Yitso Kpawo
Kpóo Ha Weintrom ní Yeee Anɔkwa Lɛ!
1, 2. Mɛni ‘shieŋtsɛ lɛ’ dũ lɛ, shi ekɛ nijiaŋwujee ba yɛ mɛɛ gbɛ nɔ?
“KƐ́ AAWIE emli wiemɔi ní ŋɔɔ waa kɛ ehesaa ní eye emuu yɛ sanegbaa ni mɔɔ shi gbɛfaŋ lɛ he lɛ, no lɛ, abɛbua ko bɛ ní kɛ enɛ yeɔ egbɔ.” Nakai ji bɔ ni Biblia mli saji ahe wielɔ ko kɛɛ beni ewieɔ Yesaia yitso 5 lɛ shishijee kukuji lɛ ahe lɛ. Yesaia wiemɔi lɛ fe ŋaa nitsumɔ ko kɛkɛ, ejaakɛ efeɔ kwɛmɔ ni jɛ suɔmɔ mli ní Yehowa yɔɔ kɛha ewebii lɛ he mfoniri ni kanyaa mɔ henumɔ waa. Yɛ nakai beaŋ nɔŋŋ lɛ, wiemɔi nɛɛ bɔɔ wɔ kɔkɔ yɛ nibii ní esaaa ehiɛ lɛ ahe.
2 Yesaia abɛbua lɛ jeɔ shishi akɛ: “Ha ni malá mishieŋtsɛ lɛ he lala, misuɔlɔ lɛ lala yɛ eweintrom lɛ he. Mishieŋtsɛ lɛ yɛ weintrom ko yɛ gɔŋkpɔ ko ní baa nii jogbaŋŋ nɔ. Ni ehu mli, ni efamɔ emli tɛi, ni etɛo wein tsei kpakpai yɛ mli, ni ema mɔɔ yɛ teŋ, ni esaa etsa weinbu hu yɛ mli; ni ehiɛ kã nɔ akɛ eeewo wein yibii, shi ewo kooŋ wein yibii.”—Yesaia 5:1, 2; okɛto Marko 12:1 he.
Weintrom lɛ Nɔkwɛmɔ
3, 4. Mɛɛ kwɛmɔ ni jɛ suɔmɔ mli akɛha weintrom lɛ?
3 Kɛji Yesaia lá abɛbua nɛɛ mli wiemɔi lɛ etsɔɔ etoibolɔi lɛ diɛŋtsɛ jio, eláaa jio, eka shi faŋŋ akɛ egbala amɛjwɛŋmɔ. Ekolɛ amɛteŋ mɛi babaoo le weintrom feemɔ nitsumɔ lɛ jogbaŋŋ, ni bɔ ni Yesaia tsɔɔ nibii amli eha lɛ mli kã shi faŋŋ ni anyɛɔ anuɔ shishi hu. Taakɛ wein dũlɔi feɔ ŋmɛnɛ lɛ, weintrom tsɛ lɛ dũuu wein yibii lɛ, shi moŋ “wein tsei kpakpai,” loo nɔ ni ‘esa’—ni ji tso nine loo tso fɔ́ ni afo kɛjɛ wein tso kroko he. Esa jogbaŋŋ akɛ efee weintrom nɛɛ “yɛ gɔŋkpɔ ko ní baa nii jogbaŋŋ nɔ,” ni ji he ko ní weintrom baaba jogbaŋŋ yɛ.
4 Ebiɔ nitsumɔ ni wa dani anyɛɔ afeɔ weintrom ní woɔ yibii. Yesaia wie weintrom tsɛ lɛ he akɛ ‘ehu mli, ni efamɔ tɛi ní yɔɔ mli lɛ’—nitsumɔ ní wa, ní yɔɔ tɔlɛ nɛ! Ekolɛ ekɛ tɛi ní dara saŋŋ lɛ ‘ma mɔɔ.’ Blema lɛ akɛ nɛkɛ mɔji nɛɛ tsuɔ nii ákɛ shidaamɔhei kɛha bulɔi ní buɔ dũmɔ nii lɛ ahe kɛjɛɔ julɔi kɛ kooloi ahe lɛ.a Agbɛnɛ hu, etswaa tɛ gbogbo kɛfoɔ weintrom lɛ kpokui lɛ anaa fɛɛ. (Yesaia 5:5) Afɔɔ enɛ feemɔ koni kɛ́ nugbɔ nɛ lɛ, ní ekafɔ́ shikpɔŋ sũ kpakpa lɛ kɛtee.
5. Mɛni nɔtsɛ lɛ kpáa gbɛ kɛjɛɔ eweintrom lɛ mli yɛ gbɛ kpakpa nɔ, shi mɛni ená?
5 Akɛni etsu nii waa kɛbu eweintrom lɛ he hewɔ lɛ, nɔtsɛ lɛ yɛ hegbɛ akɛ eeekpa gbɛ akɛ ebaawo yibii. Yɛ gbɛkpamɔ nɛɛ hewɔ lɛ, etsa weinbu yɛ mli. Shi ani nikpamɔ ní ehiɛ kã nɔ lɛ ba lɛ nakai? Dabi, weintrom lɛ wo kooŋ wein yibii.
Weintrom lɛ kɛ Enɔtsɛ Lɛ
6, 7. (a) Namɔ ji weintrom lɛ nɔtsɛ, ni mɛni ji weintrom lɛ? (b) Mɛɛ kojomɔ nɔtsɛ lɛ taoɔ ní akojo?
6 Namɔ ji nɔtsɛ lɛ, ni mɛni ji weintrom lɛ? Weintrom lɛ nɔtsɛ lɛ gbalaa jwɛŋmɔ kɛyaa sanebimɔi nɛɛ ahetooi anɔ beni lɛ diɛŋtsɛ ewieɔ lɛ, akɛ: “Agbɛnɛ, nyɛ Yerusalem bii kɛ nyɛ Yuda hii, nyɛkojoa mikɛ miweintrom lɛ teŋ! Mɛni aaasaa afee miweintrom lɛ lolo ni mifeko? Mɛɛ hewɔ mɔ ni beni mihiɛ kã nɔ akɛ ebaawo wein yibii lɛ, ni ewoɔ kooŋ wein yibii nɛɛ? Ojogbaŋŋ! agbɛnɛ mibatsɔɔ nyɛ nɔ ni mibafee miweintrom lɛ: Mibajie ehe afabaŋ lɛ, ní kooloi aye; mibakumɔ ehe gbogbo lɛ hu, ní anaanaa nɔ.”—Yesaia 5:3-5.
7 Hɛɛ, Yehowa ji weintrom lɛ nɔtsɛ, ni kɛ́ wɔɔkɛɛ lɛ, lɛ diɛŋtsɛ etee kojomɔhe lɛ, ni eebi ní akojo ekɛ eweintrom ni eha enine enyɛ shi lɛ teŋ. Belɛ, mɛni ji weintrom lɛ mɔ? Nɔtsɛ lɛ tsɔɔ mli akɛ: “Yehowa Zebaot weintrom ji Israel we lɛ, ni Yuda hii lɛ hu, eŋmɔ̃ ní esumɔɔ ni.”—Yesaia 5:7a.
8. Mɛni sa kadimɔ yɛ tsɛmɔ ní Yesaia tsɛ́ Yehowa akɛ “misuɔlɔ” lɛ he?
8 Yesaia tsɛ́ Yehowa, mɔ ni ji weintrom lɛ nɔtsɛ lɛ akɛ “misuɔlɔ.” (Yesaia 5:1) Yesaia baanyɛ awie Nyɔŋmɔ he yɛ naanyobɔɔ gbɛ ní tamɔ nɛkɛ nɔ ejaakɛ ekɛ Lɛ yɛ wekukpaa ní bɛŋkɛ kpaakpa. (Okɛto Hiob 29:4; Lala 25:14 he.) Shi kɛlɛ, suɔmɔ ní gbalɔ lɛ yɔɔ kɛha Nyɔŋmɔ lɛ bafeɔ bibioo kwraa kɛ́ akɛto suɔmɔ ní Nyɔŋmɔ ejie kpo etsɔɔ ‘eweintrom’—ni ji maŋ ní ‘edũ’ lɛ he lɛ.—Okɛto 2 Mose 15:17; Lala 80:9, 10 he.
9. Yehowa ekwɛ emaŋ lɛ, tamɔ weintrom ní jara wa yɛ mɛɛ gbɛ nɔ?
9 Yehowa ‘dũ’ emaŋ lɛ yɛ Kanaan shikpɔŋ lɛ nɔ ni ekɛ emlai kɛ ekpɔi lɛ ha amɛ, ni enɛ bafee tamɔ gbogbo ní bu amɛhe kɛjɛ jeŋmaji krokomɛi lɛ ahe koni amɛkawo amɛhe muji. (2 Mose 19:5, 6; Lala 147:19, 20; Efesobii 2:14) Kɛfata he lɛ, Yehowa ha amɛ kojolɔi, osɔfoi, kɛ gbalɔi koni amɛtsɔɔ amɛ nii. (2 Maŋtsɛmɛi 17:13; Maleaki 2:7; Bɔfoi lɛ Asaji 13:20) Beni akɛ asraafoi atutuamɔ wo Israel he gbeyei lɛ, Yehowa tée kpɔlɔi ashi eha amɛ. (Hebribii 11:32, 33) Yehowa kɛ yiŋtoo kpakpa bi akɛ: “Mɛni aaasaa afee miweintrom lɛ lolo ni mifeko [momo]?”
Nyɔŋmɔ Weintrom lɛ Yɔsemɔ Ŋmɛnɛ
10. Mɛɛ abɛbua ní kɔɔ weintrom he Yesu kɛha?
10 Ekolɛ Yesaia wiemɔi lɛ ji nɔ ni yɔɔ Yesu jwɛŋmɔ mli beni ekɛ hulɔi gbɔmɔgbelɔi lɛ ahe abɛbua lɛ ha lɛ, akɛ: “Shiatsɛ ko yɛ, ni efee weintrom, ni efo afabaŋ ewo he kɛkpe, ni etsa weinbu yɛ mli, ni etswa mɔɔ yɛ mli; ni ekɛha hulɔi apaayeli; ni edom.” Dɔlɛ sane ji akɛ, hulɔi lɛ kpá yɛ weintrom tsɛ lɛ sɛɛ, ni amɛgbe ebinuu lɛ po. Yesu tee nɔ etsɔɔ akɛ abɛbua nɛɛ tsɔɔ babaoo fe heloonaa Israel ní ekɔɔ ehe lɛ kɛkɛ, ni ekɛɛ akɛ: “Abaashɔ̃ Nyɔŋmɔ maŋtsɛyeli lɛ yɛ [nyɛ heloonaa Israel dɛŋ], ni aaaŋɔha jeŋmaŋ ko ní woɔ yibii.”—Mateo 21:33-41, 43.
11. Mɛɛ mumɔŋ weintrom ko hi shi yɛ klɛŋklɛŋ afii oha lɛ mli, shi mɛni ba yɛ bɔfoi lɛ agbele sɛɛ?
11 Nakai “jeŋmaŋ” hee lɛ bafee “Nyɔŋmɔ Israel”—ni ji Kristofoi ní afɔ amɛ mu lɛ amumɔŋ maŋ ní amɛyifalɛ feɔ 144,000 lɛ. (Galatabii 6:16; 1 Petro 2:9, 10; Kpojiemɔ 7:3, 4) Yesu kɛ kaselɔi nɛɛ to “niji” ni yɔɔ “anɔkwa wein tso,” ni ji lɛ diɛŋtsɛ ehe lɛ he. Eja gbɛ akɛ aaakpa gbɛ akɛ niji nɛɛ baawo yibii. (Yohane 15:1-5) Esa akɛ amɛjie sui ní tamɔ Kristo nɔ̃ lɛ akpo ní amɛkɛ amɛhe awo nitsumɔ ni ji “maŋtsɛyeli lɛ he sanekpakpa nɛɛ” shiɛmɔ mli. (Mateo 24:14; Galatabii 5:22, 23) Shi kɛjɛ be mli ni bɔfoi nyɔŋma kɛ enyɔ lɛ gboi kɛbaa nɛɛ, mɛi ní kɛɔ akɛ amɛji “anɔkwa wein tso” lɛ niji lɛ ateŋ mɛi babaoo diɛŋtsɛ ejie amɛhe kpo akɛ apasa niji—ni amɛwoɔ kooŋ wein yibii moŋ yɛ yibii kpakpai anajiaŋ.—Mateo 13:24-30, 38, 39.
12. Yesaia wiemɔi lɛ buɔ Kristendom fɔ́ yɛ mɛɛ gbɛ nɔ, ni mɛɛ nikasemɔ yɔɔ mli kɛha anɔkwa Kristofoi?
12 No hewɔ lɛ, bɔ ni Yesaia bu Yuda fɔ́ lɛ kɔɔ Kristendom he ŋmɛnɛ. Eyinɔsane mlipɛimɔ—etai, etai krɔŋkrɔŋi, e-Yiwalɛ Niseniianiifeemɔi lɛ—jieɔ bɔ ni eyibii lɛ joɔ ha lɛ kpo diɛŋtsɛ! Shi kɛlɛ, esa akɛ anɔkwa weintrom ni ji Kristofoi ní afɔ amɛ mu lɛ kɛ amɛhefatalɔi “asafo babaoo” lɛ abo Yesaia wiemɔi lɛ atoi. (Kpojiemɔ 7:9) Kɛ́ amɛmiitao amɛsa weintrom tsɛ lɛ hiɛ lɛ, no lɛ esa akɛ amɛwo yibii ni saa ehiɛ, ákɛ aŋkroaŋkroi, kɛ agbɛnɛ hu, ákɛ kuu.
“Kooŋ Wein Yibii”
13. Mɛni Yehowa baafee eweintrom lɛ yɛ yibii gbohii ní ewo lɛ hewɔ?
13 Akɛni egbo deŋme babaoo ní ekɛkwra eweintrom lɛ ní ekɛsaa mli jogbaŋŋ hewɔ lɛ, Yehowa kpáa gbɛ yɛ gbɛ ni ja nɔ akɛ eeetsɔ “weintrom fɛfɛo.” (Yesaia 27:2) Shi, yɛ nɔ najiaŋ ní eeewo yibii ní ayeɔ lɛ, ewo “kooŋ wein yibii,” loo kɛ́ aaawie he tɛ̃ɛ lɛ, “nibii ni jeɔ fũ” loo “yibii ní esha (ekpɔtɔ).” (Yesaia 5:2; NW shishigbɛ niŋmaa; Yeremia 2:21) No hewɔ lɛ, Yehowa jaje akɛ ebaajie “afabaŋ” ní efo ewo maŋ lɛ he ní ekɛbuɔ he lɛ. Maŋ lɛ ‘baafee butuu,’ ni ebaatsɔ amaŋfɔ kɛ he ni nugbɔ enɛɛɛ yɛ. (Kanemɔ Yesaia 5:6.) Mose ebɔ amɛ kɔkɔ momo akɛ kɛ́ amɛku Nyɔŋmɔ Mla lɛ mli lɛ, nɛkɛ nibii nɛɛ baaba amɛnɔ.—5 Mose 11:17; 28:63, 64; 29:21, 22.
14. Mɛɛ yibii Yehowa kpaa gbɛ kɛjɛɔ emaŋ lɛ dɛŋ, shi mɛɛ yibii moŋ ewo yɛ no najiaŋ?
14 Nyɔŋmɔ miikpa gbɛ akɛ maŋ lɛ baawo yibii kpakpai. Mika, ní hi shi yɛ Yesaia beaŋ lɛ jaje akɛ: “Ájaje nɔ ni hi kɛ nɔ ni Yehowa biɔ yɛ odɛŋ atsɔɔo: no ji akɛ ofee nɔ ni ja gbɛ, ni osumɔ ejurɔfeemɔ, ni okɛ o-Nyɔŋmɔ lɛ anyiɛ yɛ heshibaa mli.” (Mika 6:8; Zakaria 7:9) Shi kɛlɛ, maŋ lɛ booo Yehowa ŋaawoo lɛ toi. “[Nyɔŋmɔ kwɛ] kojomɔ gbɛ, ni naa, amimyeli yɔɔ; ekwɛ jalɛ gbɛ, ni naa, yaafó yɔɔ!” (Yesaia 5:7b) Mose gba efɔ̃ shi akɛ maŋ ní yeee anɔkwa lɛ baawo wein yibii ní ebɔɔ yɔɔ mli kɛjɛ “Sodom wein tso” lɛ mli. (5 Mose 32:32) Belɛ, eeenyɛ efee akɛ bɔlɛnamɔ mli jeŋba shara, ní hii ní kɛ hii náa bɔlɛ lɛ fata he lɛ, ji amɛhe ní amɛtsi kɛjɛ Nyɔŋmɔ Mla lɛ he lɛ fã. (3 Mose 18:22) Abaanyɛ atsɔɔ wiemɔ “amimyeli” lɛ hu shishi akɛ “lá fɔsemɔ kɛ shishwiemɔ.” Ŋwanejee ko bɛ he akɛ yiwalɛ nifeemɔ ní tamɔ nɛkɛ kɛ mɛi ni afeɔ amɛ efɔŋ lɛ ‘ayaafo’ ba—yaafo ní yashɛ weintrom lɛ Dũlɔ lɛ toiiaŋ tɔ̃ɔ lɛ.—Okɛto Hiob 34:28 he.
15, 16. Anɔkwa Kristofoi baanyɛ akwa yibii gbohii ní Israel wo lɛ yɛ mɛɛ gbɛ nɔ?
15 Yehowa Nyɔŋmɔ “[sumɔɔ] jalɛ kɛ jalɛsaneyeli.” (Lala 33:5) Ewo Yudafoi lɛ kita akɛ: “Nyɛkayea kutumpɔo yɛ kojomɔ mli: kaakwɛ ohiafo hiɛ, ni ohiɛ akashwie gbɔmɔ agbo hu hiɛaŋ; jalɛ naa okojo onaanyo gbɔmɔ.” (3 Mose 19:15) No hewɔ lɛ, esa akɛ wɔkwá hiɛaŋkwɛmɔ yɛ bɔ ni wɔkɛ mɛi krokomɛi yeɔ haa lɛ mli, ní wɔkaŋmɛ gbɛ ní nibii tamɔ hewolonɔ su, afii abɔ ní mɔ lɛ eye, heloonaa ninamɔ, loo ohia miiná bɔ ni wɔkojoɔ gbɔmɛi wɔhaa lɛ nɔ hewalɛ. (Yakobo 2:1-4) Ehe miihia ní mɛi ni sɔmɔɔ yɛ nɔkwɛmɔ gbɛhei amli lɛ titri ‘akafee nɔ ko yɛ niiaŋkpamɔ naa,’ ní be fɛɛ be lɛ, amɛtao akɛ amɛaabo fãi enyɔ ní sane lɛ kɔɔ amɛhe lɛ fɛɛ toi dani amɛkojo.—1 Timoteo 5:21; Abɛi 18:13.
16 Kɛfata he lɛ, ebaafee mlɛo kɛha Kristofoi akɛ amɛaajie subaŋ gbonyo loo atuatsemɔ su kpo yɛ Nyɔŋmɔ shishitoo mlai ahe akɛni wɔyɛ mlakwamɔ jeŋ mli lɛ hewɔ. Shi esa akɛ anɔkwa Kristofoi afee klalo akɛ ‘amɛaabo’ Nyɔŋmɔ mlai ‘atoi.’ (Yakobo 3:17) Yɛ bɔlɛnamɔ mli jeŋba shara kɛ yiwalɛ nifeemɔi ní yaa nɔ yɛ “jeŋ fɔŋ ni yɔɔ ŋmɛnɛŋmɛnɛ nɛɛ mli” lɛ fɛɛ sɛɛ lɛ, esa akɛ ‘amɛkwɛ bɔ ni amɛaafee ní amɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi.’ (Galatabii 1:4; Efesobii 5:15) Esa akɛ amɛkpoo bɔlɛnamɔ he susumɔi ní ŋmɛɔ nɔ fɛɛ nɔ feemɔ gbɛ lɛ, ni kɛ́ naataamɔi te shi lɛ, amɛtsu he nii, shi jeee kɛ “mlijoomɔ kɛ mlila kɛ mlifu kɛ bolɔmɔ kɛ musubɔɔ.” (Efesobii 4:31) Yɛ jalɛ shihilɛ ní amɛkɔɔ lɛ hewɔ lɛ, anɔkwa Kristofoi woɔ Nyɔŋmɔ hiɛ nyam ni amɛnáa ehiɛ duromɔ.
Nɔ ni Jɛɔ Hiɛjoomɔ Mli Baa
17. Mɛɛ jeŋba gbonyo abu lɛ fɔ́ yɛ Yesaia klɛŋklɛŋ kpóo lɛ mli?
17 Yesaia tsɛɛɛ Yehowa wiemɔi asɛɛ dɔŋŋ yɛ kuku 8 lɛ mli. Beni ebuɔ “kooŋ wein yibii” ní awo yɛ Yuda lɛ ekomɛi fɔ́ lɛ, lɛ diɛŋtsɛ ejaje kpóo srɔtoi ekpaa lɛ ateŋ klɛŋklɛŋ nɔ̃ lɛ akɛ: “Kpóo ha mɛi ni ŋɔɔ tsũ tsáa tsũ nɔ, kɛ mɛi ni ŋɔɔ ŋmɔ̃ fataa ŋmɔ̃ he, kɛyashi beyinɔ ní gbɛ bɛ dɔŋŋ, ní nyɛ kɛkɛ nyɛhiɔ shikpɔŋ lɛ teŋ lɛ! Yehowa Zebaot kɛɛ yɛ mitoiiaŋ akɛ: Lɛɛlɛŋ ákɛ tsũi pii aaatsɔmɔ amaŋfɔ, tsũi ni dara ní amɛyɔɔ fɛo po náŋ mɔ ko ahi amɛmli! Shi weintrom ní dalɛ shɛɔ tsinai ntai nyɔŋma humɔ aaaha wein bat kome pɛ, ni kɛ́ adũ nii homer kome lɛ, efa kome pɛ abaaná.”—Yesaia 5:8-10.
18, 19. Yesaia yinɔbii lɛ kũ amɛhiɛ amɛfɔ̃ Yehowa mlai ní kɔɔ gboshinii ahe lɛ nɔ yɛ mɛɛ gbɛ nɔ, ni mɛni baajɛ mli aba aha amɛ?
18 Yɛ blema Israel lɛ, Yehowa ji mɔ ni shikpɔŋ tso muu lɛ fɛɛ batsɔɔ enɔ. Weku fɛɛ weku yɛ gboshinii ní Nyɔŋmɔ kɛha amɛ, ni amɛbaanyɛ amɛkɛma loo amɛkɛfa, shi amɛnyɛŋ amɛhɔ̃ɔ “kwrakwra.” (3 Mose 25:23) Nɛkɛ mla nɛɛ tsĩ nibii fɔji komɛi anaa, tamɔ tsũi kɛ shikpɔji ní aaatsɔ mɔ kome pɛ nɔ̃ lɛ nɛkɛ. Ebu wekui ahe hu koni amɛkabote ohia mli vii fe nine. Shi kɛlɛ, mɛi komɛi yɛ Yuda ní kɛ hiɛjoomɔ kuɔ Nyɔŋmɔ mlai ní kɔɔ gboshinii ahe lɛ mli. Mika ŋma akɛ: “Amɛhiɛ kɔ̃ɔ abɔɔi anɔ, ni amɛshɔ̃ɔ, kɛ shiai, ni amɛŋɔɔ; ni amɛyeɔ mɔ kɛ ewe kɛ mɔ kɛ egboshinii amim.” (Mika 2:2) Shi Abɛi 20:21 lɛ bɔɔ kɔkɔ akɛ: “Gboshinii ní aha gidigidi yɛ shishijee mli lɛ, enaagbee lɛ, jɔɔmɔ baŋ nɔ.”
19 Yehowa wo shi akɛ ebaahe nɛkɛ hiɛjoolɔi nɛɛ anii ní amɛná yɛ gbɛ fɔŋ nɔ nɛɛ kɛjɛ amɛdɛŋ. Shiai ní amɛshɔ̃ yɛ mɛi adɛŋ lɛ “náŋ mɔ ko ahi amɛmli.” Shikpɔji ní amɛkɛ hiɛkɔ̃ɔ ehe lɛ baawo yibii ni kulɛ amɛbaanyɛ amɛwo lɛ mlijaa bibioo ko pɛ. Atsɔɔɔ gbɛ pɔtɛɛ ní loomɔ nɛɛ aaatsɔ nɔ aba, kɛ be mli ni ebaaba hu. Eeenyɛ efee akɛ, kɛ́ hoo lɛ, ekɔɔ shihilɛi ní Babilon nomŋɔɔ ni baaba yɛ sɛɛ mli lɛ kɛbaaba amɛnɔ lɛ he.—Yesaia 27:10.
20. Kristofoi ni yɔɔ ŋmɛnɛ lɛ baanyɛ akwa hiɛjoomɔ su ní mɛi komɛi jie lɛ kpo yɛ Israel lɛ yɛ mɛɛ gbɛ nɔ?
20 Esa akɛ Kristofoi ni yɔɔ ŋmɛnɛ lɛ ahi hiɛjoomɔ kpele ni tamɔ nɔ ni Israelbii lɛ ekomɛi jie lɛ kpo yɛ nakai beaŋ lɛ kwraa. (Abɛi 27:20) Kɛ́ heloonaa nii bafee nibii ni he hiaa fe nine lɛ, ehaa efeɔ mlɛo akɛ mɔ aaaŋmɛɛ ehe eha gbɛ̀i fɔji ní atsɔɔ nɔ anáa shika lɛ. Abaanyɛ alaka mɔ awo nitsumɔi amli ŋaa gbɛ̀i fɔji kɛ nifeemɔi ní asusuɔ akɛ ehaa anáa nii oya, ní nilee bɛ mli lɛ amli yɛ gbɛ ni waaa kwraa nɔ. “Mɔ ni yeɔ oyai aná nii lɛ, eyeŋ ehe.” (Abɛi 28:20) Belɛ, kwɛ bɔ ni ehe hiaa ní wɔmii ashɛ nɔ ni wɔyɔɔ lɛ he!—1 Timoteo 6:8.
Hiɛtserɛjiemɔ ní Esaaa He Tsɔne Lɛ
21. Mɛɛ eshai abuɔ lɛ fɔ́ yɛ Yesaia kpóo ni ji enyɔ lɛ mli?
21 Nɔ ni nyiɛ sɛɛ ji Yesaia kpóo ni ji enyɔ lɛ: “Kpóo ha mɛi ni teɔ shi maŋkɛ̃ mra, ní amɛyanyiɛɔ dãa ni wa sɛɛ, mɛi ni taraa shi kɛyashiɔ jenamɔ yi waa ní wein hãa amɛhiɛ woɔ la, ní amɛhiɛɔ saŋku kɛ obeŋta kɛ milɛ̃ kɛ bɛlɛ kɛ wein yɛ amɛkpɔ̃lɔi lɛ ahe, shi Yehowa nifeemɔ lɛ, amɛkwɛɛɛ, ni eninenaa nitsumɔ hu amɛnaaa!”—Yesaia 5:11, 12.
22. Mɛɛ henɔyeli ní bɛ ajie lɛ kpo yɛ Israel, ni mɛni baajɛ mli aba kɛha maŋ lɛ?
22 “Miishɛɛ Nyɔŋmɔ” ji Yehowa, ni etsuji ahiɛtserɛjiemɔ ní nilee yɔɔ mli lɛ edɔɔɔ lɛ. (1 Timoteo 1:11, NW) Shi kɛlɛ, nɛkɛ miishɛɛ-taolɔi nɛɛ tekeɔ husui fɛɛ! Biblia lɛ kɛɔ akɛ: “Mɛi ni tɔrɔɔ dãa lɛ, nyɔɔŋ amɛtɔrɔɔ.” (1 Tesalonikabii 5:7) Shi gbalɛ lɛ mli dãatɔlɔi lɛ jeɔ amɛdãatɔɔ shɛii lɛ shishi kɛjɛɔ leebi maaŋkpa ni amɛkãa he amɛnuɔ aahu kɛyashiɔ jenamɔ! Amɛfeɔ amɛnii tamɔ nɔ ni Nyɔŋmɔ bɛ, tamɔ nɔ ni ehaŋ amɛbu amɛnifeemɔi lɛ ahe akɔntaa. Yesaia gba wɔsɛɛ be fɔŋ efɔ̃ shi eha gbɔmɛi ní tamɔ nɛkɛ. “Aaaŋɔ mimaŋ lɛ nom ní amɛleee; ni hɔmɔ aaagbe enunyam gbɔmɛi lɛ, ni esafo yuu lɛ hu aaaŋãlã kɛ kumai.” (Yesaia 5:13) Akɛni amɛsumɔɔɔ ní amɛfee amɛnii yɛ anɔkwa nilee naa hewɔ lɛ, Nyɔŋmɔ webii ní ekɛfee kpaŋmɔ—mɛi ni nɔ kwɔlɔ kɛ mɛi ní baa shi lɛ—baaya Sheol.—Kanemɔ Yesaia 5:14-17.
23, 24. Mɛɛ henɔyeli kɛ hiɛshikamɔ abiɔ ní Kristofoi ajie lɛ kpo?
23 “Shwɛmɔ fɔŋ,” loo “hoofeemɔ okpɔlɔŋmɛɛi” hu ji naagba ko ni hi shi yɛ klɛŋklɛŋ afii oha lɛ mli Kristofoi lɛ ekomɛi ateŋ. (Galatabii 5:21; Byington; 2 Petro 2:13) No hewɔ lɛ ebɛ naakpɛɛ akɛ Kristofoi ní ejɔɔ amɛhe nɔ ŋmɛnɛ lɛ ateŋ mɛi komɛi kɛ sɛɛyoomɔ tsuuu nii yɛ hiɛtserɛjiemɔ henaabuamɔi agbɛfaŋ. Hiɛshikamɔ ní akɛtsuuu nii yɛ dãa ní wa numɔ mli lɛ haa mɛi komɛi bolɔɔ ni amɛfeɔ hoo kɛ basabasa. (Abɛi 20:1) Mɛi komɛi kɛ amɛhe ewo jeŋba shara mli po yɛ dãa ní wa ní amɛnu babaoo tsɔ lɛ hewɔ, ni aŋmɛ gbɛ ni henaabuamɔi komɛi etee nɔ aahu nyɔɔŋ nyɔɔŋ fɛɛ, ni étsĩ Kristofoi anitsumɔi komɛi ní esa akɛ atsu enɔ jetsɛremɔ lɛ anaa.
24 Shi, Kristofoi ní ŋmɛɔ pɛpɛɛpɛ lɛ woɔ Nyɔŋmɔ gbeyeishemɔ sui kpakpai ni amɛkɛ henɔyeli kɛ hiɛshikamɔ tsuɔ nii yɛ hiɛtserɛjiemɔ ní amɛhalaa lɛ mli. Amɛboɔ Paulo ŋaawoo ni anaa yɛ Romabii 13:13 lɛ toi, akɛ: “Nyɛhaa wɔbaa wɔjeŋ fɛfɛo bɔ ni sa shwane, jeee yɛ yakayaka shwɛmɔ kɛ dãatɔɔ mli.”
Ní Aaanyɛ Esha ní Asumɔ Anɔkwale
25, 26. Mɛɛ Israelbii lɛ asusumɔ fɔŋ Yesaia kpá he mama yɛ ekpóo ni ji etɛ kɛ ejwɛ lɛ amli?
25 Agbɛnɛ bó Yesaia kpóo ni ji etɛ kɛ ejwɛ lɛ atoi: “Kpóo ha mɛi ni kɛ amale kpãai gbalaa nɔ̃ sha ni amɛkɛ shwiili he taŋkpeei hu gbalaa esha lɛ, mɛi ni kɛɔ akɛ: Ha ni ehe afee oyá ní etsu enitsumɔ lɛ mramra ní wɔkwɛ! Ha ní Israel Mɔ krɔŋkrɔŋ lɛ ajina lɛ abɛŋkɛ ni eba, koni wɔle lɛ! Kpóo ha mɛi ni tsɛɔ efɔŋ akɛ ekpakpa kɛ ekpakpa hu akɛ efɔŋ! mɛi ni ŋɔɔ duŋ feɔ la, ní amɛŋɔɔ la hu amɛfeɔ duŋ, mɛi ni ŋɔɔ joomɔ feɔ ŋɔɔmɔ, ní amɛŋɔɔ ŋɔɔmɔ amɛfeɔ joomɔ lɛ!”—Yesaia 5:18-20.
26 Kwɛ bɔ ni enɛ feɔ mɛi ní feɔ esha lɛ ahe mfoniri ní mli kã shi faŋŋ hã! Amɛkpɛtɛ esha he tamɔ bɔ ni akɛ kooloi ní gbalaa jatsu lɛ fimɔɔ shwiilii lɛ. Eshafeelɔi nɛɛ sheee kojomɔ gbi ko ni baa gbeyei. Amɛkɛ hefɛoyeli kɛɔ akɛ: “[Nyɔŋmɔ atsu] enitsumɔ lɛ mramra!” Yɛ nɔ najiaŋ ní amɛaaba amɛhe shi amɛha Nyɔŋmɔ Mla lɛ, amɛtsɔmɔɔ nibii, ni amɛtsɛɔ “efɔŋ akɛ ekpakpa kɛ ekpakpa hu akɛ efɔŋ.”—Okɛto Yeremia 6:15; 2 Petro 3:3-7 he.
27. Kristofoi ni yɔɔ ŋmɛnɛ lɛ baanyɛ akwa su ni tamɔ Israelbii lɛ anɔ̃ lɛ yɛ mɛɛ gbɛ nɔ?
27 Esa akɛ Kristofoi ni yɔɔ ŋmɛnɛ lɛ akwa su ní tamɔ nɛkɛ yɛ gbɛ fɛɛ gbɛ nɔ. Ákɛ nɔkwɛmɔnɔ lɛ, amɛkpɛlɛɛɛ bɔ ni je lɛ susuɔ ajwamaŋbɔɔ kɛ hii ní kɛ hii feɔ yakayakanii lɛ he ehaa lɛ nɔ akɛ esa. (Efesobii 4:18, 19) Eji anɔkwale akɛ, Kristofonyo ko baanyɛ ekɛ ehe awo ‘nɔtɔmɔ ko’ ní baanyɛ eha eyafee esha ní hiɛdɔɔ yɔɔ mli lɛ mli. (Galatabii 6:1) Onukpai ni yɔɔ asafo lɛ mli lɛ efee klalo akɛ amɛaaye amɛbua mɛi ní egbee shi ní yelikɛbuamɔ he hiaa amɛ lɛ. (Yakobo 5:14, 15) Anyɛɔ anáa mumɔŋ hewalɛ ekoŋŋ, kɛtsɔ sɔlemɔ kɛ ŋaawoo ní damɔ Biblia nɔ lɛ nɔ. Kɛ́ jeee nakai lɛ, oshara yɛ ákɛ mɔ lɛ baanyɛ atsɔ “esha lɛ nyɔŋ.” (Yohane 8:34) Yɛ nɔ najiaŋ ní amɛaaye Nyɔŋmɔ he fɛo ní amɛhiɛ aaakpa kojomɔ gbi ní baa lɛ nɔ lɛ, Kristofoi bɔɔ mɔdɛŋ ní amɛhi shi “ní muji loo kpa ko bɛ [amɛhe]” yɛ Yehowa hiɛ.—2 Petro 3:14; Galatabii 6:7, 8.
28. Mɛɛ eshai abuɔ lɛ fɔ́ yɛ Yesaia naagbee kpóo lɛ mli, ni Kristofoi baanyɛ akwa eshai ni tamɔ nɛkɛ ŋmɛnɛ yɛ mɛɛ gbɛ nɔ?
28 Esa jogbaŋŋ akɛ Yesaia kɛ naagbee kpóo nɛɛ fataa he akɛ: “Kpóo ha mɛi ni buɔ amɛhe nilelɔi, kɛ mɛi ni amɛtsɛɔ amɛhe hiɛtɛ̃lɔi lɛ! Kpóo ha mɛi ni feɔ ekãa kɛ weinnumɔ, ní amɛhe waa amɛ kɛ dãa ní wa futumɔ; mɛi ni buɔ efɔŋfeelɔ bem yɛ nyɔɔŋnii ahewɔ, ní amɛshɔ̃ɔ jalɔi ajalɛ yɛ amɛdɛŋ lɛ!” (Yesaia 5:21-23) Eka shi faŋŋ akɛ mɛi ní sɔmɔɔ ákɛ kojolɔi yɛ shikpɔŋ lɛ nɔ lɛ ji mɛi ní akɛwie wiemɔi nɛɛ. Asafoŋ onukpai ní yɔɔ ŋmɛnɛ lɛ kwɛɔ koni amɛkafee tamɔ “mɛi ni buɔ amɛhe nilelɔi.” Amɛkɛ heshibaa kpɛlɛɔ ŋaawoo ni jɛɔ amɛnanemɛi onukpai aŋɔɔ lɛ nɔ, ni amɛnyiɛɔ asafoŋ gbɛtsɔɔmɔi asɛɛ pɛpɛɛpɛ. (Abɛi 1:5; 1 Korintobii 14:33) Amɛkɛ hiɛshikamɔ tsuɔ nii yɛ amɛdãanumɔ mli, ni amɛnuuu dãa ní wa kɛji akɛ amɛyaatsu asafoŋ gbɛnaa nii ahe nii. (Hoshea 4:11) Onukpai lɛ kwɛɔ hu koni amɛkaha efee tamɔ nɔ ni amɛjieɔ hiɛaŋkwɛmɔ kpo po. (Yakobo 2:9) Kwɛ bɔ ni esoro amɛ kwraa yɛ Kristendom osɔfoi lɛ ahe! Mɛnɛɛmɛi ateŋ mɛi babaoo buɔ eshafeelɔi ní ehé gbɛi kɛ niiatsɛmɛi ní yɔɔ amɛteŋ lɛ bem, ni amɛkɛ enɛ feemɔ teɔ shi amɛwoɔ bɔfo Paulo kɔkɔbɔi ni yɔɔ Romabii 1:18, 26, 27; 1 Korintobii 6:9, 10; kɛ Efesobii 5:3-5 lɛ.
29. Mɛɛ naagbee ni yɔɔ oshara mɛɔ Yehowa weintrom ni ji Israelbii lɛ?
29 Yesaia mu nɛkɛ gbalɛ shɛɛ sane nɛɛ naa kɛtsɔ bɔ ni ewie mɛi ní “amɛkwa Yehowa Zebaot mla lɛ,” ní amɛwooo jalɛ yibii lɛ anaagbee ní baafee oshara lɛ he eha lɛ nɔ. (Yesaia 5:24, 25; Hoshea 9:16; Maleaki 4:1) Ejajeɔ akɛ: “[Yehowa aaashi] aflaŋaa etsɔɔ jeŋmaji ni yɔɔ shɔŋŋ lɛ, ni eeekpã bɛlɛ etsɛ amɛ kɛaajɛ shikpɔŋ lɛ naagbeehei lɛ: Ni naa, amɛhe aaafee oyá kɛaaba mramra!”—Yesaia 5:26; 5 Mose 28:49; Yeremia 5:15.
30. Namɔ baabua ‘jeŋmaŋ kpeteŋkpele‘ ko naa kɛte shi ewo Yehowa webii lɛ, ni mɛni baajɛ mli aba?
30 Blema lɛ, tso kakadaŋŋ ní akɛma he ko ní kwɔ lɛ nyɛɔ etsuɔ nii ákɛ “aflaŋaa,” loo henaabuamɔhe, kɛha gbɔmɛi loo asraafoi. (Okɛto Yesaia 18:3; Yeremia 51:27 he.) Agbɛnɛ Yehowa diɛŋtsɛ baabua nɛkɛ ‘jeŋmaŋ kpeteŋkpele’ ni etsĩii egbɛi tã nɛɛ naa koni ekɛtsu ekojomɔ he nii.b ‘Eeekpã lɛ bɛlɛ,’ ni tsɔɔ akɛ, ebaagbala ejwɛŋmɔ kɛba ewebii ní egbá afã lɛ anɔ ákɛ mɛi ni sa akɛ aye amɛnɔ kunim. No sɛɛ lɛ, gbalɔ lɛ tsɔɔ tutuamɔ ní yɔɔ oya kɛ gbeyei, ní nɛkɛ kunimyelɔi ní tamɔ jatai ní ‘aaamɔ amɛmilɛloo,’ ni ji Nyɔŋmɔ maŋ lɛ, “ni amɛaawo kɛaatee” nomŋɔɔ mli nɛɛ kɛaaba lɛ mli. (Kanemɔ Yesaia 5:27-30a.) Ni kwɛ shihilɛ ní yɔɔ mɔbɔ ní aaajɛ mli aba Yehowa webii ashikpɔŋ lɛ nɔ! “Kɛ́ akwɛ shikpɔŋ lɛ, naa, duŋ kɛ awerɛho sɔŋŋ, ni la hu aaawo duŋ yɛ eblɔtui lɛ amli.”—Yesaia 5:30b.
31. Anɔkwa Kristofoi baanyɛ atsi amɛhe kɛjɛ toigbalamɔ ní akɛba Yehowa weintrom ni ji Israelbii lɛ anɔ lɛ he yɛ mɛɛ gbɛ nɔ?
31 Hɛɛ, weintrom ní Nyɔŋmɔ jɛ suɔmɔ mli edũ lɛ ejie ehe kpo akɛ ewooo yibii—nɔ ni sa lɛ pɛ ji hiɛkpatamɔ. Kwɛ nikasemɔ ní mli wa ní Yesaia wiemɔi lɛ yɔɔ kɛha mɛi fɛɛ ní baasɔmɔ Yehowa ŋmɛnɛ lɛ! Eba akɛ amɛaabɔ mɔdɛŋ ní amɛwo jalɛ yibii pɛ, kɛjie Yehowa yi ní efee yiwalaheremɔ kɛha amɛ diɛŋtsɛ hu!
[Shishigbɛ niŋmai]
a Woloŋlelɔi komɛi heɔ yeɔ akɛ akɛ tsũi ni amɛmaa waaa, ni sɛɛ etsɛɛɛ, tamɔ agbai, loo asesei fɔɔ nitsumɔ fe tɛ mɔji. (Yesaia 1:8) Mɔɔ ní yɔɔ ŋmɔ lɛ mli lɛ tsɔɔ akɛ nɔtsɛ lɛ kɛ mɔdɛŋbɔɔ babaoo diɛŋtsɛ etsu ‘eweintrom’ lɛ he nii.
b Yesaia wie Babilon he ákɛ jeŋmaŋ ní baatsu Yehowa kojomɔ ni kpataa nii ahiɛ lɛ he nii yɛ Yuda nɔ lɛ, yɛ gbalɛi krokomɛi amli.
[Mfoniri ni yɔɔ baafa 83]
Eshafeelɔ kpɛtɛɔ esha he tamɔ bɔ ni akɛ kooloo ní gbalaa jatsu fiɔ shwiili lɛ
[Baafa muu mfoniri ni yɔɔ baafa 85]