“Nyɔŋmɔ Israel” kɛ “Asafo Babaoo” Lɛ
“Mikwɛ, ni naa, asafo babaoo ni mɔ ko mɔ ko nyɛŋ akane.” —KPOJIEMƆ 7:9.
1-3. (a) Mɛɛ ŋwɛi gbɛkpamɔi ni yɔɔ nyam Kristofoi ni afɔ amɛ mu lɛ yɔɔ? (b) Mɛɛ gbɛ nɔ Satan tsɔ ebɔ mɔdɛŋ akɛ eeekpata klɛŋklɛŋ afii oha lɛ mli asafo lɛ hiɛ? (d) Mɛni ba yɛ 1919 ni tsɔɔ akɛ mɔdɛŋ ni Satan bɔ akɛ eeefite Kristofoi ni afɔ amɛ mu lɛ asafo lɛ efee efolo?
“NYƆŊMƆ Israel lɛ” shishitoo yɛ afi 33 Ŋ.B. lɛ fee nifeemɔ titri ko yɛ Yehowa yiŋtoi ahe nitsumɔ mli. (Galatabii 6:16) Emli bii ni afɔ amɛ mu lɛ yɛ hiɛnɔkamɔ akɛ amɛaafee mumɔŋ bɔɔ nii ni gbooo, ni amɛkɛ Kristo baaye nɔ yɛ Nyɔŋmɔ ŋwɛi Maŋtsɛyeli lɛ mli. (1 Korintobii 15:50, 53, 54) Nakai gbɛhe ni amɛyɔɔ mli lɛ haa amɛnaa gbɛfaŋnɔ titri yɛ Yehowa gbɛi lɛ hetsemɔ kɛ Henyɛlɔ kpeteŋkpele, Satan Abonsam yitso jwaramɔ lɛ mli. (1 Mose 3:15; Romabii 16:20) Ebɛ naakpɛɛ akɛ Satan fee nɔ fɛɛ nɔ ni eeenyɛ ni ekɛkpata nɛkɛ asafo hee nɛɛ hiɛ, kɛtsɔ yiwaa ni ekɛba enɔ lɛ kɛ ka ni eka akɛ eeefite lɛ lɛ fɛɛ nɔ!—2 Timoteo 2:18; Yuda 4; Kpojiemɔ 2:10.
2 Beni bɔfoi lɛ yɔɔ wala mli lɛ, Satan nyɛɛɛ aye omanye. Shi, yɛ amɛgbele sɛɛ lɛ, hemɔkɛyeli kwamɔ gbɛ eshwa ni anyɛɛɛ atsi naa. Yɛ naagbee lɛ, yɛ adesai ahiɛ lɛ, ebafee tamɔ nɔ ni afite Kristofoi asafo krɔŋŋ ni Yesu to shishi lɛ kwraa beni Satan to hemɔkɛyeli kwamɔ jamɔ gbɛjianɔtoo fɔŋ ni ale ŋmɛnɛ akɛ Kristendom lɛ shishi lɛ. (2 Tesalonikabii 2:3-8) Shi kɛlɛ, anɔkwa Kristojamɔ tee nɔ ehi shi.—Mateo 28:20.
3 Yesu gba yɛ ebɛbua ni kɔɔ ŋmaa kɛ jwɛi he lɛ mli akɛ anɔkwa Kristofoi baafata “jwɛi,” loo amale Kristofoi lɛ ahe ni amɛ fɛɛ amɛbaadara yɛ be ko mli; ni enɛ ba mli nakai. Shi ewie hu akɛ yɛ naagbee gbii lɛ amli lɛ, abaana “maŋtsɛyeli lɛŋ bii lɛ” ekoŋŋ akɛ esoro amɛ yɛ “jwɛi lɛ” he kwraa. (Mateo 13:36-43) Enɛ hu ba mli anɔkwale. Yɛ 1919 mli ni anɔkwa Kristofoi ni afɔ amɛ mu lɛ je Babilon nomŋɔɔ mli. Ajɛ ŋwɛi akpɛlɛ amɛ nɔ akɛ “tsulɔ anɔkwafo kɛ nilelɔ” lɛ, ni amɛkɛ ekaa je Maŋtsɛyeli lɛ he sanekpakpa lɛ shiɛmɔ shishi. (Mateo 24:14, 45-47; Kpojiemɔ 18:4) Amɛteŋ mɛi babaoo ji Jeŋmajiaŋbii; shi akɛni amɛyɛ Abraham hemɔkɛyeli lɛ eko hewɔ lɛ, amɛji ‘Abraham bii’ yɛ faŋŋ mli. Amɛji “Nyɔŋmɔ Israel lɛ” mli bii.—Galatabii 3:7, 26-29.
“Asafo Babaoo” Lɛ
4. Mɛɛ Kristofoi akuu ko abayoo amɛ faŋŋ, titri lɛ yɛ 1930 afii lɛ amli?
4 Kɛjɛ shishijee lɛ, mɛi ni kpɛlɛ nɛkɛ Kristofoi ni afɔ amɛ mu nɛɛ ashiɛmɔ lɛ nɔ lɛ hu batsɔmɔ mumɔŋ Israelbii, ni ji mɛi 144,000 ni yɔɔ ŋwɛi hiɛnɔkamɔ lɛ ateŋ shwɛɛnii lɛ. (Kpojiemɔ 12:17) Shi, yɛ 1930 afii lɛ amli titri lɛ, abayoo kuu kroko hu jogbaŋŋ. Abana mɛnɛɛmɛi akɛ amɛji “tooi krokomɛi” ni yɔɔ tooi atsũi lɛ he abɛbua lɛ mli lɛ. (Yohane 10:16) Amɛji Kristo kaselɔi ni yɔɔ hiɛnɔkamɔ akɛ amɛbaana naanɔ wala yɛ paradeiso shikpɔŋ nɔ. Kɛ wɔɔwie he yɛ mfoniri-feemɔŋ lɛ, amɛji Kristofoi ni afɔ amɛ mu lɛ amumɔŋ bii. (Yesaia 59:21; 66:22; okɛto 1 Korintobii 4:15, 16 he.) Amɛkpɛlɛ Kristofoi ni afɔ amɛ mu lɛ asafo lɛ nɔ akɛ tsulɔ anɔkwafo kɛ nilelɔ lɛ, ni taakɛ amɛnyɛmimɛi ni afɔ amɛ mu lɛ ji lɛ, amɛyɛ suɔmɔ ni mli kwɔ kɛha Yehowa, kɛ Yesu afɔleshaa lɛ mli hemɔkɛyeli, ekaa kɛha Nyɔŋmɔ yijiemɔ, kɛ suɔmɔ ni amɛyɔɔ akɛ amɛaana nɔ̃ yɛ jalɛ hewɔ.
5. Te abanu tooi krokomɛi lɛ agbɛhe lɛ shishi fiofio jogbaŋŋ aha tɛŋŋ?
5 Klɛŋklɛŋ lɛ, kulɛ anuuu nɛkɛ tooi krokomɛi nɛɛ agbɛhe lɛ shishi jogbaŋŋ, shi beni be shwieɔ mli lɛ, nibii amli bafee faŋŋ. Yɛ 1932 mli lɛ, awo Kristofoi ni afɔ amɛ mu lɛ hewalɛ ni amɛwo tooi krokomɛi lɛ ekaa ni amɛkɛ amɛhe awo shiɛmɔ nitsumɔ lɛ mli—nɔ ko ni tooi krokomɛi lɛ babaoo miifee momo. Yɛ 1934 mli lɛ, awo tooi krokomɛi lɛ hewalɛ ni amɛkɛ amɛhe aha kɛha nu mli baptisimɔ. Yɛ 1935 mli lɛ, abana akɛ amɛji “asafo babaoo” ni yɔɔ Kpojiemɔ yitso 7 lɛ. Yɛ 1938 mli lɛ, afɔ̃ amɛ nine akɛ amɛba Yesu Kristo gbele lɛ Kaimɔ lɛ akɛ mɛi ni eba amɛbaakwɛ. Yɛ 1950 mli lɛ, ayoo hii ni edara yɛ mumɔŋ yɛ amɛteŋ lɛ akɛ amɛfata “lumɛi” ni tsuɔ nii akɛ “abobaa he yɛ kɔɔyɔɔ naa kɛ teemɔ he yɛ nugbɔnɛmɔ naa” lɛ ahe. (Lala 45:17; Yesaia 32:1, 2) Yɛ 1953 mli lɛ, abana Nyɔŋmɔ shikpɔŋ nɔ gbɛjianɔtoo lɛ—ní no mli lɛ emli mɛi babaoo ji tooi krokomɛi lɛ—akɛ shikpɔŋ nɔ gbɛjianɔtoo ni baahi shi yɛ jeŋ hee lɛ mli lɛ shishitoo nɔ. Yɛ 1985 mli lɛ, abanu shishi akɛ adamɔɔ Yesu kpɔmɔ afɔleshaa lɛ nɔ abuɔ tooi krokomɛi lɛ jalɔi akɛ Nyɔŋmɔ shieŋtsɛmɛi, kɛ hiɛnɔkamɔ akɛ amɛbaana yibaamɔ kɛfo Harmagedon.
6. Mɛni ji mɛi ni afɔ amɛ mu lɛ kɛ tooi krokomɛi lɛ ashidaamɔ kɛ akɛ amɛ to amɛhe ŋmɛnɛ, ni mɛɛ sanebimɔi enɛ kɛbaa?
6 Amrɔ nɛɛ ni wɔyɔɔ “naagbee gbii” lɛ naagbee gbɛ kwraa nɛɛ, mɛi 144,000 lɛ ateŋ mɛi babaoo egboi ni amɛnine eshɛ amɛ ŋwɛi nyɔmɔwoo lɛ nɔ. (2 Timoteo 3:1; Kpojiemɔ 6:9-11; 14:13) Kristofoi ni yɔɔ shikpɔŋ nɔ hiɛnɔkamɔ lɛ ji mɛi ni tsuɔ sanekpakpa shiɛmɔ nitsumɔ lɛ waa amrɔ nɛɛ, ni amɛbuɔ akɛ eji hegbɛ kpele ni amɛna akɛ amɛaafi Yesu nyɛmimɛi ni afɔ amɛ mu lɛ asɛɛ yɛ enɛ mli. (Mateo 25:40) Shi, nɛkɛ mɛi ni afɔ amɛ mu nɛɛ ji tsulɔ anɔkwafo kɛ nilelɔ ni atsɔɔ enɔ akɛ mumɔŋ niyenii haa yɛ nɛkɛ naagbee gbii nɛɛ amli fɛɛ lɛ. Te tooi krokomɛi lɛ ashihilɛ baafee tɛŋŋ kɛ mɛi ni afɔ amɛ mu lɛ fɛɛ anine shɛ amɛ ŋwɛi nyɔmɔwoo lɛ nɔ? Mɛɛ gbɛjianɔ abaato aha tooi krokomɛi lɛ yɛ nakai beaŋ? Blema Israel hesusumɔ kuku baaye abua wɔ ni wɔha nakai sanebimɔi lɛ ahetoo.
“Osɔfoi Amaŋtsɛyeli” Krɛdɛɛ Ko
7, 8. Blema Israel ji osɔfoi amaŋtsɛyeli kɛ jeŋmaŋ krɔŋkrɔŋ yɛ Mla kpaŋmɔ lɛ shishi kɛyashi nɛgbɛ?
7 Beni Yehowa hala Israel akɛ emaŋ krɛdɛɛ lɛ, ekɛ amɛ fee kpaŋmɔ ko, ni ekɛɛ: “Kɛji nyɛaabo migbee toi ni nyɛye mikpaŋmɔ lɛ nɔ lɛ, no lɛ nyɛaatsɔ mi diɛŋtsɛ minɔ yɛ maji fɛɛ ateŋ; ejaakɛ shikpɔŋ lɛ fɛɛ lɛ minɔŋ. Shi nyɛ lɛ, nyɛaatsɔ osɔfoi amaŋtsɛyeli kɛ maŋ krɔŋkrɔŋ nyɛha mi.” (2 Mose 19:5, 6) Israel hi shi akɛ Yehowa gbɔmɛi krɛdɛɛ yɛ Mla kpaŋmɔ lɛ hewɔ. Shi, te aaafee tɛŋŋ ni shiwoo ni kɔɔ osɔfoi amaŋtsɛyeli kɛ maŋ krɔŋkrɔŋ he lɛ aba mli hu?
8 Beni Israel yeɔ anɔkwa lɛ, amɛkpɛlɛ Yehowa maŋtsɛyeli nɔ ni amɛkpɛlɛ enɔ hu akɛ amɛ-Maŋtsɛ. (Yesaia 33:22) Enɛ hewɔ lɛ, amɛji maŋtsɛyeli. Shi, taakɛ ajie lɛ kpo yɛ sɛɛ mli lɛ, shiwoo ni kɔɔ “maŋtsɛyeli” he lɛ baatsɔɔ babaoo fe nakai. Kɛfata he lɛ, beni amɛboɔ Yehowa Mla lɛ toi lɛ, no mli lɛ amɛhe tse, ni amɛtsi amɛhe kɛjɛ jeŋmaji ni ebɔle amɛ lɛ ahe. Amɛji jeŋmaŋ krɔŋkrɔŋ. (5 Mose 7:5, 6) Ani amɛji osɔfoi amaŋtsɛyeli? Ojogbaŋŋ, aje gbɛ ahala Levi akutso lɛ yɛ Israel kɛha sɔlemɔ we sɔɔmɔ, ni nakai akutso lɛ mli nɔŋŋ Levibii osɔfoyeli gbɛjianɔtoo lɛ yɔɔ. Beni akɛ Mose Mla lɛ ha amɛ lɛ, ahala Levibii hii lɛ ato wekui fɛɛ ni jɛɛɛ Levibii akutso lɛ mli lɛ akromɔbii lɛ anajiaŋ.a (2 Mose 22:29; 4 Mose 3:11-16, 40-51) No hewɔ lɛ, kɛ abaawie lɛ, aha weku fɛɛ weku ni yɔɔ Israel lɛ na najiaŋdamɔlɔ yɛ sɔlemɔ we sɔɔmɔ mli. Enɛ ji nɔ ni ha maŋ lɛ bɛŋkɛ osɔfoyeli lɛ he kpaakpa fe fɛɛ. Shi kɛlɛ, amɛdamɔ Yehowa najiaŋ yɛ jeŋmaji lɛ ahiɛ. Esa akɛ gbɔ fɛɛ gbɔ ni miitao ni eja anɔkwa Nyɔŋmɔ lɛ afata Israel he kɛfee nakai.—2 Kronika 6:32, 33; Yesaia 60:10.
9. Mɛni ha Yehowa kpoo Israel kooyigbɛ maŋtsɛyeli lɛ ni ehaaa ‘amɛsɔmɔ akɛ osɔfoi amɛha lɛ lɛ’?
9 Yɛ Salomo gbele sɛɛ lɛ, Nyɔŋmɔ webii lɛ amli gba enyɔ ni ebatsɔ Israel kooyigbɛ maŋtsɛyeli yɛ Maŋtsɛ Yeroboam shishi, kɛ Yuda wuoyigbɛ maŋtsɛyeli yɛ Maŋtsɛ Rehoboam shishi. Akɛni sɔlemɔ we lɛ, ni ji jamɔ krɔŋŋ teŋ tuuŋtu lɛ, yɛ Yuda shikpɔŋkuku mli hewɔ lɛ, Yeroboam fee tsina bii amagai yɛ lɛ diɛŋtsɛ enɔyeli shikpɔŋkuku lɛ mli ni ekɛje jamɔ gbɛ ko ni mla eŋmɛɛɛ gbɛ shishi. Kɛfata he lɛ, “emamɔ shiai yɛ hei grɔŋŋi lɛ, ni eŋɔɔ mɛi kɛjɛɔ maŋ lɛŋ he fɛɛ he ewoɔ amɛ osɔfoi, tsɛ amɛjɛɛɛ Levibii lɛ ateŋ.” (1 Maŋtsɛmɛi 12:31) Kooyigbɛ maŋ lɛ bote apasa jamɔ mli vii beni Maŋtsɛ Ahab ŋmɛ eŋa, Yezebel, ni ji maŋsɛɛ yoo lɛ gbɛ ni eto Baal jamɔ shishi yɛ maŋ lɛ mli lɛ. Yɛ naagbee lɛ, Yehowa jaje kojomɔ eshwie atuatselɔi amaŋtsɛyeli lɛ nɔ. Etsɔ Hoshea nɔ ewie akɛ: “Aaakpata mimaŋ lɛ hiɛ yɛ nilee ni ebɛ hewɔ; akɛni okwa nilee hewɔ lɛ, makwao ni okaye osɔfo oha mi.” (Hoshea 4:6) No sɛɛ etsɛɛɛ kɛkɛ ni Ashurbii lɛ bakpata Israel kooyigbɛ maŋtsɛyeli lɛ hiɛ kwraa.
10. Beni wuoyigbɛ Yuda maŋtsɛyeli lɛ yeɔ anɔkwa lɛ, mɛɛ gbɛ nɔ edamɔ Yehowa najiaŋ yɛ jeŋmaji lɛ ahiɛ yɛ?
10 Shi wuoyigbɛ maŋ, ni ji Yuda hu? Yɛ Hezekia gbii lɛ amli lɛ, Yehowa kɛ amɛ wie kɛtsɔ Yesaia nɔ akɛ: “Nyɛ ji midasefoi, kɛ mitsulɔ ni mihala, . . . maŋ ni mishɔ̃ miha mihe, koni amɛgba miyijiemɔ lɛ.” (Yesaia 43:10, 21; 44:21) Beni amɛyeɔ anɔkwa lɛ, wuoyigbɛ maŋtsɛyeli lɛ jaje Yehowa anunyam lɛ amɛtsɔɔ jeŋmaji lɛ ni amɛgbala mɛi ni yɔɔ jalɛ tsuii lɛ kɛba koni amɛbaja lɛ yɛ esɔlemɔ we lɛ, koni Levi osɔfoi ni tsuɔ nii yɛ mla naa lɛ asɔmɔ amɛ.
Gbɔi ni Yɔɔ Israel
11, 12. Tsii gbɔi komɛi ni bafata Israel he kɛsɔmɔ Yehowa lɛ gbɛi atã.
11 Ato gbɛjianɔ aha gbɔi ni here nɛkɛ maŋ odaseyeli nɛɛ nɔ lɛ, yɛ Mla ni akɛha kɛtsɔ Mose—ní eŋa, Zipora, ji Midiannyo lɛ, nɔ lɛ mli. “Futufutu gbɔmɛi babaoo” ni amɛjeee Israelbii fata Israel he kɛshi Mizraim, ni amɛyɛ jɛmɛ beni akɛ Mla lɛ ha lɛ. (2 Mose 2:16-22; 12:38; 4 Mose 11:4) Ahere Rahab kɛ eweku lɛ yiwala kɛjɛ Yeriko maŋ lɛ mli, ni sɛɛ mli lɛ ahe amɛ awo Yudafoi asafo lɛ mli. (Yoshua 6:23-25) No sɛɛ etsɛɛɛ lɛ, Gibeonbii lɛ kɛ Israel fee toiŋjɔlɛ kpaŋmɔ, ni aha amɛ nitsumɔi yɛ kpeebuu lɛ he nitsumɔ gbɛfaŋ.—Yoshua 9:3-27; kwɛmɔ 1 Maŋtsɛmɛi 8:41-43; Ester 8:17 hu.
12 Yɛ naagbee lɛ, gbɔi sɔmɔ yɛ gbɛhei ni nɔ kwɔlɔ mli. Abuɔ Uria, Hitnyo lɛ, Batsheba wu lɛ, afataa David “kãkãlɔi” lɛ ahe, taakɛ abuɔ Zelek, Amonnyo lɛ hu lɛ. (1 Kronika 11:26, 39, 41; 2 Samuel 11:3, 4) Ebed-melek, ni ji Etiopianyo lɛ, sɔmɔ yɛ maŋtsɛ we lɛ, ni enyɛɔ eyaa maŋtsɛ lɛ ŋɔɔ. (Yeremia 38:7-9) Beni Israel ku esɛɛ kɛjɛ nomŋɔɔ mli yɛ Babilon kɛba lɛ, aha Nethinim ni amɛjeee Israelbii lɛ hegbɛi babaoo yɛ osɔfoi lɛ ayelikɛbuamɔ mli. (Ezra 7:24) Akɛni abuɔ nɛkɛ gbɔi anɔkwafoi, loo gbɔi ni ebahi maŋ lɛ mli nɛɛ ateŋ mɛi pii akɛ amɛfeɔ asafo babaoo lɛ he mfoniri ŋmɛnɛ hewɔ lɛ, wɔyɛ amɛshihilɛ lɛ he miishɛɛ waa.
13, 14. (a) Mɛni ji hegbɛi kɛ gbɛnaa nii ni mɛi ni etsake kɛba jamɔ lɛ mli lɛ yɔɔ yɛ Israel? (b) Te esa akɛ Israelbii lɛ abu anɔkwafoi ni etsake kɛba jamɔ lɛ mli lɛ amɛha tɛŋŋ?
13 Nɛkɛ mɛi nɛɛ ji mɛi ni etsake kɛba jamɔ lɛ mli, Yehowa jalɔi ni ejɔɔ amɛhe nɔ, ni yɔɔ Mose Mla lɛ shishi, ni ebafata Israelbii lɛ ahe kɛtsi amɛhe kɛjɛ jeŋmaji lɛ ahe. (3 Mose 24:22) Amɛshaa afɔlei, ni amɛtsiɔ amɛhe kwraa kɛjɛɔ apasa jamɔ he, ni amɛtsiɔ amɛhe kɛjɛɔ la hu he, taakɛ Israelbii lɛ feɔ lɛ pɛpɛɛpɛ. (3 Mose 17:10-14; 20:2) Amɛye amɛbua yɛ Salomo sɔlemɔtsu lɛ maa mli, ni amɛfata he ni asaa ato anɔkwa jamɔ ama shi ekoŋŋ yɛ Maŋtsɛ Asa kɛ Maŋtsɛ Hezekia shishi. (1 Kronika 22:2; 2 Kronika 15:8-14; 30:25) Beni Petro kɛ Maŋtsɛyeli lɛ klɛŋklɛŋ samfele lɛ tsu nii yɛ Pentekoste afi 33 Ŋ.B. lɛ, “Yudafoi kɛ mɛi ni etsɔmɔ Yudafoi” fɛɛ nu ewiemɔi lɛ. Eeenyɛ efee akɛ mɛi akpei etɛ ni abaptisi amɛ yɛ nakai gbi lɛ nɔ lɛ ateŋ mɛi komɛi ji mɛi ni etsake kɛba jamɔ lɛ mli. (Bɔfoi lɛ Asaji 2:10, 41) No sɛɛ etsɛɛɛ lɛ, Filipo baptisi Etiopianyo ko ni etsake kɛba jamɔ lɛ mli—dani Petro kɛ Maŋtsɛyeli lɛ naagbee samfele lɛ tsu nii yɛ Kornelio kɛ eweku lɛ nɔ lɛ. (Mateo 16:19; Bɔfoi lɛ Asaji 8:26-40; 10:30-48) Eyɛ faŋŋ akɛ, abuuu mɛi ni etsake kɛba jamɔ lɛ mli lɛ akɛ Jeŋmajiaŋbii.
14 Shi kɛlɛ, gbɛhe ni mɛi ni etsake kɛba jamɔ lɛ mli lɛ yɔɔ yɛ shikpɔŋ lɛ nɔ lɛ tamɔɔɔ mɛi ni afɔ amɛ akɛ Israelbii lɛ anɔ. Mɛi ni etsake kɛba jamɔ lɛ mli lɛ sɔmɔɔɔ akɛ osɔfoi, ni akɛ mɛi haaa yɛ amɛkromɔbii lɛ anajiaŋ yɛ Levibii lɛ osɔfoyeli lɛ mli.b Ni mɛi ni etsake kɛba jamɔ lɛ mli lɛ bɛ gboshinii ni ji shikpɔŋ yɛ Israel. Kɛlɛ, akɛ famɔ ha Israelbii lɛ akɛ amɛsusu anɔkwafoi ni etsake kɛba jamɔ lɛ mli lɛ ahe ni amɛbu amɛ akɛ nyɛmimɛi.—3 Mose 19:33, 34.
Mumɔŋ Maŋ Lɛ
15. Beni heloonaa Israel ekpɛlɛɛɛ Mesia lɛ nɔ lɛ, mɛni jɛ mli ba?
15 Afee Mla lɛ koni eha Israel he atse, ni amɛtsi amɛhe kɛjɛ jeŋmaji ni ebɔle amɛ lɛ ahe. Shi etsu yiŋtoo kroko hu he nii. Bɔfo Paulo ŋma akɛ: “Mla lɛ etsɔ wɔ tsɔselɔ kɛmiiya Kristo ŋɔɔ, koni hemɔkɛyeli mli abu wɔ bem yɛ.” (Galatabii 3:24) Dɔlɛ sane ji akɛ, Israelbii pii haaa Mla lɛ anyiɛ amɛhiɛ kɛya Kristo ŋɔɔ. (Mateo 23:15; Yohane 1:11) No hewɔ lɛ, Yehowa Nyɔŋmɔ kpoo nakai maŋ lɛ, ni eha afɔ “Nyɔŋmɔ Israel lɛ.” Kɛfata he lɛ, ekpã ninefɔɔ mli eha mɛi ni jeee Yudafoi lɛ hu koni amɛbatsɔmɔ nɛkɛ Israel hee nɛɛ mlibii kɛmɔ shi. (Galatabii 3:28; 6:16) Nɛkɛ maŋ hee nɛɛ nɔ Yehowa shiwoo ni yɔɔ 2 Mose 19:5, 6 ni kɔɔ osɔfoi amaŋtsɛyeli he lɛ naa enaagbee mlibaa ni yɔɔ nyam lɛ yɛ. Yɛ mɛɛ gbɛ nɔ?
16, 17. Mɛɛ shishinumɔ naa Kristofoi ni afɔ amɛ mu, ni yɔɔ shikpɔŋ nɔ lɛ ji “maŋtsɛmɛi” yɛ? kɛ “osɔfoi” hu?
16 Petro tsɛ wiemɔ sɛɛ kɛjɛ 2 Mose 19:6 beni eŋma wolo eyaha Kristofoi ni afɔ amɛ mu ni hi shi yɛ egbii lɛ amli lɛ, akɛ: “Shi nyɛ lɛ, ‘weku ni ahala ji nyɛ, maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ.’ ” (1 Petro 2:9) Mɛni enɛ tsɔɔ? Ani Kristofoi ni afɔ amɛ mu ni yɔɔ shikpɔŋ lɛ nɔ lɛ ji maŋtsɛmɛi? Dabi, amɛ maŋtsɛyeli lɛ yɛ wɔsɛɛ lolo. (1 Korintobii 4:8) Shi kɛlɛ, “maŋtsɛmɛi” ji amɛ kɛ shishinumɔ akɛ akadi amɛ kɛha maŋtsɛmɛi ahegbɛi ni amɛbaana wɔsɛɛ. Amrɔ nɛɛ po, amɛji jeŋmaŋ ni yɔɔ maŋtsɛ, Yesu, ni Maŋtsɛ Kpeteŋkpele, Yehowa Nyɔŋmɔ ehala lɛ lɛ shishi. Paulo ŋma akɛ: “[Yehowa] jie wɔ kɛjɛ duŋ hewalɛ lɛ mli, ni ekɛ wɔ bato esuɔmɔ Bi lɛ maŋtsɛyeli lɛ mli.”—Kolosebii 1:13.
17 Ani Kristofoi ni afɔ amɛ mu ni yɔɔ shikpɔŋ nɔ lɛ ji osɔfoi? Yɛ shishinumɔ ko naa lɛ, hɛɛ. Akɛ asafo lɛ, amɛtsuɔ osɔfoyeli nitsumɔ ko ni anyɛŋ aje he ŋwane. Petro tsɔɔ enɛ mli beni ewie akɛ: “Ni nyɛ hu, nyɛhaa aŋɔa nyɛ . . . akɛtswaa mumɔŋ tsu ni afee nyɛ osɔfoi aweku krɔŋkrɔŋ.” (1 Petro 2:5; 1 Korintobii 3:16) Ŋmɛnɛ, Kristofoi ni afɔ amɛ mu lɛ ateŋ shwɛɛnii lɛ fɛɛ kutuu ji “tsulɔ anɔkwafo kɛ nilelɔ,” ni ji gbɛ ni atsɔɔ nɔ akɛ mumɔŋ niyenii haa lɛ. (Mateo 24:45-47) Taakɛ eji yɛ blema Israel lɛ, esa akɛ mɔ fɛɛ mɔ ni sumɔɔ ni eja Yehowa lɛ afata nɛkɛ Kristofoi ni afɔ amɛ mu nɛɛ ahe kɛja lɛ.
18. Akɛ osɔfoi lɛ, mɛni ji klɛŋklɛŋ gbɛnaa nii ni Kristofoi ni afɔ amɛ mu lɛ asafo ni yɔɔ shikpɔŋ nɔ lɛ yɔɔ?
18 Kɛfata he lɛ, Kristofoi ni afɔ amɛ mu lɛ baye Israel najiaŋ ni amɛbana hegbɛ akɛ amɛaaye Yehowa agbojee lɛ he odase yɛ jeŋmaji lɛ ateŋ. Emli sane lɛ tsɔɔ akɛ beni Petro tsɛ Kristofoi ni afɔ amɛ mu lɛ akɛ maŋtsɛmɛi ni yeɔ osɔfoi lɛ, no mli lɛ shiɛmɔ nitsumɔ lɛ ji nɔ ni yɔɔ ejwɛŋmɔ mli. Yɛ anɔkwale mli lɛ, efee Yehowa shiwoo ni yɔɔ 2 Mose 19:6 kɛ E-wiemɔi ni ekɛ Israel wie yɛ Yesaia 43:21 lɛ ekome, ni etsɛ yisɛɛ yɛ ŋmalɛ kome mli beni ekɛɛ akɛ: “Nyɛ lɛ, [nyɛji] . . . ‘maŋtsɛmɛi ni yeɔ osɔfoi, . . . koni nyɛjaje’ mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ ‘agbojee lɛ.’ ” (1 Petro 2:9) Yɛ enɛ kɛ gbeekpamɔ naa lɛ, Paulo wie Yehowa agbojee lɛ jajemɔ lɛ he akɛ eji sɔlemɔ we lɛ afɔleshaa. Eŋma akɛ: “Nyɛhaa wɔtsɔa [Yesu] nɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.”—Hebribii 13:15.
Emlibaa yɛ Ŋwɛi
19. Mɛni ji shiwoo ni akɛha akɛ Israel baafee osɔfoi amaŋtsɛyeli lɛ naagbee mlibaa ni da fe fɛɛ?
19 Shi kɛlɛ, yɛ naagbee lɛ, 2 Mose 19:5, 6 lɛ yɛ mlibaa ni yɔɔ nyam ni da kwraa fe enɛ. Yɛ Kpojiemɔ wolo lɛ mli lɛ, bɔfo Yohane nu ŋwɛi bɔɔ nii komɛi ahe akɛ amɛkɛ ŋmalɛ nɛɛ miitsu nii beni amɛjieɔ Yesu ni atee lɛ shi lɛ yi lɛ, akɛ: “Agbeo, ni okɛ ola lɛ ekpɔ̃ wɔ oha Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli, ni oŋɔ wɔ ofee maŋtsɛmɛi kɛ osɔfoi oha wɔ-Nyɔŋmɔ lɛ, ni wɔɔye maŋtsɛ yɛ shikpɔŋ lɛ nɔ.” (Kpojiemɔ 5:9, 10) Belɛ, yɛ naagbee shishinumɔ naa lɛ, osɔfoi amaŋtsɛyeli lɛ ji Nyɔŋmɔ ŋwɛi Maŋtsɛyeli lɛ, nɔyeli hegbɛ ni Yesu tsɔɔ wɔ akɛ wɔsɔle ni eba lɛ. (Luka 11:2) Kristofoi 144,000 ni afɔ amɛ mu, ni kɛ anɔkwayeli ŋmɛɔ amɛtsui shi aahu kɛyashiɔ naagbee lɛ fɛɛ baana gbɛfaŋnɔ yɛ nakai Maŋtsɛyeli gbɛjianɔtoo lɛ mli. (Kpojiemɔ 20:4, 6) Mɛɛ shiwoo ni akɛha kɛtsɔ Mose nɔ afii babaoo nɛ lɛ mlibaa ni yɔɔ nyam nɛ!
20. Mɛɛ sanebimɔ yɔɔ lolo ni sa akɛ aha hetoo?
20 Mɛni enɛɛmɛi fɛɛ kɛ asafo babaoo lɛ shihilɛ kɛ amɛ wɔsɛɛ be, beni mɛi ni afɔ amɛ mu lɛ fɛɛ anine eshɛ amɛgboshinii ni yɔɔ nyam lɛ nɔ lɛ yɔɔ feemɔ? Enɛ baafee faŋŋ yɛ nikasemɔi ni tsara nɔ nɛɛ amli naagbee nɔ lɛ mli.
[Shishigbɛ niŋmai]
a Beni aje Israel osɔfoyeli lɛ shishi lɛ, akane Israel akutsei ni jeee Levi akutso lɛ mli kromɔbii hii lɛ, kɛ Levi akutso lɛ mlibii hii lɛ fɛɛ. Kromɔbii ni ana lɛ fa fe Levibii hii lɛ kɛ mɛi 273 sɔŋŋ. No hewɔ lɛ, Yehowa fã akɛ awo shekelii enumɔ kɛha mɛi 273 nɛɛ ateŋ mɔ fɛɛ mɔ, akɛ kpɔmɔ nɔ kɛha nɔtekemɔ lɛ.
b Futufutu mɛi babaoo ni jeee Israelbii yɛ jɛmɛ beni akɛ Mla lɛ ha yɛ afi 1513 D.Ŋ.B. lɛ, shi akɛ amɛ kromɔbii lɛ fataaa he beni ahalaa Levibii ni akɛye Israel kromɔbii lɛ anajiaŋ lɛ. (Kwɛmɔ kuku 8.) Enɛ hewɔ lɛ, ahalaaa Levibii lɛ ni akɛ amɛ aye nɛkɛ mɛi ni jeee Israelbii nɛɛ anajiaŋ.
Ani Obaanyɛ Otsɔɔ Mli?
◻ Te anu tooi krokomɛi lɛ agbɛhe lɛ shishi jogbaŋŋ fiofio aha tɛŋŋ?
◻ Mɛni hewɔ Yehowa kpoo Israel kooyigbɛ maŋtsɛyeli lɛ ni amɛkasɔmɔ akɛ osɔfoi amɛha lɛ lɛ?
◻ Beni amɛyeɔ anɔkwa lɛ, mɛni ji Yuda shidaamɔ yɛ jeŋmaji lɛ ahiɛ?
◻ Mɛni ji anɔkwafoi ni tsake kɛba jamɔ lɛ mli lɛ agbɛhe yɛ Israel?
◻ Mɛi ni afɔ amɛ mu lɛ asafo lɛ sɔmɔɔ akɛ osɔfoi amaŋtsɛyeli yɛ mɛɛ gbɛ nɔ?
[Mfoniri ni yɔɔ baafa 16]
Akɛ maŋtsɛmɛi ni yeɔ osɔfoi lɛ, Kristofoi ni afɔ amɛ mu lɛ ejajeɔ
[Mfoniri ni yɔɔ baafa 18]
Yehowa anunyam lɛ yɛ shikpɔŋ nɔ
Mose Wolo ni Ji Enyɔ 19:6 naagbee mlibaa ji Maŋtsɛyeli lɛ