Yehowa Etsɔɔ Wɔ Nii Aahu Kɛbashi Ŋmɛnɛ
“Yehowa eha mi nikaselɔi alilɛi.”—YESAIA 50:4.
1, 2. (a) Yehowa saa ebi nikaselɔi ni esumɔɔ esane fe fɛɛ lɛ kɛha mɛni, ni mɛni jɛ mli ba? (b) Te Yesu kpɛlɛ enitsɔɔmɔ Jɛɛhe lɛ nɔ eha tɛŋŋ?
YEHOWA NYƆŊMƆ efee Tsɔɔlɔ aahu kɛjɛ be mli ni ebatsɔ Tsɛ lɛ. Be ko beni ebii lɛ ekomɛi tse atua lɛ sɛɛ lɛ, esaa ebi nikaselɔ ni esumɔɔ esane fe fɛɛ, e-Kromɔbi lɛ, kɛha sɔɔmɔ nitsumɔ ko yɛ shikpɔŋ nɛɛ nɔ. (Abɛi 8:30) Yesaia yitso 50 lɛ wieɔ nɛkɛ bi nikaselɔ nɛɛ he yɛ gbalɛ wiemɔ mli akɛ: “Nuntsɔ Yehowa eha mi nikaselɔi alilɛi, koni male bɔ ni mikɛ mɔ ni etɔ lɛ lɛ aaawie yɛ be ni sa mli.” (Yesaia 50:4) Nɔ ni jɛ e-Tsɛ nitsɔɔmɔ ni ekɛtsu nii beni eyɔɔ shikpɔŋ nɔ lɛ mli ba ji akɛ, Yesu bafee hejɔɔmɔ jɛɛhe kɛha mɛi fɛɛ ni ‘etɔ amɛ ni amɛjatsui fe amɛ lɛ.’—Mateo 11:28-30.
2 Yesu tsu hewalɛ nitsumɔi pii yɛ klɛŋklɛŋ afii oha lɛ mli. Egbele shwilafoi ahiŋmɛii ni etee gbohii ashi po, shi kɛlɛ, mɛi ni hi shi yɛ ebeaŋ lɛ le lɛ titri akɛ tsɔɔlɔ. Esɛɛnyiɛlɔi lɛ kɛ mɛi ni teɔ shi woɔ lɛ lɛ fɛɛ tsɛ lɛ nakai. (Mateo 8:19; 9:11; 12:38; 19:16; Yohane 3:2) Yesu kɛ nibii ni etsɔɔ lɛ he yijiemɔ haaa ehe kɔkɔɔkɔ, shi moŋ ekɛ heshibaa kpɛlɛ nɔ akɛ: “Minitsɔɔmɔ lɛ, jeee minɔŋ, shi moŋ mɔ ni tsu mi lɛ nɔŋ.” “Bɔ ni mi-Tsɛ tsɔɔ mi lɛ, nakai miwieɔ.”—Yohane 7:16; 8:28; 12:49.
Tsɔɔlɔ kɛ Nikaselɔ Teŋ Wekukpaa Kpakpa
3. Te Yesaia gbalɛ lɛ tsɔɔ miishɛɛ ni Yehowa yɔɔ yɛ mɛi ni etsɔɔ amɛ nii lɛ ahe lɛ ehaa tɛŋŋ?
3 Tsɔɔlɔ ni he esa jogbaŋŋ lɛ jieɔ miishɛɛ kɛ suɔmɔ kpo diɛŋtsɛ yɛ gbekɛbii ni etsɔɔ amɛ nii lɛ ahe. Yesaia yitso 50 lɛ jieɔ lɛ kpo akɛ Yehowa Nyɔŋmɔ yɛ nakai miishɛɛ lɛ eko yɛ mɛi ni etsɔɔ amɛ nii lɛ ahe. Gbalɛ lɛ kɛɔ akɛ: “Etsĩɛɔ mi daa leebi, etsĩɛɔ mitoi, ni mikɛnu nii tamɔ nikaselɔi.” (Yesaia 50:4) Wiemɔ ni akɛtsu nii yɛ biɛ lɛ miitsɔɔ nitsɔɔlɔ ko ni tsĩɛɔ gbekɛbii ni etsɔɔ amɛ nii lɛ daa leebi, koni etsɔɔ amɛ nii. Beni ewieɔ nɔ ni gbalɛ nɛɛ tsɔɔ lɛ he lɛ, Biblia he woloŋlelɔ ko wie akɛ: “Susumɔ lɛ ji akɛ, Kpɔlɔ lɛ baafee . . . mɔ ni, kɛ wɔɔkɛɛ lɛ, eyɛ Nyɔŋmɔ skul lɛ mli; kɛ mɔ ni baafee mɔ ni sa akɛ ekɛ tsɔsemɔ aaaha mɛi krokomɛi. . . . Mesia lɛ baafee mɔ ni he esa jogbaŋŋ kɛmɔ shi, kɛtsɔ Nyɔŋmɔ nitsɔɔmɔ nɔ, akɛ eeefee adesai atsɔɔlɔ.”
4. Te Yesu here e-Tsɛ nitsɔɔmɔ lɛ nɔ eha tɛŋŋ?
4 Gbekɛbii kpɛlɛɔ amɛtsɔɔlɔi anitsɔɔmɔ nɔ yɛ gbɛ ni hi jogbaŋŋ nɔ. Te Yesu here e-Tsɛ nitsɔɔmɔ lɛ nɔ eha tɛŋŋ? Bɔ ni ehere nɔ eha lɛ kɛ nɔ ni wɔkaneɔ yɛ Yesaia 50:5 lɛ kpaa gbee, akɛ: “Nuntsɔ Yehowa egbele mitoi, ni mitseee atua, ni asaŋ mikuuu misɛɛ.” Hɛɛ, Yesu miisumɔ waa ni ekase nii. Eji mɔ ko ni boɔ sane toi jogbaŋŋ. Nɔ ni fe nakai lɛ, eesumɔ ni efee nɔ fɛɛ nɔ ni e-Tsɛ lɛ biɔ ni efee. Etseee atua; shi moŋ, ekɛɛ akɛ: “Jeee bɔ ni mi misumɔɔ lɛ, shi moŋ bɔ ni bo osumɔɔ.”—Luka 22:42.
5. (a) Mɛni tsɔɔ akɛ Yesu le kaai ni ekɛbaakpe yɛ shikpɔŋ nɛɛ nɔ lɛ momo? (b) Mɛɛ gbɛ nɔ aha gbalɛ ni yɔɔ Yesaia 50:6 lɛ ba mli yɛ?
5 Gbalɛ lɛ tsɔɔ akɛ, aha Bi lɛ le nibii ni baajɛ Nyɔŋmɔ suɔmɔnaa nifeemɔ mli aba. Enɛ jeɔ kpo yɛ nɔ ni nikaselɔ lɛ kɛɛ lɛ mli akɛ: “Mitsɔ mikotosɛɛ miha yilɔi, kɛ midabii hu miha mɛi ni famɔɔ tsɔi; mikɛ mihiɛ hu eteee kɛjɛɛɛ hiɛgbele kɛ lajɔ he.” (Yesaia 50:6) Taakɛ gbalɛ lɛ tsɔɔ lɛ, awa Yesu yi waa yɛ shikpɔŋ nɛɛ nɔ. “Amɛfɛ lajɔ amɛshwie ehiɛ,” taakɛ bɔfo Mateo ŋma lɛ. ‘Mɛi krokomɛi hu gbala ehiɛ ma.’ (Mateo 26:67) Jamɔ mli hiɛnyiɛlɔi lɛ ji mɛi ni fee lɛ enɛ yɛ Hehoo gbɛkɛ lɛ, yɛ afi 33 Ŋ.B. Enɔ jetsɛremɔ lɛ, Yesu tsɔ ekotosɛɛ eha yilɔi lɛ, beni Roma asraafoi lɛ je gbɛ amɛyi lɛ waa dani amɛyasɛŋ lɛ yɛ tso nɔ koni egbo lɛ.—Yohane 19:1-3, 16-23.
6. Mɛni tsɔɔ akɛ Yesu elaajeee hekɛnɔfɔɔ yɛ e-Tsɔɔlɔ lɛ mli kɔkɔɔkɔ, ni mɛɛ gbɛ nɔ awo ehekɛnɔfɔɔ lɛ he nyɔmɔ yɛ?
6 Bi lɛ, ni atsɔɔ lɛ nii jogbaŋŋ kɛtsɔ hiɛ momo lɛ, elaajeee hekɛnɔfɔɔ ni eyɔɔ yɛ e-Tsɔɔlɔ lɛ mli lɛ kɔkɔɔkɔ. Enɛ jeɔ kpo yɛ nɔ ni ekɛɛ kɛtsa nɔ lɛ mli, taakɛ gbalɛ lɛ tsɔɔ lɛ: “Shi Nuntsɔ Yehowa yeɔ buaa mi, hewɔ lɛ mihiɛ eshwieko shi.” (Yesaia 50:7) Awo hekɛnɔfɔɔ ni Yesu yɔɔ yɛ e-Tsɔɔlɔ lɛ mli lɛ he nyɔmɔ babaoo diɛŋtsɛ. E-Tsɛ wo enɔ gojoo, ni ejɔɔ lɛ kɛ gbɛhe ni nɔ kwɔ kɛteke Nyɔŋmɔ tsuji krokomɛi fɛɛ agbɛhei. (Filipibii 2:5-11) Asaa jɔɔmɔi ni yɔɔ nyam ato aha wɔ hu kɛji wɔkɛ toiboo kpɛtɛ Yehowa nitsɔɔmɔ he ni ‘wɔkuuu wɔsɛɛ’ lɛ. Ha wɔkwɛ bɔ ni akɛ nakai nitsɔɔmɔ lɛ eha aahu kɛbashi wɔgbii nɛɛ amli lɛ.
Nitsɔɔmɔ Gbɛjianɔtoo ni Alɛɛ Mli
7. Te Yehowa etsu enitsɔɔmɔ yɛ shikpɔŋ nɛɛ nɔ lɛ he nii eha tɛŋŋ?
7 Taakɛ wɔna kɛtsɔ hiɛ lɛ, Yehowa kɛ e-Najiaŋdamɔlɔ ni yɔɔ shikpɔŋ nɛɛ nɔ, ni ji Yesu Kristo tsu nii ni ekɛtsu ŋwɛi nitsɔɔmɔ he nii yɛ klɛŋklɛŋ afii oha lɛ mli. (Yohane 16:27, 28) Yesu gbala jwɛŋmɔ kɛtee Nyɔŋmɔ Wiemɔ lɛ nɔ be fɛɛ be akɛ enitsɔɔmɔ lɛ jɛɛhe, ni ekɛfee nɔkwɛmɔ nɔ efɔ shi eha mɛi ni etsɔɔ amɛ nii lɛ. (Mateo 4:4, 7, 10; 21:13; 26:24, 31) Yɛ sɛɛ mli lɛ, atsu Yehowa nitsɔɔmɔ he nii yɛ shikpɔŋ lɛ nɔ kɛtsɔ mɛi ni atsɔɔ amɛ nii nɛɛ asɔɔmɔ nitsumɔ lɛ nɔ. Kaimɔ akɛ Yesu fã amɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Kɛ amɛfee mɛi kaselɔi lɛ, mɛnɛɛmɛi batsɔmɔɔ “Nyɔŋmɔ we, . . . Nyɔŋmɔ hiɛkalɔ lɛ asafo lɛ” fã. (1 Timoteo 3:15) Afee amɛ asafoi aŋkroaŋkroi hu ni Yehowa tsɔɔ amɛ nii yɛ mli. (Bɔfoi lɛ Asaji 14:23; 15:41; 16:5; 1 Korintobii 11:16) Ani ŋwɛi nitsɔɔmɔ yɛ nakai gbɛ nɔ etsa nɔ aahu kɛbashi wɔgbii nɛɛ amli?
8. Mɛɛ gbɛ nɔ Yesu tsɔɔ yɛ akɛ abaakudɔ shiɛmɔ nitsumɔ lɛ yɛ shikpɔŋ lɛ nɔ dani naagbee lɛ baaba?
8 Hɛɛ, etsa nɔ nakai! Beni eshwɛ gbii etɛ ni Yesu baagbo lɛ, egba efɔ shi akɛ abaatsu shiɛmɔ nitsumɔ kpele ko dani nibii agbɛjianɔtoo nɛɛ naagbee lɛ baaba. Ekɛɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” Yesu tee nɔ etsɔɔ gbɛ ni abaatsɔ nɔ akudɔ nɛkɛ jeŋ muu fɛɛ shiɛmɔ kɛ nitsɔɔmɔ gbɛjianɔtoo nɛɛ. Ewie “tsulɔ anɔkwafo kɛ nilelɔ” ni baasɔmɔ akɛ gbɛ, loo dɛŋdade, koni eha E-tsuji lɛ mumɔŋ niyenii lɛ he. (Mateo 24:14, 45-47) Yehowa Nyɔŋmɔ kɛ “tsulɔ” nɛɛ etsu nii ni ekwɛ Maŋtsɛyeli lɛ he nibii anɔ yɛ shikpɔŋ lɛ nɔ fɛɛ.
9. Namɛi feɔ tsulɔ anɔkwafo kɛ nilelɔi lɛ?
9 Ŋmɛnɛ, mɛi ni feɔ tsulɔ anɔkwafo kɛ nilelɔ lɛ ji Maŋtsɛyeli niyelɔi lɛ ateŋ shwɛɛnii lɛ. Mɛnɛɛmɛi ji Kristofoi ni afɔ amɛ mu, mɛi 144,000 lɛ ateŋ mɛi ni eshwɛ yɛ shikpɔŋ lɛ nɔ, ni ji “Kristo nii,” ni amɛji “Abraham seshibii” lɛ fã lɛ. (Galatabii 3:16, 29; Kpojiemɔ 14:1-3) Te ooofee tɛŋŋ ole tsulɔ anɔkwafo kɛ nilelɔ? Titri lɛ kɛtsɔ nitsumɔ ni amɛtsuɔ kɛ bɔ ni amɛkɛ amɛhe kpɛtɛɔ Nyɔŋmɔ Wiemɔ, Biblia lɛ he gbagbalii lɛ nɔ.
10. Mɛɛ dɛŋdadei tsulɔ kuu lɛ kɛtsuɔ nii ni ekɛhaa aleɔ Yehowa nitsɔɔmɔi lɛ?
10 Yehowa kɛ “tsulɔ” nɛɛ tsuɔ nii akɛ gbɛ ni etsɔɔ nɔ etsɔɔ gbɔmɛi anii ŋmɛnɛ. Mɛi ni fata tsulɔ kuu lɛ he lɛ kpɛlɛ gbɛi Yehowa Odasefoi lɛ nɔ yɛ afi 1931 mli. Kɛjɛ nakai beaŋ kɛbaa nɛɛ, mɛi akpekpei abɔ ebafata amɛhe ni amɛkpɛlɛ nakai gbɛi lɛ nɔ, ni ámɛbafata he kɛmiijaje Nyɔŋmɔ Maŋtsɛyeli lɛ. Nɛkɛ wolo tɛtrɛɛ, Buu-Mɔɔ Eetswa Yehowa Maŋtsɛyeli he Adafi nɛɛ ji dɛŋdade titri ni “tsulɔ” lɛ kɛtsuɔ nii yɛ nitsɔɔmɔ nitsumɔ lɛ mli. Shi, amɛkɛ woji krokomɛi hu tsuɔ nii, tamɔ woji wuji, woji bibii, dɛhiɛmɔ woji, kɛ Awake! wolo tɛtrɛɛ lɛ.
11. Mɛɛ skul sɔrɔtoi “tsulɔ” lɛ eto he gbɛjianɔ, ni mɛɛ yiŋtoo skul sɔrɔtoi nɛɛ eko fɛɛ eko tsuɔ he nii?
11 Kɛfata he lɛ, “tsulɔ” lɛ feɔ skul sɔrɔtoi hu. Amɛteŋ ekomɛi ji Buu-Mɔɔ Biblia Gilead Skul, ni ji nyɔji enumɔ nikasemɔ ni akɛsaa sɔɔlɔi obalahii kɛ obalayei kɛhaa maŋsɛɛ sanekpakpa shiɛmɔ sɔɔmɔ lɛ, kɛ Sɔɔmɔ Tsɔsemɔ Skul ni heɔ nyɔji enyɔ, ni tsɔseɔ onukpai kɛ asafoŋ sɔɔlɔi ni boteko gbalashihilɛ mli lɛ kɛhaa teokrase nitsumɔi krɛdɛɛi lɛ. Agbɛnɛ hu ayɛ Maŋtsɛyeli Sɔɔmɔ Skul, nɔ mli ni atsɔseɔ Kristofoi onukpai kɛ asafoŋ sɔɔlɔi yɛ be kɛ bei amli yɛ amɛ asafoŋ gbɛnaa nii agbɛfaŋ, kɛ Gbɛgbamɔ Sɔɔmɔ Skul, ni wajeɔ be-fɛɛ sanekpakpa jajelɔi koni amɛnyɛ amɛtsu nii jogbaŋŋ kɛmɔ shi yɛ amɛ shiɛmɔ nitsumɔ lɛ mli lɛ.
12. Mɛni ji nitsɔɔmɔ gbɛjianɔtoo lɛ daa otsi nifeemɔ?
12 Nitsɔɔmɔ gbɛjianɔtoo lɛ he okadi kroko hu ji daa otsi kpeei enumɔ ni afeɔ yɛ Yehowa webii asafoi ni fe 75,500 mli yɛ je lɛŋ fɛɛ lɛ. Ani onaa nɛkɛ kpeei nɛɛ ahe sɛɛ jogbaŋŋ kɛmɔɔ shi bɔ ni ooonyɛ? Ani otsɔɔ bɔ ni oboɔ tsɔsemɔ ni akɛhaa lɛ toi jogbaŋŋ lɛ nɔ otsɔɔ akɛ oheɔ oyeɔ lɛlɛŋ akɛ, kɛ wɔɔkɛɛ lɛ, oyaa Nyɔŋmɔ skul lɛ eko? Ani omumɔŋ hiɛyaa lɛ haa mɛi krokomɛi naa faŋŋ akɛ oyɛ “nikaselɔi alilɛi”?—Yesaia 50:4; 1 Timoteo 4:15, 16.
Atsɔɔ Amɛ nii yɛ Asafoŋ Kpeei Ashishi
13. (a) Mɛni ji gbɛ ko ni he hiaa ni Yehowa tsɔɔ nɔ etsɔɔ ewebii anii ŋmɛnɛ? (b) Mɛɛ gbɛ nɔ wɔɔtsɔ wɔtsɔɔ hiɛsɔɔ kɛha Buu-Mɔɔ lɛ?
13 Yehowa tsɔɔ ewebii anii, titri lɛ kɛtsɔ Buu-Mɔɔ ni akɛtsuɔ nii akɛ nitsɔɔmɔ yelikɛbuamɔ nɔ, yɛ daa otsi Biblia kasemɔ mli lɛ nɔ. Ani obuɔ kpee nɛɛ akɛ he ko ni Yehowa baanyɛ atsɔɔ bo nii yɛ? Eyɛ mli akɛ Yesaia 50:4 kɔɔ Yesu he titri moŋ, shi ebaanyɛ ekɔ mɛi fɛɛ ni haa gbɛjianɔ ni Nyɔŋmɔ eto koni wɔna “nikaselɔi alilɛi” lɛ he baa sɛɛnamɔ kɛhaa amɛ lɛ he. Gbɛ kome ni obaanyɛ otsɔ nɔ otsɔɔ akɛ obuɔ Buu-Mɔɔ lɛ akɛ ehe yɛ sɛɛnamɔ waa ji ni okane eko fɛɛ eko ni onine baashɛ nɔ lɛ amrɔ nɔŋŋ. No sɛɛ lɛ, kɛ aakase Buu-Mɔɔ lɛ yɛ asafo lɛ mli lɛ, obaanyɛ otsɔɔ hiɛsɔɔ ni oyɔɔ kɛha Yehowa kɛtsɔ jɛmɛ ni ooohi, kɛ agbɛnɛ kɛtsɔ ohe ni ooosaa akɛ ooojaje ohemɔkɛyeli lɛ otsɔɔ yɛ faŋŋ mli lɛ nɔ.—Hebribii 10:23.
14. (a) Mɛni hewɔ saji ahetoo-hamɔ yɛ kpeei ashishi lɛ ji hegbɛ ni he hiaa waa lɛ? (b) Mɛɛ gbekɛbii asaji ahetoo-hamɔ woɔ mɔ hewalɛ waa?
14 Ani ole akɛ obaanyɛ ona Yehowa nitsɔɔmɔ gbɛjianɔtoo kpele lɛ mli gbɛfaŋnɔ kɛtsɔ saji ahetoo ni oooha yɛ kpeei ashishi lɛ nɔ? Ŋwanejee ko bɛ he akɛ, saji ahetoo ni wɔhaa yɛ kpeei ashishi lɛ ji gbɛ ni he hiaa ni wɔɔnyɛ wɔtsɔ nɔ wɔkanyakanyaa wɔhe kɛha “suɔmɔ kɛ nitsumɔi kpakpai.” (Hebribii 10:24, 25) Ani gbekɛbii hu baanyɛ ana nitsɔɔmɔ gbɛjianɔtoo nɛɛ mli gbɛfaŋnɔ? Hɛɛ, amɛbaanyɛ. Bei pii lɛ, saji ahetoo ni jɛɔ gbekɛbii atsuiŋ lɛ woɔ onukpai hewalɛ. Bei komɛi lɛ, saji ahetoo ni gbekɛbii haa lɛ kanyaa mɛi heei ni baa wɔ kpeei ashishi lɛ ni amɛkɛ hiɛdɔɔ susuɔ Biblia mli anɔkwale lɛ he waa. Gbekɛbii lɛ ekomɛi kɛfeɔ amɛsu akɛ amɛaakane hetoo lɛ tɛɛ kɛjɛ kuku lɛ mli, aloo onukpa ko woɔ amɛtoiŋ kɛkɛ lɛ amɛkɛɛ hetoo lɛ kɛnyiɛ esɛɛ. Shi kɛlɛ, ewoɔ mɔ hewalɛ waa kɛji amɛsaa amɛhe jogbaŋŋ yɛ amɛ saji ahetoo-hamɔ lɛ mli. Saji ahetoo-hamɔ ni tamɔ nɛkɛ woɔ wɔ Tsɔɔlɔ Kpeteŋkpele lɛ kɛ enitsɔɔmɔ gbɛjianɔtoo ni nɔ kwɔ lɛ hiɛ nyam lɛlɛŋ.—Yesaia 30:20, 21.
15. Mɛni fɔlɔi baanyɛ afee ni amɛkɛye amɛbua gbekɛbii lɛ ni amɛha saji ahetoo jogbaŋŋ kɛmɔ shi?
15 Eyɛ miishɛɛ akɛ aaana ni gbekɛbii miitao ni amɛfata he kɛjie wɔ-Nyɔŋmɔ lɛ yi. Yesu hiɛ sɔ yijiemɔ wiemɔi ni jɛ gbekɛbii anaa lɛ waa. (Mateo 21:15, 16) Kristofonyo onukpa ko wie akɛ: “Beni miji gbekɛ lɛ, misumɔɔ ni maha saji ahetoo yɛ Buu-Mɔɔ Nikasemɔ shishi. Kɛ atsɔɔ mi sane hetoo ni maha lɛ, mitsɛ haa mitĩɔ hetoo lɛ mli, kɛ hoo lɛ, shii kpawo.” Ekolɛ kɛ nyɛmiifee weku Biblia mli nikasemɔ lɛ, nyɛ fɔlɔi lɛ baanyɛ aye abua nyɛbii lɛ ni amɛkase saji ahetoo ni amɛbaaha lɛ yɛ amɛ diɛŋtsɛ amɛ wiemɔ mli, yɛ Buu-Mɔɔ lɛ mli kukuji pɔtɛɛ komɛi amli. Nyɛyea nyɛbuaa amɛ ni amɛhiɛ asɔa hegbɛ kpele ni amɛna akɛ amɛaana Yehowa nitsɔɔmɔ gbɛjianɔtoo lɛ mli gbɛfaŋnɔ lɛ.
16. Mɛɛ sɛɛnamɔ ejɛ Teokrase Sɔɔmɔ Skul lɛ mli eba, ni namɛi baanyɛ amɛkɛ amɛhe awo skul lɛ mli?
16 Esa akɛ mɛi ni naa hegbɛ amɛkɛ gbɛtsɔɔmɔ haa kɛ mɛi ni boɔ gbɛtsɔɔmɔ ni akɛhaa lɛ toi lɛ fɛɛ asusu nitsɔɔmɔ ni akɛhaa yɛ Kristofoi akpeei krokomɛi ashishi lɛ he kɛ hiɛdɔɔ diɛŋtsɛ. Nɔ ni fe afii 50 sɔŋŋ nɛ ni Yehowa kɛ daa otsi Teokrase Sɔɔmɔ Skul lɛ etsu nii aahu ni ekɛtsɔse hii kɛ yei akpekpei abɔ koni amɛnyɛ amɛkɛ Maŋtsɛyeli shɛɛ sane lɛ aha ni emɔ shi jogbaŋŋ. Mɛi ni kɛ amɛhe bɔɔ asafo lɛ he daa lɛ baanyɛ amɛkɛ amɛhe awo mli, kɛ mɛi ni amɛbɔi kpeeibaa etsɛko lɛ hu, bei abɔ ni amɛshihilɛ kɛ Kristofoi ashishitoo mlai kpaa gbee lɛ.
17. (a) Mɛɛ yiŋtoo titri hewɔ ato Maŋshiɛmɔ ni ahaa lɛ shishi? (b) Mɛɛ saji esa akɛ mɛi ni haa maŋshiɛmɔ lɛ aha ehi amɛjwɛŋmɔ mli?
17 Nitsɔɔmɔ gbɛjianɔtoo lɛ fa kroko hu ni etsɛ waa ji Maŋshiɛmɔ ni ahaa lɛ. Taakɛ egbɛi lɛ tsɔɔ lɛ, ato kpee nɛɛ shishi titri lɛ, koni eha mɛi ni jeee Odasefoi lɛ ale Biblia mli shishijee tsɔɔmɔi lɛ. Enɛ hewɔ lɛ, ehe hiaa ni mɔ ni haa maŋshiɛmɔ lɛ aha wiemɔ lɛ bɔ ni mɛi ni nuɔ shɛɛ sane lɛ klɛŋklɛŋ kwraa lɛ baanyɛ anu shishi. Enɛ tsɔɔ akɛ esa akɛ etsɔɔ wiemɔi komɛi tamɔ “tooi krokomɛi,” “nyɛmimɛi,” kɛ “shwɛɛnii,” ni ji wiemɔi ni ekolɛ mɛi ni jeee Odasefoi lɛ nuŋ shishi lɛ mli. Akɛni ekolɛ mɛi ni baboɔ Maŋshiɛmɔ lɛ toi lɛ yɛ hemɔkɛyelii loo shihilɛi komɛi ni kɛ Ŋmalɛi lɛ kpaaa gbee kwraa mli—eyɛ mli akɛ akpɛlɛɔ nɔ yɛ adesai ashihilɛ mli ŋmɛnɛ—hewɔ lɛ, esa akɛ wielɔ lɛ kɛ ŋaalee atsu nii ni ekaye nakai hemɔkɛyelii loo shihilɛi lɛ ahe fɛo.—Okɛto 1 Korintobii 9:19-23 he.
18. Mɛɛ daa otsi asafoŋ kpeei krokomɛi hu yɔɔ, ni mɛɛ yiŋtoi ahe nii amɛtsuɔ?
18 Asafo Woloŋ Nikasemɔ lɛ ji kpee ko ni akaseɔ woji ni afee yɛ tsulɔ anɔkwafo kɛ nilelɔ lɛ kudɔmɔ shishi, kɛfataa Biblia lɛ he daa otsi lɛ yɛ. Amrɔ nɛɛ Kpojiemɔ—Enaagbee Kwraa lɛ Ebɛŋkɛ! ji wolo ni akaseɔ yɛ shikpɔji pii anɔ. Ato Sɔɔmɔ Kpee lɛ he gbɛjianɔ koni ewaje Yehowa webii koni amɛna Maŋtsɛyeli sanekpakpa lɛ shiɛmɔ mli gbɛfaŋnɔ kɛmɔ shi, ni amɛfee mɛi krokomɛi kaselɔi.—Mateo 28:19, 20; Marko 13:10.
Atsɔɔ Amɛ Nii yɛ Kpeei Wuji Ashishi
19. Mɛɛ henaabuamɔi wuji ahe gbɛjianɔ “tsulɔ” lɛ toɔ daa afi?
19 Nɔ ni fe afii oha sɔŋŋ nɛ ni ‘tsulɔ anɔkwafo’ lɛ eto kpeei wuji kɛ kpeei bibii ahe gbɛjianɔ kɛha anɔkwa Kristofoi anitsɔɔmɔ kɛ amɛ hewalɛwoo yɛ gbɛ krɛdɛɛ nɔ. Amrɔ nɛɛ afeɔ nɛkɛ kpeei wuji nɛɛ etɛ daa afi. Ayɛ gbi-kome kpee ni asafoi ni yɔɔ kpokpaa kome mli lɛ yaa. Yɛ afi lɛ mli lɛ, kpokpaa fɛɛ kpokpaa yɛ gbii enyɔ henaabuamɔ ni atsɛɔ lɛ kpokpaa nɔ kpee. Kɛfata he lɛ, ayɛ henaabuamɔ ko hu ni atsɛɔ lɛ kpokpaa wulu nɔ kpee, ni kpokpai saŋŋ buaa amɛhe naa amɛfeɔ. Yɛ afii komɛi amli lɛ, anyɛɔ afeɔ majimaji ateŋ kpeei wuji. Nɛkɛ henaabuamɔi wuji ni Odasefoi ni ji gbɔi jɛɔ maji pii anɔ amɛbaa nɛɛ woɔ Yehowa webii ahemɔkɛyeli hewalɛ waa diɛŋtsɛ!—Okɛto 5 Mose 16:16 he.
20. Mɛni atee nɔ ama nɔ mi aahu yɛ Yehowa Odasefoi ahenaabuamɔi wuji ashishi?
20 Yɛ 1922 mli, beni mɛi aaashɛ 10,000 kpe yɛ Cedar Point, Ohio, U.S.A. lɛ, wielɔ lɛ hewalɛwoo wiemɔi nɛɛ kanya toibolɔi lɛ akɛ: “Gbii fɛɛ amli gbi lɛ nɛ. Naa, Maŋtsɛ lɛ miiye nɔ! Nyɛji enajiaŋdamɔlɔi ni tswaa ehe adafi. No hewɔ lɛ, nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.” Nɛkɛ kpeei wuji nɛɛ etee nɔ ema shiɛmɔ nitsumɔ lɛ nɔ mi be fɛɛ be. Akɛ nɔkwɛmɔ nɔ lɛ, akɛ adafitswaa ko ha yɛ majimaji ateŋ kpee ni afee yɛ New York City yɛ 1953 mli lɛ shishi, ni kɔɔ shia-kɛ-shia tsɔsemɔ gbɛjianɔtoo ko ni abaatsu he nii yɛ asafoi fɛɛ amli lɛ shishijee he. Nɛkɛ gbɛjianɔtoo nɛɛ kɛ nitsumɔ na hewalɛ kpakpa yɛ Maŋtsɛyeli shiɛmɔ lɛ nɔ waa yɛ shikpɔji pii anɔ.
Nyɔŋmɔ Etsɔɔ Amɛ Nii Koni Amɛtsɔɔ Nii
21. Mɛɛ hegbɛ wɔsumɔɔ ni wɔkpɛlɛ nɔ, ni wɔlaajeŋ yiŋtoo ni yɔɔ sɛɛ lɛ?
21 Eyɛ faŋŋ akɛ, Yehowa yɛ nitsɔɔmɔ gbɛjianɔtoo ni yɔɔ nyam waa yɛ shikpɔŋ nɛɛ nɔ ŋmɛnɛ! Nyɔŋmɔ baanyɛ atsɔɔ mɛi fɛɛ ni kɛtsuɔ nii lɛ nii, hɛɛ, amɛbaanyɛ amɛfata mɛi ni aha amɛ “nikaselɔi alilɛi” lɛ ahe. Mɛɛ hegbɛ eji nɛkɛ, akɛ kɛ wɔɔkɛɛ lɛ, mɔ ko aaaya Nyɔŋmɔ skul lɛ eko! Shi kɛlɛ, kɛ wɔmiikpɛlɛ hegbɛ nɛɛ nɔ lɛ, esaaa ni wɔlaajeɔ yiŋtoo ni yɔɔ sɛɛ lɛ. Yehowa tsɔɔ Yesu nii koni lɛ hu enyɛ etsɔɔ mɛi krokomɛi anii, ni Yesu tsɔɔ ekaselɔi lɛ anii koni amɛ hu amɛnyɛ amɛtsu nakai nitsumɔ lɛ nɔŋŋ taakɛ etsuɔ lɛ, shi amɛbaatsu babaoo po fe lɛ. Nakai nɔŋŋ, aatsɔse wɔ yɛ Yehowa nitsɔɔmɔ gbɛjianɔtoo kpele lɛ mli kɛ yiŋtoo akɛ wɔ hu wɔtsɔɔ mɛi krokomɛi anii.—Yohane 6:45; 14:12; 2 Korintobii 5:20, 21; 6:1; 2 Timoteo 2:2.
22. (a) Mɛɛ naagba ko Mose kɛ Yeremia yɔɔ, shi te atsu he nii aha tɛŋŋ? (b) Mɛɛ nɔmimaa wɔbaanyɛ wɔna akɛ Nyɔŋmɔ baakwɛ ni atsu Maŋtsɛyeli shiɛmɔ nitsumɔ lɛ pɛpɛɛpɛ?
22 Ani okɛɔ, taakɛ Mose kɛɛ lɛ, akɛ, “Minaa tseee,” aloo taakɛ Yeremia kɛɛ lɛ, akɛ, “Mileee wiemɔ”? Yehowa baaye ebua bo taakɛ eye ebua amɛ lɛ. Ekɛɛ Mose akɛ: “Mikɛ onaabu aaahi shi.” Ni ekɛɛ Yeremia hu akɛ: “Kaashe . . . gbeyei, ejaakɛ mikɛo yɛ.” (2 Mose 4:10-12; Yeremia 1:6-8) Beni jamɔ mli hiɛnyiɛlɔi lɛ ka akɛ amɛaaha Yesu kaselɔi lɛ akpa wiemɔ lɛ, ewie akɛ: “Kɛji mɛnɛɛmɛi aaabu amɛnaa lɛ, no lɛ tɛi aaabolɔ.” (Luka 19:40) Shi ehe ehiaaa ni tɛi abolɔ yɛ nakai beaŋ, ni ehe ehiaaa ni amɛbolɔ amrɔ nɛɛ hu, ejaakɛ Yehowa kɛ emɛi ni etsɔɔ amɛ nii lɛ alilɛi miitsu nii ni amɛmiijaje e-Maŋtsɛyeli shɛɛ sane lɛ.
Ani Obaanyɛ Oha Hetoo?
◻ Mɛɛ Tsɔɔlɔ kɛ bi nikaselɔ wekukpaa kpakpa ko amaa nɔ mi yɛ Yesaia yitso 50?
◻ Mɛɛ gbɛ nɔ Yehowa etsu nitsɔɔmɔ gbɛjianɔtoo ko ni mli lɛɛ he nii yɛ?
◻ Mɛni ji Yehowa nitsɔɔmɔ gbɛjianɔtoo lɛ fãi komɛi?
◻ Mɛni hewɔ eji hegbɛ kpele akɛ aaana Yehowa nitsɔɔmɔ gbɛjianɔtoo lɛ mli gbɛfaŋnɔ lɛ?
[Mfoniri ni yɔɔ baafa 16]
Bei pii lɛ, saji ahetoo ni gbekɛbii jɛɔ amɛtsuiŋ amɛhaa lɛ woɔ onukpai hewalɛ