Nyɛyaa nɔ Nyɛbɔlɔa kɛ Nyamɔ Yɛ Ekomfeemɔ Mli
“Omii ashɛ ohe, ni obolɔ kɛ nyamɔ yɛ ekomefeemɔ mli.”—YESAIA 52:9, NW.
1. Mɛni hewɔ Yehowa Odasefoi yɔɔ “ekomefeemɔ mli” bianɛ lɛ?
1 YƐ EKOMEFEEMO MLI! Wiemɔi komekomɛi ashishitsɔɔmɔ wolo tsɔɔ nɛkɛ wiemɔ nɛɛ shishi akɛ “yɛ gbeekpamɔ ni yeɔ emuu mli; koni akpa gbee pɛpɛɛpɛ.” Yehowa Odasefoi sɔmɔɔ yɛ ekomefeemɔ mli ejaakɛ amɛhiɛ Kristo jwɛŋmɔ lɛ, ni amɛfee ekome kɛmiiwó Yehowa gbɛi lɛ nɔ gojoo. Akɛni Yehowa jɔɔmɔ yɔɔ amɛnɔ hewɔ lɛ, okadi shikpɔŋ ni amɛhiɔ nɔ lɛ po naa miishɛɛ, enɔ nibii fɛɛ miibolɔ kɛ nyamɔ. Enɛɛmɛi fɛɛ kɛ bɔfo Paulo sɔlemɔ wiemɔi lɛ kpaa gbee: “Shi tsuishiŋmɛɛ kɛ miishɛjemɔ Nyɔŋmɔ lɛ aha nyɛna jwɛŋmɔ kome yɛ nyɛteŋ tamɔ Kristo Yesu; koni nyɛkɛ jwɛŋmɔ kome kɛ naabu kome awo Nyɔŋmɔ kɛ wɔ-Nuŋtsɔ Yesu Kristo tsɛ lɛ hiɛ nyam.”—Romabii 15:5, 6; Yohane 17:4, 6, 20, 21.
2. (a) Taakɛ 1 Korintobii 1:10 kɛ Efesobii 4:4-6 tsɔɔ lɛ, mɛni hewɔ bulɔi lɛ naa “hiɛ kɛ hiɛ” lɛ? (b) Namɛi hu haa bolɔmɔ kɛ nyamɔ nɛɛ jijeɔ lɛ, ni yɛ mɛɛ gbɛ nɔ?
2 ‘Awo Nyɔŋmɔ hiɛ nyam!’ No ji nɔ ni Yehowa “bulɔi” ni efee ekome lɛ feɔ ŋmɛnɛ. No hewɔ lɛ amɛhaa gbalɛ nɛɛ baa mli: “Amɛkɛ ekomefeemɔ bolɔɔ kɛ nyamɔ; ejaakɛ hiɛ kɛ hiɛ amɛaana beni Yehowa buaa Zion naa kɛbaa lɛ.” (Yesaia 52:8, NW) Amɛnaa “hiɛ kɛ hiɛ,” ejaakɛ ‘amɛ fɛɛ amɛyitsoŋ kɛ amɛjwɛŋmɔ efee ekome.’ (1 Korintobii 1:10; kwɛmɔ Efesobii 4:4-6.) Ni agbɛnɛ, yɛ be mli ni “asafo babaoo” lɛ haa ‘nyamɔ bolɔmɔ’ lɛ jijeɔ lɛ, jeŋ muu fɛɛ bolɔmɔ lɛ teɔ shi kɛ naawalɛ ni ejijeɔ kɛyaa ŋwɛi shɔŋŋ.—Kpojiemɔ 7:9, 10, 15.
3. Yɛ mɛɛ gbɛ nɔ Yehowa gbɛjianɔtoo ni yɔɔ shikpɔŋ nɔ lɛ ejie miishɛɛ ni ŋwɛi asafoi lɛ yɔɔ lɛ kpo amɛtsɔɔ?
3 Nyɔŋmɔ ŋwɛi gbɛjianɔtoo lɛ, ni bɔfoi krɔŋkrɔŋi “akpei nyɔŋma toi akpei nyɔŋma” fata he lɛ woɔ “amɛgbeei anɔ” yɛ yijiemɔ ni amɛkɛhaa Yehowa akɛ Bɔlɔ kpeteŋkpele lɛ kɛ “Toobi” Yesu Kristo lɛ mli, (Kpojiemɔ 5:11, 12; 4:11) Nakai nɔŋŋ hu ato Nyɔŋmɔ webii ni yɔɔ shikpɔŋ nɔ lɛ gbɛjianɔ aha sɔɔmɔ krɔŋkrɔŋ ni ŋɔɔ. Taakɛ bɔ ni okadi shikpɔŋ ni amɛhiɔ nɔ lɛ hũ “nyãa” lɛ. Nɔ ni gbalɔ lɛ kɛɔ nɛ: “Omii ashɛ ohe ni obolɔ kɛ nyamɔ yɛ ekomefeemɔ mli, nyɛ Yerusalem tsukoi lɛ, ejaakɛ Yehowa eshɛje ewebii amii; ekpɔ Yerusalem.” (Yesaia 52:9, NW) Yehowa kɛ ewebii lɛ eba, “ŋwɛi Yerusalem” ni ji eŋwɛi gbɛjianɔtoo lɛ najiaŋdamɔlɔi ni yɔɔ shikpɔŋ nɔ lɛ, kɛjɛ hiɛkpatamɔ ni ba amɛnɔ yɛ Jeŋ Ta I be lɛ mli lɛ mli, ni ‘amɛbolɔmɔ yɛ nyamɔ mli’ yɛ ekomefeemɔ kwra mli lɛ eha mlilɛɛmɔ yɛ jeŋ muu fɛɛ etee nɔ kɛbashi ŋmɛnɛ gbi nɛɛ!—Galatabii 4:26, 27; Yesaia 52:8, NW.
4. Yehowa “ejie enine krɔŋkrɔŋ lɛ he” momo yɛ mɛɛ gbɛ nɔ, ni mɛɛ hekɛnɔfɔɔ wɔsɛɛ be kɛhaa wɔ?
4 Gbalɛ lɛ yaa nɔ ekɛɔ akɛ: “Yehowa ejie enine krɔŋkrɔŋ lɛ he yɛ jeŋmaji lɛ fɛɛ ahiɛ, koni shikpɔŋ lɛ naagbeehei lɛ fɛɛ ana wɔ-Nyɔŋmɔ lɛ yiwalaheremɔ lɛ.” Yehowa tsu nii lɛlɛŋ yɛ ewebii lɛ agbɛfaŋ yɛ nakai “naagbee gbii” lɛ shishijee lɛ mli, ni etsɛŋ, yɛ Harmagedon lɛ, ebaajie ‘enine ni yɔɔ krɔŋkrɔŋ lɛ he,’ ni ekɛ yiwalaheremɔ abaha ewebii ni eto amɛ gbɛjianɔ lɛ. Yɛ nakai be lɛ mli lɛ, ‘jeŋmaji babaoo baaná ale akɛ lɛ ji Yehowa.’—Yesaia 52:10; 12:2; Ezekiel 38:23.
5, 6. (a) Mɛni hewɔ ni ehe hiaa akɛ aaatsu Nyɔŋmɔ nitsumɔ lɛ agbe naa lɛ? (b) Gbɛjianɔtoo lɛ etsu nii kɛ yiŋtoo akɛ aaaye odase babaoo yɛ mɛɛ gbɛ nɔ?
5 Yehowa fɔbuu kojomɔ lɛ ebɛŋkɛ! “Ni eeye oyai naakpa.” (Zefania 1:14) Yɛ nakai beaŋ nɔŋŋ lɛ, esa akɛ ashiɛ nɔ ko ni hi jogbaŋŋ he sanekpakpa” lɛ akɛkpa shikpɔŋ muu lɛ fɛɛ nɔ. (Yesaia 52:7, NW) Bɔni afee ni atsu nitsumɔ lɛ agbe naa lɛ, Yehowa asafo lɛ kɛ mla naa nitsumɔ gbɛjianɔtooi sɔrɔtoi tsuɔ nii, tamɔ Watch Tower Bible and Tract Society of Pennsylvania nɛkɛ, ni mɛnɛɛmɛi kwɛɔ Yehowa Odasefoi asafoi ni yɔɔ nitsumɔhe niji 94 ni yɔɔ jeŋ fɛɛ lɛ anɔ. Yɛ afii enumɔ ni eho nɛɛ amli lɛ, woji akalamɔ kɛ nitsumɔi krokomɛi ni yaa nɔ yɛ nɛkɛ nitsumɔhe niji nɛɛ amli lɛ amli elɛɛ, no hewɔ lɛ Asafo lɛ ebaje gbɛhe ni hi mli fe be fɛɛ agbɛnɛ koni ‘ejaje toiŋjɔlɛ kɛ yiwalaheremɔ lɛ.’
6 Yɛ nyɛsɛɛ afi ni ho lɛ mli lɛ, ama tsu agbo kroko afata Asafo lɛ nitsumɔhe ni yɔɔ Watchtower Farms, New York State lɛ he, ni aalɛɛ Betel shia ni yɔɔ jɛmɛ lɛ hu mli. Akɛ offset ni ji woji tɛtrɛbii akalamɔ tsɔne eba jɛmɛ, ni tsɔne nɛɛ baanyɛ akala, kɛ hoo lɛ, woji tɛtrɛbii 400,000 gbi kome. Afamɔ Asafo lɛ woji akalamɔ tsɔnei memeji lɛ pii ni akɛfee offset ni ji mfonirishamɔ woji afeemɔ tsɔnei. Akɛ enɛɛmɛi miitsu nii bianɛ yɛ Buu Mɔɔ Asafo lɛ nitsumɔhe niji ni yɔɔ jeŋ fɛɛ lɛ babaoo mli, kɛ agbɛnɛ yɛ Brooklyn kɛ Watchtower Farms Nitsumɔ lɛ mlilɛɛmɔ miiya nɔ yɛ jeŋ fɛɛ. Akɛ nɔkwɛmɔnɔ lɛ, nitsumɔhe nine ni yɔɔ Germany lɛ kɛ offset tsɔnei nɛɛ enyɔ ni feɔ woji oyayaayai miitsu ni bianɛ, ni Japan nitsumɔhe nine lɛ miihé ekɛ nɔ ni ji etɛ ni baanyɛ afee woji tɛtrɛbii 60,000 ŋmlɛtswaa kome aje nitsumɔ shishi.
Woji Tɛtrɛbii Nyiɛ Hiɛ!
7. Mɛɛ nɔyaa loo shweremɔ ba yɛ woji tɛtrɛbii lɛ ashɛɛ mli yɛ 1983?
7 Mɛni hewɔ alɛɛɔ teokrase woji akalamɔ mli babaoo yɛ nɛkɛ gbɛ nɔ lɛ? Fɛɛ jɛ ekaa ni nyɛ ni ji nyɛmimɛi lɛ nyɛkɛtsuɔ nii yɛ sɔɔmɔ lɛ mli lɛ hewɔ. Yɛ nyɛsɛɛ afi ni ho lɛ mli lɛ, nyɛha mɛi shɛ Buu-Mɔɔ lɛ kɛ Awake! woji tɛtrɛbii lɛ ekomekomei 1,756,153, ni enɛ ji oha mlijaa 28 nɔyaa ni fe nyɛsɛɛ afi lɛ nɔ.
8. Yɛ mɛɛ gbɛ nɔ sɛɛnamɔ ni yɔɔ wɔ woji tɛtrɛbii lɛ ahe lɛ ni áyoo lɛ kɛ nibii kpakpai eba?
8 Kpokpaa nɔ kwɛlɔ ko ni yɔɔ U.S. Amerika lɛ ŋma akɛ sane ni hiɛ baafai ejwɛ ni kɔɔ woji tɛtrɛbii ahe ni aŋma awo June 1983 Wɔ Maŋtsɛyeli Sɔɔmɔ lɛ mli lɛ “ná wɔ fɛɛ wɔnɔ hewalɛ waa.” Ekɛɛ akɛ ebɛ naakpɛɛ akɛ kuu ko ni kɛ kar tee shiɛmɔ aaaku amɛsɛɛ amɛba ni amɛna nɔ ni ashɛ lɛ ejwɛ loo enumɔ. Odasefonyo gbɛgbalɔ ko ye etsutsu jwɛŋmɔ ni ejaaa ni ehiɛ lɛ nɔ kunim ni enine shɛ nɛɛhu ni ashɛ lɛ ehee nɔ yɛ otsi kome pɛ mli. Japan nitsumɔhe nine lɛ bɔ amaniɛ akɛ ehee ni ashɛ yɛ May kɛ June mli lɛ fɛɛ fee 70,115—kɛ akɛto 49,016 ni ana yɛ nyɔji enyɔ ta ni afa lɛ mli lɛ he—yɛ be mli ni afi shɛɛ po jara efee 1,800 yen (₵225) lɛ! Shi anyɛŋ akɛ sɛɛnamɔ ni yɔɔ wɔ woji tɛtrɛbi lɛ ahe yɛ mumɔŋ gbɛfaŋ lɛ ato shika he, anyɛŋ akɛto jwiɛtɛi loo shika ŋmiiŋmi ni átsa yɛ shikpɔŋ he. (Abɛi 8:10, 11) Eba akɛ wɔɔya nɔ wɔjie ekaa kpo yɛ nɔ ni ashɛɔ ni wɔkɛhaa mɛi lɛ mli yɛ 1984!
9. Mɛɛ gbɛ nɔ aaatsɔ aja woji tɛtrɛbii lɛ babaoo?
9 Shi woji tɛtrɛbii ni wɔja yɛ 1983 mli lɛ hu? Ehi jogbaŋŋ, shi enɛ ji wɔ sɔɔmɔ lɛ fa ko ni eyako hiɛ. Mɛni wɔbaanyɛ wɔfee yɛ enɛ he? Shikome ekoŋŋ lɛ, esa akɛ wɔhiɛ ni aaasɔ wɔ woji tɛtrɛbi lɛ amli saji waa lɛ akanya wɔ koni wɔhe ni wɔkɛha mɛi yɛ be fɛɛ mli, titri lɛ, yɛ wɔ daa otsi Woji Tɛtrɛbii Agbi lɛ nɔ. Wɔkɛɛ “daa otsi” Woji Tɛtrɛbii Agbi, ejaakɛ wɔ nyɛmimɛi ni yɔɔ jeŋ fɛɛ lɛ ateŋ mɛi pii miiná nitsumɔ nɛɛ mli gbɛfaŋnɔ kɛ miishɛɛ daa. Nitsumɔhe niji ni jɛkɛ waa tamɔ Kenya kɛ Hong Kong ebi akɛ ajie Hɔɔ ni ji enyɔ kɛ ejwɛ kɛha woji tɛtrɛbii anitsumɔ lɛ kɛjɛ Asafo lɛ kalanda lɛ nɔ, ejaakɛ enɛ baaha woji tɛtrɛbii abɔ ni amɛjaa yɛ amɛshikpɔŋkukuji lɛ amli lɛ anɔ agbɔ, kɛ hoo lɛ emli baaja enyɔ. No hewɔ lɛ bɔ fɛɛ bɔ ni eji lɛ, mɔ fɛɛ mɔ kɛ ehe awo sɔɔmɔ ni miishɛɛ yɔɔ mli nɛɛ mli yɛ Hɔɔ ni ji enyɔ kɛ ejwɛ lɛ nɔ, shi mɛni hewɔ oyaaa ohiɛ bianɛ ni oyashɛ oti kroko ni ji daa Hɔɔ kɛha woji tɛtrɛbii asɔɔmɔ nitsumɔ—yɛ shia kɛ shia, yɛ gbɛjegbɛi anɔ kɛ jara nɔ kɛ mɛi ni heɔ woji tɛtrɛbii lɛ daa he!—Jajelɔ 11:1.
10. Mɛɛ sɛɛnamɔ wolo tɛtrɛɛ lɛ kɛbaha Awake! kanelɔ ko?
10 Yɛ be babaoo mli lɛ efɔɔ kaa akɛ wolo tɛtrɛɛ kome pɛ teeɔ miishɛɛ shi, ni nɔ ni jɛɔ mli baa yɛ naagbee ji “gwantɛŋ” kroko ni akɛ lɛ fataa “tookwɛlɔ kpakpa” lɛ “kuu” lɛ he. (Yohane 10:14, 16) Odaseyeli mli niiashikpamɔ ni nyiɛ sɛɛ nɛɛ tsɔɔ bɔ ni enɛ ji:
Gbi ko lɛ, Maŋtsɛyeli shiɛlɔ ko ni yɔɔ Reunion miiho yɛ daatɔlɔ ko ni ehe gbɛi waa shia hiɛ, ni nuu nɛɛ tsɛ lɛ. Ekɛ miishɛɛ kɛɛ Odasefonyo lɛ akɛ, “Owura, mikpa daatɔɔ.” Akɛni mɛi pii yaa helatsamɔhe yɛ Reunion koni aye ebua amɛ ni amɛkpa daatɔɔ hewɔ lɛ, Odasefonyo lɛ bi lɛ akɛ, “Mɛɛ helatsamɔhe otee?” Nuu lɛ ha hetoo akɛ, “Miyaaa helatsamɔhe; mikane Awake! [July 8, 1982 ni kɔɔ daa ni wa numɔ he] lɛ, ni mikpa daatɔɔ.” Nyɔji enyɔ eho momo, yɛ be mli ni aŋma amaniɛbɔɔ nɛɛ, ni Odasefonyo lɛ kɛ lɛ eje shia Biblia mli nikasemɔ shishi yɛ wolo, Obaanyɛ Ohi Shi Kɛya, Naanɔ yɛ Paradeiso yɛ Shikpɔŋ Nɔ ni Buu-Mɔɔ Asafo lɛ fee lɛ mli. Wolo tɛtrɛɛ kome pɛ tsu enɛ!
Enɛ kɛ wɔ boteɔ sane kroko mli:
SHI BIBLIA MLI NIKASEMƆI MIIFA!
11. Mɛɛ hewalɛ Obaanyɛ Ohi Shi Kɛya Naanɔ wolo lɛ ena yɛ nii ni akɛtsuɔ yɛ je lɛŋ lɛ nɔ?
11 Yɛ June 1982 mli lɛ, Buu Mɔɔ Asafo lɛ jie wɔ wolo ko kɛ emli mfoniri fɛfɛji babaoo ni ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ kpo. Beni shɛɔ 1983 September teŋgbɛ lɛ, no mli lɛ akala woji nɛɛ ekomekomei 14,663,229 yɛ Asafo lɛ nitsumɔhei ni yɔɔ jeŋ fɛɛ lɛ momo. Amrɔ nɛɛ áfee yɛ wiemɔi 55 mli. Ni mɛɛ hewalɛ wolo nɛɛ ena yɛ nii ni akɛtsuɔ yɛ je lɛŋ lɛ nɔ? Ena je lɛ nɔ hewalɛ kpele! Buu Mɔɔ nitsumɔhe nine ni yɔɔ Puerto Rico lɛ ŋma yɛ nii ni atsuɔ yɛ Spanishbii ateŋ lɛ he yɛ jɛmɛ:
‘Wɔnine shɛ Obaanyɛ Ohi Shi Kɛya Naanɔ woji lɛ 30,000 nɔ yɛ August mli, shi etsɛɛɛ ni wɔkɛ enɛɛmɛi fɛɛ ha, wɔnine shɛ 30,000 kroko nɔ yɛ October mli. Beni shɛɔ February 1983 lɛ, eko kwraa bɛ, shi yɛ March kɛ June lɛ, wɔnine shɛ 30,000 kroko nɔ, amrɔ nɛɛ eshwɛ aaafee 10,000 pɛ, shi wɔmiikpa woji nɛɛ 35,000 krokomɛi agbɛ.’
12. (a) Ajie hiɛsɔɔ kpo yɛ wolo nɛɛ he yɛ mɛɛ gbɛ nɔ? (b) Kɛ wɔmiiwie akɔntaabuu tao ni yɔɔ baafai 20-23 he lɛ, ani onaa maji komɛi ni Biblia kasemɔi ni afeɔ lɛ fa fe shiɛlɔi ayibɔ lɛ?
12 Nuu onukpa ko ni yɔɔ Lapland, ni lɛ diɛŋtsɛ lɛ ejeee Odasefonyo ŋma eyaha Buu Mɔɔ nitsumɔhe nine ni yɔɔ Finland lɛ:
“Mikane jamɔ he woji pii. Shi misusuɔ akɛ, nyɛ wolo, Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ji nɔ ni hi fe fɛɛ lɛ ateŋ ekome. Miisumɔ ni nyɛkɛ ekomekomei 11 amaje mi koni mikɛha minanemɛi.”
Ŋwanejee ko bɛ he akɛ nɛkɛ wolo nɛɛ ye bua ni eha shia Biblia mli nikasemɔi ni afee yɛ 1983 sɔɔmɔ afi lɛ mli lɛ fa babaoo. Yɛ jeŋ fɛɛ lɛ, akɛ mɛi heei ni yɔɔ wiemɔ lɛ he miishɛɛ miifee nikasemɔi 1,797,112 daa nyɔŋ nɔ—eji oha mlijaa 13.3 nɔyaa fe nyɛsɛɛ afi ni ji 1982 ni ji nikasemɔ 1,586,293 lɛ.
13. Mɛɛ gbɛ nɔ Obaanyɛ Ohi Shi Kɛya Naanɔ wolo lɛ aaatsɔ aye abua Odasefoi ni he ejɔ yɛ mumɔŋ lɛ?
13 Ani oosumɔ ni ekase gbɛ ni oootsɔ nɔ odamɔ shihilɛ mli naagbai anaa? Belɛ taomɔ Yehowa Odasefoi yɛ amɛ-Maŋtsɛyeli Asai lɛ ekome nɔ ni obi ni amɛkɛ bo akase nii yɛ Obaanyɛ Ohi Shi Kɛha Naanɔ wolo lɛ mli. Ani kulɛ oji mɔ ni yɔɔ miishɛɛ yɛ Biblia gbalɛi ahe taakɛ Yehowa Odasefoi tsɔɔ mli lɛ, yɛ be ko ni eho nɛ, shi amrɔ nɛɛ lɛ ojeee Odasefonyo ni yɔɔ ekãa dɔŋŋ? Esa akɛ bo hu okɛ Odasefoi lɛ ateŋ mɔ ko akase wolo nɛɛ.
14. Mɛɛ gbɛ Odasefoi fɛɛ ni yɔɔ ekaa lɛ aaatsɔ nɔ ni amɛkɛ Obaanyɛ Ohi Shi Kɛya Naanɔ wolo lɛ atsu nii yɛ gbɛ kpakpa nɔ?
14 Ani oji Odasefonyo ni kɛ mɔ hee ko ni yɔɔ wiemɔ lɛ he miishɛɛ ekaseee Biblia lɛ? Belɛ mɛni hewɔ oteee mɔ ko akɔnɔ shi yɛ nɛkɛ wolo nɛɛ he—kɛtsɔ shia kɛ shia ni oooya loo trukaa odaseyeli nɔ—ni owo lɛ ŋaa akɛ obaasumɔ ni okɛ lɛ yi enyɔ lɛ fɛɛ akane wolo lɛ? Enɛ feemɔ waaa kwraa kɛtsɔ kukuji lɛ akanemɔ kɛ amɛhe susumɔ kɛtsɔ sanebimɔi kɛ mfonirii ni yɔɔ mli lɛ ayelikɛbuamɔ nɔ. Taakɛ Yesu diɛŋtsɛ kɛɛ lɛ, kɛ wɔkpɛlɛ Kristofoi akaselɔ-feemɔ nitsumɔ lɛ nɔ lɛ, ‘wɔbaana hejɔɔmɔ wɔha wɔsusumai,’ ni miishɛɛ ni wɔnaa lɛ daa kɛji akɛ wɔdiɛŋtsɛ lɛ wɔna mɛi krokomɛi ni ayeɔ abuaa amɛ koni amɛbatsɔmɔ kaselɔi lɛ mli gbɛfaŋnɔ. (Mateo 11:29, 30; 28:19) Ni nɛkɛ nikasemɔi nɛɛ baagbele gbɛ aha wɔ koni yɛ sɛɛ mli lɛ wɔkɛ wolo ni akaseɔ ni woɔ mɔ hemɔkɛyeli hewalɛ ni ji United in Worship of the Only True God lɛ atsa nikasemɔ lɛ nɔ.
15. Mɛɛ kadimɔ ko ni yɔɔ naakpɛɛ Na Wala Mli Ŋɔɔmɔ wolo bibioo lɛ ená?
15 Wolo bibioo ni ji Na Wala Mli Ŋɔɔmɔ yɛ Shikpɔŋ ni Kɛya Naanɔ! lɛ ni hiɛ baafai 32 lɛ efee dɛŋdade kroko ni he wa yɛ Yehowa Odasefoi anitsɔɔmɔ gbɛjianɔtoo yɛ jeŋ fɛɛ lɛ mli. Afrika maŋ ni da ni ji Zaire, he ni shiɛlɔi ayifalɛ hee ni fe fɛɛ lɛ yashɛ 28,126 ni ji oha mlijaa 14 nɔyaa fe nyɛsɛɛ afi ni ji 1982 nɔ lɛ bɔɔ amaniɛ nɛkɛ:
Wolo bibioo ni ji Na Wala Mli Ŋɔɔmɔ yɛ Shikpɔŋ nɔ Kɛya Naanɔ! lɛ ni yɔɔ wɔ wiemɔi sɔrɔtoi amli lɛ ena shiɛmɔ nitsumɔ lɛ nɔ hewalɛ waa. Mɛi pii ewie akɛ no ji nɔ pɛ ni amɛtaoɔ kɛha amɛ shikpɔŋkuku lɛ, he ni gbɔmɛi pii nyɛɛɛ akane nii loo amɛkaneɔ shi jeee jogbaŋŋ lɛ. Asafoi lɛ kɛ oyaiyeli jaa nɛkɛ woji bibii nɛɛ. Protestant sɔlemɔ ko ni yɔɔ Isiro bi ni asafoi ni yɔɔ jɛmɛ lɛ ekome aha amɛ eko ni amɛkɛtsɔɔ nii yɛ amɛ Sunday skul. Katolek osɔfo ko ni yɔɔ Medje kudɔ Land-Rover tsɔne shitooi abɔ ni eebɔ mɔdɛŋ ni enine ashɛ ekomɛi anɔ eha skul ni yɔɔ nakai maŋ lɛ mli lɛ. Ebɛ naakpɛɛ akɛ aaana gbɛfalɔi ni hiɛ woji bibii nɛɛ yɛ amɛdɛŋ.
16. (a) Te aja wolo bibioo nɛɛ aha tɛŋŋ? (b) Yɛ Jajelɔ 11:6 kɛ gbeekpamɔ naa lɛ, mɛɛ gbɛ gbekɛbii baanyɛ atsɔ nɔ ni amɛkɛ wolo bibioo lɛ atsu nii?
16 Buu Mɔɔ Asafo Iɛ nitsumɔhei ni feɔ nɛkɛ wolo nɛɛ ehala nɔ ni fe 17,000,000 yɛ wiemɔi 111 mli bianɛ, ni aabi babaoo yɛ je lɛŋ he fɛɛ he. Gbekɛbii pii ena akɛ nɛkɛ wolo bibioo nɛɛ hi jogbaŋŋ ejaakɛ eyeɔ ebuaa amɛ koni amɛtɛo anɔkwale lɛ dumɔ wui lɛ yɛ amɛ skul nanemɛi ateŋ, ni nɔ ni ejɛ mli ji shia Biblia mli nikasemɔ ni akɛ amɛ feɔ.—Jajelɔ 11:6.
17. Mɛɛ niiashikpamɔi feɔ sɛɛnamɔ ni yɔɔ wolo bibioo nɛɛ kɛ emli mfonirii yɛ nitsɔɔmɔ mli lɛ he nɔkwɛmɔ nɔ?
17 Maŋ ko ni agu wɔ nitsumɔ lɛ yɛ jɛmɛ lɛ kɛ amaniɛbɔɔ nɛɛ maje:
Odasefonyo ko ni ji yoo ni kɛ Na Wala Mli Ŋɔɔmɔ wolo bibioo lɛ miitsɔɔ gbekɛbii bibii etɛ anii lɛ egbe amagai ni ekɛ amɛ susuɔ he lɛ naa. Nikasemɔ lɛ naagbee pɛ kɛkɛ ni gbekɛbii lɛ jo foi kɛbote tsu kroko mli. Beni amɛpue ekoŋŋ lɛ ena ni amɛdɛŋ eyimɔ obɔbɔ kɛ krɔɔs sɛŋmɔtsei sɔrɔtoi ni akɛ tsei efee kɛ nibii krokomɛi. Amɛkɛ enɛɛmɛi bashwie okpɔlɔ ni ma Odasefonyo lɛ hiɛ lɛ nɔ. Enaa kpɛ ehe, ni ebi akɛ mɛni akɛ enɛɛmɛi baafee. Gbekɛbii lɛ ateŋ mɔ ni ji onukpa lɛ ha hetoo akɛ, “Bianɛ wɔkase akɛ esa akɛ wɔjie amagai sɔrɔtoi lɛ wɔshwie taakɛ Biblia lɛ tsɔɔ lɛ.”
Ivory Coast kɛ amaniɛbɔɔ ni nyiɛ sɛɛ nɛɛ maje wɔ:
Kpokpaa nɔ kwɛlɔ ko ŋa ŋma akɛ enyɛɔ ekɛ wolo bibioo lɛ tsuɔ saji sɔrɔtoi ahe nii, tamɔ yei pii ni akɛ amɛ boteɔ gbalashihilɛ mli, mɔ fɛɛ mɔ kɛkɛ ni asumɔɔ, mumɔi atsɛmɔ kɛ sɔlemɔ, ni nɔ ni efeɔ ji jwɛŋmɔ ni egbalaa kɛyaa mfonirii ni kɔɔ enɛ he ni yɔɔ wolo lɛ mli lɛ nɔ. Hɛɛ, taakɛ ekɛɔ lɛ, “Mfoniri kome jara tamɔ wiemɔi akpe.”
“Nyɛtsia Nyɛhe, Nyɛtsia Nyɛhe”
18. Mɛni titri esa akɛ Yehowa webii ‘atsi amɛhe kɛjɛ he’?
18 Jeee Afrika pɛ, shi yɛ shikpɔŋ lɛ nɔ he fɛɛ he lɛ, esa akɛ mɛi fɛɛ ni sumɔɔ ni amɛja anɔkwale Nyɔŋmɔ, Yehowa, atsi amɛhe kɛjɛ Babilon apasa jamɔ kɛ ejeŋba shara gbɛi ni jamɔi nɛɛ ŋmɛɔ gbɛ aloo ehaa eshwereɔ lɛ ahe. Nyɔŋmɔ gbalɔ lɛ kɛɛ akɛ; “Nyɛtsia nyɛhe, nyɛtsia nyɛhe!. Nyɛjea kpo kɛjɛa jɛmɛ! Nyɛkataa nɔ ko ni he tseee he! Nyɛjea kpo kɛjɛa emli! Nyɛ mɛi ni nyɛtereɔ Yehowa nibii lɛ, nyɛtsuua nyɛhe.”—Yesaia 52:11.
19. Te esa akɛ wɔfee wɔnii wɔha tɛŋŋ kɛ hemɔkɛyeli-kwalɔi bɔ mɔdɛŋ ni amɛgbala wɔ kɛjɛ wɔsɔɔmɔ krɔŋkrɔŋ lɛ he lɛ!
19 Kɛjɛ 1919 kɛbaa nɛɛ, atsuu Yehowa webii ahe kɛjɛ Kristendom apasa jamɔ mli nibii ahe. Shi, yɛ be kɛ bei amli lɛ, mɔ ko tsɔɔ ehe kɛyaa wɔŋjamɔ he ni ashwieɔ lɛ kɛjɛɔ asafo lɛ mli. Ebaabɔ mɔdɛŋ ni egbala mɛi ni tereɔ “Yehowa nibii”—gbɛjianɔ ni Yehowa eto kɛha sɔɔmɔ krɔŋkrɔŋ ni jara wa lɛ yɛ shia kɛ shia, woji tɛtrɛbii ajaa, Biblia kasemɔ kɛ Kristofoi anitsumɔi krokomɛi lɛ kɛjɛ he kɛya sɛɛ. Shi Odasefoi anɔkwafoi lɛ efɔɔɔ hemɔkɛyeli kwamɔ nibii ni tamɔ nɛkɛ ‘he taa.’—2 Korintobii 6:17; 2 Yohane 9-11.
20. Mɛni Nyɔŋmɔ Wiemɔ lɛ kɛɔ yɛ jeŋba mli mujinitsumɔ he, ni te wɔɔfee tɛŋŋ wɔkwa enɛ?
20 Shi, mujinitsumɔ kroko yɛ ni ŋmɛnɛ eye mɛi pii anɔ kunim fe bɔ ni hemɔkɛyeli-kwamɔ feɔ—jeŋba mujiwoo. Ehe miihia ni wɔkwɛ wɔhe nɔ jogbaŋŋ yɛ bɔ ni je lɛ nyɛɔ wɔnɔ koni wɔkɛ wɔhe awo jeŋba-shara mli lɛ hewɔ! Bɔfo Paulo bɔ kɔkɔ akɛ “ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii . . . anine shɛŋ Nyɔŋmɔ maŋtsɛyeli lɛ nɔ kwraa,” ni nɔ ni ekɛfata nibii ni ejaaa gbɛ nɛɛ he ji “mujinitsumɔ, nyenyeŋtswibɔɔ.” (1 Korintobii 6:9, 10; Galatabii 5:19-21) Gbɛhe ko bɛ kɛha ajwamaŋbɔlɔi yɛ mumɔŋ paradeiso ni Yehowa eto ema ewebii ateŋ ŋmɛnɛ lɛ mli. Ni asaŋ gbɛhe ko ni tamɔ nakai bɛ kɛha amɛ yɛ Maŋtsɛyeli lɛ mli aloo yɛ Paradeiso shikpɔŋ ni ebɛŋkɛ kpaakpa lɛ mli. Ha Yehowa webii ni he tse lɛ fɛɛ adamɔ amɛ gbɛhe yɛ mumɔŋ paradeiso lɛ mli kɛtsɔ Paulo ŋaawoo ni yɔɔ faŋŋ nɛɛ toiboo nɔ: “Nyɛjoa ajwamaŋbɔɔ naa foi,” “nyɛjoa wɔŋjamɔ naa foi.”—1 Korintobii 6:18; 10:1-14.
21. (a) Taakɛ Yesaia 52:12 tsɔɔ lɛ, mɛɛ hekɛnɔfɔɔ esa akɛ wɔna agbɛnɛ? (b) Te wɔɔfee tɛŋŋ wɔtsɔɔ akɛ ‘wɔnaji yɛ fɛo’?
21 Beni akpɔ Yehowa webii ni afɔ amɛ mu lɛ kɛjɛ Babilon jamɔ nyɔŋyeli mli lɛ, amɛnu hewalɛ ni yɔɔ wiemɔi ni Nyɔŋmɔ gbalɔ lɛ wie lɛ mli lɛ he: “Shi jeee hejojoomɔ naa nyɛaajɛ kpo yɛ, ni asaŋ jeee foijee nɔ hu nyɛaanyiɛ kɛaatee; ejaakɛ Yehowa aaanyiɛ nyɛhiɛ, ni Israel Nyɔŋmɔ lɛ aaanyiɛ nyɛsɛɛ.” (Yesaia 52:12) Ŋmɛnɛ, “asafo babaoo” lɛ ni ji Nuŋtsɔ lɛ “tooi krokomɛi” lɛ hu miinya yɛ nɛkɛ kpɔmɔ nɛɛ hewɔ. Maŋtsɛyeli lɛ he shiɛlɔi anɔkwafoi 2,501,722 lɛ fɛɛ yɛ hekɛnɔfɔɔ ni yeɔ emuu akɛ Yehowa baaya nɔ anyiɛ amɛhiɛ, ni ákɛ lɛ nɔŋŋ ebaanyiɛ amɛsɛɛ, aahu kɛyashi Harmagedon ta ni gbeɔ tai fɛɛ naa lɛ nɔ; kɛtsɔ mli hu; (Kpojiemɔ 16:13-16) No hewɔ lɛ, nyɛ anɔkwa Nyɔŋmɔ, Yehowa, odasefoi, ‘nyɛmii ashɛa nyɛhe ni nyɛbolɔa kɛ nyamɔ yɛ ekomefeemɔ mli’! Nyɛhaa ‘nyɛnaji ni yɔɔ fɛo’ Iɛ kɛ nyɛ ayaa sanekpakpa ni kɔɔ nɔ ko ni hi jogbaŋŋ he lɛ he shiɛmɔ mli oya, ejaakɛ “o-Nyɔŋmɔ lɛ yeɔ maŋtsɛ lɛ!”—Yesaia 52:7-9.a
[Shishigbɛ niŋmai]
a Ajie kɛjɛ January 1, 1984 Blɔfo Buu-Mɔɔ lɛ mli.
Mɛɛ hetooi okɛbaaha nɔ ni nyiɛ sɛɛ nɛɛ?
□ Mɛɛ gbɛ nɔ Yehowa ewula ewebii lɛ yɛ koni ‘amɛbolɔ yɛ ekomefeemɔ mli’?
□ Mɛɛ gbɛi ni hi jogbaŋŋ nɔ wɔɔnyɛ wɔtsɔ nɔ wɔjie hiɛsɔɔ kpo yɛ wɔ woji tɛtrɛbii lɛ ahe?
□ Mɛɛ gbɛi ni sɛɛnamɔ yɔɔ he wɔɔnyɛ wɔtsɔ nɔ ni wɔ fɛɛ wɔkɛ woji ni wɔnine shɛ nɔ nyɛsɛɛ nɛɛ lɛ atsu nii yɛ?
□ Te esa akɛ wɔhere ŋaawoo kɛ hewalɛwoo ni yɔɔ Yesaia 52:11, 12 lɛ nɔ wɔha tɛŋŋ?
[Akrabatsa ni yɔɔ baafa 25]
Yɛ June mli lɛ, Korea bɔ woji tɛtrɛbii ayifalɛ hee ni fe fɛɛ ni ji 6,656 he amaniɛ, ni eji oha mlijaa 110 fe afi ni ho lɛ mli June nɔ lɛ. Maŋtsɛyeli shiɛlɔi ni yɔɔ Greenland lɛ ná woji tɛtrɛbii heei ni ashɛ 510 kɛha afi lɛ, ni eji oha mlijaa 71 nɔyaa fe 1982 nɔ lɛ.
[Akrabatsa ni yɔɔ baafa 26]
Akalaa Awake! lɛ bianɛ yɛ wiemɔi nɛɛ amli akɛ wolo tɛtrɛɛ ni baa daa nyɔii etɛ—Arabic, Bicol, Croatian, Fijian, Hebrew, Hiri Motu, Icelandic, Kikamba, Kikuyu, Russia, Shona, Sinhalese, Turkish kɛ Urdu kɛ agbɛnɛ yɛ Bokagbɛbii awiemɔi komɛi amli. Eyɛ mli akɛ anyɛŋ ashɛ enɛɛmɛi moŋ shi abaanyɛ ana ekomekomei kɛjɛ asafoi Iɛ amli. Akɛ miishɛɛ ehere nɔ ni ajeɔ gbɛ afeɔ nɛɛ anɔ waa.
[Akrabatsa ni yɔɔ baafa 29]
Weku ko fa kɛjɛ France kɛtee Mooréa ŋshɔkpɔ ni yɔɔ French Polynesia Iɛ koni amɛyaye amɛbua osafo bibioo ko ni yɔɔ jɛmɛ. Nyɔji komɛi asɛɛ lɛ, amɛbɔ amaniɛ akɛ amɛyɛ gbɛgbalɔi 4, shiɛlɔi 5, ni amɛfeɔ shia Biblia mli nikasemɔi 51. Akɛɔ akɛ yɛ ŋshɔkpɔ ko ni bɛŋkɛ jɛmɛ ni ji Raiatéa nɔ lɛ, wekui ni yɔɔ jɛmɛ Iɛ eko fɛɛ eko kɛ Yehowa Odasefoi ekase nii. “Nikpamɔ lɛ fa” yɛ jeŋ fɛɛ.—Mateo 9:37.