Yehowa Gbɛjianɔtoo, “Mɛi Ni Akɛ Amɛ Eha” Lɛ
“Ni maŋsɛɛ bii aaadamɔ shi ni amɛaalɛ nyɛtooi lɛ.”—YESAIA 61:5
1. Mɛni hewɔ wiemɔ “nihalɔ” lɛ baaha wɔkai Yehowa lɛ?
MƐƐ nihalɔ ni keɔ nii babaoo Nyɔŋmɔ ji nɛkɛ! Bɔfo Paulo kɛɛ: “[Yehowa] dɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.” (Bɔfoi lɛ Asaji 17:25) Wɔteŋ mɔ fɛɛ mɔ baanyɛ ana ‘nikeenii kpakpai ni hi kɛwula shi fɛɛ’ ni wɔnine eshɛ nɔ kɛjɛ Nyɔŋmɔ ŋɔɔ lɛ ni wɔɔsusu he lɛ ahe sɛɛ.—Yakobo 1:5, 17; Lala 29:11; Mateo 7:7; 10:19; 13:12; 21:43.
2, 3. (a) Te esa akɛ wɔhere Nyɔŋmɔ nikeenii lɛ anɔ wɔha tɛŋŋ? (b) Levibii lɛ ji mɛi ni ‘akɛ amɛ eha’ yɛ mɛɛ shishinumɔ naa?
2 Yiŋtoo kpakpa lalatsɛ lɛ damɔ nɔ ekɛsusu bɔ ni eeefee eto Yehowa najiaŋ lɛ he. (Lala 116:12) Nɔ ko ni adesai yɔɔ aloo amɛbaanyɛ amɛkɛha he ehiaaa wɔ Bɔlɔ lɛ diɛŋtsɛ. (Lala 50:10, 12) Shi Yehowa tsɔɔ akɛ, kɛ gbɔmɛi kɛ amɛhe ha anɔkwa jamɔ yɛ hiɛsɔɔ mli lɛ esaa ehiɛ. (Okɛto Hebribii 10:5-7 he.) Esa akɛ adesai fɛɛ kɛ amɛhe aha amɛ Bɔlɔ lɛ yɛ henɔjɔɔmɔ mli, koni lɛ hu ekɛ hegbɛi krokomɛi afata he aha amɛ, taakɛ eji yɛ blema Levibii lɛ agbɛfaŋ lɛ. Eyɛ mli akɛ lsraelbii fɛɛ ejɔɔ amɛhe nɔ amɛha Nyɔŋmɔ moŋ, shi ehala Aaron weku ni jɛ Levibii lɛ ateŋ lɛ akɛ osɔfoi koni amɛsha afɔlei yɛ kpeebuu lɛ kɛ sɔlemɔwe lɛ. Shi Levibii ni eshwɛ lɛ hu?
3 Yehowa kɛɛ Mose akɛ: “Ŋɔɔ Levi akutso lɛ kɛba . . . ni amɛbu kpeebuu lɛ mli nibii fɛɛ he . . . Ni oŋɔ Levibii lɛ oha Aaron kɛ ebihii lɛ, aŋɔ amɛ aha lɛ kwraa [Hebri, nethu·nimʹ] yɛ lsraelbii lɛ ateŋ.” (4 Mose 3:6, 8, 9, 41) Akɛ Levibii lɛ ‘ha’ Aaron koni amɛsɔmɔ yɛ kpeebuu lɛ mli, no hewɔ lɛ Nyɔŋmɔ baanyɛ akɛɛ akɛ: “Ejaakɛ akɛ amɛ eha mi kwraa yɛ Israelbii lɛ ateŋ.” (4 Mose 8:16, 19; 18:6) Levibii lɛ ekomɛi tsuɔ nitsumɔi ni waaa; mɛi krokomɛi hu nine shɛ hegbɛi wuji anɔ, tamɔ Nyɔŋmɔ mlai lɛ ni amɛaatsɔɔ mɛi. (4 Mose 1:50, 51; 1 Kronika 6:48; 23:3, 4, 24-32; 2 Kronika 35:3-5) Agbɛnɛ nyɛhaa wɔgbalaa wɔjwɛŋmɔ kɛyaa gbɔmɛi krokomɛi ni ‘akɛ amɛ eha’ kɛ ŋmɛnɛŋmɛnɛ beaŋ henɔ ko nɔ wɔkwɛa.
lsraelbii Ku Amɛsɛɛ Kɛjɛ Babilon
4, 5. (a) Mɛɛ lsraelbii ku amɛsɛɛ kɛjɛ Babilon nomŋɔɔ mli lɛ? (b) Yɛ ŋmɛnɛŋmɛnɛ beaŋ hu lɛ, mɛni yɔɔ ni tamɔ lsraelbii ni ku amɛsɛɛ kɛjɛ nomŋɔɔ mli lɛ?
4 Ezra kɛ Nehemia gba bɔ ni Israel shwɛɛnii ko, ni Amralo Zerubabel nyiɛ amɛhiɛ ku amɛsɛɛ kɛjɛ Babilon amɛba amɛshikpɔŋ nɔ, koni amɛbasaa amɛtswa anɔkwa jamɔ amɛma shi lɛ he sane. Saji enyɔ lɛ fɛɛ tsɔɔ akɛ sɛɛkulɔi nɛɛ ayibɔ ji 42,360. Yibɔ nɛɛ ateŋ mɛi akpei abɔ ji “Israelbii lɛ ateŋ hii.” No sɛɛ lɛ, sane lɛ tsi osɔfoi lɛ atã. Kɛkɛ ni Levibii aaafee 350 nyiɛ sɛɛ, ni Levibii ni ji lalatsɛmɛi kɛ agbonaakwɛlɔi lɛ fata he. Ezra kɛ Nehemia ŋma akpei abɔ krokomɛi hu ni eka shi faŋŋ akɛ amɛji Israelbii, ekolɛ osɔfoi po, shi amɛnyɛɛɛ amɛtsɔɔ amɛweku gbɛi lɛ hu ahe saji—Ezra 1:1, 2; 2:2-42, 59-64; Nehemia 7:7-45, 61-66.
5 Nɛkɛ Israel shwɛɛnii ni aŋɔ amɛ nom ni sɛɛ mli lɛ amɛku amɛsɛɛ kɛba Yerusalem kɛ Yuda nɛɛ jie hetuu kɛ Nyɔŋmɔ hamɔ ni ekaaa kɛ bɔ ni amɛkɛ amɛhe eha anɔkwa jamɔ kwraa lɛ kpo. Taakɛ wɔyoo lɛ, wɔnaa nɔ ko ni tamɔ nakai pɛpɛɛpɛ yɛ ŋmɛnɛŋmɛnɛ beaŋ yɛ mumɔŋ Israel shwɛɛnii ni fa kpo kɛjɛ Babilon Kpeteŋkpele lɛ nomŋɔɔ mli yɛ 1919 lɛ ahe.
6. Nyɔŋmɔ kɛ mumɔŋ lsraelbii lɛ etsu nii yɛ wɔbe nɛɛ mli yɛ mɛɛ gbɛ nɔ?
6 Kɛjɛ be mli ni akpɔ amɛ kɛjɛ 1919 kɛbaa nɛɛ, shwɛɛnii ni ji Kristo nyɛmimɛi ni afɔ amɛ mu lɛ kɛ ekaa etee amɛhiɛ yɛ anɔkwa jamɔ mli. Yehowa ejɔɔ amɛ mɔdɛŋbɔɔ akɛ amɛaabua 144,000 lɛ ni feɔ “Nyɔŋmɔ Israel” lɛ mli naagbee bii lɛ anaa lɛ nɔ. (Galatabii 6:16; Kpojiemɔ 7:3, 4) Akɛ kuu lɛ, shwɛɛnii ni afɔ amɛ mu lɛ feɔ “tsulɔ anɔkwafo kɛ nilelɔ” kuu lɛ ni akɛ amɛ tsuɔ nii koni amɛkɛ mumɔŋ niyenii babaoo ni haa wala aha, ni amɛkɛ mɔdɛŋbɔɔ babaoo etsu he nii akɛ amɛaaja yɛ shikpɔŋ lɛ fɛɛ nɔ.—Mateo 24:45-47.
7. Namɛi kɛ amɛhe bɔɔ mɛi ni afɔ amɛ mu lɛ ahe yɛ anɔkwa jamɔ mli?
7 Taakɛ sane ni aŋma kɛtsɔ hiɛ lɛ tsɔɔ lɛ, mɛi ni fata Yehowa webii ahe bianɛ ji akpekpei abɔ ni ji “tooi krokomɛi,” ni yɔɔ hiɛnɔkamɔ ni Nyɔŋmɔ kɛha akɛ amɛbaaje amanehulu kpeteŋkpele ni etsɛŋ ni ebaaba lɛ mli lɛ. Amɛmiisumɔ ni amɛsɔmɔ Yehowa kɛya naanɔ yɛ shikpɔŋ nɔ, he ni hɔmɔ kɛ kumai yeŋ amɛ dɔŋŋ, ni awerɛho kɛ yaafonui hoŋ yɛ jɛmɛ dɔŋŋ lɛ. (Yohane 10:16; Kpojiemɔ 7:9-17; 21:3-5)Ani wɔnaa nɔ ko yɛ mɛi ni ku amɛsɛɛ kɛjɛ Babilon lɛ ahe ni tamɔ mɛnɛɛmɛi? Hɛɛ!
Mɛi ni Jeee lsraelbii Hu Ku Amɛsɛɛ
8. Namɛi fata lsraelbii ni ku amɛsɛɛ kɛjɛ Babilon lɛ ahe?
8 Beni tsɛmɔ lɛ tee akɛ mɛi ni sumɔɔ Yehowa ni amɛyɔɔ Babilon lɛ aku amɛsɛɛ amɛya Shiwoo Shikpɔŋ lɛ nɔ lɛ, mɛi akpei abɔ ni jeee lsraelbii kpɛlɛ nɔ. Wɔkaneɔ yɛ “Nethinim” (eshishi ji, ‘Mɛi ni Akɛ Amɛ Eha’) kɛ “Salomo tsuji abii lɛ,” ni amɛ fɛɛ amɛyibɔ feɔ 392 lɛ ahe sane yɛ gbɛi ni Ezra kɛ Nehemia to naa amɛkɛha lɛ mli. Saji nɛɛ hu tsiɔ 7,500 krokomɛi ata: ‘tsuji hii kɛ weyei,’ kɛ agbɛnɛ “hii lalatsɛmɛi kɛ yei lalatsɛmɛi” ni jeee Levibii. (Ezra 2:43-58, 65; Nehemia 7:46-60, 67) Mɛni kanya mɛi pii ni jeee lsraelbii nɛɛ ni amɛku amɛsɛɛ?
9. Nyɔŋmɔ mumɔ lɛ fata nomŋɔɔ mli ni aku sɛɛ kɛjɛ nɛɛ he yɛɛ mɛɛ gbɛ nɔ?
9 Ezra 1:5 wieɔ akɛ “mɛi fɛɛ ni Nyɔŋmɔ etsiɛ amɛmumɔ hiɛ lɛ te shi, koni amɛya, ni amɛyama Yehowa shia lɛ.” Hɛɛ, Yehowa kanya mɛi fɛɛ ni ku amɛsɛɛ lɛ. Ewo amɛmumɔ lɛ mli hewalɛ, ni ji, amɛjwɛŋmɔŋ nyɛmɔ ni kanyaa amɛ lɛ. Nyɔŋmɔ baanyɛ afee enɛ kɛjɛ ŋwɛi, kɛtsɔ emumɔ krɔŋkrɔŋ, ni ji enifeemɔ hewalɛ lɛ kɛ nitsumɔ nɔ. No hewɔ lɛ, “[Nyɔŋmɔ] mumɔ lɛ” ye bua mɛi fɛɛ ni “te shi, koni amɛyama Yehowa shia lɛ.”—Zakaria 4:1, 6; Hagai 1:14.
Ŋmɛnɛŋmɛnɛ Beaŋ Henɔ
10, 11. Namɛi abaanyɛ akɛto mɛi ni jeee lsraelbii ni ku amɛsɛɛ kɛjɛ Babilon lɛ he?
10 Mɛi ni jeee lsraelbii ni ku amɛsɛɛ nɛɛ feɔ namɛi ahe mfoniri? Ekolɛ Kristofoi pii baaha hetoo akɛ: ‘Nethinim lɛ damɔ shi kɛha “tooi krokomɛi” lɛ ŋmɛnɛ.’ Anɔkwale, shi jeee Nethinim lɛ pɛ; ejaakɛ mɛi ni jeee Israelbii ni ku amɛsɛɛ lɛ fɛɛ damɔ shi kɛha Kristofoi ni fataaa mumɔŋ Israel he ŋmɛnɛ lɛ.
11 Wolo, You May Survive Armageddon Into God’s New Worlda lɛ kɛɛ: “Shwɛɛnii ni ji Israelbii 42,360 lɛ jeee mɛi pɛ ni fata Amralo Zerubabel he kɛshi Babilon . . . Mɛi akpei abɔ ni jeee lsraelbii fata he . . . Yɛ Nethinim lɛ asɛɛ lɛ, mɛi krokomɛi ni jeee lsraelbii, kɛ nyɔji, kɛ hii kɛ yei lalatsɛmɛi kɛ Maŋtsɛ Salomo tsuji lɛ aseshibii hu fata he.” Wolo lɛ tsɔɔ mli akɛ: “Nethinim lɛ, nyɔji, lalatsɛmɛi kɛ Salomo tsuji lɛ abii, ni amɛ fɛɛ amɛjeee lsraelbii lɛ shi nomŋɔɔ shikpɔŋ lɛ nɔ ni amɛkɛ shwɛɛnii ni ji lsraelbii lɛ ku amɛsɛɛ . . . No hewɔ lɛ, ani eja gbɛ akɛ aaasusu akɛ ŋmɛnɛ, gbɔmɛi ni jɛ jeŋmaji sɔrɔtoi fɛɛ mli ni amɛjeee mumɔŋ lsraelbii kɛ amɛhe baabɔ mumɔŋ Israel shwɛɛnii lɛ ahe ni amɛha Yehowa Nyɔŋmɔ jamɔ aya hiɛ? Hɛɛ.” Nɛkɛ gbɔmɛi nɛɛ ‘ebatsɔmɔ ŋmɛnɛŋmɛnɛ beaŋ mfoniri-feemɔ mli Nethinim, lalatsɛmɛi, kɛ Salomo tsuji lɛ abii.’
12. Nyɔŋmɔ kɛ emumɔ lɛ tsuɔ nii yɛ gbɛ krɛdɛɛ nɔ kɛhaa mumɔŋ lsraelbii lɛ yɛ mɛɛ gbɛ nɔ, shi mɛni hewɔ wɔbaanyɛ wɔna nɔmimaa akɛ eyɛ kɛha ejalɔi fɛɛ lɛ?
12 Taakɛ eji yɛ blema nɔkwɛmɔ nɔ lɛ mli lɛ, Nyɔŋmɔ kɛ emumɔ lɛ hu haa mɛi ni hiɛ ka nɔ akɛ amɛbaahi shi kɛya naanɔ yɛ shikpɔŋ nɔ lɛ. Eji anɔkwale akɛ amɛjeee mɛi ni afɔ amɛ ehee. Mɛi 144,000 lɛ ateŋ mɔ fɛɛ mɔ yɛ niiashikpamɔ kome ko ni mɔ ko bɛ eko, ni ji fɔmɔ ni afɔ amɛ ehee akɛ Nyɔŋmɔ mumɔŋ bii ni akɛ mumɔ krɔŋkrɔŋ efɔ amɛ mu lɛ. (Yohane 3:3, 5; Romabii 8:16; Efesobii 1:13, 14) Shi nakai mufɔɔ lɛ ji Nyɔŋmɔ mumɔ lɛ kpojiemɔ yɛ asafoku bibioo lɛ pɛ he yɛ gbɛ ni ekaaa nɔ. Shi Nyɔŋmɔ mumɔ lɛ hu he miihia dani anyɛ atsu esuɔmɔnaa nii ahe nii. No hewɔ ni Yesu kɛɛ: ‘Tsɛ lɛ ni yɔɔ ŋwɛi lɛ kɛ mumɔ krɔŋkrɔŋ haa mɛi ni biɔ lɛ lɛ.’ (Luka 11:13) Kɛ mɔ ni biɔ lɛ yɛ ŋwɛi hiɛnɔkamɔ loo eji tooi krokomɛi lɛ ateŋ mɔ ko hu lɛ, Yehowa mumɔ lɛ babaoo yɛ kɛha E-suɔmɔnaa nifeemɔ.
13. Mumɔ lɛ baanyɛ atsu nii yɛ Nyɔŋmɔ tsuji fɛɛ nɔ yɛ mɛɛ gbɛ nɔ?
13 Nyɔŋmɔ mumɔ lɛ tsirɛ lsraelbii kɛ mɛi ni jeee lsraelbii fɛɛ ni amɛku amɛsɛɛ amɛya Yerusalem, ni ewajeɔ ni eyeɔ ebuaa ewebii anɔkwafoi fɛɛ ŋmɛnɛ. Kɛji akɛ hiɛnɔkamɔ ni Nyɔŋmɔ kɛha Kristofonyo lɛ ji wala yɛ ŋwɛi loo wala yɛ shikpɔŋ nɔ lɛ, esa akɛ eshiɛ sanekpakpa lɛ, ni mumɔ krɔŋkrɔŋ haa enyɛɔ eyeɔ anɔkwa yɛ enɛ mli. Esa akɛ wɔteŋ mɔ fɛɛ mɔ—ni he ni wɔhiɛnɔkamɔ ka kɔɔɔ he eko —ana mumɔ lɛ yibii ni ehe hiaa ni wɔ fɛɛ wɔna babaoo lɛ.—Galatabii 5:22-26.
Akɛha yɛ Sɔɔmɔ Krɛdɛɛ ko Hewɔ
14, 15. (a) Mɛɛ kui enyɔ akadi amɛ jogbaŋŋ yɛ mɛi ni jeee lsraelbii ni ku amɛsɛɛ lɛ ateŋ? (b) Namɛi ji Nethinim lɛ, ni mɛni amɛtsu?
14 Mɛi ni fata akpei abɔ ni jeee lsraelbii ni mumɔ lɛ tsirɛ amɛ ni amɛku amɛsɛɛ lɛ ahe ji kui bibii enyɔ ko ni Nyɔŋmɔ Wiemɔ lɛ kadiɔ amɛ jogbaŋŋ—Nethinim lɛ kɛ Salomo tsuji abii lɛ. Namɛi ni? Mɛni amɛfee? Ni enɛ baanyɛ atsɔɔ mɛni ŋmɛnɛ?
15 Nethinim lɛ ji kuu ko ni amɛshishi jɛɛɛ lsraelbii ateŋ, shi amɛna hegbɛ akɛ amɛkɛ Levibii lɛ aaasɔmɔ. Kaimɔ Kanaanbii ni jɛ Gibeon ni batsɔmɔ “laiyalɔi kɛ faaŋyalɔi [amɛ]ha asafo lɛ kɛ Yehowa afɔleshaa latɛ lɛ.” (Yoshua 9:27) Ekolɛ amɛseshibii lɛ ateŋ mɛi komɛi fata Nethinim ni kuɔ amɛsɛɛ kɛjɛɔ Babilon lɛ ahe, kɛ agbɛnɛ mɛi krokomɛi ni akɛ amɛ fata he akɛ Nethinim yɛ David nɔyeli beaŋ kɛ bei krokomɛi amli lɛ. (Ezra 8:20) Mɛni Nethinim lɛ tsu? Akɛ Levibii lɛ ha koni amɛye amɛbua osɔfoi lɛ, ni yɛ no sɛɛ lɛ, akɛ Nethinim lɛ ha koni amɛye amɛbua Levibii lɛ. Enɛ ji hegbɛ ko kɛha gbɔi ni afo amɛ ketia lɛ po.
16. Nethinim lɛ anitsumɔ tsake yɛ be naa yɛ mɛɛ gbɛ nɔ?
16 Beni kuu lɛ ku amɛsɛɛ kɛjɛ Babilon amɛba lɛ, no mli lɛ Levibii fioo ko pɛ yɔɔ mli, kɛ akɛ amɛ to osɔfoi lɛ loo Nethinim lɛ kɛ “Salomo tsuji abii” lɛ ahe. (Ezra 8:15-20) Dictionary of the Bible, ni Dr. James Hastings fee lɛ kɛɛ: “Yɛ be ko sɛɛ lɛ, wɔna ni ato [Nethinim lɛ] gbɛjianɔ jogbaŋŋ tamɔ kuu krɔŋkrɔŋ ko ni akɛ nitsumɔ ewo amɛdɛŋ, ni akɛ hegbɛi haa amɛ.” Woloŋlelɔi awolo, Vetus Testamentum lɛ wie akɛ: “Tsakemɔ ko ba. Beni Amɛku Amɛsɛɛ kɛjɛ Nomŋɔɔ mli amɛba lɛ, asusuuu nɛkɛ [gbɔi] nɛɛ ahe akɛ Sɔlemɔwe tsuji dɔŋŋ, shi moŋ akɛ emli sɔɔlɔi ni miina gbɛhe ni tamɔ kui krokomɛi ni sɔmɔɔ yɛ Sɔlemɔtsu lɛ mli lɛ mli gbɛfaŋnɔ.”—Kwɛmɔ akrabatsa, “Gbɛhe ko ni Etsake.”)
17. Mɛni hewɔ akɛ babaoo wo Nethinim lɛ adɛŋ ni amɛtsu lɛ, ni mɛɛ Biblia mli odaseyeli yɔɔ enɛ he?
17 Shi Nethinim lɛ kɛ osɔfoi lɛ kɛ Levibii lɛ ebafeee mɛi ni yeɔ egbɔ. Sɛɛkpee bii nɛɛ ji lsraelbii ni Yehowa diɛŋtsɛ hala amɛ, ni akɛ mɛi ni jeee lsraelbii etoŋ amɛnajiaŋ. Ni kɛlɛ nɔ ni Biblia lɛ tsɔɔ ji akɛ, akɛni Levibii lɛ ayi faaa hewɔ lɛ, akɛ nibii pii wo Nethinim lɛ adɛŋ akɛ amɛtsu yɛ Nyɔŋmɔ sɔɔmɔ mli. Aha amɛ shihilɛ hei ni bɛŋkɛ sɔlemɔwe lɛ. Amɛkɛ osɔfoi lɛ tsu nii yɛ Nehemia gbii lɛ amli ni amɛkɛsaa gbogboi ni bɛŋkɛ sɔlemɔwe lɛ. (Nehemia 3:22-26) Ni Persia maŋtsɛ lɛ wo akpɔ akɛ akahe Nethinim lɛ oniatsumɔ shika ko, tamɔ bɔ ni Levibii lɛ hu wooo shika ko yɛ amɛ sɔlemɔwe sɔɔmɔ hewɔ lɛ. (Ezra 7:24) Enɛ tsɔɔ bɔ ni ‘mɛi ni akɛ amɛ eha’ (Levibii kɛ Nethinim) nɛɛ efee ekome kɛtsuɔ mumɔŋ saji ahe nii diɛŋtsɛ kɛ bɔ ni Nethinim lɛ anitsumɔi tee hiɛ yɛ hiamɔ naa, eyɛ mli akɛ abuuu amɛ akɛ Levibii. Beni yɛ sɛɛ mli lɛ Ezra bua nomii anaa ni amɛku amɛsɛɛ lɛ, kɛjɛ shishijee lɛ anaaa Levibii lɛ ekomɛi yɛ mli. No hewɔ lɛ emia ehiɛ koni ebua amɛteŋ mɛi komɛi anaa. Nɔ ni jɛ mli ba ji Levibii 38 kɛ Nethinim 220 ni ku amɛsɛɛ ni amɛyasɔmɔ akɛ “sɔɔlɔi ni aaasɔmɔ yɛ wɔ Nyɔŋmɔ lɛ we lɛ.”—Ezra 8:15-20.
18. Mɛɛ nitsumɔ ekolɛ “Salomo tsuji abii lɛ” tsu?
18 Kuu ni ji enyɔ ni jeee Israelbii ni akadi amɛ jogbaŋŋ ji Salomo tsuji abii lɛ. Biblia lɛ tsɔɔ bɔ ni amɛji lɛ mli fioo pɛ. Amɛteŋ mɛi komɛi ji “Soferet bii lɛ.” Ezra kɛ wiemɔ mlitsɔɔmɔ ni tsɔɔ nɔ ko pɔtɛɛ fata gbɛi lɛ he, ni efee lɛ Has·so·pheʹreth, ni eshishi aaanyɛ afee “woloŋmalɔ lɛ.” (Ezra 2:55; Nehemia 7:57) No hewɔ lɛ ekolɛ amɛbaanyɛ amɛfee woloŋmalɔi akuu ko, ekolɛ woloŋmalɔi ni kwɛɔ sɔlemɔwe nitsumɔi anɔ. Eyɛ mli akɛ amɛjɛ gbɔi ateŋ moŋ, shi Salomo tsuji abii lɛ jie amɛhe ni amɛtuu amɛha Yehowa lɛ kpo kɛtsɔ Babilon ni amɛshi kɛ amɛsɛɛ ni amɛku koni amɛbana E-jamɔ ni atoɔ ama shi ekoŋŋ lɛ mli gbɛfaŋnɔ lɛ nɔ.
Wɔhe ni Wɔkɛhaa Ŋmɛnɛ
19. Mɛɛ wekukpaa ka mɛi ni afɔ amɛ mu ŋmɛnɛ lɛ kɛ tooi krokomɛi lɛ ateŋ?
19 Nyɔŋmɔ kɛ shwɛɛnii ni afɔ amɛ mu lɛ etsu nii waa yɛ wɔbei nɛɛ amli ni amɛnyiɛ jamɔ krɔŋŋ kɛ sanekpakpa lɛ jajemɔ lɛ hiɛ. (Marko 13:10) Kwɛ bɔ ni mɛnɛɛmɛi ena miishɛɛ akɛ amɛaana ni tooi krokomɛi nɛɛ akpei nyɔŋmai abɔ, akpei ohai abɔ, kɛkɛ lɛ akpekpei abɔ miifata amɛhe yɛ jamɔ mli! Ni mɛɛ miishɛɛ gbeekpamɔ ehi shwɛɛnii lɛ kɛ tooi krokomɛi lɛ ateŋ nɛkɛ!—Yohane 10:16.
20. Mɛɛ shishinumɔ hee ko jwɛŋmɔ yɔɔ mli kɛ akɛto Nethinim lɛ kɛ Salomo tsuji abii lɛ ahe? (Abɛi 4:18)
20 Mɛi ni jeee lsraelbii ni ku amɛsɛɛ kɛjɛ blema Babilon nomŋɔɔ mli amɛba lɛ fɛɛ feɔ tooi krokomɛi lɛ ni kɛ mumɔŋ Israel shwɛɛnii lɛ sɔmɔɔ bianɛ lɛ ahe mfoniri. Shi anɔkwale ni eji akɛ Biblia lɛ kadiɔ Nethinim lɛ kɛ Salomo tsuji abii lɛ titri lɛ hu? Kɛ akɛaato he lɛ, akɛ hegbɛi ni tekeɔ mɛi krokomɛi ni jeee Israelbii ni ku amɛsɛɛ lɛ anɔ ha Nethinim lɛ kɛ Salomo tsuji abii lɛ. Enɛ baanyɛ afee he okadi akɛ Nyɔŋmɔ kɛ sɔɔmɔ hegbɛi ni dara kɛ nitsumɔi krokomɛi ni fata he eha tooi krokomɛi lɛ ateŋ mɛi ni amɛdara yɛ mumɔŋ ni yɔɔ he tsui lɛ.
21. Nyɛmimɛi hii komɛi ni yɔɔ shikpɔŋ nɔ shihilɛ he hiɛnɔkamɔ lɛ anine eshɛ nitsumɔi kɛ hegbɛi krokomɛi anɔ yɛ mɛɛ gbɛ nɔ?
21 Hegbɛi ni akɛfata he aha Nethinim lɛ kɔɔ mumɔŋ nitsumɔi krɛdɛɛ he tɛɛ. Etamɔ nɔ ni Salomo tsuji lɛ abii lɛ ná gbɛnaa nii ni kɔɔ nɔkwɛmɔ nitsumɔi ahe. Nakai nɔŋŋ hu ŋmɛnɛ, Yehowa kɛ “gbɔmɛi ateŋ nikeenii” ejɔɔ ewebii lɛ koni amɛtsu amɛhiamɔ nii ahe nii. (Efesobii 4:8, 11, 12, New World Translation) Mɛi ni fata gbɛjianɔtoo nɛɛ he ji nyɛmimɛi hii akpei abɔ ni amɛdara yɛ mumɔŋ ni yɔɔ niiashikpamɔ ni naa gbɛfaŋnɔ yɛ ‘tooi lɛ akwɛmɔ’ mli, ni miisɔmɔ akɛ kpokpaa kɛ kpokpaa wuji anɔkwɛlɔi, kɛ Nitsumɔ He Nine Ajinafoi ni sɔmɔɔ yɛ Buu Mɔɔ Asafo lɛ nitsumɔ he niji 97 lɛ amli lɛ. (Yesaia 61:5) Hii ni sa ni yɔɔ nyɛmɔ nine shɛɔ tsɔsemɔ nɔ yɛ Asafo lɛ jeŋ fɛɛ yitso lɛ, yɛ “tsulɔ anɔkwafo kɛ nilelɔ lɛ” kɛ e-Nɔyeli Kuu lɛ gbɛtsɔɔmɔ shishi, koni amɛye amɛbua yɛ mumɔŋ niyenii ni ajaa lɛ feemɔ mli. (Luka 12:42) Atsɔse mɛi krokomɛi ni amɛjɔɔ amɛhe nɔ ni amɛtuu amɛhe amɛha yɛ be kakadaŋŋ mli lɛ koni amɛkwɛ Betel shiai kɛ woji afeemɔ hei anɔ ni amɛkwɛ jeŋ muu fɛɛ nitsumɔ he niji tsũi heei kɛ asai ni amamɔɔ kɛha Kristofoi ajamɔ lɛ anɔ. Amɛfee babaoo kɛteke nɔ yɛ sɔɔmɔ ni amɛkɛhaa akɛ mɛi ni bɛŋkɛ shwɛɛnii ni afɔ amɛ mu lɛ, ni feɔ osɔfoi amaŋtsɛyeli lɛ fa lɛ ni amɛyeɔ amɛbuaa amɛ hu lɛ mli.—Okɛto 1 Korintobii 4:17; 14:40; 1 Petro 2:9 he.
22. Mɛni hewɔ esa jogbaŋŋ ákɛ akɛ gbɛnaa nii ni tsii aaawo tooi krokomɛi lɛ ateŋ mɛi komɛi adɛŋ bianɛ lɛ, ni te esa akɛ wɔfee wɔnii yɛ he wɔha tɛŋŋ?
22 Yɛ blema bei lɛ amli lɛ, osɔfoi kɛ Levibii tee nɔ amɛsɔmɔ yɛ Yudafoi lɛ ateŋ. (Yohane 1:19) Shi ŋmɛnɛ, esa akɛ mumɔŋ Israel shwɛɛnii ni yɔɔ shikpɔŋ nɔ lɛ nɔ agbɔ. (Susumɔ sɔrɔto-feemɔ ni yɔɔ Yohane 3:30 lɛ he.) Yɛ naagbee, beni akpata Babilon Kpeteŋkpele lɛ hiɛ sɛɛ lɛ, 144 000 lɛ fɛɛ ni ‘asɔo amɛnaa lɛ’ baahi ŋwɛi kɛha Toobi lɛ yookpeemɔ lɛ. (Kpojiemɔ 7:1-3; 19:1-8) Shi amrɔ nɛɛ esa akɛ tooi krokomɛi lɛ aya nɔ ashwere. Anɔkwale ni eji akɛ akɛ gbɛnaa nii ni tsii miiwo amɛteŋ mɛi komɛi ni tamɔ Nethinim lɛ kɛ Salomo tsuji abii lɛ adɛŋ yɛ shwɛɛnii ni afɔ amɛ mu lɛ anɔkwɛmɔ shishi lɛ haaa amɛfee mɛi ni wooɔ amɛhe aloo ni amɛaanu he akɛ amɛhe miihia tsɔ̃. (Romabii 12:3) Enɛ haa wɔnaa hekɛnɔfɔɔ akɛ beni Nyɔŋmɔ webii lɛ ‘baa kɛjɛɔ amanehulu kpeteŋkpele lɛ mli’ lɛ, hii ni yɔɔ niiashikpamɔ baahi shi—“lumɛi”—ni amɛfee klalo akɛ amɛbaanyiɛ tooi krokomɛi lɛ ahiɛ.—Kpojiemɔ 7:14; Yesaia 32:1; okɛto Bɔfoi lɛ Asaji 6:2-7 he.
23. Mɛni hewɔ esa akɛ wɔ fɛɛ wɔna mumɔ ni haa akɛ nii haa yɛ Nyɔŋmɔ sɔɔmɔ mli lɛ?
23 Mɛi fɛɛ ni ku amɛsɛɛ kɛjɛ Babilon lɛ miisumɔ ni amɛtsu nii waa ni amɛkɛtsɔɔ akɛ Yehowa jamɔ ji klɛŋklɛŋ nii ni ka amɛjwɛŋmɔ kɛ amɛtsui nɔ. Nakai nɔŋŋ eji ŋmɛnɛ. Kɛfata shwɛɛnii ni afɔ amɛ mu lɛ ahe lɛ, “gbɔi . . . damɔɔ shi diɛŋtsɛ ni amɛlɛɔ tooi lɛ.” (Yesaia 61:5, NW) No hewɔ lɛ, bɔ fɛɛ bɔ ni hiɛnɔkamɔ ni Nyɔŋmɔ kɛha wɔ lɛ ji ha, ni bɔ fɛɛ bɔ ni hegbɛi ni akɛaaha onukpai ni afɔ amɛ mu lɛ dani Yehowa bembuu gbi lɛ aaaba yɛ Harmagedon lɛ ji ha lɛ, nyɛhaa wɔ fɛɛ wɔnaa mumɔ ni haa akɛ he fɛɛ shaa afɔle. Yɛ be mli ni wɔnyɛŋ wɔkɛ nɔ ko ato nibii kpakpai fɛɛ ni Yehowa kɛha wɔ lɛ najiaŋ lɛ, eba akɛ wɔɔjɛ susuma muu fɛɛ mli wɔfee nɔ fɛɛ nɔ ni wɔfeɔ yɛ egbɛjianɔtoo lɛ mli lɛ. (Lala 116:12-14; Kolosebii 3:23) Kɛkɛ lɛ wɔ fɛɛ wɔbaanyɛ wɔkɛ wɔhe aha kɛha anɔkwa jamɔ, yɛ be mli ni tooi krokomɛi lɛ kɛ mɛi ni afɔ amɛ mu lɛ, ni ato akɛ “[amɛ]baaye maŋtsɛ yɛ shikpɔŋ lɛ nɔ” lɛ sɔmɔɔ yɛ ekomefeemɔ mli lɛ.—Kpojiemɔ 5:9, 10.
[Shishigbɛ niŋmai]
a Baafai 142-8; ni Watchtower Bible and Tract Society of New York, Inc. fee.
Saji Otii ni Abaakai?
◻ Levibii lɛ ji mɛi ni ‘akɛ amɛ eha’ yɛ blema Isreal yɛ mɛɛ gbɛ nɔ?
◻ Namɛi ni jeee Isrealbii ku amɛsɛɛ kɛjɛ nomŋɔɔ mli amɛba lɛ, ni amɛfeɔ namɛi ahe mfoniri?
◻ Etamɔ nɔ ni mɛɛ tsakemɔ ba Nethinim lɛ ashihilɛ mli?
◻ Yɛ Nethinim lɛ kɛ Salomo tsuji abii lɛ ahe lɛ, mɛni ni tamɔ amɛ wɔyɔseɔ ŋmɛnɛ?
◻ Gbeekpamɔ ni ka mɛi ni afɔ amɛ mu lɛ kɛ tooi krokomɛi lɛ ateŋ lɛ haa wɔnaa mɛɛ hekɛnɔfɔɔ?
[Akrabatsa ni yɔɔ baafa 14]
GBƐHE KO NI ETSAKE
Biblia wiemɔ komekomei ashishitsɔɔmɔ woji kɛ ensaiklopediai wieɔ tsakemɔi ni ba mɛi ni jeee Israelbii ni ku amɛsɛɛ kɛjɛ nomŋɔɔ mli amɛba lɛ ashihilɛ mli lɛ he. Akɛ nɔkwɛmɔ nɔ lɛ, Encyclopaedia Biblica lɛ kɛɔ yɛ ‘Tsakemɔ yɛ amɛgbɛhe mli’ lɛ shishi akɛ: ‘Taakɛ atsɔɔ momo lɛ, abawo amɛgbɛhe yɛ shihilɛ mli lɛ nɔ hu yɛ nakai beaŋ nɔŋŋ. Etamɔ nɔ ni [Nethinim lɛ] tamɔɔɔ nyɔji dɔŋŋ yɛ wiemɔ lɛ shishinumɔ diɛŋtsɛ naa.” (Nɔ ni Cheyne kɛ Black kwɛ mli, Kpo lll, baafa, 3399) John Kitto ŋma yɛ The Cyclopedia of Biblical Literature lɛ mli akɛ: “Akpaaa gbɛ akɛ [Nethinim lɛ] amɛteŋ mɛi pii baaku amɛsɛɛ amɛba shihilɛ ni baa shi nɛɛ mli yɛ Palestina. . . Suɔmɔ mli ni mɛi ni amɛtuu amɛhe amɛha nɛɛ jɛ amɛjie amɛhe kpo lɛ wo Nethinim lɛ agbɛhe lɛ nɔ saŋŋ.” (Kpo ll baafa 417) The International Standard Bible Encyclopedia lɛ tsɔɔ akɛ: “Yɛ nɛkɛ naanyobɔɔ nɛɛ kɛ amɛshihilɛ yɛ Salomo be lɛ mli hewɔ lɛ, abaanyɛ asusu akɛ Salomo tsuji lɛ yɛ gbɛnaa nii ni he hiaa yɛ sɔlemɔtsu ni ji enyɔ lɛ mli.”—Nɔ ni G W. Bromiley kwɛ mli, Kpo 4, baafa 570.
[Mfoniri ni yɔɔ baafa 15]
Beni lsraelbii lɛ ku amɛsɛɛ kɛtee Yerusalem koni amɛyasaa amɛtswa maŋ lɛ ekoŋŋ lɛ, mɛi ni jeee lsraelbii akpei abɔ fata amɛhe kɛtee
[He ni Sane lɛ Jɛ]
Pictorial Archive (Near Eastern History) Est.
[Mfoniri ni yɔɔ baafa 17]
Nitsumɔ He Nine Ajinafoi yɛ Korea. Taakɛ blema Nethinim lɛ ji lɛ, gbɔmɛi ni jɛ tooi krokomɛi lɛ ateŋ yɛ gbɛnaa nii ni tsii yɛ anɔkwa jamɔ mli ŋmɛnɛ