Yitso Nyɔŋmai Enyɔ Kɛ Enumɔ
Tsuitsakemɔ Sɔlemɔ
1, 2. (a) Mɛni ji yiŋtoo ní yɔɔ ŋwɛi tsɔsemɔ sɛɛ? (b) Mɛɛ nihalamɔ baakã Yudafoi lɛ ahiɛ beni amɛná Yehowa dɛŋ toigbalamɔ lɛ sɛɛ?
YERUSALEM kɛ esɔlemɔtsu lɛ hiɛkpatamɔ ní ba yɛ afi 607 D.Ŋ.B. lɛ ji toigbalamɔ ní jɛ Yehowa ŋɔɔ, ni ji amɛhe miishɛɛ ní ebɛ kwraa lɛ kpojiemɔ. Yuda, atuatsemɔ maŋ lɛ, sa toigbalamɔ ní mli wa waa diɛŋtsɛ. Ni kɛlɛ, Yehowa etooo eyiŋ kwraa akɛ ebaabule Yudafoi lɛ ashishi. Bɔfo Paulo tsĩ yiŋtoo ní yɔɔ Yehowa toigbalamɔ lɛ sɛɛ lɛ tã beni ekɛɛ akɛ: “Shi tsɔsemɔ fɛɛ tsɔsemɔ lɛ, amrɔmrɔ lɛ efeee mɔ akɛ miishɛɛ nɔ̃ ni, shi dɔlɛ nɔ̃ moŋ; shi kɛ́ fee sɛɛ lɛ, ewoɔ hejɔlɛ yibii ní ji jalɛ lɛ ehaa mɛi ní etsɔ nɔ ekase nɔ ko lɛ.”—Hebribii 12:11.
2 Te Yudafoi lɛ baafee amɛnii yɛ niiashikpamɔ ní mli wa nɛɛ he amɛha tɛŋŋ? Ani amɛbaanyɛ Yehowa toigbalamɔ lɛ? (Lala 50:16, 17) Aloo amɛbaakpɛlɛ nɔ akɛ tsɔsemɔ? Ani amɛbaatsake amɛtsui koni atsá amɛ? (Yesaia 57:18; Ezekiel 18:23) Yesaia gbalɛ lɛ tsɔɔ akɛ kɛ́ hoo lɛ, tsutsu Yuda maŋ lɛ mli bii lɛ ateŋ mɛi komɛi baahere toigbalamɔ lɛ nɔ yɛ gbɛ kpakpa nɔ. Kɛjɛ yitso 63 lɛ naagbee gbɛ kukuji lɛ anɔ kɛtsá nɔ kɛbote yitso 64 lɛ mli lɛ, afee Yuda maŋ lɛ he mfoniri akɛ gbɔmɛi ní eshwa amɛhe yɛ amɛhe eshai lɛ ahewɔ, ní miibɛŋkɛ Yehowa kɛ faikpamɔ ní jɛ amɛtsui mli. Gbalɔ Yesaia sɔle tsuitsakemɔ sɔlemɔ ko, yɛ emaŋbii lɛ ahewɔ, yɛ amɛ wɔsɛɛ be mli nomŋɔɔ lɛ mli. Beni efeɔ nakai lɛ, ewie nibii ní baaba wɔsɛɛ lɛ ahe tamɔ nɔ ni amɛmiiba mli yɛ ehiŋmɛiiaŋ.
Tsɛ ní Yɔɔ Musuŋtsɔlɛ
3. (a) Yesaia gbalɛ mli sɔlemɔ lɛ wo Yehowa hiɛ nyam yɛ mɛɛ gbɛ nɔ? (b) Daniel sɔlemɔ lɛ tsɔɔ akɛ Yesaia gbalɛ mli sɔlemɔ lɛ jieɔ Yudafoi ní yɔɔ Babilon, ní eshwa amɛhe lɛ asusumɔi akpo yɛ mɛɛ gbɛ nɔ? (Kwɛmɔ akrabatsa ní yɔɔ baafa 362 lɛ.)
3 Yesaia sɔle eha Yehowa akɛ: “Maa oyi shi kɛjɛ ŋwɛi ní ojɛ ohe krɔŋkrɔŋ kɛ onunyam shihilɛhe lɛ okwɛ!” Gbalɔ lɛ miiwie mumɔŋ ŋwɛi, he ni Yehowa kɛ emumɔŋ bɔɔ nii ní anaaa amɛ lɛ hiɔ lɛ he. Beni Yesaia jieɔ Yudafoi ní yɔɔ nomŋɔɔ mli lɛ asusumɔi akpo lɛ, etee nɔ akɛ: “Nɛgbɛ ohiɛdɔɔ kɛ ohewalɛ nitsumɔi lɛ yɔɔ? otsuiŋshãlɛ kɛ omusuŋtsɔlɛ babaoo lɛ, atsĩ naa kɛjɛ mihe.” (Yesaia 63:15) Yehowa etsĩ ehewalɛ lɛ naa ni eye ehenumɔi ní mli wa waa—ni ji ‘etsuiŋshãlɛ kɛ emusuŋtsɔlɛi babaoo’—ní eyɔɔ kɛha ewebii lɛ nɔ. Ni kɛlɛ, Yehowa ji Yudafoi amaŋ lɛ “Tsɛ.” Abraham kɛ Israel (Yakob) ji amɛheloonaa blematsɛmɛi moŋ, shi kɛji akɛ mɛnɛɛmɛi aaaku sɛɛ aba wala mli ekoŋŋ lɛ, ekolɛ amɛbaakpoo amɛshwiei ní etsɔmɔ hemɔkɛyeli kwalɔi nɛɛ kwraa. Yehowa yɛ musuŋtsɔlɛ kpele diɛŋtsɛ. (Lala 27:10) Yesaia kɛ hiɛsɔɔ wie akɛ: “Bo, Yehowa, bo nɔŋŋ ji wɔtsɛ, wɔkpɔ̃lɔ ji ogbɛi kɛjɛ blema beebe.”—Yesaia 63:16.
4, 5. (a) Mɛɛ shishinumɔ naa Yehowa ha ewebii lɛ dũ gbɛ kɛjɛ egbɛ̀i lɛ anɔ lɛ? (b) Mɛɛ jamɔ nɛkɛ Yehowa taoɔ?
4 Yesaia tsá nɔ kɛ wiemɔ ko ní jɛ etsui mli, akɛ: “Yehowa, mɛɛba ohaa wɔduɔ gbɛ kɛjɛɔ ogbɛ̀i lɛ anɔ, ni owajeɔ wɔtsui ní wɔkasheo gbeyei lɛ? Otsuji lɛ kɛ onɔyeli nɔ̃ lɛ akutsei lɛ ahewɔ lɛ, kuu osɛɛ!” (Yesaia 63:17) Hɛɛ, Yesaia sɔle ní Yehowa agbala ejwɛŋmɔ kɛba etsuji lɛ anɔ ekoŋŋ. Shi, mɛɛ shishinumɔ naa Yehowa ha Yudafoi lɛ dũ gbɛ kɛjɛ egbɛ̀i lɛ anɔ lɛ? Ani Yehowa ji mɔ ni ha amɛwaje amɛtsuii, ní no hewɔ lɛ amɛbɛ gbeyeishemɔ ko kwraa kɛha lɛ lɛ? Dabi, shi eŋmɛ amɛ gbɛ ní amɛfee nakai, ni Yudafoi lɛ kɛ nijiaŋwujee ye ŋkɔmɔ akɛ Yehowa eha amɛ heyeli ní tamɔ nɛkɛ. (2 Mose 4:21; Nehemia 9:16) Amɛná ní kulɛ Yehowa kɛ ehe wo mli ní etsĩ amɛnaa koni amɛkafee nɔ̃ fɔŋ.
5 Yɛ anɔkwale mli lɛ, Nyɔŋmɔ kɛ adesai yeee yɛ nakai gbɛ nɔ. Wɔji gbɔmɛi ní yɔɔ nifeemɔ mli heyeli, ni Yehowa ŋmɛɔ wɔ gbɛ ní wɔ diɛŋtsɛ wɔkpɛ wɔyiŋ akɛ wɔbaabo lɛ toi loo wɔboŋ lɛ toi. (5 Mose 30:15-19) Yehowa miitao jamɔ ní jɛɔ tsuii kɛ jwɛŋmɔi ní anɔkwa suɔmɔ kanyaa amɛ lɛ amli. No hewɔ lɛ, eŋmɛ Yudafoi lɛ agbɛ koni amɛkɛ amɛnifeemɔ mli heyeli lɛ atsu nii, eyɛ mli akɛ enɛ eŋmɛ amɛ gbɛ ni amɛtse atua amɛshi lɛ. Nɛkɛ gbɛ nɔ eha amɛtsuii wa yɛ lɛ.—2 Kronika 36:14-21.
6, 7. (a) Mɛni jɛ Yehowa gbɛ̀i ní Yudafoi lɛ kwa lɛ mli ba? (b) Mɛɛ gbɛkpamɔ folo ko ajie lɛ kpo, shi mɛni Yudafoi lɛ bɛ hegbɛ akɛ amɛkpaa gbɛ?
6 Mɛni jɛ mli ba? Yesaia kɛɛ yɛ gbalɛ wiemɔ mli akɛ: “Be fioo kɛkɛ omaŋ krɔŋkrɔŋ lɛ ye nɔ; wɔhenyɛlɔi lɛ enaanaa ohe krɔŋkrɔŋ lɛ nɔ. Wɔtsɔmɔ tamɔ mɛi ní oyeko amɛnɔ pɛŋ, kɛ mɛi ní akɛ ogbɛi tsɛko amɛ!” (Yesaia 63:18, 19) Yehowa he krɔŋkrɔŋ lɛ hi ewebii lɛ adɛŋ yɛ be kukuoo pɛ mli. Kɛkɛ ni Yehowa ŋmɛ gbɛ ni abakpata hiɛ ni akɛ emaŋ lɛ tee nomŋɔɔ mli. Beni eba lɛ nakai lɛ, efee tamɔ nɔ ni kpaŋmɔ ko kwraa bɛ ekɛ Abraham shwiei lɛ ateŋ, ni efee tamɔ nɔ ni akɛ egbɛi tsɛko amɛ pɛŋ. Beni amɛtsɔmɔ nomii yɛ Babilon agbɛnɛ lɛ, Yudafoi lɛ bolɔ yɛ amɛshihilɛ ní hiɛnɔkamɔ bɛ mli lɛ mli akɛ: “Oo, kulɛ otserɛ ŋwɛi mli ní okpeleke shi, ní gɔji lɛ ahoso yɛ ohiɛ, tamɔ la shãa lai ní la haa nu tswaa lɛ, koni ohenyɛlɔi ale ogbɛi lɛ, ní jeŋmaji lɛ ahe akpokpo yɛ ohiɛ.” (Yesaia 64:1) Yehowa yɛ hewalɛ ní ekɛhereɔ mɔ yiwala lɛɛlɛŋ. Eka shi faŋŋ akɛ kulɛ ebaanyɛ ekpeleke shi ní ebawuu eha emaŋ lɛ, ní etserɛ nɔyeli gbɛjianɔtoi ní tamɔ ŋwɛi lɛ amli, ní ekumɔ nɔyelii ní tamɔ gɔji lɛ eshwie shi. Kulɛ Yehowa baanyɛ eha ale egbɛi lɛ kɛtsɔ ekãa ní naa wa ní ekɛaatsu nii yɛ emaŋ lɛ gbɛfaŋ lɛ nɔ.
7 Yehowa efee nibii ní tamɔ nakai be ko ní eho. Yesaia wie akɛ: “Yɛ onifeemɔ nii ni yɔɔ gbeyei ní wɔhiɛ kãaa nɔ lɛ ahewɔ! kpelekemɔ shi, ní gɔji lɛ ahoso yɛ ohiɛ!” (Yesaia 64:2) Nifeemɔi kpelei ní tamɔ nɛkɛ jieɔ Yehowa hewalɛ kɛ Nyɔŋmɔyeli lɛ kpo. Shi kɛlɛ, Yudafoi ní yeee anɔkwa, ní hi shi yɛ Yesaia gbii lɛ amli lɛ bɛ hegbɛ ní amɛkpaa Yehowa gbɛ akɛ efee nii yɛ nakai gbɛ nɔ yɛ amɛhewɔ.
Yehowa Pɛ Baanyɛ Ahere Mɔ Yiwala
8. (a) Mɛni ji gbɛ kome ní esoro Yehowa yɛ jeŋmaji lɛ apasa nyɔŋmɔi lɛ ahe? (b) Mɛni hewɔ Yehowa efeee nii ní ekɛhere ewebii lɛ ayiwala, eyɛ mli akɛ ebaanyɛ efee nakai lɛ? (d) Te Paulo tsɛ́ Yesaia 64:3 lɛ sɛɛ ni ekɛto he eha tɛŋŋ? (Kwɛmɔ akrabatsa ní yɔɔ baafa 366 lɛ.)
8 Apasa nyɔŋmɔi tsuuu yiwalaheremɔ nitsumɔi wuji amɛhaaa mɛi ní jáa amɛ lɛ. Yesaia ŋma akɛ: “Kɛjɛ teteete lɛ anuko dã, ni efoko mɔ ko toiŋ, ni hiŋmɛi hu enako Nyɔŋmɔ ko yɛ osɛɛ ní feɔ nɔ̃ ehaa mɔ ni hiɛ kã enɔ lɛ! Okɛ mɔ ni kɛ miishɛɛ tsuɔ jalɛ nii lɛ kpeɔ: mɛi ní kaiɔo yɛ ogbɛ̀i lɛ anɔ lɛ.” (Yesaia 64:3, 4a) Yehowa kome pɛ ji “mɛi ni taoɔ esɛɛgbɛ lɛ anyɔmɔwolɔ.” (Hebribii 11:6) Efeɔ nii kɛbuɔ mɛi ní feɔ jalɛ nii kɛ mɛi ní kaiɔ lɛ lɛ ahe. (Yesaia 30:18) Ani Yudafoi lɛ efee amɛnii yɛ nɛkɛ gbɛ nɔ? Dabi. Yesaia kɛɛ Yehowa akɛ: “Naa, omli efu, ejaakɛ wɔfee esha; nakai wɔyɔɔ kɛjɛ jeeŋmɔ, aso aaahere wɔyiwala kɛ̃?” (Yesaia 64:4b) Akɛni ale Nyɔŋmɔ webii lɛ jeeŋmɔ yɛ esha ní amɛfeɔ daa lɛ hewɔ lɛ, yiŋtoo ko bɛ ní Yehowa aaadamɔ nɔ etsĩ emlifu lɛ naa, ní efee nii kɛha amɛyiwalaheremɔ.
9. Mɛni Yudafoi ní etsake amɛtsui lɛ ahiɛ baanyɛ akã nɔ, ni mɛni wɔbaanyɛ wɔkase kɛjɛ enɛ mli?
9 Yudafoi lɛ nyɛŋ atsake be ní eho lɛ mli nibii, shi kɛ́ amɛtsake amɛtsui ní amɛku amɛsɛɛ kɛba jamɔ krɔŋŋ mli ekoŋŋ lɛ, no lɛ amɛhiɛ baanyɛ akã eshaifaa kɛ wɔsɛɛ be mli jɔɔmɔi anɔ. Yehowa baawo mɛi ní tsakeɔ amɛtsui lɛ anyɔmɔ yɛ lɛ diɛŋtsɛ ebe ní eto mli, kɛtsɔ jiemɔ ní eeejie amɛ kɛjɛ Babilon nomŋɔɔ mli lɛ nɔ. Shi kɛlɛ, ehe miihia ní amɛto amɛtsui shi. Yɛ amɛ tsuitsakemɔ lɛ fɛɛ sɛɛ lɛ, Yehowa tsakeŋ ebe he gbɛjianɔtoo lɛ. Shi kɛlɛ, kɛ́ amɛha amɛhiɛ hi amɛhe nɔ ní amɛkpɛlɛ Yehowa suɔmɔnaa nii anɔ lɛ, no lɛ amɛyɛ nɔmimaa akɛ yɛ naagbee lɛ ebaajie amɛ. Nakai nɔŋŋ Kristofoi ni yɔɔ ŋmɛnɛ lɛ hu kɛ tsuishitoo kwɛɔ Yehowa gbɛ. (2 Petro 3:11, 12) Wɔhaa bɔfo Paulo wiemɔi nɛɛ hiɔ wɔtsuii amli, akɛ: “Nyɛkahaa ekpakpafeemɔ miitɔa nyɛ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.”—Galatabii 6:9.
10. Mɛɛ nɔ ko ní anyɛŋ afee Yesaia jaje faŋŋ yɛ esɔlemɔ lɛ mli?
10 Yesaia gbalɛ mli sɔlemɔ lɛ fe esha jajemɔ folo ko kɛkɛ ní ebiɔ akɛ efee. Ejieɔ bɔ ni maŋ lɛ kɛ anɔkwayeli kpɛlɛɔ nɔ akɛ enyɛŋ ehere lɛ diɛŋtsɛ eyiwala lɛ kpo. Gbalɔ lɛ kɛɛ akɛ: “Wɔ fɛɛ wɔtsɔmɔ tamɔ mɛi ní he tseee, ni wɔjalɛ lɛ fɛɛ tamɔ atade ní abule: ni wɔ fiaa wɔmiiŋãlã tamɔ baa, ni wɔnishaianii lɛ miiloo wɔ kɛmiiya tamɔ kɔɔyɔɔ.” (Yesaia 64:5) Beni shɛɔ nomŋɔɔ lɛ naagbee lɛ, no mli lɛ ekolɛ Yudafoi ní etsake amɛtsui lɛ ekpá hemɔkɛyeli kwamɔ nifeemɔi lɛ. Ekolɛ amɛku amɛsɛɛ kɛba Yehowa ŋɔɔ kɛ jalɛ nifeemɔi. Shi kɛlɛ amɛyeee emuu lolo. Eyɛ mli akɛ amɛnifeemɔi kpakpai lɛ sa yijiemɔ moŋ, shi yɛ kpatamɔ kɛha eshai agbɛfaŋ lɛ, amɛtamɔ atadei ní abule lɛ pɛpɛɛpɛ. Yehowa dɛŋ eshaifaa ní amɛaaná lɛ ji nikeenii ko ní amɛsaaa ní emɔbɔnalɛ lɛ kanyaa. Ejeee nɔ ko ní amɛ diɛŋtsɛ amɛbaanyɛ amɛná.—Romabii 3:23, 24.
11. (a) Mɛɛ mumɔŋ shihilɛ ní ehiii kwraa Yudafoi ní yɔɔ nomŋɔɔ mli lɛ ateŋ mɛi pii yɔɔ mli, ni mɛni hewɔ ekolɛ eba lɛ nakai? (b) Namɛi fee hemɔkɛyeli he nɔkwɛmɔnii ní nɔ bɛ yɛ nomŋɔɔ be lɛ mli?
11 Beni Yesaia susuɔ wɔsɛɛ be he lɛ, mɛni ena? Gbalɔ lɛ sɔle akɛ: “Mɔ ko bɛ ní tsɛ́ɔ ogbɛi lɛ ní eteɔ shi ní emɔɔ omli; ejaakɛ okɛ ohiɛ etée wɔ, ni oha wɔlaaje yɛ wɔnishaianii lɛ ahewɔ.” (Yesaia 64:6) Maŋ lɛ mumɔŋ shihilɛ efite kwraa. Gbɔmɛi lɛ tsɛɛɛ Nyɔŋmɔ gbɛi yɛ sɔlemɔ mli. Eyɛ mli akɛ amɛyeee wɔŋjamɔ ní ji esha ní yɔɔ hiɛdɔɔ lɛ he fɔ́ dɔŋŋ moŋ, shi eka shi faŋŋ akɛ amɛfee anyagba yɛ amɛjamɔ lɛ mli, ni mɔ ko mɔ ko bɛ ‘ní teɔ shi ní emɔɔ Yehowa mli.’ Eyɛ faŋŋ akɛ amɛnáaa amɛkɛ Bɔlɔ lɛ teŋ wekukpaa kpakpa mli ŋɔɔmɔ. Ekolɛ amɛteŋ mɛi komɛi nuɔ he akɛ amɛjeee mɛi ní sa akɛ amɛkɛ Yehowa awie yɛ sɔlemɔ mli. Ekolɛ mɛi krokomɛi hu tsuɔ amɛ daa gbi shihilɛ mli nitsumɔi ní amɛsusuuu ehe po. Shi yɛ anɔkwale mli lɛ, aŋkroaŋkroi tamɔ Daniel, Hanania, Mishael, Azaria, kɛ Ezekiel yɛ nomii lɛ ateŋ, ni mɛnɛɛmɛi ji hemɔkɛyeli he nɔkwɛmɔnii kpakpai. (Hebribii 11:33, 34) Beni afii 70 nomŋɔɔ be lɛ bɛŋkɛɔ enaagbee lɛ, hii tamɔ Hagai, Zakaria, Zerubabel, kɛ Osɔfonukpa Yoshua efee klalo akɛ amɛkɛ hiɛnyiɛmɔ ní nɔ bɛ baaha yɛ Yehowa gbɛi lɛ tsɛmɔ mli. Shi kɛlɛ, etamɔ nɔ ni Yesaia gbalɛ mli sɔlemɔ lɛ miitsɔɔ shihilɛ ní nomii lɛ ateŋ mɛi babaoo yɔɔ mli.
“Toiboo Hi Fe Afɔle”
12. Yesaia jie bɔ ni Yudafoi ní etsake amɛtsui lɛ sumɔɔ ní amɛtsake amɛsubaŋ lɛ kpo yɛ mɛɛ gbɛ nɔ?
12 Yudafoi ní etsake amɛtsui lɛ miisumɔ ní amɛtsake. Yesaia damɔ amɛnajiaŋ, ni esɔle eha Yehowa akɛ: “Agbɛnɛ, Yehowa, bo ji wɔtsɛ: wɔ lɛ, sũ ji wɔ, ni bo ji wɔshɔ̃lɔ, ni oninenaa nitsumɔ ji wɔ fɛɛ.” (Yesaia 64:7) Wiemɔi nɛɛ kpɛlɛɔ hegbɛ ní Yehowa yɔɔ ákɛ Tsɛ, loo Wala-Halɔ lɛ nɔ shikome ekoŋŋ. (Hiob 10:9) Akɛ Yudafoi ní tsakeɔ amɛtsui lɛ toɔ nishɔ̃lɔ sũ he. Abaanyɛ ashɔ̃ mɛi ní kpɛlɛɔ Yehowa tsɔsemɔ nɔ lɛ yɛ mfonirifeemɔŋ, loo afee amɛ yɛ tɛi ní Nyɔŋmɔ efolɔ eshwie shi lɛ kɛ gbeekpamɔ naa. Shi ja Yehowa, ni ji Nishɔ̃lɔ lɛ, ekpã eshaifaa mli dani abaanyɛ afee enɛ. No hewɔ lɛ, Yesaia kpa lɛ fai shii enyɔ sɔŋŋ koni ekai akɛ emaŋ ji Yudafoi lɛ, akɛ: “Yehowa, kaaha omli miiwo la tuutu, ni kaakai nɔ̃ sha kɛmiiya naanɔ! Naa, kwɛmɔ! wɔ fɛɛ omaŋ ji wɔ!”—Yesaia 64:8.
13. Mɛɛ shihilɛ mli Israel shikpɔŋ lɛ yɔɔ beni Nyɔŋmɔ webii lɛ yɔɔ nomŋɔɔ mli lɛ?
13 Beni Yudafoi lɛ yɔɔ nomŋɔɔ mli lɛ, amɛkɛ shihilɛi babaoo kpe fe nomii ní amɛji yɛ wɔŋjalɔi ashikpɔŋ nɔ kɛkɛ. Amaŋfɔ shihilɛ ní Yerusalem kɛ esɔlemɔtsu lɛ yɔɔ mli lɛ kɛ heguɔgbee ba amɛ kɛ amɛ-Nyɔŋmɔ lɛ nɔ. Yesaia sɔlemɔ ní tsɔɔ tsuitsakemɔ lɛ tsĩ nibii ní kɛ heguɔgbee nɛɛ ba lɛ ekomɛi atã, ni ekɛɛ: “Omaji krɔŋkrɔŋi lɛ etsɔmɔ ŋã nɔ: Zion etsɔ ŋã nɔ, ni Yerusalem etsɔ amaŋfɔ. Wɔshia krɔŋkrɔŋ ní yɔɔ fɛo lɛ, nɔ̃ mli ní wɔtsɛmɛi lɛ jie oyi yɛ lɛ, akɛ la eshã, ni afite wɔnibii fɛfɛji lɛ fɛɛ.”—Yesaia 64:9, 10.
14. (a) Te Yehowa bɔ shihilɛ ní yɔɔ amrɔ nɛɛ lɛ he kɔkɔ eha tɛŋŋ? (b) Eyɛ mli akɛ Yehowa ná esɔlemɔtsu lɛ kɛ afɔlei ní ashã yɛ jɛmɛ lɛ ahe miishɛɛ moŋ, shi mɛni he hiaa fe nomɛi?
14 Yɛ anɔkwale mli lɛ, Yehowa le shihilɛ ní Yudafoi lɛ ablematsɛmɛi ashikpɔŋ lɛ yɔɔ mli lɛ jogbaŋŋ. Aaafee afii 420 dani Yerusalem hiɛkpatamɔ lɛ aaaba lɛ, ebɔ ewebii lɛ kɔkɔ akɛ kɛ́ amɛtsi amɛhe kɛjɛ ekitai lɛ ahe ní amɛyasɔmɔ nyɔŋmɔi krokomɛi lɛ, no lɛ ‘ebaakpata amɛhiɛ kɛjɛ shikpɔŋ lɛ nɔ,’ ni sɔlemɔtsu fɛfɛo lɛ ‘aaatsɔ koikoi.’ (1 Maŋtsɛmɛi 9:6-9) Lɛɛlɛŋ, Yehowa ná shikpɔŋ ní ekɛha ewebii lɛ, kɛ sɔlemɔtsu fɛfɛo ní ama ní akɛwoɔ ehiɛ nyam, kɛ afɔlei ní ashãa ahaa lɛ lɛ ahe miishɛɛ. Shi anɔkwayeli kɛ toiboo he miihia kwraa fe heloonaa nibii, kɛ afɔleshaai po. Gbalɔ Samuel kɛɛ Maŋtsɛ Saul yɛ gbɛ ní sa nɔ akɛ: “Ani Yehowa náa shãa afɔlei kɛ gbee afɔlei ahe tsui tamɔ Yehowa gbee toiboo lo? Naa, toiboo hi fe afɔle, ni ninumɔ hu hi fe too agboi afɔ.”—1 Samuel 15:22.
15. (a) Mɛɛ faikpamɔ Yesaia kɛfɔ̃ Yehowa hiɛ yɛ gbalɛ wiemɔ mli, ni te aha hetoo aha tɛŋŋ? (b) Mɛni ha naagbee lɛ Yehowa kpoo Israel kwraa akɛ maŋ lɛ?
15 Shi yɛ fɛɛ sɛɛ lɛ, ani Israel Nyɔŋmɔ lɛ baanyɛ akwɛ amanehulu ní ewebii ní etsake amɛtsui lɛ naa lɛ, ní nɔ ko tsirɛɛɛ lɛ ní ena amɛ mɔbɔ? No ji sanebimɔ ní Yesaia kɛgbe egbalɛ mli sɔlemɔ lɛ naa. Edamɔ Yudafoi nomii lɛ anajiaŋ ni ekpa fai akɛ: “Yehowa, aso enɛɛmɛi fɛɛ sɛɛ lɛ ooosu ohe lo? ooofee diŋŋ, ni ooowa wɔ yi tuutu?” (Yesaia 64:12) Taakɛ shihilɛ lɛ ba lɛ lɛ, Yehowa kɛ ewebii lɛ ahe ke amɛ lɛɛlɛŋ, ni yɛ afi 537 D.Ŋ.B. lɛ, ekɛ amɛ ku sɛɛ kɛba amɛshikpɔŋ nɔ ekoŋŋ koni amɛnyɛ amɛje jamɔ krɔŋŋ shishi ekoŋŋ yɛ jɛmɛ. (Yoel 2:13) Shi, afii ohai abɔ sɛɛ lɛ, akpata Yerusalem kɛ esɔlemɔtsu lɛ hiɛ ekoŋŋ, ni yɛ naagbee lɛ Nyɔŋmɔ kpoo emaŋ ní ekɛ amɛ efee kpaŋmɔ lɛ kwraa. Mɛni hewɔ? Ejaakɛ Yehowa webii lɛ kpalaŋ kɛjɛ ekitai lɛ ahe, ni amɛkpoo Mesia lɛ. (Yohane 1:11; 3:19, 20) Ní eba lɛ nakai lɛ, Yehowa kɛ jeŋmaŋ hee ko, ni ji mumɔŋ maŋ ko, ní atsɛɔ lɛ “Nyɔŋmɔ Israel lɛ” ye Israel najiaŋ.—Galatabii 6:16; 1 Petro 2:9.
Yehowa, ‘Sɔlemɔ Toibolɔ’ Lɛ
16. Mɛni Biblia lɛ tsɔɔ yɛ Yehowa dɛŋ eshaifaa he?
16 Wɔbaanyɛ wɔkase nibii ní he hiaa kɛjɛ nɔ ni ba Israel nɔ lɛ mli. Wɔnaa akɛ Yehowa ‘hi ni eŋɔfaa mra.’ (Lala 86:5) Ákɛ bɔɔ nii ní yeee emuu lɛ, wɔdamɔɔ emɔbɔnalɛ kɛ eshaifaa lɛ nɔ wɔnáa yiwalaheremɔ. Wɔbɛ nitsumɔi ní wɔbaanyɛ wɔtsu ní nomɛi aye abua wɔ ní wɔná jɔɔmɔi nɛɛ. Shi kɛlɛ, Yehowa kpãaa eshaifaa mli ehaaa mɔ fɛɛ mɔ kɛkɛ. Mɛi ní shwaa amɛhe yɛ amɛhe eshai lɛ amli, ní amɛkuɔ amɛsɛɛ lɛ pɛ bafeɔ mɛi ní náa ŋwɛi eshaifaa.—Bɔfoi lɛ Asaji 3:19.
17, 18. (a) Te wɔfeɔ tɛŋŋ wɔleɔ akɛ Yehowa yɛ wɔsusumɔi kɛ henumɔi ahe anɔkwa miishɛɛ? (b) Mɛni hewɔ Yehowa jieɔ tsuishitoo kpo yɛ adesai eshafeelɔi ahe lɛ?
17 Wɔnáa wɔleɔ hu akɛ Yehowa yɛ wɔsusumɔi kɛ henumɔi ahe miishɛɛ kɛji wɔjie amɛ kpo yɛ sɔlemɔ mli wɔha lɛ. Lɛ ji ‘sɔlemɔ Toibolɔ’ lɛ. (Lala 65:3, 4) Bɔfo Petro maa nɔ mi ehaa wɔ akɛ: “[Yehowa, NW] hiŋmɛii kã jalɔi ahe, ni eboɔ amɛfaikpamɔ toi.” (1 Petro 3:12) Kɛfata he lɛ, wɔnáa wɔleɔ akɛ esa akɛ heshibaa ní wɔkɛaajaje wɔhe eshai lɛ afata wɔsɔlemɔ ní tsɔɔ tsuitsakemɔ lɛ he. (Abɛi 28:13) Shi kɛlɛ, enɛ etsɔɔɔ akɛ wɔbaanyɛ wɔbu Nyɔŋmɔ mɔbɔnalɛ lɛ yakatswaa. Biblia lɛ bɔɔ Kristofoi kɔkɔ ní “[amɛkahé] Nyɔŋmɔ duromɔ lɛ yakatswaa.”—2 Korintobii 6:1.
18 Yɛ naagbee lɛ, wɔbaleɔ yiŋtoo ní yɔɔ tsuishitoo ní Nyɔŋmɔ jieɔ lɛ kpo etsɔɔ ewebii eshafeelɔi lɛ sɛɛ. Bɔfo Petro tsɔɔ mli akɛ Yehowa toɔ etsui shi “ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) Shi kɛlɛ, yɛ naagbee lɛ abaagbala mɛi ni yaa nɔ amɛkɛ Nyɔŋmɔ tsuishitoo lɛ tsuɔ nii yɛ gbɛ fɔŋ nɔ lɛ atoi. Wɔkaneɔ yɛ enɛ he akɛ: “[Yehowa baawo] mɔ fɛɛ mɔ nyɔmɔ bɔ ni sa enitsumɔi lɛ: mɛi ni kɛ ekpakpafeemɔ mli tsuishiŋmɛɛ taoɔ anunyam kɛ woo kɛ shihilɛ ni fiteŋ lɛ, aaaha amɛ naanɔ wala; shi mɛi hu ní sumɔɔ béi ní amɛbooo anɔkwale lɛ toi, shi amɛboɔ nishaianii moŋ toi lɛ, amɛnɔ̃ ji mlifu kɛ mlila.”—Romabii 2:6-8.
19. Mɛɛ sui ní tsakeee Yehowa baaya nɔ ejie lɛ kpo be fɛɛ be?
19 Bɔ ni Nyɔŋmɔ kɛ blema Israel ye ha nɛ. Ŋmɛnɛ, nakai shishitoo mlai lɛ nɔŋŋ kudɔɔ wɔkɛ Yehowa teŋ wekukpaa lɛ, ejaakɛ etsakeee. Eyɛ mli akɛ etsĩŋ toigbalamɔ ní sa lɛ naa moŋ, shi ebaaya nɔ ehi shi daa ákɛ “Yehowa, Nyɔŋmɔ musuŋtsɔlɔ kɛ durolɔ ní toɔ tsui, ní mɔbɔnalɛ kɛ anɔkwale fá pii, ní hiɛɔ mɔbɔnalɛ mli ehaa mɛi akpei abɔ, ní ŋɔɔ tɔmɔ kɛ efɔŋ kɛ esha efaa.”—2 Mose 34:6, 7.
[Akrabatsa/Mfonirii ni yɔɔ baafa 362]
Daniel Tsuitsakemɔ Sɔlemɔ Lɛ
Gbalɔ Daniel hi shi yɛ Babilon yɛ afii 70 ní Yudafoi lɛ kɛhi nomŋɔɔ mli lɛ mli fɛɛ. Nomŋɔɔ lɛ mli afi ni ji 68 lɛ mli be ko mli lɛ, Daniel yɔse kɛjɛ Yeremia gbalɛ lɛ mli akɛ Israel nomŋɔɔ shihilɛ lɛ miibɛŋkɛ enaagbee. (Yeremia 25:11; 29:10; Daniel 9:1, 2) Daniel tsɔ ehe kɛtee Yehowa ŋɔɔ yɛ sɔlemɔ mli—tsuitsakemɔ sɔlemɔ yɛ Yudafoi amaŋ lɛ fɛɛ najiaŋ. Daniel tsɔɔ mli akɛ: “Mitsɔ mihiɛ miha Nuntsɔ Nyɔŋmɔ lɛ, koni mikɛ buadayeli kɛ kpekpe kɛ lamulu atao sɔlemɔ kɛ faikpamɔ sɛɛgbɛ. Ni mikpa Yehowa, mi-Nyɔŋmɔ lɛ, fai, ni mijaje.”—Daniel 9:3, 4.
Daniel sɔle nɛkɛ sɔlemɔ nɛɛ aaafee afii ohai enyɔ yɛ be mli ní Yesaia ŋma gbalɛ mli sɔlemɔ ní anaa yɛ ewolo lɛ yitsei 63 kɛ 64 lɛ sɛɛ. Ŋwanejee ko bɛ he akɛ, Yudafoi anɔkwafoi pii sɔle amɛha Yehowa yɛ nomŋɔɔ lɛ mli jaramɔ afii lɛ amli. Shi, Biblia lɛ maa Daniel sɔlemɔ lɛ, ní eka shi faŋŋ akɛ ejieɔ Yudafoi anɔkwafoi babaoo ahenumɔi akpo lɛ nɔ mi. Enɛ hewɔ lɛ, esɔlemɔ lɛ tsɔɔ akɛ Yesaia gbalɛ mli sɔlemɔ lɛ mli henumɔi lɛ jieɔ Yudafoi anɔkwafoi ní yɔɔ Babilon lɛ ahenumɔi akpo lɛɛlɛŋ.
Kadimɔ nibii komɛi ní je amɛhe yɛ Daniel sɔlemɔ lɛ kɛ Yesaia nɔ̃ lɛ mli.
Yesaia 64:9, 10 Daniel 9:16-18
[Akrabatsa ni yɔɔ baafa 366]
“Hiŋmɛi Enako”
Bɔfo Paulo tsɛ́ Yesaia wolo lɛ mli wiemɔ ko sɛɛ yɛ ewolo ní eŋma eyaha Korintobii lɛ mli, beni eŋma akɛ: “Taakɛ bɔ ni aŋma lɛ, ‘nii ni hiŋmɛi enako ni toi hu nuko ni ebako gbɔmɔ ko tsuiŋ dã ji nii ni Nyɔŋmɔ esaa eto mɛi ni sumɔɔ lɛ lɛ.’” (1 Korintobii 2:9)a Paulo wiemɔ lɛ kɛ Yesaia wiemɔi lɛ fɛɛ etsɔɔɔ nibii ní Yehowa esaa eto kɛha ewebii yɛ ŋwɛi gboshinii ko loo yɛ wɔsɛɛ be mli shikpɔŋ nɔ paradeiso ko mli. Paulo kɛ Yesaia wiemɔi lɛ miito jɔɔmɔi ní Kristofoi náa mli ŋɔɔmɔ momo yɛ klɛŋklɛŋ afii oha lɛ mli, tamɔ Nyɔŋmɔ nibii ní mli kwɔlɔ lɛ ashishi ní amɛnuɔ kɛ mumɔŋ sɛɛyoomɔ ní amɛnáa kɛjɛɔ Yehowa ŋɔɔ lɛ ahe.
Ja Yehowa be ní eto ní ekɛbaajie mumɔŋ nibii ní mli kwɔlɔ lɛ akpo lɛ eshɛ dani wɔbaanyɛ wɔnu shishi—ni kɛ nakai po lɛ, ja wɔ ji mumɔŋ gbɔmɛi ní kɛ Yehowa yɔɔ wekukpaa ní bɛŋkɛ kpaakpa dani wɔbaanyɛ wɔnu shishi. Paulo wiemɔi lɛ kɔɔ mɛi ní yɔɔ mumɔŋ dalɛ bibioo, loo amɛbɛ eko kwraa lɛ ahe. Amɛhiŋmɛi nyɛɛɛ ana, loo eyɔse mumɔŋ anɔkwalei, ni amɛtoi hu nyɛɛɛ anu, loo enu nakai nibii lɛ ashishi. Nibii ní Nyɔŋmɔ esaa eto eha mɛi ní sumɔɔ lɛ lɛ ahe nilee po boteee gbɔmɛi ní tamɔ nɛkɛ lɛ atsuii amli. Shi Nyɔŋmɔ etsɔ emumɔ lɛ nɔ ejie nibii nɛɛ akpo etsɔɔ mɛi ní ejɔɔ amɛhe nɔ amɛha Nyɔŋmɔ, taakɛ Paulo ji lɛ.—1 Korintobii 2:1-16.
[Shishigbɛ niŋmaa]
a Anaaa Paulo wiemɔi lɛ yɛ Hebri Ŋmalɛi lɛ amli tamɔ bɔ ni etsɛ yisɛɛ lɛ pɛpɛɛpɛ. Etamɔ nɔ ni efee susumɔi ní yɔɔ Yesaia 52:15; 64:3; kɛ 65:17 lɛ fɛɛ ekome.
[Mfoniri ni yɔɔ baafa 367]
Yerusalem kɛ esɔlemɔtsu lɛ hi Nyɔŋmɔ webii adɛŋ “be fioo kɛkɛ”