Akpekpei Ni Yɔɔ Wala Mli Bianɛ Gboiŋ Gbi Ko Gbi Ko Kɛjɛŋ Wɔshikpɔŋ Lɛ Nɔ
“Miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaaka; ni mɔ fɛɛ mɔ ni hiɛ ka ni eheɔ minɔ eyeɔ lɛ, egboŋ gbi ko gbi ko kɛaatee naanɔ.”—Yohane 11:25, 26.
1. Kɛ mɔ ko gboŋ kɛjɛŋ wɔshikpɔŋ nɛɛ nɔ kɔkɔɔkɔ lɛ, belɛ mɛni no baaji aha nakai mɔ ni aduro lɛ lɛ?
1 AKƐ mɔ ko gboŋ gbi ko gbi ko lɛ baatsɔɔ akɛ mɔ aŋkro ni aduro lɛ nɛkɛ lɛ baaya nɔ ahi shi akɛ adesa nuu loo yoo yɛ biɛ yɛ shikpɔŋ nɛɛ nɔ yɛ be fɛɛ mli! Sane naamuu ni shishinumɔ yɔɔ mli nɛ, aloo jeee nakai? Ni ani ekɛ Yesu Kristo wiemɔi ni yɔɔ yiteŋgbɛ nɛɛ ni ewie fe afii ohai 19 ni eho nɛ lɛ kpaaa gbee lo? Ekɛ lɛ kpaa gbee.
2, 3. (a) Mɛɛ hiɛnɔkamɔ Hebri Ŋmalɛi lɛ kɛhaa? (b) Mɛni ji jwɛŋmɔ kwraa ni Kristendom jamɔ gbɛjianɔtooi lɛ hiɛ?
2 Hebri Ŋmalɛi krɔŋkrɔŋi lɛ, ni ji kɛjɛ Mose Klɛŋklɛŋ Wolo lɛ kɛyashi Maleaki, kɛ ŋwɛi hiɛnɔkamɔ ko haaa, no hewɔ lɛ Yudafoi ni kɛ amɛhe kpɛtɛɔ nɛkɛ Ŋmalɛi nɛɛ ahe gbagbalii lɛ bɛ ŋwɛi hiɛnɔkamɔ ni amɛsheee jɛmɛ shihilɛ. Shi Hebri Ŋmalɛi lɛ kɛ naanɔ wala he hiɛnɔkamɔ hãa. (Lala 37:20: Hiob 14:15) Kɛha heloo naa Yudanyo ni afo lɛ ketia lɛ, naanɔ wala yɛ shikpɔŋ nɔ yɛ shiwoo Mesia lɛ. Maŋtsɛyeli shishi lɛ ji daa hiɛnɔkamɔ kɛ gbɛkpamɔ.
3 Shi kɛlɛ, jeee nakai ji jamɔ gbɛjianɔtooi ni yɔɔ Kristendom lɛ ajwɛŋmɔ. Amɛheɔ amɛyeɔ ni amɛtsɔɔ akɛ, wɔ ni ji adesai lɛ yɛ susumai ni gbooo yɛ wɔgbɔmɔtso ni gboɔ nɛɛ mli, ni akɛ kɛ wɔ gbele be ni wɔnyɛŋ wɔjo naa foi lɛ shɛ lɛ, ahãa nɛkɛ susuma nɛɛ yeɔ ehe ni ejoɔ foi kɛyaa mumɔi ashihilɛhe ni anaaa jɛmɛ lɛ. Jɛmɛ akojoɔ lɛ yɛ, ni Nyɔŋmɔ kɛ lɛ yaa ŋwɛi hejɔɔmɔ mli aloo toigbalamɔ he yɛ piŋmɔ ni bɛ naagbee mli kɛji akɛ gbɔmɔ lɛ jeee Kristofonyo anɔkwafo. Ni jwɛŋmɔ kwraa ni Kristendom hiɛ ji akɛ abaashã ni akpata shikpɔŋ lɛ, hulu, nyɔŋtsere kɛ ŋulamii lɛ ahiɛ yɛ jeŋ muu fɛɛ la hiɛkpatamɔ ko mli.
4. Mɛni hewɔ wɔshikpɔŋ nɛɛ ni agboŋ kɛjɛŋ nɔ kwraa lɛ jeee nɔ ko ni tamɔ sanekpakpa kɛha mɛi pii ni shihilɛ mli ni shikpɔŋ lɛ yɔɔ amrɔ nɛɛ lɛ yɔɔ amɛjwɛŋmɔ mli lɛ?
4 Bɔ ni Nyɔŋmɔjamɔ tsɔɔmɔ ni tamɔ nɛkɛ lɛ ji hewɔ lɛ, enyɛŋ eba mli anɔkwale gbi ko gbi ko akɛ “akpekpei ni yɔɔ wala mli bianɛ gboiŋ gbi ko gbi ko kɛjɛŋ wɔshikpɔŋ lɛ nɔ.” Shi, mɛi pii baabi wɔ akɛ, Namɔ po baasumɔ ni ehi shi yɛ shibɔlemɔ ŋulami ni haomɔi tamɔ hɔmɔ, tsɛŋemɔ helai, shikpɔŋhosomɔi, tai, majimaji ateŋ kɛ weku mli hetsɛ̃ kɛ nuklea tawuu nii ni abuaa naa ni woɔ adesai fɛɛ ashihilɛ he gbeyei nɛkɛ eyi nɔ obɔ lɛ nɔ.’ Kɛji akɛ nibii ni fãa mɔ tsui nɛkɛ baaya nɔ ahao wɔshikpɔŋ lɛ kɛya naanɔ lɛ, belɛ gbɔmɛi ni jwɛŋmɔŋ ka shi lɛ ateŋ mɛi pii baasumɔ ni amɛje nɔ—kɛtsɔ gbele nɔ po!
Shishijee Yiŋtoo Kɛha Shikpɔŋ Lɛ
5. Te shikpɔŋ lɛ yɔɔ tɛŋŋ beni Nyɔŋmɔ kɛ adesai to nɔ lɛ, ni mɛni ji Nyɔŋmɔ henumɔ yɛ adesai ahe?
5 Shi, adesai ashihilɛ shishijee mli tɔɔ Bɔlɔ lɛ kɛ shikpɔŋ lɛ ha adesai akɛ amɛ naanɔ shĩa. No mli lɛ eji ‘shikpɔŋ kpakpa.’ Biblia mli sane ni kɔɔ nibɔɔ he lɛ kɛɔ wɔ akɛ, beni Bɔlɔ lɛ esaa shikpɔŋ lɛ kɛ enɔ nibii eha klɛŋklɛŋ nuu lɛ kɛ yoo lɛ ni ekɛ amɛ eto jɛmɛ sɛɛ lɛ, “Nyɔŋmɔ kwɛ nibii fɛɛ ni efee lɛ, ni naa, ehi naakpa.” (1 Mose 1:31) Eji ejeee nɔ ni hi naakpa yɛ Bɔlɔ lɛ hiɛ kulɛ, ekɛ ebii ni ji adesai lɛ etoŋ biɛ yɛ klɛŋklɛŋ be mli kwraa. Nibɔɔ he niŋmalɔ lɛ wieɔ yɛ Nyɔŋmɔ ni ji Bɔlɔ lɛ he akɛ: “Tɛsaa ji lɛ ni enitsumɔi hi pɛ; ejaakɛ egbɛi fɛɛ jalɛ ni. Anɔkwa Mawu ji lɛ, nɔ sha bɛ lɛ.” (5 Mose 32:4) Nɔ ko bɛ ni áŋma afɔ shi yɛ Nyɔŋmɔ Ofe lɛ nitsumɔ loo nifeemɔ he ni eeekpa mɔ ko fai yɛ he. Ákɛ Tsɛ kpakpa lɛ, esumɔ adesai kɛjɛ shishijee. Ni esumɔɔ adesai lolo.—Yohane 3:16.
6, 7. Mɛni hewɔ wɔbaanyɛ wɔna hekɛnɔfɔɔ akɛ bɔ ni Nyɔŋmɔ bɔ shikpɔŋ lɛ kɛ gbɔmɔ efɔ nɔ lɛ efeŋ yaka nitsumɔ?
6 Yɛ miishɛɛ mli lɛ, shikpɔŋ lɛ kɛ gbɔmɔ ni Nyɔŋmɔ bɔ yɛ nɔ lɛ efeŋ yaka nitsumɔ. Yɛ be mli ni ekɛ oti ko ni woɔ Nyɔŋmɔ hiɛ nyam maa klɛŋklɛŋ nuu kɛ yoo lɛ hiɛ lɛ, Nyɔŋmɔ fa Adam kɛ Hawa ni amɛfɔ bii ni yeɔ emuu amɛwo shikpɔŋ lɛ nɔ obɔ. Afɔ amɛ hu ni amɛya shikpɔŋ lɛ fɛɛ nɔ ni etsɔ je muu fɛɛ Paradeiso, ni amɛye bɔɔ nii ni baa shi yɛ shikpɔŋ lɛ nɔ lɛ fɛɛ nɔ. (1 Mose 1:28) Nɔ ni yɔɔ mɔbɔ ji akɛ, yɛ nɔ ni fe gbɔmɔ shihilɛ kɛ niiashikpamɔ afii 6,000 nɛɛ, adesa nyɛɛɛ afee nɔ ni afa lɛ akɛ efee lɛ. Nɔ ni ehiii kwraa hu lɛ, adesai miiwo amɛ diɛŋtsɛ amɛshihilɛ ni amɛaabule kɛjɛ shikpɔŋ nɔ yɛ yiwalɛ mli kɛtsɔ amɛ diɛŋtsɛ amɛ nibii ni amɛfee lɛ anɔ lɛ he gbeyei. Shi adesa ni efee ehe mɔ ni nine enyɛ shi yɛ nɔ fɛɛ nɔ mli lɛ hako Nyɔŋmɔ ni ji Bɔlɔ lɛ nine anyɛ shi.
7 Nyɔŋmɔ shishijee yiŋtoo ni kɔɔ wɔshikpɔŋ lɛ he lɛ baaba mli, Nyɔŋmɔ ema enɛ nɔ mi eha wɔ! (Yesaia 55:11. Biblia lɛ kɛɔ yɛ Jajelɔ 1:4 akɛ: “Yinɔ hoɔ yaa, ni yinɔ baa; shi shikpɔŋ lɛ ema shi kɛmiiya naanɔ.” Ni Nyɔŋmɔ ni ji Bɔlɔ lɛ wieɔ lɛ diɛŋtsɛ ehe yɛ Yesaia 45:18 akɛ “Nyɔŋmɔ, mɔ ni shɔ̃ shikpɔŋ lɛ ni ekɛma shi,” ni ekɛfata he akɛ: “Ekɛma shi, ni ebɔɔɔ lɛ efolo, shi eshɔ̃ lɛ ni ahi nɔ lɛ, kɛɛ nɛ: Miji Yehowa, ni mɔ ko bɛ sɛɛ dɔŋŋ.” Ni adesa weku ni yeɔ emuu, ni akɛ naanɔ wala nikeenii eduro amɛ ‘baahi nɔ’ kɛ̃, yɛ Nyɔŋmɔ be ni sa mli!
8, 9. (a) Mɛni hewɔ anɔkwale ni eji akɛ ŋwɛi kɛ shikpɔŋ ni yɔɔ nɛɛ lɛ baaho aya lɛ eteee shi ewooo Nyɔŋmɔ yiŋtoo kɛha shikpɔŋ lɛ akɛ ahi nɔ lɛ? (b) Mɛni ji “ŋwɛi hee’” kɛ “shikpɔŋ hee” lɛ, ni mɛni ji Biblia mli shiwoo ni kɔɔ amɛhe?
8 Bɔfo Petro eteee shi ewooo Nyɔŋmɔ yiŋtoo he wiemɔi ni haa mɔ hiɛnɔkamɔ ni yɔɔ yiteŋgbɛ nɛɛ beni ebɔɔ wɔ kɔkɔ akɛ ŋwɛi kɛ shikpɔŋ ni yɔɔ nɛɛ baaho aya lɛ. Dabi, ejaakɛ yɛ be mli ni ekai wɔ nɔ ni baa yɛ wɔsɛɛ be mli, ni agbɛnɛ ebɛŋkɛ wɔ kpaakpa lɛ, etee nɔ ekɛɛ akɛ: “Shi yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:10-13) Ábaa Nyɔŋmɔ shiwoo ni kɔɔ nɛkɛ ŋwɛi hee kɛ shikpɔŋ hee nɛɛ yi yɛ Yesaia 65:17 aha wɔ. Ni yɛ bei abɔ ni enɛɛmɛi baahi shi kɛyata lɛ, akɛɛ wɔ yɛ Yesaia 66:22: “Shi tamɔ bɔ ni ŋwɛi hee kɛ shikpɔŋ hee ni mibafee lɛ aaadamɔ shi yɛ mihiɛ lɛ; Yehowa kɛɛ, nakai nyɛseshi kɛ nyɛgbɛi lɛ aaadamɔ shi.”
9 Ah, hɛɛ, ŋwɛi hee lɛ kɛ shikpɔŋ hee lɛ baaya nɔ adamɔ shi yɛ Yehowa hiɛ; amɛbaadamɔ shi shiŋŋ, amɛbaatsɛ, amɛbaaya nɔ! Mɛi ni feɔ “shikpɔŋ hee” lɛ ji adesai aweku ni ji jalɔi ni baahi shikpɔŋ muu lɛ fɛɛ ni átsumɔ nɔ ni Bɔlɔ lɛ shɔ̃ ni “ahi nɔ” lɛ nɔ lɛ. (Yesaia 45:18) “Ŋwɛi hee” lɛ ni ji jalɛ ŋwɛi hewalɛi heei lɛ baakwɛ shikpɔŋ ni atsumɔ nɔ lɛ kɛ enɔ bii jalɔi lɛ anɔ. Kɛkɛ lɛ ebaafee anɔkwale akɛ Yehowa Nyɔŋmɔ ebɔɔɔ wɔshikpɔŋ ni yɔɔ naakpɛɛ “efolo.” Ebaabu lɛ bem akɛ Feelɔ kɛ̃.
EMLI NI AAAJE KƐYABOTE “SHIKPƆŊ HEE” LƐ NƆ
10, 11. (a) Mɛni ji nɔ ni jɛŋ shihilɛ he nikaselɔi ebuuu he akɔntaa yɛ amɛwiemɔi loo nibii ni amɛgbaa amɛfɔɔ shi lɛ amli, no hewɔ lɛ mɛni mli wɔbaanyɛ wɔje, kɛyabote mɛni mli? (b) Mɛni wɔbaanyɛ wɔkase kɛjɛ Noa kɛ eweku lɛ ni je Nu Afua lɛ mli lɛ mli?
10 Mfoniri ni jeŋ shihilɛ he nikaselɔi kɛtsɔɔ lɛ kɛ hiɛnɔkamɔ ko ni tsɔɔ akɛ adesai baaje mli aloo amɛyi baana wala kɛyabote nibii agbɛjianɔtoo hee ni hi kwraa mli haaa. Wɔmiida shi akɛ amɛsusumɔi jeee shikpɔŋ lɛ Bɔlɔ lɛ susumɔi, ni asaŋ jeee amɛgbɛ́i ji egbɛ̀i (Yesaia 55:8-11) Amɛsusumɔi damɔɔɔ nɔ ni ba shikpɔŋ nɔ jeeŋmɔ beebe yɛ nuu ni ji Noa lɛ gbii lɛ amli lɛ nɔ. Jeŋmaji lɛ anuklea okpɛlɛmii lɛ kɛ amɛtawuu nii krokomɛi ni naa wa lɛ fɛɛ nyɛŋ anina hewalɛ ni yɔɔ je muu fɛɛ Nu Afua ni fɔse eshwie shi kɛjɛ ŋwɛi ni kɛ nakai blema yiwalɛ je lɛ ba naagbee lɛ mli lɛ. Yɛ emɔbɔnalɛ naa lɛ, Yehowa Nyɔŋmɔ ni ji Bɔlɔ lɛ to gbɛjianɔ koni adesa weku lɛ aje nakai je lɛ naagbee ni ba kɛ hiɛkpatamɔ lɛ mli koni amɛya nɔ amɛhi shikpɔŋ nɔ.
11 Adesai kpaanyɔ ji mɛi ni je nakai blema je lɛ hiɛkpatamɔ lɛ mli, ni amɛji Noa kɛ eŋa, kɛ amɛbihii etɛ kɛ amɛŋamɛi. Nɛkɛ adesai susumai kpaanyɔ nɛɛ anɔ atsɔ aje wɔweku lɛ shishi ehee, yɛ jalɛ mli.(2 Petro 2:5; 3:6) Enɛ tsuɔ nii akɛ okadi kɛhaa wɔsɛɛ be ko ni ebɛŋkɛ lɛ. (1 Mose 9:1-7) Nɔ ni etsɔɔ ji akɛ, bɔ ni Noa kɛ eweku lɛ je je lɛ naagbee yɛ amɛgbii lɛ amli lɛ mli lɛ, nakai nɔŋŋ wɔbaanyɛ wɔje je nɛɛ naagbee lɛ mli kɛyabote nibii agbɛjianɔtoo hee ni ebɛŋkɛ wɔ kpaakpa lɛ mli!
12, 13. (a) Mɛni hewɔ akpekpei abɔ sheee nibii agbɛjianɔtoo momo nɛɛ naagbee lɛ gbeyei ŋmɛnɛ lɛ? (b) Sɔlemɔ ni gbɔmɔ Bi lɛ tsɔɔ wɔ lɛ maa mɛni nɔ mi kɛhaa wɔ yɛ wɔshikpɔŋ lɛ diɛntsɛ he?
12 Akpekpei abɔ yɛ shikpɔŋ nɔ ŋmɛnɛ ni le akɛ “ŋwɛi hee” lɛ kɛ “shikpɔŋ hee” lɛ ka wɔhiɛ nɔŋŋ. Amɛsheee ŋmɛnɛŋmɛnɛ je momo nɛɛ naagbee lɛ gbeyei, eyɛ mli akɛ ebaaba tamɔ la ni baashã ŋwɛi kɛ shikpɔŋ lɛ fɛɛ. Amɛle kɛjɛ nibii fɛɛ a-Bɔlɔ lɛ Wiemɔ ni anyɛɔ akɛ he fɔɔ nɔ lɛ mli akɛ wɔshikpɔŋ nɛɛ diɛŋtsɛ baaje mli tamɔ bɔ ni eje mli yɛ klɛŋklɛŋ je lɛ naagbee yɛ amɛblematsɛ Noa gbii lɛ amli lɛ. Lalatsɛ lɛ ni mumɔ yɔɔ enɔ lɛ wie enɛ yɛ wɔshikpɔŋ lɛ he: “Ŋwɛi lɛ, Yehowa ŋwɛi ni, shi shikpɔŋ lɛ, eŋɔha gbɔmɛi abii.”—Lala 115:16.
13 Afeee “gbɔmɛi abii” lɛ ahaaa ŋwɛi, shi moŋ kɛha shikpɔŋ lɛ, he ni Bɔlɔ lɛ fa amɛ ni amɛhi lɛ. Shikpɔŋ nɛɛ nɔ ji he ni Tsɔɔlɔ Kpeteŋkpele lɛ ni tsɛ ehe “gbɔmɔ bi” lɛ tsɔɔ ekaselɔi lɛ ni amɛsɔle amɛha Bɔlɔ lɛ, akɛ: “Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee esumɔnaa nii yɛ shikpɔŋ nɔ, taakɛ afeɔ yɛ ŋwɛi hu” lɛ yɛ. (Mateo 24:37; 6:9, 10 New World Translation) Dani mɔ ni “boɔ sɔlemɔ toi” lɛ aaaha nakai sɔlemɔ lɛ hetoo kɛtsɔ eŋwɛi Maŋtsɛyeli ni baa lɛ nɔ lɛ, esa akɛ wɔshikpɔŋ lɛ diɛŋtsɛ aje nibii agbɛjianɔtoo ni abu lɛ fɔ nɛɛ naagbee ni bɛŋkɛɔ lɛ mli. (Lala 65:3) Enɔ adesai ni jeɔ mli lɛ baafee ŋwɛi Tsɛ lɛ suɔmɔnaa nii yɛ, tamɔ bɔ pɛ ni bɔfoi lɛ ni yɔɔ ŋwɛi lɛ feɔ yɛ anɔkwayeli mli lɛ.
14. Namɛi baaje “shikpɔŋ hee” lɛ shishi, ni abaalɛɛ nakai shikpɔŋ hee lɛ mli yɛ mɛɛ gbɛ nɔ?
14 Mɛɛ gbɛkpamɔ ni yɔɔ naakpɛɛ po ka mɛi ni feɔ Nyɔŋmɔ suɔmɔnaa nii lɛ ahiɛ yɛ shikpɔŋ ni atsiimɔ nɔ lɛ nɔ nɛkɛ! Adesai ni baaje ŋmɛnɛŋmɛnɛ je nɛɛ mli, ni kpaa naanɔ sɔɔmɔ ni amɛkɛaaha ŋwɛi Tsɛ lɛ gbɛ yɛ Paradeiso shikpɔŋ nɔ lɛ baaje “shikpɔŋ hee” lɛ shishi yɛ Mesia lɛ “ŋwɛi hee” lɛ shishi. Yɛ be ni sa mli lɛ abalɛɛ nɛkɛ shiwoo “shikpɔŋ hee” nɛɛ mli kɛtsɔ adesai ni egboi ni aaakpɔ amɛ yɛ gbohiiashitee lɛ mli ni atsɔɔ amɛ jalɛsaneyeli ni no baaha amɛfee nɔ ni ja lɛ nɔ. (Yohane 5:28, 29) Yɛ enɛ hewɔ lɛ, mɛni ji nɔ ni esa akɛ wɔ mɛi ni wɔkpaa gbɛ akɛ wɔbaaje je nɛŋ naagbee lɛ mli lɛ afee?
15, 16. (a) Mɛni bɔfo Petro tsɔɔ akɛ eji gbɛ kpakpa kɛha mɛi ni kpaa gbɛ akɛ amɛbaaje je nɛŋ naagbee lɛ mli lɛ? (b) Mɛɛ gbɔmɔ nɛkɛ Noa ji yɛ gbii ni tsɔ Nu afua lɛ hiɛ amli, ni mɛɛ nyɔmɔ awo lɛ kɛ eweku lɛ?
15 Sanebimɔ ko ni hi jogbaŋŋ nɛ. Nɔ ni fe afii 1,900 nɛ ni bɔfo Petro tsɔɔ nɔ ni esa akɛ efee hetoo kɛha nakai sanebimɔ lɛ, beni eŋma akɛ: “Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔjamɔi amli? Mɛi ni kwɛɔ gbɛ ni amɛshwieɔ Nyɔŋmɔ gbi lɛ baa lɛ, no mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli.” (3 Petro 3:11, 12) Kɛji akɛ esa kɛha bɔfo lɛ ni mumɔ yɔɔ enɔ lɛ akɛ eŋmala nɛkɛ wiemɔi nɛɛ afii 1,900 ni eho nɛ, yɛ Roma Maŋtsɛyeli lɛ nɔyeli beaŋ lɛ, kwɛ bɔ ni esa jogbaŋŋ moŋ ákɛ akɛ nakai wiemɔi lɛ aaawo Yehowa Odasefoi ni yɔɔ nibii agbɛjianɔtoo nɛɛ naagbee gbii kwraa lɛ amli lɛ ŋaa. ‘Nuŋtsɔ [Yehowa] gbi’ lɛ baaba naagbee tamɔ asereɔ okadi “shikpɔŋ lɛ: kɛ emli nitsumɔi” yɛ kukwɛi mli.—2 Petro 3:10.
16 Noa ji jalɔ, ni eye emuu yɛ eyinɔbii lɛ ateŋ: ni Noa kɛ Nyɔŋmɔ nyiɛ” yɛ je ni tsɔ Nu Afua lɛ hiɛ lɛ naagbee gbii lɛ amli. (1 Mose 6:9) Gbɛ ni Noa tsɔ nɔ enyiɛ akɛ eweku bibioo lɛ yitso lɛ ha Nyɔŋmɔ ni ekɛ lɛ nyiɛ lɛ baa amɛyi. Beni Noa kɛ eweku Iɛ je kpo hiɛkalɔi kɛjɛ yiwalaheremɔ adeka lɛ mli lɛ sɛɛ lɛ, kɛkɛ ni akɛ amɛ tsu nii koni amɛje jalɛ nibii agbɛjianɔtoo hee ko shishi yɛ Yehowa Nyɔŋmɔ jɔɔmɔ shishi. Kɛkɛ ni Nyɔŋmɔ kɛ mɛi ni amɛjo Nu Afua lɛ mli lɛ fee kpaŋmɔ ko akɛ ekɛ jeŋ fɛɛ Afua baŋ adesa weku lɛ nɔ yɛ shikpɔŋ nɔ dɔŋŋ.—1 Mose 9:8-17.
17. Be enyiɛ Noa kɔkɔbɔɔ lɛ hé, ni mɛɛ shihilɛ kɛ no kpãa gbee ŋmɛnɛ?
17 Akɛ kɔkɔbɔɔ babaoo ni kɔɔ nu ni baanɛ ni baaha shikpɔŋ muu lɛ fɛɛ nɔ lɛ ha Noa. Nakai nɔŋŋ akɛ je nɛɛ naagbee lɛ he kɔkɔbɔɔ eha Yehowa Odasefoi ni yɔɔ wɔ afii ohai 20 nɛɛ mli lɛ. Nɛkɛ kɔkɔbɔɔ nɛɛ damɔ Biblia lɛ ni jɛ mumɔŋ lɛ kɛ emli gbalɛi ni eba mli ni feɔ lɛ faŋŋ akɛ wɔmiibɛŋkɛ yiwalɛ nibii agbɛjianɔtoo nɛɛ naagbee kwraa lɛ he kpaakpa lɛ nɔ.
Gbohii Lɛ Ni Aaahere Amɛ Atuu Kɛba Shikpɔŋ Nɔ
18. Mɛɛ gbohii ni abaatee amɛ shi kɛba shikpɔŋ nɔ lɛ he ninaa ni atsɔ hiɛ akɛha ni átsɔɔ mli yɛ Kpojiemɔ ŋmɛnɛ Odasefoi akpekpei abɔ mli filiɔ amɛ yɛ he?
18 Ŋmɛnɛ, Yehowa Odasefoi akpekpei abɔ ‘ni kɛ Nyɔŋmɔ nyiɛ’ lɛ mli filiɔ amɛ yɛ ninaa ni atsɔ hiɛ ale yɛ Kpojiemɔ 20:11-14 lɛ hewɔ, he ni wɔkaneɔ yɛ akɛ: “Ni mina maŋtsɛsɛi yɛŋ ko ni da, kɛ mɔ ni ta nɔ lɛ, ni shikpɔŋ kɛ ŋwɛi jo foi yɛ ehiɛ, ni anaaa gbɛ ahaaa amɛ. Ni mina gbohii lɛ, mɛi bibii kɛ mɛi wuji, damɔ maŋtsɛsɛi lɛ hiɛ, ni agbele wolo kroko ni ji wala wolo lɛ hu naa. Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ. Ni ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ bɔ ni sa enitsumɔi lɛ. Ni gbele kɛ gbohiiaje lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ, la kpaakpo lɛ nɛ.”
19. Adesai ni egboi ni ateeɔ amɛ shi kɛbaa wala mli ekoŋŋ lɛ baaba shikpɔŋ ni yɔɔ mɛɛ shihilɛ mli nɔ, ni te abaahere amɛ aha tɛŋŋ yɛ amɛshihilɛ hee lɛ shishijee mli?
19 Mɛi ni ateeɔ amɛ shi kɛjɛɔ gbohii ateŋ taakɛ nakai Biblia gbalɛ lɛ tsɔɔ lɛ baŋ shikpɔŋ ni gbɔmɛi eta yɛ nɔ ko nɔ. Yehowa odasefoi akpekpei abɔ ni amɛjɔɔ amɛhe nɔ ni abaptisi amɛ lɛ miikpa gbɛ akɛ amɛbaajo okadi ŋwɛi kɛ shikpɔŋ momo lɛ ni aaaho aya lɛ mli ni amɛhere gbohii ni ateeɔ amɛ shi kɛbaa shikpɔŋ ni asaa nɔ koni etsɔ jeŋ fɛɛ Paradeiso lɛ nɔ lɛ atuu. (Luka 23:43) No mli lɛ nibii agbɛjianɔtoo hee lɛ etee hiɛ saŋŋ. No mli lɛ mɛi ni je jeŋ momo nɛɛ naagbee lɛ mli lɛ kɛ suɔmɔ eto nibii ahe gbɛjianɔ bɔ ni sa kɛha adesai ni gboi ni akpɔ amɛ lɛ asɛɛkuu.
20. Mɛɛ famɔ ni Yesu kɛha yɛ be mli ni etee Lazaro kɛ Yairo biyoo lɛ shi kɛjɛ gbele mli lɛ sɛɛ tsɔɔ nɔ ni esa akɛ mɛi ni eje mli lɛ afee yɛ akpekpei toi akpekpei abɔ ni átee amɛ shi lɛ ahe?
20 Nakai akpekpei abɔ lɛ baakai bɔ ni yɛ be mli ni Yesu tee enaanyo Lazaro shi kɛjɛ gbonyobu ni yɔɔ Betania ni bɛŋkɛ Yerusalem lɛ mli nɔŋŋ lɛ efa mɛi ni kwɛɔ naakpɛɛ nii ni yaa nɔ lɛ akɛ amɛfɛne fũu mamai lɛ kɛjɛ Lazaro he lɛ. Nakai nɔŋŋ hu beni Yesu tee Yudanyo nɔyelɔ Yairo biyoo lɛ shi lɛ, “efa akɛ aha lɛ nɔ ko eye.” (Luka 8:55; Yohane 11:44) Ŋwanejee ko bɛ he ákɛ akɛ famɔi ni jɛ ŋwɛi baaha mɛi ni eje mli lɛ ni amɛto gbɛjianɔ ni sa amɛha adesai akpekpei toi akpekpei abɔ ni egboi ni akɛ amɛ baa wala mli lɛ.
21, 22. (a) Mɛɛ gbɛjianɔtoo nɔ mɛi ni eje mli lɛ baatsɔ ni amɛye amɛbua mɛi ni gboi ni átee amɛ shi lɛ koni amɛnine ashɛ Kristo gbele lɛ mli sɛɛnamɔi lɛ anɔ? (b) Mɛni hewɔ “shikpɔŋ hee” lɛ baatsɔ jalɛ nɔ̃ kɛjɛ eshishijee diɛntsɛ?
21 Abaatsu tsɔsemɔ nitsumɔ kpeteŋkpele ko hu he nii. Ni enɛ kɛ ŋwɛi yiŋtoo kɛha adesai ni egboi ni kuɔ amɛsɛɛ kɛbaa koni amɛbaŋɔ hegbɛ ni Yesu Kristo kpɔmɔ afɔleshaa lɛ mli sɛɛnamɔi kɛbaa lɛ amɛha amɛhe lɛ kpãa gbee. Enɛ feemɔ pɛ nɔ abaatsɔ ni ahã amɛ hegbɛ ni amɛhi shi yɛ shikpɔŋ ni tamɔ Eden nɔ, yɛ adesa emuuyeli mli. “Asafo babaoo” lɛ ni kpaa gbɛ akɛ amɛbaaje “amanehulu kpeteŋkpele” lɛ mli lɛ eje amɛhesaamɔ shishi momo po koni amɛna nakai tsɔsemɔ gbɛjianɔtoo ni yɔɔ naakpɛɛ lɛ mli gbɛfaŋnɔ. Amɛ diɛŋtsɛ lɛ, amɛkɛ amɛhe eha “Nyɔŋmɔ Toobi” Yesu Kristo afɔleshaa gbele lɛ mli sɛɛnamɔi lɛ momo. (Yohane 1:29) Enɛ ji nɔ ni atsɔɔ yɛ Kpojiemɔ 7:9-14, ni awie enɛ yɛ amɛhe kɛfata nibii krokomɛi ahe lɛ: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ, ni amɛfɔ amɛtadei lɛ ahe, ni amɛha eyɛ futaa yɛ Toobi lɛ lá lɛ mli.” No hewɔ lɛ, akɛni amɛnine shɛɔ Kristo kpɔmɔ nɔ lɛ mli sɛɛnamɔi anɔ hewɔ lɛ, afee amɛhe mfoniri akɛ “amɛwo atadei yɛji.”
22 Awieɔ “asafo babaoo” nɛɛ ahe yɛ mfonirifeemɔ loo okadi gbɛ nɔ hu akɛ: “Amɛjaa lɛ nyɔɔŋ kɛ shwane yɛ esɔlemɔtsu lɛ mli.” Kpojiemɔ 7:15 Aheŋ amɛ atadei yɛji lɛ kɛjɛŋ amɛdɛŋ yɛ “amanehulu kpeteŋkpele” ni ka wɔhiɛ nɔŋŋ lɛ mli, shi moŋ amɛbaaya nɔ amɛkɛ sɔɔmɔ krɔŋkrɔŋ aha Yehowa Nyɔŋmɔ yɛ ehebuu shishi ni amɛgbaaa afa. (Kpojiemɔ 7:17) Amɛ, amɛbaafee “shikpɔŋ hee” lɛ shishijee Iɛ fã, yɛ amɛ okadi “atadei yɛji” lɛ amli, koni efee nɔ ni “jalɛ hiɔ mli” kɛjɛ eshishijee tɔ̃ɔ.—2 Petro 3:13.a
[Shishigbɛ niŋmai]
a Ajie kɛjɛ October 1, 1983 Blɔfo BUU-MƆƆ lɛ mli
Sanebimɔi Kɛha Emlitii
□ Mɛɛ wɔsɛɛ be mli wala he jwɛŋmɔ gbɔmɛi ni ehi shi yɛ tsutsu lɛ kɛ ŋmɛnɛŋmɛnɛ beaŋ fɛɛ eńa?
□ Mɛni ji Nyɔŋmɔ yiŋtoo kɛha shikpɔŋ lɛ, ni Biblia lɛ yeɔ enɛ he odase yɛ mɛɛ gbɛ nɔ?
□ Yɛ mɛɛ gbɛ nɔ nɔ ni ba Noa kɛ eweku lɛ nɔ lɛ haa wɔnaa hekɛnɔfɔɔ akɛ akpekpei abɔ ni yɔɔ wala mli bianɛ lɛ gboiŋ gbi ko gbi ko?
□ Namɛi baahere gbohii lɛ atuu kɛba wala mli lɛ, ni mɛɛ gbɛjianɔ abaato aha amɛ?
[Mfoniri ni yɔɔ baafa 11]
Noa kɛ eweku lɛ je Nu Afua lɛ mli. Akpekpei baaje je lɛ naagbee Iɛ mli
[Mfoniri ni yɔɔ baafa 12]
Taakɛ ahere Lazaro atuu kɛba wala mli ekoŋŋ lɛ, nakai nɔŋŋ mɛi ni baaje Harmagedon mli lɛ baahere gbohii lɛ atuu kɛba wala mli