Yitso Nyɔŋma Kɛ Ekome
Kpóo Ha Atuatselɔi Lɛ!
1. Mɛɛ tɔmɔ ko ní mli wa waa Yerobeam tɔ̃?
BENI aja Yehowa webii ní ekɛ amɛ efee kpaŋmɔ lɛ mli ní amɛtsɔmɔ maŋtsɛyelii enyɔ lɛ, akutsei nyɔŋma kooyigbɛ maŋtsɛyeli lɛ baje Yerobeam nɔyeli shishi. Maŋtsɛ hee lɛ bafee nɔyelɔ ni bɔɔ mɔdɛŋ, ní yɔɔ ekãa waa. Shi enáaa hemɔkɛyeli diɛŋtsɛ yɛ Yehowa mli. Enɛ hewɔ lɛ, etɔ̃ tɔmɔ ko ní mli wa waa ní sa kooyigbɛ maŋtsɛyeli lɛ yinɔsane be fɛɛ he yɛ gbɛ fɔŋ nɔ. Akɛni amɛyɛ Mose Mla lɛ shishi hewɔ lɛ, awo Israelbii lɛ kita akɛ amɛfã gbɛ shii etɛ yɛ afi mli kɛya sɔlemɔwe lɛ yɛ Yerusalem, ní amrɔ nɛɛ eyaje Yuda ni ji wuoyigbɛ maŋtsɛyeli lɛ mli lɛ. (5 Mose 16:16) Akɛni eeshe gbeyei akɛ nɛkɛ daa afi gbɛfãai nɛɛ baaha eshishibii lɛ asusu ekome ní amɛkɛ amɛnyɛmimɛi ni yɔɔ wuoyigbɛ maŋtsɛyeli lɛ mli lɛ aaafee lɛ he hewɔ lɛ, Yerobeam “[fee] shika tsinabii enyɔ, ni ekɛɛ amɛ akɛ: Nyɛ Yerusalem yaa lɛ efá! Israel, naa onyɔŋmɔi ní yajieo kɛjɛ Mizraim shikpɔŋ lɛ nɔ lɛ! Ni eŋɔ ekome ema Betel, ni eŋɔ ekome hu ema Dan.”—1 Maŋtsɛmɛi 12:28, 29.
2, 3. Mɛɛ hewalɛ Yerobeam tɔmɔ lɛ ná yɛ Israel nɔ?
2 Efee tamɔ nɔ ni Yerobeam yiŋtoo lɛ tsu nii yɛ be ko mli. Gbɔmɛi lɛ kpá Yerusalem yaa fiofio ni amɛbɔi jamɔ yɛ tsinabii enyɔ lɛ ahiɛ. (1 Maŋtsɛmɛi 12:30) Shi kɛlɛ, nɛkɛ hemɔkɛyeli kwamɔ jamɔ nifeemɔ nɛɛ fite akutsei nyɔŋma maŋtsɛyeli lɛ. Yɛ afii ní nyiɛ sɛɛ kɛba lɛ mli lɛ, Yehu po, ní jie ekãa ní sa yijiemɔ waa kpo beni ejie Baal jamɔ kwraa kɛjɛ Israel lɛ, tee nɔ ekoto shi eha shika tsinabii lɛ. (2 Maŋtsɛmɛi 10:28, 29) Mɛni hu jɛ Yerobeam yiŋkpɛɛ ní ehiii kwraa nɛɛ mli ba? Maŋkwramɔŋ basabasafeemɔ kɛ amanehulu ní ba gbɔmɛi lɛ anɔ.
3 Akɛni Yerobeam ebatsɔ hemɔkɛyeli kwalɔ hewɔ lɛ, Yehowa wie akɛ eseshibii yeŋ maŋtsɛ yɛ shikpɔŋ lɛ nɔ, ni yɛ naagbee lɛ, kooyigbɛ maŋtsɛyeli lɛ baana amanehulu ní mli wa waa. (1 Maŋtsɛmɛi 14:14, 15) Yehowa wiemɔ lɛ ba mli anɔkwale. Israel maŋtsɛmɛi lɛ ateŋ mɛi kpawo kɛ afii enyɔ loo nɔ ni shɛɛɛ nakai ye nɔ—mɛi komɛi lɛ, amɛye nɔ gbii fioo ko pɛ. Maŋtsɛ kome gbe lɛ diɛŋtsɛ ehe, ni hii hiɛnyamtaolɔi gbe amɛteŋ mɛi ekpaa ni amɛshɔ̃ maŋtsɛsɛi lɛ yɛ amɛdɛŋ. Yerobeam II lɛ nɔyeli, ní ba naagbee aaafee afi 804 D.Ŋ.B. beni Uzia yeɔ maŋtsɛ yɛ Yuda lɛ sɛɛ titri ni Israel kɛ haomɔi ni ji basabasafeemɔi, yiwalɛ, kɛ gbɔmɛi ní agbeɔ amɛ nigii lɛ kpe waa. Shihilɛ ní ba nɛɛ hewɔ ni Yehowa kɛ kɔkɔbɔɔ, loo “shɛɛ” ko ha tɛ̃ɛ kɛtsɔ Yesaia nɔ kɛyaha kooyigbɛ maŋtsɛyeli lɛ. “[Yehowa, “NW”] shɛ shɛɛ ko yɛ Yakob hewɔ, ni eyashwie Israel nɔ.”—Yesaia 9:7.a
Henɔwomɔ kɛ Hewoo kɛ Nyɔŋmɔ Mlifu Baa
4. Mɛɛ “shɛɛ” wiemɔ Yehowa kɛtsu kɛtee Israel, ni mɛni hewɔ?
4 Akuŋ hiɛ afɔ̃ŋ Yehowa “shɛɛ” wiemɔ lɛ nɔ. “Maŋ muu lɛ fɛɛ aná ale, Efraim hu kɛ Samariabii lɛ ní kɛ henɔwomɔ kɛ hewoo jwɛŋmɔ [wieɔ lɛ].” (Yesaia 9:8) “Yakob,” “Israel,” “Efraim,” kɛ “Samaria” fɛɛ kɔɔ Israel kooyigbɛ maŋtsɛyeli lɛ, ní Efraim ji akutso ní yɔɔ hewalɛ fe fɛɛ, ní Samaria ji emaŋtiase lɛ he. Yehowa wiemɔ ní ewie eshi nakai maŋtsɛyeli lɛ ji kojomɔ wiemɔ ní mli wa waa, ejaakɛ Efraim ewaje ehe yɛ hemɔkɛyeli kwamɔ mli ni eje gbɛ eefee ŋtɛŋ eeshi Yehowa. Nyɔŋmɔ ebuŋ gbɔmɛi lɛ ahe kɛjɛŋ nibii ní baajɛ amɛgbɛ̀i fɔji lɛ amli aba lɛ ahe. Abaanyɛ amɛnɔ ní amɛnu, loo amɛbo Nyɔŋmɔ wiemɔ lɛ toi.—Galatabii 6:7.
5. Israelbii lɛ jie amɛhe kpo akɛ Yehowa kojomɔ nifeemɔi lɛ esaaa amɛhe yɛ mɛɛ gbɛ nɔ?
5 Beni shihilɛ lɛ yaa nɔ emli woɔ wu lɛ, gbɔmɛi lɛ laaje nibii wuji, ni amɛshiai—ní akɛ sũ ŋtayai kɛ tsei ní jara waaa emamɔ lɛ fata he. Ani enɛ baaha amɛtsuii ahe ajɔ agbɛnɛ? Ani amɛbaabo Yehowa gbalɔi lɛ atoi ní amɛku amɛsɛɛ kɛba anɔkwa Nyɔŋmɔ lɛ ŋɔɔ?b Yesaia eŋma ŋtɛŋfeemɔ ní gbɔmɛi lɛ jie lɛ kpo lɛ, akɛ: “Ŋtayai lɛ ekumɔ eshwie shi, shi wɔkɛ tɛi ní ako aaatswa ekoŋŋ; atoo sikamore tsei lɛ ashwie shi, shi wɔɔtɛo tseneduru tsei yɛ amɛnajiaŋ.” (Yesaia 9:9) Israelbii lɛ te shi amɛwo Yehowa ni amɛkpoo egbalɔi lɛ ní kɛɔ amɛ nɔ hewɔ ní amanehului nɛɛ baa amɛnɔ lɛ. Yɛ naagbee lɛ, gbɔmɛi lɛ kɛɛ akɛ: ‘Wɔtsũi ní akɛ sũ ŋtayai ní kumɔɔ kɛ tsei ní jara waaa mamɔ lɛ baaje wɔdɛŋ moŋ, shi wɔbaafee babaoo fe ekrokomɛi ní wɔkɛaaye enɛɛmɛi anajiaŋ kɛkɛ, kɛtsɔ tsumaa nibii ní jara wawai—ni ji tɛ ní ako kɛ tseneduru tsei ní wɔkɛaamamɔ wɔtsũi lɛ ekoŋŋ lɛ nɔ!’ (Okɛto Hiob 4:19 he.) Nɔ ko kwraa bɛ ni Yehowa baafee, fe akɛ eeeya nɔ egbala amɛtoi babaoo lolo.—Okɛto Yesaia 48:22 he.
6. Mɛɛ gbɛ nɔ Yehowa tsɔ efite ŋaa ní Aram kɛ Israel tsɔ̃ amɛshi Yuda lɛ?
6 Yesaia tee nɔ akɛ: “Yehowa aaatée Rezin haolɔi lɛ ashi awo amɛ.” (Yesaia 9:10a) Israel Maŋtsɛ Peka kɛ Aram Maŋtsɛ Rezin kɛ amɛhe efee kpaŋmɔ. Amɛmiitsɔ ŋaa ní amɛye Yuda akutsei enyɔ maŋtsɛyeli lɛ nɔ kunim koni amɛkɛ maŋtsɛ ní amɛbaanyɛ amɛkudɔ enifeemɔi—ni ji mɔ ko ní atsɛɔ lɛ “Tabeel bi lɛ” ata Yehowa maŋtsɛsɛi lɛ nɔ yɛ Yerusalem. (Yesaia 7:6) Shi kpaŋmɔ lɛ fite. Rezin yɛ henyɛlɔi ni he wa waa, ni Yehowa ‘baatee’ henyɛlɔi nɛɛ ‘ashi’ ewo “amɛ,” ni ji Israel. Wiemɔ ni ji ‘ebaatee amɛ shi’ lɛ tsɔɔ akɛ ebaaŋmɛ amɛ gbɛ ní amɛwu ta ko ní baafite kpaŋmɔ lɛ kɛ otii ní amɛkɛmamɔ amɛhiɛ lɛ kwraa.
7, 8. Mɛni jɛ Aram nɔ kunim ní Ashur ye lɛ mli ba kɛha Israel?
7 Kpaŋmɔ nɛɛ fitemɔ lɛ je shishi beni Ashur yatutua Aram lɛ. “Ashur maŋtsɛ lɛ fã yatua Damasko [Aram maŋtiase lɛ] ni eŋɔ lɛ, ni eŋɔ amɛ nom kɛtee Kir, ni egbe Rezin.” (2 Maŋtsɛmɛi 16:9) Akɛni elaaje ehefatalɔ ní he wa lɛ hewɔ lɛ, Peka na akɛ afite ŋaai ní etsɔ yɛ Yuda he lɛ kwraa. Yɛ anɔkwale mli lɛ, yɛ Rezin gbele sɛɛ be fioo mli lɛ, Hoshea ju shi egbe Peka nigii, ni no sɛɛ lɛ eshɔ̃ Samaria maŋtsɛsɛi lɛ.—2 Maŋtsɛmɛi 15:23-25, 30.
8 Aram, Israel tsutsu hefatalɔ ní ekɛ lɛ efee kpaŋmɔ lɛ, ebatsɔ Ashur, ni ji hewalɛ ní yeɔ nɔ yɛ kpokpaa lɛ nɔ lɛ sɔɔlɔ agbɛnɛ. Yesaia gba yɛ bɔ ni Yehowa kɛ nɛkɛ maŋkwramɔŋ shihilɛ nɛɛ baatsu nii aha lɛ he akɛ: “[Yehowa aaaha] amɛ [Israel] henyɛlɔi lɛ ate shi: Arambii aaajɛ bokagbɛ, ni Filistibii aaajɛ anaigbɛ, ni amɛaagbɛ amɛdaaŋ hatoo amɛaaye Israel. Fɛɛ lɛ emlifu lɛ ejɔko, shi enine lɛ ekpã mli lolo.” (Yesaia 9:10b, 11) Hɛɛ, Aram etsɔ Israel henyɛlɔ agbɛnɛ, ni esa akɛ Israel asaa ehe kɛha tutuamɔ kɛjɛ Ashur kɛ Aram dɛŋ. Tutuamɔ lɛ ye omanye. Ashur fee Hoshea, mɔ ni ebashɔ̃ maŋtsɛyeli lɛ akɛ etsulɔ, ni ehe onia wulu diɛŋtsɛ kɛjɛ edɛŋ. (Afii nyɔŋmai fioo ko ni tsɔ hiɛ lɛ, Ashur nine shɛ shika wulu ko nɔ kɛjɛ Israel Maŋtsɛ Menahem dɛŋ.) Kwɛ bɔ ni gbalɔ Hoshea wiemɔi lɛ ji anɔkwale ha, akɛ: “Gbɔi eye [Efraim hewalɛ]”!—Hoshea 7:9; 2 Maŋtsɛmɛi 15:19, 20; 17:1-3.
9. Mɛni hewɔ wɔbaanyɛ wɔkɛɛ akɛ Filistibii lɛ atutuamɔ lɛ “aaajɛ anaigbɛ” lɛ?
9 Ani Yesaia ewieee hu akɛ Filistibii lɛ “aaajɛ anaigbɛ” amɛtutua lɛ? Hɛɛ. Dani aaafee kompas ní kɛ dade ní gbalaa dade lɛ hewalɛ tsuɔ nii kɛtsɔɔ gbɛ lɛ, no mli lɛ Hebribii lɛ tsɔɔ gbɛ kɛjɛɔ mɔ ko ní damɔ shi ni ehiɛ miikwɛ hulushiteehe lɛ nɔ. Enɛ hewɔ lɛ, “bokagbɛ” ji hiɛgbɛ, ni hulushinyɔɔhe, ni ji Filistibii lɛ amaŋ ní bɛŋkɛ ŋshɔnaa lɛ ji “anaigbɛ.” Ekolɛ Yuda fata “Israel” ní atsĩ tã yɛ Yesaia 9:11 lɛ he yɛ sane nɛɛ mli ejaakɛ Filistibii lɛ yatutua Yuda yɛ Ahaz ní Peka kɛhi shi yɛ be kome mli lɛ nɔyeli beaŋ, ni amɛye Yudeabii amaŋtiasei kɛ mɔji babaoo anɔ kunim ni amɛhi mli. Taakɛ Efraim ni yɔɔ kooyigbɛ lɛ ji lɛ, Yuda sa toigbalamɔ ni jɛ Yehowa ŋɔɔ nɛɛ, ejaakɛ hemɔkɛyeli kwamɔ egbɛ eshwã maŋ lɛ mli fɛɛ.—2 Kronika 28:1-4, 18, 19.
Kɛjɛ ‘Yitso Kɛbashi Lei’—Atuatselɔi Amaŋ
10, 11. Mɛɛ toigbalamɔ Yehowa kɛbaaba Israel nɔ yɛ atua ní amɛtee nɔ amɛtse lɛ hewɔ?
10 Yɛ amanehulu ní ena lɛ fɛɛ sɛɛ—kɛ Yehowa gbalɔi lɛ asane jajemɔi ní mli wa waa lɛ fɛɛ sɛɛ lɛ—kooyigbɛ maŋtsɛyeli lɛ tee nɔ etse atua eshi Yehowa. “Maŋ lɛ ekuuu esɛɛ ebaaa mɔ ni yi lɛ lɛ ŋɔɔ, ni amɛtaooo Yehowa Zebaot sɛɛgbɛ hu.” (Yesaia 9:12) Enɛ hewɔ lɛ, gbalɔ lɛ kɛɛ akɛ: “Yehowa aaafo yitso kɛ lei, pãmpã kɛ gãlã gbi kome yɛ Israel. Onukpa kɛ hiɛnaanɔ gbɔmɔ lɛ ji yitso, ni gbalɔ ní tsɔɔ amale lɛ ji lei lɛ. Ejaakɛ maŋ nɛɛ gbɛtsɔɔlɔi lɛ haa amɛduɔ gbɛ, ni mɛi ní amɛtsɔɔ amɛ gbɛ lɛ, ahiɛ kpataa.”—Yesaia 9:13-15.
11 “Yitso” kɛ “pãmpã” lɛ damɔ shi kɛha “onukpa kɛ hiɛnaanɔ gbɔmɔ”—ni ji maŋ lɛ hiɛnyiɛlɔi lɛ. “Lei” kɛ “gãlã” lɛ kɔɔ amale gbalɔi ní wieɔ wiemɔi ní saa amɛhiɛnyiɛlɔi lɛ ahiɛ lɛ ahe. Biblia he woloŋlelɔ ko ŋma akɛ: “Atsɛɔ amale Gbalɔi lɛ akɛ lei, ejaakɛ amɛji gbɔmɛi lɛ ateŋ mɛi ní baa shi fe fɛɛ yɛ jeŋba gbɛfaŋ, ni amɛji nɔyelɔi yiwalɔi lɛ asɛɛnyiɛlɔi kɛ sɛɛfilɔi osatofoi ní amɛkɛtsuɔ amɛyiŋtoi ahe nii.” Nilelɔ Edward J. Young wie amale gbalɔi nɛɛ ahe akɛ: “Jeee hiɛnyiɛlɔi ji amɛ, shi kɛ́ amɛnyiɛ hiɛnyiɛlɔi lɛ asɛɛ kɛmiiya he ni amɛyaa lɛ, amɛwoɔ amɛyiteŋ mulu ni amɛkɛ amɛhe fũfũaa amɛ, tamɔ gbee ní kɛ miishɛɛ miitswa elei.”—Okɛto 2 Timoteo 4:3 he.
‘Okulafoi kɛ Awusãi’ Po Efee Amɛhe Atuatselɔi
12. Nɛgbɛ Israel maŋ lɛ mli bii lɛ afitemɔ lɛ etee shɔŋŋ kɛyashɛ?
12 Yehowa ji okulafoi kɛ awusãi a-Hefãlɔ kpele fe fɛɛ. (2 Mose 22:22, 23) Ni kɛlɛ, bó nɔ ni Yesaia yɔɔ kɛɛmɔ agbɛnɛ lɛ toi: “[Yehowa, “NW”] naŋ amɛblahii lɛ ahe miishɛɛ, ni emusuŋ etsɔŋ lɛ yɛ amɛwusãi kɛ okulafoi lɛ ahe; ejaakɛ mɛi lɛ fɛɛ lɛ osatofoi kɛ efɔŋfeelɔi ni, ni naabu fɛɛ naabu wieɔ yakayaka wiemɔi. Fɛɛ lɛ emlifu lɛ ejɔko, ni enine lɛ ekpã mli lolo.” (Yesaia 9:16) Hemɔkɛyeli kwamɔ efite maŋbii lɛ akui srɔtoi lɛ fɛɛ, ni okulafoi kɛ awusãi hu fata he! Yehowa jɛ tsuishitoo mli etsu egbalɔi lɛ, kɛ hiɛnɔkamɔ akɛ gbɔmɛi lɛ baatsake amɛgbɛ̀i lɛ. Ákɛ nɔkwɛmɔnɔ lɛ, Hoshea kpá amɛ fai akɛ: “Israel, kpalemɔ oba Yehowa, o-Nyɔŋmɔ lɛ, ŋɔɔ! Ejaakɛ onishaianii lɛ ahewɔ lɛ ogbee shi.” (Hoshea 14:1) Kwɛ bɔ ni ebaadɔ okulafoi kɛ awusãi a-Hefãlɔ lɛ eha akɛ esa akɛ etsu kojomɔ he nii eshi amɛ hu po!
13. Mɛni wɔbaanyɛ wɔkase kɛjɛ shihilɛ ní hi shi yɛ Yesaia gbii lɛ amli lɛ mli?
13 Taakɛ Yesaia ji lɛ, wɔ hu wɔyɛ “jaramɔ bei” ni nyiɛ gbi ní Yehowa baatsu kojomɔ he nii eshi gbɔmɛi fɔji lɛ ahiɛ lɛ mli. (2 Timoteo 3:1-5) Belɛ, kwɛ bɔ ni ehe hiaa ní Kristofoi aya nɔ ahi shi akɛ mɛi ni he tse yɛ mumɔŋ, jeŋba mli, kɛ jwɛŋmɔ mli, ni bɔ ni amɛshihilɛ ji kɔɔɔ he eko, koni amɛná Nyɔŋmɔ hiɛ duromɔ. Ha wɔteŋ mɔ fɛɛ mɔ kɛ hiɛdɔɔ abu ekɛ Yehowa teŋ wekukpaa lɛ he jogbaŋŋ. Ekaba akɛ mɛi ni ejo foi kɛjɛ “Babilon kpeteŋkpele lɛ” mli lɛ kɛ lɛ “[aaafee] ekome yɛ ehe eshai lɛ amli” dɔŋŋ.—Kpojiemɔ 18:2, 4.
Apasa Jamɔ kɛ Awuiyeli Baa
14, 15. (a) Mɛni jɛɔ daimonioi ajamɔ mli baa? (b) Mɛɛ amanehulu ní yaa nɔ Yesaia gba efɔ̃ shi akɛ Israel baana?
14 Yɛ gbɛ ko nɔ lɛ, apasa jamɔ ji daimonioi ajamɔ. (1 Korintobii 10:20) Taakɛ eje kpo yɛ be ní tsɔ Nu Afua lɛ hiɛ lɛ mli lɛ, daimonioi ahewalɛ kɛ awuiyeli baa. (1 Mose 6:11, 12) Belɛ, ebɛ naakpɛɛ akɛ beni Israel tsɔ ehe hemɔkɛyeli kwalɔ ní ebɔi daimonioi ajamɔ lɛ, awuiyeli kɛ efɔŋfeemɔ yi shikpɔŋ lɛ nɔ obɔ̃ lɛ.—5 Mose 32:17; Lala 106:35-38.
15 Yesaia kɛ mfoniri ni mli kã shi faŋŋ tsɔɔ bɔ ni efɔŋfeemɔ kɛ awuiyeli gbɛ eshwã Israel lɛ, yɛ wiemɔ mli, akɛ: “Efɔŋfeemɔ tsoɔ tamɔ la, eshãa kpitikpitii kɛ ŋmeii, ehereɔ yɛ koo hayii amli, ni elasu teɔ shi kpii kɛyaa ŋwɛi. Yehowa Zebaot mlifu naa lɛ shikpɔŋ lɛ eshã, ni maŋ lɛ etsɔ tamɔ la niyenii; mɔ ko ebaaa enyɛmi yi. Amɛaashara nii amɛaaye yɛ ninejurɔgbɛ, shi hɔmɔ aaaye amɛ kɛ̃; ni amɛaaye nii yɛ abɛkugbɛ hu, shi amɛtɔrɔŋ. Mɔ fɛɛ mɔ aaaye lɛ diɛŋtsɛ enine he loo po: Manase aaaye Efraim, ni Efraim hu aaaye Manase, ni amɛyi enyɔ lɛ fɛɛ amɛaate shi amɛwo Yuda. Fɛɛ lɛ emlifu lɛ ejɔko, ni enine lɛ ekpã mli lolo.”—Yesaia 9:17-20.
16. Mɛɛ gbɛ nɔ wiemɔi ni yɔɔ Yesaia 9:17-20 lɛ ba mli yɛ?
16 Taakɛ la ní miitso lɛɛɔ kɛjɛɔ kpitikpiti nɔ kɛyaa kpitikpiti nɔ lɛ, nakai awuiyeli lɛ gbɛ eshwã ni anyɛɛɛ atsĩ naa, ni eyashɛ “koo hayii” lɛ mli oya, ni etsɔ koo mli la ní miitso waa, ni ji awuiyeli kpele diɛŋtsɛ. Biblia mli saji ahe wielɔi ni ji Keil kɛ Delitzsch tsɔɔ he ni awuiyeli lɛ tee nɔ kɛyashɛ lɛ mli akɛ, eji “yiwalɛ gbɛ ní fe fɛɛ ní amɛtsɔ nɔ amɛkpata amɛ diɛŋtsɛ amɛhiɛ yɛ maŋ ta mli sakasakafeemɔ mli. Akɛni amɛbɛ mlihilɛ henumɔ ko kwraa hewɔ lɛ, amɛgbegbee amɛhe, shi kɛlɛ amɛtsuii enyɔɔɔ amɛmli.” Eeenyɛ efee akɛ, atsĩ Efraim kɛ Manase akutsei lɛ pɛ tã yɛ biɛ ejaakɛ amɛji kooyigbɛ maŋtsɛyeli lɛ najiaŋdamɔlɔi titri, ni akɛni Yosef bihii enyɔ lɛ aseshibii ji amɛ hewɔ lɛ, amɛji akutsei nyɔŋma lɛ ateŋ akutsei ni wekukpaa ní bɛŋkɛ kpaakpa kã amɛteŋ fe fɛɛ. Ni kɛlɛ, yɛ enɛ fɛɛ sɛɛ lɛ, amɛfo amɛ diɛŋtsɛ amɛnyɛmimɛi awui ní amɛyeɔ nɛɛ mli yɛ be mli ní amɛkɛ Yuda ní yɔɔ wuoyigbɛ lɛ wuɔ ta lɛ pɛ mli.—2 Kronika 28:1-8.
Kojolɔi Fɔji lɛ kɛ Amɛkojolɔ Kpe
17, 18. Mɛɛ fitemɔ yaa nɔ yɛ Israel mla kɛ maŋ nɔkwɛmɔ gbɛjianɔtoo lɛ mli?
17 Yɛ enɛ sɛɛ lɛ, Yehowa gbala ejwɛŋmɔ kɛtee Israel kojolɔi fɔji kɛ maŋ onukpai krokomɛi lɛ anɔ yɛ kojomɔ mli. Mɛnɛɛmɛi kɛ hewalɛ ní amɛyɔɔ lɛ tsuɔ nii yɛ gbɛ fɔŋ nɔ kɛtsɔ ohiafoi kɛ nɔ̃nalɔi ní baa amɛŋɔɔ kɛha jalɛsaneyeli lɛ anii ní amɛhàa lɛ nɔ. Yesaia kɛɛ akɛ: “Kpóo ha akpɔwolɔi ní woɔ akpɔi ní ejaaa, kɛ woloŋmalɔi hu ní ŋmaa musu nibii lɛ, koni amɛtsɔ ohiafoi akojomɔ hiɛ amɛbu shi, ni amɛshɔ̃ mimaŋbii lɛ ateŋ nɔ̃nalɔi lɛ agbɛnaa lɛ yɛ amɛdɛŋ, ni okulafoi atsɔmɔ amɛnomŋɔɔ nii ni awusãi hu atsɔmɔ amɛhàa nii!”—Yesaia 10:1, 2.
18 Yehowa Mla lɛ guɔ toikɔdɔmɔ sane ní ayeɔ yɛ gbɛ̀i srɔtoi fɛɛ nɔ: “Nyɛkayea kutumpɔo yɛ kojomɔ mli: kaakwɛ ohiafo hiɛ, ni ohiɛ akashwie gbɔmɔ agbo hu hiɛaŋ; jalɛ naa okojo onaanyo gbɔmɔ.” (3 Mose 19:15) Akɛni amɛbuuu nakai mla lɛ hewɔ lɛ, maŋ onukpai nɛɛ woɔ amɛ diɛŋtsɛ amɛ “akpɔi ní ejaaa” koni amɛkɛhã nɔ ni bafeɔ juu kpetekpelee ní jɛ yiwalɛ ní fe fɛɛ mli lɛ afee nɔ ni mla fiɔ sɛɛ—ni amɛheɔ okulafoi kɛ awusãi anii fioo pɛ ní amɛyɔɔ lɛ yɛ amɛdɛŋ. Yɛ anɔkwale mli lɛ, Israel apasa nyɔŋmɔi lɛ enaaa toikɔdɔmɔ saji ní amɛyeɔ nɛɛ, shi Yehowa miina. Agbɛnɛ Yehowa tsɔ Yesaia nɔ egbala ejwɛŋmɔ kɛba nɛkɛ kojolɔi yiwalɔi nɛɛ anɔ.
19, 20. Abaatsake shihilɛ ní Israel kojolɔi fɔji lɛ yɔɔ mli lɛ yɛ mɛɛ gbɛ nɔ, ni mɛni baaba amɛ ‘anunyam’ lɛ nɔ?
19 “Saramɔ gbi lɛ nɔ, kɛ fitemɔ ní baajɛ shɔŋŋ aba lɛ mli lɛ, té nyɛbaafee tɛŋŋ? Namɔ ŋɔɔ nyɛaajo foi kɛaatee nyɛyaba abo? Ni nɛgbɛ nyɛaashi nyɛnii lɛ yɛ? Eshwɛŋ nɔ ko nɔ ko akɛ ja amɛba amɛhe shi yɛ gbokɛlɛfoi lɛ ateŋ, ni amɛgbeegbee shi yɛ mɛi ní enyɔ̃nyɔ̃i lɛ ateŋ!” (Yesaia 10:3, 4a) Okulafoi kɛ awusãi lɛ naaa kojolɔi anɔkwafoi ní amɛaaŋɔ amɛsaji amɛha amɛ ní amɛye amɛha amɛ. Belɛ, kwɛ bɔ ni esa jogbaŋŋ akɛ Yehowa miibi ní nakai Israel kojolɔi fɔji ní kulɛ amɛbaaŋɔ amɛsaji amɛha amɛ ní amɛye lɛ diɛŋtsɛ abu amɛhe akɔntaa amɛha Yehowa agbɛnɛ. Hɛɛ, etsɛŋ ni amɛbaaná amɛle akɛ “Nyɔŋmɔ hiɛkalɔ lɛ dɛŋ gbeemɔ yɛ gbeyei pam.”—Hebribii 10:31.
20 Nɛkɛ kojolɔi yiwalɔi nɛɛ ‘anunyam’—ni ji je lɛŋ hiɛnyam, woo, kɛ hewalɛ ní fataa amɛninamɔ kɛ gbɛhe lɛ he kɛbaa lɛ—sɛɛ etsɛŋ kwraa. Mɛi komɛi baatsɔmɔ ta mli gbokɛlɛfoi, ni ‘amɛaaba amɛhe shi,’ loo amɛaabumɔ shi yɛ gbokɛlɛfoi krokomɛi ateŋ, beni agbegbee mɛi ní eshwɛ lɛ, ní mɛi ní gboi yɛ ta mli lɛ agbohii jwere amɛnɔ. Ninámɔ fɔŋ hu fata amɛ ‘anunyam’ lɛ he, ni amɛhenyɛlɔi lɛ baahà fɛɛ kɛya.
21. Yɛ toigbalamɔi ní Israel ená lɛ hewɔ lɛ, ani Yehowa mli ní efu amɛ lɛ sɛɛ efo?
21 Yesaia mu ewiemɔ lɛ naagbee fã nɛɛ naa kɛ kɔkɔbɔɔ wiemɔ ní mli wa waa, akɛ: “[Amanehulu ní maŋ lɛ ena kɛbashi bianɛ lɛ] fɛɛ lɛ emlifu lɛ ejɔko, ni enine lɛ ekpã mli lolo.” (Yesaia 10:4b) Hɛɛ, Yehowa yɛ nibii babaoo ní ebaakɛɛ Israel. Yehowa esuŋ enine ní ekpã mli lɛ aahu kɛyashi be mli ní ekɛ naagbee tutuamɔ ni ji hiɛkpatamɔ aaaba kooyigbɛ maŋtsɛyeli ní etse atua lɛ nɔ.
Kaaha Amale kɛ Pɛsɛmkunya Miiye Onɔ Kɔkɔɔkɔ
22. Mɛni wɔbaanyɛ wɔkase kɛjɛ nɔ ni ba Israel nɔ lɛ mli?
22 Yehowa wiemɔi ni ewieɔ kɛtsɔ Yesaia nɔ lɛ ba mli yɛ Israel nɔ yɛ gbɛ ní mli wa nɔ, ‘ni ekuuu esɛɛ ebaaa eŋɔɔ efolo.’ (Yesaia 55:10, 11) Yinɔsane eŋma Israel kooyigbɛ maŋtsɛyeli lɛ naagbee ní yɔɔ mɔbɔ lɛ efɔ̃ shi, ni wɔbaanyɛ wɔfee amanehulu ní maŋ lɛ mli bii lɛ kɛkpe lɛ he mfoniri yɛ wɔjwɛŋmɔ mli kɛkɛ. Nakai nɔŋŋ hu Nyɔŋmɔ wiemɔ lɛ baaba mli yɛ amrɔ nɛɛ nibii agbɛjianɔtoo lɛ nɔ, titri lɛ Kristendom hemɔkɛyeli kwalɔ lɛ. Belɛ, kwɛ bɔ ni ehe hiaa ní Kristofoi akabo amalei, ni ji lakamɔ wiemɔi ní teɔ shi woɔ Nyɔŋmɔ lɛ atoi! Atsɔ Nyɔŋmɔ Wiemɔ lɛ nɔ akpa Satan ŋaa gbɛ̀i lɛ ahe mama jeeŋmɔ, no hewɔ lɛ esaaa akɛ wɔgbeeɔ enɛɛmɛi amli taakɛ eba lɛ yɛ blema Israelbii lɛ agbɛfaŋ lɛ. (2 Korintobii 2:11) Eba akɛ wɔteŋ mɔ ko mɔ ko kpaŋ Yehowa jamɔ “yɛ mumɔ kɛ anɔkwale mli” kɔkɔɔkɔ. (Yohane 4:24) Kɛ́ eba lɛ nakai lɛ, no lɛ enine ní ekpã mli lɛ esaŋ ejálɔi lɛ ahe kɔkɔɔkɔ tamɔ bɔ ni efee Efraim atuatselɔ lɛ; ekɛ eniji baaloo amɛ atuu kɛ miishɛɛ, ni ebaaye ebua amɛ kɛnyiɛ gbɛ ní yaa naanɔ wala mli yɛ paradeiso shikpɔŋ nɔ lɛ nɔ.—Yakobo 4:8.
[Shishigbɛ niŋmai]
a Yesaia 9:7–10:4 lɛ hiɛ fãi ejwɛ (ŋmalɛ ní hiɛ lalafoo wiemɔi lɛ fãi komɛi), ni eko fɛɛ eko gbeɔ naa kɛ lala nɔheremɔ wiemɔ ni tsɔɔ nɔ ko ni baaba: “Fɛɛ lɛ emlifu lɛ ejɔko, ni enine lɛ ekpã mli lolo.” (Yesaia 9:11, 16, 20; 10:4) Nɛkɛ niŋmaa mli ŋaa ní akɛtsu nii nɛɛ baanyɛ abua Yesaia 9:7–10:4 lɛ naa efee lɛ “shɛɛ” wiemɔ kome. (Yesaia 9:7) Kadimɔ hu akɛ, Yehowa “[nine] lɛ ekpã mli lolo,” jeee ní eha amɛ hegbɛ ní akpata ekɛ amɛ teŋ, shi moŋ ní ekojo amɛ.—Yesaia 9:12.
b Yehowa gbalɔi ni hi shi yɛ Israel kooyigbɛ maŋtsɛyeli lɛ mli lɛ ateŋ mɛi komɛi ji Yehu (jeee maŋtsɛ lɛ), Elia, Mikaia, Elisha, Yona, Oded, Hoshea, Amos, kɛ Mika.
[Mfoniri ni yɔɔ baafa 139]
Efɔŋfeemɔ kɛ yiwalɛ gbɛ eshwã Israel fɛɛ tamɔ koo mli la
[Mfoniri ni yɔɔ baafa 141]
Yehowa baaha mɛi fɛɛ ní hàa mɛi krokomɛi anii lɛ abu amɛhe akɔntaa amɛha lɛ