Yitso 8
Fa 9: Nyɔŋmɔ Afii Akpe Maŋtsɛyeli Lɛ Ebɛŋkɛ
Nɔ Ni Abaakpa Gbɛ Beni Afii Akpe Kojomɔ Gbi Lɛ Baa Naagbee
1. Mɛni ebafeŋ nɔ ko ni ekaaa aloo eyɔɔ naakpɛɛ tsɔ akɛ aaakpa gbɛ akɛ shikpɔŋ lɛ nɔ bii baakase jalɛ yɛ afii akpe be ni akɛ Satan ewo bu kwɔŋkwɔŋ lɛ mli lɛ?
1 KOJOMƆI ni jɛ Nyɔŋmɔ ŋɔɔ kɛha shikpɔŋ lɛ kɛ enɔ bii lɛ ji nɔ ni baaba jeŋ fɛɛ yɛ afii akpe lɛ ni akɛwo Satan Abonsam tsuŋ yɛ bu kwɔŋkwɔŋ lɛ mli lɛ mli Ŋwɛi kɔjolɔi lɛ baakojo ni amɛbaatsu nii amɛha Yehowa Nyɔŋmɔ. Nakai nɔŋŋ hu najiaŋdamɔlɔi ni ji lumɛi ni yɔɔ shikpɔŋ nɔ lɛ hu baafee. Amɛbaafee amɛnii tamɔ kojolɔi ni Maŋtsɛ Yehoshafat ni jɛ Yerusalem lɛ to yɛ shikpɔŋ muu lɛ fɛɛ nɔ koni amɛkɛ-kpale gbɔmɛi lɛ kɛba Nyɔŋmɔ ŋɔɔ lɛ. Yehoshafat kɛɛ amɛ akɛ: “Nyɛkwɛa jogbaŋŋ yɛ nɔ ni nyɛaafee lɛ hewɔ! Ejaaakɛ jeee gbɔmɛi nyɛkojoɔ nyɛhaa, shi moŋ Yehowa ni, ni efata nyɛhe yɛ atɛŋbuu lɛ mli. No hewɔ lɛ agbɛnɛ nyɛhaa Yehowa gbeyeishemɔ [jeee gbɔmɔ] ahia nyɛmli! Nyɛkwɛa jogbaŋŋ ni nyɛfea; ejaakɛ Yehowa, wɔ Nyɔŋmɔ lɛ, kutumpɔo kɛ hiɛaŋkwɛmɔ kɛ nyɔɔŋnihemɔ bɛ ehe!” (2 Kron. 19:4-7) Akɛni ŋwɛi kojolɔi ni tamɔ nɛkɛ kɛ amɛ lumɛi ni kojoɔ nɛɛ yɔɔ shikpɔŋ nɔ hewɔ lɛ, ejeee nɔ ko ni ekaaa akɛ aaakpa gbɛ akɛ Paradeiso shikpɔŋ lɛ nɔ bii lɛ baakase jalɛ, amɛ fɛɛ, kɛha afii akpe.—Yes. 26:9.
2, 3. (a) Yesu tsɔ David nɔ ebafee mɛ Betlehemnyo Seshinyo, no hewɔ lɛ Yesaia kɛ Yesu shishijee yɛ shikpɔŋ nɔ lɛ to mɔ ni ewie ehe lɛ he yɛ mɛɛ gbɛ nɔ?(b) Mɛɛ mumɔ ni hiɛ mɛɛ sui baahi enɔ, ni ebaakojo yɛ mɛɛ gbɛ nɔ?
2 Mɛɛ Kojolɔ Nukpa ni he esa ni anyɛɔ akɛ he fɔɔ enɔ adesai fɛɛ baaná nɛkɛ, yɛ “ŋwɛi hee” lɛ mli, yɛ Kojomɔ Gbi ni feɔ afii akpe lɛ fɛɛ mli nɛkɛ! Nɔ ni yɔɔ miishɛɛ waa ji gbalɛ mlitsɔɔmɔ ni kɔɔ Kojolɔ nɛɛ he ni Yesaia kɛha yɛ afii ohai kpaanyɔ dani wɔ-Ŋmɛnɛŋmɛnɛ Be nɛɛ shɛ lɛ mli. Nɛkɛ Kojolɔ ni agba ehe sane afɔ shi lɛ ji Nuntsɔ Yesu Kristo, Mesia ni ji Maŋtsɛ David, Yishai ni jɛ Betlehem lɛ Seshinyo lɛ. Ani kojolɔ ko yɛ ni fe mɔ ni Yehowa Nyɔŋmɔ ehala lɛ nɛɛ ni ejaje adesai asaji ni ekwɛ ni gbɔmɛi lɛ anine ashɛ jalɛsaneyeli nɔ ni eto jalɛ ema shikpɔŋ lɛ nɔ kɛya naanɔ nɛɛ? Belɛ bo toi jogbaŋŋ mɔ, yɛ be mli ni gbalɔ ni mumɔ yɔɔ enɔ lɛ gbaa wɔ wɔsɛɛ be Kojolɔ ni jɛ Yishai, Betlehemnyo lɛ mli kɛtsɔ Maŋtsɛ David nɔ lɛ sui sɔrɔtoi lɛ ahe sane lɛ. Yɛ be mli ni ekɛ Seshinyo ni je shishi yɛ shikpɔŋ nɔ lɛ toɔ tsofa bibioo ko ni kwɛ̃ɔ kɛjɛɔ tsokuku ni afo afɔ shi lɛ mli lɛ he lɛ, Yesaia gba akɛ
3 “Shi tsofɔ ko aaakwɛ̃ kɛaajɛ Yishai tsokuku lɛŋ, tsonine aaajɛ eshishifaa lɛŋ awo yibii; ni Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeena Yehowa gbeyeishemɔ lɛ he miishɛɛ; bɔni ehiŋmɛii naa lɛ, jeee nakai ebaakojo, ni bɔni etoii nuɔ lɛ, jeee nakai ebaabu atɛŋ; shi eeekojo ohiafoi yɛ jalɛ naa, ni jajemɔ hu ekɛ aaaka mɛi lɛ, ni eeebu mɛi ni nii yɔɔ mɔbɔ yɛ shikpɔŋ lɛ nɔ lɛ atɛŋ bɔni ja, ni ekɛ edaaŋ tso lɛ aaatswa shikpɔŋ lɛ, ni ekɛ enaabu mumɔ lɛ aaagbe mɔfɔŋ lɛ. Ni jalɛ aaatsɔ ehɛfiinɔ, Ni anɔkwayeli aaatsɔ emlifiinɔ.”—Yes. 11:1-5.
4. (a) Ebaakojo adesai yɛ namɔ gbeyeishemɔ mli? (b) Yɛ mɛɛ gbɛ nɔ ebaafee mɔ ni fe “tsofɔ” aloo “tsonine” ko kɛkɛ ni jɛ “Yishai tsokuku” lɛ mli, ni ehaŋ amɛ hiɛnɔkamɔ afee yaka eloo ni eeehao amɛ?
4 Nɛkɛ Kojolɔ Nukpa nɛɛ sumɔɔ ni enaa Yehowa gbeyeishemɔ he miishɛɛ waa akɛ ebaakojo eha Yehowa shi jeee kɛha gbɔmɔ. No hewɔ lɛ esheɔ Nyɔŋmɔ gbeyei yɛ atɛŋ ni ebuɔ lɛ mli, shi esheee gbɔmɔ gbeyei. Ŋwanejee ko kwraa bɛ he akɛ eji nilelɔ yɛ gbeyeishemɔ ni sa ni ekɛhaa anɔkwa Nyɔŋmɔ kome ni ji Yehowa lɛ hewɔ. Ehiii shi akɛ “tsofɔ” aloo “tsonine” ko kɛkɛ ni kwɛ̃ kɛjɛ “Yishai tsokuku” ni ma shi Shiŋŋ lɛ mli, shi moŋ eda gojoo etsɔ “tso agbo” yɛ ŋwɛi odeheyeli mli, akɛ David Kpeteŋkpele, Yehowa hiɛkalɔ lɛ Bi. (Yes. 61:3; ekɛto Ezekiel 17:22-24 he.) Yehowa mumɔ ni he wa lɛ jɔɔ ehe yɛ odehe ni awo enɔ grɔŋŋ nɛɛ nɔ, ni ekɛ nilee, sanesɛɛkɔmɔ kɛ ŋaalee ni he hiaa kɛba nɛkɛ egbɛhe ni kwɔ nɛɛ duroɔ lɛ. No hewɔ lɛ, akɛ Maŋtsɛ ni ta maŋtsɛsɛi nɔ yɛ Nyɔŋmɔ ninejurɔ nɔ lɛ, ebaafee yijiemɔ kɛha Yehowa; ni ákɛ Kojolɔ ni ajɛ ŋwɛi ahala lɛ lɛ, ehaŋ shikpɔŋ lɛ nɔ bii lɛ ahiɛnɔkamɔ aafee yaka aloo ni eeehao amɛ.
5. Akɛni ebaakojo yɛ jalɛ naa pɛpɛɛpɛ hewɔ lɛ, yɛ mɛɛ gbɛ nɔ ebaajie ehe kpo akɛ mɔ ni kwɛɛɛ hiɛaŋ kɛ mɔ ni yɔɔ sanesɛɛkɔmɔ, babaoo po fe Salomo ákɛ kojolɔ?
5 Abaato jalɛsaneyeli ama shikpɔŋ nɔ. Ŋwɛi Kojolɔ lɛ kɛ sanesɛɛkɔmɔ babaoo baatsu nii fe mɔ ni fee ehe mfoniri ni ji Maŋtsɛ Salomo, ni kojo yɛ gbɛ ni ekaaa nɔ, tamɔ sane ko ni mliwa ni ajwamaŋi enyɔ lɛ kɛbafɔ ehiɛ lɛ. Mɛi enyɔ lɛ fɛɛ kpoo abifao ni egbo lɛ ni amɛkɛɛ akɛ mɔ ni hiɛ ka lɛ ji amɛbi. Ana gbɛ ni yɔɔ sɔrɔto ni Salomo tsɔ nɔ eha ale abifao ni yɔɔ wala mli lɛ nyɛ diɛŋtsɛ lɛ yɛ faŋŋ mli, ni aŋma afɔ shi akɛɛ “Ni Israel fɛɛ nu kojomɔ ni maŋtsɛ lɛ kojo lɛ he, ni amɛshe maŋtsɛ lɛ gbeyei; ejaakɛ amɛna akɛ Nyɔŋmɔ nilee yɛ emli, ni ekɛ kojoɔ.” (1 Maŋts. 8:16-28) Yɛ nakai gbɛ nɔ nɔŋŋ lɛ, Salomo Kpeteŋkpele lɛ ekojoŋ yɛ bɔni ehiŋmɛi naa nii aloo bɔni enuɔ kɛkɛ, shi moŋ ebaakwɛ ni anɔkwalei lɛ fɛɛ aje kpo ni amaniɛbɔɔ lɛ afee anɔkwale diɛŋtsɛ, beni afee ni akɛ kojomɔ ni ja aha ni abu atɛŋ yɛ jalɛ naa. Ekwɛŋ gbɔmɛi agboi ahiɛ ni eku ehiɛ eshwie ohiafoi anɔ, aloo henɔwolɔi ni eku ehiɛ eshwie heshibalɔi anɔ.
6. Yɛ mɛɛ gbɛ nɔ kɛtsɔ enifeemɔ yɛ “amanehulu kpeteŋkpele” Iɛ nɔ lɛ eeejie ehe kpo akɛ ekoome akpe Iɛ baafee jalɛ nɔ̃?
6 Beni afee ni etsɔɔ nɔ ni ekojomɔ be afii akpe lɛ ewo shi akɛ ekɛbaaba lɛ, nɛkɛ Kojolɔ Nukpa ni Yehowa mumɔ eyi lɛ obɔ lɛ baajie ehe kpo akɛ ohiafoi kɛ heshibalɔi a-Kpɔ̃lɔ yɛ “amanehulu kpeteŋkpele” ni baa ni baaya ayagbe naa yɛ “Nyɔŋmɔ Ofe lɛ gbi wulu lɛ nɔ ta” yɛ Harmagedon mli lɛ. (Mat. 24:21; Kpoj. 7:14; 16:14, 16) Efamɔ kɛ gbɛtsɔɔmɔi ni ekɛhaa ŋwɛi tabilɔi lɛ baatamɔ “tso” ni jɛ edaaŋ, ejaakɛ yɛ nɔ ni ekɛɔ akɛ Tatsɛnukpa lɛ mlibaa mli lɛ, abaatswia ‘shikpɔŋ momo’ ni jalɛ bɛ mli lɛ nɔ̃ ni akumɔ lɛ dukuduku. Yehowa mumɔ lɛ baatsirɛ enaabu ni ebaajie esubaŋ kɛ bɔni enuɔ he ehaa yɛ mɛi fɔji ni yɔɔ shikpɔŋ lɛ nɔ lɛ ahe etsɔɔ, ni abaagbe amɛ. Abaabɛɛ mɛi fɔji, henɔwolɔi ni wooɔ amɛhe lɛ fɛɛ kɛjɛ wɔ shikpɔŋ kutruku nɛɛ nɔ. Ni mɛnɛɛmɛi anɔyelɔ ni anaaa lɛ, Satan lɛ, akɛ kɔsɔŋkɔsɔ baafimɔ lɛ ni akɛ lɛ awo bu kwɔŋkwɔŋ lɛ mli.
7, 8. (a) Beni afee ni ahi aha adesai hewɔ lɛ, yɛ mɛɛ gbɛ nɔ Kojolɔ lɛ baatamɔ mɔ ko ni kɛ jalɛ efi ehɛ ni ekɛ anɔkwayeli efi emliteŋ? (b) Mɛni baajɛ enɛ mli aba aha adesai yɛ tsakemɔi ni ekɛbaaba amɛteŋ lɛ
7 Yɛ anɔkwale mli lɛ adesai bɛ nɔ ko ni amɛaakpa no gbɛ yɛ Kojolɔ Yesu Kristo ni Yehowa ehala lɛ lɛ kojomɔ be afii akpe lɛ mli fe jalɛsaneyeli kɛ anɔkwayeli ni he baaba sɛɛnamɔ aha amɛ. Ebaafee tamɔ nɔ ni nɛkɛ Ŋwɛi Kojolɔ nɛɛ efi ehɛ, ni jalɛ wajeɔ lɛ, tamɔ mɔ ko ni efi emliteŋ kɛha jalɛ nitsumɔ. Hɛɛ, etamɔ nɔ ni ekɛ anɔkwayeli su efi ehɛ kɛ emliteŋ aloo efi emli koni ekɛ anɔkwayeli akwɛ nibii ni he hiaa gbɔmɛi ni ekojoɔ amɛ yɛ tɛi ni Nyɔŋmɔ efolɔ eshwie shi lɛ anaa lɛ anɔ. Oo, mɛɛ toiŋjɔlɛ kɛ kpoofeemɔ po enɛ kɛ aaaba shikpɔŋ nɔ! Kwɛ bɔni tsakemɔi baaba sui ni gbɔmɛi hiɛ yɛ amɛhe amɛhe lɛ mli, mɛɛ su kɛ baŋ tsakemɔ po baaba nɛkɛ, beni afee ni ahi aha mɛi krokomɛi! Afee enɛ he mfoniri fɛfɛo yɛ Yesaia gbalɛ wiemɔi lɛ amli, taakɛ ekɛɔ lɛ:
8 “Ni jalɛ aaatsɔ ehɛfiinɔ, ni anɔkwayeli aaatsɔ emlifiinɔ. Ni klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; Ni tsina bi kɛ jata bi kɛ kooloo ni ewo fɔ fɛɛ aaahi hekome, ni gbekɛ bibioo aaakpala amɛ, Tsinayoo hu kɛ oshishibrishi aaaye nii, ni amɛbii aaabumɔ shi yɛ hekome, ni jata aaaye jwɛi tamɔ tsina. Fufɔo aaashwɛ yɛ shikpaa bu naa, ni gbekɛ ni etse fufɔ hu aaaŋɔ enine awo onufu bu mli. Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ Shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔni nu ha ŋshɔ shishi lɛ.”—Yes. 11:5-9.
GBƆMƆTSO SU KƐ BAŊ TSAKEMƆI
9. Kɛjɛ mɛɛ be, ni namɛi anɔ Nyɔŋmɔ mumɔ lɛ eha nɛkɛ sui atsakemɔ nɛɛ eba?
9 Susumɔ adesa subaŋi ni akɛtoɔ klaŋ, kootsɛ, oshishibrishi, jata bi, shikpaa ni ji onufu bi lɛ he okwɛ! Gbɔmɛi pii yɛ ni amɛhiɛ sui ni tamɔ nɛkɛ ni yɛ naagbee lɛ amɛkpɛlɛ Nyɔŋmɔ maŋtsɛyeli lɛ he sane lɛ nɔ ni amɛtsake amɛsubaŋi beni afee ni amɛnyɛ amɛkɛ gbɔmɛi krokomɛi ni he jɔ ni yɔɔ kpoo tamɔ too gwantɛŋ bi, gbekɛ bibioo, fufɔo aloo mɔ ni etse fufɔ ahi shi. Kɛjɛ be mli ni atsɔ Kristo nɔ afɔse mumɔ krɔŋkrɔŋ lɛ ashwie Kristofoi asafo lɛ ni amɛbua amɛhe naa yɛ Pentekoste gbijurɔyeli lɛ nɔ yɛ afi 33 Ŋ.B. lɛ nɔ kɛbaa nɛɛ, Nyɔŋmɔ mumɔ lɛ miitsu nii koni etsake asafo lɛ mlibii lɛ ni amɛtamɔ Kristo. Nɔ ni ejɛ mli eba ji akɛ asafo lɛ kɛ emlibii anɔkwafoi lɛ enyɛ amɛkɛ amɛhe ehi shi yɛ toiŋjɔlɛ mli, eyɛ mli akɛ tsutsu lɛ abaanyɛ akɛ amɛ subaŋ ato kooloi awuyelɔi ahe. (Bɔf. 2:1-33) Yesaia gbalɛ lɛ eba mli anɔkwale ejaakɛ amɛfeko amɛnanemɛi Kristofoi lɛ efɔŋ ko ni asaŋ amɛyeko asafo lɛ awui hu yɛ Yehowa jamɔ ni yɔɔ “gɔŋ krɔŋkrɔŋ” lɛ nɔ Iɛ mli.
10. (a) Yɛ Kristo hefatalɔi kojolɔi 144,000 esɛɛ Iɛ, namɛi hu subaŋ tsakemɔ nɛɛ eba amɛnɔ? (b) Mɛɛ gbɛ nɔ nɛkɛ tsakemɔ nɛɛ baahi aha amɛ yɛ Kristo afii akpe kojomɔ lɛ shishijee mli?
10 Nɛkɛ subaŋ tsakemɔ nɛɛ jeee nɔ ni etee nɔ yɛ mɛi ni yɛ naagbee lɛ amɛfeɔ Kojolɔ Nukpa Kristo hefatalɔi kojolɔi 144,000 lɛ ateŋ pɛ, shi moŋ etee nɔ hu yɛ “asafo babaoo” ni anyɛɛɛ akane amɛ ni ji Yehowa jalɔi ni ŋmɛnɛ abuaa amɛnaa kɛjɛɔ shikpɔŋ lɛ nɔ jeŋmaji, akutsei, gbɔmɛi kɛ majianɔ wiemɔi fɛɛ mli lɛ ateŋ. Nɛkɛ mɛi ni kpaa gbɛ akɛ amɛbaahi shikpɔŋ nɔ Paradeiso lɛ mli lɛ ená nɔmimaa akɛ Nyɔŋmɔ baabu amɛhe yɛ “amanehulu kpeteŋkpele” lɛ mli ni ebaabaa amɛyi kɛtsɔ mli kɛbote Nyɔŋmɔ gbɛjianɔtoo hee ni yɔɔ Kristo afii akpe kojomɔ shishi lɛ mli. (Kpoj. 7:9-17) No hewɔ lɛ amɛkɛ amɛsubaŋi ni atsake lɛ baabote gbɛjianɔtoo hee lɛ mli tɛɛ. Enɛ baahi aha amɛ, ejaakɛ amɛ amɛbaafee “hiɛkalɔi” ni ŋwɛi Kojolɔ Yesu Kristo baaje shishi ekɛ ekojomɔi afii akpe lɛ atsu amɛhe nii. (2 Tim. 4:1) Yɛ shihilɛi ni tamɔ nɛkɛ shishi lɛ, awuyeli aloo efɔŋfeemɔ he gbeyeishemɔ baalaaje kwraa yɛ Yehowa jamɔ “gɔŋ krɔŋkrɔŋ” lɛ hɔ. Amɛle Yehowa momo, no hewɔ lɛ, akɛni nɛkɛ mɛi ni eje mli nɛɛ ebɔle je lɛŋ fɛɛ hewɔ lɛ, shikpɔŋ lɛ nɔ aayi obɔ kɛ Yehowa he nilee. Shi nɛkɛ nilee nɛɛ baaya hiɛ.
11. Mɛni ji nɔ ni Nyɔŋmɔ ma nɔ mi eha mɛi kpaanyɔ ni je nu afua lɛ mli lɛ yɛ shikpɔŋ nɔ bɔɔnii lɛ ahe ni mɛɛ gbɛ nɔ enɛ baana eŋmɛnɛŋmɛnɛ beaŋ nɔ?
11 Heni wɔshɛ nɛɛ haa wɔkaiɔ nɔ ni akɛɛ adesai kpaanyɔ ni je Noa gbi lɛ mli nu afua lɛ mli lɛ, yɛ beni amɛje kpo kɛjɛ adeka lɛ mli ni amɛsha afɔle amɛha Nyɔŋmɔ lɛ. Yehowa kɛɛ amɛ akɛ: “Ni nyɛhe gbeyei kɛ nyɛshemɔ aka shikpɔŋ lɛ nɔ kooloi fɛɛ kɛ ŋwɛi loofɔji fɛɛ anɔ, nɔ fɛɛ nɔ ni wamɔɔ yɛ shikpɔŋ, kɛ ŋshɔŋloi fɛɛ lɛɛ, nyɛdɛŋ atu amɛ awo.” (1 Mose 9:2) Ani esaaa akɛ enɛ naa eŋmɛnɛŋmɛnɛ beaŋ nɔ? Akɛni akɛ “amanehulu kpeteŋkpele” ni baa lɛ baate shi awo adesai ni yɔɔ shikpɔŋ nɔ ni leee Nyɔŋmɔ lɛ hewɔ lɛ, agbeŋ shikpɔŋ nɔ kooloi, loofɔji kɛ ŋshɔŋloi. Shishinumɔ yɛ mli akɛ aakpa gbɛ akɛ Nyɔŋmɔ kɛ adesa bɔɔnii, ni amɛ akɛ nitsumɔ baawo amɛdɛŋ ni amɛtsake shikpɔŋ ni afite lɛ lɛ ni etsɔ Paradeiso lɛ ahe gbeyeishemɔ ni elaaje lɛ fɛɛ baafɔ bɔɔnii ni baa shi lɛ anɔ. Yɛ anɔkwale mli lɛ akɛni Nyɔŋmɔ tsɔ emumɔ lɛ nɔ etsake kooloi asui ni yɔɔ gbɔmɔ mli lɛ kɛtee Kristofoi asubaŋi amli yɛ 144,000 lɛ kɛ “asafo babaoo” ni yɔɔ ŋmɛnɛ lɛ amli hewɔ lɛ, abaanyɛ afee nɔ ko ni tamɔ nakai nɔŋŋ yɛ kooloi ni hiɛ yɔɔ la lɛ agbɛfaŋ Yɛ anɔkwale mli lɛ, amɛyeŋ Yehowa jalɔi ni yɔɔ shikpɔŋ nɔ lɛ awui.
12, 13. (a) Mɛni ji su ni nuu Iɛ kɛ yoo lɛ hiɛ yɛ shikpɔŋ nɔ bɔɔnii ni baa shi lɛ ahe yɛ shishijee Paradeiso lɛ mli? (b) Mɛɛ wekukpaa nɛkɛ baaba shikpɔŋ nɔ bɔɔnii ni baa shi lɛ ateŋ diɛŋtsɛ ni fe mfonirifeemɔ gbɛ pɛ kɛkɛ nɔ?
12 Yɛ enɛ kɛ gbeekpamɔ naa lɛ, wɔmiikpa gbɛ akɛ bɔni atsɔɔ kooloi ashihilɛ lɛ mli fɛofɛo yɛ Yesaia 11:6-9 lɛ baaba mli diɛŋtsɛ yɛ loofɔji kɛ ŋshɔŋlooi kɛ shikpɔŋ nɔ bɔɔnii lɛ ahe yɛ Ishai Kpeteŋkpele Yehowa Nyɔŋmɔ, binuu ni ji hejɔlɛ lumɔ lɛ afi akpe nɔyeli lɛ mli. Yɛ shishijee Paradeiso aloo Eden Abɔɔ lɛ mli lɛ, no mli lɛ, Hawa ni ji yoo lɛ sheee onufu gbeyei, ejooo foi be mli ni aha ekɛ lɛ wie lɛ. (1 Mose 3:1-4) Dani enɛ aaaba lɛ, akɛ kooloi ni hiɛ yɔɔ la lɛ kɛ ŋwɛi loofɔji ni flikiɔ lɛ ba Adam hiɛ ni ewo amɛ gbɛi ni esheee amɛ gbeyei. (1 Mose 2:19, 20) Nakai bɔɔnii ni baa shi ni yɔɔ shikpɔŋ nɔ lɛ ahe gbeyeishemɔ ni bɛ ni yɔɔ Eden kɛ awui ni amɛyeee mɔ ko lɛ baaba ekoŋŋ yɛ Paradeiso ni áku sɛɛ akɛba lɛ mli.
13 Agbɛnɛ hu toiŋjɔlɛ baaba nɛkɛ shikpɔŋ nɔ kooloi, bɔɔnii ni flikiɔ kɛ loi ateŋ kɛ agbɛnɛ kɛ gbɔmɔ teŋ. Ebafeŋ nii ni kɛ ehe kpaa gbee ákɛ Nyɔŋmɔ aaha agba gbalɛ ni tamɔ Yesaia 11:6-9, kɛ Ezekiel 34:25 kɛ Hoshea 2:18, ni fɛɛ afee nɔ ni feɔ mfonirifeemɔ mli nɔ ko aloo ehiɛ gbɔmɔ shishinumɔ, ni nɔ ko ni tamɔ nɛkɛ baŋ diɛŋtsɛ yɛ shihilɛ mli, tamɔ nɔ ni emlibaa diɛŋtsɛ lɛ ji nɔ ko ni ashweɔ ni yɔɔ fɛo ni nyɛŋ aba.
14. Shi kɛlɛ, mɛni he hiaa waa fe shikpɔŋ nɔ kooloi ni baa shi lɛ ni aaaha amɛhe ajɔ? Ni mɛni hewɔ?
14 Shi kɛlɛ, kooloi, loofɔji kɛ loi ni ji bɔɔnii lɛ ni aaaha amɛhe ajɔ lɛ jeee oti lɛ. Nɛkɛ shikpɔŋ nɔ bɔɔnii nɛɛ yɛ jeeŋmɔ dani adesa pue. Shihilɛ ni adesa aaaya nɔ ahi yɛ shikpɔŋ nɔ lɛ ji nɔ ni he eba sane lɛ. Afɔ Adam kɛ Hawa seshibii fɛɛ akɛ eshafeelɔi, no hewɔ lɛ, “Nyɔŋmɔ anunyam lɛ ebɔamɛ.” (Rom. 3:23) Yɛ saji pii amli lɛ, sui ni adesa ena lɛ jeee Nyɔŋmɔ gbeyeishemɔ sui, shi moŋ, sui ni tamɔ kooloi awuyelɔi anɔ. No hewɔ lɛ, ehe miihia ni akɛ adesa áku sɛɛ aba nakai “Nyɔŋmɔ anunyam” lɛ he beni afee ni ebafee mɔ ni sa naanɔ wala kɛha Nyɔŋmɔ ni ji Bɔlɔ lɛ yijiemɔ. Ehe miihia ni akɛ adesa weku lɛ mlibii lɛ aba toiŋjɔlɛ, kɛ shihilɛ ni yɔɔ kpoo ni aaaba amɛ kɛ amɛhe amɛhe teŋ lɛ mli, ni amɛtsu jalɛ kɛ jalɛsaneyeli he nii yɛ emuuyeli mli. Enɛ ji nɔ ni Yesu Kristo kojomɔ afii akpe lɛ kɛ aaba.
15. Te aaafee tɛɛŋ ni ŋwɛi kojolɔi ni yeɔ adesai anɔ Iɛ aaaha efɔŋfeemɔ aba shi yɛ be mli ni gbɔmɛi ayi faa kɛyaa hiɛ lɛ?
15 Ŋmɛnɛ, efɔŋ ni adesai feɔ lɛ miifa fe bɔni gbɔmɛi ayifalɛfaa yɛ shikpɔŋ lɛ nɔ. Nɔ ni baate shi awo enɛ kwraa lɛ, adesai ayifalɛ baaya hiɛ yɛ afii akpe lɛ mli gbohii ni ji “jalɔi” kɛ “mɛi ni ejaaa” lɛ ni aaatee amɛshi lɛ hewɔ. Shi kɛlɛ, efɔŋfeemɔ baaya nɔ aba shi kɛyashi be mli ni eeelaaje kwraa. Mɛni hewɔ? Ejaakɛ ŋwɛi kojolɔi ni yeɔ adesai anɔ lɛ baafee mɛi ni ja kwraa ni amɛbaatsɔɔ adesai fɛɛ, anɔkwa jalɛsaneyeli yɛ tɛi ni Nyɔŋmɔ efolɔ eshwie shi lɛ anaa. Yɛ nɔ ni baaye abua yɛ enɛ gbɛfaŋ lɛ, “shikpɔŋ lɛ nɔ aaayi obɔ kɛ Yehowa he nilee tamɔ bɔ ni nu ha ŋshɔ shishi lɛ.” (Yes. 11:9) E-jamɔ lɛ pɛ ji nɔ ni ebaaŋmɛ gbɛ yɛ eteokrase afii akpe lɛ mli. Akɛ adesai baaba Yehowa “anɔkwa kpeebuu” ni ji emumɔŋ sɔlemɔwe lɛ shikpɔŋ nɔ kpo lɛ nɔ. Jɛmɛ ji heni abaaha amɛle anɔkwale ni yɔɔ nɔ ni Yesu kɛɛ eŋwɛi Tsɛ lɛ yɛ sɔlemɔ mli lɛ: “Enɛ ji naanɔ wala lɛ, akɛ amɛaana bo anɔkwa Nyɔŋmɔ kome lɛ, kɛ Yesu Kristo mɔ ni otsu lɛ lɛ he nilee.”—Yoh. 17:3, NW; Heb. 8:2.
16. (a) Mɛni baajɛ Kristo afii akpe kojomɔ nɔyeli lɛ mli aba ni po hewɔ ni eyiŋtoo lɛ efeŋ yaka lɛ? (b) Mɛni hewɔ ni Kristo kɛ naanɔ wala haŋ adesai ni áku sɛɛ esaa amɛ yɛ Paradeiso lɛ?
16 Afii akpe Kojomɔ Gbi lɛ he yiŋtoo efeŋ yaka. Be mli ni eeeba naagbee lɛ, mɛi fɛɛ ni baa amɛhe shi ni amɛfeɔ toiboo lɛ efee mɛi ni atsɔse amɛ yɛ anɔkwale jalɛ kɛ jalɛsaneyeli mli kɛshɛ emuuyeli mli. Amɛ gbɔmɔtsoŋ kɛ jwɛmɔŋ fãtɔi ni amɛna akɛ gboshinii kɛjɛ Adam kɛ Hawa dɛŋ lɛ baafee nɔ ni etee. Agbɛnɛ amɛyɛ emuu ni amɛsheɔ Nyɔŋmɔ jalɛ tɛi ni efolɔ eshwie shi lɛ he kwraa. Ani Yesu Kristo, akɛ Kojolɔ Nukpa lɛ kɛ naanɔ wala hegbɛ yɛ paradeiso shikpɔŋ fɛfɛo ni asaa nɔ yɛ toiŋjɔlɛ mli lɛ haa amɛ? Dabi! Etsuŋ enɛ he nii ehaŋ Nyɔŋmɔ yɛ biɛ, ejaakɛ ele akɛ aŋma akɛ: “Nyɔŋmɔ ji Mɔ ni buɔ bem.”(Rom. 8:33) Belɛ mɛni ji nɔ ni Nyɔŋmɔ Kojolɔ lɛ feɔ?