Ani Obaanyɛ Ona Paradeiso Ko Mli Ŋɔɔmɔ Bianɛ?

PARADEISO ko yɛ shikpɔŋ nɔ ŋmɛnɛ. Emli miilɛɛ kɛmiiya hiɛ daa ni gbɔmɛi akpekpei abɔ miiná mli ŋɔɔmɔ. Bo hu, obaanyɛ ofee efã. Ani enɛ ji jwɛŋmɔ mli lamɔ ko? Dabi kwraa, ejaakɛ jeee adebɔɔ mli, shikpɔŋ nɔ paradeiso diɛŋtsɛ ko he wɔwieɔ lɛ, shi moŋ mumɔŋ nɔ̃.a

Ooobi akɛ, “Mɛni otsɔɔ akɛ mumɔŋ paradeiso lɛ.’” Kɛ aaawie lɛ faŋŋ lɛ: Abaanyɛ awie Kristofoi agbɛjianɔtoo ko ni amɛtsake amɛgbɔmɔtsoŋ sui ni ekɛ Nyɔŋmɔ taomɔ nii akpa gbee ni amɛfee ekome yɛ enɔkwale jamɔ mli lɛ he akɛ amɛyɛ mumɔŋ paradeiso ko mli.

Biblia lɛ nɛgbɛ faŋ atsɔɔ mumɔŋ shihilɛ ni yɔɔ naakpɛɛ tamɔ nɛkɛ yɛ.’ Mɛɛ odaseyeli yɔɔ ni tsɔɔ akɛ shihilɛ ni tamɔ nɛkɛ yɛ ŋmɛnɛ?

Klaŋ Ni Kɛ Gwaŋtɛŋ Bi Aahi Shi

Biblia mli gbalɛi babaoo yɛ ni tsɔɔ shihilɛi ni gbalaa paradeiso ko kɛbaa jwɛŋmɔ mli. Niiamlitsɔɔmɔ fɛfɛo ni kɔɔ paradeiso nɛɛ eko he ji nɔ ni anaa yɛ Yesaia 11:​6-9, nɔ ni kaneɔ nɛkɛ lɛ:

“Ni klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ni ewo fɔ fɛɛ aaahi he kome, ni gbekɛ bibioo aaakpala amɛ. Tsina yoo hu kɛ oshishibrishi aaaye nii, ni amɛbii aaabumɔ shi yɛ he kome, ni jata aaaye jwɛi tamɔ tsina. Fufɔoo aaashwɛ yɛ shikpaa bu naa, ni gbekɛ ni etse fufɔ hu, aaaŋɔ enine awo onufu bu mli. Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.”

Susumɔ bɔ ni ebaafee nɔ ni yɔɔ miishɛɛ akɛ aaahi shi yɛ shihilɛhei ni yɔɔ kpoo tamɔ nɔ ni atsɔɔ yɛ biɛ, ni toiŋjɔlɛ ni yeɔ emuu yɛ naakpɛɛ gbɛ ni tamɔ nɛkɛ nɔ yɔɔ mli lɛ he okwɛ! Enɛ kɛ Paradeiso shihilɛi ni yɔɔ Eden abɔɔ lɛ mli beni kooloi kɛ adesai hi nakai abɔɔ lɛ mli yɛ ekomefeemɔ ni yeɔ emuu mli lɛ baaku sɛɛ aba ekoŋŋ. (1 Mose 1:​30; 2:​8, 9, 19, 20) Anɔkwale Kristofoi kɛ miishɛɛ miikpa nɛkɛ jɔɔmɔi ni yɔɔ nyam ni baaba shikpɔŋ muu lɛ fɛɛ nɔ yɛ wɔsɛɛ be mli yɛ Mesia Maŋtsɛ, Yesu Kristo nɔyeli lɛ shishi lɛ mli ŋɔɔmɔyeli gbɛ. Atsɔɔ enɔyeli lɛ mli yɛ Yesaia 11:​1-5, kukuji ni tsɔ nɔ ni atsɛ yɛ yiteŋgbɛ nɛɛ ahiɛ nɔŋŋ lɛ. Shi ani nɛkɛ wɔsɛɛ be mli jɔɔmɔi ni nine baashɛ nɔ diɛŋtsɛ yɛ Maŋtsɛyeli nɔyeli lɛ shishi lɛ pɛ ji Yesaia wiemɔi lɛ amlibaa?

Dabi, abaanyɛ akɛɛ hu akɛ gbalɛ nɛɛ feɔ tsakemɔi yɛ adesa sui amli lɛ he mfoniri. Yɛ mɛɛ gbɛ nɔ? Afii ohai 18 lɛ mli Biblia kaselɔ Matthew Henry haa hetoo akɛ: “Abaatsake gbɔmɛi ni hiɛ yɔɔ kramakrama kɛ la waa lɛ, mɛi ni kɔmɔɔ mɛi ni yeɔ mɛi fɛɛ ni ebɔle amɛhe lɛ atsuii yɛ gbɛ ni yɔɔ naakpɛɛ waa nɔ akɛ . . amɛkɛ mɔ ni yɔɔ wudɔɔ fe fɛɛ kɛ mɛi ni tamɔ nakai lɛ ni tsutsu ko lɛ amɛbaafee mɛi ni amɛbaaye amɛ oyá lɛ aaahi shi yɛ suɔmɔ mli.”

Ni Biblia kaselɔ kroko, Joseph Benson ŋma yɛ afii oha ni eho lɛ mli akɛ: “Abaatsɔ sanekpakpa lɛ shiɛmɔ nɔ kɛ Kristo duromɔ nɔ atsake gbɔmɛi ni hiɛ yɔɔ la, ni yi wa, ni hiɛ sui ni anyɛɛɛ amɛnɔ aye lɛ waa akɛ amɛbaatsɔmɔ mɛi ni baa amɛhe shi, ni he jɔ ni anyɛɔ ayeɔ amɛnɔ, ni amɛmli woŋ la ni amɛwa mɛi ni he jɔ kɛ mɛi ni nii yɔɔ mɔbɔ ni atsi amɛtã [yɛ] kuku 4 lɛ ayi.”

Susumɔ he okwɛ! Adesai ni miikpɔlɔ amɛtsutsu yiwalɛ sui lɛ ni yɛ nomɛi anajiaŋ lɛ, amɛmiiwo gbɔmɔtsoŋ sui ni toiŋjɔlɛ kɛ suɔmɔ kadiɔ lɛ! Jeee akɛ gbɔmɛi ni tamɔ nɛkɛ lɛ laajeɔ mɛi ni amɛji lɛ. Yesaia ekɛɛɛ akɛ klaŋ batsɔ gwantɛŋ bi, shi moŋ, esui tsakeɔ bɔni afee ni enyɛ akɛ gwantɛŋ bi lɛ ahi shi yɛ hejɔlɛ mli.

Nɔ ni tamɔ nakai nɔŋŋ ni kɛ Yesaia wiemɔi lɛ nyiɛ lɛ, adesai ni yɔɔ kooloi asui​—mɛi ni ekolɛ amɛgbe mɛi, amɛshishiu aloo amɛye amɛnaanyo gbɔmɔ awui yɛ gbɛ kroko nɔ​—tsakeɔ amɛgbɔmɔtsoŋ sui, ni amɛkɛ mɛi krokomɛi ni he jɔ tamɔ gwantɛŋ bi hiɔ shi. Kɛji akɛ shihilɛ tamɔ nɛkɛ ba yɛ gbɔmɛi ateŋ lɛ, abaanyɛ awie anunyam nii ni jɛɔ mli baa lɛ he akɛ mumɔŋ paradeiso. Shi ani Yesaia wiemɔi lɛ diɛŋtsɛ miiba mli ŋmɛnɛ?

Mumɔŋ Paradeiso Ko​—Mɛɛ Be?

Gbalɛ ko ni kɛ enɛ nyiɛ pɛpɛɛpɛ yɛ Yesaia wolo lɛ mli ni yeɔ buaa wɔ ni wɔna be ni nɛkɛ naakpɛɛ mumɔŋ shihilɛ nɛɛ jeɔ shishi ebaa mli. Wɔkaneɔ yɛ Yesaia 2:​2-4 akɛ:

“Ni aaaba mli akɛ naagbee gbii lɛ amli lɛ, Yehowa we gɔŋ lɛ aaama shi yɛ gɔji lɛ ayiteaŋ, ni aaawo nɔ fe gɔŋkpɔi lɛ; ni jeŋmaji fɛɛ aaaho kɛaaba he; ni amɛkɛ amɛklantei aaasɔ̃ kɔii ni amɛkɛ amɛkpɔlɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”

Kadimɔ akɛ atsɔɔ tsakemɔ kroko mli​—gbɔmɛi ni miitsɔmɔ mɛi ni sumɔɔ toiŋjɔlɛ, ‘ni kɛ klantei miisɔ̃ kɔii.’ Mɛɛ be enɛ baaba? Biblia mli gbalɛ lɛ haa hetoo akɛ, “yɛ naagbee gbii lɛ amli.” Taakɛ atsɔɔ shii abɔ yɛ Buu-Mɔɔ lɛ mli lɛ, nibii agbɛjianɔtoo nɛɛ bote naagbee gbii lɛ amli kɛjɛ afi 1914. No hewɔ lɛ, wɔmiihi shi bianɛ yɛ be ni Yesaia 11:​6-9 miina emlibaa lɛ mli. Esa akɛ mumɔŋ shihilɛ ni yɔɔ nyam ahi shi bianɛ! Ooobi akɛ, ‘Shi yɛ nɛgbɛ.’

Gbɔmɔ Su Lɛ He Ni Ajɔɔ

Gbɔmɔtsoŋ sui ahe jɔɔmɔ taakɛ Yesaia gbalɛ lɛ tsɔɔ lɛ ka he miiya nɔ shii abɔ yɛ gbɔmɛi anɔkwafoi ateŋ, mɛi ni be mli ni amɛkase Biblia mli anɔkwale lɛ, amɛhaa ‘amɛjwɛŋmɔi tsɔɔ ehee’ ni ‘amɛwoɔ gbɔmɔtso hee lɛ.’ (Romabii 12:2; Efesobii 4:​23, 24) Susumɔ nɔkwɛmɔ nɔ ni nyiɛ sɛɛ nɛɛ he:

David ji obalanyo agbo ko ni he wa ni da yɛ ŋmɔ ko ni yɔɔ Minnesota yɛ United States, Amerika lɛ mli. David ni sɛɛ mli lɛ ebatsɔ atswɛrɛnɔlɔ lɛ tsɔɔ mli akɛ, “Mitsɛ kɛɔ mi daa akɛ mikɛ atswerɛ atao misaji anaa.” Mikaiɔ lɛ daa ni eekɛɛ akɛ, ‘kaaje nɔmɔ ko shishi kɔkɔɔkɔ, shi bɔɔ mɔdɛŋ ni ogbe naa.’ Nɔ ni jɛ mli ba ji akɛ, ebafee klɛŋklɛŋ lɛ nɔmɔ, kaabi sane kɔkɔɔkɔ. Minaa miishɛɛ diɛŋtsɛ akɛ miiye mɛi krokomɛi agbɔmɔtsei awui.”

Akɛ nɔkwɛmɔ nɔ lɛ, gbɛkɛ ko ni nuu ko ni miishi tsɔnei amaamɔhe ko batsĩ David kar lɛ hiɛ. Ekɛ kuɛŋtimɔ kpoo akɛ ebaafã. David kɛɛ akɛ, “migri waa akɛ mitao ni magbe lɛ.” No hewɔ lɛ egbala nuu lɛ kɛjɛ ekar Iɛ mli ni eyi lɛ aahu kɛyashi nɔ̃ nyɔ enɔ. Ani gbɔmɔ ni hiɛ yiwalɛ su tamɔ nɛkɛ baanyɛ atsake egbɛ̀i diɛŋtsɛ?

Gbi ko be mli ni etsuuu nii lɛ, Yehowa Odasefoi ba David ŋɔɔ. Amɛsane ni kɔɔ jalɛ nibii a-Gbɛjianɔtoo Hee he lɛ ta etsui he. David kɛɛ akɛ, “Miyiŋ tsɔ amrɔ nɔŋŋ akɛ amɛhiɛ anɔkwale lɛ.” Yɛ be mli ni ekɛ nɔ ni ekaseɔ lɛ bɔi nitsumɔ lɛ, David je shishi efee tsakemɔi yɛ eshihilɛ mli​—ekpa tawa shɛremɔ ni ekpa tsofai fɔji kɛ nitsumɔ. Eeya ehiɛ po yɛ eyiwalɛ su lɛ he jɔɔmɔ mli.

Shi nyɔji saŋŋ komɛi asɛɛ lɛ, nɔ ko ni gbalaa mɔ sɛɛ ni jeɔ nijiaŋ wui ba David nɔ. Eetsu nii yɛ tsumaa he ko. Gbi ko leebi lɛ ehefatalɔ nitsulɔ ko je shishi ebɔi lɛ haomɔ. David bɔ lɛ kɔkɔ ni efɔɔ, shi efɔɔɔ. Mɛni jɛ mli ba? David tsɔɔ mli: “Mima lɛ atswerɛ waa akɛ misusu akɛ migbe lɛ. Nɔ̃ nyɔ enɔ aaafee minitii 20. Mihiɛ gbo diɛŋtsɛ.”

Shi kɛlɛ, David tee nɔ etsake egbɔmɔ su lɛ. Kaa diɛŋtsɛ ko ba afii saŋŋ komɛi asɛɛ be mli ni etsɔ Yehowa Odasefonyo ni abaptisi lɛ lɛ sɛɛ. Eje kpo etee shia kɛ shia shiɛmɔ. Yɛ shinaa ko naa lɛ nuu ko je kpo ni ebɔi buu kɛ lɛ hamɔ. Kɛkɛ ni nuu lɛ mɔ David kootu lɛ mli ni etsi lɛ kɛjɛ atrakpoi lɛ anɔ. David ekɛɛɛ nɔ ko ni eje shishi ebɔi nyiɛmɔ kɛmiiya shia ni tsa nɔ lɛ mli. Akɛni nuu lɛ tsui etɔko yɛ enɛ he hewɔ lɛ, enyiɛ esɛɛ ni ekɔ tso ko ni akɛtswaa bɔɔl ni ekɛtswa David hɛ sɛɛ. Shi obalanyo ni tsutsu lɛ ehiɛ yɔɔ la nɛɛ etooo najiaŋ! Enyiɛ kɛtee kɛkɛ. Mɛɛ tsakemɔ ni yɔɔ naakpɛɛ ni baa yɛ gbɔmɔtsoŋ su mli nɛ! Nɛkɛ “klaŋ” nɛɛ kɛ “gwantɛŋ bii” miihi shi yɛ toiŋjɔlɛ mli bianɛ, ni eesɔmɔ akɛ onukpa kɛ be fɛɛ sɔɔlɔ yɛ asafo lɛ mli.

Yɛ bei babaoo mli lɛ nɛkɛ tsakemɔ ni baa mɛi krokomɛi anɔ nɛɛ naa gbɔmɛi ni naa enɛ lɛ anɔ hewalɛ waa akɛ, amɛ hu, etsirɛɔ amɛ ni amɛfee tsakemɔi yɛ amɛshihilɛi amli kɛha nɔ ni hi. No hewɔ lɛ, obalanyo kroko ni lɛ hu egbɛi ji David, yɛ be mli ni ekɛ enaanyo momo ko ni ena lɛ etsɛ ekpe sɛɛ lɛ, ekɛɛ: Esoro lɛ kwraa. Ebɛ yitsɔi kusuu dɔŋŋ, ekɛ wiemɔ sha tsuuu nii dɔŋŋ aloo ekwɛɔ ehe nɔ jogbaŋŋ ni ekɛ ehe akawo tsofai fɔji kɛ nitsumɔ mli. Eha eshihilɛ he etse kɛmɔ shi kwraa. Enɛ ha mihe jɔ̃ mihe waa akɛ mitao ni male nɔ ni kɛ tsakemɔ lɛ ba.” David naanyo lɛ ebatsɔ Yehowa Odasefoi lɛ ateŋ mɔ kome. Ni nakai David fee, yɛ beni eha lɛ diɛŋtsɛ eshihilɛ he etse sɛɛ.

Abaanyɛ aku niiashikpamɔi ni yɔɔ yiteŋgbɛ nɛɛ abɔ he shii abɔ yɛ Yehowa Odasefoi asafoi 45,020 ni yɔɔ jeŋ fɛɛ lɛ mli. Ekolɛ ole amɛteŋ mɔ kome loo mɛi saŋŋ ni amɛfee tsakemɔi ni yɔɔ naakpɛɛ yɛ amɛshihilɛi amli.

Kɛji akɛ nikwɛlɔi tee Yehowa Odasefoi akpeei wuji ashishi lɛ, amɛfɔɔ toiŋjɔlɛ shihilɛ ni yɔɔ jɛmɛ lɛ he wiemɔ. Mɔ ko ni ŋmaa saji ehaa Journal de Montréal adafitswaa wolo lɛ ŋma akɛ: “Jeee Odasefonyo ji mi. Shi miji odasefonyo yɛ anɔkwasane nɛɛ he akɛ Odasefoi lɛ yeɔ subaŋ kpakpa ni sa he odase. . . Kɛji akɛ amɛ pɛ ji gbɔmɛi ni yɔɔ je lɛ mli lɛ, kulɛ ehe ehiaŋ akɛ wɔlalaa wɔshinaai asɛɛ gbekɛ ni wɔto tsɔnei ni gbɛɔ ni shweɔ julɔi.”

Nyɛɛ ni mli wa baka akrowai enyɔ komɛi ateŋ yɛ Mexico. Amɛfɔɔ amɛhe gbee. Polisifoi lɛ nyɛɛɛ afee nɔ ko kɛku naa. Kɛkɛ ni weku kome ko je shishi amɛkɛ Yehowa Odasefoi bɔi nikasemɔ. Wekui krokomɛi hɔɔ amɛ mɔgbee dadei lɛ ni amɛkɛ shika lɛ yahe Bibliai, koni amɛ hu amɛnyɛ amɛkase nii lɛ eko. Etsɛɛɛ tsɔ ni ato mumɔŋ paradeiso ni anɔkwa toiŋjɔlɛ kɛ ekomefeemɔ yɔɔ mli ama shi yɛ akrowaiaŋbii nɛɛ ateŋ.

Shi jeee akɛ Yehowa Odasefoi kɛ na ni amɛnaa shihilɛ ni atsɔɔ yɛ Yesaia 11:​6-9 lɛ mli ŋɔɔmɔ lɛ he yijiemɔ haa amɛhe. Dabi, hewalɛ kome pɛ yɔɔ jeŋ muu fɛɛ ni baanyɛ aha gbɔmɛi afee tsakemɔi kpelei ni tamɔ nɛkɛ yɛ amɛshihilɛi amli. Nakai hewalɛ lɛ ji Nyɔŋmɔ mumɔ krɔŋkrɔŋ lɛ. (Galatabii 5:​22, 23) Ni Nyɔŋmɔ jɛɔ miishɛɛ mli ekɛ mumɔ nɛɛ haa gbɔmɛi ni kɛ anɔkwayeli tao nɔ ni kɛ etaomɔ nii kpaa gbee lɛ.​—Luka 11:​9-13; Bɔfoi lɛ Asaji 5:⁠32.

Nakai nɔŋŋ Yehowa Odasefoi ekɛɛɛ akɛ amɛye emuu. Dabi, amɛyɛ naagbai tamɔ mɔ fɛɛ mɔ yɔɔ lɛ nɔŋŋ. Shi amɛyɛ gbɛtsɔɔmɔ kpakpa ni amɛkɛtsuɔ amɛnaagbai lɛ ahe nii​—Biblia lɛ. (Lala 119:105) Amɛbɔɔ mɔdɛŋ waa ni amɛkɛ emli shishitoo mlai lɛ atsu nii yɛ amɛshihilɛ mli, eyɛ mli akɛ amɛtɔ̃ɔ yɛ bei komɛi amli moŋ. (Romabii 3:23) Ona, anyɛɛɛ afamɔ gbɔmɔtsoŋ sui ni eka mɔ he waa lɛ ashishi oya nɔŋŋ. Shi kɛlɛ, yɛ Nyɔŋmɔ mumɔ lɛ yelikɛbuamɔ naa lɛ, gbɔmɛi ni hiɛ nyɛ̃ɛ su po baanyɛ aya amɛhiɛ yɛ amɛsui ni esaaa lɛ ahe jɔɔmɔ mli.

Shi kɛlɛ, nɔ kome ko ka shi faŋŋ: Yɛ béi, mligbalamɔ kɛ jeŋba shara ni anaa yɛ je lɛŋ ŋmɛnɛ lɛ najiaŋ lɛ, aana suɔmɔ, jwɛŋmɔŋ toiŋjɔlɛ kɛ ekomefeemɔ ni jeɔ kpo faŋŋ yɛ Yehowa Odasefoi ni yɔɔ jeŋ fɛɛ lɛ ateŋ lɛ mli ŋɔɔmɔ yɛ mumɔŋ paradeiso lɛ mli. Enɛ haa amɛtsɔɔ hiɛ amɛnaa toiŋjɔlɛ kɛ bɔ ni adesai baafee ekome amɛhi shi yɛ shikpɔŋ nɛɛ nɔ yɛ Paradeiso diɛŋtsɛ mli yɛ Yesu Kristo Afii Akpe Nɔyeli lɛ mli.​—Luka 23:⁠43.

Mɛni hewɔ okaseee babaoo lolo yɛ paradeiso he? Taomɔ ni ona nɔ hewɔ ni Yehowa Odasefoi naa toiŋjɔlɛ, mii ni shɛɔ nii ni ayɔɔ he, miishɛɛ kɛ ekomefeemɔ​—nibii ni ŋwanejee ko bɛ he akɛ okɛtoɔ paradeiso he oya lɛ mli ŋɔɔmɔ, kɛ akɛ amɛ to mɛi krokomɛi ahe lɛ. Kasemɔ bɔ ni bo hu​—obaanyɛ ona paradeiso ko ni tamɔ nɛkɛ mli ŋɔɔmɔ bianɛ!

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 7]

“Ni Yesu kɛɛ lɛ akɛ: Lɛlɛŋ; mikɛɛo ŋmɛnɛ akɛ: okɛ mi aaahi Paradeiso!” Luka 23:​43, NW.

[Akrabatsa ni yɔɔ baafa 5]

PARADEISO HE GBALƐI

Hebri Ŋmalɛi lɛ mli gbalɛi komɛi ni kɔɔ paradeiso he lɛ ena amɛmlibaa momo yɛ wɔgbii nɛɛ amli. Akɛ nɔkwɛmɔ nɔ lɛ, susumɔ gbalɛ ni yɔɔ Yesaia 35 lɛ he, nɔ ni gba akɛ ‘ŋa kpataa lɛ aaagba afoforo tamɔ fɔfɔi’ lɛ he. Gbalɛ nɛɛ ba mli anɔkwale yɛ gbɛ bibioo nɔ beni Yudafoi ni aŋɔ amɛ nom lɛ ku amɛsɛɛ kɛjɛ Babilon yɛ afi 537 D.Ŋ.B. lɛ. Akɛni ena miishɛɛ yɛ amɛsɛɛkuu kɛha ejamɔ lɛ he hewɔ lɛ, Nyɔŋmɔ ha amɛjaku shikpɔŋ, Yuda ni etsɔ amaŋfɔ lɛ frɔke shikome ekoŋŋ ni eba nii babaoo akɛ ebatsɔ paradeiso yɛ gbɛ bibioo nɔ.

Eyɛ faŋŋ akɛ gbalɛ ni yɔɔ Yesaia 35 lɛ yɛ mumɔŋ mlibaa hu. Te wɔfee tɛŋŋ wɔle lɛ? Nɔ kome ji akɛ yɛ kukuji 5 kɛ 6 lɛ, ewo shi akɛ abaatsa shwilafoi, toimulɔi, obubuafoi kɛ mumuii. Nɔ ko bɛ ni tsɔɔ akɛ atsa Yudafoi ni kuɔ amɛsɛɛ yɛ afi 537 D.Ŋ.B. lɛ diɛŋtsɛ kɛjɛ nɛkɛ helai nɛɛ amli. Eka shi faŋŋ akɛ esa akɛ anu enɛ shishi yɛ mumɔŋ gbɛ nɔ​—akɛ nɔkwɛmɔ nɔ lɛ, agbele amɛhiŋmɛii koni ena heyeli la ni yɔɔ amɛjaku shikpɔŋ nɔ lɛ. Nakai nɔŋŋ hu mumɔŋ paradeiso ko miifrɔke bianɛ yɛ Yehowa Nyɔŋmɔ jalɔi ateŋ, shi be nɛɛ mli lɛ yɛ jeŋ fɛɛ.

Yɛ wɔsɛɛ be ni ebɛŋkɛ kpaakpa lɛ mli beni Nyɔŋmɔ ekpata efɔŋfeemɔ fɛɛ hiɛ kɛjɛ wɔshikpɔŋ lɛ nɔ sɛɛ lɛ, “asafo babaoo” ko ni baaje mli kɛ gbohii ni atee amɛ shi lɛ baana gbɔmɔtsoŋ tsamɔ diɛŋtsɛ. Kristo Yesu baadamɔ ekpɔmɔ afɔleshaa lɛ nɔ ekɛ mɛi ni feɔ toiboo lɛ aba adesa emuuyeli mli ni amɛhi shikpɔŋ nɔ Paradeiso ni asaa ato lɛ nɔ kɛya naanɔ. No hewɔ lɛ etsɛŋ kwraa ni abaakpã nɔ ni atsi ta yɛ Yesaia 36 lɛ mli ni ekpele shikpɔŋ muu lɛ fɛɛ nɔ yɛ be mli ni atsakeɔ wɔshikpɔŋ kutruku nɛɛ afeɔ lɛ toiŋjɔlɛ abɔɔ ko, nɔ̃ mli ni adebɔɔ mli Paradeiso lɛ bafeɔ nɔ ni yɔɔ diɛŋtsɛ lɛ.​—Yesaia 25:​6-8; Kpojiemɔ 7:9; 21:​3, 4.