Yaa Nɔ Obɔ Kɔkɔ Yɛ Yehowa Nitsumɔ Ni Ekaaa Lɛ
“Yehowa aaate shi adamɔ shi tamɔ bɔ ni efee yɛ Perazim gɔŋ lɛ nɔ lɛ, ni eeegiri tamɔ bɔ ni efee yɛ Gibeon jɔɔ lɛŋ lɛ.”—YESAIA 28:21.
1, 2. Mɛɛ nitsumɔ ko ni efɔɔɔ kaa Yehowa tsu yɛ E-webii agbɛfaŋ yɛ David gbii lɛ amli?
NAAKPƐƐ nifeemɔ! Nitsumɔ ko ni efɔɔɔ kaa kwraa! No ji nɔ ni Yehowa fee yɛ ewebii lɛ ahewɔ yɛ blema bei amli yɛ afii ohai 11 D.Ŋ.B. lɛ mli tɔɔ. Ni nɛkɛ nifeemɔ ni yɔɔ naakpɛɛ nɛɛ feɔ nitsumɔ ko ni efɔɔɔ kaa kwraa ni etsɛŋ ni ebaatsu yɛ wɔsɛɛ be ni ka wɔhiɛ kpaakpa nɛɛ mli lɛ he mfoniri. Mɛni ji nakai blema nifeemɔ lɛ? Beni awo David maŋtsɛ yɛ Yerusalem lɛ sɛɛ etsɛɛɛ lɛ, Filistibii ni bɛŋkɛ amɛ nɔŋŋ lɛ batutua amɛ, ni enɛ je Yehowa nifeemɔ ni yɔɔ naakpɛɛ lɛ shishi. Klɛŋklɛŋ lɛ, Filistibii lɛ bɔi tutuamɔ kɛ nihaa yɛ Refaim jɔɔ kplanaa lɛ mli. David bi Yehowa nɔ ni efee, ni afa lɛ ni efa kɛyanina amɛ ni ekɛ amɛ awuu. Akɛni ebo Yehowa wiemɔ lɛ toi hewɔ lɛ, David ye Filistibii ata kpeteŋkpele lɛ nɔ kunim butuu yɛ Baal-perazim. Shi Filistibii lɛ ekpɛlɛɛɛ amɛnɔ kunim ni aye lɛ nɔ. Etsɛɛɛ kɛkɛ ni amɛku amɛsɛɛ amɛba koni amɛbakpata nii ahiɛ ni amɛha nibii babaoo ekoŋŋ yɛ Refaim jɔɔ kplanaa lɛ mli, ni David yabi gbɛtsɔɔmɔ kɛjɛ Yehowa ŋɔɔ shikome ekoŋŋ.
2 Yɛ enɛ mli lɛ akɛɛ lɛ ni ekɛ esraafoi lɛ ayaje Filistibii lɛ asɛɛ gbɛ. Yehowa kɛɛ lɛ akɛ: “Ni kɛ onu nyiɛmɔ gbɛɛmɔ yɛ baka tsei lɛ anɔ lɛ, kɛkɛ ni owo ohe nɔ; ejaakɛ no mli lɛ Yehowa eje kpo kɛnyiɛ ohiɛ ni eyaatswia Filistibii ata lɛ nii.” Ni nakai ji bɔ ni ebalɛ. David mɛ kɛyashi be mli ni Yehowa ha gbɛɛmɔ lɛ je kpo tamɔ nyiɛmɔ gbɛɛmɔ yɛ baka tsei lɛ anɔ—ekolɛ kɛtsɔ kɔɔyɔɔ ko ni naa wa ni eha etswa lɛ nɔ. Amrɔ nɔŋŋ kɛkɛ ni David kɛ etai lɛ tumɔ kɛjɛ hei ni amɛyateetee amɛhe yɛ lɛ ni amɛyatutua Filistibii ni amɛjwɛŋmɔ etee gbɛɛmɔ lɛ nɔ lɛ, ni amɛye amɛnɔ kunim ni amɛgbe amɛ jogbaŋŋ. Ni amɛbua jamɔ mli amagai ni Filistibii lɛ shi amɛshwie shi yɛ tawuu he lɛ fɛɛ naa yɛ he kome ni amɛkpata fɛɛ hiɛ.—2 Samuel 5:17-25; 1 Kronika 14:8-17.
3. Mɛni hewɔ naakpɛɛ nii ni Yehowa fee lɛ he hiaa Yudafoi ni hi shi yɛ Yesaia gbii lɛ amli lɛ, ni mɛni hewɔ esa akɛ Kristendom ni yɔɔ ŋmɛnɛ lɛ hu ana he miishɛɛ lɛ?
3 Nitsumɔ ko ni efɔɔɔ kaa, naakpɛɛ nifeemɔ ni Yehowa tsu eshi Filistibii lɛ kɛ agbɛnɛ yɛ emaŋtsɛ ni afɔ lɛ mu lɛ hewɔ ji enɛ. Nɛkɛ nifeemɔ ni sa kadimɔ nɛɛ he miihia waa ejaakɛ gbalɔ Yesaia bɔ kɔkɔ akɛ Yehowa baafee naakpɛɛ nɔ ko kɛ hewalɛ babaoo tamɔ nakai nɔŋŋ eshi mumɔŋ daatɔlɔi ni yɔɔ Yuda lɛ. No hewɔ lɛ, ehe miihia ni jamɔ mli hiɛnyiɛlɔi ni yeee anɔkwa ni hi shi yɛ Yesaia gbii lɛ amli lɛ akadi enɛ jogbaŋŋ. Esa akɛ Kristendom ni yɔɔ ŋmɛnɛ lɛ hu akadi enɛ jogbaŋŋ ejaakɛ nɔ ni ba Yuda nɔ lɛ feɔ nɔ ni baaba Kristendom nɔ yɛ naagbee lɛ he mfoniri.
“Saa lɛ Kɛɛɛ”
4, 5. (a) Mɛɛ gbɛ nɔ Yesaia fee shihilɛ ni jamɔ mli hiɛnyiɛlɔi ni hi shi yɛ egbii amli lɛ yɔɔ mli ni hejɔlɛ ko kwraa bɛ mli lɛ he mfoniri ni mli ka shi faŋŋ yɛ? (b) Mɛni kɛ shihilɛ ni hejɔlɛ bɛ mli ni Kristendom yɔɔ mli ŋmɛnɛ lɛ ba?
4 Klɛŋklɛŋ lɛ, Yesaia kpa anɔkwale ni eji akɛ kpaŋmɔi ni nakai blema mumɔŋ daatɔlɔi lɛ kɛ amɛhiɛ efɔ nɔ lɛ ji lakamɔ, amale lɛ he mama. Kɛkɛ ni efee shihilɛ ni mɛi ni amɛhiɛ ka nakai amale lɛ nɔ lɛ yɔɔ mli ni hejɔlɛ ko kwraa bɛ mli lɛ he mfoniri ni mli ka shi faŋŋ. Ekɛɛ: “Shi saa lɛ kɛɛɛ bɔ ni mɔ aaanyɛ emli akpa yɛ nɔ, ni nɔhaanɔ lɛ hu elɛɛɛ bɔ ni mɔ aaanyɛ akota ehe awo mli.” (Yesaia 28:20) Mɔ fɛɛ mɔ ni kpaa emli yɛ saa ni kɛɛɛ nɔ lɛ naa akɛ enaji jeɔ kpo kɛbaa fɛ̃i lɛ mli. Shi yɛ gbɛ kroko nɔ lɛ, kɛji edɔrɔ enakutsei amli bɔni afee ni ekɛ saa lɛ kɛlɛ aye egbɔ lɛ, no hu kɛkɛ lɛ nɔhaanɔ lɛ elɛɛɛ ni no hewɔ lɛ egbɔmɔtso lɛ fa babaoo jeɔ kpo. Bɔ fɛɛ bɔ ni efeɔ lɛ, egbɔmɔtso lɛ fa ko kɛ̃ jeɔ kpo kɛbaa fɛ̃i lɛ mli.
5 Kɛ aawie yɛ mfoniri-feemɔ mli lɛ, bɔ ni mɛi ni hi shi yɛ Yesaia gbii lɛ amli ni amɛkɛ amɛhiɛ fɔ abobaahe ni ji amale nɔ lɛ ashihilɛ ba lɛ nɛ. Ni nakai nɔŋŋ eji shihilɛ ni hejɔlɛ bɛ mli kɛha mɛi ni kɛ amɛhiɛ fɔɔ Kristendom abobaahe ni ji amale nɔ lɛ hu ŋmɛnɛ. Kɛ wɔɔbaakɛɛ lɛ, amɛhe eje kpo kɛba fɛ̃i lɛ mli. Jeee be ni akɛtaoɔ miishɛjemɔ yɛ je lɛŋ gbɛjianɔtoi kɛha toiŋjɔlɛ kɛ shweshweeshwe shihilɛ lɛ amli nɛ. Kpaŋmɔi ni Kristendom kɛ maŋkwramɔŋ nɔyelɔi lɛ efee lɛ haŋ lɛ miishɛjemɔ ko ni ŋɔɔ, yɛ Nyɔŋmɔ kojomɔ nifeemɔ ni baa lɛ ahe susuma lɛ shishi.
Yehowa Naakpɛɛ Nifeemɔ Lɛ
6. Mɛɛ gbɛ nɔ Yehowa baafee nii eshi Yuda yɛ, ni mɛɛ gbɛ nɔ ebaate shi ewo Kristendom yɛ?
6 Akɛni agbɛnɛ etsɔɔ shihilɛ ni hejɔlɛ ko kwraa bɛ mli ni Yerusalem ni yeee anɔkwa ni hi shi yɛ egbii lɛ amli lɛ yɔɔ mli—kɛ ŋmɛnɛŋmɛnɛ beaŋ Kristendom ni yeee anɔkwale lɛ hu nɔ—lɛ hewɔ lɛ, Yesaia tee nɔ ni ekɛɛ: “Ejaakɛ Yehowa aaate shi adamɔ shi tamɔ bɔ ni efee yɛ Perazim gɔŋ lɛ nɔ lɛ, ni eeegiri tamɔ bɔ ni efee yɛ Gibeon jɔɔ lɛŋ lɛ, koni etsu enii ni ji naakpɛɛ nitsumɔ lɛ, ni efee nii ni ji hejɔmɔ nifeemɔ lɛ.” (Yesaia 28:21) Hɛɛ, Yesaia bɔ kɔkɔ akɛ, etsɛŋ ni Yehowa baate shi adamɔ shi tamɔ bɔ ni efee yɛ Baal-Perazim lɛ. Shi amrɔ nɛɛ ebaatsu nii eshi lɛ diɛŋtsɛ ewebii ni bɛ hemɔkɛyeli lɛ, ni ebaafee nakai tamɔ nu afua ni anyɛɛɛ naa atsi ni miitsɔ gbogbo ni akɛtsi naa ni miikumɔ kɛmiishwie shi lɛ mli. Abaaha kpaŋmɔ ni Yerusalem kɛ gbele efee lɛ afee kpaŋmɔ folo ni sɛɛnamɔ ko kwraa bɛ he. Yɛ nakai gbɛ nɔ nɔŋŋ lɛ, Yehowa baatsu nii eshi Kristendom yɛ wɔsɛɛ be ni ka wɔhiɛ kpaakpa nɛɛ mli, ni ebaana akɛ sɛɛnamɔ ko kwraa bɛ edaatɔlɔi agbeekpamɔ ni ekɛ je nɛɛ ba lɛ eko kwraa he. Abaajwara egbɛjianɔtoo ni mli lɛɛ waa lɛ kwraa ni abaagbɛ mɛi ni fiɔ esɛɛ lɛ fɛɛ ashwa. Akɛ la baasha emale nyɔŋmɔi lɛ fɛɛ butuu.
7. Mɛni hewɔ awieɔ Yehowa yiŋtoi yɛ Yuda he lɛ ahe akɛ “naakpɛɛ nii” kɛ “nɔ ni efɔɔɔ kaa” lɛ?
7 Mɛni hewɔ Yesaia tsɛɔ nitsumɔ ni Yehowa baatsu ashi Yerusalem lɛ akɛ naakpɛɛ nitsumɔ kɛ nitsumɔ ni efɔɔɔ kaa lɛ? Ojogbaŋŋ, Yerusalem ji Yehowa jamɔ lɛ fɛɛ yitso kɛ maŋtsɛ ni Yehowa efɔ lɛ mu lɛ maŋtiase. (Lala 132:11-18) Enɛ hewɔ lɛ, akpatako ehiɛ da. Akɛ la eshako esɔlemɔ tsu lɛ da. Abutuko David odehei ashia, ni ato shishi be ko yɛ Yerusalem lɛ hu da. Asusuuu nibii ni tamɔ nɛkɛ he akɛ ebaanyɛ eba mli. Eji nɔ ko ni efɔɔɔ kaa kwraa akɛ Yehowa baasusu he akɛ ebaaŋmɛ gbɛ ni nibii ni tamɔ nɛkɛ aba.
8. Mɛɛ kɔkɔbɔɔ Yehowa kɛba yɛ enifeemɔ ni efɔɔɔ kaa ni baa lɛ he?
8 Shi Yehowa kɛ kɔkɔbɔɔ ni sa ha kɛtsɔ egbalɔi lɛ anɔ akɛ nibii ni haa mɔ he jɔ̃ɔ lɛ baaba ni ebaaho eya. (Mika 3:9-12) Akɛ nɔkwɛmɔ nɔ lɛ, gbalɔ Habakuk, ni hi shi yɛ afii ohai kpawo D.Ŋ.B. lɛ kɛɛ: “Nyɛkwɛa jeŋmaji lɛ ateŋ, ni nyɛnaa, ni nyɛhe ajɔ̃a nyɛhe jogbaŋŋ! Ejaakɛ miitsu nitsumɔ ko yɛ nyɛyinɔ nɛɛ, ni kɛ agba nyɛ lɛ, nyɛheŋ nyɛyeŋ! Ejaakɛ naa, miitee Kaldeabii ashi, jeŋmaŋ ko ni yi wa ni he yɔɔ oya hu, ni fãa nyiɛmɔ kɛkpaa shikpɔŋ lɛ lɛɛmɔ nɔ, bɔni afee ni amɛyaŋɔ shihilɛ hei ni jeee amɛnɔ lɛ. Amɛhe yɛ ŋmiŋmi kɛ gbeyei.”—Habakuk 1:5-7.
9. Mɛɛ gbɛ nɔ Yehowa ha ekɔkɔbɔɔ ni ekɛha yɛ Yerusalem he lɛ ba mli yɛ?
9 Yɛ afi 607 D.Ŋ.B. lɛ, Yehowa ha ekɔkɔbɔɔ lɛ ba mli. Akɛni eŋmɛ gbɛ ni Babilon asraafoi lɛ batutua Yerusalem hewɔ lɛ, eŋmɛ amɛ gbɛ ni amɛkpata maŋ lɛ kɛ sɔlemɔ tsu lɛ fɛɛ hiɛ. (Yaafo 2:7-9) Kɛfata he lɛ, eŋmɛ gbɛ ni akpata Yerusalem hiɛ nɔ ni ji shii enyɔ nɔ. Mɛni hewɔ? Ojogbaŋŋ, beni amɛtee nomŋɔɔ mli afii 70 sɛɛ lɛ, Yudafoi ni etsake amɛtsui lɛ ku amɛsɛɛ kɛba amɛshikpɔŋ nɔ, ni yɛ naagbee lɛ amɛma sɔlemɔ tsu kroko yɛ Yerusalem. Shi kɛlɛ, Yudafoi lɛ kpalaŋ kɛjɛ Yehowa he ekoŋŋ. Yɛ Ŋ.B. klɛŋklɛŋ afii oha lɛ mli lɛ, Paulo tsɛ Habakuk wiemɔi lɛ ayisɛɛ eha Yudafoi ni hi shi yɛ ebeaŋ lɛ, ni kɛtsɔ no nɔ lɛ ebɔ amɛ kɔkɔ akɛ gbalɛ lɛ baana emlibaa kroko yɛ wɔsɛɛ be mli. (Bɔfoi lɛ Asaji 13:40, 41) Yesu diɛŋtsɛ ebɔ kɔkɔ yɛ gbɛ pɔtɛɛ nɔ akɛ abaakpata Yerusalem kɛ esɔlemɔ tsu lɛ hiɛ yɛ hemɔkɛyeli ni Yudafoi lɛ bɛ lɛ hewɔ. ( Mateo 23:37–24:2) Ani nakai klɛŋklɛŋ afii oha lɛ mli Yudafoi lɛ fee toiboo? Dabi. Amɛkpoo Yehowa kɔkɔbɔɔ lɛ kwraa, tamɔ amɛblematsɛmɛi lɛ fee lɛ pɛpɛɛpɛ. No hewɔ lɛ, Yehowa saa eti enaakpɛɛ enitsumɔ lɛ mli ekoŋŋ. Akpata Yerusalem kɛ esɔlemɔ tsu lɛ hiɛ yɛ afi 70 Ŋ.B. kɛtsɔ Roma asraafoi lɛ anɔ.
10. Mɛɛ gbɛ nɔ Yehowa baafee nii eshi Kristendom yɛ wɔsɛɛ be fioo ni ka wɔhiɛ lɛ mli yɛ?
10 No hewɔ lɛ, mɛni hewɔ esa akɛ mɔ ko asusu akɛ Yehowa efeŋ nɔ ko ni tamɔ nakai nɔŋŋ yɛ wɔ diɛŋtsɛ wɔbe nɛɛ mli? Anɔkwale lɛ ji, eyɛ mli akɛ eji nɔ ko ni yɔɔ naakpɛɛ kɛ nɔ ni efɔɔɔ kaa kɛha mɛi ni jeɔ he ŋwane lɛ moŋ, shi ebaaha eyiŋtoi lɛ aba mli. Ni yɛ enɛ mli lɛ, mɔ nɔ ni ebaatsu nii nɛɛ yɛ ji Kristendom, ni kɛɔ akɛ ejaa Nyɔŋmɔ, taakɛ blema Yuda ji lɛ nɔŋŋ, shi efite kwraa bɔ ni ehiii he nɔ ko feemɔ lɛ. Kɛtsɔ e-David Kpeteŋkpele, Yesu Kristo nɔ lɛ, Yehowa baate shi edamɔ shi yɛ Kristendom “Filistibii” lɛ anɔ yɛ ŋmɛlɛtswaa ni amɛkpaaa gbɛ kwraa nɔ. Ebaatsu enitsumɔ ni efɔɔɔ kaa lɛ aahu kɛyashi eeebɛɛ Kristendom jamɔ gbɛjianɔtoo lɛ he naagbee nibii fɛɛ ni baashwɛ lɛ kɛya kwraa.—Mateo 13:36-43; 2 Tesalonikabii 1:6-10.
Yehowa Nifeemɔ lɛ he Kɔkɔbɔɔ
11, 12. Mɛɛ gbɛ nɔ Yehowa Odasefoi ebɔ kɔkɔ yɛ Yehowa kojomɔi ni baa lɛ ahe yɛ?
11 Yehowa Odasefoi kɛ afii babaoo ebɔ nɛkɛ kojomɔ nitsumɔ ni baa ni Yehowa baatsu nɛɛ he kɔkɔ. Amɛgbala jwɛŋmɔ kɛtee nɔ akɛ Yerusalem kɛ esɔlemɔ tsu lɛ hiɛkpatamɔ ni ba yɛ afi 607 D.Ŋ.B. kɛ agbɛnɛ hu yɛ afi 70 Ŋ.B. lɛ ji gbalɛ mli kɔkɔbɔi yɛ nɔ ni baaba Kristendom nɔ lɛ he. Ni kɛfata he lɛ, amɛfee lɛ faŋŋ akɛ, yɛ Kristendom hemɔkɛyeli kwamɔ lɛ hewɔ lɛ, ebatsɔ jeŋ apasa jamɔ maŋtsɛyeli, ni ji Babilon Kpeteŋkpele lɛ fa. Yɛ enɛ hewɔ lɛ, Nyɔŋmɔ kojomɔi ni ekɛbaaba Babilon Kpeteŋkpele lɛ nɔ lɛ baaba Kristendom nɔ titri, ejaakɛ lɛ ji nakai Satan kuu ni ebua naa lɛ fɛɛ mli mɔ ni eye fɔ fe fɛɛ.—Kpojiemɔ 19:1-3.
12 Yehowa Odasefoi egbala jwɛŋmɔ kɛtee gbalɛ mli kɔkɔbɔɔ ni Biblia lɛ kɛhaa akɛ yɛ Yehowa diɛŋtsɛ be ni sa mli lɛ, Babilon Kpeteŋkpele lɛ maŋkwramɔŋ nanemɛi lɛ baate shi awo lɛ lɛ nɔ. Yɛ be mli ni ekɛ kooloo ni tsuɔ tamɔ muneele lɛ akoloŋtoi nyɔŋma lɛ feɔ mɛnɛɛmɛi ahe mfoniri lɛ, Kpojiemɔ wolo lɛ bɔɔ kɔkɔ akɛ: “Ni akoloŋtoi nyɔŋma ni ona lɛ, kɛ kooloo lɛ, amɛaanyɛ ajwamaŋ lɛ, [Babilon Kpeteŋkpele lɛ] ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaasha lɛ.” (Kpojiemɔ 17:16) Akɛ la baasha Kristendom ni sumɔɔ Nyɔŋmɔ jamɔ lɛ, ni abaakpata ekɛ apasa jamɔi krokomɛi ni eshwɛ lɛ fɛɛ hiɛ. Enɛ baafee Yehowa naakpɛɛ nifeemɔ, nitsumɔ ni efɔɔɔ kaa ni ebaatsu yɛ wɔgbii nɛɛ amli lɛ.
13. Mɛɛ gbɛ nɔ bɔ ni mɛi hereɔ Yehowa kɔkɔbɔɔ wiemɔi lɛ anɔ ŋmɛnɛ lɛ tamɔ nɔ ni Yesaia kɛkpe lɛ nɔŋŋ yɛ?
13 Kɛ Yehowa Odasefoi kɛ nɛkɛ amanehulu ni baa nɛɛ he kɔkɔbɔɔ lɛ miiha lɛ, efɔɔ kaa akɛ amɛkɛ hefɛoyeli ŋmɔlɔ kpeɔ. Efeɔ gbɔmɛi ahiɛ yaa, yɛ nɔ gbɔmɛi ni amɛsusuɔ akɛ amɛji ni no hewɔ amɛwieɔ nibii ni tamɔ nakai lɛ he. Kristendom efee tamɔ mɔ ko ni damɔ shi shiŋŋ, ni ato shishi jogbaŋŋ diɛŋtsɛ. Ni, mɛi komɛi po nuɔ he akɛ eshihilɛ miihi kɛmiiya hiɛ. Ni yɛ nyɛsɛɛ be fioo nɛɛ mli lɛ, nɔyelii ni tsutsu ko lɛ amɛnyɛɔ enɔ lɛ eha lɛ heyeli babaoo ni ekɛfee nɔ ni esumɔɔ. Shi kɛlɛ, yɛ anɔkwale mli lɛ, esa akɛ Kristendom abo Yesaia ŋaawoo lɛ toi: “No hewɔ lɛ nyɛkaŋɔfea fɛoyeli dɔŋŋ, koni akamia nyɛkpaai lɛ amli; ejaakɛ minu hiɛkpatamɔ kɛ nɔ ni ama nɔ mi ko he kɛjɛ Nuŋtsɔ Yehowa Zebaot ŋɔɔ, ni ebaaba shikpɔŋ muu lɛ fɛɛ nɔ.”—Yesaia 28:22; 2 Petro 3:3, 4.
14. Mɛɛ gbɛ nɔ abaaha Kristendom kpaai lɛ amli awa ni abaamia mli waa yɛ?
14 Yɛ hei babaoo lɛ, Kristendom baaya nɔ ate shi awo Maŋtsɛ lɛ kɛ e-Maŋtsɛyeli lɛ. (2 Tesalonikabii 2:3, 4, 8) Shi kɛlɛ, yɛ nakai beaŋ nɔŋŋ lɛ, abaaha ekpaai lɛ mli awa ni abaamia mli waa. Yɛ wiemɔ kroko mli lɛ, ebaama ehiɛkpatamɔ lɛ nɔ mi waa fe tsutsu lɛ po. Yehowa gbaŋ afa kɛjɛŋ eyiŋ ni ekpɛ akɛ ebaaha akpata Kristendom hiɛ lɛ he, tamɔ bɔ ni egbaaa afa kɛjɛɛɛ eyiŋ ni ekpɛ akɛ ebaaŋmɛ gbɛ ni akpata Yerusalem kɛ esɔlemɔ tsu lɛ hiɛ yɛ afi 607 D.Ŋ.B. lɛ he lɛ pɛpɛɛpɛ.
“Nyɛjea Emli”
15. Mɛɛ gbɛ ni aaatsɔ nɔ aje mli agbele kɛha mɛi ni yɔɔ jalɛ tsuii lɛ?
15 Mɛɛ gbɛ nɔ mɔ ko aaatsɔ aje nɔ ni baaba Kristendom nɔ nɛɛ mli? Mra mli yɛ Israel gbii amli tɔɔ lɛ, Yehowa tsu egbalɔi anɔkwafoi lɛ ni amɛha mɛi ni yɔɔ tsui ni ja lɛ aku amɛsɛɛ kɛba jamɔ krɔŋŋ lɛ he ekoŋŋ. Ŋmɛnɛ, eha e-Dasefoi, ni amrɔ nɛɛ amɛyibɔ miishɛ akpekpei abɔ lɛ amli lɛ ete shi, kɛha yiŋtoo ni tamɔ nakai nɔŋŋ he nitsumɔ. Amɛkɛ ekaa kpaa mumɔŋ gbele shihilɛ ni Kristendom yɔɔ mli lɛ he mama. Yɛ nakai feemɔ mli lɛ, amɛkɛ anɔkwayeli tiɔ sane jajemɔi ni tamɔ haomɔi ni ŋwɛibɔfoi atɛtrɛmaŋtɛrɛ kpamɔi ni yɔɔ Kpojiemɔ yitsei 8 kɛ 9 lɛ kɛbaa lɛ amli. Ni kɛfata he lɛ, amɛkɛ ekaa eshiɛ hewalɛwoo wiemɔ ni aŋma yɛ Kpojiemɔ 18:4 lɛ: “Nyɛjea emli, mimaŋ, . . . ni nyɛkana ehaomɔi lɛ eko.” Mɔ ni he ni nakai wiemɔ “emli” lɛ kɔɔ ji Babilon Kpeteŋkpele lɛ, jeŋ apasa jamɔ maŋtsɛyeli, ni emli klɛŋklɛŋ mɔ kɛ mɔ ni ji oti fe fɛɛ ji Kristendom.
16. Mɛɛ gbɛ nɔ gbɔmɛi akpekpei abɔ ejo foi kɛjɛ apasa jamɔ mli yɛ?
16 Kɛjɛ 1919 kɛbaa, titri lɛ kɛjɛ 1922 lɛ, heshibalɔi akuu ni amɛyifalɛ miiya hiɛ ehere nakai hewalɛwoo wiemɔ lɛ nɔ, ni amɛshi Babilon Kpeteŋkpele lɛ. Klɛŋklɛŋ lɛ, akpei abɔ, no sɛɛ lɛ akpei ohai abɔ, ni amrɔ nɛɛ akpekpei abɔ etsi amɛhe kɛjɛ apasa jamɔ he, titri lɛ Kristendom, ni amɛje kpo kɛba jamɔ krɔŋŋ lɛ mli. (Yesaia 2:2-4) Amɛle akɛ shimɔ ni amɛaashi Babilon Kpeteŋkpele lɛ pɛ nɔ amɛaatsɔ ni amɛkana ehaomɔi lɛ eko, beni ebaaba enaagbee kɛ ehiɛkpatamɔ yɛ be mli ni be baashɛ kɛha Yehowa nitsumɔ ni efɔɔɔ kaa lɛ he nitsumɔ lɛ.
17, 18. Mɛɛ gbɛ nɔ Yehowa ebatsɔ hewulamɔ akekre kɛ akekre fɛfɛo eha ewebii lɛ yɛ?
17 Gbalɔ Yesaia tsɔɔ miishɛɛ shihilɛ ni mɛi ni halaa akɛ amɛaakɔ shidaamɔ yɛ jamɔ krɔŋŋ lɛ gbɛfaŋ lɛ yɔɔ mli lɛ mli faŋŋ. Ekɛɛ: “Nakai gbi lɛ nɔ lɛ Yehowa Zebaot aaatsɔ akekre fɛfɛo kɛ anunyam fai eha emaŋ lɛŋ mɛi ni eshwɛ lɛ, kɛ kojomɔ mumɔ hu ha mɛi ni taa shi kojoɔ lɛ, kɛ hewalɛ hu ha mɛi ni shwieɔ ta kɛyaa agbo naa lɛ.”—Yesaia 28:5, 6.
18 Akɛni amɛyeɔ anɔkwale lɛ anɔkwa hewɔ lɛ, Yehowa ji anunyam akekre ni fiteee kɛha tsulɔ anɔkwafo kɛ nilelɔ kuu lɛ mlibii lɛ. Enɛ ebafee anɔkwale titri lɛ kɛjɛ 1926 kɛbaa. Yɛ nakai afi lɛ mli lɛ, The Watch Tower ni je kpo yɛ January 1 lɛ ma bɔ ni ehe hiaa waa ni awo Yehowa gbɛi lɛ hiɛ nyam lɛ nɔ mi yɛ emli sane ko ni kanyaa mɔ ni yitso ji ‘Namɔ Baawo Yehowa Hiɛ Nyam?’ lɛ mli. Kɛjɛ nakai be lɛ mli kɛbaa nɛɛ, Kristofoi ni afɔ amɛ mu lɛ eshiɛ nakai gbɛi lɛ amɛtsɔɔ yɛ je lɛŋ fɛɛ yɛ gbɛ ni amɛfeko nakai da nɔ. Yɛ 1931 lɛ, abale amɛ jogbaŋŋ akɛ amɛbɛŋkɛ Yehowa he kpaakpa kɛtsɔ gbɛi Yehowa Odasefoi ni amɛkpɛlɛ nɔ lɛ nɔ. Kɛfata he lɛ, asafo babaoo ni ji tooi krokomɛi lɛ hu eje Kristendom kɛ Babilon Kpeteŋkpele lɛ fa ni eshwɛ lɛ fɛɛ mli amɛba. Mɛnɛɛmɛi hu ekpɛlɛ Nyɔŋmɔ gbɛi lɛ nɔ. Mɛni ejɛ mli eba? Yehowa diɛŋtsɛ ebatsɔ hewulamɔ akekre kɛ akekre fɛfɛo kɛha gbɔmɛi ni amɛyifalɛ fe akpekpei ejwɛ yɛ maji kɛ ŋshɔkpɔi aaashɛ 212 anɔ—shi jeee kɛha jeŋmaŋ ko ni yeɔ ehe. Mɛɛ hiɛnyamwoo mɛnɛɛmɛi ena nɛkɛ akɛ akɛ Nyɔŋmɔ hiɛkalɔ kɛ anɔkwafo koome lɛ pɛ gbɛi aaatsɛ amɛ.—Kpojiemɔ 7:3, 4, 9, 10; 15:4.
“Ni Yehowa Mumɔ lɛ Aaahi Enɔ”
19. Namɔ ji mɔ ni ta kojomɔ sɛi nɔ lɛ, ni mɛɛ gbɛ nɔ Yehowa ebatsɔ kojomɔ mumɔ eha lɛ yɛ?
19 Yehowa etsɔ “kojomɔ mumɔ” kɛha Yesu, “mɔ ni taa shi kojoɔ lɛ.” Beni Yesu yɔɔ shikpɔŋ nɔ lɛ, ekpoo akɛ ehaŋ mumɔ ni tɔɔ mɔ daa ni ji je lɛŋ kpaŋmɔ lɛ aye enɔ kunim. Ŋmɛnɛ, akɛ Maŋtsɛ ni Yehowa ewo lɛ lɛ, mumɔ krɔŋkrɔŋ eyi lɛ obɔ, ni ekudɔɔ lɛ ni efeɔ yiŋkpɛi ni ŋmɛɔ pɛpɛɛpɛ ni mli ka shi faŋŋ hu. Gbalɛ nɛɛ eba mli yɛ Yesu nɔ akɛ: “Ni Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ.” (Yesaia 11:2) Lɛlɛŋ, Yehowa baatsɔ Yesu nɔ ‘eŋɔ kojomɔ efee susumɔ kpaa, ni ekɛ jalɛ aaafee kulomulo.’ (Yesaia 28:17) Yɛ be mli ni hiɛkpatamɔ bafeɔ ehenyɛlɔi ni etɔrɔ daa yɛ mumɔŋ lɛ butuu lɛ, abaatsu jalɛsaneyeli he nii aha Yehowa gbɛi krɔŋkrɔŋ lɛ kɛ ejeŋ muu fɛɛ maŋtsɛyeli lɛ hu.
20, 21. Mɛɛ gbɛ nɔ Yesaia 28:1-22 mli wiemɔi lɛ saa ohe yɛ?
20 No hewɔ lɛ mɛɛ shishinumɔ ni yɔɔ nyam nɛkɛ gbalɛ ni yɔɔ Yesaia yitso 28 nɛɛ yɔɔ kɛha wɔ ŋmɛnɛ nɛkɛ! Kɛ wɔtsi wɔhe kwraa kɛjɛ Kristendom mumɔŋ daatɔlɔi lɛ ahe ni wɔkɛ wɔhe kpɛtɛ jamɔ krɔŋŋ lɛ he lɛ, no lɛ wɔbaana yibaamɔ yɛ be mli ni Yehowa feɔ enaakpɛɛ nii ni etsuɔ enitsumɔ ni efɔɔɔ kaa lɛ hu lɛ. Kwɛ bɔ ni wɔmli filiɔ wɔ akɛ wɔɔle enɛ! Ni kwɛ bɔ ni wɔnaa miishɛɛ waa akɛ wɔɔsusu he akɛ kɛji nɛkɛ nibii nɛɛ fɛɛ na ba mli lɛ, no baanyɛ mɔ fɛɛ mɔ nɔ ni ena ele akɛ Yehowa Zebaot etsu nii yɛ ewebii anɔkwafoi lɛ ahewɔ, kɛ agbɛnɛ kɛha lɛ diɛŋtsɛ hu ebembuu kɛtsɔ Yesu Kristo nɔ!—Lala 83:18, 19.
21 No hewɔ lɛ eba akɛ anɔkwa Kristofoi fɛɛ aaaya nɔ kɛ ekaa ni amɛbɔ Yehowa naakpɛɛ nifeemɔ lɛ he kɔkɔ. Ha amɛya nɔ yɛ enitsumɔ ni efɔɔɔ kaa lɛ jajemɔ mli. Yɛ be mli ni amɛfeɔ nakai lɛ, ha amɛjaje amɛtsɔɔ mɔ fɛɛ mɔ akɛ wɔyɛ hiɛnɔkamɔ ni hosooo yɛ Nyɔŋmɔ Maŋtsɛyeli ni yɔɔ e-Maŋtsɛ ni ewo lɛ lɛ shishi lɛ mli. Eba akɛ ekaa ni amɛyɔɔ, kɛ amɛfaishitswaa, kɛ amɛ anɔkwayeli lɛ fɛɛ aaaye abua kɛha Yehowa, wɔ-Nyɔŋmɔ ofe lɛ naanɔ yijiemɔ.—Lala 146:1, 2, 10.
Ani Obaanyɛ Okai?
◻ Mɛni hewɔ ni hejɔlɛ bɛ shihilɛ ni Kristendom yɔɔ mli lɛ mli lɛ?
◻ Mɛni Yehowa kpɛ eyiŋ yɛ he yɛ Yerusalem he, ni mɛni hewɔ enɛ yɔɔ “naakpɛɛ” kɛ “nɔ ni efɔɔɔ kaa” lɛ?
◻ Mɛɛ kɔkɔbɔɔ Yehowa Odasefoi ejaje amɛtsɔɔ ni kɔɔ Kristendom he, ni te gbɔmɛi lɛ efee amɛnii yɛ he amɛha tɛŋŋ?
◻ Mɛɛ gbɛ nɔ gbɔmɛi lɛ aaatsɔ amɛje nɔ ni baaba Kristendom nɔ mli yɛ?
[Mfoniri ni yɔɔ baafa 24]
Yehowa baati enaakpɛɛ nifeemɔ lɛ mli ekoŋŋ, ni yɛ emli lɛ, eeefee nii eshi Kristendom