Sanebimɔi ni Jɛ Kanelɔi Adɛŋ

Ani eja akɛ aaakɛɛ akɛ Yehowa mɔbɔnalɛ lɛ tsĩɔ ejalɛsaneyeli lɛ naa?

Eyɛ mli akɛ akɛ nɛkɛ wiemɔ nɛɛ etsu nii moŋ, shi ehi jogbaŋŋ akɛ aaatsi he kɛaajɛ he ejaakɛ etamɔ nɔ ni eetsɔɔ akɛ Yehowa mɔbɔnalɛ lɛ baa ejalɛsaneyeli lɛ shi loo etsĩɔ naa, tamɔ nɔ ni emɔbɔnalɛ lɛ nɔ kwɔ fe ejalɛsaneyeli lɛ naawalɛ lɛ. Enɛ ejaaa.

Abaanyɛ atsɔɔ Hebri wiemɔ kɛha “jalɛ” lɛ hu shishi akɛ “kojomɔ.” Jalɛ kɛ jalɛ nifeemɔ yɛ tsakpaa ni bɛŋkɛ kpaakpa. Shi kɛlɛ, bei pii lɛ jalɛ biɔ ni akɛ mla atsu nii. Shi bei pii lɛ jalɛ nifeemɔ biii nakai feemɔ. Eji anɔkwale akɛ, Yehowa jalɛsaneyeli lɛ baanyɛ ekɛ toigbalamɔ ni sa aba, shi ebaanyɛ ekɛ yiwalaheremɔ abaha mɛi ni sa lɛ hu. (1 Mose 18:20-32; Yesaia 56:1; Maleaki 3:20) No hewɔ lɛ, esaaa akɛ abuɔ Yehowa jalɛsaneyeli lɛ akɛ eyɛ keketee tsɔ loo ehe miihia ni ajɔɔ he.

Hebri wiemɔ kɛha “mɔbɔnalɛ” lɛ hu baanyɛ atsɔɔ henɔ ni ayeɔ yɛ kojomɔ mli. Ebaanyɛ etsɔɔ musuŋtsɔlɛ babaoo hu kpojiemɔ, nɔ ni kɛ heyeli bahaa mɛi ni ehia amɛ lɛ.—5 Mose 10:18; Luka 10:29-37.

Yehowa ji Nyɔŋmɔ ni yeɔ jalɛ sane ni enaa mɔbɔ fɛɛ. (2 Mose 34:6, 7; 5 Mose 32:4; Lala 145:9) Ejalɛsaneyeli kɛ emɔbɔnalɛ lɛ fɛɛ yeɔ emuu ni amɛtsuɔ nii yɛ gbeekpãmɔ mli. (Lala 116:5; Hoshea 2:21) Nakai sui enyɔ lɛ fɛɛ ŋmɛɔ pɛpɛɛpɛ loo amɛyeɔ amɛbuaa amɛteŋ mɔ fɛɛ mɔ. No hewɔ lɛ, kɛ́ wɔkɛɛ akɛ Yehowa mɔbɔnalɛ lɛ tsĩɔ ejalɛsaneyeli lɛ naa lɛ, no lɛ esa akɛ wɔkɛɛ hu akɛ ejalɛsaneyeli lɛ tsĩɔ emɔbɔnalɛ lɛ naa.

Yesaia gba akɛ: “Yehowa miimɛ̃, koni eduro nyɛ, ni no hewɔ lɛ ewó ehe nɔ, koni ena nyɛ mɔbɔ; ejaakɛ Yehowa lɛ, kojomɔ [“jalɛ,” The New English Bible] Nyɔŋmɔ ni.” (Yesaia 30:18) Yesaia miitsɔɔ yɛ biɛ akɛ Yehowa jalɛsaneyeli lɛ kanyaa mɔbɔnalɛ nifeemɔ, yɛ nɔ najiaŋ ni emɔbɔnalɛ lɛ aaajɔɔ ejalɛsaneyeli lɛ he loo eeetsĩ naa. Yehowa jieɔ mɔbɔnalɛ kpo ejaakɛ eja ni agbɛnɛ hu ejaakɛ eyɛ suɔmɔ.

Eji anɔkwale akɛ, Biblia ŋmalɔ Yakobo ŋma akɛ: “Shwãa mɔbɔnalɛ shwãa eshiɔ kojomɔ.” (Yakobo 2:13b) Shi kɛlɛ, jeee Yehowa he Yakobo wieɔ lɛ, shi moŋ Kristofoi ni jieɔ mɔbɔnalɛ kpo—ákɛ nɔkwɛmɔnɔ lɛ, yɛ nɔ̃nalɔ kɛ ohiafo he lɛ. (Yakobo 1:27; 2:1-9) Kɛ́ akɛ mɛi ni nii yɔɔ mɔbɔ nɛɛ ba koni akojo amɛ lɛ, Yehowa yɔseɔ amɛnifeemɔ lɛ ni ejɛɔ mɔbɔnalɛ mli ekɛ amɛhe keɔ amɛ kɛtsɔ e-Bi lɛ afɔleshaa lɛ nɔ. No hewɔ lɛ, amɛmɔbɔnalɛ nifeemɔ lɛ yeɔ fɔbuu kojomɔ fɛɛ ni amɛbaanyɛ amɛkɛ amɛhe afɔ̃ nɔ lɛ nɔ.—Abɛi 14:21; Mateo 5:7; 6:12; 7:2.

No hewɔ lɛ, ejaaa akɛ aaakɛɛ akɛ Yehowa mɔbɔnalɛ lɛ tsĩɔ ekojomɔ lɛ naa yɛ shishinumɔ naa akɛ, ekɛ mɔbɔnalɛ jɔɔ ejalɛsaneyeli lɛ he. Yɛ Yehowa hiɛ lɛ, nakai sui enyɔ lɛ ŋmɛɔ pɛpɛɛpɛ jogbaŋŋ. Amɛ fɛɛ amɛŋmɛɔ pɛpɛɛpɛ taakɛ amɛhaa—Yehowa sui krokomɛi, tamɔ suɔmɔ kɛ nilee lɛ ŋmɛɔ pɛpɛɛpɛ lɛ.