Yitso 25

Odasefoi Enyɔ lɛ ni Aha Amɛba Wala Mli Ekoŋŋ

 1. Bɔfo ni he wa lɛ tsɛ Yohane koni efee mɛni?

DANI kpoo ni ji enyɔ lɛ aaaho aya kwraa lɛ, bɔfo ni he wa lɛ tsɛ Yohane koni ekɛ ehe awo gbalɛ sane kroko kɛhamɔ mli, shi enɛ kɔɔ sɔlemɔtsu lɛ he. (Kpojiemɔ 9:12; 10:1) Bɔ ni Yohane bɔ amaniɛ lɛ nɛ: “Ni aha mi gala ko ni tamɔ tso ni ekɛɛ: Tee shi ni osusu Nyɔŋmɔ sɔlemɔtsu lɛ kɛ afɔleshaa latɛ lɛ kɛ mɛi ni jaa Nyɔŋmɔ yɛ mli lɛ.”—Kpojiemɔ 11:1.

Sɔlemɔtsu Lɛ

 2. (a) Mɛɛ sɔlemɔtsu baahi shi kɛbashi wɔgbii nɛɛ amli? (b) Namɔ ji sɔlemɔtsu lɛ mli Osɔfonukpa, ni mɛni ji E-Krɔŋkrɔŋ Fe Fɛɛ lɛ?

² Sɔlemɔtsu ni atsi ta yɛ biɛ lɛ nyɛŋ afee sɔlemɔtsu diɛŋtsɛ ko yɛ Yerusalem, ejaakɛ Romabii lɛ kpata naagbee nɔ lɛ hiɛ yɛ afi 70 Ŋ.B. Shi bɔfo Paulo tsɔɔ akɛ dani aaakpata nakai tsu lɛ hiɛ lɛ, no mli lɛ sɔlemɔtsu kroko ni baahi shi kɛbashi wɔgbii nɛɛ amli lɛ epue. Enɛ ji mumɔŋ sɔlemɔtsu kpeteŋkpele lɛ ni ha kpee buu lɛ kɛ agbɛnɛ sɛɛ mli lɛ sɔlemɔtsui ni amamɔ yɛ Yerusalem lɛ ahe gbalɛ mfonirii ba mli lɛ. No ji “anɔkwa buu lɛ ni Nuŋtsɔ [Yehowa] lɛ diɛŋtsɛ shi ni jeee gbɔmɔ ko shi lɛ,” ni emli Osɔfonukpa ji Yesu, ni Paulo tsɔɔ akɛ “eyata shi yɛ Nyɔŋmɔ maŋtsɛsɛi lɛ ninejurɔ yɛ ŋwɛi” momo lɛ. E-Krɔŋkrɔŋ Fe Fɛɛ lɛ ji he ni Yehowa yɔɔ yɛ ŋwɛi diɛŋtsɛ lɛ.—Hebribii 8:1, 2; 9:11, 24.

 3. Yɛ kpee buu lɛ mli lɛ, mɛni akɛ (a) muhɔɔ ni etsĩ Krɔŋkrɔŋ Fe Fɛɛ lɛ kɛ He Krɔŋkrɔŋ lɛ teŋ lɛ feɔ he mfoniri? (b) kooloi afɔleshaai lɛ feɔ he mfoniri? (d) afɔleshaa latɛ lɛ feɔ he mfoniri?

³ Bɔfo Paulo tsɔɔ mli akɛ kpee buu lɛ muhɔɔ ni gbalaa Krɔŋkrɔŋ Fe Fɛɛ lɛ mli kɛjɛɔ He Krɔŋkrɔŋ tsu lɛ he lɛ feɔ Yesu heloo lɛ he mfoniri. Beni Yesu kɛ ewala sha afɔle lɛ, nɛkɛ muhɔɔ loo mama nɛɛ mli gba enyɔ, ni tsɔɔ akɛ Yesu heloo lɛ jeee gbɛtsii nii kɛmiiha Yehowa hiɛ ni eeeya yɛ ŋwɛi dɔŋŋ. Yɛ Yesu afɔleshaa lɛ hewɔ lɛ, eshishibii osɔfoi bibii ni afɔ amɛ mu lɛ ni gboiɔ yɛ anɔkwayeli mli lɛ hu baaya ŋwɛi yɛ be ni sa mli. (Mateo 27:50, 51; Hebribii 9:3; 10:19, 20) Paulo tsɔɔ mli hu akɛ, kooloi afɔleshaai ni yaa nɔ be fɛɛ be yɛ kpee buu lɛ mli lɛ gbalaa jwɛŋmɔ kɛyaa Yesu afɔleshaa kome ni ekɛ egbɔmɔtso akɛ adesa ni yeɔ emuu lɛ baasha lɛ nɔ. Afɔleshaa latɛ lɛ ni yɔɔ kpo lɛ nɔ lɛ damɔ shi kɛha Yehowa gbɛjianɔtoo, taakɛ esuɔmɔnaa nii ji, koni ekɛkpɛlɛ Yesu afɔleshaa lɛ nɔ eha “mɛi pii”—kɛjɛ mɛi ni afɔ amɛ mu lɛ ateŋ, kɛ sɛɛ mli lɛ, toi krokomɛi lɛ—ni “kwɛɔ lɛ gbɛ lɛ ayiwalaheremɔ.”—Hebribii 9:28; 10:9, 10; Yohane 10:16.

 4. Mɛni akɛ enɛɛmɛi feɔ he mfoniri (a) He Krɔŋkrɔŋ lɛ? (b) mligbɛ kpo lɛ?

⁴ Wɔbaanyɛ wɔjɛ adafitswaa ni jɛ mumɔŋ yɛ ŋwɛi nɛɛ mli wɔmu sane naa akɛ He Krɔŋkrɔŋ ni yɔɔ kpee buu lɛ mli lɛ feɔ shihilɛ ni yɔɔ krɔŋkrɔŋ ni klɛŋklɛŋ lɛ Kristo kɛ agbɛnɛ osɔfoi aweku krɔŋkrɔŋ lɛ ni ji emlibii ni afɔ amɛ mu lɛ ni feɔ 144,000 lɛ na mli ŋɔɔmɔ yɛ be mli ni amɛyɔɔ shikpɔŋ nɔ lolo, dani amɛtsɔ “muhɔɔ” lɛ mli lɛ he okadi. (Hebribii 6:19, 20; 1 Petro 2:9) Edamɔ shi kɛha ŋɔ ni Nyɔŋmɔ eŋɔ amɛ akɛ emumɔŋ bii, taakɛ bɔ ni Nyɔŋmɔ kpɛlɛ Yesu nɔ akɛ e-Bi yɛ Yesu baptisimɔ yɛ Yordan mli yɛ afi 29 Ŋ.B. lɛ sɛɛ lɛ pɛpɛɛpɛ. (Luka 3:22; Romabii 8:15) Ni mligbɛ kpo lɛ hu, kpee buu lɛ fa ni Israelbii ni jeee osɔfoi lɛ naa kɛ he ni ashaa afɔle lɛ yɛ lɛ hu? Enɛ feɔ shidaamɔ ni yeɔ emuu ni gbɔmɔ Yesu yɔɔ ni ha efee mɔ ni sa akɛ ekɛ ewala shaa afɔle ehaa adesai lɛ he mfoniri. Edamɔɔ shi kɛhaa krɔŋkrɔŋbii lɛ ajalɛ shidaamɔ ni adamɔ Yesu afɔleshaa lɛ nɔ akɛha amɛ, ni esɛɛnyiɛlɔi ni afɔ amɛ mu lɛ naa mli ŋɔɔmɔ yɛ be mli ni amɛyɔɔ shikpɔŋ nɔ lɛ.a—Romabii 1:7; 5:1.

Sɔlemɔtsu Kpee Buu lɛ Susumɔ

 5. Yɛ Hebri Ŋmalɛ lɛ mli gbalɛi amli lɛ, mɛni nɛkɛ nibii nɛɛ tsɔɔ (a) Yerusalem ni asusu lɛ? (b) Ezekiel ninaa lɛ mli sɔlemɔtsu lɛ ni asusu lɛ?

⁵ Akɛɛ Yohane ni “esusu Nyɔŋmɔ sɔlemɔtsu lɛ kɛ afɔleshaa latɛ lɛ kɛ mɛi ni jaa Nyɔŋmɔ yɛ mli lɛ.” Mɛni enɛ tsɔɔ? Yɛ Hebri Ŋmalɛi lɛ agbalɛi amli lɛ, susumɔi ni tamɔ nɛkɛ lɛ maa nɔ mi akɛ akɛ jalɛsaneyeli, baadamɔ Yehowa tɛi ni efolɔ eshwie shi ni ja lɛ anɔ aha. Yɛ Maŋtsɛ Manase yiwalɔ lɛ bei lɛ amli lɛ, Yerusalem ni asusu yɛ gbalɛ naa lɛ yeɔ hiɛkpatamɔ kojomɔ ni anyɛŋ atsake ni baaba nakai maŋ lɛ nɔ lɛ he odase. (2 Maŋtsɛmɛi 21:13; Yaafo 2:8) Shi yɛ sɛɛ mli lɛ, beni Yeremia na akɛ aasusu Yerusalem lɛ, enɛ ma nɔ mi akɛ abaatswa maŋ lɛ ekoŋŋ. (Yeremia 31:39; kwɛmɔ Zakaria 2:2-8 hu.) Nakai nɔŋŋ hu bɔ ni asusu sɔlemɔwe ni Ezekiel na yɛ eninaa lɛ mli babaoo lɛ maa nɔ mi kɛhaa Yudafoi ni yɔɔ nom mli yɛ Babilon lɛ akɛ abaaku sɛɛ ato anɔkwa jamɔ ama shi ekoŋŋ yɛ amɛshikpɔŋ nɔ. Eji kaimɔ hu akɛ, yɛ amɛtɔmɔi ahewɔ lɛ, kɛjɛ enɛ nɔ kɛyaa lɛ esa akɛ Israel kɛ tɛi ni Nyɔŋmɔ efɔlo eshwie shi ni yɔɔ krɔŋkrɔŋ lɛ atsu nii.—Ezekiel 40:3, 4; 43:10.

 6. Yohane ni akɛɛ lɛ akɛ esusu sɔlemɔtsu lɛ kɛ osɔfoi ni jaa yɛ jɛmɛ lɛ ji mɛni he okadi? Tsɔɔmɔ mli.

⁶ No hewɔ lɛ, beni afa Yohane akɛ esusu sɔlemɔtsu lɛ kɛ nakai osɔfoi lɛ ni jaa yɛ mli lɛ, eji okadi ni tsɔɔ akɛ nɔ ko nɔ ko bɛ ni baanyɛ atsi Yehowa yiŋtoi ni kɔɔ sɔlemɔtsu gbɛjianɔtoo lɛ kɛ mɛi ni yɔɔ mli lɛ ahe lɛ mlibaa gbɛ, ni akɛ nakai yiŋtoi lɛ miibɛŋkɛ amɛnaagbee kwraa. Amrɔ nɛɛ ni akɛ nibii fɛɛ eto Yehowa bɔfo ni he wa lɛ najiashi nɛɛ, be eshɛ ni aaato “Yehowa we lɛ gɔŋ lɛ aaama shi yɛ gɔji lɛ ayiteaŋ.” (Yesaia 2:2-4) Yɛ Kristendom hemɔkɛyeli kwamɔ afii ohai babaoo lɛ sɛɛ nɛɛ, esa akɛ awó Yehowa jamɔ krɔŋŋ lɛ nɔ. Ni be eshɛ hu ni abaatee Yesu nyɛmimɛi anɔkwafoi ni gboi lɛ ashi kɛya “He Krɔŋkrɔŋ Fe Fɛɛ” lɛ. (Daniel 9:24; 1 Tesalonikabii 4:14-16; Kpojiemɔ 6:11; 14:4) Ni esa akɛ asusu “wɔ-Nyɔŋmɔ lɛ tsuji” ni yɔɔ shikpɔŋ nɔ ni asɔo amɛnaa lɛ anaagbee bii lɛ yɛ ŋwɛi tɛi ni afolɔ ashwie shi lɛ anaa bɔni afee ni amɛfee mɛi ni sa kɛha amɛ naanɔ shihilɛ he yɛ sɔlemɔtsu gbɛjianɔtoo lɛ mli akɛ Nyɔŋmɔ bii ni ajɛ mumɔŋ afɔ amɛ. Yohane kuu lɛ ni yɔɔ ŋmɛnɛ lɛ le nakai tɛi ni afolɔ ashwie shi ni yɔɔ krɔŋkrɔŋ lɛ ni amɛtswa amɛfai shi akɛ amɛbaahi shi yɛ naa.—Kpojiemɔ 7:1-3; Mateo 13:41, 42; Efesobii 1:13, 14; okɛto Romabii 11:20 he.

Kpo lɛ ni Anaanaa Nɔ

 7. (a) Mɛni hewɔ akɛɛ Yohane akɛ ekasusu kpo lɛ? (b) Mɛɛ be mli anaanaa maŋ krɔŋkrɔŋ lɛ nɔ nyɔji 42 lɛ? (d) Kristendom osɔfoi lɛ nyɛɛɛ afi Yehowa jalɛ tɛi ni efolɔ eshwie shi lɛ asɛɛ nyɔji 42 yɛ mɛɛ gbɛ nɔ?

⁷ Mɛni hewɔ aŋmɛɛɛ Yohane gbɛ koni esusu kpo lɛ? Ekɛɔ wɔ yɛ nɛkɛ wiemɔi nɛɛ amli: “Ni kpo ni yɔɔ sɔlemɔtsu lɛ agbo lɛ naa lɛ, tsi oha sɛɛ, ni okasusu no, ejaakɛ akɛha jeŋmaji lɛ, ni amɛaanaanaa maŋ krɔŋkrɔŋ lɛ nɔ nyɔji nyɔŋmai-ejwɛ kɛ enyɔ.” (Kpojiemɔ 11:2) Wɔyoo akɛ mligbɛ kpo lɛ feɔ Kristofoi ni akɛ mumɔ efɔ amɛ lɛ ajalɛ shidaamɔ yɛ shikpɔŋ nɔ lɛ he mfoniri. Taakɛ wɔbaana lɛ, nɔ ni awieɔ he yɛ biɛ lɛ kɔɔ nyɔji 42 diɛŋtsɛ he, ni ejeɔ shishi kɛjɛɔ December 1914 kɛyashi June 1918, yɛ be mli ni aka mɛi fɛɛ ni tsɛɔ amɛhe Kristofoi lɛ akwɛ waa lɛ. Ani amɛbaadamɔ shi amɛha Yehowa jalɛ tɛi lɛ yɛ nakai tawuu afii lɛ amli? Amɛteŋ mɛi pii efeee nakai. Kristendom osɔfoi lɛ fɛɛ kɛ maŋhedɔɔ ye toiboo ni amɛaafee amɛha ŋwɛi mla lɛ hiɛ. Nɔ ni amɛfeɔ yɛ fai enyɔ ni kɛ amɛhe wuɔ ta titri yɛ Kristendom lɛ ji shiɛmɔ ni osɔfoi lɛ shiɛ amɛtsɔɔ obalahii lɛ ni amɛkɛloo amɛ amɛwo tawuu bui amli. Agbe akpekpei abɔ. Beni kojomɔ lɛ jeɔ shishi yɛ Nyɔŋmɔ we lɛ yɛ 1918 lɛ, no mli lɛ U.S.A hu kɛ ehe ewo nakai lashishwiemɔ lɛ mli, ni Kristendom osɔfoi lɛ fɛɛ eye la yi sɔ, ni nɛkɛ la nɛɛ miibolɔ lolo kɛmiitsɛ ŋwɛi oweletɔɔ. (1 Petro 4:17) Shɛ ni ashɛrɛ amɛ ashwie lɛ efee nɔ ni baahi shi kɛya naanɔ, anyɛŋ atsake.—Yesaia 59:1-3, 7, 8; Yeremia 19:3, 4.

 8. Mɛni ji nɔ ni Biblia Kaselɔi lɛ ateŋ mɛi pii yɔse yɛ Jeŋ Ta I be lɛ mli, shi mɛni ji nɔ ni amɛnuuu shishi jogbaŋŋ?

⁸ Shi Biblia Kaselɔi akuu fioo lɛ hu? Ani abaasusu amɛ amrɔ nɔŋŋ yɛ 1914 kɛtsɔ ŋwɛi tɛi ni afolɔ ashwie shi lɛ ahe ni amɛkɛ amɛhe kpɛtɛɔ lɛ nɔ? Dabi. Taakɛ afee mɛi ni kɛɔ akɛ amɛji Kristofoi ni yɔɔ Kristendom lɛ, esa akɛ amɛ hu aka amɛ. ‘Atsi amɛ aha sɛɛ, akɛ amɛ ha jeŋmaji lɛ’ koni aka amɛ waa ni awa amɛ yi. Amɛteŋ mɛi pii yɔse akɛ esaaa akɛ amɛyaa ni amɛyagbeɔ amɛnanemɛi gbɔmɛi, eyɛ mli akɛ no mli lɛ amɛnuuu maŋ saji ni Kristofoi kɛ amɛhe wooo mli lɛ shishi jogbaŋŋ. (Mika 4:3; Yohane 17:14, 16; 1 Yohane 3:15) Akɛni jeŋmaji lɛ miinyɛ amɛnɔ hewɔ lɛ amɛteŋ mɛi komɛi ŋmɛɛ saji ahe ni amɛkɛsaa.

 9. Mɛni ji maŋ krɔŋkrɔŋ ni jeŋmaji lɛ naanaa nɔ lɛ, ni namɛi yɔɔ shikpɔŋ nɔ ni damɔ shi kɛha nɛkɛ maŋ nɛɛ?

⁹ Shi te ebalɛ tɛŋŋ ni nakai jeŋmaji lɛ naanaa maŋ krɔŋkrɔŋ lɛ nɔ lɛ? Eka shi faŋŋ akɛ enɛ kɔɔɔ Yerusalem ni akpata hiɛ fe afii 25 dani aŋma Kpojiemɔ lɛ he. Shi moŋ maŋ krɔŋkrɔŋ lɛ ji Yerusalem Hee, ni atsɔɔ mli yɛ sɛɛ mli yɛ Kpojiemɔ lɛ, ni Kristofoi ni afɔ amɛ mu lɛ ateŋ mɛi ni eshwɛ yɛ shikpɔŋ nɔ lɛ ni yɔɔ sɔlemɔtsu lɛ mli kpo lɛ nɔ lɛ damɔ shi kɛha amɛ lɛ. Yɛ be ni sa mli lɛ, mɛnɛɛmɛi hu baafee maŋ krɔŋkrɔŋ lɛ fa. No hewɔ lɛ naamɔ ni anaanaa amɛ nɔ lɛ tsɔɔ akɛ aanaanaa maŋ lɛ diɛŋtsɛ nɔ.—Kpojiemɔ 21:2, 9-21.

Odasefoi Enyɔ Lɛ

10. Mɛni Yehowa Odasefoi anɔkwafoi lɛ baafee yɛ be mli ni anaanaa amɛnɔ lɛ?

¹⁰ Yɛ be mli ni anaanaa amɛ nɔ lɛ, nɛkɛ anɔkwafoi nɛɛ kpaaa Yehowa Odasefoi anɔkwafoi ni amɛji lɛ. No hewɔ lɛ gbalɛ lɛ tee nɔ akɛ: “Ni maha midasefoi enyɔ lɛ awo kpekpe ni amɛgba gbii akpe kɛ ohai enyɔ kɛ nyɔŋmai ekpaa. Mɛnɛɛmɛi ji mutsei enyɔ lɛ kɛ kanetsei enyɔ lɛ ni damɔ shikpɔŋ lɛ nɔ Nuŋtsɔ lɛ hiɛ lɛ.”—Kpojiemɔ 11:3, 4.

11. Ni Kristofoi anɔkwafoi ni afɔ amɛ mu lɛ aaagba “yɛ kpekpe mli” lɛ tsɔɔ mɛni?

¹¹ Su ni ji tsuishiŋmɛɛ he miihia nɛkɛ Kristofoi anɔkwafoi ni afɔ amɛ mu nɛɛ, ejaakɛ esa akɛ amɛgba “yɛ kpekpe” mli. Mɛni ji nɔ ni enɛ tsɔɔ? Yɛ Biblia bei amli lɛ, akɛ kpekpe damɔɔ shi ahaa yarafeemɔ. Wo ni mɔ ko aaawo enɛ lɛ ji okadi ni tsɔɔ akɛ aba mɔ lɛ shi yɛ awerɛho loo haomɔ mli. (1 Mose 37:34; Hiob 16:15, 16; Ezekiel 27:31) Kpekpe kɔɔ hiɛkpatamɔ shɛɛ saji ni kɛ ŋkɔmɔyeli loo awerɛho baa ni esa akɛ Nyɔŋmɔ gbalɔi lɛ ajaje lɛ he. (Yesaia 3:8, 24-26; Yeremia 48:37; 49:3) Kpekpe ni aaawo lɛ baanyɛ atsɔɔ heshibaa aloo tsuitsakemɔ yɛ ŋwɛi kɔkɔbɔɔ hewɔ. (Yona 3:5) Kpekpe ni odasefoi enyɔ lɛ wo lɛ baanyɛ atsɔɔ amɛtsuishiŋmɛɛ kɛ heshibaa ni amɛkɛjaje Yehowa kojomɔi amɛtsɔɔ lɛ. Amɛji odasefoi ni miijaje nɛkɛ oweletɔɔ gbi nɛɛ ni kɛ awerɛho hu baaba jeŋmaji lɛ anɔ lɛ.—5 Mose 32:41-43.

12. Mɛni hewɔ be kpalaŋŋ ni emli ni abaanaanaa maŋ krɔŋkrɔŋ lɛ nɔ lɛ tamɔ eji be diɛŋtsɛ lɛ?

¹² Esa akɛ Yohane kuu lɛ ashiɛ nɛkɛ sane nɛɛ yɛ be pɔtɛɛ ni atsɔɔ lɛ mli: gbii 1,260, aloo nyɔji 42, be sɛɛjɛkɛmɔ kome too lɛ nɔŋŋ ni esa akɛ anaanaa maŋ krɔŋkrɔŋ lɛ nɔ lɛ. Etamɔ nɔ ni nɛkɛ be nɛɛ yɛ nakai nɔŋŋ, ejaakɛ atsɔɔ mli yɛ gbɛi sɔrɔtoi enyɔ nɔ, klɛŋklɛŋ lɛ yɛ nyɔji amli kɛkɛ lɛ yɛ gbii amli. Kɛfata he lɛ, yɛ Nuŋtsɔ lɛ gbi lɛ shishijee mli lɛ, akadi be ni ji afii etɛ kɛ fa ni Nyɔŋmɔ webii aniiashikpamɔ ni mli wa lɛ tamɔ saji ni ba ni agba he sane afɔ shi yɛ biɛ lɛ pɛpɛɛpɛ—nɔ ni je shishi yɛ December 1914 ni tee nɔ aahu kɛyashi June 1918 lɛ. (Kpojiemɔ 1:10) Amɛshiɛ “kpekpe” he sane ni kɔɔ Yehowa kojomɔ ni baa Kristendom kɛ je lɛ nɔ lɛ.

13. (a) Anɔkwale ni eji akɛ odasefoi enyɔ lɛ feɔ Kristofoi ni afɔ amɛ mu lɛ he okadi lɛ tsɔɔ mɛni? (b) Mɛɛ Zakaria gbalɛ akaiɔ yɛ tsɛ ni Yohane tsɛ odasefoi enyɔ lɛ akɛ “mutsei enyɔ lɛ kɛ kanetsei enyɔ” lɛ hewɔ?

¹³ Anɔkwale ni eji akɛ akɛ odasefoi enyɔ fee amɛhe mfoniri lɛ maa nɔ mi kɛhaa wɔ akɛ amɛsane lɛ ji anɔkwale ni ema shi shiŋŋ. (Okɛto 5 Mose 17:6; Yohane 8:17, 18 he.) Yohane tsɛɔ amɛ “mutsei enyɔ lɛ kɛ kanetsei enyɔ lɛ ni damɔ shikpɔŋ lɛ nɔ Nuŋtsɔ lɛ hiɛ lɛ.” Enɛ ji wiemɔ ni kɔɔ Zakaria, ni na kanetso ni egbala niji kpawo kɛ mutsei enyɔ lɛ he gbalɛ lɛ he diɛŋtsɛ. Akɛɛ mutsei lɛ feɔ “mɛi enyɔ ni afɔ amɛ mu lɛ,” ni ji, Amralo Zerubabel kɛ Osɔfonukpa Yoshua, “ni damɔ shikpɔŋ muu lɛ fɛɛ Nuŋtsɔ lɛ masɛi lɛ” he mfoniri.—Zakaria 4:1-3, 14.

14. (a) Mutsei enyɔ lɛ he ninaa ni Zakaria na lɛ tsɔɔ mɛni? Ni kanetso lɛ hu? (b) Mɛni baafee Kristofoi ni afɔ amɛ mu lɛ aniiashikpamɔ yɛ klɛŋklɛŋ jeŋ ta lɛ mli?

¹⁴ Zakaria hi shi yɛ tsutswaa be ko mli, ni eninaa ni kɔɔ mutsei enyɔ lɛ he lɛ tsɔɔ akɛ akɛ Yehowa mumɔ lɛ baajɔɔ Zerubabel kɛ Yoshua ni amɛkɛwaje gbɔmɛi lɛ kɛha nitsumɔ lɛ. Kanetso lɛ he ninaa lɛ kai Zakaria koni ‘ekagbe nibii bibii agbi lɛ he guɔ,’ ejaakɛ abaatsu Yehowa yiŋtoi ahe nii—“jeee nyɛmɔ naa lɛ, jeee hewalɛ naa, shi mimumɔ lɛ naa! Yehowa Zebaot kɛɛ.” (Zakaria 4:6, 10; 8:9) Nakai nɔŋŋ hu akɛ Kristofoi akuu fioo ni kɛ hekamɔ tere anɔkwale lɛ mli la lɛ kɛtee adesai aŋɔɔ yɛ klɛŋklɛŋ jeŋ ta lɛ mli lɛ baatsu nii yɛ tsutswaa nitsumɔ ko mli. Amɛ hu amɛbaatsɔmɔ hewalɛwoo jɛɛhe, eyɛ mli akɛ amɛyi faaa moŋ, shi kɛlɛ amɛbaakase bɔ ni amɛaafee ni amɛkɛ amɛhe afɔ Yehowa hewalɛ nɔ, ni amɛgbeŋ shishijee nibii bibii agbi lɛ he guɔ.

15. (a) Anɔkwale ni eji akɛ Kristofoi ni afɔ amɛ mu lɛ ji odasefoi enyɔ lɛ kaiɔ wɔ mɛni? Tsɔɔmɔ mli. (b) Mɛɛ okadii afa odasefoi enyɔ lɛ ni amɛfee?

¹⁵ Anɔkwale ni eji akɛ atsɔɔ mli akɛ amɛji odasefoi enyɔ lɛ hu kaiɔ wɔ tsakemɔ lɛ. Yɛ nakai ninaa lɛ mli lɛ, Yesu bɔfoi etɛ na lɛ yɛ Maŋtsɛyeli anunyam mli, ni Mose kɛ Elia fata ehe. Enɛ fee Yesu ni ta enunyam maŋtsɛsɛi lɛ nɔ yɛ 1914 koni etsu nitsumɔ ni akɛ nakai gbalɔi enyɔ lɛ fee he mfoniri lɛ. (Mateo 17:1-3) Nɔ ni kɛ enɛ yaa pɛpɛɛpɛ lɛ, agbɛnɛ ana ni odasefoi enyɔ lɛ miifee okadii ni kaiɔ wɔ Mose kɛ Elia nɔ lɛ. Akɛ nɔkwɛmɔnɔ lɛ, Yohane wie yɛ amɛhe akɛ: “Ni kɛ mɔ ko miitao afee amɛ efɔŋ lɛ, la jɛɔ amɛdaaŋ ni emiɔ amɛhenyɛlɔi lɛ; ni kɛ mɔ ko miitao afee amɛ efɔŋ lɛ, nɛkɛ nɔŋŋ sa akɛ agbeɔ lɛ. Mɛnɛɛmɛi yɛ hegbɛ akɛ amɛŋaa ŋwɛi naa, koni nu akanɛ yɛ amɛgbalɛ gbii lɛ amli.”—Kpojiemɔ 11:5, 6a.

16. (a) Okadi ni kɔɔ la lɛ he lɛ kaiɔ wɔ be mli ni atswa hegbɛ ni Mose yɔɔ lɛ mpoa yɛ Israel lɛ yɛ mɛɛ gbɛ nɔ? (b) Kristendom osɔfoi lɛ ebuuu Biblia Kaselɔi lɛ ni amɛtee haomɔ shi amɛwo amɛ yɛ klɛŋklɛŋ jeŋ ta lɛ mli yɛ mɛɛ gbɛ nɔ, ni mɛnɛɛmɛi wuu amɛshi enɛ yɛ mɛɛ gbɛ nɔ?

¹⁶ Enɛ kaiɔ wɔ be mli ni atswa hegbɛ ni Mose yɔɔ lɛ mpoa yɛ Israel lɛ. Nakai gbalɔ lɛ jaje kojomɔ wiemɔi ni tamɔ la, ni Yehowa kpata atuatselɔi lɛ ahiɛ, ni la diɛŋtsɛ jɛ ŋwɛi basha amɛteŋ mɛi 250. (4 Mose 16:1-7, 28-35) Nakai nɔŋŋ hu Kristendom hiɛnyiɛlɔi lɛ tse Biblia Kaselɔi lɛ hiɛ atua, ni amɛkɛɔ akɛ amɛkaseko nii yɛ amɛ osɔfoi akɔlegii lɛ eko mli da. Shi Nyɔŋmɔ odasefoi lɛ yɛ yijiemɔ woji ni nɔ kwɔlɔ akɛ sɔɔlɔi: amɛji nakai gbɔmɛi heshibalɔi lɛ ni bo amɛ Ŋmalɛ mli sane lɛ toi lɛ. (2 Korintobii 3:2, 3) Yɛ 1917 mli lɛ, Biblia Kaselɔi lɛ fee wolo ko ni ji The Finished Mystery, wolo ko ni kɛ hewalɛ wieɔ Kpojiemɔ kɛ Ezekiel woji lɛ ahe. Nɔ ni nyiɛ enɛ sɛɛ ba ji dɛhiɛmɔ wolo The Bible Students Monthly lɛ ni emli sane titri ji ‘Babilon Shigbeemɔ—Nɔ Hewɔ ni Esa Akɛ Kristendom Ana Amanehulu Bianɛ—Nɔ ni Baajɛ Mli Aba yɛ Naagbee’ lɛ ni hiɛ baafai ejwɛ ni aja ekomekomei 10,000,000 aha lɛ. Yɛ U.S.A lɛ, osɔfoi lɛ ni amɛmli efu lɛ kɛ ta ni eba lɛ tsu nii koni akɛtsi wolo lɛ naa. Maji krokomɛi hu yɛ ni akaneɔ wolo lɛ akwɛɔ da. Ni kɛlɛ, Nyɔŋmɔ tsuji tee nɔ amɛwuu amɛshi amɛ kɛ dɛhiɛmɔ wolo kroko ni hiɛ baafai ejwɛ ni emli sane lɛ tamɔ la ni egbɛi ji Kingdom News lɛ. Yɛ be mli ni Nuŋtsɔ lɛ gbi lɛ yaa nɔ lɛ, woji krokomɛi baaha Kristendom mumɔŋ gbele shihilɛ ni eyɔɔ mli lɛ aje kpo faŋŋ.—Okɛto Yeremia 5:14 he.

17. (a) Mɛɛ nibii ni ba yɛ Elia gbii lɛ amli kɔɔ nu hɔmɔ kɛ la he? (b) La jɛ odasefoi enyɔ lɛ adaaŋ yɛ mɛɛ gbɛ nɔ, ni mɛɛ nu hɔmɔ kɔɔ enɛ he?

¹⁷ Ni Elia hu? Yɛ Israel maŋtsɛmɛi lɛ agbii lɛ amli lɛ, nɛkɛ gbalɔ nɛɛ jaje nu hɔmɔ ni baaba ni eji Yehowa mlifu ni ekɛbaa Israelbii ni jaa Baal lɛ anɔ. Enɛ ye afii etɛ kɛ fa. (1 Maŋtsɛmɛi 17:1; 18:41-45; Luka 4:25; Yakobo 5:17) Yɛ sɛɛ mli, beni Maŋtsɛ Ahazia ni yeee anɔkwale lɛ tsu asraafoi koni amɛyanyɛ Elia nɔ koni eba emaŋtsɛ we lɛ, gbalɔ lɛ tsɛ la kɛjɛ ŋwɛi ni ebasha asraafoi lɛ. Beni tatsɛ ko kɛ bulɛ ni sa ha egbɛhe akɛ gbalɔ lɛ pɛ mli ni Elia kpɛlɛ nɔ akɛ ebaafata ehe kɛyana maŋtsɛ lɛ. (2 Maŋtsɛmɛi 1:5-16) Nakai nɔŋŋ hu kɛjɛ 1914 kɛbashi 1918 lɛ, shwɛɛnii ni afɔ amɛ mu lɛ kɛ ekaa gbala jwɛŋmɔ kɛtee Kristendom mumɔŋ nu hɔmɔ lɛ nɔ, ni amɛbɔ kɔkɔ yɛ kojomɔ ni tamɔ la ni baa yɛ “Yehowa gbi wulu kpele ni he yɔɔ gbeyei” lɛ mli lɛ he.—Maleaki 3:19, 23; Amos 8:11.

18. (a) Mɛɛ hegbɛ akɛha odasefoi enyɔ lɛ, ni enɛ tamɔ nɔ ni akɛha Mose lɛ yɛ mɛɛ gbɛ nɔ? (b) Odasefoi enyɔ lɛ kpa Kristendom he mama yɛ mɛɛ gbɛ nɔ?

¹⁸ Yohane tee nɔ ewie nɛkɛ yɛ odasefoi enyɔ lɛ ahe: “Ni amɛyɛ hegbɛ hu yɛ nui lɛ anɔ akɛ amɛhaa etsɔɔ la, ni amɛkɛ haomɔ haoɔ shikpɔŋ lɛ shii abɔ ni amɛsumɔɔ.” (Kpojiemɔ 11:6b) Bɔni afee ni etsɔ Farao yiŋ ni eha Israel aye amɛhe lɛ, Yehowa kɛ Mose tsu nii ni ekɛ haomɔi ba Mizraim ni nyɛɔ ewebii lɛ anɔ lɛ nɔ, ni nui ni aha etsɔ la fata he. Yɛ afii ohai abɔ sɛɛ lɛ, Filistibii ni ji Israel henyɛlɔi lɛ kai nii ni Yehowa fee eshi Mizraim lɛ, ni eha amɛbolɔ akɛ: “Namɔ aaajie wɔ kɛaajɛ nɛkɛ Nyɔŋmɔ kpele nɛɛ dɛŋ? Mɔ nɛɛ ji Nyɔŋmɔ ni kɛ haomɔi sɔrɔtoi hao Mizraimbii lɛ yɛ ŋa lɛ nɔ lɛ!” (1 Samuel 4:8, New World Translation; Lala 105:29) Mose fee Yesu, ni yɔɔ hegbɛ akɛ ejajeɔ Nyɔŋmɔ kojomɔi eshwieɔ egbii lɛ amli jamɔ mli hiɛnyiɛlɔi lɛ anɔ lɛ he mfoniri. (Mateo 23:13; 28:18; Bɔfoi lɛ Asaji 3:22) Ni yɛ klɛŋklɛŋ jeŋ ta lɛ mli lɛ, Kristo nyɛmimɛi lɛ, odasefoi enyɔ lɛ, kpa “nui” ni gbeɔ mɔ ni Kristendom kɛhaa etoi kuu lɛ ahe mama.

Agbe Odasefoi Enyɔ Lɛ

19. Taakɛ sane ni yɔɔ Kpojiemɔ lɛ tsɔɔ lɛ, mɛni baa, beni odasefoi enyɔ lɛ egbe amɛ odaseyeli lɛ naa lɛ?

¹⁹ Bɔ ni nɛkɛ haomɔ ni ba Kristendom nɔ nɛɛ naa wa sɔŋŋ hewɔ lɛ, beni odasefoi enyɔ lɛ egbe amɛgbalɛ lɛ naa yɛ kpekpe mli yɛ nyɔji 42 sɛɛ lɛ, Kristendom tsɔ hewalɛ ni eyɔɔ yɛ je lɛ nɔ lɛ nɔ ‘egbe amɛ.’ Yohane ŋma akɛ: “Ni kɛ amɛgbe amɛdaseyeli lɛ naa lɛ, kooloo lɛ ni jɛ bu kwɔŋkwɔŋ lɛ mli lɛ kɛ amɛ baawuu ta, ni eeeye amɛnɔ kunim, ni eeegbe amɛ; ni amɛgbohii lɛ aaajwere maŋ kpeteŋkpele lɛ ni atsɛɔ lɛ yɛ mumɔ mli akɛ Sodoma kɛ Mizraim lɛ, he ni asɛŋ amɛ Nuŋtsɔ lɛ yɛ lɛ, blohu lɛ mli. Ni maji lɛ kɛ akutsei lɛ kɛ majianɔwiemɔi lɛ kɛ jeŋmaji lɛ ateŋ mɛi komɛi aaakwɛ amɛgbohii lɛ gbii etɛ kɛ fa, ni amɛkpɛlɛŋ ni aŋɔ amɛgbohii lɛ ato fuu hei amli. Ni mɛi ni hiɔ shikpɔŋ lɛ nɔ lɛ aaanya yɛ amɛ hewɔ ni amɛmli aaafili amɛ, ni amɛaamajemaje amɛhe kee nii, ejaakɛ nɛkɛ gbalɔi enyɔ nɛɛ piŋ mɛi ni hiɔ shikpɔŋ lɛ nɔ lɛ.”—Kpojiemɔ 11:7-10.

20. Mɛni ji “kooloo lɛ ni jɛ bu kwɔŋkwɔŋ lɛ mli lɛ”?

²⁰ Enɛ ji wiemɔi 37 ni awie ni kɔɔ kooloo he yɛ Kpojiemɔ wolo lɛ mli lɛ mli klɛŋklɛŋ nɔ. Yɛ be ni sa mli lɛ, wɔbaasusu enɛ kɛ kooloi krokomɛi lɛ ahe fitsofitso. Efa akɛ wɔɔkɛɛ agbɛnɛ akɛ “kooloo lɛ ni jɛ bu kwɔŋkwɔŋ lɛ mli lɛ” ji Satan gbɛjianɔtoo, maŋkwramɔŋ nibii agbɛjianɔtoo ni yɔɔ shihilɛ mli lɛ.b—Okɛto Kpojiemɔ 13:1; Daniel 7:2, 3, 17 he.

21. (a) Odasefoi enyɔ lɛ ajamɔŋ henyɛlɔi lɛ ŋɔ hegbɛ ni tawuu lɛ mli shihilɛ lɛ kɛba lɛ amɛkɛtsu nii yɛ mɛɛ gbɛ nɔ? (b) Anɔkwale ni eji akɛ ashi odasefoi enyɔ lɛ agbohii ni afuuu amɛ lɛ tsɔɔ mɛni? (d) Te abaasusu be kpalaŋŋ ni ji gbii etɛ kɛ fa lɛ he aha tɛŋŋ? (Kwɛmɔ shishigbɛ niŋmaa lɛ.)

²¹ Jeŋmaji lɛ kɛ amɛhe wo klɛŋklɛŋ jeŋ ta lɛ mli kɛjɛ 1914 kɛbashi 1918. Maŋhedɔɔ mumɔ te shi kɛyashɛ shɔŋŋ, ni yɛ 1918 agbiɛnaa be mli lɛ, odasefoi enyɔ lɛ ajamɔ mli henyɛlɔi lɛ ŋɔ hegbɛ lɛ yɛ bɔ ni shihilɛ lɛ eba lɛ hewɔ koni amɛkɛtsu nii. Amɛkudɔ Maŋ lɛ mla gbɛjianɔtoo lɛ ni yɛ enɛ hewɔ lɛ awo Biblia Kaselɔi lɛ mli onukpai titrii lɛ atsuŋ yɛ amale naafolɔmɔ ni ji maŋjwaa he. Amɛnanemɛi nitsulɔi anɔkwafoi lɛ anaa kpɛ amɛhe. Etamɔ nɔ ni Maŋtsɛyeli nitsumɔ lɛ eba naagbee kwraa. Ebafee tamɔ nɔ ni shiɛmɔ nitsumɔ lɛ egbo. Yɛ Biblia bei amli lɛ, efeɔ hiɛshishwiemɔ ni ehiii kwraa kɛ afuuu mɔ ko yɛ kaimɔ bu mli. (Lala 79:1-3; 1 Maŋtsɛmɛi 13:21, 22) No hewɔ lɛ, ahorabɔɔ kpeteŋkpele baaba odasefoi enyɔ lɛ agbohii ni afuuu amɛ lɛ nɔ. Bɔ ni Palestina kɔɔyɔɔ mli dɔɔ babaoo hewɔ lɛ, gbonyo ni ka gbɛjegbɛ nɔ gbii etɛ kɛ fa lɛ baaje shishi aje fu diɛŋtsɛ.c (Okɛto Yohane 11:39 he.) Nɛkɛ gbalɛ mlitsɔɔmɔ nɛɛ tsɔɔ hiɛgbele ni ba odasefoi enyɔ nɛɛ anɔ. Aŋmɛɛɛ gbɛ po koni adamɔ mɛi ni awo amɛ tsuŋ ni yɔɔ yiteŋgbɛ nɛɛ asɛɛ koni aŋmɛɛ amɛhe yɛ be mli ni amɛbi ni akwɛ amɛsane lɛ mli ekoŋŋ lɛ. Akpa amɛhe mama yɛ be kakadaŋŋ mli koni amɛhe aje fu awo “maŋ kpeteŋkpele” lɛ mlibii lɛ. Shi mɛni ji nɛkɛ “maŋ kpeteŋkpele” nɛɛ?

22. (a) Mɛni ji maŋ kpeteŋkpele lɛ? (b) Maŋ lɛ mli adafitswaa woji kɛ amɛhe bɔ osɔfoi lɛ ahe ni amɛkɛnya yɛ dioo ni aha odasefoi enyɔ lɛ efee lɛ hewɔ yɛ mɛɛ gbɛ nɔ? (Kwɛmɔ akrabatsa ni afo yɛ shishigbɛ nɛɛ.)

²² Yohane kɛ hetooi komɛi haa wɔ. Ekɛɔ akɛ asɛŋ Yesu yɛ jɛmɛ. No hewɔ lɛ wɔsusuɔ Yerusalem he amrɔ nɔŋŋ. Shi ekɛɛ hu akɛ atsɛɔ maŋ kpeteŋkpele lɛ Sodoma kɛ Mizraim. Ojogbaŋŋ, abatsɛ Yerusalem diɛŋtsɛ be ko akɛ Sodom yɛ nibii ni ehiii ni afeɔ yɛ emli lɛ hewɔ. (Yesaia 1:8-10; okɛto Ezekiel 16:49, 53-58 he.) Ni Mizraim, ni ji klɛŋklɛŋ jeŋ hewalɛ lɛ, bafeɔ nibii agbɛjianɔtoo ni yɔɔ je nɛɛ mli lɛ he mfoniri yɛ bei komɛi amli. (Yesaia 19:1, 19; Yoel 4:19) No hewɔ lɛ, nɛkɛ maŋ kpeteŋkpele nɛɛ feɔ “Yerusalem” ni abule lɛ ni kɛɔ akɛ ejaa Nyɔŋmɔ shi moŋ ebafee mɔ ni he tseee kɛ mɔ ni feɔ esha, tamɔ Sodom, kɛ Satan jeŋ gbɛjianɔtoo nɛɛ fa, tamɔ Mizraim lɛ he mfoniri. Efeɔ Kristendom, ŋmɛnɛŋmɛnɛ beaŋ Yerusalem ni yeee anɔkwale lɛ, gbɛjianɔtoo ni emlibii lɛ nya babaoo yɛ be mli ni amɛha odasefoi enyɔ lɛ ashiɛmɔ ni gbaa amɛnaa lɛ fee dioo lɛ he mfoniri.

Atee Amɛ Shi Ekoŋŋ!

23. (a) Mɛni ba odasefoi enyɔ lɛ anɔ yɛ gbii etɛ kɛ fa sɛɛ, ni te enɛ sa amɛhenyɛlɔi lɛ ahe eha tɛŋŋ? (b) Mɛɛ be mli Kpojiemɔ 11:11, 12 kɛ Ezekiel gbalɛ lɛ ni kɔɔ bɔ ni Yehowa mu eshwie wui ni he ekwakwao nɔ yɛ jɔɔ ko mli lɛ naa eŋmɛnɛŋmɛnɛ beaŋ mlibaa?

²³ Maŋ adafitswaa woji yafata osɔfoi lɛ ahe ni amɛkɛgbe Nyɔŋmɔ webii lɛ ahe guɔ, ni adafitswaa woji nɛɛ ekome po kɛɛ: “Akɛ Finished Mystery wolo lɛ eba naagbee.” Shi nɔ ko bɛ ni kɛ anɔkwale lɛ teŋ jɛkɛ fe nɔ ni amɛwie nɛɛ! Odasefoi enyɔ lɛ jwereee shi akɛ gbohii. Wɔkaneɔ akɛ: “Ni gbii etɛ kɛ fa sɛɛ lɛ wala mumɔ jɛ Nyɔŋmɔ ŋɔɔ ba amɛmli, ni amɛte shi amɛdamɔ amɛnaji anɔ, ni gbeyei kpeteŋkpele mɔmɔ mɛi ni na amɛ lɛ. Ni amɛnu gbee kpeteŋkpele jɛ ŋwɛi miikɛɛ amɛ akɛ: Nyɛkwɔa kɛbaa biɛnɛɛ! Ni amɛkwɔ kɛtee ŋwɛi yɛ atatu lɛ mli, ni amɛhenyɛlɔi lɛ na amɛ.” (Kpojiemɔ 11:11, 12) No hewɔ lɛ amɛna niiashikpamɔ ni tamɔ wui ni amɛhe ekwakwao ni Ezekiel yana yɛ jɔɔ ko mli yɛ ninaa lɛ mli lɛ. Yehowa mu eshwie nɛkɛ wui ni he ekwakwao nɛɛ anɔ, ni amɛba wala mli, ni ekɛ Israel maŋ lɛ fɔmɔ ekoŋŋ yɛ afii 70 nomŋɔɔ yɛ Babilon lɛ he mfoniri ha. (Ezekiel 37:1-14) Nɛkɛ gbalɛi enyɔ nɛɛ, ni yɔɔ Ezekiel kɛ Kpojiemɔ lɛ, naa amɛmlibaa ni yɔɔ naakpɛɛ yɛ ŋmɛnɛŋmɛnɛ beaŋ yɛ 1919, beni Yehowa ku sɛɛ ekɛ edasefoi ni “gboi” lɛ ba wala kɛ hewalɛ mli ekoŋŋ lɛ.

24. Beni odasefoi enyɔ lɛ ba wala mli lɛ, te esa amɛjamɔ mli yiwalɔi lɛ ahe eha tɛŋŋ?

²⁴ Mɛɛ hejɔmɔ enɛ aaaji aha yiwalɔi lɛ nɛkɛ! Odasefoi enyɔ lɛ agbohii lɛ ba wala mli ekoŋŋ trukaa kɛkɛ ni amɛbɔi nitsumɔ. Eji tsofa ni jooɔ ni esa akɛ nakai osɔfoi lɛ ami, titri hu lɛ, akɛni aŋmɛɛ sɔɔlɔi Kristofoi ni amɛtsɔ ŋaa ni awo amɛ tsuŋ lɛ ahe ekoŋŋ, ni yɛ sɛɛ mli lɛ aŋmɛɛ amɛhe kwraa akɛ amɛyeee fɔ lɛ. Hejɔmɔ lɛ hu baanyɛ afee nɔ ni da waa, beni yɛ September 1919 mli lɛ, Biblia Kaselɔi lɛ fee kpee yɛ Cedar Point, Ohio, U.S.A lɛ. Biɛ ji he ni J. F. Rutherford, ni aŋmɛɛ ehe kɛjɛ tsuŋwoohe etsɛko lɛ kanya mɛi ni amɛba kpee lɛ kɛ ewiemɔ ni ji “Maŋtsɛyeli lɛ he Adafitswaa,” ni damɔ Kpojiemɔ 15:2 kɛ Yesaia 52:7 nɔ lɛ. Kɛkɛ ni Yohane kuu lɛ je shishi akɛ “amɛaagba,” aloo amɛaashiɛ yɛ faŋŋ mli shikome ekoŋŋ. Amɛkɛ hewalɛ tee amɛhiɛ, ni amɛsheee gbeyei amɛkɛkpa Kristendom osatofeemɔ lɛ he mama.

25. (a) Mɛɛ be mli akɛɛ odasefoi enyɔ lɛ akɛ, “Nyɛkwɔa kɛbaa biɛnɛɛ,” ni te enɛ ba mli eha tɛŋŋ? (b) Mɛɛ hejɔmɔ maŋ kpeteŋkpele lɛ na yɛ odasefoi enyɔ lɛ ni ba wala mli ekoŋŋ lɛ hewɔ?

²⁵ Kristendom bɔ mɔdɛŋ shii abɔ koni eti kunim ni eye yɛ 1918 mli lɛ mli. Eje shishi ekɛ asafoi ni feɔ basabasa tsu nii, mla naa ŋaatsɔi, tsuŋwoi, kɛ gbelei po—shi fɛɛ fee efolo! Kɛjɛ 1919 kɛbaa lɛ, agbɛnɛ enine shɛɛɛ odasefoi enyɔ lɛ amumɔŋ shihilɛ he lɛ nɔ dɔŋŋ. Nakai afi lɛ mli Yehowa kɛɛ amɛ akɛ: “Nyɛkwɔa kɛbaa biɛnɛɛ,” ni amɛkwɔ kɛtee mumɔŋ shihilɛ he ko ni awo nɔ ni amɛhenyɛlɔi lɛ baanyɛ ana amɛ shi amɛnyɛɛɛ amɛta amɛhe lɛ mli. Yohane tsɔɔ bɔ ni hejɔmɔ lɛ na maŋ kpeteŋkpele lɛ nɔ hewalɛ eha, yɛ sɛɛ mli beni atee amɛ shi lɛ: “Ni nakai ŋmɛlɛtswaa lɛ nɔ nɔŋŋ lɛ, shikpɔŋ hoso waa, ni maŋ lɛ mlijai nyɔŋma mli ekome wule; ni shikpɔŋhosomɔ lɛ mli lɛ agbe gbɔmɛi akpei kpawo, ni mɛi ni shwɛ lɛ she gbeyei, ni amɛŋɔ anunyam amɛha ŋwɛi Nyɔŋmɔ lɛ.” (Kpojiemɔ 11:13) Hosomɔi wuji diɛŋtsɛ tee nɔ yɛ jamɔ nɔyeli he lɛ. Etamɔ nɔ ni shikpɔŋ miihoso yɛ jamɔi wuji lɛ ahiɛnyiɛlɔi lɛ ashishi yɛ be mli ni nɛkɛ Kristofoi ni aha amɛba wala mli ekoŋŋ lɛ bɔi nitsumɔ lɛ. Amɛmaŋ lɛ mli gbɔmɛi amlijaa nyɔŋma mli ekome, yɛ okadi gbɛ nɔ lɛ gbɔmɛi 7,000 he jɔ̃ amɛhe aahu akɛ awie amɛhe akɛ amɛgboi.

26. Namɛi damɔ shi kɛha “maŋ lɛ mlijai nyɔŋma mli ekome” lɛ kɛ “akpei kpawo” ni yɔɔ Kpojiemɔ 11:13 lɛ? Tsɔɔmɔ mli.

²⁶ Wiemɔ ni ji “maŋ lɛ mlijai nyɔŋma mli ekome” lɛ kaiɔ wɔ akɛ Yesaia gba yɛ blema Yerusalem he akɛ maŋ lɛ mlijai nyɔŋma mli ekome baaje maŋtiase lɛ hiɛkpatamɔ lɛ mli akɛ seshi krɔŋkrɔŋ. (Yesaia 6:13) Yɛ nakai gbɛ nɔ nɔŋŋ lɛ, yibɔ ni ji 7,000 lɛ kaiɔ wɔ akɛ beni Elia nu he akɛ ekome too pɛ eshwɛ yɛ Israel ni yeɔ anɔkwa lɛ, Yehowa kɛɛ lɛ akɛ yɛ anɔkwale mli lɛ, gbɔmɛi 7,000 yɛ ni kulako shi amɛhako Baal. (1 Maŋtsɛmɛi 19:14, 18) Bɔfo Paulo kɛɛ yɛ klɛŋklɛŋ afii oha lɛ mli akɛ nɛkɛ 7,000 nɛɛ feɔ shwɛɛnii ni ji Yudafoi ni amɛbo sanekpakpa ni kɔɔ Kristo he lɛ toi lɛ ahe mfoniri. (Romabii 11:1-5) Nɛkɛ ŋmalɛi nɛɛ yeɔ ebuaa wɔ ni wɔnuɔ shishi akɛ “akpei kpawo” lɛ kɛ “maŋ lɛ mlijai nyɔŋma mli ekome” ni yɔɔ Kpojiemɔ 11:13 lɛ ji mɛi ni boɔ odasefoi enyɔ lɛ ni akɛ amɛ eba wala mli ekoŋŋ lɛ atoi ni amɛshiɔ eshafeemɔ maŋ kpeteŋkpele lɛ. Taakɛ eji lɛ, amɛgboiɔ amɛhaa Kristendom. Ajieɔ amɛgbɛi kɛjɛɔ Kristendombii awoji amli. Yɛ egbɛfaŋ lɛ, amɛbɛ wala mli dɔŋŋ.d

27, 28. (a) ‘Mɛi ni shwɛ lɛ kɛ anunyam ha ŋwɛi Nyɔŋmɔ lɛ’ yɛ mɛɛ gbɛ nɛ? (b) Anyɛ Kristendom osɔfoi lɛ anɔ koni amɛkpɛlɛ mɛni nɔ?

²⁷ Shi te fee tɛŋŋ ni ‘mɛi ni eshwɛ [yɛ Kristendom] lɛ kɛ anunyam ha ŋwɛi Nyɔŋmɔ lɛ’? Eka shi faŋŋ akɛ jeee kɛtsɔ amɛjamɔ ni ekwa hemɔkɛyeli lɛ kpoomɔ koni amɛbatsɔmɔ Nyɔŋmɔ tsuji nɔ. Shi moŋ, taakɛ atsɔɔ mli yɛ Vincent’s Word Studies in the New Testament lɛ mli, yɛ be mli ni ewieɔ wiemɔ “ŋɔ anunyam amɛha ŋwɛi Nyɔŋmɔ lɛ” he lɛ. Jɛmɛ ji he ni ajaje yɛ akɛ: “Wiemɔ kuku lɛ etsɔɔɔ tsakemɔ, loo tsuitsakemɔ, ni asaŋ ejeee shidaa, shi moŋ yɔsemɔ, ni nakai ji eshishinumɔ diɛŋtsɛ yɛ ŋmalɛ naa. Okɛto Yosh. vii. 19 (Sept.). Yohane ix. 24; Bɔfoi lɛ Asaji xii. 23; Romabii iv. 20 he.” Esa akɛ Kristendom akpɛlɛ nɔ kɛ mlifu akɛ Biblia Kaselɔi lɛ a-Nyɔŋmɔ lɛ efee naakpɛɛ nɔ wulu ko yɛ Kristofoi anitsumɔ mli ni ekɛ amɛ ba ekoŋŋ lɛ hewɔ.

²⁸ Ekolɛ osɔfoi lɛ kpɛlɛ enɛ nɔ yɛ amɛjwɛŋmɔ mli kɛkɛ, loo amɛkpɛlɛ nɔ amɛha amɛhe kɛkɛ. Eka shi faŋŋ akɛ amɛteŋ mɔ ko bɛ ni anu yɛ ehe yɛ faŋŋ mli akɛ eekpɛlɛ nɔ akɛ odasefoi enyɔ lɛ yɛ Nyɔŋmɔ. Shi Yehowa gbalɛ ni ekɛtsɔ Yohane nɔ lɛ yeɔ ebuaa wɔ ni wɔyɔseɔ nɔ ni yɔɔ amɛtsuii amli ni wɔnaa bɔ ni aba amɛ shi aha kɛ hejɔmɔ yɛ 1919 lɛ. Kɛjɛ nakai afi lɛ nɔ kɛbaa nɛɛ, akɛni “akpei kpawo” lɛ shi Kristendom yɛ efai shi ni etswa akɛ eeetsĩ etoi kuu lɛ fɛɛ naa lɛ sɛɛ lɛ, anyɛ osɔfoi lɛ anɔ koni amɛyɔse akɛ Yohane kuu lɛ a-Nyɔŋmɔ lɛ he wa fe amɛnyɔŋmɔ lɛ. Amɛbaayoo enɛ babaoo yɛ faŋŋ mli yɛ sɛɛ mli afii lɛ amli, akɛni amɛtoi lɛ ateŋ mɛi babaoo baashi amɛ, ni amɛjaje gbɔmɛi lɛ awiemɔ yɛ be mli ni Elia ye Baal jalɔi lɛ anɔ kunim yɛ Karmel Gɔŋ lɛ nɔ lɛ: “Yehowa lɛ, lɛ ji Nyɔŋmɔ! Yehowa lɛ, lɛ ji Nyɔŋmɔ!”—1 Maŋtsɛmɛi 18:39.

29. Mɛni Yohane kɛɛ eeba oya lɛ, ni mɛɛ hosomɔ kroko mɛɔ Kristendom?

²⁹ Shi bo toi! Yohane kɛɔ wɔ akɛ: “Kpoo ni ji enyɔ lɛ eho; naa, kpoo ni ji etɛ lɛ miiba oya.” (Kpojiemɔ 11:14) Kɛji akɛ nɔ ni eba kɛtsɔ hiɛ nɛɛ ehoso Kristendom diɛŋtsɛ lɛ, mɛni ebaafee yɛ be mli ni atswaa kpoo ni ji etɛ lɛ he adafi, ni bɔfo ni ji kpawo lɛ kpaa etɛtrɛmaŋtɛrɛ lɛ, ni agbeɔ Nyɔŋmɔ teemɔŋ sane krɔŋkrɔŋ lɛ naa kwraa lɛ?—Kpojiemɔ 10:7.

[Shishigbɛ niŋmai]

nitsumɔ lɛ

[Akrabatsa ni yɔɔ baafa 168]

Mlifilimɔ ni Yɔɔ Kpojiemɔ 11:10 Lɛ

Ray H. Abrams wie mlifu ni osɔfoi lɛ kɛte shi amɛwo Biblia Kaselɔi lɛ awolo ni ji The Finished Mystery lɛ yɛ ewolo ni ji Preachers Present Arms ni aŋma yɛ 1933 lɛ mli. Esusu osɔfoi lɛ amɔdɛŋbɔɔ koni amɛkpala Biblia Kaselɔi lɛ kɛ “amɛnaagba ni tamɔ hela” lɛ amɛshwie lɛ he. Enɛ kɛ saneyeli he sane ba, ni nɔ ni jɛ mli ba ji tsuŋ ni awo J. F. Rutherford kɛ ehefatalɔi kpawo afii babaoo. Dr. Abrams kɛfata he akɛ: “Sane muu lɛ fɛɛ hesusumɔ haa wɔmuɔ sane lɛ naa akɛ sɔlemɔi lɛ kɛ osɔfoi lɛ ji mɛi ni hɔ mɔdɛŋ ni abɔ koni akpata Russellbii lɛ ahiɛ lɛ sɛɛ. Yɛ Canada, yɛ February, 1918 lɛ, osɔfoi lɛ je gbɛ amɛfa ta amɛshi amɛ kɛ amɛwoji lɛ, titri lɛ The Finished Mystery lɛ. Taakɛ Winnipeg Tribune lɛ tsɔɔ lɛ, . . . amɛwolo lɛ naa ni atsĩ lɛ jɛ ‘osɔfoi lɛ anajiaŋdamɔlɔi’ ni tsu he nii lɛ hewɔ.”

Dr. Abrams tee nɔ akɛ: “Beni afii nyɔŋmai enyɔ tsuŋwoo lɛ he adafitswaa shɛ jamɔ mli adafitswaa woji lɛ awoloŋmalalɔi lɛ aŋɔɔ lɛ, woji nɛɛ fɛɛ, ewuji kɛ bibii lɛ fɛɛ, nya loo amɛmlifili amɛ yɛ nɔ ni eba lɛ hewɔ. Minyɛɛɛ mana wiemɔi komɛi ni tsɔɔ henumɔ kɛ dɔlɛ ni jɛ jamɔ mli woji nɛɛ eko ŋɔɔ. Upton Sinclair mu sane lɛ naa akɛ, ‘sanebimɔ ko bɛ he, yiwaa lɛ . . . jɛ anɔkwale ni eji akɛ “shishijee” jamɔ kui lɛ ena nyɛɛ kɛha amɛ lɛ hewɔ.’ Nɔ ni sɔlemɔi lɛ fɛɛ amɔdɛŋbɔɔ nyɛɛɛ afee lɛ, etamɔ nɔ ni agbɛnɛ nɔyeli lɛ enyɛ efee kɛha amɛ.” Yɛ be mli ni etsɛ wiemɔi kɛjɛ jamɔ mli woji sɔrɔtoi lɛ awiemɔi ni amɛkɛgbeɔ amɛhe guɔ lɛ amli lɛ, mɔ ni ŋma sane lɛ tsɔɔ bɔ ni Saneyeli He Wulu lɛ tsake eyiŋkpɛɛ lɛ ni ekɛɛ akɛ: “Akɛ dioofeemɔ here nɛkɛ kojomɔ nɛɛ nɔ yɛ sɔlemɔi lɛ amli.”

[Mfoniri ni yɔɔ baafa 163]

Yohane susu mumɔŋ sɔlemɔwe lɛ—esa akɛ ana tɛi ni afolɔ ashwie shi lɛ yɛ osɔfoi ni afɔ amɛ mu lɛ ahe

[Mfonirii ni yɔɔ baafa 165]

Tsutswaa nitsumɔ ni Zerubabel kɛ Yoshua tsu lɛ tsɔɔ akɛ nibii bibii baaje shishi yɛ Nuŋtsɔ lɛ gbi lɛ mli ni nɔ ni baanyiɛ sɛɛ ji yifalɛ babaoo ni baaba yɛ Yehowa Odasefoi ateŋ. Ehe bahia ni agbele nitsumɔhei ni yɔɔ yiteŋgbɛ nɛɛ, ni yɔɔ Brooklyn, New York lɛ mli babaoo bɔni afee ni akɛye abua ni akpee hiamɔ lɛ naa

[Mfonirii ni yɔɔ baafa 166]

Kojomɔ saji ni tamɔ la ni odasefoi enyɔ lɛ jaje lɛ fee Mose kɛ Elia gbalɛ nitsumɔ lɛ he mfoniri

[Mfonirii ni yɔɔ baafa 169]

Taakɛ wui ni he ekwakwao ni yɔɔ Ezekiel yitso 37 lɛ ji lɛ, akɛ odasefoi enyɔ lɛ ba wala mli ekoŋŋ kɛha ŋmɛnɛŋmɛnɛ beaŋ shiɛmɔ