Bo Toi Yehowa—Bulɔ lɛ Miiwie!
“Mitoo bulɔ miha Israel we Iɛ, . . . ni obɔ amɛ kɔkɔ oha mi.”—EZEKIEL 3:17.
1. Mɛni hewɔ esa akɛ obo toi beni Yehowa “bulɔ” lɛ wieɔ lɛ?
YEHOWA “bulɔ” lɛ kɛ Nyɔŋmɔ shɛɛsane lɛ miiha bianɛ. Ani oobo toi? Owala diɛŋtsɛ damɔ nakai sane lɛ ni okɛ hiɛsɔɔ aaabo toi ni otsu he nii lɛ nɔ. Etsɛŋ kwraa, ‘ni jeŋmaji lɛ aaale Yehowa’ yɛ be mli ni etseɔ egbɛi krɔŋkrɔŋ lɛ he kɛtsɔɔ yiwalɛ gbɛjianɔtoo nɛɛ hiɛkpatamɔ kɛ ewebii ayibaamɔ nɔ lɛ. Ani ohiɛ ka nɔ akɛ ooofata amɛhe? (Ezekiel 36:23; 39:7; 2 Petro 3:8-13) Ekolɛ ooonyɛ, ofata he, shi ja obo Yehowa “bulɔ” lɛ toi beni ewieɔ lɛ.
2. Mɛni jɛ mli ba kɛha Yuda maŋtsɛyeli lɛ akɛni amɛbooo Nyɔŋmɔ gbalɔi lɛ atoi hewɔ.
2 Nyɔŋmɔ gbalɔi lɛ ni amɛbooo amɛ toi lɛ kɛ oshara ba Yuda maŋtsɛyeli lɛ nɔ yɛ afi 607 D.Ŋ.B. Jeŋmaji ni ji henyɛlɔi lɛ nya yɛ nakai amaŋfɔfeemɔ ni Babilonbii lɛ kɛba lɛ hewɔ. Shi kwɛ bɔni awo Yehowa gbɛi lɛ hiɛ nyam yɛ be mli ni ekudɔɔ saji koni Yudafoi anɔkwafoi lɛ aku amɛsɛɛ amɛba amɛ shikpɔŋ nɔ yɛ afi 537 D.Ŋ.B. ekoŋŋ lɛ!
3. Mɛni yɔɔ Ezekiel wolo lɛ mli?
3 Yehowa gbalɔ ni ji Ezekiel gba nakai amaŋfɔfeemɔ lɛ kɛ amɛ sɛɛkuu ekoŋŋ lɛ efɔ shi. Nɔ ni yɔɔ Biblia wolo ni egbɛi ka nɔ ni eŋma egbe naa yɛ Babilonia aaafee afii 591 D.Ŋ.B. lɛ mli ji (1) Ezekiel nitsumɔ lɛ; (2) Gbalɛ nifeemɔi; (3) Shɛɛ saji ni akɛshiɔ Israel; (4) Yerusalem kojomɔ ni egba efɔ shi; (5) Gbalɛi ni ekɛshi jeŋmaji lɛ; (6) Shiwoi ni kɔɔ amɛ sɛɛkuu kɛ saramɔ he; (7) Gbalɛ ni akɛshiɔ Gog ni jɛ Magog; kɛ (8) Nyɔŋmɔ sɔlemɔ we lɛ he ninaa. Wɔmiifɔ bo nine ni okane wolo lɛ yɛ be mli ni wɔkaseɔ enɛ lɛ. Wɔbaana bɔ ni ekɔɔ wɔhe ŋmɛnɛ ni obaabo toi yɛ be mli ni Yehowa “bulɔ” lɛ wieɔ lɛ.a
Afa Nyɔŋmɔ Bulɔ Lɛ
4. (a) Mɛni Ezekiel na yɛ ninaa mli? (b) Namɛi ji “hiɛkalɔi” lɛ, ni mɛɛ sui komɛi amɛhiɛ?
4 Yɛ Tamuz 5, afi 613 D.Ŋ.B. (yɛ Yuda maŋtsɛ Yehoiakim nomŋɔɔ yɛ Babilon lɛ nɔ afi ni ji enumɔ lɛ nɔ lɛ) , no mli lɛ osɔfo Ezekiel ni eye afii 30 lɛ fata Yuda nomii ni yɔɔ “Kebar faa” ni ji Eufrate Faa lɛ nine ko ni ehe gbɛi lɛ naa lɛ ahe. Ena Yehowa ŋwɛi shwiili lɛ yɛ ninaa mli ni “hiɛkalɔi ejwɛ” fata he. (Kanemɔ Ezekiel 1:4-10.) “Hiɛkalɔi ejwɛ” aloo kerubim ni yɔɔ fiji lɛ ateŋ mɔ fɛɛ mɔ yɛ hiɛi ejwɛ. (Ezekiel 10:1-20; 11:22) Enɛ tsɔɔ akɛ kerubim lɛ yɛ suɔmɔ (gbɔmɔ jalɛsaneyeli (jata) hewalɛ (tsina) , kɛ nilee (okropɔŋ) ni Nyɔŋmɔ kɛha. Kerubim lɛ eko fɛɛ eko damɔ ‘kokloloŋto ni hɔ kokloloŋto teŋ’ ko he, ni Nyɔŋmɔ mumɔ loo enitsumɔ hewalɛ lɛ nyɛɔ etsiɔ amɛ kɛyaa he fɛɛ he.—Ezekiel 1:1-21.
5. Ŋwɛi shwiili lɛ damɔ shi kɛha mɛni, ni te esa akɛ bɔ ni wɔnaa lɛ nɛkɛ lɛ asa Yehowa webii ahe aha tɛŋŋ?
5 Shwiili lɛ nɔ Talɔ lɛ ji Yehowa anunyam lɛ kpɛmɔ he nɔkwɛmɔ nɔ. (Kanemɔ Ezekiel 1:22-28.) Kwɛ bɔni shwiili lɛ damɔ shi kɛha Nyɔŋmɔ ŋwɛi bɔfoi agbɛjianɔtoo lɛ jogbaŋŋ ha! (Lala 18:11; 103:20, 21; Daniel 7:9, 10) Yehowa taa nɔ kɛ shishinumɔ akɛ lɛ eyeɔ nɛkɛ bɔɔnii nɛɛ anɔ ni ekɛ amɛ tsuɔ eyiŋtoo he nii. Mɔ ni ta nɔ lɛ yɛ kpoo, tamɔ kwaabuɛtɛ ni fata he lɛ, shi Ezekiel naa kpɛ ehe naakpa. Yɛ anɔkwale mli lɛ, esa akɛ nɛkɛ Yehowa anunyam kɛ ehewalɛ akɛ eŋwɛi asafoi lɛ Gbɛjianɔtolɔ Ofe lɛ he ninaa nɛɛ aha wɔba wɔhe shi ni wɔda shi kɛha hegbɛ ni wɔna akɛ wɔɔsɔmɔ lɛ akɛ eshikpɔŋ nɔ gbɛjianɔtoo lɛ fa lɛ.
6. (a) Mɛɛ nitsumɔ Ezekiel nine shɛ nɔ, ni te ebu sɔɔmɔ kɛha Nyɔŋmɔ lɛ tɛŋŋ? (b.) Mɛɛ gbɔmɛi nɛkɛ Ezekiel baagba yɛ amɛteŋ lɛ, ni bɔ ni Nyɔŋmɔ kɛ lɛ ye ha lɛ he baanyɛ aba sɛɛnamɔ aha wɔ yɛ mɛɛ gbɛ nɔ?
6 Eyɛ mli,akɛ atsɛ lɛ akɛ “gbɔmɔ bi” koni akɛkai lɛ akɛ eji adesa ni ebaa shi kwraa moŋ, shi ahala Ezekiel akɛ Yehowa gbalɔ. (Kanemɔ Ezekiel 2:1-5.) Ezekiel baaya “jeŋmaji atuatselɔi,” ni ji Israel kɛ Yuda maŋtsɛyelii lɛ aŋɔɔ. Klɛŋklɛŋ lɛ, etsɔ ŋwɛi famɔ nɔ eye wolokpo ko ni yaafo lalai yɔɔ mli, shi eŋɔɔ yɛ edaaŋ tamɔ wo ejaakɛ eŋɔɔ enaa akɛ eeetsɔ Nyɔŋmɔ gbalɔ. Nakai nɔŋŋ hu eŋɔɔ Kristofoi ni afɔ amɛ mu lɛ kɛ amɛnanemɛi tsuji lɛ anaa akɛ amɛaafee Yehowa odasefoi. Ezekiel baagba yɛ gbɔmɛi ni tsui wa ni amɛyi wala ateŋ, shi Nyɔŋmɔ baaha ehiɛ ati kɛ faishitswaa tamɔ amɛhiɛaŋ, ni eha ehiɛnaa awa tamɔ diamɛnte aloo ojarawa tɛ. Ekɛ ekaa baagba, amɛbo toi jio amɛbooo toi jio. Eyɛ miishɛɛ akɛ aaale akɛ akɛni Nyɔŋmɔ fi Ezekiel sɛɛ yɛ shihilɛi ni mli wawai ashishi hewɔ lɛ, ebaaye ebua wɔ ni wɔye odase yɛ ekaa naa yɛ shikpɔŋkuku fɛɛ shikpɔŋkuku mli.—Ezekiel 2:6–3:11.
7. Mɛɛ gbɛnaa nii yɔɔ Ezekiel nitsumɔ lɛ mli?
7 Wolokpo lɛ yeli ha Ezekiel ‘mli wo la yɛ mumɔŋ’ bɔni sa shɛɛsane lɛ pɛpɛɛpɛ. Eyahi Tel-abib ‘kɛ hejɔ̃mɔ gbii kpawo’ ni ewieee ni eesusu sane lɛ he. (Ezekiel 3:12-15) Ehe miihia ni wɔ hu wɔjwɛŋ saji anɔ ni wɔkase nii waa ni wɔnu mumɔŋ nibii ni mli kwɔlɔ lɛ ashishi. Akɛni eyɔɔ sane ko ni ebaajaje hewɔ lɛ, Nyɔŋmɔ kɛ nitsumɔ wo Ezekiel dɛŋ akɛ bulɔ. (Kanemɔ Ezekiel 3:16-21.) Bulɔ hee ni ahala lɛ lɛ baabɔ Israelbii mlakwalɔi lɛ kɔkɔ akɛ ŋwɛi hiɛkpatamɔ ko ka amɛhiɛ.
8. Namɔ sɔmɔɔ akɛ Yehowa “bulɔ” ŋmɛnɛ, ni namɛi kɛ amɛhe ebɔ amɛhe lɛ?
8 Kɛ Ezekiel ebɔɔɔ kɔkɔ akɛ bulɔ lɛ, Yehowa baaha efee mɔ ni mɛi ni baagboi lɛ agbele jɛ lɛ. Eyɛ mli akɛ mɛi ni sumɔɔɔ ni eka amɛhiɛ lɛ kɛ kpai baafimɔ lɛ yɛ okadi gbɛ nɔ moŋ, shi ekɛ ekaa baajaje Nyɔŋmɔ shɛɛsane lɛ. (Ezekiel 3:22-27) Yɛ wɔgbii nɛɛ amli lɛ, Kristendom ekpoo akɛ eeebo toi ni ebɔɔ mɔdɛŋ ni etsi Kristofoi ni afɔ amɛ mu lɛ gbɛ. Shi kɛjɛ 1919 kɛbaa nɛɛ nɛkɛ mɛi ni afɔ amɛ mu nɛɛ esɔmɔ akɛ Yehowa “bulɔ,” ni amɛkɛ ekaa jajeɔ shɛɛsane kɛha nɛkɛ gbɛjianɔtoo nɛɛ “naagbee be” lɛ. (Daniel 12:4) Mɛi ni fata amɛhe yɛ nɛkɛ nitsumɔ nɛɛ mli ji Yesu “toi krokomɛi” lɛ ateŋ “asafo babaoo” ni amɛyi faa yɛ be fɛɛ mli lɛ. (Kpojiemɔ 7:9, 10; Yohane 10:16) Akɛni “bulɔ” kuu lɛ yaa nɔ ewieɔ Nyɔŋmɔ shɛɛsane lɛ hewɔ lɛ, yɛ anɔkwale mli lɛ mɛi ni afɔ amɛ mu lɛ ateŋ mɔ fɛɛ mɔ kɛ “asafo babaoo” lɛ hu baasumɔ ni amɛjaje enɛ amɛtsɔɔ akɛ daa shiɛlɔ.
Gbalɛi ni Akɛfee Nɔkwɛmɔ Nii
9. (a) Ezekiel to okadi kɛha wɔ yɛ mɛɛ gbɛ nɔ? (b) Mɛni Ezekiel fee koni ekɛfee Yerusalem he ka ni Babilon baawo lɛ he mfoniri, ni gbii 390 kɛ gbii 40 lɛ tsɔɔ mɛni?
9 Yɛ no sɛɛ lɛ, Ezekiel kɛ heshibaa kɛ ekaa fee gbalɛ mli nɔkwɛmɔ nii ni ewieee, ni akɛto okadi ko ni esa akɛ etsirɛ wɔ koni wɔtsu nitsumɔ ni Nyɔŋmɔ kɛwo wɔdɛŋ lɛ he nii yɛ heshibaa mli kɛ ekaa mli. Bɔni afee ni efee Babilon he kawoo lɛ he mfoniri lɛ, ebaaka shi ni eekwɛ ntayaa ko ni efee Yerusalem he mfoniri yɛ nɔ. Ezekiel baaka ebɛku ŋmawu nɔ gbii 390 koni ekɛtere Israel akutsei nyɔŋma maŋtsɛyeli lɛ anɔtɔmɔ lɛ, kɛkɛ lɛ ebaaka eninejurɔ ŋmawu nɔ gbii 40 koni ekɛtere Yuda akutsei enyɔ lɛ nɔsha lɛ. Gbi kome baadamɔ shi aha afi. No hewɔ lɛ afii 890 lɛ jeɔ shishi kɛjɛɔ be mli ni ato Israel shishi yɛ afi 997 D.Ŋ.B. kɛbashi Yerusalem hiɛkpatamɔ yɛ afi 607 D.Ŋ.B. Yuda afii 40 lɛ jeɔ shishi kɛjɛɔ be mli ni ahala Yeremia akɛ Nyɔŋmɔ gbalɔ yɛ afi 647 D.Ŋ.B. kɛbashi Yuda hiɛkpatamɔ yɛ afi 607 D.Ŋ.B.—Ezekiel 4:1-8; Yeremia 1:1-3.
10. Te Ezekiel fee nɔ ni baajɛ hekawoo le mli aba lɛ he mfoniri eha tɛŋŋ, ni mɛni wɔbaanyɛ wɔkase yɛ anɔkwale ni eji akɛ Nyɔŋmɔ waje lɛ lɛ mli?
10 Yɛ enɛ sɛɛ lɛ, Ezekiel fee nɔ ni jɛ hekawoo lɛ mli ba lɛ he nɔkwɛmɔ nɔ. Bɔni afee ni ekɛtsɔɔ hɔmɔ ni baaba lɛ eye niyenii ni tsiimɔ shɛɔ ŋsɛnii tɛ kome fa ni enu nu ni efalɛ shɛɔ gbɔi atɔ kome daa gbi. Aboloo ni ebaaye ji (ŋmaa kɛ akoko kɛ akpataramɔ kɛ yɔɔ kɛ blɔfo akoko kɛ abele ni akɛfutu ni mla eŋmɛɛɛ gbɛ ni asha yɛ sɛbo nɔ) ni he tseee. (3 Mose 19:19) Nifeemɔ nɛɛ tsɔɔ akɛ ohia kpeteŋkpele ji nɔ ni baaba Yerusalembii lɛ anɔ. Shi kwɛ bɔni enɛ haa wɔtsuii nyɔɔ wɔmli ni akɛ taakɛ Yehowa waje Ezekiel yɛ shihilɛ ni mli wa nɛɛ shishi lɛ, Nyɔŋmɔ baaye abua wɔ ni wɔhi shi akɛ anɔkwafoi ni wɔhi shi ni wɔtsu shiɛmɔ nitsumɔ ni ka wɔhiɛ lɛ he nii yɛ shihilɛi ni mli wawai fɛɛ sɛɛ!—Ezekiel 4:9-17.
11. (a) Mɛɛ nifeemɔi atsi ta yɛ Ezekiel 5:1-4, ni mɛni jl nɔ ni enɛɛmɛi tsɔɔ? (b) Esa akɛ anɔkwale ni eji akɛ Ezekiel nɔkwɛmɔ nii lɛ ba mli lɛ ana wɔnɔ hewalɛ yɛ mɛɛ gbɛ nɔ?
11 Yɛ enɛ sɛɛ lɛ, Ezekiel kɛ klaŋte ni naa ba shɛ eyitsɔi kɛ etsɛŋ. (Kanemɔ Ezekiel 5:1-4) Mɛi ni gboiɔ yɛ hɔmɔ kɛ hela naa lɛ ayifalɛ baatamɔ gbalɔ lɛ yitsɔi mlijaa etɛ mli ekome ni eshã yɛ Yerusalem teŋ lɛ. Mɛi ni ta lɛ baagbe amɛ lɛ ayifalɛ tamɔ mlijaa etɛ ni ekɛ klaŋte folɔ mli lɛ. Abaagbɛ mɛi ni baaje mli lɛ ashwa jeŋmaji lɛ ateŋ tamɔ mlijai etɛ mli ekome ni aŋɔ ashwã kɔɔyɔɔ mli lɛ. Shi nomŋɔɔbii nɛɛ ateŋ mɛi fioo baatamɔ yitsɔi ni ahala kɛjɛ nɔ ni agbɛ ashwa kɔɔyɔɔŋ ni akɛfi Ezekiel ataade naa ni ekɛtsɔɔ akɛ amɛbaatee anɔkwale jamɔ shi yɛ Yuda yɛ afi 70 amaŋfɔfeemɔ lɛ sɛɛ lɛ. (Ezekiel 5:5-17) Esa akɛ anɔkwale ni eji akɛ Yehowa ha enɛ kɛ gbalɛ nɔkwɛmɔ nii krokomɛi ba mli lɛ atsirɛ wɔ ni wɔkɛ wɔhe afɔ enɔ akɛ Mɔ ni haa gbalɛ baa mli.—Yesaia 42:9; 55:11.
Hiɛkpatamɔ Miiba!
12. (a) Ezekiel 6:1-7 tsɔɔ akɛ mɛi ni baaba abatutua amɛ lɛ baafee mɛni? (b) Taakɛ Ezekiel gbalɛ lɛ tsɔɔ lɛ, mɛni ji mfonirifeemɔ Yerusalem, ni mɛni baaba enɔ?
12 Ezekiel wie etsɔɔ shikpɔŋ lɛ nɔ bii lɛ yɛ afi 613 D.Ŋ.B. koni ekɛtsɔɔ nɔ ni baaba Yudabii wɔŋjalɔi lɛ anɔ. (Kanemɔ Ezekiel 6:1-7) Mɛi ni tutua maŋ lɛ baafite hei grɔŋŋi lɛ, tsofa-kɛ-ŋma tsei lɛ, kɛ afɔleshaa latɛi lɛ ni akɛtsuɔ nii yɛ apasa jamɔ mli lɛ. Susumɔ ni aaasusu bɔni hiɛkpatamɔ aaaba kɛtsɔ hɔmɔ, hela kɛ tawuu nɔ lɛ baaha mɔ abolɔ akɛ “Kpoo ha Israel!” ni amɛaama enɛ nɔ mi kɛtsɔ dɛtswaa kɛ naji ni akɛaashimɔ shi nɔ. Mumɔŋ ajwamaŋbɔlɔi lɛ agbohii lɛ baakamɔ shi yɛ amɛhei grɔŋŋi lɛ fɛɛ. Beni Kristendom, okadi Yerusalem lɛ hu kɛ hiɛkpatamɔ ni tamɔ nakai nɔŋŋ aaakpe lɛ, eeena ele akɛ emanehulu lɛ jɛ Yehowa.—Ezekiel 6:8-14.
13. Mɛni ji “tso” ni yɔɔ Yehowa dɛŋ lɛ, ni mɛni baajɛ ekɛ nitsumɔ mli aba?
13 ‘Naagbee lɛ miiba shikpɔŋ lɛ koji ejwɛ lɛ nɔ,’ nɔ ni ji Yuda ni yeee anɔkwale lɛ jamɔ gbɛjianɔtoo lɛ. Amanehulu nibii ni egba “afoforo” loo “ahwanya” baabɔle wɔŋjalɔ lɛ yitso beni “tso” ni yɔɔ Nyɔŋmɔ dɛŋ—Nebukadnezar kɛ Babilonia asraafoi lɛ—aaate shi awo Yehowa webii lɛ kɛ sɔlemɔ we lɛ. Abaagbe mɛi ni ji Yuda ‘asafo’ ni heɔ nii ni hɔɔ nii lɛ aloo akɛ amɛ baaya nomŋɔɔ mli, ni mɛi ni eshwɛɔ yɛ sɛɛ lɛ anijiaŋ baagbɔjɔ yɛ tsuifaa hewɔ. Kɛ abutu amɛ apasa jamɔ gbɛjianɔtoo lɛ, amɛbaashɛ amɛyiteŋ kpataa kɛ yarafeemɔ.—Ezekiel 7:1-18.
14. Mɛni ji nɔ ni nyɔɔŋnihamɔ nyɛɛɛ afee aha Yerusalem, ni mɛni ji nɔ ni no tsɔɔ kɛha Kristendom?
14 Anyɛŋ aha Yehowa kɛ eblafoi ata lɛ nyɔɔŋ nii. (Kanemɔ Ezekiel 7:19.) Nyɔɔŋ nii nyɛɛɛ ahere ‘teemɔ he’ lɛ ni ji Krɔŋkrɔŋ Fe Fɛɛ lɛ koni Kaldea “ojotswalɔi” lɛ akabule lɛ ni amɛha krɔŋkrɔŋ nibii lɛ ni amɛshi sɔlemɔ we lɛ amaŋfɔ. Yehowa ha ‘mɛi ni he wa lɛ ahewoo lɛ sɛɛ fo’ beni amɔ Maŋtsɛ Zedekia ni agbe Levi osɔfoyeli lɛ mli hiɛnaanɔbii lɛ. (2 Maŋtsɛmɛi 25:4-7, 18-21) Dabi, eshafeelɔi ni yɔɔ Yerusalem ni awo he ka lɛ mli lɛ nyɛŋ ajo amanehulu naa foi kɛtsɔ nyɔɔŋ nihamɔ nɔ beni Nyɔŋmɔ ‘kojoɔ amɛ’ akɛ mɛi ni eku kpaŋmɔ mli lɛ. Nakai nɔŋŋ hu, yɛ nibii ni Kristendom buɔ lɛ akɛ krɔŋkrɔŋ nii lɛ bulemɔ ni baa nɛɛ mli lɛ. enyɛŋ eha nyɔɔŋ nii ni ejo ŋwɛi fɔbuu kojomɔ ni ji hiɛkpatamɔ ni baa enɔ lɛ naa foi. Ebaafee nɔ ni ekpe sɛɛ tsɔ akɛ eeebo Yehowa “bulɔ” lɛ toi.—Ezekiel 7:20-27.
Ŋkɔmɔ ni Ayeɔ yɛ Nihii Nii lɛ Ahewɔ
15. Mɛni Ezekiel na yɛ Yerusalem, ni esa akɛ enɛ asa wɔhe yɛ mɛɛ gbɛ nɔ?
15 Beni Ezekiel na Nyɔŋmɔ anunyam lɛ he ninaa yɛ Elul 5, 612 D.Ŋ.B. lɛ, ‘nɔ ko tamɔ nine mɔ eyitsɔi mli’ ni ewolɛ kɛtee Yerusalem kɛtsɔ mumɔ mli. No mli lɛ ŋwɛi shwiili lɛ hu etsi ehe kɛjɛ jɛmɛ. Esa akɛ nɔ ni Ezekiel na lɛ aha wɔhe anyaŋe wɔ akɛ wɔɔbo hemɔkɛyeli kwalɔi atoi. (Abɛi 11:9) Israel hemɔkɛyeli kwalɔi miija amagai ahe okadii (ekolɛ wɔŋ tso lɛ) yɛ sɔlemɔ we ni ji Nyɔŋmɔ awuŋayeli shia lɛ. (2 Mose 20:2-6) Yɛ be mli ni ebote emligbɛ lɛ, mɛɛ nihii nii Ezekiel na nɛkɛ! (Kanemɔ Ezekiel 8:10, 11) Kwɛ hiɛgbejianii akɛ Israel onukpai 70 aaasha tsofa-kɛ-ŋma aha apasa nyɔŋmɔi ni damɔ shi kɛha nibii ni anyaŋeɔ sɔrɔtoi ni atɛŋ!—Ezekiel 8:1-12.
16. Mɛni Ezekiel ninaa lɛ tsɔɔ yɛ nɔ ni jɛɔ hemɔkɛyeli kwamɔ mli baa he?
16 Ezekiel ninaa lɛ tsɔɔ bɔni hemɔkɛyeli kwamɔ ji nɔ ni kɛ mumɔŋ gbele baa haa lɛ mli. Ejaakɛ alaka Israelyei ni amɛwo yara ni amɛmiifo Tamuz, Babilon nyɔŋmɔ kɛ esuɔlɔ Ishta ni ji nibaanii anyɔŋmɔyoo lɛ! Ni kwɛ musubɔɔ sane akɛ amɛaana Israel hii 25 yɛ sɔlemɔ we lɛ mligbɛ kpo lɛ nɔ ni amɛmiija hulu! (5 Mose 4:15-19) Amɛkɛ tso nine ko ni ji nihii nii, ekolɛ nɔ ni damɔ shi kɛha adesa nuu tso toɔ Nyɔŋmɔ gugɔ naa. Ŋwanejee ko bɛ he akɛ Yehowa boŋ amɛsɔlemɔi atoi, ni Kristendom baatao eyelikɛbuamɔ sɛɛ gbɛ yaka yɛ “amanehulu kpeteŋkpele” lɛ mli!—Ezekiel 8:13-18; Mateo 24:21.
Akadi Kɛha Yibaamɔ
17. Mɛɛ hii kpawo he ninaa ana lɛ, ni mɛni amɛfee?
17 Yɛ no sɛɛ lɛ, wɔna hii kpawo—mɔ kome lɛ eji woloŋmalɔ ni bu klala ni mɛi ekpaa lɛ hiɛ jwaramɔ dadei. (Kanemɔ Ezekiel 9:1-7.) “Hii ekpaa” lɛ damɔ shi kɛha Yehowa ŋwɛi blafoi ata lɛ, eyɛ mli akɛ ebaanyɛ ekɛ shikpɔŋ nɔ bii hu atsu nii. Mɛi ni ‘nuu ni wo klala’ lɛ kadi amɛhiɛnai lɛ anine baashɛ Nyɔŋmɔ mɔbɔnalɛ nɔ ejaakɛ amɛsumɔɔɔ nihii nii ni afeɔ yɛ sɔlemɔ we lɛ. Hiɛkpatamɔ ni “hii ekpaa” lɛ kɛba lɛ je shishi yɛ onukpai wɔŋjalɔi 70 lɛ kɛ yei ni ewo yara amɛha Tamuz kɛ hulujalɔi 25 lɛ anɔ. Babilon asraafoi lɛ gbe mɛnɛɛmɛi kɛ mɛi krokomɛi ni yeee Nyɔŋmɔ anɔkwale lɛ yɛ afi 607 D.Ŋ.B.
18. (a) Namɔ ji ŋmɛnɛŋmɛnɛ beaŋ ‘nuu ni wo klala’ lɛ? (b) Mɛni ji “kadimɔ” lɛ, namɛi yɔɔ enɛ eko ni mɛni baajɛ eko ni mɔ ko yɔɔ lɛ mli aba?
18 Okadi ‘nuu ni wo klala’ lɛ ji Kristofoi ni afɔ amɛ mu lɛ akuu lɛ. Amɛyaa shia-kɛshia amɛkɛ mfoniri feemɔ mli kadimɔ nii ko yakadiɔ mɛi ni batsɔmɔɔ “asafo babaoo” ni ji Kristo “toi krokomɛi” lɛ fa lɛ ahiɛnai. “Okadi” lɛ ji odaseyeli ni tsɔɔ akɛ nɛkɛ toi nɛɛ ejɔɔ amɛhe nɔ ni abaptisi amɛ ni amɛhiɛ Kristo su. ‘Amɛyeɔ ŋkɔmɔ ni amɛdamɔɔ ŋtsɔi yɛ nihii nii’ ni afeɔ yɛ Kristendom teŋ lɛ hewɔ, ni amɛje kpo kɛjɛ Babilon Kpeteŋkpele, jeŋ apasa jamɔ maŋtsɛyeli lɛ mli. (Kpojiemɔ 18:4, 5) Amɛ “okadi” lɛ baaha efee faŋŋ eha Nyɔŋmɔ blafoi ata lɛ akɛ esa akɛ abaa amɛyi yɛ “amanehulu kpeteŋkpele” lɛ mli. Amɛbaanyɛ amɛhiɛ nakai “okadi” lɛ kɛtsɔ amɛhe ni amɛkɛaabɔ mɛi ni afɔ amɛ mu lɛ yɛ mɛi krokomɛi akadimɔ mli lɛ nɔ. No hewɔ lɛ kɛ ‘akadi bo lɛ,’ na ‘kadimɔ’ nitsumɔ lɛ mli gbɛfaŋnɔ yɛ ekaa naa.—Ezekiel 9:8-11.
Hiɛkpatamɔ ni Tamɔ La Miiba!
19. Mɛni ji nɔ ni ŋmɛnɛŋmɛnɛ beaŋ ‘nuu ni wo klala’ lɛ gbɛɔ eshwaa Kristendom fɛɛ lɛ?
19 Nuu ni wo klala lɛ tee ŋwɛi shwiili lɛ kokloloŋtoi lɛ ateŋ ni eyakpiti ŋai kɛ la. Ekɛ enɛ shwa Yerusalem nɔ, ni ekɛ nakai feemɔ tsɔ hiɛ ebɔ amɛ kɔkɔ akɛ ehiɛkpatamɔ lɛ baafee Nyɔŋmɔ mlifu ni tamɔ la lɛ kpojiemɔ. (Ezekiel 10:1-8; Yaafo 2:2-4; 4:11 Afɔse Yehowa mlifu lɛ ashwie shi kɛtsɔ Babilonbii lɛ anɔ yɛ Ezekiel gbii lɛ amli. (2 Kronika 36:15-21; Yeremia 25:9-11) Shi wɔ gbii nɛɛ hu? Okadi ‘nuu ni wo klala’ lɛ gbɛɔ Nyɔŋmɔ shɛɛsane ni tamɔ la lɛ eshwaa Kristendom fɛɛ ekɛbɔɔ lɛ kɔkɔ akɛ etsɛŋ ni abaafɔse ŋwɛi mlifu ashwie lɛ kɛ mɛi ni eshwɛ yɛ Babilon Kpeteŋkpele lɛ mli lɛ fɛɛ anɔ. Shi, mɛi ni kpoɔ akɛ amɛaabo Yehowa “bulɔ” lɛ toi lɛ bɛ hiɛnɔkamɔ ko akɛ amɛbaaje mli.—Yesaia 61:1, 2; Kpojiemɔ 18:8-10, 20.
20. (a) Esa akɛ gbeekpamɔ kɛ ekomefeemɔ ni ka ŋwɛi shwiili lɛ kokloloŋtoi lɛ kɛ kerubim lɛ ateŋ lɛ asa wɔhe yɛ mɛɛ gbɛ nɔ? (b) Mɛni ji nɔ ni lumɛi komɛi feɔ, ni amɛkɛ Yerusalem to mɛni he yɛ gbɛ ni ejaaa nɔ?
20 Agbalaa jwɛŋmɔ kɛyaa ŋwɛi shwiili lɛ nɔ ekoŋŋ, Nyɔŋmɔ ŋwɛi gbɛjianɔtoo lɛ. Yɛ be mli ni wɔkadiɔ gbeekpamɔ ni yɔɔ shwiili lɛ kɛ kokloloŋtoi lɛ kɛ kerubim lɛ ateŋ lɛ, esa akɛ no atsirɛ wɔ ni wɔkɛ Nyɔŋmɔ shikpɔŋ nɔ gbɛjianɔtoo lɛ afee ekome yɛ nɔ fɛɛ nɔ mli. Yɛ anɔkwayeli hewɔ lɛ, esa akɛ wɔ hu wɔbu he kɛjɛ hii kutumpɔfoi adɛŋ. (Ezekiel 10:9-22) Gbɔmɛi ni tamɔ nɛkɛ yɛ Ezekiel gbii lɛ amli, ejaakɛ enaa lumɛi 25 ni miikpaŋ ni amɛtse atua amɛshi Nyɔŋmɔ blafoi lɛ koni Mizraim aye abua amɛ. Amɛkɛ Yerusalem to kukwɛi he ni amɛkɛ amɛ diɛŋtsɛ amɛhe to heloo ni efee shweshweeshwe yɛ mli lɛ he. Shi kwɛ bɔ ni amɛtɔ̃ kwraa ha! Babilon “gbɔi” lɛ “klante” baagbe mɛi ni kpaŋɔ nɛɛ ateŋ mɛi komɛi, ni mɛi krokomɛi hu baatsɔmɔ nomii. Enɛ baaba mli akɛni Nyɔŋmɔ ebu Yudafoi lɛ fɔ akɛ amɛku ekpaŋmɔ lɛ mli lɛ hewɔ; (Ezekiel 11:1-13; 2 Mose 19:1-8; 24:1-7; Yeremia 52:24-27) Akɛni Kristendom kɛɔ akɛ ekɛ Nyɔŋmɔ ebote kpaŋmɔ mli shi ekɛ ehe fɔɔ jeŋmaji akpaŋmɔi anɔ hewɔ lɛ, ehiɛ baakpata yɛ tutuamɔ ni Yehowa blafoi atai lɛ kɛaaba enɔ lɛ hewɔ.
21. Mɛni ba yɛ Yuda afii 70 amaŋfɔfeemɔ lɛ sɛɛ, ni mɛni ni tamɔ nakai nɔŋŋ sa shwɛɛnii ni afɔ amɛ mu lɛ ahe?
21 Eyɛ mli akɛ ‘agbɛ’ Israelbii lɛ ‘ashwa shikpɔji anɔ’ moŋ yɛ 617 D.Ŋ.B., shi Nyɔŋmɔ ji “he krɔŋkrɔŋ,” aloo abobaahe kɛha nomii ni amɛtsake amɛtsuii lɛ. (Ezekiel 11:14-16) Shi mɛni hu abaanyɛ akpa gbɛ? (Kanemɔ Ezekiel 11:17-21.) Yɛ Yuda afii 70 amaŋfɔfeemɔ lɛ sɛɛ lɛ, shwɛɛnii ko ku sɛɛ amɛba “Israel shikpɔŋ” ni atsuu he lɛ nɔ ekoŋŋ. Kɛ akɛaato he lɛ, beni ahere shwɛɛnii ni afɔ amɛ mu lɛ yiwala kɛjɛ Babilon nomŋɔɔ mli yɛ 1919 lɛ, yɛ mumɔ lɛ gbɛtsɔɔmɔ shishi hewɔ lɛ, be ko mumɔŋ Israel “shikpɔŋ” ni etsɔ amaŋfɔ lɛ ebafee nɔ ni atsuu nɔ. No hewɔ lɛ mɛi ni akadi amɛ kɛha yibaamɔ lɛ miina ŋwɛi duromɔ mli miishɛɛ bianɛ kɛ mumɔŋ Israel shwɛɛnii ni aku sɛɛ abua amɛ naa lɛ. Ni kɛji akɛ otee nɔ obo Nyɔŋmɔ “bulɔ” lɛ toi lɛ, ooonyɛ ofata mɛi ni baaje mli yɛ be mli ni Yehowa gbalaa eklante lɛ ahe.b
[Shishigbɛ niŋmai]
a Kɛ be yɛ lɛ, nikasemɔ nɔkwɛlɔ lɛ aha akane ŋmalɛi ni atsɔmɔ eniŋmai lɛ yɛ be mli ni asafo lɛ kaseɔ enɛ lɛ kɛ nikasemɔi enyɔ hu ni baanyiɛ sɛɛ lɛ. Abaanyɛ akɛ Teokrase Sɔɔmɔ Skul lɛ mli ŋmalɛi otii lɛ hu adamɔ Ezekiel wolo lɛ mli nikasemɔi nɛɛ anɔ.
b Ajie kɛjɛ September 15, 1988 Watchtower lɛ mli.
Ani Okaiɔ?
◻ Mɛni hewɔ esa akɛ obo toi beni Yehowa “bulɔ” lɛ wieɔ lɛ?
◻ Nyɔŋmɔ ŋwɛi shwiili Iɛ damɔ shi kɛha mɛni?
◻ Namɛi sɔmɔɔ ŋmɛnɛ akɛ Yehowa “bulɔ” Iɛ?
◻ Mɛɛ hemɔkɛyeli kwamɔ Ezekiel na yɛ Yerusalem, ni esa akɛ ninaa nɛɛ asa wɔhe yɛ mɛɛ gbɛ nɔ?
◻ Namɛi ji ŋmɛnɛŋmɛnɛ beaŋ ‘nuu ni wo klala’ lɛ ni mɛni ji ‘kadimɔ’ ni akɛkadiɔ hiɛnai Iɛ?