“Ni Amɛaana Amɛle Akɛ Mi Ji Yehowa”
“Ni mihaŋ abule migbɛi krɔŋkrɔŋ Iɛ dɔŋŋ, ni jeŋmaji lɛ aaana ale akɛ mi ji Yehowa.”—EZEKIEL 39:7.
1, 2. Te wɔfeɔ tɛŋ wɔleɔ akɛ Yehowa eŋmɛŋ gbɛ ni abule egbɛi krɔŋkrɔŋ lɛ kɛya naanɔ?
BLEMA Israelbii lɛ bule Yehowa gbɛi krɔŋkrɔŋ lɛ ni Ezekiel wolo lɛ feɔ ene faŋŋ. Shi Kristendombii hu buleɔ Nyɔŋmɔ ni amɛkɛɔ akɛ amɛjaa lɛ lɛ gbɛi.
2 Ani Jeŋ Muu Fɛɛ Maŋtse lɛ baaya nɔ ni eŋmɛ gbɛ ni abule egbɛi kɛya naanɔ? Dabi, ejaakɛ ejaje akɛ: “Mi mihaŋ abule migbɛi krɔŋkrɔŋ lɛ dɔŋŋ, ni ‘jeŋmaji lɛ aaana ale akɛ Miji Yehowa.” Ezekiel 39:7; kwɛmɔ Ezekiel 38:23 hu.) Mɛni ji nɔ ni enɛ baatsɔɔ? Ni mɛɛ nii abaanyɛ akase kɛjɛ Ezekiel wolo lɛ naagbee yitsei lɛ amli?
Gbalɛi ni Agba Ashi Mɛi Krokomɛi
3. (a) Mɛni ji nɔ ni jeŋmaji lɛ fee yɛ be mli ni Yuda naa nɔ lɛ? (b) Mɛɛ su hewɔ ejie Tiro “maŋtse” lɛ kɛtee, ni te esa akɛ enɛ asa wɔhe aha tɛŋŋ?
3 Yɛ Yerusalem hiɛkpatamɔ lɛ sɛɛ lɛ, abu Amon fɔ yɛ emii ni shɛ ehe yɛ Yuda amanehulu lɛ hewɔ, kɛ Moab hu akɛni eye Yuda he feo hewɔ. Abu Edom fɔ yɛ nyɛɛ ni eyɔɔ kɛha amɛ lɛ kɛ Filistibii lɛ hu ni hiɛ oweletɔɔ mumɔ lɛ hewɔ ni enɛ kɛ Nyɔŋmɔ “mlila kamɔi” baaba amɛnɔ. (Ezekiel 25:1-17; Abɛi 24:17, 18) Akɛni emli fili lɛ yɛ Yerusalem amanehulu lɛ hewɔ lɛ, Tiro maŋ lɛ baagbee shi yɛ Nebukadnezar hiɛ aloo yɛ Nebukadrezar (taakɛ bɔ ni Babiloniabii lɛ tsɛɔ lɛ lɛ) hiɛ. (Ezekiel 26:1-21) Etamɔ lɛlɛ ni baashiu kɛ̃. (Ezekiel 27:1-36) Akpa Tiro “maŋtsɛ” lɛ (eka shi faŋŋ akɛ amɛ odehei aweku lɛ) akɛni eyɔɔ henɔwomɔ mumɔ tamɔ Satan nɔ lɛ hewɔ. (Ezekiel 28:1-26) Yɛ anɔkwale mli lɛ, esa akɛ wɔkpoo eshafeemɔ kɛ henɔwomɔ ni baaha wɔbule Yehowa gbɛi lɛ.—Lala 138:6; Abɛi 21:4.
4. Mɛni yɔɔ ni mɛɔ Farao ni jɛ Mizraim lɛ?
4 Ezekiel gba afii 40 amaŋfɔ ni abaafee Mizraim. Eninamɔ lɛ fɛɛ baafee nyɔmɔwoo ni akɛbaaha Nebukadnezar yɛ tawuu mli nii ni etsu yɛ Yehowa fɔbuu kojomɔ ni ekɛba Tiro nɔ lɛ hewɔ. (Ezekiel 29:1-21) Kɛ Nyɔŋmɔ kwɛ ni agbɛ Mizraimbii lɛ ashwa lɛ, ‘amɛbaana amɛle akɛ lɛ ji Yehowa.’ (Ezekiel 30:1-26) Akɛni akɛ lɛ damɔ shi aha Mizraim hewɔ lɛ, akɛ Farao henɔwolɔ lɛ to tseneduru tso ni kwɔ gojoo ni abaafo lɛ afɔ shi he. (Ezekiel 31:1-18) Yɛ naagbee lɛ, Ezekiel wo yaafo lalai anɔ yɛ Farao kɛ bɔ ni Mizraim baakpeleke shi kɛya Sheol lɛ he.—Ezekiel 32:1-32.
Bulɔ lɛ Nitsumɔ
5. (a) Mɛɛ shihilɛi ashishi pɛ Nyɔŋmɔ kpɛlɛɔ mumɔŋ bulɔ lɛ nɔ yɛ? (b) Akɛ ‘anyiɛ yɛ wala akpɔi lɛ amli’ lɛ tsɔɔ mɛni?
5 Akai Ezekiel yɛ enitsumɔ akɛ bulɔ lɛ he. (Ezekiel 33:1-7) Shi, Nyɔŋmɔ kpɛlɛɔ mumɔŋ bulɔ lɛ nɔ pɛ ejaakɛ etsu enitsumɔ ni ebɔ efɔŋfeelɔi lɛ kɔkɔ. (Kanemɔ Ezekiel 33:8, 9.) No hewɔ lɛ, “bulɔ” kuu ni afɔ amɛ mu lɛ kɛ ekaa jajeɔ ŋwɛi kɔkɔbɔi lɛ tamɔ Ezekiel. Akɛni Nyɔŋmɔ nyaaa efɔŋfeelɔ gbele he hewɔ lɛ, ebuŋ amɛ tsutsu shihilɛ lɛ he akɔntaa eshiŋ amɛ kɛji akɛ amɛbo kɔkɔbɔi lɛ atoi ni ‘amɛnyiɛ yɛ wala akpɔi lɛ amli’ lɛ. Yɛ Ezekiel gbii lɛ amli lɛ, nakai akpɔi lɛ amli nyiɛmɔ tsɔɔ akɛ amɛaabo Mla lɛ toi, shi amrɔ nɛɛ lɛ nɔ ni etsɔɔ ji Kristo kpɔmɔ lɛ ni aaakɛlɛ nɔ ni aaafee esɛɛnyiɛlɔ. (1 Petro 2:21) Nɔ ko fɔŋ ko bɛ ni tsɔɔ akɛ gbɛ ni Nyɔŋmɔ tsɔɔ nɔ egbalaa gbɔmɛi atoi aloo ewoɔ gbɔmɛi anyɔmɔ lɛ ejaaa, ni yibaamɔ kɛmiitsɔ “amanehulu kpeteŋkpele” lɛ mli lɛ damɔ ekpɔi lɛ anɔyeli nɔ.—Ezekiel 33:10-20; Mateo 24:21.
6. Ŋmɛnɛ, mɛi pii tamɔ Yuda nomii lɛ yɛ Ezekiel gbii lɛ amli yɛ mɛɛ gbɛ nɔ?
6 Kɛmiiba afi 607 D.Ŋ.B. lɛ naagbee lɛ, foijelɔ ko babɔ Yerusalem hiɛkpatamɔ lɛ he amaniɛ, ni Ezekiel wie Yehowa shɛɛsane lɛ ekoŋŋ. (Ezekiel 33:21-29) Te nomii lɛ fee amɛnii amɛha tɛŋŋ? (Kanemɔ Ezekiel 33:30-33.) Ŋmɛnɛ, mɛi pii tamɔ Yuda nomii ni Ezekiel ji ‘suɔmɔ he lalafolɔ’ yɛ amɛhiɛ lɛ. ‘Kɛ mɛi ni afɔ amɛ mu lɛ kɛ amɛhefatalɔi lɛ tee amɛŋɔɔ yɛ shia-kɛ-shia lɛ, nɛkɛ gbɔmɛi nɛɛ boɔ maŋtsɛyeli lɛ he sane lɛ toi tamɔ nɔ ni eŋɔɔ amɛnaa, shi amɛmɔɔɔ mli. Kɛha amɛ lɛ etamɔ”suɔmɔ lala ko ni ŋɔɔ, shi amɛjɔɔɔ amɛhe nɔ amɛhaaa Yehowa, ni amɛjeŋ “amanehulu kpeteŋkpele” lɛ mli.
Yehowa “Tookwɛlɔ Kome” lɛ
7. Mɛɛ Yehowa nifeemɔi yɛ wɔbei nɛɛ amli anyɛɔ akɛtoɔ bɔ ni ekɛ etoi lɛ ye ha yɛ Ezekiel gbii lɛ amli lɛ he?
7 Yehowa bu mɛi ni buleɔ egbɛi krɔŋkrɔŋ lɛ fɔ, nɔyeli mli “Israel tookwɛlɔi” lɛ, yɛ shɛɛsane ko ni etsɔ Ezekiel nɔ ekɛha yɛ Yerusalem shigbeemɔ lɛ sɛɛ lɛ mli. Kwɛ bɔni nakai wiemɔi lɛ sa Kristendom nɔyelɔi lɛ jogbaŋŋ ha. (Kanemɔ Ezekiel 34:1-6.) Kristendom maŋkwramɔŋ nɔyelɔi lɛ kɛ “toi” lɛ lɛɔ amɛhe diɛŋtsɛ, ni amɛtamɔɔɔ Tookwɛlɔ Kpakpa, Yesu Kristo. (Yohane 10:9-15) Taakɛ Nyɔŋmɔ jie etoi lɛ kɛtsɔ nɔyeli hewalɛ ni eshɔ kɛjɛ tookwɛlɔi pɛsɛmkunya tsɛmɛi lɛ adɛŋ yɛ be mli ni Yuda tsɔ amaŋfɔ lɛ, nakai nɔŋŋ hu ebaajie etoi lɛ kɛtsɔ Kristendom nɔyelɔi lɛ ni eeeshɔ nɔyeli hewalɛ kɛaajɛ amɛdɛŋ yɛ “amanehulu kpeteŋkpele” lɛ mli lɛ nɔ. (Kpojiemɔ 16:14-16; 19:11-21) Yehowa jie suɔmɔ kpo etsɔɔ ewebii ni tamɔ toi lɛ beni ejie amɛ kɛjɛ Babilon yɛ afi 537 D.Ŋ.B.; taakɛ bɔ ni ejie nakai su lɛ nɔŋŋ kpo yɛ be mli ni ekɛ Koresh Kpeteŋkpele, Yesu Kristo, tsu nii koni ekɛkpɔ mumɔŋ Israel shwɛɛnii lɛ kɛjɛ nyɔji ni amɛtsɔmɔ amɛha Babilon Kpeteŋkpele lɛ yɛ afi 1919 Ŋ.B. lɛ.—Ezekiel 34:7-14.
8. Mɛni esa akɛ Yehowa afee kɛ ‘too lɛ eko ewo fɔ’ ni yɛ no hewɔ lɛ ebaabɔi toi kuu lɛ anɔnyɛɛ lɛ, ni te esa akɛ Kristofoi tookwɛlɔi bibii lɛ abu toi lɛ ahe amɛha tɛŋŋ?
8 Nyɔŋmɔ kwɛɔ etoi lɛ jogbaŋŋ. (Kanemɔ Ezekiel 34:15, 16.) Kɛ ‘too ko ni ewo fɔ’ baahao Nyɔŋmɔ toi lɛ ŋmɛnɛ lɛ, Yehowa kɛ shwiemɔ ni aaashwie lɛ bianɛ kɛ agbɛnɛ hiɛkpatamɔ yɛ “amanehulu kpeteŋkpele” lɛ mli lɛ ‘baalɛ lɛ.’ Afi 1914 mli ni Yehowa kɛ “tookwɛlɔ kome,” Yesu Kristo to shwɛɛnii ni afɔ amɛ mu lɛ nɔ. Kɛjɛ 1935 kɛbaa nɛɛ, ekudɔ “asafo babaoo” lɛ ni ji “toi krokomɛi” lɛ ni kɛ ‘Yehowa lɛɛhe lɛ toi’ ni ji mɛi ni afɔ amɛ mu lɛ sɔmɔɔ bianɛ lɛ anaabuamɔ lɛ. Esa akɛ tookwɛlɔi bibii ni ji Kristofoi lɛ kɛ mlitsɔlɛ akwɛ nɛkɛ toi nɛɛ fɛɛ nɔ taakɛ Nyɔŋmɔ kɛ Kristo feɔ lɛ.—Ezekiel 34:17-31; Kpojiemɔ 7:9; Yohane 10:16; Lala 23:1-4; Bɔfoi lɛ Asaji 20:28-30.
“Eden Trom” Lɛ!
9. Akɛni Yehowa ewie akɛ esa akɛ Yuda kɛ Israel shikpɔŋ lɛ aye hejɔɔmɔ gbi hewɔ lɛ, mɛni efee?
9 Agbɛnɛ susumɔ Yuda kɛ Israel shikpɔŋ ni etsɔ amanfɔ lɛ he ekoŋŋ. Akɛni Nyɔŋmɔ efa akɛ esa akɛ eye hejɔɔmɔ gbii ni mɔ ko bɛ nɔ afii 70 hewɔ lɛ, efee nii koni ekɛtsi Edom kɛ maji komɛi agbɛ koni amɛkabahi nakai shikpɔŋkuku lɛ nɔ. (2 Kronika 36:19-21; Daniel 9:2) Yɛ anɔkwale mli lɛ, afee Edom kɛ egɔji ashikpɔŋ ni ji Seir hu amaŋfɔ, taakɛ agba afɔ shi lɛ, ni Babilonbii lɛ ji mɛi ni ye amɛnɔ yɛ afi 602-601 D.Ŋ.B.—Ezekiel 35:1–36:5; Yeremia 25:15-26.
10. Shwɛɛnii lɛ ni aku sɛɛ akɛ amɛ ba Yuda yɛ 539 D.Ŋ.B. lɛ tsɔɔ mɛni ni baaba yɛ wɔgbii nɛɛ amli?
10 Bɔ ni aku sɛɛ asaa akɛ Yuda shwɛɛnii komɛi ba ekoŋŋ yɛ 537 D.Ŋ.B. lɛ tsɔɔ nɔ ko ni baaba ni yɔɔ miishɛɛ yɛ wɔgbii nɛɛ amli. Yɛ 1919 lɛ, “Israel gɔji” aloo Yehowa Odasefoi ni afɔ amɛ mu lɛ amumɔŋ shikpɔji lɛ bafee nɔ ni shwɛɛnii ni akanya amɛ ekoŋ yɛ mumɔŋ lɛ ebɔi nɔ hilɛ. (Ezekiel 36:6-15 Nyɔŋmɔ tsuu amɛhe kɛjɛ jamɔ mli muji nifeemɔi fɛɛ he ni ekɛ “mumɔ hee” wo amɛmli koni amɛnyɛ amɛwo mumɔ krɔŋkrɔŋ lɛ yibii lɛ. (Galatabii 5:22, 23) No hewɔ lɛ bɔni afee ni jeŋmajiaŋbii lɛ akabule Yehowa gbɛi lɛ akɛni eka ewebii lɛ hewɔ lɛ, ejɔɔ shwɛɛnii lɛ babaoo diɛŋtsɛ.—Ezekiel 36:16-32.
11. Nɔ ni kɛ Ezekiel 36:33-36 kpaa gbee lɛ, mɛni ji nɔ ni Nyɔŋmɔ efee shwɛɛnii ni afɔ amɛ mu lɛ amumɔŋ shikpɔŋ lɛ?
11 Beni shwɛɛnii lɛ ku amɛsɛɛ kɛjɛ Yuda lɛ, atsake nakai shikpɔŋ ni etsɔ amaŋfɔ lɛ afee lɛ “Eden Trom” ni woɔ yibii. (Kanemɔ Ezekiel 36:33-36.) Nakai nɔŋŋ hu kɛjɛ 1919 kɛbaa nɛɛ Yehowa etsake mumɔŋ shwɛɛnii lɛ atsutsu shihilɛ he ni etsɔ amaŋfɔ lɛ ni eha etsɔ mumɔŋ paradeiso ni woɔ yibii, ni amrɔ nɛɛ amɛkɛ “asafo babaoo” lɛ naa mli gbɛfaŋ nɔ. Akɛni gbɔmɛi krɔŋkrɔŋi ji mɛi ni amɛbahi mumɔŋ paradeiso nɛɛ mli hewɔ lɛ, Kristofonyo fɛɛ Kristofonyo ni ejɔɔ ehe nɔ lɛ atsu nii ni eha ehe atse.—Ezekiel 36:37, 38.
Ekomefeemɔ Eba Ekoŋŋ
12. Yɛ mɛɛ gbɛ nɔ afee blema Yuda maŋ lɛ ni awaje amɛ ekoŋŋ lɛ he mfoniri yɛ Ezekiel 37:1-14, ni mɛɛ ŋmɛnɛŋmɛnɛ beaŋ henɔ wɔyɔɔ yɛ enɛ he?
12 Beni Yudafoi lɛ yɔɔ Babilon nomŋɔɔ mli lɛ, no mli lɛ amɛtamɔ maŋ ni egbo, tamɔ wui ni jwere ŋa nɔ. (Ezekiel 37:1-4) Shi mɛni ji nɔ ni Ezekiel na yɛ no sɛɛ? (Kanemɔ Ezekiel 37:5-10.) Akɛ faji mɔmɔ nakai wui lɛ, ni loo kwɛ̃ ha amɛhe ni hewolo baha amɛhe ni akɛ wala mumɔ kanya amɛ kɛba wala mli. (Ezekiel 37:11-14) Nyɔŋmɔ tee Yuda maŋ lɛ shi beni Israel akutsei lɛ fɛɛ mli mɛi 42,360 kɛ mɛi ni jeee Israelbii ni amɛyibɔ shɛɔ 7,500 ŋɔ hegbɛ lɛ koni amɛku sɛɛ amɛyahi Yuda ekoŋŋ ni amɛtswa Yerusalem kɛ esɔlemɔ tsu lɛ ni amɛsaa amɛto anɔkwale jamɔ amɛma amɛmaŋ shikpɔŋ nɔ ekoŋŋ lɛ. (Ezra 1:1-4; 2:64, 65) Nakai nɔŋŋ hu yɛ 1918 mli lɛ mumɔŋ Israel shwɛɛnii ni awaa amɛ yi lɛ batsɔmɔ tamɔ nakai wui ni ehe ekwakwao lɛ—ni agbe amɛ yɛ amɛmaŋ odaseyeli nitsumɔ lɛ hewɔ lɛ. Shi Yehowa kanya amɛ ekoŋŋ yɛ 1919 akɛ Maŋtsɛyeli jajelɔi. (Kpojiemɔ 11:7-12) Esa akɛ nɔkwɛmɔ nɔ nɛɛ awaje wɔhekɛnɔfɔɔ akɛ nɛkɛ mɛi ni afɔ amɛ mu nɛɛ kɛ amɛhefatalɔi lɛ ji shikpɔŋ nɔ gbɛjianɔtoo ni Yehowa kɛtsuɔ nii ŋmɛnɛ lɛ.—Kwɛmɔ 1975 Yearbook Of Jehovah’s Witnesses, baafai 87-125.
13. Yɛ mɛɛ gbɛ nɔ afee ekomefeemɔ yɛ gbɛjianɔtoo mli ni aku sɛɛ akɛba Nyɔŋmɔ blema webii ateŋ ekoŋŋ lɛ he mfoniri yɛ Ezekiel 37:15-20, ni mɛni ji enɛ he mfoniri yɛ ŋmɛnɛŋmɛnɛ beaŋ?
13 Mɛɛ gbɛ nɔ atsɔ afee gbɛjianɔtoo mli ekomefeemɔ ni aku sɛɛ akɛba ekoŋŋ yɛ blema Yehowa webii ateŋ lɛ he nɔkwɛmɔ nɔ yɛ? (Kanemɔ Ezekiel 37:15-20.) Ŋmɛnɛŋmɛnɛ beaŋ henɔ ko ni kɔɔ tsei enyɔ nɛɛ (ekome ni akadi kɛha akutsei enyɔ ni ji Yuda kɛ ekroko lɛ kɛha Israel akutsei nyɔŋma lɛ) yɛ ŋmɛnɛ. Yɛ Jeŋ Ta I mli lɛ, hii hiɛnyamtaolɔi bɔ mɔdɛŋ ni amɛfite ekomefeemɔ ni yɔɔ Nyɔŋmɔ tsuji ateŋ lɛ, shi afee anɔkwafoi ni afɔ amɛ mu nɛɛ ekome ekoŋŋ yɛ 1919 yɛ Kristo, amɛ “maŋtsɛ kome” lɛ kɛ “tookwɛlɔ kome” lɛ shishi. Agbɛnɛ hu, taakɛ bɔ ni mɛi 7,500 ni jeee Israelbii ni ku amɛsɛɛ kɛba Yuda lɛ ji lɛ, mɛi ni ji “asafo babaoo” lɛ hu kɛ shwɛɛnii ni afɔ amɛ mu lɛ efee ekome. Mɛɛ miishɛɛ enɛ ji akɛ mɔ ko aaahi mumɔŋ paradeiso lɛ ni esɔmɔ Yehowa yɛ ekomefeemɔ mli yɛ wɔ “maŋtsɛ kome” lɛ shishi!—Ezekiel 37:21-28.
Gog Tutua!
14. Namɔ ji Gog ni jɛ Magog lɛ, ni mɛni ebaafee? (Ezekiel 38:1-17)
14 Nɔ ni nyiɛ sɛɛ lɛ, agba nɔkwɛmɔ nɔ ko ni yɔɔ naakpɛɛ afɔ shi. Akɛni eekpa gbɛ akɛ ebaabule Nyɔŋmɔ gbɛi lɛ ni ekpata E-webii lɛ ahiɛ hewɔ lɛ, Gog ni jɛ Magog lɛ baatutua mumɔŋ Israel shwɛɛnii lɛ, ni damɔ shi kɛha Yehowa yoo lɛ ni ji E-ŋwɛi gbɛjianɔtoo lɛ. (Kpojiemɔ 12:1-17) Gog ji “je nɛŋ nɔyelɔ,” Satan Abonsam. Enine shɛ gbɛi ni ji Gog lɛ nɔ yɛ be mli ni ashwie lɛ kɛjɛ ŋwɛi, beni afɔ Maŋtsɛyeli lɛ yɛ 1914 lɛ sɛɛ. (Yohane 12:31) “Magog shikpɔŋ lɛ” ji he ni atsi Gog kɛ edaimonioi lɛ anaa awo yɛ shikpɔŋ lɛ niiaŋ he ko. Beni tai ni sumɔɔɔ jamɔ lɛ ekpata Kristendom kɛ mɛi ni yɔɔ Babilon Kpeteŋkpele lɛ mli lɛ ahiɛ sɛɛ lɛ, Yehowa baaha Gog atutua mumɔŋ Israel shwɛɛnii lɛ kɛ amɛhefatalɔi ni amɛjɔɔ amɛhe nɔ lɛ ni yɔɔ he ni efeɔ tamɔ nɔ ni amɛbɛ hebuu nɔ ko yɛ lɛ.—Ezekiel 38:1-17; Kpojiemɔ 17:12-14.
15. Mɛni baaba beni Gog tutuaa Yehowa Odasefoi lɛ?
15 Mɛni baaba beni Gog tutuaa Yehowa Odasefoi lɛ? (Kanemɔ Ezekiel 38:18-23) Yehowa baahere ewebii lɛ ayiwala! Edɛŋdade ji nyɔŋmɔnɛmɔ ni loɔ nibii kɛyaa, nyɔŋmɔŋtɛi ni dara, la ni tsoɔ, gbele hela ni tsɛŋeɔ mɛi. Yɛ yiŋfutumɔ hewɔ lɛ, Gog tabilɔi lɛ baagba amɛwo amɛ diɛŋtsɛ amɛhe ni amɛgbegbee amɛhe. Shi dani Nyɔŋmɔ baakpata amɛhiɛ kwraa kɛaatee naanɔ lɛ, ‘abaaha amɛle akɛ lɛ ji Yehowa.’
16. (a) Mɛni baaba “Magog shikpɔŋ lɛ” nɔ? (b) Te esa akɛ nɔ ni agba afɔ shi ni kɔɔ Gog he nɛɛ he nilee ana wɔ nɔ hewalɛ aha tɛŋŋ?
16 Beni akɛ Satan kɛ edaimonioi lɛ aaawo bu kwɔŋkwɔŋ lɛ mli lɛ, “Magog shikpɔŋ lɛ” ni ji amɛshihilɛ he ni eba shi ni yɔɔ shikpɔŋ nɛɛ nɔ lɛ baafee nɔ ni etee kɛmiiya naanɔ. (Kpojiemɔ 20:1-3) Bɔ ni Gog tawuu nibii lɛ baafa babaoo aha hewɔ lɛ, ebaahe be dani abaajie fɛɛ kɛya. Loofɔji kɛ kooloi awuiyelɔi baaye Gog asafo lɛ agbohii ni ashi ni afuuu amɛ lɛ. Te esa akɛ nilee ni kɔɔ enɛɛmɛi fɛɛ he lɛ asa wɔhe aha tɛŋŋ? Esa akɛ le ni wɔkaseɔ wɔleɔ akɛ Gog tutuamɔ lɛ ebɛŋkɛ, shi Yehowa baahere E-webii ayiwala lɛ aha wɔhemɔkɛyeli afa, eha wɔmli afili wɔ akɛ nibii ni baajɛ enɛ mli aba lɛ baatse Nyɔŋmɔ gbɛi ni abule lɛ kɛjɛ jeeŋmɔ beebe lɛ he!—Ezekiel 39:1-29.
Naa Yehowa Hekrɔŋkrɔŋ Lɛ!
17. (a) Mɛɛ ninaa akɛha Ezekiel yɛ 593 D.Ŋ.B.? (b) Sɔlemɔ tsu ni ana yɛ ninaa lɛ mli lɛ ni yɔɔ lolo lɛ yeɔ mɛni he odase?
17 Yɛ afii 593 D.Ŋ.B. lɛ, ni ji Yerusalem Sɔlemɔtsu lɛ hiɛkpatamɔ lɛ sɛɛ afi ni ji 14 lɛ nɔ lɛ, aha Ezekiel na Yehowa jamɔ he lɛ he ninaa hee ko. Taakɛ gbalɔ lɛ bɔfo ni kudɔɔ lɛ lɛ susumɔ lɛ ji lɛ, eji nɔ ko ni da naakpa. (Ezekiel 40:1–48:35) Nɛkɛ sɔlemɔtsu nɛɛ feɔ “anɔkwa buu lɛ ni Yehowa diɛŋtsɛ shi” lɛ he mfoniri, ni amɛji “ŋwɛi nii lɛ ahenɔi.” Yesu Kristo tee Krɔŋkrɔŋ Fe Fɛɛ lɛ, ni ji “ŋwɛi diɛŋtsɛ” yɛ afi 33 Ŋ.B. koni ekɛ ekpɔmɔ afɔleshaa lɛ ayaha Nyɔŋmɔ. (Hebribii 8:2; 9:23, 24) Nakai sɔlemɔtsu lɛ he ninaa lɛ yeɔ odase akɛ jamɔ krɔŋŋ baaje Gog tutuamɔ lɛ mli shweshweeshwe. Mɛɛ miishɛjemɔ enɛ ji kɛha mɛi ni sumɔɔ Yehowa gbɛi lɛ nɛkɛ!
18. Mɛni ji sɔlemɔ tsu ni ana yɛ ninaa lɛ mli lɛ he nibii ni aŋmala ashwie shi lɛ ekomɛi?
18 Nibii pii yɔɔ sɔlemɔtsu lɛ he. Akɛ nɔkwɛmɔ nɔ lɛ, eyɛ agboi ekpaa yɛ ekponɔgbɛ kɛ mligbɛ gbogboi lɛ amli. (Ezekiel 40:6-35) Ayɛ niyeli tsui nyɔŋmai etɛ yɛ jɛmɛ (eka shi faŋŋ akɛ koni gbɔmɛi lɛ anyɛ aye afɔleshaa niyenii lɛ yɛ ekomefeemɔ mli yɛ jɛmɛ) yɛ kponɔgbɛ kpo lɛ nɔ. (40:17) Afɔleshaa latɛ lɛ yɛ mligbɛ kpo lɛ nɔ. (43:13-17) Ayɛ tsu ni akɛfee afɔleshaa latɛ ni eka shi faŋŋ akɛ koni asha tsofa-kɛ-ŋma yɛ nɔ yɛ sɔlemɔ tsu lɛ klɛŋklɛŋ tsu lɛ mli. (41:21, 22) Krɔŋkrɔŋ Fe Fɛɛ lɛ dalɛ ji ninetalɔi 20 koji ejwɛ, ni gbogbo ni bɔle sɔlemɔtsu lɛ he lɛ feɔ susumɔ tso 500 (ninetalɔi 5,100) yɛ efa fɛɛ fa. Mɛɛ shia kpeteŋkpele ni Nyɔŋmɔ anunyam eyi jɛmɛ obɔ po nɛ!—Ezekiel 41:4; 42:16-20; 43:1-7.
19. Te esa akɛ bɔ ni atsɔɔ sɔlemɔ tsu lɛ he nibii lɛ amli aha lɛ kɛ anɔkwale ni eji akɛ esa akɛ mɛi ni sɔmɔɔ yɛ jɛmɛ lɛ afee mɛi ni anaa Nyɔŋmɔ taomɔ nii yɛ amɛhe lɛ asa wɔhe aha tɛŋŋ?
19 Esa akɛ nibii sɔrɔtoi babaoo ni kɔɔ sɔlemɔwe lɛ he, efɔleshai, nikee nii kɛ gbijurɔyelii lɛ aha wɔyoo bɔ ni ehe hiaa akɛ wɔɔnyiɛ famɔi ni Nyɔŋmɔ gbɛjianɔtoo lɛ kɛhaa lɛ sɛɛ jogbaŋŋ, koni wɔna akɛ esa akɛ wɔbɔ mɔdɛŋ fɛɛ ni wɔɔnyɛ ni wɔwo Yehowa kɛ ejamɔ lɛ nɔ. (Ezekiel 45:13-25; 46:12-20) Esa akɛ ana Nyɔŋmɔ taomɔ nii ni nɔ kwɔlɔ lɛ yɛ mɛi ni sɔmɔɔ yɛ esɔlemɔwe lɛ ahe, ni esa akɛ amɛtsɔɔ gbɔmɛi lɛ ‘sɔrɔto ni yɔɔ nɔ krɔŋkrɔŋ kɛ nɔ ni abule lɛ teŋ.’ (Ezekiel 44:15, 16, 23) Esa akɛ enɛ atsirɛ wɔ ni wɔhiɛ krɔŋkrɔŋfeemɔ mli akɛ Yehowa webii.—Efesobii 1:3, 4.
20. Nu ni hoɔ kɛjɛɔ sɔlemɔ tsu ni ana yɛ ninaa lɛ mli lɛ shishi lɛ feɔ mɛni he okadi? (b) Nɛkɛ okadi nu nɛɛ baana hewalɛ yɛ mɛni nɔ?
20 Nu ko hoɔ kɛjɛɔ sɔlemɔwe lɛ ni tsaa Ŋoo Ŋshɔ lɛ mli nui lɛ aloo ehaa eŋɔɔ bɔni afee ni loi babaoo aba mli. (Ezekiel 47:1-11) Nɛkɛ nu nɛɛ damɔ shi kɛha gbɛjianɔ ni Nyɔŋmɔ eto kɛha naanɔ wala, ni Yesu afɔleshaa lɛ fata he ni efa kɛha mɛi ni baaje Gog tutuamɔ lɛ mli lɛ kɛ mɛi krokomɛi, ni mɛi ni atee amɛ shi kɛjɛ gbohii ateŋ lɛ hu fata he. (Yohane 5:28, 29; 1 Yohane 2:2; Kpojiemɔ 22:1, 2) Ŋoo Ŋshɔ lɛ damɔ shi kɛha nɔ ni adesai edamɔ nɔ amɛhi shi—fɔbuu kɛha esha kɛ gbele kɛ agbɛnɛ Satan nɔyeli. Adesai ni akpɔ amɛ lɛ baashwere yɛ Mesia nɔyeli lɛ tsamɔ shihilɛi ashishi taakɛ Ŋoo Ŋshɔ lɛ ni emli nui eŋɔɔ lɛ mli loi fa babaoo lɛ.
21. Mɛni Ezekiel 47:12 tsɔɔ akɛ adesai toibolɔi baana mli ŋɔɔmɔ yɛ jeŋ hee lɛ mli?
21 Tsei ni kwɛɔ yɛ faa ni ana yɛ ninaa lɛ mli lɛ atoi lɛ hu he baa tsamɔ nɛɛ mli. (Kanemɔ Ezekiel 47:12.) Yɛ jeŋ hee lɛ mli lɛ, adesai toibolɔi baana gbɔmɔtsoŋ kɛ mumɔŋ tsamɔ ni yeɔ emuu mli ŋɔɔmɔ. Mɛni hewɔ? Hewalɛ ni yaa nɔ etsaa mɔ yɛ be fɛɛ mli yɛ tsei ni woɔ yibii ni anaa yɛ ninaa lɛ mli lɛ yibai lɛ amli. Mɛɛ jɔɔmɔi enɛ ji kɛha mɛi ni le Yehowa ni amɛsɔmɔɔ Lɛ bianɛ lɛ!
Ni Amɛaana Amɛle!
22. Mɛni tsɔɔ akɛ Nyɔŋmɔ kɛ gbɔmɛi baato hei ni ehalaa yɛ Paradeiso lɛ mli?
22 Kɛ wɔkɛ Yehowa gbɛjianɔtoo lɛ fee ekome bianɛ lɛ, wɔbaana sui ni baaha wɔkpa gbee loo wɔfee ekome beni Nyɔŋmɔ kɛ gbɔmɛi ni ehalaa amɛ toɔ Paradeiso shikpɔŋ lɛ nɔ lɛ. Akɛ akɛ gbɔmɛi baato hei ni tamɔ nɛkɛ lɛ, wɔnaa yɛ bɔ ni ato akutsei lɛ anaa aha yɛ shikpɔŋ lɛ jaa mli yɛ maŋ nɔkwɛmɔ shikpɔŋ ni Ezekiel na yɛ ninaa lɛ mli lɛ kooyigbɛ kɛ ewuoyigbɛ lɛ mli. Nɔ ni fata nakai shikpɔŋ lɛ “nɔwomɔ nɔkee nɔ” ni aja mli etɛ lɛ he ji fa ko kɛha Levibii ni jeee osɔfoi lɛ kɛ osɔfoi lɛ agbɛfaŋnɔ ni sɔlemɔtsu ni ana yɛ ninaa mli lɛ fata he. Nɔ ni yɔɔ wuoyigbɛ fa lɛ teŋ gbɛ ji maŋtiase ni wekui pii tsuɔ nii yɛ jɛmɛ yɛ “lumɔ” ni ji Mesia lumɔ lɛ ni mɛi pii feɔ enajiaŋdamɔlɔi yɛ “shikpɔŋ hee” lɛ nɔ lɛ.—Ezekiel 47:13–48:34; 2 Petro 3:13; Lala 45:16.
23. Bɔni afee ni wɔfee adesai ni akpɔ amɛ ni hiɔ Paradeiso lɛ ateŋ mɛi komɛi lɛ, mɛni esa akɛ wɔfee bianɛ?
23 Akɛni eta maŋtsɛsɛi nɔ yɛ eŋwɛi hekrɔŋkrɔŋ lɛ hewɔ lɛ, Nyɔŋmɔ baajɔɔ okadi maŋtiase lɛ ni Ezekiel na lɛ. (Kanemɔ Ezekiel 48:36.) Abaatsɛ nakai shikpɔŋ nɔ maŋ nɔkwɛmɔ gbɛjianɔtoo lɛ akɛ Jehovah-Shammah, aloo “Yehowa Diɛŋtsɛ Yɛ Jɛi.” Yaa nɔ ojie suɔmɔ ni etɔɔɔ fa kpo otsɔɔ Nyɔŋmɔ, ni ooofee adesai ni akpɔ amɛ ni hiɔ Paradeiso, yɛ be mli ni mɔ ko mɔ ko bɛ shikpɔŋ lɛ nɔ ni baahi mumɔŋ duŋ mli shi amɛ fɛɛ amɛbaale akɛ Yehowa ji anɔkwa Nyɔŋmɔ hiɛkalɔ kome lɛ ateŋ mɔ ko. (Habakuk 2:14) Kwa nyɛ ni aaanyɛ onɔ ni oyoo Nyɔŋmɔ gbɛi lɛ ni jeee nakai ji bɔ ni osumɔɔ, yɛ be mli ni akpataa efɔŋfeelɔi ahiɛ lɛ. Na hemɔkɛyeli ni otsɔɔ akɛ oyɛ hiɛnɔkamɔ akɛ Obaafata mɛi ni baaje mli lɛ ahe yɛ be mli ni nɛkɛ wiemɔi nɛɛ baa mli lɛ: “Ni jeŋmaji lɛ aaana ale akɛ miji Yehowa lɛ.”—Ezekiel 36:23.a
[Shishigbɛ niŋmai]
a Ajie kɛjɛ September 15, 1988 Watchtower Iɛ mli.
Mɛni Obaakɛɛ?
◻ Mɛɛ shihilɛi ashishi pɛ Yehowa kpɛlɛɔ mumɔŋ bulɔ nɔ yɛ?
◻ Te Yehowa feɔ etoi lɛ tɛŋŋ, ni te esa akɛ nɔkwɛlɔi ni ji Kristofoi lɛ hu kɛ amɛ aye aha tɛŋŋ?
◻ Mɛɛ gbɛ nɔ atsɔ afee Yuda maŋ Iɛ ni awaje amɛ ekoŋŋ lɛ he mfoniri yɛ? (Ezekiel 37:1-14) Mɛni ji enɛ he nɔkwɛmɔ nɔ ni yɔɔ ŋmɛnɛŋmɛnɛ beaŋ?
◻ Namɔ ji Gog ni jɛ Magog lɛ, mɛni baaba beni atutuaa Odasefoi lɛ?
◻ Nu ni hoɔ kɛjɛ sɔlemɔtsu lɛ ni ana yɛ ninaa lɛ mli lɛ shishi lɛ feɔ mɛni he okadi?
[Shikpɔŋ he mfoniri/Mfoniri ni yɔɔ baafa 24]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
The holy contribution and tribal assignments
ŊSHƆ KPETEŊKPELE
ENTERING IN TO HAMATH
DAN
ASHER
NAPHTALI
MANASE
EFRAIM
RUBEN
YUDA
LUMƆ LƐ
Holy Contribution
En-Eglaim
BENYAMIN
SIMEON
En-gedi
ISAKAR
ZEBULON
Tamar
GAD
Meribath-Kadesh
Salt Sea
Jordan River
Sea of Galilee
[Mfoniri ni yɔɔ baafa 21]
Yehowa kwɛɔ etoi Iɛ blɛoo, taakɛ bɔ ni blema tookwɛlɔi feɔ Iɛ. Nakai nɔŋŋ esa akɛ Kristofoi ni ji nɔkwɛlɔi Iɛ abu Nyɔŋmɔ toi lɛ ni amɛhiɛ amɛ blɛoo
[Mfoniri ni yɔɔ baafa 23]
Nɔwomɔ nɔkeenɔ krɔŋkrɔŋ Iɛ kɛ akutsei lɛ ashikpɔji Iɛ ahusui