Nyɔŋmɔ Wiemɔ lɛ ni Aaagbɛ Ashwa Maŋsɛɛ Yɛ Je ko ni Gbeyeishemɔ Yɔɔ Mli lɛ Mli
1. Mɛɛ gbeyeishemɔ ko ní eko kɛ lɛ yeee egbɔ ni baaba jeŋ fɛɛ gbalɔ ni fe fɛɛ yɛ adesa yinɔsane mli lɛ gba fɔ shi?
1 GBALƆ ni fe fɛɛ yɛ adesa yinɔsane fɛɛ mli, Yesu Kristo, gba yɛ jeŋ-tsakemɔ be ni je shishi kɛ Jeŋ Ta I fɛmɔ yɛ 1914, kɛ bɔ ni majimaji lɛ asusumɔ ji lɛ he akɛ: “Ni nɔ aaanyɔnyɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ, ejaakɛ aaahoso ŋwɛi hewalɛi lɛ tete.”—Luka 21:26, 27.
2. Namɛi sheee gbeyei lɛ, ni mɛni hewɔ?
2 Shi, yɛ bɔ ni eyɔɔ naakpɛɛ ha lɛ fɛɛ sɛɛ lɛ, mɛi yɛ ni amɛsheee gbeyei ni nɔ̃ enyɔɔɔ amɛ nɔ tamɔ mɛi ni bɛ yelikɛbuamɔ ko. Amɛji Yehowa odasefoi ni anaa amɛ yɛ shikpɔji 205 nɔ lɛ. Amɛfeɔ nɔ ni Yesu wo hewalɛ yɛ he lɛ: “Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ Iɛ miibɛŋkɛ.”—Luka 21:28.
3. Mɛni hewɔ atooo Mesia Maŋtsɛyeli lɛ amaaa shi yɛ Yerusalem yɛ Israel, ni mɛni hewɔ Jeŋmaji Akpaŋmɔ lɛ kɛ esɛɛyelɔ lɛ etsiko nuklea be lɛ naa lɛ?
3 Ŋmɛnɛ anɔkwale lɛ yɛ lolo ni ama nɔ mi fe be fɛɛ akɛ “jeŋmaji abei ni ato,” “Jeŋmaji abei,” lɛ ba naagbee yɛ, 1914 afi lɛ naagbee fa lɛ mli, ni ákɛ ato Yehowa Nyɔŋmɔ Maŋtsɛyeli kɛtsɔ Yesu Kristo nɔ lɛ ni ewo shi yɛ he lɛ ama shi yɛ ŋwɛi koni eye nɔ yɛ ehenyɛlɔi ateŋ. (Luka 21:24, NW, Authorized Version) No hewɔ lɛ atoko nakai Mesia Maŋtsɛyeli lɛ amako shikpɔŋ nɔ Yerusalem kɛbashi ŋmɛnɛ gbi nɛɛ. Yɛ sanenaatsɔɔmɔ ni ja naa lɛ, Jeŋmaji Akpaŋmɔ lɛ nyɛɛɛ afee “Nyɔŋmɔ Maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɔ.” Kpaŋmɔ lɛ sɛɛyelɔ, Jeŋmaji Ekomefeemɔ lɛ hu nyɛɛɛ aha Kristendom sɔlemɔi lɛ aba mli yɛ nɔ ni fe afii 35 ni ekɛhi shi lɛ fɛɛ sɛɛ; enyɛɛɛ etsi nuklea be lɛ naa.
4. Jeŋmaji Akpaŋmɔ lɛ ji yinɔ apam diɛŋtsɛ ni átee ashi mɛni?
4 Kɛjɛ be mli ni ato yiŋ yɛ majimaji ateŋ kpaŋmɔ lɛ he kɛmiiba Jeŋ Ta I lɛ naagbee kɛbaa nɛɛ, Yehowa Odasefoi ejaje ni gbeyeishemɔ bɛ mli akɛ, adesai anine-naa nibii ni akɛtoɔ pɔtɛ̃ɛ lɛ he, odehei anɔyeli kɛtsɔ Kristo nɔ lɛ najiaŋ lɛ baafee efolo. Amɛtsɔ gbalɛ ni yɔɔ Yesaia 8:12 lɛ nɔ amɛkudɔ amɛnifeemɔ gbɛ: “Nɔ fɛɛ nɔ ni maŋ nɛɛ tsɛɔ apam lɛ, nyɛkatsɛa no apam, ni asaŋ amɛgbeyei ni amɛsheɔ lɛ, nyɛkashea, ni nyɛtsui akafaa hu!” Nakai adesa gbɛjianɔtoo lɛ ji “apam” diɛŋtsɛ, hɛɛ, yi nɔ apam diɛŋtsɛ ni átee áshi Nyɔŋmɔ Maŋtsɛyeli kɛtsɔ Kristo nɔ lɛ he nibii ni jara wa lɛ. Belɛ te aaafee tɛŋŋ ni enɛ aaana maŋtsɛmɛi a-Maŋtsɛ, Yehowa Nyɔŋmɔ jɔɔmɔ kɛ sɛɛfimɔ hu?
5. (a) Yɛ nɔ ni yɔɔ “wolokpo” lɛ mli lɛ fɛɛ sɛɛ lɛ, te “wolokpo” lɛ fee tɛŋŋ yɛ Ezekiel daaŋ beni eye lɛ? (b) Ni akɛ Nyɔŋmɔ Wiemɔ lɛ aaawo wɔdaaŋ ni wɔsɔmɔ akɛ edasefoi lɛ ji mɛɛ niiashikpamɔ diɛŋtsɛ?
5 Maŋtsɛyeli sane lɛ ni Yehowa Odasefoi yaa nɔ amɛjajeɔ lɛ ji nɔ ni hiɛdɔɔ yɔɔ mli diɛŋtsɛ, yɛ je ni ehiŋmɛi egbele yɛ gbɛ kroko nɔ nɛɛ mli. Ámɛna niiashikpamɔ ko ni tamɔ gbalɔ Ezekiel nɔ̃, yɛ be mli ni eji gboklɛfonyo yɛ Babilon shikpɔŋ lɛ nɔ, afii saŋŋ dani Babiloniabii lɛ kpata Yerusalem hiɛ yɛ afi 607 D.Ŋ.B. lɛ. Taakɛ eba bɔfo lɛ nɔ yɛ sɛɛ mli beni ebaje Patmo ŋshɔkpɔ lɛ nɔ lɛ, akɛ “wolokpo” ko ha Ezekiel. Gbalɔ lɛ kɛɔ wɔ akɛ: “Ni aŋma hiɛ kɛ sɛɛ, ni aŋma yaafoi kɛ ŋtsɔidɔɔmɔ kɛ yarafeemɔ yɛ mli.” (Ezekiel 2:9, 10) Yɛ be mli ni ebo Nyɔŋmɔ famɔ akɛ eye “wolokpo” nɛɛ toi lɛ, Ezekiel kɛɛ akɛ: “Eŋɔɔmɔ tamɔ wò yɛ midaaŋ.” (Ezekiel 3:1-3) Ŋmɛnɛ, ni wɔteŋ mɛi komɛi aaana ni aŋɔ Nyɔŋmɔ Wiemɔ Iɛ awo wɔdaaŋ koni wɔsɔmɔ akɛ ewiemɔ lɛ he jajelɔi lɛ ji hegbɛ ni ŋɔɔ, ni nɔ fɛɛ nɔ ni yɔɔ nakai Wiemɔ lɛ mli lɛ kɔɔɔ he eko, kɛ emli yaafoi kɛ ŋtsɔidɔɔmɔ kɛ yarafeemɔ lɛ fɛɛ. (Okɛto Lala 19:8-11 he.) Kɛjɛ be mli ni Yehowa Odasefoi ye Nyɔŋmɔ Wiemɔ lɛ ni ajie lɛ kpo lɛ yɛ ta lɛ sɛɛ afi ni ji 1919 kɛbaa nɛɛ amɛbuɔ lɛ waa akɛ nɔ ko ni jara wa. Ewo amɛ hewalɛ tamɔ bɔ ni wò diɛŋtsɛ waje Yonatan lɛ.—1 Samuel 14:26, 27.
6. Mɛni hewɔ ekãafeemɔ he hiaa yɛ be mli ni Nyɔŋmɔ oweletɔɔ gbi lɛ bɛŋkɛɔ lɛ, shi Yehowa Odasefoi baanyɛ ana nɔmimaa yɛ mɛni he?
6 Yɛ be mli ni “wɔ Nyɔŋmɔ lɛ oweletɔɔ gbi” lɛ bɛŋkɛɔ oyayaayai lɛ, ebiɔ ekãa yɛ Yehowa Odasefoi agbɛfaŋ koni amɛkɛ amɛnine atsɔɔ “yaafoi kɛ ŋtsɔidɔɔmɔ kɛ yarafeemɔ” ni baa yɛ wɔsɛɛ be mli lɛ amɛha adesa weku muu lɛ fɛɛ. (Yesaia 61:1, 2) Gbɔmɛi ni taoɔ hejɔlɛ ni yɔɔ je ni oshara ka eyiteŋ nɛɛ mli lɛ sumɔŋ ni amɛbo amaniɛbɔɔ ni tamɔ nɛkɛ ni jɛɔ Yehowa Odasefoi adaaŋ lɛ toi. Shi akɛni Nyɔŋmɔ tsuɔ amɛ koni amɛyagbɛ e-Wiemɔ lɛ amɛshwa hewɔ lɛ, amɛbaanyɛ amɛna nɔmimaa akɛ obaafi amɛ sɛɛ aahu kɛyashi eweletɔɔ gbi lɛ nɔ tɔɔ.
7. Mɛɛ gbɛ nɔ Yehowa baatsɔ aha Ezekiel anyɛ adamɔ enitsumɔ lɛ naa?
7 Eŋɔɔɔ akɛ mɛi aaakpoo akɛ amɛaabo toi, shi nyɛhaa wɔfea toiboo wɔhaa nɔ ni Nyɔŋmɔ kɛɛ Ezekiel lɛ: “Shi Israel we lɛ sumɔŋ akɛ amɛaabo bo toi, ejaakɛ amɛsumɔɔɔ akɛ amɛboɔ mi toi, ejaakɛ Israel we lɛ fɛɛ ewaje amɛhiɛŋtsei, ni amɛtsui hu wa. Naa, miha ehiɛ ewa yɛ amɛhiɛ, ni ehiɛŋtso hu ewa ewo amɛhiɛŋtsei; naa, miha ohiɛŋtso efee tamɔ diamente ni wa fe tswɛrɛbo lɛ. Kaashe amɛ gbeyei, ni etsui akafa yɛ amɛhiɛ, tsɛ weku toigbolɔi ji amɛ! . . . Ni oyiŋ oya nomii ni ji omaŋbii lɛ aŋɔɔ, ni oyawie otsɔɔ amɛ ni okɛɛ amɛ akɛ: Be ni Nuŋtsɔ Yehowa kɛɛ nɛ! amɛbo toi jio, amɛbooo toi jio.”—Ezekiel 3:7-11.
8. Te Ezekiel kuu lɛ fee tɛŋŋ amɛnyɛ amɛdamɔ shihilɛ ni oshara yɔɔ mli yɛ Jeŋ Ta I sɛɛ lɛ naa, ni eji osɔfoi lɛ bo toi kulɛ mɛni?
8 Shihilɛ ko ni oshara yɔɔ mli ni tamɔ nakai ji nɔ ni Kristofoi ni akɛ Nyɔŋmɔ mumɔ lɛ efɔ́ amɛ ni amɛbatsɔmɔ emumɔŋ bii ni akɛ emumɔ lɛ efɔ amɛ mu ni amɛtsɔmɔ edasefoi ni ehala amɛ lɛ ateŋ shwɛɛnii lɛ kɛ-kpe lɛ. Amɛ amɛfeɔ afii ohai 20 nɛɛ mli Ezekiel kuu lɛ. No hewɔ lɛ amɛgbalako amɛhe shi kɛjɛko Kristendom osɔfoi ni amɛwula amɛhe kpɛŋshɛŋŋ kɛ amɛhiɛ keketee ni baanyɛ akɛɛ akɛ amɛji mumɔŋ Israelbii lɛ ahiɛ. Eji nɛkɛ jamɔ mli hiɛnyiɛlɔi nɛɛ ŋmɛɛ amɛhiɛŋtsei ni ewa keketee lɛ ahe ni amɛbo Maŋtsɛyeli sane ni shwɛɛnii ni afɔ amɛ mu lɛ jajeɔ kɛjɛ 1919 lɛ toi kulɛ, Kristendom kɛ ehe woŋ jeŋ ta ni ji enyɔ lɛ ni da kwraa ni fite nii babaoo yɛ jeŋ fɛɛ fe klɛŋklɛŋ nɔ̃ lɛ mli.
9. Yɛ mɛɛ gbɛ nɔ áha shwɛɛnii lɛ kɛ amɛhefatalɔi ni amɛjɔɔ amɛhe nɔ lɛ enyɛ amɛdamɔ amɛnitsumɔ lɛ naa?
9 Ŋmɛnɛ, yɛ mɛi ahe gbeyei ni nuklea tawuu woɔ yɛ Jeŋmaji Ekomefeemɔ lɛ ni ma shi lɛ fɛɛ sɛɛ lɛ, jamɔ mli hiɛnyiɛlɔi lɛ tsakeko su ni amɛhiɛ yɛ Maŋtsɛyeli jajelɔi lɛ ahe lɛ. Nohewɔ lɛ ehe ebahia ni shwɛɛnii ni afɔ amɛ mu lɛ, ákɛ Maŋtsɛyeli lɛ bɔfoi lɛ kɛ amɛhefatalɔi ni amɛjɔɔ amɛhe nɔ ni abaptisi amɛ ni jɛ jeŋmaji fɛɛ mli lɛ awaje amɛ diɛŋtsɛ amɛhiɛŋtsei tamɔ diamente loo tswɛrɛbo yɛ jamɔ mli shitee-kɛwoo ni wa lɛ hewɔ. Amɛyaa nɔ amɛshiɛɔ Nyɔŋmɔ Wiemɔ lɛ ni amɛsheee gbeyei.
10. Kulɛ esa akɛ osɔfoi lɛ kɛ amɛ asafoŋbii lɛ abo Yehowa Odasefoi atoi yɛ mɛɛ yiŋtooi ahewɔ ni mɛɛ anɔkwa sane yɔɔ ni nyɔŋmɔjalɔi nɛɛ baakpɛlɛ nɔ?
10 Kulɛ esa akɛ Kristendom osɔfoi lɛ kɛ amɛ asafoŋbii lɛ titri anu sane lɛ kɛ ŋaawoo ni Yehowa Odasefoi kɛha lɛ shishi. Odasefoi lɛ naa nɔ ni amɛkɛɔ lɛ kɛjɛɔ Biblia kome too lɛ nɔŋŋ ni nɔ ni akɛɛ atsɛɔ lɛ Kristofoi aje lɛ kɛɔ akɛ amɛkpɛlɛɔ nɔ ni amɛ Biblia asafoi sɔrɔtoi lɛ gbɛɔ shwaa yɛ wiemɔi babaoo mli lɛ nɔŋŋ mli. Efee tamɔ bɔ pɛ ni Yehowa Nyɔŋmɔ kɛɛ Ezekiel lɛ, taakɛ New World Translation Biblia lɛ tsɔɔ mli lɛ: “Ni bii henɔwolɔi ni amɛwaje amɛhiɛ kɛ amɛtsui lɛ—amɛ amɛŋɔɔ mitsuɔ bo nɛɛ, ni esa akɛ okɛɛ amɛ akɛ, ‘Bɔ ni Nuŋtsɔ Maŋtsɛ Yehowa ekɛɛ nɛ.’ Ni amɛ lɛ, amɛbaabo toi jio, amɛboŋ toi jio—ejaakɛ amɛji toigbolɔi awe—ni amɛbaaná amɛle kɛ̃ hu akɛ gbalɔ diɛŋtsɛ ehi amɛteŋ.”—Ezekiel 2:4, 5.
11. Mɛɛ sui komɛi Kristendom ejie lɛ kpo yɛ Yehowa shwɛɛnii ni ekɛ nitsumɔ ewo amɛdɛŋ lɛ ahe, ni mɛɛ gbɛ nɔ eye ebua shwɛɛnii lɛ ni amɛtsu nitsumɔ ni hiɛdɔɔ yɔɔ mli nɛɛ he nii yɛ?
11 Hiɛwalɛ loo kuɛŋtimɔ kɛ tsuiwalɛ ji nɔ ni Kristendom ni kɛɔ akɛ eji mumɔŋ Israel lɛ ejie lɛ kpo yɛ shwɛɛnii lɛ ni afɔ amɛ mu ni Nuŋtsɔ Maŋtsɛ Yehowa kɛ nitsumɔ ewo amɛdɛŋ akɛ amɛjaje enaagbee wiemɔ lɛ yɛ “nibii agbɛjianɔtoo nɛɛ naagbee” lɛ mli lɛ ahe. (Mateo 24:3, 14, NW) Nyɔŋmɔ Ofe lɛ le akɛ ebaanyɛ edũ gbeyei ni asheee ewo eshwɛɛnii ni afɔ amɛ mu lɛ amli ni ewo ŋmɛnɛŋmɛnɛ beaŋ Ezekiel kuu nɛɛ hewalɛ ni no aha amɛkɛ amɛhe awo nitsumɔ ni hiɛdɔɔ yɔɔ mli nɛɛ mli ni amɛtsu he nii.
12. Mɛɛ apasa naafolɔmɔi Yehowa tsiɔ gbɛ lɛ, ni mɛɛ sane ni kɔɔ enɛ he ni baaba baaha ana lɛ akɛ eji mɔ ni shwamɔ ko kwraa bɛ ehe?
12 Nyɔŋmɔ ni anyɛŋ abɔ lɛ ahora lɛ eto eyiŋ akɛ ebaatsi hegbɛi fɛɛ ni aaaba ni no aaaha afolɔ enaa akɛ ekwɛɛɛ nɔ ko nɔ jogbaŋŋ, aloo enyɛɛɛ ekɛ kɔkɔbɔɔ ni sa aha mɛi ni yɔɔ oshara mli lɛ naa. Shihilɛi lɛ miibɛŋkɛ wɔ kɛmiishɛ he ni aaajie wɔ kpo atsɔɔ ni ana bɔ ni wɔji. Kɛkɛ lɛ abaanyɛ mɛi ni booo sane toi lɛ anɔ ni amɛkpɛlɛ anɔkwale ni eji akɛ gbalɔ ko ni jɛ Yehowa ŋɔɔ ehi amɛteŋ lɛ nɔ. Enɛ baaba yɛ be mli ni Babilon Kpeteŋkpele, jeŋ apasa jamɔ maŋtsɛyeli lɛ gbeɔ shi kɛyaa naanɔ hiɛkpatamɔ mli yɛ maŋkwramɔŋ hewalɛi lɛ ni tsutsu lɛ ekɛ amɛ bɔɔ mumɔŋ ajwamaŋ ni anyaŋeɔ lɛ adɛŋ lɛ. Enɛ baaha ana jamɔ krɔŋŋ Nyɔŋmɔ lɛ akɛ mɔ ni shwamɔ ko kwraa bɛ ehe.
13. Akɛni Yehowa eye shi ni ewo shwɛɛnii ni afɔ amɛ mu lɛ nɔ hewɔ lɛ, efee nɔkwɛmɔ nɔ kpakpa kɛha “toi krokomɛi” lɛ yɛ mɛɛ gbɛ nɔ?
13 Wiemɔ mli gbeyeishemɔ ni bɛ, ni shwɛɛnii lɛ ni afɔ amɛ mu lɛ ejie lɛ kpo aahu kɛbashi bianɛ lɛ jɛ bɔ ni Yehowa ehi shi yɛ eshiwoo lɛ naa lɛ hewɔ, akɛ: “Naa, miha ohiɛ ewa yɛ amɛhiɛ, ni ohiɛŋtso hu ewa ewo amɛhiɛŋtsei; naa, miha ohiɛŋtso efee tamɔ diamente ni wa fe tswɛrɛbo lɛ. Kaashe amɛ gbeyei, ni otsui akafa yɛ amɛhiɛ, tsɛ weku toigbolɔi ji amɛ!” (Ezekiel 3:8, 9) Akɛni awaje amɛ nɛkɛ hewɔ lɛ, shwɛɛnii lɛ etsu nii akɛ nɔkwɛmɔ nɔ ni haa mɔ tsui nyaa kɛha “toi krokomɛi” lɛ ni amɛyi faa babaoo, ni Yesu Kristo Tookwɛlɔ Kpakpa lɛ wo shi akɛ ebaabua amɛnaa kɛba eshwɛɛnii ni afɔ amɛ mu lɛ masɛi lɛ. (Yohane 10:16; Kpojiemɔ 7:9-17) Ákɛ Yehowa Odasefoi lɛ, nɛkɛ “tooi krokomɛi” nɛɛ ena ekãa tamɔ jata.
14, 15. (a) Mɛɛ sɔrɔtofeemɔ hewɔ ni Yehowa odasefoi babaoo ni yɔɔ Kristendom kɛ esɛɛgbɛ shikpɔji anɔ lɛ naa amanehulu yɛ tsuŋwoo hei lɛ? (b) Yɛ mɛɛ gbɛ nɔ hewalɛ ni tsuŋwooi naa yɛ Odasefoi ni eye amɛhe lɛ anɔ lɛ yɔɔ sɔrɔto yɛ nɔ ni akpaa gbɛ lɛ he lɛ?
14 Yehowa Odasefoi ekaseee Babilon kpeteŋkpele lɛ. No hewɔ lɛ amɛyɛ nyɛmimɛi yɛ Kristofoi ahemɔkɛyeli lɛ mli yɛ Kristendom shikpɔji lɛ anɔ kɛ esɛɛ fɛɛ ni miina nɔ̃ yɛ gboklɛfoi atsui amli yɛ amɛhe ni amɛkɛwooo maŋ saji amli kwraa lɛ hewɔ. Enɛ kɛ gbeyeishemɔ woko Odasefoi ni eye amɛhe lolo lɛ kɛ mɛi ni awo amɛ tsuŋ lɛ amli, ni enɛ tamɔ bɔfo Paulo nyɛmimɛi Kristofoi ni yɔɔ Roma lɛ anɔ̃ lɛ pɛpɛɛpɛ. Paulo bi yɛ saneyeli ko mli akɛ eesumɔ ni ekɛ esane lɛ ayafɔ Roma Kaisare lɛ hiɛ kɛha jalɛsaneyeli, ni kojolɔ lɛ fa akɛ: “Ni okɛ osane lɛ eha Kaisare yeli nɛɛ, Kaisare ŋɔɔ nɔŋŋ oootee.” (Bɔfoi 25:10-12) No hewɔ lɛ awo Paulo kɔsɔŋkɔsɔ ni akɛ lɛ fa gbɛ kɛtee Roma ni akɛ lɛ yawo gboklɛfoi atsuŋ kɛyashi be mli ni aaaye esane lɛ. Shihilɛi ni tamɔ nɛkɛ shishi eyɔɔ hewɔ ni yɛ be mli ni eŋmaa wolo eyaha enanemɛi Kristofoi ni esumɔɔ amɛ waa ni yɔɔ Filipi maŋtiase lɛ mli yɛ Hela lɛ, ekɛɛ akɛ:
15 “Ni nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo etsɔ mikpãai lɛ anɔ ena ekãa babaoo fe tsutsu lɛ kɛmiijaje Nyɔŋmɔ wiemɔ lɛ ni amɛsheee gbeyei.”—Filipibii 1:14.
16. Yɛ tsuŋ ni awo nyɛmimɛi Kristofoi lɛ fɛɛ sɛɛ lɛ, mɛɛ sui Yehowa Odasefoi ni eye amɛhe lɛ jie lɛ kpo yɛ Jeŋ Ta I sɛɛ nɔŋŋ, ni mɛni hewɔ nakai su lɛ nɔŋŋ he hiaa ŋmɛnɛ lɛ?
16 Nɔ ko ni tamɔ enɛ hu nɛ, beni Jeŋ Ta I ba naagbee yɛ afi 1918 mli lɛ, Watchtower Asafo lɛ yitso lɛ mli onukpai lɛ kɛ nitsulɔi lɛ na amɛhe yɛ tsuŋwoohe yɛ apasa naafolɔmɔ hewɔ. Akɛni toiŋjɔlɛ eba agbɛnɛ hewɔ lɛ, nyɛmimɛi ni yɔɔ sɛɛ lɛ kɛ ekãa to gbɛjianɔ amrɔ nɔŋŋ koni aŋmɛɛ amɛhe. Aŋmɛɛ amɛhe kɛjɛ amɛtsuŋwoo lɛ mli yɛ 1919 ni afo amɛsane lɛ mli akɛ ayeee dɔŋŋ. No hewɔ lɛ abu amɛ akɛ mɛi ni yeee apasa naafolɔmɔi lɛ eko kwraa mli fɔ. Amɛwó Nyɔŋmɔ Maŋtsɛyeli kɛtsɔ Kristo nɔ lɛ he sanekpakpa lɛ shiɛmɔ lɛ nɔ kɛ ekãa babaoo fe be fɛɛ, koni amɛkɛtswa Babilon Kpeteŋkpele lɛ kɛ ehemɛi lɛ mpoa. Akɛni Yehowa Odasefoi ni awo amɛ tsuŋ lɛ fa ŋmɛnɛ, fe bɔ ni eyɔɔ yɛ Jeŋ Ta I be lɛ mli hewɔ lɛ, ebafeɔ nitsumɔ ni ka amɛnyɛmimɛi ni eye amɛhe ni yɔɔ sɛɛ lɛ anɔ akɛ ‘amɛjaje Nyɔŋmɔ wiemɔ lɛ ni amɛsheee gbeyei.’
Mɛi Ni Woɔ Kristendom Hiɛgbele Yɛ Toi Ni Amɛboɔ Hewɔ
17. (a) Yɛ mɛi ni eeenyɛ eba akɛ amɛbaabo toi lɛ agbɛfaŋ lɛ, mɛni Yehowa kɛɛ Ezekiel? (b) Yɛ beni akɛ mɔdɛŋbɔɔ kɛ hiɛmiamɔ etsu namɛi ahe nii sɛɛ dani be shɛ ni esa akɛ agbala jwɛŋmɔ kɛba mɛi ni baanyɛ abo toi lɛ anɔ, ni yɛ mɛɛ gbɛ nɔ?
17 Sanebimɔ ko ni yɔɔ miishɛɛ ji akɛ. Namɛi eka shi faŋŋ akɛ amɛbaanyɛ amɛfee mɛi ni baabo toi lɛ? Yehowa kɛɛ Ezekiel kɛkɔ enɛ he akɛ: “Ejaakɛ jeee maŋ ni wieɔ maŋsɛɛ wiemɔ ni amɛwiemɔ wa ŋɔɔ atsuɔ bo nɛɛ . . . Jeee majimaji babaoo ni wieɔ maŋsɛɛ wiemɔ ni amɛwiemɔ wa ni onuuu amɛwiemɔ ni. Lɛlɛŋ, kɛ amɛŋɔɔ mitsuɔ bo nɛɛ kulɛ, amɛaabo bo toi.” (Ezekiel 3:5, 6) Ebafee sɔ ni ka gbalɔ lɛ nɔ akɛ eya nɔ ewie Nyɔŋmɔ wiemɔ lɛ etsɔɔ lɛ diɛŋtsɛ emaŋbii lɛ, ewie etsɔɔ Israelbii ni yɔɔ nom mli yɛ Babilon shikpɔŋ lɛ nɔ lɛ. Nakai nɔŋŋ hu kɛbashi wɔ afii ohai 20 nɛɛ mli afii nyɔŋmai ejwɛ lɛ teŋgbɛ lɛ, mumɔŋ Israel shwɛɛnii ni afɔ amɛ mu lɛ mia amɛhiɛ koni amɛbua mumɔŋ Israel naagbee mlibii lɛ anaa amɛwo “asafoku bibioo” lɛ “kuu” ni ŋwɛi Tsɛ lɛ eto akɛ ekɛ Maŋtsɛyeli lɛ baaha amɛ, koni amɛkɛ e-Bi lɛ aye maŋtsɛ kɛha adesai ni akpɔ amɛ lɛ jɔɔmɔ lɛ mli. (Luka 12:32) Kɛkɛ ni asusu e-Bi lɛ wiemɔi ni yɔɔ Yohane 10:16 lɛ kɛ bɔ ni ekɔɔ Kpojiemɔ 7:9-17 he lɛ he ekoŋŋ.
18, 19. Mɛni hewɔ ebi gbeyei ni asheee yɛ 1935 mli koni akɛyoo “asafo babaoo” lɛ akɛ amɛfata “toi” ni abaafee amɛ kɛ shwɛɛnii ni afɔ amɛ mu lɛ “kuu kome” lɛ ahe lɛ?
18 Yesu, ni ji Nyɔŋmɔ Bi lɛ kɛɛ yɛ Yohane 10:16 akɛ: “Ni miyɛ toi krokomɛi ni jɛɛɛ toi atsu nɛɛ mli; ni nomɛi hu ja miŋɔ amɛ kɛba, ni amɛbanu migbee, ni toi lɛ fee kuu kome kɛ kwɛlɔ kome.”
19 Kɛ aaatsɛ mɛi komɛi akɛ “toi krokomɛi” ni amɛbo “kwɛlɔ kome” lɛ gbee toi yɛ be nɛɛ mli lɛ biɔ gbeyei ni asheee. Yehowa Odasefoi miitsɔ yiwaa ni naa wa mli yɛ Adolf Hitler asraafoi lɛ adɛŋ, kɛ Roma Katolek Sɔlemɔ lɛ ni Nazi Hitler ji emlinyo lɛ osɔfoi lɛ asɛɛfimɔ. No hewɔ lɛ ebi hemɔkɛyeli kɛ hekɛnɔfɔɔ babaoo kɛ gbeyei ni asheee kwraa yɛ jeŋ shihilɛ ni tamɔ nɛkɛ mli, yɛ Watch Tower Asafo lɛ nɔkwɛlɔ lɛ dɛŋ koni etsɔɔ yɛ afi 1935 mli akɛ, “asafo babaoo” lɛ ni yɔɔ Kpojiemɔ 7:9-17 lɛ ji “toi krokomɛi” lɛ, ni ágba amɛhe sane afɔ shi lɛ, ni ákɛ abaafee amɛ kɛ shwɛɛnii lɛ, ni afɔ amɛ mu ni awaa amɛyi lɛ ni yɔɔ “toi atsu nɛɛ mli” lɛ ekome ákɛ “kuu kome.” Shi kɛlɛ, ehe bahia ni ‘ejaje Nyɔŋmɔ wiemɔ lɛ ni esheee gbeyei.’ Ni efee nakai hu.
20. Te “toi krokomɛi” lɛ ehere nɔ ámɛha tɛŋŋ, no hewɔ lɛ “kuu” lɛ ayi efa kɛyashɛ nɛgbɛ ŋmɛnɛ?
20 Kɛjɛ shishijee mli tɔɔ ni ohai abɔ here nɔ, amɛjɔɔ amɛhe nɔ kwraa ni nɔ ko nɔ ko eshwɛɛɛ yɛ sɛɛ dɔŋŋ amɛha Yehowa Nyɔŋmɔ kɛtsɔ ‘ekwɛlɔ kome’ lɛ nɔ ni amɛfee enɛ he okadi kɛtsɔ nu mli baptisimɔ nɔ. Ni amrɔ nɛɛ, yɛ Je Ta II ni bafo mli lɛ fɛɛ sɛɛ lɛ, nakai “toi krokomɛi” lɛ ayi efa amɛfee ‘toi akuu’ ko ni amɛyifalɛ shɛɔ akpekpei enyɔ kɛ fã loo nɔ ni fe nakai yɛ shikpɔji 205 nɔ. Shikpɔji nɛɛ babaoo yɛ nɔ ni atsɛɔ lɛ akɛ Kristendom lɛ sɛɛ, tamɔ Japan nɛkɛ, heni Maŋtsɛyeli sane lɛ he shiɛlɔi ni kɛ aja mli lɛ amɛshɛɔ 70,000 daa afi yɔɔ lɛ, kɛ Korea ni yɔɔ mɛi ni fe 30,000, kɛ Nigeria ni yɔɔ mɛi fe 100,000.
21. Namɛi ni hereɔ “kwɛlɔ kome” lɛ tsɛmɔ lɛ nɔ hewɔ ni enɛ woɔ Kristendom hiɛgbele lɛ?
21 Akpɛlɛɔ nɔ akɛ aawo Kristendom ni hiɛŋtso nɔ wa ni etsui hu wa lɛ hiɛgbele yɛ “kwɛlɔ kome” lɛ tsɛmɔ ni ahere nɔ yɛ shikpɔji ni amɛwiemɔ wa ni etamɔ nɔ ni mɛi ni yɔɔ Kristendom lɛ nuuu shishi, titri lɛ amɛjamɔ gbɛjianɔtooi lɛ amli wiemɔi sɔrɔtoi lɛ. Mɛi ni batsɔmɔ Kristo “toi krokomɛi” lɛ miijie ekãa babaoo kpo akɛni amɛbuuu nɔ ni je lɛ baanyɛ asusu yɛ amɛhe, ni amɛkɛ amɛhe yabɔɔ “kwɛlɔ kome” lɛ he akɛ amɛ-Hiɛnyiɛlɔ kɛ Yiwalaherelɔ ni Nyɔŋmɔ kɛha amɛ lɛ. Amɛshiɛɔ Nyɔŋmɔ Wiemɔ lɛ ni amɛsheee gbeyei tamɔ amɛ Tookwɛlɔ lɛ.
22. Yɛ shihilɛ loo bɔ ni je lɛ hiɛ yɔɔ hewɔ lɛ, mɛɛ jwɛŋmɔŋ su nɛkɛ esa kɛ Yehowa Odasefoi kɛshiɛ Nyɔŋmɔ Wiemɔ lɛ?
22 Je lɛ su ni yɔɔ gbeyei lɛ miifite kwraa. Daimonioi ahewalɛ ebua jeŋmaji lɛ anaa amɛto amɛ srɛnɛɛ kɛmiiya Harmagedon tawuu he lɛ kɛha naagbee kwraa ta lɛ. Yehowa Odasefoi baadamɔ he ni yɔɔ shweshweeshwe, yɛ ŋsra lɛ sɛɛ, ni amɛkwɛ beni amɛ-Nyɔŋmɔ lɛ yeɔ kunim lɛ. Akɛni amɛje tai amli Ta lɛ mli shweshweeshwe hewɔ lɛ, amɛbaafata ŋwɛi asafoi ni mli efili amɛ ni nyãa lɛ ahe ni amɛjaje, Yehowa, Nyɔŋmɔ ni anyɛŋ aye enɔ kunim lɛ kɛ e-Tatsɛ-Nukpa hewalɔ, Yesu Kristo yijiemɔi amɛtsɔɔ. (Kpojiemɔ 16:13-16) Jeee be ni akɛbɔɔ he agwaa lɛ nɛ! Nyɛyaa nyɛhiɛ mɔ, nyɛ Yehowa Odasefoi ni áfee nyɛ asafoku kome, yɛ ‘Nyɔŋmɔ wiemɔ lɛ ni nyɛshiɛɔ ni nyɛsheee gbeyei’ lɛ mli kɛyashi be mli ni shikpɔŋ lɛ nɔ aayi obɔ kɛ Yehowa anunyam lɛ he nilee tamɔ bɔ ni nu ha ŋshɔ shishi lɛ.—Yesaia 11:9; Ezekiel 47:1-5.a
[Shishigbɛ niŋmai]
a Ajie kɛjɛ December 15, 1983 Blɔfo Buu-Mɔɔ lɛ mli.
Ani Okadi?
□ Mɛɛ niiashikpamɔ Ezekiel na yɛ Babilon, ni enɛ naa ehenɔ yɛ ŋmɛnɛŋmɛnɛ beaŋ yɛ mɛɛ gbɛ nɔ?
□ Yɛ subaŋ ni osɔfoi hiɛ hewɔ lɛ, mɛni hewɔ ehe hiaa ni □ Nyɔŋmɔ webii afee mɛi ni sheee gbeyei yɛ e-Wiemɔ lɛ gbɛɛ-kɛ-shwamɔ mli?
□ Yɛ mɛɛ gbɛ nɔ Yehowa webii ni amɛjɔɔ amɛhe nɔ lɛ ejaje amɛwiemɔ Iɛ amɛtsɔɔ “maŋ ni amɛwiemɔ wa”?
Mɛɛ su esa akɛ ojie lɛ kpo bianɛ kɛ agbɛnɛ yɛ wɔsɛɛ be mli?
[Mfoniri ni yɔɔ baafa 17]
Yehowa Odasefoi sheee gbeyei yɛ osɔfoi ni ekpɛlɛɛɛ amɛshiɛmɔ lɛ nɔ kɛ hiɛwalɛ lɛ fɛɛ sɛɛ
[Akrabatsa ni yɔɔ baafa 20]
“Nyɛhe awaa ni nyɛfea ekaa, nyɛkashea gbeyei ni nyɛtsui akafaa amɛnɔ; ejaakɛ Yehowa, o-Nyɔŋmɔ Iɛ ji mɔ ni kɛ bo nyiɛ, eshiŋ bo, ni esaa ekwaŋ bo. Ni Yehowa lɛ, lɛ ji mɔ ni aaanyiɛ ohiɛ, lɛ nɔŋŋ ekɛ bo aaahi shi, eshiŋ bo afi esaa ekwaŋ bo; kaashe gbeyei ni otsui akafa.”—5 Mose 31:6, 8.