Yitso 14
Maŋtsɛ lɛ Miiye Nɔ!
1, 2. (a) Mɛɛ nɔ ko ni sa kadimɔ jogbaŋŋ yɔɔ afi 1914 he? (b) Te Watch Tower wolo tɛtrɛɛ lɛ gbala jwɛŋmɔ kɛtee afi 1914 nɔ eha tɛŋŋ afii babaoo dani nakai afi lɛ shɛ?
ŊWANEJEE ko bɛ he akɛ, afi 1914 bafee tsakemɔ be krɛdɛɛ ko yɛ jeŋmaji lɛ kɛ adesai asaji amli. Shi esa kadimɔ jogbaŋŋ kwraa fe bɔ ni yinɔsaneŋmalɔi babaoo yɔseɔ. No ji be mli ni nibii ni yɔɔ miishɛɛ ni kɔɔ Nyɔŋmɔ Maŋtsɛyeli lɛ ‘baa’ lɛ he lɛ ba mli. No mli lɛ Biblia kaselɔi ni kwɛɔ jogbaŋŋ lɛ kɛ afii abɔ etsɔ hiɛ amɛmiikpa nakai afi lɛ gbɛ kɛ gbɛkpamɔ ni mli wa. Kɛ mɛɛ nɔdaamɔ nɔ?
2 Afii nyɔŋmai etɛ kɛ ejwɛ dani 1914 aaashɛ lɛ, wolo tɛtrɛɛ ni atsɛɔ lɛ Zion’s Watch Tower and Herald of Christ’s Presence lɛ gbala jwɛŋmɔ kɛtee afi 1914 nɔ akɛ be ni akadi lɛ yɛ Biblia gbalɛ mli, yɛ wolo tɛtrɛɛ nɛɛ mli nɔ ni akala yɛ December 1879 kɛ March 1880 lɛ amli. Sane ko ni aŋma yɛ June 1880 nɔ lɛ mli lɛ gbala jwɛŋmɔ kɛtee “Jeŋmaji Abei lɛ (Luka xxi. 24)” naagbee ni bɛŋkɛɔ lɛ nɔ. Eyɛ mli akɛ niŋmalɔ lɛ nuuu nɔ ni nibii ni eshwɛ fioo ni ebaaba lɛ tsɔɔ lɛ shishi jogbaŋŋ kɛmɔ shi yɛ nakai beaŋ moŋ, shi etsɔɔ kɛjɛ Biblia be he akɔntaabuu mli akɛ be sɛɛjɛkɛmɔ ni ji “bei kpawo,” aloo afii 2,520 ni jeŋmaji ni bɛ Nyɔŋmɔ gbeyeishemɔ lɛ kɛbaaye nɔ, ni je shishi kɛjɛ blema Yerusalem klɛŋklɛŋ amaŋfɔ feemɔ lɛ mli lɛ, baaba naagbee yɛ “A. D. 1914.” Ewie akɛ: “Afee be kakadaŋŋ ni ji afii 2520 kɛ . . . niiashikpamɔ ni mli wa [ni Nyɔŋmɔ webii ena] yɛ kooloi [adesai anɔyelii, Dan. vii.] ashishi lɛ he mfoniri faŋŋ yɛ Dan. iv., kɛtsɔ Nebukadnezar ‘bei kpawo’ kɛ eniiashikpamɔ ni mli wa ni ena yɛ kooloi ateŋ lɛ nɔ.” Belɛ, mɛni ji nɛkɛ “bei kpawo” nɛɛ mɔ?
LAMƆ KO SHISHITSƆƆMƆ
3. Mɛɛ shishijee anɔkwale ko ajaje yɛ Daniel 4:25?
3 Biblia mli wolo ni ji Daniel lɛ yitso 4 lɛ wieɔ gbalɛ mli lamɔ ko ni sa kadimɔ waa he. Efeɔ he mfoniri akɛ “Mɔ ni Yɔɔ Ŋwɛi Shɔŋŋ lɛ Yɛ Hewalɛ yɛ gbɔmɛi amaŋtsɛyeli nɔ, ni eŋɔhaa mɔ fɛɛ mɔ ni esumɔɔ.” (Daniel 4:25) Nebukadnezar, ni ji Babilon maŋtsɛ lɛ la lamɔ lɛ, ni egba etsɔɔ Daniel kɛha eshishitsɔɔmɔ.
4-6. (a) Mɛɛ lamɔ ko Nebukadnezar la? (b) Te Daniel tsɔɔ shishi eha tɛŋŋ? (d) Mɛɛ gbɛ nɔ eba mli yɛ? (e) Beni asaa akɛ Nebukadnezar ba egbɛhe lɛ ekoŋŋ lɛ, mɛɛ sane ko ekpɛlɛ nɔ?
4 Nebukadnezar na tso agbo kpeteŋkpele ko ni anyɛɔ ajɛɔ shikpɔŋ lɛ naagbee hei fɛɛ anaa lɛ yɛ ninaa mli. Ehaa mɔ fɛɛ mɔ niyenii, kɛ abobaa he hu. Shi “mɔ krɔŋkrɔŋ” ko jɛ ŋwɛi ewo akpɔ akɛ afo tso lɛ afɔ̃ shi ni akɛ dade kɛ akɔɔble, ni ji su mli nii ni wa fe fɛɛ ni ale yɛ nakai beaŋ lɛ afĩ etsoku lɛ. “Bei kpawo” baaho yɛ be mli ni tso lɛ yɔɔ nɛkɛ naatsii shihilɛ nɛɛ mli lɛ.
5 Beni etsɔɔ nɛkɛ gbalɛ mli lamɔ nɛɛ shishi lɛ, Daniel tsɔɔ mli akɛ be ni tso lɛ kɛyɔɔ egbojee mli lɛ damɔ shi kɛha Nebukadnezar. ‘Abaafo lɛ afɔ shi’ loo abaaba lɛ shi kwraa. “Bei kpawo” baaho, ni nakai be lɛ mli fɛɛ lɛ, Nebukadnezar baafee tamɔ jwɛiaŋ kooloi lɛ pɛpɛɛpɛ. Shi taakɛ bɔ ni akpataaa “tso” lɛ hiɛ kwraa kɛmɔɔɔ shi lɛ, nakai nɔŋŋ hu yɛ “bei kpawo” lɛ sɛɛ lɛ, abaasaa akɛ maŋtsɛ lɛ aba egbɛhe mli ekoŋŋ.—Daniel 4:19-27.
6 Enɛ ji nɔ pɛpɛɛpɛ ni ba Nebukadnezar nɔ. Aba lɛ shi kwraa, ni ebatsɔ tamɔ kooloo ko ní ajie kɛjɛ adesai ashihilɛ mli, ni eyeɔ jwɛi. Eka shi faŋŋ akɛ, nakai “bei kpawo” lɛ feɔ afii kpawo, ni ji be ni Nebukadnezar kɛna ‘eniiashikpamɔ ni mli wa waa yɛ kooloi lɛ ateŋ lɛ.’ Eyiteŋ tsɔi fɛɛ tsa kusuu, tamɔ okropɔŋ tsɛji, ni ewaobii anaa hu tsa kakadaji tamɔ looflɔ waobii anaa. Shi yɛ naagbee lɛ, ejwɛŋmɔ ku sɛɛ eba eyiŋ ekoŋŋ, ni asaa akɛ lɛ ba emaŋtsɛyeli gbɛhe lɛ mli. Beni enɛ ba mli lɛ, ejie “ŋwɛi Maŋtsɛ lɛ yi,” ni ewo ehiɛ nyam akɛ Mɔ ni yɔɔ nɔyeli hewalɛ lɛlɛŋ, kɛ mɔ ni “emaŋtsɛyeli lɛ yɛ kɛjɛ yinɔ kɛyaa yinɔ.”—Daniel 4:28-37.
7-9. (a) Mɛɛ gbalɛ mli Yesu wie Jeŋmajiaŋbii Abei lɛ naagbee lɛ he yɛ? (b) No hewɔ lɛ mɛɛ sanebimɔi ehe hiaa ni wɔna nomɛi ahe miishɛɛ waa?
7 Shi kɛlɛ, mɛni enɛɛmɛi fɛɛ kɛ wɔ Ŋmɛnɛŋmɛnɛ Beaŋ afi 1914 yɔɔ feemɔ?
“JEŊMAJI ABE LƐ”
8 Beni Yesu Kristo tsɔɔ ‘nibii agbɛjianɔtoo lɛ naagbee lɛ he okadi’ lɛ ni ewie akɛ:
“Ni jeŋmaji lɛ aaanaanaa yerusalem nɔ kɛyashi beyinɔ ni jeŋmaji abe lɛ aaashɛ.” (Luka 21:24)
“Jeŋmaji” ni Yesu wieɔ he lɛ ji jeŋmaji ni jeee Yudafoi lɛ, aloo “Jeŋmajiaŋbii” lɛ. King James Version Biblia ni ale jogbaŋŋ lɛ kɛ wiemɔ “Jeŋmaji abe” tsuɔ nii yɛ biɛ. Enɛ hewɔ lɛ, mɛi pii esusu he akɛ ‘Mɛni ji Jeŋmajiaŋbii Abe lɛ? Mɛɛ be sɛɛjɛkɛmɔ pɔtɛɛ yɔɔ Yesu jwɛŋmɔ mli? Mɛɛ be eje shishi, ni mɛɛ be ebaaba naagbee?’
9 Wɔtsɔ hiɛ wɔna momo akɛ Yesu gbalɛ kpeteŋkpele ni kɔɔ “okadi” lɛ he lɛ yɛ shishinumɔ ko ni he hiaa waa kɛha wɔ ŋmɛnɛ. No hewɔ lɛ, ehe miihia ni wɔle nɛkɛ sanebimɔi nɛɛ hu ahetoo.
“YERUSALEM” TSƆƆ MƐNI?
10-12. (a) Taakɛ nilelɔ ko tsɔɔ lɛ, nibii ni ba yɛ afi 29-70 Ŋ.B. lɛ feɔ mɛni he mfoniri? (b) Shi mɛɛ shishinumɔ “Yerusalem” baanyɛ ana yɛ ŋmalɛ ni yɔɔ Luka 21:24 lɛ mli? (d) Saiklopedia ko ni ale jogbaŋŋ lɛ yeɔ ebuaa wɔ kɛ nɛkɛ shishinumɔ nɛɛ yɛ mɛɛ gbɛ nɔ? (e) Enɛ hewɔ lɛ, “Yerusalem” damɔ shi kɛha mɛni?
10 Beni etsɔɔ ejwɛŋmɔ yɛ Yesu gbalɛ lɛ he lɛ, Nilelɔ A. T. Robertsona wie akɛ Yesu kɛ “sɔlemɔ tsu lɛ kɛ Yerusalem hu hiɛkpatamɔ ni ba mli kɛ̃ yɛ nakai yinɔ lɛ mli yɛ A.D. 70 lɛ tsu nii akɛ ebaa ni ji enyɔ lɛ kɛ je lɛ naagbee loo yinɔ lɛ naagbee kwraa ni baa lɛ hu he okadi.” Enɛ hewɔ lɛ, wɔbaanyɛ wɔbi akɛ: Yɛ nɔ ni ba Yerusalem nɔ yɛ afi 70 Ŋ.B. lɛ sɛɛ lɛ, mɛɛ shihinumɔ ni da loo nɔ ni baaba yɛ be kakadaŋŋ mli Yesu kɛwie “Yerusalem” he yɛ Luka 21:24 lɛ?
11 Yesu bu Yerusalem akɛ Israel maŋtiase, he ni maŋtsɛmɛi ni Yehowa efɔ amɛ mu yɛ David seshi lɛ mli lɛ taa “Yehowa sɛi lɛ nɔ” yɛ, ni amɛyeɔ nɔ akɛ maŋtsɛmɛi amɛhaa Yehowa Nyɔŋmɔ lɛ. Agbɛnɛ hu, esɔlemɔwe lɛ ji anɔkwa jamɔ shikwɛ̃ɛ he kɛha shikpɔŋ nɔ bii fɛɛ. (1 Kronika 28:5; 29:23; 2 Kronika 9:8) Cyclopaedia ni M’Clintock kɛ Strong fee lɛ wieɔ akɛ: “Akɛ Yerusalem efee Israel fɛɛ nɔ maŋtsɛ lɛ maŋtsɛyeli shihilɛ he; ni Sɔlemɔ tsu lɛ, ni afɔɔ lɛ tsɛmɔ akɛ ‘Yehowa shia lɛ’ feɔ maŋtsɛmɛi a-Maŋtsɛ, ni ji teokrase nɔyeli maŋ lɛ yitso ni nɔ kwɔ fe fɛɛ lɛ shihilɛ he yɛ nakai beaŋ nɔŋŋ, . . . Lɛlɛŋ, Yerusalem he ehiaaa yɛ maŋkwramɔ gbɛfaŋ: ejeee maŋtsɛyeli ko ni he wa waa ni miikudɔ maji krokomɛi amli saji lɛ maŋtiase, shi kɛlɛ edamɔ he ko ni kwɔ waa yɛ gbɛkpamɔi kpakpai ni David gba efɔ shi beni ejajeɔ ehemɔkɛyeli yɛ Mesia ko ni baaba lɛ mli lɛ mli [Lala 2:6; 110:2].”—Volume IV, baafa 838.
12 Anɔkwale ni eji akɛ maŋtsɛmɛi ni jɛ David seshi mli lɛ taa “Yehowa maŋtsɛyeli sɛi lɛ nɔ” lɛ ma anɔkwale ni eji akɛ maŋtsɛyeli lɛ, Nyɔŋmɔ nɔ ni lɛ nɔ mi. Israel maŋtsɛyeli lɛ, ni eshishitoo he yɔɔ Yerusalem lɛ feɔ Nyɔŋmɔ Maŋtsɛyeli diɛŋtsɛ he mfoniri. Enɛ hewɔ lɛ, “Yerusalem” damɔ shi kɛha Nyɔŋmɔ Maŋtsɛyeli lɛ.
13, 14. Mɛɛ be ‘nɔnaamɔ’ ni yɔɔ Luka 21:24 lɛ je shishi, ni yɛ mɛɛ gbɛ nɔ?
13 Agbɛnɛ kaimɔ Yesu wiemɔi nɛɛ, akɛ: “Jeŋmaji lɛ aaanaanaa Yerusalem nɔ kɛyashi beyinɔ ni jeŋmaji abe lɛ aaashɛ.” (Luka 21:24) Mɛɛ be nɛkɛ ‘nɔnaamɔ’ nɛɛ je shishi? Eka shi faŋŋ akɛ, eje shishi kwraa dani afɔ Yesu yɛ Betlehem, ejaakɛ maŋtsɛmɛi ni ji adesai ni jɛ David seshi lɛ mli lɛ ekpa maŋtsɛyeli yɛ Yerusalem be babaoo ko ni eho. David maŋtsɛmɛi aweku lɛ ba naagbee beni Babilonbii ni Nebukadnezar nyiɛ amɛhiɛ kɛbatutua maŋ lɛ jie Maŋtsɛ Zedekia kɛjɛ maŋtsɛsɛi lɛ nɔ lɛ.
14 Biblia lɛ yinɔsane ni ja jogbaŋŋ kɛmɔ shi lɛ kɛɔ wɔ nɔ ni ba yɛ nibii fɔji ni maŋbii lɛ kɛ Maŋtsɛ Zedekia fee lɛ hewɔ. Ejajeɔ akɛ: “Yehowa mlifu te shi wo emaŋ lɛ ni tsabaa ko bɛ dɔŋŋ. No hewɔ lɛ eyakpala Kaldeabii [Babilonbii] lɛ amaŋtsɛ lɛ kɛba amɛnɔ, ni ekɛ klante gbe amɛbalahii lɛ, . . . [Nyɔŋmɔ] tuu amɛ fɛɛ ewo [Nebukadnezar] dɛŋ. Ni Nyɔŋmɔ we lɛ nibii lɛ fɛɛ, nii wuji kɛ nii bibii, kɛ Yehowa we lɛ jwetrii lɛ kɛ maŋtsɛ lɛ kɛ enukpai lɛ ajwetrii lɛ, eloo fɛɛ tswɛm kɛtee Babel. Ni amɛshã Nyɔŋmɔ we lɛ, ni amɛkumɔkumɔɔ Yerusalem gbogboi lɛ.” (2 Kronika 36:11, 12, 16-20) Jɛmɛ ji he ni ‘nɔnaamɔ’ lɛ je shishi kɛjɛ.
“AAANAANAA NƆ” KƐYASHI MƐƐ BE?
15-17. (a) Namɔ laaje David maŋtsɛyeli lɛ he “gbɛnaa” lɛ, ni yɛ mɛɛ gbɛ nɔ? (b) Namɔ nine baashɛ nakai gbɛnaa lɛ nɔ ekoŋŋ lɛ, ni yɛ be sɛɛkɛlɛ enyiɛ mli? (d) No hewɔ lɛ, mɛɛ sanebimɔ ni he hiaa waa teɔ shi? (e) Mɛni hewɔ ebaahi jogbaŋŋ akɛ Daniel aha sanebimɔ nɛɛ hetoo lɛ?
15 Gbalɔ Ezekiel gba Zedekia, mɔ ni ji David maŋtsɛmɛi aseshi lɛ mli naagbee mɔ ni ye nɔ kɛjɛ Yerusalem lɛ jiemɔ kɛmiijɛ maŋtsɛsɛi lɛ nɔ lɛ efɔ shi, yɛ nɛkɛ wiemɔi nɛɛ amli akɛ:
“Bɔ ni Nuŋtsɔ Yehowa kɛɛ nɛ: ‘Ajie fai lɛ, ni akpɔ akekre lɛ! Enɛ ehiŋ bɔ ni eyɔɔ lɛ dɔŋŋ; . . . Butumɔ, butumɔ, butumɔ mabutu lɛ; ni enɛ hu ehiŋ shi kɛyashi beyinɔ ni mɔ gbɛnaa ni ji lɛ aaaba, ni maŋɔha lɛ!’”—Ezekiel 21:26, 27.
16 Eyɛ mli akɛ Maŋtsɛ Zedekia laaje David maŋtsɛyeli lɛ he “gbɛnaa” lɛ yɛ nakai beaŋ moŋ, shi Mesia ni awo shi yɛ ehe lɛ nine baasaa ashɛ nakai “gbɛnaa” lɛ nɔ ekoŋŋ ni ebaaye nɔ yɛ Nyɔŋmɔ Maŋtsɛyeli lɛ mli “kɛaatee naanɔ.” (Luka 1:32, 33) Shi be sɛɛjɛkɛmɔ enyiɛ ebaaye dani Mesia maŋtsɛyeli—ni Israel shikpɔŋ nɔ maŋtsɛyeli kɛ emaŋtiase ni yɔɔ Yerusalem lɛ fee he mfoniri lɛ—baabɔi nɔyeli?
17 Yehowa Nyɔŋmɔ le, ni ebaanyɛ etsɔɔ be sɛɛjɛkɛmɔ lɛ yɛ e-Wiemɔ lɛ mli, taakɛ bɔ ni egba nibii krokomɛi babaoo ni baaba wɔsɛɛ lɛ kɛtsɔ hiɛ lɛ. Yɛ ewiemɔ ni kɔɔ “nibii agbɛjianɔtoo lɛ naagbee lɛ” he lɛ mli lɛ, Yesu tsɛ Daniel gbalɛ lɛ, ni Nyɔŋmɔ tsɔ hiɛ egba nibii pii ni baaya nɔ yɛ ŋwɛi kɛ shikpɔŋ nɔ lɛ yɛ mli pɛpɛɛpɛ lɛ sɛɛ shii abɔ. (Okɛ Mateo 24:3, 15, 21, 30 ato Daniel 9:27; 11:31; 12:1; 7:13 he.) Agbɛnɛ hu, ani gbalɛ ni kɔɔ “otsii nyɔŋmai kpawo” lɛ he, ni yɔɔ Daniel 9:24-27 lɛ kɛ be he akɔntaabuu ni ja pɛpɛɛpɛ haaa yɛ Mesia lɛ klɛŋklɛŋ baa lɛ he? Ani ebafeŋ nɔ ni ja jogbaŋŋ kɛha nakai gbalɔ lɛ nɔŋŋ akɛ eeetsɔɔ be kɛha Mesia lɛ baa ni ji enyɔ lɛ? Daniel yitso ejwɛ lɛ mli ji he ni wɔnaa nɛkɛ gbalɛ mli sane ni kɔɔ wɔhe tɛɛ nɛɛ yɛ.
EMLIBAA YƐ GBƐ NI DA NƆ
18. (a) Mɛni eeenyɛ efee akɛ no hewɔ ni je lɛŋ yinɔsaji etsiii Nebukadnezar sɛkɛyeli lɛ tã lɛ? (b) Mɛni hewɔ esa akɛ wɔbo nɔ ni Nyɔŋmɔ Wiemɔ lɛ kɛɔ yɛ biɛ lɛ toi lɛ?
18 Wɔsusu Daniel gbalɛ ni kɔɔ “bei kpawo” lɛ he lɛ klɛŋklɛŋ mlibaa diɛŋtsɛ lɛ he momo, ni wɔna akɛ ekɔ afii kpawo diɛŋtsɛ ni Nebukadnezar kɛye sɛkɛ lɛ he. Esaaa akɛ anɔkwale ni eji akɛ je lɛŋ yinɔsane ewieee afii kpawo ni Nebukadnezar kɛtaaa maŋtsɛsɛi lɛ nɔ lɛ he fitsofitso lɛ feɔ wɔ naakpɛɛ. Ale Mizraim, Ashur, kɛ Babilon blema nibii ni aŋmala ashwie lɛ jogbaŋŋ akɛ ajie nɔ fɛɛ nɔ ni baawo nɔyelɔ lɛ hiɛgbele lɛ kɛjɛ mli, ni no ji yiŋtoo kome hewɔ ni anyɛɛɛ akɛ he afɔ̃ nɔ, tamɔ bɔ ni Nyɔŋmɔ Wiemɔ ni jɛ mumɔŋ lɛ ji lɛ. Nyɔŋmɔ Wiemɔ lɛ ji nɔ ni maa nɔ mi ehaa wɔ akɛ lamɔ mli ninaa lɛ ba mli. Gbalɛ lɛ mli wiemɔi hu tsɔɔ akɛ ebaana emlibaa ni yaa shɔŋŋ po fe nakai, ni no hu eba mli. Yɛ mɛɛ gbɛ nɔ?
19. Mɛni hewɔ ni nilee yɔɔ mli akɛ nɛkɛ ninaa nɛɛ baaye ebua wɔ ni wɔkɛna Jeŋmajiaŋbii Abei lɛ sɛɛkɛlɛ lɛ?
19 Esa akɛ wɔkadi akɛ akɛ lamɔ lɛ ha Babilon maŋtsɛ lɛ, mɔ ni ji jeŋ nɔyelɔ tuuŋtu ni na gbɛfaŋnɔ titri ní akɛbutu nɔ ni damɔ shi kɛha Nyɔŋmɔ Maŋtsɛyeli ni yɔɔ shikpɔŋ nɔ, ní akɛto Jeŋmajiaŋbii anɔyeli ni baye je lɛ nɔ lɛ shishi lɛ. Agbɛnɛ hu, eka shi faŋŋ akɛ akɛ ninaa lɛ ha yɛ be mli ni nɛkɛ tsakemɔ kpele nɛɛ eba lɛ sɛɛ afii fioo pɛ mli—beni maŋtsɛyeli diɛŋtsɛ ni Yehowa tsɔɔ nɔ ejieɔ enɔyeli kpo lɛ eko bɛ dɔŋŋ lɛ. Kɛfata he lɛ, Daniel yitso 4 lɛ maa saneyitso ni ji ‘Mɔ ni Yɔɔ Ŋwɛi Shɔŋŋ lɛ ji gbɔmɛi amaŋtsɛyeli lɛ Nɔyelɔ, ni ekɛhaa mɔ fɛɛ mɔ ni esumɔɔ’ lɛ nɔ mi shii abɔ. (Daniel 4:17, 26, 34, 35) Enɛ hewɔ lɛ wɔyɛ yiŋtoo kpakpa ni wɔɔdamɔ nɔ wɔkpa ninaa nɛɛ gbɛ kɛha sane ni kɔɔ be ni Jeŋmajiaŋbii lɛ kɛbaaye shikpɔŋ nɛɛ nɔ lɛ he.
20. Mɛɛ sane ko wɔbiɔ, ni nɛgbɛ wɔbaanyɛ wɔtao hetoo lɛ yɛ?
20 Kɛji wɔmiibu be lɛ kɛjɛ be mli ni abutu nɔ ni feɔ Nyɔŋmɔ Maŋtsɛyeli lɛ he mfoniri diɛŋtsɛ, kɛ emaŋtsɛ ni jɛ David seshi lɛ mli lɛ, be sɛɛjɛkɛmɔ enyiɛ baaho dani Nyɔŋmɔ baajie maŋtsɛ ni eyeɔ lɛ kpo ekoŋŋ kɛtsɔ maŋtsɛyeli ni yɔɔ David odehei aweku lɛ mli lɛ nɔ, kɛ Mesia lɛ ákɛ maŋtsɛ ni miiye nɔ? Daniel yitso 4 lɛ haa nɔdaamɔ nɔ ni anyɛɔ akɛleɔ Jeŋmajiaŋbii Abe loo “jeŋmaji abe,” ni ji be mli ni nakai jeŋmaji lɛ aaanaanaa “Yerusalem,” loo Nyɔŋmɔ Maŋtsɛyeli lɛ nɔ lɛ sɛɛjɛkɛmɔ.—Luka 21:24.
21. Mɛni Daniel 4:15-17 kɛ Hiob 14:7 tsɔɔ yɛ shihilɛ ni nyiɛ Zedekia jiemɔ yɛ maŋtsɛsɛi lɛ nɔ lɛ sɛɛ lɛ he?
21 Nɔnaamɔ lɛ jeɔ shishi kɛjɛɔ afi mli ni Nebukadnezar jie Maŋtsɛ Zedekia kɛjɛ maŋtsɛsɛi lɛ nɔ yɛ Yerusalem lɛ. Kɛjɛ nakai beaŋ kɛyaa lɛ, ‘afo’ Yehowa maŋtsɛyeli, taakɛ afee he mfoniri yɛ Yuda maŋtsɛmɛi aseshi lɛ mli lɛ ‘afɔ shi.’ Ebaje naatsii shishi, tamɔ tsoku ni akɛ dadei fimɔ lɛ yɛ Nebukanezar lamɔ lɛ mli lɛ. Jeŋmaji anɔyelii ni tamɔ kooloi anɔ ye shikpɔŋ lɛ nɔ fɛɛ. Shi hiɛnɔkamɔ yɛ kɛha “tso” lɛ, akɛ “eeehere ekoŋŋ.” Ni no lɛ, gbɔmɛi ni yɔɔ wala mli lɛ baana “ale akɛ Mɔ ni Yɔɔ Ŋwɛi Shɔŋŋ lɛ Yɛ Hewalɛ yɛ gbɔmɛi amaŋtsɛyeli nɔ.”—Daniel 4:15-17; Hiob 14:7; okɛto Yesaia 11:1, 2; 53:2 he.
22. Mɛɛ be Maŋtsɛyeli “tso” lɛ fu baa kusuu ekoŋŋ, ni yɛ mɛɛ gbɛ nɔ?
22 Mɔ ni Yɔɔ Ŋwɛi Shɔŋŋ lɛ yeɔ nɔ kɛtsɔɔ e-Mesia lɛ nɔ yɛ nɛkɛ Maŋtsɛyeli ni asaa akɛma shi ekoŋŋ nɛɛ nɔ. Dabi, jeee yɛ nakai Mɔ lɛ klɛŋklɛŋ puemɔ akɛ gbɔmɔ ni eye emuu yɛ shikpɔŋ nɔ lɛ mli, beni Yudafoi lɛ gbe ehe guɔ ni amɛkpoo lɛ akɛ maŋtsɛ lɛ. Shi moŋ ajie dadei ni akɛfimɔ tsoku lɛ, ni Maŋtsɛyeli “tso” lɛ bu kusuu ekoŋŋ, beni nɛkɛ “gbɔmɛi amliwoo” nɛɛ ba yɛ enunyam lɛ mli akɛ gbɔmɛi ni jɛ jeŋmaji fɛɛ amli lɛ aŋwɛi Maŋtsɛ lɛ. Kɛkɛ ni, beni Jeŋmajiaŋbii Abei lɛ ba naagbee lɛ, ni je nɛŋ maŋtsɛyeli lɛ batsɔ “wɔ-Nuŋtsɔ lɛ kɛ e-Kristo” lɛ maŋtsɛyeli.—Kpojiemɔ 11:15; Daniel 4:17, 25.
“BEI KPAWO” LƐ—ESƐƐKƐLƐ FEƆ ENYIƐ?
23. Mɛni hewɔ Jeŋmajiaŋbii Abei lɛ bashɛɔ wɔgbii nɛɛ amli tɔ̃ɔ lɛ?
23 Eka shi faŋŋ akɛ, belɛ, “bei kpawo” lɛ ni akɛtsu nii kɛha Jeŋmajiaŋbii Abei lɛ sɛɛ baakɛ kwraa fe afii kpawo diɛŋtsɛ. Kaimɔ akɛ, Yesu wie nɛkɛ Jeŋmajiaŋbii Abei nɛɛ ‘mlibaa’ loo enaagbee he yɛ “nibii agbɛjianɔtoo lɛ naagbee” lɛ he wiemɔ mli. (Luka 21:7, 24; Mateo 24:3, NW) No hewɔ lɛ, ebaatsa nɔ aahu kɛbashi wɔgbii nɛɛ amli tɔ̃ɔ. Shi te esɛɛkɛlɛ diɛŋtsɛ hu?
24. Te wɔɔfee tɛŋŋ wɔtsɔɔ “bei kpawo” lɛ sɛɛkɛlɛ lɛ shishi?
24 Kɛji ogbele Kpojiemɔ yitso 12 lɛ, wɔnaa yɛ jɛmɛ akɛ kuku 6 kɛ 14 lɛ tsɔɔ akɛ be sɛɛkɛlɛ ni ji gbii 1,260 lɛ feɔ “be kɛ bei kɛ be fa,” aloo 1 + 2 + 1/2 ni fɛɛ feɔ bei 31/2. No hewɔ lɛ, “be” kome baafee gbii 360, aloo nyɔŋtsere nyɔji 12, ni kɛ aja mli lɛ, eko fɛɛ eko hiɛ gbii 30. “Bei kpawo” lɛ baafee gbii 2,520; ni Biblia mli gbalɛ naa bebuu ni ji “gbi kome aaatsɔ afi” lɛ tsɔɔ akɛ, kɛ abu naa lɛ, nɛkɛ bei nɛɛ baafee kalenda afii 2,520 diɛŋtsɛ. (4 Mose 14:34; Ezekiel 4:6) Enɛ hewɔ lɛ, nɛkɛ ji “bei kpawo”—Jeŋmajiaŋbii Abei lɛ sɛɛkɛlɛ.
25. Mɛɛ gbɛ nɔ “afii nyɔŋmai kpawo” ni yɔɔ Yeremia 25:11 lɛ yeɔ ebuaa ni akɛleɔ be ni Jeŋmajiaŋbii Abei lɛ je shishi?
25 Ayeɔ abuaa wɔ ni wɔnyɛɔ wɔleɔ kalenda nɔ be ni Jeŋmajiaŋbii Abei lɛ je shishi kɛtsɔ Nyɔŋmɔ Wiemɔ lɛ mli kwɛmɔ nɔ. Taakɛ bɔ ni wɔtsɔ hiɛ wɔna momo lɛ, Yehowa ŋmɛ Babilonbii lɛ gbɛ ni amɛye ewebii anɔ kunim, ni amɛkpata Yerusalem kɛ esɔlemɔ tsu lɛ hiɛ, ni amɛjie Zedekia kɛjɛ “Yehowa maŋtsɛyeli sɛi lɛ nɔ” ni amɛloo Yudafoi lɛ kɛtee Babilon nomŋɔɔ mli. (1 Kronika 28:5) Nibii ni nyiɛ sɛɛ ba yɛ “nyɔŋ ni ji kpawo lɛ nɔ lɛ” ha Yudafoi fioo ni shwɛ yɛ shikpɔŋ lɛ nɔ lɛ jo foi kɛtee Mizraim, no hewɔ lɛ enɛ ha Yuda bakã shi amaŋfɔ kwraa. (2 Maŋtsɛmɛi 25:1-26; Yeremia 39:1-10; 41:1–43:7) Yehowa gbalɔ Yeremia egba efɔ shi akɛ amaŋfɔ feemɔ lɛ baaye afii 70. (Yeremia 25:8-11) No sɛɛ lɛ, Yehowa ‘baawo Babel maŋtsɛ lɛ nyɔmɔ yɛ enishaianii lɛ hewɔ,’ ni ‘ekɛ E-webii lɛ baaku sɛɛ aba biɛ,’ ni ji amɛshikpɔŋ lɛ nɔ ekoŋŋ.—Yeremia 25:12; 29:10.
26. (a) Mɛni Daniel ye he odase, ni mɛni eyoo? (b) Te wɔɔfee tɛŋŋ wɔle nyɔŋ kɛ afi nɔ ni Daniel gbalɛ ni kɔɔ amɛsɛɛkuu kɛ amɛshikpɔŋ nɔ yaa ekoŋŋ lɛ he lɛ ba mli? (d) Mɛni ji nakai afi lɛ pɔtɛɛ?
26 Daniel diɛŋtsɛ hi shi yɛ nomŋɔɔ mli yɛ Babilon aahu afii babaoo. Gbi gbɛkɛ ni Babilon gbee shi eha Medo-Persiabii lɛ, lɛ diɛŋtsɛ ekɛ ehiŋmɛi ye egbalɛ lɛ, kɛ gbalɛi krokomɛi ni agba ashi nakai maŋtiase lɛ mlibaa he odase. (Daniel 5:17, 25-30; Yesaia 45:1, 2) Yinɔsaneŋmalɔi buɔ akɔntaa akɛ Babilon gbee shi yɛ October shishijee gbɛ yɛ afi 539 D.Ŋ.B. No sɛɛ etsɛɛɛ nɔŋŋ lɛ, Daniel yoo kɛjɛ Yeremia gbalɛ lɛ mli akɛ eshwɛ fioo ni Yerusalem afii 70 nomŋɔɔ kɛ amaŋfɔ feemɔ lɛ baaba naagbee. (Daniel 9:2) Ni esusumɔ lɛ ja hu! Persianyo Koresh nɔyeli lɛ klɛŋklɛŋ afi, ni yinɔsaneŋmalɔi pii kɛɔ akɛ eje shishi kɛjɛ afi 538 D.Ŋ.B. agbiɛnaa be mli lɛ mli lɛ, Koresh wo akpɔ ko ni ŋmɛɔ Yudafoi lɛ agbɛ ni amɛku amɛsɛɛ kɛya amɛ diɛŋtsɛ amɛshikpɔŋ nɔ ni amɛyahi jɛmɛ ni amɛsaa amɛma Yehowa sɔlemɔtsu lɛ yɛ jɛmɛ. (2 Kronika 36:20-23; Ezra 1:1-5) Yinɔsane ni ajɛ mumɔŋ aŋma lɛ kɛɔ wɔ akɛ Yudafoi lɛ kpɛlɛ Koresh akpɔ lɛ nɔ amrɔ nɔŋŋ, no hewɔ lɛ, “beni shɛ nyɔŋ ni ji kpawo lɛ, . . . Israel bii lɛ [yɛ] amɛmaji lɛ amli.” (Ezra 3:1) Yɛ wɔ kalenda bebuu naa lɛ, nakai be lɛ baafee October, 537 D.Ŋ.B., ni feɔ be ni afii 70 amaŋfɔ feemɔ ni agba afɔ lɛ shi lɛ ba naagbee lɛ.
27. (a) Belɛ, mɛɛ be afii 70 lɛ je shishi, ni kɛ mɛɛ nifeemɔ? (b) Be sɛɛkɛlɛ enyiɛ ji “bei kpawo” lɛ, ni no hewɔ lɛ, mɛɛ be eba naagbee? (d) Mɛɛ gbalɛ kpeteŋkpele kroko hu bɔi mlibaa yɛ nakai afi lɛ mli pɛpɛɛpɛ? (e) Mɛɛ sane ko Buu-Mɔɔ efi sɛɛ aahu afii 100 sɔŋŋ loo nɔ ni fe nakai?
27 Nakai yinɔsane mli adafitswaa lɛ he miihia wɔ koni wɔnyɛ wɔle “jeŋmaji abe lɛ” shishijee. Akɛni Yuda kɛ Yerusalem afii 70 amaŋfɔ feemɔ lɛ ba naagbee yɛ afi 537 D.Ŋ.B. hewɔ lɛ, amɛje shishi yɛ afi 607 D.Ŋ.B. Nakai afi lɛ baafee afi nɔ ni ajie Zedekia kɛjɛ “Yehowa maŋtsɛyeli sɛi lɛ nɔ” yɛ Yerusalem lɛ. No hewɔ lɛ, no nɔŋŋ hu kadiɔ Jeŋmajiaŋbii Abei lɛ shishijee be. Kɛji okane afii lɛ kɛjɛ October 607 D.Ŋ.B. lɛ, “bei kpawo,” ni ji afii 2,520 lɛ kɛ wɔ baa October 1914 Ŋ.B. shishijee gbɛ, be mli ni, taakɛ wɔna momo lɛ, Yesu gbalɛ kpeteŋkpele ni kɔɔ “nibii agbɛjianɔtoo lɛ naagbee” lɛ he lɛ bɔi mlibaa lɛ. Nyɔŋmɔ Wiemɔ lɛ mli saji ni anyɛɔ akɛ he fɔɔ nɔ lɛ ji nɔdaamɔ nɔ kɛha nɛkɛ sane naamuu nɛɛ, ní Buu-Mɔɔ wolo tɛtrɛɛ lɛ efi sɛɛ aahu fe afii 100 sɔŋŋ lɛ.
28, 29. (a) Mɛni yɔɔ je lɛŋ nibii ni aŋmala ashwie shi lɛ ahe ni sa akɛ eha wɔda shi waa yɛ saji otii ni abaa yi yɛ Nyɔŋmɔ Wiemɔ lɛ mli lɛ he? (b) Mɛni hewɔ wɔyɔɔ yiŋtoo ni mli wa ni haa wɔŋɔɔ October 1914 fe bei krokomɛi akɛ Jeŋmajiaŋbii Abei lɛ naagbee be lɛ?
28 Wɔbaanyɛ wɔda shi waa lɛlɛŋ akɛ Yehowa baa Yudafoi, kɛ Babilonbii kɛ Medo-Persiabii ni hi shi yɛ afii ohai ekpaa D.Ŋ.B. lɛ ahe saji ni he hiaa lɛ ahe mfoniri ni ja pɛpɛɛpɛ lɛ yi jogbaŋŋ yɛ e-Wiemɔ ni jɛ mumɔŋ lɛ mli. Kɛ jeee nakai lɛ, kulɛ ebaawa waa dani abaanyɛ akɛ nibii ni ba yɛ nakai beaŋ lɛ atsara, ejaakɛ eka shi faŋŋ akɛ je lɛŋ saji ni aŋmala ashwie shi yɛ nakai be lɛ he lɛ shɛɛɛ.
29 Shi, mɛi damɔɔ nɛkɛ je lɛŋ saji ni aŋmala ashwie shi nɛɛ pɛ nɔ amɛbuɔ akɔntaa akɛ akpata Yerusalem hiɛ yɛ afi 587/6 D.Ŋ.B., ni ákɛ, Yudafoi lɛ baje Babilonbii anɔyeli shishi yɛ afi nɔ ni Nebukadnezar baye maŋtsɛ lɛ, ni amɛbuɔ akɛ ebafeɔ afi 605 D.Ŋ.B.b Enɛ hewɔ lɛ, amɛŋɔɔ afi 605 D.Ŋ.B. akɛ afi nɔ ni Yeremia 25:11 lɛ bɔi mlibaa, akɛ: “Shikpɔŋ lɛ fɛɛ baakã shi amaŋfɔ; ni amɛaasɔmɔ yɛ Jeŋmajiaŋbii lɛ ateŋ afii nyɔŋmai kpawo.” (Bagster Greek Septuagint lɛ) Kɛji nakai eji, ni akane Jeŋmajiaŋbii Abei lɛ kɛjɛ nakai beaŋ lɛ, no lɛ ekɛ gbalɛ mli “bei kpawo” lɛ naagbee baawo Jeŋ Ta afi ni ji 1916 mli. Ni kɛlɛ, taakɛ wɔkɛɛ lɛ, wɔheɔ wɔyeɔ akɛ wɔyɛ yiŋtoo ni mli wa ni wɔɔdamɔ nɔ wɔkpɛlɛ sane ni yɔɔ Nyɔŋmɔ Wiemɔ lɛ mli, ni tsɔɔ akɛ Jeŋmajiaŋbii Abei lɛ je shishi yɛ October 607 D.Ŋ.B. ni eba naagbee yɛ October 1914 Ŋ.B. lɛ nɔ.
30. Mɛɛ nibii ni eba ni kɛji abua fɛɛ naa lɛ ehaa ayooɔ be ni je shishi kɛjɛ 1914 lɛ akɛ “naagbee gbii”?
30 Wɔbaanyɛ wɔna miishɛɛ akɛ Nyɔŋmɔ ha ajɛ mra beebe aŋmala gbalɛi ni tsɔɔ be ni Yesu baa akɛ Mesia yɛ afi 29 Ŋ.B. lɛ mli faŋŋ, kɛ agbɛnɛ “ba ni eba” akɛ ŋwɛi Maŋtsɛ ni awo ehiɛ nyam kɛjɛ 1914 Ŋ.B. lɛ yɛ e-Wiemɔ lɛ mli. Beni “nibii agbɛjianɔtoo lɛ naagbee lɛ” yaa nɔ lolo lɛ, wɔmiina akɛ shihilɛi ni Yesu kɛɛ wɔ akɛ wɔhiɛ ahi wɔhe nɔ yɛ he lɛ miiwo wu kɛmiibɔle wɔ. Jeŋ tai, hɔmɔ, tsɛŋemɔ helai, shikpɔŋhosomɔi, mlakwamɔ, suɔmɔ ni bɛ, nyɛɛ kɛ yiwaa ni akɛbaa mɛi ni kɛ Biblia shishitoo mlai tsuɔ nii lɛ anɔ—enɛɛmɛi fɛɛ ni abua naa afee lɛ ekome lɛ eha wɔbale nɔ ni ji “naagbee gbii” lɛ.—2 Timoteo 3:1; Mateo 24:3-12, NW; Marko 13:7-13.
AFII AKPE LƐ—MƐƐ BE?
31. (a) Mɛɛ ŋaawoo Yesu kɛha yɛ wɔgbii nɛɛ ahe, ni mɛni hewɔ? (b) Mɛɛ sanebimɔi enɛ baatsirɛ wɔ ni wɔbi, ni mɛɛ hetoo Yehowa kɛhaa?
31 Be enyiɛ nɛkɛ shihilɛ ni yɔɔ gbeyei nɛɛ sɛɛ baatsɛ kɛyashi? Akɛni amrɔ nɛɛ akɛ Kristo Yesu eta maŋtsɛsɛi nɔ akɛ Tatsɛ-kɛ-Maŋtsɛ hewɔ lɛ, yiŋtoo kpakpa yɛ ni wɔɔdamɔ nɔ wɔhe wɔye akɛ etsɛŋ ni ebaatsu fɔbuu kojomɔ he nii yɛ Nyɔŋmɔ henyɛlɔi anɔ. “No gbi lɛ kɛ no ŋmɛlɛtswaa lɛ mɔ ko leee,” no hewɔ lɛ wɔnaŋ wɔhiɛ ni wɔɔka wɔtsɔɔ be lɛ mli lɛ he sɛɛ. Shi fɛɛ sɛɛ hu lɛ, esa akɛ wɔbo Yesu ŋaawoo nɛɛ toi, akɛ: “Nyɛsaraa.” (Marko 13:32; Mateo 24:42) Beni wɔnaa bɔ ni shihilɛ lɛ yaa nɔ efiteɔ yɛ shikpɔŋ nɔ, ni wɔnaa bɔ ni mɛi babaoo hu booo Maŋtsɛyeli lɛ he sanekpakpa lɛ toi lɛ, ekolɛ no baaha wɔbi, yɛ wɔshiɛmɔ nitsumɔ lɛ he, taakɛ Nyɔŋmɔ gbalɔ lɛ bi lɛ, akɛ: “Nuŋtsɔ [Yehowa], kɛyashi mɛɛ beyinɔ?” Ni Yehowa ha hetoo akɛ:
“Kɛyashi beyinɔ ni maji lɛ aaatsɔmɔ amaŋfɔ, ni mɔ ko mɔ ko bɛ mli, ni shiai lɛ hu mɔ ko mɔ ko bɛ mli, ni shikpɔŋ lɛ aaatsɔ amaŋfɔ kwraa.” (Yesaia 6:10-12)
Yehowa baatsu nɛkɛ fɔbuu kojomɔ nɛɛ he nii yɛ lɛ diɛŋtsɛ ebe ni eto mli, klɛŋklɛŋ lɛ yɛ Kristendom nɔ, no sɛɛ lɛ, yɛ Satan je lɛ fãi krokomɛi ni eshwɛ lɛ fɛɛ hu nɔ. Kristo afii 1,000 nɔyeli lɛ baanyiɛ sɛɛ amrɔ nɔŋŋ.—Kpojiemɔ 20:1-3, 6.
“NƐKƐ YINƆ NƐƐ”—TE NƆ NI JI?
32. Mɛɛ sanebimɔ ko teɔ shi yɛ sane ni yɔɔ Mateo 24:34 lɛ hewɔ?
32 Yesu maa nɔ mi kɛhaa wɔ yɛ egbalɛ kpeteŋkpele ni kɔɔ “okadi” lɛ he lɛ mli akɛ: “Lɛlɛŋ, miikɛɛ nyɛ akɛ: Nɛkɛ yinɔ nɛɛ hoŋ, ja nii nɛɛ fɛɛ eba mli dã.” (Mateo 24:34) Akɛni ekɛ be sɛɛjɛkɛmɔ pɔtɛɛ ko tsuuu nii ehaaa yinɔ hewɔ lɛ, te esa akɛ wɔnu “nɛkɛ yinɔ nɛɛ” shishi wɔha tɛŋŋ?
33. (a) Mɛni ji “yinɔ” ni hi shi yɛ Yesu beaŋ lɛ? (b) Kɛji akɛmiito he lɛ, mɛni abaanyɛ awie yɛ 1914-1918 “yinɔ” lɛ he?
33 Yɛ Yesu gbii lɛ amli lɛ, kaselɔi ni nu ewiemɔi lɛ ateŋ mɛi komɛi, kɛ eyinɔ bii lɛ ateŋ mɛi krokomɛi hi shi aahu kɛtsɔ Yudafoi anibii agbɛjianɔtoo lɛ naagbee “amanehulu” lɛ mli. Amɛji Yesu beaŋ “yinɔ” lɛ. Beni aŋmaa wolo nɛɛ, no mli lɛ, yɛ United States pɛ lɛ, gbɔmɛi ni fa fe 10,000,000 yɛ wala mli lolo, ni amɛdara yɛ afii amli bɔ ni sa ni amɛaana “kɔɔmɔi lɛ abɔimɔ” lɛ yɛ 1914-1918. Mɛnɛɛmɛi ateŋ mɛi komɛi baanyɛ ahi wala mli lolo afii saŋŋ. Ni kɛlɛ, Yesu maa nɔ mi kɛhaa wɔ akɛ, ebaaba akɛ “gbɔmɔ Bi” ni ebatsu kojomɔ he nii yɛ Satan nibii agbɛjianɔtoo lɛ nɔ dani “nɛkɛ yinɔ nɛɛ” baaho aya. (Mateo 24:8, 21, 37-39) Esa akɛ wɔya nɔ wɔshi kpe, ni wɔkpa nakai ‘maŋtsɛyeli lɛ baa lɛ’ gbɛ.—Luka 21:31-36.
[Shishigbɛ niŋmai]
a Word Pictures in the New Testament, Vol. I. bf. 188.
b Kwɛmɔ Hefatamɔ, yɛ baafa 186.
[Akrabatsa ni yɔɔ baafa 135]
“BEI KPAWO” LƐ HE AKƆNTAABUU
“Bei” 7 = 7 × 360 = afii 2,520
(Biblia mli “be” loo afi lɛ feɔ gbii ni yɔɔ nyɔŋtsere afi ni ji gbii 354 kɛ hulu afi ni ji gbii 3651/4 mli lɛ mlijaa)
607 D.Ŋ.B. kɛbashi 1 D.Ŋ.B. = afii 606
1 D.Ŋ.B. kɛbashi 1 Ŋ.B. = afi 1
1 Ŋ.B. kɛbashi 1914 Ŋ.B. = afii 1,913
607 D.Ŋ.B. kɛbashi 1914 Ŋ.B. = afii 2,520
[Akrabatsa ni yɔɔ baafa 140]
“1914 YINƆ LƐ”
Robert Wohl tsɔɔ yɛ wolo ni hiɛ yitso ni yɔɔ yiteŋgbɛ lɛ mli akɛ “anyɛŋ adamɔ akɔntaabuu nɔ atsɔɔ nɔ ni yinɔ ji yɛ afii abɔ ni eheɔ lɛ shishinumɔ naa, shi ebɔleɔ yinɔsane mli amanehului wuji ahe, ni enɛ he nɔkwɛmɔ nɔ ni fe fɛɛ ji klɛŋklɛŋ jeŋ ta lɛ.”—“The Economist,” March 15, 1980