Yitso Kpawo

Wiemɔi Ejwɛ Ni Tsake Je Lɛ

1. Nɛgbɛ wiemɔi ejwɛ ni aŋma jeeŋmɔ yɛ gbogbo ko he lɛ hewalɛ lɛ yashɛ?

WIEMƆI kukuji ejwɛ ni aŋma yɛ gbogbo ni asha he lɛ he. Kɛlɛ, nakai wiemɔi ejwɛ lɛ wo nɔyeli ko ni yɔɔ hewalɛ waa lɛ he gbeyei aahu akɛ shwɛ sharao kulɛ eye sɛkɛ. Amɛtswa maŋtsɛmɛi enyɔ ni abaafã amɛ kɛjɛ amɛ maŋtsɛsɛii anɔ lɛ he adafi, amɛteŋ mɔ kome gbele, kɛ jeŋ hewalɛ ko ni he wa waa ko naagbee. Nɔ ni jɛ nakai wiemɔi lɛ amli ba ji jamɔ gbɛjianɔtoo ko ni akɛ woo haa lɛ lɛ ni aba lɛ shi. Nɔ ni he hiaa fe fɛɛ lɛ, amɛwó Yehowa jamɔ krɔŋŋ lɛ nɔ ni amɛma emaŋtsɛyeli lɛ nɔ mi ekoŋŋ yɛ be mli ni gbɔmɛi babaoo kɛ bulɛ haaa ekoeko lɛ. Nakai wiemɔi lɛ ha anu jeŋ saji po shishi ŋmɛnɛ! Te aaafee tɛŋŋ ni wiemɔi ejwɛ aaanyɛ afee enɛɛmɛi fɛɛ? Nyɛhaa wɔkwɛa.

2. (a) Mɛni ba Babilon yɛ Nebukadnezar gbele sɛɛ? (b) Mɛɛ nɔyelɔ baye nɔ agbɛnɛ?

² Afii nyɔŋmai abɔ eho kɛjɛ be mli ni atsɔɔ saji ni yɔɔ Daniel yitso 4 lɛ mli lɛ. Maŋtsɛ Nebukadnezar henɔwolɔ lɛ afii 43 nɔyeli yɛ Babilon nɔ lɛ ba naagbee kɛ egbele yɛ afi 582 D.Ŋ.B. Sɛɛyelɔi srɔtoi ni jɛ eweku lɛ mli tsara nɔ amɛba, shi gboimɔ ni amɛgboiɔ mra loo ju ni ajuɔ shi agbeɔ amɛteŋ mɔ fɛɛ mɔ lɛ kɛ amɛnɔyeli lɛ baa naagbee. Yɛ naagbee lɛ, nuu ko ni atsɛɔ lɛ Nabonido baye maŋtsɛ kɛtsɔ atuatsemɔ nɔ. Eji nyɔɔŋtsere nyɔŋmɔ Sin wɔyoo ko binuu, ni eyɛ faŋŋ akɛ Nabonido jɛɛɛ Babilon odehei aweku lɛ mli. Woloŋlelɔi komɛi susuɔ akɛ ekɛ Nebukadnezar biyoo ko bote gbalashihilɛ mli koni no aha enɔyeli lɛ afee nɔ ni mla ŋmɛɔ gbɛ, ni efee amɛbinuu Belshazar akɛ mɔ ni baaye esɛɛ, ni eshi lɛ koni eye Babilon nɔ afii babaoo. Kɛji akɛ nɛkɛ eji lɛ, belɛ Belshazar baafee Nebukadnezar nabi. Ani ekase nii kɛjɛ enii niiashikpamɔ lɛ mli akɛ Yehowa ji Nyɔŋmɔ Ofe, ni enyɛɔ ebaa maŋtsɛ fɛɛ maŋtsɛ shi? Dabi kwraa!​—Daniel 4:37.

OKPƆLƆŊMƐƐ KO SHISHI FEE BASABASA

3. Belshazar okpɔlɔŋmɛɛ lɛ tamɔ mɛni?

³ Daniel yitso 5 lɛ jeɔ shishi kɛ okpɔlɔŋmɛɛ kpeteŋkpele ko. “Maŋtsɛ Belshazar ŋmɛ enukpai lɛ ateŋ mɛi akpe okpɔlɔ kpeteŋkpele, ni enu wein yɛ mɛi akpe nɛɛ hiɛ.” (Daniel 5:1) Taakɛ obaanyɛ osusu lɛ, ebaanyɛ efee asa kpeteŋkpele ko ni baanyɛ aha nɛkɛ hii nɛɛ, kɛ maŋtsɛ lɛ ŋamɛi krokomɛi kɛ ehemɛi lɛ fɛɛ aná shitaramɔhe. Woloŋlelɔ ko ŋma akɛ: “Okpɔlɔ ni Babiloniabii ŋmɛɔ lɛ yɛ nyam waa, shi bei pii lɛ eyagbeɔ naa kɛ dãatɔɔ. Wein ni ashɛ kɛjɛ maŋsɛɛ kɛ ŋɔɔmɔ nibii srɔtoi fɛɛ yimɔɔ okpɔlɔ lɛ nɔ obɔ. Anowatrɛi aŋma yimɔɔ asa lɛ nɔ obɔ; lalɔi kɛ bɛji anifeemɔi jieɔ gbɔi ni amɛbabua amɛhe naa lɛ ahiɛtserɛ.” Belshazar tá he ni mɔ fɛɛ mɔ baana lɛ, ni enu edãa​—enu, ni enu ekoŋŋ kɛtsara nɔ.

4. (a) Mɛni hewɔ eeenyɛ efee nii ni yɔɔ naakpɛɛ akɛ Babiloniabii lɛ aaaŋmɛ okpɔ̃lɔ̃ yɛ October 5 loo 6, afi 539 D.Ŋ.B. gbɛkɛ lɛ? (b) Mɛni jeɔ kpo faŋŋ akɛ no ha Babiloniabii lɛ na hekɛnɔfɔɔ yɛ asraafoi ni tutuaa amɛ lɛ hiɛ lɛ?

⁴ Eyɛ naakpɛɛ akɛ Babiloniabii lɛ aaanya waa yɛ nɛkɛ gbɛkɛ nɛɛ​—October 5 loo 6, 539 D.Ŋ.B. Amɛmaŋ lɛ miiwuu ta, ni nibii eyaaa nɔ jogbaŋŋ kɛhaaa amɛ. Midiabii kɛ Persiabii atai ni batutua amɛ lɛ ye Nabonido nɔ kunim etsɛko, ni eyaba abo yɛ Borsippa ni yɔɔ Babilon wuoyi-anaigbɛ lɛ. Amrɔ nɛɛ Koresh asraafoi lɛ ebabɔ nsara yɛ Babilon sɛɛ tuuŋtu. Ni kɛlɛ, etamɔ nɔ ni enɛ gbaaa Belshazar kɛ ebladei lɛ anaa. Ejaakɛ amɛmaŋtiase lɛ ji Babilon ni anyɛɛɛ abote mli lɛ! Egbogboi ni dara naakpa lɛ miikwɛ jɔɔi voovoo ni Eufrate Faa kpeteŋkpele lɛ mli nui ni hoɔ kɛtsɔɔ maŋtiase lɛ mli lɛ eyimɔ amɛmli obɔbɔ lɛ nɔ. Henyɛlɔ ko kɛ oyaiyeli yeko Babilon nɔ kunim dã yɛ afii akpe ni eho lɛ fɛɛ mli. No hewɔ lɛ, mɛni hewɔ esa akɛ ohao? Ekolɛ Belshazar susu akɛ amɛ okpɔlɔŋmɛɛ lɛ shishi hoofeemɔ lɛ baajie hekɛnɔfɔɔ ni amɛyɔɔ lɛ kpo atsɔɔ henyɛlɔi ni yɔɔ sɛɛ lɛ koni no aje amɛnijiaŋ wui.

5, 6. Mɛni Belshazar fee beni etɔ dãa lɛ, ni mɛni hewɔ enɛ fee Yehowa ni asopaa lɛ waa lɛ?

⁵ Etsɛɛɛ ni dãanumɔ babaoo lɛ ná Belshazar nɔ hewalɛ. Taakɛ Abɛi 20:1 kɛɔ lɛ, “wein lɛ hefɛoyelɔ ni.” Shi yɛ enɛ mli lɛ, wein diɛŋtsɛ ha maŋtsɛ lɛ fee buuluianii ko ni hiɛdɔɔ yɔɔ mli waa. Efã ni akɛ Yehowa sɔlemɔwe lɛ krɔŋkrɔŋ nii lɛ aba okpɔlɔŋmɛɛ lɛ shishi. Aŋɔ nɛkɛ nibii nɛɛ ni esa akɛ akɛtsu jamɔ krɔŋŋ he nii pɛ lɛ akɛ nomŋɔɔ nii beni Nebukadnezar ye Yerusalem nɔ kunim lɛ. Abɔ Yudafoi osɔfoi lɛ ni akɛ hegbɛ ha amɛ koni amɛkɛtsu nii yɛ Yerusalem sɔlemɔtsu lɛ mli yɛ bei ni eho lɛ mli lɛ kɔkɔ akɛ amɛha amɛ diɛŋtsɛ lɛ amɛhe atse.​—Daniel 5:2; okɛto Yesaia 52:11 he.

⁶ Shi kɛlɛ, Belshazar yɛ nifeemɔ su ko ni tsɔɔ bulɛ ni ebɛ yɛ ejwɛŋmɔ mli. “Maŋtsɛ lɛ kɛ enukpai lɛ kɛ eŋamɛi lɛ kɛ ehemɛi lɛ nu . . . wein ni amɛjie shika kɛ jwiɛtɛi kɛ akɔɔble kɛ dade kɛ tso kɛ tɛ nyɔŋmɔi lɛ ayi.” (Daniel 5:​3, 4) No hewɔ lɛ, Belshazar miitao ni ehole epasa nyɔŋmɔi lɛ anɔ kɛteke Yehowa! Etamɔ nɔ ni nɛkɛ su nɛɛ ehe shi yɛ Babiloniabii ateŋ. Amɛye Yudafoi ni amɛŋɔ amɛ nom lɛ anɔ kɛ heguɔgbee, amɛye amɛjamɔ lɛ he fɛo, ni amɛkɛ hiɛnɔkamɔ ko haaa amɛ akɛ amɛaaku amɛsɛɛ kɛaaya amɛmaŋ shikpɔŋ ni amɛsumɔɔ lɛ nɔ. (Lala 137:​1-3; Yesaia 14:​16, 17) Ekolɛ maŋtsɛ ni etɔ dãa nɛɛ nu he akɛ nomii nɛɛ ni eeeba amɛ shi ni esopa amɛ-Nyɔŋmɔ lɛ baasa eyei lɛ kɛ enukpai lɛ ahiɛ, koni no aha efee tamɔ mɔ ni yɔɔ hewalɛ.a Shi kɛji akɛ Belshazar nu hewalɛnamɔ ko he po lɛ, esɛɛ etsɛɛɛ.

GBOGBO HE NIŊMAA LƐ

7, 8. Te fee tɛŋŋ ni afo Belshazar okpɔlɔŋmɛɛ lɛ mli, ni mɛɛ hewalɛ enɛ ná yɛ maŋtsɛ lɛ nɔ?

⁷ Wiemɔ ni jɛ mumɔŋ lɛ kɛɔ akɛ: “Nakai ŋmɛlɛtswaa lɛ nɔ nɔŋŋ lɛ gbɔmɔ nine waabii je kpo, ni ebaŋma nii yɛ kanetso lɛ ŋɛlɛnɔ yɛ maŋtsɛ mɔ̃ɔ lɛŋ gbogbo ni asha he kaaloo lɛ he; ni maŋtsɛ lɛ na nine ni ŋmaa nii lɛ.” (Daniel 5:5) Mɛɛ tsuifãa nii anaa nɛɛ! Nine je kpo trukaa kɛkɛ, ni enyiɛ kɔɔyɔɔ mli yɛ he ni kane kpɛɔ jogbaŋŋ yɛ yɛ gbogbo lɛ he lɛ. Susumɔ bɔ ni okpɔlɔŋmɛɛ lɛ shishi baafee diŋŋ aha beni mɛi ni atsɛ amɛ lɛ tsɔɔ amɛhiɛ kɛgbɛɔ amɛdaaŋ hatoo kɛkwɛɔ enɛ lɛ he okwɛ. Nine lɛ bɔi shɛɛ sane ko ni anuuu shishi ŋmalamɔ yɛ gbogbo ni asha he lɛ he.b Bɔ ni nii nɛɛ tsɔɔ nɔ fɔŋ ko ni baa, kɛ bɔ ni eji nii ni hiɛ kpaŋ nɔ gbi ko gbi ko hewɔ lɛ, kɛbashi ŋmɛnɛ lɛ gbɔmɛi kɛ wiemɔ “gbogbo he niŋmaa” tsuɔ nii kɛtsɔɔ oshara ko ni baa he kɔkɔbɔɔ.

⁸ Mɛɛ hewalɛ enɛ ná yɛ maŋtsɛ henɔwolɔ ni bɔ mɔdɛŋ akɛ eeewo lɛ diɛŋtsɛ kɛ enyɔŋmɔi lɛ anɔ kɛteke Yehowa lɛ nɔ? “Kɛkɛ ni maŋtsɛ lɛ hiɛ tsake, ni ejwɛŋmɔi hao lɛ, ni ehɛ talɔi lɛ amli gbɔjɔ, ni enakutsei tswiatswia amɛhe.” (Daniel 5:6) Belshazar tao akɛ eeefee ehe agbo diɛŋtsɛ yɛ eshishibii lɛ ahiɛ. Yɛ no najiaŋ lɛ, ebatsɔ hegbeyeiwoo he mfoniri ko​—ehiɛ yɛ́ futaa, ehɛ miihoso, egbɔmɔtso muu lɛ fɛɛ miikpokpo bliblibli aahu akɛ enakutsei miitswiatswia amɛhe kɛkɛ. Anɔkwale diɛŋtsɛ ji David wiemɔi ni ekɛha Yehowa yɛ lala mli lɛ: “Hewolɔi lɛ, ohiŋmɛii kã amɛhe ni obaa amɛ shi.”​—2 Samuel 22:​1, 28; okɛto Abɛi 18:12 he.

9. (a) Mɛni hewɔ Belshazar gbeyeishemɔ lɛ tamɔɔɔ Nyɔŋmɔ gbeyeishemɔ nɔŋŋ lɛ? (b) Mɛni maŋtsɛ lɛ kɛɛ ekɛbaaha Babilon nilelɔi lɛ?

⁹ Esa akɛ akadi akɛ Belshazar gbeyeishemɔ lɛ tamɔɔɔ Nyɔŋmɔ gbeyeishemɔ, ni ji woo diɛŋtsɛ ni anáa ahaa Yehowa, ni ji nilee fɛɛ shishijee lɛ. (Abɛi 9:10) Dabi, gbeyeishemɔ ni gbeɔ mɔ nɛ, ni ekɛ nɔ ko ni tamɔ nilee bahaaa maŋtsɛ ni he kpokpoɔ lɛ.c Yɛ nɔ najiaŋ ni eeekpa Nyɔŋmɔ ni esopa lɛ bianɛ lɛ dɛŋ eshaifaa he fai lɛ, ebo waa etsɛ́ “okɔmfoi kɛ Kaldeamɛi kɛ ŋulamiiaŋkwɛlɔi lɛ kɛba.” Ejaje po akɛ: “Mɔ fɛɛ mɔ ni aaakane nɛkɛ ŋmalɛ nɛɛ, ni eeetsɔɔ mi shishi lɛ, aaawo lɛ atade afaseo, ni aaawo ekuɛ shika kɔsɔŋkɔsɔ, ni eeetsɔ nɔyelɔ mɔ ni ji etɛ yɛ maŋtsɛyeli lɛ mli.” (Daniel 5:7) Nɔyelɔ ni ji etɛ yɛ maŋtsɛyeli lɛ mli lɛ baafee mɔ ni yɔɔ hewalɛ waa diɛŋtsɛ, maŋtsɛmɛi enyɔ ni yeɔ nɔ pɛ yɔɔ ehiɛ, Nabonido kɛ Belshazar diɛŋtsɛ. Kulɛ abaashi gbɛhe ni tamɔ nɛkɛ lɛ aha Belshazar binuu nukpa. Maŋtsɛ lɛ he miitswa shi waa akɛ aaatsɔɔ lɛ shɛɛ sane ni yɔɔ naakpɛɛ nɛɛ shishi!

10. Te nilelɔi lɛ tee nɔ amɛha tɛŋŋ yɛ gbogbo he niŋmaa lɛ ni amɛbɔ mɔdɛŋ ni amɛtsɔɔ shishi lɛ mli?

¹⁰ Nilelɔi lɛ badamɔ asa kpeteŋkpele lɛ nɔ. Asɛ̃ɛɛ amɛhe, ejaakɛ Babilon ji maŋ ni kɛ ehe ewo apasa jamɔ mli waa, ni gbatsũi babaoo yɛ jɛmɛ. Gbɔmɛi ni kɛɔ akɛ amɛkaneɔ naakpɛɛ nibii ni amɛnyɛɔ amɛtsɔɔ teemɔŋ saji ashishi lɛ fá diɛŋtsɛ. Nɛkɛ nilelɔi nɛɛ baanyɛ anyã yɛ hegbɛ ni kã amɛhiɛ lɛ hewɔ. Naa hegbɛ ni amɛná akɛ amɛaatsɔɔ nii ni amɛle lɛ yɛ hiɛnaanɔbii nɛɛ ahiɛ, koni amɛná maŋtsɛ lɛ hiɛ duromɔ, ni amɛnine ashɛ gbɛhe ni kwɔ kɛ hewalɛ babaoo nɔ. Shi kwɛ bɔ ni amɛnine nyɛ shi hã! “Amɛnyɛɛɛ ŋmalɛ lɛ amɛkane loo ni amɛaatsɔɔ maŋtsɛ lɛ shishi.”d​—Daniel 5:8.

11. Mɛni hewɔ ekolɛ Babilon nilelɔi lɛ nyɛɛɛ akane niŋmaa lɛ?

¹¹ Kɛji akɛ Babilon nilelɔi lɛ na akɛ amɛnyɛɛɛ amɛtsɔɔ niŋmaa lɛ diɛŋtsɛ​—niŋmaa okadii lɛ diɛŋtsɛ​—shishi lɛ, no lɛ anyɛɛɛ ale. Kɛji akɛ amɛfee nakai lɛ, no lɛ nɛkɛ shishiulɔi nɛɛ baaná hegbɛ babaoo ni amɛkɛkane nɔ ko ni ji amale amɛwo mli, ekolɛ shishitsɔɔmɔ ko koni amɛkɛlaka maŋtsɛ lɛ po. Nɔ kroko ni amɛbaanyɛ amɛfee ji akɛ, ányɛ ana niŋmaa okadii lɛ faŋŋ. Ni akɛni aŋmalaa wiemɔi tamɔ Aramaik kɛ Hebri ni gbee gbɛɛmɔ bɛ mli hewɔ lɛ, wiemɔ kuli fɛɛ wiemɔ kuli baanyɛ ahiɛ shishinumɔi pii. Kɛji nakai ni lɛ, nilelɔi lɛ nyɛŋ akpɛ amɛyiŋ yɛ nɔ̃ wiemɔi ni ataoɔ atsɔɔ lɛ he. Kɛji akɛ amɛnyɛ amɛfee nakai po lɛ, kɛlɛ, amɛnyɛŋ amɛnu wiemɔi lɛ ashishi koni amɛtsɔɔ shishi. Fɛɛ sɛɛ lɛ, nɔ̃ kome ko ji anɔkwale: Babilon nilelɔi lɛ anine nyɛ shi​—kɛ hiɛshishwiemɔ!

12. Mɛɛ odase nilelɔi lɛ ni nyɛɛɛ afee nɔ ko lɛ yeɔ?

¹² No hewɔ lɛ, akpa nilelɔi lɛ ahe mama akɛ shishiulɔi, kɛ amɛjamɔ gbɛjianɔtoo ni akɛ woo haa lɛ akɛ ojotswaa nii. Mɛɛ gbɔmɛi ni hiɛ eshwie shi amɛtsɔmɔ nɛkɛ! Beni Belshazar na akɛ ehiɛ ni ekɛfɔ̃ɔ nɛkɛ nyɔŋmɔi ajalɔi nɛɛ anɔ lɛ efee efolo lɛ, ebashe gbeyei babaoo moŋ, ehao naakpa, ni ehiɛ tsake, ni enukpai lɛ po fee “yaa.”e​—Daniel 5:9.

ATSƐ GBƆMƆ NI YƆƆ SƐƐYOOMƆ KƐBA

13. (a) Mɛni hewɔ maŋnyɛ lɛ wo ŋaa akɛ atsɛ Daniel kɛba lɛ? (b) Te Daniel hiɔ shi ehãa tɛŋŋ?

¹³ Nɛkɛ jaramɔ be nɛɛ mli maŋnyɛ lɛ diɛŋtsɛ​—eyɛ faŋŋ akɛ maŋtsɛ lɛ nyɛ lɛ​—bote okpɔlɔŋmɛɛ asa lɛ nɔ. Enu hoofeemɔ ni yaa nɔ yɛ okpɔlɔŋmɛɛ lɛ shishi lɛ he, ni ele mɔ ni baanyɛ atsɔɔ gbogbo lɛ he niŋmaa lɛ shishi. Afii nyɔŋmai abɔ ni etsɔ hiɛ lɛ, etsɛ Nebukadnezar hala Daniel ákɛ onukpa yɛ enilelɔi lɛ fɛɛ nɔ. Maŋnyɛ lɛ kai lɛ akɛ nuu ni “mumɔ ni teke nɔ kɛ nilee kɛ jwɛŋmɔ” yɔɔ emli. Akɛni etamɔ nɔ ni Belshazar leee Daniel hewɔ lɛ, eeenyɛ efee akɛ gbalɔ lɛ elaaje egbɛhe ni nɔ kwɔ yɛ nɔyeli lɛ mli lɛ yɛ Nebukadnezar gbele lɛ sɛɛ. Shi gbɛhe jeee nɔ ni he hiaa Daniel. Ekolɛ eye afii 90 kɛmiiya yɛ nɛkɛ be nɛɛ mli, ni eesɔmɔ Yehowa yɛ anɔkwayeli mli lolo. Yɛ aaafee afii 80 ni ekɛhi nomŋɔɔ mli yɛ Babilon lɛ fɛɛ sɛɛ lɛ, ale lɛ kɛ e-Hebri gbɛi lɛ. Maŋnyɛ lɛ po wie ehe akɛ Daniel, ekɛ Babilonia gbɛi ni be ko lɛ akɛha lɛ lɛ tsuuu nii. Yɛ anɔkwale mli lɛ, ewo maŋtsɛ lɛ hewalɛ akɛ: “Ha ayatsɛ Daniel kɛba, ni ebatsɔɔ shishi.”​—Daniel 1:7; 5:​10-12.

14. Mɛni bafee Daniel kaa yɛ be mli ni ena niŋmaa ni yɔɔ gbogbo lɛ he lɛ?

¹⁴ Ayatsɛ Daniel ni ebadamɔ Belshazar hiɛ. Eyɛ hiɛgbele akɛ aaakpa duromɔ ko he fai kɛjɛ Yudanyo nɛɛ ni maŋtsɛ lɛ esopa e-Nyɔŋmɔ lɛ bianɛ lɛ dɛŋ. Kɛlɛ, Belshazar bɔ mɔdɛŋ ni ewo Daniel yiteŋ mlu, ekɛ nakai nyɔmɔwoo lɛ nɔŋŋ ha lɛ​—mɔ ni ji etɛ yɛ maŋtsɛyeli lɛ mli​—kɛ ebaanyɛ ekane ni etsɔɔ naakpɛɛ wiemɔi lɛ ashishi eha lɛ. (Daniel 5:​13-16) Daniel hole ehiŋmɛii anɔ ekwɛ niŋmaa ni yɔɔ gbogbo lɛ he lɛ, ni mumɔ krɔŋkrɔŋ ha enyɛ eyoo eshishinumɔ lɛ. Eji hiɛkpatamɔ shɛɛ sane ni jɛ Yehowa Nyɔŋmɔ ŋɔɔ! Te Daniel aaafee tɛŋŋ ajaje maŋtsɛ henɔwolɔ nɛɛ kojomɔ ni naa wa lɛ atsɔɔ lɛ yɛ ehiɛ​—kɛ agbɛnɛ yɛ eŋamɛi kɛ ebladei lɛ ahiɛ? Susumɔ jaramɔ shihilɛ ni Daniel baje mli lɛ he okwɛ! Ani maŋtsɛ lɛ naadakɔmɔ wiemɔi lɛ kɛ ninámɔ kɛ gbɛihemɔ lɛ gbala lɛ? Ani gbalɔ lɛ baaba Yehowa wiemɔ lɛ shi?

15, 16. Mɛɛ yinɔsane mli sane ko ni he hiaa waa Belshazar nyɛɛɛ akase, ni yɛ mɛɛ gbɛ nɔ nii ni anyɛɛɛ akase nɛɛ egbɛ eshwã nakai nɔŋŋ ŋmɛnɛ?

¹⁵ Daniel kɛ ekãa wie akɛ: “Ha onikeenii lɛ ahi shi ahao, ni oŋɔ onyɔmɔwoo lɛ hu oha mɔ kroko; shi kɛlɛ makane ŋmalɛ lɛ matsɔɔ maŋtsɛ, ni matsɔɔ lɛ shishi hu.” (Daniel 5:17) No sɛɛ lɛ, Daniel kpɛlɛ Nebukadnezar dalɛ lɛ nɔ, maŋtsɛ ni yɔɔ hewalɛ babaoo akɛ enyɛɔ egbeɔ mɔ, etswaa mɔ nɔ̃, ewóɔ mɔ nɔ, loo ebaa mɔ fɛɛ mɔ ni esumɔɔ lɛ shi. Shi kɛlɛ, Daniel kai Belshazar akɛ Yehowa, “Nyɔŋmɔ ni yɔɔ ŋwɛi shɔŋŋ” lɛ ha Nebukadnezar da agbo. Yehowa ji mɔ ni ba nakai maŋtsɛ ni yɔɔ hewalɛ waa lɛ shi beni ebatsɔ henɔwolɔ lɛ. Hɛɛ, anyɛ Nebukadnezar nɔ koni ekase akɛ “Nyɔŋmɔ ni yɔɔ ŋwɛi shɔŋŋ lɛ yeɔ gbɔmɛi amaŋtsɛyeli nɔ, ni eŋɔɔ mɔ fɛɛ mɔ ni esumɔɔ etoɔ nɔ.”​—Daniel 5:​18-21.

¹⁶ Belshazar “le enɛ fɛɛ.” Ni kɛlɛ, enyɛɛɛ ekase nii kɛjɛ yinɔsane mli. Yɛ anɔkwale mli lɛ, etee shɔŋŋ kɛteke Nebukadnezar esha ni ji henɔwomɔ ni ejaaa lɛ kɛyafee nii ni tsɔɔ mɔ ni hiɛ esɔɔɔ Yehowa. Daniel kɛ esha ni maŋtsɛ lɛ efee lɛ fɔ̃ ehiɛ kpetekpelee. Agbɛnɛ hu, ekɛ ekãa kɛɛ Belshazar yɛ wɔŋjalɔi ni amɛbabua amɛhe naa lɛ ahiɛ akɛ apasa nyɔŋmɔi lɛ “amɛnaaa nii ni amɛnuuu nii ni amɛleee nii hu.” Nyɔŋmɔ gbalɔ ni yɔɔ ekãa lɛ kɛfata he akɛ, ákɛ mɔ ni tamɔɔɔ nakai yakayaka nyɔŋmɔi lɛ, Yehowa ji Nyɔŋmɔ ni “omumɔ yɔɔ edɛŋ” lɛ. Gbɔmɛi kɛ nii ni wala bɛ mli feɔ nyɔŋmɔi, amɛjáa shika, nitsumɔ, gbɛihemɔ nibii, kɛ hiɛtserɛjiemɔ po kɛbashi ŋmɛnɛ gbi nɛɛ. Shi nibii nɛɛ ateŋ eko kwraa nyɛŋ ekɛ wala aha. Yehowa pɛ ji mɔ ni shihilɛ mli ni wɔ fɛɛ wɔyɔɔ lɛ jɛ, lɛ enɔ wɔkɛ wɔhe fɔ̃ɔ kɛhaa mumɔ fɛɛ mumɔ ni wɔgbalaa wɔwoɔ wɔmli lɛ.​—Daniel 5:​22, 23; Bɔfoi lɛ Asaji 17:​24, 25.

ANU TEEMƆŊ SANE KO SHISHI!

17, 18. Mɛni ji wiemɔi ejwɛ ni aŋma yɛ gbogbo lɛ he lɛ, ni mɛni ji amɛshishinumɔ diɛŋtsɛ?

¹⁷ Agbɛnɛ gbalɔ ni egbɔ lɛ tee nɔ efee nii ni Babilon nilelɔi lɛ fɛɛ nyɛɛɛ afee lɛ. Ekane ni etsɔɔ niŋmaa ni ákpɛ yɛ gbogbo lɛ he lɛ shishi. Wiemɔi lɛ ji: “Mene, mene, tekel, ufarsin.” (Daniel 5:​24, 25) Mɛni ji amɛshishinumɔ?

¹⁸ Wiemɔi lɛ ashishinumɔ pɔtɛɛ ji “mina, mina, shekel, kɛ shekeli fã.” Wiemɔ lɛ eko fɛɛ eko hiɛ shika tsiimɔ jara, ni ato naa kɛmiiba shi yɛ amɛjara lɛ naa. Kwɛ bɔ ni enaa namɔ wa ha! Kɛji akɛ Babilonia nilelɔi lɛ nyɛ amɛyoo wiemɔi komekomei lɛ po lɛ, ebɛ naakpɛɛ akɛ amɛnyɛɛɛ amɛtsɔɔ shishi.

19. Mɛni ji wiemɔ “Mene” lɛ shishitsɔɔmɔ?

¹⁹ Daniel ni yɔɔ Nyɔŋmɔ mumɔ krɔŋkrɔŋ lɛ hewalɛ shishi lɛ tsɔɔ mli akɛ: “Wiemɔ lɛ shishitsɔɔmɔ nɛ: Mene: Nyɔŋmɔ ekane omaŋtsɛyeli lɛ ni egbe naa.” (Daniel 5:26) Klɛŋklɛŋ wiemɔ lɛ gbee gbɛɛmɔi lɛ ŋmɛɔ wiemɔ ni ji “mina” kɛ Aramaik wiemɔ su ko kɛha “akane agbe naa,” loo “akane” lɛ shishinumɔ kɛ gbeekpamɔ gbɛ, ni enɛ damɔ daaŋ gbɛɛmɔ ni nikanelɔ lɛ kɛfataa he lɛ nɔ. Daniel le jogbaŋŋ akɛ Yudafoi lɛ anomŋɔɔ be lɛ miibɛŋkɛ enaagbee. Afii 70 ni agba afɔ̃ shi lɛ mli afii 68 eho momo. (Yeremia 29:10) Be Bulɔ Kpeteŋkpele, Yehowa, ekane Babilon akɛ jeŋ hewalɛ lɛ nɔyeli be lɛ, ni enaagbee lɛ ebɛŋkɛ fe bɔ ni mɔ fɛɛ mɔ ni yɔɔ Belshazar okpɔlɔŋmɛɛ lɛ shishi lɛ susu. Yɛ anɔkwale mli lɛ, be lɛ etã kwraa​—jeee kɛha Belshazar pɛ, shi kɛha etsɛ, Nabonido hu. Ekolɛ enɛ baanyɛ afee nɔ hewɔ ni aŋma wiemɔ “Mene” lɛ shii enyɔ lɛ​—koni akɛtswa maŋtsɛmɛi enyɔ nɛɛ anɔyeli lɛ naagbee lɛ he adafi.

20. Mɛni ji shishitsɔɔmɔ ni akɛha wiemɔ “Tekel” lɛ, ni te ekɔɔ Belshazar he ehaa tɛŋŋ?

²⁰ Yɛ gbɛ kroko nɔ lɛ, aŋma wiemɔ “Tekel” lɛ shikome pɛ yɛ nɔ kome wiemɔ su mli. Enɛ baanyɛ atsɔɔ akɛ akɛmiiha Belshazar titri. Ni enɛ baafee nɔ ni sa, ejaakɛ etsɔɔ akɛ ebɛ bulɛ ko kwraa kɛha Yehowa. Wiemɔ lɛ diɛŋtsɛ shishinumɔ ji “shekel,” shi gbee gbɛɛmɔi lɛ hu kɛ wiemɔ “áŋmɛ” kpãa gbee. No hewɔ lɛ, Daniel kɛɛ Belshazar akɛ: “Tekel: áŋmɛo yɛ nsɛnii mli, ni ana akɛ oshɛɛɛ.” (Daniel 5:27) Kɛha Yehowa lɛ, jeŋmaji fɛɛ jeee fɛi tamɔ mulu kuli ni kpɛtɛ nsɛnii he. (Yesaia 40:15) Amɛbɛ hewalɛ ko kwraa ni amɛkɛaafite eyiŋtoi. Belɛ mɛni maŋtsɛ hepupuulɔ kome tsiimɔ baanyɛ ashɛ? Belshazar bɔ mɔdɛŋ ni ewo ehe nɔ kɛteke jeŋ muu fɛɛ Maŋtsɛ lɛ. Gbɔmɔ wudɔɔ nɛɛ sheee gbeyei akɛ eeesopa Yehowa ni eye jamɔ krɔŋŋ he fɛo, shi “ana akɛ eshɛɛɛ.” Hɛɛ, kojomɔ ni baa oyayaayai lɛ sa Belshazar jogbaŋŋ kɛmɔ shi!

21. Yɛ mɛɛ gbɛ nɔ “Ufarsin” ji wiemɔi etɛ ni akɛtsu nii, ni mɛni wiemɔ nɛɛ tsɔɔ kɛhaa Babilon wɔsɛɛ be akɛ jeŋ hewalɛ?

²¹ Naagbee wiemɔ ni yɔɔ gbogbo lɛ he ji “Ufarsin.” Daniel kane lɛ yɛ wiemɔ kome su mli, “Peres,” ejaakɛ ekolɛ eewie maŋtsɛ kome he yɛ be mli ni mɔ kroko lɛ bɛ. Nɛkɛ wiemɔ nɛɛ kɛ Yehowa teemɔŋ sane kpeteŋkpele ni hiɛ wiemɔi etɛ ni akɛtsu nii lɛ ba naagbee. Yɛ wiemɔ lɛ shishinumɔ diɛŋtsɛ naa lɛ, “Ufarsin” shishi ji “shekeli fã.” Shi niŋmaa okadii lɛ hu ŋmɛɔ shishinumɔi krokomɛi enyɔ gbɛ​—“mlijaai” kɛ “Persiabii.” No hewɔ lɛ, Daniel gba fɔ̃ shi akɛ: “Peres: aja omaŋtsɛyeli lɛ mli, ni aŋɔha Mediabii kɛ Persiabii!”​—Daniel 5:28.

22. Te Belshazar fee enii yɛ teemɔŋ sane lɛ naa tsabaa lɛ he eha tɛŋŋ, ni ekolɛ mɛni ji ehiɛnɔkamɔ?

²² No hewɔ lɛ, ana teemɔŋ sane lɛ naa. Babilon kpeteŋkpele lɛ miihe agbee shi yɛ Mediabii kɛ Persiabii atai lɛ ahiɛ. Eyɛ mli akɛ etsui efã yɛ hiɛkpatamɔ he sane ni ajaje nɛɛ hewɔ moŋ, shi Belshazar tee nɔ eye ewiemɔ lɛ nɔ. Eha etsuji lɛ kɛ atade afaseo wo Daniel, ni awula ekuɛ kɛ shika kɔsɔŋkɔsɔ, ni ashiɛ yɛ ehewɔ atsɔɔ akɛ nɔyelɔ ni ji etɛ yɛ maŋtsɛyeli lɛ mli. (Daniel 5:29) Daniel kpooo ehiɛ nyam ni awo nɛɛ, ejaakɛ eyɔse akɛ etsɔɔ woo ni akɛmiiha Yehowa. Shi ekolɛ, Belshazar susu akɛ ekɛ E-gbalɔ lɛ ni ewo ehiɛ nyam lɛ baaba Yehowa kojomɔ lɛ shi. Kɛji nakai ni lɛ, belɛ eji sane bibioo ko ni kpe sɛɛ kwraa tsɔ̃.

BABILON SHIGBEEMƆ

23. Mɛɛ blema gbalɛ ko náa emlibaa yɛ be mli ni Belshazar okpɔlɔŋmɛɛ lɛ yaa nɔ lɛ?

²³ Yɛ be mli ni Belshazar kɛ emɛi ni ekpee amɛ lɛ nuɔ dãa amɛhãa amɛnyɔŋmɔi lɛ ni amɛkɛyeɔ Yehowa he fɛo lɛ, no mli lɛ aato shihilɛ ko he gbɛjianɔ yɛ duŋ lɛ mli yɛ maŋtsɛwe lɛ sɛɛ. Gbalɛ ni atsɔ Yesaia nɔ awie kɛtsɔ hiɛ nɔ ni miihe ashɛ afii ohai enyɔ lɛ mlibaa miiya nɔ. Yehowa gba yɛ Babilon he akɛ: “Maha amɛkɛ̃ɛmɔ fɛɛ sɛɛ afo.” Hɛɛ, Nyɔŋmɔ webii ni nakai yiwalɛ maŋ lɛ wa amɛyi lɛ fɛɛ baaba naagbee. Kɛtsɔ mɛni nɔ? Nakai gbalɛ lɛ nɔŋŋ kɛɛ akɛ: “Elam, ba! Media, baabɔ nsara owo ehe!” Elam batsɔ Persia fã yɛ gbalɔ Yesaia gbii lɛ asɛɛ. Beni Belshazar okpɔlɔŋmɛɛ, ni ágba no hu he sane áfɔ̃ shi yɛ nakai Yesaia gbalɛ lɛ nɔŋŋ mli lɛ shɛɔ lɛ, no mli lɛ Persia kɛ Media tai lɛ efee ekome diɛŋtsɛ koni ‘amɛya ni amɛyawo ka’ amɛshi Babilon.​—Yesaia 21:​1, 2, 5, 6.

24. Mɛɛ Babilon shigbeemɔ lɛ mlitsɔɔmɔ Yesaia gbalɛ lɛ égba efɔ̃ shi momo?

²⁴ Yɛ anɔkwale mli lɛ, ágba nɛkɛ tai nɛɛ ahiɛnyiɛlɔ lɛ he sane afɔ̃ shi, taakɛ etawuu mli ŋaatsɔɔ mli otii lɛ hu ji lɛ. Yesaia etsɔ hiɛ egba afii 200 momo akɛ Yehowa baafɔ mɔ ko ni atsɛɔ lɛ Koresh lɛ mu koni ete shi ewo Babilon. Yɛ be mli ni etutuaa amɛ lɛ mli lɛ, ebaaha gbɛtsii nii fɛɛ afee trɛnɛɛ yɛ ehiɛ. Babilon faai lɛ ‘baamii,’ ni abaashi egbói wuji lɛ afɔ̃ shi ni aŋmɛɛɛ mli. (Yesaia 44:​27–45:3) Ni nakai eba lɛ. Koresh asraafoi lɛ gbá nu gbɛ kroko kɛha Eufrate Faa lɛ, ni enɛ ha nu lɛ ba shi koni amɛnyiɛ kɛtsɔ faa gbɛ lɛ mli. Bulɔi anyagbafeelɔi eshi Babilon gbogbo lɛ mli agbói lɛ amɛfɔ̃ shi ni amɛŋamɔɔɔ. Taakɛ jeŋ yinɔsaneŋmalalɔi kpɛlɛɔ nɔ lɛ, abatutua maŋ lɛ yɛ be mli ni emli bii lɛ miiye nii ni amɛmiinu dãai. Aye Babilon nɔ kunim ni shitee-kɛ-woo ko baaa mli. (Yeremia 51:30) Shi kɛlɛ, gbele ko ni sa kadimɔ ba. Daniel bɔ amaniɛ akɛ: “Nakai nyɔɔŋ lɛŋ nɔŋŋ agbe Kaldeabii amaŋtsɛ Belshazar lɛ. Ni Dario, Medianyo lɛ, ŋɔ maŋtsɛyeli lɛ, beni eye afii nyɔŋmai ekpaa kɛ enyɔ lɛ.”​—Daniel 5:​30; 6:1.

NII NI AKASEƆ KƐJƐƆ GBOGBO HE NIŊMAA LƐ MLI

25. (a) Mɛni hewɔ blema Babilon ji ŋmɛnɛ jeŋ muu fɛɛ apasa jamɔ gbɛjianɔtoo lɛ he mfoniri ni sa lɛ? (b) Mɛɛ shishinumɔ naa aŋɔ ŋmɛnɛŋmɛnɛ beaŋ Nyɔŋmɔ tsuji lɛ nom yɛ Babilon?

²⁵ Sane ni jɛ mumɔŋ ni yɔɔ Daniel yitso 5 lɛ tsɔ̃ɔ nɔ ko waa kɛhaa wɔ. Ákɛ apasa jamɔ nifeemɔi ashikwɛ̃ɛhe lɛ, blema Babilon ji jeŋ apasa jamɔ maŋtsɛyeli lɛ he okadi ni sa jogbaŋŋ. Ákɛ mɔ ni áfee ehe mfoniri yɛ Kpojiemɔ akɛ ajwamaŋ ni lá he kumai miiye lɛ lɛ, atsɛɔ nɛkɛ jeŋ muu fɛɛ shishiulɔ ni ebua ehe naa nɛɛ akɛ “Babilon kpeteŋkpele lɛ.” (Kpojiemɔ 17:5) Akɛ mɔ ni booo kɔkɔbɔi fɛɛ ni kɔɔ epasa tsɔɔmɔi kɛ nifeemɔi ni gbeɔ Nyɔŋmɔ he guɔ lɛ toi lɛ, etee nɔ ewa mɛi ni shiɛɔ Nyɔŋmɔ Wiemɔ lɛ mli anɔkwale lɛ ayi. Taakɛ blema Yerusalem kɛ Yuda maŋ lɛ mli bii ji lɛ, Kristofoi anɔkwafoi ni afɔ amɛ mu lɛ ateŋ shwɛɛnii lɛ tee nomŋɔɔ mli yɛ “Babilon kpeteŋkpele” lɛ mli beni yiwaa ni osɔfoi kanyaa tsĩ Maŋtsɛyeli shiɛmɔ nitsumɔ lɛ naa kwraa yɛ afi 1918 mli lɛ.

26. (a) Te fee tɛŋŋ ni “Babilon Kpeteŋkpele” lɛ gbee shi yɛ afi 1919? (b) Mɛɛ kɔkɔbɔɔ esa akɛ wɔ diɛŋtsɛ lɛ wɔbo toi ni wɔgba mɛi krokomɛi?

²⁶ Shi, trukaa kɛkɛ ni “Babilon kpeteŋkpele” lɛ gbee shi! Oo, eji shigbeemɔ ko ni anuuu gbɛɛmɔ ko he​—tamɔ bɔ pɛ ni blema Babilon gbee shi yɛ afi 539 D.Ŋ.B. ni anuuu gbɛɛmɔ ko he lɛ. Fɛɛ sɛɛ lɛ, nɛkɛ mfonirifeemɔŋ shigbeemɔ nɛɛ fite nii kɛ̃. Eba yɛ afi 1919 Ŋ.B., beni aŋmɛɛ Yehowa webii ahe kɛjɛ Babilon nyɔŋyeli mli ni akɛ ŋwɛi nɔkpɛlɛmɔ jɔɔ amɛ lɛ. Enɛ kɛ hewalɛ ni “Babilon kpeteŋkpele” lɛ yɔɔ yɛ Nyɔŋmɔ webii anɔ lɛ ba naagbee, ni ekadi ehe mamakpamɔ yɛ kpo nɔ akɛ shishiulɔ ni anyɛŋ akɛ he afɔ̃ enɔ lɛ shishijee. Nakai shigbeemɔ lɛ efee nɔ ni anyɛɛɛ atsake, ni enaagbee hiɛkpatamɔ lɛ ebɛŋkɛ. No hewɔ lɛ Yehowa tsuji etee nɔ ejaje kɔkɔbɔɔ nɛɛ, akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli.” (Kpojiemɔ 18:4) Ani obo nakai kɔkɔbɔɔ lɛ toi? Ani ogbaa mɛi krokomɛi?f

27, 28. (a) Mɛɛ anɔkwale ko ni he hiaa Daniel hiɛ kpaaa nɔ kɔkɔɔkɔ lɛ? (b) Mɛɛ odaseyeli wɔyɔɔ ni tsɔɔ akɛ etsɛŋ ni Yehowa baate shi ashi ŋmɛnɛ efɔŋfeemɔ je lɛ?

²⁷ No hewɔ lɛ, niŋmaa lɛ yɛ gbogbo lɛ he ŋmɛnɛ​—shi jeee kɛha “Babilon kpeteŋkpele” lɛ pɛ. Kaimɔ anɔkwale ko ni he hiaa titri yɛ Daniel wolo lɛ mli lɛ: Yehowa ji Jeŋ Muu Fɛɛ Maŋtsɛ. Lɛ, lɛ pɛ eyɔɔ hegbɛ akɛ etoɔ nɔyelɔ yɛ adesai anɔ. (Daniel 4:​17, 25; 5:21) Abaajie nɔ fɛɛ nɔ ni damɔ shi akɛ nɔ ni teɔ shi ewoɔ Yehowa yiŋtoi lɛ kɛya. Be fioo pɛ eshwɛ ni Yehowa kɛaafee nii. (Habakuk 2:3) Kɛha Daniel lɛ, be ni tamɔ nɛkɛ ba agbɛnɛ yɛ ewala be mli afii oha lɛ mli. Kɛkɛ ni ena bɔ ni Yehowa kpá jeŋ hewalɛ ko​—nɔ ni etee nɔ ewa Nyɔŋmɔ webii ayi kɛjɛ Daniel gbekɛbiiashi lɛ.

²⁸ Odaseyelii babaoo yɛ ni anyɛŋ aje he ŋwane akɛ, Yehowa Nyɔŋmɔ kɛ adesai a-Nɔyelɔ ko eta ŋwɛi maŋtsɛsɛi ko nɔ. Ákɛ, je lɛ eku ehiɛ eshwie Maŋtsɛ nɛɛ nɔ, ni ete shi ewo enɔyeli lɛ ji odaseyeli ni ma shi shiŋŋ ni tsɔɔ akɛ etsɛŋ ni Yehowa baabɛɛ mɛi ni teɔ shi woɔ Maŋtsɛyeli nɔyeli lɛ fɛɛ kɛjɛ shihilɛ mli. (Lala 2:​1-11; 2 Petro 3:​3-7) Ani oofee onii yɛ bɔ ni wɔbei nɛɛ ahe hiaa lɛ naa, ni okɛ ohekɛnɔfɔɔ miiwo Nyɔŋmɔ Maŋtsɛyeli lɛ mli? Kɛji nakai ni lɛ, belɛ okase nii kɛjɛ gbogbo lɛ he niŋmaa lɛ mli lɛɛlɛŋ!

[Shishigbɛ niŋmai]

MƐNI OYƆSE?

• Te fee tɛŋŋ ni afo Belshazar okpɔlɔŋmɛɛ lɛ mli yɛ October 5 loo 6 gbɛkɛ, yɛ afi 539 D.Ŋ.B. lɛ?

• Mɛni ji gbogbo he niŋmaa lɛ shishitsɔɔmɔ?

• Mɛɛ gbalɛ ko ni kɔɔ Babilon shigbeemɔ he baa mli yɛ be mli ni Belshazar okpɔlɔŋmɛɛ lɛ yaa nɔ lɛ?

• Mɛɛ shishinumɔ sane ni yɔɔ gbogbo he niŋmaa lɛ mli lɛ hiɛ kɛha wɔgbi nɛɛ?

[Baafa muu mfoniri ni yɔɔ baafa 98]

[Baafa muu mfoniri ni yɔɔ baafa 103]