Daniel

5 Maŋtsɛ Belshazar+ ŋmɛ okpɔlɔ kpele ehã ebladei lɛ ateŋ mɛi akpe, ni enu wain yɛ amɛhiɛ.+ 2 Be ni wain lɛ ba Belshazar hiɛ lɛ, efã koni ayahole shika tsuru kɛ jwiɛtɛi kɔɔpoi ni etsɛ Nebukadnezar yaloo yɛ Yerusalem sɔlemɔ shĩa lɛ mli lɛ kɛba,+ koni maŋtsɛ lɛ kɛ ebladei lɛ kɛ ehemɛi* lɛ kɛ eŋamɛi bibii lɛ kɛnu wain. 3 Kɛkɛ ni amɛkɛ shika tsuru kɔɔpoi ni ayaloo yɛ Nyɔŋmɔ shĩa lɛ sɔlemɔ shĩa lɛ ni yɔɔ Yerusalem lɛ mli lɛ ba, ni maŋtsɛ lɛ, kɛ ebladei lɛ, kɛ ehemɛi* lɛ, kɛ eŋamɛi bibii lɛ kɛnu wain. 4 Amɛnu wain, ni amɛjie shika tsuru kɛ jwiɛtɛi kɛ akɔɔble kɛ dade kɛ tso kɛ tɛ nyɔŋmɔi lɛ ayi.

5 Ni naa! gbɔmɔ nine waobii ko fã kpo, ni ebɔi niŋmaa yɛ maŋtsɛ shĩa lɛ gbogbo lɛ plasta lɛ ni hiɛ kwɛɔ kanetso lɛ he, ni maŋtsɛ lɛ na nine lɛ sɛɛ be ni nine lɛ ŋmaa nii lɛ. 6 Kɛkɛ ni maŋtsɛ lɛ hiɛ shale* ni esusumɔi lɛ wo ehe gbeyei waa, ni ehɛ mli kpokpo,+ ni enakutsei shilɛshilɛi amɛhe.

7 Maŋtsɛ lɛ bo waa akɛ atsɛ okɔmfoi lɛ, kɛ Kaldeabii* lɛ, kɛ ŋulamiiaŋkwɛlɔi lɛ kɛba.+ Maŋtsɛ lɛ kɛɛ Babilon hiɛshikalɔi lɛ akɛ: “Mɔ fɛɛ mɔ ni baanyɛ akane niŋmaa nɛɛ ni etsɔɔ mi shishi lɛ, akɛ atade ni hiɛ pɛpol kɔla baawo lɛ, ni akɛ shika tsuru kuɛnii baawo ekuɛ,+ ni ebaaye nɔ akɛ nɔyelɔ ni ji etɛ nɔ yɛ maŋtsɛyeli lɛ mli.”+

8 Kɛkɛ ni hiɛshikalɔi lɛ fɛɛ badamɔ maŋtsɛ lɛ hiɛ, shi amɛnyɛɛɛ amɛkane niŋmaa lɛ loo amɛtsɔɔ maŋtsɛ lɛ eshishi.+ 9 No hewɔ lɛ, Maŋtsɛ Belshazar tsui fã waa ni ehiɛ shale; ni ebladei lɛ hao waa.+

10 Maŋtsɛ lɛ kɛ ebladei lɛ awiemɔi lɛ ahewɔ lɛ, maŋnyɛ lɛ ba asa ni aŋmɛ okpɔlɔ lɛ yɛ nɔ lɛ nɔ. Maŋnyɛ lɛ kɛɛ akɛ: “Maŋtsɛ, oyi ana wala kɛya naanɔ. Kaahã osusumɔi wo ohe gbeyei loo amɛhã ohiɛ shale. 11 Nuu* ko yɛ omaŋtsɛyeli lɛ mli ni nyɔŋmɔi krɔŋkrɔŋi lɛ amumɔ yɛ emli. Yɛ otsɛ gbii lɛ amli lɛ, ana akɛ ejwɛŋmɔ mli egbele, ni eyoɔ nii asɛɛ, ni eyɛ hiɛshikamɔ tamɔ nyɔŋmɔi lɛ ahiɛshikamɔ lɛ.+ Otsɛ Maŋtsɛ Nebukadnezar wó lɛ majikfeelɔi lɛ, kɛ okɔmfoi lɛ, kɛ Kaldeabii* lɛ, kɛ ŋulamiiaŋkwɛlɔi lɛ anɔ onukpa;+ maŋtsɛ, otsɛ fee enɛ. 12 Ejaakɛ Daniel, mɔ ni maŋtsɛ lɛ tsɛ lɛ Belteshazar+ lɛ yɛ mumɔ ni nɔ bɛ kɛ nilee, kɛ sɛɛyoomɔ bɔ ni ebaanyɛ etsɔɔ lamɔi ashishi, ni ebaanyɛ egbala ajenui amli, ni efɛne saji ni mli wala tamɔ kpɔi ni ehiii fɛnemɔ.*+ No hewɔ lɛ, hã ayatsɛ Daniel kɛba ni ebaatsɔɔ bo niŋmai lɛ ashishi.”

13 No hewɔ lɛ, akɛ Daniel ba maŋtsɛ lɛ hiɛ. Maŋtsɛ lɛ bi Daniel akɛ: “Ani bo ji Daniel, ni jɛ mɛi ni ayaŋɔ amɛ nom yɛ Yuda kɛba,+ mɛi ni mitsɛ maŋtsɛ lɛ yaloo amɛ kɛjɛ Yuda kɛba lɛ ateŋ lɛ lo?+ 14 Minu ohe akɛ nyɔŋmɔi lɛ amumɔ yɛ omli+ ni akɛ ojwɛŋmɔ mli egbele, ni sɛɛyoomɔ kɛ hiɛshikamɔ ni nɔ bɛ yɛ omli.+ 15 Akɛ hiɛshikalɔi lɛ kɛ okɔmfoi lɛ ba mihiɛ koni amɛbakane niŋmaa nɛɛ, koni amɛtsɔɔ mi shishi, shi amɛnyɛɛɛ amɛtsɔɔ sane lɛ shishi.+ 16 Shi minu ohe akɛ onyɛɔ otsɔɔ saji ashishi,+ ni onyɛɔ ofɛneɔ saji ni mli wala tamɔ kpɔi ni ehiii fɛnemɔ.* Kɛ́ onyɛ okane niŋmaa lɛ ni otsɔɔ mi eshishi lɛ, akɛ atade ni hiɛ pɛpol kɔla baawo bo, ni akɛ shika tsuru kuɛnii baawo okuɛ, ni obaaye nɔ akɛ nɔyelɔ ni ji etɛ nɔ yɛ maŋtsɛyeli lɛ mli.”+

17 Kɛkɛ ni Daniel kɛɛ maŋtsɛ lɛ akɛ: “Hã onikeenii lɛ ahi odɛŋ, ni okɛ onikeenii lɛ ahã mɛi krokomɛi. Shi makane niŋmaa lɛ matsɔɔ maŋtsɛ, ni matsɔɔ lɛ eshishi. 18 Bo maŋtsɛ, Nyɔŋmɔ Ni Nɔ Kwɔ Fe Fɛɛ lɛ hã otsɛ Nebukadnezar maŋtsɛyeli lɛ, kɛ agbojee, kɛ woo kɛ hiɛnyam.+ 19 Agbojee ni ehã lɛ lɛ hewɔ lɛ, majimaji lɛ, jeŋmaji lɛ, kɛ wiemɔ kui lɛ fɛɛ ahe kpokpoɔ kɛ gbeyeishemɔ yɛ ehiɛ.+ Mɔ fɛɛ mɔ ni esumɔɔ akɛ egbe lɛ lɛ, egbeɔ lɛ, ni mɔ fɛɛ mɔ ni esumɔɔ akɛ ehã ehi wala mli lɛ, ehãa ehiɔ wala mli, ni mɔ fɛɛ mɔ ni esumɔɔ akɛ ewó enɔ lɛ, ewóɔ enɔ, ni mɔ fɛɛ mɔ ni esumɔɔ akɛ eshwie ehiɛ shi lɛ, eshwieɔ ehiɛ shi.+ 20 Shi be ni etsui wó ehe nɔ, ni ewaje emumɔ ni no hã eye etsuinaa sane lɛ,+ aba lɛ shi kɛje emaŋtsɛyeli lɛ maŋtsɛ sɛi lɛ nɔ, ni ahe enunyam lɛ yɛ edɛŋ. 21 Ashwie lɛ yɛ gbɔmɛi ateŋ, ni ahã lɛ kooloo tsui, ni eyahi ŋa mli tejii ateŋ. Ahã ekpe jwɛi tamɔ tsinahii kpeɔ jwɛi lɛ, ni ŋwɛi bɔ́ fɔ egbɔmɔtso kɛyashi ená ele akɛ Nyɔŋmɔ Ni Nɔ Kwɔ Fe Fɛɛ lɛ ji Nɔyelɔ yɛ adesai amaŋtsɛyeli mli, ni ekɛ mɔ fɛɛ mɔ ni esumɔɔ lɛ taa nɔ.+

22 “Shi bo ebinuu Belshazar, obaaa otsui shi, eyɛ mli akɛ ole nibii nɛɛ fɛɛ. 23 Moŋ lɛ, owó ohe nɔ oshi ŋwɛi Nuŋtsɔ lɛ,+ ni ohã ayahole eshĩa lɛ kɔɔpoi lɛ ahã bo.+ Kɛkɛ ni bo kɛ obladei lɛ kɛ ohemɛi* lɛ kɛ oŋamɛi bibii lɛ kɛnu wain, ni nyɛjie jwiɛtɛi kɛ shika tsuru kɛ akɔɔble kɛ dade kɛ tso kɛ tɛ nyɔŋmɔi lɛ ayi, nyɔŋmɔi ni enaaa nɔ ko nɔ ko, ni amɛnuuu nɔ ko nɔ ko, ni amɛleee nɔ ko nɔ ko lɛ.+ Shi owooo Nyɔŋmɔ ni omumɔ ni omuɔ kɛ ogbɛi fɛɛ yɔɔ edɛŋ+ lɛ hiɛ nyam. 24 No hewɔ lɛ, atsu nine lɛ kɛjɛ eŋɔɔ, ni ebaŋma niŋmaa nɛɛ.+ 25 Ni niŋmaa ni aŋma lɛ nɛ: MENE, MENE, TEKEL, kɛ PARSIN.

26 “Wiemɔi lɛ ashishi nɛ: MENE, Nyɔŋmɔ ekane omaŋtsɛyeli lɛ gbii lɛ, ni ekɛba naagbee.+

27 “TEKEL, aŋmɛ otsiimɔ yɛ nsɛnii mli, ni ana akɛ oshɛɛɛ.

28 “PERES, aja omaŋtsɛyeli lɛ mli, ni akɛhã Mediabii lɛ kɛ Persiabii lɛ.”+

29 Kɛkɛ ni Belshazar kɛ famɔ hã, ni amɛkɛ atade ni hiɛ pɛpol kɔla wo Daniel, ni amɛkɛ shika tsuru kuɛnii wo ekuɛ; ni amɛtswa ehe adafi akɛ ebaatsɔ nɔyelɔ ni ji etɛ nɔ yɛ maŋtsɛyeli lɛ mli.+

30 Nakai nyɔɔŋ lɛ mli nɔŋŋ lɛ, agbe Belshazar, Kaldeabii lɛ amaŋtsɛ lɛ.+ 31 Ni Dario,+ Medianyo lɛ nine shɛ maŋtsɛyeli lɛ nɔ; no mli lɛ eye afii 62.