Yitso Nyɔŋma

Namɔ Baanyɛ Ate Shi Awo Lumɛi Alumɔ Lɛ?

1, 2. Mɛni hewɔ ninaa ni Daniel na yɛ Belshazar nɔyeli afi ni ji etɛ lɛ mli he hiaa wɔ lɛ?

AFII 57 eho kɛjɛ be mli ni akpata Yehowa sɔlemɔtsu ni yɔɔ Yerusalem lɛ hiɛ. Belshazar kɛ etsɛ, Nabonido fɛɛ yeɔ Babilonia Maŋtsɛyeli, ni ji jeŋ hewalɛ ni ji etɛ yɛ Biblia gbalɛ mli lɛ nɔ.a Áŋɔ Nyɔŋmɔ gbalɔ Daniel nom yɛ Babilon. Ni yɛ “maŋtsɛ Belshazar nɔyeli afi ni ji etɛ lɛ nɔ lɛ,” Yehowa kɛ ninaa ko baha Daniel ni jieɔ anɔkwa jamɔ ni aaaku sɛɛ akɛma shi ekoŋŋ lɛ mlitsɔɔmɔi komɛi akpo.​—Daniel 8:1.

² Gbalɛ ninaa ni Daniel na lɛ ná enɔ hewalɛ waa, ni eji nɔ ko ni wɔ ni wɔyɔɔ “naagbee be” nɛɛ mli lɛ yɔɔ he miishɛɛ waa. Ŋwɛibɔfo Gabriel kɛɛ Daniel akɛ: “Naa, mibatsɔɔo nɔ ni baaba yɛ mlifu lɛ naagbee be lɛ mli; ejaakɛ naagbee be ni ato lɛ nɔ̃ ni.” (Daniel 8:​16, 17, 19, 27) Belɛ nyɛhaa wɔkɛ miishɛɛ babaoo asusua nɔ ni Daniel na lɛ kɛ nɔ ni etsɔɔ kɛha wɔ ŋmɛnɛ lɛ he.

TOO AGBO NI YƆƆ AKLONTOI ENYƆ

3, 4. Mɛɛ kooloo Daniel na ni edamɔ faa lɛ naa lɛ, ni efeɔ mɛni he mfoniri?

³ Daniel ŋma akɛ: “Ni mina yɛ ninaa lɛ mli, ni eba mli akɛ, beni mina lɛ, miyɛ Shushan mɔ̃ɔ lɛ ni yɔɔ Elam shikpɔŋ lɛ nɔ lɛ mli; mina yɛ ninaa lɛ mli ni miyɛ Ulai faa lɛ naa.” (Daniel 8:2) Kɛji akɛ Daniel yɛ Shushan (Susa)​—Elam maŋtiase, ni yɔɔ kilomitai 350 yɛ Babilon bokagbɛ lɛ mli diɛŋtsɛ​—aloo eyɛ jɛmɛ yɛ ninaa mli kɛkɛ lɛ, no lɛ awieee.

⁴ Daniel tee nɔ akɛ: “Ni mihole mihiŋmɛii anɔ, ni mikwɛ, ni naa, too agbo ko damɔ faa lɛ naa, ni eje aklontoi enyɔ.” (Daniel 8:3a) Nɔ ni too agbo lɛ damɔ shi kɛha lɛ eyaaa nɔ efeee teemɔŋ sane kɛhaaa Daniel. Bɔfo Gabriel wie yɛ sɛɛ mli akɛ: “Too agbo lɛ ni ona ni ji aklontoi enyɔ tsɛ lɛ, ji Media kɛ Persia maŋtsɛmɛi lɛ.” (Daniel 8:20) Mediabii lɛ jɛ gɔji ashikpɔŋ ni yɔɔ Ashur bokagbɛ lɛ nɔ amɛba, ni Persiabii lɛ hi shi kɛjɛ shishijee akɛ shikpalɔi ni kwɛɔ tooi yɛ Persia Ŋshɔnine lɛ kooyigbɛ niiaŋ. Shi, beni Media kɛ Persia Maŋtsɛyeli lɛ daa lɛ, emli bii lɛ baná suɔmɔ ni ekaaa kɛha ŋɔɔmɔyeli.

5. Te fee tɛŋŋ ni aklonto ni “kpe sɛɛ ba” lɛ bafee nɔ ni kwɔ fe enaanyo lɛ?

⁵ Daniel bɔ amaniɛ akɛ: “Ni aklontoi lɛ kwɔlɔ, shi ekome kwɔ fe ekome, ni nɔ ni kwɔ fe enaanyo lɛ kpe sɛɛ ba.” (Daniel 8:3b) Aklonto ni kwɔ fe enaanyo ni kpe sɛɛ ba lɛ feɔ Persiabii lɛ ahe mfoniri, ni aklonto kroko lɛ damɔ shi kɛha Mediabii lɛ. Klɛŋklɛŋ lɛ, Mediabii lɛ baye nɔ. Shi yɛ afi 550 D.Ŋ.B. lɛ, Koresh ni ji Persia nɔyelɔ lɛ ye Media Maŋtsɛ Astyages nɔ kunim yɛ gbɛ ni waaa nɔ. Koresh fee gbɔmɛi enyɔ lɛ akusumii kɛ mlai ekome, efee amɛ maŋtsɛyelii lɛ ekome, ni amɛlɛɛ amɛ kunimyelii lɛ amli. Kɛjɛ no nɔ kɛyaa lɛ, maŋtsɛyeli lɛ bafee nɔ ni bɔ he enyɔ.

TOO AGBO LƐ FEƆ EHE AGBO

6, 7. Te eba lɛ tɛŋŋ ni “kooloo ko kooloo ko nyɛɛɛ” too agbo lɛ ‘hiɛ edamɔ’ lɛ?

⁶ Beni Daniel yaa nɔ etsɔɔ bɔ ni too agbo lɛ ji lɛ, ekɛɛ akɛ: “Mina too agbo lɛ, ni eeshi kɛmiiya anaigbɛ kɛ kooyigbɛ kɛ wuoyigbɛ, ni kooloo ko kooloo ko nyɛɛɛ ehiɛ adamɔ, ni mɔ ko bɛ ni aaanyɛ mɔ ko ajie yɛ edɛŋ; shi nɔ ni esumɔɔ efeɔ, ni eje agbo.”​—Daniel 8:4.

⁷ Akɛ kooloo ko ni fã kpo kɛjɛ ŋshɔŋ ni tamɔ jata ni yɔɔ okropɔŋ fiji lɛ fee Babilon he mfoniri yɛ ninaa ni atsɔ hiɛ akɛha Daniel lɛ mli. (Daniel 7:​4, 17) Nakai mfonirifeemɔŋ kooloo lɛ nyɛɛɛ adamɔ ninaa hee nɛɛ mli “too agbo” lɛ hiɛ. Babilon gbee shi yɛ Koresh Kpeteŋkpele lɛ hiɛ yɛ afi 539 D.Ŋ.B. Aaafee no sɛɛ afii 50 lɛ, maŋkwramɔŋ nɔyelii loo ‘kooloi komɛi bɛ’ ni nyɛ amɛdamɔ Media kɛ Persia Maŋtsɛyeli lɛ​—Biblia gbalɛ mli jeŋ hewalɛ ni ji ejwɛ lɛ hiɛ.

8, 9. (a) “Too agbo” lɛ ‘shi kɛtee anaigbɛ kɛ kooyigbɛ kɛ wuoyigbɛ’ yɛ mɛɛ gbɛ nɔ? (b) Mɛni Ester wolo lɛ kɛɔ yɛ Persia Maŋtsɛ Dario I sɛɛyelɔ lɛ he?

⁸ Akɛni eba kɛjɛ ‘hulu shiteehe’​—bokagbɛ​—hewɔ lɛ, Media kɛ Persia Jeŋ Hewalɛ lɛ fee nɔ ni esumɔɔ, “eshi kɛmiiya anaigbɛ kɛ kooyigbɛ kɛ wuoyigbɛ.” (Yesaia 46:11) Maŋtsɛ Cambyses II, ni baye Koresh Kpeteŋkpele lɛ sɛɛ lɛ ye Mizraim nɔ kunim. Mɔ ni baye esɛɛ ji Persia Maŋtsɛ Dario I, ni fã kɛtsɔ anaigbɛ kɛfo Bosporus ŋshɔgbɛ fintɔ̃ɔ lɛ yɛ afi 513 D.Ŋ.B. lɛ, ni eyatutua Europa shikpɔŋkuku ni ji Thrace, ni emaŋtiase ji Byzantium (amrɔ nɛɛ Instanbul) lɛ. Eba Thrace shi yɛ afi 508 D.Ŋ.B., ni eye Makedonia nɔ kunim yɛ afi 496 D.Ŋ.B. No hewɔ lɛ, yɛ Dario beaŋ lɛ, Media kɛ Persia “too agbo” lɛ eshɔ̃ shikpɔŋkukuji yɛ hei srɔtoi etɛ: kooyigbɛ kɛmiiya Babilonia kɛ Ashur, anaigbɛ kɛtsɔ Asia Bibioo lɛ, kɛ wuoyigbɛ kɛmiibote Mizraim.

⁹ Beni Biblia lɛ yeɔ Media kɛ Persia Maŋtsɛyeli lɛ dalɛ he odase lɛ, ewie Dario sɛɛyelɔ Xerxes I he akɛ “nɛkɛ Ahashwerosh nɛɛ ye maŋtsɛ kɛjɛ India kɛyashi Kush yɛ shikpɔji srɔtoi oha kɛ nyɔŋmai enyɔ kɛ kpawo nɔ.” (Ester 1:1) Shi nɛkɛ maŋtsɛyeli kpeteŋkpele nɛɛ baaba ehe shi eha ekroko, ni enɛ gbɛfaŋ lɛ, Daniel ninaa lɛ jieɔ emli saji komɛi ni teeɔ miishɛɛ shi ni esa akɛ ewaje wɔhemɔkɛyeli yɛ Nyɔŋmɔ gbalɛ wiemɔ lɛ mli lɛ kpo.

TOO KPAKPO LƐ SHI TOO AGBO LƐ KƐGBEE SHI

10. Mɛɛ kooloo tsi “too agbo” lɛ etswa shi yɛ Daniel ninaa lɛ mli lɛ?

¹⁰ Susumɔ bɔ ni Daniel naa baakpɛ ehe aha beni enaa nɔ ni yaa nɔ agbɛnɛ lɛ. Sane lɛ kɛɔ akɛ: “Ni beni mikwɛɔ lɛ, naa, too kpakpo ko jɛ anaigbɛ miiba ebahe shikpɔŋ muu lɛ fɛɛ hiɛ, ni ehe esaaa shikpɔŋ; ni too kpakpo lɛ yɛ aklonto ni da yɛ ehiŋmɛii ateŋ; ni eba too agbo lɛ ni ji aklontoi enyɔ tsɛ ni mina akɛ edamɔ faa lɛ naa lɛ ŋɔ̃ɔ, ni esha foi kɛba enɔ yɛ ehewalɛ hiɛdɔɔ lɛ mli. Ni mina lɛ ni etsi ebɛŋkɛ too agbo lɛ, ni emli ewo lɛ la naakpa, ni eshi too agbo lɛ, ni ekumɔ eklontoi enyɔ lɛ; ni hewalɛ bɛ too agbo lɛ mli, bɔ ni ekɛaadamɔ ehiɛ, shi etsi lɛ egbee shikpɔŋ, ni enaanaa lɛ, ni mɔ ko mɔ ko nyɛɛɛ too agbo lɛ ajie yɛ edɛŋ.” (Daniel 8:​5-7) Mɛni ji nɔ ni enɛɛmɛi fɛɛ tsɔɔ?

11. (a) Te ŋwɛibɔfo Gabriel tsɔɔ bɔ ni “too kpakpo tsɔiatsɛ” lɛ kɛ ‘eklonto ni da’ lɛ ji lɛ mli eha tɛŋŋ? (b) Aklonto ni yɔɔ srɔto lɛ fee namɔ he mfoniri?

¹¹ Ashĩii Daniel loo wɔ akɛ wɔsusu nɔ ni ninaa nɛɛ shishi ji lɛ he. Bɔfo Gabriel bɔ Daniel amaniɛ akɛ: “Too kpakpo tsɔiatsɛ lɛ ji Hela maŋtsɛ lɛ. Ni aklonto wulu lɛ ni yɔɔ ehiŋmɛii ateŋ lɛ ji klɛŋklɛŋ maŋtsɛ lɛ.” (Daniel 8:21) Awó Persia Maŋtsɛyeli lɛ nɔ naagbee maŋtsɛ, Dario III (Codommanus) maŋtsɛ yɛ afi 336 D.Ŋ.B. Nakai afi lɛ nɔŋŋ mli ni Alexander batsɔ maŋtsɛ yɛ Makedonia. Yinɔsane tsɔɔ akɛ Alexander Kpeteŋkpele lɛ bafee klɛŋklɛŋ “Hela maŋtsɛ” ni agba ehe sane afɔ̃ shi lɛ. Alexander kɛ oyaiyeli je shishi kɛjɛ ‘hulu shinyɔɔhe’ loo anaigbɛ, yɛ afi 334 D.Ŋ.B. Tamɔ mɔ ni “ehe esaaa shikpɔŋ” lɛ, eye shikpɔŋkukuji anɔ kunim ni eshi “too agbo” lɛ kɛgbee shi. Akɛni ekɛ Media kɛ Persia nɔyeli ni shwɛ fioo ni ena afii ohai enyɔ lɛ ba naagbee hewɔ lɛ, Hela batsɔ jeŋ hewalɛ ni ji enumɔ ni tsɔɔ nɔ ko yɛ Biblia lɛ mli. Mɛɛ ŋwɛi gbalɛ mlibaa ni yɔɔ naakpɛɛ nɛ!

12. Te fee tɛŋŋ ni mfonirifeemɔŋ too kpakpo lɛ ‘aklonto ni da’ lɛ “ku,” ni mɛni ji aklontoi ejwɛ ni baye enajiaŋ lɛ?

¹² Shi Alexander hewalɛ lɛ sɛɛ etsɛŋ. Ninaa lɛ jie lɛ kpo ekoŋŋ akɛ: “Ni too kpakpo lɛ je agbo kpeteŋkpele diɛŋtsɛ; ni beni ehe wa kwraa lɛ, eklonto kpeteŋkpele lɛ kũ, ni aklontoi ejwɛ ni dara ni kwɛɔ ŋwɛi kɔɔyɔi ejwɛ lɛ nɔ gbɛ baje kpo yɛ enajiaŋ.” (Daniel 8:8) Beni etsɔɔ gbalɛ lɛ mli lɛ, Gabriel kɛɛ akɛ: “Agbɛnɛ lɛ bɔ ni no kũ ni ejwɛ te shi damɔ shi yɛ enajiaŋ lɛ, maŋtsɛyelii ejwɛ aaajɛ jeŋmaŋ lɛ mli ate shi, shi amɛnaŋ hewalɛ tamɔ lɛ.” (Daniel 8:22) Taakɛ agba lɛ, beni eyashɛ ekunimyeli lɛ yiteŋ ni kwɔ fe fɛɛ lɛ, Alexander “kũ” loo egbo, beni eye afii 32 pɛ. Ni yɛ naagbee lɛ, aja emaŋtsɛyeli kpeteŋkpele lɛ mli aha etatsɛmɛi ejwɛ.

AKLONTO BIBIOO KO NI YƆƆ NAAKPƐƐ

13. Mɛni kwɛ̃ kɛjɛ aklontoi ejwɛ lɛ ateŋ ekome he, ni te efee enii eha tɛŋŋ?

¹³ Ninaa lɛ fã ni nyiɛ sɛɛ lɛ mli lɛɛɔ kɛtekeɔ nɔ ni fe afii 2,200, ni emlibaa mli kpãa kɛbaa ŋmɛnɛŋmɛnɛ beaŋ. Daniel ŋma akɛ: “Ni aklonto bibioo ko je kpo yɛ [aklontoi ejwɛ lɛ ateŋ] ekome he, ni ebada kpeteŋkpele diɛŋtsɛ kɛtee wuoyigbɛ kɛ bokagbɛ kɛ shikpɔŋ fɛfɛo lɛ nɔ. Ni eda aahu kɛyashi ŋwɛi asafo lɛ he, ni etsirɛ asafo lɛ kɛ ŋulamii lɛ ekomɛi etswia shikpɔŋ, ni enaanaa amɛnɔ. Ni ewo ehe nɔ kɛyashi asafo lɛ lumɔ lɛ ŋɔ̃ɔ, ni eshɔ̃ daa gbi afɔle lɛ yɛ edɛŋ, ni etsi ehé krɔŋkrɔŋ shihilɛhe lɛ etswa shi. Shi aŋɔ asafo ko aha lɛ, ni ete shi ewo daa gbi afɔle lɛ yɛ mlatɔ̃mɔ mli, ni etsi anɔkwale lɛ etswa shikpɔŋ, ni efee, ni eshwere.”​—Daniel 8:​9-12.

14. Mɛni ŋwɛibɔfo Gabriel wie yɛ mfonirifeemɔŋ aklonto bibioo lɛ nifeemɔi ahe, ni mɛni baaba nakai aklonto lɛ nɔ?

¹⁴ Dani wɔɔnu wiemɔi ni atsɛ sɛɛ lɛ ashishi lɛ, esa akɛ wɔbo Nyɔŋmɔ ŋwɛibɔfo lɛ toi. Beni étsɔɔ maŋtsɛyelii ejwɛ ni baajɛ Alexander maŋtsɛyeli lɛ mli aba hewalɛ mli lɛ sɛɛ lɛ, ŋwɛibɔfo Gabriel kɛɛ akɛ: “Ni amɛmaŋtsɛyeli lɛ naagbee mli, beni mlatɔ̃lɔi lɛ amlatɔ̃mɔ lɛ eyi lɛ, maŋtsɛ ko ni hiɛ wa ni ele ŋaa fɔŋ hu aaate shi. Ni ehewalɛ lɛ mli aaawa, shi jeee lɛ diɛŋtsɛ ehewalɛ naa; ni eeekpata hiɛ ni yɛ naakpɛɛ, ni eeeshwere, ni eeefee, ni eeekpata hewalɔi lɛ kɛ mɛi krɔŋkrɔŋi lɛ amaŋ lɛ hiɛ. Ni eŋaalee sɔŋŋ hewɔ lɛ eeeha shishiumɔ ashwere yɛ edɛŋ, ni eeefee ehe agbo yɛ etsui mli, ni eeekpata mɛi pii ahiɛ ni amɛleee be; ni eeete shi ewo lumɛi alumɔ lɛ tete; shi aaakumɔ lɛ, ni jeee kɛ nine tete.”​—Daniel 8:​23-25.

15. Mɛni ŋwɛibɔfo lɛ kɛɛ Daniel akɛ efee yɛ ninaa lɛ he?

¹⁵ Ŋwɛibɔfo lɛ kɛɛ Daniel akɛ: “Shi bo lɛ tsiimɔ ninaa lɛ nɔ, ejaakɛ eeeye gbii pii dani eeeba mli.” (Daniel 8:26) Ninaa lɛ fã nɛɛ baŋ mli ja eye “gbii pii,” ni esa akɛ Daniel ‘atsimɔ ninaa lɛ nɔ.’ Eyɛ faŋŋ akɛ eshishinumɔ lɛ hi shi akɛ teemɔŋ sane kɛha Daniel. Shi amrɔ nɛɛ, eka shi faŋŋ akɛ, nakai “gbii pii” lɛ eho. No hewɔ lɛ, wɔbiɔ akɛ: ‘Mɛni jeŋ yinɔsane jieɔ lɛ kpo yɛ gbalɛ ninaa nɛɛ mlibaa he?’

AKLONTO BIBIOO LƐ BATSƆ HEWALƐ KPETEŊKPELE

16. (a) Mɛɛ mfonirifeemɔŋ aklonto ni aklonto bibioo fã kpo kɛjɛ mli lɛ? (b) Te fee tɛŋŋ ni Roma batsɔ jeŋ hewalɛ ni ji ekpaa yɛ Biblia gbalɛ mli, shi mɛni hewɔ jeee mfonirifeemɔŋ aklonto bibioo lɛ moŋ?

¹⁶ Taakɛ yinɔsane tsɔɔ lɛ, aklonto bibioo lɛ kwɛ̃ kɛjɛ okadi aklontoi ejwɛ lɛ ateŋ ekome he​—nɔ ni yɔɔ anaigbɛ shɔŋŋ lɛ. Enɛ ji Hela maŋtsɛyeli ni Tatsɛ Cassander kɛye nɔ yɛ Makedonia kɛ Hela lɛ. Yɛ sɛɛ mli lɛ, Tatsɛ Lysimachus, Thrace kɛ Asia Bibioo lɛ nɔ maŋtsɛ lɛ ŋɔ maŋtsɛyeli lɛ. Yɛ afii ohai enyɔ dani wɔ Ŋmɛnɛŋmɛnɛ Be nɛɛ shɛ lɛ, Roma ye nɛkɛ Hela nɔyelihe ni ji anaigbɛ fãi lɛ anɔ kunim. Ni beni shɛ afi 30 D.Ŋ.B. lɛ, Roma eŋɔ Hela maŋtsɛyelii lɛ fɛɛ, ni efee ehe jeŋ hewalɛ ni ji ekpaa yɛ Biblia gbalɛ mli. Shi Roma Maŋtsɛyeli lɛ jeee aklonto bibioo ni yɔɔ Daniel ninaa lɛ mli lɛ, ejaakɛ nakai maŋtsɛyeli lɛ eyaaa nɔ kɛyashi “naagbee be ni ato” lɛ.​—Daniel 8:19.

17. (a) Mɛɛ wekukpaa bakã Britania kɛ Roma Maŋtsɛyeli lɛ teŋ? (b) Mɛɛ tsakpãa kã Britania Maŋtsɛyeli lɛ kɛ Hela maŋtsɛyeli ni yɔɔ Makedonia kɛ Hela lɛ teŋ?

¹⁷ Belɛ mɛni yinɔsane yɔseɔ lɛ akɛ “maŋtsɛ ni hiɛ wa” ni yɔɔ ekãa lɛ? Britania ji Roma Maŋtsɛyeli lɛ fã ko ni kwɛ̃ diɛŋtsɛ yɛ kooyi-anaigbɛ. Kɛbashi Ŋ.B. afii ohai enumɔ lɛ shishijee mli fɛɛ lɛ, no mli lɛ Roma nɔyelihei yɛ nɔ ni ale bianɛ akɛ Britain lɛ. Beni be shwieɔ mli lɛ, Roma Maŋtsɛyeli lɛ ba shi, shi hewalɛ ni Hela kɛ Roma hiŋmɛigbelemɔ ná lɛ tee nɔ yɛ Britain kɛ Europa hei krokomɛi ni éhi Roma nɔyeli shishi lɛ. Mexico lalafolɔ kɛ niŋmalɔ, Octavio Paz ni na Nobel Jweremɔnɔ̃ lɛ eko lɛ ŋma akɛ: “Beni Roma Maŋtsɛyeli lɛ gbee shi lɛ, kɛkɛ ni Sɔlemɔ lɛ baye enajiaŋ.” Ekɛfata he akɛ: “Sɔlemɔ tsɛmɛi lɛ kɛ sɛɛ mli woloŋlelɔi lɛ hu ŋɔ Hela jeŋ nilee amɛfata Kristofoi atsɔɔmɔ he.” Ni afii ohai 20 lɛ mli jeŋ nilelɔ kɛ akɔntaabulɔ kpanaa Bertrand Russell kɛɛ akɛ: “Anaigbɛ hiŋmɛigbelemɔ, ni ba kɛjɛ Hela nɔ̃ mli lɛ damɔ jeŋ nilee kɛ ŋaa ni jɛ blema saji ni je shishi yɛ Mileto [Hela maŋtiase ko ni yɔɔ Asia Bibioo lɛ], afii akpei enyɔ kɛ fã ni eho lɛ mli lɛ anɔ.” No hewɔ lɛ, abaanyɛ akɛɛ akɛ, Britania Maŋtsɛyeli lɛ ná ehiŋmɛigbelemɔ lɛ shishifãi kɛjɛ Makedonia kɛ Hela ni Helabii amaŋtsɛyeli lɛ yeɔ nɔ lɛ mli.

18. Mɛni ji aklonto bibioo ni batsɔ “maŋtsɛ ko ni hiɛ wa” yɛ “naagbee be lɛ mli” lɛ? Tsɔɔmɔ mli.

¹⁸ Beni afi 1763 shɛɔ lɛ, Britania Maŋtsɛyeli lɛ eye Spain kɛ France ní he wa ní kɛ lɛ shiɔ akaŋ lɛ nɔ kunim. Kɛjɛ nakai be lɛ mli kɛbaa lɛ ejie ehe kpo akɛ ŋshɔi ahiɛ awula kɛ jeŋ hewalɛ ni ji kpawo yɛ Biblia gbalɛ mli. Yɛ be mli ni America shihemɔ maji 13 lɛ po tse amɛhe kɛjɛ Britania he yɛ afi 1776 ni amɛto United States of America po sɛɛ lɛ, Britania Maŋtsɛyeli lɛ da kɛyashɛ shikpɔŋ lɛ fɛɛ mlijaa ejwɛ mli ekome, kɛ emli gbɔmɛi ayifalɛ mlijaa ejwɛ mli ekome. Jeŋ hewalɛ ni ji kpawo lɛ ná hewalɛ babaoo po beni United States of America kɛ Britania fee ekome kɛto Anglo-Amerika jeŋ hewalɛ ni bɔ he enyɔ lɛ. Hewalɛ nɛɛ ebatsɔ “maŋtsɛ ko ni hiɛ wa” diɛŋtsɛ yɛ shika kɛ tawuu gbɛfaŋ. Belɛ aklonto bibioo ni batsɔ maŋkwramɔŋ hewalɛ ni hiɛ wa yɛ “naagbee be lɛ mli” lɛ ji Anglo-Amerika Jeŋ Hewalɛ lɛ.

19. Mɛni ji “shikpɔŋ fɛfɛo lɛ” ni atsĩ tã yɛ ninaa lɛ mli lɛ?

¹⁹ Daniel na akɛ aklonto bibioo lɛ “bada kpeteŋkpele diɛŋtsɛ” kɛtee “shikpɔŋ fɛfɛo” lɛ he. (Daniel 8:9) Shiwoo Shikpɔŋ lɛ ni Yehowa kɛha ewebii ni ehala amɛ lɛ yɛ fɛo aahu akɛ atsɛ lɛ akɛ shikpɔŋ muu lɛ fɛɛ nɔ “shikpɔji lɛ ateŋ nɔ ni yɔɔ fɛo fe fɛɛ.” (Ezekiel 20:​6, 15) Eji anɔkwale akɛ Britania ye Yerusalem nɔ kunim yɛ December 9, 1917, ni yɛ afi 1920 mli lɛ, Jeŋmaji Akpaŋmɔ lɛ kɛ Palestina wo Great Britain dɛŋ akɛ ekwɛ nɔ, ni ebaaya nɔ kɛyashi May 14, 1948. Shi ninaa lɛ ji gbalɛ nɔ̃, ni okadii pii yɛ mli. Ni “shikpɔŋ fɛfɛo” ni atsĩ tã yɛ ninaa lɛ mli lɛ feɔ shikpɔŋ nɔ shihilɛ ni gbɔmɛi ni Nyɔŋmɔ buɔ amɛ akɛ krɔŋkrɔŋ yɛ jeŋ hewalɛ ni ji kpawo lɛ be lɛ mli lɛ yɔɔ mli lɛ ahe mfoniri, shi jeee Yerusalem. Nyɛhaa wɔkwɛa bɔ ni Anglo-Amerika Jeŋ Hewalɛ lɛ bɔɔ mɔdɛŋ akɛ eeewo mɛi krɔŋkrɔŋi lɛ ahe gbeyei lɛ.

ETSI “EHÉ KRƆŊKRƆŊ SHIHILƐHE LƐ” ETSWA SHI

20. Namɛi ji “ŋwɛi asafo lɛ” kɛ “ŋulamii lɛ” ni aklonto bibioo lɛ bɔɔ mɔdɛŋ ni etsirɛ amɛ etswia shikpɔŋ lɛ?

²⁰ Aklonto bibioo lɛ tee nɔ “eda aahu kɛyashi ŋwɛi asafo lɛ he, ni etsirɛ asafo lɛ kɛ ŋulamii lɛ ekomɛi etswia shikpɔŋ.” Bɔ ni ŋwɛibɔfo lɛ tsɔɔ mli eha lɛ, “ŋwɛi asafo lɛ” kɛ “ŋulamii lɛ” ni aklonto bibioo lɛ bɔɔ mɔdɛŋ ni etsirɛ amɛ etswia shikpɔŋ lɛ ji “mɛi krɔŋkrɔŋi lɛ amaŋ lɛ.” (Daniel 8:​10, 24) Nɛkɛ “mɛi krɔŋkrɔŋi” nɛɛ ji Kristofoi ni akɛ mumɔ efɔ amɛ mu lɛ. Akɛni atsɔ kpaŋmɔ hee, ni Yesu Kristo lá ni efɔse eshwie shi lɛ hã ebɔi nitsumɔ lɛ nɔ akɛ amɛ eba amɛkɛ Nyɔŋmɔ teŋ wekukpaa mli hewɔ lɛ, áju amɛhe, ni átsuu amɛhe, ni átu amɛ ama afã kɛha Nyɔŋmɔ pɛ sɔɔmɔ. (Hebribii 10:10; 13:20) Akɛni eha amɛtsɔmɔ gboshiniyelɔi kɛ e-Bi lɛ yɛ ŋwɛi hewɔ lɛ, Yehowa buɔ amɛ krɔŋkrɔŋ. (Efesobii 1:​3, 11, 18-20) Belɛ yɛ Daniel ninaa lɛ mli lɛ, “ŋwɛi asafo lɛ” damɔ shi kɛha “mɛi krɔŋkrɔŋi” 144,000 lɛ ateŋ shwɛɛnii ni yɔɔ shikpɔŋ nɔ, ni kɛ Toobi lɛ baaye maŋtsɛ yɛ ŋwɛi lɛ.​—Kpojiemɔ 14:​1-5.

21. Namɔ hiɔ “hé krɔŋkrɔŋ shihilɛhe” lɛ ni jeŋ hewalɛ ni ji kpawo lɛ bɔɔ mɔdɛŋ ni efee lɛ amaŋfɔ lɛ?

²¹ Ŋmɛnɛ, mɛi 144,000 lɛ ateŋ mɛi ni eshwɛ lɛ ji “ŋwɛi Yerusalem”​—Nyɔŋmɔ Maŋtsɛyeli ni tamɔ maŋtiase lɛ​—kɛ esɔlemɔtsu gbɛjianɔtoo lɛ najiaŋdamɔlɔi ni yɔɔ shikpɔŋ nɔ. (Hebribii 12:​22, 28; 13:14) Yɛ shishinumɔ nɛɛ naa lɛ, amɛhiɔ “hé krɔŋkrɔŋ” ni jeŋ hewalɛ ni ji kpawo lɛ bɔɔ mɔdɛŋ ni enaanaa nɔ ni efee lɛ amaŋfɔ lɛ. (Daniel 8:13) Beni ewieɔ nakai hé krɔŋkrɔŋ lɛ hu he akɛ “[Yehowa] hé krɔŋkrɔŋ shihilɛhe” lɛ, Daniel kɛɛ akɛ: “Ni eshɔ̃ daa gbi afɔle lɛ yɛ [Yehowa] dɛŋ, ni etsi ehé krɔŋkrɔŋ shihilɛhe lɛ etswa shi. Shi aŋɔ asafo ko aha lɛ, ni ete shi ewo daa gbi afɔle lɛ yɛ mlatɔ̃mɔ mli, ni etsi anɔkwale lɛ etswa shikpɔŋ, ni efee, ni eshwere,” (Daniel 8:​11, 12) Enɛ ba mli yɛ mɛɛ gbɛ nɔ?

22. Yɛ mɛɛ gbɛ nɔ jeŋ hewalɛ ni ji kpawo lɛ ‘tɔ̃ mla’ ni sa kadimɔ yɛ Jeŋ Ta II be lɛ mli?

²² Mɛni fee Yehowa Odasefoi aniiashikpamɔ yɛ Jeŋ Ta II be lɛ mli? Amɛna nɔ̃ yɛ yiwaa ni naa wa waa mli! Eje shishi yɛ Nazi kɛ Fascist maji lɛ amli. Shi etsɛɛɛ ni ‘ashɛrɛ anɔkwale atswia shikpɔŋ’ yɛ ‘aklonto bibioo ni ehewalɛ ebada waa’ lɛ nɔyelihe ni da waa lɛ fɛɛ mli. Atsĩ Maŋtsɛyeli jajelɔi “asafo” lɛ kɛ amɛ nitsumɔ ni ji “sanekpakpa” lɛ shiɛmɔ lɛ naa yɛ nɔ ni miihe ashɛ Britania Nɔyeli Maji lɛ fɛɛ mli. (Marko 13:10) Beni maji nɛɛ bua amɛmli bii ahewalɛ naa lɛ, amɛŋmɛɛɛ gbɛ ni Yehowa Odasefoi aye amɛhe akɛ mɛi ni kɛ amɛhe wooo asraafoi anitsumɔ mli, amɛjieee bulɛ kpo kwraa amɛhaaa amɛ teokrase halamɔi akɛ Nyɔŋmɔ sɔɔlɔi lɛ. Yehowa tsuji anɔkwafoi ni yɔɔ United States lɛ kɛ asafoi ni feɔ amɛ basabasa kɛ hiɛshishwiemɔi srɔtoi kpe. No hewɔ lɛ, jeŋ hewalɛ ni ji kpawo lɛ bɔ mɔdɛŋ koni eshɔ̃ yijiemɔ afɔle​—“naabui ni jajeɔ egbɛi lɛ ayibii lɛ”​—ní Yehowa webii kɛhaa lɛ daa akɛ amɛjamɔ lɛ mli “daa gbi afɔle” lɛ kɛya. (Hebribii 13:15) No hewɔ lɛ, nakai jeŋ hewalɛ lɛ ‘tɔ̃ mla’ yɛ Mɔ ni Yɔɔ Ŋwɛi Shɔŋŋ lɛ nɔyelihe ni sa lɛ​—“ehé krɔŋkrɔŋ shihilɛhe” lɛ ni eyatutua lɛ hewɔ.

23. (a) Te fee tɛŋŋ ni Anglo-Amerika Jeŋ Hewalɛ lɛ ‘wó ehe nɔ eshi lumɛi a-Lumɔ lɛ’ yɛ Jeŋ Ta II mli lɛ? (b) Namɔ ji ‘Lumɛi lɛ anɔ Lumɔ’ lɛ?

²³ Yɛ “mɛi krɔŋkrɔŋi lɛ” ni ewa amɛyi yɛ Jeŋ Ta II be lɛ mli lɛ hewɔ lɛ, aklonto bibioo lɛ fee ehe agbo “aahu kɛyashi asafo lɛ lumɔ lɛ nɔ.” Aloo, taakɛ ŋwɛibɔfo Gabriel jaje lɛ, ete shi ‘ewo lumɛi a-Lumɔ’ lɛ. (Daniel 8:​11, 25) Sabala ni ji ‘lumɛi a-Lumɔ’ lɛ kɔɔ Yehowa Nyɔŋmɔ pɛ he. Hebri wiemɔ sar, ni atsɔɔ shishi akɛ “lumɔ” lɛ kɔɔ feemɔ wiemɔ ko ni eshishi ji “aye nɔyelihe nɔ” lɛ he. Kɛfata maŋtsɛ bi loo odehe ko ni ekɔɔ ehe lɛ he lɛ, wiemɔ lɛ kɔɔ onukpa, loo lumɔ he. Daniel wolo lɛ tsĩ ŋwɛibɔfoi komɛi ni ji lumɛi atã​—akɛ nɔkwɛmɔnɔ lɛ, Mikael. Nyɔŋmɔ ji Lumɔ Nukpa yɛ lumɛi nɛɛ fɛɛ nɔ. (Daniel 10:​13, 21; okɛto Lala 83:18 he.) Ani wɔbaanyɛ wɔsusu mɔ ko po ni baanyɛ awó ehe nɔ eshi Yehowa​—lumɛi a-Lumɔ lɛ he?

ABAASAA “HÉ KRƆŊKRƆŊ LƐ”

24. Mɛɛ nɔmimaa Daniel 8:​14 kɛhaa wɔ?

²⁴ Mɔ ko mɔ ko bɛ ni baanyɛ awó ehe nɔ eshi lumɛi a-Lumɔ lɛ​—maŋtsɛ ko po bɛ ni “hiɛ wa” tamɔ Anglo-Amerika Jeŋ Hewalɛ lɛ ni baanyɛ afee nakai! Mɔdɛŋ srɔtoi ni maŋtsɛ nɛɛ bɔ koni efee Nyɔŋmɔ shihilɛhe lɛ amaŋfɔ lɛ yeee omanye. Yɛ be kpalaŋŋ ni ji “jenamɔi kɛ jetsɛremɔi akpei enyɔ kɛ ohai etɛ” sɛɛ lɛ, ŋwɛibɔfo ni atsu lɛ lɛ kɛɛ akɛ, “akɛ hé krɔŋkrɔŋ lɛ aaaba eshihilɛ ni ja lɛ mli,” loo “eeeje kpo akɛ kunimyelɔ.”​—Daniel 8:​13, 14; The New English Bible.

25. Mɛni ji gbalɛ be kpalaŋŋ ni ji gbii 2,300 lɛ sɛɛkɛlɛ, ni esa akɛ akɛto mɛni he?

²⁵ Gbii 2,300 lɛ feɔ gbalɛ be kpalaŋŋ ko. No hewɔ lɛ, ekɔɔ gbalɛ afi ko ni feɔ gbii 360 he. (Kpojiemɔ 11:​2, 3; 12:​6, 14) Belɛ gbii 2,300 nɛɛ baafee afii 6, nyɔji 4, kɛ gbii 20. Mɛɛ be ji nɛkɛ be kpalaŋŋ nɛɛ? Ojogbaŋŋ, yɛ afi 1930 afii lɛ amli lɛ, yiwaa ni yaa hiɛ yɛ maji srɔtoi amli bɔ̃i Nyɔŋmɔ webii anɔ baa. Ni yɛ Jeŋ Ta II mli lɛ, awa Yehowa Odasefoi ayi waa yɛ Anglo-Amerika jeŋ hewalɛ ni bɔ he enyɔ lɛ shikpɔji anɔ. Mɛni hewɔ? Akɛni amɛmaa nɔ mi akɛ ‘amɛbaabo Nyɔŋmɔ toi akɛ nɔyelɔ fe gbɔmɛi’ lɛ hewɔ. (Bɔfoi lɛ Asaji 5:29) No hewɔ lɛ, esa akɛ gbii 2,300 lɛ akɔ nakai ta lɛ he.b Shi mɛni abaanyɛ awie yɛ gbalɛ be nɛɛ shishijee kɛ enaagbee he?

26. (a) Esa akɛ gbii 2,300 lɛ kanemɔ aje shishi kɛjɛ mɛɛ mra be mli? (b) Mɛɛ be gbii 2,300 lɛ ba naagbee?

²⁶ Kɛji ákɛ akɛ “hé krɔŋkrɔŋ” lɛ “ba” loo asaa ekoŋŋ kɛba bɔ ni esa akɛ ehi shi lɛ mli lɛ, no lɛ esa akɛ gbii 2,300 lɛ kanemɔ lɛ aje shishi kɛjɛ be mli ni eyɔɔ etsutsu “shihilɛ ni ja” mli yɛ Nyɔŋmɔ hiɛ lɛ mli. Yɛ mra be mli lɛ, enɛ ji June 1, 1938, beni The Watchtower lɛ ŋma sane ni eyitso ji “Gbɛjianɔtoo,” ni tsɔɔ teokrase gbɛjianɔtoo taomɔ nii lɛ mli jogbaŋŋ kɛmɔ shi lɛ fã 1 lɛ. Nɔ ni yɔɔ June 15, 1938 The Watchtower lɛ mli ji sane ni ji “Gbɛjianɔtoo” lɛ fã 2 lɛ. Kɛji akɛ akane gbii 2,300 (afii 6, nyɔji 4, kɛ gbii 20 yɛ Hebri kalanda lɛ nɔ) kɛjɛ June 1 loo 15, 1938 lɛ, ekɛ wɔ baa October 8 loo 22, 1944. Yɛ kpee krɛdɛɛ ko ni afee yɛ Pittsburgh, Pennsylvania, U.S.A. yɛ September 30 kɛ October 1, 1944, lɛ, Buu Mɔɔ Asafo lɛ sɛinɔtalɔ lɛ wie sane ko ni ji “Teokrase Shidaamɔ Ŋmɛnɛ” lɛ he. Yɛ amɛ daa afi kpee ni mla gbɛjianɔtoo kuu lɛ fee yɛ October 2, lɛ shishi lɛ, atsake Asafo lɛ mla gbɛjianɔtoo lɛ mli bɔni afee ni aha ebɛŋkɛ teokrase gbɛjianɔtoo he bɔ ni mla lɛ aaaŋmɛ gbɛ. Beni aŋma Biblia taomɔ nii ni aha emli efee faŋŋ lɛ, ato teokrase gbɛjianɔtoo lɛ jogbaŋŋ yɛ Yehowa Odasefoi asafoi lɛ amli.

27. Mɛɛ Odaseyeli yɔɔ ni tsɔɔ akɛ atsĩ “daa gbi afɔle” ni akɛhaa lɛ naa yɛ Jeŋ Ta II be ni yiwaa eyi mli obɔ lɛ mli?

²⁷ Beni gbii 2,300 lɛ ba naagbee yɛ Jeŋ Ta II ni je shishi yɛ afi 1939 lɛ, atsĩ “daa gbi afɔle” ni akɛhaa yɛ Nyɔŋmɔ hé krɔŋkrɔŋ lɛ mli lɛ naa kpɛŋŋ yɛ yiwaa hewɔ. Yɛ afi 1938 mli lɛ, Buu Mɔɔ Asafo lɛ yɛ nitsumɔhe niji 39 ni ato koni akɛkwɛ Odasefoi lɛ anitsumɔ lɛ nɔ yɛ shikpɔŋ lɛ fɛɛ nɔ, shi beni shɛɔ afi 1943 lɛ, 21 pɛ eshwɛ. Nɔyaai ni aná yɛ Maŋtsɛyeli jajelɔi ayifalɛ lɛ hu mli lɛ faaa yɛ nakai be lɛ mli.

28, 29. (a) Beni Jeŋ Ta II bɛŋkɛɔ enaagbee lɛ, mɛni tee nɔ yɛ Yehowa gbɛjianɔtoo lɛ mli? (b) Mɛni abaanyɛ awie yɛ henyɛlɔ lɛ hetsɛ̃ ni ekɛbɔ mɔdɛŋ srɔtoi koni efee “hé krɔŋkrɔŋ” lɛ amaŋfɔ ni ekpata hiɛ lɛ he?

²⁸ Taakɛ wɔyɔse lɛ, yɛ Jeŋ Ta II naagbee nyɔji lɛ amli lɛ, Yehowa Odasefoi ku sɛɛ amɛma amɛfaishitswaa akɛ amɛbaawó Nyɔŋmɔ nɔyeli lɛ nɔ gojoo kɛtsɔ sɔɔmɔ ni amɛkɛaaha lɛ akɛ teokrase gbɛjianɔtoo lɛ nɔ mi. Yiŋtoo nɛɛ hewɔ ni aku sɛɛ aje amɛnitsumɔ kɛ nɔyeli gbɛjianɔtoo lɛ he gbɛjianɔ shishi yɛ afi 1944 lɛ. Yɛ anɔkwale mli lɛ, sane ni yɔɔ October 15, 1944 The Watchtower lɛ mli ji “Ato Gbɛjianɔ Kɛha Naagbee Nitsumɔ.” Enɛ kɛ saji krokomɛi ni kɔɔ sɔɔmɔ nitsumɔ lɛ he yɛ nakai be lɛ nɔŋŋ mli lɛ tsɔɔ akɛ gbii 2,300 lɛ eba naagbee, ni ákɛ “hé krɔŋkrɔŋ” lɛ eba “shihilɛ ni ja” mli ekoŋŋ.

²⁹ Mɔdɛŋ ni henyɛlɔ lɛ kɛ hetsɛ̃ ni naa wa bɔ koni efee “hé krɔŋkrɔŋ” lɛ amaŋfɔ ni ekpata hiɛ lɛ fee efolo kwraa. Yɛ anɔkwale mli lɛ, “mɛi krɔŋkrɔŋi” ni eshwɛ ni yɔɔ shikpɔŋ nɔ lɛ kɛ amɛnanemɛi “asafo babaoo” lɛ eje mli akɛ kunimyelɔi. (Kpojiemɔ 7:9) Ni hé krɔŋkrɔŋ lɛ, ni yɔɔ eteokrase shihilɛ ni ja mli lɛ, yaa nɔ ekɛ sɔɔmɔ krɔŋkrɔŋ haa Yehowa bianɛ.

30. Mɛni etsɛŋ kwraa ni ebaaba “maŋtsɛ ko ni hiɛ wa” lɛ nɔ?

³⁰ Anglo-Amerika Jeŋ Hewalɛ lɛ hiɛ egbɛhe lɛ mli lolo. Shi ŋwɛibɔfo Gabriel kɛɛ akɛ: “Shi aaakumɔ lɛ, ni jeee kɛ nine tete.” (Daniel 8:25) Etsɛŋ kwraa​—abaakumɔ nɛkɛ “maŋtsɛ ko ni hiɛ wa” lɛ​—jeŋ hewalɛ ni ji kpawo yɛ Biblia gbalɛ mli nɛɛ, ni jeee kɛ adesai aniji, shi kɛtsɔ hewalɛ ni fe adesa nɔ̃ nɔ yɛ Harmagedon. (Daniel 2:44; Kpojiemɔ 16:​14, 16) Kwɛ miishɛɛ ni eji akɛ aaale akɛ, abaabu Yehowa Nyɔŋmɔ, lumɛi a-Lumɔ lɛ jeŋ muu fɛɛ maŋtsɛyeli lɛ bem kwraa yɛ no beaŋ!

[Shishigbɛ niŋmai]

MƐNI OYƆSE?

• Nɔ ni nyiɛ sɛɛ nɛɛ feɔ mɛni he mfoniri

“too agbo” ni yɔɔ “aklontoi enyɔ” lɛ?

“too kpakpo tsɔiatsɛ” kɛ “eklonto kpeteŋkpele” lɛ?

aklontoi ejwɛ ni baje kpo yɛ “aklonto ni da” lɛ najiaŋ lɛ?

aklonto bibioo ni fã kpo kɛjɛ aklontoi ejwɛ lɛ ateŋ ekome mli lɛ?

• Yɛ mɛɛ gbɛ nɔ Anglo-Amerika Jeŋ Hewalɛ lɛ bɔ mɔdɛŋ ni efee “hé krɔŋkrɔŋ” lɛ amaŋfɔ yɛ Jeŋ Ta II lɛ mli, ni ani eye omanye?

[Shikpɔŋ he mfoniri/Mfoniri ni yɔɔ baafa 166]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Media kɛ Persia Maŋtsɛyeli

MAKEDONIA

MIZRAIM

Memphis

ETIOPIA

Yerusalem

Babilon

Ecbatana

Shushan

Persepolis

INDIA

[Shikpɔŋ he mfoniri/Mfoniri ni yɔɔ baafa 169]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Hela Maŋtsɛyeli

MAKEDONIA

MIZRAIM

Babilon

Indus Faa

[Shikpɔŋ he mfoniri ni yɔɔ baafa 172]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Roma Maŋtsɛyeli

BRITANIA

ITALY

Roma

Yerusalem

MIZRAIM

[Baafa muu mfoniri ni yɔɔ baafa 164]

[Mfonirii ni yɔɔ baafa 174]

Gbɔmɛi komɛi ni he gbɛi yɛ Anglo-Amerika Jeŋ Hewalɛ lɛ mli:

1. George Washington, klɛŋklɛŋ U.S. maŋnɔkwɛlɔ (1789-​97)

2. Maŋnyɛ Victoria ni jɛ Britania (1837-​1901)

3. Woodrow Wilson, U.S. maŋnɔkwɛlɔ (1913-​21)

4. David Lloyd George, Britania sɔɔlɔ nukpa (1916-​22)

5. Winston Churchill, Britania sɔɔlɔ nukpa, (1940-45, 1951-​55)

6. Franklin D. Roosevelt, U.S. maŋnɔkwɛlɔ (1933-​45)