Wɔye Nakai Gbohiiashitee “Naagbee Gbi” Lɛ Mli Amrɔ Nɛɛ
1. Mra mli afii nyɔŋmanyɔŋmai komɛi ni eho lɛ, asusu akɛ shwɛɛnii ni ji Kristofoi ni yɔɔ wala mli lɛ ahiɛnyamwoo lɛ baaba yɛ mɛɛ be mli; shi ani nɔni agba ato yɛ 1 Tesalonikabii Awolo 4:16 kɛ 17 lɛ ba mli kɛjɛ nakai be lɛ nɔ kɛbaa?
1 AKƐNI abaatee “gbohii ni yɔɔ Kristo mli” lɛ ashi kɛ mumɔŋ gbɔmɔtsei ni adesai nyɛɛɛ amɛkɛ amɛhiŋmɛii ana yɛ nakai “naagbee gbi” lɛ nɔ hewɔ lɛ, esa akɛ wɔ adesai lɛ wɔtsɔ hemɔkɛyeli nɔ wɔhe wɔye akɛ no miiya nɔ amrɔ nɛɛ, shi jeee nɔni wɔkɛ wɔhiŋmɛii naa lɛ nɔ wɔɔɔtsɔ wɔhe wɔye. Wɔbaakai akɛ afii nyɔŋmanyɔŋmai komɛi ni eho nɛ lɛ, mɛi saŋŋ susu akɛ abaawo Kristofoi asafo lɛ mlibii fɛɛ ni yɔɔ wala mli lɛ ahiɛ nyam beni Jeŋmaji Abe lɛ ba naagbee yɛ aaafee October 1, 1914 mli lɛ. (Luka 21:24) Shi nɔko ni tamɔ nɔni awie he yɛ 1 Tesalonikabii Awolo 4:16 kɛ 17 lɛ baaa yɛ nakai be lɛ mli. Ta moŋ gbá yɛ ŋwɛi, kɛkɛ ni awo Satan kɛ edaimonioi ni aye amɛnɔ kunim lɛ afoi oya kɛba shikpɔŋ nɛɛ nɔ gbɛ. (Kpoj. 12:7-13) Sane kome ko ji akɛ Kristofoi ni afɔ amɛ yɛ mumɔŋ ni yɔɔ wala mli yɛ shikpɔŋ nɛɛ nɔ yɛ afi 1914 mli lɛ ateaŋ mɛi saŋŋ yɛ heloo lɛ mli yɛ wɔmasɛi ŋmɛnɛ. Etamɔ nɔni belɛ tɔmɔ ko eba bɔni abu nakai “naagbee gbi,” nɔ̃ nɔ ni abaawo asafo ni afɔ amɛ yɛ mumɔŋ lɛ hiɛ nyam yɛ lɛ gbɛfaŋ.
2, 3. Hiɛnyamwoo lɛ baaba yɛ mɛɛ be mli ni nohewɔ lɛ mɛɛ sanebimɔ teɔ shi yɛ 1 Korintobii Awolo 15:50-57 mlibaa he?
2 Shi Yesu Kristo ni awo ehiɛ nyam lɛ “ba ni eba” aloo parousia ni akɛ hiŋmɛi enaaa lɛ je shishi kɛ̃ yɛ Jeŋmaji Abe lɛ naagbee yɛ afi 1914 mli. Nohewɔ lɛ kɛjɛ no nɔ kɛbaa lɛ esa akɛ nɔni agba ato yɛ 1 Tesalonikabii Awolo 4:16 kɛ 17 lɛ aba mli yɛ Kristofoi ni afɔ amɛ yɛ mumɔŋ lɛ agbɛfaŋ, koni no kɛ “naagbee gbi” lɛ akpa gbee.—Yoh. 6:54.
3 Belɛ mɛɛbe esa akɛ 1 Korintobii Awolo 15:50-57 mlibaa aje shishi mɔ? Jɛi kaneɔ akɛ: “Heloo kɛ lá nine shɛŋ Nyɔŋmɔ maŋtsɛyeli lɛ nɔ, ni asaŋ fitemɔ hu nine shɛŋ nɔni fiteee lɛ nɔ. Naa, teemɔsane miŋɔkɛɔ nyɛ nɛɛ: Jeee wɔ fɛɛ wɔbaawɔ [yɛ gbele mli, tamɔ bɔni adesai gbɔmɔtso ni fiteɔ lɛ gboɔ] lɛ, shi abaatsake wɔ fɛɛ, trukaa, hiŋmɛitswaa mli, beni aaakpã naagbee tɛtrɛmantrɛ lɛ; ejaakɛ abaakpã tɛtrɛmantrɛ, ni aaatee gbohii ashi ni amɛfiteŋ dɔŋŋ, ni wɔ [mɛi ni wɔ ji Kristofoi tamɔ Paulo] lɛ, abaatsake wɔ. Ejaakɛ ja nɛkɛ fitemɔnɔ nɛɛ wo nɔni fiteee lɛ, ni nɛkɛ gbelenɔ nɛɛ wo nɔni gbooo lɛ. Shi beni nɛkɛ fitemɔnɔ nɛɛ ewo nɔni fiteee lɛ, ni nɛkɛ gbelenɔ nɛɛ ewo nɔni gbooo lɛ, no wiemɔ ni aŋma lɛ aaaba mli akɛ: ‘Ami gbele yɛ kunim mli. Bo gbele, nɛgbɛ ogai lɛ yɔɔ? Bo gbohiiaje, nɛgbɛ okunim lɛ yɔɔ?’ Shi gbele gãi ji esha; ni esha hewalɛ ji [Mose] Mla lɛ. Shi shidaa aha Nyɔŋmɔ, mɔni tsɔ wɔ-Nuntsɔ Yesu Kristo nɔ ni eha wɔye kunim lɛ.”
4. Mɛɛbe Yesu gbo: ni Daniel 9:24-27 etsɔɔ enɛ momo yɛ mɛɛ gbɛ nɔ?
4 Beni afee ni wɔnyɛ wɔbu be he akɔntaa ni damɔ Ŋmalɛi lɛ anɔ lɛ, wɔbaanyɛ wɔkɛ nibii ni ba ni je amɛhe aloo eko kɛ eko nyiɛ yɛ bɔni amɛsu yɔɔ eha hewɔ lɛ atotoo amɛhe. Nohewɔ lɛ wɔbiɔ akɛ, Mɛɛbe ateé Yesu Kristo diɛŋtsɛ shi ni ebatsɔ ‘Kristo ni ji klɛŋklɛŋyibii’ lɛ? Enɛ ba Hɔgbaa, Nisan 16, yɛ afi 33 Ŋ.B. mli. Yɛ gbi ni ji enyɔ ni tsa no hiɛ yɛ Hehoo gbi lɛ nɔ, Nisan 14 lɛ, asɛŋlɛ yɛ tso nɔ kɛyashi egbo. Akadi nakai gbi ni Kristo shã afɔle yɛ nɔ lɛ yɛ saji sɔrɔtoi ni baaba ni Yehowa Nyɔŋmɔ to naa yɛ Daniel 9:24-27 lɛ amli. Nakai gbi Iɛ kadi “otsii nyɔŋmaikpawo” ni ji otsi afii, shi jeee gbii lɛ, ateŋ naagbeenɔ lɛ mlijaa. Daniel gbalɛ lɛ gba eto akɛ yɛ nɛkɛ naagbee otsi loo otsi-afii ni ji 70 nɔ lɛ mli Iɛ, “aaafo mɔni afɔle mu [ni ji Mesia] lɛ ashɛ afɔ̃, ni enaŋ mɔko.” Shi mɛɛbe mli yɛ nakai naagbee ‘otsi-afi’ ni je shishi yɛ afi 29 Ŋ.B. gbo-be mli lɛ mli krɛdɛɛ? Daniel 9:27 haa hetoo akɛ: “Otsi lɛ teŋ lɛ eeeha afɔle kɛ niyenii afɔle sɛɛ afo.” Nohewɔ lɛ yɛ Yesu gbele sɛɛ lɛ, kooloi ni akɛshãa afɔle lɛ he ehiaaa dɔŋŋ.
5. Te afeɔ tɛɛŋ anaa be mli ‘otsi-afi’ ni ji 70 lɛ jɛ shishi; ni mɛni kadi no shishijee lɛ? Mɛɛ be krɛdɛɛ ko shishi no je kɛha Yerusalem kɛ Yudafoi agbɛjianɔtoo lɛ?
5 Akɛni Yesu kɛ adesa wala ni eye emuu ni eyɔɔ lɛ shã afɔle yɛ “otsi lɛ teŋ” aloo yɛ Nisan 14 gbi lɛ nɔ, yɛ afi 33 Ŋ.B. mli hewɔ lɛ, nakai “otsi” lɛ je shishi nyɔɔŋtsere-afii etɛ kɛ fã mra mli yɛ Tishri 15, yɛ afi 29 Ŋ.B. mli. Belɛ mɛni ba ni kadi nakai ‘otsi-afi’ ni ji 70 nɔ lɛ shishijee? Yesu tsɔ Mesia, ni shishi ji “Mɔmɔ, Afɔlɛ Mu.” Nakai be lɛ mli Yohane Baptisilɔ lɛ baptisi Yesu. No sɛɛ nɔŋŋ lɛ, akɛ mumɔ krɔŋkrɔŋ “fɔ” Yesu “mu” ni ebatsɔ Mesia kɛ Maŋtsɛ yɛ Yehowa, webii lɛ anɔ. No mli lɛ Yesu eye afii 30. (Luka 3:21-23; 4:1-21) Enɛ kadi “naagbee be” lɛ shishijee kɛha Yerusalem kɛ Yudafoi afɔleshaa gbɛjianɔtoo lɛ. Yɛ be ni shɛɛɛ afii 41 yɛ enɛ sɛɛ mli, aloo yɛ afi 70 Ŋ.B. latsaa-be mli lɛ, akpata Yerusalem kɛ esɔlemɔtsu lɛ hiɛ kwraa. Taakɛ Daniel 9:26 gba eto lɛ: “Lumɔ [ni ji Tatsɛnukpa Tito] ni baaba [yɛ afi 70 Ŋ.B. mli] lɛ maŋbii lɛ aaafite maŋ lɛ hekrɔŋkrɔŋ lɛ, ni enaagbee lɛ [aaaba tamɔ nɔni Roma tabilɔi lɛ babua enɔ babaoo ni amɛkpata ehiɛ tamɔ] . . . nu afua, ni ta aaakã he kɛyashi naagbee.”
6, 7. Mɛni nyiɛ Jeŋmaji Abe ni ba naagbee yɛ afi 1914 mli lɛ sɛɛ kpaakpa kɛba; ni mɛɛ adafi ni atswa yɛ no be lɛ mli yɛ ŋwɛi lɛ ba mli anɔkwale yɛ wɔshikpɔŋ nɛɛ kɛ egbohii lɛ ahe?
6 Yɛ nakai gbɛ nɔ nɔŋŋ lɛ, beni Jeŋmaji Abe lɛ ba naagbee yɛ afi 1914 gbo-be mli lɛ, nibii agbɛjianɔtoo nɛɛ “naagbee be” lɛ je shishi. (Dan. 12:4) Beni nakai Jeŋmaji Abe lɛ tã nɛkɛ nɔŋŋ lɛ, awó Yesu ni afɔle mu ni yɔɔ ŋwɛi lɛ Maŋtsɛ kɛ eblematsɛ David ni ye nɔ yɛ Yerusalem lɛ Gboshiniyelɔ ni hiɔ shi daa. No be lɛ mli adafi ni atswa kɛnyiɛ tɛtrɛmantrɛ ni ji kpawo lɛ kpãmɔ sɛɛ lɛ ba mli anɔkwale. Wɔkaneɔ yɛ enɛ he yɛ Kpojiemɔ 11:15-18 akɛ:
7 “Ni bɔfo ni ji kpawo lɛ kpã, ni anu gbeei wuji yɛ ŋwɛi miikɛɛ akɛ: Je nɛŋ maŋtsɛyeli lɛ etsɔ wɔ-Nuntsɔ [ni ji Nuntsɔ Maŋtsɛ Yehowa] lɛ kɛ e-Kristo (mɔni efɔlɛ mu) lɛ nɔ̃, ni [Nuntsɔ maŋtsɛ Yehowa lɛ,] eeeye maŋtsɛ kɛaatee naanɔi anaanɔ. . . . Wɔmiidao shi, bo Nuntsɔ Nyɔŋmɔ Ofe lɛ, bo mɔni oyɔɔ ni oyɛ ni obaaba lɛ, akɛ oŋɔ ohewalɛ kpeteŋkpele lɛ ni oye maŋtsɛ, ni jeŋmaji lɛ amli efu, ni omlifu eshɛ kɛ be ni abaakojo gbohii lɛ ni abaawo otsuji ni ji gbalɔi lɛ kɛ krɔŋkrɔŋbii lɛ kɛ mɛi ni sheɔ ogbɛi lɛ gbeyei, mɛi bibii kɛ mɛi wuji lɛ anyɔmɔ, ni abaafite mɛi ni fiteɔ shikpɔŋ lɛ.”
8. (a) No be lɛ mli lɛ, jeŋmaji lɛ amli wo namɛi la, ni mɛni hewɔ amɛfee nakai; ni te amɛfee no amɛha tɛɛŋ? (b) Mɛɛ gbɛ nɔ enɛ kɛ nɔni ba Yesu ni afɔlɛ mu lɛ nɔ yɛ “otsi lɛ teŋ” lɛ nyiɛ yɛ?
8 ‘Jeŋmaji lɛ amli fu’ yɛ Jeŋ Ta I ni ba kɛjɛ afi 1914 kɛyashi 1918 Ŋ.B. lɛ mli, ni amɛfɔse amɛmlifu lɛ amɛshwie Nuntsɔ Maŋtsɛ Yehowa webii ni, ejɔɔ amɛhe nɔ amɛhalɛ lɛ anɔ. Mɛni hewɔ; Ejaakɛ mɛnɛɛmɛi miishiɛ akɛ Jeŋmaji Abe lɛ ba naagbee yɛ afi 1914 mli ni akɛ Kristo maŋtsɛyeli lɛ ma shi yɛ ŋwɛi. Nɛkɛ jeŋmaji amlifu nɛɛ yashɛ eshɛɛhe yɛ afi 1918 nyɔŋmɔnɛmɔ-be mli, titri yɛ United States Amɛrika. Enɛ ba afii etɛ kɛ fã yɛ Jeŋmaji Abe lɛ naagbee kɛ Yesu ni afɔlɛ mu lɛ nɔwomɔ akɛ Maŋtsɛ yɛ ŋwɛi lɛ sɛɛ. Nɔni ba mɛi ni jajeɔ Maŋtsɛyeli lɛ yɛ shikpɔŋ nɔ lɛ anɔ yɛ afi 1918 mli lɛ tamɔ nɔni ba Yesu nɔ yɛ Yerusalem yɛ “otsi lɛ teŋ” lɛ nɔŋŋ. Yɛ egbɛfaŋ lɛ, ehe bahia akɛ ateelɛ shi. Yɛ gbɛ ko ni tamɔ nakai nɔŋŋ nɔ lɛ atswa nɛkɛ emaŋtsɛyeli lɛ he shiɛlɔi nɛɛ nɔ̃ ko ni amɛyiwalɔi lɛ susu akɛ no ji “gbelenɔ,” ni nohewɔ lɛ hiɛtsiɛmɔ kɛ shitee ko he bahia Maŋtsɛyeli lɛ he shiɛmɔ lɛ.
9. (a) Mɛni hewɔ Maŋtsɛyeli lɛ he shiɛlɔi ni awaa amɛ yi lɛ akanyamɔ aloo amɛhiɛtsiɛmɔ yɛ okaditoo gbɛ nɔ eha nitsumɔ hee lɛ nyɛŋ afee nako ni tamɔ Yesu shitee ni ba Nisan 16, yɛ afi 33 Ŋ.B. mli lɛ nɔŋŋ Iɛ? (b) ‘Sha ni aaasha amɛ kɛya koni amɛkɛ Nuntsɔ lɛ ayakpe’ lɛ nyɛŋ atsɔ namɛi amumɔŋ shitee hiɛ?
9 Yesu shitee ni ba Nisan 16, yɛ afi 33 Ŋ.B. mli lɛ ji mumɔŋ nɔ̃ kɛmiibote ŋwɛi shihilɛhe lɛ, shi ateelɛ shi kɛjɛ shikpɔŋnɔ fuuhe ko mli. Yɛ Maŋtsɛyeli shiɛlɔi ni yɔɔ heloo lɛ mli lolo lɛ agbɛfaŋ lɛ, atsiɛ amɛhiɛ kɛha shikpɔŋnɔ nitsumɔ ko, kɛha “maŋtsɛyeli lɛ he sanekpakpa nɛɛ” shiɛmɔ hee ko yɛ shikpɔŋ nɛɛ fɛɛ nɔ “ni akɛye jeŋmaji lɛ fɛɛ odase.” (Mat. 24:14) Nakai Kristofoi ni afɔ amɛ yɛ mumɔŋ lɛ ahiɛnyamwoo yɛ ŋwɛi kɛ agbɛnɛ ‘sha ni aaasha amɛ kɛbote atatui amli koni amɛkɛ Nuntsɔ lɛ ayakpe yɛ kɔɔyɔŋ’ lɛ shɛko. Atoko akɛ enɛ aba amɛnɔ dani atee Kristofoi ni ‘ewɔ yɛ gbele mli yɛ Kristo mli’ lɛ ashi, dani afi 1918 ashɛ. Moŋ lɛ, taakɛ 1 Tesalonikabii Awolo 4:14-17 tsɔɔ lɛ, “gbohii ni yɔɔ Kristo mli lɛ tsutsu baate shi.” Esa jogbaŋŋ akɛ amɛshitee lɛ baatsɔ Maŋtsɛyeli shiɛlɔi lɛ ahiɛtsiɛmɔ aloo amɛkanyamɔ kɛha nitsumɔ lolo yɛ heloo lɛ mli yɛ shikpɔŋ nɛɛ nɔ yɛ “naagbee be” nɛɛ mli, lɛ hiɛ. Amɛhiɛtsiɛmɔ nɛɛ ba yɛ afi 1919 nyɔŋmɔnɛmɔ-be mli.
10. Namɛi ashitee lɛ baatamɔ Yesu shitee ni ba Nisan 16, yɛ afi 33 Ŋ.B. mli lɛ nɔŋŋ; ni mɛɛbe no baaba?
10 “Gbohii ni yɔɔ Kristo mli” lɛ ashitee yɛ mumɔŋ yɛ afi 1918 nyɔŋmɔnɛmɔ-be mli, beni awó Kristo maŋtsɛ yɛ Jeŋmaji Abe lɛ naagbee yɛ afi 1914 gbo-be mli lɛ sɛɛ afii etɛ kɛ fã lɛ baatamɔ Yesu diɛŋtsɛ shitee yɛ Nisan 16 gbi lɛ nɔ yɛ afi 33 Ŋ.B. mli yɛ “otsi lɛ teŋ” lɛ nɔŋŋ. (Dan. 9:27) Nohewɔ lɛ ‘amɛte shi tsutsu’ lɛɛlɛŋ. Ni no ni amɛfee lɛ tsɔ mɛi ni yɔɔ wala mli yɛ Kristo “ba ni eba” aloo parousia lɛ mli lɛ ashitee kɛ Maŋtsɛyeli shiɛmɔ lɛ gbele hiɛ.
11. Mɛɛ be ko ni tamɔ enɛ nɔŋŋ he bajeɔ sane lɛ mli yɛ Nyɔŋmɔ gbalɛnaa odasefoi ni awie amɛhe yɛ Kpojiemɔ yitso 11 mli lɛ agbɛfaŋ; ni ani kwɔ ni amɛ aaakwɔ kɛya ŋwɛi lɛ feɔ 1 Tesalonikabii Awolo 4:17 mlibaa he mfoniri?
11 Be ko ni tamɔ nakai nɔŋŋ he bajeɔ sane lɛ mli yɛ Nyɔŋmɔ gbalɛnaa odasefoi ni afee amɛhe mfoniri yɛ Kpojiemɔ yitso 11 lɛ mli lɛ agbɛfaŋ. Taakɛ Kpojiemɔ 11:3-7 tsɔɔ lɛ, agbe amɛ beni amɛ́tsu gbalɛ nitsumɔ gbii 1,260 aloo afii 3 sɛɛ. Shi ateé amɛ shi: “Ni gbii etɛ kɛ fã lɛ sɛɛ lɛ wala mumɔ jɛ Nyɔŋmɔ ŋɔɔ ba amɛmli, ni amɛte shi amɛdamɔ amɛnaji anɔ, ni gbeyei kpeteŋkpele mɔmɔ mɛi ni na amɛ lɛ. Ni amɛnu gbee kpeteŋkpele jɛ ŋwɛi miikɛɛ amɛ akɛ: Nyɛkwɔa kɛbaa biɛ nɛɛ! Ni amɛkwɔ kɛtee ŋwɛi yɛ atatu lɛ mli, ni amɛhenyɛlɔi lɛ na amɛ.” (Kpoj. 11:11, 12) Enɛ fee mfoniri yɛ gbalɛnaa ni etsɔɔ bɔni aaafee atsĩɛ Kristofoi ni afɔ amɛ yɛ mumɔŋ lɛ ahiɛ kɛha Maŋtsɛyeli sɔɔmɔ yɛ afi 1919 nyɔŋmɔnɛmɔ-be mli aha lɛ. Kwɔ ni amɛkwɔ kɛbahe gbɛi yɛ jeŋ fɛɛ lɛ jeee 1 Tesalonikabii Awolo 4:17 mlibaa. Yɛ enɛ gbɛfaŋ lɛ, wɔkaiɔ akɛ atsĩɛɛɛ Yesu Kristo kaselɔi 120 lɛ ahiɛ ahaaa maŋteŋ sɔɔmɔ yɛ Yerusalem kɛyashi gbii 51 ho yɛ Yesu Kristo ni ji amɛ-Nuntsɔ, lɛ sɛŋmɔ kɛ efuu lɛ sɛɛ dã.
12. Mɛɛ gbɛ nɔ agba nɛkɛ mumɔŋ shwɛɛnii nɛɛ akanyamɔ lɛ he sane ato yɛ ninaa ni yɔɔ Ezekiei 37:1-14 lɛ mli yɛ?
12 Agba nɛkɛ shwɛɛnii ni yɔɔ wala mli lolo nɛɛ ahiɛtsiɛmɔ lɛ ato yɛ Ezekiel 37:1-14 hu. Jɛmɛ lɛ, Yehowa ha gbalɔ Ezekiel na ninaa ko ni tsɔɔ jɔɔ yoo ko ni Israelbii awui ni egbi yɔɔ mli. Kɛkɛ ni atsara wui nɛɛ ekoŋŋ ni amɛtsɔmɔ Israelbii hiɛkaalɔi ni efee klalo akɛ amɛ aaashi nomŋɔɔ yɛ woŋjalɔi maŋ Babilon kɛya shia. Beni Yehowa tsɔɔ bɔni gbalɛ nɛɛ aaaba mli eha lɛ, ekɛɛ: “Naa, magbele nyɛgbohiiabui lɛ anaa, ni maha nyɛjɛ nyɛgbohiiabui lɛ amli nyɛba, mimaŋ [ni yɔɔ nomŋɔɔ mli yɛ Babilon], ni maŋɔ nyɛ kɛaatee Israel shikpɔŋ lɛ nɔ; ni nyɛ aaana nyɛle akɛ miji Yehowa lɛ, beni migbele nyɛgbohiiabui lɛ anaa, ni miha nyɛje nyɛgbohiiabui lɛ amli nyɛba lɛ, mimaŋ.”—Ezek. 37:12, 13.
13. Te jɔɔ ni mli eyi kɛ wui ni he ekwakwao lɛ he ninaa lɛ ba mli eha tɛɛŋ yɛ ŋmɛnɛbeaŋ; ni mɛɛ gbɛ nɔ enɛ tamɔ nɔni ba Yesu kaselɔi lɛ anɔ yɛ nɔni ba yɛ “otsi lɛ teŋ” lɛ sɛɛ lɛ yɛ?
13 yɛ nakai gbalɛ lɛ mlibaa yɛ ŋmɛnɛbeaŋ lɛ mli lɛ, atsĩɛ mumɔŋ Israelbii lɛ ashwɛɛnii lɛ ahiɛ yɛ afi 1919 nyɔŋmɔnɛmɔ-be mli, ni afɛne amɛ kɛjɛ Babilon Kpeteŋkpele ni ji jeŋ apasa jamɔ maŋtsɛyeli lɛ mli, kɛ agbɛnɛ kɛjɛ amɛhe ni amɛkɛ aaawo emaŋkwramɔŋ, saneyeli kɛ tawuu sapatei ni tsu Babilon Kpeteŋkpele lɛ suɔmɔnaanii amɛhalɛ yɛ Jeŋ Ta 1 mli lɛ ashishi hu. Yesu diɛŋtsɛ kaselɔi lɛ ahiɛtsiɛmɔ kɛ amɛfɛnemɔ kɛmiijɛ Yudafoi anibii agbɛjianɔtoo ni yeɔ mɔ amim lɛ mli lɛ baaa aahu kɛyashi Yesu gbele, efuu, kɛ eshitee kɛmiijɛ gbohii ateŋ yɛ gbi ni ji etɛ lɛ nɔ, Nisan 16, yɛ afi 33 Ŋ.B. mli tɔ̃ɔ, ni ebaafee akɛ enɛ kɔɔ bɔni ato nibii anaa aha yɛ ŋmɛnɛbeaŋ lɛ he eko, yɛ gbalɛ gbɛfaŋ. Enɛ ba yɛ nakai “otsi,” nɔ̃ mli ni akɛ Yesu shã afɔle akɛ kpɔmɔnɔ kɛha adesai fɛɛ, lɛ teŋ lɛ sɛɛ nɔŋŋ.
14. Mɛɛ kuu ni awie he yɛ 1 Tesalonikabii Awolo 4:15-17 lɛ mli ŋmɛnɛbeaŋ odasefoi ni akanya amɛ ni awo amɛ hewalɛ nɛɛ yɔɔ; ni nɔni Yesu tsɛlɛ “naagbee gbi” lɛ ji ‘nɔni ajɔɔ’ kɛha amɛ yɛ mɛɛ gbɛ nɔ?
14 Yɛ ŋmɛnɛbeaŋ lɛ, mumɔŋ Israelbii ashwɛɛnii ni atsĩɛ amɛhiɛ ni wó odaseyeli nitsumɔ lɛ nɔ ekoŋŋ yɛ afi 1919 nyɔŋmɔnɛmɔ-be mli Iɛ ji mɛi ni Paulo wie yɛ amɛhe akɛ “wɔ mɛi ni wɔhiɛ kãmɔ ni baashwɛ yɛ Nuntsɔ lɛ baabe lɛ mli” lɛ. (1 Tes. 4:15) Amɛkpaa gbɛ akɛ amɛ aaagboi “yɛ Kristo mli” beni amɛgbe naagbee odase ni aaaye yɛ jeŋ fɛɛ yɛ Maŋtsɛyeli lɛ he lɛ naa yɛ Yesu baabe lɛ mli lɛ. Amɛgboiɔ yɛ “naagbee gbi,” nɔ̃ nɔ ni, taakɛ Yesu kɛɛ lɛ, ebaatee ekaselɔi lɛ ateaŋ mɛi ni ena hegbɛ akɛ amɛye eheloo ni amɛnu elá lɛ ashi kɛjɛ gbohii ateŋ, lɛ nɔ. Enɛ tsɔɔ ‘sha ni aaasha amɛ kɛya’ koni amɛkɛ amɛ-Nuntsɔ lɛ ayakpe “yɛ kɔɔyɔɔ mli” lɛ. Adesai ni amɛ aaashi yɛ shikpɔŋ nɛɛ nɔ lɛ ahiŋmɛii enaaa nɛkɛ hiŋmɛitswaa mli shitee ni amɛnaa kɛboteɔ ŋwɛi shihilɛ mli lɛ, tamɔ nɔni akɛ “atatui” eha he. “Ajɔɔ” amɛ lɛɛlɛŋ, ejaakɛ amɛgboiɔ “yɛ Nuntsɔ lɛ mli . . . kɛjɛ ŋmɛnɛ nɔ kɛyaa nɛɛ,” yɛ “Nuntsɔ lɛ baabe lɛ mli,” ni nohewɔ lɛ ehe ehiaaa ni amɛyawɔ yɛ gbele mli kɛmɛ ehaa ni ji enyɔ lɛ.—Kpoj. 14:13; Yoh. 6:53, 54; 1 Kor. 15:52, 53.
15. Mɛɛ nanemɛi nitsulɔi komɛi ni bafata he nyɛsɛɛ nɛɛ baahi shi be mli ni shwɛɛnii ni yɔɔ wala mli lɛ aaashi shikpɔŋ nɛɛ nɔ yɛ “naagbee gbi” lɛ naagbee lɛ; ni mɛɛ shɛɛyeli nɛkɛ enɛ aaaji?
15 Amɛshĩɔ amɛhefatalɔi Kristofoi ni ji “asafo babaoo” ko yɛ amɛsɛɛ yɛ shikpɔŋ nɛɛ nɔ. Yɛ nɛkɛ naagbee be nɛɛ mli kɛ “Nuntsɔ lɛ baabe” ni akɛ hiŋmɛi enaaa lɛ mli fɛɛ lɛ, amɛkɛ mumɔŋ Israelbii shwɛɛnii lɛ egbo deŋme yɛ naagbee odase ni ayeɔ jeŋmaji fɛɛ yɛ Maŋtsɛyeli lɛ he lɛ mli. Nɛkɛ “asafo babaoo” nɛɛ miikpa gbɛ akɛ amɛ aaato “amanehulu kpeteŋkpele” ni baakpata je nɛɛ nibii agbɛjianɔtoo lɛ hiɛ lɛ. (Kpoj. 7:9, 14) Nohewɔ lɛ amɛ aaahi shi be mli ni miishɛɛ be lɛ aaashɛ ni ‘aaasha’ mumɔŋ lsraelbii lɛ ashwɛɛnii lɛ ateŋ naagbeebii lɛ ‘kɛya atatui lɛ amli koni amɛkɛ Nuntsɔ lɛ ayakpe yɛ kɔɔyɔɔ mli’ lɛ. (1 Tes. 4:17) Kwɛ bɔni eeefee nɔko ni suɔmɔ yɔɔ mli akɛ “asafo babaoo” ni yɔɔ wala mli yɛ nakai gbohiiashitee naagbee gbi lɛ nɔ lɛ kɛ shwɛɛnii ni yɔɔ wala mli lɛ aaaye shɛɛ be mli ni amɛ aaagbe amɛshikpɔŋnɔ sɔɔmɔ lɛ naa yɛ nakai “naagbee gbi” lɛ naagbee kwraa lɛ! (Yoh. 6:53, 54) Enɛ ebafeŋ shɛɛyeli ko ni yɔɔ mɛlɛɔ, shi abaanyɛ ana suɔmɔ krɔŋŋ ko ni jɛ tsuiŋ lɛ kpojiemɔ yɛ mɛi ni yaa kɛ mɛi ni ashĩɔ yɛ sɛɛ yɛ paradeiso shikpɔŋ ko nɔ lɛ ateŋ. “Asafo babaoo” lɛ enaŋ amɛ dɔŋŋ.
16. “Asafo baboo” lɛ naŋ namɛi amɛkɛbɔ naanyo dɔŋŋ yɛ heloo mli; shi namɛi amɛkɛ miishɛɛ aaahere atuu kɛba paradeiso shikpɔŋ lɛ nɔ?
16 Eyɛ mli akɛ “asafo babaoo” lɛ enaŋ shwɛɛnii ni awo amɛhiɛ nyam lɛ yɛ gbɔmɔtsoŋ dɔŋŋ moŋ, shi mɛi heei babaoo ni baaba amɛbahi paradeiso shikpɔŋ lɛ nɔ lɛ baashɛje “asafo babaoo” lɛ mii. Namɛi ni, ni nɛgbɛ amɛbaajɛ kɛba? Mɛnɛɛmɛi ji adesai krokomɛi ni akpɔ̃ amɛ ni abaatee amɛ shi kɛjɛ “naagbee henyɛlɔ” ni ji gbele ni aná kɛjɛ Adam dɛŋ lɛ, shikpɔŋ lɛ nɔ kɛba lɛ. (1 Kor. 15:26) Mɛɛ miishɛɛ po “asafo babaoo” lɛ aaana nɛkɛ akɛ amɛkɛ Hiob, hɛɛ, Abraham, Isak, Yakob, Yohane Baptisilɔ lɛ, hɛɛ, kɛ Betlehem gbekɛbii bibii ni amɛhenyɛlɔ Herode Kpele lɛ wo amɛ gbɛ kɛtee gbohiiaje lɛ fɛɛ aaakpe nɛkɛ lɛ! Mɛɛ miishɛɛ po eeeji akɛ akɛ nanemɛi ni ale ni amɛfata Tookwɛlɔ Kpakpa lɛ “tooi krokomɛi” lɛ ahe shi amɛnyɛɛɛ amɛfo “amanehulu kpeteŋkpele” lɛ ni amɛbote enɔyeli afii 1,000 lɛ mli tɛ̃ɛ, lɛ hu aaakpe! (Kpoj. 20:4, 6; Yoh. 10:16) Ani shwɛɛnii ni afɔ amɛ mu lɛ ateaŋ mɛi ni baafo “amanehulu kpeteŋkpele” lɛ baahi shikpɔŋ nɛɛ nɔ yɛ Gbɛjianɔtoo Hee lɛ mli koni amɛna shikpɔŋ nɛɛ nɔ gbohii lɛ ashitee yɛ amɛ “naagbee gbi” lɛ nɔ? (Yoh. 11:24) Ŋmalɛi lɛ emaaa enɛ nɔ mi.
17. (a) Yɛ shikpɔŋnɔ gbohii lɛ anaabuamɔ gbɛfaŋ lɛ, mɛi ni aaatee amɛ shi yɛ no be mli lɛ aaatamɔ mɛni, kɛ́ akɛ amɛ to Kristo he? (b) Eyɛ mli akɛ ehe ebahiaŋ ni atee “asafo babaoo” lɛ ashi kɛjɛ gbohiiaje moŋ, shi amɛ hu amɛ aaatamɔ mɛi ni atee amɛ shi nɔŋŋ yɛ mɛɛ jwɛŋmɔ naa; ni mɛɛ shihilɛ ko ni jɔɔmɔ yɔɔ mli aaahi shi yɛ Kristo afii akpe nɔyeli lɛ naagbee?
17 Abaabua nɛkɛ adesai ni atee amɛ shi nɛɛ anaa akɛ mɛi ni Yesu Kristo ni ateelɛ shi lɛ tsɔ “klɛŋklɛŋmɔ” yɛ amɛteŋ lɛ asɛɛkpeeyibii. (1 Kor. 15:20, 22, 23) Eyɛ mli akɛ shitee kɛmiijɛ gbohiiaje ko he ehiaŋ “asafo babaoo” ni yi aaana wala lɛ moŋ, shi amɛ hu amɛ aaatamɔ gbohii ni aaatee amɛ shi lɛ nɔŋŋ, ejaakɛ Yesu Kristo kpatamɔ afɔle lɛ mli sɛɛnamɔi ahe baahia amɛ. Esa akɛ atsumɔ hewalɛ ni gbele ni aná kɛtsɔ fɔmɔ nɔ lɛ naà yɛ mɛi anɔ lɛ fɛɛ. Ebaafee jɔɔmɔ lɛɛlɛŋ eha adesai fɛɛ ni akpɔ̃ amɛ ni feɔ toiboo ni “asafo babaoo” ni fo amanehulu lɛ hu fata he lɛ lɛɛlɛŋ, be mli ni yɛ Kristo nɔyeli afii 1,000 lɛ naagbee gbɛ lɛ, ‘aaafo gbele sɛɛ akɛ naagbee henyɛlɔ’ lɛ. Kɛkɛ lɛ, yɛ gbɛ ni sa jogbaŋŋ nɔ lɛ, Yehowa Nyɔŋmɔ aaafee “nibii fɛɛ ayitso.”—1 Kor. 15:26, 28; Kpoj. 1:18; 20:11-14.a
[Shishigbɛ niŋmai]
a Ajie kɛjɛ June 15, 1979 Blɔfo Buu-Mɔɔ lɛ mli.
[Mfoniri ni yɔɔ baafa 28]
Mɛi ni aaatee amɛ shi lɛ akpeemɔ yɛ Paradeiso