Daniel

9 Ahasweros binuu Dario+ ni jɛ Mediabii lɛ aseshibii lɛ ateŋ, ni awó lɛ maŋtsɛ yɛ Kaldeabii lɛ amaŋtsɛyeli lɛ nɔ lɛ nɔyeli afi ni ji klɛŋklɛŋ nɔ lɛ mli lɛ,+ 2 lɛɛlɛŋ, yɛ enɔyeli afi ni ji klɛŋklɛŋ nɔ lɛ mli lɛ, mi, Daniel, mikwɛ woji lɛ amli ni mikɔ sɛɛ akɛ, afii abɔ ni atsĩ tã yɛ Yehowa wiemɔ ni ekɛhã gbalɔ Yeremia lɛ mli koni akɛgbe Yerusalem amaŋfɔfeemɔ lɛ naa+ lɛ ji afii 70.+ 3 No hewɔ lɛ, mitsɔ mihiɛ mihã Yehowa, anɔkwa Nyɔŋmɔ lɛ, ni mikpa lɛ fai yɛ sɔlemɔ mli kɛ ŋmaahilɛ+ kɛ kpekpe kɛ lamulu. 4 Misɔle mihã Yehowa, mi-Nyɔŋmɔ lɛ ni mijaje wɔhe eshai lɛ ni mikɛɛ:

“Ao Yehowa, anɔkwa Nyɔŋmɔ, mɔ kpele ni he yɔɔ gbeyei, ni yeɔ ekpaŋmɔ nɔ, ni jieɔ suɔmɔ ni tsakeee kpo+ etsɔɔ mɛi ni sumɔɔ lɛ, ni amɛyeɔ ekitãi lɛ anɔ lɛ,+ 5 wɔfee esha, ni wɔtɔ̃, ni wɔfee efɔŋ, ni wɔtse atua;+ ni wɔgba afã kɛje okitãi lɛ kɛ oyiŋkpɛi* lɛ ahe. 6 Wɔbooo otsuji gbalɔi lɛ,+ ni wie yɛ ogbɛ́i lɛ mli amɛtsɔɔ wɔmaŋtsɛmɛi lɛ, kɛ wɔlumɛi lɛ, kɛ wɔtsɛmɛi lɛ, kɛ shikpɔŋ lɛ nɔ bii lɛ fɛɛ toi. 7 Ao Yehowa, bo onɔ ji jalɛ lɛ, shi wɔ lɛ, wɔnɔ lɛ ji hiɛgbele lɛ tamɔ bɔ ni eyɔɔ ŋmɛnɛ kɛhã Yuda hii lɛ, kɛ Yerusalembii lɛ, kɛ Israel fɛɛ, mɛi ni bɛŋkɛ kɛ mɛi ni yɔɔ shɔŋŋ, yɛ shikpɔji fɛɛ ni oshwie amɛ kɛtee nɔ yɛ anɔkwa ni amɛyeee bo lɛ hewɔ lɛ.+

8 “Ao Yehowa, wɔnɔ lɛ ji hiɛgbele lɛ, wɔ kɛ wɔmaŋtsɛmɛi lɛ, kɛ wɔlumɛi lɛ, kɛ wɔtsɛmɛi lɛ, ejaakɛ wɔfee esha wɔshi bo. 9 Yehowa, wɔ-Nyɔŋmɔ lɛ, lɛ enɔ ji mɔbɔnalɛ kɛ eshai ni akɛkeɔ lɛ,+ ejaakɛ wɔtse ehiɛ atua.+ 10 Wɔbooo Yehowa, wɔ-Nyɔŋmɔ lɛ, gbee toi yɛ emlai lɛ ni etsɔ etsuji gbalɔi lɛ anɔ ekɛto wɔhiɛ ni wɔnyiɛɛɛ sɛɛ lɛ hewɔ.+ 11 Israel fɛɛ eku omla lɛ mli ni amɛgba afã ejaakɛ amɛbooo ogbee toi, ni no hewɔ lɛ, ofɔse oloomɔ lɛ kɛ kitã ni okã ni aŋma yɛ anɔkwa Nyɔŋmɔ lɛ tsulɔ Mose Mla lɛ mli lɛ oshwie wɔnɔ+ ejaakɛ wɔfee esha wɔshi bo. 12 Ekɛ sane fɔŋ kpele eba wɔnɔ kɛye ewiemɔi ni ewie eshi wɔ+ kɛ wɔnɔyelɔi ni ye wɔnɔ* lɛ anɔ; afeko nɔ ni afee yɛ Yerusalem nɛɛ eko pɛŋ yɛ ŋwɛi shishi fɛɛ.+ 13 Sane fɔŋ nɛɛ fɛɛ eba wɔnɔ tamɔ bɔ ni aŋma yɛ Mose Mla lɛ mli lɛ,+ shi fɛɛ sɛɛ lɛ, wɔkpako Yehowa, wɔ-Nyɔŋmɔ lɛ, fai kɛtsɔ wɔtɔmɔ lɛ ni wɔbaatsi wɔhe kɛje he,+ ni wɔná onɔkwale* lɛ mli sɛɛyoomɔ lɛ nɔ.

14 “No hewɔ lɛ, Yehowa tee nɔ ekwɛ, ni ekɛ sane fɔŋ ba wɔnɔ, ejaakɛ Yehowa, wɔ-Nyɔŋmɔ lɛ ja yɛ enitsumɔi fɛɛ ni etsuɔ lɛ amli; shi wɔbooo egbee toi.+

15 “Agbɛnɛ, Ao Yehowa, wɔ-Nyɔŋmɔ, bo mɔ ni okɛ nineshiwalɛ jie omaŋbii lɛ kɛje Ejipt shikpɔŋ lɛ nɔ+ ni okɛfee gbɛ́i ohã ohe kɛbashi ŋmɛnɛ gbi nɛɛ,+ wɔfee esha, ni wɔfee efɔŋ. 16 Ao Yehowa, yɛ ojalɛ nifeemɔi lɛ fɛɛ anaa lɛ,+ ofainɛ, jiemɔ omlifu lɛ kɛ omlila lɛ kɛje omaŋ Yerusalem, ogɔŋ krɔŋkrɔŋ lɛ nɔ; ejaakɛ wɔhe eshai lɛ kɛ wɔtsɛmɛi lɛ atɔmɔi lɛ ahewɔ lɛ, Yerusalem kɛ omaŋbii lɛ etsɔ hiɛgbejianii kɛhã mɛi ni bɔle wɔ lɛ fɛɛ.+ 17 Ni agbɛnɛ, Ao wɔ-Nyɔŋmɔ, bo otsulɔ sɔlemɔ kɛ efaikpamɔi lɛ toi, ni ohã ohiɛ akpɛ ojamɔhe+ ni kã shi amaŋfɔ+ lɛ nɔ yɛ bo diɛŋtsɛ ohewɔ, Ao Yehowa. 18 Ao mi-Nyɔŋmɔ, ba otoi shi ni obo toi! Gbelemɔ ohiŋmɛii ni okwɛ wɔmaŋfɔfeemɔ lɛ kɛ maŋ ni akɛ ogbɛ́i efɔ̃ nɔ lɛ; ejaakɛ jeee wɔjalɛ nifeemɔi lɛ ahewɔ wɔkpaa bo fai lɛ, shi moŋ omɔbɔnalɛ ni fa babaoo lɛ hewɔ.+ 19 Ao Yehowa, bo toi. Ao Yehowa, okɛ wɔhe eshai lɛ ake wɔ.+ Ao Yehowa, bo toi jogbaŋŋ ni ofee! Ao mi-Nyɔŋmɔ, kaatsɛ, yɛ bo diɛŋtsɛ ohewɔ, ejaakɛ akɛ ogbɛ́i efɔ̃ omaŋ lɛ kɛ omaŋbii lɛ anɔ.”+

20 Be ni miwieɔ lolo ni misɔleɔ ni mijajeɔ mihe esha kɛ mimaŋ Israel he esha lɛ, ni mikpaa fai yɛ Yehowa, mi-Nyɔŋmɔ lɛ hiɛ koni ena mi-Nyɔŋmɔ lɛ gɔŋ krɔŋkrɔŋ lɛ mɔbɔ lɛ,+ 21 hɛɛ, be ni mikã he miwieɔ yɛ sɔlemɔ lɛ mli lɛ, nuu Gabriel,+ mɔ ni mina yɛ ninaa lɛ mli klɛŋklɛŋ lɛ,+ ba miŋɔɔ aaafee gbɛkɛnaashi nikee afɔle be lɛ mli be ni etɔ mi waa lɛ. 22 Ni ebahã minu shishi, ekɛɛ akɛ:

“Ao Daniel, agbɛnɛ miba koni mibahã oyoo sɛɛ ni onu shishi. 23 Be ni oje ofaikpamɔ lɛ shishi nɔŋŋ ni wiemɔ lɛ je kpo, ni miba koni mibabɔ bo amaniɛ, ejaakɛ oji mɔ ko ni ashwɛɛɛ ehe kwraa.*+ No hewɔ lɛ, jwɛŋmɔ sane lɛ nɔ ni onu ninaa lɛ shishi.

24 “Otsii* 70 ato ahã omaŋbii lɛ kɛ omaŋ krɔŋkrɔŋ+ lɛ koni akɛgbe nɔtɔmɔ lɛ naa, ni akɛjie esha,+ ni akɛkpãtã ahã tɔmɔ,+ ni akɛ naanɔ jalɛ aba,+ ni akɛsɔo ninaa lɛ kɛ gbalɛ* lɛ naa,+ ni akɛfɔ Krɔŋkrɔŋi Amli Krɔŋkrɔŋ* lɛ mu. 25 Ná ole ni onu shishi akɛ kɛjɛ be ni wiemɔ lɛ baaje kpo akɛ ayatswa Yerusalem ni asaa ama ekoŋŋ+ lɛ kɛyashi be ni Mesia*+ lɛ, Hiɛnyiɛlɔ+ lɛ baaba lɛ nɔ lɛ, ebaafee otsii 7, kɛ agbɛnɛ hu otsii 62.+ Abaasaa atswa Yerusalem ni ama lɛ ekoŋŋ kɛ emli henaabuamɔhe kɛ maŋ lɛ he gɔɔta agbo, shi abaafee enɛ yɛ haomɔ beiaŋ.

26 “Ni yɛ otsii 62 lɛ sɛɛ lɛ, abaafo Mesia lɛ ashɛ afɔ̃,+ ni nɔ ko eshwɛŋ kɛhãŋ lɛ.+

“Ni hiɛnyiɛlɔ ko ni baa lɛ maŋbii lɛ baakpãtã maŋ lɛ kɛ he krɔŋkrɔŋ lɛ hiɛ.+ Ni nu afua ji nɔ ni kɛ enaagbee baaba. Ni kɛyashi naagbee lɛ baaba lɛ, ta baaba; nɔ ni akpɛ mli ato ji amaŋfɔfeemɔi.+

27 “Ebaahã kpaŋmɔ lɛ aya nɔ atsu nii ahã mɛi babaoo lɛ otsi kome; ni yɛ otsi lɛ teŋ lɛ, ebaahã afɔle kɛ nikee afɔle sɛɛ afo.+

“Ni mɔ ni kɛ amaŋfɔfeemɔ baaba lɛ baata nyaŋemɔ nii fine nɔ kɛba;+ ni kɛyashi hiɛkpatamɔ baaba lɛ, abaafɔse nɔ ni akpɛ mli ato lɛ hu ashwie mɔ ni kã shi amaŋfɔ lɛ nɔ.”