Nyɔŋmɔ Maŋtsɛyeli Lɛ ‘Baa’​—Mɛɛ Be?

 1. (a) Mɛni hewɔ esa akɛ ‘wɔmɛ’ naagbee lɛ? (b) Mɛɛ gbɛ nɔ wɔɔtsɔ wɔwo ‘wɔsɔɔmɔ lɛ hiɛ nyam,’ ni kɛ mɛɛ hekɛnɔfɔɔ?

¹ MƐƐ be kwraa wɔbaanyɛ wɔkpa Maŋtsɛyeli lɛ shiwooi agbɛ akɛ ebaaba mli kwraa? Kɛha mɛi ni amɛsɔmɔ Yehowa yɛ anɔkwale mli afii 20, 30, 40 loo babaoo lɛ, etamɔ nɔ ni aha “naagbee” lɛ eshashao shi fioo. Shi kaimɔ nɔ ni Nyɔŋmɔ gbalɔ Habakuk kɛɔ wɔ lɛ: “Kɛ eshashao shi hu jiŋŋ mɛɛ lɛ kɛ; ejaakɛ ebaaba lɛlɛŋ, ekpeŋ sɛɛ.” (Habakuk 2:⁠3) Ehe ehiaaa ni wɔtsɔ hiɛ wɔle “nɔ gbi kɛ ŋmlɛtswaa” ni “amanehulu kpeteŋkpele” lɛ kɛ emlifu lɛ fɛɛ baafɛ ashwie jeŋ nɛɛ nɔ. Amrɔ nɛɛ lɛ, nɔ ni he hiaa pɛ ji ni ‘wɔwo wɔsɔɔmɔ lɛ hiɛ nyam’ kɛtsɔ ekaa ni wɔkɛ aaashiɛ maŋtsɛyeli ni ato ama shi lɛ he sanekpakpa lɛ wɔtsɔɔ nɔ. Ejaakɛ wɔbaanyɛ wɔna hekɛnɔfɔɔ akɛ, kɛji akɛ wɔshiɛ Maŋtsɛyeli lɛ he sane lɛ kɛyashɛ he ni Yehowa sumɔɔ akɛ afee kɛyashɛ lɛ, kɛkɛ lɛ “naagbee lɛ baaba.”​—Mateo 24:​14, 21, 36; Romabii 11:⁠13.

 2. (a) Mɛni yɔɔ miishɛɛ yɛ be ni Yehowa toɔ ehaa saji lɛ ahe? (b) Mɛɛ be, ni mɛni je Yudafoi agbɛjianɔtoo lɛ “naagbee gbii” lɛ shishi?

² Yɛ bɔ ni Yehowa toɔ be yɛ nibii ahe ehaa hewɔ lɛ, nɛkɛ anɔkwasane nɛɛ yɛ miishɛɛ: Ákɛ Nyɔŋmɔ tsɔ hiɛ ejie adesa yinɔsane mli bei enyɔ ni he hiaa waa kɛbashi ŋmɛnɛŋmɛnɛ be nɛɛ mli lɛ shishijee lɛ kpo. Mɛni ji enɛɛmɛi? Enyɔ lɛ fɛɛ lɛ kojomɔ bei ni. Nɛkɛ bei nɛɛ ateŋ klɛŋklɛŋ nɔ lɛ ji Yudafoi anibii agbɛjianɔtoo lɛ “naagbee gbii” ni je shishi kɛ Yesu baptisimɔ kɛ emufɔɔ akɛ Mesia lɛ. (Yoel 1:​15; 3:​1-5; Bɔfoi lɛ Asaji 2:17) Daniel gbalɛ ni atsɔ hiɛ fe afii 500 aŋma afɔ shi lɛ tsɔɔ afi 29 Ŋ.B. akɛ eji nakai “naagbee gbii” lɛ shishijee. Yɛ mɛɛ gbɛ nɔ?

“Naagbee Gbii” Ni Ato Aha Yudafoi Lɛ

 3, 4. (a) Mɛni ji “otsii nyɔŋmai kpawo” lɛ, mɛɛ be amɛje shishi, ni mɛɛ be amɛba naagbee? (b) Mɛni nibii kadi naagbee ‘otsi ni ji afii’ lɛ akɛ nɔ ni he hiaa?

³ Wɔkaneɔ be kpalaŋŋ ko ni ji “otsii nyɔŋmai kpawo ni ji afii” (An American Translation; Moffatt) he sane yɛ Daniel 9:​24-27, aloo nɔ ni fɛɛ feɔ afii 490, ni je shishi kɛjɛ “beyinɔ ni wiemɔ aaaje kpo akɛ aku sɛɛ ayatswa Yerusalem ekoŋŋ”a lɛ nɔ. Mɛɛ be nɛ? Biblia mli sane ni yɔɔ Nehemia 2:​1-7 lɛ kɛɔ akɛ Persia “Maŋtsɛ Artashasta yinɔ afi ni ji nyɔŋmai enyɔ lɛ nɔ,” Persia maŋtsɛ lɛ diɛŋtsɛ fa edãawolɔ Yudanyo, Nehemia, ni eku esɛɛ kɛya etsɛmɛi amaŋ lɛ mli ekoŋŋ ni eyaku sɛɛ ‘etswa ema shi.’ Taakɛ jeŋ yinɔsane tsɔɔ lɛ nɛkɛ “Artashasta yinɔ afi ni ji nyɔŋmai enyɔ” nɛɛ baafee afi 455 D.Ŋ.B. Kɛ akane afii 490 kɛjɛ nakai be lɛ nɔ lɛ wɔbashɛɔ afi 36 Ŋ.B. Daniel gbalɛ lɛ kɛɔ wɔ akɛ naagbee ‘otsi ni ji afi,’ 29-36 Ŋ.B., lɛ ji be krɛdɛɛ ko ni he hiaa. Ni mɛni hewɔ?

⁴ No ji akɛ “kɛjɛ beyinɔ ni wiemɔ aaaje kpo akɛ ayatswa Yerusalem ekoŋŋ lɛ kɛyashi Mesia hiɛnyiɛlɔ lɛ nɔ lɛ, efeɔ otsii kpawo, agbɛnɛ hu otsii nyɔŋmai ekpaa kɛ enyɔ.” No hewɔ lɛ Mesia lɛ baapue yɛ nakai otsii ni ji afii ni gbeɔ yi feɔ nyɔŋmai kpawo lɛ shishijee. Enɛ hu baakadi Yudafoi anibii agbɛjianɔtoo lɛ “naagbee gbii” lɛ shishijee, nɔ mli ni Mesia lɛ baama Abraham kpaŋmɔ lɛ nɔ mi aha nakai Yudafoi ni baakpɛlɛ enɔ lɛ yɛ nakai klɛŋklɛŋ afii kpawo ni ji kojomɔ be lɛ mli. Yɛ nakai otsi ni ji afii “lɛ teŋ lɛ,” ni ji akɛ, yɛ afi 33 Ŋ.B. lɛ, “aaafo Mesia lɛ ashɛ afɔ” yɛ gbele mli, lɛ diɛŋtsɛ efɔleshaa kpele ni akɛkpataa esha baaha ‘afɔle kɛ nikee nii afɔle [taakɛ Israel mla tsɔɔ lɛ] sɛɛ aafo’ akɛ sɛɛnamɔ bɛ he dɔŋŋ.​—Hebribii 10:​12, 18.

 5. (a) Mɛni tsɔɔ akɛ Yudafoi lɛ le be ni kɔɔ “otsii nyɔŋmai kpawo” lɛ he lɛ jogbaŋŋ? (b) Mɛni hewɔ Yudafoi lɛ ahiɛnɔkamɔ fee yaka yɛ nɔ ni amɛkpaa gbɛ lɛ mli? (d) Daniel gbalɛ lɛ ba mli anɔkwale yɛ mɛɛ gbɛ nɔ?

⁵ Ŋwanejee ko bɛ he akɛ Yudafoi lɛ le “otsii nyɔŋmai kpawo” be lɛ jogbaŋŋ, ejaakɛ Biblia ŋmalɔ Luka kɛɔ wɔ akɛ “maŋ lɛ hiɛ ka” Kristo lɛ nɔ yɛ nakai gbii lɛ amli. (Luka 3:15) Shi kɛlɛ, amɛkɛ amɛhiɛnɔkamɔi efɔ anunyam maŋtsɛ tabilɔ ko ni miiba, ni baanyiɛ Yudafoi lɛ ahiɛ kɛye Romabii yiwalɔi lɛ anɔ kunim nɔ. Amɛhemɔkɛyeli lɛ shɛɛɛ he ni amɛaahe amɛye akɛ “aaafo” Mesia lɛ “ashɛ afɔ,” agbe lɛ, yɛ afi 33 Ŋ.B. Ni asaŋ amɛkɛ amɛhiɛ efɔɔɔ gbalɛ mli kɔkɔbɔɔ akɛ Yerusalem kɛ ewebii lɛ baatsɔ “fitemɔ kwraa” mli ekoŋŋ lɛ nɔ ni amɛheee amɛyeee. Shi kwɛ bɔ ni Daniel gbalɛ lɛ ba mli anɔkwale ha yɛ be mli ni Roma asraafoi ni yɔɔ tatsɛ Tito shishi lɛ kpata Yerusalem hiɛ yɛ afi 70 Ŋ.B. lɛ!

Jeŋ Muu Fɛɛ “Naagbee Gbii”​—Mɛɛ Be?

 6. Mɛɛ be kroko Yehowa tsɔ hiɛ ejie lɛ kpo, ni eji mɛni shishijee?

⁶ Shi kɛ̃lɛ, mɛni ji be kroko ni jeɔ shishi ni Yehowa tsɔ hiɛ ekɛ mlihilɛ jie lɛ kpo lɛ? No ji Satan jeŋ nibii agbɛjianɔtoo lɛ fɛɛ “naagbee gbii.” (2 Timoteo 3:​1-5, NW) Enɛɛmɛi ji “jaramɔ bei ni mli wa” ni je shishi yɛ jeŋ fɛɛ yɛ afi 1914 Ŋ.B. lɛ.

 7, 8. (a) Te Biblia kaselɔi ni kɛ hiɛdɔɔ kaseɔ nii lɛ esusu nakai be lɛ he amɛha tɛŋŋ kɛjɛ 1880 aahu kɛbashi 1980 afii lɛ amli? (b) Mɛɛ wiemɔi ni jɛ mɛi ni le saji ni yaa nɔ yɛ je lɛŋ lɛ aŋɔɔ hu egbala jwɛŋmɔ kɛtee 1914 nɔ?

⁷ Afii 34 dani 1914 aaaba lɛ, no mli lɛ Biblia kaselɔi ni hiɛ ka shi jogbaŋŋ lɛ miikpa nakai be lɛ gbɛ. Buu-Mɔɔ lɛ tee nɔ egbala jwɛŋmɔ kɛtee nɔ ni etsɔɔ lɛ nɔ kɛjɛ afi 1880 kɛbaa. Ni amrɔ nɛɛ, afii 68 yɛ 1914 sɛɛ nɛɛ, wɔtsɔɔ wɔhe wɔkwɛɔ nakai afi lɛ akɛ nɔ ni haa mɔ tsui tswaa kpalakpala kɛ shishinumɔ. Niŋmalɔ ko ni le nii jogbaŋŋ wie 1914 he akɛ afi nɔ ni “je ni, ale yɛ nakai be lɛ mli ni akpɛlɛɔ nɔ lɛ ba naagbee.”b Mɔ kroko hu tsɔɔ 1914 mli akɛ no je “ŋmɛnɛŋmɛnɛ beaŋ be [ni] mɔ fɛɛ mɔ le jogbaŋŋ akɛ . . . nɔ ni ekɛbaaba naagbee ji jeŋ muu fɛɛ hiɛkpatamɔ lɛ shishi.”​—Agbɛnɛ kwɛmɔ wolo “Let Your Kingdom Come,” lɛ baafai 127-140, 186-189.

⁸ Yɛ nɔ ni fe afii 50 sɛɛ lɛ, German maŋnɔkwɛlɔ ni egbo Konrad Adenauer susu nibii ni eho lɛ ahe ni ekɛɛ yɛ be mli ni eyɔɔ wala mli lɛ akɛ: “Susumɔi kɛ mfonirii baa mijwɛŋmɔ mli, . . . susumɔi ni yɔɔ dani afi 1914 ba, be mli ni toiŋjɔlɛ, kpoofeemɔ kɛ shweshweeshwe shihilɛ diɛŋtsɛ yɔɔ shikpɔŋ nɛɛ nɔ​—be ni wɔleee gbeyeishemɔ . . . Shweshweeshwe shihilɛ kɛ kpoofeemɔ elaaje kɛjɛ adesai ashihilɛ mli kɛjɛ 1914.” Ni agbɛnɛ yɛ nyɛsɛɛ nɛɛ nɔŋŋ, ni ji November 1980 mli lɛ, tsutsu Ŋleshi maŋnɔkwɛlɔ Harold Macmillan fo ehe ekwɛ afii 86 ni ekɛhi shi lɛ yɛ esɛɛ, ni ewie Maŋnyɛ Victoria beaŋ “shweremɔ ni ba kɛkɛ” lɛ he kɛ heshwamɔ yɛ nibii ni baaa mli lɛ hewɔ. Ekɛɛ akɛ: “Nɔ fɛɛ nɔ hiɔ kɛyaa hiɛ jogbaŋŋ yɛ be fɛɛ mli. Enɛ ji je ni afɔ mi yɛ mli lɛ. [Shi] trukaa ni akpaaa gbɛ, ni nɔ fɛɛ nɔ ba naagbee leebi ko, yɛ 1914.”

 9. (a) Te fee tɛŋŋ ni Biblia kaselɔi tsɔ hiɛ amɛyoo akɛ afi 1914 baafee be ko ni sa kadimɔ? (b) Mɛɛ Daniel gbalɛ lɛ yitso 4 shishitsɔɔmɔ kɛ nɛkɛ jwɛŋmɔ nɛɛ ba?

⁹ Te fee tɛŋŋ ni Biblia kaselɔi anɔkwafoi ni ŋmɛnɛ ale amɛ akɛ Yehowa Odasefoi lɛ tsɔ hiɛ amɛle afii 34 akɛ 1914 baakadi nɛkɛ tsakemɔ nɛɛ? No ji akɛ “tsulɔ anɔkwafo kɛ nilelɔ” (Mateo 24:​45-47) lɛ ni Kristofoi ni afɔ amɛ mu ni sɔmɔɔ yɛ amɛ-Nuŋtsɔ Yesu Kristo shishi lɛ feɔ enɛ lɛ ‘eŋɔ amɛhiɛ amɛto gbalɛ wiemɔ lɛ ni kpɛɔ tamɔ la yɛ he ko ni ewo duŋ’ lɛ nɔ, taakɛ wiemɔi ni yɔɔ Petro Wolo ni ji Enyɔ 1:19 tsɔɔ lɛ. Amɛtsɔ gbalɛ ni yɔɔ Daniel yitso 4 lɛ nɔ amɛkase akɛ Maŋtsɛ David odehei aweku ni yɔɔ Yerusalem lɛ butumɔ, ni ba yɛ afi 607 D.Ŋ.B. lɛ efeŋ nɔ ni baakadi Yehowa nɔyeli yɛ shikpɔŋ nɔ lɛ naagbee kɛmiiya naanɔ. “Tso” ni damɔ shi kɛha Nyɔŋmɔ nɔyeli hewalɛ lɛ baakwɛ̃ ekoŋŋ. Yɛ “bei kpawo” aloo afii 2,520 ni Jeŋmaji kɛye nɔ tamɔ kooloi yɛ shikpɔŋ lɛ nɔ lɛ sɛɛ lɛ, abaale ekoŋŋ akɛ “Mɔ ni yɔɔ ŋwɛi shɔŋŋ lɛ yɛ hewalɛ yɛ gbɔmɛi amaŋtsɛyeli lɛ nɔ, ni eŋɔhaa mɔ fɛɛ nɔ ni esumɔɔ, ni eŋɔɔ mɛi ni ji gbɔmɛi amliwoo etaa nɔ.”​—Daniel 4:​14-17.

10. Esoro Mesia lɛ puemɔ yɛ 1914 lɛ yɛ eklɛŋklɛŋ baa lɛ he yɛ mɛɛ gbɛ nɔ?

¹⁰ Hɛɛ, nakai oshara afi ni ji 1914 lɛ mli nakai “gbɔmɛi amliwoo” ni yɛ eklɛŋklɛŋ baa akɛ Mesia lɛ mli lɛ, akɛ yiwalɛ ‘fo lɛ ashɛ afɔ, ni ebɛ nɔ ko nɔ ko kɛha lɛ diɛŋtsɛ ehe’ lɛ aaapue ekoŋŋ. Shi Kristo baa akɛ mɔ ni anaaa lɛ yɛ nɛkɛ be nɛɛ mli, yɛ ŋwɛi anunyam mli, ni ebɔfoi krɔŋkrɔŋi lɛ fɛɛ fata ehe, ni “eeeta enunyam sɛi lɛ nɔ.”​—Daniel 9:​26; Mateo 25:⁠31.

1914 “Yinɔ” Lɛ

11. (a) Mɛɛ “yinɔ” hoŋ eyaŋ kɛyashi nibii ni Yesu gba fɔ shi lɛ aaaba mli da lɛ? (b) Mɛni ji nɔ ni mɛi ni eshwɛ yɛ nɛkɛ “yinɔ” nɛɛ mIi lɛ kpaa gbɛ akɛ amɛbaana?

¹¹ Beni Kristo ba ni eba, aloo parousia lɛ je shishi lɛ, adesa hiŋmɛi enaaa lɛ. Shi nakai 1914 yinɔ lɛ nyɛ amɛna nɔ ni ba shikpɔŋ nɛɛ nɔ lɛ akɛ eba ni eba Iɛ he “okadi” ni ákɛ eji “kɔɔmɔi lɛ abɔimɔ” kɛha adesai! (Mateo 24:​8, Authorized Version) Ni nakai 1914 yinɔ lɛ mli mɛi ni eshwɛ lɛ ka he amɛmiiwie enɛ he. Amɛteŋ mɛi komɛi baaya nɔ awie he aaahu kɛyashi be mli ni “amanehulu kpeteŋkpele” lɛ aaabatsumɔ Satan yiwalɛ nibii agbɛjianɔtoo lɛ kɛjɛ wɔshikpɔŋ nɛɛ nɔ. Ejaakɛ Yesu Kristo diɛŋtsɛ maa nɔ mi kɛhaa wɔ akɛ: “Lɛlɛŋ, miikɛɛnyɛ akɛ, nɛkɛ yinɔ nɛɛ [yinɔ ni na ‘kɔɔmɔi lɛ abɔimɔ’ yɛ 1914] hoŋ, ja nii nɛɛ fɛɛ eba mli dã. Ŋwɛi kɛ shikpɔŋ baaho aya; shi miwiemɔi lɛ hoŋ eyaŋ.”​—Mateo 24:​3, 8, 34, 35.

12. (a) Mɛni nibii ni bɔi baa kɛjɛ 1914 esa akɛ nomɛi atsɔ wɔyiŋ yɛ bɔ ni gbalɛ baa mli pɛpɛɛpɛ lɛ he? (b) Shi kɛ̃lɛ aŋmɛ wɔhemɔkɛyeli lɛ shiŋŋ yɛ mɛni mli? (d) “Sanekpakpa” lɛ gbalaa jwɛŋmɔ kɛyaa namɔ nɔ?

¹² ‘Kɔɔmɔi’ ni agba afɔ shi akɛ ebaaje shishi yɛ 1914 lɛ fɛ eshwie je lɛ nɔ trukaa kɛ naakpɛɛ. Ni eehao adesai lolo! Amɛkɛ “okadi” lɛ he odaseyeli ni tsɔɔ mɔ yiŋ haa akɛ 1914 kadi “nibii agbɛjianɔtoo lɛ naagbee” lɛ shishijee. Shi kɛ̃lɛ, jeee be kɛkɛ nɔ wɔhemɔkɛyeli damɔ, tamɔ 1914. Wɔŋmɛ wɔhemɔkɛyeli shiŋŋ tamɔ sɛkɛ wɔwo Nyɔŋmɔ wiemɔ muu lɛ fɛɛ mli, yɛ “sanekpakpa” lɛ ni klɛŋklɛŋ lɛ Yesu kɛ ekaselɔi lɛ shiɛ lɛ mli, yɛ Biblia mli gbalɛi babaoo ni eba mli yɛ naakpɛɛ gbɛ nɔ, yɛ wɔgbii nɛɛ amli lɛ mli, ni titri lɛ, akɛni enɛɛmɛi kɔɔ “tsulɔ anɔkwafo kɛ nilelɔ” lɛ kɛ amɛnanemɛi nitsulɔi lɛ ahe ni ehaa ayɔseɔ amɛ lɛ hewɔ. “Maŋtsɛyeli lɛ he sanekpakpa nɛɛ,” Biblia muu lɛ fɛɛ mli sane lɛ ji wɔhemɔkɛyeli lɛ shishitoo. Enɛɛmɛi fɛɛ gbalaa jwɛŋmɔ kɛyaa Yesu Kristo, Nyɔŋmɔ Bi lɛ ni etsu lɛ kɛba shikpɔŋ nɔ koni ebakpɔ adesai lɛ, ni amrɔ nɛɛ eyeɔ nɔ yɛ anunyam mli yɛ ŋwɛi maŋtsɛyeli ni ato ama shi lɛ mli lɛ nɔ. (Mateo 24:​3, 14, 45-47; 25:​31-33; Kpojiemɔ 19:10) Akɛni wɔyɔɔ hemɔkɛyeli hewɔ lɛ, wɔbaanyɛ wɔyoo bɔ ni Maŋtsɛyeli Iɛ ‘baaba’ kɛha mɛi fɛɛ ni sumɔɔ ni diɔ jalɛnifeemɔ sɛɛ lɛ ayiwalaheremɔ. Mɛɛ gbɛ nɔ eeetsɔ efee enɛ yɛ?c

[Shishigbɛ niŋmai]

Seattle Times, January 1, 1959 nɔ̃ lɛ mli niŋmaa titri.

[Akrabatsa ni yɔɔ baafa 17]

“OTSII NYƆŊMAI KPAWO NI JI AFII” (Daniel 9:​24-27)

KƐJƐ “beyinɔ ni” Nehemia nine shɛ Persia maŋtsɛ lɛ “wiemɔ” nɔ yɛ afi 455 D.Ŋ.B.

455 - D.Ŋ.B. = afii 454

1 D.Ŋ.B. - 1 Ŋ.B. = afi 1

1 D.Ŋ.B. - 36 Ŋ.B. = afii 35

455 D.Ŋ.B. - 36 Ŋ.B. = afii 490

“Aaafo Mesia lɛ ashɛ afɔ . . . otsi lɛ teŋ,” April 33 Ŋ.B.

KƐYASHI duromɔ be krɛdɛɛ kɛha Yudafoi yɛ afi 36 Ŋ.B. lɛ naagbee kɛ Kornelio shiabii lɛ tsakemɔ

[Akrabatsa ni yɔɔ baafa 18]

“JEŊMAJI ABEI NI ATO” (Daniel 4:​14-25; Luka 21:​24-26)

Yehowa Nɔyeli lɛ fiimɔ yɛ be mli ni Jeŋmaji Abei jeɔ shishi afi 607 D.Ŋ.B.

“BEI KPAWO” = 7×360 = afii 2,520

(Kwɛmɔ Kpojiemɔ 12:​6, 14; Ezekiel 4:6b)

607 - 1 D.Ŋ.B. = afii 606

1 D.Ŋ.B. - 1 Ŋ.B. = afi 1

1 Ŋ.B. - 1914 Ŋ.B. = afii 1,913

607 D.Ŋ.B. - 1914 Ŋ.B. = afii 2,520

Ato Yehowa Nɔyeli lɛ ama shi yɛ Mesia Maŋtsɛyeli lɛ mli, 1914 Ŋ.B.