Yitso Ejwɛ
Amaga Kpeteŋkpele Ko Shitee Kɛ Eshigbeemɔ
1. Mɛni hewɔ esa akɛ wɔnya shihilɛ ko ni te shi beni Maŋtsɛ Nebukadnezar ŋɔ Daniel kɛ mɛi krokomɛi kɛtee nom mli lɛ sɛɛ afii nyɔŋma lɛ he lɛ?
AFII nyɔŋma eho kɛjɛ be mli ni Maŋtsɛ Nebukadnezar kɛ Daniel kɛ Yuda ‘shikpɔŋ lɛ nɔ hiɛnaanɔbii’ komɛi ba nomŋɔɔ mli yɛ Babilon lɛ. (2 Maŋtsɛmɛi 24:15) Oblanyo fioo Daniel miisɔmɔ yɛ maŋtsɛ lɛ mɔ̃ɔ lɛ mli beni shihilɛ ko ni woɔ wala he gbeyei te shi lɛ. Mɛni hewɔ esa akɛ wɔnya enɛ he? Ejaakɛ, jeee akɛ gbɛ ni Yehowa Nyɔŋmɔ tsɔ nɔ ekɛ ehe wo sane lɛ mli lɛ hereɔ Daniel kɛ mɛi krokomɛi ayiwala kɛkɛ, shi moŋ ehaa wɔnaa bɔ ni Biblia gbalɛ mli jeŋ hewalɛi lɛ tsara nɔ kɛba kɛbashi wɔ bei nɛɛ amli lɛ mli jogbaŋŋ.
MAŊTSƐ KO KƐ HAOMƆ KO NI MLI WA KPE
2. Mɛɛ be Nebukadnezar nine shɛ eklɛŋklɛŋ gbalɛ lamɔ lɛ nɔ lɛ?
2 “Nebukadnezar maŋtsɛyeli afi ni ji enyɔ lɛ nɔ lɛ,” gbalɔ Daniel ŋma akɛ, “Nebukadnezar la lamɔi komɛi, ni etsui bɔ̃i yeli yɛ emli, ni ewɔ tserɛ yɛ ehiɛ.” (Daniel 2:1) Lalɔ lɛ ji Nebukadnezar, Babilonia Maŋtsɛyeli lɛ nɔ maŋtsɛ lɛ. Ebatsɔ jeŋ nɔyelɔ yɛ afi 607 D.Ŋ.B., beni Yehowa Nyɔŋmɔ ŋmɛ lɛ gbɛ koni ekpata Yerusalem kɛ esɔlemɔtsu lɛ hiɛ lɛ. Yɛ Nebukadnezar nɔyeli afi ni ji enyɔ (606/605 D.Ŋ.B.) ákɛ jeŋ nɔyelɔ lɛ mli lɛ, Nyɔŋmɔ hã ela lamɔ ko ni fãa mɔ tsui.
3. Namɛi nyɛɛɛ atsɔɔ maŋtsɛ lɛ lamɔ lɛ shishi lɛ, ni te Nebukadnezar fee enii yɛ he eha tɛŋŋ?
3 Nɛkɛ lamɔ nɛɛ hao Nebukadnezar aahu akɛ enyɛɛɛ ewɔ. Taakɛ ebaaba lɛ lɛ, eesumɔ waa ni enu shishi. Shi maŋtsɛ kpeteŋkpele lɛ hiɛ ekpa lamɔ lɛ nɔ! No hewɔ lɛ efã ni atsɛ Babilon woloŋlelɔi, okɔmfoi, kɛ ŋkunyaayelɔi lɛ kɛba, ni ebi ni amɛgba lɛ lamɔ lɛ ni amɛtsɔɔ lɛ shishi hu. Sane lɛ tsii fe amɛ. Nyɛ ni amɛnyɛɛɛ nakai amɛfee lɛ wo Nebukadnezar mli la naakpa, no hewɔ lɛ efã ni “akpata Babel nilelɔi lɛ fɛɛ hiɛ.” Fãmɔ nɛɛ kɛ gbalɔ Daniel kɛ oblafo ni ahala lɛ lɛ baakpe hiɛ-kɛ-hiɛ. Mɛni hewɔ? Ejaakɛ abuɔ lɛ kɛ enanemɛi Hebribii etɛ lɛ—Hanania, Mishael, kɛ Azaria—akɛ amɛfata Babilon nilelɔi lɛ ahe.—Daniel 2:2-14.
DANIEL BA EBAHERE AMƐYIWALA
4. (a) Te fee tɛŋŋ ni Daniel ná ele Nebukadnezar lamɔ lɛ mli saji kɛ eshishinumɔ lɛ hu? (b) Mɛni Daniel wie ni ekɛtsɔɔ hiɛsɔɔ ni eyɔɔ kɛha Yehowa Nyɔŋmɔ?
4 Beni ena ele yiŋtoo hewɔ ni Nebukadnezar wo akpɔ ni mli wa waa nɛkɛ lɛ, “Daniel yiŋ tee ni eyakpa maŋtsɛ lɛ fai, akɛ eha lɛ be ni etsɔɔ maŋtsɛ lɛ shishi.” Akpɛlɛ enɛ nɔ. Daniel tee ewe, ni lɛ kɛ enanemɛi Hebribii etɛ lɛ sɔle, ni amɛmiibi ni ‘Nyɔŋmɔ ni yɔɔ ŋwɛi lɛ musuŋ atsɔ lɛ yɛ nɛkɛ teemɔŋ sane nɛɛ hewɔ.’ Yehowa jie lamɔ lɛ mli teemɔŋ sane lɛ kpo etsɔɔ Daniel yɛ ninaa mli nakai gbɛkɛ lɛ nɔŋŋ. Daniel kɛ shidaa kɛɛ akɛ: “Ajie Nyɔŋmɔ gbɛi lɛ yi kɛjɛ naanɔ kɛyashi naanɔ, ejaakɛ enɔ̃ ji nilee kɛ hewalɛ fɛɛ! Lɛ ji mɔ ni tsakeɔ be kɛ yinɔ, lɛ ekpaa maŋtsɛmɛi, ni esaa ewoɔ maŋtsɛmɛi, lɛ ehaa ŋaalelɔi leɔ ŋaa, ni nilelɔi hu leɔ nii. Lɛ ji mɔ ni jieɔ nibii ni mli kwɔlɔ kɛ nibii ni aŋɔ-tee lɛ akpo, ele nii ni yɔɔ duŋ mli, ni la hu kɛ lɛ yɔɔ.” Daniel jie Yehowa yi yɛ sane shishinumɔ nɛɛ hewɔ.—Daniel 2:15-23.
5. (a) Beni edamɔ maŋtsɛ lɛ hiɛ lɛ, mɛɛ gbɛ nɔ Daniel tsɔ ekɛ yijiemɔ hã Yehowa? (b) Mɛni hewɔ wɔnyaa sane mlitsɔɔmɔ ni Daniel kɛha lɛ he ŋmɛnɛ lɛ?
5 Enɔ jetsɛremɔ lɛ, Daniel tee Ariok, oblafoi anukpa ni ahala lɛ akɛ ekpata Babilon nilelɔi lɛ ahiɛ lɛ ŋɔɔ. Beni Ariok nu akɛ Daniel baanyɛ atsɔɔ lamɔ lɛ shishi lɛ, esha foi ekɛ lɛ tee maŋtsɛ lɛ hiɛ. Ákɛ mɔ ni kɛ yijiemɔ ko haaa ehe lɛ, Daniel kɛɛ Nebukadnezar akɛ: “Nyɔŋmɔ ko yɛ ŋwɛi ni jieɔ teemɔŋ saji ashi, ni eetsɔɔ maŋtsɛ Nebukadnezar nɔ ni baaba wɔsɛɛ.” Daniel efee klalo akɛ, jeee Babilonia Maŋtsɛyeli lɛ wɔsɛɛ be pɛ eeejie lɛ kpo, shi bɔ ni jeŋ saji baatamɔ ahã kɛjɛ Nebukadnezar gbii lɛ amli kɛbashi wɔbei nɛɛ amli kɛteke enɛ.—Daniel 2:24-30.
LAMƆ LƐ—AKAI
6, 7. Mɛni ji lamɔ lɛ ni Daniel kai maŋtsɛ lɛ?
6 Nebukadnezar bo Daniel toi jogbaŋŋ beni etsɔɔ mli lɛ: “Bo maŋtsɛ ookwɛ, ni naa, amaga kpeteŋkpele ko nɛ, ni nɛkɛ amaga nɛɛ da, ni ekpɛɔ akɛ nɔ ko, ni edamɔ ohiɛ, ni ehe yɛ gbeyei. Nɛkɛ amaga nɛɛ yitso lɛ shika kpakpa ni, etsitsi kɛ eniji lɛ jwiɛtɛi ni, emusu kɛ ehɛ lɛ akɔɔble ni, eshwuɔji lɛ dade ni, enaji lɛ fã dade, ni fã hu sũ. Ohiɛ lɛ kwɛmɔ aahu, ni tɛ ko tse bagbee shi ni jeee nine sa he, ni ebatswa amaga lɛ naji ni ji dade kɛ sũ lɛ anɔ, ni ejwara amɛ wɔtsɔwɔtsɔ. Kɛkɛ ni dade lɛ kɛ sũ lɛ kɛ akɔɔble lɛ kɛ jwiɛtɛi lɛ kɛ shika lɛ fɛɛ tswɛm jwara wɔtsɔwɔtsɔ, ni amɛtsɔmɔ tamɔ abelenaashaji ni jwere gbo abeleshaahe, ni kɔɔyɔɔ loo amɛ kɛtee ni anaaa amɛ yɛ he ko he ko dɔŋŋ; shi tɛ lɛ ni tswa amaga lɛ tsɔ̃ gɔŋ kpeteŋkpele, ni ekpele shikpɔŋ muu lɛ fɛɛ nɔ.”—Daniel 2:31-35.
7 Kwɛ miishɛɛ ni Nebukadnezar baaná beni enuɔ ni Daniel tsɔɔ lɛ elamɔ lɛ! Shi mɛɛ! Kɛ́ Daniel tsɔɔ lamɔ lɛ shishi hu lɛ, no dani abaaŋmɛɛ Babilon nilelɔi lɛ ahe. Beni ewieɔ kɛhaa lɛ diɛŋtsɛ ehe kɛ enanemɛi Hebribii etɛ lɛ, Daniel jaje akɛ: “Lamɔ lɛ nɛ; ni wɔɔtsɔɔ eshishi hu yɛ maŋtsɛ lɛ hiɛ.”—Daniel 2:36.
MAŊTSƐYELI WULU KO NI ESORO LƐ KWRAA
8. (a) Daniel tsɔɔ shika yitso lɛ shishi akɛ eji namɔ loo mɛni? (b) Mɛɛ be shika yitso lɛ ba shihilɛ mli?
8 “Bo maŋtsɛ ji maŋtsɛmɛi amaŋtsɛ, ni ŋwɛi Nyɔŋmɔ lɛ eŋɔ maŋtsɛyeli kɛ hewalɛ kɛ nɔyeli kɛ anunyam ehao; ni he fɛɛ he ni gbɔmɛi abii kɛ ŋaŋ kooloi kɛ ŋwɛi loofɔji hiɔ lɛ, eŋɔ-wo odɛŋ, ni ewoo amɛ fɛɛ amɛnɔyelɔ: bo ji shika yitso lɛ.” (Daniel 2:37, 38) Nɛkɛ wiemɔi nɛɛ bakɔ Nebukadnezar he beni Yehowa kɛ lɛ tsu nii ni ekpata Yerusalem hiɛ yɛ afi 607 D.Ŋ.B. lɛ sɛɛ. Nakai enɛ ji, ejaakɛ maŋtsɛmɛi ni akɛ amɛ ta sɛi nɔ yɛ Yerusalem lɛ jɛ David, maŋtsɛ ni Yehowa efɔ lɛ mu lɛ wekukpaa lɛ mli. Yerusalem ji Yuda maŋtiase, Nyɔŋmɔ okadi maŋtsɛyeli ni damɔ Yehowa nɔyeli yɛ shikpɔŋ muu lɛ fɛɛ nɔ lɛ najiaŋ lɛ. Akɛni akpata nakai maŋtiase lɛ hiɛ yɛ afi 607 D.Ŋ.B. hewɔ lɛ, nɛkɛ Nyɔŋmɔ okadi maŋtsɛyeli nɛɛ ehiii shi dɔŋŋ. (1 Kronika 29:23; 2 Kronika 36:17-21) Jeŋ hewalɛi ni tsara nɔ kɛba ni amaga lɛ fãi ni ji dadei loo sũ mli nibii damɔ shi kɛha amɛ lɛ baanyɛ aye je lɛ nɔ agbɛnɛ ni Nyɔŋmɔ okadi maŋtsɛyeli lɛ kɛ ehe wooo esaji amli. Ákɛ shika yitso, sũ mli nii ni jara wa fe fɛɛ ni ale yɛ blema bei lɛ amli lɛ, Nebukadnezar ná hegbɛ ni yɔɔ srɔto akɛ eeebutu nakai maŋtsɛyeli lɛ kɛtsɔ Yerusalem hiɛkpatamɔ lɛ nɔ.—Kwɛmɔ “Maŋtsɛ Tabilɔ ko To Maŋtsɛyeli,” ni yɔɔ baafã 63 lɛ.
9. Namɔ damɔ shi kɛha shika yitso lɛ?
9 Nebukadnezar, ni ye maŋtsɛ afii 43 lɛ ji maŋtsɛmɛi awekukpaa ko ni ye Babilonia Maŋtsɛyeli lɛ nɔ lɛ yitso. Mɛi ni fata he ji eshaanuu Nabonido kɛ ebinuu nukpa, Evil-Merodak. Nakai maŋtsɛmɛi awekukpaa lɛ tee nɔ ehi shi afii 43 kroko, kɛyashi Nabonido binuu Belshazar gbele yɛ afi 539 D.Ŋ.B. (2 Maŋtsɛmɛi 25:27; Daniel 5:30) No hewɔ lɛ, shika yitso ni yɔɔ lamɔ lɛ mli lɛ damɔɔɔ shi kɛhaaa Nebukadnezar pɛ, shi moŋ Babilonia nɔyeli kpãa lɛ fɛɛ.
10. (a) Yɛ mɛɛ gbɛ nɔ Nebukadnezar lamɔ lɛ tsɔɔ yɛ akɛ Babilonia Jeŋ Hewalɛ lɛ sɛɛ etsɛŋ? (b) Mɛni gbalɔ Yesaia gba yɛ Babilon nɔ kunimyelɔ lɛ he? (d) Medo-Persia hewalɛ shɛɛɛ Babilon nɔ̃ lɛ yɛ mɛɛ shishinumɔ naa?
10 Daniel kɛɛ Nebukadnezar akɛ: “Ni osɛɛ lɛ maŋtsɛyeli kroko aaate shi ni kɛo yeee egbɔ.” (Daniel 2:39) Maŋtsɛyeli ko ni amaga lɛ jwiɛtɛi tsitsi kɛ eniji damɔ shi kɛha lɛ lɛ baaye Nabukadnezar maŋtsɛmɛi awekukpaa lɛ najiaŋ. Yesaia etsɔ hiɛ ekɛ afii 200 egba maŋtsɛyeli nɛɛ he sane momo, ni etsɔɔ maŋtsɛ kunimyelɔ lɛ gbɛi po ákɛ—Koresh. (Yesaia 13:1-17; 21:2-9; 44:24–45:7, 13) Enɛ ji Medo-Persia Maŋtsɛyeli lɛ. Eyɛ mli akɛ Medo-Persia kɛ hiŋmɛigbelemɔ kpeteŋkpele ko ba ni jeee nɔ ni baa shi fe Babilonia Maŋtsɛyeli lɛ nɔ̃ lɛ moŋ, shi jwiɛtɛi lɛ damɔ shi kɛha sɛɛ mli maŋtsɛyeli lɛ, sũ mli nii ni jara waaa tamɔ shika. Eshɛɛɛ Babilonia Jeŋ Hewalɛ lɛ nɔ̃ lɛ kɛ shishinumɔ akɛ enáaa hegbɛ ni yɔɔ srɔto koni ebutu Yuda, Nyɔŋmɔ mfonirifeemɔŋ maŋtsɛyeli diɛŋtsɛ lɛ, kɛ emaŋtiase ni yɔɔ Yerusalem lɛ.
11. Mɛɛ be Nebukadnezar maŋtsɛmɛi awekukpaa ehiii shi dɔŋŋ?
11 Beni Daniel etsɔɔ lamɔ lɛ shishi lɛ sɛɛ afii 60 lɛ, ekɛ ehiŋmɛi na Nebukadnezar maŋtsɛmɛi awekukpaa lɛ naagbee. Daniel yɛ jɛmɛ, yɛ October 5 loo 6, afi 539 D.Ŋ.B. lɛ gbɛkɛ, beni Medo-Persia asraafoi lɛ ye Babilon ni tamɔ nɔ ni anyɛɛɛ abote mli lɛ nɔ kunim ni amɛgbe Maŋtsɛ Belshazar lɛ. Yɛ Belshazar gbele hewɔ lɛ, lamɔ mli amaga lɛ shika yitso—ni ji Babilonia Maŋtsɛyeli lɛ—ehiii shi dɔŋŋ.
MAŊTSƐYELI KO HA GBƆMƐI NI AŊƆ AMƐ NOM YE AMƐHE
12. Akpɔ ni Koresh wo yɛ afi 537 D.Ŋ.B. lɛ he ba sɛɛnamɔ kɛha Yudafoi ni yɔɔ nomŋɔɔ mli lɛ yɛ mɛɛ gbɛ nɔ?
12 Medo-Persia baye Babilonia Maŋtsɛyeli lɛ najiaŋ akɛ jeŋ hewalɛ ni yɔɔ, yɛ afi 539 D.Ŋ.B. Dario, ni ji Medianyo ni eye afii 62 lɛ bafee klɛŋklɛŋ nɔyelɔ yɛ Babilon maŋtiase ni aye enɔ kunim lɛ nɔ. (Daniel 5:30, 31) Lɛ kɛ Koresh ni ji Persianyo lɛ fɛɛ ye Medo-Persia Maŋtsɛyeli lɛ nɔ yɛ be kuku ko mli. Beni Dario gbo lɛ, Koresh kome batsɔ Persia Maŋtsɛyeli lɛ yitso. Kɛha Yudafoi ni yɔɔ Babilon lɛ, Koresh nɔyeli lɛ tsɔ̃ɔ kpɔmɔ kɛmiijɛ nomŋɔɔ mli. Yɛ afi 537 D.Ŋ.B. lɛ, Koresh wo akpɔ ko ni ŋmɛ Yudafoi ni yɔɔ nomŋɔɔ mli yɛ Babilon lɛ gbɛ koni amɛku amɛsɛɛ amɛya amɛmaŋ shikpɔŋ nɔ ni amɛyasaa amɛma Yerusalem kɛ Yehowa sɔlemɔwe lɛ ekoŋŋ. Shi akuuu sɛɛ atooo Nyɔŋmɔ maŋtsɛyeli diɛŋtsɛ lɛ ekoŋŋ yɛ Yuda kɛ Yerusalem.—2 Kronika 36:22, 23; Ezra 1:1—2:2a.
13. Nebukadnezar lamɔ amaga lɛ jwiɛtɛi tsitsi kɛ niji lɛ feɔ mɛni he mfoniri?
13 Lamɔ mli amaga lɛ jwiɛtɛi tsitsi kɛ niji lɛ fee Persia maŋtsɛmɛi awekukpaa ni je shishi kɛjɛ Koresh Kpeteŋkpele lɛ nɔ lɛ he mfoniri. Nakai maŋtsɛmɛi awekukpaa lɛ hi shi fe afii 200. Aheɔ ayeɔ akɛ Koresh gbo beni ekɛ ehe ewo tafãa ko mli yɛ afi 530 D.Ŋ.B. Yɛ maŋtsɛmɛi aaafee 12 ni baye maŋtsɛ yɛ esɛɛ yɛ Persia Maŋtsɛyeli lɛ mli lɛ ateŋ lɛ, kɛ hoo lɛ amɛteŋ mɛi 2 kɛ Yehowa webii ni ehala amɛ lɛ ye yɛ mlihilɛ naa. Amɛteŋ mɔ kome ji Dario I (Persianyo lɛ), ni mɔ kroko lɛ ji Artashasta I.
14, 15. Mɛɛ yelikɛbuamɔ Dario Kpeteŋkpele lɛ kɛ Artashasta I kɛha Yudafoi lɛ?
14 Dario I ji mɔ ni gbeɔ yi feɔ etɛ yɛ Koresh Kpeteŋkpele lɛ sɛɛ yɛ Persia maŋtsɛmɛi awekukpaa lɛ mli. Mɛi enyɔ ni tsɔ̃ ehiɛ lɛ baanyɛ afee Cambyses II kɛ enyɛmi nuu Bardiya (aloo ekolɛ mɔ ni kwa efee ehe Magian ni atsɛɔ lɛ Gaumata lɛ). Beni Dario I, ni ale lɛ hu akɛ Dario Kpeteŋkpele lɛ bata maŋtsɛsɛi lɛ nɔ yɛ afi 521 D.Ŋ.B. lɛ, no mli lɛ átsĩ sɔlemɔwe lɛ ni asaa amaa ekoŋŋ yɛ Yerusalem lɛ naa. Beni Dario yana woji ni akpɔ ni Koresh wo lɛ yɔɔ mli yɛ Akmeta blema nibii atoohe lɛ, efee babaoo fe naatsii lɛ jiemɔ pɛ kɛkɛ yɛ afi 520 D.Ŋ.B. Ekɛ shika hu ha kɛjɛ maŋtsɛ jwetri lɛ mli koni akɛsaa ama sɔlemɔwe lɛ.—Ezra 6:1-12.
15 Persia nɔyelɔ ni nyiɛ sɛɛ ni ye ebua yɛ Yudafoi lɛ anibii asaamɔ he mɔdɛŋbɔi amli ji Artashasta I, ni baye etsɛ Ahashwerosh (Xerxes I) sɛɛ yɛ afi 475 D.Ŋ.B. lɛ. Awo Artashasta gbɛi akɛ Longimanus ejaakɛ eninejurɔ kɛ fe ebɛku. Yɛ enɔyeli afi ni ji 20 lɛ mli, yɛ afi 455 D.Ŋ.B. lɛ, ekɛ nitsumɔ wo edãawolɔ Nehemia, Yudanyo lɛ dɛŋ koni efee amralo yɛ Yuda ni etswa Yerusalem gbogboi lɛ ekoŋŋ. Nifeemɔ nɛɛ kadi ‘otsii nyɔŋmai kpawo ni ji afii’ ni atsɔɔ mli yɛ Daniel wolo lɛ yitso 9, ni to Mesia lɛ, loo Kristo, Yesu ni jɛ Nazaret lɛ puemɔ kɛ egbele be emamɔ shi lɛ shishijee.—Daniel 9:24-27; Nehemia 1:1; 2:1-18.
16. Mɛɛ be ni mɛɛ maŋtsɛ yeɔ nɔ beni Medo-Persia Jeŋ Hewalɛ lɛ ba naagbee lɛ?
16 Maŋtsɛmɛi ekpaa lɛ mli naagbee mɔ ni baye Artashasta I sɛɛ yɛ Persia Maŋtsɛyeli lɛ maŋtsɛsɛi lɛ nɔ ji Dario III. Enɔyeli lɛ ba naagbee trukaa yɛ afi 331 D.Ŋ.B., beni Alexander Kpeteŋkpele lɛ ye enɔ kunim ko ni yɔɔ gbeyei yɛ Gaugamela, ni bɛŋkɛ blema Ninive lɛ. Enɔ kunim ni aye nɛɛ kɛ Medo-Persia Jeŋ Hewalɛ ni jwiɛtɛi fã ni yɔɔ Nebukadnezar lamɔ mli amaga lɛ mli lɛ fee ehe mfoniri lɛ ba naagbee. Hewalɛ ni baaba lɛ he wa yɛ gbɛi komɛi anɔ, ni kɛlɛ eshɛɛɛ hu yɛ nibii komɛi amli. Enɛ bafeɔ faŋŋ yɛ be mli ni wɔboɔ Nebukadnezar lamɔ lɛ shishitsɔɔmɔ lolo ni Daniel kɛha lɛ toi lɛ.
MAŊTSƐYELI KO—EDA WAA SHI EHEWALƐ SHƐƐƐ
17-19. (a) Mɛɛ jeŋ hewalɛ jwiɛtɛi musu kɛ ehɛ lɛ damɔ shi kɛha, ni nɛgbɛ enɔyeli lɛ mli lɛɛ kɛyashɛ? (b) Namɔ ji Alexander III? (d) Te fee tɛŋŋ ni Hela batsɔ majimaji ateŋ wiemɔ, ni ebafee nɔ ni hi jogbaŋŋ kɛha mɛni?
17 Daniel kɛɛ Nebukadnezar akɛ amaga kpeteŋkpele lɛ musu kɛ ehɛ lɛ feɔ “maŋtsɛyeli kroko ni ji etɛ ni ji akɔɔble nɔ̃, ni eeeye shikpɔŋ lɛ fɛɛ nɔ.” (Daniel 2:32, 39) Maŋtsɛyeli ni ji etɛ nɛɛ baanyiɛ Babilonia kɛ Medo-Persia sɛɛ aba. Bɔ ni akɔɔble jara waaa tamɔ jwiɛtɛi lɛ, nɛkɛ jeŋ hewalɛ hee nɛɛ hewalɛ shɛŋ Medo-Persia nɔ̃ lɛ, kɛ shishinumɔ akɛ, akɛ hegbɛ ko ni tamɔ Yehowa webii lɛ akpɔmɔ woŋ ehiɛ nyam. Shi kɛlɛ, maŋtsɛyeli ni tamɔ akɔɔble lɛ ‘aaaye shikpɔŋ lɛ fɛɛ nɔ’ ni tsɔɔ akɛ emli baalɛɛ waa fe Babilonia loo Medo-Persia. Mɛni he odase yinɔsane mli anɔkwalei lɛ yeɔ yɛ nɛkɛ jeŋ hewalɛ nɛɛ he?
18 Beni Alexander III eye afii 20 ni ebata Makedonia maŋtsɛsɛi lɛ nɔ yɛ afi 336 D.Ŋ.B. lɛ sɛɛ etsɛɛɛ ni ekɛ hiɛnyamtaomɔ je kunimyeli tafãa ko shishi. Yɛ kunimii ni eye yɛ etai ni ewuu lɛ amli hewɔ lɛ, abatsɛ lɛ akɛ Alexander Kpeteŋkpele. Akɛni ekunimii lɛ eko nyiɛ eko sɛɛ hewɔ lɛ, etee nɔ etsi kɛbɛŋkɛ Persia nɔyelihe lɛ. Beni eye Dario III nɔ kunim yɛ Gaugamela ta lɛ mli yɛ afi 331 D.Ŋ.B. lɛ, kɛkɛ ni Persia Maŋtsɛyeli lɛ je eshigbeemɔ shishi, ni Alexander to Hela shishi akɛ jeŋ hewalɛ hee.
19 Yɛ Gaugamela kunimyeli lɛ sɛɛ lɛ, Alexander tee nɔ eyaye Persia maŋtiasei ni ji Babilon, Shushan, Persepolis, kɛ Akmeta nɔ kunim. Akɛni eba Persia Maŋtsɛyeli lɛ fãi krokomɛi ni eshwɛ lɛ ashĩ hewɔ lɛ, elɛɛ ekunimyelii lɛ amli kɛtee India anaigbɛ. Ato Hela nɔyelihei yɛ shikpɔji ni aye amɛnɔ kunim lɛ anɔ. No hewɔ lɛ, Hela wiemɔ kɛ hiŋmɛigbelemɔ gbɛ eshwã maŋtsɛyelihe lɛ fɛɛ mli. Yɛ anɔkwale mli lɛ, Hela Maŋtsɛyeli lɛ bada kwraa fe eko fɛɛ eko ni tsɔ ehiɛ ba lɛ. Taakɛ Daniel gba fɔ̃ shi lɛ, akɔɔble maŋtsɛyeli lɛ ‘ye shikpɔŋ lɛ fɛɛ nɔ.’ Nɔ kome ni jɛ mli ba ji akɛ, Hela (Koine) batsɔ majimaji ateŋ wiemɔ. Akɛni anyɛɔ atsɔɔ wiemɔ lɛ nɔ atsɔɔ saji amli yɛ gbɛ ni ja nɔ hewɔ lɛ, ebafee nɔ ni sa jogbaŋŋ ni aaatsɔ nɔ akɛŋma Kristofoi a-Hela Ŋmalɛi lɛ kɛ Nyɔŋmɔ Maŋtsɛyeli lɛ he sanekpakpa lɛ gbɛɛ-kɛ-shwãmɔ.
20. Mɛni ba Hela Maŋtsɛyeli lɛ nɔ yɛ Alexander Kpeteŋkpele lɛ gbele sɛɛ?
20 Alexander Kpeteŋkpele lɛ hi shi afii kpaanyɔ pɛ akɛ jeŋ nɔyelɔ. Eyɛ mli akɛ edako moŋ, shi Alexander ni eye afii 32 lɛ he baye beni eye nii yɛ okpɔlɔŋmɛɛ ko shishi lɛ sɛɛ, ni etsɛɛɛ ni egbo, yɛ June 13, 323 D.Ŋ.B. Beni be shwieɔ mli lɛ, aja emaŋtsɛyeli kpeteŋkpele lɛ mli afee lɛ shikpɔŋkukuji ejwɛ, ni etatsɛmɛi lɛ ateŋ mɔ fɛɛ mɔ ye ekome nɔ. Nɛkɛ ji bɔ ni eba lɛ akɛ maŋtsɛyelii ejwɛ fã kpo kɛjɛ maŋtsɛyeli kpeteŋkpele kome mli, ni yɛ naagbee lɛ Roma Maŋtsɛyeli lɛ ŋɔ fɛɛ. Jeŋ hewalɛ ni tamɔ akɔɔble lɛ tee nɔ ehi shi aahu kɛyashi afi 30 D.Ŋ.B. beni maŋtsɛyelii ejwɛ nɛɛ ateŋ naagbee nɔ̃—Ptolemaik maŋtsɛmɛi awekukpaa ni ye nɔ yɛ Mizraim lɛ—gbee shi kwraa yɛ Roma hiɛ.
MAŊTSƐYELI NI JWARAA NI FUFULUƆ NII
21. Te Daniel tsɔɔ “maŋtsɛyeli ni ji ejwɛ lɛ” mli eha tɛŋŋ?
21 Daniel tee nɔ yɛ lamɔ mli amaga lɛ mlitsɔɔmɔ lɛ mli akɛ: “Ni maŋtsɛyeli ni ji ejwɛ lɛ [yɛ Babilon, Medo-Persia, kɛ Hela sɛɛ lɛ], he aaawa tamɔ dade, ni taakɛ bɔ ni dade jwaraa ni egbɛlɛɔ nibii fɛɛ lɛ, nakai nɔŋŋ eeejwara ni eeefufulu enɛɛmɛi fɛɛ, tamɔ dade fufuluɔ nii.” (Daniel 2:40) Yɛ ehewalɛ kɛ enyɛmɔ ni ekɛjwaraa nii lɛ hewɔ lɛ, jeŋ hewalɛ nɛɛ baatamɔ dade—ehe wa fe maŋtsɛyelii ni akɛ shika, jwiɛtɛi, loo akɔɔble damɔ shi kɛha amɛ lɛ. Roma Maŋtsɛyeli lɛ ji hewalɛ nɛɛ.
22. Roma Maŋtsɛyeli lɛ tamɔ dade yɛ mɛɛ gbɛ nɔ?
22 Roma jwara ni egbɛlɛ Hela Maŋtsɛyeli lɛ ni emi nɔ ni eshwɛ yɛ Medo-Persia kɛ Babilonia jeŋ hewalɛi lɛ amli lɛ fɛɛ. Akɛni ebɛ bulɛ ko kɛha Nyɔŋmɔ Maŋtsɛyeli ni Yesu Kristo jaje etsɔɔ lɛ hewɔ lɛ, egbe lɛ yɛ sɛŋmɔtso nɔ yɛ afi 33 Ŋ.B. Bɔni afee ni ejwara anɔkwa Kristojamɔ lɛ, Roma wa Yesu kaselɔi lɛ ayi. Agbɛnɛ hu, Romabii lɛ kpata Yerusalem kɛ esɔlemɔtsu lɛ hiɛ yɛ afi 70 Ŋ.B.
23, 24. Kɛfata Roma Maŋtsɛyeli lɛ he lɛ, mɛni hu amaga lɛ naji lɛ feɔ he mfoniri?
23 Jeee Roma Maŋtsɛyeli lɛ pɛ Nebukadnezar lamɔ mli amaga lɛ dade naji lɛ fee he mfoniri, shi nɔ ni jɛ mli ba yɛ maŋkwramɔŋ hu. Susumɔ wiemɔi nɛɛ ni aŋma yɛ Kpojiemɔ 17:9b, 10 lɛ ahe: “Ni maŋtsɛmɛi kpawo ni. Mɛi enumɔ lɛ egbee shi, ni mɔ kome lɛ yɛ, ni mɔ kroko lɛ nako aba, ni kɛ eba lɛ, ja ehi shi fioo.” Beni bɔfo Yohane ŋma nɛkɛ wiemɔi nɛɛ lɛ, no mli lɛ Romabii lɛ eŋɔ lɛ nom kɛtee Patmo ŋshɔkpɔ lɛ nɔ. Maŋtsɛmɛi loo jeŋ hewalɛi enumɔ ni egbee shi lɛ ji Mizraim, Ashur, Babilon, Medo-Persia, kɛ Hela. Nɔ ni ji ekpaa lɛ—Roma Maŋtsɛyeli lɛ—yɛ hewalɛ mli lolo. Shi no hu baagbee shi, ni maŋtsɛ ni gbeɔ yi feɔ kpawo lɛ baate shi kɛjɛ shikpɔŋkukuji ni Roma eye nɔ kunim lɛ ateŋ ekome mli. Mɛɛ jeŋ hewalɛ enɛ baaji?
24 Be ko lɛ Britania ji Roma Maŋtsɛyeli lɛ fã ni yɔɔ kooyi-anaigbɛ. Beni afi 1763 shɛɔ lɛ, ébatsɔ Britania Maŋtsɛyeli—Britania ni ye ŋshɔi kpawo lɛ anɔ lɛ. Beni shɛɔ afi 1776 lɛ, eshihemɔhei 13 ni yɔɔ Amerika lɛ éjaje akɛ ámɛye amɛhe koni amɛto United States, Amerika. Shi yɛ sɛɛ mli afii lɛ amli lɛ, Britania kɛ United States batsɔmɔ hefatalɔi yɛ tawuu kɛ toiŋjɔlɛ be fɛɛ mli. No hewɔ lɛ, Anglo-Amerika ekomefeemɔ lɛ ba shihilɛ mli akɛ jeŋ hewalɛ ni ji kpawo yɛ Biblia gbalɛ mli. Taakɛ Roma Maŋtsɛyeli lɛ ji lɛ, efee mɔ ni ‘he wa tamɔ dade,’ ni ekɛ nɔyeli hewalɛ ni tamɔ dade tsu nii. No hewɔ lɛ, nɔ ni fata lamɔ mli amaga lɛ dade naji lɛ ahe ji Roma Maŋtsɛyeli lɛ kɛ Anglo-Amerika jeŋ hewalɛ ni bɔ he enyɔ lɛ fɛɛ.
FUTUMƆ NI WAAA
25. Mɛni Daniel wie yɛ amaga lɛ naji kɛ waobii lɛ ahe?
25 No sɛɛ lɛ Daniel kɛɛ Nebukadnezar akɛ: “Ni bɔ ni ona naji kɛ waobii lɛ ni fã gbɛshɔ̃lɔ sũ ni fã hu dade lɛ, maŋtsɛyeli lɛ mli baagbala; shi dade lɛ hewalɛ lɛ eko aaahi mli, taakɛ bɔ ni ona akɛ dade lɛ kɛ sũ ni akpɔtɔ lɛ futu lɛ. Ni bɔ ni enane waobii lɛ fã dade ni fã hu sũ lɛ, nakai nɔŋŋ maŋtsɛyeli lɛ fã mli aaawa, ni fã hu aaajwa [he waŋ]. Ni bɔ ni ona dade ni sũ ni akpɔtɔ futu mli lɛ, nakai amɛkɛ gbɔmɛi aseshibii aaafutu amɛmli moŋ, shi amɛkpɛtɛŋ, taakɛ bɔ ni dade kɛ sũ futuuu lɛ.”—Daniel 2:41-43.
26. Mɛɛ be nɔyeli ni naji lɛ kɛ waobii lɛ feɔ he mfoniri lɛ jie ehe kpo?
26 Jeŋ hewalɛi ni tsara nɔ kɛba ni Nebukadnezar lamɔ mli amaga lɛ fãi srɔtoi lɛ damɔ shi kɛha amɛ lɛ je shishi kɛ yitso lɛ ni etee nɔ kɛbashi naji lɛ anɔ. Yɛ sane naatsɔɔmɔ ni ja naa lɛ, naji kɛ waobii ni ji “dade kɛ sũ” lɛ baafee adesa naagbee nɔyeli ni jieɔ ehe kpo ni baahi shi yɛ “naagbee be lɛ” mli lɛ he mfoniri.—Daniel 12:4.
27. (a) Mɛɛ jeŋ shihilɛ naji lɛ kɛ dade kɛ sũ waobii lɛ feɔ he mfoniri? (b) Mɛni amaga lɛ waobii nyɔŋma lɛ feɔ he mfoniri?
27 Beni afii ohai 20 lɛ jeɔ shishi lɛ, Britania Maŋtsɛyeli lɛ ye gbɔmɛi ni yɔɔ shikpɔŋ nɔ lɛ ayifalɛ mlijaa ejwɛ mli ekome nɔ. Europa maŋtsɛyelii krokomɛi ye gbɔmɛi akpekpei babaoo hu nɔ. Shi nɔ ni jɛ Jeŋ Ta I mli ba ji jeŋmaji akui moŋ yɛ maŋtsɛyelii anajiaŋ. Nifeemɔ nɛɛ tee nɔ oyayaayai yɛ Jeŋ Ta II sɛɛ. Beni maŋhedɔɔ yaa hiɛ lolo lɛ, maji ni pueɔ yɛ je lɛŋ lɛ bafá yɛ naakpɛɛ gbɛ nɔ. Amaga lɛ waobii nyɔŋma lɛ damɔ shi kɛha hewalɛi kɛ nɔyelii ni hiɔ shi nɛɛ fɛɛ, ejaakɛ yɛ Biblia lɛ mli lɛ, yibɔ ni ji nyɔŋma lɛ damɔɔ shi kɛhaa emuuyeli yɛ shikpɔŋ nɔ yɛ bei komɛi amli.—Okɛto 2 Mose 34:28; Mateo 25:1; Kpojiemɔ 2:10 he.
28, 29. (a) Taakɛ Daniel tsɔɔ lɛ, sũ lɛ damɔ shi kɛha mɛni? (b) Mɛni abaanyɛ awie yɛ dade kɛ sũ ni efutu lɛ he?
28 Amrɔ nɛɛ ni wɔyɔɔ “naagbee be” lɛ mli nɛɛ, wɔbashɛ amaga lɛ naji lɛ anɔ. Nɔyelii ni akɛ amaga lɛ naji kɛ waobii ni ji dade ni sũ efutu lɛ damɔ shi kɛha amɛ lɛ feɔ amɛnii tamɔ dade—kɛ yiwalɛ loo nɔnyɛɛ. Ekrokomɛi tamɔ sũ. Yɛ mɛɛ gbɛ nɔ? Daniel kɛ sũ lɛ to “gbɔmɛi aseshibii” ahe. (Daniel 2:43) Yɛ bɔ ni sũ ni akɛfee adesai aseshibii lɛ waaa lɛ fɛɛ sɛɛ lɛ, eba akɛ nɔyelii ni amɛ subaŋ efee tamɔ dade lɛ enyɛ ebo gbɔmɛi foji ni sumɔɔ ni anu amɛgbee yɛ nɔyelii ni yeɔ amɛnɔ lɛ amli lɛ atoi babaoo. (Hiob 10:9) Shi yiwalɛ nɔyeli kɛ gbɔmɛi foji lɛ kpɛtɛɛɛ—tamɔ bɔ ni dade kɛ sũ nyɛɛɛ akpɛtɛ lɛ. Yɛ amaga lɛ hiɛkpatamɔ mli lɛ, je lɛ baajwara dukuduku yɛ maŋkwramɔŋ diɛŋtsɛ!
29 Ani naji kɛ waobii ni mli egbala lɛ baaha amaga muu lɛ fɛɛ agbee shi? Mɛni baaba amaga lɛ nɔ?
NAAGBEE NI SA KADIMƆ WAA!
30. Tsɔɔmɔ bɔ ni Nebukadnezar lamɔ lɛ ba naagbee eha lɛ mli.
30 Susumɔ lamɔ lɛ naagbee lɛ he. Daniel kɛɛ maŋtsɛ lɛ akɛ: “Ohiɛ lɛ kwɛmɔ aahu, ni tɛ ko tse bagbee shi ni jeee nine sa he, ni ebatswa amaga lɛ naji ni ji dade kɛ sũ lɛ anɔ, ni ejwara amɛ wɔtsɔwɔtsɔ. Kɛkɛ ni dade lɛ kɛ sũ lɛ kɛ akɔɔble lɛ kɛ jwiɛtɛi lɛ kɛ shika lɛ fɛɛ tswɛm jwara wɔtsɔwɔtsɔ, ni amɛtsɔmɔ tamɔ ablenaa shaji ni jwere gbo ableshaahe, ni kɔɔyɔɔ loo amɛ kɛtee ni anaaa amɛ yɛ he ko he ko dɔŋŋ; shi tɛ lɛ ni tswa amaga lɛ tsɔ̃ gɔŋ kpeteŋkpele, ni ekpele shikpɔŋ muu lɛ fɛɛ nɔ.”—Daniel 2:34, 35.
31, 32. Mɛni agba afɔ̃ shi ni kɔɔ Nebukadnezar lamɔ lɛ naagbee fã lɛ he?
31 Kɛha emlitsɔɔmɔ lɛ, gbalɛ lɛ tee nɔ akɛ: “Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ; taakɛ bɔ ni ona akɛ tɛ lɛ tse kɛjɛ gɔŋ lɛ nɔ bagbee shi ni jeee nine sa he, ni ejwara dade lɛ kɛ akɔɔble lɛ kɛ sũ lɛ kɛ jwiɛtɛi lɛ kɛ shika lɛ.—Nyɔŋmɔ agbo lɛ ejie nɔ ni baaba wɔsɛɛ etsɔɔ maŋtsɛ, ni lamɔ lɛ yɛ mli, ni eshishitsɔɔmɔ lɛ hu ma shi shiŋŋ.”—Daniel 2:44, 45.
32 Beni enu shishi akɛ ákai elamɔ lɛ ni átsɔɔ shishi lɛ, Nebukadnezar kpɛlɛ nɔ akɛ Daniel Nyɔŋmɔ lɛ pɛ ji ‘maŋtsɛmɛi a-Nuntsɔ kɛ teemɔŋ saji Akpojielɔ.’ Maŋtsɛ lɛ kɛ gbɛhei kɛ gbɛnaa nii ni nɔ kwɔlɔ wo Daniel kɛ enanemɛi Hebribii etɛ lɛ adɛŋ. (Daniel 2:46-49) Shi kɛlɛ, mɛni Daniel ‘shishitsɔɔmɔ ni anyɛɔ akɛ he fɔ̃ɔ nɔ’ lɛ tsɔɔ yɛ ŋmɛnɛŋmɛnɛ bei nɛɛ amli?
‘GƆŊ KO KPELE SHIKPƆŊ MUU LƐ FƐƐ NƆ’
33. Mɛɛ “gɔŋ” nɔ “tɛ” lɛ tsé kɛjɛ lɛ, ni mɛɛ be kɛ mɛɛ gbɛ nɔ enɛ ba yɛ?
33 Beni “jeŋmaji abe” lɛ ba naagbee yɛ October 1914 lɛ, “Nyɔŋmɔ ni yɔɔ ŋwɛi lɛ” to ŋwɛi Maŋtsɛyeli lɛ ema shi kɛtsɔ e-Bi, Yesu Kristo ni afɔ lɛ mu lɛ ni ekɛ lɛ ta maŋtsɛsɛi nɔ akɛ “maŋtsɛmɛi amaŋtsɛ kɛ nuntsɔmɛi anuntsɔ” lɛ nɔ.a (Luka 21:24; Kpojiemɔ 12:1-5; 19:16) Nakai eba lɛ akɛ kɛtsɔ ŋwɛi hewalɛ ní jeee adesai anine nɔ lɛ, afo Mesia Maŋtsɛyeli “tɛ” lɛ kɛjɛ Yehowa jeŋ muu fɛɛ maŋtsɛyeli “gɔŋ” lɛ nɔ. Nɛkɛ ŋwɛi nɔyeli nɛɛ yɛ Yesu Kristo, mɔ ni Nyɔŋmɔ eha lɛ shihilɛ ni gbele bɛ mli lɛ dɛŋ. (Romabii 6:9; 1 Timoteo 6:15, 16) No hewɔ lɛ akɛ nɛkɛ ‘wɔ-Nuntsɔ [Nyɔŋmɔ] lɛ kɛ e-Kristo lɛ maŋtsɛyeli’—wiemɔ ni kɔɔ Yehowa jeŋ muu fɛɛ maŋtsɛyeli he lɛ—haŋ mɔ kroko. Ebaadamɔ shi kɛya naanɔ.—Kpojiemɔ 11:15.
34. Te eba lɛ tɛŋŋ ni afɔ́ Nyɔŋmɔ Maŋtsɛyeli lɛ yɛ “nɛkɛ maŋtsɛmɛi nɛɛ ayinɔ lɛ”?
34 Maŋtsɛyeli lɛ fɔmɔ ba yɛ “nɛkɛ maŋtsɛmɛi nɛɛ ayinɔ lɛ” mli. (Daniel 2:44) Jeee mɛnɛɛmɛi pɛ ji maŋtsɛmɛi ni amaga lɛ waobii lɛ feɔ amɛhe mfoniri lɛ, shi mɛi ni dade, akɔɔble, jwiɛtɛi, kɛ shika fãi lɛ fee amɛhe mfoniri lɛ hu. Eyɛ mli akɛ Babilonia, Persia, Hela, kɛ Roma maŋtsɛyelii lɛ eho akɛ jeŋ hewalɛi moŋ, shi amɛshwɛɛnii yɛ lolo yɛ afi 1914 be lɛ mli. No mli lɛ Turkeybii Ottoman Maŋtsɛyeli lɛ ji nɔ ni yeɔ Babilonia shikpɔŋkuku lɛ nɔ, ni maŋ nɔyelii miiye nɔ yɛ Persia (Iran) kɛ Hela kɛ Roma, Italy.
35. Mɛɛ be “tɛ” lɛ baatswa amaga lɛ, ni abaajie amaga lɛ kɛya kwraa yɛ mɛɛ gbɛ nɔ?
35 Etsɛŋ kwraa ni Nyɔŋmɔ ŋwɛi Maŋtsɛyeli lɛ baatswa mfonirifeemɔŋ amaga lɛ nane. Yɛ enɛ hewɔ lɛ, abaakumɔ maŋtsɛyelii lɛ fɛɛ ni amaga ni akɛ sũ mli nii fee lɛ fee amɛhe mfoniri lɛ dukuduku, ni ekɛ amɛ baaba amɛnaagbee. Yɛ anɔkwale mli lɛ, yɛ “Nyɔŋmɔ Ofe lɛ gbi wulu lɛ nɔ ta lɛ” mli lɛ, nakai “tɛ” lɛ kɛ hewalɛ baajwara nii ákɛ ebaagbɛlɛ amaga lɛ mulumulu, ni Nyɔŋmɔ ahum lɛ mli kɔɔyɔɔ lɛ baabɛɛ lɛ kɛya tamɔ ablenaashaji ni jwere ableshaahe. (Kpojiemɔ 16:14, 16) Kɛkɛ lɛ, tamɔ bɔ ni tɛ lɛ da etsɔ tamɔ gɔŋ kpeteŋkpele ni kpele shikpɔŋ muu lɛ fɛɛ nɔ lɛ, Nyɔŋmɔ Maŋtsɛyeli lɛ baatsɔ nɔyeli gɔŋ ni baaná “shikpɔŋ muu lɛ fɛɛ nɔ” hewalɛ.—Daniel 2:35.
36. Mɛni hewɔ abaanyɛ atsɛ Mesia Maŋtsɛyeli lɛ akɛ nɔyeli ni ma shi shiŋŋ lɛ?
36 Eyɛ mli akɛ Mesia Maŋtsɛyeli lɛ ji ŋwɛi nɔ̃ moŋ, shi ebaakpã ehewalɛ lɛ mli kɛbashɛ wɔ jeŋ kutruku nɛɛ nɔ kɛha adesai toibolɔi ni yɔɔ shikpɔŋ lɛ nɔ fɛɛ lɛ ajɔɔmɔ. Nɛkɛ nɔyeli ni ma shi shiŋŋ nɛɛ “fiteŋ dɔŋŋ” loo “ashiŋ . . . ahaŋ maŋ kroko.” Ákɛ nɔ ni tamɔɔɔ adesai nɔyelɔi ni gboɔ lɛ amaŋtsɛyelii lɛ, “eeedamɔ shi kɛaatee naanɔ,” kɛmiiya naanɔ. (Daniel 2:44) Eba akɛ oooná hegbɛ ni ofee eshishibii lɛ ateŋ mɔ kome kɛya naanɔ.
[Shishigbɛ niŋmai]
a Kwɛmɔ wolo nɛɛ Yitso 6.
MƐNI OYƆSE?
• Mɛɛ jeŋ hewalɛi Nebukadnezar lamɔ mli amaga kpeteŋkpele lɛ fãi srɔtoi lɛ feɔ amɛhe mfoniri lɛ?
• Mɛɛ jeŋ shihilɛ naji lɛ kɛ dade kɛ sũ waobii lɛ feɔ he mfoniri?
• Mɛɛ be ni mɛɛ “gɔŋ” afo “tɛ” lɛ kɛjɛ nɔ lɛ?
• Mɛɛ be “tɛ” lɛ baatswa amaga lɛ?
[Akrabatsa/Mfonirii ni yɔɔ baafa 63-67]
MAŊTSƐ TABILƆ TO MAŊTSƐYELI
ODEHE ni baatsɔ Babilon nɔyelɔ lɛ kɛ esraafoi lɛ kpata Mizraim tabilɔi ni yɔɔ Farao Neko shishi lɛ ahiɛ yɛ Karkemish yɛ Siria. Mizraimbii ni aye amɛnɔ kunim lɛ jo foi kɛtee wuoyigbɛ kɛmiibɛŋkɛ Mizraim, ni Babilonbii lɛ tiu amɛ. Shi shɛɛ sane ko ni jɛ Babilon hã odehe kunimyelɔ lɛ kpa amɛtiumɔ. Shɛɛ sane lɛ ji akɛ, etsɛ, Nabopolasar, egbo. Akɛni ekɛ fãmɔ hã etatsɛmɛi lɛ akɛ amɛkɛ nomii lɛ kɛ haanii lɛ aba hewɔ lɛ, Nebukadnezar kɛ oyaiyeli ku esɛɛ kɛtee shia ni eyaŋɔ maŋtsɛsɛi ni etsɛ eshi lɛ.
No hewɔ lɛ Nebukadnezar batá Babilon maŋtsɛsɛi lɛ nɔ yɛ afi 624 D.Ŋ.B., ni ebatsɔ nɔyelɔ ni ji enyɔ yɛ Babilonia Maŋtsɛyeli Hee lɛ nɔ. Yɛ enɔyeli be ni he afii 43 lɛ mli lɛ, eŋɔ shikpɔŋkukuji ni be ko lɛ Ashur Jeŋ Hewalɛ lɛ yeɔ nɔ lɛ, ni elɛɛ enɔyelihe lɛ mli, ni eŋɔ Siria ni kã kooyigbɛ lɛ kɛ Palestina ni kã anaigbɛ lɛ kɛyashi Mizraim husu lɛ naa.—Kwɛmɔ shikpɔŋ he mfoniri lɛ.
Yɛ enɔyeli afi ni ji ejwɛ (620 D.Ŋ.B.) lɛ mli lɛ, Nebukadnezar hã Yuda batsɔ̃ maŋtsɛyeli ni sɔmɔɔ lɛ. (2 Maŋtsɛmɛi 24:1) Afii etɛ sɛɛ lɛ, Yudea atuatsemɔ hã Babilon bawo Yerusalem he ka. Nebukadnezar ŋɔ Yehoiakin, Daniel, kɛ mɛi krokomɛi nom kɛtee Babilon. Maŋtsɛ lɛ loo Yehowa sɔlemɔwe lɛ nibii lɛ ekomɛi kɛtee. Efee Yehoiakin tsɛkwɛ̃ Zedekia, Yuda maŋtsɛ ni sɔmɔɔ lɛ.—2 Maŋtsɛmɛi 24:2-17; Daniel 1:6, 7.
Yɛ sɛɛ mli be ko lɛ, Zedekia hu tse atua, ni ekɛ ehe yabɔ Mizraim he. Nebukadnezar bawo Yerusalem he ka ekoŋŋ yɛ afi 607 D.Ŋ.B., ni ekumɔ gbogboi lɛ, eshã sɔlemɔtsu lɛ, ni ekpata maŋ lɛ hiɛ. Egbe Zedekia bii lɛ fɛɛ, ni eshwila Zedekia hiŋmɛi ni efimɔ lɛ bɔni afee ni eŋɔ lɛ kɛya Babilon akɛ gboklɛfonyo. Nebukadnezar ŋɔ gbɔmɛi babaoo nom ni eloo sɔlemɔwe lɛ nibii ni eshwɛ lɛ kɛtee Babilon. “Ni aŋɔ Yuda nom kɛjɛ eshikpɔŋ lɛ nɔ kɛtee.”—2 Maŋtsɛmɛi 24:18–25:21.
Nebukadnezar ye Tiro hu nɔ kunim kɛtsɔ maŋtiase lɛ he ka ni ewo lɛ nɔ—hekawoo ni ye afii 13. Yɛ hekawoo be lɛ mli lɛ, asraafoi lɛ ‘ayiteŋ kpá’ yɛ amɛ dadefaii ni kpɔlɔ amɛyiteŋ lɛ hewɔ, ni amɛkɔ̃ɔji anɔ hu ‘kpɔlɔ’ yɛ nibii ni amɛkɛwo ka lɛ teremɔ hewɔ. (Ezekiel 29:18) Yɛ naagbee lɛ, Tiro ba ehe shi eha Babilonia asraafoi lɛ.
Eyɛ faŋŋ akɛ Babilonia maŋtsɛ lɛ ji tabilɔ ni le tawuu mli ŋaa gbɛi waa. Woji komɛi ni tsɔɔ saji amli, titri lɛ nɔ ni ji Babilonia nɔ̃ lɛ tsɔɔ mli akɛ eji maŋtsɛ ni ja. Yɛ be mli ni Ŋmalɛi lɛ ewieee diɛŋtsɛ akɛ Nebukadnezar ji mɔ ni ja lɛ, gbalɔ Yeremia kɛɛ akɛ, eyɛ mli akɛ Zedekia tse atua moŋ, shi ekɛ lɛ baaye yɛ mlihilɛ naa ‘kɛji akɛ eeeya Babilon maŋtsɛ lɛ lumɛi lɛ aŋɔɔ.’ (Yeremia 38:17, 18) Ni yɛ Yerusalem hiɛkpatamɔ lɛ sɛɛ lɛ, Nebukadnezar kɛ Yeremia ye yɛ bulɛ mli. Maŋtsɛ lɛ kɛ fãmɔ ha yɛ Yeremia hewɔ akɛ: “Ŋɔɔ lɛ ni okwɛ lɛ jogbaŋŋ, ni okafee lɛ efɔŋ, shi moŋ bɔ ni eeekɛɛo lɛ, feemɔ nakai oha lɛ.”—Yeremia 39:11, 12; 40:1-4.
Ákɛ maŋnɔkwɛmɔ he gbɛjianɔtolɔ lɛ, Nebukadnezar he fee oya yɛ sui kɛ nyɛmɔi ni Daniel kɛ enanemɛi etɛ lɛ—Shadrak, Meshak, kɛ Abednego—ni amɛ Hebri gbɛi ji Hanania, Mishael, kɛ Azaria yɔɔ lɛ yɔsemɔ. No hewɔ lɛ, maŋtsɛ lɛ kɛ amɛ tsu nii yɛ gbɛhei ni kwɔlɔ amli yɛ emaŋtsɛyeli lɛ mli.—Daniel 1:6, 7, 19-21; 2:49.
Mɔ ni Nebukadnezar etu ehe eha lɛ titri yɛ jamɔ mli ji Marduk, Babilon nyɔŋmɔ titri lɛ. Maŋtsɛ lɛ kɛ ekunimyelii lɛ fɛɛ he yijiemɔ ha Marduk. Emamɔ gbatsũi eha Marduk kɛ Babilonia nyɔŋmɔi krokomɛi babaoo yɛ Babilon ni esaa amɛmli fɛfɛo. Ekolɛ ajɔɔ shika amaga ni akɛma Dura ŋa lɛ nɔ lɛ nɔ aha Marduk. Ni etamɔ nɔ ni Nebukadnezar kɛ ehe fɔ̃ɔ ŋkunyaayeli nɔ waa yɛ etawuu mli nifeemɔi amli.
Nebukadnezar hu pupuu ehe yɛ Babilon, maŋtiase ni da fe fɛɛ ni átswa gbogboi awo he lɛ ni esaa ema lɛ hewɔ. Akɛni egbe maŋtiase lɛ gbogboi ni dara naakpa ni bɔ he enyɔ ní etsɛ je etswaa shishi lɛ naa hewɔ lɛ, Nebukadnezar ha maŋtiase lɛ fee nɔ ni anyɛŋ abote mli. Maŋtsɛ lɛ saa maŋtsɛwe momo ko ni yɔɔ maŋtiase lɛ teŋ tuuŋtu lɛ, ni ema latsaa be mli maŋtsɛwe aaafee kilomitai enyɔ yɛ maŋtiase lɛ maŋtsɛwe lɛ kooyigbɛ. Bɔni afee ni esa emaŋnyɛ Medianyo, ni shweɔ ni ena ŋmeŋmei kɛ kooi ni yɔɔ emaŋ lɛ hiɛ lɛ, abɔ amaniɛ akɛ Nebukadnezar fee abɔɔ ni tsotsoro shi—ni akɛɛ eji blema je lɛ naakpɛɛ nibii kpawo lɛ ateŋ ekome lɛ.
Maŋtsɛ lɛ shwã gbi ko beni eshɛraa shi yɛ Babilon maŋtsɛwe lɛ akɛ: “Ani jeee Babel kpeteŋkpele lɛ ni mima ni etsɔ̃ maŋtsɛwe yɛ mihewalɛ kpeteŋkpele lɛ naa ha minunyam lɛ yijiemɔ lɛ nɛ! Maŋtsɛ lɛ naa enyɔɔɔ shi” ni ahã eye sɛkɛ. Enyɛɛɛ eye maŋtsɛ afii kpawo, ni eye ŋa nɔ jwɛi tamɔ bɔ ni Daniel egba efɔ̃ shi lɛ. Yɛ nakai be lɛ naagbee lɛ, akɛ maŋtsɛyeli lɛ hã Nebukadnezar ekoŋŋ, ni eye nɔ aahu kɛyashi egbele mli yɛ afi 582 D.Ŋ.B.—Daniel 4:30-36.
MƐNI OYƆSE?
Mɛni abaanyɛ awie yɛ Nebukadnezar he akɛ
• tawuu mli ŋaatsɔ̃lɔ?
• maŋnɔkwɛmɔ he gbɛjianɔtolɔ?
• Marduk jálɔ?
• tsũtswalɔ?
[Shikpɔŋ he mfoniri]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
BABILONIA MAŊTSƐYELI
ŊSHƆ TSURU
Yerusalem
Eufrate Faa
Tigris Faa
Ninive
Shushan
Babilon
Ur
[Mfoniri]
Babilon, maŋ ni da fe fɛɛ ni atswa gbogbo awo he yɛ ebe lɛ mli
[Mfoniri]
Drako lɛ ji Marduk he okadi
[Mfoniri]
Babilon abɔɔi ni tsotsoro shi ni ehe gbɛi lɛ
[Nitɛŋmɔ ni akɛmiitsɔɔ nɔ ko mli/Mfoniri ni yɔɔ baafa 56]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
DANIEL GBALƐ LƐ MLI JEŊ HEWALƐI
Amaga kpeteŋkpele lɛ (Daniel 2:31-45)
BABILONIA kɛjɛ 607 D.Ŋ.B.
MEDO-PERSIA kɛjɛ 539 D.Ŋ.B.
HELA kɛjɛ 331 D.Ŋ.B.
ROMA kɛjɛ 30 D.Ŋ.B.
ANGLO-AMERIKA JEŊ HEWALƐ kɛjɛ 1763 Ŋ.B.
JEŊ NI MAŊKWRAMƆ EGBALA MLI yɛ naagbee be lɛ mli
[Baafa muu mfoniri ni yɔɔ baafa 47]
[Baafa muu mfoniri ni yɔɔ baafa 58]