Yehowa Wiemɔ Lɛ Anɔkwaleŋ!
‘Mi, Yehowa, mihaa mitsulɔ wiemɔ baa mli anɔkwale.’—YESAIA 44:24-26, Byington.
1. Mɛni atsɔ hiɛ awie he yɛ 1864 akɛ ebaaba yɛ wɔsɛɛ be mli?
1 MƐNI baaba wɔ́? Gbɔmɛi baasumɔ ni amɛle. Shi kwɛ bɔ ni nibii ni amɛgbaa yɛ he lɛ haaa mɔ tsui anyɔ emli! Ákɛ nɔkwɛmɔ lɛ: Aaafee afi 1864 mli ni adebɔɔ nibii ahe nilelɔ Alfred B. Wallace gba ‘wɔsɛɛ be kɛha adesa weku lɛ’ ni gbɔmɔ diɛŋtsɛ to eyiŋ yɛ he nɛɛ efɔ shi: “Mɔ fɛɛ mɔ baatao . . . miishɛɛ aha lɛ diɛŋtsɛ ehe kɛ enaanyo hu; . . . . jeŋba he susumɔ ni ŋmɛɔ pɛpɛɛpɛ eŋmɛŋ gbɛ ni mɔ ko afite mɔ kroko heyeli; . . . mlai ni hi fe fɛɛ ji nɔ ni baakudɔ gbɔmɔ fɛɛ gbɔmɔ; hegbɛi ni mɛi krokomɛi yɔɔ, kɛ na ni anaa ahaa mɔ kɛ henumɔ ni yeɔ emuu ni aaajie kpo yɛ mɛi ahe.” Wallace gba fɔ shi akɛ gbɔmɔ baatsake wɔ shikpɔŋ nɛɛ ni etsɔ “fɛfɛo tamɔ paradeiso ni baa mɛi ni kɛɛ amɛnaa wɔsɛɛ be loo lalafolɔi ajwɛŋmɔ mli lɛ”!
2. Nibii ni adesa gbaa efɔ̃ɔ shi ni baaa mli lɛ teeɔ mɛɛ sanebimɔi ashi?
2 Mɔ ni ŋma nakai wiemɔi lɛ gbo nyɔji nɛɛhu sɛɛ pɛ ni atsi adesai ayisɛɛ awo Jeŋ Ta I duŋ kpii lɛ mli. Belɛ nɛgbɛ nakai ‘paradeiso fɛfɛo’ ni gbɔmɛi ni naa haa mɛi eyi mli obɔ lɛ yɔɔ? Ni ŋmɛnɛ hu? Ŋwanejee ko bɛ he, ‘mɛi babaoo asuɔmɔ he ejɔ’—yɛ gbalɛ ni aaagba ni kɛ no kpaaa gbee lɛ fɛɛ sɛɛ. (Mateo 24:12) Shi ani esa akɛ enɛ aha wɔje gbalɛ fɛɛ he ŋwane? Yehowa Nyɔŋmɔ jieɔ lɛ diɛŋtsɛ ehe kpo akɛ Mɔ ni ‘kuɔ nilelɔi anaa ni ehaa amɛnilee lɛ feɔ kwashiai asane, ni ehaa etsuji awiemɔ baa mli anɔkwale.’ (Yesaia 44:24-26, By) Shi, mɛi komɛi baabi akɛ: ‘Ani wɔbaanyɛ wɔkɛ wɔhe afɔ Biblia mli gbalɛi anɔ? Ani Yehowa Wiemɔ lɛ ji anɔkwale lɛlɛŋ?
Fitemɔ Kɛ Saamɔ
3. Taakɛ 3 Mose 26:27-35 tsɔɔ lɛ, mɛni ba Yuda kɛ Yerusalem nɔ yɛ afii ohai kpawo D.Ŋ.B. lɛ mli?
3 Odaseyelii babaoo yɛ ni tsɔɔ akɛ wɔbaanyɛ, yɛ anɔkwale mli lɛ wɔbaanyɛ wɔkɛ wɔhe afɔ Biblia mli gbalɛi anɔ. Akɛ nɔkwɛmɔ nɔ lɛ, gbalɛi ni kɔɔ fitemɔ kɛ saamɔ he lɛ ba mli anɔkwale yɛ Yehowa blema webii, Israelbii lɛ ahe. Kɛ amɛja Yehowa yɛ anɔkwale mli lɛ, amɛshwereɔ yɛ ‘shikpɔŋ ni fufɔ kɛ woo’ hoɔ yɛ nɔ, ni amɛ-Nyɔŋmɔ lɛ kɛha amɛ lɛ nɔ. (3 Mose 20:24; 1 Maŋtsɛmɛi 4:2, 20) Shi atsɔ hiɛ abɔ amɛ kɔkɔ akɛ kɛ amɛfeee toiboo lɛ nɛkɛ paradeiso nɛɛ baatsɔ ŋa kplanaa. (3 Mose 26:27-35) Yɛ afi 607 D.Ŋ.B., aaafee beni Mose eŋma 3 Mose lɛ sɛɛ afii 900 lɛ, Babiloniabii baye Yuda kɛ Yerusalem nɔ. Yɛ no sɛɛ etsɛɛɛ lɛ, Yudafoi ni shwɛ yɛ shikpɔŋ lɛ nɔ lɛ jo foi kɛtee Mizraim ni amaŋfɔfeemɔ ni agba afɔ shi lɛ ba mli anɔkwale.—Yeremia 39:8-10; 40:5; 41:2; 43:1-7.
4. (a) Mɛni shi Yehowa wo ewebii lɛ jeeŋmɔ beebe dani akpata Yerusalem hiɛ yɛ 607 D.Ŋ.B.? (b) Shiwoo nɛɛ ba mli yɛ mɛɛ gbɛ nɔ?
4 Shi Yehowa wo shi nɔ ni fe afii oha dani Yerusalem hiɛkpatamɔ lɛ po ba akɛ ekɛ ewebii ni tsakeɔ amɛtsui lɛ baaba amɛshikpɔŋ ni etsɔ amaŋfo lɛ nɔ ekoŋŋ, koni esaa eto paradeiso shihilɛ ni yɔɔ fɛo ema shi. (Yesaia 35:1-4) Nyɔŋmɔ kɛɛ hu akɛ: “Mi Yehowa, . . mɔ ni haa etsulɔ wiemɔ baa mli anɔkwale ni ekɛɔ yɛ Yerusalem he akɛ ‘abaahi mli,’ kɛ Yuda mɔji lɛ akɛ: ‘abaatswa amɛ ekoŋŋ, ni maha ahi emaŋfoi lɛ amli ekoŋŋ lɛ.’” Yesaia 44:24-26, By) Mediabii kɛ Persiabii ni Koresh nyiɛ amɛhiɛ lɛ ye Babilon nɔ kunim yɛ afi 539 D.Ŋ.B., taakɛ Yesaia egba efɔ shi lɛ. (Yesaia 44:27–45:6) Akpɔ ni Koresh wo akɛ aŋmɛ Yudafoi lɛ agbɛ ni amɛku sɛɛ amɛya amɛshikpɔŋ nɔ ni amɛyatswa sɔlemɔtsu lɛ ekoŋŋ lɛ ba mli yɛ afi 537 D.Ŋ.B. ni yɛ be ni sa mli lɛ, tsakemɔ ni ágba afɔ shi lɛ ba Yuda shikpɔŋ lɛ nɔ. (Ezra 1:1-4; Yesaia 35:5-10; Ezekiel 36:35) Kwɛ bɔ ni Yehowa Wiemɔ lɛ ji anɔkwale ha!
Tiro Nyɛɛɛ Aha Gbalɛ Afee Yaka
5. Mɛni Yehowa gba kɛtsɔ Ezekiel nɔ ni kɔɔ Tiro he?
5 Ŋwɛi gbalɛ ni jɛ mumɔŋ lɛ ba mli yɛ blema Tiro maŋ lɛ nɔ, nɔ ni atsɛɔ lɛ yɛ gbɛ ni ja nɔ akɛ “Ŋshɔnaa Maŋnyɛ” lɛ. Yehowa wie yɛ nɛkɛ Foenike ŋshɔnaa maŋ nɛɛ he akɛ: “Naa, mikɛo ena, Tiro, ni maha jeŋmaji babaoo ate shi kɛaaba onɔ . . . Naa, maha Nebukadnezar, Babel maŋtsɛ lɛ . . . aba Tiro nɔ . . . ni ekɛ edadei lɛ aaakumɔ omɔji ni kwɔlɔ lɛ. . . . Ni amɛkɛ otɛi kɛ otsei kɛ osũ lɛ baawo nu mli . . . Ni mafeeo tɛsaa kpataa; ni oootsɔ yaai akamɔ he; asaŋ bo dɔŋŋ.”—Ezekiel 26:3-14.
6. Mɛni ba blema Tiro nɔ ni ha gbalɛ ba mli?
6 Shigbeemɔ ni tamɔ nɛkɛ fee nɔ ni nyɛŋ aba mli. Taakɛ Yudanyo yinɔsane ŋmalɔ Yosefus kɛɛ lɛ, Babiloniabii ni wo Tiro he ka lɛ ye afii 13. (Josephus, Against Apion, Book 1, Chapter 21) Yinɔsane etsɔɔɔ bɔ ni Nebukadnezar mɔdɛŋbɔɔ lɛ hi jogbaŋŋ ha, eyɛ mli akɛ Tirobii agboshinii ni fite kɛ gbɔmɛi ahiɛ ni akpata lɛ da naakpa. Sɛɛ mli gbalɛ ko ni atsɔ Zakaria nɔ akɛha lɛ tsɔɔ akɛ Nyɔŋmɔ baaa kpata maŋtiase lɛ hiɛ kwraa. (Zakaria 9:3, 4) Gbalɛ nɛɛ ba mli aaafee afii 200 sɛɛ beni ákɛha. No mli lɛ mɛi ni yɔɔ Tiro ŋshɔkpɔ maŋtiase lɛ mli lɛ nuɔ he akɛ amɛyɛ shweshweeshwe yɛ egbogboi ni kwɔlɔ lɛ ahewɔ. Shi, afi 332 D.Ŋ.B. lɛ, Aleksanda Kpeteŋkpele lɛ asraafoi lɛ ye ŋshɔkpɔ maŋtiase lɛ nɔ kunim, amɛkɛ sũ ni amɛtere kɛjɛ Tiro fee gbɛ kɛtee ŋshɔkpɔ lɛ nɔ. Kɛjɛ nakai be lɛ mli kɛbaa nɛɛ, nɛkɛ shikpɔŋ ni shwɛ fioo ŋshɔ abɔle lɛ lɛ eda kɛtsɔ shia ni nui lɛ ebua naa eshwie jɛmɛ lɛ hewɔ. Agbɛnɛ, akrowa ko yɛ biɛ yɛ ŋshɔ nɛɛ naa ni wolɛi kaa amɛyaai yɛ jɛmɛ—gbalɛ mlibaa kroko. Eji anɔkwale, Yehowa Wiemɔ lɛ anɔkwaleŋ!
“Lashishwiemɔ Maŋ Lɛ” Gbee Shi
7, 8. (a) Mɛni Yehowa etsɔ egbalɔi anɔ egba efɔ shi ni kɔɔ Ninive he? (b) Mɛni hewɔ etamɔ nɔ ni Ninive nyɛŋ atsɔ “amaŋfo” lɛ?
7 Nyɔŋmɔ gbalɛ Wiemɔ lɛ hu ba mli anɔkwale yɛ blema Ninive, Asiria Maŋtsɛyeli lɛ maŋtiase ni wa Yehowa webii ayi lɛ nɔ. (2 Maŋtsɛmɛi 17:1-6; 1 Kronika 5:6, 26) Yehowa jaje kɛtsɔ egbalɔi lɛ anɔ yɛ Ninive be, yɛ be mli ni ena hewalɛ babaoo lɛ akɛ: “Nyɛhaa jwiɛtɛi, nyɛhaa shika! Ejaakɛ nii ni abua naa ato kɛ fɛo nibii sɔrɔtoi babaoo lɛ fɛɛ bɛ naagbee. . . . Ashwɛ lɛ efolo, eka shi efolo kɛ amaŋfo! . . . Kpoo ha lashishwiemɔ maŋ lɛ!” (Nahum 2:10, 11; 3:1) “Eeefee Ninive amaŋfo, . . . ni kooloi kui aabumɔ eteŋ, kooloi sɔrɔtoi fɛɛ.”—Zefania 2:13, 14.
8 Te aaafee tɛŋŋ ni enɛ aaaba mli hu? Ninive ji “maŋ kpeteŋkpele” lɛ. (Yona 1:2) Taakɛ blema yinɔsane ŋmalɔ Diodorus tsɔɔ lɛ, Ninive yɛ gbogboi ni atswa abɔle he ni elɛɛmɔ shɛɔ ninetalɔi 100, ni elɛɛ bɔ ni eeeha ta-shwiilii ni atsara amɛ etɛ ni amɛto yɛ amɛŋɛlɛ nɔ anyiɛ nɔ. Yɛ gbalɔ Yona gbii lɛ amli lɛ (afii ohai nɛɛhu D.Ŋ.B.) mɛi ni yɔɔ maŋtiase lɛ mli lɛ ayi fa fe 120,000. (Yona 4:11) Ani enɛɛmɛi fɛɛ baatsɔ “amaŋfo”?
9. Yɛ mɛɛ gbɛ nɔ nɔ ni ba Ninive nɔ lɛ eye odase lolo akɛ Yehowa Wiemɔ lɛ anɔkwale?
9 Yɛ afi 632 D.Ŋ.B., afii 16 aloo nɔ ni fe nakai yɛ Zefania gbalɛ lɛ sɛɛ lɛ, Babiloniabii kɛ Mediabii bawo Ninive he ka. Taakɛ Diodorus (Book II, Chapter 27) tsɔɔ lɛ, “nunɛmɔ babaoo” ha Tigris Faa lɛ je ŋa. Ni “eha maŋ lɛ fã nɔ ni ekumɔ egbogboi lɛ kɛtee aaafee’ ninetalɔi 12,000.” Aye Ninive nɔ kunim. Ni taakɛ blema BabyIonian Chronicle lɛ tsɔɔ lɛ, “Amɛloo haa nii babaoo kɛjɛ maŋtiase lɛ kɛ sɔlemɔwe lɛ ni amɛkumɔ maŋ lɛ ni etsɔ tamɔ tumu ko ni etsɔ gɔŋ.” Ninive bafee maŋtiase ni elaaje afii ohai babaoo. Ebutumɔ lɛ ji “sanekpakpa” diɛŋtsɛ kɛha Nyɔŋmɔ webii ni áma nɔ mi aha amɛ akɛ “Yehowa hi” ni “ele mɛi ni baa lɛ abo lɛ.” (Nahum 1:7) Ŋmɛnɛ, kɛ sralɔ ko tee Ninive ni eyana emaŋfɔ lɛ yɛ Irag lɛ, ebaana ni tooi miiye nii yɛ egbogboi ni ekumɔ ni etsɔ ŋmeŋmei lɛ anɔ taakɛ agba afɔ shi lɛ. Biɛ nɛɛ wɔnaa odaseyeli ni tsɔɔ akɛ Yehowa Wiemɔ lɛ ji anɔkwale yɛ.
“Akolonto Ni Da” Lɛ Ku’
10. (a) Mɛɛ gbalɛ ninaa áŋma afɔ shi yɛ Daniel 8:1-8? (b) Te Gabriel tsɔɔ gbalɛ nɛɛ mli nibii lɛ amli eha tɛŋŋ?
10 Daniel na too kpakpo ko ni hiɛ “akolonto ni da” ni gbe too agbo ko yɛ gbalɛ ninaa ko mli. Nɛkɛ akolonto nɛɛ ku ni ejwɛ baye najiaŋ. (Daniel 8:1-8) Mɛni ji enɛ shishi? Bɔfo Gabriel tsɔɔ mli: “Too agbo lɛ ni ona ni ji akolontoi enyɔ tsɛ lɛ, ji Media kɛ Persia maŋtsɛmɛi lɛ. Ni toó kpakpo tsɔi-atsɛ lɛ ji Hela maŋtsɛ lɛ. Ni akolonto wulu lɛ ni yɔɔ ehiŋmɛii ateŋ lɛ ji klɛŋklɛŋ maŋtsɛ lɛ. Agbɛnɛ lɛ bɔ ni no ku ni ejwɛ te shi damɔ shi yɛ enajiaŋ lɛ, maŋtsɛyelii ejwɛ aaajɛ jeŋmaŋ lɛ mli ate shi, shi amɛnaŋ hewalɛ tamɔ lɛ.”—Daniel 8:16, 20-22.
11, 12. Te Daniel 8:20-22 ba mli eha tɛŋŋ?
11 No mli lɛ, Media kɛ Persia ni akɛ too agbo lɛ ni yɔɔ akolontoi enyɔ lɛ fee ehe mfoniri yɛ ninaa lɛ mli lɛ eye Babilon ni he wa lɛ nɔ kunim. Shi Nyɔŋmɔ bɔfo lɛ ekɛɛ akɛ “too kpakpo tsɔi-atsɛ” lɛ ni ji Hela lɛ, baagbe too agbo lɛ. Enɛ ji nɔ pɛpɛɛpɛ ni ba yɛ afii ohai ejwɛ D.Ŋ.B. lɛ mli, beni Aleksanda Kpeteŋkpele lɛ asraafoi ni wieɔ Hela lɛ butu Media kɛ Persia Maŋtsɛyeli lɛ. Shi, Aleksanda gbo trukaa beni eye afii 32 pɛ, yɛ afi 323 D.Ŋ.B., ni eshiii sɛɛyelɔ ko ni he esa yɛ esɛɛ. Aleksanda gbele lɛ ha “akolonto ni da” lɛ ku, shi ‘ejwɛ ni yɛ naagbee lɛ amɛte shi yɛ no najiaŋ’ ni agba afɔ shi lɛ hu?
12 Aleksanda yɛ tatsɛmɛi babaoo, shi amɛteŋ mɛi ejwɛ ji mɛi ni jie amɛhe kpo akɛ amɛyɔɔ hewalɛ yɛ naagbee. No hewɔ lɛ eba mli akɛ “akolonto ni da” lɛ ku, shi yɛ naagbee lɛ akɛ ‘akolontoi ejwɛ’ aloo “maŋtsɛyelii ejwɛ” bato najiaŋ. Beni shɛɔ afi 301 D.Ŋ.B. lɛ, no mli lɛ nɛkɛ tatsɛmɛi nɛɛ ehe shi yɛ hewalɛ mli: Ptolemy Lagus (Mizraim kɛ Palestina) ; Seleucus Nicator (Mesopotamia kɛ Siria) ; Cassander (Makedonia kɛ Hela) ; kɛ Lysimachus (Thrace kɛ Asia Bibioo lɛ) .a Wɔnaa ekoŋŋ akɛ Yehowa Wiemɔ lɛ anɔkwaleŋ.
“Mɔ Ni Afɔ Lɛ Mu [Mesia] Ni Ji Lumɔ Lɛ” Pue!
13. Mɛni Daniel 9:24, 25 kɛɔ yɛ Mesia lɛ puemɔ lɛ he?
13 Daniel wolo lɛ hu kɛ odaseyeli titri ko: ni ekaaa haa kɛtsɔɔ akɛ Yehowa Wiemɔ lɛ anɔkwaleŋ. Atsɔ hiɛ afii ohai pii akɛ mumɔ tsirɛ Daniel koni etsɔɔ be pɔtɛɛ ni Mesia lɛ baapue yɛ shikpɔŋ nɔ. Gbalɛ ni yɔɔ miishɛɛ nɛɛ fa ko kɛɔ akɛ: “Otsii nyɔŋmai kpawo ato aha omaŋbii lɛ kɛ omaŋ krɔŋkrɔŋ lɛ, ni akɛgbe mlatɔmɔ lɛ naa, ni akɛsɔo eshai anaa, ni akɛkpata yɛ nishaianii ahewɔ, ni akɛ naanɔ jalɛ aba, ni akɛsɔo ninaa kɛ gbalɛ naa, ni akɛfɔ he krɔŋkrɔŋ fe fɛɛ lɛ mu. Esa akɛ ona ole ni ona sanesɛɛkɔmɔ akɛ kɛjɛ beyinɔ ni wiemɔ aaaje kpo akɛ aku sɛɛ ayatswa Yerusalem ekoŋŋ kɛyashi mɔ ni afɔ lɛ mu ni ji lumɔ lɛ nɔ lɛ, efeɔ otsii kpawo, agbɛnɛ hu otsii nyɔŋmai ekpaa kɛ enyɔ.”—Daniel 9:24, 25, NW.
14. (a) Mɛɛ Ŋmalɛ nɔ wɔbaadamɔ wɔkɛɛ akɛ “otsii” ni yɔɔ Daniel 9:24, 25 lɛ mli gbi fɛɛ gbi feɔ afi kome? (b) Mɛɛ afi mli ‘wiemɔ akɛ aku sɛɛ atswa Yerusalem ekoŋŋ’ lɛ ba yɛ? (d) Te “Otsii” 69 lɛ sɛɛkɛlɛ yɔɔ tɛŋŋ, ni mɛɛ be mli amɛje shishi ni amɛba naagbee?
14 Ani nɛkɛ “otsii” nɛɛ ji otsii diɛŋtsɛ? Dabi, ejaakɛ nibii fɛɛ ni ágba ni kɔɔ Mesia lɛ he lɛ baaa mli yɛ otsii 70 mli, aloo nɔ ni shɛɛɛ afi kɛ fã lɛ mli. Enɛ bafee “otsii” ni emli gbi fɛɛ gbi feɔ afi. (Okɛto 4 Mose 14:33, 34 he.) “Wiemɔ . . . akɛ aku sɛɛ ayatswa Yerusalem” lɛ je kpo yɛ Persia Maŋtsɛ Artashasta (Longimanus) nɔyeli afi ni ji 20 lɛ mli. (Nehemia 2:1-18) Akɛni eje enɔyeli shishi yɛ 474 D.Ŋ.B. hewɔ lɛ, enɔyeli afi ni ji 20 lɛ ji 455 D.Ŋ.B. No hewɔ lɛ, otsii 69 ni ji afii, ‘kɛjɛ be mli ni akɛ wiemɔ ha akɛ atswa Yerusalem lɛ kɛyashi lumɔ ni afɔ lɛ mu lɛ nɔ lɛ’ feɔ afii 483 (7 x 69) ni emli kpãa aahu kɛyashɛɔ 29 Ŋ.B.
15. Mɛni gbɛ Yudafoi lɛ kpaa aloo mɛni ji amɛhiɛnɔkamɔ yɛ afi 29 Ŋ.B.?
15 Yohane Baptisilɔ lɛ miishiɛ “tsuitsakemɔ baptisimɔ ni akɛnaa eshaifaa” ni deka bɛ mli kwraa kɛha lɛ yɛ nakai be lɛ mli. Ni Yudafoi lɛ hu? “Maŋ lɛ hiɛ ka nɔ ni mɛi lɛ fɛɛ susuɔ yɛ amɛtsuiiaŋ yɛ Yohane hewɔ akɛ benɛ lɛ ji Kristo lɛ.” (Luka 3:3-6, 15) Yudanyo woloŋlelɔ Abba Hillel Silver wie kɛkɔ nɛkɛ hiɛnɔkamɔ nɛɛ ahe akɛ: “Klɛŋklɛŋ afii oha lɛ, shi titri lɛ yinɔ ni yɔɔ dani [Yerusalem] hiɛkpatamɔ lɛ ba lɛ ná Mesia lɛ he henumɔ ko ni sa kadimɔ jogbaŋŋ. Jeee akɛ enɛ jɛ . . . yiwaa ni Romabii lɛ ha emli bawa lɛ hewɔ, shi moŋ, hemɔkɛyeli loo hiɛnɔkamɔ ni be he akɔntaabuu ni ale jogbaŋŋ yɛ nakai be lɛ mli lɛ kɛba hewɔ . . . shi aakpa Mesia lɛ gbɛ yɛ Ŋ.B. klɛŋklɛŋ afii oha lɛ mlijaai ejwɛ lɛ mli fa ni ji enyɔ lɛ mli.” Nakai “be he akɔntaabuu ni ale jogbaŋŋ” lɛ damɔ Daniel wolo lɛ nɔ.
16. (a) Mɛni hewɔ Tiberio Kaisare nɔyeli afi ni ji 15 lɛ sa kadimɔ jogbaŋŋ lɛ? (b) Beni abaptisi Yesu lɛ, mɛni ba?
16 Daniel gbalɛ lɛ etsɔɔ akɛ otsii 69 ni ji afii lɛ mli baakpã kɛyashɛ 29 Ŋ.B. Ojogbaŋŋ, ani Mesia lɛ pue yɛ be naa yɛ nakai afi lɛ mli? Hɛɛ, epuei! Yohane Baptisilɔ lɛ eje eshiɛmɔ kɛ baptisimɔ shishi yɛ “Kaisare Tiberio maŋtsɛyeli afi ni ji nyɔŋma kɛ enumɔ lɛ mli.” (Luka 3:1-3) Akɛni Tiberio batsɔ Roma maŋtsɛ yɛ August 17, 14 Ŋ.B. (Gregorian kalenda) hewɔ lɛ, Yohane nitsumɔ lɛ je shishi no sɛɛ afi ni ji 15 lɛ nɔ, aloo yɛ afi 29 Ŋ.B. agbiɛnaa be mli. Nakai afi lɛ naagbee Yohane Baptisilɔ lɛ baptisi Yesu ni jɛ Nazaret lɛ, kɛkɛ ni mumɔ krɔŋkrɔŋ lɛ kpeleke shi kɛjɛ ŋwɛi koni ebafɔ Yesu mũ ákɛ Kristo aloo Mesia lɛ, (Luka 3:21, 22) Gbalɛ ni kɔɔ Mesia lɛ he lɛ eba mli.b Aye he odase shikome ekoŋŋ akɛ Yehowa Wiemɔ lɛ anɔkwaleŋ.
17. Mɛni ji Mesia lɛ he gbalɛi ni ba mli yɛ Yesu Kristo nɔ lɛ ekomɛi?
17 Hebri Ŋmalɛ lɛ mli gbalɛi babaoo hu ba mli yɛ Yesu Kristo nɔ. Akɛ nɔkwɛmɔnɔ lɛ, obalayoo fro ko fɔ Yesu yɛ Betlehem. (Yesaia 7:14; Mika 5:1, 2; Mateo 1:18-23; 2:3-6) Agbe gbekɛbii bibii yɛ efɔmɔ sɛɛ. (Yeremia 31:15; Mateo 2:16-18) Ena hiɛnyiɛlɔ ko. (Yesaia 40:3; Mateo 3:1-3) Yesu tere wɔhelai. (Yesaia 53:4; Mateo 8:16, 17) Eta teji bi nɔ kɛbote Yerusalem. (Zakaria 9:9; Yohane 12:12-15) Bɔfoi lɛ ateŋ mɔ kome tsɔɔ esɛɛgbɛ ni ehe jwiɛtɛi kukuji 30. (Lala 41:10; Zakaria 11:12; Mateo 26:14-16, 46-56; Yohane 13:18) Beni asɛŋ Yesu sɛɛ lɛ, asraafoi ja etadei lɛ amɛha amɛhe kɛtsɔ oshikifɔɔ nɔ koni nine ashɛ emligbɛ atade lɛ nɔ. (Lala 22:19; Yohane 19:23, 24) Akuuu ewu ko, shi moŋ akɛ akplɔ tsurɔ lɛ. (Lala 34:21; Zakaria 12:10; Yohane 19:33-37) Yɛ be mli ni ehi gbonyobu mli gbii etɛ mli fai komɛi lɛ, atee lɛ shi. (Yona 1:17; 2:10; Mateo 12:39, 40; Marko 9:31; Bɔfoi lɛ Asaji 10:40) Enɛɛmɛi ji nɔkwɛmɔ nii komɛi kɛkɛ ni tsɔɔ bɔ ni Yesu ha gbalɛi ni kɔɔ Mesia lɛ he lɛ ba mli yɛ enɔ lɛ. Shi enɛɛmɛi hu yeɔ odase akɛ Yehowa Wiemɔ lɛ anɔkwaleŋ.
Abaanyɛ Ale Wɔsɛɛ Be
18, 19. (a) Mɛni hewɔ ejeee yaka sane akɛ wɔɔbi nɔ ni baaba wɔ́ lɛ? (b) Mɛɛ sanebimɔi krokomɛi teɔ shi lolo?
18 Yesu, Mesia lɛ diɛŋtsɛ kɛ gbalɛi ni haa hiɛnɔkamɔ ha. Akɛ nɔkwɛmɔ nɔ, egba ‘beni eba’ yɛ wɔsɛɛ be mli lɛ he saji efɔ shi. (Mateo 24:3-14) Yɛ anɔkwale mli lɛ, miishɛjemɔ gbalɛi ni kɔɔ afii ohai 20 nɛɛ he lɛ ji nɔ ni Biblia mli niŋmaai sɔrɔtoi ŋma fɔ shi. No hewɔ lɛ ejeee yaka akɛ aaabi akɛ, ‘Mɛni baaba wɔ̃?’ Wɔbaanyɛ wɔle!
19 Yɛ he ni wɔshɛ nɛɛ, wɔsusu Ŋmalɛ mli gbalɛi ni ba mli yɛ blema bei ni eho lɛ amli lɛ ahe. Shi wɔbe nɛɛ hu? Ani wɔyɛ odaseyelii krokomɛi ni shɛjeɔ mɔ mii akɛ Yehowa Wiemɔ lɛ anɔkwaleŋ?c
[Shishigbɛ niŋmai]
a Ajie kɛjɛ April 1, 1984 Watchtower lɛ mli.
b Kɛha enɛ mlitsɔɔmɔ lolo lɛ, ofainɛ kwɛmɔ wolo, “Your Will Be Done on Earth” ni Watchtower Bible and Tract Society of New York, Inc. fee yɛ 1958 lɛ baafai 188-95.
c Kɛha “otsii” nyɔŋmai kpawo lɛ mlitsɔɔmɔ lolo lɛ, ofainɛ kwɛmɔ wolo, “Let Your Kingdom Come” ni Watchtower Bible and Tract Society of New York, Inc. fee lɛ yitso 7.
Ani Obaanyɛ Okai?
□ Taakɛ agba afɔ shi lɛ, mɛni ba blema Tiro nɔ?
□ Ninive kɛ mɛɛ odaseyeli eha ni tsɔɔ akɛ Yehowa Wiemɔ lɛ anɔkwaleŋ?
□ Mɛni ba ni ha Daniel 8:20-22 ba mli?
□ Te “otsii” 69 lɛ sɛɛkɛlɛ yɔɔ tɛŋŋ, ni mɛɛ be mli amɛje shishi ni amɛba naagbee?
□ Mɛni ji Mesia lɛ he gbalɛi ni ba mli yɛ Yesu nɔ lɛ ekomɛi?