‘Nii Ni Ajie Lɛ Kpo Lɛ Ji Wɔ Nɔ’
“Nii ni aŋɔtee lɛ ji Yehowa, wɔ-Nyɔŋmɔ lɛ nɔ, shi nii ni ajie lɛ kpo lɛ ji wɔ . . . nɔ̃.”—5 MOSE 29:28.
1, 2. (a) Mɛni hewɔ Yehowa kpojiemɔi lɛ ahe hiaa adesai waa nakai lɛ? (b) Mɛni ji nɔ ni esa akɛ efee wɔsubaŋ yɛ saji ni Yehowa eha wɔle lɛ ahe?
KƐ́ MƆ ko na ehe yɛ shikpɔŋ ko ni akɛ okpɛlɛmii bibii ni fɛ́lɛɔ ni gbeɔ mɛi ehɔlɔ shikpɔŋ, shi ehiɛ shikpɔŋ lɛ mfoniri ni tsɔɔ gbɛ ni kamɔ okpɛlɛmii bibii ni akɛhɔlɔ shikpɔŋ nɛɛ ateŋ lɛ, ani obaanyɛ osusu bɔ ni ebaakase nakai shikpɔŋ lɛ he mfoniri lɛ jogbaŋŋ koni enyiɛ egbɛtsɔɔmɔi lɛ fɛɛ sɛɛ lɛ he? Aloo susumɔ mɔ ko ni miiye hela ko ni anyɛŋ atsa lɛ he. Ani obaanyɛ osusu miishɛɛ ni ebaana yɛ be mli ni ediɔ nibii heei ni ále yɛ tsofafeemɔ mli ni kɛ hiɛnɔkamɔ haa etsamɔ lɛ sɛɛ lɛ he? Ojogbaŋŋ, anɔkwa sane ni yɔɔ mɔbɔ lɛ ji akɛ wɔyɛ shihilɛi enyɔ nɛɛ fɛɛ mli. Je ko ni tsɔnei ni atsɔ̃ kɛ bui ni egbɛ eshwa he fɛɛ he ni baanyɛ akpata wɔhiɛ lɛ mli wɔyɔɔ lɛ. Ni wɔmiigboi yɛ hela ni adesa nyɛŋ atsa ni ji emuu ni ayeee ni wɔna akɛ gboshinii lɛ hewɔ. (1 Yohane 2:15-17; Romabii 7:20, 24) Nyɔŋmɔ pɛ ji mɔ ni baanyɛ aha wɔyoo nɛkɛ tsɔnei nɛ ni wɔjo naa foi, ni lɛ pɛ ji mɔ ni yɔɔ tsabaa kɛha emuu ni wɔyeee lɛ. No hewɔ ni Yehowa kpojiemɔi lɛ ahe hiaa wɔ lɛ.
2 Ni no hewɔ hu ni mumɔ naa niŋmalɔ ni ŋma Abɛi awolo lɛ wo ŋaa akɛ: “Ba otoi shi, ni onu nilelɔi awiemɔi, ni okɛ otsui afɔ minilee lɛ nɔ.” (Abɛi 22:7) Nakai nɔŋŋ wɔkaneɔ nɔ ko ni tamɔ enɛ yɛ Abɛi 18:15: “Hiɛtɛlɔ tsui naa nilee, ni nilelɔ toi taoɔ nilee sɛɛgbɛ.” Wɔnyɛŋ wɔtsɔ wɔsɛɛ wɔha nilee fɛɛ nilee ni Yehowa jieɔ lɛ kpo lɛ.
Yehowa Jieɔ Teemɔŋ Saji Akpo
3. Mɛɛ Yehowa yiŋtoi lɛ akpojiemɔ eha Adam kɛ Hawa lɛ?
3 Yɛ miishɛɛ mli lɛ, Yehowa ejie nilee kpo etsɔɔ ni eshiuuu nɔ ko nɔ. Kɛjɛ nibɔɔ be mli tɔɔ ni Nyɔŋmɔ etee nɔ ekɛ saji ni he hiaa ejalɔi eha amɛ fiofio yɛ shihilɛi sɔrɔtoi ashishi (Abɛi 11:9; Jajelɔ 7:12) Etsɔɔ mli kɛjɛ shishijee akɛ Adam kɛ Hawa kɛ amɛseshibii baaye shikpɔŋ lɛ kɛ enɔ kooloi fɛɛ nɔ. (1 Mose 1:28, 29) Shi, Satan laka Adam kɛ Hawa ni amɛfee esha, ni ebafee nɔ ni wa akɛ aaana gbɛ ni ŋwɛi yiŋtoo nɛɛ aaatsɔ nɔ aba mli koni ewo Nyɔŋmɔ hiɛ nyam. Shi Yehowa je shishi etsɔɔ saji amli oya. Ejie lɛ kpo akɛ, yɛ be ni sa mli lɛ, “Seshi” ko ni ja baapue, ni ebaafite Satan kɛ esɛɛnyiɛlɔi lɛ anitsumɔi fɛɛ.—1 Mose 3:15.
4, 5. Mɛɛ kpojiemɔi krokomɛi Yehowa fee, ni namɛi ji gbɔmɛi ni akɛ amɛ tsu nii lɛ?
4 Etamɔ nɔ ni hii kɛ yei ni sheɔ Nyɔŋmɔ gbeyei lɛ yɛ saji ni amɛbaasumɔ ni amɛbi yɛ Seshi lɛ he. Namɔ ni? Mɛɛ be ebaaba? Ehe baaba sɛɛnamɔ aha adesai yɛ mɛɛ gbɛ nɔ? Yɛ be mli ni afii ohai abɔ lɛ hoɔ lɛ, Yehowa kɛ kpojiemɔi ni kɔɔ eyiŋtoi ahe lɛ ekrokomɛi ha, ni yɛ sɛɛ mli lɛ, eha nɛkɛ sanebimɔi nɛɛ fɛɛ ahetoo. Dani Nu Afaa lɛ aaaba lɛ, ekɛ emumɔ tsirɛ Henok ni egba yɛ Satan seshi lɛ hiɛkpatamɔ ni baa Iɛ he. (Yuda 14, 15) Aaafee afii 2,400 dani wɔ-Ŋmɛnɛŋmɛnɛ Be lɛ aaaba lɛ, ejie lɛ kpo etsɔɔ Noa ákɛ adesa wala kɛ lá yɛ krɔŋkrɔŋ—anɔkwale ni baafee nɔ ni he hiaa waa kɛ́ shiwoo Seshi lɛ ba lɛ.—1 Mose 9:1-7.
5 Yɛ Noa gbii lɛ asɛɛ lɛ, Yehowa jie nilee ni he hiaa kpo etsɔɔ kɛtsɔ blematsɛmɛi anɔkwafoi krokomɛi anɔ. Yɛ afii ohai 20 D.Ŋ.B. mli lɛ, Abraham kase akɛ shiwoo Seshi lɛ baafee eseshibii lɛ ateŋ mɔ ko. (1 Mose 22:15-18) Nɛkɛ shiwoo nɛɛ batsɔ Abraham bi Isak kɛ enabi Yakob (ni sɛɛ mli lɛ atsɛ lɛ Israel) lɛ agboshinii ni jara wa waa diɛŋtsɛ. (1 Mose 26:3-5; 28:13-15) Kɛkɛ ni Yehowa tsɔ Yakob nɔ ejie lɛ kpo akɛ nɛkɛ Seshi nɛɛ, “Shilo” nɛɛ baafee nɔyelɔ ni yɔɔ hewalɛ waa ni abaafɔ lɛ yɛ ebi Yuda wekukpaa lɛ mli.—1 Mose 49:8-10.
6. Namɛi bafee gbɛ kɛha “nii ni ajie lɛ kpo” lɛ yɛ afii ohai 16 D.Ŋ.B. lɛ mli, ni mɛni ji nibii heei ni amɛkase lɛ ekomɛi?
6 Afii ohai 16 D.Ŋ.B. lɛ mli ni Yehowa to Israel bii lɛ efee amɛ maŋ. Anɔkwale lɛ ni ajieɔ lɛ kpo kɛyaa nɔ lɛ batsɔ namɔ nɔ agbɛnɛ? Mose ha nɛkɛ sanebimɔ nɛɛ hetoo yɛ wiemɔ ni ewie etsɔɔ nɛkɛ maŋ hee nɛɛ mli lɛ mli: “Nii ni aŋɔtee lɛ ji Yehowa, wɔ-Nyɔŋmɔ lɛ nɔ, shi nii ni ajie lɛ kpo lɛ ji wɔ kɛ wɔbii anɔ kɛmiiya bei ni aleee, bɔni afee ni wɔye nɛkɛ mla nɛɛ mli wiemɔi lɛ fɛɛ nɔ.” (5 Mose 29:28, NW) Hɛɛ, yɛ efɔmɔ yɛ afi 1513 D.Ŋ.B. lɛ sɛɛ lɛ, Israel maŋ lɛ bafee gbɛ loo dɛŋdade ko ni “atuu Nyɔŋmɔ wiemɔi lɛ awo amɛdɛŋ.” (Romabii 3:2) Ni mɛɛ wiemɔi ni fa po enɛ ji! Nyɔŋmɔ gbala Israelbii lɛ ewo Mla kpaŋmɔ ni baanyɛ aha amɛna hegbɛ amɛtsɔmɔ maŋ ni yeɔ osɔfoi kɛ maŋtsɛmɛi lɛ mli. (2 Mose 19:5, 6) Nɔ ni fata Mla lɛ he ji jeŋba he mlai ni ye bua amɛ koni amɛyoo ni amɛkwa esha ni baaha amɛgbee shi lɛ kɛ agbɛnɛ afɔleshaa he gbɛjianɔtoi ni kɛ kooloi ala ni yɔɔ krɔŋkrɔŋ lɛ tsu nii ni ekɛjie amɛhe eshai kɛya yɛ gbɛ fioo ko nɔ.
7, 8. (a) Mɛɛ saji krokomɛi Yehowa jie lɛ kpo yɛ Seshi ni baa lɛ he? (b) Mɛɛ gbɛ nɔ atsɔ abaa “nii ni ajie lɛ kpo” lɛ ayi, ni namɔ jie nɛkɛ nibii nɛɛ ahe shishiumɔ ni ja lɛ kpo?
7 Beni be hoɔ lɛ, Yehowa kɛ kpojiemɔi babaoo ni kɔɔ Seshi lɛ he ha. Nyɔŋmɔ jie lɛ kpo kɛtsɔ lalatsɛ lɛ nɔ akɛ Jeŋmaji lɛ baakpoo Seshi lɛ, shi Seshi lɛ baaye kunim yɛ Yehowa yelikɛbuamɔ naa. (Lala 2:1-12) Etsɔ Yesaia nɔ ejie lɛ kpo akɛ Seshi lɛ baatsɔ “Hejɔlɛ lumɔ” ni akɛ ebaana amanehulu yɛ mɛi krokomɛi ahe eshai ahewɔ. (Yesaia 9:5; 53:3-12) Yehowa jie hei ni abaafɔ Seshi lɛ yɛ lɛ po kpo yɛ afii ohai kpaanyɔ D.Ŋ.B. mli, ni agbɛnɛ be ni ekɛbaaje esɔɔmɔ nitsumɔ lɛ shishi lɛ hu yɛ afii ohai ekpaa D.Ŋ.B. lɛ mli.—Mika 5:2; Daniel 9:24-27.
8 Yɛ naagbee lɛ, abua “nii ni ajie lɛ kpo” lɛ anaa afee lɛ Hebri Ŋmalɛi ni hiɛ woji 39. Shi enɛ ji klɛŋklɛŋ nifeemɔ kɛkɛ yɛ enɛɛmɛi fɛɛ mli. Eshɛɔ be ni nibii ni aŋmala lɛ ashishinumɔ wa, kɛha mɛi ni atsɔ amɛnɔ aŋmala lɛ po! (Daniel 12:4, 8; 1 Petro 1:10-12) Shi, yɛ be mli ni yɛ naagbee lɛ shishinumɔ lɛ ba lɛ, ebafeee nɔ ni damɔ adesa ko shishitsɔɔmɔ nɔ. Taakɛ eji yɛ gbalɛ lamɔi amli lɛ, “shishitsɔɔmɔ lɛ . . . Nyɔŋmɔ nɔŋ.”—1 Mose 40:8.
Gbɛ Hee
9. Mɛni hewɔ heloonaa Israel laaje hegbɛ ni ekɛaatsɔɔ gbɛ ni aaatsɔ nɔ akɛ “nii ni ejie lɛ kpo” lɛ aha lɛ, ni mɛɛ be mli enɛ ba?
9 Beni Yesu Kristo yɔɔ shikpɔŋ nɔ lɛ, no mli lɛ Israel ka he eji Nyɔŋmɔ gbɛ. Esa akɛ mɛi fɛɛ ni sumɔɔ akɛ amɛaasɔmɔ Yehowa lɛ afee nakai yɛ maŋ ni ahala amɛ lɛ kɛbɔɔ mli. (Yohane 4:22) Shi Mose etsɔɔ akɛ hegbɛ ni akɛfeɔ “nii ni ajie lɛ kpo lɛ” he sɔɔlɔi lɛ hu kɛ gbɛnaa nii baa. Ekɛɛ akɛ: “Nii ni ajie lɛ kpo lɛ ji wɔ kɛ wɔbii anɔ kɛmiiya naanɔ be ni aleee bɔni afee ni wɔye nɛkɛ mla nɛɛ mli wiemɔi lɛ fɛɛ nɔ.” (5 Mose 29:28, NW) Nakai “be ni aleee” lɛ ba naagbee yɛ afi 33 Ŋ.B. Mɛni hewɔ? Ejaakɛ akɛ maŋ lɛ, Yudafoi lɛ yeee ‘mla nɛɛ mli wiemɔi lɛ fɛɛ nɔ.’ Titri lɛ, amɛhereee Seshi, Yesu Kristo lɛ, eyɛ mli akɛ Mla lɛ eteee nɔ efee amɛ “tsɔselɔ kɛmiiya nɔ.” (Galatabii 3:24) Akɛni amɛnyɛɛɛ amɛfee nakai hewɔ lɛ, Yehowa hala gbɛ kroko eha “nii ni ajie lɛ kpo lɛ.”
10. Mɛni bafee gbɛ hee kɛha Yehowa kpojiemɔi lɛ?
10 Mɛni ji nɛkɛ gbɛ hee nɛɛ? Paulo ha Efesobii lɛ le enɛ be mli ni eŋma akɛ “koni agbɛnɛ atsɔ asafo lɛ nɔ aha . . . ele Nyɔŋmɔ nilee ni fa babaoo lɛ, yɛ naanɔ yiŋ ni eto yɛ Kristo Yesu, wɔ-Nuŋtsɔ lɛ mli lɛ naa.” (Efesobii 3:10, 11) Hɛɛ, Kristofoi asafo lɛ, ni ato shishi yɛ Pentekoste afi 33 Ŋ.B. lɛ ji kuu ni akɛ “nii ni ajie lɛ kpo” ehee lɛ wo amɛdɛŋ. Akɛ kuu lɛ, Kristofoi ni afɔ amɛ mu nɛɛ sɔmɔ akɛ “tsulɔ anɔkwafo kɛ nilelɔ” ni ahala lɛ koni ekɛ mumɔŋ niyenii aha yɛ be ni sa mli. (Mateo 24:45) Agbɛnɛ Kristofoi lɛ ebatsɔmɔ “Nyɔŋmɔ saji lɛ anɔ tsuji.”—1 Korintobii 4:1.
11, 12. Mɛni ji kpojiemɔi ni yɔɔ naakpɛɛ ni atsɔ nɛkɛ gbɛ nɛɛ nɔ akɛha lɛ ekomɛi?
11 Anɔkwale titri ni kɔɔ nɛkɛ “teemɔŋ saji” heei nɛɛ ahe ji akɛ Yesu Kristo, shiwoo Seshi lɛ epue. (Galatabii 3:16) Yesu ji “Shilo,” mɔ ni yɔɔ hegbɛ akɛ eyeɔ adesai anɔ, ni Yehowa ehala lɛ akɛ Maŋtsɛyeli ni yɛ naagbee lɛ ekɛ Paradeiso baaba shikpɔŋ nɛɛ nɔ lɛ nɔ Maŋtsɛ. (Yesaia 11:1-9; Luka 1:31-33) Yesu ji Yehowa Osɔfonukpa hu ni ehala, mɔ ni kɛ ewala ni yeɔ emuu ni muji ko bɛ he lɛ ha adesai akɛ kpɔmɔnɔ—shishitoo mla ni kɔɔ krɔŋkrɔŋ ni la ji lɛ he nitsumɔ ni yɔɔ naakpɛɛ fe fɛɛ. (Hebribiii 7:26; 9:26) Kɛjɛ enɛ nɔ kɛyaa lɛ, adesai ni heɔ yeɔ lɛ na hiɛnɔkamɔ akɛ amɛnine baanyɛ ashɛ adesa wala ni yeɔ emuu ni Adam laaje lɛ nɔ ekoŋŋ.—1 Yohane 2:1, 2.
12 Nɛkɛ shiwoo Seshi nɛɛ hu ji teŋdamɔlɔ, lɛ edamɔɔ kpaŋmɔ hee ni akɛtoɔ Mla kpaŋmɔ momo lɛ najiaŋ lɛ mli ehaa esɛɛnyiɛlɔi lɛ kɛ eŋwɛi Tsɛ lɛ. (Hebribii 8:10-13; 9:15) Yɛ nɛkɛ kpaŋmɔ hee nɛɛ hewɔ lɛ, Kristofoi asafo lɛ ni daa kɛyaa hiɛ lɛ baye heloo naa Israel najiaŋ, amɛbatsɔmɔ mumɔŋ Israel, “Abraham seshi” yɛ mumɔŋ kɛ Yesu. kɛ “nii ni ejie lɛ kpo” lɛ ahe tsuji. (Galatabii 3:29; 6:16; 1 Petro 2:9) Agbɛnɛ nɔ ko ni Yudafoi lɛ susuko he dã nɛ—afɔ̃ nine atsɛ Jeŋmajiaŋbii ni amɛbatsɔmɔ nakai mumɔŋ Israel maŋ hee lɛ fã! (Romabii 2:28, 29) No hewɔ lɛ, akɛ nitsumɔ wo Yudafoi kɛ mɛi ni jeee Yudafoi ni ji mumɔŋ Israelbii lɛ adɛŋ koni amɛfee Yesu kaselɔi yɛ shikpɔŋ muu lɛ fɛɛ nɔ. (Mateo 28:19, 20) No hewɔ lɛ, “nii ni ajie lɛ kpo” yɛ batsɔ nii ni esa akɛ ale yɛ majimaji ateŋ.
13. Mɛɛ gbɛ nɔ atsɔ abaa nɛkɛ nibii heei ni “ajie lɛ kpo” nɛɛ ayi aha yinɔi ni baaba yɛ wɔsɛɛ be mli?
13 Yɛ be ni sa mli lɛ, atsɔ Kristofoi asafo lɛ nɔ aŋmala “nii ni ajie lɛ kpo” nɛɛ awo woji 27 ni feɔ Kristofoi a-Hela Ŋmalɛi lɛ amli ni enɛ kɛ Biblia kpo muu lɛ fɛɛ ni jɛ mumɔŋ lɛ naabuamɔ ba naagbee. Shi shikome ekoŋŋ lɛ, nɔ ni yɔɔ nɛkɛ woji nɛɛ amli ji gbalɛi babaoo ni kɔɔ Yehowa yiŋtoo he, ni afii ohai pii dani abaanu shishi jogbaŋŋ. Shikome ekoŋŋ lɛ, yɛ anɔkwale mli lɛ, ŋmalɛi lɛ aŋmalalɔi lɛ miisɔmɔ yinɔi ni anako afɔ amɛ diɛŋtsɛ.
“Nii Ni Ajie Lɛ Kpo” Ŋmɛnɛ
14. Akɛni hemɔkɛyeli kwamɔ kpeteŋkpele lɛ eba hewɔ lɛ, mɛɛ be Yehowa baaha la akpɛ yɛ “nii ni ejie lɛ kpo” lɛ anɔ ekoŋŋ?
14 Yɛ bɔfoi lɛ agbele sɛɛ lɛ, hemɔkɛyeli kwamɔ kpeteŋkpele lɛ tee nɔ eshwere yɛ mɛi ni tsɛɔ amɛhe Kristofoi lɛ ateŋ, taakɛ agba afɔ shi lɛ. (Mateo 13:36-42; Bɔfoi lɛ Asaji 20:29, 30) Nɔ ni nyiɛ sɛɛ ba ji afii ohai pii, ni “nii ni ajie lɛ kpo” lɛ ahe shishinumɔ lɛ fɛɛ nɔ baha, eyɛ mli akɛ Yesu shiii mɛi ni taoɔ akɛ amɛaahi shi akɛ anɔkwafoi lɛ. (Mateo 28:20) Shi, Yesu ewo shi akɛ shihilɛ ni tamɔ nɛkɛ ehiŋ shi kɛyaŋ naanɔ. Abaagbála yiwalɔi lɛ kɛ jalɔi lɛ ateŋ faŋŋ yɛ nibii agbɛjianɔtoo lɛ naagbee lɛ mli, ni ‘jalɔi lɛ aaakpɛ tamɔ hulu yɛ amɛ-Tsɛ maŋtsɛyeli lɛ mli.’ (Mateo 13:43) Tamɔ bɔ ni Daniel gba akɛ ‘anɔkwale nilee baafa babaoo yɛ naagbee be lɛ mli’ lɛ. (Daniel 12:4) La baakpɛ ashwie “nii ni ajie lɛ kpo” lɛ anɔ ekoŋŋ.
15. Mɛni hewɔ Kristendom mli jamɔi lɛ efee amɛhe mɛi ni esaaa akɛ amɛsɔmɔɔ akɛ gbɛ kɛhaa “nii ni ejie lɛ kpo” ehee kwraa ni eba lɛ?
15 Nibii agbɛjianɔtoo lɛ naagbee lɛ mli wɔyɔɔ kɛjɛ 1914 kɛbaa nɛɛ. No hewɔ lɛ, ehe miihia ni wɔle mɛi ni Yehowa kɛ amɛ tsuɔ nii ŋmɛnɛ akɛ gbɛ kɛba mumɔŋ la hee nɛɛ. Eka shi faŋŋ akɛ ekɛ Kristendom jamɔi ni ato ama shi lɛ tsuuu nii. Ana akɛ mɛnɛɛmɛi sumɔɔɔ ni amɛshɛrɛɔ apasa tsɔɔmɔi ni amɛbua naa kɛjɛ hemɔkɛyeli kwamɔ kpeteŋkpele be lɛ mli lɛ amɛshwieɔ. Ŋmɛnɛ, amɛhiɛnyiɛlɔi lɛ ateŋ mɛi pii kɛ amɛhe ewo blemasaji kɛ jamɔ mli hemɔkɛyeli amli aahu akɛ amɛŋmɛɛɛ gbɛ ni nilee hee ko abote amɛjwɛŋmɔ mli dɔŋŋ, aloo yiŋkɔshikɔshifeemɔ ena amɛnɔ hewalɛ aahu akɛ amɛyiŋ feɔ amɛ naa yɛ Biblia lɛ ni jɛ mumɔŋ lɛ kɛ bɔ ni jeŋba kpakpa he tɛi ni afolɔ ashwie shi lɛ sa jogbaŋŋ ha lɛ he.
16. Namɛi ebafee Yehowa gbɛ yɛ ŋmɛnɛŋmɛnɛ bei nɛɛ amli lɛ?
16 Yesu kɛɛ akɛ abaashɔ Nyɔŋmɔ Maŋtsɛyeli lɛ kɛjɛ Yudafoi lɛ adɛŋ “ni aaaŋɔ-ha maŋ ko ni woɔ yibii.” (Mateo 21:43) Enɛ bafee mumɔŋ Israel ni ji Kristofoi asafo ni eje shishi ehee lɛ yɛ klɛŋklɛŋ afii oha Iɛ mli. Ŋmɛnɛ, kuu kome pɛ yɔɔ ni woɔ yibii ni tamɔ klɛŋklɛŋ asafo lɛ nɔ lɛ. Nɛkɛ mumɔŋ Israelbii nɛɛ ji “tsulɔ anɔkwafo kɛ nilelɔ” kuu lɛ ni yɔɔ Mateo 24:45-47 lɛ mli bii. Taakɛ klɛŋklɛŋ Kristofoi lɛ ji lɛ, nɛkɛ naagbee gbii nɛɛ amli Kristofoi Iɛ sheee gbeyei akɛ ‘amɛaaha amɛla lɛ akpɛ.’ (Mateo 5:14-16) Kɛjɛ 1919 mli tɔ̃ɔ ni amɛje shishi amɛkɛ ekaa tsu Maŋtsɛyeli lɛ he sanekpakpa lɛ shiɛmɔ yɛ jeŋ fɛɛ kɛha odaseyeli lɛ he nii. (Mateo 24:14) Akɛni amɛwo Nyɔŋmɔ Maŋtsɛyeli lɛ yibii hewɔ lɛ, Yehowa ejɔɔ amɛ babaoo ni eha amɛle “Nyɔŋmɔ nilee ni fa babaoo lɛ” he nibii ni yɔɔ ehee lɛ fɛɛ.—Efesobii 3:10.
17, 18. Mɛɛ shishiumɔ ni yaa hiɛ Yehowa etee nɔ ekɛha fiofio kɛtsɔ ŋmɛnɛŋmɛnɛ beaŋ gbɛ lɛ nɔ?
17 No hewɔ lɛ, abanu Yesu gbalɛ kpeteŋkpele ni kɔɔ gwaŋtɛŋi lɛ kɛ abotiai lɛ ahe shishi jogbaŋŋ yɛ 1923 mli, ni abayoo akɛ aakojo jeŋ muu lɛ fɛɛ. (Mateo 25:31-46) Afi 1925 mli ni Nyɔŋmɔ tsuji ni yɔɔ shikpɔŋ nɛɛ nɔ lɛ baná Kpojiemɔ yitso 12 lɛ he nilee ni ja ni amɛyoo nɔ ni ba diɛŋtsɛ yɛ afi 1914 ni akadi lɛ. Agbɛnɛ afi 1932 mli ni aha amɛ shishinumɔ mli bakwɔ lolo. Yehowa jie lɛ kpo akɛ Ŋmalɛ ni kɔɔ Yudafoi lɛ ni aaaku sɛɛ akɛ amɛ aba Yerusalem ekoŋŋ lɛ he lɛ kɔɔɔ heloo naa Israel ni amɛjie amɛhe kpo akɛ amɛyeee anɔkwale kɛjɛ jeeŋmɔ ni ashɛrɛ amɛ ashwie lɛ ahe, shi moŋ, ekɔɔ mumɔŋ Israel, Kristofoi asafo lɛ he. (Romabii 2:28, 29) Kɛkɛ ni yɛ 1935 mli lɛ, amɛbaná Yohane ninaa ni kɔɔ “asafo babaoo” ni yɔɔ Kpojiemɔ yitso kpawo lɛ he shishinumɔ ni ja ni enɛ gbele mɛi ni afɔ amɛ mu lɛ ahiŋmɛi ni amɛyoo naabuamɔ nitsumɔ kpeteŋkpele ni ka amɛhiɛ lolo lɛ.—Kpojiemɔ 7:9-17.
18 Enɛ kanya shiɛmɔ nitsumɔ lɛ ni awo mli hewalɛ yɛ jeŋ fɛɛ, yɛ be mli ni “nibii ni yɔɔ shikpɔŋ nɔ” lɛ anaabuamɔ je shishi kɛ ekaa yɛ naagbee lɛ. (Efesobii 1:10) Yɛ afi 1939 yɛ be mli ni ta lɛ he atatui buaa ehe naa yɛ Europa lɛ, kɛkɛ ni aha maŋsaji ni akɛ he wooo mli lɛ mli bafee faŋŋ fe be fɛɛ. Afi 1970 mli ni abayoo “lumɛi” ni yɔɔ Yesaia 32:1, 2 lɛ jogbaŋŋ. Yɛ afi 1962 lɛ, abanu mɛi ni ji “hegbɛi ni yeɔ nɔ” lɛ kɛ bɔ ni Kristofonyo lɛ nyɛɔ ekɛ amɛ yeɔ lɛ shishi jogbaŋŋ, ni emli bafee faŋŋ yɛ “nii ni ajie lɛ kpo” lɛ mli. (Romabii 13:1, 2) Ni yɛ 1965 mli lɛ, abaná shikpɔŋ nɔ gbohiiashitee kɛ mɛi ni ehe baaba sɛɛnamɔ aha amɛ lɛ he shishinumɔ ni mli ka shi faŋŋ.—Yohane 5:28, 29.
19. Yehowa “tsulɔ” kuu ni yɔɔ ŋmɛnɛ lɛ ejie ehe kpo akɛ Nyɔŋmɔ Wiemɔ Iɛ nɔkwɛlɔ ni sa jogbaŋŋ yɛ mɛɛ gbɛ nɔ?
19 Kɛfata he lɛ, Kristofoi asafo lɛ ni afɔ amɛ mu yɛ afii ohai 20 nɛɛ mli lɛ efee Nyɔŋmɔ Wiemɔ ni ji “nii ni ajie lɛ kpo” lɛ ni aŋmala ashwie shi lɛ nɔkwɛlɔi ni sa. Nɛkɛ asafo nɛɛ mli bii lɛ anajiaŋdamɔlɔi lɛ je shishi akɛ amɛaatsɔɔ Biblia lɛ shishi kɛba ŋmɛnɛŋmɛnɛ beaŋ Ŋleshi wiemɔ mli, ni kɛbashi ŋmɛnɛ, New World Translation of the Holy Scriptures lɛ epue yɛ wiemɔi 11 mli, ni ákala ekomekomei 40,000,000. Kristofoi ni afɔ amɛ mu nɛɛ ni ji “tsulɔ” kuu lɛ hu nyiɛɔ majimaji ateŋ nitsɔɔmɔ he gbɛjianɔtoo ko hiɛ ni amɛ amɛfeɔ Biblia kasemɔ he woji kɛ woji tɛtrɛbii. Etoɔ daa otsi kpeei, daa kpeei wuji, kɛ skul sɔrɔtoi ahe gbɛjianɔ—ni fɛɛ lɛ, asaa lɛ jogbaŋŋ koni akɛye abua mɛi ni taoɔ anɔkwale lɛ koni amɛná “nii ni ajie lɛ kpo” lɛ he anɔkwale nilee. Yɛ anɔkwale mli lɛ, “jalɔi” lɛ miikpɛ “tamɔ hulu” yɛ mumɔŋ shishinumɔ naa bianɛ, ni amɛmiitsɔɔ akɛ nitsumɔ ni akɛwo amɛdɛŋ lɛ sa amɛ.—Mateo 13:43.
Wɔ Gbɛnaa Nii
20, 21. (a) Te atsirɛ lalatsɛ lɛ ni efee enii yɛ Yehowa Wiemɔ ni ájie lɛ kpo lɛ he eha tɛŋŋ? (b) Mɛɛ saji abaasusu he yɛ nikasemɔ ni nyiɛ sɛɛ lɛ mIi?
20 No hewɔ lɛ, Yehowa shiko wɔ ni wɔka yɛ je ni akɛ okpɛlɛmii ehɔlɔ emli shikpɔji fɛɛ mli nɛɛ mli. Shi moŋ, ekɛ e-Wiemɔ lɛ eha wɔ koni ekpɛ yɛ wɔgbɛ nɔ koni eye ebua wɔ ni wɔkwa mumɔŋ osharai. (Lala 119:105) Yehowa shiko wɔ koni esha kɛ emuu ni ayeee agbe wɔ. Shi moŋ, egbele naanɔ wala yɛ paradeiso shikpɔŋ nɔ hegbɛ eha wɔ, ni ekɛ nɛkɛ hegbɛ nɛɛ he nilee fɛɛ eha wɔ. (Yohane 17:3) Belɛ ŋwanejee ko bɛ he akɛ no hewɔ ni yɛ be mli ni lalatsɛ lɛ wieɔ “nii ni ejie lɛ kpo” lɛ he yɛ egbii lɛ amli lɛ, ebo akɛ: “Misumɔɔ omla lɛ akɛ nɔ ko! Jenamɔ fɛɛ lɛ, no he mijwɛŋɔ.”—Lala 119:97.
21 Ani nɛkɛ ji bɔ ni onuɔ “nii ni” Yehowa “ejie lɛ kpo” ni anuɔ shishi yɛ wɔgbii nɛɛ amli lɛ he? Ani ohiɛ sɔɔ anɔkwalei ni okase lɛ jogbaŋŋ? Ani oona akɛ nɛkɛ anɔkwalei nɛɛ ahe miihia koni eye ebua bo ni okpɛ oyiŋ, ojo kaai anaa foi ni osɔmɔ Yehowa? Be enyiɛ ofiteɔ, okɛkaneɔ ni okɛkaseɔ nɛkɛ “nii ni ejie lɛ kpo” nɛɛ? Ani gbɛ ko yɛ ni oootsɔ nɔ oha onikasemɔ sui lɛ aya hiɛ? Abaasusu nɛkɛ saji nɛɛ ahe yɛ nikasemɔ ni nyiɛ sɛɛ nɛɛ mli.a
[Shishigbɛ niŋmai]
a Ajie kɛjɛ May 15, 1986 Watchtower lɛ mli
Ani Okaiɔ?
◻ Dani Yesu be lɛ aaashɛ lɛ, no mli lɛ, mɛni ji gbɛi komɛi ni atsɔɔ nɔ akɛ “nii ni ejie lɛ kpo” lɛ haa?
◻ “Nii ni ajie lɛ kpo” lɛ batsɔ namɛi anɔ yɛ afi 33 Ŋ.B. lɛ mli?
◻ Mɛni ji kpojiemɔi ni he hiaa waa ni atsɔ nɛkɛ gbɛ hee nɛɛ nɔ akɛha lɛ ekomɛi?
◻ Mɛni hewɔ esa akɛ “nii ni ajie lɛ kpo” lɛ afee mumɔŋ Israelbii lɛ anii ŋmɛnɛ lɛ?
◻ Kristofoi ni afɔ amɛ mu lɛ asafo lɛ ejie ehe kpo akɛ Yehowa Wiemɔ lɛ nɔkwɛlɔi ni sa yɛ mɛɛ gbɛ nɔ?
[Wiemɔ ni akɔ ni akɛmiitsu nii ni yɔɔ baafa 21]
Kristofoi ni afɔ amɛ mu lɛ asafo lɛ bafee nɔkwɛlɔi heei amɛha Yehowa kpojiemɔ lɛ
[Wiemɔ ni akɔ ni akɛmiitsu nii ni yɔɔ baafa 22]
Yehowa “tsulɔ” kuu ni ji edasefoi ni afɔ amɛ mu Iɛ esɔmɔ jogbaŋŋ akɛ Nyɔŋmɔ Wiemɔ lɛ nɔkwɛlɔi
[Mfoniri ni yɔɔ baafa 19]
Yehowa tsɔ blema hii anɔkwafoi anɔ ejie nilee ni he hiaa wɔ lɛ kpo