18 Mɔ fɛɛ mɔ ni tseɔ ehe lɛ, ediɔ nibii ni lɛ diɛŋtsɛ eshweɔ lɛ asɛɛ;
Esumɔɔɔ hiɛshikamɔ fɛɛ hiɛshikamɔ.
2 Kwashia sumɔɔɔ ni enuɔ nii ashishi;
Nɔ ni esumɔɔ moŋ ji akɛ, ejie nɔ ni yɔɔ etsui mli lɛ kpo.+
3 Kɛ́ gbɔmɔ fɔŋ ba lɛ, heguɔgbee hu baa,
Ni hiɛgbejianii kɛ hiɛshishwiemɔ ni nyiɛɔ.+
4 Gbɔmɔ daaŋ wiemɔi tamɔ nui ni mli kwɔlɔ.+
Hiɛshikamɔ nuhiŋmɛi lɛ, etamɔ faa ni hoɔ.
5 Ehiii akɛ abaaye sane ahã mɔ fɔŋ+
Loo abaatsɔ jalɔ sane hiɛ abu shi yɛ kojomɔ mli.+
6 Kwashia wiemɔi teɔ béi shi,+
Ni enaabu tsɛɔ yii kɛbaa.+
7 Kwashia daaŋ wiemɔ ji nɔ ni kpãtãa ehiɛ,+
Ni enaabu ji tsɔne ni duɔ ewala.
8 Mɔ ni wieɔ mɔ he efɔŋ lɛ, ewiemɔi tamɔ niyenii ni ŋɔɔ;+
Amiɔ lɛ oyayaayai awoɔ musuŋ.+
9 Mɔ fɛɛ mɔ ni feɔ anihao yɛ enitsumɔ mli lɛ,
Enyɛmi ji mɔ ni kpãtãa nii ahiɛ.+
10 Yehowa gbɛ́i lɛ ji mɔɔ ni wa.+
No mli jalɔ sháa foi kɛyaa, ni abuɔ ehe.+
11 Niiatsɛ naa nii ni eyɔɔ lɛ tamɔ maŋ ni atswa gbogbo awo he;
Yɛ ejwɛŋmɔ mli lɛ, etamɔ gbogbo ni buɔ ehe.+
12 Dani shigbeemɔ baaba lɛ, gbɔmɔ tsui wóɔ ehe nɔ,+
Ni anunyam nyiɛɔ heshibaa sɛɛ.+
13 Mɔ ni hãa sane hetoo dani eboɔ sane lɛ mli toi lɛ,
Eefee buulu ni eeshwie ehiɛ shi hu.+
14 Bɔ ni gbɔmɔ nuɔ he yɛ etsui mli lɛ baanyɛ ahã enyɛ edamɔ hela naa,+
Shi tsui ni ekumɔ lɛ, namɔ baanyɛ naa edamɔ?+
15 Mɔ ni nuɔ nii ashishi lɛ, etsui náa nilee,+
Ni hiɛshikalɔ toi taoɔ nilee.
16 Gbɔmɔ nikeenii gbeleɔ gbɛ ehãa lɛ;+
Ni ekɛ lɛ yaa mɛi wuji ahiɛ.
17 Mɔ ni jajeɔ esane klɛŋklɛŋ lɛ, efeɔ tamɔ nɔ ni esane ja,+
Shi kɛ́ mɔ kroko lɛ ba lɛ, ebabibiɔ lɛ saji ni akɛnaa anɔkwale lɛ. +
18 Oshiki foɔ sane fɛɛ sane sɛɛ,+
Ni ehãa ahalaa hewalɔi enyɔ ateŋ mɔ kome.
19 Nyɛmi ni atɔ̃ enɔ lɛ, efaŋ maŋ ni atswa gbogbo awo he,+
Ni naataamɔi komɛi tamɔ mɔɔ sɛɛ adabaŋi.+
20 Gbɔmɔ daaŋ yibii hãa emusuŋ yiɔ obɔ;+
Ni edaaŋ wiemɔi baahã etɔ.
21 Gbele kɛ wala yɛ lilɛi dɛŋ;+
Mɛi ni sumɔɔ ni amɛkɛtsu nii lɛ baaye eyibii lɛ eko.+
22 Mɔ ni ená ŋa kpakpa lɛ, ená nɔ kpakpa,+
Ni ehiɛ baa nyam yɛ Yehowa hiɛ.+
23 Ohiafo lɛ, kɛ́ eewie lɛ, fai ekpaa,
Shi niiatsɛ kɛ wiemɔi ni wa hãa hetoo.
24 Nanemɛi komɛi yɛ ni sumɔɔ ni amɛfite amɛteŋ,+
Shi naanyo ko yɛ ni kpɛtɛɔ mɔ gbagbalii fe nyɛmi.+