Yitso Nyɔŋma Kɛ Kpawo

Anɔkwa Jálɔi Ayɔsemɔ Yɛ Naagbee Be Lɛ Mli

1. Taakɛ Daniel yitso 7 tsɔɔ lɛ, mɛɛ niiashikpamɔ ni ekaaa gbɔmɛi akuu fioo ko ni bɛ hefamɔ baaná yɛ wɔgbii nɛɛ amli?

JEŊ hewalɛ ni he wa waa kɛ tutuamɔ ko ni hiɛdɔɔ yɔɔ mli ba gbɔmɛi akuu bibioo ko ni bɛ hefamɔ ko lɛ anɔ. Amɛje mli shweshweeshwe ni amɛná hewalɛ hee po​—jeee akɛ ejɛ amɛ diɛŋtsɛ amɛhewalɛ mli, shi akɛni Yehowa Nyɔŋmɔ buɔ amɛ akɛ amɛjara wa lɛ hewɔ. Daniel yitso 7 lɛ gba saji nɛɛ ni ba yɛ afii ohai 20 lɛ shishijee mli lɛ efɔ̃ shi. Shi, namɛi ji nɛkɛ gbɔmɛi nɛɛ ni agba yɛ amɛhe lɛ? Nakai Daniel yitso lɛ nɔŋŋ wie amɛhe akɛ “mɔ ni yɔɔ ŋwɛi shɔŋŋ lɛ” ni ji Yehowa Nyɔŋmɔ “mɛi krɔŋkrɔŋi lɛ.” Ejie lɛ kpo hu akɛ, yɛ naagbee lɛ aŋkroaŋkroi nɛɛ baafee hefatalɔi nɔyelɔi yɛ Mesia Maŋtsɛyeli lɛ mli!​—Daniel 7:​13, 14, 18, 21, 22, 25-​27.

2. (a) Te Yehowa nuɔ he yɛ etsuji ni afɔ amɛ mu lɛ ahe ehaa tɛŋŋ? (b) Mɛni baafee nilee gbɛ ni esa akɛ atsɔ nɔ yɛ nɛkɛ bei nɛɛ amli?

² Taakɛ wɔkase yɛ Daniel yitso 11 lɛ, kooyigbɛ maŋtsɛ lɛ baaba enaagbee kwraa, yɛ be mli ni ewo gbɔmɛi anɔkwafoi nɛɛ amumɔŋ shikpɔŋ ni kã shi shweshweeshwe lɛ he gbeyei lɛ sɛɛ. (Daniel 11:45; okɛto Ezekiel 38:​18-23 he.) Hɛɛ, Yehowa buɔ enɔkwafoi ni afɔ amɛ mu lɛ ahe waa. Lala 105:​14, 15 kɛɔ wɔ akɛ: “[Yehowa] kã maŋtsɛmɛi yɛ amɛhewɔ akɛ: ‘Nyɛkataa mimɛi ni mifɔ amɛ mu lɛ ahe, ni migbalɔi lɛ hu, nyɛkafee amɛ nɔ ko!’” Belɛ ani okpɛlɛŋ nɔ akɛ, ebaafee nɔ ni nilee yɔɔ mli akɛ “asafo babaoo” lɛ ni amɛyi fáa lɛ kɛ amɛhe aaabɔ nɛkɛ mɛi krɔŋkrɔŋi nɛɛ ahe gbagbalii bɔ ni amɛaanyɛ yɛ bei ni efee hamahama nɛɛ amli? (Kpojiemɔ 7:9; Zakaria 8:23) Yesu Kristo jie yi akɛ gbɔmɛi ni tamɔ gwantɛŋi lɛ afee nakai pɛpɛɛpɛ​—amɛkɛ amɛhe abɔ emumɔŋ nyɛmimɛi ni afɔ amɛ mu lɛ ahe kɛtsɔ yelikɛbuamɔ ni amɛkɛaaha amɛ yɛ amɛ nitsumɔ lɛ mli lɛ nɔ.​—Mateo 25:​31-​46; Galatabii 3:​29.

3. (a) Mɛni hewɔ ebɛ mlɛo akɛ aaana Yesu sɛɛnyiɛlɔi ni afɔ amɛ mu lɛ ni akɛ amɛ abɔ gbagbalii lɛ? (b) Daniel yitso 12 baaye abua yɛ enɛ gbɛfaŋ yɛ mɛɛ gbɛ nɔ?

³ Shi, Nyɔŋmɔ Henyɛlɔ, Satan, etee nɔ ewuu ta diɛŋtsɛ eshi mɛi ni afɔ amɛ mu lɛ. Eha apasa jamɔ eshwere, ni ekɛ apasa Kristofoi ewo shikpɔŋ lɛ nɔ obɔ. Nɔ ni ejɛ mli eba ji gbɔmɛi babaoo ni álaka amɛ. Mɛi krokomɛi anijiaŋ eje wui po akɛ amɛnyɛŋ amɛna mɛi ni damɔ shi kɛha anɔkwale jamɔ lɛ kwraa. (Mateo 7:​15, 21-​23; Kpojiemɔ 12:​9, 17) Esa akɛ mɛi ni naa “asafoku bibioo” lɛ ni amɛkɛ amɛhe bɔɔ amɛhe lɛ po awuu ta waa koni amɛhiɛ hemɔkɛyeli lɛ mli, ejaakɛ je nɛɛ taoɔ be fɛɛ be akɛ eeefite hemɔkɛyeli. (Luka 12:32) Ni bo hu? Ani ona “mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ” ni okɛ ohe miibɔ amɛhe? Ani ole odaseyeli ni ma shi shiŋŋ ni tsɔɔ akɛ mɛi ni ona amɛ lɛ ji mɛi ni Nyɔŋmɔ ehala amɛ diɛŋtsɛ lɛ? Odaseyeli ni tamɔ nɛkɛ baanyɛ awaje ohemɔkɛyeli. Ebaanyɛ ewula bo hu, koni oye obua mɛi krokomɛi ni amɛna bɔ ni jamɔ mli yiŋfutumɔ ni yɔɔ ŋmɛnɛŋmɛnɛ je nɛɛ mli lɛ ji. Nilee ni hereɔ mɔ yiwala nɛɛ babaoo yɛ Daniel yitso 12.

LUMƆ KPETEŊKPELE LƐ JE NIFEEMƆ SHISHI

4. (a) Daniel 12:1 gbaa mɛɛ nibii srɔtoi enyɔ efɔ̃ɔ shi yɛ Mikael he? (b) Yɛ bei pii amli lɛ, mɛni maŋtsɛ ko ni “damɔ shi” lɛ tsɔɔ yɛ Daniel wolo lɛ mli?

⁴ Daniel 12:1 kaneɔ akɛ: “Nakai be lɛ mli lɛ Mikael ni ji lumɔ kpeteŋkpele ni damɔ shi ha omaŋbii lɛ aaate shi adamɔ shi.” Kuku nɛɛ gbaa nibii enyɔ ni yɔɔ srɔto kwraa yɛ Mikael he efɔ̃ɔ shi: ekome, ákɛ ‘edamɔ shi,’ ni tsɔɔ shihilɛ ko ni hiɔ shi yɛ be kpalaŋŋ ko mli; enyɔ, ákɛ ‘eeete shi edamɔ shi,’ ni tsɔɔ sane ko ni baaba yɛ nakai be kpalaŋŋ lɛ mli. Klɛŋklɛŋ lɛ, wɔbaasumɔ ni wɔle be mli ni Mikael ‘damɔ shi ha [Daniel] maŋ bii lɛ.’ Kaimɔ akɛ Mikael ji gbɛi ni akɛha Yesu yɛ enitsumɔ akɛ ŋwɛi Nɔyelɔ lɛ mli. Sane ni kɔɔ ‘eshidaamɔ’ he lɛ kaiɔ wɔ gbɛ ni akɛ wiemɔ nɛɛ tsu nii yɛ he kroko yɛ Daniel wolo lɛ mli lɛ. Afɔɔ he wiemɔ akɛ maŋtsɛ ko nifeemɔ, tamɔ hewalɛ ni eŋɔ akɛ odehe.​—Daniel 11:​2-4, 7, 20, 21.

5, 6. (a) Mɛɛ be kpalaŋŋ mli Mikael damɔ shi lɛ? (b) Mɛɛ be ni yɛ mɛɛ gbɛ nɔ Mikael “aaate shi adamɔ shi,” ni mɛni baajɛ mli aba?

⁵ Eyɛ faŋŋ akɛ ŋwɛibɔfo lɛ miitsɔɔ be kpalaŋŋ ko ni atsɔɔ yɛ he kroko yɛ Biblia gbalɛ mli. Yesu tsɛ enɛ akɛ “ba ni eba” (Hela, pa·rou·siʹa), beni ebaaye nɔ akɛ Maŋtsɛ yɛ ŋwɛi. (Mateo 24:​37-​39) Atsɛɔ nɛkɛ be kpalaŋŋ nɛɛ hu akɛ “naagbee gbii” kɛ “naagbee be lɛ.” (2 Timoteo 3:1; Daniel 12:​4, 9) Kɛjɛ be mli ni nakai be kpalaŋŋ lɛ je shishi yɛ afi 1914 kɛbaa nɛɛ, Mikael etee nɔ edamɔ shi akɛ Maŋtsɛ yɛ ŋwɛi.​—Okɛto Yesaia 11:10; Kpojiemɔ 12:​7-9 he.

⁶ Shi, mɛɛ be Mikael ‘te shi edamɔ shi’? Beni eteɔ shi koni efee nɔ ko krɛdɛɛ ko lɛ. Yesu baafee enɛ yɛ wɔsɛɛ be mli. Kpojiemɔ 19:​11-16 tsɔɔ bɔ ni Yesu ji yɛ gbalɛ mli akɛ Mesia Maŋtsɛ ni he wa ni ta okpɔŋɔ nɔ kɛnyiɛ ŋwɛi ta lɛ hiɛ ni ekɛ hiɛkpatamɔ miiba Nyɔŋmɔ henyɛlɔi anɔ. Daniel 12:1 yaa nɔ akɛ: “Shi fimɔ be ko aaaba ni anako nɔ dã kɛjɛ beyinɔ ni jeŋmaŋ yɔɔ lɛ kɛyashi nakai be lɛ mli.” Ákɛ Yehowa Oblafo Nukpa lɛ, Kristo kɛ yiwalɛ nibii agbɛjianɔtoo lɛ fɛɛ baaba enaagbee yɛ “amanehulu babaoo” ni ágba afɔ̃ shi lɛ mli.​—Mateo 24:21; Yeremia 25:33; 2 Tesalonikabii 1:​6-8; Kpojiemɔ 7:​14; 16:​14, 16.

7. (a) Mɛɛ hiɛnɔkamɔ yɔɔ kɛha anɔkwafoi fɛɛ yɛ “fimɔ be” ni baa lɛ mli? (b) Mɛni ji Yehowa wolo lɛ, ni mɛni hewɔ ehe hiaa akɛ aaana mɔ ko yɛ mli lɛ?

⁷ Mɛni baaba mɛi ni kɛ hemɔkɛyeli tsuɔ nii lɛ anɔ yɛ nɛkɛ duŋ be nɛɛ mli? Akɛɛ Daniel kɛfata he akɛ: “Nakai be lɛ mli lɛ aaahere omaŋ lɛ mli mɔ fɛɛ mɔ ni aaana akɛ aŋma egbɛi yɛ wolo lɛ mli lɛ.” (Okɛto Luka 21:​34-36 he.) Mɛni ji nɛkɛ wolo nɛɛ? Edamɔ shi kɛha kaimɔ ni Yehowa Nyɔŋmɔ baakai mɛi ni feɔ esuɔmɔnaa nii lɛ. (Maleaki 3:16; Hebribii 6:10) Mɛi ni aŋma amɛgbɛi yɛ wala wolo nɛɛ mli lɛ ji gbɔmɛi ni yɔɔ shweshweeshwe fe fɛɛ yɛ je lɛ mli, ejaakɛ amɛnáa ŋwɛi hebuu mli ŋɔɔmɔ. Abaanyɛ aha efɔŋ fɛɛ efɔŋ ni aaaba amɛnɔ lɛ afee efolo, ni aaaha efee efolo hu. Kɛji akɛ gbele po banina amɛ dani “fimɔ be” ni baa nɛɛ ba lɛ, amɛhiɔ shi shweshweeshwe yɛ Yehowa kaimɔ ni bɛ naagbee lɛ mli. Ebaakai amɛ ni etee amɛ shi yɛ Yesu Kristo Afii Akpe Nɔyeli lɛ mli.​—Bɔfoi lɛ Asaji 24:15; Kpojiemɔ 20:​4-6.

MƐI KRƆŊKRƆŊI LƐ ‘AHIƐ TSƐ̃’

8. Daniel 12:2 kɛ mɛɛ gbɛkpamɔ ni ŋɔɔ haa?

⁸ Nii ni shɛjeɔ mɔ mii diɛŋtsɛ ji gbohiiashitee hiɛnɔkamɔ lɛ. Daniel 12:2 tsiɔ tã, akɛ: “Mɛi ni wɔɔ yɛ shikpɔŋ sũ mli lɛ ateŋ mɛi pii hiɛ aaatsɛ̃; mɛi komɛi aaatee naanɔ wala mli, shi mɛi komɛi hu aaatee naanɔ hiɛgbele kɛ naanɔ nyaŋemɔ mli.” (Okɛto Yesaia 26:19 he.) Nɛkɛ wiemɔi nɛɛ baanyɛ akai wɔ Yesu Kristo shiwoo ni taa mɔ tsuiŋ waa ni kɔɔ gbohiiashitee ni baaba lɛ he lɛ. (Yohane 5:​28, 29) Mɛɛ hiɛnɔkamɔ ni yɔɔ miishɛɛ nɛ! Bo lɛ susumɔ nanemɛi kɛ wekumɛi ni asumɔɔ amɛ​—ni ámɛgboi bianɛ​—ni akɛ hegbɛ eha amɛ koni amɛhi shi ekoŋŋ yɛ wɔsɛɛ be mli lɛ ahe okwɛ! Shi, shiwoo ni yɔɔ Daniel wolo lɛ mli lɛ kɔɔ gbohiiashitee kroko he titri​—eko ni eba momo. Te aaafee tɛŋŋ ni eeeba lɛ nakai hu?

9. (a) Mɛni hewɔ jwɛŋmɔ yɔɔ mli akɛ aaakpa gbɛ akɛ Daniel 12:2 baaná emlibaa yɛ naagbee gbii lɛ amli lɛ? (b) Mɛɛ shitee nɛkɛ gbalɛ lɛ wieɔ he lɛ, ni te wɔfeɔ tɛŋŋ wɔleɔ?

⁹ Susumɔ emli saji ni fata he lɛ ahe. Taakɛ wɔna lɛ, yitso 12 lɛ klɛŋklɛŋ kuku lɛ kɔɔɔ nibii agbɛjianɔtoo nɛɛ naagbee lɛ pɛ he, shi moŋ naagbee gbii lɛ amli be lɛ fɛɛ hu he. Yɛ anɔkwale mli lɛ, yitso lɛ mli saji lɛ titri baŋ mli yɛ shikpɔŋ nɔ paradeiso ni baa lɛ mli, shi moŋ yɛ naagbee be lɛ mli. Ani gbohiiashitee ko eba yɛ nɛkɛ be nɛɛ mli? Bɔfo Paulo ŋma yɛ “mɛi ni ji Kristo nii lɛ” agbohiiashitee lɛ he akɛ ebaaba yɛ “beni eba lɛ mli.” (NW) Shi, ateeɔ mɛi ni akɛ amɛ yaa ŋwɛi wala mli lɛ ashi akɛ mɛi ni “amɛfiteŋ dɔŋŋ.” (1 Korintobii 15:​23, 52) Ateee amɛteŋ mɔ ko shi kɛyaaa “naanɔ hiɛgbele kɛ naanɔ nyaŋemɔ” ni agba afɔ̃ shi yɛ Daniel 12:2 lɛ “mli.” No hewɔ lɛ, ani gbohiiashitee kroko yɛ? Yɛ bei komɛi amli lɛ, gbohiiashitee baanyɛ atsɔɔ mumɔŋ nɔ̃ yɛ Biblia lɛ mli. Ákɛ nɔkwɛmɔnɔ lɛ, gbalɛ wiemɔi ni kɔɔ mumɔŋ hewalɛ mli ni abaa ekoŋŋ loo gbohiiashitee he yɛ Ezekiel wolo lɛ kɛ Kpojiemɔ wolo lɛ mli.​—Ezekiel 37:​1-​14; Kpojiemɔ 11:3, 7, 11.

10. (a) Atee shwɛɛnii ni afɔ amɛ mu lɛ ashi yɛ naagbee be lɛ mli yɛ mɛɛ shishinumɔ naa? (b) Ni kɛlɛ, te eba lɛ tɛŋŋ ni mɛi ni afɔ amɛ mu lɛ ni atee amɛ shi lɛ ateŋ mɛi komɛi ahiɛ tsɛ̃ kɛtee “naanɔ hiɛgbele kɛ naanɔ nyaŋemɔ mli” lɛ?

¹⁰ Ani Nyɔŋmɔ tsuji ni afɔ amɛ mu lɛ eba mumɔŋ hewalɛ mli ekoŋŋ yɛ naagbee be lɛ mli? Hɛɛ! Eji yinɔsane mli nii ni ba diɛŋtsɛ ákɛ, akɛ tutuamɔ ko ni ekaaa ba shwɛɛnii fioo ko ni ji anɔkwa Kristofoi lɛ anɔ yɛ afi 1918, ni efite amɛ maŋ sɔɔmɔ nitsumɔ ni ato he gbɛjianɔ lɛ. Kɛkɛ ni beni akpaaa gbɛ kwraa lɛ, amɛku sɛɛ amɛba wala mli ekoŋŋ yɛ mumɔŋ shishinumɔ naa yɛ afi 1919. Nɛkɛ anɔkwa saji nɛɛ kɛ bɔ ni atsɔɔ gbohiiashitee lɛ mli aha taakɛ agba afɔ̃ shi yɛ Daniel 12:2 lɛ kpãa gbee. Mɛi komɛi ‘ahiɛ tsɛ̃’ yɛ mumɔŋ yɛ nakai be lɛ mli kɛ no sɛɛ. Shi nɔ ni yɔɔ mɔbɔ ji akɛ, jeee amɛ fɛɛ amɛhi shi akɛ mɛi ni hiɛ etsɛ̃ yɛ mumɔŋ. Mɛi ni hiɛ tsɛ̃ ni hala akɛ amɛbaakpoo Mesia Maŋtsɛ lɛ ni amɛshĩ Nyɔŋmɔ sɔɔmɔ lɛ anine shɛ ‘naanɔ hiɛgbele kɛ nyaŋemɔ’ nɔ taakɛ atsɔɔ mli yɛ Daniel 12:2 lɛ. (Hebribii 6:​4-6) Shi kɛlɛ, anɔkwafoi ni afɔ amɛ mu lɛ kɛ mumɔŋ wala mli ni amɛba ekoŋŋ lɛ tsu nii, ni amɛkɛ anɔkwayeli fi Mesia Maŋtsɛ lɛ sɛɛ. Yɛ naagbee lɛ, amɛ anɔkwayeli lɛ kɛ amɛ yaa “naanɔ wala mli,” taakɛ gbalɛ lɛ tsɔɔ lɛ. Ŋmɛnɛ, mumɔŋ hewalɛ ni amɛyɔɔ yɛ shitee kɛ woo ni amɛkɛkpeɔ lɛ fɛɛ sɛɛ lɛ yeɔ ebuaa wɔ ni wɔyɔseɔ amɛ.

‘AMƐKPƐ́Ɔ TAMƆ ŊULAMII’

11. Namɛi ji “mɛi ni le nii lɛ” ŋmɛnɛ, ni amɛkpɛ́ɔ tamɔ ŋulamii yɛ mɛɛ shishinumɔ naa?

¹¹ Daniel yitso 12 lɛ kukuji enyɔ ni nyiɛ sɛɛ lɛ feɔ babaoo po kɛyeɔ buaa wɔ koni wɔyoo “mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ.” Ŋwɛibɔfo lɛ kɛɛ Daniel yɛ kuku 3 lɛ akɛ: “Mɛi ni le nii lɛ aaakpɛ́ tamɔ atatu kpɛmɔ, ni mɛi ni etsɔɔ mɛi pii agbɛ kɛtee jalɛ mli lɛ aaakpɛ́ tamɔ ŋulamii kɛaatee naanɔ.” Namɛi ji “mɛi ni le nii lɛ” ŋmɛnɛ? Shikome ekoŋŋ lɛ, odaseyeli lɛ tsɔɔ “mɔ ni yɔɔ ŋwɛi shɔŋŋ lɛ mɛi krɔŋkrɔŋi” lɛ nɔŋŋ. Fɛɛ sɛɛ lɛ namɛi, ákɛ ja anɔkwafoi ni afɔ amɛ mu lɛ pɛ yɔɔ shishinumɔ ni amɛkɛaayoo akɛ Mikael, ni ji Lumɔ Kpeteŋkpele lɛ, je eshidaamɔ akɛ Maŋtsɛ lɛ shishi yɛ afi 1914? Kɛtsɔ anɔkwalei ni tamɔ nɛkɛ ni amɛshiɛ lɛ anɔ​—kɛ agbɛnɛ hu kɛtsɔ amɛ Kristofoi ajeŋba ni amɛhiɛ mli lɛ nɔ lɛ​—amɛ́tee nɔ ‘amɛ́tso tamɔ kanei’ yɛ jeŋ ni mli ewo duŋ yɛ mumɔŋ nɛɛ mli. (Filipibii 2:15; Yohane 8:12) Yesu gba yɛ amɛhe akɛ: “Ni jalɔi lɛ aaakpɛ́ tamɔ hulu yɛ amɛtsɛ maŋtsɛyeli lɛ mli.”​—Mateo 13:43.

12. (a) Shwɛɛnii ni afɔ amɛ mu lɛ kɛ amɛhe ewo ‘mɛi ni atsɔɔ amɛ gbɛ kɛyaa jalɛ mli’ lɛ mli yɛ naagbee be lɛ mli yɛ mɛɛ gbɛ nɔ? (b) Mɛi ni afɔ amɛ mu lɛ kɛ mɛi pii baaba jalɛ mli ni ‘amɛkpɛ́ tamɔ ŋulamii’ yɛ Kristo Afii Akpe Nɔyeli lɛ mli yɛ mɛɛ gbɛ nɔ?

¹² Daniel 12:3 po kɛɔ wɔ nitsumɔ ni nɛkɛ Kristofoi ni afɔ amɛ mu nɛɛ baatsu yɛ naagbee be lɛ mli. Amɛkɛ ‘mɛi pii baaba jalɛ mli.’ Shwɛɛnii ni afɔ amɛ mu lɛ je shishi akɛ amɛaabua Kristo nanemɛi niyelɔi 144,000 lɛ ateŋ mɛi ni eshwɛ lɛ anaa. (Romabii 8:​16, 17; Kpojiemɔ 7:​3, 4) Beni nakai nitsumɔ lɛ ba naagbee​—eyɛ faŋŋ akɛ yɛ afi 1930 afii lɛ teŋgbɛ lɛ​—amɛje “asafo babaoo” lɛ ni ji “tooi krokomɛi” lɛ anaabuamɔ shishi. (Kpojiemɔ 7:9; Yohane 10:16) Mɛnɛɛmɛi hu náa Yesu Kristo kpɔmɔ afɔleshaa lɛ mli hemɔkɛyeli. No hewɔ lɛ, amɛyɛ shidaamɔ ni he tse yɛ Yehowa hiɛ. Amɛyifalɛ shɛɔ akpekpei abɔ ŋmɛnɛ, ni hiɛnɔkamɔ ni amɛshweɔ ji yiwalɛ je nɛɛ hiɛkpatamɔ ni baa lɛ mli ni amɛaaje shweshweeshwe. Yɛ Kristo Afii Akpe Nɔyeli lɛ mli lɛ, Yesu kɛ enanemɛi maŋtsɛmɛi kɛ osɔfoi 144,000 lɛ kɛ kpɔmɔnɔ lɛ mli sɛɛnamɔi fɛɛ baatsu adesai toibolɔi ni yɔɔ shikpɔŋ nɔ lɛ ahe nii, koni amɛkɛye amɛbua mɛi fɛɛ ni jieɔ hemɔkɛyeli kpo lɛ ni amɛjie esha ni amɛná kɛjɛ Adam ŋɔɔ lɛ ahe naagbee nibii ni eshwɛ lɛ fɛɛ kɛya. (2 Petro 3:13; Kpojiemɔ 7:​13, 14; 20:​5, 6) Kɛkɛ lɛ mɛi ni afɔ amɛ mu lɛ baaná ‘mɛi pii ni atsɔɔ amɛ gbɛ kɛbaa jalɛ mli’ lɛ mli gbɛfaŋnɔ yɛ gbɛ ni yeɔ emuu nɔ, ni ‘amɛbaakpɛ́ tamɔ ŋwɛi ŋulamii.’ Ani obuɔ shihilɛ yɛ shikpɔŋ nɔ yɛ Kristo kɛ ehefatalɔi nɔyelɔi lɛ anunyam ŋwɛi nɔyeli lɛ shishi lɛ akɛ ejara wa? Mɛɛ hegbɛ eji nɛkɛ, akɛ okɛ “mɛi krɔŋkrɔŋi” lɛ aaaná Nyɔŋmɔ Maŋtsɛyeli lɛ he sanekpakpa lɛ shiɛmɔ mli gbɛfaŋnɔ!​—Mateo 24:14.

‘AMƐBAAKANE LƐ FITSOFITSO’

13. Asɔo Daniel wolo lɛ mli wiemɔi lɛ anaa ni afee lɛ teemɔŋ sane yɛ mɛɛ shishinumɔ naa?

¹³ Ŋwɛibɔfo lɛ sane ni ejaje etsɔɔ Daniel, ni je shishi yɛ sɛɛ mli yɛ Daniel 10:20 lɛ baa naagbee agbɛnɛ kɛ nɛkɛ wiemɔi ni shɛjeɔ mɔ mii nɛɛ: “Shi bo, Daniel lɛ, tsiimɔ wiemɔi nɛɛ anɔ, ni osɔo wolo nɛɛ naa kɛyashi naagbee be lɛ; mɛi pii aaakane fitsofitso, ni nilee aaafá.” (Daniel 12:4) Afee nɔ ni akɛ mumɔ tsirɛ Daniel koni eŋmala lɛ ateŋ nɔ ni fa lɛ teemɔŋ sane diɛŋtsɛ, ni asɔo naa koni adesa nilee akanu shishi. Ejaakɛ Daniel diɛŋtsɛ ŋma yɛ sɛɛ mli akɛ: “Ni minu, shi minaaa shishi.” (Daniel 12:8) Yɛ shishinumɔ nɛɛ naa lɛ, Daniel wolo lɛ hi shi akɛ nɔ ni asɔo naa afii ohai abɔ. Ni ŋmɛnɛ hu?

14. (a) Namɛi ‘ekane fitsofitso’ yɛ “naagbee be lɛ mli,” ni yɛ nɛgbɛ? (b) Mɛɛ odaseyeli yɔɔ ni tsɔɔ akɛ Yehowa ejɔɔ nɛkɛ ‘nikanemɔ fitsofitso’ nɛɛ nɔ?

¹⁴ Wɔná hegbɛ akɛ wɔɔhi shi yɛ “naagbee be” ni agba afɔ̃ shi yɛ Daniel wolo lɛ mli lɛ mli. Taakɛ agba lɛ, anɔkwafoi pii ‘ekase’ Nyɔŋmɔ Wiemɔ lɛ mli baafai lɛ ‘fitsofitso.’ Mɛni ejɛ mli kɛba? Anɔkwa nilee efa, yɛ Yehowa jɔɔmɔ hewɔ. Akɛ shishinumɔ ejɔɔ Yehowa Odasefoi anɔkwafoi ni afɔ mu lɛ, ni eye ebua amɛ koni amɛnu shishi ákɛ gbɔmɔ Bi lɛ batsɔ Maŋtsɛ yɛ afi 1914, koni amɛyoo kooloi ni yɔɔ Daniel gbalɛ lɛ mli lɛ, ni amɛbɔ kɔkɔ yɛ “amaŋfɔfeemɔ nihii nii” lɛ he​—ni enɛɛmɛi ji nɔkwɛmɔnii fioo ko pɛ. (Daniel 11:31) Belɛ nɛkɛ nilee babaoo nɛɛ ji “mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ” akadimɔ nii kroko hu. Shi Daniel nine shɛ odaseyeli nɔ lolo.

‘AKUMƆ AMƐ DUKUDUKU’

15. Mɛɛ sanebimɔ ŋwɛibɔfo ko tee lɛ shi agbɛnɛ, ni sanebimɔ nɛɛ baanyɛ akai wɔ namɛi?

¹⁵ Wɔbaanyɛ wɔkai akɛ, Daniel nine shɛ nɛkɛ ŋwɛibɔfoi ashɛɛ saji nɛɛ anɔ yɛ Hidekel “faa wulu lɛ” ni atsɛɔ lɛ hu akɛ Tigri lɛ naa. (Daniel 10:4) Agbɛnɛ ena bɔɔ nii ni ji ŋwɛibɔfɔi etɛ ni ekɛɛ akɛ: “Kɛkɛ ni mi, Daniel, mikwɛ, ni naa, mɛi krokomɛi enyɔ damɔ shi, mɔ kome yɛ faa lɛ naa biɛ nɛɛ, ni mɔ kome hu yɛ faa lɛ naa biɛ nɛɛ. Ni mɔ kome kɛɛ nuu lɛ ni wo klala ni yɔɔ faa lɛ mli nui lɛ ayiteŋ lɛ akɛ: Mɛɛ beyinɔ aaagbe nɛkɛ naakpɛɛ nii nɛɛ anaa?” (Daniel 12:​5, 6) Sane ni ŋwɛibɔfo lɛ tee lɛ shi ekoŋŋ yɛ biɛ lɛ baanyɛ akai wɔ “mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ.” Yɛ “naagbee be lɛ” shishijee yɛ afi 1914 lɛ, no mli lɛ amɛhaoɔ yɛ sanebimɔ ni kɔɔ be ni ebaaye dani Nyɔŋmɔ shiwoi lɛ aba mli lɛ he. Ákɛ amɛ nɛkɛ gbalɛ nɛɛ kɔɔ amɛhe diɛŋtsɛ lɛ bafeɔ faŋŋ yɛ hetoo ni akɛha sanebimɔ nɛɛ lɛ mli.

16. Mɛɛ gbalɛ ŋwɛibɔfo lɛ jaje, ni ema anɔkwale ni emlibaa ji lɛ nɔ mi yɛ mɛɛ gbɛ nɔ?

¹⁶ Daniel sane lɛ tee nɔ akɛ: “Ni minu nuu lɛ ni wo klala ni eyɔɔ faa lɛ mli nui lɛ ayiteŋ lɛ wiemɔ, ni ewo eninejurɔ kɛ ebɛku nɔ etsɔɔ ŋwɛi, ni ekã mɔ ni hiɛ kã kɛyaa naanɔ lɛ kitã, ákɛ eeekã nɔ kɛyashi be kɛ bei kɛ be fã; ni kɛ akumɔ maŋ krɔŋkrɔŋ lɛ hewalɛ lɛ agbe naa lɛ, aaagbe enɛɛmɛi fɛɛ naa.” (Daniel 12:7) Hiɛdɔɔ sane diɛŋtsɛ nɛ. Ŋwɛibɔfo lɛ hole eniji enyɔ lɛ anɔ ekɛkã kitã, ekolɛ koni ŋwɛibɔfoi enyɔ ni yɔɔ faa wulu lɛ biɛ kɛ biɛ lɛ ana nifeemɔ lɛ. Ekɛ nakai feemɔ ma bɔ ni gbalɛ nɛɛ baaba mli anɔkwale aha lɛ nɔ mi. Shi mɛni ji bei ni ato nɛɛ? Hetoo lɛ namɔ jeee nɔ ni wa taakɛ ekolɛ obaasusu lɛ.

17. (a) Mɛɛ saji ni je amɛhe abaanyɛ ana yɛ gbalɛi ni yɔɔ Daniel 7:​25, Daniel 12:​7, kɛ Kpojiemɔ 11:​3, 7, 9 lɛ amli? (b) Be sɛɛkɛlɛ enyiɛ bei etɛ kɛ fã lɛ feɔ?

¹⁷ Gbalɛ nɛɛ tamɔ gbalɛi krokomɛi enyɔ lɛ yɛ naakpɛɛ gbɛ nɔ. Anaa ekome, ni asusu he yɛ wolo nɛɛ Yitso 9 lɛ yɛ Daniel 7:25; ekroko lɛ yɛ Kpojiemɔ 11:​3, 7, 9. Kadimɔ nibii ni je amɛhe lɛ ekomɛi. Eko fɛɛ eko baa mli yɛ naagbee be lɛ mli. Gbalɛi enyɔ lɛ fɛɛ kɔɔ Nyɔŋmɔ tsuji krɔŋkrɔŋi lɛ ahe, etsɔɔ akɛ awa amɛyi ni amɛnyɛɛɛ amɛtsu amɛmaŋ shiɛmɔ nitsumɔ lɛ he nii yɛ be kuku ko mli. Gbalɛ lɛ eko fɛɛ eko tsɔɔ akɛ Nyɔŋmɔ tsuji lɛ ahiɛ tsɛ̃ɔ ekoŋŋ ni amɛjeɔ amɛnitsumɔ lɛ shishi, amɛye amɛyiwalɔi lɛ anɔ. Ni gbalɛ lɛ eko fɛɛ eko tsĩɔ nɛkɛ be ni mli wa kɛha krɔŋkrɔŋbii lɛ sɛɛkɛlɛ tã. Gbalɛi enyɔ ni yɔɔ Daniel (7:​25 kɛ 12:7) lɛ fɛɛ kɔɔ ‘be, bei, kɛ be fã’ he. Woloŋlelɔi kpɛlɛɔ enɛ nɔ akɛ etsɔɔ bei etɛ kɛ fã. Kpojiemɔ wieɔ nakai be kpalaŋŋ lɛ nɔŋŋ he akɛ nyɔji 42, loo gbii 1,260. (Kpojiemɔ 11:​2, 3) Enɛ maa nɔ mi akɛ, bei etɛ kɛ fã ni yɔɔ Daniel wolo lɛ mli lɛ kɔɔ afii etɛ kɛ fã ni eko fɛɛ eko feɔ gbii 360 he. Shi mɛɛ be nɛkɛ gbii 1,260 nɛɛ je shishi?

18. (a) Taakɛ Daniel 12:​7 tsɔɔ lɛ, mɛni baakadi gbii 1,260 lɛ naagbee? (b) Mɛɛ be akumɔ “maŋ krɔŋkrɔŋ lɛ hewalɛ lɛ” agbe naa, ni enɛ ba mli yɛ mɛɛ gbɛ nɔ? (d) Mɛɛ be gbii 1,260 lɛ je shishi, ni mɛi ni afɔ amɛ mu lɛ ‘gba yɛ kpekpe mli’ yɛ nɛkɛ be kpalaŋŋ nɛɛ mli yɛ mɛɛ gbɛ nɔ?

¹⁸ Gbalɛ lɛ yɛ faŋŋ diɛŋtsɛ yɛ be mli ni gbii 1,260 lɛ baaba naagbee lɛ he​—“kɛ́ akumɔ maŋ krɔŋkrɔŋ lɛ hewalɛ lɛ agbe naa lɛ.” Yɛ afi 1918 teŋgbɛ lɛ, atsɔ̃ apasa naafolɔmɔ nɔ awo Buu Mɔɔ Biblia kɛ Wolo Bibioo Asafo lɛ hiɛnyiɛlɔi ni esɛinɔtalɔ, J. F. Rutherford fata he lɛ tsuŋ be kakadaŋŋ. Nyɔŋmɔ mɛi krɔŋkrɔŋi lɛ na diɛŋtsɛ ni ‘ákumɔ’ amɛnitsumɔ lɛ ‘dukuduku,’ ákumɔ amɛ hewalɛ lɛ. Kɛji akɛ akane afii etɛ kɛ fã kɛjɛ afi 1918 teŋgbɛ kɛtee sɛɛ lɛ, ekɛ wɔ baa afi 1914 naagbee. No mli lɛ mɛi ni afɔ amɛ mu lɛ akuu fioo lɛ miisaa amɛhe amɛha yiwaa ni naa wa ni amɛkɛbaakpe lɛ. Jeŋ Ta I efɛ, ni shi ni ateɔ awoɔ amɛnitsumɔ lɛ miiya hiɛ. Yɛ afi 1915 po lɛ, amɛkɛ amɛ afi ŋmalɛ lɛ damɔ sane ni Kristo bi esɛɛnyiɛlɔi lɛ nɔ, akɛ: “Ani nyɛaanyɛ kpulu ni mibanu lɛ nyɛnu?” (Mateo 20:22) Taakɛ agba afɔ̃ shi yɛ Kpojiemɔ 11:3 lɛ, gbii 1,260 be ni nyiɛ sɛɛ lɛ ji awerɛho be kɛha mɛi ni afɔ amɛ mu lɛ​—efee tamɔ nɔ ni amɛmiigba yɛ kpekpe mli. Yiwaa lɛ naa bawa waa. Awo amɛteŋ mɛi komɛi atsuŋ, asafo yuu fee mɛi krokomɛi basabasa, ni afee mɛi krokomɛi hu niseniianii. Mɛi pii ye awerɛho yɛ Asafo lɛ klɛŋklɛŋ sɛinɔtalɔ, C. T. Russell gbele he yɛ afi 1916. Shi mɛni baaba, beni nɛkɛ duŋ be nɛɛ ba naagbee kɛtsɔ gbe ni agbe nɛkɛ mɛi krɔŋkrɔŋi nɛɛ ákɛ shiɛmɔ gbɛjianɔtoo lɛ nɔ lɛ?

19. Yɛ mɛɛ gbɛ nɔ gbalɛ ni yɔɔ Kpojiemɔ yitso 11 lɛ maa nɔ mi kɛhaa wɔ akɛ, mɛi ni afɔ amɛ mu lɛ efeŋ dioo yɛ be kakadaŋŋ mli?

¹⁹ Gbalɛ ni tamɔ nakai nɔŋŋ ni anaa yɛ Kpojiemɔ 11:​3, 9, 11 lɛ tsɔɔ akɛ, beni agbe “odasefoi enyɔ” lɛ sɛɛ lɛ, amɛkamɔ shi akɛ gbohii yɛ be kuku pɛ mli​—gbii etɛ kɛ fã—kɛyashi be mli ni atsĩɛ amɛhiɛ ekoŋŋ. Nakai nɔŋŋ hu gbalɛ ni yɔɔ Daniel yitso 12 lɛ tsɔɔ akɛ, mɛi krɔŋkrɔŋi lɛ efeŋ dioo ejaakɛ amɛyɛ nitsumɔ babaoo ni kã amɛhiɛ.

‘ATSUU AMƐHE, AMƐYƐ FUTAFUTA, AKA AMƐ AKWƐ’

20. Taakɛ Daniel 12:​10 tsɔɔ lɛ, mɛɛ jɔɔmɔi baaba mɛi ni afɔ amɛ mu lɛ anɔ yɛ amɛ niiashikpamɔi ni naa wa lɛ sɛɛ?

²⁰ Taakɛ átsɔ hiɛ akadi lɛ, Daniel ŋmala nɛkɛ nibii nɛɛ eshwie shi, shi enyɛɛɛ enu shishi. Kɛlɛ, ekolɛ esusu mɛi krɔŋkrɔŋi lɛ ahiɛ ni mɛi ni waa amɛyi lɛ aaakpata kwraa lɛ he, ejaakɛ ebi akɛ, “Te enɛɛmɛi anaa aaayakpa tɛŋŋ?” Ŋwɛibɔfo lɛ ha hetoo akɛ: “Yaa, Daniel! ejaakɛ atsimɔ wiemɔi lɛ anɔ, ni asɔo naa kɛyashi naagbee be lɛ. Aaatsuu mɛi pii ahe ni aaaha amɛyɛ futafuta, ni aaaka amɛ akwɛ; shi mɛi fɔji lɛ aaafee efɔŋ, ni mɛi fɔji lɛ ateŋ mɔ ko mɔ ko enaŋ shishi; shi mɛi ni le nii lɛ aaana shishi.” (Daniel 12:​8-10) Hiɛnɔkamɔ ni ma shi shiŋŋ yɛ kɛha mɛi krɔŋkrɔŋi lɛ! Yɛ nɔ najiaŋ ni aaakpata amɛhiɛ lɛ, abaaha amɛyɛ futafuta, akɛ shidaamɔ ni he tse yɛ Yehowa Nyɔŋmɔ hiɛ baajɔɔ amɛ. (Maleaki 3:​1-3) Amɛ sɛɛyoomɔ yɛ mumɔŋ saji ahe lɛ baaha amɛhe atse yɛ Nyɔŋmɔ hiɛ. Ákɛ mɛi ni tamɔɔɔ nakai lɛ, mɛi fɔji lɛ baakpoo mumɔŋ nibii ni amɛaanu shishi lɛ. Shi mɛɛ be enɛɛmɛi fɛɛ baaba?

21. (a) Be kpalaŋŋ ni agba afɔ̃ shi yɛ Daniel 12:11 lɛ baaje shishi yɛ be mli ni akɛ mɛɛ shihilɛi eba dã? (b) Mɛni ji “daa gbi afɔle” lɛ, ni mɛɛ be ajie kɛtee? (Kwɛmɔ akrabatsa ni yɔɔ baafa 298 lɛ.)

²¹ Akɛɛ Daniel akɛ: “Kɛjɛ be ni aaajie daa gbi afɔle lɛ, ni aŋɔ amaŋfɔfeemɔ nihii nii lɛ ama shi yɛ enajiaŋ lɛ, efeɔ gbii akpe kɛ ohai enyɔ kɛ nyɔŋmai nɛɛhu.” No hewɔ lɛ, be nɛɛ baaje shishi yɛ be mli ni átsu shihilɛi komɛi ahe nii agbe naa dã. Esa akɛ ajie “daa gbi afɔle”​—loo “afɔle ni ayaa nɔ ashãa”a​—lɛ kɛya. (Daniel 12:​11, NW, shishigbɛ niŋmaa) Mɛɛ afɔle ŋwɛibɔfo lɛ tsɔɔ lɛ? Jeee kooloi afɔlei ni ashãa yɛ shikpɔŋ nɔ sɔlemɔtsu ko mli lɛ. Ejaakɛ sɔlemɔtsu lɛ ni yɔɔ Yerusalem tsutsu ko lɛ po ji Yehowa mumɔŋ sɔlemɔtsu kpeteŋkpele, ni bɔi nitsumɔ beni Kristo batsɔ emli Osɔfonukpa yɛ afi 29 Ŋ.B. lɛ​—“henɔ” kɛkɛ! Ehe ehiaaa ni aya nɔ ashã eshai ahe afɔle yɛ nɛkɛ mumɔŋ sɔlemɔtsu, ni damɔ shi kɛha Nyɔŋmɔ gbɛjianɔtoo kɛha jamɔ krɔŋŋ nɛɛ mli, ejaakɛ “Kristo hu . . . aŋɔ lɛ aha shikome, koni etere mɛi pii ahe eshai kɛya.” (Hebribii 9:​24-28) Ni kɛlɛ, anɔkwa Kristofoi fɛɛ shãa afɔlei yɛ nɛkɛ sɔlemɔtsu nɛɛ mli. Bɔfo Paulo ŋma akɛ: “Nyɛhaa wɔtsɔa [Kristo] nɔ ni wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ.” (Hebribii 13:15) No hewɔ lɛ, gbalɛ lɛ klɛŋklɛŋ shihilɛ lɛ​—“daa gbi afɔle” lɛ jiemɔ lɛ​—ba mli yɛ afi 1918 teŋgbɛ, beni atsĩ shiɛmɔ nitsumɔ lɛ naa kwraa yɛ be kuku ko mli lɛ.

22. (a) Mɛni ji amaŋfɔfeemɔ “nihii nii” lɛ, ni mɛɛ be ato ama shi? (b) Mɛɛ be be kpalaŋŋ ni agba afɔ̃ shi yɛ Daniel 12:11 lɛ je shishi, ni mɛɛ be eba naagbee?

²² Shi, eshihilɛ lɛ fã ni ji enyɔ lɛ hu​—“amaŋfɔfeemɔ nihii nii lɛ” ni “aŋɔ . . . ama shi” loo ato lɛ hu? Taakɛ wɔna beni wɔsusuɔ Daniel 11:31 lɛ he lɛ, klɛŋklɛŋ lɛ nɛkɛ nihii nii nɛɛ ji Jeŋmaji Akpaŋmɔ lɛ ni ku sɛɛ ejie ehe kpo akɛ Jeŋmaji Ekomefeemɔ lɛ. Amɛji nihii nii ejaakɛ ajie amɛyi akɛ toiŋjɔlɛ he hiɛnɔkamɔ kome pɛ ni yɔɔ shikpɔŋ nɔ. No hewɔ lɛ, yɛ gbɔmɛi pii atsuii amli lɛ, nɛkɛ gbɛjianɔtoi nɛɛ bayeɔ Nyɔŋmɔ Maŋtsɛyeli lɛ najiaŋ diɛŋtsɛ! Ato yiŋ yɛ Kpaŋmɔ lɛ he yɛ January 1919. Shihilɛi ni yɔɔ Daniel 12:11 lɛ fɛɛ ba mli yɛ nakai be lɛ mli. No hewɔ lɛ, gbii 1,290 lɛ je shishi kɛjɛ afi 1919 shishijee mli ni etee nɔ aahu kɛyashi afi 1922 (Kooyigbɛ Shikpɔŋ lɛ Mlijaa Fã lɛ) gbo be mli.

23. Nyɔŋmɔ mɛi krɔŋkrɔŋi lɛ shwere kɛtee hetsemɔ shidaamɔ mli yɛ gbii 1,290 ni agba afɔ̃ shi yɛ Daniel yitso 12 lɛ mli yɛ mɛɛ gbɛ nɔ?

²³ Ani mɛi krɔŋkrɔŋi lɛ shwere kɛyashɛ he ni amɛyɛ futafuta, ni atsuu amɛhe yɛ Nyɔŋmɔ hiɛ yɛ nakai be lɛ mli? Nakai pɛpɛɛpɛ amɛfee! Ajie Buu Mɔɔ Asafo lɛ sɛinɔtalɔ lɛ kɛ ehefatalɔi ni bɛŋkɛ lɛ kpaakpa lɛ kɛjɛ tsuŋwoo lɛ mli yɛ March 1919. Yɛ sɛɛ mli lɛ aha amɛye amɛhe kwraa kɛjɛ apasa naafolɔmɔi ni akɛshi amɛ lɛ mli. Akɛni amɛle akɛ amɛgbeko amɛnitsumɔ lɛ naa kwraa hewɔ lɛ, amrɔ nɔŋŋ ni amɛkɛ amɛhe wo nitsumɔ mli, ni amɛto kpee wulu he gbɛjianɔ kɛha nakai afi lɛ yɛ September 1919. Nakai afi lɛ nɔŋŋ mli afee Buu-Mɔɔ wolo tɛtrɛɛ lɛ hefatalɔ ko. Shishijee lɛ atsɛ lɛ The Golden Age (amrɔ nɛɛ Awake!), ni etee nɔ efi Buu-Mɔɔ lɛ sɛɛ ni gbeyeishemɔ bɛ mli, ni ekpa je nɛɛ kpɔtɔmɔ lɛ he mama ni eye ebua Nyɔŋmɔ webii lɛ koni amɛhi shi akɛ mɛi ni he tse. Beni shɛɔ gbii 1,290 ni agba afɔ̃ shi lɛ naagbee lɛ, no mli lɛ mɛi krɔŋkrɔŋi lɛ eshɛ shɔŋŋ yɛ amɛshidaamɔ ni he tse kɛ saamɔ shihilɛ lɛ mli. Yɛ September 1922, aaafee be mli ni nɛkɛ be kpalaŋŋ nɛɛ ba naagbee lɛ, amɛfee kpee wulu ko ni sa kadimɔ yɛ Cedar Point, Ohio, U.S.A. Ewo shiɛmɔ nitsumɔ lɛ mli hewalɛ waa. Shi kɛlɛ, ehe miihia ni aná nɔyaa babaoo lolo. No eshwɛ kɛha be kpalaŋŋ ko ni akadi lɛ.

MIISHƐƐ KƐHA MƐI KRƆŊKRƆŊI LƐ

24, 25. (a) Mɛɛ be kpalaŋŋ ko agba afɔ̃ shi yɛ Daniel 12:​12 lɛ, ni eyɛ faŋŋ akɛ mɛɛ be eje shishi ni eba naagbee? (b) Mɛni ji shwɛɛnii ni afɔ amɛ mu lɛ amumɔŋ shihilɛ beni gbii 1,335 lɛ jeɔ shishi lɛ?

²⁴ Yehowa bɔfo lɛ gbe egbalɛ ni kɔɔ mɛi krɔŋkrɔŋi lɛ ahe lɛ naa kɛ nɛkɛ wiemɔi nɛɛ: “[Miishɛɛ ji, NW] mɔ ni aaaŋmɛ etsui shi ni eeeyashɛ gbii akpe kɛ ohai etɛ kɛ nyɔŋmai etɛ kɛ enumɔ lɛ nɔ lɛ!” (Daniel 12:12) Ŋwɛibɔfo lɛ etsɔɔɔ be mli ni be kpalaŋŋ nɛɛ fã lɛ jeɔ shishi loo ebaa naagbee. Yinɔsane tsɔɔ akɛ enyiɛɔ be ni tsɔ hiɛ lɛ sɛɛ nɔŋŋ. Kɛji nakai ni lɛ, belɛ ebaaje shishi kɛjɛ afi 1922 (Kooyigbɛ Shikpɔŋ lɛ Mlijaa Fã lɛ) gbo be mli kɛyashi afi 1926 agbiɛnaa be mli. Ani mɛi krɔŋkrɔŋi lɛ ba miishɛɛ shihilɛ mli beni nakai be lɛ ba naagbee lɛ? Hɛɛ, yɛ mumɔŋ gbɛ̀i ni he hiaa anɔ.

²⁵ Yɛ afi 1922 kpee (ni atsɔɔ yɛ baafa 302) lɛ sɛɛ po lɛ, no mli lɛ Nyɔŋmɔ mɛi krɔŋkrɔŋi lɛ ateŋ mɛi komɛi atsuii miishwe be ni eho lɛ lolo. Wolo titri ni amɛkaseɔ yɛ amɛkpeei ashishi ji Biblia lɛ kɛ Studies in the Scriptures wolokpoi lɛ ni C. T. Russell ŋmala lɛ. No mli lɛ, susumɔ ni egbɛ eshwã ni ahiɛ lɛ tsɔɔ afi 1925 akɛ afi ni gbohiiashitee lɛ baaje shishi koni aku sɛɛ akɛ Paradeiso aba shikpɔŋ nɔ ekoŋŋ. No hewɔ lɛ, mɛi pii miisɔmɔ kɛ be ko ni amɛto yɛ amɛjwɛŋmɔ mli. Mɛi komɛi kɛ henɔwomɔ kpoo amɛhe ni amɛkɛaawo maŋ shiɛmɔ nitsumɔ lɛ mli lɛ. Enɛ jeee shihilɛi ni miishɛɛ yɔɔ mli kwraa.

26. Mɛi ni afɔ amɛ mu lɛ amumɔŋ shihilɛ lɛ tsake yɛ be mli ni gbii 1,335 lɛ yaa nɔ lɛ yɛ mɛɛ gbɛ nɔ?

²⁶ Shi beni gbii 1,335 lɛ yaa nɔ lɛ, enɛɛmɛi fɛɛ bɔi tsakemɔ. Shiɛmɔ bafee klɛŋklɛŋ nii, ejaakɛ ato gbɛjianɔ koni mɔ fɛɛ mɔ kɛ ehe awo sɔɔmɔ nitsumɔ lɛ mli be fɛɛ be. Ato kpeei ahe gbɛjianɔ koni akase The Watch Tower lɛ daa otsi. March 1, 1925 nɔ̃ lɛ mli nikasemɔ ni fee yinɔsane lɛ ji “Maŋ lɛ Fɔmɔ,” ni ha Nyɔŋmɔ webii lɛ ná nɔ ni ba kɛjɛ afi 1914 kɛbashi afi 1919 be lɛ he shishinumɔ ni yeɔ emuu lɛ. Beni afi 1925 ho lɛ, agbɛnɛ mɛi krɔŋkrɔŋi lɛ sɔmɔɔɔ Nyɔŋmɔ kɛ be pɔtɛɛ ko ni ma amɛhiɛ ni baaba nɔŋŋ dɔŋŋ. Shi moŋ, Yehowa gbɛi lɛ hetsemɔ bafee nɔ̃ titri. Ama anɔkwale ni he hiaa waa nɛɛ nɔ mi waa fe bei fɛɛ, yɛ January 1, 1926 Watch Tower lɛ mli nikasemɔ ni eyitso ji “Namɔ kɛ Woo Baaha Yehowa?” lɛ mli. Ajie wolo ni ji Deliverance lɛ kpo yɛ kpee wulu ni afee yɛ May 1926 lɛ shishi. (Kwɛmɔ baafa 302) Enɛ ji woji heei ni afee ni akɛbaato Studies in the Scriptures lɛ najiaŋ lɛ ateŋ ekome. Mɛi krɔŋkrɔŋi lɛ kwɛɛɛ bei ni eho lɛ dɔŋŋ. Amɛkɛ hekɛnɔfɔɔ miikwɛ wɔsɛɛ be kɛ nitsumɔ ni kã amɛhiɛ lɛ. No hewɔ lɛ, taakɛ agba afɔ̃ shi lɛ, gbii 1,335 lɛ ba naagbee kɛ miishɛɛ shihilɛ mli ní mɛi krɔŋkrɔŋi lɛ yɔɔ.

27. Yɛ mɛɛ gbɛ nɔ Daniel yitso 12 naamuamɔ yeɔ ebuaa wɔ koni wɔyoo mɛi ni Yehowa efɔ amɛ mu lɛ kɛ nɔmimaa?

²⁷ Shi kɛlɛ, jeee amɛ fɛɛ amɛŋmɛ amɛtsui shi kɛtsɔ be ni fee gidigidi nɛɛ mli. Ŋwanejee ko bɛ he akɛ no hewɔ ni ŋwɛibɔfo lɛ ma bɔ ni ehe hiaa ni ‘aŋmɛ tsui shi’ lɛ nɔ mi lɛ. Ajɔɔ mɛi ni ŋmɛ amɛtsui shi ni tee nɔ amɛkpa gbɛ lɛ babaoo. Daniel yitso 12 lɛ naamuamɔ feɔ enɛ faŋŋ. Taakɛ agba afɔ̃ shi lɛ, mɛi ni afɔ amɛ mu lɛ ahiɛ tsɛ̃ɔ, loo atee amɛ shi yɛ mumɔŋ shishinumɔ naa. Akɛ Nyɔŋmɔ Wiemɔ lɛ mli sɛɛyoomɔ ni ekaaa ha amɛ, aha amɛ hewalɛ ni ‘amɛkane mli fitsofitso,’ ni mumɔ krɔŋkrɔŋ lɛ kudɔ amɛ koni amɛnu blema teemɔŋ saji ashishi. Yehowa tsuu amɛhe ni eha amɛkpɛ́ yɛ mumɔŋ, tamɔ ŋulamii akpɛmɔ. Yɛ enɛ hewɔ lɛ, amɛkɛ mɛi pii ba jalɛ shidaamɔ mli yɛ Yehowa Nyɔŋmɔ hiɛ.

28, 29. Mɛni esa akɛ efee wɔ faishitswaa yɛ be mli ni “naagbee be” lɛ bɛŋkɛɔ enaagbee kwraa lɛ he lɛ?

²⁸ Yɛ nɛkɛ gbalɛ mli kadimɔ nii ni haa aleɔ “mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ” hewɔ lɛ, mɛɛ naajiemɔ yɔɔ ni tsɔɔ akɛ no hewɔ ni anyɛɛɛ ayoo amɛ ni akɛ amɛ abɔ lɛ? Jɔɔmɔi ni yɔɔ naakpɛɛ miimɛ asafo babaoo lɛ ni kɛ amɛhe bɔɔ mɛi ni afɔ amɛ mu lɛ akuu ni amɛyifalɛ nɔ gbɔɔ nɛɛ yɛ Yehowa sɔɔmɔ mli lɛ. Esa akɛ wɔ fɛɛ wɔkpa Nyɔŋmɔ shiwoi lɛ amlibaa gbɛ. (Habakuk 2:3) Mikael, ni ji Lumɔ Kpeteŋkpele lɛ etee nɔ edamɔ shi eha Nyɔŋmɔ webii lɛ afii nyɔŋmai abɔ yɛ wɔgbii nɛ amli. Etsɛŋ kwraa ni ebaaje nifeemɔ shishi akɛ oblafo ni Nyɔŋmɔ ehala lɛ kɛha nibii agbɛjianɔtoo nɛɛ. Kɛ́ efee nakai lɛ, nɛgbɛ wɔbaadamɔ?

²⁹ Nakai sanebimɔ lɛ hetoo baadamɔ halamɔ ni wɔɔhala emuuyeli mli hiɛmɔ yɛ shihilɛ mli bianɛ lɛ nɔ. Bɔni afee ni wɔwaje wɔfaishitswaa akɛ wɔɔfee nakai yɛ be mli ni “naagbee be lɛ” bɛŋkɛɔ enaagbee kwraa lɛ, nyɛhaa wɔsusua Daniel wolo lɛ naagbee kuku lɛ he. Ehe sane ni wɔɔgba yɛ yitso ni nyiɛ sɛɛ lɛ mli lɛ baaye abua wɔ ni wɔna bɔ ni Daniel damɔ e-Nyɔŋmɔ lɛ hiɛ, kɛ bɔ ni eeedamɔ E-hiɛ yɛ wɔsɛɛ be mli lɛ.

[Shishigbɛ niŋmai]

MƐNI OYƆSE?

• Mɛɛ be kpalaŋŋ mli Mikael “damɔ shi,” ni yɛ mɛɛ gbɛ nɔ, ni mɛɛ be ‘eeete shi edamɔ shi’?

• Mɛɛ shitee nɛkɛ Daniel 12:2 wieɔ he lɛ?

• Mɛɛ be kadiɔ nɔ ni nyiɛ sɛɛ nɛɛ ashishijee kɛ amɛ naagbee

 bei etɛ kɛ fã ni atsĩ tã yɛ Daniel 12:7 lɛ?

gbii 1,290 ni agba afɔ̃ shi yɛ Daniel 12:11 lɛ?

gbii 1,335 ni agba afɔ̃ shi yɛ Daniel 12:12 lɛ?

• Yɛ mɛɛ gbɛ nɔ Daniel yitso 12 lɛ ni wɔɔbo toi lɛ yeɔ ebuaa wɔ koni wɔyoo Yehowa anɔkwa jálɔi lɛ?

[Akrabatsa ni yɔɔ baafa 298]

DAA GBI AFƆLE LƐ JIEMƆ

Wiemɔ “daa gbi afɔle” lɛ jeɔ kpo shii enumɔ yɛ Daniel wolo lɛ mli. Ekɔɔ yijiemɔ afɔlei​—‘naabui ayibii’​—ní Yehowa Nyɔŋmɔ tsuji kɛhaa lɛ daa lɛ ahe. (Hebribii 13:15) Áwie ejiemɔ ni agba afɔ̃ shi lɛ he yɛ Daniel 8:​11, 11:​31, kɛ 12:11.

Awa Yehowa webii ayi waa yɛ jeŋ tai enyɔ lɛ fɛɛ mli, yɛ “kooyigbɛ maŋtsɛ lɛ” kɛ “wuoyigbɛ maŋtsɛ lɛ” maŋtsɛyelihei lɛ fɛɛ mli. (Daniel 11:​14, 15) “Daa gbi afɔle” lɛ jiemɔ lɛ ba kɛmiiba Jeŋ Ta I naagbee, beni shwɛ sharao kulɛ atsĩ shiɛmɔ nitsumɔ lɛ naa kwraa yɛ afi 1918 teŋgbɛ lɛ. (Daniel 12:7) Nakai nɔŋŋ hu Anglo-Amerika Jeŋ Hewalɛ lɛ ‘jie’ “daa gbi afɔle” lɛ kɛtee yɛ Jeŋ Ta II be lɛ mli gbii 2,300. (Daniel 8:​11-​14; kwɛmɔ wolo nɛɛ Yitso 10.) Nazi “tai” lɛ hu jie yɛ be kpalaŋŋ ko ni atsɔɔɔ mli lɛ mli yɛ Ŋmalɛi lɛ amli.​—Daniel 11:31; kwɛmɔ wolo nɛɛ Yitso 15.

[Akrabatsa/Mfonirii ni yɔɔ baafa 301]

GBALƐ BEI NI YƆƆ DANIEL

Bei kpawo (afii 2,520): October 607 D.Ŋ.B. kɛyashi

Otsii 70 (afii 490): 455 D.Ŋ.B. kɛyashi 36 Ŋ.B.

Gbii 1,290: January 1919 kɛyashi

Gbii 1,335: September 1922 kɛyashi May 1926

[Mfonirii ni yɔɔ baafa 287]

Awo Yehowa tsuji ni ale amɛ waa lɛ tsuŋ yɛ gbɛ ni ejaaa nɔ yɛ nɔyeli lɛ tsuŋwoohe ni yɔɔ Atlanta, yɛ Georgia, U.S.A. lɛ. Kɛjɛ abɛkugbɛ kɛmiiya ninejurɔgbɛ: A. H. Macmillan, J. F. Rutherford, W. E. Van Amburgh (tara shi), G. H. Fisher, R. J. Martin, G. DeCecca, F. H. Robison, kɛ C. J. Woodworth (damɔ shi)

[Mfonirii ni yɔɔ baafa 299]

Afee kpeei wuji ni fee yinɔsane yɛ Cedar Point, Ohio, U.S.A., yɛ 1919 (ŋwɛigbɛ) kɛ 1922 (shishigbɛ)

[Baafa muu mfoniri ni yɔɔ baafa 302]