Yitso 2
Jiemɔ Yehowa Yi akɛ Anɔkwa Nyɔŋmɔ Lɛ
1. (a) Namɔ ji anɔkwa Nyɔŋmɔ lɛ? (b) Yɛ be mli ni wɔkaseɔ ehe nii lɛ, te esa akɛ enɛ ana wɔshihilɛ nɔ hewalɛ aha tɛŋŋ?
BƆFO Paulo ŋma enanemɛi Kristofoi lɛ akɛ, eyɛ mli akɛ mɛi pii yɛ ni atsɛɔ amɛ nyɔŋmɔi moŋ, shi “kɛlɛ wɔ lɛ Nyɔŋmɔ kome pɛ wɔyɔɔ, Tsɛ lɛ, . . . kɛ Nuŋtsɔ kome hu ni ji Yesu Kristo lɛ.” (1 Kor. 8:5, 6) “Nyɔŋmɔ kome pɛ” ni Paulo wieɔ ehe lɛ ji Yehowa, nibii fɛɛ a-Bɔlɔ lɛ. (5 Mose 6:4; Kpoj. 4:11) Gbɔmɛi ni hiɛ sɔɔ nii ni kaseɔ esui kɛ nibii ni efee eha adesai lɛ naa amɛhe akɛ mɛi ni kɛ amɛhe ekpɛtɛ ehe kpaakpa. Ni mɛni jɛɔ mli baa? Nɔ ni sa feemɔ nɔŋŋ ji ni amɛha ale Mɔ ni amɛhiɛ sɔɔ lɛ babaoo nɛɛ agbojee lɛ, ni amɛfeɔ nakai kɛtsɔɔ wiemɔi kɛ nitsumɔi anɔ. Yɛ be mli ni suɔmɔ ni amɛyɔɔ kɛha Yehowa lɛ daa lɛ, amɛnuɔ he akɛ eetsirɛ amɛ ni amɛgba mɛi krokomɛi ehe sane, ni ákɛ adesai lɛ, amɛmiisumɔ ni amɛkase lɛ bɔ ni amɛaanyɛ. Biblia lɛ woɔ wɔ fɛɛ hewalɛ ni wɔfee nakai, akɛ: “Nyɛfea Nyɔŋmɔ kaselɔi tamɔ bii ni asumɔɔ, ni nyɛnyiɛa yɛ suɔmɔ mli.” (Efes. 5:1, 2) Kɛ wɔɔnyɛ wɔnyiɛ nakai ŋaawoo lɛ sɛɛ lɛ, ehe baahia ni wɔle Yehowa taakɛ eji diɛŋtsɛ.
NƆ GBƆMƆ NI YEHOWA JI
2. Mɛni ji Nyɔŋmɔ sui ni ekaaa ni tsirɛɔ wɔ koni wɔjie eyi lɛ ekomɛi?
2 Anaa wiemɔi ni yɔɔ tɛɛ ni haa aleɔ Nyɔŋmɔ sui ni ekaaa lɛ babaoo yɛ Biblia lɛ mli fɛɛ. Kɛ okane enɛɛmɛi lɛ, ŋɔɔ be ni osusu nɔ ni sui nɛɛ ji diɛŋtsɛ kɛ bɔ ni amɛhe hiaa kɛha bo lɛ ahe. Akɛ nɔkwɛmɔ nɔ lɛ: “Nyɔŋmɔ lɛ, suɔmɔ ji lɛ.” (1 Yoh. 4:8) “Egbɛi fɛɛ lɛ jalɛ ni.” (5 Mose 32:4) ‘Lɛ edɛŋ nilee yɔɔ.’ (Hiob 12:13) Eyɛ “hewalɛ kpele.” (Yes. 40:26) Yɛ be mli ni osusuɔ nɛkɛ sui nɛɛ ahe lɛ, ani hiɛsɔɔ ni oyɔɔ kɛha Nyɔŋmɔ lɛ tsirɛɛɛ bo ni ojie eyi?
3. Mɛɛ Yehowa su kɛ baŋ lɛ fai krokomɛi gbalaa wɔ waa lɛ?
3 Yɛ be mli ni ehaa wɔleɔ esu kɛ baŋ kpakpa lɛ lolo lɛ, Biblia lɛ kɛɔ wɔ akɛ Yehowa ji “Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.” (2 Mose 34:6) “Ejaakɛ bo Nuŋtsɔ [Yehowa], ohi ni oŋɔfaa mra.” (Lala 86:5) “Ejaakɛ Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsuii ehi kɛwula shi yɛ egbɛfaŋ lɛ.” (2 Kron. 16:9) “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔf. 10:34, 35) Yehowa “haa mɛi fɛɛ faa” ni eji “miishɛɛ Nyɔŋmɔ.” (Yak. 1:5; 1 Tim. 1:11) Kwɛ bɔ ni mɔ he jɔɔ lɛ ehaa akɛ aaasɔmɔ Nyɔŋmɔ ni anyɛŋ akɛ mɔ ko ato ehe nɛɛ ni nine ashɛ esuɔmɔ kwɛmɔ nɔ!
4. (a) Mɛɛ hetuu-kɛhamɔ nɛkɛ Yehowa biɔ, ni te enɛ he hiaa ha tɛŋŋ? (b) Lala 34:4 fɔɔ nine etsɛɔ wɔ koni wɔna mɛni mli gbɛfaŋnɔ?
4 Nɔ ni kɛ esui lɛ kpaa gbee ji anɔkwale ni eji akɛ eji “Nyɔŋmɔ ni biɔ he ni atuɔ ahaa ekometoo” lɛ. (2 Mose 20:5, NW) Bɔni afee ni wɔsɔmɔ lɛ ni ekpɛlɛ nɔ lɛ esa akɛ wɔtuu wɔjamɔ fɛɛ wɔha lɛ. Wɔnyɛŋ wɔsumɔ jeŋ ni Satan ji e-nyɔŋmɔ lɛ hu. (1 Yoh. 2:15-17; 2 Kor. 4:3, 4) Yehowa le kwa ni akwaa afeɔ he jalɔi lɛ fɛɛ. Jeee nɔ ni wɔfeɔ lɛ pɛ ele, shi moŋ ele bɔ ni wɔnuɔ he wɔhaa kɛ nɔ gbɔmɛi ni wɔtaoɔ wɔtsɔmɔ lɛ hu jogbaŋŋ. Kɛ wɔsumɔɔ jalɛ nifeemɔ lɛlɛŋ lɛ, eyeɔ ebuaa wɔ. (Yer. 17:10; Abɛi 15:9) Yɛ nɔ gbɔmɔ ni Yehowa ji lɛ hewɔ lɛ, gbɔmɛi akpekpei abɔ ni yɔɔ jeŋ fɛɛ lɛ kɛ miishɛɛ ekpɛlɛ Biblia mli lalatsɛ ni ŋma akɛ: “Nyɛkɛ mi akafoa Yehowa dalɛ lɛ, ni nyɛhaa wɔ fɛɛ wɔwoa egbɛ́i lɛ nɔ” lɛ ninefɔɔ lɛ nɔ. (Lala 34:4) Ani oji amɛteŋ mɔ kome?
5. Mɛni baaye abua wɔ koni Yehowa su kɛ baŋ he nii ni wɔkaseɔ lɛ he aba sɛɛnamɔ aha wɔ yɛ gbɛ ni mɔɔ shi nɔ?
5 Bɔ ni osumɔɔ ni owie Nyɔŋmɔ he lɛ mli baakwɔ, ni ebaaye ebua bo babaoo yɛ mɔdɛŋ ni obɔɔ koni okase lɛ lɛ mli kɛ otao esui ni nɔ kwɔlɔ lɛ amli jogbaŋŋ oha ohe lɛ. Taomɔ (1) nɔ ni esu fɛɛ su ji lɛ mli jogbaŋŋ, ekolɛ nɔ ni haa esoroɔ no yɛ sui krokomɛi lɛ ahe lɛ, (2) bɔ ni Yehowa ejie enɛ kpo etsɔɔ kɛ mɛi ni ejie lɛ kpo etsɔɔ amɛ lɛ, kɛ agbɛnɛ hu (3) bɔ ni ooofee ojie enɛ kpo aloo bɔ ni esa akɛ ena osusumɔ nɔ hewalɛ eha.
6. Akɛ nɔkwɛmɔ nɔ lɛ, okɛ suɔmɔ atsu nii ni okɛtsɔɔ bɔ ni obaapɛi Yehowa sui lɛ amli oha. Feemɔ nakai ni okɛha sanebimɔi ni yɔɔ kuku nɛɛ naagbee lɛ ahetoo, ni okɛ ŋmalɛi afata ohetoo lɛ he.
6 Susumɔ nɔkwɛmɔ nɔ kome pɛ he yɛ biɛ okwɛ. Kɛ Biblia lɛ kɛɛ, “Nyɔŋmɔ lɛ, suɔmɔ ji lɛ” lɛ, mɛni etsɔɔ? (1 Yoh. 4:8) Shi suɔmɔ sɔrɔtoi yɔɔ. Hela wiemɔ ni akɛtsu nii yɛ ŋmalɛ nɛɛ mli ji a·gaʹpe, ni kɔɔ suɔmɔ ni nɔ kwɔ fe fɛɛ, ni jeɔ kpo yɛ Yehowa Nyɔŋmɔ diɛŋtsɛ mli lɛ he lɛ. Nɛkɛ suɔmɔ nɛɛ ji pɛsɛmkunya su ni abɛ kwraa lɛ kpojiemɔ. Yɛ be mli ni enɛ yɔɔ ojwɛŋmɔ mli lɛ, ha sanebimɔi ni yɔɔ shishigbɛ nɛɛ ahetoo yɛ bo diɛŋtsɛ owiemɔ mli, ni okɛ ŋmalɛi ni atsɛ shi aŋmaaa amɛmli wiemɔi lɛ atsu nii.
Ájie su ni tamɔ nɛkɛ kpo yɛ Yehowa nibɔɔ nitsumɔi amli yɛ mɛɛ gbɛ nɔ? (Bɔf. 14:16, 17)
Mɛni ji Yehowa suɔmɔ kɛha adesai lɛ he nɔkwɛmɔ nɔ ni ekaaa ni fe fɛɛ? (Yoh. 3:16) Ani ejurɔ ni gbɔmɔ feɔ loo hi ni ehi lɛ hewɔ Yehowa fee nakai lɛ? (Rom. 5:8)
Te esa akɛ nɔ ni Yehowa tsɔ e-Bi lɛ nɔ efee lɛ ana hewalɛ yɛ gbɛ ni wɔtsɔɔ nɔ wɔhiɔ shi lɛ nɔ eha tɛŋŋ? (2 Kor. 5:14, 15, 18, 19)
Mɛɛ gbɛi anɔ nɛkɛ ákɛ Kristofoi lɛ wɔɔnyɛ wɔtsɔ nɔ wɔjie suɔmɔ ni tamɔ nakai nɔŋŋ kpo wɔtsɔɔ wɔnanemɛi Kristofoi? (1 Kor. 13:4-7; 1 Yoh. 4:10, 11; 3:16-18)
Namɛi hu esa akɛ wɔjie suɔmɔ kpo wɔtsɔɔ amɛ, ni yɛ mɛɛ gbɛ nɔ? (Mat. 5:43-48; 28:19, 20; Gal. 6:10)
7. Te ooofee tɛŋŋ ona saji ni tamɔ nakai ni kɔɔ Yehowa sui krokomɛi ahe yɛ oteemɔŋ nikasemɔ mli?
7 Ani obaasumɔ ni ole Yehowa sui krokomɛi lɛ ahe saji babaoo? Kɛha eshishijee yɛ teemɔŋ nikasemɔ mli lɛ, mɛni hewɔ okɛ “jalɛsaneyeli” kɛ “nilee” ejeee shishi, kɛkɛ lɛ yɛ no sɛɛ lɛ, ekolɛ “suɔmɔ kɛ mlihilɛ” kɛ “mɔbɔnalɛ.” Obaanyɛ otsɔ Buu Mɔɔ woji ni akɛtaoɔ saji kɛ wiemɔi kɛ nɔ ni akɛtaoɔ Biblia mli saji lɛ anɔ oná nibii ahe shishinumɔ babaoo diɛŋtsɛ.
YE OBUA MƐI KROKOMƐI NI AMƐKASE ANƆKWALE NI KƆƆ NYƆŊMƆ HE LƐ
8. (a) Mɛɛ nyɔŋmɔi nɛkɛ je lɛŋ bii jaa? (b) Namɔ hɔ yiŋfutumɔ nɛɛ fɛɛ sɛɛ, ni mɛni hewɔ okɛɔ nakai?
8 Adesai jaa nyɔŋmɔi krokomɛi akpekpei abɔ ni amɛkɛteɔ shi amɛwoɔ anɔkwale Nyɔŋmɔ lɛ jamɔ lɛ. Yɛ afii ohai ejwɛ lɛ mli lɛ, Kristendom kpɛlɛ hemɔkɛyeli yɛ “Triniti” ni Babilonbii, Mizraimbii, Hindubii kɛ Buddhabii tsɔɔ yɛ blema lɛ nɔ. Kɛfata Nyɔŋmɔ he jwɛŋmɔ ni ahiɛ nɛɛ he lɛ, ajá nɔyelɔi ni he wa, akaŋshilɔi kɛ lalafolɔi ni ehe gbɛi lɛ akɛ nyɔŋmɔi. Shika kɛ mɔ diɛŋtsɛ he kɛ bɔlɛnamɔ hu etsɔmɔ nyɔŋmɔi ni ajaa amɛ waa. Namɔ hɔ enɛɛmɛi fɛɛ sɛɛ? Satan Abonsam ni ji “je nɛŋ nyɔŋmɔ lɛ.” (2 Kor. 4:4; 1 Kor. 10:20) Etsɔ ŋaa gbɛi sɔrɔtoi fɛɛ nɔ ebɔ mɔdɛŋ koni egbala gbɔmɛi kɛjɛ Yehowa he, aloo kɛ hoo lɛ koni eja amɛhe ni amɛtuu amɛha lɛ lɛ mli.
9. Mɛni ji gbɛ ni hi fe fɛɛ ni oootsɔɔ nɔ oye obua mɔ ko koni ekase anɔkwale ni kɔɔ Nyɔŋmɔ he lɛ?
9 Te wɔɔfee tɛŋŋ wɔye wɔbua nɛkɛ gbɔmɛi nɛɛ, kɛ amɛtsɛɔ amɛhe Kristofoi aloo amɛji mɛi krokomɛi lɛ, koni amɛle anɔkwale ni kɔɔ Nyɔŋmɔ he lɛ? Gbɛi ni hi fe fɛɛ lɛ ateŋ ekome ji ni atsɔɔ amɛ nɔ ni Biblia lɛ diɛŋtsɛ kɛɔ yɛ mɔ ni anɔkwale Nyɔŋmɔ lɛ ji kɛ nɔ gbɔmɔ ni eji lɛ he. No sɛɛ lɛ ehe baahia ni wɔkɛ jeŋba ni tsɔɔ sui ni Nyɔŋmɔ gbeyeishemɔ yɔɔ mli afi enɛ sɛɛ yɛ wɔ diɛŋtsɛ wɔshihilɛ mli.—1 Pet. 2:12.
10. Kɛ okɛ mɔ ni heɔ Triniti lɛ eyeɔ miiwie lɛ, mɛni hewɔ nilee bɛ mli akɛ wɔɔsusu akɛ wɔle nɔ ni eheɔ eyeɔ diɛŋtsɛ lɛ?
10 Shi kɛji Kristendom sɔlemɔi lɛ amlibii lɛ ateŋ mɛi komɛi kɛ bo je ŋwane ni amɛkɛɛ akɛ “Triniti” lɛ ni amɛheɔ amɛyeɔ lɛ damɔ Ŋmalɛ nɔ lɛ, no hu? Klɛŋklɛŋ kwraa lɛ, kadimɔ akɛ, eyɛ mli akɛ sɔlemɔ lɛ eje gbɛ etsɔɔ bɔ ni “Triniti” tsɔɔmɔ lɛ ji lɛ mli moŋ, shi gbɔmɛi pii hiɛ amɛ diɛŋtsɛ amɛsusumɔi yɛ he. Bi amɛ ni amɛtsɔɔ bɔ ni amɛnuɔ shishi amɛhaa lɛ mli, ni oye obua amɛ ni amɛkɛ amɛhemɔkɛyeli lɛ ato nɔ ni yɔɔ amɛ diɛŋtsɛ amɛ-Biblia mli lɛ he amɛkwɛ. Wo amɛ hewalɛ yɛ be ni sa mli hu ni amɛkɛ sɔlemɔ lɛ tsɔɔmɔi lɛ ato Nyɔŋmɔ Wiemɔ lɛ he amɛkwɛ.
11. Kɔ saji otii enumɔ lɛ ateŋ ekome yɛ be kome mli, ni okɛ sanebimɔi kɛ ŋmalɛi ni ato naa yɛ kuku nɛɛ shishi lɛ atsɔɔ nɔ hewɔ ni ŋmalɛi lɛ fiii “Triniti” tsɔɔmɔ lɛ sɛɛ lɛ mli.
11 Yɛ be mli ni gbɔmɛi anɔkwafoi ni oooye obua amɛ lɛ yɔɔ ojwɛŋmɔ mli lɛ, susumɔ bɔ ni ooofee ni okɛ ŋmalɛi ni yɔɔ shishigbɛ nɛɛ atsu nii ni okɛto saji otii ni ŋmalɛi lɛ tsɔɔ mli lɛ ahe lɛ he:
(1) Triniti tsɔɔlɔi komɛi kɛɔ akɛ ŋwɛi Gbɔmɛi etɛ yɔɔ (Tsɛ, Bi kɛ Mumɔ Krɔŋkrɔŋ) shi kɛlɛ Nyɔŋmɔ kome pɛ.
Shi ani Bɔfoi lɛ Asaji 2:4, 17 tsɔɔ akɛ “Mumɔ Krɔŋkrɔŋ” lɛ gbɔmɔ ni?
Mɛni hewɔ eyeɔ ebuaa kɛ wɔyoo gbɔmɛi abɔ ni awieɔ amɛhe yɛ ŋmalɛi ni nyiɛ sɛɛ nɛɛ eko fɛɛ eko mli lɛ? (Yoh. 17:20-22; Bɔf. 7:56; Kpoj. 7:10)
(2) Mɛi komɛi heɔ yeɔ akɛ “Triniti” lɛ mlibii fɛɛ hiɛ anunyam kome, akɛ mɔ ko kwɔɔɔ loo ebaaa shi fe enyɛmi, akɛ amɛ fɛɛ amɛyeɔ egbɔ ni amɛyɛ daa.
Ani Ŋmalɛi lɛ kpɛlɛɔ nɔ nakai? (Kɛha hetoo lɛ, kwɛmɔ Yohane 14:28; Mateo 24:36; Kpojiemɔ 3:14.)
(3) Mɛi komɛi gbalaa jwɛŋmɔ kɛyaa Yohane 1:1 nɔ akɛ nɔ ni yeɔ “Triniti” lɛ he odase. Amɛjeɔ ŋwane akɛ akɛ Hela wiemɔ ni husu bɛ he (“ko”) tsu nii yɛ biɛ, ni no hewɔ lɛ esa akɛ ŋmalɛ lɛ akane akɛ: “ni Wiemɔ lɛ Nyɔŋmɔ ni,” shi jeee “nyɔŋmɔ ko ni.”
Shi mɛi enyiɛ awie amɛhe yɛ Yohane 1:1 lɛ? Etɛ? Aloo enyɔ? Yohane 1:18 hu teɔ shi ewoɔ “Triniti” tsɔɔmɔ lɛ yɛ mɛɛ gbɛ nɔ?
Eji anɔkwale akɛ wiemɔ ni husu bɛ he bɛ Hela wiemɔ mli, shi wiemɔi pii yɛ eko, ni akɛtsuɔ nii yɛ nakai wiemɔi lɛ amli koni akɛtsɔɔ saji amli yɛ gbɛ ni ja nɔ. Kɛji akɛ mɔ ko nu he akɛ ejaaa akɛ akɛ wiemɔ ni husu bɛ he lɛ aaatsu nii yɛ be mli ni atsɔɔ Yohane 1:1 shishi lɛ, belɛ ani ebaasumɔ ni ajie no hu yɛ Bɔfoi lɛ Asaji 28:6 taakɛ King James Version lɛ kɛ ekrokomɛi feɔ lɛ lɛ? (Gbɛ kroko ni atsɔɔ Yohane 1:1 shishi, taakɛ ejeɔ kpo yɛ An American Translation lɛ mli ji, “Wiemɔ lɛ yɛ krɔŋkrɔŋ,” ni tsɔɔ akɛ, eyɛ sui krɔŋkrɔŋi ni Nyɔŋmɔ yɔɔ lɛ eko.)
(4) Triniti tsɔɔlɔi lɛ tsɔɔ hu akɛ Hebri wiemɔ ni akɛtsu nii yɛ 1 Mose 1:1, 26 ni atsɔɔ shishi akɛ “Nyɔŋmɔ” lɛ ji El·o·himʹ, ni akɛ enɛ tsɔɔ yifalɛ wiemɔ yɛ Hebri mli ni nɔ ni etsɔɔ diɛŋtsɛ ji “Nyɔŋmɔi.”
Mɛni hewɔ ni enɛ fiii Gbɔmɛi krɔŋkrɔŋi etɛ yɛ “Nyɔŋmɔ kome” mli lɛ he tsɔɔmɔ lɛ sɛɛ lɛ?
Kɛji akɛ etsɔɔ “Triniti” yɛ 1 Mose 1:1 lɛ, belɛ mɛni etsɔɔ yɛ Kojolɔi 16:23, ni kɛ el·o·himʹ damɔɔ shi ehaa “nyɔŋmɔ,” ni Hebri feemɔ wiemɔ lɛ hu damɔ shi kɛha mɔ kome shi jeee mɛi babaoo lɛ?
Mɛni hewɔ akɛ Nyɔŋmɔ yɛ yifalɛ wiemɔ mli tsu nii yɛ Hebri ŋmalɛi nɛɛ amli lɛ? Enɛ ji gbɛ kome ni Hebri tsɔɔ nɔ ehaa anaa agbojee loo nɔwomɔ he jwɛŋmɔ. Kɛji akɛ aatsɔɔ nɔ ni fe gbɔmɔ kome lɛ, feemɔ wiemɔi ni fataa he lɛ hu jeɔ kpo yɛ yifalɛ mli, shi ebɛ lɛ nakai yɛ nɔ ni wɔsusu he nɛɛ mli.
(5) Yɛ bɔ ni sɔlemɔi lɛ ema Yesu nɔ mi (kɛ anɔkwale ni eji akɛ ajie Yehowa gbɛi lɛ kɛjɛ Biblia shishitsɔɔmɔi pii amli) hewɔ lɛ, kɛ atsi Nyɔŋmɔ tã lɛ, mɔ ni mɛi komɛi susuɔ ehe pɛ ji Yesu.
Shi mɛɛ jamɔ mli nɔkwɛmɔ nɔ Yesu kɛha koni wɔnyiɛ sɛɛ? (Luka 4:8)
12. Mɛni hewɔ Yesu wie e-Tsɛ he yɛ gbɛ ni ja nɔ akɛ “anɔkwa Nyɔŋmɔ kome pɛ” lɛ?
12 Eyɛ mli akɛ awieɔ Yesu he yɛ Ŋmalɛi lɛ amli akɛ “nyɔŋmɔ ko,” kɛ “Nyɔŋmɔ Hewalɔ” po moŋ, shi ewo e-Tsɛ lɛ nɔ gojoo, ni ewie ehe akɛ “mi-Nyɔŋmɔ kɛ nyɛ hu nyɛ-Nyɔŋmɔ.” (Yoh. 1:1; 20:17; Yes. 9:6) Ekɛ Mose kpa gbee, ejaakɛ Mose etsɔ hiɛ ewie akɛ: “Yehowa lɛ, lɛ ekome ji Nyɔŋmɔ, ni mɔ ko mɔ ko bɛ sɛɛ dɔŋŋ.” (5 Mose 4:35) Esoro Yehowa kwraa yɛ nibii ni ajaa tamɔ amagai, gbɔmɛi ni afeɔ amɛ nyɔŋmɔi kɛ Satan Abonsam he. Nɔ ni kɛ enɛɛmɛi fɛɛ kpaaa gbe lɛ, taakɛ Yesu tsɛ lɛ lɛ, Yehowa ji “anɔkwa Nyɔŋmɔ kome pɛ lɛ.”—Yoh. 17:3.
‘NYIƐMƆ YƐ YEHOWA GBƐI AMLI’
13, 14. Ni ‘aaale’ ni ‘anyiɛ’ yɛ Yehowa gbɛi amli lɛ biɔ mɛni?
13 Yɛ afii babaoo ni gbɔmɔ yiŋ efutu lɛ yɛ mɔ ni Nyɔŋmɔ ji lɛ he lɛ sɛɛ nɛɛ, mɛi pii naa miishɛɛ babaoo akɛ amɛna Nyɔŋmɔ gbɛi diɛŋtsɛ, Yehowa, yɛ amɛ-Bibliai amli. (2 Mose 6:3) Shi nɛkɛ nilee nɛɛ he aaaba sɛɛnamɔ aha amɛ kɛya naanɔ kɛ ‘amɛaanyiɛ yɛ Yehowa gbɛi amli kɛya naanɔ.’ (Mika 4:5) Enɛ biɔ babaoo fe gbɛi, Yehowa, ni aaale aloo ni amɛaakɛɛ akɛ amɛji Yehowa Odasefoi kɛkɛ.
14 Lala 9:11 jaje yɛ nɔ ni Nyɔŋmɔ gbɛi lɛ tsɔɔ diɛŋtsɛ he akɛ: “Mɛi ni le ogbɛi lɛ aaaŋɔ amɛhiɛ amɛaafɔ onɔ . . . Yehowa.” Mɛni enɛ biɔ? Ebiɔ babaoo fe ni aaale gbɛi Yehowa lɛ kɛkɛ, ni no hu etsɔɔɔ akɛ akɛ he fɔɔ Yehowa nɔ. Yɛ enɛ mli lɛ, ni ‘aaale’ Nyɔŋmɔ gbɛi lɛ tsɔɔ akɛ wɔyooɔ nɔ Nyɔŋmɔ ni Yehowa ji, wɔkɛ bulɛ haa enɔyeli hewalɛ lɛ, ni wɔyeɔ ekitai anɔ. Nakai nɔŋŋ hu, ni ‘aaanyiɛ yɛ Yehowa gbɛi amli’ lɛ tsɔɔ akɛ wɔjɔɔ wɔhe nɔ wɔha lɛ, ni wɔdamɔ enajiaŋ akɛ ejalɔi lɛ ateŋ mɔ ko, ni mɔ lɛ kɛ eshihilɛ atsu nii diɛŋtsɛ yɛ Nyɔŋmɔ suɔmɔnaa nifeemɔ kɛ gbeekpamɔ naa. (Luka 10:27) Ani oofee nakai?
15. Yɛ henumɔ kɛha nitsumɔ sɛɛ lɛ, mɛni he hiaa kɛ wɔɔsɔmɔ Yehowa kɛya naanɔ?
15 Kɛ wɔɔnyɛ wɔsɔmɔ Yehowa kɛya naanɔ lɛ, belɛ esa akɛ nɔ ni fe henumɔ kɛha nitsumɔ atsirɛ wɔ. Bɔfo Paulo wo Timoteo ni miisɔmɔ Yehowa momo afii pii lɛ hewalɛ akɛ: “Obɔ Nyɔŋmɔ jamɔ hetuu-kɛhamɔ moŋ he mɔdɛŋ.” (1 Tim. 4:7, NW) Hetuu-kɛhamɔ baa kɛjɛɔ tsui lɛ mli; hiɛsɔɔ ni ayɔɔ kɛha mɔ ni ajieɔ enɛ kpo atsɔɔ lɛ lɛ ji nɔ ni tsirɛɔ mɔ lɛ. “Nyɔŋmɔ jamɔ hetuu-kɛhamɔ” ji bulɛ ni mli kwɔ ni ayɔɔ kɛha Yehowa diɛŋtsɛ. Ehaa ajɛɔ suɔmɔ mli akɛ he kpɛtɛɔ ehe yɛ hiɛsɔɔ ni ayɔɔ kɛha lɛ kɛ egbɛi lɛ hewɔ. Ehaa wɔfeɔ mɛi ni sumɔɔ akɛ wɔɔha mɔ fɛɛ mɔ kɛ bulɛ aha egbɛi lɛ akɛ nɔ ni nɔ bɛ. Esa akɛ wɔtao “Nyɔŋmɔ jamɔ hetuu-kɛhamɔ” akɛ oti aloo nɔ ni wɔkɛma wɔhiɛ yɛ wɔshihilɛ mli, kɛ wɔɔnyiɛ yɛ Yehowa, anɔkwa Nyɔŋmɔ lɛ gbɛi amli kɛaatee naanɔ lɛ.—Lala 37:4; 2 Pet. 3:11.
Sanegbaa Ni Akɛtiɔ Mli
● Mɛɛ gbɔmɔ nɛkɛ Yehowa ji? Esui sɔrɔtoi lɛ fɛɛ eko he shishinumɔ ni mli ka shi faŋŋ ni wɔɔna lɛ he baa sɛɛnamɔ kɛhaa wɔ yɛ mɛɛ gbɛ nɔ?
● Te wɔɔfee tɛŋŋ wɔye wɔbua mɛi krokomɛi ni amɛkase anɔkwale ni kɔɔ Nyɔŋmɔ he lɛ?
● Le ni ‘aaale’ Yehowa ni ‘anyiɛ yɛ egbɛi amli’ lɛ biɔ mɛni?