Yitso 1

Jamɔ Mli Ekomefeemɔ—Mɛni Etsɔɔ Kɛhaa Bo?

 1, 2. (a) Mɛni nɔ adamɔɔ akɛ anɔkwale ekomefeemɔ yɛ jamɔ mli baa yɛ wɔgbii nɛɛ amli lɛ? (b) Te Biblia lɛ tsɔɔ nɔ ni yaa nɔ lɛ mli ehaa tɛŋŋ?

NIFEEMƆ ko ni yɔɔ miishɛɛ kɛha ekomefeemɔ yɛ jamɔ mli miiya nɔ yɛ je lɛŋ he fɛɛ he. Eegbala gbɔmɛi ni jɛ jeŋmaji kɛ wekui kɛ wiemɔi fɛɛ mli. Amɛ ekomefeemɔ lɛ jɛɛɛ hemɔkɛyelii komɛi aheŋmɛɛmɔ koni akɛsaa. Jeee shihilɛ mli sui komɛi ni kɛ Nyɔŋmɔ Wiemɔ lɛ kpaaa gbee lɛ ni awieee ashiii kɛ enɛ baa. Belɛ mɛni kɛ enɛ baa? Anɔkwale ni eji akɛ gbɔmɛi ni jɛ shihilɛi sɔrɔtoi amli lɛ miile Yehowa akɛ anɔkwa Nyɔŋmɔ kome pɛ ni amɛjɛ amɛsuɔmɔ mli amɛmiiha amɛshihilɛ kɛ ejalɛ gbɛi lɛ akpa gbee lɛ hewɔ.—Okɛto Kpojiemɔ 15:3, 4 he.

² Enɛ ji gbalɛ ko ni gbalɔ Mika ŋma efɔ shi aaafee afii 2,700 ni eho nɛ lɛ mlibaa. Yɛ be mli ni ewieɔ “naagbee gbii lɛ amli” lɛ he lɛ, eŋma akɛ: “Ni jeŋmaji pii aaatee ayakɛɛ akɛ: ‘Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛi lɛ, ni wɔnyiɛ etempɔŋi lɛ anɔ.’” (Mika 4:1, 2)a Ani oona ni nɔ ko ni tamɔ nakai miiya nɔ?

 3, 4. (a) Eji anɔkwale akɛ “jeŋmaji” lɛ miitsɔ amɛhe kɛmiiba Yehowa ŋɔɔ yɛ mɛɛ gbɛ nɔ? (b) Mɛɛ saji esa akɛ wɔbi wɔhe?

³ Jeee akɛ “jeŋmaji” muji fɛɛ miiba Yehowa mumɔŋ we lɛ kɛha jamɔ. Shi aŋkroaŋkroi ni jɛ maji ni tamɔ nɛkɛ mli lɛ miifee nakai. Yɛ be mli ni amɛkaseɔ yiŋtoo ni suɔmɔ yɔɔ mli lɛ kɛ Yehowa Nyɔŋmɔ su kɛ baŋ ni ŋɔɔ ni gbalaa mɛi lɛ ahe nii lɛ, etsirɛɔ amɛtsuii waa diɛŋtsɛ. Amɛkɛ heshibaa taoɔ ni amɛle nɔ ni Nyɔŋmɔ taoɔ yɛ amɛdɛŋ. Amɛsɔlemɔ tamɔ David, nuu ni yɔɔ hemɔkɛyeli, ni sɔle nɛkɛ lɛ nɔ: “Tsɔɔmɔ mi ni mafee osuɔmɔnaa nii, ejaakɛ bo ji mi-Nyɔŋmɔ.”—Lala 143:10.

⁴ Ani onaa ohe yɛ nakai Yehowa jalɔi asafo babaoo lɛ ateŋ? Ani bɔ ni ohereɔ famɔ ni onine shɛɔ nɔ lɛ nɔ ohaa lɛ yeɔ odase akɛ oyɔseɔ diɛŋtsɛ akɛ Yehowa ji ejɛɛhe? ‘Onyiɛɔ etempɔŋi lɛ anɔ’ kɛyashɛɔ nɛgbɛ?

BƆ NI AFEƆ NI NINE SHƐƆ NƆ

 5. (a) Yɛ naagbee lɛ abaaná ekomefeemɔ yɛ jamɔ mli kɛyashi nɛgbɛ? (b) Mɛni hewɔ ehe hiaa waa akɛ aaatsɔ Yehowa jalɔ bianɛ lɛ, ni te wɔɔfee tɛŋŋ wɔye wɔbua mɛi krokomɛi ni amɛfee nakai?

⁵ Yehowa yiŋtoo ji ni bɔɔ nii fɛɛ ni yɔɔ jwɛŋmɔ lɛ afee ekome yɛ jamɔ mli—ni akɛ apasa eshishiuuu mɔ ko, ni mɔ ko egbugbuuu shi yɛ nyɛ ni enyɛɛɛ ena nɔ ni shihilɛ he shishinumɔ diɛŋtsɛ ji hewɔ. Kwɛ bɔ ni wɔtsui shweɔ gbi nɔ ni mɛi fɛɛ ni yɔɔ wala mli lɛ aaajɔɔ anɔkwa Nyɔŋmɔ kome pɛ lɛ! (Lala 103:19-22) Shi dani enɛ aaanyɛ aba lɛ, esa akɛ Yehowa ajie mɛi ni kuɔ amɛhiɛ amɛshwieɔ enɔyeli ni suɔmɔ yɔɔ mli lɛ nɔ ni amɛmaa nɔ mi akɛ amɛaafite mɛi krokomɛi ashihilɛ lɛ kɛjɛ enibɔɔ lɛ fɛɛ mli. Yɛ emɔbɔnalɛ naa lɛ, etsɔɔ hiɛ ekɛ nɔ ni ebaafee lɛ he kɔkɔbɔɔ haa. Ni gbɔmɛi ni yɔɔ he fɛɛ he lɛ yɛ hegbɛ akɛ amɛaatsake amɛgbɛ̀i. No hewɔ lɛ akɛ hehiamɔ miikpa wɔ fai yɛ wɔgbii nɛɛ amli yɛ jeŋ fɛɛ akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjaa Mɔ ni fee ŋwɛi kɛ shikpɔŋ kɛ ŋshɔ kɛ nu bui ni baa lɛ.” (Kpoj. 14:6, 7) Ani okpɛlɛ nakai ninefɔɔ lɛ nɔ? Kɛji nakai lɛ, belɛ eji hegbɛ ni ona agbɛnɛ akɛ okɛ Yehowa gbɛjianɔtoo lɛ aaatsu nii koni oye obua mɛi krokomɛi ni amɛ hu amɛfee nakai.

 6. Yɛ be mli ni wɔkase Biblia shishijee tsɔɔmɔi lɛ sɛɛ lɛ, mɛɛ nɔyaa kroko esa akɛ wɔkɛ hiɛmiamɔ abɔ mɔdɛŋ ni wɔná?

⁶ Jeee Nyɔŋmɔ yiŋtoo ji ni ekɛ gbɔmɛi ni kɛɔ kɛkɛ akɛ amɛheɔ Yehowa amɛyeɔ ni ákɛ amɛmiisumɔ ni amɛhi shi yɛ Paradeiso, shi yɛ nakai beaŋ nɔŋŋ lɛ amɛyaa nɔ amɛdiɔ amɛ pɛsɛmkunya nibii asɛɛ lɛ aba egbɛjianɔtoo lɛ mli. Eesumɔ ni gbɔmɛi abaná “esuɔmɔnaa nifeemɔ he anɔkwale nilee,” ni esa akɛ enɛ aje kpo yɛ amɛshihilɛ mli. (Kol. 1:9, 10, New World Translation) Yɛ be mli ni gbɔmɛi ni hiɛ sɔɔ nii lɛ ekase Biblia mli shishitoo tsɔɔmɔi lɛ ahe nii sɛɛ lɛ, amɛsumɔɔ ni amɛya amɛhiɛ kɛyashɛ Kristofoi adalɛ mli. Nɔ ni amɛshweɔ ji ni amɛle Yehowa diɛŋtsɛ, ni amɛha e-Wiemɔ lɛ he shishinumɔ ni amɛyɔɔ lɛ mli alɛɛ ni emli akwɔ, ni amɛkɛtsu nii kwraa kɛmɔ shi yɛ amɛshihilɛ mli. Amɛtaoɔ ni amɛtamɔ amɛ ŋwɛi Tsɛ lɛ, ni amɛjie esui lɛ akpo ni amɛkwɛ saji taakɛ ekwɛɔ amɛ lɛ. Enɛ tsirɛɔ amɛ koni amɛtao gbɛi ni amɛaatsɔ nɔ amɛná nitsumɔ ni ehaa atsuɔ yɛ shikpɔŋ nɔ ŋmɛnɛ yɛ wɔgbii nɛɛ amli lɛ mli gbɛfaŋnɔ babaoo bɔ ni amɛaanyɛ. Ani nakai ofeɔ?—Efes. 5:1; Heb. 5:12–6:3; 1 Tim. 4:15.

 7. Anɔkwa ekomefeemɔ baanyɛ aba bianɛ po yɛ mɛɛ gbɛi anɔ, ni nine shɛɔ enɛ nɔ yɛ mɛɛ gbɛ nɔ?

⁷ Biblia lɛ tsɔɔ akɛ gbɔmɛi ni sɔmɔɔ Yehowa lɛ baafee gbɔmɛi ni ámɛfee ekome. (Efes. 4:1-3) Esa akɛ ekomefeemɔ nɛɛ ahi shi bianɛ, eyɛ mli akɛ jeŋ ni mli egbala mli wɔyɔɔ ni wɔmiipele yɛ emuu ni wɔyeee lɛ shishi lolo. Yesu kɛ hiɛdɔɔ sɔle akɛ ekaselɔi lɛ fɛɛ afee ekome, ni amɛná anɔkwa ekomefeemɔ mli ŋɔɔmɔ diɛŋtsɛ. Mɛni ji nɔ ni enɛ baatsɔɔ? Ákɛ klɛŋklɛŋ kwraa lɛ, wekukpaa kpakpa baaba amɛ kɛ Yehowa kɛ e-Bi lɛ teŋ. Agbɛnɛ hu amɛbaafee ekome. (Yoh. 17:20, 21) Aafee nakai bianɛ yɛ be mli ni amɛkɛ gbɛtsɔɔmɔi ni amɛnine shɛɔ nɔ yɛ Yehowa “we” lɛ tsuɔ nii lɛ.

MƐƐ NIBII HAA EKOMEFEEMƆ BAA?

 8. (a) Mɛni wɔnaa kɛji akɛ wɔkɛ Biblia lɛ tsu nii ni wɔkɛha sanebimɔi ni kɔɔ wɔhe lɛ ahetoo? (b) Tsɔ sanebimɔi ni ato naa yɛ yiteŋgbɛ lɛ ahetoohamɔ nɔ otsɔɔ nibii ni kɛ Kristofoi a-ekomefeemɔ baa.

⁸ Ato nibii titrii ni yeɔ buaa ni nɛkɛ ekomefeemɔ nɛɛ baa lɛ ekomɛi anaa yɛ shishigbɛ. Yɛ be mli ni ohaa sanebimɔi ni nyiɛɔ enɛɛmɛi asɛɛ lɛ hetoo lɛ, susumɔ bɔ ni eko fɛɛ eko saa wekukpaa ni ka okɛ Yehowa kɛ onanemɛi Kristofoi lɛ ateŋ lɛ he jogbaŋŋ. Kɛ odamɔ ŋmalɛi ni atsɛ lɛ anɔ osusu nɛkɛ saji otii nɛɛ ahe lɛ, eeeye ebua ni ona jwɛŋmɔ kpakpa kɛ sanesɛɛkɔmɔ ni ji sui ni he hiaa wɔ fɛɛ yɛ Nyɔŋmɔ he lɛ. (Abɛi 5:1, 2; Fil. 1:9-11) No hewɔ lɛ susumɔ nɛkɛ nibii nɛɛ ahe ekomekome:

(1) Wɔ fɛɛ wɔjaa Yehowa ni wɔkpɛlɛɔ nɔ akɛ lɛ eyɔɔ hegbɛ akɛ efeɔ mla yɛ nɔ ni hi kɛ nɔ ni ehiii he.

Kɛ wɔje gbɛ wɔku wɔhiɛ wɔshwie Yehowa ŋaawoo ni kɔɔ sane ko ni wɔsusuɔ akɛ eyɛ bibioo kɛha wɔ lɛ he lɛ nɔ lɛ, te ebaasusu nifeemɔ nɛɛ he eha tɛŋŋ? (Luka 16:10; okɛto Maleaki 1:6-8 he.)

Ani kɛ wɔbooo Yehowa kitai atoi yɛ be fɛɛ mli lɛ esaa mɛi krokomɛi ahe? (Okɛto Romabii 5:12; Yoshua 7:20-26; 1 Maŋtsɛmɛi 14:16 he.)

(2) Wɔyɛ Nyɔŋmɔ Wiemɔ lɛ akɛ nɔ ni baatsɔɔ wɔ gbɛ, yɛ he fɛɛ he ni wɔyɔɔ yɛ je lɛŋ.

Kɛ wɔkpɛ wɔyiŋ lɛ, mɛɛ oshara yɔɔ feemɔ ni wɔɔfee nɔ ni “wɔnuɔ he” kɛkɛ akɛ eja lɛ mli? (Yer. 17:9; Abɛi 14:12)

Kɛ wɔnuuu ŋaawoo ko ni Biblia lɛ kɛhaa yɛ sane ko he lɛ shishi lɛ, mɛni esa akɛ wɔfee? (Abɛi 2:3-5)

(3) Wɔ fɛɛ wɔnaa mumɔŋ niyenii kome too ni akɛhaa lɛ he sɛɛ.

Mɛɛ shihilɛi yɔɔ mɛi ni hiɛ esɔɔɔ mumɔŋ niyenii he gbɛjianɔ ni Yehowa eto lɛ ateŋ? (Okɛto Yesaia 1:3; 9:16; 65:14 he.)

(4) Yesu Kristo ji wɔ-Hiɛnyiɛlɔ kɛ mɔ ni wɔ fɛɛ wɔtsɔɔ enɔ wɔbɛŋkɛɔ Yehowa yɛ jamɔ mli, shi jeee gbɔmɔ adesa ko kwraa.

Ani wɔteŋ mɔ ko yɛ yiŋtoo pɔtɛɛ ko ni eeedamɔ nɔ ehe eye akɛ, akɛ gbɔmɛi lɛ, wɔnɔ kwɔlɔ fe mɛi krokomɛi? (Rom. 3:23, 24; 12:3; Mat. 23:8-10)

(5) Wɔkɛ wɔhiɛ fɔɔ Nyɔŋmɔ Maŋtsɛyeli lɛ nɔ akɛ adesai ahiɛnɔkamɔ kome pɛ ni he fɛɛ he ni wɔyɔɔ lɛ kɔɔɔ he eko.

Enɛ buɔ wɔhe kɛjɛɔ sui ni aaaha wɔmli agbala lɛ he yɛ mɛɛ gbɛ nɔ? (Mat. 6:9, 10; Mika 4:3)

(6) Mumɔ krɔŋkrɔŋ lɛ haa mɛi ni jaa Yehowa lɛ naa sui ni he hiaa Kristofoi a-ekomefeemɔ.

Te wɔfeɔ tɛŋŋ wɔgbeleɔ gbɛ koni Nyɔŋmɔ mumɔ lɛ awo eyibii lɛ yɛ wɔmli? (Lala 1:2; Abɛi 22:4; Kpoj. 3:6; Bɔf. 5:32)

Mumɔ lɛ yibii ni wɔyɔɔ lɛ baana hewalɛ yɛ wekukpaa ni ka wɔkɛ Yehowa teŋ lɛ nɔ yɛ mɛɛ gbɛ nɔ? Ebaana wɔkɛ wɔnyɛmimɛi anɔ hewalɛ yɛ mɛɛ gbɛ nɔ? (Gal. 5:22, 23)

(7) Gbɛnaa nii akɛ wɔshiɛ Nyɔŋmɔ Maŋtsɛyeli lɛ he sanekpakpa lɛ ka wɔ fɛɛ wɔnɔ.

Mɛɛ gbɛ nɔ wɔhe ni wɔkɛwoɔ nɛkɛ shiɛmɔ nitsumɔ nɛɛ mli kɛ wɔnanemɛi Kristofoi fɛɛ lɛ naa bɔ ni wɔnuɔ he wɔhaa amɛ lɛ nɔ hewalɛ yɛ? (Okɛto Kolosebii 4:7, 11 he.)

 9. Kɛ wɔkɛ anɔkwalei nɛɛ tsu nii yɛ wɔshihilɛ mli lɛ, mɛni jɛɔ mli baa?

⁹ Ni wɔɔkpɛlɛ anɔkwa saji nɛɛ anɔ lɛ ji nɔ kome. Ni wɔɔhi shi yɛ naa lɛ biɔ babaoo. Shi kɛ wɔfee nakai lɛ, egbalaa wɔ kɛbɛŋkɛɔ Yehowa he. Wɔkɛ wɔnanemɛi heyelilɔi anaanyobɔɔ lɛ hu shɛjeɔ wɔmii. Taakɛ Lala 133:1 kɛɔ lɛ: “Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ!” Ani bo diɛŋtsɛ lɛ onako bɔ ni jeŋ momo nɛɛ he ni oootsi ohe kɛaajɛ, kɛ emli pɛsɛmkunya lɛ fɛɛ he, ni okɛ mɛi ni sumɔɔ Yehowa diɛŋtsɛ lɛ akpe yɛ kpeei ashishi lɛ haa omii shɛɔ ohe?

KWA SUI NI KƐ MLIGBALAMƆI BAA

10. Mɛni hewɔ ehe hiaa ni wɔkwɛ jogbaŋŋ koni wɔkwa heyeli mumɔ lɛ?

¹⁰ Esa akɛ wɔkwa sui ni kɛ mligbalamɔi baa lɛ, bɔni afee ni wɔkafite nakai ekomefeemɔ ni jara wa lɛ. Enɛɛmɛi ateŋ nɔ titri ji heyeli mumɔ lɛ. Yehowa yeɔ ebuaa wɔ koni wɔkwa su nɛɛ kɛtsɔ mɔ ni kɛba ni ji Satan Abonsam ni ekpaa ehe mama lɛ nɔ. Lɛ ji mɔ ni laka Hawa ni eha esusu akɛ kɛ eku ehiɛ eshwie nɔ ni Nyɔŋmɔ ewie lɛ nɔ ni ekpɛ eyiŋ eha lɛ diɛŋtsɛ ehe lɛ no aaahi aha lɛ. Adam yafata ehe yɛ nakai atuatsemɔ gbɛ lɛ nɔ. Nɔ ni jɛ mli ba ji amanehulu kɛha amɛ kɛ wɔ hu. (1 Mose 2:16, 17; 3:1-6, 17-19) Jeŋ ni nakai heyeli mumɔ lɛ eyi mli obɔ tɔ mli wɔyɔɔ nɛɛ, no hewɔ lɛ esaaa akɛ efeɔ wɔ naakpɛɛ kɛji akɛ ehe miihia ni wɔjie nakai mumɔ lɛ kɛjɛ wɔmli. Yehowa jɛɔ suɔmɔ mli eyeɔ ebuaa wɔ koni wɔfee nakai kɛtsɔ ŋaawoo ni etsɔɔ egbɛjianɔtoo lɛ nɔ ekɛhaa wɔ lɛ nɔ.

11. Mɛni baatsɔɔ kɛji akɛ wɔkɛ anɔkwayeli miisaa wɔhe wɔha shihilɛ yɛ Nyɔŋmɔ jalɛ Gbɛjianɔtoo Hee lɛ mli?

¹¹ Wɔtsɔ nakai gbɛjianɔtoo lɛ nɔ wɔkase Yehowa shiwoo ni yɔɔ nyam akɛ, ekɛ ŋwɛi hee kɛ shikpɔŋ hee “ni jalɛ hiɔ mli” baato nɔ ni yɔɔ nɛɛ najiaŋ lɛ he nii. (2 Pet. 3:13) Gbɛkpamɔ ni wɔyɔɔ akɛ etsɛŋ ni nɛkɛ yiwalɛ je nɛɛ baaho aya ni ákɛ abaatsake shikpɔŋ lɛ afee lɛ Paradeiso lɛ haa wɔnaa miishɛɛ. Shi ani wɔ diɛŋtsɛ wɔshihilɛ gbɛ tsɔɔ akɛ wɔmiisaa wɔhe wɔha shihilɛ yɛ jeŋ ni jalɛ nii ji nɔ ni abaafee yɛ jɛmɛ lɛ mli hilɛ diɛŋtsɛ? Biblia lɛ kɛɔ wɔ yɛ faŋŋ mli akɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ Tsɛ lɛ suɔmɔ lɛ bɛ emli.” (1 Yoh. 2:15) Eji anɔkwale akɛ nibii pii yɛ ni kɔɔ je lɛ he ni wɔteŋ mɔ ko mɔ ko sumɔɔɔ. Shi ani nibii ni tsiɔ ŋɔɔmɔ ni wɔɔye yɛ je lɛŋ lɛ naa lɛ pɛ wɔsumɔɔɔ? Aloo wɔkpooɔ esu loo emumɔ lɛ hu—eheyeli su lɛ, bɔ ni esusuɔ ekome ehe kɛtekeɔ nɔ lɛ? Ani wɔkɛmiifee wɔsubaŋ akɛ wɔɔbo Yehowa toi kɛjɛ wɔtsui mli diɛŋtsɛ, ni nɔ ni heloo lɛ kɛɔ lɛ kɔɔɔ he eko? Esa akɛ wɔshihilɛ gbɛ fɛɛ—ni he ni wɔyɔɔ lɛ kɔɔɔ he eko, ni nɔ ni wɔfeɔ lɛ kɔɔɔ he eko lɛ—aye odase akɛ Nyɔŋmɔ ji mɔ ni kudɔɔ wɔsusumɔi kɛ wɔyiŋtoi.—Abɛi 3:5, 6.

12. (a) Mɛni hewɔ ehe hiaa akɛ wɔɔŋɔ hegbɛ lɛ bianɛ koni wɔkase Yehowa gbɛi ni wɔnyiɛ nomɛi asɛɛ yɛ wɔshihilɛ mli lɛ? (b) Ŋmalɛi ni atsɛ ni aŋmaaa yɛ kukuji lɛ amli lɛ tsɔɔ mɛni diɛŋtsɛ kɛhaa wɔ?

¹² Kɛ be ni Yehowa eto ni ebaakpata nɛkɛ yiwalɛ nibii agbɛjianɔtoo nɛɛ kɛ mɛi fɛɛ ni sumɔɔ egbɛ̀i lɛ ahiɛ lɛ shɛ lɛ, eshashaoŋ shi. Etsiŋ nakai be lɛ etoŋ ni etsakeŋ tɛi ni efolɔ eshwie shi lɛ hu bɔni afee ni eha mɛi ni bɔɔ mɔdɛŋ lolo akɛ amɛaakpɛtɛ je lɛ he aloo mɛi ni hiɛ tsui fãfãafã yɛ Nyɔŋmɔ suɔmɔnaa nii ni amɛaakase ni amɛfee lɛ he lɛ aba mli. Be ni esa akɛ akɛtsu he nii nɛ! (Luka 13:23, 24; 17:32; 21:34-36) Belɛ kwɛ miishɛɛ ni enɛ ji akɛ wɔmiina “asafo babaoo” lɛ ni ji gbɔmɛi ni miimɔ hegbɛ ni jara wa waa nɛɛ mli lɛ, ni amɛkɛ miishɛɛ miitao tsɔsemɔ ni Yehowa tsɔɔ egbɛjianɔtoo ni suɔmɔ yɔɔ mli lɛ nɔ ekɛhaa lɛ, koni agbɛnɛ amɛnyiɛ yɛ egbɛi anɔ yɛ ekomefeemɔ mli lɛ!

[Shishigbɛ niŋmai]

Sanegbaa Ni Akɛtiɔ Mli

● Mɛni ji Yehowa yiŋtoo yɛ jamɔ he?

● Beni wɔkase Biblia shishijee tsɔɔmɔi lɛ asɛɛ lɛ, mɛɛ nɔyaa kroko esa akɛ wɔbɔ mɔdɛŋ waa ni wɔtao?

● Mɛni wɔ aŋkroaŋkroi lɛ baanyɛ afee koni nibii ni feɔ mɛi ekome ni wɔsusu he lɛ ana hewalɛ yɛ wɔshihilɛ nɔ bɔ ni sa?

[Baafa muu mfoniri ni yɔɔ baafa 4]