Yitso 18
Maŋtsɛyeli lɛ Eye Kunim!
1. (a) Mɛni ji yiŋtoo hewɔ ni wɔyɔɔ nɔmimaa yɛ adesai awɔsɛɛ shihilɛ he lɛ? (b) Mɛni Harmagedon baatsɔɔ kɛha mɛi ni fiteɔ shikpɔŋ lɛ?
ANI abaakpata adesai fɛɛ ahiɛ kɛjɛ shikpɔŋ nɛɛ nɔ? Dabi. Ni Maŋtsɛyeli lɛ ji yiŋtoo hewɔ. Ejaakɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ,” ni ji Yesu ni akɛ lɛ eta maŋtsɛsɛi nɔ lɛ ji mɔ ni jeɔ nitsumɔ shishi yɛ Maŋtsɛyeli lɛ ‘baa’ lɛ mli, koni ekpata Satan shikpɔŋ nɔ gbɛjianɔtoo lɛ kɛ eyiwalɛ gbɛjianɔtoi lɛ ahiɛ. Abaakpata nɛkɛ mɛi ni baakpata shikpɔŋ lɛ hiɛ nɛɛ hu diɛŋtsɛ ahiɛ yɛ Harmagedon mli.—Kpojiemɔ 11:15, 18; 14:19, 20; 19:11-16.
2, 3. (a) Mɛɛ kɔkɔbɔɔ Zefania gbalɛ lɛ kɛhaa? (b) Mɛni he hiaa kɛha yibaamɔ?
2 Wɔ-Nyɔŋmɔ, Yehowa ebɔ wɔ kɔkɔ ni wɔya nɔ wɔshi kpe daa ni wɔkwɛ nɔ ni etsɛŋ ni ebaatsu yɛ Harmagedon lɛ.
“ ‘No hewɔ lɛ nyɛkwɛa mi gbɛ,’ Yehowa kɛɛ, ‘kɛyashi gbi nɔ ni mate shi akɛ odasefonyo, ejaakɛ miyiŋtoo ji akɛ mabua jeŋmaji lɛ anaa, ni makpee maŋtsɛyelii lɛ kɛaakpe, koni mafɔse mimlila kɛ mimlifu ni naa wa lɛ fɛɛ mashwie amɛnɔ; ejaakɛ miwuŋayeli la lɛ aaasha shikpɔŋ muu lɛ fɛɛ.’ ”
Shi mɛi komɛi baana yibaamɔ kɛjɛ mli, mɛi babaoo diɛŋtsɛ! Ni Yehowa miisaa amɛ amrɔ nɛɛ po, taakɛ nakai gbalɛ lɛ nɔŋŋ mli wiemɔi ni tsa nɔ lɛ tsɔɔ mli lɛ, akɛ:
“Ejaakɛ no mli lɛ maŋɔ wiemɔ krɔŋŋ maha majimaji lɛ, koni amɛ fɛɛ kwa amɛtsɛ Yehowa gbɛi lɛ, koni amɛsɔmɔ lɛ kɔŋ kɛ kɔŋ.”—Zefania 3:8, 9, “NW.”
3 Ani obaafee nakai mɛi ni baana yibaamɔ lɛ ateŋ mɔ ko? Hɛɛ, kɛji “[o]tsɛ Yehowa gbɛi lɛ.” Mɛɛ gbɛ nɔ oootsɔ ofee enɛ? Kɛtsɔ tsakemɔ ni oootsake ni owie “wiemɔ krɔŋŋ” lɛ nɔ—ni oŋɔ Nyɔŋmɔ Maŋtsɛyeli lɛ sanekpakpa ni tsuɔ mɔ he lɛ oto otsui mli, ni otsu he nii. (Marko 13:10) Beni ojieɔ hemɔkɛyeli kpo yɛ gbɛjianɔ ni Nyɔŋmɔ eto kɛtsɔ Kristo nɔ lɛ mli lɛ, esa akɛ ofee taakɛ Petro wo lɛ diɛŋtsɛ emaŋbii lɛ hewalɛ akɛ amɛfee, afii ohai 19 ni eho nɛ lɛ, akɛ: “No hewɔ lɛ nyɛtsakea nyɛtsuiiaŋ, ni nyɛkua nysɛɛ, koni agbe nyɛhe eshai lɛ, bɔni afee ni hejɔɔmɔ yinɔ ajɛ Yehowa diɛŋtsɛ ŋɔɔ aba.”—Bɔfoi lɛ Asaji 3:19, NW.
4, 5. (a) Mɛɛ gbɛ nɔ oootsɔ ona okɛ Yehowa teŋ wekukpaa ni bɛŋkɛ kpaakpa? (b) Mɛɛ gbɛ nɔ oootsɔ obo “wiemɔ krɔŋŋ” lɛ toi?
4 Taakɛ Yesu fee lɛ, esa akɛ bo hu ojie ohe kpo akɛ ojeee Satan je lɛ fa. (Yohane 17:14, 16) Kɛji ojɔɔ ohe nɔ oha Yehowa kɛtsɔ Kristo nɔ ni okɛ nu mli baptisimɔ fee he okadi lɛ, no lɛ obaanyɛ ona okɛ Yehowa Nyɔŋmɔ teŋ wekukpaa ni bɛŋkɛ kpaakpa. (1 Petro 3:21) Esa akɛ obɔ mɔdɛŋ ni oha nɛkɛ wekukpaa ni bɛŋkɛ kpaakpa nɛɛ aya hiɛ be fɛɛ be, beni okɛ ewebii ni ato amɛhe gbɛjianɔ yɛ shikpɔŋ nɔ lɛ sɔmɔɔ Nyɔŋmɔ “kɔŋ kɛ kɔŋ” lɛ. Obaasumɔ hu ni okɛ mɛnɛɛmɛi afee ekome ni okɛha mɛi fɛɛ ni baabo toi lɛ anu “maŋtsɛyeli lɛ he sanekpakpa nɛɛ,” yɛ hegbɛ ni ooona lɛ naa.—Mateo 24:14; Romabii 10:10-18; Hebribii 13:15.
5 Ani oji mɔ ko ni miibo “wiemɔ krɔŋŋ” ni ji Biblia mli anɔkwale lɛ toi yɛ nɛkɛ gbɛ nɔ? No lɛ okɛ ohe afɔ Yehowa nɔ kwraa kɛmɔ shi. “Nuu Ekaalɔ ni aaanyɛ oyiwala ahere ni.”—Zefania 3:17; Yesaia 12:2-5.
6. Mɛɛ naagbee ŋaawoo Yohane kɛha, ni mɛni esa akɛ enɛ awo wɔ hewalɛ ni wɔfee?
6 Beni onaa suɔmɔ kɛhaa Yehowa kɛ ejalɛ lɛ, ehe miihia hu ni ohi shi yɛ Biblia shishitoo mlai anaa. Bɔfo Yohane kɛ nɛkɛ ŋaawoo fɛfɛo nɛɛ ha akɛ:
“Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ Tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ Tsɛ lɛ mli, shi moŋ je lɛ mli ejɛ; ni je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:15-17)
“Kɛyaa naanɔ”! Ani no haaa efee sɛɛnamɔ akɛ akɛ ekaa aaafee Nyɔŋmɔ suɔmɔnaa nii yɛ Satan nibii agbɛjianɔtoo fɔŋ nɛɛ naagbee nɛɛ amli? Ani ewooo wɔ hewalɛ yɛ nɛkɛ “naagbee gbii” nɛɛ amli ni wɔbɛŋkɛ Yehowa gbɛjianɔtoo lɛ, ni “tsulɔ anɔkwafo kɛ nilelɔ” lɛ damɔ shi kɛha lɛ lɛ he kpaakpa daa nɛɛ?—Mateo 24:45-47.
NITSUMƆ KPETEŊKPELE KO
7. Yɛ Harmagedon sɛɛ lɛ, mɛni baashwɛ?
7 Beni Harmagedon ta lɛ he lasu lɛ hoɔ eyaa lɛ, Yehowa gbɛjianɔtoo ni anaa lɛ baakã he ahi shi yɛ biɛ, ni efee klalo ni akɛtsu nii yɛ gbɛ fɛɛ gbɛ ni eeetsɔɔ lɛ nɔ. Ni eba akɛ aaabu wɔ hu aŋkroaŋkro akɛ wɔsa, ni wɔhi biɛ!—Zefania 2:3; Lala 25:8, 9, 20.
8. (a) Mɛni he baahia yɛ nakai beaŋ ni akɛtsu Nyɔŋmɔ nitsumɔ lɛ? (b) No mli lɛ Nyɔŋmɔ webii efee klalo yɛ mɛɛ gbɛ nɔ?
8 Esa akɛ Nyɔŋmɔ webii aya nɔ ahi shi akɛ mɛi ni ato amɛhe gbɛjianɔ yɛ Maŋtsɛyeli nɔyeli lɛ shishi bɔni afee ni amɛnyɛ amɛtsu nitsumɔ wulu ni ji shikpɔŋ ni atsuu he lɛ nɔ ni amɛaaha efee fɛo, ni amɛtsake wɔ shikpɔŋ kokroo nɛɛ ni efee “Nyɔŋmɔ trom” diɛŋtsɛ ni yɔɔ fɛo. (Okɛto Ezekiel 31:8 he.) Ani oosumɔ ni ona nakai nitsumɔ lɛ hu mli gbɛfaŋnɔ? Tsuijurɔnaa mumɔ kɛ hewalɛ ni jɛ Nyɔŋmɔ ŋɔɔ he baahia koni akɛtsu nakai nitsumɔ lɛ—ni ji ekaa ni Yehowa Odasefoi kɛtsuɔ nii ni ‘amɛkɛshiɛɔ maŋtsɛyeli lɛ he sanekpakpa nɛɛ yɛ shikpɔŋ lɛ nɔ fɛɛ’ lɛ nɔŋŋ eko. Esa akɛ mɔ fɛɛ mɔ afee nitsulɔ diɛŋtsɛ, yɛ Maŋtsɛ lɛ nɔkwɛmɔ nɔ lɛ sɛɛnyiɛmɔ mli, mɔ ni kɛɛ akɛ: “Mi-Tsɛ miitsu nii kɛbashi be nɛ, no hewɔ ni mi hu mitsuɔ lɛ.”—Yohane 5:17; 4:34.
9. (a) Mɛɛ nitsumɔ baahi shi yɛ jɛmɛ? (b) Mɛni tsɔɔ akɛ enɛ efeŋ deŋmegbomɔ folo kɛkɛ?
9 Ebɛ naakpɛɛ akɛ tsumaa nitsumɔi baashwere yɛ shikpɔŋ lɛ nɔ he fɛɛ he—jeee maŋtiase tsũi ni yɔɔ taŋ ni mɛi babaoo wɔɔ mli lɛ amaamɔ, shi moŋ wekui ashihilɛ hei fɛfɛji ahe gbɛjianɔtoo kpakpa yɛ paradeiso shihilɛ mli. Hɛɛ, nitsumɔ babaoo yɛ ni ebaabi ni atsu, shi ebaafee miishɛɛ, nitsumɔ ni ŋɔɔ, nitsumɔ ni nyɔmɔwoo yɔɔ mli, nɔ ni Maŋtsɛ Salomo wie he lɛ, akɛ, “Nɔ ko nɔ ko bɛ ni hi” fe akɛ “gbɔmɔ aye ni enu, ni eye nii kpakpai amli ŋɔɔmɔ yɛ edeŋmegbomɔ fɛɛ mli.”—Jajelɔ 3:12, 13; okɛto Yesaia 65:17, 21-25 he.
10. Mɛni Kpojiemɔ 21:1-4 tsɔɔ yɛ shihilɛi ni baahi shi yɛ nakai beaŋ lɛ he?
10 Mɛɛ shihilɛi ashishi Nuŋtsɔ lɛ “tooi krokomɛi” lɛ baatsu amɛnitsumɔ lɛ yɛ? (Yohane 10:16) Kpojiemɔ yitso 21 lɛ kɛɔ nɔ ni wɔbaanyɛ wɔkpa gbɛ. Ewieɔ “ŋwɛi hee kɛ shikpɔŋ hee” he. Adesai anɔyeli gbɛjianɔtoi fɔji lɛ bɛ adesai ashihilɛ nɔ hewalɛ ko dɔŋŋ, ejaakɛ “tsutsu ŋwɛi lɛ kɛ tsutsu shikpɔŋ lɛ” eho etee. Agbɛnɛ hu, ajie Abonsam kɛ ehewalɛ ni yɔɔ nigii ni enaa yɛ mɛi anɔ lɛ kɛtee kwraa. Adesai “ŋshɔ” ni yiŋ efutu amɛ bɛ dɔŋŋ, ni kũɔ kɛyaa kɛbaa beni amɛdiɔ nifeemɔi ni Nyɔŋmɔ gbeyeishemɔ bɛ mli lɛ asɛɛ lɛ. Yɛ no najiaŋ lɛ, adesai ashihilɛ ni yɔɔ shiŋŋ, ni ji “shikpɔŋ hee” lɛ kɛ nɔdaamɔ nɔ ni ma shi shiŋŋ baaha kɛha Nyɔŋmɔ suɔmɔnaa nifeemɔ. Jɛmɛ ji he ni obaanyɛ okɛ anɔkwayeli anyiɛ “ŋwɛi hee,” ni ji Maŋtsɛ lɛ kɛ “[e]yemfro” kɛ emlibii 144,000 lɛ gbɛtsɔɔmɔi asɛɛ yɛ. Nɛkɛ “ayemforo” odehe nɛɛ ‘baakpeleke shi kɛjɛ ŋwɛi aba’ yɛ egbɛhe akɛ “maŋ krɔŋkrɔŋ lɛ ni ji Yerusalem Hee lɛ” mli, kɛ shishinumɔ akɛ ebaagbala ejwɛŋmɔ kɛya nibii asaamɔ nitsumɔ ni abaatsu yɛ shikpɔŋ nɔ lɛ nɔ. Ni mɛɛ miishɛɛ nibii baajɛ mli aba nɛkɛ! Taakɛ Yohane gbaa wɔ lɛ:
“Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafo nui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:1-4.
11. (a) Mɛɛ gbɛkpamɔ ni yɔɔ nyam mɛɔ mɛi ni baana yibaamɔ lɛ? (b) Mɛɛ gbɛ nɔ Nyɔŋmɔ baatsɔ awo shikpɔŋ lɛ nɔ obɔ kɛ gbɔmɛi?
11 Kadimɔ akɛ gbɛkpamɔ ko ni yɔɔ nyam yɛ nakai shiwoo lɛ mli, akɛ “gbele bɛ dɔŋŋ.” Aakpa gbɛ akɛ gbɔmɛi akpekpei abɔ baana yibaamɔ kɛtsɔ “amanehulu kpeteŋkpele” lɛ mli ni amɛaabote “shikpɔŋ hee” lɛ mli jɔɔmɔi lɛ amli. (Kpojiemɔ 7:9, 14) Shi kɛlɛ, yɛ naagbee lɛ, mɛi akpekpei toi akpei, akpekpei akpei abɔ, baana wala mli ŋɔɔmɔ yɛ biɛ yɛ Maŋtsɛyeli lɛ shishi. Mɛni hewɔ wɔkɛɔ akɛ mɛi “akpekpei akpei abɔ” lɛ? Noa gbii lɛ amli nu afua lɛ sɛɛ lɛ, Yehowa kɛ famɔ ha jalɔi ni na yibaamɔ kɛje mli lɛ, ni ekɛɛ: “Nyɛfɔa ni nyɛyi afaa, ni nyɛyia shikpɔŋ lɛ nɔ obɔ.” Enɛ tsɔɔ gbɛkpamɔ ni yɔɔ nyam ni ji adesai agbalashihilɛ mlibotemɔ kɛ bii afɔmɔ yɛ jalɛ mli, kɛ hoo lɛ yɛ be ko mli, yɛ Harmagedon sɛɛ. (1 Mose 9:1, 7; 10:1-32; Mateo 24:37) Shi kɛlɛ, jeee no ji Nyɔŋmɔ gbɛ titri ni eeetsɔ nɔ ‘ewo shikpɔŋ lɛ obɔ’ kɛ adesai yɛ nakai beaŋ. Belɛ, te Nyɔŋmɔ aaafee tɛŋŋ ekɛ gbɔmɛi awo wɔ shikpɔŋ nɛɛ nɔ obɔ, ni ekɛha eshishijee yiŋtoo lɛ aba mli? (1 Mose 1:28; Yesaia 45:18) Ebaafee enɛ kɛtsɔ enaakpɛɛ nii kpele ni ji gbohiiashitee lɛ nɔ, ni eeefee shii abɔ kɛteke nɔ.
“HIƐKALƆI A-NYƆŊMƆ”
12. Mɛɛ Yesu tsɔɔmɔ ko ha gbɔmɛi babaoo anaa kpɛ amɛhe?
12 Be ko lɛ, Yesu ha mɛi ni teɔ shi woɔ lɛ lɛ hetoo, ni ekɛɛ amɛ akɛ:
“Shi gbohiiashitee lɛ hewɔ lɛ nyɛkaneko nɔ ni Nyɔŋmɔ kɛɛ nyɛ akɛ: ‘Mi lɛ, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ ji mi lɛ’? Nyɔŋmɔ lɛ jeee gbohii a-Nyɔŋmɔ ni, shi moŋ hiɛkalɔi a-Nyɔŋmɔ ni.”
Yɛ Nyɔŋmɔ hiɛ lɛ, nakai hii anɔkwafoi lɛ tamɔ hiɛkalɔi nɔŋŋ, ni ebaatee amɛ shi kɛba wala mli. Gbɔmɛi asafoi babaoo lɛ anaa kpɛ amɛhe yɛ nakai tsɔɔmɔ lɛ he.—Mateo 22:31-33; Luka 20:37, 38.
13. Mɛni wɔbaanyɛ wɔkpa gbɛ yɛ “tooi krokomɛi” anɔkwafoi ni egboi lɛ ahe?
13 Nilee yɛ mli akɛ aaakpa gbɛ akɛ nɛkɛ gbɔmɛi anɔkwafoi ni ŋmɛ amɛtsui shi yɛ yiwaa shishi “koni amɛnine ashɛ shitee ni hi fe no lɛ nɔ” lɛ, kɛ “tooi krokomɛi” lɛ ateŋ mɛi ni hiɛɔ amɛ emuuyeli mli, ni ekolɛ amɛaagboi dani Harmagedon aaashɛ lɛ baana mra shitee kɛba “shikpɔŋ hee” lɛ nɔ. Ekolɛ bo diɛŋtsɛ hu olaaje osuɔlɔi komɛi yɛ gbele mli, ni ji Nyɔŋmɔ tsuji anɔkwafoi po. Kwɛ miishɛɛ ni eeeji akɛ wɔɔkpee nɛkɛ gbɔmɛi nɛɛ fɛɛ kɛjɛ gbohiiaje kɛba, ni wɔgba amɛ Yehowa nitsumɔ kpele ni ekɛbu ehe bem lɛ!—Hebribii 11:35.
14. Mɛɛ hiɛnɔkamɔ ni yɔɔ nyam awie he yɛ Yohane 5:28, 29 kɛ Kpojiemɔ 20:11-13?
14 Shi, adesai ateŋ mɛi krokomɛi ni egboi kɛtsɔ yinɔsane be ni fe afii 6,000 lɛ mli fɛɛ lɛ hu? Yesu kɛɛ: “Enɛ akafee nyɛ naakpɛɛ, ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui lɛ amli lɛ aaanu egbee, ni amɛaaje kpo.” (Yohane 5:28, 29) “Gbohii lɛ, mɛi bibii kɛ mɛi wuji” fɛɛ baaje kpo kɛaajɛ gbohii abui amli kɛba ni amɛaadamɔ Nyɔŋmɔ kojomɔ sɛi lɛ hiɛ.—Kpojiemɔ 20:11-13.
15. Mɛni hewɔ ni kojomɔ be lɛ efeŋ be ni yɔɔ gbeyei lɛ?
15 Ani no baafee be ni yɔɔ gbeyei kɛha mɛi ni abaatee amɛ shi lɛ? Yɛ jamɔ mli mfonirii ni atɛŋ yɛ Naagbee Kojomɔ lɛ he lɛ fɛɛ sɛɛ lɛ, nakai be lɛ moŋ baafee miishɛɛ be fe fɛɛ. Ejaakɛ akojoŋ mɛi ni abaatee amɛ shi lɛ yɛ amɛnifeemɔi fɔji ni amɛfee be ko ni eho lɛ naa, shi moŋ, yɛ bɔ ni amɛsumɔɔ akɛ amɛaahi shi yɛ jalɛ taomɔ nii ni abiɔ yɛ amɛdɛŋ kɛha wala yɛ Nyɔŋmɔ Maŋtsɛyeli lɛ nɔyeli he lɛ shishi lɛ naa. (Okɛto Romabii 6:7 he.) Ni abaabɔ mɔdɛŋ fɛɛ ni aaanyɛ ni akɛye abua amɛ yɛ gbɛ ni baaha asaa amɛkɛ Nyɔŋmɔ teŋ kwraa kɛmɔ shi lɛ nɔnyiɛmɔ mli. Abaatsu tsɔsemɔ nitsumɔ kpele ni fe fɛɛ he nii kɛya hiɛ yɛ Maŋtsɛyeli gbɛjianɔtoo lɛ shishi.
16. (a) Mɛni ji “woji” lɛ? (b) Mɛni hewɔ tsɔsemɔ ni akɛaaha yɛ “shikpɔŋ hee” lɛ nɔ lɛ nɔ baakwɔ waa lɛ?
16 Abaagbele “woji” anaa. Enɛɛmɛi baafee gbɛtsɔɔmɔi ni aŋmala koni eye ebua adesai ni atee amɛ shi kɛba wala mli lɛ koni amɛtsu nakai “nitsumɔi” ni baaha amɛfee mɛi ni sa kɛha naanɔ wala namɔ lɛ. (Kpojiemɔ 20:12) Akɛni Yehowa kɛ e-Mesia Maŋtsɛ lɛ ji mɛi ni kudɔɔ nibii ni akɛtsuɔ tsɔsemɔ lɛ he nii kɛ ehe gbɛjianɔtoo yɛ “shikpɔŋ hee” lɛ nɔ lɛ hewɔ lɛ, ebaaya hiɛ kwraa, kɛji akɛto nɔ fɛɛ nɔ ni Satan je lɛ kɛha dã lɛ he.
JƆƆMƆI NI YƆƆ KƐHA “ASAFO BABAOO” LƐ
17. Kɛji ona yibaamɔ kɛtee nakai “shikpɔŋ hee” lɛ nɔ lɛ, mɛni ehe baahia ni ofee?
17 Shi, kɛ oji “asafo babaoo” ni baana yibaamɔ kɛfo Harmagedon lɛ ateŋ mɔ ko lɛ, nɛgbɛ obaana ohe yɛ, yɛ nɛkɛ mfoniri nɛɛ mli? Bɔfo Paulo kɛɛ: “Taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaana wala yɛ.” (1 Korintobii 15:22) Bo hu Kristo kpɔmɔ nɔ lɛ mli sɛɛnamɔi, ni ekɛbaatsu nii ni ekɛhole adesai anɔ kɛshɛ emuuyeli mli yɛ e-afii 1,000 nɔyeli lɛ mli lɛ ahe baahia bo. Nakai nɔŋŋ ehe baahia ni onine ashɛ tsɔsemɔ ni yɔɔ afii akpe “woji” lɛ amli lɛ hu nɔ, bɔni afee ni okɛ anɔkwayeli atsu “nitsumɔi” ni baaha aŋma ogbɛi yɛ “wala wolo lɛ” mli.
18. Mɛɛ Maŋtsɛyeli gbɛjianɔtoo kɛ miishɛɛ krɛdɛɛ ko baaba?
18 Ŋmɛnɛ, adesa ni yeee emuu aŋsɔ ni oyɔɔ lɛ nyɛɔ emɔmɔɔ nibii ni enyɛmɔ fɛɛ baanyɛ amɔ lɛ mli fã bibioo ko pɛ ni ekɛtoɔ. Ekolɛ anu pɛŋ ni ookɛɛ akɛ, ‘Ao, eji mikai kulɛ!’ Kwɛ bɔ ni sa akɛ oda shi waa yɛ Kristo afɔleshaa lɛ he! Ejaakɛ, akɛ Maŋtsɛyeli gbɛjianɔtoo ni akɛaahole adesai anɔ lɛ fã lɛ, jeee akɛ abaajie gbɔmɔtsoŋ hewaa kɛ piŋmɔ kɛya kɛkɛ, shi adebɔɔ nii ni yɔɔ naakpɛɛ—adesa jwɛŋmɔ ni oyɔɔ lɛ—baaye emuu kɛha saji akasemɔ kɛ nɔ ni okase lɛ kɛ-too, kɛ enɔjwɛŋmɔ, kɛ nɔ ni fe fɛɛ lɛ, jamɔ ni wɔɔtsɔ nɔ koni wɔhiɛ asɔ wɔ-Nyɔŋmɔ, Yehowa sui ni yɔɔ nyam lɛ hu. Abaajie wiemɔ mli husui, ni wiemɔi ni afutu yɛ Babel mɔɔ lɛ maa be lɛŋ kɛba lɛ kɛjɛ jɛmɛ, ni abaatsɔɔ adesai fɛɛ wiemɔ kome bɔni afee ni amɛ fɛɛ amɛja Yehowa kutuu yɛ ekomefeemɔ mli, taakɛ Zefania 3:9 tsɔɔ lɛ.
19. Mɛɛ miishɛɛ Maŋtsɛyeli lɛ shishibii baana mli gbɛfaŋnɔ?
19 Suɔmɔ ni ayɔɔ kɛha Nyɔŋmɔ kɛ naanyo gbɔmɔ lɛ hu baakanya adesai atsuii ni eye emuu. Ebɛ naakpɛɛ akɛ Nuŋtsɔ Maŋtsɛ Yehowa kɛ ewebii ni hiɛ sɔɔ nii lɛ wie nɛkɛ wiemɔi nɛɛ, akɛ:
“Naa, miibɔ ŋwɛi hee kɛ shikpɔŋ hee, ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ; shi moŋ, nyɛnyaa ni nyɛmli afilia nyɛ kɛyaa naanɔ yɛ nii ni mibɔɔ lɛ ahewɔ; ejaakɛ naa, miibɔ Yerusalem [Hee] ni etsɔ mlifilimɔ, kɛ emli bii lɛ hu ni amɛtsɔ nyamɔ! Ni mimli aaafili mi yɛ Yerusalem he, ni manya mimaŋbii lɛ ahe, ni anuŋ yaafo aloo bolɔmɔ gbee yɛ emli dɔŋŋ.” (Yesaia 65:17-19)
Mɛi 144,000 ni ji Kristo hefatalɔi yɛ e-Maŋtsɛyeli lɛ mli lɛ anyamɔ kɛ mlifilimɔ ni jijeɔ lɛ mli baalɛɛ kɛbashɛ Maŋtsɛyeli lɛ shishibii akpekpei akpei abɔ ni yɔɔ shikpɔŋ nɔ lɛ anɔ beni mɛnɛɛmɛi yaa hiɛ kɛbɛŋkɛɔ adesa emuuyeli he lɛ.
ATSE YEHOWA GBƐI LƐ HE KƐMIIYA NAANƆ
20. (a) Mɛni hewɔ afii 1,000 lɛ baaho oya lɛ? (b) Te David jɔɔ Yehowa eha tɛŋŋ? (d) Ani etsirɛɔ bo ni owie yijiemɔ wiemɔi ni tamɔ nakai?
20 Afii akpe baaho, tamɔ gbi kome yɛ Yehowa hiɛ, ni kwɛ bɔ ni eeefee tamɔ be kuku ko kɛkɛ kɛha adesai hu, beni amɛkɛ amɛdeka fɛɛ tsuɔ nii kɛsaa nibii lɛ! (2 Petro 3:8) Wɔbaanyɛ wɔkpa gbɛ akɛ, abaato hiɛtserɛjiemɔ be he gbɛjianɔ hu kɛha miishɛɛ naanyobɔɔ kɛ kpɔiaŋgbɔlemɔ ni haa mɔ hewalɛ, lalai amli miishɛɛnamɔ kɛ ŋaa nitsumɔi krokomɛi ni sa jogbaŋŋ, kɛ be fɛɛ be hu lɛ, gbɛjianɔtoo kɛha wɔ-Bɔlɔ Kpeteŋkpele lɛ jamɔ. Mɔ fɛɛ mɔ baasumɔ ni ejɔɔ Yehowa, taakɛ David fee beni etoɔ gbɛjianɔ kɛhaa sɔlemɔtsu mli jamɔ, beni ekɛɛ akɛ:
“Bo, Yehowa, onɔ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ mɔ ni yɔɔ ŋwɛi kɛ shikpɔŋ lɛ nɔ lɛ, onɔ ni. Bo, Yehowa, onɔ ji maŋtsɛyeli lɛ, ni bo ji mɔ ni ta nii fɛɛ nɔ akɛ yitso. Ni ninamɔ kɛ anunyam fɛɛ jɛ odɛŋ, ni bo nɔŋŋ oyeɔ nii fɛɛ nɔ, ni odɛŋ hu hewalɛ kɛ nyɛmɔ yɔɔ, ni odɛŋ sane nɔŋŋ ji mɔ fɛɛ mɔ dalɛ kɛ hewalɛ namɔ. No hewɔ lɛ agbɛnɛ, wɔ-Nyɔŋmɔ, wɔmiidao shi ni wɔmiijie ohiɛnyam gbɛi lɛ yi!”—1 Kronika 29:11-13.
21. (a) Te Kristo baagbee e-afii akpe nɔyeli lɛ naa eha tɛŋŋ? (b) No mli lɛ mɛni Maŋtsɛyeli lɛ etsu?
21 Yɛ nɛkɛ yijiemɔ wiemɔ ni yɔɔ nyam nɛɛ kɛ gbeekpamɔ naa lɛ, Mɔ ni nɔ kwɔ fe David, Kristo Yesu, baagbe etoiŋjɔlɛ kɛ nibii asaamɔ afii akpe nɔyeli lɛ naa kɛtsɔ nɔ ni bɔfo Paulo gba efɔ shi nɛɛ he nitsumɔ nɔ, akɛ:
“No sɛɛ dani naagbee lɛ baaba, beni eeeŋɔ maŋtsɛyeli lɛ eha Nyɔŋmɔ kɛ Tsɛ lɛ, ni eeefo nɔyeli fɛɛ [ni teɔ shi woɔ lɛ] kɛ hegbɛ fɛɛ kɛ hewalɛ fɛɛ sɛɛ lɛ.”
Abaama nɔ mi shikome ekoŋŋ, kɛ agbɛnɛ kɛmiiya naanɔ akɛ Nyɔŋmɔ nɔyeli ji nɔyeli ni hi, ni yɔɔ hewalɛ ni fa ni ekɛ naanɔ jɔɔmɔi aaabaha Yehowa jalɔi. No mli lɛ ajie Adam gbele lɛ yɛ Maŋtsɛyeli nɔyeli ni mli hi lɛ shishi, ni aha adesai fɛɛ eba wala mli yɛ “Kristo mli.” Kɛtsɔ enɛ nɔ lɛ, abaaha gbɔmɛi akpekpei akpei abɔ ni yɔɔ wala mli yɛ shikpɔŋ nɔ yɛ nakai beaŋ lɛ “[a]ye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.”—Romabii 8:21; 1 Korintobii 15:22-28.
22. (a) Mɛɛ kaa be kukuoo ko baanyiɛ sɛɛ? (b) Mɛɛ naagbee bembuu nitsumɔ ko Yesu baatsu?
22 Abaaŋmɛɛ Satan he kɛjɛ bu kwɔŋkwɔŋ lɛ mli yɛ be kukuoo ko pɛ mli, koni ebaka adesai ajeŋ ni eye emuu lɛ yɛ enɔkwayeli kɛha Yehowa maŋtsɛyeli lɛ he. Gbɔmɛi babaoo ni aleee amɛyibɔ baahala akɛ amɛaanyiɛ Abonsam sɛɛ, shi abaatsu kojomɔ he nii yɛ amɛnɔ oya nɔŋŋ. Nyɔŋmɔ “yoo” lɛ “seshi,” ni ji Kristo Yesu baatsu enaagbee bembuu nitsumɔ lɛ he nii kɛtsɔ blema Onufu lɛ yitso jwaramɔ nɔ, ni eeekpata lɛ kɛ eshwiei lɛ fɛɛ ahiɛ kwraa tamɔ bɔ ni akɛ la ni tsoɔ “nyɔɔŋ kɛ shwane [kɛyaa] naanɔ” kpataa nii ahiɛ lɛ. No mli lɛ akojo sane wulu ni atee lɛ shi yɛ Eden, ni kɔɔ ja ni eja akɛ Yehowa aaaye ebɔɔ nii anɔ maŋtsɛ lɛ he lɛ agbe naa, ni ana naa kɛmiiya naanɔ!—Kpojiemɔ 20:7-10; 1 Mose 3:15.
23. (a) Esa akɛ Nyɔŋmɔ shiwoi ahe susumɔ aha wɔfee mɛni? (b) Mɛni hewɔ esa akɛ wɔsumɔ ni wɔna akɛ ‘Nyɔŋmɔ Maŋtsɛyeli lɛ eba’ lɛ?
23 Kɛ wɔsusu “naanɔ Maŋtsɛ,” wɔ-Bɔlɔ Kpeteŋkpele, Nuŋtsɔ Maŋtsɛ Yehowa shiwoi ni yɔɔ nyam lɛ ahe lɛ, ani etsirɛɛɛ wɔ ni wɔjie egbɛi lɛ yi yɛ shidaa mli? Ani etsirɛɛɛ wɔ ni wɔwie “Nyɔŋmɔ nii wuji” lɛ kɛ “[e]maŋtsɛmɛi a-Maŋtsɛ” lɛ kɛ Mesia Maŋtsɛyeli lɛ he, taakɛ etsirɛ mɛi komɛi yɛ Pentekoste gbi lɛ nɔ lɛ? (Bɔfoi lɛ Asaji 2:11; Kpojiemɔ 15:3; 19:16) Ani etsirɛɛɛ wɔ ni wɔsɔle wɔha wɔ ŋwɛi Tsɛ lɛ akɛ, “HA O-MAŊTSƐYELI LƐ ABA”? (Mateo 6:9, 10, NW) Hɛɛ, ‘BA,’ ni obakpata Satan nitsumɔi lɛ kɛ egbɛjianɔtoo lɛ hiɛ kɛjɛ shikpɔŋ nɛɛ nɔ! Hɛɛ, ‘BA,’ ni okɛ nɔyeli ni sa abaha gbɔmɛi adesai fɛɛ! Hɛɛ, ‘BA,’ ni okɛ afii akpe nɔyeli ni yɔɔ nyam ni kɛ paradeiso baasaa aba ekoŋŋ, kɛ mɛi ni egboi lɛ ashitee, kɛ adesai fɛɛ ni sumɔɔ lɛ anɔholemɔ kɛmiiya adesai emuuyeli mli lɛ aba! Hɛɛ, ‘BA,’ koni atse Yehowa gbɛi ni gbɛi ko kwraa kɛ lɛ yeee egbɔ lɛ he kɛya naanɔi anaanɔ!
[Mfoniri ni yɔɔ baafa 180, 181]
Gbekɛbii ni afɔ amɛ yɛ jalɛ mli, yɛ shikpɔŋ hee lɛ nɔ lɛ naŋ haomɔi ni gbaa wekui anaa ŋmɛnɛ lɛ eko kwraa