“Nyɛkwɛa Mi Gbɛ”
“ ‘No hewɔ lɛ nyɛkwɛa mi gbɛ,’ Yehowa kɛɛ.”—ZEFANIA 3:8.
1. Mɛɛ kɔkɔbɔɔ gbalɔ Zefania kɛha, ni gbɔmɛi ni yɔɔ ŋmɛnɛ lɛ yɛ enɛ he miishɛɛ yɛ mɛɛ gbɛ nɔ?
“YEHOWA gbi wulu lɛ ebɛŋkɛ.” Gbalɔ Zefania kɛ kɔkɔbɔɔ tsɛmɔ nɛɛ ha yɛ afii ohai kpawo D.Ŋ.B. teŋ gbɛ. (Zefania 1:14) Aaafee afii 40 loo 50 sɛɛ lɛ, gbalɛ lɛ ba mli beni gbi ni akɛbaatsu Yehowa kojomɔi ahe nii lɛ ba Yerusalem kɛ nakai jeŋmaji ni etse Yehowa maŋtsɛyeli hiɛ atua kɛtsɔ nibii fɔji ni amɛfee ewebii nɔ lɛ anɔ lɛ. Mɛni hewɔ esa akɛ gbɔmɛi ni yɔɔ afii ohai 20 nɛɛ naagbee gbɛ nɛɛ ana enɛ he miishɛɛ? Wɔyɛ be ko ni Yehowa naagbee “gbi wulu” lɛ miibɛŋkɛ oyayaayai lɛ mli. Taakɛ eba yɛ Zefania gbii lɛ amli lɛ, Yehowa “mlifu ni naa wa” lɛ miihe atso yɛ ŋmɛnɛŋmɛnɛ maŋ ni tamɔ Yerusalem pɛpɛɛpɛ—ni ji Kristendom—kɛ jeŋmaji fɛɛ ni waa Yehowa webii ayi, ni amɛtseɔ ejeŋ muu fɛɛ maŋtsɛyeli lɛ hiɛ atua lɛ anɔ.—Zefania 1:4; 2:4, 8, 12, 13; 3:8; 2 Petro 3:12, 13.
Zefania—Odasefonyo ni Yɔɔ Ekaa
2, 3. (a) Mɛni wɔle yɛ Zefania he, ni mɛni tsɔɔ akɛ eji Yehowa odasefonyo ni yɔɔ ekaa waa? (b) Mɛɛ anɔkwa saji yeɔ ebuaa wɔ ni wɔnaa be mli kɛ he ni Zefania gbalɛ lɛ ba yɛ?
2 Saji fioo pɛ ale yɛ Zefania, ni egbɛi (Hebri, Tsephan·yahʹ) lɛ shishi ji “Yehowa Eŋɔ Eto (Esaa Nɔ ko Eto)” lɛ he. Shi, kɛ akɛ lɛ to gbalɔi krokomɛi ahe lɛ, Zefania tsɔɔ ewekukpaa kɛyashiɔ yinɔ ni ji ejwɛ lɛ nɔ, kɛyaa sɛɛ kɛyashiɔ “Hezekia” nɔ tɔ̃ɔ. (Zefania 1:1; okɛto Yesaia 1:1; Yeremia 1:1; Ezekiel 1:3 he.) Akɛni enɛ efɔɔɔ kaa hewɔ lɛ, saji ahe wielɔi pii wieɔ enanashishiu lɛ he akɛ Maŋtsɛ Hezekia anɔkwafo lɛ. Kɛ nakai eji lɛ, no lɛ Zefania jɛ odehei aweku mli, ni enɛ baawo bɔ ni ekɛ wiemɔi ni mli wa waa bu Yuda lumɛi lɛ fɔ lɛ mli hewalɛ, ni tsɔɔ akɛ eji Yehowa odasefonyo kɛ gbalɔ ni yɔɔ ekaa waa. Bɔ ni ele Yerusalem shikpɔŋ lɛ shikamɔ kɛ nibii ni yaa nɔ yɛ maŋtsɛ we lɛ jogbaŋŋ eha lɛ tsɔɔ akɛ ekolɛ ejaje Yehowa kojomɔi lɛ yɛ maŋtiase lɛ mli diɛŋtsɛ.—Kwɛmɔ Zefania 1:8-11, NW shishigbɛ niŋmaai lɛ.
3 Nɔ ni sa kadimɔ waa ji anɔkwale ni eji akɛ, beni Zefania jaje ŋwɛi kojomɔi eshi Yuda maŋ lɛ mli “lumɛi” (abladei, loo wekui anɔ maŋtsɛmɛi) lɛ kɛ “maŋtsɛ bii lɛ,” etsiii maŋtsɛ lɛ diɛŋtsɛ tã yɛ wiemɔi ni ewie eshi amɛ lɛ mli.a (Zefania 1:8; 3:3) Enɛ tsɔɔ akɛ no mli lɛ obalanyo Maŋtsɛ Yosia etsɔɔ suɔmɔ ni eyɔɔ kɛha jamɔ krɔŋŋ lɛ momo, eyɛ mli akɛ, yɛ shihilɛ ni yɔɔ ni Zefania wie waa eshi lɛ hewɔ lɛ, eka shi faŋŋ akɛ no mli lɛ ejeko ejamɔ mli tsakemɔi lɛ ahe nitsumɔ shishi. Enɛɛmɛi fɛɛ tsɔɔ akɛ Zefania gba yɛ Yuda, yɛ Yosia ni ye maŋtsɛ kɛjɛ afi 659 kɛbashi 629 D.Ŋ.B. lɛ, nɔyeli lɛ shishijee afii lɛ amli. Ŋwanejee ko bɛ he akɛ ekaa ni Zefania kɛgba lɛ ha bɔ ni obalanyo Yosia jwɛŋmɔ yɔɔ wɔŋjamɔ, yiwalɛ nifeemɔ, kɛ efɔŋ feemɔ ni fa babaoo yɛ Yuda yɛ nakai beaŋ lɛ nɔ lɛ tee hiɛ waa, ni ewo lɛ hewalɛ kɛha ta ni efã eshi wɔŋjamɔ yɛ sɛɛ mli hu lɛ.—2 Kronika 34:1-3.
Yiŋtoi Kɛha Yehowa Mlifu ni Naa Wa Lɛ
4. Mɛɛ wiemɔi amli Yehowa jie emli ni efu Yuda kɛ Yerusalem lɛ kpo yɛ?
4 Yehowa yɛ yiŋtoo kpakpa ni eeedamɔ nɔ emli afu Yuda kɛ emaŋtiase ni ji Yerusalem hiɛnyiɛlɔi lɛ kɛ emli bii lɛ. Ejaje kɛtsɔ egbalɔ Zefania nɔ akɛ: “Makpã minine mli yɛ Yuda kɛ Yerusalem bii lɛ fɛɛ nɔ, ni maplenee Baal nɔ ni eshwɛ lɛ, kɛ wulɔmɛi kɛ osɔfoi lɛ fɛɛ agbɛi kɛaajɛ biɛ, kɛ mɛi hu ni jaa ŋwɛi asafo lɛ yɛ tsũi ayiteaŋ lɛ, kɛ mɛi ni jaa Yehowa ni amɛkãa lɛ kita ni amɛsaa amɛkãa Malkam hu kita lɛ.”—Zefania 1:4, 5.
5, 6. (a) Mɛni ji jamɔ mli shihilɛ ni yɔɔ Yuda yɛ Zefania be lɛ mli? (b) Mɛni ji shihilɛ ni Yuda maŋ lɛ hiɛnyiɛlɔi kɛ amɛshishi bii lɛ yɔɔ mli?
5 Akɛ fɔmɔ he kusumii ni afeɔ yɛ Baal jamɔ mli, kɛ daimonioi ahewalɛ ni akɛkwɛɔ ŋulamiiaŋ, kɛ wɔŋjalɔi anyɔŋmɔ Malkam jamɔ wo Yuda he muji. Kɛji Malkam nɔŋŋ ji Molek, taakɛ mɛi komɛi kɛɔ lɛ, no lɛ nɔ ni fata Yuda apasa jamɔ lɛ he hu ji nihii nii ni ji gbekɛbii ni akɛ amɛ shaa afɔle lɛ. Nɛkɛ jamɔ mli nifeemɔi nɛɛ yɛ nyaŋemɔ yɛ Yehowa hiɛ. (1 Maŋtsɛmɛi 11:5, 7; 14:23, 24; 2 Maŋtsɛmɛi 17:16, 17) Emlifu ba amɛnɔ babaoo po kɛfata he, ejaakɛ wɔŋjalɔi lɛ tee nɔ amɛkamɔ kitai yɛ Yehowa gbɛi amli. Eyaŋ nɔ enaŋ jamɔ mli nifeemɔi ni he tseee nɛɛ ahe tsui dɔŋŋ, no hewɔ lɛ ebaakpata osɔfoi wɔŋjalɔi kɛ hemɔkɛyeli kwalɔi lɛ fɛɛ ahiɛ.
6 Kɛfata he lɛ, Yuda maŋ hiɛnyiɛlɔi lɛ hu efite waa. Elumɛi lɛ tamɔ “jatai” amimyelɔi “ni hũuɔ,” ni abaanyɛ akɛ ekojolɔi lɛ hu ato “klaji” fulɔi ahe. (Zefania 3:3) Afolɔɔ amɛshishi bii lɛ anaa akɛ “amɛkɛ yiwalɛ kɛ shishiumɔ woɔ amɛnuntsɔmɛi lɛ awei obɔbɔ.” (Zefania 1:9) Heloonaa ninamɔ fa babaoo. Mɛi pii kɛ shihilɛ lɛ miitsu nii ni amɛkɛmiina nii babaoo.—Zefania 1:13.
Yehowa Gbi lɛ he Yiŋkɔshikɔshi Feemɔi
7. Be sɛɛjekɛmɔ enyiɛ Zefania kɛgba kɛtsɔ “Yehowa gbi wulu lɛ” hiɛ, ni mɛni ji Yudafoi lɛ ateŋ mɛi pii amumɔŋ shihilɛ?
7 Taakɛ wɔna momo lɛ, jamɔ mli shihilɛ fɔŋ ni tee nɔ waa yɛ Zefania gbii lɛ amli lɛ tsɔɔ akɛ etsu enitsumɔ akɛ odasefonyo kɛ gbalɔ lɛ he nii dani Maŋtsɛ Yosia je etafaa ni ekɛte shi ewo wɔŋjamɔ lɛ shishi, aaafee afi 648 D.Ŋ.B. (2 Kronika 34:4, 5) Belɛ, eeenyɛ efee akɛ kɛ hoo lɛ Zefania gba aaafee afii 40 dani “Yehowa gbi wulu lɛ” ba Yuda maŋtsɛyeli lɛ nɔ. Shi yɛ be ni ho lɛ mli lɛ, Yudafoi lɛ ateŋ mɛi pii ná yiŋkɔshikɔshi feemɔi, ni ‘amɛkpale’ kɛjɛ Yehowa sɔɔmɔ mli, ni amɛtsɔmɔ mɛi ni jeee amɛhe sane ji nɔ ko. Zefania wieɔ mɛi ni “taooo Yehowa sɛɛ gbɛ, ni amɛbiii eshi hu lɛ” ahe. (Zefania 1:6) Eka shi faŋŋ akɛ, aŋkroaŋkroi ni yɔɔ Yuda lɛ fee shikpilikpii, ni amɛgbaaa amɛhe naa yɛ Nyɔŋmɔ he.
8, 9. (a) Mɛni hewɔ Yehowa baaba ebakwɛ “gbɔmɛi ni jwere amɛshishi atutru lɛ hiɛ” lɛ? (b) Yehowa baagbala ejwɛŋmɔ kɛba mɛi ni yɔɔ Yuda lɛ kɛ amɛmaŋ kɛ jamɔ mli hiɛnyiɛlɔi lɛ anɔ yɛ mɛɛ gbɛ nɔ?
8 Yehowa ha ale eyiŋtoo akɛ ebaaba ebakwɛ mɛi ni kɛɔ akɛ ewebii ji amɛ lɛ. Ebaatao mɛi ni ená yiŋkɔshikɔshi feemɔi yɛ amɛtsuii amli, yɛ enyɛmɔ loo eyiŋ ni eto akɛ ekɛ ehe baawo adesai asaji amli lɛ, yɛ mɛi ni tsɛɔ amɛhe ejalɔi lɛ ateŋ. Ejaje akɛ: “Ni aaaba mli akɛ nakai be lɛ mli lɛ, mikɛ kanei aaakpa Yerusalem, ni mawo gbɔmɛi ni jwere amɛshishi atutru lɛ hiɛ lɛ anyɔmɔ, mɛi ni kɛɔ yɛ amɛtsui mli akɛ: ‘Yehowa efeŋ ekpakpa, ni esaa efeŋ efɔŋ hu’ lɛ.” (Zefania 1:12) Wiemɔ ni ji “gbɔmɛi ni jwere amɛshishi atutru lɛ hiɛ” (ni ji wiemɔ ni kɔɔ wein feemɔ he lɛ) kɔɔ mɛi ni jwere shi loo amɛnyɔ shi, tamɔ dãa shishi kpɔtɔɔ nyɔɔ shi yɛ dãahoomɔ bale shishi, ní amɛsumɔɔɔ ni sane jajemɔ ni tsɔɔ bɔ ni be baashɛ ni Nyɔŋmɔ kɛ ehe baawo adesai asaji amli lɛ haoɔ amɛ lɛ ahe.
9 Yehowa baagbala ejwɛŋmɔ kɛba gbɔmɛi ni yɔɔ Yuda kɛ Yerusalem lɛ kɛ amɛ osɔfoi ni kɛ wɔŋjamɔ efutu ejamɔ mli lɛ anɔ. Kɛ amɛnuɔ he akɛ amɛyɛ shweshweeshwe, tamɔ nɔ ni amɛyɛ duŋ mli ni anaaa amɛ, yɛ Yerusalem gbogboi lɛ amli lɛ, ebaatao amɛ fɛɛ, tamɔ nɔ ni ekɛ kanei ni kpɛɔ waa, ni gbuɔ kɛtsɔɔ mumɔŋ duŋ ni amɛyaba abo yɛ mli lɛ, miitao amɛ. Ebaahoso amɛ kɛjɛ amɛ jamɔ mli shikpilikpii feemɔ lɛ mli, klɛŋklɛŋ lɛ, kɛtsɔ kojomɔ shɛɛ saji ni yɔɔ gbeyei anɔ, no sɛɛ lɛ, kɛtsɔ nakai kojomɔi lɛ ahe nitsumɔ hu nɔ.
“Yehowa Gbi Wulu lɛ Ebɛŋkɛ”
10. Te Zefania wie “Yehowa gbi wulu lɛ” he eha tɛŋŋ?
10 Yehowa kɛ mumɔ tsirɛ Zefania ni ejaje akɛ: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa. Anuɔ Yehowa gbi lɛ gbee!” (Zefania 1:14) Jaramɔ gbii jwere mɔ fɛɛ mɔ hiɛ lɛlɛŋ—osɔfoi, lumɛi, kɛ gbɔmɛi lɛ—mɛi ni booo kɔkɔbɔɔ lɛ toi ni amɛaaku amɛsɛɛ kɛba jamɔ krɔŋŋ he ekoŋŋ lɛ. Beni ewieɔ nakai gbi ni akɛbaatsu kojomɔ he nii lɛ he lɛ, gbalɛ lɛ tee nɔ akɛ: “Mlifu gbi ji nakai gbi lɛ, fimɔ kɛ amanehulu gbi ni, amaŋfɔ kɛ amaŋfɔ feemɔ gbi ni, duŋ kɛ jeŋ tuutuu-feemɔ gbi ni, atatu kɛ oblɔtu kpii gbi hu ni, tɛtrɛmantɛrɛ kɛ oshebɔɔ gbi ni baa maji ni atswa gbogboi awo amɛhe lɛ kɛ mɔji ni kwɔlɔ lɛ anɔ ni.”—Zefania 1:15, 16.
11, 12. (a) Mɛɛ kojomɔ shɛɛ sane ajaje ashi Yerusalem? (b) Ani heloonaa ninamɔ baahere Yudafoi lɛ ayiwala?
11 Yɛ afii nyɔŋmai fioo komɛi asɛɛ lɛ, Babilon asraafoi baaba amɛbatutua Yuda. Yerusalem hu ejeŋ mli. Abaafee emli shihilɛ hei lɛ kɛ emli nitsumɔ hei lɛ fɛɛ amaŋfɔ. “ ‘Ni aaaba mli akɛ nakai gbi lɛ nɔ lɛ,’ Yehowa kɛɛ, ‘bolɔmɔ gbee aaajɛ Looi Agbó lɛ naa, ni lelewomɔ hu aaajɛ maŋ lɛ mlijaa ni ji enyɔ lɛ mli, ni gbɛɛmɔ wulu kpele aaajɛ gɔŋkpɔi lɛ anɔ. Nyɛwoa lele, nyɛ mɛi ni nyɛhiɔ Maktesh [ni ji Yerusalem fã ko] lɛ, ejaakɛ akpata ejarayelɔi amaŋ lɛ fɛɛ hiɛ, ni aplenee mɛi fɛɛ ni tere jwiɛtɛi lɛ.’ ”—Zefania 1:10, 11, NW shishigbɛ niŋmaa.
12 Akɛni amɛsumɔɔɔ ni amɛheɔ amɛyeɔ akɛ Yehowa gbi lɛ ebɛŋkɛ hewɔ lɛ, Yudafoi pii kɛ amɛhe wo nitsumɔi ni anaa sɛɛ babaoo kɛjɛɔ mli lɛ amli. Shi Yehowa tsɔ egbalɔ anɔkwafo Zefania nɔ egba efɔ shi akɛ amɛnii ni amɛna lɛ “aaatsɔmɔ haanii, ni amɛwei lɛ hu aaatsɔmɔ amaŋfɔ.” Amɛnuŋ wein ni amɛfee lɛ, ni “amɛjwiɛtɛi kɛ amɛshika fɛɛ nyɛŋ amɛ ajie yɛ Yehowa mlifu gbi lɛ nɔ.”—Zefania 1:13, 18.
Akojo Jeŋmaji Krokomɛi Hu
13. Mɛɛ kojomɔ shɛɛ sane Zefania jaje eshi Moab, Amon, kɛ Ashur?
13 Yehowa tsɔ egbalɔ Zefania nɔ ejie emlifu kpo eshi jeŋmaji ni kɛ ewebii ye yɛ gbɛ fɔŋ nɔ lɛ hu. Ejaje akɛ: “Minuɔ Moab ahorabɔɔ kɛ Amonbii lɛ ajɛmɔi ni amɛkɛbɔ mimaŋ lɛ ahora, ni amɛkɛwó amɛhe nɔ amɛshi amɛ kpokpai lɛ. No hewɔ lɛ, gbii abɔ ni mihiɛ kã nɛɛ,’ Yehowa Zebaot, Israel Nyɔŋmɔ lɛ kɛɛ, ‘Moab aaatsɔ tamɔ Sodom, ni Amonbii lɛ hu aaatamɔ Gomora; saŋsɔrɔi amaamɔ he kɛ ŋoo bui, kɛ naanɔ amaŋfɔi. . . . Ni eeekpa enine mli ewo kooyigbɛ lɛ, ni eeekpata Ashur hiɛ, ni eeefee Ninive amaŋfɔ, ni eeeha egbĩ keketee tamɔ ŋa nɔ.’ ”—Zefania 2:8, 9, 13.
14. Mɛɛ odaseyeli yɔɔ ni tsɔɔ akɛ maŋsɛɛ jeŋmaji ‘wó amɛhe nɔ’ amɛshi Israelbii lɛ kɛ amɛ-Nyɔŋmɔ, Yehowa?
14 Moab kɛ Amon ji Israel henyɛlɔi kɛjɛ jeeŋmɔ beebe. (Okɛto Kojolɔi 3:12-14 he.) Niŋmaa ko yɛ Moabbii Atɛ, ni yɔɔ Louvre Museum yɛ Paris lɛ nɔ, ni Moab Maŋtsɛ Mesha ahorabɔɔ wiemɔi yɛ mli. Ekɛ henɔwomɔ gba bɔ ni eyakɔlɔ Israelbii amaji babaoo kɛtsɔ enyɔŋmɔ Kemosh yelikɛbuamɔ nɔ. (2 Maŋtsɛmɛi 1:1) Yeremia, ni kɛ Zefania hi shi yɛ be kome mli lɛ, wie bɔ ni Amonbii lɛ bahi Israelbii ashikpɔŋ ni ji Gad shikpɔŋ lɛ nɔ yɛ amɛnyɔŋmɔ Malkam gbɛi amli lɛ he. (Yeremia 49:1) Yɛ Ashur gbɛfaŋ lɛ, Maŋtsɛ Shalmaneser V bawo Samaria he ka ni eye maŋ lɛ nɔ, aaafee afii oha dani Zefania gbii lɛ shɛ. (2 Maŋtsɛmɛi 17:1-6) No sɛɛ be fioo lɛ, Maŋtsɛ Sanherib batutua Yuda, ni eye emaji ni atswa gbogboi awo he lɛ amli babaoo nɔ, ni ewo Yerusalem he gbeyei po. (Yesaia 36:1, 2) Ashur maŋtsɛ lɛ naawielɔ lɛ je gbɛ ewó ehe nɔ waa eshi Yehowa beni ekɛɔ akɛ Yerusalem aŋmɛɛ amɛhe amɛha amɛ akɛ aye amɛnɔ lɛ.—Yesaia 36:4-20.
15. Yehowa baaba jeŋmaji ni woɔ amɛhe nɔ amɛshiɔ ewebii lɛ anyɔŋmɔi lɛ ashi yɛ mɛɛ gbɛ nɔ?
15 Lala 83 tsĩɔ jeŋmaji babaoo, ni Moab, Amon, kɛ Ashur fata he lɛ atã, akɛ amɛje gbɛ amɛwo amɛhe nɔ amɛshi Israel, ni amɛkɛ shwãa wie akɛ: “Nyɛbaa ni wɔbutua amɛ ni amɛkafee maŋ dɔŋŋ, ni akakai Israel gbɛi lɛ dɔŋŋ.” (Lala 83:5) Gbalɔ Zefania kɛ ekaa tswa adafi akɛ Yehowa zebaot baaba nɛkɛ jeŋmaji ni woɔ amɛhe nɔ nɛɛ kɛ amɛnyɔŋmɔi lɛ fɛɛ shi. “Enɛ amɛaaná yɛ amɛhewoo lɛ hewɔ, ejaakɛ amɛbɔ Yehowa Zebaot maŋ lɛ ahora, ni amɛwó amɛhe nɔ yɛ amɛnɔ. Yehowa he aaaba gbeyei aha amɛ, ejaakɛ eeekpata shikpɔŋ lɛ nɔ nyɔŋmɔi lɛ fɛɛ hiɛ, ni jeŋmaji lɛ ŋshɔkpɔi lɛ fɛɛ aaaja lɛ, mɔ fɛɛ mɔ kɛaajɛ egbɛhe.”—Zefania 2:10, 11.
“Nyɛkwɛa Mi Gbɛ”
16. (a) Yehowa gbi ni bɛŋkɛɔ lɛ fee miishɛɛ jɛɛhe kɛha namɛi, ni mɛni hewɔ? (b) Mɛɛ famɔ ni kanyaa mɔ akɛha nɛkɛ shwɛɛnii anɔkwafoi nɛɛ?
16 Eyɛ mli akɛ mumɔŋ wɔdɔiwɔɔ, yiŋkɔshikɔshi feemɔ, wɔŋjamɔ, juu-kɛ-fɔ̃, kɛ heloonaa ninamɔ fa babaoo yɛ hiɛnyiɛlɔi lɛ kɛ gbɔmɛi ni yɔɔ Yuda kɛ Yerusalem lɛ ateŋ mɛi pii agbɛfaŋ moŋ, shi anaa faŋŋ akɛ Yudafoi anɔkwafoi komɛi bo Zefania kɔkɔbɔɔ gbalɛi lɛ atoi. Amɛye awerɛho yɛ nifeemɔi ni ji nihii nii ni Yuda lumɛi, kɛ kojolɔi, kɛ osɔfoi lɛ feɔ lɛ he. Zefania sane jajemɔi lɛ fee miishɛjemɔ jɛɛhe kɛha nɛkɛ gbɔmɛi anɔkwafoi nɛɛ. Yɛ nɔ najiaŋ ni eeefee hejaramɔ sane eha amɛ lɛ, bɔ ni Yehowa gbi lɛ ebɛŋkɛ lɛ bafee miishɛɛ jɛɛhe kɛha amɛ, ejaakɛ ebaafo nɛkɛ nihii nii ni afeɔ nɛɛ fɛɛ sɛɛ. Shwɛɛnii anɔkwafoi lɛ bo Yehowa famɔ ni kanyaa mɔ waa nɛɛ toi, akɛ: “ ‘No hewɔ lɛ nyɛkwɛa mi gbɛ,’ Yehowa kɛɛ, ‘kɛyashi gbi nɔ ni mate shi akɛ odasefonyo, ejaakɛ miyiŋtoo ji akɛ mabua jeŋmaji lɛ anaa, ni makpee maŋtsɛyelii lɛ kɛaakpe, koni mafɔse mimlila kɛ mimlifu ni naa wa lɛ fɛɛ mashwie amɛnɔ.’ ”—Zefania 3:8, NW.
17. Mɛɛ be, ni yɛ mɛɛ gbɛ nɔ Zefania kojomɔ shɛɛ saji lɛ bɔi mlibaa yɛ jeŋmaji lɛ anɔ?
17 Nibii ebatiii mɛi ni bo nakai kɔkɔbɔɔ lɛ toi lɛ ashĩ trukaa. Amɛteŋ mɛi pii hi shi ni amɛna Zefania gbalɛ lɛ mlibaa. Yɛ afi 632 D.Ŋ.B lɛ, Babilonbii, kɛ Mediabii, kɛ kui babaoo ni jɛ kooyigbɛ, ekolɛ Skitebii lɛ, fɛɛ fee ekome ni amɛbaye Ninive nɔ kunim ni amɛkpata maŋ lɛ hiɛ. Yinɔsaneŋmalɔ Will Durant gbaa akɛ: “Babilonbii asraafoi ni yɔɔ Nabopolassar shishi lɛ kɛ Mediabii asraafoi ni yɔɔ Cyaxares shishi lɛ kɛ Skitebii akuu ni jɛ Caucasus lɛ fɛɛ fee ekome, ni amɛnine shɛ mɔji ni yɔɔ kooyigbɛ lɛ anɔ oya nɔŋŋ yɛ gbɛ ni yɔɔ naakpɛɛ waa nɔ. . . . Tutuamɔ kome pɛ kɛkɛ ni Ashur laaje kwraa kɛjɛ yinɔsane mli.” Nɔ ni Zefania gba efɔ̃ shi lɛ pɛpɛɛpɛ nɛ.—Zefania 2:13-15.
18. (a) Atsu ŋwɛi kojomɔ he nii yɛ Yerusalem nɔ yɛ mɛɛ gbɛ nɔ, ni mɛni hewɔ? (b) Mɛɛ gbɛ nɔ Zefania gbalɛ ni kɔɔ Moab kɛ Amon he lɛ ba mli yɛ?
18 Yudafoi lɛ ateŋ mɛi babaoo ni kwɛ Yehowa gbɛ lɛ hu hi shi ni amɛkɛ amɛhiŋmɛi na ekojomɔi ni atsu he nii yɛ Yuda kɛ Yerusalem nɔ lɛ. Zefania egba momo yɛ Yerusalem he akɛ: “Kpoo ha maŋ ni tseɔ atua ni abule lɛ, maŋ ni yi wa lɛ! Ebooo gbee ko gbee ko toi, ekpɛlɛɛɛ tsɔsemɔ; ekɛ ehiɛ efɔ̃ɔɔ Yehowa nɔ, ni etsiii ebɛŋkɛɛɛ e-Nyɔŋmɔ lɛ.” (Zefania 3:1, 2) Yɛ anɔkwale ni eyeee lɛ hewɔ lɛ, Babilonbii bawo Yerusalem he ka shii enyɔ sɔŋŋ, ni yɛ naagbee lɛ amɛnine shɛ maŋ lɛ nɔ ni amɛkpata hiɛ yɛ afi 607 D.Ŋ.B. (2 Kronika 36:5, 6, 11-21) Yɛ Moab kɛ Amon gbɛfaŋ lɛ, taakɛ Yudafoi ayinɔsaneŋmalɔ Josephus tsɔɔ mli lɛ, Yerusalem shigbeemɔ lɛ sɛɛ afii enumɔ mli lɛ, Babilonbii lɛ fã ta yɛ amɛnɔ ni amɛye amɛnɔ kunim. Enɛ hewɔ lɛ amɛlaaje kwraa kɛjɛ shihilɛ mli taakɛ agba afɔ̃ shi lɛ.
19, 20. (a) Mɛɛ gbɛ nɔ Yehowa wo mɛi ni tee nɔ amɛkwɛ lɛ gbɛ lɛ anyɔmɔ yɛ? (b) Mɛni hewɔ nibii ni tee nɔ nɛɛ kɔɔ wɔhe lɛ, ni mɛni abaasusu he yɛ nikasemɔ ni nyiɛ sɛɛ lɛ mli?
19 Zefania gbalɛ lɛ mli saji nɛɛ kɛ saji krokomɛi lɛ fɛɛ amlibaa bafee niiashikpamɔ ni woɔ mɔ hemɔkɛyeli hewalɛ waa kɛha Yudafoi kɛ mɛi ni jeee Yudafoi ni tee nɔ amɛkwɛ Yehowa gbɛ lɛ. Mɛi ni yi ná wala kɛfo hiɛkpatamɔ ni ba Yuda kɛ Yerusalem nɔ lɛ ateŋ mɛi komɛi ji Yeremia, Etiopianyo Ebed-Melek, kɛ Yonadab, Rekabnyo lɛ shiabii lɛ. (Yeremia 35:18, 19; 39:11, 12, 16-18) Yudafoi anɔkwafoi ni yɔɔ nomŋɔɔ mli lɛ kɛ amɛbii, ni tee nɔ amɛkwɛ Yehowa gbɛ lɛ, batsɔ shwɛɛnii ni yɔɔ miishɛɛ ní akpɔ̃ amɛ kɛjɛ Babilon yɛ afi 537 D.Ŋ.B. ni amɛku amɛsɛɛ kɛba Yuda ni amɛbato jamɔ krɔŋŋ shishi ekoŋŋ lɛ fã.—Ezra 2:1; Zefania 3:14, 15, 20.
20 Mɛni enɛɛmɛi fɛɛ tsɔɔ kɛhaa wɔbe nɛɛ? Shihilɛ ni hi shi yɛ Zefania gbii lɛ amli lɛ tamɔ nihii nii ni afeɔ yɛ Kristendom ŋmɛnɛ lɛ nɔŋŋ pɛpɛɛpɛ yɛ gbɛi pii anɔ. Kɛfata he lɛ, sui sɔrɔtoi ni Yudafoi lɛ jie lɛ kpo yɛ nakai beaŋ lɛ je sui ni anaa ŋmɛnɛ, ní bei komɛi lɛ ejeɔ kpo yɛ Yehowa webii po ateŋ lɛ. Enɛɛmɛi ji saji ni abaasusu he yɛ nikasemɔ ni nyiɛ enɛ sɛɛ lɛ mli.
[Shishigbɛ niŋmaa]
a Etamɔ nɔ ni wiemɔ “maŋtsɛ bii lɛ” kɔɔ lumɛi ni ji odehei lɛ fɛɛ ahe, ejaakɛ Yosia diɛŋtsɛ bihii lɛ darako yɛ nakai beaŋ.
Kɛha Emlitii
◻ Mɛni ji jamɔ mli shihilɛ ni hi Yuda yɛ Zefania gbii lɛ amli?
◻ Te shihilɛ ni yɔɔ maŋ hiɛnyiɛlɔi lɛ ateŋ lɛ yɔɔ ha tɛŋŋ, ni mɛni ji gbɔmɛi lɛ ateŋ mɛi pii asubaŋ?
◻ Jeŋmaji lɛ wó amɛhe nɔ amɛshi Yehowa webii lɛ yɛ mɛɛ gbɛ nɔ?
◻ Mɛɛ kɔkɔbɔɔ Zefania kɛha Yuda kɛ jeŋmaji krokomɛi?
◻ Awo mɛi ni tee nɔ amɛkwɛ Yehowa gbɛ lɛ nyɔmɔ yɛ mɛɛ gbɛ nɔ?
[Mfoniri ni yɔɔ baafa 9]
Moabbii Atɛ lɛ maa nɔ mi akɛ Moab Maŋtsɛ Mesha wie ahorabɔɔ wiemɔi eshi blema Israel
[He ni Sane lɛ Jɛ]
Moabbii Atɛ: Musée du Louvre, Paris
[Mfoniri ni yɔɔ baafa 10]
Ákɛ nɔ ni fiɔ Zefania gbalɛ lɛ sɛɛ lɛ, nɛkɛ blema tao nɔ niŋmaa ni kɔɔ Babilonbii Ayinɔsane he nɛɛ eŋma Ninive hiɛkpatamɔ ni asraafoi ni efee ekome lɛ kɛba enɔ lɛ efɔ shi
[He ni Sane lɛ Jɛ]
Blema tao nɔ niŋmaa: The British Museum ji mɛi ni kɛha