Nyɛmimɛi Ni Efee Ekome

YEHOWA NYƆŊMƆ hala Israel maŋ lɛ akɛ ewebii ní egbɛ́i kã amɛnɔ, ni ekɛ amɛ tsu nii aaafee afii 1,500. No sɛɛ lɛ, Yehowa “gbala ejwɛŋmɔ kɛba jeŋmaji lɛ anɔ klɛŋklɛŋ kwraa koni ehala amɛteŋ mɛi komɛi kɛhã egbɛ́i lɛ.” (Bɔf. 15:14) Mɛi ni ebaahala kɛhã egbɛ́i lɛ baasɔmɔ akɛ edasefoi, ni bɔ ni amɛsusuɔ nii ahe amɛhãa kɛ amɛnifeemɔi fɛɛ baafee ekome ekɔɔɔ he eko he ni amɛyɔɔ yɛ shikpɔŋ lɛ nɔ. Nɔ ni baahã mɛi ni ahala ahã Nyɔŋmɔ gbɛ́i lɛ afee ekome ji famɔ ni Yesu kɛhã ekaselɔi lɛ. Ekɛɛ amɛ akɛ: “No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ amli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, nyɛtsɔa amɛ ni amɛye nii fɛɛ ni mifã nyɛ lɛ nɔ.”​—Mat. 28:19, 20.

² Kɛ́ ojɔɔ ohe nɔ ohã Yehowa ni ohã abaptisi bo lɛ, obatsɔ Yesu Kristo kaselɔ. Ofata jeŋ muu fɛɛ nyɛmimɛi ni ji Kristofoi ni efee ekome ni hãaa maŋ nɔ ni mɔ ko jɛ, weku mli ni mɔ ko jɛ, loo niiatsɛ loo ohiafo ni mɔ ko ji lɛ agbála amɛmli lɛ ahe. (Lala 133:1) Enɛ hewɔ lɛ, osumɔɔ onanemɛi Kristofoi ni okɛyɔɔ asafo lɛ mli lɛ waa ni obuɔ amɛ. Ekolɛ esoro amɛteŋ mɛi komɛi ahewolonɔ su loo maŋ nɔ ni amɛjɛ loo skul abɔ ni amɛtee, ni ekolɛ tsutsu ko lɛ, nibii nɛɛ ateŋ eko hewɔ lɛ, osumɔɔɔ mɛi nɛɛ asane. Amrɔ nɛɛ nyɛmimɛi asuɔmɔ ni yɔɔ wɔteŋ lɛ mli wa kwraa fe suɔmɔ ni yɔɔ nanemɛi, jamɔ kome mli bii, loo weku kome mli bii ateŋ.​—Mar. 10:29, 30; Kol. 3:14; 1 Pet. 1:22.

³ Ewa kɛhã mɛi komɛi akɛ amɛbaatsake susumɔ ni amɛhiɛ yɛ mɛi ahewolonɔ su, maŋkwramɔŋ saji, loo adesai ashihilɛ mli saji krokomɛi ni kɛ mligbalamɔ baa mɛi ateŋ lɛ ahe. Kɛ́ nakai eji yɛ ogbɛfaŋ lɛ, ebaahi jogbaŋŋ akɛ obaasusu Yudafoi ni batsɔmɔ Kristofoi lɛ ahe. Ehe bahia ni amɛtsake susumɔi ni amɛhiɛ yɛ mɛi ni ji jeŋmajiaŋbii lɛ ahe. Be ni afã Petro ni eya Roma asraafonyo ko ni atsɛɔ lɛ Kornelio ni kwɛɔ asraafoi 100 nɔ lɛ ŋɔɔ lɛ, Yehowa jɛ mlihilɛ mli esaa Petro jwɛŋmɔ kɛhã nakai nitsumɔ lɛ.​—Bɔf., yitso 10.

⁴ Akɛɛ Petro yɛ ninaa ko mli akɛ egbe kooloi komɛi ni eye, kooloi ni ena yɛ ninaa lɛ mli lɛ ahe tseee yɛ kusum naa kɛhã Yudafoi. Be ni Petro kpoo lɛ, gbee ko kɛ lɛ wie kɛjɛ ŋwɛi akɛ: “Kpa nibii ni Nyɔŋmɔ efee amɛ krɔŋkrɔŋ lɛ tsɛmɔ akɛ nibii ni abule.” (Bɔf. 10:15) Nɛkɛ ninaa nɛɛ ji nɔ ni saa Petro jwɛŋmɔ kɛhã nitsumɔ ni akɛwo edɛŋ akɛ eyasara nuu ko ni ji jeŋmajiaŋnyo lɛ. Be ni Petro tee he ni Yehowa tsu lɛ lɛ, ekɛɛ mɛi ni ebua amɛhe naa yɛ jɛmɛ lɛ akɛ: “Nyɛ diɛŋtsɛ nyɛle jogbaŋŋ akɛ mla eŋmɛɛɛ gbɛ ni Yudanyo kɛ maŋ kroko nɔ nyo bɔɔ loo etsiɔ ebɛŋkɛɔ lɛ, shi Nyɔŋmɔ etsɔɔ mi akɛ mikatsɛ mɔ ko, mɔ ni abule loo mɔ ni he tseee. No hewɔ ni be ni atsu ni abatsɛ mi lɛ, mijieee naa ni miba nɛɛ.” (Bɔf. 10:28, 29) No hewɔ lɛ, Petro na odaseyeli ni tsɔɔ akɛ Yehowa ekpɛlɛ Kornelio kɛ eshĩabii lɛ anɔ.

⁵ Ehe bahia ni Saul ni jɛ Tarso, ni eji Farisifonyo ni le woloŋ waa lɛ aba ehe shi koni ekɛ mɛi ni tsutsu ko lɛ ekɛ amɛ yeee lɛ abɔ. Ehe bahia ni ebo gbɛtsɔɔmɔ ni amɛkɛhã lɛ lɛ po toi. (Bɔf. 4:13; Gal. 1:13-20; Fip. 3:4-11) Wɔbaanyɛ wɔsusu tsakemɔi ni Sergio Paulo, Dionisio, Damari, Filemon, Onesimo, kɛ mɛi krokomɛi fee be ni ashiɛ sane kpakpa lɛ atsɔɔ amɛ ni amɛbatsɔmɔ Yesu Kristo kaselɔi lɛ ahe wɔkwɛ.​—Bɔf. 13:6-12; 17:22, 33, 34; Flm. 8-20.

⁶ Ŋwanejee ko bɛ he akɛ, suɔmɔ ni nyɛmimɛi ni yɔɔ asafo lɛ mli lɛ jie lɛ kpo amɛtsɔɔ bo lɛ ji nɔ ni ye ebua bo ni ehã okɛ ohe badɔmɔ Yehowa kɛ esafo lɛ. Ona okadi ni Yesu Kristo wie akɛ no akɛbaayɔse enɔkwa kaselɔi lɛ faŋŋ. Ekɛɛ akɛ: “Miihã nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ. Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yoh. 13:34, 35) Ni be ni oyɔse akɛ suɔmɔ ni osafoŋbii lɛ jie lɛ kpo amɛtsɔɔ bo lɛ ji suɔmɔ ni yɔɔ nyɛmimɛi ni yɔɔ jeŋ fɛɛ lɛ ateŋ lɛ mli bibioo ko pɛ kɛkɛ lɛ, oná Yehowa kɛ esafo lɛ he miishɛɛ waa. Ofata mɛi ni Biblia lɛ gba akɛ abaabua amɛnaa yɛ naagbee gbii nɛɛ amli ni amɛbajá Yehowa yɛ toiŋjɔlɛ kɛ ekomefeemɔ mli lɛ ahe.​—Mika 4:1-5.

⁷ Akɛni nibii babaoo yɛ ni gbálaa mɛi amli ŋmɛnɛ hewɔ lɛ, namɔ po baasusu akɛ abaanyɛ abua mɛi ni “jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli” lɛ anaa ni afee amɛ ekome? (Kpo. 7:9) Bo lɛ, susumɔ bɔ ni mɛi ni kɛɛ amɛhiŋmɛi egbele yɛ jeŋ shikpamɔ mli lɛ ebuuu mɛi ni hiɔ shi yɛ blema kusumii anaa lɛ he okwɛ. Kwɛmɔ jamɔŋ hetsɛ̃ ni yɔɔ mɛi ni hiɛ hewolonɔ su kome kɛ mɛi ni jɛ maŋ kome nɔ lɛ ateŋ. Yɛ maŋ kome mli po lɛ, maŋkwramɔ egbála mɛi amli fe be fɛɛ ni eho. Ni kɛ́ osusu mligbalamɔi ni shika kɛ nibii krokomɛi kɛbaa lɛ he lɛ, obaana akɛ, akɛ abaafee mɛi ni jɛ maji, wiemɔi, kɛ kui srɔtoi fɛɛ mli lɛ ekome ni amɛsumɔ amɛhe ni amɛhi shi yɛ toiŋjɔlɛ mli lɛ ji naakpɛɛ nii ko ni Nyɔŋmɔ Ofe lɛ pɛ baanyɛ afee.​—Zak. 4:6.

⁸ Shi ekomefeemɔ ni tamɔ nɛkɛ yɛ, ni obafata he be ni ojɔɔ ohe nɔ ni abaptisi bo akɛ Yehowa Odasefoi lɛ ateŋ mɔ kome lɛ. Kɛ́ obaaná nakai ekomefeemɔ lɛ he sɛɛ lɛ, no lɛ, esa akɛ oye obua kɛbaa yi. Obaafee enɛ kɛtsɔ bɔfo Paulo wiemɔi ni yɔɔ Galatiabii 6:10 lɛ toi ni obaabo lɛ nɔ, ekɛɛ akɛ: “Gbii abɔ ni wɔyɔɔ hegbɛ nɛɛ, nyɛhãa wɔfea mɛi fɛɛ ekpakpa, shi titri lɛ, mɛi ni etsɔmɔ wɔwekumɛi yɛ hemɔkɛyeli lɛ mli lɛ.” Wɔkɛ ŋaawoo nɛɛ hu tsuɔ nii: “Nyɛkajɛa naataamɔ loo nyɛhe ni nyɛnaa tsɔ mli nyɛfea nɔ ko nɔ ko, shi moŋ nyɛkɛ heshibaa abua mɛi krokomɛi akɛ amɛnɔ kwɔlɔ fe nyɛ, be mli ni nyɛtaoɔ nibii ni hi hã mɛi krokomɛi, shi jeee nibii ni hi hã nyɛ pɛ lɛ.” (Fip. 2:3, 4) Kɛ́ wɔtee nɔ wɔtsɔse wɔhe koni wɔna wɔnyɛmimɛi lɛ tamɔ bɔ ni Yehowa naa amɛ, shi jeee tamɔ bɔ ni amɛji yɛ kponɔgbɛ lɛ, wɔbaaya nɔ wɔkɛ amɛ ahi shi yɛ toiŋjɔlɛ kɛ miishɛɛ mli.​—Efe. 4:23, 24.

⁹ Tamɔ bɔ ni bɔfo Paulo fee he nɔkwɛmɔnɔ lɛ, mligbalamɔ bɛ asafo lɛ mli, moŋ lɛ, emli bii lɛ ateŋ mɔ fɛɛ mɔ susuɔ enyɛmi he. (1 Kor. 12:14-26) Eyɛ mli akɛ wɔkɛ wɔnyɛmimɛi ni yɔɔ jeŋ fɛɛ lɛ ekomɛi ateŋ jekɛ moŋ, shi no etsɔɔɔ akɛ wɔsusuuu amɛhe. Kɛ́ aawa wɔnyɛmimɛi lɛ ekomɛi ayi lɛ, ehaoɔ wɔ waa. Kɛ́ ehia wɔnyɛmimɛi lɛ ekomɛi, oshãra nina amɛ, loo aawu ta yɛ he ni amɛyɔɔ lɛ, wɔbɔɔ mɔdɛŋ akɛ wɔbaaye wɔbua amɛ yɛ mumɔŋ kɛ heloonaa fɛɛ.​—2 Kor. 1:8-11.

¹⁰ Esa akɛ wɔ fɛɛ wɔsɔle wɔhã wɔnyɛmimɛi lɛ daa gbi. Mɛi komɛi kɛ kai ni baanyɛ ahã amɛfee efɔŋ miikpe. Ekolɛ wɔle mɛi krokomɛi ni miina amanehulu. Ni yɛ mɛi komɛi agbɛfaŋ lɛ, mɛi ni amɛkɛtsuɔ nii kɛ mɛi ni amɛkɛyɔɔ shĩa ni amɛkɛ amɛ bɛ jamɔ kome mli lɛ miite shi miiwo amɛ ni aleee. (Mat. 10:35, 36; 1 Tes. 2:14) Enɛ gbaa wɔnaa ejaakɛ nyɛmimɛi ji wɔ fɛɛ yɛ je lɛŋ. (1 Pet. 5:9) Mɛi yɛ wɔteŋ ni miitsu nii waa yɛ Yehowa sɔɔmɔ lɛ mli ni amɛnyiɛɔ hiɛ yɛ shiɛmɔ nitsumɔ lɛ kɛ asafo lɛ mli. Kɛfata he lɛ, ayɛ mɛi hu ni miikwɛ jeŋ muu fɛɛ nitsumɔ lɛ nɔ. Esa akɛ wɔsɔle wɔhã mɛi nɛɛ fɛɛ ejaakɛ eji gbɛ ni wɔtsɔɔ nɔ wɔjieɔ suɔmɔ kpo wɔtsɔɔ amɛ ni wɔtsɔɔ hu akɛ amɛsane kã wɔtsui nɔ, kɛji nɔ ko bɛ ni wɔbaanyɛ wɔfee wɔhã amɛ tɛ̃ɛ po.​—Efe. 1:16; 1 Tes. 1:2, 3; 5:25.

¹¹ Yɛ naagbai ni yaa nɔ yɛ shikpɔŋ lɛ nɔ yɛ naagbee gbii nɛɛ amli lɛ ahewɔ lɛ, esa akɛ Yehowa webii afee klalo akɛ amɛbaaye amɛbua amɛhe. Bei komɛi lɛ, oshãrai tamɔ shikpɔŋhosomɔi kɛ nu afuai baabi ni ato gbɛjianɔ ni akɛ heloonaa nibii babaoo ayaye abua mɛi ni oshãra lɛ enina amɛ lɛ. Blema Kristofoi lɛ fee nɔkwɛmɔnɔ kpakpa yɛ enɛ gbɛfaŋ. Kaselɔi ni yɔɔ Antiokia lɛ kai ŋaa ni Yesu wo lɛ, ni no hewɔ lɛ, amɛkɛ heloonaa nii babaoo maje nyɛmimɛi ni yɔɔ Yudea lɛ. (Bɔf. 11:27-30; 20:35) Afii komɛi asɛɛ lɛ, bɔfo Paulo wo Korintobii lɛ hewalɛ ni amɛfi gbɛjianɔ ni atoɔ koni aye abua nyɛmimɛi ni efi amɛ lɛ sɛɛ. (2 Kor. 9:1-15) Yɛ wɔbei nɛɛ amli hu lɛ, kɛ́ oshãra ko ba wɔnyɛmimɛi lɛ anɔ, ni heloonaa yelikɛbuamɔ ko he miihia amɛ lɛ, asafo lɛ kɛ Kristofoi aŋkroaŋkroi komɛi toɔ gbɛjianɔ oya nɔŋŋ ni amɛyayeɔ amɛbuaa.

¹² Ato wɔ kɛ wɔnyɛmimɛi ni yɔɔ jeŋ fɛɛ lɛ ahe gbɛjianɔ koni wɔfee ekome kɛfee Yehowa suɔmɔnaa nii. Yɛ wɔbei nɛɛ amli lɛ, esuɔmɔnaa nii ji ni ashiɛ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase. (Mat. 24:14) Be ni wɔtsuɔ nitsumɔ nɛɛ, Yehowa miisumɔ hu akɛ wɔba wɔjeŋ yɛ ejeŋba he mlai ni nɔ kwɔlɔ lɛ anaa. (1 Pet. 1:14-16) Esa akɛ wɔba wɔhe shi wɔhã wɔhe, ni wɔfee ekome kɛtsu nii waa koni sane kpakpa lɛ aya nɔ ashwere. (Efe. 5:21) Be nɛɛ ji be ni esa akɛ wɔtao Nyɔŋmɔ Maŋtsɛyeli lɛ klɛŋklɛŋ fe bei fɛɛ ni eho; ejeee be ni akɛtiuɔ nibii ni wɔ diɛŋtsɛ wɔsumɔɔ lɛ asɛɛ. (Mat. 6:33) Kɛ́ wɔhã enɛ hi wɔjwɛŋmɔ mli ni wɔfee ekome kɛtsu nii yɛ sane kpakpa lɛ hewɔ lɛ, wɔtsui baanyɔ wɔmli amrɔ nɛɛ ni wɔbaaná jɔɔmɔi babaoo kɛya naanɔ.

¹³ Akɛ Yehowa Odasefoi lɛ, esoro wɔ kwraa, ni ahala wɔ yɛ adesai ateŋ akɛ mɛi ni he tse, ni sɔmɔɔ Nyɔŋmɔ kɛ hiɛdɔɔ. (Tito 2:14) Yehowa ni wɔjáa lɛ hãa esoroɔ wɔ kwraa. Jeee ekome kɛkɛ wɔ kɛ wɔnyɛmimɛi ni yɔɔ shikpɔŋ lɛ nɔ fɛɛ lɛ efee kɛmiitsu nii, shi wɔshiɛɔ anɔkwale wiemɔ kome lɛ, ni wɔbaa wɔjeŋ yɛ anɔkwale lɛ ni wɔshiɛɔ lɛ naa. Yehowa gba enɛ kɛtsɔ egbalɔ Zefania nɔ akɛ: “Matsake majimaji lɛ awiemɔ mafee lɛ wiemɔ krɔŋŋ, koni amɛ fɛɛ kwa amɛtsɛ Yehowa gbɛ́i lɛ, ní amɛfee ekome kɛsɔmɔ lɛ.”​—Zef. 3:9.

¹⁴ No sɛɛ lɛ, Yehowa kɛ emumɔ lɛ tsirɛ Zefania ni ewie bɔ ni wɔnyɛmimɛi ni yɔɔ jeŋ fɛɛ lɛ baafee ekome tamɔ bɔ ni wɔnaa ŋmɛnɛ lɛ he akɛ: “Israelbii ni eshwɛ lɛ efeŋ nɔ ko ni ejaaa; amɛmaleŋ, ni anaŋ lakamɔ lilɛi ko yɛ amɛdaaŋ; amɛbaaye nii ni amɛbaabumɔ shi, ni mɔ ko mɔ ko woŋ amɛhe gbeyei.” (Zef. 3:13) Akɛni wɔnu Yehowa Wiemɔ ni ji anɔkwale lɛ shishi, ni wɔtsake bɔ ni wɔsusuɔ nii ahe wɔhãa, ni wɔbaa wɔjeŋ yɛ Yehowa taomɔ nii lɛ anaa hewɔ lɛ, wɔnyɛɔ wɔfeɔ ekome kɛtsuɔ nii. Wɔnyɛɔ wɔfeɔ nɔ ni mɛi ni kwɛɔ nii tamɔ adesai lɛ susuɔ akɛ anyɛŋ afee lɛ. Anɔkwa, esoro wɔ kwraa, wɔ ji Nyɔŋmɔ webii, ni wɔwoɔ ehiɛ nyam yɛ shikpɔŋ muu lɛ fɛɛ nɔ.​—Mika 2:12.