Okɛ Yehowa Asafo Lɛ Abɔ Gbagbalii

KASELƆ Yakobo ŋma akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” (Yak. 4:8) Yɛ emuu ni wɔyeee lɛ fɛɛ sɛɛ lɛ, Yehowa bɛ shɔŋŋ tsɔ loo ekɛ wɔteŋ jɛkɛɛɛ bɔ ni enyɛŋ enu nɔ ni wɔkɛ lɛ wieɔ. (Bɔf. 17:27) Te wɔbaafee tɛŋŋ wɔtsi wɔbɛŋkɛ Nyɔŋmɔ lɛ? Wɔbaanyɛ wɔkɛ Yehowa abɔ naanyo gbagbalii kɛtsɔ wɔtsui mli ni wɔbaajɛ wɔsɔle kɛ hiɛdɔɔ lɛ nɔ. (Lala 39:12) Wɔbaanyɛ wɔkɛ lɛ abɔ naanyo gbagbalii hu kɛtsɔ Nyɔŋmɔ Wiemɔ, ni ji Biblia lɛ ni wɔkaseɔ daa lɛ nɔ. Kɛ́ wɔfee enɛ lɛ, wɔbaleɔ Yehowa Nyɔŋmɔ jogbaŋŋ, wɔleɔ yiŋ ni eto, kɛ nɔ ni esumɔɔ ni wɔfee. (2 Tim. 3:16, 17) Enɛ hãa wɔsumɔɔ lɛ, ni wɔsumɔŋ ni wɔfee nɔ ko ni esumɔɔɔ.​—Lala 25:14.

² Kɛ̃lɛ, ja wɔtsɔ Yehowa Bi, Yesu pɛ nɔ dani wɔbaanyɛ wɔbɛŋkɛ Yehowa kpaakpa. (Yoh. 17:3; Rom. 5:10) Adesa ko bɛ ni baanyɛ ahã wɔle bɔ ni Yehowa susuɔ nii ahe ehãa lɛ jogbaŋŋ fe Yesu. Ekɛ e-Tsɛ lɛ bɔ gbagbalii aahu akɛ ewie akɛ: “Mɔ ko mɔ ko leee mɔ ni Bi lɛ ji, ja Tsɛ lɛ pɛ, ni mɔ ko mɔ ko leee mɔ ni Tsɛ lɛ ji, ja Bi lɛ pɛ, kɛ mɔ fɛɛ mɔ ni Bi lɛ sumɔɔ akɛ ejie lɛ kpo etsɔɔ lɛ lɛ.” (Luka 10:22) No hewɔ lɛ, kɛ́ wɔkane Sanekpakpai lɛ koni wɔna bɔ ni Yesu susu nii ahe kɛ bɔ ni enu nii ahe ehã lɛ, belɛ wɔmiikase bɔ ni Yehowa susuɔ nii ahe kɛ bɔ ni enuɔ nii ahe ehãa. Nilee ni tamɔ nɛkɛ lɛ baahã wɔtsi wɔbɛŋkɛ Nyɔŋmɔ kpaakpa.

³ Yehowa asafo lɛ fã ni yɔɔ shikpɔŋ lɛ nɔ lɛ yeɔ ebuaa wɔ koni wɔkase bɔ ni wɔbaafee wɔfee Nyɔŋmɔ suɔmɔnaa nii. Kɛ́ wɔkɛ Yehowa asafo lɛ bɔ gbagbalii lɛ, no baahã wekukpaa ni yɔɔ wɔ kɛ Yehowa teŋ lɛ mli awa. Ni wɔfeɔ enɛ fɛɛ yɛ Nyɔŋmɔ Bi lɛ ni ji wɔ-Yitso lɛ shishi. Tamɔ bɔ ni agba yɛ Mateo 24:45-47 lɛ, Yesu Kristo, ni ji Nuŋtsɔ lɛ ehala “nyɔŋ anɔkwafo kɛ hiɛshikalɔ lɛ” koni ehã ewebii lɛ “amɛniyenii yɛ be ni sa mli.” Ŋmɛnɛ lɛ, nyɔŋ anɔkwafo lɛ hãa wɔ mumɔŋ niyenii babaoo. Yehowa tsɔɔ nyɔŋ nɛɛ nɔ ewoɔ wɔ ŋaa koni wɔkane e-Wiemɔ lɛ daa gbi, wɔya Kristofoi akpeei daa, ni wɔshiɛ “Maŋtsɛyeli lɛ he sane kpakpa” lɛ. (Mat. 24:14; 28:19, 20; Yos. 1:8; Lala 1:1-3) Esaaa akɛ wɔnaa gbɛtsɔɔmɔi ni nyɔŋ anɔkwafo nɛɛ kɛhãa wɔ lɛ akɛ ejɛ adesai adɛŋ. Esa akɛ wɔkɛ Yehowa asafo lɛ fã ni yɔɔ shikpɔŋ lɛ nɔ lɛ abɔ gbagbalii ni wɔkɛ gbɛtsɔɔmɔi ni ekɛhãa wɔ lɛ atsu nii. Enɛ baahã wɔbɛŋkɛ Yehowa Nyɔŋmɔ kpaakpa, ni no baawaje wɔ ni ebu wɔhe yɛ amanehului ni wɔkɛkpeɔ lɛ fɛɛ asɛɛ.

⁴ Ekolɛ okɛ afii babaoo ehi anɔkwale lɛ mli. Kɛ́ nakai lɛ, ekã shi faŋŋ akɛ, ole bɔ ni esa akɛ afi shi shiŋŋ yɛ shihilɛi ni kaa anɔkwa ni wɔyeɔ lɛ mli. Shi kɛ́ obale Yehowa etsɛko, ni okɛ ewebii lɛ bɔi bɔɔ etsɛko po lɛ, ole akɛ Satan Abonsam teɔ shi ewoɔ mɔ fɛɛ mɔ ni baa ehe shi ehãa Yehowa nɔyeli lɛ. (2 Tim. 3:12) No hewɔ lɛ, kɛji ofi shi be kplaŋŋ jio, be kukuoo jio lɛ, esaaa akɛ no hãa osheɔ gbeyei loo onijiaŋ jeɔ wui. Yehowa ewo shi akɛ ebaawa bo ni ebaakpɔ̃ bo ni ehã bo wala wɔsɛɛ akɛ jweremɔnɔ.​—Heb. 13:5, 6; Kpo. 2:10.

⁵ Ekolɛ wɔ fɛɛ wɔbaana amanehulu ko yɛ be fioo ni eshwɛ yɛ Satan gbɛjianɔtoo nɛɛ mli lɛ mli. Kɛjɛ be ni ato Nyɔŋmɔ Maŋtsɛyeli lɛ shishi yɛ afi 1914 lɛ, aŋmɛɛɛ Satan gbɛ ni eya ŋwɛi he ni Yehowa yɔɔ lɛ. Ashɛ lɛ afɔ̃ shikpɔŋ lɛ nɔ, he ni atsĩ lɛ kɛ ebɔfoi lɛ anaa yɛ lɛ. Akɛni Satan mli ewo la hewɔ lɛ, ekɛ amanehulu babaoo eba shikpɔŋ lɛ nɔ, ni ehã aawa Yehowa tsuji ni ejɔɔ amɛhe nɔ amɛhã Yehowa lɛ ayi waa, ni enɛ ji odaseyeli ni tsɔɔ akɛ wɔyɛ enɔyeli fɔŋ lɛ naagbee gbii lɛ amli.​—Kpo. 12:1-12.

⁶ Shihilɛ ni baa shi ni Satan eyaje mli lɛ ehã emli efu waa, ele akɛ eshwɛ lɛ be fioo pɛ. Ekɛ edaimonioi lɛ bɔɔ mɔdɛŋ fɛɛ ni amɛbaanyɛ koni amɛtsĩ Maŋtsɛyeli shiɛmɔ nitsumɔ lɛ naa ní amɛfite ekomefeemɔ ni yɔɔ Yehowa tsuji ateŋ lɛ. Enɛ hewɔ lɛ, wɔmiiwu mumɔŋ ta ko, ni awie ta nɛɛ he akɛ: “Jeee heloo kɛ lá wɔkɛnɔɔ lɛ, shi moŋ wɔkɛ nɔyelii, kɛ hegbɛi, kɛ je ni mli ewo duŋ nɛɛ mli nɔyelɔi lɛ, kɛ mumɔi fɔji ni yɔɔ ŋwɛiniiaŋ lɛ.” Kɛ́ wɔbaaye kunim yɛ ta nɛɛ mli ni wɔya nɔ wɔhi Yehowa masɛi lɛ, esaaa akɛ wɔkpaa nɔmɔ lɛ, moŋ lɛ esa akɛ wɔwo mumɔŋ tawuu hewulamɔ nii lɛ fɛɛ. Esa akɛ ‘wɔdamɔ shi shiŋŋ wɔshi Abonsam ŋaatsɔi lɛ.’ (Efe. 6:10-17) Enɛ baabi ni wɔfi shi.

⁷ Kɛ́ wɔmia wɔhiɛ kɛdamɔ shihilɛ ni naa wa naa lɛ, no tsɔɔ akɛ wɔfi shi. Yɛ Nyɔŋmɔjamɔ gbɛfaŋ lɛ, shifimɔ tsɔɔ hiɛ ni amiaa kɛfeɔ nɔ ni ja, be ni akɛ shihilɛ ni naa wa, shiteekɛwoo, yiwaa, loo nɔ kroko ni baahã wɔŋmɛɛ anɔkwa ni wɔyeɔ Nyɔŋmɔ lɛ he lɛ ekpe. Esa akɛ wɔkase bɔ ni afiɔ shi akɛ Kristofoi. Enɛ heɔ be. Be ni wɔhe waa yɛ hemɔkɛyeli lɛ mli lɛ, wɔleɔ bɔ ni afiɔ shi jogbaŋŋ. Kɛ́ wɔfi shi yɛ kai bibii ni wɔkɛkpeɔ lɛ amli lɛ, ebaahã wɔhe awa ni wɔbaanyɛ wɔfi shi yɛ shihilɛi ni naa wawai ni wɔkɛbaakpe wɔsɛɛ lɛ amli. (Luka 16:10) Wɔnyɛŋ wɔmɛ ni wɔkɛ shihilɛ ni naa wa ko akpe dani wɔtswa wɔfai shi akɛ wɔbaafi shi yɛ wɔhemɔkɛyeli lɛ mli. Esa akɛ wɔŋmɔ wɔyiŋ kpɔ dani kaa be lɛ ashɛ. Bɔfo Petro tsɔɔ bɔ ni ehe miihia ni wɔjie shifimɔ kɛ sui kpakpai krokomɛi kpo. Eŋma akɛ: “Nyɛbɔa mɔdɛŋ fɛɛ ni nyɛaanyɛ ni nyɛkɛ jeŋba kpakpa afataa nyɛhemɔkɛyeli lɛ he, ni nyɛkɛ nilee afataa nyɛjeŋba kpakpa lɛ he, ni nyɛkɛ henɔyeli afataa nyɛnilee lɛ he, ni nyɛkɛ shifimɔ afataa nyɛhenɔyeli lɛ he, ni nyɛkɛ Nyɔŋmɔjamɔ afataa nyɛshifimɔ lɛ he, ni nyɛkɛ nyɛmimɛi ateŋ suɔmɔ afataa nyɛ-Nyɔŋmɔjamɔ lɛ he, ni nyɛkɛ suɔmɔ afataa nyɛnyɛmimɛi ateŋ suɔmɔ lɛ he.”​—2 Pet. 1:5-7; 1 Tim. 6:11.

⁸ Yakobo tsɔɔ bɔ ni ehe miihia waa ni wɔfi shi. Eŋma akɛ: “Minyɛmimɛi, kɛ́ nyɛkɛ shihilɛi ni mli wawai srɔtoi kpe lɛ, nyɛbua lɛ miishɛɛ sɔŋŋ, ejaakɛ nyɛle akɛ nyɛhemɔkɛyeli ni aka akwɛ yɛ nɛkɛ gbɛ nɔ lɛ kɛ shifimɔ baa. Shi nyɛhãa shifimɔ lɛ agbea enitsumɔ naa, koni nyɛye emuu ni nyɛhi kɛwula shi yɛ gbɛ fɛɛ gbɛ nɔ, koni ekashwɛ nyɛ nɔ ko.” (Yak. 1:2-4) Yakobo wie akɛ, esa akɛ Kristofoi akpa gbɛ akɛ amɛkɛ shihilɛi ni mli wawai baakpe, ni kɛ́ amɛkɛkpe lɛ, esa akɛ amɛná miishɛɛ, ejaakɛ no baahã amɛkase bɔ ni afiɔ shi. Ani osusu sane lɛ he yɛ nakai gbɛ nɔ? Kɛkɛ ni Yakobo tsɔɔ akɛ shifimɔ yɛ nɔ ni etsuɔ; ehãa wɔyeɔ emuu akɛ Kristofoi ni ehãa wɔsaa Nyɔŋmɔ hiɛ jogbaŋŋ. Be fɛɛ be ni wɔkɛ shihilɛ ko ni mli wa baakpe ni wɔbaafi shi ni wɔye Yehowa anɔkwa lɛ, ehãa wɔshifimɔ lɛ mli waa. Shifimɔ hu hãa wɔnáa sui kpakpai krokomɛi ni he hiaa waa.

⁹ Kɛ́ wɔfi shi lɛ, esaa Yehowa hiɛ; no baatsirɛ lɛ ni ehã wɔ naanɔ wala akɛ jweremɔnɔ. Yakobo kɛfata he akɛ: “Gbɔmɔ ni yaa nɔ efiɔ shi yɛ shihilɛ ni mli wa mli lɛ yɛ miishɛɛ, ejaakɛ kɛ́ Nyɔŋmɔ ná ehe miishɛɛ lɛ, ebaaná wala akekere lɛ, nɔ ni Yehowa wo shi akɛ ekɛbaahã mɛi ni yaa nɔ amɛsumɔɔ lɛ lɛ.” (Yak. 1:12) Anɔkwa, wala hewɔ ni wɔfiɔ shi lɛ. Kɛ́ wɔfiii shi lɛ, wɔnyɛŋ wɔhi anɔkwale lɛ mli. Kɛ́ wɔŋmɛ gbɛ ni je lɛ ná wɔnɔ hewalɛ lɛ, wɔbaaku wɔsɛɛ kɛya je lɛŋ ekoŋŋ. Kɛ́ wɔfiii shi lɛ, wɔyaŋ nɔ wɔnáŋ Yehowa mumɔ lɛ, ni no hãŋ wɔwo mumɔ lɛ yibii lɛ.

¹⁰ Kɛ́ wɔbaanyɛ wɔya nɔ wɔfi shi yɛ bei ni mli shihilɛ wa nɛɛ amli lɛ, esa akɛ wɔná amanehului ni wɔkɛkpeɔ akɛ Kristofoi lɛ ahe jwɛŋmɔ ni ja. Kaimɔ akɛ Yakobo ŋma akɛ: “Nyɛbua lɛ miishɛɛ sɔŋŋ.” Ebɛ mlɛo akɛ wɔbaafee nakai, ejaakɛ shihilɛi ni mli wawai ni wɔkɛkpeɔ lɛ hãa wɔnaa nɔ loo wɔhaoɔ. Shi kaimɔ akɛ, ja ofi shi amrɔ nɛɛ dani obaaná wala wɔsɛɛ. Niiashikpamɔ ko ni bɔfoi lɛ ná lɛ baanyɛ aye abua wɔ ni wɔna bɔ ni wɔbaafee wɔbu shihilɛi ni mli wawai ni wɔkɛkpeɔ lɛ akɛ nɔ ko ni yɔɔ miishɛɛ. Abɔ enɛ he amaniɛ yɛ Bɔfoi awolo lɛ mli. Ekaneɔ akɛ: “Amɛtsɛ bɔfoi lɛ, ni amɛgwao amɛ, ni amɛfã amɛ akɛ amɛkpa wiemɔ yɛ Yesu gbɛ́i mli, ni amɛŋmɛɛ amɛhe. No hewɔ lɛ, amɛshi Sanhedrin lɛ hiɛ amɛtee kɛ miishɛɛ babaoo ejaakɛ egbɛ́i lɛ hewɔ lɛ, abu amɛ akɛ mɛi ni sa akɛ ashwie amɛhiɛ shi.” (Bɔf. 5:40, 41) Bɔfoi lɛ na akɛ amanehulu ni amɛna lɛ ji odaseyeli ni tsɔɔ akɛ amɛbo Yesu famɔ lɛ toi, ni akɛ Yehowa ená amɛhe miishɛɛ. Afii komɛi asɛɛ be ni akɛ mumɔ tsirɛ Petro ni eŋma e-klɛŋklɛŋ wolo lɛ, etsɔɔ sɛɛnamɔ ni yɔɔ he akɛ wɔbaana amanehulu yɛ jalɛ hewɔ.​—1 Pet. 4:12-16.

¹¹ Nɔkwɛmɔnɔ kroko hu kɔɔ Paulo kɛ Sila he. Be ni amɛtsuɔ amɛ maŋsɛɛ sɔɔmɔ lɛ yɛ Filipi lɛ, amɔmɔ amɛ ni akɛ sane fɔ̃ amɛnɔ akɛ amɛmiigba maŋbii lɛ anaa, ni amɛmiijaje kusumii ni mla eŋmɛɛɛ gbɛ. Enɛ hewɔ lɛ ayi amɛ jogbaŋŋ ni awo amɛ tsuŋ. Biblia lɛ bɔɔ amaniɛ akɛ, be ni amɛyɔɔ tsuŋwoohe lɛ ni atoko amɛfaji lɛ anɔ ahãko amɛ lɛ, “aaafee nyɔɔŋteŋ lɛ, Paulo kɛ Sila miisɔle ni amɛmiilá kɛmiijie Nyɔŋmɔ yi, ni mɛi ni awo amɛ tsuŋ lɛ miibo amɛ toi.” (Bɔf. 16:16-25) Paulo kɛ mɔ ni fata ehe lɛ bu amanehulu ni amɛna yɛ Kristo hewɔ lɛ akɛ odaseyeli ni tsɔɔ akɛ amɛhiɛ anɔkwa ni amɛyeɔ Nyɔŋmɔ kɛ gbɔmɛi lɛ mli, ni agbɛnɛ hu, amɛbu lɛ akɛ hegbɛ ni amɛná hu ni amɛkɛbaaye mɛi ni baasumɔ ni amɛbo sane kpakpa lɛ toi lɛ odase. Amɛna akɛ, mɛi krokomɛi awala hu ebaje sane lɛ mli. Nakai nyɔɔŋ lɛŋ nɔŋŋ lɛ, tsuŋwoohe nɔkwɛlɔ lɛ kɛ eshĩabii lɛ bo toi ni amɛbatsɔmɔ kaselɔi. (Bɔf. 16:26-34) Paulo kɛ Sila kɛ amɛhiɛ fɔ̃ Yehowa nɔ, ni amɛhe amɛye akɛ eyɛ hewalɛ ni ebaanyɛ ekɛwaje amɛ yɛ amanehulu lɛ mli, ni eeshwe ni efee nakai hu. Ni Yehowa wooo amɛ hiɛgbele.

¹² Ŋmɛnɛ hu lɛ, Yehowa kɛ nɔ fɛɛ nɔ ni he hiaa koni wɔnyɛ wɔdamɔ shihilɛi ni mli wawai anaa lɛ ehã wɔ. Eesumɔ ni wɔfi shi. Ehã wɔ e-Wiemɔ ni jɛ mumɔŋ lɛ koni wɔná eyiŋtoi lɛ ahe nilee krɔŋŋ. Enɛ tswaa wɔhemɔkɛyeli emaa shi. Wɔyɛ hegbɛ akɛ wɔkɛ wɔnyɛmimɛi Kristofoi lɛ baabɔ, ni wɔkɛ jamɔ krɔŋŋ ahã Nyɔŋmɔ. Wɔyɛ hegbɛ hu akɛ wɔbaatsɔ sɔlemɔ nɔ wɔwaje wɔ kɛ Yehowa teŋ wekukpaa lɛ. Eboɔ yijiemɔ ni wɔkɛhãa lɛ kɛ yelikɛbuamɔ ni wɔkɛ hiɛdɔɔ biɔ bɔ ni afee ni wɔya nɔ wɔsa ehiɛ lɛ toi. (Fip. 4:13) Kɛfata he lɛ, kɛ́ wɔjwɛŋ wɔhiɛnɔkamɔ lɛ he lɛ, ewajeɔ wɔ waa.​—Mat. 24:13; Heb. 6:18; Kpo. 21:1-4.

¹³ Shihilɛi ni mli wawai ni wɔkɛkpeɔ ŋmɛnɛ lɛ tamɔ nɔ ni Yesu Kristo kaselɔi ni hi shi yɛ blema lɛ kɛkpe lɛ nɔŋŋ. Yɛ wɔbei nɛɛ amli lɛ, mɛi ni akɛɛ amɛ Yehowa Odasefoi ahe saji gbohii lɛ esopa Yehowa Odasefoi lɛ ni amɛwa amɛyi babaoo. Tamɔ bɔ ni eba lɛ yɛ bɔfoi lɛ abeiaŋ lɛ, mɛi ni hɔ shiteekɛwoi nɛɛ asɛɛ ji mɛi ni dɔɔ jamɔi ni tsɔɔ amale tsɔɔmɔi ni Nyɔŋmɔ Wiemɔ lɛ kpaa amɛnifeemɔi gbohii lɛ ahe mama lɛ ahe lɛ. (Bɔf. 17:5-9, 13) Bei komɛi lɛ, Yehowa webii lɛ tsɔɔ mlai ni amralofoi lɛ ewo lɛ anɔ amɛyeɔ amɛhe. (Bɔf. 22:25; 25:11) Kɛ̃lɛ, maŋ hiɛnyiɛlɔi komɛi hu tsĩɔ wɔnitsumɔ lɛ naa, ni amɛbɔɔ mɔdɛŋ akɛ amɛbaagu wɔ-Kristofoi asɔɔmɔ nitsumɔ lɛ. (Lala 2:1-3) Yɛ shihilɛi ni tamɔ nɛkɛ mli lɛ, wɔfeɔ ekãa tamɔ bɔ ni bɔfoi anɔkwafoi ni wie akɛ, “esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi” lɛ fee lɛ nɔŋŋ.​—Bɔf. 5:29.

¹⁴ Akɛni mɛi ni dɔɔ amɛmaŋ he yɛ je lɛŋ lɛ ayi miifa hewɔ lɛ, enɛ kɛ nɔnyɛɛ baa mɛi ni shiɛɔ sane kpakpa lɛ nɔ koni amɛŋmɛɛ nitsumɔ ni Nyɔŋmɔ kɛwo amɛdɛŋ lɛ he. Kpojiemɔ 14:9-12 lɛ bɔɔ wɔ kɔkɔ yɛ jamɔ ni wɔbaajá “kooloo awuiyelɔ lɛ kɛ emaga lɛ” he, ni Nyɔŋmɔ tsuji fɛɛ kɛ kɔkɔbɔɔ nɛɛ shwɛɛɛ kwraa. Wɔnaa nɔ hewɔ ni Yohane wie akɛ: “Biɛ shifimɔ yɛ mɛi krɔŋkrɔŋi lɛ agbɛfaŋ he ehia yɛ, mɛi ni yeɔ Nyɔŋmɔ kitãi lɛ anɔ ni amɛhiɛɔ Yesu hemɔkɛyeli lɛ mli kpɛŋŋ lɛ.”

¹⁵ Tai, nɔyeli hiɛ atuatsemɔi, loo yiwai kɛ naatsĩi baanyɛ ahã ewa kɛhã Kristofoi akɛ amɛbaajá Nyɔŋmɔ yɛ faŋŋ mli. Ekolɛ nyɛnyɛŋ nyɛkpe akɛ asafo. Ekolɛ nyɛnyɛŋ nyɛkɛ nitsumɔhe nine lɛ ashãra. Ekolɛ kpokpaa nɔkwɛlɔi nyɛŋ abasara nyɛ. Ekolɛ nyɛnine shɛŋ woji anɔ. Kɛ́ oyaje shihilɛi nɛɛ ateŋ eko mli lɛ, mɛni esa akɛ ofee?

¹⁶ Esa akɛ ofee nɔ fɛɛ nɔ ni obaanyɛ ofee yɛ nakai shihilɛ lɛ mli. Esa akɛ onyɛ ofee aŋkro nikasemɔ. Bei pii lɛ, mɛi fioo ko baanyɛ abua amɛhe naa yɛ mɛi ashĩai amli kɛkase nii. Abaanyɛ akase woji ni akase momo loo abaanyɛ akase Biblia lɛ diɛŋtsɛ po yɛ kpeei ni tamɔ nɛkɛ lɛ ashishi. Kaahao loo kaaye otsui. Gbɛtsɔɔmɔ Kuu lɛ baabɔ mɔdɛŋ ni ekɛ nyɛmimɛi hii ni nyiɛɔ hiɛ lɛ ashãra yɛ be kukuoo ko sɛɛ.

¹⁷ Kɛ́ ekolɛ okome oyaje he ko ni onyɛmimɛi Kristofoi lɛ bɛ jɛmɛ po lɛ, kaimɔ akɛ Yehowa kɛ e-Bi Yesu Kristo kɛ bo yɛ. Obaanyɛ ohiɛ ohiɛnɔkamɔ lɛ mli kpɛŋŋ. Yehowa baanyɛ anu osɔlemɔi lɛ, ni ebaanyɛ ekɛ emumɔ lɛ awo bo hewalɛ. Hã etsɔɔ bo gbɛ. Kaimɔ akɛ Yehowa tsulɔ kɛ Yesu Kristo kaselɔ ji bo. No hewɔ lɛ, okɛ hegbɛ fɛɛ hegbɛ ni obaaná lɛ aye odase. Yehowa baajɔɔ omɔdɛŋbɔi lɛ anɔ, ni ekolɛ etsɛŋ mɛi krokomɛi baabafata ohe yɛ anɔkwa jamɔ mli.​—Bɔf. 4:13-31; 5:27-42; Fip. 1:27-30; 4:6, 7; 2 Tim. 4:16-18.

¹⁸ Kɛ́ ekolɛ, tamɔ bɔ ni eba lɛ yɛ bɔfoi lɛ agbɛfaŋ lɛ, bo hu akɛɛ abaagbe bo yɛ ohemɔkɛyeli lɛ hewɔ lɛ, okɛ ohiɛ afɔ̃ “Nyɔŋmɔ ni teɔ gbohii ashi” lɛ nɔ. (2 Kor. 1:8-10) Hemɔkɛyeli ni oyɔɔ akɛ abaatee gbohii ashi lɛ baanyɛ aye abua bo ni ofi shi yɛ shiteekɛwoo ni naa wa fe fɛɛ lɛ po mli. (Luka 21:19) Kristo Yesu fee enɛ he nɔkwɛmɔnɔ; ele akɛ anɔkwa ni ebaaye yɛ kaa mli lɛ baawo mɛi krokomɛi hewalɛ ni amɛfi shi. Bo hu nakai nɔŋŋ onɔkwɛmɔnɔ lɛ baanyɛ awo onyɛmimɛi lɛ ekomɛi hewalɛ.​—Yoh. 16:33; Heb. 12:2, 3; 1 Pet. 2:21.

¹⁹ Yɛ yiwaa kɛ shiteekɛwoo sɛɛ lɛ, shihilɛi ni mli wawai krokomɛi hu yɛ ni esa akɛ ofi shi yɛ mli. Akɛ nɔkwɛmɔnɔ lɛ, mɛi komɛi anijiaŋ eje wui ejaakɛ mɛi booo sane lɛ toi yɛ amɛshikpɔŋkuku lɛ mli. Mɛi komɛi hu lɛ, hela loo henumɔŋ naagba ko, loo gbɔmɔtsoŋ gbɔjɔmɔ ko ji nɔ ni ebiɔ ni amɛfi shi yɛ mli. Ehe bahia ni bɔfo Paulo afi shi yɛ shihilɛ ko ni tamɔ nakai ni hãaa enyɛ etsu esɔɔmɔ nitsumɔ lɛ loo bei komɛi lɛ, ehãa ewaa kɛhãa lɛ akɛ ebaatsu lɛ mli. (2 Kor. 12:7) Agbɛnɛ, Epafrodito, ni ji blema Kristofonyo ko ni hi shi yɛ Filipi asafo lɛ mli lɛ hu hao, ‘akɛni enanemɛi lɛ nu akɛ no mli lɛ ebɛ hewalɛ lɛ hewɔ.’ (Fip. 2:25-27) Emuu ni wɔ kɛ wɔnyɛmimɛi lɛ fɛɛ yeee lɛ baanyɛ ekɛ naagbai ni naa wa aba ni ebaabi ni wɔfi shi yɛ mli. Béi baanyɛ aba wɔ kɛ wɔnyɛmi Kristofonyo ko loo wɔwekunyo ko teŋ. Shi mɛi ni boɔ ŋaawoo ni yɔɔ Yehowa Wiemɔ lɛ mli lɛ toi lɛ baanyɛ afi shi yɛ mli, ni amɛbaanyɛ amɛtsu he nii.​—Eze. 2:3-5; 1 Kor. 9:27; 13:8; Kol. 3:12-14; 1 Pet. 4:8.

²⁰ Esa akɛ wɔya nɔ wɔnyiɛ Yesu Kristo ni ji mɔ ni Yehowa ehala akɛ asafo lɛ Yitso lɛ sɛɛ kpaakpa. (Kol. 2:18, 19) Esa akɛ wɔkɛ “nyɔŋ anɔkwafo kɛ hiɛshikalɔ lɛ” kɛ nɔkwɛlɔi ni ehala lɛ afee ekome kɛtsu nii. (Heb. 13:7, 17) Kɛ́ wɔkɛ teokrase gbɛtsɔɔmɔi tsu nii ni wɔkɛ mɛi ni nyiɛɔ hiɛ lɛ fee ekome lɛ, wɔbaafee mɛi ni ato amɛhe gbɛjianɔ ni amɛfee Yehowa suɔmɔnaa nii. Esaaa akɛ wɔkɛ sɔlemɔ shwɛɔ kwraa. Kaimɔ akɛ, kɛ́ awo wɔ tsuŋ jio, akɛ wɔ etee he ko banee jio lɛ, no nyɛŋ atsĩ wɔnaa ni wɔkɛ wɔ-Tsɛ ni yɔɔ ŋwɛi lɛ akagba sane, ni agbɛnɛ hu, no nyɛŋ afite ekomefeemɔ ni yɔɔ wɔ kɛ wɔnyɛmimɛi lɛ ateŋ lɛ.

²¹ Nyɛhãa wɔkɛ faishitswaa kɛ shifimɔ fɛɛ atsua shiɛmɔ nitsumɔ lɛ, ni ji nitsumɔ ni Yesu Kristo kɛhã esɛɛnyiɛlɔi fɛɛ akɛ amɛtsu be ni atee lɛ shi lɛ. Ekɛɛ akɛ: “No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ amli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, nyɛtsɔa amɛ ni amɛye nii fɛɛ ni mifã nyɛ lɛ nɔ.” (Mat. 28:19, 20) Nyɛhãa wɔfia shi tamɔ bɔ ni Yesu fee lɛ. Nyɛhãa wɔhiɛ ahia Maŋtsɛyeli lɛ hiɛnɔkamɔ lɛ kɛ naanɔ wala ni kã wɔhiɛ lɛ nɔ. (Heb. 12:2) Akɛ Kristo kaselɔi ni abaptisi amɛ lɛ, wɔná hegbɛ akɛ wɔye wɔbua koni Yesu gbalɛ ni kɔɔ “je lɛ naagbee gbii lɛ” he lɛ aba mli. Ewie akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.” (Mat. 24:3, 14) Kɛ́ wɔkɛ wɔtsui fɛɛ wo nitsumɔ nɛɛ mli bianɛ lɛ, wɔbaaná naanɔ wala yɛ jalɛ jeŋ hee ni Yehowa kɛbaaba lɛ mli!