Gbi ni ‘Tsoɔ Tamɔ Flɔnɔɔ’
“Naa! gbi ni tsoɔ tamɔ flɔnɔɔ lɛ miiba.”—MALEAKI 4:1, NW.
1. Mɛɛ sanebimɔi teɔ shi yɛ Maleaki 3:19 he?
MIISHƐƐ ji mɛi ni Yehowa halaa akɛ eeeŋma amɛgbɛi yɛ ekaimɔ wolo lɛ mli yɛ naagbee gbii nɛɛ amli lɛ. Shi mɛi ni nine shɛɛɛ nakai hegbɛ lɛ nɔ lɛ hu? Kɛji akɛ amɛji nɔyelɔi loo gbɔmɛi foji kɛkɛ lɛ, mɛni baaba amɛnɔ kɛji akɛ amɛgbe mɛi ni jajeɔ Nyɔŋmɔ Maŋtsɛyeli lɛ kɛ amɛ shɛɛ sane lɛ he guɔ? Maleaki wieɔ akɔntaabuu gbi ko he. Wɔkaneɔ yɛ yitso 3, kuku 19 akɛ: “Shi naa, gbi lɛ miiba, ni eeedɔ tamɔ flɔnɔɔ, ni hewolɔi fɛɛ kɛ mɛi ni feɔ nifɔjianii lɛ aaatsɔmɔ gbetselii, ni gbi ni baa lɛ aaashã amɛ, ni eshiŋ tso shishifã loo tso nine ehaŋ amɛ, Yehowa Zebaot kɛɛ.”
2. Mɛɛ Yehowa kojomɔ mlitsɔɔmɔ fitsofitso ko Ezekiel kɛha?
2 Gbalɔi krokomɛi hu kɛ kojomɔ ni Yehowa kɛbaa jeŋmaji lɛ anɔ lɛ toɔ flɔnɔɔ mli la ni edɔ waa lɛ he. Kwɛ bɔ ni Ezekiel 22:19-22 kɔɔ kojomɔ ni Nyɔŋmɔ kɛbaa Kristendom ni ekwa hemɔkɛyeli lɛ mli jamɔi kui sɔrɔtoi lɛ anɔ lɛ he ehaa! Ekaneɔ akɛ: “No hewɔ lɛ bɔ ni Nuntsɔ Yehowa kɛɛ nɛ: ‘Akɛni nyɛ bluublu nyɛtsɔmɔ shika fei hewɔ lɛ, naa, mabua nyɛnaa . . . Taakɛ bɔ ni abuaa jwiɛtɛi kɛ akɔɔble kɛ dade kɛ sumui kɛ sanyaa naa awoɔ seremɔ flɔnɔɔ mli, ni ahuuɔ la awoɔ he ni esereɔ lɛ, nakai mabua nyɛnaa yɛ mimlifu kɛ mimlila lɛ mli, ni mikɛ nyɛ aaawo mli ni masere nyɛ. Ni mabua nyɛnaa, ni mahuu mimlifu la lɛ mawo nyɛhe ni nyɛsere yɛ mli! Bɔ ni asereɔ jwiɛtɛi yɛ flɔnɔɔ mli lɛ, nakai nɔŋŋ kɛ̃ aaasere nyɛ yɛ mli, ni nyɛaana nyɛle akɛ mi, Yehowa, mifɔse mimlila lɛ mishwie nyɛnɔ.’ ”
3, 4. (a) Mɛni osɔfoi lɛ kɛ osatofeemɔ ewie? (b) Mɛɛ nibii gbohii jamɔ efee ni aŋmala ashwie shi?
3 Nɔkwɛmɔ nɔ ni mli wa waa lɛlɛŋ nɛ! Esa akɛ osɔfoi lɛ ni egbala amɛhe shi kɛjɛ Yehowa gbɛi lɛ kɛ nitsumɔ he, ni amɛbɔɔ nakai gbɛi krɔŋkrɔŋ lɛ musu po lɛ kɛ nakai akɔntaabuu gbi lɛ akpe. Amɛkɛ henɔwomɔ kɛɔ akɛ, amɛ kɛ amɛ maŋkwramɔŋ nanemɛi lɛ baato Nyɔŋmɔ Maŋtsɛyeli amɛma shikpɔŋ nɔ, aloo kɛ hoo lɛ, ni amɛha shikpɔŋ lɛ afee he ni sa kɛha Maŋtsɛyeli lɛ.
4 Kristendom ni ekwa hemɔkɛyeli lɛ kɛ ehe ebɔ maŋkwramɔŋ nɔyelɔi ahe ni amɛkɛwuu tai ni yɔɔ gbeyei. Yinɔsane eŋmala nibii ni tsɔɔ teŋgbɛ afii lɛ amli Tai Krɔŋkrɔŋi ni awuu, Spanish Niseniianii ni ekɛnyɛ mɛi anɔ ni amɛtsake, Afii Nyɔŋmai Etɛ Tawuu ni gbe Europabii babaoo yɛ afii ohai 17 lɛ mli, kɛ Spanish Maŋ Ta ni ba yɛ 1930 afii lɛ amli, ni awu koni aha Spain afee shweshweeshwe aha Katolik jamɔ lɛ. Wɔ afii oha nɛɛ mli jeŋ tai enyɔ lɛ kɛ lashishwiemɔ ni fe fɛɛ ba, beni Katolikbii kɛ Protestantbii fɛɛ kɛ amɛhe wo amɛ nanemɛi heyelilɔi kɛ mɛi krokomɛi ni jɛ jamɔi krokomɛi amli lɛ agbee ni akwɛɛɛ hiɛaŋ mli lɛ. Nyɛsɛɛ nɛɛ nɔŋŋ hu lɛ, tawuu kɛ awuiyeli etee nɔ yɛ Katolikbii kɛ Protestantbii ateŋ yɛ Ireland, yɛ jamɔ kui ateŋ yɛ India, kɛ tsutsu Yugoslavia jamɔ kui ateŋ. Akɛ la ekpa jamɔ yinɔsane baafai amli hu kpɔtɔɔ, kɛtsɔ Yehowa Odasefoi anɔkwafoi akpei abɔ ni gboi akɛ la odasefoi lɛ nɔ.—Kpojiemɔ 6:9, 10.
5. Mɛɛ kojomɔ mɛɔ apasa jamɔ?
5 Wɔbaanyɛ wɔyoo jalɛsane ni yɔɔ fɔbuu kojomɔ ni Yehowa kɛbaa Babilon Kpeteŋkpele, jeŋ apasa jamɔ maŋtsɛyeli lɛ, kɛ esɛɛfilɔi lɛ anɔ lɛ amrɔ nɔŋŋ. Atsɔɔ hiɛkpatamɔ nɛɛ mli yɛ Kpojiemɔ 18:21, 24: “Ni bɔfo ko ni he wa wo tɛ ko ni tamɔ wiɛ wulu, ni eshɛ efɔ ŋshɔŋ ekɛɛ: ‘Nɛkɛ aaashɛ Babilon maŋ kpeteŋkpele lɛ afɔ trukaa, ni anaŋ lɛ kwraa dɔŋŋ. Ni emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ ala lɛ yɛ.’ ”
6. (a) Namɛi baatsɔmɔ gbetselii lɛ, ni mɛni hewɔ? (b) Mɛɛ nɔmimaa yɔɔ kɛha mɛi ni sheɔ Yehowa gbeyei lɛ?
6 Yɛ be ni sa mli lɛ, mɛi fɛɛ ni ji jalɛ nifeemɔ henyɛlɔi, kɛ mɛi ni kɛ amɛhe kpɛtɛɔ amɛhe lɛ fɛɛ “aaatsɔmɔ gbetselii.” Yehowa gbi lɛ baatso yɛ amɛteŋ tamɔ flɔnɔɔ. “Ni eshiŋ tso shishifa loo tso nine ehaŋ amɛ.” Yɛ nakai akɔntaabuu gbi lɛ nɔ lɛ, akɛ gbekɛbii, loo tso niji lɛ baaye yɛ bɔ ni Yehowa kojoɔ amɛ shishifai, ni ji amɛ fɔlɔi, ni kwɛɔ gbekɛbii nɛɛ anɔ lɛ naa. Fɔlɔi yiwalɔi naŋ seshibii ni baaha amɛ yiwaa gbɛi lɛ aya nɔ. Shi mɛi ni naa Nyɔŋmɔ Maŋtsɛyeli shiwoi lɛ amli hemɔkɛyeli lɛ hosoŋ. No hewɔ lɛ, Hebribii 12:28, 29 woɔ ŋaa akɛ: “Nyɛhaa wɔdaa shi, ni wɔkɛsɔmɔ Nyɔŋmɔ bɔ ni sa ehiɛ kɛ woo kɛ gbeyeishemɔi! Ejaakɛ wɔ Nyɔŋmɔ lɛ, la ni fiteɔ mɔ hu ji lɛ.”
Ani Yehowa Ji Nyɔŋmɔ Yiwalɔ?
7. Yehowa suɔmɔ baa ekojomɔ mli yɛ mɛɛ gbɛ nɔ?
7 Ani enɛ tsɔɔ akɛ, Yehowa ji Nyɔŋmɔ yiwalɔ kɛ oweletɔlɔ? Jeee nakai kwraa! Bɔfo lɛ jaje shishijee anɔkwale ko yɛ 1 Yohane 4:8: “Nyɔŋmɔ lɛ, suɔmɔ ji lɛ.” Kɛkɛ ni ekɛ nɔmimaa fata he yɛ kuku 16 lɛ akɛ: “Nyɔŋmɔ lɛ, suɔmɔ ji lɛ, ni mɔ ni hiɔ suɔmɔ mli lɛ, ehiɔ Nyɔŋmɔ mli, ni Nyɔŋmɔ hu hiɔ emli.” Suɔmɔ ni eyɔɔ kɛha adesai lɛ hewɔ ni Yehowa eto eyiŋ akɛ ebaatsuu shikpɔŋ nɛɛ nɔ ni ejie efɔŋ feemɔ kɛ yiwalɛ fɛɛ kɛya lɛ. Wɔ Nyɔŋmɔ ni yɔɔ suɔmɔ kɛ mɔbɔnalɛ lɛ jaje akɛ: “Gbii abɔ ni mihiɛ ka nɛɛ, . . . Minaaa efɔŋ feelɔ gbele he miishɛɛ, shi moŋ akɛ efɔŋ feelɔ akpale kɛjɛ egbɛ lɛ nɔ ni eyi ana wala! Nyɛkpalea, nyɛkpalea kɛjɛa nyɛgbɛi fɔji lɛ anɔ! Shi mɛɛba ni nyɛaagboi?”—Ezekiel 33:11.
8. Mɛɛ gbɛ nɔ Yohane ma suɔmɔ nɔ mi yɛ, ni kɛlɛ ejie ehe kpo akɛ Nugbɔshiimɔ Bi?
8 Yohane wieɔ a·gaʹpe, ni ji suɔmɔ ni damɔ mla nɔ, lɛ he shii abɔ fe Sanekpakpai aŋmalalɔi krokomɛi etɛ lɛ fɛɛ ni abua amɛ niŋmaai anaa, ni kɛlɛ, awieɔ Yohane diɛŋtsɛ he yɛ Marko 3:17 akɛ ‘Nugbɔshiimɔ Bi.’ Yehowa mumɔ lɛ tsirɛmɔ naa ni nɛkɛ Nugbɔshiimɔ Bi nɛɛ kɛŋmala Biblia lɛ mli naagbee kpojiemɔ wiemɔi, Kpojiemɔ, ni jieɔ Yehowa kpo akɛ Nyɔŋmɔ ni tsuɔ jalɛ kojomɔ he nii lɛ. Wolo nɛɛ mli eyi obɔ kɛ kojomɔ wiemɔi, tamɔ akɛ, “Nyɔŋmɔ mlila lɛ weinŋaa nɔ kpeteŋkpele lɛ,” “Nyɔŋmɔ mlifu tɔi kpawo lɛ,” kɛ “Nyɔŋmɔ Ofe lɛ mlifu ni naa wa lɛ.”—Kpojiemɔ 14:19; 16:1; 19:15.
9. Mɛɛ wiemɔi Yesu kɛtsu nii yɛ Yehowa kojomɔi ahe, ni egbalɛi lɛ ba mli yɛ mɛɛ gbɛ nɔ?
9 Wɔ Nuntsɔ Yesu Kristo, ni ji “Nyɔŋmɔ ni anaaa lɛ lɛ subaŋ” lɛ kɛ ekãa jaje Yehowa kojomɔi lɛ etsɔɔ beni eyɔɔ shikpɔŋ nɛɛ nɔ lɛ. (Kolosebii 1:15) Akɛ nɔkwɛmɔ nɔ lɛ, kpoo sɔrɔtoi kpawo yɛ Mateo yitso 23, ni ejaje eshi jamɔ mli osatofoi ni hi shi yɛ egbii lɛ amli lɛ. Ekɛ wiemɔi nɛɛ mu efɔbuu kojomɔ wiemɔi ni ekɛshi amɛ lɛ naa: “Yerusalem, Yerusalem, bo mɔ ni ogbeɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi—shii enyiɛ mitao akɛ kulɛ mibuaa obii anaa tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛɛɛ! Naa, aaashi nyɛwe lɛ amaŋfɔ aha nyɛ.” Afii nyɔŋmai etɛ kɛ kpawo sɛɛ lɛ, Roma asraafoi ni yɔɔ Tatsɛ Tito shishi lɛ tsu fɔbuu kojomɔ he nii eshi amɛ. Efee gbi ni yɔɔ gbeyei waa, ni fee gbalɛ mfoniri kɛha gbi ni baafee gbeyei fe fɛɛ eko yɛ adesai aniiashikpamɔ fɛɛ mli—Yehowa gbi, ni etsɛŋ ni ebaaba lɛ.
“Hulu” lɛ Te Shi
10. “Jalɛ hulu” lɛ kɛ miishɛɛ bahaa Nyɔŋmɔ webii yɛ mɛɛ gbɛ nɔ?
10 Yehowa haa aleɔ akɛ mɛi ayi baana wala yɛ egbi lɛ mli. Ewieɔ mɛnɛɛmɛi ahe yɛ Maleaki 3:20 akɛ: “Shi nyɛ mɛi ni nyɛsheɔ migbɛi lɛ gbeyei lɛ, jalɛ hulu aaate shi aha nyɛ kɛ tsamɔ yɛ efiji amli.” Nakai jalɛ hulu lɛ jeee mɔ ko mɔ ko fe Yesu Kristo diɛŋtsɛ. Lɛ ji “je lɛ mli la lɛ.” (Yohane 8:12) Mɛɛ gbɛ nɔ ekpɛɔ yɛ? Eteɔ shi kɛ tsamɔ yɛ efiji amli—klɛŋklɛŋ lɛ mumɔŋ tsamɔ, ni wɔnaa mli niiashikpamɔ ŋmɛnɛ po lɛ, kɛ agbɛnɛ, yɛ jeŋ hee ni baa lɛ mli lɛ, gbɔmɔtsoŋ tsamɔ kɛha gbɔmɛi ni jɛ jeŋmaji fɛɛ mli lɛ. (Mateo 4:23; Kpojiemɔ 22:1, 2) Yɛ mfoniri-feemɔ mli lɛ, taakɛ Maleaki kɛɛ lɛ, mɛi ni atsa amɛ lɛ ‘aaaje kpo, ni amɛaahuru tamɔ tsinabii ni amɛwo fɔ’ ni agbele amɛ kɛjɛ amɛtsu mli. Mɛɛ miishɛɛ po mɛi ni atee amɛ shi kɛjɛ gbohiiaje kɛ gbɛkpamɔ akɛ amɛaaye emuu yɛ adesa gbɔmɔtso mli lɛ baana nɛkɛ!
11, 12. (a) Mɛni baa efɔŋ feelɔi lɛ anɔ lɛ? (b) Nyɔŋmɔ webii lɛ “naanaa mɛi fɔji anɔ” yɛ mɛɛ gbɛ nɔ?
11 Shi, mɛi fɔji lɛ hu? Wɔkaneɔ yɛ Maleaki 3:21 akɛ: “ ‘Ni nyɛaanaanaa mɛi fɔji anɔ; ejaakɛ gbi ni mafee lɛ, amɛaatsɔmɔ lamlu yɛ nyɛnajiashi,’ Yehowa Zebaot kɛɛ.” Yɛ be mli ni ebuɔ mɛi ni sumɔɔ lɛ lɛ ahe lɛ, no mli lɛ wɔ Nyɔŋmɔ-Tawulɔ lɛ ejie nakai henyɛlɔi lɛ fɛɛ kɛjɛ shikpɔŋ nɔ kwraa, ni ekpata amɛhiɛ. No mli lɛ atsi Satan kɛ edaimonioi lɛ anaa.—Lala 145:20; Kpojiemɔ 20:1-3.
12 Nyɔŋmɔ webii naaa efɔŋ feelɔi ahiɛkpatamɔ lɛ mli gbɛfaŋnɔ. Belɛ mɛɛ gbɛ nɔ ‘amɛnaanaa mɛi fɔji lɛ anɔ’ yɛ? Amɛfeɔ enɛ yɛ mfoniri-feemɔ gbɛ nɔ kɛtsɔɔ amɛhe ni amɛkɛwoɔ kunimyeli gbijurɔyeli kpele lɛ mli lɛ nɔ. 2 Mose 15:1-21 tsɔɔ nɛkɛ gbijurɔyeli nɛɛ mli. Eba yɛ Farao kɛ etabilɔi babaoo lɛ ahiɛkpatamɔ yɛ Ŋshɔ Tsuru lɛ mli lɛ sɛɛ. Yɛ Yesaia 25:3-9 mlibaa mli lɛ, nɔ ni baanyiɛ “yiwalɔi lɛ” ahiɛkpatamɔ lɛ sɛɛ ji kunimyeli okpɔlɔŋmɛɛ ni kɛ Nyɔŋmɔ shiwoo nɛɛ yɔɔ tsakpaa: “Eeemi gbele kɛaatee naanɔ; ni Nuntsɔ Yehowa aaatsumɔ hiɛaŋ fɛɛ yaafonui, ni eeejie emaŋ lɛ hiɛgbele lɛ yɛ shikpɔŋ muu lɛ fɛɛ nɔ; ejaakɛ Yehowa ekɛɛ. Ni aaakɛɛ yɛ nakai gbi lɛ nɔ akɛ: ‘Naa, wɔ-Nyɔŋmɔ lɛ . . . nɛ! Mɔ nɛ ji Yehowa ni wɔhiɛ ka enɔ lɛ! Nyɛhaa wɔnyaa ni wɔmli afilia wɔ yɛ eyiwalaheremɔ lɛ hewɔ!’ ” Jeee oweletɔɔ henumɔ yɔɔ miishɛɛ ni wɔna nɛɛ mli, shi moŋ mlifilimɔ, akɛ wɔna akɛ atse Yehowa gbɛi lɛ he, ni atsuu shikpɔŋ lɛ he koni adesai ni efee ekome ahi nɔ yɛ toiŋjɔlɛ mli.
Tsɔsemɔ he Gbɛjianɔtoo Wulu Ko
13. Mɛɛ tsɔsemɔ baaya nɔ yɛ “shikpɔŋ hee“ lɛ nɔ?
13 Awo Yudafoi lɛ ŋaa yɛ Maleaki 3:22 akɛ, “nyɛkaia . . . Mose mla” lɛ. Nakai nɔŋŋ hu ŋmɛnɛ ehe hiaa ni wɔnyiɛ “Kristo mla” taakɛ atsi ta yɛ Galatabii 6:2 lɛ sɛɛ. Ŋwanejee ko bɛ he akɛ, akɛ gbɛtsɔɔmɔi krokomɛi ni damɔ enɛ nɔ baaha mɛi ni baaje Harmagedon mli lɛ, ni abaaŋmala enɛɛmɛi yɛ Kpojiemɔ 20:12 “woji” ni abaagbele naa yɛ gbohiiashitee be lɛ mli lɛ amli. Mɛɛ gbi ni yɔɔ nyam eeefee nɛkɛ, beni atsɔɔ mɛi ni atee amɛ shi kɛjɛ gbohiiaje lɛ anii koni amɛnyiɛ shihilɛ ni yɔɔ “shikpɔŋ hee” lɛ nɔ lɛ sɛɛ lɛ!—Kpojiemɔ 21:1.
14, 15. (a) Mɛɛ gbɛ nɔ atsɔɔ ayɔseɔ ŋmɛnɛŋmɛnɛ beaŋ Elia lɛ? (b) Mɛɛ gbɛnaa nii Elia kuu lɛ tsuɔ he nii?
14 Enɛ baafee tsɔsemɔ nitsumɔ ni Yehowa wie he, taakɛ aŋma afɔ shi yɛ Maleaki 3:23 lɛ nɔtsamɔ: “Naa, matsu gbalɔ Elia kɛba nyɛŋɔɔ, dani Yehowa gbi wulu kpele ni he yɔɔ gbeyei lɛ aaashɛ.” Namɔ ji nakai ŋmɛnɛŋmɛnɛ beaŋ Elia lɛ? Taakɛ atsɔɔ yɛ Mateo 16:27, 28 lɛ, beni ewieɔ ‘emaŋtsɛyeli lɛ mli ni eeeba’ lɛ he lɛ, Yesu kɛɛ: “Ejaakɛ gbɔmɔ Bi lɛ baaba yɛ e-Tsɛ anunyam lɛ mli kɛ ebɔfoi lɛ; ni no mli lɛ eeewo mɔ fɛɛ mɔ nyɔmɔ yɛ enitsumɔ naa.” Gbii ekpaa sɛɛ, beni ekɛ Petro, Yakobo, kɛ Yohane yɔɔ gɔŋ ko nɔ lɛ, “esu tsake yɛ amɛhiɛ, ni ehiɛ kpɛ tamɔ hulu, ni etadei lɛ yɛ́ tamɔ la.” Ani ekome pɛ epue yɛ ninaa nɛɛ mli? Dabi, ejaakɛ “naa, Mose kɛ Elia bajie amɛhe kpo tsɔɔ amɛ, ni amɛkɛ lɛ wie.”—Mateo 17:2, 3.
15 Mɛni ji nɔ ni enɛ baanyɛ atsɔɔ? Etsɔɔ faŋŋ akɛ Yesu ji Mose Kpeteŋkpele ni agba yɛ ehe yɛ be mli ni ebaa kɛha kojomɔ lɛ. (5 Mose 18:18, 19; Bɔfoi lɛ Asaji 3:19-23) Ekɛ ŋmɛnɛŋmɛnɛ beaŋ Elia ko baabɔ, koni amɛkɛtsu nitsumɔ ko ni he hiaa waa, ni ji Maŋtsɛyeli lɛ he sanekpakpa lɛ shiɛmɔ yɛ shikpɔŋ lɛ fɛɛ nɔ, dani Yehowa gbi wulu ni he yɔɔ gbeyei waa lɛ ashɛ. Beni etsɔɔ “Elia” nɛɛ nitsumɔ lɛ mli lɛ, Maleaki 3:24 jaje akɛ: “Ni eeedɔrɔ tsɛmɛi atsuii kɛba amɛbii ahe, kɛ bii hu atsuii kɛba tsɛmɛi ahe, koni mikaba ni mibaha shikpɔŋ lɛ ye musu.” No hewɔ lɛ, ayɔseɔ “Elia” nɛɛ akɛ Kristofoi ni afɔ amɛ mu ni yɔɔ shikpɔŋ nɔ lɛ ateŋ tsulɔ anɔkwafo kɛ nilelɔ kuu lɛ, mɔ ni e-Nuntsɔ Yesu, kɛ E-nibii fɛɛ ewo edɛŋ lɛ. Nɔ ni fata enɛ he ji hemɔkɛyeli shia lɛ mli bii fɛɛ ni akɛ mumɔŋ “niyenii” ni he hiaa aaaha amɛ “yɛ be ni sa nɔ.”—Mateo 24:45, 46.
16. Mɛni ni yɔɔ miishɛɛ ejɛ Elia kuu lɛ nitsumɔ lɛ mli eba?
16 Wɔnyɛɔ wɔnaa nɔ ni ejɛ nakai niyenii ahe gbɛjianɔtoo lɛ mli eba yɛ jeŋ fɛɛ ŋmɛnɛ. Buu-Mɔɔ wolo tɛtrɛɛ lɛ, ni akalaa eko fɛɛ eko ni jeɔ kpo lɛ ekomekomei 16,100,000 yɛ wiemɔi 120 mli, ni emli 97 mli saji lɛ fɛɛ jeɔ kpo yɛ be kome mli lɛ, eha “maŋtsɛyeli lɛ he sanekpakpa nɛɛ” miigbɛ kɛmiishwa shikpɔŋ lɛ fɛɛ nɔ. (Mateo 24:14) Akɛ woji krokomɛi ni yɔɔ wiemɔi sɔrɔtoi babaoo hu mli tsuɔ nii yɛ Yehowa Odasefoi ashiɛmɔ kɛ nitsɔɔmɔ nitsumɔ lɛ mli yɛ gbɛi sɔrɔtoi anɔ. Elia kuu lɛ, tsulɔ anɔkwafo kɛ nilelɔ lɛ, hiɛ yɛ ehe nɔ waa, yɛ “mɛi ni hiɛ yɔɔ amɛmumɔŋ hiamɔ nii anɔ” lɛ ni ehaa amɛ niyenii babaoo lɛ mli. (Mateo 5:3, NW) Kɛfata he lɛ, akɛ mɛi ni kpɛlɛɔ Maŋtsɛyeli hiɛnɔkamɔ nɛɛ nɔ ni amɛtsuɔ he nii lɛ bawoɔ jeŋ muu fɛɛ ekomefeemɔ ko ni yɔɔ naakpɛɛ mli. Ekɔɔ asafo babaoo lɛ “ni jɛ jeŋmaŋ fɛɛ jeŋmaŋ, kɛ akutsei, kɛ maji, kɛ majianɔ wiemɔi amli” lɛ he. (Kpojiemɔ 7:9) Kɛ atsu nitsumɔ nɛɛ kɛyashɛ he ni Yehowa taoɔ lɛ, kɛkɛ lɛ naagbee lɛ baaba yɛ egbi wulu kpele ni he yɔɔ gbeyei lɛ mli.
17. Mɛɛ be mli Yehowa gbi wulu kpele ni he yɔɔ gbeyei lɛ baaba?
17 Mɛɛ be kwraa nakai gbi wulu kpele ni he yɔɔ gbeyei lɛ baafɛ ashwie wɔ nɔ? Bɔfo Paulo haa hetoo: “Nuntsɔ Yehowa gbi lɛ baaba tamɔ julɔ baa nyɔɔŋ lɛ. Ejaakɛ be mli ni aaakɛɛ, [ekolɛ yɛ gbɛ ni yɔɔ sɔrɔto nɔ] akɛ: ‘Hejɔlɛ yɛ, ni wɔyɛ shweshweeshwe!’ lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.”—1 Tesalonikabii 5:2, 3.
18, 19. (a) Mɛɛ gbɛ nɔ atsɔɔ ajajeɔ “hejɔlɛ yɛ ni wɔyɛ shweshweeshwe” lɛ? (b) Mɛɛ be mli Yehowa webii ahe baajɔ amɛ?
18 Namɛi ji “amɛ” ni yɔɔ gbalɛ nɛɛ mli lɛ? Amɛji maŋkwramɔŋ hiɛnyiɛlɔi ni kɛɔ akɛ amɛbaanyɛ amɛtswa gbɛjianɔtoo hee ko ni efee ekome kɛjɛ yiwalɛ jeŋ ni ekumɔ nɛɛ fai sɔrɔtoi lɛ amli amɛma shi lɛ. Nibii wuji ni amɛfee, Jeŋmaji Akpaŋmɔ lɛ kɛ Jeŋmaji Ekomefeemɔ lɛ nine enyɛ shi yɛ enɛ mli. Taakɛ Yehowa gbalɔ lɛ gba fɔ shi lɛ, bianɛ po “amɛkɛɔ akɛ, ‘Omanye! omanye!’ Shi omanye ko bɛ.”—Yeremia 6:14; 8:11; 14:13-16.
19 Beni enɛ yaa nɔ lɛ, Yehowa webii ŋmɛɔ amɛtsui shi yɛ jeŋ ni leee Nyɔŋmɔ nɛɛ nɔnyɛɛi kɛ yiwaai lɛ amli. Shi etsɛŋ, taakɛ atsɔɔ yɛ 2 Tesalonikabii 1:7, 8 lɛ, amɛbaana hejɔɔmɔ “beni aaajie Nuntsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ lɛ kɛ mɛi ni booo wɔ-Nuntsɔ Yesu Kristo sanekpakpa lɛ toi lɛ anɔ lɛ.”
20. (a) Mɛni Zefania kɛ Habakuk gba yɛ gbi ni ‘tsoɔ tamɔ flɔnɔɔ mli la’ lɛ he? (b) Mɛɛ ŋaawoo kɛ hewalɛwoo nɛkɛ gbalɛi nɛɛ kɛhaa?
20 Mɛɛ mra enɛ baafee? Wɔteŋ mɛi pii kɛ be babaoo emɛ aahu. Dani enɛ aaaba lɛ, heshibalɔi babaoo ni yi baana wala lɛ miihere tsɛmɔ ni anaa yɛ Zefania 2:2, 3 akɛ: “Nyɛtaoa Yehowa sɛɛgbɛ . . . Nyɛtaoa jalɛ sɛɛgbɛ, nyɛtaoa heshibaa sɛɛgbɛ: ekolɛ aaaŋɔ nyɛ atee yɛ Yehowa mlifu gbi lɛ nɔ!” lɛ nɔ. Agbɛnɛ kɔkɔbɔɔ nɛɛ hu yɛ Zefania 3:8: “No hewɔ lɛ nyɛkwɛa mi gbɛ, Yehowa kɛɛ, kɛyashi gbi nɔ ni mate shi akɛ odasefonyo! ejaakɛ miyiŋtoo ji akɛ mabua jeŋmaji lɛ anaa, ni makpee maŋtsɛyelii lɛ kɛaakpe, koni mafɔse mimlila kɛ mimlifu ni naa wa lɛ fɛɛ mashwie amɛnɔ; ejaakɛ miwuŋayeli la lɛ aaasha shikpɔŋ muu lɛ fɛɛ.” Naagbee lɛ ebɛŋkɛ! Yehowa le nakai gbi kɛ ŋmɛlɛtswaa lɛ, ni etsakeŋ be ni eto lɛ. Nyɛhaa wɔkɛ tsuishitoo aŋmɛa wɔtsui shi. “Shi ninaa lɛ yɛ ha be ni ato lɛ kɛ̃, ni eeye oyai ni eshɛ enaagbee, ni emaleŋ; kɛ eshashao shi hu jiŋŋ, mɛɛ lɛ kɛ̃; ejaakɛ ebaaba lɛlɛŋ, ekpeŋ sɛɛ.” (Habakuk 2:3) Yehowa gbi wulu kpele ni he yɔɔ gbeyei lɛ miibɛŋkɛ kɛ foi. Kaimɔ akɛ, nakai gbi lɛ ekpeŋ sɛɛ!
Kɛha Emlitii:
◻ Mɛni baaba nɔyelɔi lɛ kɛ mɛi ni ayeɔ amɛnɔ lɛ fɛɛ nɔ yɛ Yehowa gbi wulu kpele ni he yɔɔ gbeyei lɛ mli?
◻ Mɛɛ Nyɔŋmɔ nɛkɛ Yehowa ji?
◻ Mɛɛ tsɔsemɔ nɛkɛ atsɔɔ mli aha Nyɔŋmɔ webii lɛ?
◻ Mɛɛ kɔkɔbɔɔ Nyɔŋmɔ gbalɔi lɛ kɛhaa wɔ yɛ bɔ ni naagbee lɛ ebɛŋkɛ kpaakpa eha lɛ hewɔ?
[Mfoniri ni yɔɔ baafa 21]
Anyɛ mɛi pii anɔ atsake amɛ awo Katolik jamɔ mli yɛ Spanish Niseniianii be lɛ mli
[He ni Sane lɛ Jɛ]
The Complete Encyclopedia of Illustration/J.G.Heck