“Nyɛhaa Wɔkɛ Jatsu Fɛɛ Jatsu Aŋmɛa Shi”

Mary ye ŋkɔmɔ akɛ, “miwerɛ eho mihe ni minijiaŋ eje wui babaoo.” Yɛ be mli ni Kristofonyo yoo nɛɛ wieɔ jatsu ni ji Kristofoi agbɛnaa nii lɛ he lɛ, ekɛfata he akɛ: “Miina nanemɛi ni kɛ nitsumɔ mli deŋmegbomɔ miifite amɛgbɔmɔtsei. Mi hu minuɔ tɔlɛ kɛ nɔnyɛɛ lɛ he. Nyɛfainɛ nyɛyɛa nyɛbuaa mi ni manu nɔ hewɔ lɛ shishi.”

ANI bo hu onuɔ he akɛ oyɛ nɔnyɛɛ shishi, etɔ bo babaoo akɛ onyɛɛɛ otsu oteokrase gbɛnaa nii ahe nii jogbaŋŋ? Ani yɛ bei komɛi amli lɛ ebafeɔ tamɔ nɔ ni Kristofoi asɔɔmɔ nitsumɔ lɛ ji jatsu ko ni tsii, gbɛnaa nii ni anyɛɛɛ atere? Kristofoi anɔkwafoi pii tsɔɔ nijiaŋwujee bei amli, ejaakɛ nibii ni ebɔle wɔhe be fɛɛ be ji hewalɛi ni ehiii ni baanyɛ aba wɔ miishɛɛnamɔ shi. Anɔkwa Kristofonyo ni mɔ ko aaaji ŋmɛnɛ lɛ ji kaa diɛŋtsɛ. No hewɔ lɛ, yɛ bei komɛi amli lɛ, mɛi komɛi baanu he akɛ Kristofoi asɔɔmɔ nitsumɔ lɛ ji jatsu ni tsii.

Nɔ Ni Haa Ebaa lɛ Nakai lɛ Taomɔ

Ŋmalɛi lɛ feɔ lɛ faŋŋ akɛ Yehowa kɛ taomɔ nii komɛi ni shishinumɔ bɛ mli eshwieko wɔnɔ. Bɔfo Yohane kɛɛ akɛ “Nyɔŋmɔ kitai lɛ waaa.” (1 Yohane 5:⁠3) Yesu kɛɛ esɛɛnyiɛlɔi lɛ nakai nɔŋŋ akɛ: “Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.” (Mateo 11:​29, 30) Eka shi faŋŋ akɛ ejeee Yehowa suɔmɔnaa nii akɛ wɔɔnu he akɛ akɛ jatsu ni tsii tsɔ efɔ wɔnɔ yɛ sɔɔmɔ ni wɔkɛhaa lɛ lɛ mli.

Belɛ te aaafee tɛŋŋ ni Kristofonyo anɔkwafo lɛ aaabu e-Kristofoi agbɛnaa nii lɛ akɛ jatsu ni tsii hu? Eeenyɛ efee akɛ nibii pii kɔɔ he. Kadimɔ bɔfo Paulo wiemɔi nɛɛ: “Wɔ hu . . . nyɛhaa wɔkɛ jatsu fɛɛ jatsu aŋmɛa shi, . . . ni wɔkɛ tsuishitoo ada foi ni ka wɔhiɛ lɛ.” (Hebribii 12:⁠1) Paulo wiemɔi lɛ tsɔɔ akɛ yɛ bei komɛi amli lɛ Kristofonyo lɛ kɛ jatsui ni he ehiaaa baatere lɛ diɛŋtsɛ ehe. Enɛ kɔɔɔ eshai komɛi ni hiɛdɔɔ yɔɔ mli he. Shi Kristofonyo lɛ baanyɛ atɔ̃ yɛ eyiŋkpɛi amli ni enɛ baaha eshihilɛ afee hwanyaŋŋ kwraa, ni ebaaha ewa waa kɛha lɛ akɛ eeeda foi ni ka wɔhiɛ lɛ.

Heloo Gbɛfaŋ Nibii Ahe Susumɔ Ni Ŋmɛɔ Pɛpɛɛpɛ

Ŋɔɔ heloo gbɛfaŋ nitsumɔ nɛkɛ akɛ nɔkwɛmɔ nɔ. Shika helɛtemɔ shihilɛi ni yɔɔ shikpɔji pii anɔ lɛ haŋ Kristofonyo lɛ ahala nɔ ni esumɔɔ akɛ ja ekɛ ŋmɛlɛtswai babaoo tsu nii. Shi yɛ bei babaoo mli lɛ, gbɔmɛi kɛ amɛhe woɔ nitsumɔi komɛi amli koni amɛkɛya amɛhiɛ aloo ni amɛkɛbua shihilɛ mli nibii ni haa miishɛɛ lɛ anaa. Yɛ amɛhiamɔ nii titrii lɛ ni amɛsaa amɛsusuɔ he jogbaŋŋ lɛ hewɔ lɛ, Kristofoi komɛi ena akɛ jwɛŋmɔ yɛ mli akɛ amɛaafee tsakemɔi yɛ amɛnitsumɔi amli. Nɛkɛ sane lɛ ji yɛ Debbie kɛ ewu, ni amɛ fɛɛ amɛji Yehowa Odasefoi lɛ agbɛfaŋ. Yoo lɛ kɛɛ: “Wɔ shika shihilɛ etsake, ni ehe ehiaaa dɔŋŋ akɛ maya nɔ mikɛ mibe fɛɛ atsu nii. Shi eheŋmɛɛmɔ wa kɛha mi.” Etsɛɛɛ ni ebanu nɔnyɛɛ he akɛ eyɛ babaoo feemɔ tsɔ. Etsɔɔ mli akɛ: “Hɔɔ pɛ ji gbi ni miyɔɔ ni mikɛtsuɔ nii yɛ shia. Yɛ bei pii amli lɛ minuuu he akɛ esa akɛ maya shiɛmɔ. Misumɔɔɔ nakai kwraa, ni mihenilee bɔi minaa gbamɔ, ni kɛlɛ misumɔɔ minitsumɔ lɛ hu! Yɛ naagbee lɛ, ehe bahia ni matsu shihilɛ lɛ he nii diɛŋtsɛ. Tsabaa kome pɛ yɔɔ. Mikpa nitsumɔ lɛ.” Wɔbaanyɛ wɔkpɛlɛ nɔ akɛ tsakemɔ wulu ni tamɔ nɛkɛ ehiŋ kɛhaŋ mɛi komɛi. Shi kɛlɛ, onitsumɔ he gbɛjianɔtoo lɛ mlikwɛmɔ jogbaŋŋ baanyɛ ajie bɔ ni ehe hiaa ni ofee tsakemɔi komɛi lɛ kpo.

Ekolɛ gbɛi krokomɛi ni wɔɔtsɔ nɔ wɔjie jatsui ni he ehiaaa lɛ kɛjɛ wɔkɔji anɔ lɛ yɛ. Ni wɔgbɛfaa kɛha hiɛtserɛjiemɔ, kpɔiaŋgbɔlemɔ nifeemɔi, loo miishɛɛnamɔ​—ni be ni afiteɔ akɛkwɛɔ televishin fata he lɛ ni wɔɔfo nɔ fioo lɛ hu? Ni yɛ be mli ni wɔha nibii eŋmɛ pɛpɛɛpɛ yɛ gbɛ ko nɔ yɛ nibii nɛɛ amli lɛ, esa akɛ wɔya nɔ wɔfee tsakemɔi yɛ be fɛɛ mli ni wɔkɛhiɛ nɛkɛ pɛpɛɛpɛ-ŋmɛɛ nɛɛ mli.

Hiɛshikamɔ He Miihia

Hiɛshikamɔ yɛ saji ni tamɔ nɛkɛ mli lɛ baaye abua wɔ ni wɔdamɔ shihilɛi heei ni teɔ shi lɛ anaa. Enɛ baaha wɔna wɔsɔɔmɔ nitsumɔ lɛ he jwɛŋmɔ kpakpa yɛ be fɛɛ mli.​—Efesobii 5:​15-17; Filipibii 4:⁠5.

Ani onaa akɛ nɔnyɛɛ ko ka onɔ akɛ ofee babaoo tamɔ bɔ ni mɛi krokomɛi feɔ yɛ Nyɔŋmɔ sɔɔmɔ mli lɛ? Enɛ hu kɛ yeyeeyefeemɔ kɛ nijiaŋwujee baaba oshihilɛ mli. Yɛ be mli ni mɛi krokomɛi anɔkwɛmɔ nɔ kpakpa lɛ baawo bo hewalɛ ni ofee babaoo lɛ, hiɛshikamɔ baaye abua bo ni okɛ otii ni sa ni kɛ shihilɛ mli ni oyɔɔ lɛ kɛ onyɛmɔ kpaa gbee lɛ amamɔ shi aha ohe. Ŋmalɛi lɛ kɛɔ wɔ akɛ: “Shi mɔ fɛɛ mɔ aka lɛ diɛŋtsɛ enitsumɔ ekwɛ, ni no dani eeena nɔ ko yɛ lɛ diɛŋtsɛ emli kɛkɛ ni eshwa efɔ nɔ, ni jeee mɔ kroko nɔ̃ lɛ nɔ. Ejaakɛ mɔ fɛɛ mɔ aaatere lɛ diɛŋtsɛ ejatsu.”​—Galatabii 6:​4, 5.

Maŋ kusumii kɛ blema saji hu baanyɛ ekɛ nɔ ko afata wɔjatsui lɛ ahe. Etɔ gbɔmɛi lɛ babaoo yɛ Yesu gbii lɛ amli yɛ mɔdɛŋ ni amɛbɔɔ koni amɛye jamɔ mli mlai kɛ blema saji babaoo ni gbɔmɛi kɛmamɔ shi lɛ anɔ lɛ hewɔ. Aha Yehowa webii eye amɛhe ŋmɛnɛ kɛjɛ apasa jamɔŋ blema saji amli. (Okɛto Yohane 8:32 he.) Ni kɛlɛ, Kristofonyo lɛ baanyɛ ekɛ ehe awo maŋ kusum saji amli yakatswaa. Akɛ nɔkwɛmɔ nɔ lɛ, yɛ bei komɛi amli lɛ akɛ kusum nifeemɔi babaoo bɔleɔ yookpeemɔ he. Nɛkɛ kusum nifeemɔi nɛɛ efeŋ nɔ ni ehiii moŋ, ekolɛ amɛbaanyɛ amɛfee nɔ ni yɔɔ fɛo kɛ miishɛɛ po. Shi, ekolɛ Kristofoi bɛ be loo shika ni amɛkɛaaye nibii nɛɛ fɛɛ nɔ, ni mɔdɛŋ ni amɛaabɔ akɛ amɛaafee nakai lɛ baanyɛ ekɛ jatsui krokomɛi ni he ehiaaa abafata he.

Susumɔ nɔ ni ba beni Yesu yasara yoo ko ni atsɛɔ lɛ Marta lɛ he. Ni eŋwɛi nilee lɛ he aaaba sɛɛnamɔ babaoo aha lɛ moŋ lɛ, “Marta gba ehe naa tuutu yɛ sɔɔmɔ pii ahewɔ.” Eloo nibii babaoo eshwie enɔ. (Luka 10:40) Shi Yesu kɛ mlihilɛ wo lɛ ŋaa akɛ ebaanyɛ efo eniyenii he gbɛjianɔtoo lɛ nɔ kuku koni enitsɔɔmɔ lɛ he aba sɛɛnamɔ aha lɛ. (Luka 10:​41, 42) Enɛ tsɔɔ diɛŋtsɛ akɛ kojomɔ kpakpa kɛ hiɛshikamɔ baaye abua bo ni ofee mɔ ni ŋmɛɔ pɛpɛɛpɛ yɛ o-Kristofoi asɔɔmɔ nitsumɔ lɛ mli.​—Yakobo 3:⁠17.

Kojomɔ kpakpa hu he miihia yɛ be mli ni ohalaa onanemɛi lɛ. Abɛi 27:3 bɔɔ kɔkɔ akɛ: “Tɛ tsii, ni shia hu jatsu kɛ tsiimɔ ni; shi buuluu mlifu tsii fe nii enyɔ nɛɛ fɛɛ.” Bɔ fɛɛ bɔ ni ji lɛ, onanemɛi ni bɛŋkɛ bo kpaakpa lɛ baanyɛ ana osusumɔ nɔ hewalɛ waa. Mɛi ni kɛ oyaiyeli taoɔ tɔmɔ ni amɛwieɔ amɛshiɔ mɛi krokomɛi yɛ asafo lɛ mli lɛ ni okɛ amɛ aaabɔ lɛ baanyɛ atɛo nijiaŋwujee kɛ jwɛŋmɔ ni ejaaa awo omli. (1 Korintobii 15:33) Kɛ oyoo akɛ naagba nɛ lɛ, belɛ tsakemɔi komɛi ni nilee yɔɔ mli ni ooofee yɛ mɛi ni okɛ amɛ bɔɔ lɛ ahe lɛ baaha ojatsu lɛ afee huyɛhuyɛ.

Okɛ Nyɔŋmɔ Anyiɛ yɛ Heshibaa Mli

Wɔnaa sane ni kanyaa mɔ jwɛŋmɔ nɛɛ yɛ Mika 6:​8, akɛ: “Nɔ ni Yehowa biɔ yɛ odɛŋ . . . ji akɛ . . . okɛ o-Nyɔŋmɔ lɛ anyiɛ yɛ heshibaa mli.” Atsɔɔ heshibaa loo hiɛshikamɔ shishi akɛ yoomɔ ni mɔ aaayoo he ni enyɛɔ efeɔ nii kɛyashɛɔ. Mɛi ni yɔseee he ni amɛnyɛɔ amɛfeɔ nii kɛyashɛɔ lɛ baaloo nibii babaoo ashwie amɛ diɛŋtsɛ amɛhe nɔ fe bɔ ni amɛaanyɛ. Enɛ eba Kristofoi ni amɛdara yɛ mumɔŋ lɛ anɔ, yɛ nɔkwɛlɔi po nɔ, ni nɔ ni ejɛ mli eba ji nijiaŋwujee, yiŋtoo ni feɔ yaka, kɛ miishɛɛ ni laajeɔ. Kenneth, ni ji Kristofonyo onukpa lɛ kpɛlɛ nɔ akɛ: “Mina akɛ miihao, ni mikɛɛ mihe akɛ, ‘Miŋmɛŋ gbɛ ni enɛ aba minɔ.’ No hewɔ lɛ mifolɔ nibii ni jwere minɔ lɛ anɔ, ni migbala mijwɛŋmɔ kɛtee nɔ ni manyɛ mafee lɛ anɔ.”

Ebawa kɛha gbalɔ Mose heshibalɔ lɛ po akɛ eeenyɛ ena he ni ehewalɛ nyɛɔ efeɔ nii kɛyashɛɔ. No hewɔ lɛ, ehe bahia ni eshaanuu Yetro aye abua Mose ni ejwɛŋ nitsumɔ ni fa tsɔ ni ebɔɔ mɔdɛŋ ni ekome etsu lɛ he jogbaŋŋ. Yetro bi akɛ: “Mɛni ji nɔ ni ofeɔ ohaa maŋ lɛ nɛɛ? . . . Nɔ ni ofeɔ nɛɛ ehiii. Ebaatɔo . . . shi nii nɛɛ tsii tsɔ hao, okometoo onyɛŋ. . . . Faamɔ maŋ lɛ fɛɛ mli hii ni yɔɔ hewalɛ, . . . ni aaaba mli akɛ sane wulu fɛɛ sane wulu lɛ amɛkɛba ohiɛ, shi saji bibii fɛɛ lɛ amɛye, bɔni afee ni amɛmɔ sɛɛ amɛhao ni efo tsɔ ehao.” Amrɔ nɔŋŋ pɛ kɛkɛ ni Mose je shishi akɛ ekɛ enitsumɔi lɛ ekomɛi aaawo mɛi krokomɛi adɛŋ, ni ehe jɔ lɛ kɛjɛ nɔ ni miihe afee jatsu ni enyɛɛɛ etere lɛ mli.​—2 Mose 18:​13-26.

Mose kɛɛ Yehowa yɛ be kroko mli akɛ: “Mikome too minyɛŋ maŋ muu nɛɛ fɛɛ mahiɛ, ejaakɛ etsii fe mi.” Hetoo lɛ ba ekoŋŋ akɛ ekɛ nitsumɔ awo mɛi krokomɛi adɛŋ. Ekolɛ enɛ hu baanyɛ afee onaagba lɛ naa tsabaa kɛ onuɔ he akɛ nitsumɔi babaoo jwere onɔ tsɔ.​—4 Mose 11:​14-17.

Yehowa Yeɔ Ebuaa Wɔ Koni Wɔtere Jatsu Lɛ

Yesu kɛɛ akɛ epã lɛ teremɔ waaa ni ejatsu lɛ etsiii shi jeee ni ebɛ tsiimɔ kwraa. Pã ni Yesu fɔ̃ɔ wɔ nine ni wɔbatere lɛ jeee hejɔfeemɔ pã. Eji henɔjɔɔmɔ kwraa kɛmiiha Nyɔŋmɔ akɛ Yesu Kristo kaselɔ lɛ pã. No hewɔ lɛ, tsiimɔ ko loo nɔnyɛɛ ko fataa anɔkwa Kristofonyo ni mɔ ko aaaji lɛ he kɛbaa. (Mateo 16:​24-26; 19:​16-29; Luka 13:24) Yɛ be mli ni jeŋ shihilɛi fiteɔ lɛ, nɔnyɛɛi baafa. Shi wɔyɛ nɔ ni wɔɔdamɔ nɔ wɔna jwɛŋmɔ kpakpa ejaakɛ Yesu ninefɔɔ lɛ tsɔɔ akɛ mɛi krokomɛi baanyɛ abafata ehe yɛ epã lɛ shishi, ni akɛ ebaaye abua amɛ.a No hewɔ lɛ, bei abɔ ni wɔnyiɛɔ Kristo gbɛtsɔɔmɔ sɛɛ lɛ, wɔbaanyɛ wɔtere wɔjatsu lɛ, ejaakɛ ebaaye ebua wɔ.

Nyɔŋmɔ kwɛɔ mɛi ni sumɔɔ lɛ lɛ anɔ, ni ebuɔ mɛi fɛɛ ni tsɔɔ sɔlemɔ nɔ amɛshɛrɛɔ amɛjatsui lɛ amɛshwieɔ enɔ lɛ atsuii kɛ jwɛŋmɔŋ nyɛmɔi ahe. (Lala 55:​23; Filipibii 4:​6, 7; 1 Petro 5:​6, 7) Lalatsɛ lɛ kɛɛ: “Ajie Nuŋtsɔ lɛ [Yehowa] yi! Daa nɛɛ etereɔ wɔjatsui lɛ ehaa wɔ; Mawu lɛ nɔŋŋ ji wɔyiwalaheremɔ.” (Lala 68:20) Hɛɛ, na nɔmimaa akɛ Nyɔŋmɔ baatere jatsu lɛ aha bo hu daa gbi, kɛ oshɛ jatsu fɛɛ jatsu ofɔ ni okɛ tsuiŋmɛɛ da foi ni ka ohiɛ lɛ.

[Shishigbɛ niŋmai]

[Mfoniri ni yɔɔ baafa 24]

Onukpai ni le nii Iɛ miisumɔ ni amɛkɛ nitsumɔi awo mɛi krokomɛi adɛŋ ni amɛkɛ mɛi krokomɛi aja amɛjatsui Iɛ