Beni Yesu Baa yɛ Maŋtsɛyeli Anunyam Mli

“Mɛi ni damɔ biɛ nɛɛ ateŋ mɛi komɛi . . . kɛ gbele esaŋ amɛnaa kwraa kɛyashi beyinɔ ni amɛaana gbɔmɔ Bi lɛ ni miiba yɛ emaŋtsɛyeli lɛ mli klɛŋklɛŋ dã.”—MATEO 16:28, NW.

 1, 2. Mɛni ba yɛ afi 32 Ŋ.B. Pentekoste sɛɛ nɔŋŋ, ni mɛni ji yiŋtoo ni yɔɔ nɔ ni ba lɛ sɛɛ?

AFI 32 Ŋ.B. Pentekoste sɛɛ etsɛɛɛ ni Yesu Kristo bɔfoi lɛ ateŋ mɛi etɛ na ninaa ko ni sa kaimɔ. Taakɛ mumɔ naa niŋmaa lɛ tsɔɔ lɛ, “Yesu ŋɔ Petro kɛ Yakobo kɛ enyɛmi Yohane, ni ekɛ amɛ tee gɔŋ ni kwɔ ko nɔ yɛ afã. Ni esu tsake yɛ amɛhiɛ.”—Mateo 17:1, 2.

² Tsakemɔ lɛ he ninaa lɛ ba yɛ be ni he hiaa waa mli. Yesu eje shishi eekɛɛ esɛɛnyiɛlɔi lɛ akɛ ebaana amanehulu ni ebaagbo yɛ Yerusalem, shi amɛna akɛ ewiemɔi lɛ ashishinumɔ wa. (Mateo 16:21-23) Ninaa lɛ waje Yesu bɔfoi etɛ lɛ ahemɔkɛyeli yɛ saamɔ ni esaa amɛ kɛha egbele ni baa lɛ kɛ agbɛnɛ hu, nitsumɔ kɛ tɔlɛ afii kɛ kaa ni baanyiɛ sɛɛ aba Kristofoi asafo lɛ nɔ lɛ. Ani wɔbaanyɛ wɔkase nɔ ko kɛjɛ ninaa lɛ mli ŋmɛnɛ? Hɛɛ, ejaakɛ nɔ ni efee he mfoniri lɛ baa mli diɛŋtsɛ yɛ wɔbe nɛɛ mli.

 3, 4. (a) Mɛni Yesu wie gbii ekpaa dani tsakemɔ lɛ ba? (b) Tsɔɔmɔ nɔ ni ba yɛ tsakemɔ be lɛ mli lɛ mli.

³ Gbii ekpaa dani tsakemɔ lɛ aaaba lɛ, Yesu kɛɛ esɛɛnyiɛlɔi lɛ akɛ: “Gbɔmɔ Bi lɛ baaba yɛ e-Tsɛ anunyam lɛ mli kɛ ebɔfoi lɛ; ni no mli lɛ eeewo mɔ fɛɛ mɔ nyɔmɔ yɛ enitsumɔ naa.” (NW) Nɛkɛ wiemɔi nɛɛ baaba mli yɛ “nibii agbɛjianɔtoo lɛ naagbee” (NW) lɛ mli. Yesu tee nɔ ekɛɛ akɛ: “Lɛlɛŋ, miikɛɛ nyɛ akɛ: Mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɛyashi beyinɔ ni amɛaana gbɔmɔ bi lɛ miiba yɛ emaŋtsɛyeli lɛ mli.” (Mateo 16:27, 28; 24:3; 25:31-34, 41; Daniel 12:4) Tsakemɔ lɛ ba kɛha sɛɛkpee wiemɔi nɛɛ amlibaa.

⁴ Mɛni diɛŋtsɛ bɔfoi etɛ lɛ na? Nɔ ni nyiɛ sɛɛ nɛɛ ji bɔ ni Luka tsɔɔ sane lɛ mli eha: “Ni beni [Yesu] esɔleɔ lɛ, ehiɛ su tsake, ni etade lɛ yɛ́ futaa, ni ekpɛ kaŋkaŋ. Ni naa! hii enyɔ kɛ lɛ bawie, amɛji Mose kɛ Elia; mɛi ni bajie amɛhe kpo yɛ anunyam mli, ni amɛwie yɛ ejeŋ naa ni ebaaya eyagbe yɛ Yerusalem lɛ hewɔ lɛ.” Kɛkɛ ni “atatu bakete amɛnɔ [bɔfoi lɛ]. Ni beni amɛbote atatu lɛ mli lɛ, amɛshe gbeyei. Ni gbee jɛ atatu lɛ mli kɛɛ: ‘Misuɔmɔ Bi lɛ nɛ, mɔ ni mihala lɛ lɛ. Nyɛboa lɛ toi.’ ”—Luka 9:29-31, 34, 35, NW.

Awaje Hemɔkɛyeli

 5. Mɛɛ hewalɛ tsakemɔ lɛ ná yɛ bɔfo Petro nɔ?

⁵ Bɔfo Petro eyoo Yesu momo akɛ “Kristo lɛ, Nyɔŋmɔ hiɛkalɔ lɛ Bi lɛ.” (Mateo 16:16, NW) Yehowa wiemɔi ni jɛ ŋwɛi lɛ ma nakai eyoomɔ lɛ nɔ mi, ni Yesu tsakemɔ lɛ he ninaa lɛ hu ji Maŋtsɛyeli hewalɛ kɛ anunyam mli ni Kristo baa, koni yɛ naagbee lɛ ekojo adesai lɛ he nɔkwɛmɔ nɔ. Yɛ nɔ ni fe tsakemɔ lɛ sɛɛ afii 30 lɛ, Petro ŋma akɛ: “Jeee adesãi ni atãa yɛ ŋaa mli asɛɛ wɔnyiɛ wɔjaje wɔ-Nuntsɔ Yesu Kristo hewalɛ kɛ ebaa lɛ he sane wɔtsɔɔ nyɛ, shi moŋ wɔji odasefoi ni na enunyam kpeteŋkpele lɛ kɛ wɔhiŋmɛii. Ejaakɛ ená woo kɛ anunyam kɛjɛ Tsɛ Nyɔŋmɔ lɛ ŋɔɔ, beni nakai gbee lɛ jɛ anunyam kpeteŋkpele lɛ mli ba eŋɔɔ akɛ: ‘Mɔ nɛ ji misuɔmɔ Bi ni minaa ehe tsui lɛ.’ Ni nɛkɛ gbee nɛɛ wɔ diɛŋtsɛ wɔnu akɛ ŋwɛi ejɛ, beni wɔkɛ lɛ yɔɔ gɔŋ krɔŋkrɔŋ lɛ nɔ lɛ.”—2 Petro 1:16-18, NW; 1 Petro 4:17.

 6. Te saji lɛ tee nɔ eha tɛŋŋ yɛ tsakemɔ lɛ sɛɛ?

⁶ Ŋmɛnɛ hu, nɔ ni bɔfoi etɛ lɛ na lɛ ewaje wɔ hemɔkɛyeli. Saji kɛ nibii etee hiɛ kɛjɛ afi 32 Ŋ.B. moŋ. Yesu gbo yɛ afi ni nyiɛ sɛɛ ba lɛ mli ni atee lɛ shi, ni ekwɔ kɛtee e-Tsɛ lɛ ninejurɔ nɔ. (Bɔfoi lɛ Asaji 2:29-36) Yɛ nakai afi lɛ Pentekoste lɛ nɔ lɛ, afɔ́ “Nyɔŋmɔ Israel” hee lɛ, ni shiɛmɔ he tafãa je shishi, eje shishi kɛjɛ Yerusalem ni yɛ sɛɛ mli lɛ emli lɛɛ kɛtee shikpɔŋ lɛ naagbee hei lɛ. (Galatabii 6:16; Bɔfoi lɛ Asaji 1:8) Amrɔ nɔŋŋ ni aka Yesu sɛɛnyiɛlɔi lɛ ahemɔkɛyeli akwɛ. Amɔmɔ bɔfoi lɛ ni ayi amɛ waa, ejaakɛ amɛkpɛlɛɛɛ nɔ akɛ amɛaakpa shiɛmɔ. Etsɛɛɛ ni agbe Stefano. Kɛkɛ ni agbe Yakobo ni kɛ ehiŋmɛi na tsakemɔ lɛ. (Bɔfoi lɛ Asaji 5:17-40; 6:8–7:60; 12:1, 2) Shi Petro kɛ Yohane yi ná wala koni amɛsɔmɔ Yehowa yɛ anɔkwayeli mli afii babaoo lolo. Yɛ anɔkwale mli lɛ, kɛbaa Ŋ.B. klɛŋklɛŋ afii oha lɛ naagbee gbɛ lɛ, Yohane ŋma Yesu ni yɔɔ ŋwɛi anunyam mli lɛ he ninaai lolo.—Kpojiemɔ 1:12-20; 14:14; 19:11-16.

 7. (a) Mɛɛ be ninaa ni kɔɔ tsakemɔ lɛ he lɛ mlibaa je shishi? (b) Mɛɛ be Yesu wo mɛi komɛi nyɔmɔ yɛ amɛ nitsumɔ naa?

⁷ Kɛjɛ “Nuntsɔ lɛ gbi lɛ” shishijee yɛ 1914 kɛbaa nɛɛ, ninaai ni Yohane na lɛ mli babaoo eba mli. (Kpojiemɔ 1:10) Ni Yesu ‘baa yɛ e-Tsɛ lɛ anunyam mli,’ ni tsakemɔ lɛ fee he mfoniri lɛ hu? Nɛkɛ ninaa nɛɛ mlibaa je shishi beni afɔ Nyɔŋmɔ ŋwɛi Maŋtsɛyeli lɛ yɛ 1914 lɛ. Beni Yesu, taakɛ jetsɛremɔ ŋulami [toloo] ji lɛ, pue yɛ jeŋ muu fɛɛ akɛ Maŋtsɛ ni awo lɛ ehee, taakɛ eji lɛ, no bafee tamɔ gbi hee ko leebi maŋkpa. (2 Petro 1:19; Kpojiemɔ 11:15; 22:16) Ani Yesu wo mɛi komɛi anyɔmɔ yɛ amɛ nitsumɔ naa yɛ nakai be lɛ mli? Hɛɛ. Odaseyeli ni mli wa waa yɛ akɛ, yɛ no sɛɛ etsɛɛɛ lɛ, Kristofoi ni afɔ amɛ mu lɛ aŋwɛi shitee lɛ je shishi.—2 Timoteo 4:8; Kpojiemɔ 14:13.

 8. Mɛni nibii baakadi ninaa ni kɔɔ tsakemɔ lɛ he lɛ naagbee?

⁸ Shi etsɛŋ ni Yesu baaba “yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe” koni ebakojo adesai fɛɛ. (Mateo 25:31) No mli lɛ, ebaajie ehe kpo yɛ enunyam kpeteŋkpele lɛ fɛɛ mli, koni ewo “mɔ fɛɛ mɔ” nyɔmɔ yɛ mɔ lɛ nitsumɔ naa. Mɛi ni tamɔ gwantɛŋi lɛ baana naanɔ wala yɛ Maŋtsɛyeli ni asaa ato aha amɛ lɛ mli, ni mɛi ni tamɔ abotiai lɛ baaya ‘naanɔ hiɛkpatamɔ mli.’ Mɛɛ sane naamuu ni yɔɔ fɛo po enɛ baaji kɛha tsakemɔ lɛ he ninaa lɛ nɛkɛ!—Mateo 25:34, 41, 46; Marko 8:38; 2 Tesalonikabii 1:6-10.

Yesu Nanemɛi ni Awo Amɛhiɛ Nyam Lɛ

 9. Ani esa akɛ wɔkpa gbɛ akɛ Mose kɛ Elia kɛ Yesu baahi shi yɛ ninaa ni kɔɔ tsakemɔ lɛ he lɛ mlibaa mli? Tsɔɔmɔ mli.

⁹ Jeee Yesu pɛ yɔɔ tsakemɔ lɛ mli. Ana ni Mose kɛ Elia fata ehe. (Mateo 17:2, 3) Ani amɛba jɛmɛ diɛŋtsɛ? Dabi, ejaakɛ no mli lɛ hii enyɔ lɛ egboi jeeŋmɔ, ni amɛwɔ yɛ sũ mli, amɛmiimɛ gbohiiashitee. (Jajelɔ 9:5, 10; Hebribii 11:35) Ani amɛkɛ Yesu baapue beni ebaa yɛ ŋwɛi anunyam mli lɛ? Dabi, ejaakɛ Mose kɛ Elia gboi dani agbele ŋwɛi hiɛnɔkamɔ lɛ naa aha adesai. Amɛbaafee shikpɔŋ nɔ ‘jalɔi ashitee’ lɛ fã. (Bɔfoi lɛ Asaji 24:15) No hewɔ lɛ, amɛ puemɔ yɛ tsakemɔ lɛ he ninaa lɛ mli lɛ ji okadi. Yɛ mɛni he?

10, 11. Elia kɛ Mose feɔ namɛi ahe mfoniri yɛ saji sɔrɔtoi lɛ amli?

¹⁰ Yɛ shihilɛi krokomɛi amli lɛ, Mose kɛ Elia ji gbalɛ mli gbɔmɛi. Ákɛ Mla kpaŋmɔ lɛ teŋdamɔlɔ lɛ, Mose fee Yesu, kpaŋmɔ hee lɛ Teŋdamɔlɔ lɛ he mfoniri. (5 Mose 18:18; Galatabii 3:19; Hebribii 8:6) Elia fee Yohane Baptisilɔ lɛ, ni tsɔ Mesia lɛ hiɛ lɛ he mfoniri. (Mateo 17:11-13) Agbɛnɛ hu, yɛ Kpojiemɔ yitso 11 lɛ mlitsɔɔmɔ naa lɛ, Mose kɛ Elia fee shwɛɛnii ni afɔ amɛ mu yɛ naagbee be lɛ mli lɛ ahe mfoniri. Te wɔfeɔ tɛŋŋ wɔleɔ enɛ?

¹¹ Ojogbaŋŋ, gbelemɔ kɛya Kpojiemɔ 11:1-6. Wɔkaneɔ yɛ kuku 3 akɛ: “Ni maha midasefoi enyɔ lɛ awo kpekpe ni amɛgba gbii akpe kɛ ohai enyɔ kɛ nyɔŋmai ekpaa.” Nɛkɛ gbalɛ nɛɛ ba mli yɛ Kristofoi ni afɔ amɛ mu lɛ ateŋ shwɛɛnii lɛ anɔ yɛ Jeŋ Ta I mli.a Mɛni hewɔ odasefoi enyɔ? Ejaakɛ shwɛɛnii ni afɔ amɛ mu lɛ tsuɔ nitsumɔi, ni yɛ mumɔŋ lɛ, etamɔ Mose kɛ Elia nɔ̃ lɛ. Kukuji 5 kɛ 6 lɛ yaa nɔ ekɛɔ akɛ: “Ni kɛ mɔ ko miitao afee [odasefoi enyɔ lɛ] efɔŋ lɛ, la jɛɔ amɛdaaŋ ni emiɔ amɛhenyɛlɔi lɛ; ni kɛ mɔ ko miitao afee amɛ efɔŋ lɛ, nɛkɛ nɔŋŋ sa akɛ agbeɔ lɛ. Mɛnɛɛmɛi yɛ hegbɛ akɛ amɛŋaa ŋwɛi naa, koni nu akanɛ yɛ amɛgbalɛ gbii lɛ amli; ni amɛyɛ hegbɛ hu yɛ nui lɛ anɔ, akɛ amɛhãa etsɔ̃ɔ lá, ni amɛkɛ haomɔ haoɔ shikpɔŋ lɛ shii abɔ ni amɛsumɔɔ.” No hewɔ lɛ, aakai wɔ yɛ naakpɛɛ nii ni Elia kɛ Mose fee lɛ ahe.—4 Mose 16:31-34; 1 Maŋtsɛmɛi 17:1; 2 Maŋtsɛmɛi 1:9-12.

12. Namɛi Mose kɛ Elia feɔ amɛhe mfoniri yɛ saji ni kɔɔ tsakemɔ lɛ he lɛ mli?

¹² Belɛ, namɛi ahe mfoniri Mose kɛ Elia feɔ yɛ tsakemɔ lɛ shishitsɔɔmɔ naa? Luka kɛɔ akɛ, amɛkɛ Yesu pue “yɛ anunyam mli.” (Luka 9:31) Eyɛ faŋŋ akɛ, amɛfeɔ Kristofoi ni akɛ mumɔ krɔŋkrɔŋ efɔ amɛ mu akɛ Yesu “nanemɛi niyelɔi,” ni yɛ enɛ hewɔ lɛ amɛnine shɛ naakpɛɛ hiɛnɔkamɔ ni ji ‘amɛkɛ lɛ hiɛnyam ni aaawo’ lɛ nɔ lɛ ahe mfoniri. (Romabii 8:17) Mɛi ni afɔ amɛ mu ni atee amɛ shi lɛ kɛ Yesu baahi shi beni ebaa yɛ e-Tsɛ lɛ anunyam mli koni “ewo mɔ fɛɛ mɔ nyɔmɔ yɛ enitsumɔ naa” lɛ.—Mateo 16:27.

Odasefoi Tamɔ Mose kɛ Elia

13. Mɛni nibii kadiɔ Mose kɛ Elia akɛ Yesu nanemɛi niyelɔi ni awo amɛkɛ lɛ hiɛ nyam lɛ ahe gbalɛ mli mfonirii ni sa?

¹³ Nibii komɛi yɛ ni sa kadimɔ ni kadiɔ Mose kɛ Elia akɛ Yesu nanemɛi niyelɔi ni afɔ amɛ mu lɛ ahe gbalɛ mfonirii ni sa. Mose kɛ Elia fɛɛ sɔmɔ akɛ Yehowa naawielɔi afii pii. Amɛ fɛɛ amɛkɛ nɔyelɔ ko mlifu kpe. Yɛ hiamɔ be mli lɛ, maŋsɛɛ weku ko ye bua amɛteŋ mɔ fɛɛ mɔ. Amɛ fɛɛ amɛkɛ ekãa gba amɛtsɔɔ maŋtsɛmɛi ni amɛdamɔ shi shiŋŋ amɛshi apasa gbalɔi. Mose kɛ Elia fɛɛ na Yehowa hewalɛ lɛ he nɔkwɛmɔ nii yɛ Sinai Gɔŋ (ni atsɛɔ lɛ Horeb hu) lɛ nɔ. Mɛi enyɔ lɛ fɛɛ hala sɛɛyelɔi yɛ Yordan bokagbɛ. Ni ana naakpɛɛ nii ni fa fe fɛɛ ni afee lɛ yɛ Mose (kɛ Yoshua) kɛ Elia (kɛ Elisha) bei lɛ amli, ja nɔ ni tee nɔ yɛ Yesu shihilɛ be mli lɛ pɛ.b

14. Yɛ mɛɛ gbɛ nɔ mɛi ni afɔ amɛ mu lɛ esɔmɔ akɛ Yehowa naawielɔ tamɔ Mose kɛ Elia?

¹⁴ Ani enɛɛmɛi fɛɛ kaiii wɔ Nyɔŋmɔ Israel lɛ? Ekaiɔ wɔ lɛlɛŋ. Yesu kɛɛ esɛɛnyiɛlɔi anɔkwafoi lɛ akɛ: “No hewɔ lɛ, nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ, mikɛ nyɛ yɛ daa kɛyashi jeŋ naagbee lɛ.” (Mateo 28:19, 20) Yɛ nɛkɛ wiemɔi nɛɛ atoiboo hewɔ lɛ, Kristofoi ni afɔ amɛ mu lɛ esɔmɔ akɛ Yehowa naawielɔ kɛjɛ Pentekoste afi 33 Ŋ.B. aahu kɛbashi bianɛ. Taakɛ Mose kɛ Elia ji lɛ, amɛkpee nɔyelɔi amlifu naa ni amɛye amɛ odase. Yesu kɛɛ ebɔfoi 12 lɛ akɛ: “Lumɛi kɛ maŋtsɛmɛi ahiɛ tete po akɛ nyɛ aaatee yɛ mihewɔ, koni aŋɔye amɛ kɛ jeŋmaji lɛ odase.” (Mateo 10:18) Ewiemɔi lɛ eba mli shii abɔ yɛ Kristofoi asafo lɛ yinɔsane be mli.—Bɔfoi lɛ Asaji 25:6, 11, 12, 24-27; 26:3.

15, 16. Mɛni yɔɔ ni je amɛhe ni kã mɛi ni afɔ amɛ mu lɛ ni yɔɔ afã kome, kɛ Mose kɛ Elia ni yɔɔ afã kroko, yɛ sane ni kɔɔ (a) shi ni adamɔɔ ahãa anɔkwale ni gbeyeishemɔ bɛ mli lɛ mli? (b) yelikɛbuamɔ ni amɛna kɛjɛ mɛi ni jeee Israelbii adɛŋ lɛ mli?

¹⁵ Kɛfata he lɛ, Kristofoi ni afɔ amɛ mu lɛ efee mɛi ni sheee gbeyei tamɔ Mose kɛ Elia, yɛ shi ni amɛdamɔ amɛha anɔkwale ni amɛkɛte shi amɛshi jamɔ mli apasa nifeemɔi lɛ ahewɔ. Kaimɔ bɔ ni Paulo wie eshi Yudanyo apasa gbalɔ Baryesu waa, ni etsɔ ŋaa gbɛ kɛ shiŋŋ feemɔ nɔ ekpa apasa ni Ateene nyɔŋmɔi lɛ ji lɛ he mama lɛ. (Bɔfoi lɛ Asaji 13:6-12; 17:16, 22-31) Kaimɔ hu akɛ, shwɛɛnii ni afɔ amɛ mu lɛ kɛ ekãa ekpa Kristendom he mama yɛ ŋmɛnɛŋmɛnɛ beaŋ, ni odaseyeli ni tamɔ nɛkɛ lɛ ehao lɛ.—Kpojiemɔ 8:7-12.c

¹⁶ Beni Mose jo Farao mlifu naa foi lɛ, eyaná abobaahe yɛ Reuel, ni atsɛɔ lɛ hu akɛ Yetro, ni jeee Israelnyo lɛ shia. Yɛ sɛɛ mli be ko lɛ, Mose nine shɛ gbɛjianɔtoo he ŋaawoo ni sɛɛnamɔ yɔɔ he waa nɔ kɛjɛ Reuel, ni ebinuu Hobab ekudɔ Israel kɛtsɔ ŋa lɛ nɔ lɛ ŋɔɔ.d (2 Mose 2:15-22; 18:5-27; 4 Mose 10:29) Ani aŋkroaŋkroi ni jeee Nyɔŋmɔ Israel ni afɔ amɛ mu lɛ eye ebua Nyɔŋmɔ Israel lɛ mli bii nakai nɔŋŋ? Hɛɛ, “asafo babaoo” lɛ, ni ji “tooi krokomɛi” lɛ, ni pue nyɛsɛɛ nɛɛ yɛ naagbee gbii nɛɛ amli lɛ eye ebua amɛ. (Kpojiemɔ 7:9; Yohane 10:16; Yesaia 61:5) Yɛ be mli ni egbaa miishɛɛ kɛ suɔmɔ ni nɛkɛ “tooi” nɛɛ kɛaaha enyɛmimɛi ni afɔ amɛ mu lɛ efɔ̃ɔ shi lɛ, Yesu kɛɛ amɛ yɛ gbalɛ mli akɛ: “Hɔmɔ ye mi, ni nyɛha mi nii miye; kumai ye mi, ni nyɛha mi nu minu; gbɔ ji mi, ni nyɛha mibato nyɛŋɔɔ; minyiɛ yayai, ni nyɛwo mi atade; mihe ye, ni nyɛbasara mi; awo mi tsuŋ, ni nyɛba miŋɔɔ. . . . Lɛlɛŋ miikɛɛ nyɛ akɛ: Gbii abɔ kɛ̃ ni nyɛfee nyɛha minyɛmimɛi nɛɛ ateŋ bibioo kome lɛ, mi nɔŋŋ nyɛfee nyɛha lɛ.”—Mateo 25:35-40.

17. Yɛ mɛɛ gbɛ nɔ mɛi ni afɔ amɛ mu lɛ ná niiashikpamɔ ni tamɔ nɔ ni Elia ná yɛ Horeb Gɔŋ lɛ nɔ lɛ?

¹⁷ Agbɛnɛ hu, Nyɔŋmɔ Israel lɛ ná niiashikpamɔ ko ni tamɔ Elia nɔ̃ lɛ yɛ Horeb Gɔŋ lɛ nɔ.e Taakɛ Elia ji yɛ be mli ni ejoɔ Maŋnyɛ Izebel naa foi lɛ, shwɛɛnii ni afɔ amɛ mu, ni sheɔ gbeyei lɛ susu akɛ amɛ nitsumɔ lɛ eba naagbee yɛ Jeŋ Ta I be lɛ mli. Agbɛnɛ hu, taakɛ Elia ji lɛ, amɛkɛ Yehowa, ni ba koni ebakojo nakai gbɛjianɔtoi ni kɛɔ akɛ amɛji “Nyɔŋmɔ we” lɛ kpe. (1 Petro 4:17; Maleaki 3:1-3) Yɛ be mli ni ana akɛ Kristendom shɛɛɛ lɛ, ayoo shwɛɛnii ni afɔ amɛ mu lɛ akɛ “tsulɔ anɔkwafo kɛ nilelɔ lɛ,” ni ahala lɛ ato Yesu shikpɔŋ nɔ nibii fɛɛ kwa nɔ. (Mateo 24:45-47) Yɛ Horeb lɛ, Elia nu ‘gbee ko ni yɔɔ kpoo ni baa shi’ ni fee Yehowa nɔ̃, ni eeha lɛ nitsumɔ babaoo ni ebaatsu. Ta lɛ sɛɛ afii ni fee kpoo lɛ mli ni Yehowa tsuji anɔkwafoi ni afɔ amɛ mu lɛ nu egbee kɛjɛ Biblia lɛ baafai amli. Amɛ hu amɛna akɛ amɛyɛ nitsumɔ ko ni amɛbaatsu.—1 Maŋtsɛmɛi 19:4, 9-18; Kpojiemɔ 11:7-13.

18. Yɛ mɛɛ gbɛ nɔ atsɔ Nyɔŋmɔ Israel lɛ nɔ akɛ Yehowa hewalɛ lɛ kpojiemɔi ni yɔɔ naakpɛɛ eha?

¹⁸ Yɛ naagbee lɛ, ani akudɔ Yehowa hewalɛ lɛ kpojiemɔi ni ekaaa kɛtsɔ Nyɔŋmɔ Israel lɛ nɔ? Yɛ Yesu gbele sɛɛ lɛ, bɔfoi lɛ fee naakpɛɛ nii babaoo, shi enɛɛmɛi asɛɛ fo fiofio. (1 Korintobii 13:8-13) Yɛ gbii nɛɛ amli lɛ, wɔnaaa naakpɛɛ nii diɛŋtsɛ yɛ faŋŋ mli. Shi yɛ gbɛ kroko nɔ lɛ, Yesu kɛɛ esɛɛnyiɛlɔi lɛ akɛ: “Lɛlɛŋ, lɛlɛŋ, miikɛɛ nyɛ akɛ: Mɔ ni heɔ minɔ yeɔ lɛ, nitsumɔi ni mitsuɔ lɛ, lɛ hu eeetsu, ni eeetsu nii ni fe nomɛi tete.” (Yohane 14:12) Enɛ ná eklɛŋklɛŋ mlibaa beni Yesu kaselɔi lɛ shiɛ sanekpakpa lɛ kɛkpa Roma Maŋtsɛyeli lɛ mli fɛɛ yɛ klɛŋklɛŋ afii oha lɛ mli lɛ. (Romabii 10:18) Átsu nitsumɔi wuji po fe nakai ŋmɛnɛ, akɛni shwɛɛnii ni afɔ amɛ mu lɛ enyiɛ sanekpakpa lɛ shiɛmɔ hiɛ yɛ “je nɛŋ fɛɛ, ni akɛye jeŋmaji lɛ fɛɛ odase” lɛ hewɔ. (Mateo 24:14) Mɛni ejɛ mli eba? Afii ohai 20 lɛ eye Yehowa tsuji anɔkwafoi ni amɛjɔɔ amɛhe nɔ lɛ anaabuamɔ ni da fe fɛɛ yɛ yinɔsane mli lɛ he odase. (Kpojiemɔ 5:9, 10; 7:9, 10) Mɛɛ Yehowa hewalɛ lɛ he odaseyeli ni yɔɔ naakpɛɛ nɛ!—Yesaia 60:22.

Yesu Nyɛmimɛi lɛ Baa yɛ Anunyam Mli

19. Mɛɛ be anaa Yesu nyɛmimɛi ni afɔ amɛ mu lɛ kɛ lɛ yɛ anunyam mli?

¹⁹ Yɛ be mli ni Yesu nyɛmimɛi ni afɔ amɛ mu lɛ ateŋ shwɛɛnii lɛ gbeɔ amɛ shikpɔŋ nɔ nitsumɔ lɛ naa lɛ, awoɔ amɛkɛ lɛ hiɛ nyam. (Romabii 2:6, 7; 1 Korintobii 15:53; 1 Tesalonikabii 4:14, 17) No hewɔ lɛ, amɛbatsɔmɔɔ maŋtsɛmɛi kɛ osɔfoi ni gbooo yɛ ŋwɛi Maŋtsɛyeli lɛ mli. No mli lɛ, amɛaafata Yesu ni ekɛ “dadetso aaakpala [gbɔmɛi], ni eeejwara amɛ tamɔ ajwaraa sũ gbɛ́i lɛ.” (Kpojiemɔ 2:27; 20:4-6; Lala 110:2, 5, 6) Amɛkɛ Yesu baatara maŋtsɛsɛii anɔ ni amɛkojo “Israel akutsei nyɔŋma kɛ enyɔ lɛ.” (Mateo 19:28) Bɔɔ nii ni dɔmɔɔ ntsɔi lɛ kɛ hehiamɔ emɛ nɛkɛ nibii nɛɛ, ni ji “Nyɔŋmɔ bii lɛ akpojiemɔ” lɛ fã lɛ.—Romabii 8:19-21; 2 Tesalonikabii 1:6-8.

20. (a) Tsakemɔ lɛ wo Petro hemɔkɛyeli hewalɛ yɛ mɛɛ gbɛkpamɔ he? (b) Tsakemɔ lɛ woɔ Kristofoi ahewalɛ ŋmɛnɛ yɛ mɛɛ gbɛ nɔ?

²⁰ Paulo wie Yesu kpojiemɔ yɛ ‘amanehulu kpeteŋkpele’ lɛ mli lɛ he, beni eŋma akɛ: “Eeeba ni aaawo ehiɛ nyam yɛ emɛi krɔŋkrɔŋi lɛ amli, ni aaana enaakpɛɛ nii yɛ eheyelilɔi lɛ fɛɛ mli yɛ nakai gbi lɛ nɔ.” (Mateo 24:21; 2 Tesalonikabii 1:10) Mɛɛ gbɛkpamɔ ni yɔɔ nyam po enɛ ji kɛha Petro, Yakobo, Yohane, kɛ Kristofoi ni akɛ mumɔ efɔ amɛ mu lɛ fɛɛ nɛkɛ! Tsakemɔ lɛ wo Petro hemɔkɛyeli hewalɛ. Yɛ anɔkwale mli lɛ, ehe saji lɛ kanemɔ woɔ wɔ hu wɔ hemɔkɛyeli hewalɛ ni ewajeɔ wɔ hekɛnɔfɔɔ akɛ etsɛŋ ni Yesu ‘aaawo mɔ fɛɛ mɔ nyɔmɔ yɛ enitsumɔ naa.’ Anɔkwa Kristofoi ni afɔ amɛ mu ni amɛtee nɔ amɛhi shi kɛbashi bianɛ lɛ naa ni ama amɛ hekɛnɔfɔ̃ɔ lɛ nɔ mi akɛ, abaawo amɛkɛ Yesu hiɛ nyam. Áwaje tooi krokomɛi lɛ ahemɔkɛyeli yɛ nilee ni amɛyɔɔ akɛ ebaahere amɛyiwala kɛtsɔ nibii agbɛjianɔtoo fɔŋ nɛɛ naagbee lɛ mli kɛyabote anunyam jeŋ hee lɛ mli lɛ hewɔ. (Kpojiemɔ 7:14) Mɛɛ hewalɛwoo koni adamɔ shi shiŋŋ kɛyashi naagbee nɛ! Ni ninaa nɛɛ baanyɛ atsɔɔ wɔ nii babaoo, taakɛ wɔbaana yɛ nikasemɔ ni nyiɛ sɛɛ lɛ mli lɛ.

[Shishigbɛ niŋmai]

Ani Okaiɔ?

◻ Namɛi bafata Yesu he yɛ tsakemɔ lɛ mli lɛ?

◻ Tsakemɔ lɛ wo bɔfoi lɛ ahemɔkɛyeli hewalɛ yɛ mɛɛ gbɛ nɔ?

◻ Beni Mose kɛ Elia pue yɛ ‘anunyam mli’ kɛ Yesu yɛ tsakemɔ lɛ mli lɛ, namɛi amɛdamɔ shi kɛha?

◻ Mɛni nibii yɔɔ ni jejee amɛhe yɛ Mose kɛ Elia ni yɔɔ afã kome kɛ Nyɔŋmɔ Israel lɛ hu ni yɔɔ afã kroko lɛ teŋ?

[Mfoniri ni yɔɔ baafa 10]

Tsakemɔ lɛ ewaje klɛŋklɛŋ kɛ ŋmɛnɛŋmɛnɛ beaŋ Kristofoi lɛ ahemɔkɛyeli