Yesu Baa loo Ba ni Yesu Eba—Te Nɔ ni Ji?
“Mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?”—MATEO 24:3, NW.
1. Mɛni sanebimɔi tsu yɛ Yesu sɔɔmɔ lɛ mli?
BƆ NI Yesu kɛ sanebimɔi tsu nii yɛ hesaa mli lɛ ha etoibolɔi lɛ jwɛŋ, amɛsusu nibii ahe po yɛ gbɛi heei anɔ. (Marko 12:35-37; Luka 6:9; 9:20; 20:3, 4) Wɔbaanyɛ wɔda shi hu akɛ eha sanebimɔi ahetoo. Ehetooi lɛ haa anɔkwalei ni ekolɛ wɔbaleŋ loo wɔbanuŋ shishi lɛ amli feɔ faŋŋ.—Marko 7:17-23; 9:11-13; 10:10-12; 12:18-27.
2. Mɛɛ sanebimɔ esa akɛ wɔgbala wɔjwɛŋmɔ kɛya nɔ agbɛnɛ?
2 Wɔnaa sanebimɔi ni he hiaa waa ni Yesu ha hetoo lɛ ateŋ ekome yɛ Mateo 24:3. Akɛni eshikpɔŋ nɔ shihilɛ lɛ miiba naagbee hewɔ lɛ, kpaako Yesu ebɔ kɔkɔ akɛ abaakpata Yerusalem sɔlemɔtsu lɛ hiɛ, ni ebaakadi Yudafoi agbɛjianɔtoo lɛ naagbee. Mateo sane lɛ kɛfata he akɛ: “Beni eta shi yɛ Mu Gɔŋ lɛ nɔ lɛ, kaselɔi lɛ ba eŋɔɔ yɛ teemɔŋ, ni amɛkɛɛ: ‘Kɛɛmɔ wɔ, Mɛɛ be mli nibii nɛɛ baaba, ni mɛni baafee ba ni oba [“obaa,” King James Version] lɛ kɛ nibii agbɛjianɔtoo lɛ naagbee lɛ he okadi?’ ”—Mateo 24:3, NW.
3, 4. Mɛɛ sɔrɔtofeemɔ ni sa kadimɔ yɔɔ bɔ ni Bibliai tsɔɔ wiemɔ titri ko ni yɔɔ Mateo 24:3 shishi lɛ mli?
3 Biblia kanelɔi akpekpei abɔ esusu akɛ, ‘Mɛni hewɔ kaselɔi lɛ bi nakai sane lɛ, ni te esa akɛ hetoo ni Yesu ha lɛ asa mihe aha tɛŋŋ?’ Yɛ ehetoohamɔ mli lɛ, Yesu wie bɔ ni baai baapue aha ni tsɔɔ akɛ latsaa be “eshɛ eta” [ebɛŋkɛ]. (Mateo 24:32, 33) No hewɔ lɛ, sɔlemɔi pii tsɔɔ akɛ, bɔfoi lɛ miibi Yesu “baa” lɛ he okadi, okadi ni yeɔ odase akɛ esɛɛkuu lɛ miihe aba. Amɛheɔ amɛyeɔ akɛ ‘ebaa’ lɛ baafee be pɔtɛɛ ni eŋɔɔ Kristofoi kɛyaa ŋwɛi, koni agbɛnɛ ekɛ je lɛ naagbee aba. Ani oheɔ oyeɔ akɛ enɛ ja?
4 Yɛ nɔ najiaŋ ni akɛ “baa” aaatsu nii lɛ, Biblia shishitsɔɔmɔi komɛi ni New World Translation of the Holy Scriptures lɛ fata he lɛ kɛ wiemɔ, “ba ni oba” tsuɔ nii. Ani eeenyɛ efee akɛ, nɔ ni kaselɔi lɛ bi he sane lɛ kɛ hetoo ni Yesu ha lɛ yɛ sɔrɔto yɛ nɔ ni atsɔɔ yɛ sɔlemɔi lɛ amli lɛ he? Mɛni diɛŋtsɛ abi lɛ? Ni mɛɛ hetoo Yesu kɛha?
Mɛni Amɛbiɔ Lɛ?
5, 6. Mɛɛ sane naa wɔbaanyɛ wɔmu yɛ bɔfoi lɛ ajwɛŋmɔ he, beni amɛbi sane ni wɔkane yɛ Mateo 24:3 lɛ?
5 Yɛ nɔ ni Yesu wie yɛ sɔlemɔtsu lɛ he lɛ hewɔ lɛ, eeenyɛ eba akɛ kaselɔi lɛ miisusu Yudafoi agbɛjianɔtoo lɛ he, beni amɛbi ‘ba ni eba [loo, ‘ebaa’] lɛ kɛ nibii agbɛjianɔtoo [yɛ faŋŋ mli lɛ, “yinɔ”] lɛ he okadi’ lɛ.—Okɛ “je lɛ” ni yɔɔ 1 Korintobii 10:11 kɛ Galatabii 1:4, KJ lɛ ato he.
6 Shishinumɔ fioo ko pɛ bɔfoi lɛ yɔɔ yɛ Yesu tsɔɔmɔi ni kɔɔ enɛ he lɛ he. Amɛsusu kɛjɛ shishijee akɛ, “amrɔ lɛ nɔŋŋ Nyɔŋmɔ maŋtsɛyeli lɛ baapue.” (Luka 19:11; Mateo 16:21-23; Marko 10:35-40) Ni yɛ be mli ni ekɛ amɛ egba sane yɛ Mu Gɔŋ lɛ nɔ po sɛɛ, shi dani akɛ mumɔ krɔŋkrɔŋ aaafɔ amɛ mu lɛ, amɛbi kɛji akɛ Yesu miito Maŋtsɛyeli lɛ ama shi aha Israel yɛ nakai be lɛ mli.—Bɔfoi lɛ Asaji 1:6.
7. Mɛni hewɔ bɔfoi lɛ bi Yesu sane yɛ ewɔsɛɛ be mli nitsumɔ he lɛ?
7 Kɛlɛ, amɛle akɛ ebaaya, ejaakɛ etsɛko tsɔ̃ ni ekɛɛ amɛ akɛ: “Be kukuoo kɛkɛ eshwɛ eha la lɛ yɛ nyɛteŋ. Gbii abɔ ni nyɛyɔɔ la lɛ nɛɛ, nyɛnyiɛa.” (Yohane 12:35; Luka 19:12-27) No hewɔ lɛ, amɛbaanyɛ ni amɛsusu diɛŋtsɛ akɛ, ‘Kɛji akɛ Yesu baaya lɛ, te wɔɔfee tɛŋŋ wɔyoo esɛɛkuu lɛ?’ Beni epue akɛ Mesia lɛ, mɛi pii yooo lɛ. Ni yɛ nɔ ni fe afi sɛɛ lɛ, atee nɔ abibii saji yɛ nɔ ni Mesia lɛ baafee lɛ ni eeeha fɛɛ aba mli lɛ he. (Mateo 11:2, 3) No hewɔ lɛ, bɔfoi lɛ yɛ nɔ ni amɛaadamɔ nɔ amɛbi sane yɛ wɔsɛɛ be he. Shi, shikome ekoŋŋ lɛ, ani amɛmiibi okadi ni tsɔɔ akɛ etsɛŋ ni ebaaba, aloo amɛmiibi nɔ kroko ni yɔɔ sɔrɔto?
8. Mɛɛ wiemɔ eeenyɛ eba akɛ bɔfoi lɛ kɛ Yesu wieɔ lɛ?
8 Susumɔ ohe akɛ oji loofɔlɔ ko ni miibo Mu Gɔŋ lɛ nɔ sanegbaa lɛ toi. (Okɛto Jajelɔ 10:20 he.) Kulɛ obaanu ni Yesu kɛ bɔfoi lɛ miiwie Hebri. (Marko 14:70; Yohane 5:2; 19:17, 20; Bɔfoi lɛ Asaji 21:40) Ni kɛlɛ, eeenyɛ efee akɛ amɛle Hela wiemɔ lɛ hu.
Nɔ ni Mateo Ŋma —Yɛ Hela Wiemɔ Mli
9. Mɛni nɔ ŋmɛnɛŋmɛnɛ beaŋ Mateo shishitsɔɔmɔi pii damɔ?
9 Saji ni aŋmala ashwie shi ni yaa sɛɛ kɛyashɛɔ afii ohai enyɔ Ŋ.B. lɛ nɔ lɛ tsɔɔ akɛ, Mateo ŋma e-Sanekpakpa lɛ yɛ Hebri mli klɛŋklɛŋ. Eyɛ faŋŋ akɛ eŋma yɛ Hela mli yɛ sɛɛ mli. Niŋmaai ni akɛ niji ŋmala yɛ Hela mli lɛ babaoo ehi shi kɛbashɛ wɔbe nɛɛ mli, ni akɛtsu nii akɛ nɔ ni adamɔɔ nɔ atsɔɔ e-Sanekpakpa lɛ shishi kɛyaa ŋmɛnɛŋmɛnɛ wiemɔi amli. Mɛni Mateo ŋma yɛ Hela mli yɛ nakai sanegbaa ni tee nɔ yɛ Mu Gɔŋ lɛ nɔ lɛ he? Mɛni eŋma yɛ “baa” loo “ba ni oba” ni kaselɔi lɛ bi he sane, ni Yesu wie he lɛ he?
10. (a) Mɛɛ Hela wiemɔ kɛha “ba” Mateo fɔɔ kɛ nitsumɔ, ni mɛɛ shishinumɔi ebaanyɛ ená? (b) Mɛɛ Hela wiemɔ kroko ayɔɔ he miishɛɛ?
10 Wɔnaa Hela feemɔ wiemɔ ni ale waa kɛha “ba,” ni ji erʹkho·mai lɛ fe shii 80, yɛ Mateo wolo lɛ klɛŋklɛŋ yitsei 23 lɛ amli. Jwɛŋmɔ ni etsɔɔ yɛ bei pii amli ji nɔ ko ni miiba loo eebɛŋkɛ, taakɛ eyɔɔ Yohane 1:47 lɛ: ‘Yesu na Natanael miiba eŋɔɔ.’ Feemɔ wiemɔ erʹkho·mai baanyɛ atsɔɔ “eshɛ shi,” “nyɛyaa,” “yashɛ,” “shɛ,” loo “yiŋ tee,” ni fɛɛ damɔ bɔ ni akɛtsuɔ nii ahaa lɛ nɔ. (Mateo 2:8, 11; 8:28; Yohane 4:25, 27, 45; 20:4, 8; Bɔfoi lɛ Asaji 8:40; 13:51) Shi, Mateo kɛ wiemɔ kroko, wiemɔ ni anaaa yɛ Sanekpakpai lɛ amli: pa·rou·siʹa, tsu nii yɛ Mateo 24:3, 27, 37, 39. Akɛni Nyɔŋmɔ kɛ emumɔ kanya Biblia lɛ ŋmaa hewɔ lɛ, mɛni hewɔ etsirɛ Mateo koni ehala Hela wiemɔ nɛɛ yɛ nɛkɛ kukuji nɛɛ amli, beni eŋmaa e-Sanekpakpa lɛ yɛ Hela wiemɔ mli lɛ? Mɛni ji eshishinumɔ, ni mɛni hewɔ wɔbaasumɔ akɛ wɔle?
11. (a) Mɛɛ shishinumɔ yɔɔ pa·rou·siʹa mli? (b) Nɔkwɛmɔ nii ni jɛ Josephus niŋmaai amli lɛ maa shishinumɔ ni wɔhiɛ yɛ pa·rou·siʹa he lɛ nɔ mi yɛ mɛɛ gbɛ nɔ? (Kwɛmɔ shishigbɛ niŋmaa.)
11 Kɛ aaawie he pɔtɛɛ lɛ, pa·rou·siʹa shishi ji “ba ni oba.” Expository Dictionary of New Testament Words ni Vine fee lɛ kɛɔ akɛ: “PAROUSIA, . . . shishi diɛŋtsɛ ji, ba ni aba, para, kɛ agbɛnɛ, ousia, ni (jɛ eimi, ayɛ) mli, ni etsɔɔ shishɛɛ kɛ ba ni aba fɛɛ. Akɛ nɔkwɛmɔ nɔ lɛ, awula ko wie bɔ ni e-parousia he hiaa yɛ he ko bɔni afee ni eyatsu saji ni kɔɔ enibii ahe lɛ he nii yɛ wolo ko ni akɛ papyrus fee nɔ.” Wiemɔi komekomei ashishitsɔɔmɔ woji krokomɛi tsɔɔ mli akɛ, pa·rou·siʹa damɔ shi kɛha ‘nɔyelɔ ko ni eba saramɔ.’ No hewɔ lɛ, ejeee be ni ebashɛ shi lɛ kɛkɛ, shi ba ni eba ni jeɔ shishi kɛjɛɔ eshishɛɛ be lɛ nɔ kɛyaa. Nɔ ni yɔɔ miishɛɛ ji akɛ, nakai ji bɔ ni Yudanyo yinɔsaneŋmalɔ Josephus, ni hi shi yɛ bɔfoi lɛ abeaŋ kɛ pa·rou·siʹa tsu nii.a
12. Yɛ mɛɛ gbɛ nɔ Biblia lɛ diɛŋtsɛ yeɔ ebuaa wɔ ni wɔmaa pa·rou·siʹa shishinumɔ lɛ nɔ mi?
12 “Ba ni eba” shishinumɔ lɛ jeɔ kpo faŋŋ yɛ blema woji amli, ni kɛlɛ Kristofoi yɛ miishɛɛ titri yɛ bɔ ni Nyɔŋmɔ Wiemɔ lɛ kɛ pa·rou·siʹa tsuɔ nii ehaa lɛ he. Hetoo lɛ tamɔ nakai nɔŋŋ—ba ni eba. Wɔnaa nakai kɛjɛɔ nɔkwɛmɔ nii ni yɔɔ Paulo woji lɛ amli lɛ amli. Akɛ nɔkwɛmɔ nɔ lɛ, eŋma Filipibii lɛ akɛ: “Taakɛ bɔ ni nyɛboɔ toi daa nɛɛ, jeee beni mikɛ nyɛ yɔɔ lɛ kɛkɛ, shi moŋ titri lɛ, agbɛnɛ ni mibɛ nyɛŋɔɔ nɛɛ hu lɛ: nyɛkɛ gbeyeishemɔ kɛ hekpokpomɔ atsua nyɛ yiwalaheremɔ lɛ he nii.” Ewie hu akɛ ekɛ amɛ baahi shi koni amɛmli afili amɛ “yɛ kpe ni [ekɛ amɛ] bakpe [pa·rou·siʹa] ekoŋŋ lɛ hewɔ.” (Filipibii 1:25, 26; 2:12, NW) Shishitsɔɔmɔi krokomɛi kaneɔ akɛ, “akɛni miyɔɔ nyɛŋɔɔ ekoŋŋ” (Weymouth; New International Version); “beni miyɔɔ nyɛ masɛi ekoŋŋ” (Jerusalem Bible; New English Bible); kɛ “beni nyɛnine eshɛ minɔ ekoŋŋ yɛ nyɛteŋ lɛ.” (Twentieth Century New Testament) Paulo kɛ “be mli ni lɛ diɛŋtsɛ eyɛ” lɛ to be mli ni “ebɛ” lɛ he yɛ 2 Korintobii 10:10, 11. Anaa faŋŋ kɛjɛɔ nɔkwɛmɔ nii nɛɛ amli akɛ, jeee beni ebɛŋkɛɔ loo eshɛɔ shi he ewieɔ lɛ; ekɛ pa·rou·siʹa tsu nii kɛ shishinumɔ akɛ eyɛ jɛmɛ.b (Okɛto 1 Korintobii 16:17 he.) Ni wiemɔi ni kɔɔ Yesu pa·rou·siʹa lɛ he lɛ hu? Ani amɛ shishinumɔ kɔɔ ‘ebaa’ lɛ he, aloo amɛtsɔɔ ba ni eba yɛ be kpalaŋŋ mli?
13, 14. (a) Mɛni hewɔ esa akɛ wɔmu sane naa akɛ pa·rou·siʹa kɔɔ be kpalaŋŋ he? (b) Mɛni esa akɛ awie yɛ Yesu pa·rou·siʹa lɛ sɛɛkɛlɛ he?
13 Kristofoi ni akɛ mumɔ efɔ amɛ mu ni yɔɔ Paulo gbii lɛ amli lɛ yɛ Yesu pa·rou·siʹa lɛ he miishɛɛ. Shi Paulo bɔ amɛ kɔkɔ akɛ amɛkaha ‘ahoso amɛ kɛmiijɛ amɛ jwɛŋmɔ lɛ he.’ Klɛŋklɛŋ lɛ, esa akɛ “mlakwamɔ gbɔmɔ lɛ,” ni ji Kristendom osɔfoi lɛ apue. Paulo ŋma akɛ, “mlakwalɔ lɛ ba ni eba lɛ baa yɛ Satan nitsumɔ naa kɛ hewalɛ nitsumɔi fɛɛ kɛ amale okadii amli.” (2 Tesalonikabii 2:2, 3, 9, NW) Eyɛ faŋŋ akɛ, “mlakwamɔ gbɔmɔ lɛ” pa·rou·siʹa, loo ba ni eba lɛ, jeee eshishɛɛ ko kɛkɛ ni hoɔ eyaa nɔŋŋ; shi ebaahi shi yɛ be kpalaŋŋ ko mli, ni abaafee amale okadii yɛ nɛkɛ be nɛɛ mli. Mɛni hewɔ enɛ tsɔɔ nɔ̃ ko ni sa kadimɔ lɛ?
14 Susumɔ kuku ni tsɔ no hiɛ lɛ he: “Abaajie mlakwalɔ lɛ kpo, mɔ ni Nuntsɔ Yesu kɛ edaaŋ mumɔ lɛ aaagbe lɛ lɛ, ni ekɛ ba ni eba lɛ puemɔ lɛ aaakpata ehiɛ lɛ.” Taakɛ bɔ ni “mlakwamɔ gbɔmɔ lɛ” ba ni eba lɛ baaya nɔ yɛ be kpalaŋŋ mli lɛ, ba ni Yesu eba lɛ hu mli baakpã kɛyashi be ko, ni ebaaba naagbee yɛ nakai mlakwalɔ ni ji “hiɛkpatamɔ bi” lɛ hiɛkpatamɔ lɛ mli.—2 Tesalonikabii 2:8, NW.
Hebri-Wiemɔ Shishinumɔ Gbɛfaŋ
15, 16. (a) Mɛɛ wiemɔ pɔtɛɛ akɛtsu nii yɛ Mateo shishitsɔɔmɔi pii ni afee kɛba Hebri wiemɔ mli lɛ mli? (b) Te akɛ bohʼ tsu nii yɛ Ŋmalɛi lɛ amli aha tɛŋŋ?
15 Taakɛ wɔkadi lɛ, eyɛ faŋŋ akɛ Mateo ŋma e-Sanekpakpa lɛ yɛ Hebri wiemɔ mli klɛŋklɛŋ. No hewɔ lɛ, mɛɛ Hebri wiemɔ ekɛtsu nii yɛ Mateo 24:3, 27, 37, 39? Mateo shishitsɔɔmɔi krokomɛi ni afee yɛ ŋmɛnɛŋmɛnɛ Hebri mli lɛ yɛ feemɔ wiemɔ lɛ su ko ni ji bohʼ, yɛ bɔfoi lɛ asanebimɔ lɛ kɛ Yesu hetoo lɛ fɛɛ mli. Enɛ baaha akane amɛ nɛkɛ: “Mɛni ji o[bohʼ] lɛ kɛ nibii agbɛjianɔtoo lɛ naagbee lɛ he okadi?” kɛ, “Shi bɔ ni Noa gbii lɛ fee lɛ, nakai gbɔmɔ bi lɛ [bohʼ] lɛ hu baatamɔ.” (Mateo 24:3, 37) Mɛni ji bohʼ shishinumɔ?
16 Eyɛ mli akɛ ehiɛ shishinumɔi sɔrɔtoi moŋ, shi Hebri feemɔ wiemɔ bohʼ lɛ shishinumɔ titri ji “ba.” Theological Dictionary of the Old Testament lɛ kɛɔ akɛ: ‘Epueɔ shii 2,532, ni bohʼ ji feemɔ wiemɔi ni afɔɔ kɛ nitsumɔ waa yɛ Hebri Ŋmalɛi lɛ amli lɛ ateŋ ekome, ni no titri ji feemɔ wiemɔ ni akɛtsɔɔ hetsimɔ mli.’ (1 Mose 7:1, 13; 2 Mose 12:25; 28:35; 2 Samuel 19:30; 2 Maŋtsɛmɛi 10:21; Lala 65:3; Yesaia 1:23; Ezekiel 11:16; Daniel 9:13; Amos 8:11) Eji Yesu kɛ bɔfoi lɛ kɛ wiemɔ ko ni eshishinumɔi fa nɛkɛ tsu nii kulɛ, abaanyɛ aje shishinumɔ lɛ he ŋwane. Shi ani amɛfee nakai?
17. (a) Mɛni hewɔ ekolɛ Mateo shishitsɔɔmɔi pii ni yɔɔ ŋmɛnɛŋmɛnɛ beaŋ Hebri mli lɛ nyɛŋ atsɔɔ nɔ ni Yesu kɛ bɔfoi lɛ kɛɛ? (b) Nɛgbɛ wɔbaanyɛ wɔna nɔ ni baaye abua ni wɔna nɔ̃ wiemɔ ni ekolɛ Yesu kɛ bɔfoi lɛ kɛtsu nii lɛ yɛ, ni mɛɛ yiŋtoo kroko haa jɛɛhe nɛɛ feɔ nɔ ni wɔnaa he miishɛɛ lɛ? (Kwɛmɔ shishigbɛ niŋmaa.)
17 Ha ahi ojwɛŋmɔ mli akɛ, nakai ŋmɛnɛŋmɛnɛ beaŋ Hebri shishitsɔɔmɔi lɛ ji shishitsɔɔmɔi ni ekolɛ amɛkɛ bɔ ni Mateo ŋma wiemɔ lɛ yɛ Hebri mli pɛpɛɛpɛ eha lɛ baŋ. Anɔkwa sane lɛ ji akɛ, Yesu baanyɛ ekɛ wiemɔ kroko atsu nii fe bohʼ, nɔ ni kɛ pa·rou·siʹa shishinumɔ yaa pɛpɛɛpɛ. Wɔnaa enɛ kɛjɛɔ 1995 wolo ni ji Hebrew Gospel of Matthew, ni Nilelɔ George Howard ŋma lɛ mli. Wolo lɛ gbala jwɛŋmɔ kɛtee afii ohai 14 lɛ mli naataomɔ, ni Yudanyo tsofafeelɔ Shem-Tob ben Isaac Ibn Shaprut kɛshi Kristojamɔ lɛ nɔ. Nakai wolo lɛ kɛ Mateo Sanekpakpa lɛ ni aŋma yɛ Hebri mli ha. Odaseyeli yɛ ni tsɔɔ akɛ, yɛ nɔ najiaŋ ni eeefee nɔ ni atsɔɔ shishi kɛjɛ Latin loo Hela ni awieɔ yɛ Shem-Tob be lɛ mli lɛ mli lɛ, nɛkɛ Mateo ŋmalɛ nɛɛ etsɛ waa, ni aŋma yɛ Hebri mli kɛjɛ shishijee.c No hewɔ lɛ, ebaanyɛ ekɛ wɔ abɛŋkɛ nɔ ni awie yɛ Mu Gɔŋ lɛ nɔ lɛ he kpaakpa.
18. Mɛɛ Hebri wiemɔ ni yɔɔ miishɛɛ Shem-Tob kɛtsu nii, ni mɛni ji eshishi?
18 Shem-Tob Mateo wolo lɛ kɛ feemɔ wiemɔ bohʼ tsuuu nii yɛ Mateo 24:3, 27, 39. Yɛ no najiaŋ lɛ, ekɛ gbɛi, bi·ʼahʹ, ni tamɔ no lɛ tsu nii. Nakai gbɛi lɛ jeɔ kpo yɛ Hebri Ŋmalɛi lɛ amli yɛ Ezekiel 8:5 pɛ, yɛ he ni eshishi ji “agbonaa.” Ni eeetsɔɔ nifeemɔ akɛ aaba lɛ, bi·ʼahʹ ni yɔɔ jɛmɛ lɛ tsɔɔ tsũ ko shishijee [agbonaa]; beni oyɔɔ agbo lɛ naa, aloo shinaa lɛ naa lɛ, belɛ oyɛ tsu lɛ mli. Agbɛnɛ hu jamɔ he woji ni jeee Biblia mli nɔ̃ ni fata Ŋshɔ ni Egbo Wolokpoi lɛ ahe lɛ fɔɔ bi·ʼahʹ kɛ nitsumɔ yɛ osɔfoi anitsumɔ shishɛɛ loo eshishijee mli. (Kwɛmɔ 1 Kronika 24:3-19; Luka 1:5, 8, 23.) Ni blema Siriak (loo, Aramaik) Peshitta ni atsɔɔ shishi kɛba Hebri mli yɛ 1986 lɛ kɛ bi·ʼahʹ tsu nii yɛ Mateo 24:3, 27, 37, 39. No hewɔ lɛ, odaseyeli yɛ ni tsɔɔ akɛ, ekolɛ gbɛi bi·ʼahʹ lɛ baanyɛ ahiɛ shishinumɔ ni yɔɔ sɔrɔto yɛ blema bei lɛ amli, ni esoro no yɛ feemɔ wiemɔ bohʼ ni akɛtsu nii yɛ Biblia lɛ mli lɛ he. Mɛni hewɔ ayɔɔ miishɛɛ yɛ enɛ he lɛ?
19. Kɛji akɛ Yesu kɛ bɔfoi lɛ kɛ bi·ʼahʹ tsu nii lɛ, te wɔbaanyɛ wɔmu sane naa wɔha tɛŋŋ?
19 Ekolɛ bɔfoi lɛ kɛ gbɛi bi·ʼahʹ nɛɛ tsu nii yɛ amɛ sanebimɔ lɛ mli, ni Yesu hu kɛtsu nii yɛ ehetoohamɔ lɛ mli. Kɛji akɛ nɔ ni yɔɔ bɔfoi lɛ ajwɛŋmɔ mli ji Yesu wɔsɛɛ be shishɛɛ kɛkɛ po lɛ, ekolɛ Kristo kɛ bi·ʼahʹ tsu nii koni ekɛ saji pii afata he fe nɔ ni amɛsusuɔ he lɛ. Yesu baanyɛ atsɔɔ beni eeeshɛ shi ni ebaje gbɛhe hee shishi; eshishɛɛ lɛ baafee enitsumɔ hee lɛ shishijee. Enɛ kɛ pa·rou·siʹa shishinumɔ ni Mateo kɛtsu nii kɛjɛ no sɛɛ kɛyaa lɛ baakpa gbee. Shishinumɔ yɛ mli akɛ, gbɛ ni atsɔɔ nɔ akɛ bi·ʼahʹ tsuɔ nii nɛkɛ lɛ baafi nɔ ni Yehowa Odasefoi etsɔɔ kɛjɛ jeeŋmɔ akɛ, “okadi” ni nibii pii yɔɔ mli ni Yesu kɛha lɛ baatsɔɔ akɛ eba lɛ sɛɛ.
Aamɛ Ba ni Eba lɛ Naagbee
20, 21. Mɛni wɔbaanyɛ wɔkase kɛjɛ nɔ ni Yesu wie yɛ Noa gbii lɛ ahe lɛ mli?
20 Esa akɛ ba ni Yesu eba lɛ he nikasemɔ akɔ wɔshihilɛ kɛ wɔ gbɛkpamɔi ahe tɛ̃ɛ. Yesu wo esɛɛnyiɛlɔi lɛ hewalɛ ni amɛha amɛhiɛ ahi amɛhe nɔ. Ekɛ okadi ha, koni anyɛ ayoo ba ni eba lɛ, eyɛ mli akɛ mɛi pii efoŋ mli: “Shi bɔ ni Noa gbii lɛ fee lɛ, nakai gbɔmɔ Bi lɛ ba ni eba lɛ hu baatamɔ. Ejaakɛ bɔ ni yɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli; ni amɛhiɛ bɛ amɛhe nɔ, kɛyashi nu afua lɛ baloo amɛ fɛɛ kɛtee lɛ, nakai nɔŋŋ gbɔmɔ Bi lɛ ba ni eba lɛ aaatamɔ.”—Mateo 24:37-39, NW.
21 Yɛ Noa gbii lɛ amli lɛ, gbɔmɛi ni hi shi yɛ nakai yinɔ lɛ mli lɛ ateŋ mɛi pii tee nɔ kɛkɛ amɛtsu amɛshihilɛ mli nitsumɔi. Yesu gba fɔ shi akɛ, nakai nɔŋŋ “gbɔmɔ Bi lɛ ba ni eba” (NW) lɛ baatamɔ. Ekolɛ gbɔmɛi ni ebɔle Noa he lɛ baanu he akɛ nɔ ko nɔ ko baŋ. Ole nɔ ni ba diɛŋtsɛ. Nakai gbii lɛ, ni he be kpalaŋŋ lɛ, ba naagbee, “nu afua lɛ baloo amɛ fɛɛ kɛtee.” Luka kɛ sane ni tamɔ nakai nɔŋŋ, ni Yesu kɛ “Noa gbii lɛ” to “gbɔmɔ Bi lɛ gbii lɛ” (NW) he ha. Yesu wo ŋaa akɛ: “Nakai nɔŋŋ kɛ̃ baaba gbi ni aaajie gbɔmɔ Bi lɛ kpo lɛ.”—Luka 17:26-30, NW.
22. Mɛni hewɔ esa akɛ wɔnya Yesu gbalɛ ni yɔɔ Mateo yitso 24 lɛ he titri lɛ?
22 Enɛɛmɛi fɛɛ kɛ shishinumɔ krɛdɛɛ ko haa wɔ, ejaakɛ be ni wɔnaa nibii ni Yesu gba fɔ shi lɛ amli wɔyɔɔ lɛ—tai, shikpɔŋ hosomɔi, tsɛŋemɔ helai, hɔmɔ, kɛ ekaselɔi lɛ ayiwaa. (Mateo 24:7-9; Luka 21:10-12) Ana shihilɛi ni tamɔ nɛkɛ, kɛjɛ tawuu ni ayoo lɛ kɛ gbɛi, Jeŋ Ta I, ni tsake yinɔsane mli kɛbaa nɛɛ, eyɛ mli akɛ gbɔmɛi pii buɔ enɛɛmɛi akɛ yinɔsane ni yɔɔ lɛ fãi komɛi kɛkɛ. Shi, anɔkwa Kristofoi nuɔ saji ni sa kadimɔ ni tamɔ nɛkɛ shishi, tamɔ bɔ ni gbɔmɛi ni hiɛ yɔɔ amɛhe nɔ lɛ nuɔ agbamitso ni fũɔ baai shishi akɛ latsaa-be ebɛŋkɛ lɛ. Yesu wo ŋaa akɛ: “Nakai nɔŋŋ hu, beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ eta.”—Luka 21:31.
23. Yesu wiemɔi ni yɔɔ Mateo yitso 24 lɛ hiɛ shishinumɔ krɛdɛɛ ko kɛha namɛi, ni mɛni hewɔ?
23 Yesu ha hetoo ni eha yɛ Mu Gɔŋ lɛ nɔ lɛ mli babaoo kɔ esɛɛnyiɛlɔi lɛ ahe. Amɛji mɛi ni baaná yiwalaheremɔ nitsumɔ ni ji sanekpakpa lɛ shiɛmɔ, yɛ shikpɔŋ muu lɛ fɛɛ nɔ, dani naagbee lɛ aba lɛ mli gbɛfaŋnɔ. Amɛji mɛi ni baana “amaŋfɔ nihii nii . . . lɛ akɛ ema he krɔŋkrɔŋ lɛ.” Amɛ amɛbaatsu he nii kɛtsɔ ‘foijee’ nɔ dani amanehulu babaoo lɛ aba. Ni amɛbaafee mɛi ni wiemɔi ni ekɛfata he nɛɛ baakɔ amɛhe titri: “Ni kɛ afooo no gbii lɛ anɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ, aaafo no gbii lɛ anɔ kpitioo.” (Mateo 24:9, 14-22) Shi, mɛni kwraa nakai wiemɔi ni biɔ hiɛshikamɔ waa lɛ tsɔɔ, ni mɛni hewɔ abaanyɛ akɛɛ akɛ, amɛkɛ nɔdaamɔ nɔ ni baaha wɔna miishɛɛ, hekɛnɔfɔɔ, kɛ ekãa babaoo haa wɔ bianɛ lɛ? Mateo 24:22 he nikasemɔ ni nyiɛ sɛɛ lɛ kɛ hetooi lɛ baaha.
[Shishigbɛ niŋmai]
a Nɔkwɛmɔ nii ni jɛ Josephus: Yɛ Sinai Gɔŋ lɛ nɔ lɛ, sarawai ni gbala kɛ nugbɔshiimɔi “tswa adafi akɛ Nyɔŋmɔ yɛ jɛmɛ [pa·rou·siʹa].” Naakpɛɛ nifeemɔi ni je kpo yɛ kpeebuu lɛ mli lɛ “tsɔɔ ba ni Nyɔŋmɔ eba [pa·rou·siʹa] jɛmɛ.” Nyɔŋmɔ “jie ehewalɛ kɛ ba ni eba [pa·rou·siʹa] kpo etsɔɔ etsulɔ lɛ” kɛtsɔ shwiilii ni bɔleɔ shi lɛ ni ekɛtsɔɔ Elisha tsulɔ lɛ nɔ. Beni Roma maŋ onukpa Petronius bɔ mɔdɛŋ ni ejɔɔ Yudafoi lɛ ahe lɛ, Josephus kɛɛ akɛ, ‘Nyɔŋmɔ jie ba ni eba [pa·rou·siʹa] kpo etsɔɔ Petronius,’ kɛtsɔ nugbɔ ni etsu kɛba lɛ nɔ. Josephus kɛ pa·rou·siʹa etooo nɔ ko ni miiba kɛkɛ loo nɔ ko ni ba fioo he. Etsɔɔ nɔ ko ni miiya nɔ, ba ni aba po ni anaaa. (2 Mose 20:18-21; 25:22; 3 Mose 16:2; 2 Maŋtsɛmɛi 6:15-17)—Okɛto Antiquities of the Jews, Book 3, yitso 5, kuku 2 [80]; yitso 8, kuku 5 [202]; Book 9, yitso 4, kuku 3 [55]; Book 18, yitso 8, kuku 6 [284] he.
b E. W. Bullinger tsɔɔ yɛ ewolo, A Critical Lexicon and Concordance to the English and Greek New Testament lɛ mli akɛ, pa·rou·siʹa shishi ji ‘jɛmɛ ni ayɔɔ, no hewɔ lɛ, ba ni aba, shishɛɛ; baa ko ni jwɛŋmɔ ni fata he ji abaahi shi kwraa kɛjɛ nakai baa lɛ nɔ kɛyaa.’
c Odaseyeli kome ji akɛ, Hebri wiemɔ, “Gbɛi Lɛ,” ni aŋmala fɛɛ loo afo lɛ kuku shii 19 yɛ mli. Nilelɔ Howard ŋma akɛ: “Nyɔŋmɔ Gbɛi lɛ kanemɔ yɛ Kristofoi awolo ni Yudanyo naataolɔ tsɛ wiemɔ kɛjɛ mli lɛ sa kadimɔ. Kɛji akɛ enɛ ji Hebri shishitsɔɔmɔ ni afee kɛjɛ Hela loo Latin Kristofoi awolo mli lɛ, kulɛ nɔ ni mɔ ko baakpa gbɛ akɛ eeena ji adonai [Nuntsɔ] yɛ ŋmalɛ lɛ mli, shi jeee okadi kɛha gbɛi krɔŋkrɔŋ YHWH, ni da fe bɔ ni aaanyɛ akɛ wiemɔi atsɔɔ mli lɛ. . . . Ákɛ ekɛ gbɛi ni da fe bɔ ni aaanyɛ atsɔɔ mli lɛ aaafata he lɛ ji nɔ ko ni anyɛɛɛ atsɔɔ mli. Odaseyeli lɛ tsɔɔ waa akɛ, Shem-Tob nine shɛ e-Mateo wolo ni Nyɔŋmɔ Gbɛi yɔɔ emli ŋmalɛi lɛ amli momo lɛ nɔ, ni ákɛ, ekolɛ ebaa yi moŋ fe ni ekɛ ehe aaawo fɔ ni eeeye yɛ ejiemɔ mli lɛ mli.” New World Translation of the Holy Scriptures—With References lɛ kɛ Shem-Tob Mateo wolo (J2) lɛ tsuɔ nii akɛ nɔ ni fiɔ gbɛi krɔŋkrɔŋ lɛ sɛɛ yɛ Kristofoi a-Hela Ŋmalɛi lɛ amli.
Te Obaaha Hetoo Oha Tɛŋŋ?
◻ Mɛni hewɔ ehe hiaa ni wɔna sɔrɔtofeemɔ ni yɔɔ bɔ ni Bibliai tsɔɔ Mateo 24:3 shishi amɛhaa lɛ mli?
◻ Mɛni ji wiemɔ, pa·rou·siʹa shishi, ni mɛni hewɔ enɛ he hiaa wɔ lɛ?
◻ Mɛɛ egbɔyeli ko baanyɛ ahi Mateo 24:3 yɛ Hela kɛ Hebri wiemɔ mli?
◻ Mɛni titri ni kɔɔ be he, ehe hiaa ni wɔle, koni wɔnu Mateo yitso 24 shishi?
[Mfoniri ni yɔɔ baafa 10]
Mu Gɔŋ lɛ, ni ajɛɔ jɛmɛ anaa Yerusalem lɛ