Anɔkwayeli ni Akɛaafĩ Nyɔŋmɔ Wiemɔ ni Jɛ Mumɔŋ lɛ Sɛɛ
“Wɔgu hiɛgbejianii ni aŋɔtee lɛ, ni wɔbaaa wɔjeŋ yɛ kutumpɔo mli, ni asaŋ wɔfutuuu Nyɔŋmɔ wiemɔ lɛ.”—2 KORINTOBII 4:2.
1. (a) Mɛni ji nɔ ni he bahia bɔni afee ni atsu nitsumɔ ni atsɔɔ yɛ Mateo 24:14 kɛ 28:19, 20 lɛ he nii? (b) Nɛgbɛ aná Biblia lɛ yɛ gbɔmɛi lɛ awiemɔi amli kɛyashɛ beni naagbee gbii lɛ je shishi lɛ?
YESU KRISTO gba efɔ̃ shi yɛ egbalɛ kpeteŋkpele ni kɔɔ beni eba enɔyeli lɛ mli lɛ kɛ nibii agbɛjianɔtoo momo nɛɛ naagbee lɛ he akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” Ewo esɛɛnyiɛlɔi lɛ ŋaa hu akɛ: “Nyɛyafea jeŋmaji fɛɛ mikaselɔi, . . . ni nyɛtsɔɔa amɛ ni amɛye nii fiaa ni mikɛɛ nyɛ lɛ nɔ.” (Mateo 24:14; 28:19, 20) Nɔ ni fata nakai gbalɛi lɛ amlibaa he ji nitsumɔ babaoo ni atsuɔ yɛ Biblia lɛ shishitsɔɔmɔ kɛ ekalamɔ mli, yɛ mɛi ni atsɔɔ amɛ nɔ ni no tsɔɔ lɛ mli, kɛ yelikɛbuamɔ ni akɛhaa amɛ koni amɛkɛtsu nii yɛ amɛ shihilɛi amli. Mɛɛ hegbɛ eji nɛkɛ akɛ aaaná nitsumɔ ni tamɔ nɛkɛ mli gbɛfaŋnɔ! Beni shɛɔ 1914 lɛ, no mli lɛ akala Biblia lɛ loo efã ko yɛ wiemɔi 570 amli momo. Shi kɛjɛ no sɛɛ kɛbaa nɛɛ akɛ wiemɔi krokomɛi ohai abɔ kɛ wiemɔi bibii babaoo efata he, ni átsɔɔ nɔ ni fa fe ekome shishi kɛtee wiemɔi babaoo mli.a
2. Mɛɛ jwɛŋmɔi sɔrɔtoi ená Biblia shishitsɔɔlɔi kɛ woloŋmalɔi anitsumɔ lɛ nɔ hewalɛ?
2 Eji nitsumɔ ni wa akɛ wiemɔ shishitsɔɔlɔ fɛɛ shishitsɔɔlɔ aaatsɔɔ sane ni yɔɔ wiemɔ kome mli lɛ shishi ni eha mɛi ni kaneɔ wiemɔ kroko ni amɛnuɔ lɛ anu shishi. Biblia shishitsɔɔlɔi komɛi kɛ henɔkwɛmɔ jogbaŋŋ diɛŋtsɛ etsu nii akɛ nɔ ni amɛtsɔɔ shishi lɛ ji Nyɔŋmɔ Wiemɔ lɛ. Nɔ ni efee mɛi krokomɛi miishɛɛ kɛkɛ yɛ nitsumɔ lɛ he ji bɔ ni ebiɔ ni ale woloŋ jogbaŋŋ lɛ. Ekolɛ amɛsusu Biblia mli saji lɛ ahe akɛ hiŋmɛigbelemɔ mli gboshinii ko kɛkɛ ni jara wa. Yɛ mɛi komɛi agbɛfaŋ lɛ, jamɔ ji amɛ jarayeli nitsumɔ, ni wolo ni akalaa ni amɛgbɛi kã nɔ akɛ wiemɔ shishitsɔɔlɔ loo woloŋmalɔ lɛ ji shika ni amɛtaoɔ lɛ fã. Eka shi faŋŋ akɛ amɛyiŋtoi lɛ náa bɔ ni amɛtsuɔ amɛnii amɛhaa lɛ nɔ hewalɛ.
3. Te New World Bible Translation Committee lɛ buɔ enitsumɔ lɛ ehaa tɛŋŋ?
3 Nɔ ni sa kadimɔ ji wiemɔ ni New World Bible Translation Committee lɛ wie nɛɛ akɛ: “Ŋmalɛi Krɔŋkrɔŋi lɛ ashishitsɔɔmɔ tsɔɔ akɛ ni aaatsɔɔ Yehowa Nyɔŋmɔ susumɔi kɛ wiemɔi lɛ ashishi kɛya wiemɔ kroko mli . . . Eji susumɔ ni hiɛdɔɔ yɔɔ mli waa. Wolo nɛɛ shishitsɔɔlɔi ni sheɔ Ŋmalɛi Krɔŋkrɔŋi lɛ Feelɔ ni Yɔɔ Ŋwɛi lɛ gbeyei ni amɛsumɔɔ lɛ lɛ nuɔ he akɛ, gbɛnaa nii krɛdɛɛ ko kã amɛnɔ yɛ E-hiɛ, ákɛ amɛkɛ esusumɔi kɛ esanejajemɔi lɛ aha yɛ gbɛ ni ja jogbaŋŋ nɔ bɔ ni amɛaanyɛ. Amɛnuɔ he hu akɛ gbɛnaa nii kã amɛnɔ yɛ nikanelɔi ni taoɔ nibii amli ni kɛ amɛhe fɔɔ Ŋwɛi Flooflo Nyɔŋmɔ lɛ Wiemɔ ni jɛ mumɔŋ lɛ nɔ kɛha amɛnaanɔ yiwalaheremɔ lɛ hewɔ. Gbɛnaa nii ni hiɛdɔɔ yɔɔ mli ni amɛnuɔ he nɛkɛ lɛ hewɔ ni yɛ afii babaoo ni eho nɛɛ mli lɛ, ajinafoi akuu nɛɛ ni ji hii ni ejɔɔ amɛhe nɔ lɛ kɛfee New World Translation of the Holy Scriptures lɛ.” Oti ni ma ajinafoi akuu lɛ hiɛ ji ni amɛná Biblia shishitsɔɔmɔ ni baafee faŋŋ ni abaanu shishi ni baakpɛtɛ blema Hebri kɛ Hela wiemɔ lɛ he gbagbalii koni eha aná anɔkwa nilee ni daa kɛyaa hiɛ lɛ he shishitoonɔ.
Mɛni Eba Nyɔŋmɔ Gbɛi lɛ Nɔ?
4. Te Nyɔŋmɔ gbɛi lɛ he hiaa yɛ Biblia lɛ mli ehaa tɛŋŋ?
4 Biblia lɛ yiŋtoi titrii lɛ ateŋ ekome ji ni eye ebua gbɔmɛi koni amɛbale anɔkwa Nyɔŋmɔ lɛ. (2 Mose 20:2-7; 34:1-7; Yesaia 52:6) Yesu Kristo tsɔɔ esɛɛnyiɛlɔi lɛ koni amɛsɔle akɛ e-Tsɛ gbɛi lɛ “he atse,” ahiɛ lɛ krɔŋkrɔŋ, loo akɛ krɔŋkrɔŋfeemɔ atsu he nii. (Mateo 6:9) Nyɔŋmɔ ha akɛ lɛ diɛŋtsɛ egbɛi wo Biblia lɛ mli nɔ ni fe shii 7,000. Eesumɔ ni gbɔmɛi ale nakai gbɛi lɛ kɛ Mɔ ni atsɛɔ lɛ nakai lɛ sui.—Maleaki 1:11.
5. Te wiemɔ shishitsɔɔlɔi sɔrɔtoi etsɔɔ ŋwɛi gbɛi lɛ shishi amɛha tɛŋŋ?
5 Biblia shishitsɔɔlɔi babaoo ejie anɔkwa bulɛ kpo amɛtsɔɔ ŋwɛi gbɛi lɛ ni amɛkɛtsu nii pɛpɛɛpɛ yɛ amɛwoji lɛ amli. Shishitsɔɔlɔi komɛi sumɔɔ Yahweh kɛ nitsumɔ. Mɛi krokomɛi hu ehala ŋwɛi gbɛi lɛ su ko ni akɛtsuɔ nii yɛ amɛ diɛŋtsɛ amɛ wiemɔ lɛ mli, yɛ be mli ni amɛkɛ nɔ ni jeɔ kpo yɛ Hebri ŋmalɛ lɛ mli lɛ tsuɔ nii yɛ faŋŋ mli lolo, bei pii lɛ gbɛi su ko ni ale jogbaŋŋ yɛ bɔ ni akɛtsu nii aahu lɛ hewɔ. New World Translation of the Holy Scriptures lɛ kɛ Yehowa tsuɔ nii shii 7,210 yɛ ŋmalɛ lɛ mli he ni esa akɛ eje kpo yɛ lɛ.
6. (a) Yɛ nyɛsɛɛ afii nɛɛ amli lɛ, mɛni wiemɔ shishitsɔɔlɔi efee yɛ ŋwɛi gbɛi lɛ he? (b) Te nifeemɔ nɛɛ egbɛ eshwa eha tɛŋŋ?
6 Eyɛ mli akɛ Biblia shishitsɔɔlɔi kɛ wɔŋjalɔi anyɔŋmɔi ni tamɔ nɛkɛ lɛ agbɛii tamɔ Baal kɛ Molek etsu nii yɛ nyɛsɛɛ afii nɛɛ amli moŋ, shi amɛkɛ oyaiyeli miijie anɔkwa Nyɔŋmɔ lɛ diɛŋtsɛ gbɛi lɛ kɛmiijɛ e-Wiemɔ ni jɛ mumɔŋ lɛ shishitsɔɔmɔi amli. (2 Mose 3:15; Yeremia 32:35) Yɛ saji tamɔ Mateo 6:9 kɛ Yohane 17:6, 26 lɛ amli lɛ, Albania shishitsɔɔmɔ ni aja waa lɛ tsɔɔ Hela wiemɔ kɛha “ogbɛi lɛ” (ni ji, Nyɔŋmɔ gbɛi lɛ) shishi kɛkɛ akɛ “bo,” tamɔ nɔ ni nakai ŋmalɛi lɛ etsĩii gbɛi ko tã kwraa. Yɛ Lala 83:19 lɛ, The New English Bible kɛ Today’s English Version lɛ jie Nyɔŋmɔ diɛŋtsɛ gbɛi kɛ wiemɔ fɛɛ wiemɔ ni tsɔɔ anɔkwale ni eji akɛ Nyɔŋmɔ yɛ gbɛi lɛ kɛjɛ mli. Eyɛ mli akɛ ŋwɛi gbɛi lɛ je kpo yɛ Hebri Ŋmalɛi lɛ shishitsɔɔmɔi memeji amli yɛ wiemɔi babaoo mli moŋ, shi bei pii lɛ shishitsɔɔmɔi heei jieɔ kɛjɛɔ mli loo amɛŋmaa amɛwoɔ woji lɛ anaabugbɛ. Nakai eji yɛ Ŋleshi wiemɔ mli kɛ wiemɔi babaoo ni yɔɔ Europa, Afrika, Amerika Wuoyigbɛ, India, kɛ Pasifik ŋshɔkpɔi anɔ lɛ amli hu.
7. (a) Te Afrika Bibliai lɛ ekomɛi ashishitsɔɔlɔi lɛ kɛ ŋwɛi gbɛi lɛ tsuɔ nii amɛhaa tɛŋŋ? (b) Te onuɔ no he ohaa tɛŋŋ?
7 Mɛi ni tsɔɔ Biblia lɛ shishi kɛyaa Afrika wiemɔi komɛi amli lɛ miiya amɛhiɛ fioo fe nakai. Yɛ nɔ najiaŋ ni amɛkɛ Ŋmalɛ naa sabala, tamɔ Nyɔŋmɔ loo Nuntsɔ aaato ŋwɛi gbɛi lɛ najiaŋ kɛkɛ lɛ, amɛkɛ gbɛi ni aná kɛjɛ amɛjamɔŋ hemɔkɛyelii amli lɛ miiwo mli. Yɛ The New Testament and Psalms in Zulu (1986 shishitsɔɔmɔ) lɛ mli lɛ, akɛ gbɛi diɛŋtsɛ ni ji (uMvelinqangi) ni Zulubii lɛ nuɔ shishi akɛ no tsɔɔ ‘blematsɛ kpeteŋkpele ni ajáa lɛ kɛtsɔɔ adesai ablematsɛmɛi anɔ’ lɛ etsu nii kɛha sabala ni ji Nyɔŋmɔ (uNkulunkulu). Sane ko ni aŋma yɛ The Bible Translator wolo tɛtrɛɛ ni je kpo yɛ October 1992 lɛ mli lɛ bɔ amaniɛ akɛ, yɛ be mli ni atoɔ Chichewa Biblia ni abaatsɛ lɛ akɛ Buku Loyera lɛ he gbɛjianɔ lɛ, no mli lɛ wiemɔ shishitsɔɔlɔi lɛ kɛ Chauta miitsu nii akɛ gbɛi diɛŋtsɛ ni baaye Yehowa lɛ najiaŋ. Sane lɛ tsɔɔ mli akɛ Chauta ji “Nyɔŋmɔ ni amɛle lɛ aahu ni amɛja lɛ lɛ.” Ni kɛlɛ, nɛkɛ gbɔmɛi nɛɛ ateŋ mɛi pii jáa nɔ ni amɛheɔ amɛyeɔ akɛ nomɛi ji gbohii lɛ amumɔi lɛ. Ani eji anɔkwale akɛ kɛ gbɔmɛi sɔle amɛha “Mɔ ni Nɔ Kwɔ Fe Fɛɛ” lɛ, kɛkɛ lɛ gbɛi fɛɛ gbɛi ni amɛkɛtsuɔ nii amɛhaa “Mɔ ni Nɔ Kwɔ Fe Fɛɛ” lɛ bafeɔ nɔ ni ja jogbaŋŋ kɛha gbɛi diɛŋtsɛ ni ji Yehowa lɛ, ni nɔ kroko ni baanyɛ akɔ amɛjamɔ lɛ he lɛ kɔɔɔ he eko? Eka shi faŋŋ akɛ dabi! (Yesaia 42:8; 1 Korintobii 10:20) Nyɔŋmɔ diɛŋtsɛ gbɛi ni akɛ nɔ kroko ni haa gbɔmɛi nuɔ he akɛ amɛ kusumii amli hemɔkɛyelii lɛ ja diɛŋtsɛ lɛ aaato najiaŋ lɛ yeee ebuaaa amɛ koni amɛbɛŋkɛ anɔkwa Nyɔŋmɔ lɛ he kpaakpa.
8. Mɛni hewɔ yiŋtoo ni Nyɔŋmɔ hiɛ akɛ eeeha ale lɛ lɛ efeko efolo lɛ?
8 Enɛɛmɛi fɛɛ tsakeko Yehowa yiŋtoo ni ehiɛ akɛ eeeha ale egbɛi lɛ, ni ehako efee efolo hu. Aaja Bibliai ni ŋwɛi gbɛi lɛ yɔɔ mli lɛ babaoo lolo yɛ wiemɔi ni yɔɔ Europa, Afrika, Amerika maji, Bokagbɛ lɛ, kɛ ŋshɔkpɔi lɛ anɔ lɛ amli. Agbɛnɛ hu Yehowa Odasefoi ni amɛyifalɛ shɛɔ 5,400,000 ni yɔɔ maji kɛ shikpɔŋkukuji 233 amli lɛ ni amɛ fɛɛ amɛkɛ nɔ ni fa fe ŋmɛlɛtswai akpekpei akpei abɔ gbaa mɛi krokomɛi anɔkwa Nyɔŋmɔ lɛ gbɛi kɛ yiŋtoo he nii afi fɛɛ afi lɛ hu yɛ. Amɛkalaa ni amɛjaa Bibliai—nɔ ni kɛ ŋwɛi gbɛi lɛ tsuɔ nii—yɛ wiemɔi ni gbɔmɛi aaashɛ 3,600,000,000 wieɔ yɛ shikpɔŋ nɔ lɛ amli, ni Ŋleshi, China, Russia, Spain, Portugal, French, kɛ Dutch wiemɔi fata he. Amɛkalaa woji hu ni akɛkaseɔ Biblia lɛ yɛ wiemɔi ni shikpɔŋ nɔ bii babaoo le lɛ amli. Etsɛŋ ni Nyɔŋmɔ diɛŋtsɛ baatsu nii yɛ gbɛ ni baaha esanejajemɔ ni tsɔɔ akɛ maji lɛ fɛɛ ‘aaaná amɛle akɛ lɛ ji Yehowa lɛ’ aba mli lɛ nɔ.—Ezekiel 38:23.
Beni Mɔ Diɛŋtsɛ Hemɔkɛyelii Náa Shishitsɔɔmɔ lɛ Nɔ Hewalɛ
9. Mɛɛ gbɛ nɔ Biblia lɛ tsɔɔ gbɛnaa nii ni hiɛdɔɔ yɔɔ mli ni kã mɛi ni kɛ Nyɔŋmɔ Wiemɔ lɛ tsuɔ nii lɛ anɔ lɛ?
9 Gbɛnaa nii ni hiɛdɔɔ yɔɔ mli kã mɛi ni tsɔɔ Nyɔŋmɔ Wiemɔ lɛ shishi lɛ kɛ mɛi ni kɛtsɔɔ nii lɛ hu nɔ. Bɔfo Paulo wie yɛ lɛ kɛ enanemɛi lɛ asɔɔmɔ nitsumɔ lɛ he akɛ: “Wɔgu hiɛgbejianii ni aŋɔtee lɛ, ni wɔbaaa wɔjeŋ yɛ kutumpɔo mli, ni asaŋ wɔfutuuu Nyɔŋmɔ wiemɔ lɛ, shi moŋ wɔkɛ anɔkwale lɛ kpojiemɔ lɛ jieɔ wɔhe wɔtsɔɔ gbɔmɛi ahenilee fɛɛ yɛ Nyɔŋmɔ hiɛ.” (2 Korintobii 4:2) Ní aaafutu lɛ tsɔɔ akɛ ni aaafite lɛ kɛtsɔ nɔ ko ni bɛ mli loo nɔ ni shɛɛɛ nakai lɛ ni akɛaawo mli lɛ nɔ. Bɔfo Paulo tamɔɔɔ Israel tookwɛlɔi ni yeee anɔkwa ni yɔɔ Yeremia gbii lɛ amli lɛ ni Yehowa kã amɛhiɛ yɛ amɛ diɛŋtsɛ amɛsusumɔi ni amɛshiɛ moŋ fe ni amɛaashiɛ nɔ ni Nyɔŋmɔ kɛɛ lɛ. (Yeremia 23:16, 22) Shi mɛni etee nɔ yɛ ŋmɛnɛŋmɛnɛ beaŋ?
10. (a) Mɛɛ gbɛ nɔ jwɛŋmɔ ni anáa lɛ ená ŋmɛnɛŋmɛnɛ wiemɔ shishitsɔɔlɔi anɔ hewalɛ moŋ fe anɔkwa ni aaaye Nyɔŋmɔ lɛ? (b) Mɛɛ gbɛnaa nii amɛkɛfɔɔ amɛhe nɔ yɛ gbɛ ni ejaaa nɔ?
10 Yɛ Jeŋ Ta II mli lɛ, Nyɔŋmɔjamɔ he nilelɔi kɛ osɔfoi ajinafoi akuu kɛ Nazi nɔyeli ni yɔɔ Germany lɛ fee ekome ni amɛfee “Kpaŋmɔ Hee” ni afee lɛ ehee ni jie saji kpakpai ni kɔɔ Yudafoi lɛ ahe, kɛ saji fɛɛ ni wieɔ Yesu Kristo ni jɛ Yudafoi aweku mli lɛ ahe lɛ kɛjɛ mli. Nyɛsɛɛ nɛɛ nɔŋŋ lɛ, shishitsɔɔlɔi ni fee The New Testament and Psalms: An Inclusive Version lɛ gba afã kɛtsɔ he kroko, ni amɛmiibɔ mɔdɛŋ ni amɛjie saji fɛɛ ni tsɔɔ akɛ Kristo gbele lɛ he gbɛnaa nii kã Yudafoi lɛ anɔ lɛ kɛjɛ mli. Nakai shishitsɔɔlɔi lɛ hu nu he akɛ nikanelɔi ni fiɔ yei ahegbɛ sɛɛ lɛ amii baashɛ amɛhe babaoo, kɛ awieee Nyɔŋmɔ he akɛ Ataa, shi moŋ akɛ Ataa-Naa kɛ agbɛnɛ kɛ awieee Yesu he akɛ Nyɔŋmɔ Bi, shi moŋ akɛ e-Gbekɛ. (Mateo 11:27) Yɛ be mli ni amɛkɛ enɛ tsuɔ nii lɛ, amɛjie ŋamɛi ni baa amɛhe shi amɛhaa amɛwumɛi kɛ toiboo ni gbekɛbii feɔ amɛhaa amɛfɔlɔi lɛ he shishitoo mla lɛ kɛjɛ mli. (Kolosebii 3:18, 20) Mɛi ni fee nakai shishitsɔɔmɔi lɛ kɛ fai shi ni bɔfo Paulo tswa akɛ ‘ekɛ nɔ ko futuŋ Nyɔŋmɔ wiemɔ lɛ’ kpãaa gbee. Amɛmiijie amɛhiɛ kɛmiijɛ nitsumɔ ni esa akɛ wiemɔ shishitsɔɔlɔ atsu lɛ nɔ, ni amɛŋɔɔ hegbɛ akɛ wolofeelɔi, ni amɛfeɔ woji ni kɛ bulɛ ni Biblia lɛ yɔɔ lɛ tsuɔ nii akɛ gbɛ ni amɛtsɔɔ nɔ amɛtsuɔ amɛ diɛŋtsɛ amɛ susumɔi ahe nii.
11. Mɛɛ gbɛ nɔ Kristendom tsɔɔmɔi lɛ teɔ shi ewoɔ nɔ ni Biblia lɛ kɛɔ yɛ susuma kɛ gbele he lɛ?
11 Bei pii lɛ Kristendom sɔlemɔi lɛ tsɔɔ akɛ adesa susuma lɛ ji mumɔ, ni ákɛ ejeɔ gbɔmɔtso lɛ mli eyaa yɛ gbele mli, ni ákɛ egbooo. Nɔ ni tamɔɔɔ nakai lɛ, Biblia shishitsɔɔmɔi memeji ni yɔɔ wiemɔi babaoo mli lɛ tsɔɔ faŋŋ akɛ susumai ji adesai, ni ákɛ susumai ji kooloi, ni ákɛ susuma lɛ gboɔ. (1 Mose 12:5; 36:6; 4 Mose 31:28; Yakobo 5:20) No eha osɔfoi lɛ ayiŋ efee amɛ kɔshikɔshi.
12. Mɛɛ gbɛ nɔ nyɛsɛɛ nɛɛ shishitsɔɔmɔi komɛi tsĩmɔɔ Biblia shishijee anɔkwalei lɛ anɔ yɛ?
12 Amrɔ nɛɛ, shishitsɔɔmɔi heei komɛi tsĩmɔɔ anɔkwalei nɛɛ anɔ. Yɛ mɛɛ gbɛ nɔ? Nɔ ni amɛfeɔ kɛkɛ ji, amɛsumɔɔɔ ni amɛtsɔɔ Hebri gbɛi neʹphesh (susuma) lɛ shishi tɛ̃ɛ yɛ ŋmalɛi kukuji komɛi amli. Yɛ 1 Mose 2:7 lɛ, ekolɛ amɛbaakɛɛ akɛ klɛŋklɛŋ nuu lɛ “bɔi shihilɛ” (yɛ “batsɔ̃ wala susuma” lɛ najiaŋ). Aloo ekolɛ amɛbaawie kooloo ni hiɛ kã he akɛ ‘bɔɔ nɔ’ moŋ fe nɔ ni amɛaawie he akɛ “susuma.” (1 Mose 1:21) Yɛ ŋmalɛi tamɔ Ezekiel 18:4, 20 mli lɛ, amɛwieɔ “gbɔmɔ lɛ” loo “mɔ aŋkro lɛ” he (moŋ fe “susuma” lɛ) akɛ egboɔ. Ekolɛ shishitsɔɔmɔi ni tamɔ nɛkɛ lɛ hi kɛha wiemɔ shishitsɔɔlɔ lɛ. Shi mɛɛ yelikɛbuamɔ amɛkɛhaa mɔ ni kɛ anɔkwayeli taoɔ anɔkwale lɛ ni Kristendom tsɔɔmɔi ni ŋmalɛ fiii sɛɛ lɛ etsɔ hiɛ etsake ejwɛŋmɔ lɛ?b
13. Mɛɛ gbɛ nɔ Biblia shishitsɔɔmɔi komɛi tsĩmɔɔ Nyɔŋmɔ yiŋtoo ni kɔɔ shikpɔŋ lɛ he lɛ nɔ yɛ?
13 Yɛ mɔdɛŋ ni wiemɔ shishitsɔɔlɔi—loo jamɔ he nitsɔɔlɔi ni tĩɔ amɛnitsumɔ lɛ mli lɛ—bɔɔ koni amɛkɛfi hemɔkɛyeli ni amɛyɔɔ akɛ gbɔmɛi kpakpai fɛɛ yaa ŋwɛi lɛ sɛɛ lɛ, amɛbaanyɛ amɛbɔ mɔdɛŋ hu ni amɛtsĩmɔ nɔ ni Biblia lɛ kɛɔ yɛ yiŋtoo ni Nyɔŋmɔ hiɛ kɛha shikpɔŋ lɛ he lɛ nɔ. Yɛ Lala 37:11 lɛ, shishitsɔɔmɔi sɔrɔtoi kaneɔ akɛ heshibalɔi lɛ anine baashɛ “shikpɔŋ lɛ” nɔ. “Shikpɔŋ” baanyɛ afee wiemɔ (ʼeʹrets) ni akɛtsu nii yɛ Hebri ŋmalɛ lɛ mli lɛ shishitsɔɔmɔ. Shi kɛlɛ, Today’s English Version (ni no adamɔ nɔ akɛtsɔɔ wiemɔi ashishi kɛtee wiemɔi babaoo amli lɛ) yaa hiɛ fe nakai. Eyɛ mli akɛ shishitsɔɔmɔ nɛɛ tsɔɔ Hela wiemɔ ge shishi akɛ “shikpɔŋ” shii 17 yɛ Mateo Sanekpakpa lɛ mli moŋ, shi yɛ Mateo 5:5 (NW) lɛ, ekɛ wiemɔ kuku ni ji “nɔ ni Nyɔŋmɔ ewo shi yɛ he” lɛ toɔ “shikpɔŋ” najiaŋ. Taakɛ eji lɛ, sɔlemɔ lɛ mli bii susuɔ ŋwɛi he. Akɛ anɔkwayeli etsɔɔɔ amɛ akɛ, Yesu Kristo wie yɛ e-Gɔŋ nɔ Shiɛmɔ lɛ mli akɛ mɛi ni he jɔ, loo heshibalɔi lɛ “baahi shikpɔŋ lɛ nɔ.”
14. Mɛɛ pɛsɛmkunya kanyamɔ jeɔ kpo faŋŋ yɛ Biblia shishitsɔɔmɔi komɛi amli?
14 Átsɔɔ Ŋmalɛi lɛ hei komɛi ashishi yɛ faŋŋ mli kɛ jwɛŋmɔ lɛ akɛ amɛaaye amɛbua shiɛlɔi koni amɛná nyɔŋgbele nyɔmɔwoo kpakpa. Eji anɔkwale akɛ Biblia lɛ kɛɔ akɛ: “Nitsulɔ lɛ, enyɔmɔwoo sa lɛ.” (1 Timoteo 5:18) Shi yɛ 1 Timoteo 5:17, he ni ekɛɔ yɛ akɛ esa akɛ “aŋɔ woo toi enyɔ awo” onukpai ni yeɔ nɔ jogbaŋŋ lɛ, woo pɛ ni amɛteŋ mɛi komɛi susuɔ akɛ esa akɛ atsĩ tã lɛ ji nɔ ni kɔɔ shika he. (Okɛto 1 Petro 5:2 he.) No hewɔ lɛ, The New English Bible lɛ kɛɔ akɛ “esa akɛ akɛ shika toi enyɔ awo amɛ,” ni Contemporary English Version lɛ kɛɔ akɛ “esa akɛ awo amɛ nyɔmɔ toi enyɔ.”
Anɔkwayeli ni Akɛfiɔ Nyɔŋmɔ Wiemɔ lɛ Sɛɛ
15. Te wɔɔnyɛ wɔfee tɛŋŋ wɔle nɔ̃ Biblia shishitsɔɔmɔi ni wɔkɛbaatsu nii?
15 Mɛni enɛɛmɛi fɛɛ tsɔɔ kɛhaa mɔ aŋkro ni kaneɔ Biblia lɛ kɛ mɛi ni kɛ Biblia lɛ tsuɔ nii kɛtsɔɔ mɛi krokomɛi anii lɛ? Yɛ wiemɔi ni akɛtsuɔ nii babaoo lɛ amli lɛ, Biblia shishitsɔɔmɔ ni fa fe ekome yɔɔ ni abaanyɛ ahala. Okɛ sɛɛyoomɔ atsu nii yɛ Biblia ni okɛbaatsu nii lɛ halamɔ mli. (Abɛi 19:8) Kɛ shishitsɔɔmɔ ko kɛ anɔkwayeli tsuuu nii yɛ mɔ ni Nyɔŋmɔ diɛŋtsɛ ji he lɛ—ni ejie egbɛi kɛjɛ e-Wiemɔ ni jɛ mumɔŋ lɛ mli yɛ yiŋtoo fɛɛ yiŋtoo hewɔ lɛ—ani eeenyɛ efee akɛ wiemɔ shishitsɔɔlɔi lɛ etsake nibii komɛi yɛ Biblia ŋmalɛ lɛ hei komɛi? Kɛ oyiŋ miifee bo kɔshikɔshi yɛ ja ni shishitsɔɔmɔ ko ja lɛ he lɛ, bɔɔ mɔdɛŋ ni okɛto shishitsɔɔmɔi memeji ahe. Kɛ Nyɔŋmɔ Wiemɔ lɛ tsɔɔlɔ ji bo lɛ, ná shishitsɔɔmɔi ni kɛ ehe kpɛtɛɔ nɔ ni yɔɔ blema Hebri kɛ Hela ŋmalɛ lɛ he gbagbalii lɛ he miishɛɛ.
16. Te wɔteŋ mɔ fɛɛ mɔ aaafee tɛŋŋ aye Nyɔŋmɔ Wiemɔ ni jɛ mumɔŋ ni wɔkɛaatsu nii lɛ anɔkwa?
16 Esa akɛ wɔteŋ mɔ fɛɛ mɔ aye Nyɔŋmɔ Wiemɔ lɛ anɔkwa. Wɔfeɔ nakai bɔ ni sa kɛtsɔɔ nɔ ni yɔɔ mli lɛ hesusumɔ nɔ, koni kɛ eeehi lɛ, wɔkɛ be ko atsu nii gbi fɛɛ gbi kɛkane Biblia lɛ. (Lala 1:1-3) Wɔfeɔ nakai kɛtsɔ nɔ ni ekɛɔ ni wɔkɛtsuɔ nii kɛmɔɔ shi yɛ wɔ diɛŋtsɛ wɔshihilɛi amli lɛ nɔ, ni wɔkaseɔ bɔ ni wɔkɛ eshishitoo mlai lɛ kɛ nɔkwɛmɔnii lɛ baatsu nii akɛ nɔdaamɔ nɔ kɛha yiŋkpɛi ni ja feemɔ. (Romabii 12:2; Hebribii 5:14) Wɔtsɔɔ akɛ wɔji mɛi ni kɛ anɔkwayeli fãa Nyɔŋmɔ Wiemɔ lɛ he kɛtsɔɔ ekãa ni wɔkɛshiɛɔ wɔtsɔɔ mɛi krokomɛi lɛ nɔ. Wɔfeɔ nakai hu akɛ tsɔɔlɔi kɛtsɔ Biblia lɛ ni wɔkɛtsuɔ nii jogbaŋŋ lɛ nɔ, koni wɔkatsɔ̃mɔ nɔ ni ekɛɔ lɛ loo wɔkɛ eko fata he bɔ ni baasa wɔsusumɔi. (2 Timoteo 2:15) Nɔ ni Nyɔŋmɔ egba efɔ̃ shi lɛ baaba mli kɛ̃. Eyeɔ e-Wiemɔ ni ehaa ebaa mli lɛ anɔkwa. Eba akɛ wɔkɛ anɔkwayeli aaafi sɛɛ.
[Shishigbɛ niŋmai]
a United Bible Societies lɛ to wiemɔi kɛ wiemɔi bibii 2,167 ni ákala Biblia muu lɛ loo efã ko yɛ mli lɛ naa yɛ 1997 mli. Wiemɔi komɛi amli wiemɔi bibii babaoo fata yibɔ nɛɛ he.
b Nɛkɛ sanegbaa nɛɛ gbalaa jwɛŋmɔ kɛyaa wiemɔi ni baanyɛ aha sane lɛ afee faŋŋ, ni wiemɔ shishitsɔɔlɔi sumɔɔɔ ni amɛfeɔ nakai lɛ nɔ. Wiemɔi ni nine baanyɛ ashɛ nɔ lɛ haa nɔ ni wiemɔ shishitsɔɔlɔi baanyɛ afee yɛ wiemɔi komɛi amli lɛ tsuɔ nii kɛyashɛɔ he ko pɛ. Belɛ jamɔ he nitsɔɔlɔi ni yeɔ anɔkwa lɛ baatsɔɔ mli akɛ, eyɛ mli akɛ wiemɔ shishitsɔɔlɔ lɛ kɛ wiemɔi sɔrɔtoi babaoo tsu nii moŋ loo kɛ́ ekɛ wiemɔ ni eshishinumɔ damɔɔɔ ŋmalɛ nɔ tsu nii po lɛ, akɛ shishijee wiemɔ ni ji neʹphesh lɛ tsuɔ nii kɛkɔɔ adesai kɛ kooloi ahe, ni edamɔɔ shi kɛhaa nɔ ko ni muɔ, ni yeɔ nii, ni baanyɛ agbo.
Ani Okaiɔ?
◻ Mɛɛ kanyamɔi ená Biblia shishitsɔɔlɔi anitsumɔ lɛ nɔ hewalɛ yɛ ŋmɛnɛŋmɛnɛ beaŋ?
◻ Mɛni hewɔ ŋmɛnɛŋmɛnɛ beaŋ shishitsɔɔmɔ hako Nyɔŋmɔ yiŋtoo ni kɔɔ lɛ diɛŋtsɛ egbɛi he lɛ afee efolo?
◻ Mɛɛ gbɛ nɔ shishitsɔɔmɔi komɛi tsĩmɔɔ Biblia mli anɔkwalei ni kɔɔ susuma, gbele kɛ shikpɔŋ lɛ he lɛ nɔ yɛ?
◻ Mɛɛ gbɛ̀i anɔ wɔbaanyɛ wɔtsɔ wɔtsɔɔ akɛ, wɔkɛ anɔkwayeli fiɔ Nyɔŋmɔ Wiemɔ lɛ sɛɛ?
[Mfoniri ni yɔɔ baafa 16]
Mɛɛ Biblia shishtsɔɔmɔ esa akɛ okɛtsu nii?