Yitso 12
“Naagbee Gbii” lɛ kɛ Maŋtsɛyeli LƐ
1. (a) Mɛɛ sanebimɔi ni he hiaa waa teɔ shi agbɛnɛ? (b) Mɛni Ŋmalɛi lɛ kɛɔ yɛ naagbee gbii ahe (i) kɛha wɔ shikpɔŋ lɛ, (ii) kɛha mɛi ni fiteɔ lɛ lɛ?
ANI “naagbee gbii lɛ” amli wɔyɔɔ amrɔ nɛɛ? Mɛni “naagbee gbii lɛ” tsɔɔ? Miishɛɛ sane ji akɛ, “naagbee gbii” ko baŋ kɛhaŋ shikpɔŋ lɛ diɛŋtsɛ. Ejaakɛ Biblia lɛ maa nɔ mi kɛhaa wɔ akɛ: “Shikpɔŋ lɛ, . . . ekahoso gbi ko gbi ko.” Yɛ Yehowa shishijee yiŋtoo lɛ kɛ gbeekpamɔ naa lɛ, abaaha adesai kɛ kooloi awala ahi shi yɛ biɛ kɛya naanɔ. (Lala 104:5-24; 119:89, 90; 1 Mose 1:27, 28; 8:21, 22) Shi kɛlɛ, gbɛ fɛɛ gbɛ nɔ lɛ, “naagbee gbii” yɛ kɛha nakai jeŋmaji kɛ aŋkroaŋkroi fɔji ni fiteɔ Nyɔŋmɔ shikpɔŋ lɛ. Maŋtsɛyeli lɛ ‘baa’ ji nɔ ni kɛ fitemɔ baaba nɛkɛ nifitelɔi nɛɛ anɔ.—2 Petro 3:3-7; Yakobo 5:1-4; Kpojiemɔ 11:15-18.
2. Mɛni tuuŋtu Paulo gba efɔ shi yɛ wɔ “bei ni yɔɔ gbeyei” nɛɛ he?
2 Ani eeenyɛ efee akɛ nakai “naagbee gbii” lɛ amli wɔyɔɔ amrɔ nɛɛ? Bo lɛ, kɔ Biblia shishitsɔɔmɔi lɛ eko fɛɛ eko ni okane nɔ ni Nyɔŋmɔ kɛ mumɔ tsirɛ bɔfo Paulo ni egba efɔ shi kɛha “naagbee gbii” lɛ, yɛ Timoteo Wolo ni Ji Enyɔ yitso 3, kuku 1 kɛyashi 5 lɛ. No sɛɛ lɛ, bi ohe akɛ, Ani nɛkɛ ji bɔ ni adesai aje lɛ ji ŋmɛnɛ? Bɔfo lɛ gba “bei ni yɔɔ gbeyei” efɔ shi, ni ekɛfata he yɛ biɛ akɛ:
“Gbɔmɛi baatsɔmɔ hesuɔlɔi, shika suɔlɔi, shwalɔi, henɔwolɔi, mɛi ajɛlɔi, fɔlɔi anɔ toigbolɔi, trumui, mɛi ni he tseee, mɛi ni bɛ suɔmɔ, mɛi ni kɛ sane ekeee, oshekuyelɔi, mɛi ni bɛ henɔyeli, yiwalɔi, mɛi ni sumɔɔɔ ekpakpa, sɛɛgbɛtsɔɔlɔi, gidigidi-tsɛmɛi, hewolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ—mɛi ni hiɛ su tamɔ Nyɔŋmɔ jalɔi shi amɛkwa emli hewalɛ lɛ. Okɛ amɛ akana nɔ ko kwraa feemɔ.”—New International Version.
3. Mɛni hewɔ “naagbee gbii” ni Paulo wieɔ he lɛ mli wa kwraa fe Yudafoi anibii agbɛjianɔtoo lɛ naagbee lɛ?
3 Beni bɔfo lɛ ŋma nɔ ni yɔɔ yiŋteŋ gbɛ nɛɛ, no mli lɛ jeee Yudafoi anibii agbɛjianɔtoo lɛ “naagbee gbii” lɛ ahe ewieɔ lɛ. Enyɛŋ efee akɛ no he ewieɔ, ejaakɛ Paulo ŋmala nakai wiemɔi lɛ aaafee afi 65 Ŋ.B., beni nakai “naagbee gbii” lɛ amli nɔ ni fe afii 30 ebaho kɛtee momo, ni eshwɛ afii enumɔ pɛ ni Yerusalem hiɛkpatamɔ lɛ baaba lɛ. Ni nakai nɔŋŋ hu no mli lɛ hemɔkɛyeli kwamɔ shihilɛi lɛ ejeko shishi yɛ mɛi ni tsɛɔ amɛhe Kristofoi lɛ ateŋ. Nakai Yudafoi anibii agbɛjianɔtoo lɛ “naagbee gbii” lɛ ehiii kwraa, shi nibii ni yaa nɔ yɛ Satan jeŋ muu fɛɛ nibii agbɛjianɔtoo nɛɛ “naagbee gbii” lɛ amli, beni Yesu baaba ekoŋŋ koni ebato emaŋtsɛyeli lɛ shishi lɛ, baaha nakai beaŋ nɔ lɛ afee bibioo kwraa.
MLIBAA NI BƆ HE ENYƆ
4. Mɛni ha kaselɔi lɛ bi sane ni yɔɔ Mateo 24:3 lɛ?
4 Yesu ewie “je nɛŋ naagbee lɛ” he yɛ ebɛbuai lɛ amli. (Mateo 13:39, 40, 49) Eka shi faŋŋ akɛ, enɛ tee ekaselɔi lɛ amiishɛɛ shi, ni titri lɛ, yɛ bɔ ni gbɔmɛi foji lɛ naa amanehulu babaoo, yɛ nakai beaŋ po, yɛ Roma nɔyeli ni yitsoŋ wa waa lɛ kɛ Yudafoi ajamɔ mli hiɛnyiɛlɔi lɛ ashishi lɛ hewɔ. Amɛhiɛ ka nɔ akɛ Nyɔŋmɔ Maŋtsɛyeli lɛ kɛ heyeli baaba. No hewɔ lɛ, beni eshwɛ gbii etɛ dani abaagbe Yesu lɛ, ekaselɔi lɛ ateŋ mɛi ejwɛ ba eŋɔɔ beni eta shi yɛ Mu Gɔŋ lɛ nɔ, ni ekwɛɔ Yerusalem yɛ amɛjɔɔ mli lɛ, ni amɛbabi lɛ akɛ: “Kɛɛmɔ wɔ, Mɛɛ be abaafee nii nɛɛ, ni mɛni ji ba ni oba lɛ kɛ nibii agbɛjianɔtoo lɛ naagbee lɛ he okadi?”—Mateo 24:3, NW; Marko 13:3, 4.
5. Te Yesu wiemɔi ni ekɛha amɛ hetoo lɛ baaba mli aha tɛŋŋ?
5 Eyɛ mli akɛ Yesu kaselɔi lɛ miisusu wɔsɛɛ be ni ka amɛhiɛ kpaakpa lɛ pɛ he moŋ, shi hetoo ni Yesu ha amɛ yɛ nakai beaŋ lɛ baana emlibaa yɛ gbɛi enyɔ nɔ: klɛŋklɛŋ lɛ, yɛ Yudafoi anibii agbɛjianɔtoo lɛ “naagbee gbii” lɛ amli, kɛ, sɛɛ mli kwraa lɛ, yɛ Satan jeŋ fɛɛ nibii agbɛjianɔtoo ni ekpele shikpɔŋ muu lɛ fɛɛ nɔ lɛ “naagbee gbii” lɛ hu mli.
6, 7. (a) Mɛɛ gbɛ nɔ Yesu wiemɔi ni yɔɔ Mateo 24:7-22 lɛ na emlibaa bibioo kwraa yɛ? (b) Mɛɛ ehe kaimɔ nɔ ko ni yɔɔ daa nɛɛ ehi shi aahu kɛbashi ŋmɛnɛ?
6 Nɔ ni Yesu kɛɛ nakai kaselɔi lɛ, taakɛ aŋma yɛ Mateo 24, kuku 7 kɛyashi 22 lɛ, tsɔɔ bɔ ni nibii baaba lɛ aha, ni amɛteŋ mɛi komɛi baana yɛ gbɛ bibioo kwraa nɔ yɛ afii 37 ni baanyiɛ sɛɛ kɛba lɛ mli aahu kɛbashi afi 70 Ŋ.B. Yɛ Yudafoi ni hi shi yɛ Yesu yinɔ lɛ agbɛfaŋ lɛ, ebaafee basabasa feemɔ be ko ni tai, hɔmɔ, shikpɔŋ hosomɔi, Kristofoi anyɛɛ, kɛ amale Mesiai baapue yɛ mli. Ni kɛlɛ, abaashiɛ “maŋtsɛyeli lɛ he sanekpakpa nɛɛ” yɛ adebɔɔ fɛɛ mli ni akɛye amɛ odase. Yɛ naagbee lɛ, nakai “nihiinii,” ni ji Romabii wɔŋjalɔi lɛ asraafoi lɛ, bote Yerusalem sɔlemɔwe lɛ “he krɔŋkrɔŋ lɛ” lɛlɛŋ. Beni amɛná mumɔ hé fioo, ni Yesu kaselɔi lɛ nyɛ amɛbo egbalɛ naa famɔ lɛ toi kɛtsɔ foi ni amɛje kɛtee gɔji lɛ anɔ kɛha shweshweeshwe feemɔ lɛ sɛɛ lɛ, Romabii lɛ ku amɛsɛɛ amɛba ekoŋŋ yɛ Tatsɛ Tito shishi. Amɛkpata Yerusalem kɛ emli bii lɛ fɛɛ ahiɛ butuu, ni amɛkumɔ esɔlemɔtsu lɛ kwraa, ni amɛshiii tɛ kome yɛ tɛ kroko nɔ.—Kwɛmɔ Luka 19:43, 44; Kolosebii 1:23 hu.
7 Yɛ Yesu “okadi” lɛ mlibaa mli lɛ, nɛkɛ haomɔi ni abua naa nɛɛ ba Yudafoi lɛ anɔ, ni eba naagbee kwraa kɛ Yerusalem hiɛkpatamɔ ni mli wa waa ni ba yɛ afi 70 Ŋ.B. lɛ. Yudafoi ni fa fe akpeiakpe kome kɛ amɛmaŋtiase lɛ hiɛ kpata, ni aloo mɛi ni gboiii lɛ kɛtee akɛ nyɔji. Tito kunimyeli lɛ he gbogbo ni atswa ama shi lɛ ma shi lolo yɛ Roma kɛbashi ŋmɛnɛ akɛ Yesu gbalɛ lɛ mlibaa he kaimɔ nɔ ni yɔɔ daa nɛɛ. Shi, ani aŋma Yesu “okadi” lɛ afɔ shi ni abaa yi yɛ niŋmaa mli akɛ kɔkɔbɔɔ nɔ kɛha gbɔmɛi ni hi shi yɛ klɛŋklɛŋ afii oha lɛ mli lɛ pɛ? Ani eji ‘yinɔsane ni egbo’ kɛkɛ ŋmɛnɛ? Eka shi faŋŋ akɛ, hetoo lɛ ji, Dabi!
BƆ NI EKƆƆ JEŊ MUU FƐƐ HE EHAA
8. (a) Mɛɛ hewalɛ esa akɛ Yesu wiemɔi lɛ amlibaa bibioo nɛɛ ana yɛ wɔnɔ ŋmɛnɛ? (b) Mɛɛ nibii wuji ahe gbalɛ mli mfoniri enɛ feɔ?
8 Esa akɛ Yesu wiemɔi lɛ amlibaa bibioo kwraa ni ba yɛ Yudafoi anibii agbɛjianɔtoo lɛ “naagbee gbii” lɛ amli lɛ awo hemɔkɛyeli ni wɔyɔɔ yɛ ŋwɛi gbalɛ hewalɛ mli lɛ mli hewalɛ. Shi, nakai nibii ni ba yɛ klɛŋklɛŋ afii oha lɛ mli lɛ hu haa wɔ nibii ni baaba yɛ gbɛ ni mli lɛɛ waa nɔ yɛ Satan jeŋ muu fɛɛ nibii agbɛjianɔtoo lɛ gbɛfaŋ lɛ he gbalɛ mli mfoniri ko ni sa kadimɔ waa. Yesu wiemɔi ni yɔɔ Mateo 24:21, 22 lɛ miimɛ emlibaa wulu ni fe fɛɛ:
“Ejaakɛ no be lɛ mli lɛ amanehulu babaoo baaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ. Ni kɛ afooo no gbii lɛ anɔ kpitioo lɛ, kulɛ ahereŋ heloo ko heloo ko yiwala; shi mɛi ni ahala lɛ ahewɔ lɛ aaafo no gbii lɛ anɔ kpitioo.”
9. Te wɔfeɔ tɛŋŋ wɔleɔ akɛ Yesu wiemɔi lɛ kɔɔ jeŋ muu fɛɛ akɔntaabuu gbi ko he lɛ?
9 Yesu gbalɛ lɛ mli wiemɔi ni tsa nɔ, yɛ Mateo 24:23–25:46 lɛ hu tsɔɔ bɔ ni “nibii agbɛjianɔtoo lɛ naagbee lɛ” baakpele jeŋ muu fɛɛ eha. Beni “gbɔmɔ Bi” lɛ baatsu kojomɔ he nii yɛ Satan je lɛ nɔ, ákɛ Nyɔŋmɔ maŋtsɛ ni ekɛ lɛ eta maŋtsɛsɛi nɔ, yɛ nakai haomɔ be lɛ naagbee kwraa lɛ, “no lɛ shikpɔŋ lɛ nɔ akutsei lɛ fɛɛ aaawo yara.” Enɛ baasa adesai fɛɛ ni kpooɔ maŋtsɛ ni Yesu ji lɛ ahe. Ejeee kojomɔ ni baaba maŋ kome kɛ emaŋtiase pɛ nɔ, shi moŋ eji jeŋ muu fɛɛ akɔntaabuu gbi.—Mateo 24:30.
10. (a) Taakɛ afee he mfoniri yɛ Yesu gbalɛ lɛ mli lɛ, ebaasoro nɔ ni baaba mɛi ni ‘feɔ nɔ ni amɛ diɛŋtsɛ amɛsumɔɔ’ lɛ anɔ lɛ yɛ nɔ ni baaba mɛi ni ‘taoɔ Nyɔŋmɔ maŋtsɛyeli lɛ’ anɔ lɛ he yɛ mɛɛ gbɛ nɔ? (b) Mɛni hewɔ enɛ baaba yɛ jeŋ muu fɛɛ lɛ?
10 Beni etsɔɔ bɔ ni Nyɔŋmɔ kojomɔ lɛ baakpele jeŋ muu fɛɛ lɛ shikome ekoŋŋ lɛ, Yesu gbalɛ lɛ tee nɔ ekɛ “nibii agbɛjianɔtoo lɛ naagbee lɛ” to be ni tsɔ Noa nu afua lɛ hiɛ nɔŋŋ lɛ he, ni ekɛɛ:
“Ejaakɛ bɔ ni yɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ, nakai nɔŋŋ gbɔmɔ Bi lɛ baa lɛ aaatamɔ.”
Taakɛ bɔ ni nakai beaŋ Nu Afua lɛ bɛɛ gbɔmɛi ni bɛ Nyɔŋmɔ gbeyeishemɔ lɛ aje lɛ fɛɛ kɛtee lɛ, nakai nɔŋŋ amanehulu ni naa wa waa ni kadiɔ Mesia lɛ “ba ni eba” lɛ baajie mɛi ni kuɔ amɛhiɛ amɛfɔɔ Maŋtsɛyeli lɛ nɔ ni ‘amɛfeɔ nɔ ni amɛ diɛŋtsɛ amɛsumɔɔ’ lɛ fɛɛ kɛjɛ wɔ shikpɔŋ nɛɛ nɔ kwraa. Miishɛɛ sane ji akɛ, mɛi ni ‘etao Nyɔŋmɔ maŋtsɛyeli lɛ kɛ ejalɛ lɛ tsutsu’ lɛ ateŋ mɛi babaoo baana yibaamɔ ni amɛnine aaashɛ naanɔ wala nɔ yɛ paradeiso shikpɔŋ nɔ. Ani obaafee nɛkɛ gbɔmɛi nɛɛ ateŋ mɔ ko?—Mateo 6:33; 24:37-39; 25:31-46.
11. Mɛɛ gbalɛi krokomɛi tsɔɔ akɛ jeŋmaji lɛ fɛɛ ahe yɛ sane lɛ mli, ni mɛi krokomɛi baana yibaamɔ kɛjɛ mli hu?
11 Biblia gbalɛi babaoo tsɔɔ akɛ “amanehulu kpeteŋkpele” ni baa lɛ baasa “jeŋmaji lɛ fɛɛ” he yɛ shikpɔŋ nɛɛ nɔ. (Lala 2:2-9; Yesaia 34:1, 2; Yeremia 25:31-33; Ezekiel 38:23; Yoel 4:12-16; Mika 5:15; Habakuk 3:1, 12, 13) Shi mɛi komɛi baana yibaamɔ kɛjɛ mli hu!—Yesaia 26:20, 21; Daniel 12:1; Yoel 3:4, 5.
BA NI MAŊTSƐ LƐ EBA YƐ ŊWƐI ANUNYAM MLI LƐ
12. (a) Mɛni hewɔ ba ni Yesu eba lɛ he “okadi” he hiaa lɛ? (b) Mɛni hewɔ ni ehe ehiaaa ni epue yɛ heloo gbɔmɔtso mli dɔŋŋ lɛ?
12 Yesu gbalɛ kpele ni kɔɔ ba ni eba lɛ he “okadi” lɛ he lɛ kɛɔ wɔ akɛ “beni gbɔmɔ Bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ.” (Mateo 25:31) Akɛni nakai anunyam lɛ kpɛmɔ lɛ baafite adesai ahiŋmɛii foji nɛɛ hewɔ lɛ, belɛ esa akɛ Maŋtsɛ lɛ afee mɔ ni adesai enaaa lɛ kɛ amɛhiŋmɛi. (Okɛto 2 Mose 33:17-20; Hebribii 12:2 he.) No hewɔ ni ‘ba ni eba lɛ he okadi’ he hiaa lɛ. Yɛ Mesia lɛ baa ni ji enyɔ lɛ mli lɛ, ehe ehiaaa dɔŋŋ akɛ eŋmɛɛ ŋwɛi mumɔŋ wala shihilɛ lɛ he koni ebapue yɛ shikpɔŋ nɔ yɛ helooŋ gbɔmɔtso mli, ni akɛ lɛ atsu nii akɛ “eshai ahe afɔle.” Akɛni ekɛ adesa wala esha afɔle “shikome nyɔŋlo” hewɔ lɛ, ebaa “nɔ ni ji shii enyɔ lɛ, eeeshi esha” akɛ ŋwɛi maŋtsɛ ni anaaa lɛ kɛ hiŋmɛi.—Hebribii 7:26, 27; 9:27, 28; 10:8-10; 1 Petro 3:18.
13. Mɛni Luka 19:11-27 lɛ tsɔɔ yɛ Yesu sɛɛkuu kɛ enɔkpɛlɛmɔ yɛ jeŋmaji lɛ ateŋ lɛ he?
13 Yesu kɛɛ ekaselɔi ni bɛŋkɛ lɛ kpaakpa lɛ yɛ naagbee gbɛkɛ ni ekɛ amɛ hi shi lɛ mli akɛ: “Miiya ni miyasaa gbɛhe mato nyɛ. Ni kɛji mitee ni miyasaa gbɛhe mito nyɛ lɛ, mibaba ekoŋŋ ni mibabaŋɔ nyɛ kɛya he ni mi diɛŋtsɛ miyɔɔ lɛ, koni he ni miyɔɔ lɛ nyɛ hu nyɛhi jɛi.” (Yohane 14:2, 3) Yɛ enɛ kɛ gbeekpamɔ naa lɛ, Yesu abɛbua ni yɔɔ Luka 19:11-27 lɛ wieɔ ehe akɛ “ablade ko [ni] dom etee maŋsɛɛ shɔŋŋ, ní eyaŋɔ emaŋtsɛyeli, ni eku esɛɛ eba.” Enɛ baahe be ni fa saŋŋ. Shi “emaŋbii lɛ nyɛ lɛ, ni amɛtsu bɔfoi kɛtiu lɛ akɛ: ‘Wɔsumɔɔɔ ni mɔ nɛ abaye wɔnɔ maŋtsɛ.’ ” Nakai nɔŋŋ hu gbɔmɛi yɛ ŋmɛnɛ ni kɛɔ akɛ Kristofoi ji amɛ, shi amɛkpooɔ “maŋtsɛmɛi a-Maŋtsɛ” lɛ ni amɛyafiɔ amɛ diɛŋtsɛ amɛ adesai anɔyelii ni yeee emuu lɛ asɛɛ. (Kpojiemɔ 19:16) Abaagbala mɛnɛɛmɛi atoi waa, taakɛ eji yɛ “maŋbii” ni yɔɔ Yesu abɛbua lɛ mli lɛ agbɛfaŋ lɛ.
“KƆƆMƆI LƐ ABƆIMƆ NI”
14. Yɛ wiemɔi ni akɛteɔ shi awoɔ lɛ fɛɛ sɛɛ lɛ, mɛni fiɔ afi 1914 Ŋ.B. sɛɛ akɛ be mli ni Kristo kɛku esɛɛ?
14 Mɛɛ be nɛkɛ Maŋtsɛ kpeteŋkpele, ni jeŋmaji lɛ taooo lɛ nɛɛ bɔiɔ wɔ shikpɔŋ nɛɛ nɔ maŋtsɛyeli? Odaseyelii lɛ fɛɛ tsɔɔ akɛ be lɛ ji afi 1914 Ŋ.B. Shi ekolɛ mɔ ko baawie ashi akɛ, ‘Yɛ nɔ najiaŋ ni ekɛ Kristo toiŋjɔlɛ lɛ moŋ aaaba lɛ, nakai afi lɛ bafee haomɔ yinɔ ni adesai yɔɔ mli nɛɛ shishijee be!’ Nakai pɛpɛɛpɛ ji sane lɛ! Ejaakɛ, taakɛ Biblia gbalɛ tsɔɔ lɛ, beni ‘je nɛŋ maŋtsɛyeli lɛ aaatsɔ wɔ-Nuŋtsɔ Yehowa kɛ e-Kristo lɛ maŋtsɛyeli’ lɛ, nakai be lɛ ji be mli ni jeŋmaji lɛ ‘amli baafu’ lɛ. (Kpojiemɔ 11:15, 18) Nakai be lɛ nɔŋŋ ji be mli ni Yehowa baatsu ehefatalɔ maŋtsɛ lɛ, ni eje kpo kɛya, akɛ, “Ye lumɔ yɛ ohenyɛlɔi lɛ ateŋ!” (Lala 110:1, 2) Shi akpataaa nakai henyɛlɔi lɛ ahiɛ amrɔ nɔŋŋ.
15. Te Kpojiemɔ 12 wieɔ Maŋtsɛyeli lɛ fɔmɔ he yɛ gbɛ ni sa jogbaŋŋ nɔ ehaa tɛŋŋ?
15 Kpojiemɔ yitso 12 lɛ tsɔɔ ninaa ko ni yɔɔ miishɛɛ waa, ni bɔfo Yohane na Nyɔŋmɔ Mesia maŋtsɛyeli lɛ fɔmɔ lɛ yɛ okadi mli. Afɔ lɛ tamɔ gbekɛ nuu, kɛjɛ Nyɔŋmɔ “yoo” lɛ mli—eŋwɛi gbɛjianɔtoo ni ji ebɔɔnii ŋwɛibɔfoi lɛ ateŋ. “Asha ebi lɛ kɛtee Nyɔŋmɔ ŋɔɔ yɛ emaŋtsɛsɛi lɛ masɛi,” ejaakɛ eka shi faŋŋ akɛ Maŋtsɛyeli lɛ baadamɔ Yehowa kɛ emaŋtsɛyeli lɛ nɔ kɛha enitsumɔ.—Kpojiemɔ 12:1-5.
16, 17. (a) Mɛni kɛ jaramɔ shihilɛi ni eba shikpɔŋ lɛ nɔ kɛjɛ 1914 kɛbaa nɛɛ ba? (b) Te Yesu wiemɔi ni yɔɔ Mateo kɛ Luka lɛ wie nɛkɛ haomɔi nɛɛ ashishijee he eha tɛŋŋ?
16 No sɛɛ lɛ, ta te shi yɛ ŋwɛi! Maŋtsɛ ni akɛ lɛ eta maŋtsɛsɛi nɔ lɛ kɛ ebɔfoi lɛ fee ekome ni amɛkɛ Satan kɛ edaimonioi akuu lɛ wuu, ni amɛshɛrɛ amɛ amɛshwie kɛjɛ Yehowa ŋwɛi lɛ kɛba wɔ shikpɔŋ nɛɛ niiaŋ. No hewɔ lɛ, ebafee “kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ, ejaakɛ Abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.” (Kpojiemɔ 12:7-12) Maŋtsɛ lɛ buaa adesai ni sumɔɔ jalɛ nifeemɔ lɛ anaa kɛhaa yiwalaheremɔ yɛ nakai be ni kɛ akɛaato nii ahe lɛ, eji “be fioo kɛkɛ” lɛ mli, ni ebɔɔ kɔkɔ yɛ kojomɔ ni kã Satan jeŋ muu fɛɛ nibii agbɛjianɔtoo lɛ hiɛ ni baaba enɔ lɛ hu he.—Mateo 24:32-41; 25:31-33.
17 Ŋmɛnɛ, wɔnaa Yesu “okadi” ni ekɛha, taakɛ atsɔɔ mli fitsofitso yɛ Mateo yitso 24 kɛ 25, Marko yitso 13 kɛ Luka yitso 21 lɛ mlibaa. Kadimɔ akɛ Yesu tsɔɔ “kɔɔmɔi lɛ abɔimɔ” lɛ mli yɛ biɛ kɛ nɛkɛ wiemɔi nɛɛ, akɛ:
“Maŋ aaate shi awo maŋ, ni maŋtsɛyeli hu aaate shi awo maŋtsɛyeli; ni shikpɔŋ hosomɔi ni naa wa aaaba hei sɔrɔtoi fɛɛ, kɛ hɔji kɛ gbele helai, ni gbeyei nibii kɛ okadii wuji aaajɛ ŋwɛi aba.” (Mateo 24:3, 7, 8; Luka 21:10, 11)
Ani nakai “kɔɔmɔi lɛ abɔimɔ” lɛ ebahao adesai kɛjɛ afi 1914 Ŋ.B. kɛbaa nɛɛ?
18. Mɛɛ gbɛ nɔ ta bafee nɔ ko ni yɔɔ gbeyei waa kɛjɛ 1914 kɛbaa?
18 Afi 1914 mli ji be mli ni Ta Kpeteŋkpele (ni atsɛ lɛ yɛ sɛɛ mli akɛ “Jeŋ Ta I”) lɛ je shishi, ni nibii ni nyiɛ sɛɛ kɛba hu ji tsɛŋemɔ helai kɛ hɔmɔ. Ewa waa kɛha niŋmalɔi akɛ amɛaatsɔɔ nibii ni yɔɔ gbeyei ni tee nɔ yɛ hei ni awuu ta lɛ yɛ lɛ, ejaakɛ gbɔmɛi akpekpei abɔ hiɛ kpata yɛ bui amli tawuu ni tee nɔ yɛ 1914-1918 hiɛkpatamɔ lɛ mli lɛ mli. Atsɛɔ Paul Nash wiemɔ ko sɛɛ yɛ wolo ni gbɛi ji Eye Deep in Hell lɛ mli akɛ ewie yɛ Europa tawuu he lɛ he akɛ: “Niŋmaa tso loo nitɛŋmɔ ko bɛ ni baanyɛ aha maŋ nɛɛ ale jogbaŋŋ—shihilɛi amli diɛŋtsɛ ni awuɔ tai lɛ yɛ nyɔɔŋ kɛ shwane, yɛ daa nyɔŋ nɔ lɛ. Efɔŋ kɛ yiwalɛ kpele ni ajie lɛ kpo lɛ pɛ baanyɛ afee nɔ ni kudɔ ta nɛɛ, ni anaaa Nyɔŋmɔ nine he okadi bibioo po yɛ he ko he ko. . . . Okpɛlɛmii ni atswiaa lɛ kpaaa . . . nii ahiɛkpatamɔ, mɛi akpajee, kɛ amɛhaomɔ, ni amɛboteɔ gbonyo bu ni ji shikpɔŋ nɛɛ mli; gbonyo bu wulu agbo kome, ni ekɛ gbohii ni amɛnii efee mɔbɔ lɛ bashwieɔ mli. Anyɛŋ akɛ wiemɔ atsɔɔ mli, Nyɔŋmɔ gbeyeishemɔ bɛ mli, hiɛnɔkamɔ bɛ mli.”
19. Mɛni akɔntaabuu tsɔɔ yɛ bɔ ni shikpɔŋ hosomɔi etee hiɛ eha kɛjɛ 1914 kɛbaa lɛ he?
19 “Shikpɔŋ hosomɔi” hu fata he ákɛ “okadi” lɛ fã. Ani shikpɔŋ hosomɔi efa babaoo kɛjɛ 1914 kɛbaa nɛɛ? Ekolɛ enɛ baaha onaa akpɛ ohe fioo. Shi ehe akɔntaabuu ni yɔɔ lɛ haa mɔ naa kpɛɔ ehe fe nakai! Taakɛ Geo Malagoli wie he yɛ ewolo ni gbɛi ji Il Piccolo lɛ mli lɛ: “Yɛ afii 1,059 ni ho (kɛjɛ 856 kɛbashi 1914) lɛ mli lɛ, nibii ni aŋmala ashwie shi ni anyɛɔ akɛ he fɔɔ nɔ lɛ tsĩɔ shikpɔŋ hosomɔi wuji 24 pɛ tã.” Yibɔi ni ekɛha lɛ tsɔɔ akɛ, nakai afii lɛ amli lɛ, kɛ aja mli lɛ, mɛi 1,800 gboiɔ daa afi yɛ shikpɔŋ hosomɔi amli, shi kɛjɛ 1915 kɛbaa nɛɛ, shikpɔŋ hosomɔi wuji 43 eba, ni kɛ aja mli lɛ, enɛɛmɛi egbe gbɔmɛi 25,300 daa afi.
20, 21. Mɛni eje kpo faŋŋ kɛjɛ 1914 kɛbaa, ni mɛni hewɔ?
20 Yɛ Jeŋ Ta I mli lɛ, okpɛlɛmii wuji ni tswia tuŋtɛi babaoo shikome kɛtsara nɔ lɛ bafee nɔ hee kwraa—ta diɛŋtsɛ. No ji klɛŋklɛŋ kwraa ni akɛ kɔɔyɔŋ lɛji bibii, kɛ agbɛnɛ, nɔ ni he hiaa fe no lɛ, kɔɔyɔŋ lɛji wuji je kɔɔyɔŋ tawuu yinɔ lɛ shishi.
21 Nɔ ni atsɛɔ lɛ akɛ ŋwɛi niiaŋ nɔ kunim ni adesai eye lɛ egbala jwɛŋmɔ kɛtee hulu, nyɔŋtsere, kɛ ŋulamii anɔ, ni aana odaseyeli ni miitsɔ akɛ Hewalɛi Kpeteŋkpelei lɛ miito amɛyiŋ akɛ amɛkɛ shibɔlemɔ ŋulamii baatsu nii ni amɛkɛto asraafoi atutuamɔ jɛɛhei ashishi. Shi amrɔ nɛɛ amɛyɛ bɔ ni ajɛɔ ŋwɛi aŋmɛɛɔ okpɛlɛmii wuji ahe, ni ejɛɔ maŋ wulu kome mli kɛyaa ekroko mli, kɛyaa maŋ fɛɛ maŋ ni amɛsumɔɔ akɛ eya lɛ he nilee momo. Nuklea tawuu nii ni yɔɔ amrɔ nɛɛ, ni maji ni teɔ shi woɔ amɛhe lɛ ebua naa lɛ fa bɔ ni ebaanyɛ ekpata adesai fɛɛ ahiɛ kwraa shii abɔ, ni abuɔ akɔntaa akɛ beni afii oha nɛɛ baaba naagbee lɛ, no mli lɛ maji aaashɛ 35 kɛ tawuu nii ni kpataa nii ahiɛ kwraa nɛɛ eko ewula amɛha.
22. (a) Ŋshɔ diɛŋtsɛ ni wɔnaa nɛɛ ena shishinumɔ hee ko kwraa kɛjɛ 1914 kɛbaa yɛ mɛɛ gbɛ nɔ? (b) Mɛni jeŋ nilelɔi bɔɔ kɔkɔ yɛ he, yɛ nibii ni woɔ wɔ shibɔlemɔ ŋulami nɛɛ shihilɛ he gbeyei lɛ he?
22 Ŋshɔ lɛ baná shishinumɔ hee kwraa beni akɛ nu shishi tawuu lɛji bɔi nitsumɔ yɛ Jeŋ Ta I mli lɛ; enɛ ha United States kɛ ehe wo ta lɛ mli, ni ŋmɛnɛ, étsɔ he ni asheɔ gbeyei fe fɛɛ akɛ oshara baanyɛ ajɛ aba. Nuklea nu shishi tawuu lɛji efee klalo yɛ ŋshɔi lɛ amli. Maŋtiase ko bɛ shikpɔŋ nɛɛ nɔ ni nuklea okpɛlɛmii nyɛŋ ashɛ jɛmɛ. New York Times ni je kpo yɛ August 30, 1980 lɛ tsɛ U.S. State Department nilelɔ kpanaa Marshall D. Shulman wiemɔ ko sɛɛ akɛ ekɛɛ akɛ nyɛ ni eeenyɛ eba akɛ abaawuu nuklea ta lɛ “baanyɛ aya hiɛ waa moŋ fe ni enɔ aaagbɔ.” Adafitswaa ko ni hé baafa muu fɛɛ, ni akɛwo New York Times ni je kpo yɛ March 2, 1980 lɛ mli, ni hii kɛ yei fe 600 ni ale amɛ waa lɛ wo nyɔmɔ lɛ wie akɛ: “Nuklea ta, ‘bibioo’ po ni aaawuu lɛ, kɛ gbele, pilamɔ kɛ helai babaoo baaba, bɔ ni eko bako nakai dã yɛ adesai ashihilɛ yinɔsane be fɛɛ mli.” Amɛkɛfata he akɛ “abaagbe nuklea tawuu nii ni kui enyɔ lɛ aaatswia amɛhe lɛ naa yɛ ŋmɛlɛtswaa kome pɛ mli, ni ebaanyɛ ekpata wala babaoo hiɛ yɛ shikpɔŋ lɛ kooyigbɛ afã lɛ mli.” Ni U.S. maŋ najiaŋdamɔlɔ ni yɔɔ Moscow lɛ hu wie yɛ 1981 mli akɛ: “Miina akɛ je lɛŋ shihilɛ efee oshara waa fe bɔ ni efee pɛŋ yɛ eyinɔsane be fɛɛ mli.” Shi shika ni afiteɔ yɛ nɛkɛ tawuu nii ni kpataa nii ahiɛ waa nɛɛ ahe lɛ kã he eefa babaoo lolo.
23. Mɛni hewɔ esa akɛ wɔsɔle waa yɛ Maŋtsɛyeli lɛ ‘baa’ he lɛ?
23 Etamɔ nɔ ni adesai miishɛ shihilɛ ni Harold C. Urey ni aha lɛ Nobel Jweremɔ Nii lɛ wie he efɔ shi afii saŋŋ nɛ lɛ he, beni ewie akɛ: “Wɔbaaye nii kɛ gbeyeishemɔ, wɔɔwɔ kɛ gbeyeishemɔ, wɔɔhi shi yɛ gbeyeishemɔ mli ni wɔbaagboi hu yɛ gbeyeishemɔ mli.” Miishɛɛ sane ji akɛ, Nuŋtsɔ Maŋtsɛ Yehowa, ni bɔ shikpɔŋ nɛɛ yɛ eyiŋtoo kpakpa ko hewɔ lɛ, kɛ gbɛ ko baaha ni abaatsɔ nɔ akɛje mli, kɛtsɔ e-Bi lɛ maŋtsɛyeli lɛ nɔ. Shi dani wɔɔpɛi enɛ mli fitsofitso lɛ, nyɛhaa wɔsusua Yesu gbalɛ lɛ he lolo wɔkwɛa. Kadimɔ bɔ ni ewiemɔi ni kɔɔ ta, hɔmɔ kɛ tsɛŋemɔ hela he, ákɛ “okadi” lɛ mli kadimɔ nii lɛ ekomɛi lɛ, kɛ gbalɛ ni tamɔ nakai nɔŋŋ yɛ Kpojiemɔ lɛ kpaa gbee jogbaŋŋ yɛ gbɛ ni sa kadimɔ nɔ. Kaimɔ akɛ, Nyɔŋmɔ Maŋtsɛyeli ni Mesia lɛ yeɔ nɔ lɛ pɛ ji tsabaa—nakai maŋtsɛyeli ni wɔsɔleɔ waa yɛ ‘ebaa’ lɛ he lɛ!
[Akrabatsa ni yɔɔ baafa 115]
NƆ NI NIŊMALƆI EWIE YƐ 1914 HE
Yɛ jeŋ ta ni ji enyɔ sɛɛ po lɛ, mɛi babaoo kã he amɛtsɛɔ 1914 akɛ tsakemɔ be kpele yɛ ŋmɛnɛŋmɛnɛ beaŋ yinɔsane mli:
“Lɛlɛŋ akɛ afi 1914 moŋ kadiɔ tsakemɔ be yɛ wɔbe nɛɛ mli fe nɔ ni ba yɛ Hiroshima lɛ.”—Rene Albrecht-Carrie, “The Scientific Monthly,” July 1951
“Kɛjɛ 1914 kɛbaa nɛɛ, mɔ fɛɛ mɔ ni naa shihilɛ ni yaa nɔ yɛ je lɛŋ lɛ ehao waa yɛ nɔ ni tamɔ shɛɛ mli sane ko ni ka enɔ akɛ eshi ako kɛya ehiɛ kɛyabote oshara wulu mli lɛ hewɔ. Mɛi ni susuɔ nii ahe waa lɛ ebanu he akɛ anyɛŋ nɔ ko kwraa afee ni akɛtsi fitemɔ ni wɔɔbote mli lɛ naa. Amɛnaa adesai aweku lɛ, tamɔ mɔ ko ni ehe gbɛi yɛ Hela oshara ko mli, ni nyɔŋmɔi ni mli efu tsirɛɔ eyisɛɛ ni ejeee mɔ ni yeɔ shɛɛ mli sane nɔ dɔŋŋ.”—Bertrand Russell, New York “Times Magazine,” September 27, 1953
“Ŋmɛnɛŋmɛnɛ beaŋ yinɔ nɛɛ . . . je shishi yɛ 1914, ni mɔ ko leee be loo bɔ ni ebaafee eba naagbee. . . . Ebaanyɛ eba naagbee kɛ hiɛkpatamɔ kpeteŋkpele.”—Editorial, “The Seattle Times,” January 1, 1959
“Yɛ 1914 mli lɛ, je lɛ, taakɛ ale ni akpɛlɛɔ nɔ lɛ, ba naagbee.”—James Cameron, “1914,” ni aŋma yɛ 1959 lɛ
“Klɛŋklɛŋ Jeŋ Ta lɛ ji nibii wuji fe fɛɛ ni eba yɛ yinɔsane mli dã lɛ ateŋ ekome.”—Barbara Tuchman, “The Guns of August,” 1962
“Susumɔi kɛ mfonirii baa mijwɛŋmɔ mli, . . . susumɔi ni yɔɔ dani afi 1914 shɛ, be mli ni toiŋjɔlɛ, kpoofeemɔ kɛ shweshweeshwe shihilɛ diɛŋtsɛ yɔɔ shikpɔŋ nɛɛ nɔ—be ni wɔleee gbeyeishemɔ lɛ. . . . Shweshweeshwe shihilɛ kɛ kpoofeemɔ elaaje kɛjɛ adesai ashihilɛ mli kɛjɛ 1914.”—German maŋ nɔkwɛlɔ Konrad Adenauer, 1965
“Jeŋ muu lɛ fɛɛ mli gbala diɛŋtsɛ aaafee Jeŋ Ta I mli, ni wɔleee nɔ hewɔ lɛ lolo. . . . Shihilɛ ni eye emuu ka wɔhiɛ. Toiŋjɔlɛ kɛ shweshweeshwe shihilɛ yɛ. Kɛkɛ ni nɔ fɛɛ nɔ fite. Wɔhi shihilɛ ni wɔnyɛɛɛ nɔ ko wɔfee lɛ mli aahu kɛjɛ nakai beaŋ kɛbaa.”—Dr. Walker Percy, “American Medical News,” November 21, 1977
“Afi 1914 mli ni je lɛ laaje bɔ ni eŋmɛɔ pɛpɛɛpɛ lɛ ni enyɛko edamɔ shi nakai dɔŋŋ kɛbashi bianɛ. . . . Nɛkɛ be nɛɛ ebafee basabasa feemɔ kɛ yiwalɛ be ni fe fɛɛ, yɛ maŋ kɛ maŋ teŋ kɛ agbɛnɛ yɛ maji komekomei lɛ amli fɛɛ.”—“The Economist,” London, August 4, 1979
“Hiŋmɛigbelemɔ bote hela ni yi wa ni ekolɛ ekɛ lɛ baaba naagbee lɛ mli yɛ 1914.”—Frank Peters, St. Louis “Post-Dispatch,” January 27, 1980
“Nɔ fɛɛ nɔ baaya hiɛ ni eya nɔ jogbaŋŋ. Enɛ ji jeŋ ni afɔ mi yɛ mli lɛ. . . . Trukaa, ni akpaaa gbɛ, leebi ko yɛ 1914 mli ni enɛɛmɛi fɛɛ ba naagbee.”—Britania maŋ nɔkwɛlɔ Harold Macmillan, New York “Times,” November 23, 1980