“Ja Nii Nɛɛ Fɛɛ Eba Mli Dã”
“Yesu here nɔ ekɛɛ amɛ akɛ: ‘. . . Ja nii nɛɛ fɛɛ eba mli dã, shi kɛlɛ naagbee lɛ shɛko.’”—MATEO 24:4-6.
1. Mɛɛ saneyitso esa akɛ wɔná he miishɛɛ waa?
ŊWANEJEE ko bɛ he akɛ oyɛ owala kɛ owɔsɛɛ be he miishɛɛ waa. Kɛ́ nakai lɛ, no lɛ esa akɛ oná sane ko ni hé C. T. Russell jwɛŋmɔ waa yɛ afi 1877 mli tɔ̃ɔ lɛ hu he miishɛɛ. Russell, mɔ ni to Buu Mɔɔ Asafo lɛ shishi yɛ sɛɛ mli lɛ, ŋma wolo ni gbɛi ji The Object and Manner of Our Lord’s Return. Nɛkɛ wolo bibioo ni hiɛ baafai 64 nɛɛ wie Yesu sɛɛkuu, loo ba ní eeeba wɔsɛɛ lɛ he.[1] (Yohane 14:3) Be ko beni eyɔɔ Mu Gɔŋ lɛ nɔ lɛ, ebɔfoi lɛ bi lɛ nakai sɛɛkuu lɛ he sane, akɛ: “Mɛɛ be mli nibii nɛɛ baaba, ni mɛni baafee ba ni oba lɛ [loo, “obaa lɛ,” King James Version] kɛ nibii agbɛjianɔtoo lɛ naagbee lɛ he okadi?”—Mateo 24:3, NW.
2. Mɛni hewɔ ayɔɔ susumɔi ni kɛ amɛhe kpãaa gbee yɛ nɔ ni Yesu gba efɔ̃ shi lɛ he lɛ?
2 Ani ole Yesu hetoo lɛ ni onuɔ shishi hu? Anaa yɛ Sanekpakpai lɛ ateŋ etɛ mli. Nilelɔ D. A. Carson wie akɛ: “Biblia mli yitsei fioo komɛi pɛ etée gbeekpamɔ ni baaa shishitsɔɔlɔi ateŋ lɛ babaoo shi fe Mateo 24 kɛ saji ni kɛ lɛ nyiɛɔ pɛpɛɛpɛ, ni yɔɔ Marko 13 kɛ Luka 21 lɛ.” Kɛkɛ ni etsɔɔ lɛ diɛŋtsɛ ejwɛŋmɔ—tamɔ adesai asusumɔi krokomɛi ni teɔ shi woɔ amɛhe lɛ nɔŋŋ.[2] Yɛ afii oha loo nɔ̃ ní eho lɛ mli lɛ, nɛkɛ susumɔi nɛɛ amli babaoo jie hemɔkɛyeli ni abɛ lɛ kpo. Mɛi ni hiɛ nakai susumɔi lɛ wieɔ akɛ Yesu ekɛɛɛ nɔ ni wɔkaneɔ yɛ Sanekpakpai lɛ amli lɛ kɔkɔɔkɔ, ákɛ atsake ewiemɔ lɛ kwraa yɛ sɛɛ mli, aloo ákɛ nɔ ni egba efɔ̃ shi lɛ baaa mli—ni shitee-kɛ-woo wiemɔi ni mli wawai hã susumɔi nɛɛ hé shi. Shishitsɔɔlɔi lɛ ateŋ mɔ kome po susu Marko Sanekpakpa lɛ he ‘yɛ Mahayana-Buddhabii ajeŋ nilee shishinumɔ naa’![3]
3. Te Yehowa Odasefoi susuɔ Yesu gbalɛ lɛ he amɛhaa tɛŋŋ?
3 Nɔ ni tamɔɔɔ enɛ lɛ, Yehowa Odasefoi kpɛlɛɔ bɔ ni Biblia lɛ ji anɔkwale, ní anyɛɔ akɛ he fɔ̃ɔ nɔ lɛ nɔ, ni nɔ ni Yesu kɛɛ bɔfoi ejwɛ ni kɛ lɛ yɔɔ Mu Gɔŋ lɛ nɔ lɛ beni eshwɛ gbii etɛ dani ebaagbo lɛ hu fata he. Kɛjɛ C. T. Russell gbii lɛ amli aahu kɛbaa nɛɛ, Nyɔŋmɔ webii etee nɔ amɛná gbalɛ ní Yesu kɛha yɛ jɛmɛ lɛ he shishinumɔ ni mli kã shi faŋŋ. Ni Buu-Mɔɔ etee nɔ etsɔɔ bɔ ni amɛnuɔ gbalɛ nɛɛ shishi amɛhaa lɛ mli faŋŋ lolo, yɛ nyɛsɛɛ afii fioo ní eho nɛɛ amli. Ani onu nakai sane lɛ shishi jogbaŋŋ, akɛni onaa hewalɛ ni enáa yɛ oshihilɛ nɔ lɛ hewɔ?a Hã wɔsaa wɔsusu he ekoŋŋ.
Mlibaa ni Yɔɔ Gbeyei Kã Amɛhiɛ Nɔŋŋ
4. Mɛni hewɔ ekolɛ bɔfoi lɛ bi Yesu wɔsɛɛ be he sane lɛ?
4 Bɔfoi lɛ le akɛ Yesu ji Mesia lɛ. No hewɔ lɛ beni amɛnu ní etsĩ egbele, eshitee, kɛ esɛɛkuu lɛ tã lɛ, eka shi faŋŋ akɛ, amɛbaasusu akɛ, ‘Kɛ́ Yesu gbo ní etee lɛ, te ebaafee tɛŋŋ eha naakpɛɛ nibii ni akpaa gbɛ akɛ Mesia lɛ baatsu lɛ aba mli?’ Kɛfata he lɛ, Yesu wie Yerusalem kɛ esɔlemɔtsu lɛ naagbee he. Ekolɛ bɔfoi lɛ baasusu akɛ, ‘Mɛɛ be, ni mɛɛ gbɛ nɔ enɛ baatsɔ aba?’ Beni amɛbɔɔ mɔdɛŋ ní amɛnu nibii nɛɛ ashishi lɛ, bɔfoi lɛ bi akɛ: “Tsɔɔmɔ wɔ be mli ni aaafee nii nɛɛ, kɛ be mli ni nii nɛɛ fɛɛ kwa aaaba mli lɛ he okadi.”—Marko 13:4; Mateo 16:21, 27, 28; 23:37–24:2.
5. Nɔ ni Yesu kɛɛ lɛ ná emlibaa yɛ klɛŋklɛŋ afii oha lɛ mli yɛ mɛɛ gbɛ nɔ?
5 Yesu gba efɔ̃ shi akɛ tai, hɔji, tsɛŋemɔ helai, shikpɔŋ hosomɔi, hetsɛ̃ kɛ yiwaa ni akɛaaba Kristofoi anɔ, kɛ amale mesiai aaaba, kɛ Maŋtsɛyeli lɛ he sanekpakpa lɛ shiɛmɔ yɛ he fɛɛ he. No sɛɛ dani naagbee lɛ baaba. (Mateo 24:4-14; Marko 13:5-13; Luka 21:8-19) Yesu wie enɛ yɛ afi 33 Ŋ.B. lɛ shishijee gbɛ. Yɛ afii nyɔŋmai fioo ni nyiɛ sɛɛ lɛ amli lɛ, ekaselɔi ni hiɛ yɔɔ amɛhe nɔ lɛ nyɛ amɛyoo akɛ nibii ní egba efɔ̃ shi lɛ miiba mli anɔkwale, yɛ gbɛ ni sa kadimɔ nɔ. Hɛɛ, yinɔsane maa nɔ mi akɛ okadi lɛ ná mlibaa yɛ nakai beaŋ, ni no kɛ Yudafoi anibii agbɛjianɔtoo lɛ ba enaagbee yɛ Romabii lɛ adɛŋ yɛ afi 66-70 Ŋ.B. Mɛɛ gbɛ nɔ enɛ tsɔ eba?
6. Mɛni tee nɔ yɛ Romabii lɛ kɛ Yudafoi lɛ ateŋ yɛ afi 66 Ŋ.B.?
6 Yɛ Yudea latsaa be ni jeŋ dɔɔ lɛ mli, yɛ afi 66 Ŋ.B. lɛ, Yudafoi Hiɛdɔlɔi nyiɛ hiɛ ni ayatutua Roma bulɔi ni yɔɔ mɔɔ ni bɛŋkɛ Yerusalem sɔlemɔtsu lɛ mli lɛ, ni enɛ je basabasafeemɔ shishi yɛ shikpɔŋ lɛ nɔ hei krokomɛi. Nilelɔ Heinrich Graetz tsɔɔ mli yɛ History of the Jews wolo lɛ mli akɛ: “Cestius Gallus, ní enitsumɔ ákɛ Syria Amralo lɛ ji ní ehiɛ woo ni Roma asraafoi lɛ yɔɔ lɛ mli lɛ, . . . nyɛɛɛ ekwɛ atuatsemɔ ni gbɛɔ eshwãa kɛbɔleɔ lɛ lɛ dɔŋŋ ní ebɔɔɔ mɔdɛŋ akɛ eeetsĩ egbɛɛ-kɛ-shwãmɔ naa. Etsɛ́ esraafoi akui lɛ fɛɛ kɛba, ni lumɛi ni bɛŋkɛ lɛ lɛ hu jɛ amɛsuɔmɔ mli amɛha asraafoi bafata he.” Nɛkɛ asraafoi 30,000 nɛɛ babɔ nsara amɛwo Yerusalem he. Yɛ nɔmɔ fioo sɛɛ lɛ, Yudafoi lɛ gbala amɛhe shi kɛtee gbogboi lɛ asɛɛ, yɛ sɔlemɔtsu lɛ masɛi. “Romabii lɛ tutua gbogboi lɛ waa, yɛ gbii enumɔ ní tsara nɔ kɛba lɛ amli, shi be fɛɛ be lɛ, Yudeabii lɛ atawuu nii lɛ nyɛɔ amɛnɔ ni amɛgbalaa amɛhe shi kɛyaa sɛɛ. Gbi ni ji ekpaa lɛ nɔ dani amɛnyɛ amɛtsa kooyigbɛ gbogbo lɛ fã ni yɔɔ Sɔlemɔtsu lɛ hiɛ gbɛ lɛ shishi.”[4]
7. Mɛni hewɔ Yesu kaselɔi nyɛ amɛsusu saji ahe yɛ gbɛ ni yɔɔ srɔto nɔ yɛ Yudafoi pii ahe lɛ?
7 Bo diɛŋtsɛ susumɔ bɔ ni Yudafoi lɛ ayiŋ baafutu amɛ aha, akɛni amɛnu he yɛ be kplaŋŋ mli akɛ Nyɔŋmɔ baabu amɛ kɛ amɛmaŋtiase krɔŋkrɔŋ lɛ he lɛ he okwɛ! Shi kɛlɛ, átsɔ hiɛ ábɔ Yesu kaselɔi lɛ kɔkɔ momo akɛ amanehulu ko miimɛ Yerusalem. Yesu egba efɔ̃ shi akɛ: “Ogbii miiba, ni ohenyɛlɔi lɛ aaatsa bu awo ohe, ni amɛaabɔleo kpula ni amɛaasá oyi yɛ he fɛɛ he, ni amɛaaŋɔo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli.” (Luka 19:43, 44) Shi ani no baatsɔɔ gbele kɛha Kristofoi ni yɔɔ Yerusalem yɛ afi 66 Ŋ.B. lɛ?
8. Mɛɛ amanehulu Yesu gba efɔ̃ shi, ni namɛi ji “halamɔbii” ní amɛhewɔ lɛ abaafo gbii lɛ anɔ kpitioo lɛ?
8 Beni ehaa bɔfoi lɛ hetoo yɛ Mu Gɔŋ lɛ nɔ lɛ, Yesu gba efɔ̃ shi akɛ: “Nakai gbii lɛ amli lɛ amanehulu aaaba ní anako nɔ dã kɛjɛ jeŋ ni Nyɔŋmɔ bɔ lɛ shishijee mli aahu kɛbashi ŋmɛnɛŋmɛnɛ, ni asaŋ anaŋ enɔ dɔŋŋ. Ni ja [Yehowa, NW] fo gbii lɛ anɔ, kɛ́ jeee nakai lɛ, ahereŋ heloo ko heloo ko yiwala; shi halamɔbii ni ehala lɛ ahewɔ lɛ efo gbii lɛ anɔ.” (Marko 13:19, 20; Mateo 24:21, 22) No hewɔ lɛ abaafo gbii lɛ anɔ ni abaahere “halamɔbii lɛ” ayiwala. Namɛi ni? Eka shi faŋŋ akɛ jeee Yudafoi atuatselɔi ní kɛɔ akɛ amɛjáa Yehowa, shi amɛkpoo e-Bi lɛ. (Yohane 19:1-7; Bɔfoi lɛ Asaji 2:22, 23, 36) Anɔkwa halamɔbii ní hi shi yɛ nakai beaŋ lɛ ji nakai Yudafoi kɛ mɛi ni jeee Yudafoi, ní ná Yesu mli hemɔkɛyeli akɛ Mesia kɛ Yiwalaherelɔ lɛ. Nyɔŋmɔ hala nakai mɛi lɛ, ni ekɛ amɛ fee mumɔŋ maŋ hee, ni ji “Nyɔŋmɔ Israel lɛ,” yɛ Pentekoste afi 33 Ŋ.B.—Galatabii 6:16; Luka 18:7; Bɔfoi lɛ Asaji 10:34-45; 1 Petro 2:9.
9, 10. ‘Afo’ gbii ni ji Roma tutuamɔ lɛ ‘nɔ kpitioo’ yɛ mɛɛ gbɛ nɔ, ni mɛni jɛ mli ba?
9 Ani ‘afo gbii lɛ anɔ’ ni ahere halamɔbii ni afɔ amɛ mu, ní yɔɔ Yerusalem lɛ ayiwala? Nilelɔ Graetz tsɔɔ mli akɛ: “[Cestius Gallus] susuuu akɛ nilee yɛ mli akɛ eeetsá ta ni ewuɔ eshiɔ hiɛdɔlɔi ni jieɔ ekãafeemɔ kpo lɛ nɔ, ní eje tafãa kakadaŋŋ shishi yɛ nakai be lɛ mli, be mli ni etsɛŋ kwraa ni gbo nugbɔnɛmɔ lɛ baaje shishi . . . ni ekolɛ ehaŋ asraafoi lɛ anine ashɛ niyenii nɔ lɛ. Yɛ enɛ hewɔ lɛ, ekolɛ esusu akɛ nilee yɛ mli babaoo akɛ egbala ehe shi moŋ.” Bɔ fɛɛ bɔ ni Cestius Gallus susu lɛ, Roma asraafoi lɛ gbala amɛhe shi kɛjɛ maŋtiase lɛ mli, ni Yudafoi lɛ tiu amɛ ni amɛgbe amɛteŋ mɛi babaoo diɛŋtsɛ.[5]
10 Nakai Romabii lɛ ahe shi ni amɛgbala ní yɔɔ naakpɛɛ lɛ ŋmɛ gbɛ ni ahere “heloo”—ni ji Yesu kaselɔi ni yɔɔ oshara mli yɛ Yerusalem—lɛ ayiwala. Yinɔsane eŋma efɔ̃ shi akɛ beni hegbɛ bibioo nɛɛ naa gbele kɛha amɛ lɛ, Kristofoi jo foi kɛshi nakai kpokpaa lɛ nɔ. Mɛɛ Nyɔŋmɔ nyɛmɔ ni ekɛleɔ nɔ ni baaba wɔsɛɛ, kɛ bɔ ni ekwɛɔ ní ejálɔi aná yibaamɔ lɛ ajieɔ lɛ kpo nɛkɛ! Ni kɛlɛ, Yudafoi ni heee yeee, ni tee nɔ amɛhi Yerusalem kɛ Yudea lɛ hu?
Mɛi ni Hi Shi yɛ Be Kome Mli lɛ Baana
11. Mɛni Yesu wie yɛ “nɛkɛ yinɔ nɛɛ” he?
11 Yudafoi babaoo nu he akɛ amɛjamɔ gbɛjianɔtoo, ní damɔ sɔlemɔtsu lɛ nɔ lɛ, baahi shi nakai daa nɛɛ. Shi Yesu wie akɛ: “Nyɛkasea agbami tso . . . lɛ: beni eniji lɛ efrɔke ní ebɔi baai fumɔ lɛ, nyɛle akɛ latsaa be lɛ eshɛ eta. Nakai nɔŋŋ nyɛ hu, beni nyɛaana nii nɛɛ fɛɛ lɛ, nyɛlea akɛ eshɛ agbói lɛ anaa eta. Lɛɛlɛŋ, miikɛɛ nyɛ akɛ: Nɛkɛ yinɔ nɛɛ hoŋ, jaa nii nɛɛ fɛɛ eba mli dã. Ŋwɛi kɛ shikpɔŋ baaho aya; shi miwiemɔi lɛ hoŋ eyaŋ.”—Mateo 24:32-35; wɔma efã ko nɔ mi.
12, 13. Te kaselɔi lɛ baanu bɔ ni Yesu wie “nɛkɛ yinɔ nɛɛ” he eha lɛ shishi amɛha tɛŋŋ?
12 Eka shi faŋŋ akɛ Kristofoi na okadi ni nibii pii yɔɔ mli lɛ shishijee fãi lɛ amli babaoo akɛ eba mli yɛ afii ni tsɔ afi 66 Ŋ.B. hiɛ lɛ amli—tai, hɔji, kɛ Maŋtsɛyeli lɛ he sanekpakpa lɛ shiɛmɔ ni mli lɛɛ po. (Bɔfoi lɛ Asaji 11:28; Kolosebii 1:23) Shi kɛlɛ, mɛɛ be naagbee lɛ baaba? Mɛni Yesu tsɔɔ beni ekɛɛ akɛ: ‘Nɛkɛ yinɔ nɛɛ [Hela, ge·ne·aʹ] hoŋ eyaŋ’ lɛ? Bei pii lɛ, Yesu tsɛɔ Yudafoi shitee-kɛ-wolɔi babaoo ni hi shi yɛ be kome mli, ní jamɔ mli hiɛnyiɛlɔi fata he lɛ akɛ, ‘yinɔ fɔŋ kɛ gbalafitelɔi.’ (Mateo 11:16; 12:39, 45; 16:4; 17:17; 23:36) No hewɔ lɛ, beni ewie “nɛkɛ yinɔ nɛɛ” he ekoŋŋ yɛ Mu Gɔŋ lɛ nɔ lɛ, eka shi faŋŋ akɛ etsɔɔɔ Yudafoi aweku ni hi shi yɛ yinɔsane be fɛɛ mli lɛ fɛɛ; ni etsɔɔɔ esɛɛnyiɛlɔi lɛ hu, eyɛ mli akɛ amɛji “weku ni ahala.” (1 Petro 2:9) Nakai nɔŋŋ hu Yesu ekɛɛɛ akɛ “nɛkɛ yinɔ nɛɛ” ji be sɛɛkɛlɛ ko.
13 Shi moŋ, mɛi ni yɔɔ Yesu jwɛŋmɔ mli ji Yudafoi shitee-kɛ-wolɔi ni hi shi yɛ nakai beaŋ, ní baana okadi ni ekɛha lɛ mlibaa lɛ. Nilelɔ Joel B. Green tsɔɔ mli yɛ sane ní kɔɔ “nɛkɛ yinɔ nɛɛ,” ní yɔɔ Luka 21:32 lɛ he akɛ: “Yɛ Sanekpakpa ni Ji Etɛ lɛ mli lɛ, ‘nɛkɛ yinɔ nɛɛ’ (kɛ wiemɔi kukuji ni tamɔ nakai lɛ) etee nɔ etsɔɔ gbɔmɛi akuu ní teɔ shi woɔ Nyɔŋmɔ yiŋtoo lɛ yɛ bei fɛɛ mli. . . . [Ekɔɔ] gbɔmɛi ni kɛ kuɛŋtimɔ tsɔɔ amɛsɛɛ amɛhaa Nyɔŋmɔ yiŋtoo lɛ ahe.”b[6]
14. Mɛni nakai “yinɔ” lɛ na, shi nɔ ni ba yɛ Kristofoi lɛ agbɛfaŋ lɛ yɛ srɔto yɛ mɛɛ gbɛ nɔ?
14 Yinɔ fɔŋ ni ji Yudafoi shitee-kɛ-wolɔi ni nyɛ́ amɛna akɛ okadi lɛ miiba mli lɛ baana naagbee lɛ hu. (Mateo 24:6, 13, 14) Ni amɛna hu! Roma asraafoi lɛ ku amɛsɛɛ yɛ afi 70 Ŋ.B., ni Tito, ni ji Maŋtsɛ Vespasian binuu lɛ nyiɛ amɛhiɛ. Amanehulu ní Yudafoi ní atsĩ amɛnaa awo maŋtiase lɛ mli ekoŋŋ lɛ na lɛ naa wa fe bɔ ni abaanyɛ ahe aye.c Flavius Josephus ní kɛ ehiŋmɛi na lɛ bɔ amaniɛ akɛ beni shɛɔ be mli ni Romabii lɛ kpata maŋtiase lɛ hiɛ lɛ, no mli lɛ, Yudafoi aaashɛ 1,100,000 egboi, ni aŋɔ mɛi aaafee 100,000 nom, ni etsɛɛɛ ni mɛnɛɛmɛi ateŋ mɛi pii ahiɛ kpata kɛtsɔ hɔmɔ nɔ, loo yɛ Romabii ashwɛmɔhei lɛ. Lɛɛlɛŋ, amanehulu ni ba yɛ afii 66-70 Ŋ.B. lɛ da fe eko fɛɛ eko ní eba Yerusalem kɛ Yudafoi anibii agbɛjianɔtoo lɛ nɔ dã, loo ebaaba amɛnɔ. Kwɛ bɔ ni nɔ ni jɛ mli ba kɛha Kristofoi ní bo Yesu gbalɛ kɔkɔbɔɔ lɛ toi, ní amɛshi Yerusalem beni Roma asraafoi lɛ ku amɛsɛɛ yɛ afi 66 Ŋ.B. sɛɛ lɛ yɔɔ srɔto kwraa hã! ‘Ahere’ Kristofoi ni afɔ amɛ mu, ni ji “mɛi ní ahala” lɛ ‘ayiwala,’ loo abaa amɛyi, yɛ afi 70 Ŋ.B.—Mateo 24:16, 22.
Mlibaa Kroko yɛ Lolo ní Baaba
15. Te wɔɔfee tɛŋŋ wɔná nɔmimaa akɛ Yesu gbalɛ lɛ baaná emlibaa ni da yɛ afi 70 Ŋ.B. sɛɛ?
15 Shi kɛlɛ, jeee no ji naagbee. Yesu etsɔɔ mra kɛtsɔ hiɛ momo akɛ, yɛ maŋtiase lɛ hiɛkpatamɔ sɛɛ lɛ, ebaaba yɛ Yehowa gbɛi amli. (Mateo 23:38, 39; 24:2) Kɛkɛ ni no sɛɛ lɛ efee enɛ faŋŋ yɛ egbalɛ ni ekɛha yɛ Mu Gɔŋ lɛ nɔ lɛ mli. Beni etsĩ “amanehulu babaoo” ni baa lɛ tã lɛ, ewie hu akɛ sɛɛ mli lɛ amale Kristoi baate shi, ni jeŋmaji lɛ baanaanaa Yerusalem nɔ yɛ be kplaŋŋ ko mli. (Mateo 24:21, 23-28; Luka 21:24) Ani eeenyɛ efee akɛ emlibaa kroko, nɔ ni da fe klɛŋklɛŋ nɔ lɛ, hu baaba wɔsɛɛ? Anɔkwa saji lɛ haa hetoo akɛ hɛɛ. Kɛ́ wɔkɛ Kpojiemɔ 6:2-8, (ní aŋma yɛ amanehulu ni ba Yerusalem nɔ yɛ afi 70 Ŋ.B. sɛɛ lɛ) to Mateo 24:6-8 kɛ Luka 21:10, 11 he lɛ, wɔnaa akɛ tai, hɔji, kɛ tsɛŋemɔ helai ní mli wa kã wɔhiɛ kɛmiiba. Nɛkɛ Yesu wiemɔi lɛ amlibaa wulu nɛɛ eba aahu kɛjɛ be mli ni Jeŋ Ta I fɛ́ yɛ afi 1914 lɛ kɛbaa.
16-18. Mɛni wɔkpaa gbɛ akɛ kpaako ebaaba?
16 Yehowa Odasefoi kɛ afii nyɔŋmai abɔ etee nɔ etsɔɔ aahu kɛbashi ŋmɛnɛ akɛ okadi lɛ mlibaa ni anaa bianɛ lɛ tsɔɔ akɛ “amanehulu babaoo” ko kã wɔhiɛ kɛmiiba. “Yinɔ” fɔŋ ni yɔɔ amrɔ nɛɛ baana nakai amanehulu lɛ. Etamɔ nɔ ni shikome ekoŋŋ lɛ, eshishijee fã ko baanyiɛ hiɛ (tutuamɔ ni akɛaaba apasa jamɔ fɛɛ nɔ), tamɔ bɔ ni tutuamɔ ni Gallus kɛba yɛ afi 66 Ŋ.B. lɛ gbele amanehulu lɛ naa eshwie Yerusalem nɔ lɛ.d No sɛɛ lɛ, yɛ be kplaŋŋ ní atsɔɔɔ esɛɛkɛlɛ sɛɛ lɛ, naagbee lɛ baaba—hiɛkpatamɔ ni baaba jeŋ muu fɛɛ, tamɔ nɔ ni ba yɛ afi 70 Ŋ.B. lɛ pɛpɛɛpɛ.
17 Beni ewieɔ amanehulu ni kã wɔhiɛ kpaakpa lɛ he lɛ, Yesu wie akɛ: “Shi no gbii lɛ anɔ amanehului [apasa jamɔ hiɛkpatamɔ] lɛ asɛɛ lɛ, etsɛŋ ni hulu aaawo duŋ, ni nyɔɔŋtsere kpɛŋ dɔŋŋ, ni ŋulamii aaatserɛ kɛaajɛ ŋwɛi atswia shi, ni ŋwɛi hewalɛi lɛ aaahoso. Kɛkɛ ni gbɔmɔ bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo.”—Mateo 24:29, 30.
18 No hewɔ lɛ, Yesu diɛŋtsɛ wie akɛ “no gbii lɛ anɔ amanehului lɛ asɛɛ lɛ,” ŋwɛi okadii ni yɔɔ srɔto yɛ gbɛi komɛi anɔ baaba. (Okɛto Yoel 3:1-5; 4:15[Ga Bible] he.) Enɛ baaha adesai toigbolɔi lɛ atsui afã waa, ni amɛhe baajɔ̃ amɛhe aahu akɛ ‘amɛbaawo yara’ diɛŋtsɛ. “Nɔ̃ aaanyɔnyɔɔ” mɛi pii “anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ.” Shi jeee nakai nibii baaba lɛ yɛ anɔkwa Kristofoi agbɛfaŋ! Mɛnɛɛmɛi ‘baahole amɛyitsei anɔ, ejaakɛ amɛkpɔmɔ lɛ miibɛŋkɛ.’—Luka 21:25, 26, 28.
Kojomɔ Kã Wɔhiɛ!
19. Te wɔɔfee tɛŋŋ wɔtsɔɔ be mli ni gwantɛŋi kɛ abotiai ahe abɛbua lɛ baaba mli?
19 Kadimɔ akɛ Mateo 24:29-31 lɛ gbaa efɔ̃ɔ shi akɛ (1) gbɔmɔ Bi lɛ baaba, (2) ebaa nɛɛ baafee kɛ anunyam babaoo, (3) ŋwɛibɔfoi baafata ehe, ni (4) shikpɔŋ lɛ nɔ akutsei fɛɛ baana lɛ. Yesu tĩ okadii nɛɛ amli yɛ gwantɛŋi kɛ abotiai ahe abɛbua lɛ mli. (Mateo 25:31-46) No hewɔ lɛ, wɔbaanyɛ wɔmu sane naa akɛ abɛbua nɛɛ kɔɔ be ní nyiɛ amanehulu lɛ shishijee fɛmɔ lɛ sɛɛ, beni Yesu kɛ eŋwɛibɔfoi lɛ baaba ní ebata shi yɛ emaŋtsɛsɛi lɛ nɔ ní ekojo lɛ he. (Yohane 5:22; Bɔfoi lɛ Asaji 17:31; okɛto 1 Maŋtsɛmɛi 7:7; Daniel 7:10, 13, 14, 22, 26; Mateo 19:28 he.) Namɛi abaakojo amɛ lɛ, ni mɛni baajɛ mli aba? Abɛbua lɛ tsɔɔ akɛ Yesu baagbala ejwɛŋmɔ kɛya jeŋmaji fɛɛ nɔ, tamɔ nɔ ni amɛbabua amɛhe naa yɛ eŋwɛi maŋtsɛsɛi lɛ hiɛ tuuntu.
20, 21. Mɛni baaba gwantɛŋi ni yɔɔ Yesu abɛbua lɛ mli lɛ anɔ? (b) Mɛni baaba abotiai lɛ anɔ wɔsɛɛ?
20 Akɛ hii kɛ yei ni tamɔ gwantɛŋi lɛ baadamɔ Yesu ninejurɔ nɔ, ni ji ehiɛ duromɔ mli. Mɛni hewɔ? Ejaakɛ amɛkɛ hegbɛi ni amɛná lɛ tsu nii ni amɛkɛfee enyɛmimɛi—Kristofoi ní afɔ amɛ mu, ní baaná Kristo ŋwɛi Maŋtsɛyeli lɛ mli gbɛfaŋnɔ lɛ ejurɔ. (Daniel 7:27; Hebribii 2:9–3:1) Yɛ abɛbua lɛ kɛ gbeekpãmɔ naa lɛ, Kristofoi akpekpei abɔ ni tamɔ gwantɛŋi lɛ eyoo Yesu mumɔŋ nyɛmimɛi lɛ, ni amɛmiitsu nii kɛmiifi amɛsɛɛ. Nɔ ni ejɛ mli eba ji akɛ, “asafo babaoo” lɛ ená hiɛnɔkamɔ ni damɔ Biblia lɛ nɔ, ákɛ amɛyi baaná wala kɛfo “amanehulu kpeteŋkpele lɛ” ni amɛbaahi shi kɛya naanɔ yɛ Paradeiso, ni ji Nyɔŋmɔ Maŋtsɛyeli lɛ nɔyelihe ni yɔɔ shikpɔŋ nɛɛ nɔ lɛ.—Kpojiemɔ 7:9, 14; 21:3, 4; Yohane 10:16.
21 Kwɛ nɔ srɔto kwraa ni baajɛ mli aba kɛha abotiai lɛ! Awie amɛhe yɛ Mateo 24:30 lɛ akɛ ‘amɛaawo yara’ beni Yesu aaaba lɛ. Ni esa jogbaŋŋ hu akɛ amɛaawo yara ní amɛfó, ejaakɛ no mli lɛ amɛha ana amɛ faŋŋ akɛ amɛkpoo Maŋtsɛyeli lɛ he sanekpakpa lɛ, ákɛ amɛteɔ shi amɛwoɔ Yesu kaselɔi lɛ, ni amɛsumɔɔ je lɛ ní hoɔ kɛyaa lɛ moŋ. (Mateo 10:16-18; 1 Yohane 2:15-17) Yesu—jeee ekaselɔi ni yɔɔ shikpɔŋ nɔ lɛ ateŋ mɔ ko—tsɔɔ mɛi ni ji abotiai lɛ. Ewie amɛhe akɛ: “Mɛnɛɛmɛi aaatee naanɔ hejaramɔ mli.”—Mateo 25:46.
22. Mɛɛ Yesu abɛbua lɛ fã ko esa akɛ wɔya nɔ wɔsusu he lolo?
22 Hiɛyaa ni wɔná yɛ gbalɛ ni yɔɔ Mateo yitsei 24 kɛ 25 lɛ shishinumɔ mli lɛ yɛ miishɛɛ waa. Shi kɛlɛ, Yesu gbalɛ lɛ fã ko yɛ ní esa akɛ wɔsusu he jogbaŋŋ lolo—‘amaŋfɔ nihii nii ni ma hé krɔŋkrɔŋ lɛ.’ Yesu wo esɛɛnyiɛlɔi lɛ hewalɛ ní amɛkɛ sɛɛyoomɔ atsu nii yɛ enɛ gbɛfaŋ, ní amɛfee klalo akɛ amɛaatsu he nii. (Mateo 24:15, 16) Mɛni ji nɛkɛ “amaŋfɔ nihii nii” nɛɛ? Mɛɛ be emaa hé krɔŋkrɔŋ lɛ? Ni te esaa wɔ ŋmɛnɛŋmɛnɛ kɛ wɔsɛɛ be wala gbɛkpamɔi ahe ehaa tɛŋŋ? Nikasemɔ ni nyiɛ sɛɛ lɛ baasusu enɛ he.
[Shishigbɛ niŋmai]
a Kwɛmɔ nikasemɔi ni yɔɔ February 15, 1994; October 15 kɛ November 1, 1995; kɛ August 15, 1996 Buu-Mɔɔ lɛ amli lɛ mli.
b Britania woloŋlelɔ G. R. Beasley-Murray wie akɛ: “Esaaa akɛ wiemɔ kuku ni ji ‘nɛkɛ yinɔ nɛɛ’ feɔ naagba kɛhaa wiemɔ shishitsɔɔlɔi. Eyɛ mli akɛ akpɛlɛɔ nɔ akɛ genea yɛ mra be mli Hela wiemɔ mli lɛ tsɔɔ fɔmɔ, shwiei, kɛ no hewɔ lɛ, weku moŋ, . . . shi yɛ [Hela Septuagint] lɛ mli lɛ, bei pii lɛ, akɛtsɔɔ Hebri wiemɔ ni ji dôr shishi, ní eshishi ji yinɔ, adesai ayinɔ, loo yinɔ, yɛ mɛi ni hiɔ shi yɛ be kome mli lɛ shishinumɔ naa. . . . Yɛ wiemɔi ní akɛɛ Yesu wie lɛ agbɛfaŋ lɛ, etamɔ nɔ ni wiemɔ lɛ hiɛ shishinumɔi ni bɔ he enyɔ: yɛ gbɛ kome nɔ lɛ, etsɔɔ mɛi ni ekɛhi shi yɛ be kome mli be fɛɛ be, ni yɛ gbɛ kroko nɔ lɛ, etsɔɔ wiemɔ ní anaa faŋŋ akɛ eewie eeshi mɛi be fɛɛ be.”[7]
c Nilelɔ Graetz wie yɛ ewolo ni ji History of the Jews lɛ mli akɛ bei komɛi lɛ, Romabii lɛ sɛŋɔ gbokɛlɛfoi 500 gbi kome. Amɛfolɔ Yudafoi krokomɛi ní amɔmɔ amɛ lɛ aniji, ni no sɛɛ lɛ, amɛkɛ amɛ ku sɛɛ kɛtee maŋtiase lɛ mli ekoŋŋ. Mɛɛ shihilɛi yɔɔ jɛmɛ? “Shika he bɛ sɛɛnamɔ ko kwraa, ejaakɛ enyɛɛɛ ehe aboloo. Hii kɛ hiɛdɔɔ diɛŋtsɛ nɔɔ yɛ gbɛjegbɛi anɔ yɛ niyenii ni yɔɔ nyaŋemɔ kɛ taŋ fe fɛɛ he, yɛ jwɛi fioo, kooloo wele bibioo, loo jwɛi ni ashɛrɛɔ ashwieɔ ahaa gbeei lɛ he. . . . Gbohii ni jwere shi ní afũuu amɛ, ni fáa oyayaayai lɛ ha latsaa be mli kɔɔyɔɔ ní mli edɔ waa lɛ mli yi obɔ kɛ tsɛŋemɔ helai, ni helai, hɔmɔ, kɛ klante gbe maŋbii lɛ ateŋ mɛi babaoo.”[8]
d Nikasemɔ ni nyiɛ sɛɛ lɛ wieɔ amanehulu ni baaba wɔsɛɛ lɛ fã nɛɛ he.
Ani Okaiɔ?
◻ Mɛɛ mlibaa Mateo 24:4-14 lɛ ná yɛ klɛŋklɛŋ afii oha lɛ mli?
◻ Yɛ bɔfoi lɛ abeaŋ lɛ, afo gbii lɛ anɔ kpitioo ni ahere heloo ko yiwala, taakɛ agba afɔ̃ shi yɛ Mateo 24:21, 22 lɛ yɛ mɛɛ gbɛ nɔ?
◻ Mɛni kadi “yinɔ” ní atsĩ tã yɛ Mateo 24:34 lɛ?
◻ Te wɔfeɔ tɛŋŋ wɔleɔ akɛ gbalɛ ní akɛha yɛ Mu Gɔŋ lɛ nɔ lɛ baaná mlibaa kroko, ní da fe klɛŋklɛŋ nɔ̃ lɛ?
◻ Mɛɛ be gwantɛŋi kɛ abotiai ahe abɛbua lɛ baaba mli, ni yɛ mɛɛ gbɛ nɔ?
[Mfoniri ni yɔɔ baafa 12]
Tito Agbó ni yɔɔ Roma lɛ mli nibii ni anaa faŋŋ, ni miitsɔɔ nomŋɔɔ nibii ni jɛ Yerusalem hiɛkpatamɔ lɛ mli
[He ni Sane lɛ Jɛ]
Soprintendenza Archeologica di Roma