Kpɔmɔ Yɛ Yesu Kristo Kpojiemɔ Be Lɛ Mli
“Nyɛmii ashɛa, koni enunyam kpojiemɔ lɛ mli hu nyɛmii ashɛ ni nyɛmli afli nyɛ.”—1 PETRO 4:13.
1. Mɛɛ gbɛ nɔ Yehowa eha etsuji ena nii babaoo yɛ?
YEHOWA eha e-Dasefoi lɛ nikeenii babaoo diɛŋtsɛ. Akɛ wɔ-Tsɔɔlɔ Kpeteŋkple lɛ, etsɔ esuɔmɔnaa nii kɛ eyiŋtoo he nilee babaoo ni eha wɔna lɛ nɔ eha wɔ sɛɛyoomɔ. Ni etsɔ emumɔ krɔŋkrɔŋ lɛ hu nɔ eha wɔna nyɛmɔ ni wɔkɛaaha la lɛ atso aha mɛi babaoo kɛ ekaa. Bɔfo Paulo ni akɛ mumɔ tsirɛ lɛ lɛ kɛɔ wɔ yɛ 1 Korintobii 1:6, 7 akɛ: “Ama Kristo he odase lɛ nɔ mi yɛ nyɛmli, ni duromɔ keenii ko eshwɛɛɛ nyɛ, ni nyɛkwɛɔ wɔ-Nuŋtsɔ Yesu Kristo kpojiemɔ lɛ gbɛ lɛ.”
2. Mɛɛ miishɛɛ gbɛkpamɔ “wɔ-Nuŋtsɔ Yesu Kristo kpojiemɔ lɛ” yɔɔ kɛha wɔ?
2 “Wɔ-Nuŋtsɔ Yesu Kristo kpojiemɔ lɛ”—mɛni no tsɔɔ? No kɔɔ be mli ni abaajie Yesu kpo akɛ Maŋtsɛ ni awo ehiɛ nyam, ní ebaatsu nii koni ekɛwo esɛɛnyiɛlɔi anɔkwafoi lɛ anyɔmɔ, ni ekɛtsu oweletɔɔ he nii yɛ mɛi ni sheee Nyɔŋmɔ gbeyei lɛ anɔ lɛ he. Taakɛ 1 Petro 4:13 lɛ tsɔɔ lɛ, ebaafee be ni Kristofoi ni akɛ mumɔ efɔ amɛ mu ni amɛhiɛ amɛ anɔkwayeli mli lɛ kɛ amɛhefatalɔi anɔkwafoi, ni ji asafo babaoo lɛ ‘amii baashɛ amɛhe, ni amɛmli baafili amɛ hu kɛteke nɔ,’ ejaakɛ no tsɔɔ Satan nibii agbɛjianɔtoo nɛɛ naagbee.
3. Taakɛ wɔnyɛmimɛi ni hi Tesalonika lɛ fee lɛ, te esa akɛ wɔ hu wɔdamɔ shi shiŋŋ wɔha tɛŋŋ?
3 Beni nakai be lɛ bɛŋkɛɔ lɛ, belɛ Satan kɛ nɔnyɛɛ babaoo miiba wɔnɔ yɛ emlifu mli. Ebɔɔ mɔdɛŋ akɛ emi wɔ, tamɔ jata ko ni miihũu. No hewɔ lɛ, esa akɛ wɔdamɔ shi shiŋŋ! (1 Pet. 5:8-10) Beni wɔnyɛmimɛi ni hi blema Tesalonika lɛ ji mɛi heei kwraa yɛ anɔkwale lɛ mli lɛ, amɛkɛ amanehului ni tamɔ nɔ ni Yehowa Odasefoi pii kɛkpeɔ ŋmɛnɛ lɛ kpe. No hewɔ lɛ, bɔfo Paulo wiemɔi ni eŋma eyaha amɛ lɛ he yɛ sɛɛnamɔ kɛha wɔ hu nakai nɔŋŋ. Eŋma akɛ: “Eja yɛ Nyɔŋmɔ hiɛ akɛ mɛi ni haoɔ nyɛ lɛ, eeehao amɛ eto najiaŋ, ni nyɛ mɛi ni ahaoɔ nyɛ lɛ, eeeha nyɛkɛ wɔ fɛɛ hejɔɔmɔ, beni aaajie Nuŋtsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ lɛ.” (2 Tesalonikabii 1:6-8) Hɛɛ, heyeli baaba kɛ̃!
4. Mɛni hewɔ ni kojomɔ ni abaatsu he nii yɛ Yesu kpojiemɔ be lɛ mli lɛ sa osɔfoi lɛ?
4 Yɛ Paulo beaŋ lɛ, amanehulu ni ba amɛnɔ lɛ mli babaoo jɛ Yudafoi ajamɔ mli hiɛnyiɛlɔi lɛ aŋɔɔ. Nakai nɔŋŋ hu ŋmɛnɛ, yɛ bei babaoo mli lɛ, mɛi ni kɛɔ akɛ amɛdamɔ Nyɔŋmɔ najiaŋ, titri lɛ Kristendom osɔfoi lɛ ji mɛi ni woɔ shitee-kɛ-woo ni baa Yehowa Odasefoi ni sumɔɔ toiŋjɔlɛ lɛ anɔ lɛ he hewalɛ. Mɛnɛɛmɛi kwaa amɛfeɔ tamɔ mɛi ni le Nyɔŋmɔ, shi amɛkpooɔ Biblia mli “Yehowa kome” lɛ, ni amɛkɛ teemɔŋ Triniti ko ni anuuu shishi yeɔ enajiaŋ. (Marko 12:29) Amɛbooo wɔ-Nuŋtsɔ Yesu he sanekpakpa lɛ toi, shi moŋ amɛkɛ amɛhiɛ fɔɔ adesai anɔyeli nɔ kɛhaa heyeli, ni amɛkpooɔ Kristo jalɛ Maŋtsɛyeli ni baa lɛ he sanekpakpa lɛ. Esa akɛ nɛkɛ jamɔ mli shitee-kɛ-wolɔi nɛɛ fɛɛ ahiɛ akpata yɛ be mli ni “aaajie Nuŋtsɔ Yesu kpo kɛaajɛ ŋwɛi” lɛ!
Yesu Kristo “Baa” Lɛ
5. Mɛɛ gbɛ nɔ afee Yesu kpojiemɔ lɛ he mfoniri faŋŋ yɛ Mateo 24:29, 30 yɛ?
5 Yesu wie nakai kpojiemɔ lɛ he jogbaŋŋ yɛ Mateo 24:21, 29, 30. Beni etsɔɔ ba ni eba lɛ kɛ nibii agbɛjianɔtoo lɛ naagbee lɛ he okadi lɛ mli kadimɔ nii sɔrɔtoi lɛ amli jogbaŋŋ lɛ, ewie akɛ: “Hulu aaawo duŋ, ni nyɔŋtsere kpɛŋ dɔŋŋ, ni ŋulamii aaatserɛ kɛaajɛ ŋwɛi atswia shi, ni ŋwɛi hewalɛi lɛ aaahoso.” Nakai beaŋ lɛ, “gbɔmɔ Bi lɛ okadi lɛ aaapue yɛ ŋwɛi.” Ni shikpɔŋ lɛ nɔ jeŋmaji lɛ “fɛɛ aaawo yara, ni amɛaana gbɔmɔ Bi lɛ [Nyɔŋmɔ Mesia Maŋtsɛ lɛ]akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo.” Nɛkɛ “baa,” er-kho’me-non yɛ Hela wiemɔ mli nɛɛ kɔɔ Yesu puemɔ akɛ Yehowa Bembulɔ lɛ he.
6, 7. Mɛɛ gbɛ nɔ “hiŋmɛi fɛɛ hiŋmɛi aaana lɛ” yɛ, ni namɛi fata he yɛ enɛ mli?
6 Bɔfo Yohane hu wie nɛkɛ “ebaa” nɛɛ he yɛ Kpojiemɔ 1:7, he ni ewie yɛ akɛ: “Naa! Eeba kɛ atatui lɛ.” Oh, nakai henyɛlɔi lɛ enaŋ Yesu kɛ amɛhiŋmɛii diɛŋtsɛ, ejaakɛ “atatui lɛ” tsɔɔ akɛ eeba ni anaaa lɛ, koni ebatsu kojomɔ he nii. Kɛji adesai foji kɛkɛ baanyɛ amɛkɛ amɛhiŋmɛii diɛŋtsɛ ana eŋwɛi anunyam lɛ, no lɛ amɛbaashwila, tamɔ afee Saul, beni enyiɛ gbɛ nɔ kɛyaa Damasko, ni aha eshwila beni Yesu ni awo ehiɛ nyam lɛ jie ehe kpo etsɔɔ lɛ yɛ la kpɛmɔ kpele ko mli lɛ.—Bɔfoi lɛ Asaji 9:3-8; 22:6-11.
7 Kpojiemɔ lɛ mli sane lɛ yaa nɔ ekɛɔ akɛ “hiŋmɛi fɛɛ hiŋmɛi aaana lɛ, kɛ mɛi ni tsurɔ lɛ nii lɛ hu, ni shikpɔŋ lɛ nɔ akutsei lɛ fɛɛ aaawo yara yɛ ehewɔ.” Enɛ tsɔɔ akɛ, shitee kɛ-wolɔi ni yɔɔ shikpɔŋ nɔ lɛ baayoo yɛ hiɛkpatamɔ ni Yesu kɛbaaba amɛnɔ lɛ mli akɛ ekɛ hewalɛ kɛ anunyam kpele eba akɛ Yehowa Blafo. Mɛni hewɔ awieɔ henyɛlɔi nɛɛ ahe akɛ “mɛi ni tsurɔ lɛ nii lɛ”? Nɔ hewɔ ji akɛ, ejaakɛ mlifu su ni amɛjieɔ lɛ kpo yɛ Yehowa tsuji ahe ŋmɛnɛ lɛ tamɔ mɛi ni wa Yesu yi lɛ anɔ lɛ nɔŋŋ. Lɛlɛŋ ‘amɛbaagbalagbalaa amɛhe mai ni amɛbaawo yara yɛ ehewɔ.’
8. Mɛɛ kɔkɔbɔɔ Yesu kɛ Paul fɛɛ kɛhaa yɛ trukaa hiɛkpatamɔ ko he?
8 Mɛɛ gbɛ nɔ Yehowa oweletɔɔ gbi lɛ baatsɔ aba? Yesu wie osharai ni eba ni ebafee ba ni eba kɛjɛ 1914 kɛbaa lɛ he okadi lɛ he yɛ gbalɛ ni Luka yitso 21 lɛ mli. Kɛkɛ ni Yesu bɔ kɔkɔ yɛ kukuji 34 kɛ 35 lɛ akɛ: “Shi nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋ ŋmaa he haomɔi akahe nyɛtsuií, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne.” Hɛɛ, nakai Yehowa oweletɔɔ gbi lɛ baaba trukaa, oya nɔŋŋ! Bɔfo Paulo maa enɛ nɔ mi yɛ 1 Tesalonikabii 5:2, 3, ni ekɛɔ akɛ: “Nuŋtsɔ [Yehowa] gbi lɛ baaba tamɔ julɔ baa nyɔɔŋ lɛ. Ejaakɛ be mli ni amɛaakɛɛ akɛ: ‘Hejɔlɛ yɛ, ni wɔyɛ shweshweeshwe!’ lɛ, no mli nɔŋŋ hiɛkpatamɔ aaabatua amɛ trukaa.” Ni amrɔ nɛɛ po, jeŋmaji lɛ miiwie toiŋjɔlɛ kɛ shweshweeshwe shihilɛ be, ni amɛmiikpaŋ akɛ amɛbaawaje Jeŋmaji Ekomefeemɔ lɛ kɛ yiŋtoo akɛ amɛaatsɔ no nɔ amɛkɛbu hei ni haomɔi aaaba lɛ ahe kɛtsɔ asraafoi ahewalɛ nɔ.
9. Namɛi ‘la baakpɛ aha’ lɛ, ni mɛni hewɔ?
9 Bɔfo lɛ yaa nɔ ekɛɔ wɔ yɛ 1Te 5 kukuji 4 kɛ 5 lɛ akɛ: “Shi, anyɛmimɛi, nyɛ lɛ nyɛbɛ duŋ mli, ní gbi lɛ aaabati nyɛ shi tamɔ julɔ. Ejaakɛ nyɛ fɛɛ lɛ, la bii ji nyɛ kɛ shwane bii hu. Wɔjeee nyɔɔŋ aloo duŋ bii.” Wɔmli filiɔ wɔ akɛ la bii ji wɔ—la hiɛlɔi kɛha mɛi krokomɛi ni shweɔ anɔkwa toiŋjɔlɛ kɛ shweshweeshwe shihilɛ yɛ Nyɔŋmɔ jeŋ hee lɛ mli. Wɔkaneɔ yɛ Lala 97:10, 11 akɛ: “Nyɛ mɛi ni nyɛsumɔɔ Yehowa lɛ, nyɛnyɛa efɔŋ! Ebaa emɛi krɔŋkrɔŋi lɛ asusumai ayi; ejieɔ amɛ kɛjɛɔ mɛi fɔji adɛŋ. La baate shi aha jalɔ kɛ̃, kɛ miishɛɛ hu ha mɛi ni ja yɛ amɛtsuiaŋ lɛ.”
Bɔ ni Nibii Baanyiɛ Sɛɛ Aba Aha
10. Mɛɛ kɔkɔbɔɔ ko ni kɔɔ Nyɔŋmɔ akɔntaabuu gbi lɛ he, ni atsɔ hiɛ akɛha, esa akɛ wɔbo toi? (Kpojiemɔ 16:15)
10 Te nibii baanyiɛ sɛɛ aba tɛŋŋ kɛji amanehulu kpeteŋkpele lɛ je shishi lɛ? Nyɛhaa wɔgbelea kɛyaa Kpojiemɔ yitso 16. Kadimɔ, taakɛ atsɔɔ mli yɛ kukuji 13 kɛyashi 16 lɛ akɛ, daimonioi amumɔi ni he tseee bua shikpɔŋ muu lɛ fɛɛ nɔ jeŋmaji lɛ fɛɛ anaa kɛtee Har-Magedon, ni ji Nyɔŋmɔ Ofe lɛ gbi wulu lɛ nɔ ta lɛ mli. Amaa bɔ ni nakai gbi ni akɛbaabu akɔntaa lɛ baafee tamɔ julɔ baa lɛ nɔ mi shikome ekoŋŋ, ni abɔɔ wɔ kɔkɔ ni wɔya nɔ wɔshi kpe—ni wɔya nɔ wɔwo mumɔŋ atadei ni kadiɔ wɔ kɛhaa yiwalaheremɔ lɛ. Be eshɛ ni akɛbaakojo shikpɔŋ lɛ nɔ gbɔmɛi, kɛ jeŋmaji lɛ, kɛ—mɔ ko hu. Namɔ ji nakai mɔ lɛ?
11. Yoo ni yɔɔ Kpojiemɔ 17:5 lɛ ejie ehe kpo ni ana lɛ faŋŋ yɛ mɛɛ gbɛ nɔ?
11 Eji mfoniri-feemɔŋ yoo ko ni eje gbɛ ebɔ mɔdɛŋ waa akɛ eeeha ana lɛ akɛ “mɔ ko ni he hiaa.” Awieɔ ehe yɛ Kpojiemɔ 17:5 akɛ “teemɔŋ sane: ‘Babilon Kpeteŋkpele lɛ, shikpɔŋ lɛ nɔ ajwamaŋi lɛ kɛ nihiinii lɛ anyɛ lɛ.’” Shi ejeee teemɔŋ sane dɔŋŋ kɛha Yehowa Odasefoi. Ejie ehe kpo faŋŋ akɛ jeŋ apasa jamɔ maŋtsɛyeli lɛ, ni Kristendom jamɔ kui lɛ feɔ emli fa kpotoo. Bɔ ni ekɛ ehe woɔ maŋkwramɔŋ saji amli babaoo, ni “krɔŋkrɔŋbii lɛ ala lɛ . . . etɔ lɛ daa” kɛtsɔ yiwaa ni ekɛbaa anɔkwa Kristofoi anɔ lɛ nɔ, kɛ bɔ ni eha afɔse “mɛi fɛɛ ni agbe yɛ shikpɔŋ lɛ nɔ lɛ ala” ashwie shi, ní gbɔmɛi fe akpekpei oha ni agbe amɛ yɛ afii ohai 20 nɛɛ pɛ mli tai ni awuu lɛ mli lɛ fata he lɛ, ji nihiinii diɛŋtsɛ yɛ Yehowa hiɛ.—Kpojiemɔ 17:2, 6; 18:24.
12. Mɛni hewɔ ni abu Kristendom jamɔ kui lɛ fɔ lɛ.
12 Nɔ ni ehiii kwraa fe fɛɛ lɛ, Kristendom jamɔ kui lɛ kɛ heguɔgbee eba Nyɔŋmɔ, mɔ ni amɛkɛ osatofeemɔ kɛɔ akɛ amɛdamɔ enajiaŋ lɛ gbɛi anɔ. Yɛ nɔ najiaŋ ni amɛaatsɔɔ Nyɔŋmɔ Wiemɔ krɔŋŋ lɛ, amɛtsɔɔ Babilonbii kɛ Helabii ajeŋ nilee moŋ, ni amɛha jeŋmaji lɛ fɛɛ kɛ amɛhe ewo jeŋba mli fitemɔ mli kɛtsɔ jeŋba shara shihilɛ ni teɔ shi woɔ Biblia shishitoo mlai ni amɛkpɛlɛɔ nɔ lɛ nɔ. Ni wiemɔi ni yɔɔ Yakobo 5:1, 5 lɛ buɔ amɛteŋ mɛi ni kɛ ŋaalee kɛ hiɛjoomɔ tsuɔ nii amɛkɛnaa nii babaoo lɛ fɔ akɛ: “Agbɛnɛ, nyɛ niiatsɛmɛi hu, nyɛfoa ni nyɛwoa lele yɛ nyɛwerɛhoianii ni baaba nyɛnɔ lɛ ahewɔ! Nyɛye nyɛnaa nii yɛ shikpɔŋ lɛ nɔ ni nyɛbɔ ahoshwi; nyɛlɛ nyɛtsuii aahu kɛyashi gbee gbi lɛ nɔ.”
Babilon Kpeteŋkpele lɛ Sa Hiɛkpatamɔ!
13. Te klɛŋklɛŋ tutuamɔ ni amanehulu kpeteŋkpele lɛ kɛbaaba lɛ baaba aha tɛŋŋ, ni mɛɛ oyaiyeli ko amaa nɔ mi yɛ Kpojiemɔ 18:4, 5?
13 Klɛŋklɛŋ tutuamɔ ni amanehulu kpeteŋkpele lɛ kɛbaaba lɛ baaba kɛ Yehowa kojomɔ he nitsumɔ yɛ Babilon Kpeteŋkpele lɛ nɔ. Kpojiemɔ 17:15-18 tsɔɔ nɔ ni ji Nyɔŋmɔ “yiŋtoo” yɛ faŋŋ mli—akɛ ekɛ “akoloŋtoi nyɔŋma,” ni ji majimaji ateŋ Jeŋmaji Ekomefeemɔ “kooloo lɛ” mli hewalɛi kpelei lɛ baatsu nii, ni ekɛkpata ehiɛ kwraa. “Ni akoloŋtoi nyɔŋma ni ona lɛ, kɛ kooloo lɛ, amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ. Ejaakɛ Nyɔŋmɔ kɛwo amɛtsuiiaŋ koni amɛfee eyiŋtoo nii lɛ.” No hewɔ lɛ ebɛ naakpɛɛ akɛ ŋwɛi gbee ko kɛ kɔkɔbɔɔ ko ni he hiaa waa haa, yɛ Kpojiemɔ 18:4, 5 akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko. Ejaakɛ ehe eshai lɛ eshɛ ŋwɛi tɔ̃ɔ, ni Nyɔŋmɔ ekai enifɔjianii lɛ.” Tsɛmɔ lɛ yaa nɔ ejajeɔ akɛ: Nyɛkɛ apasa jamɔ fɛɛ afoɔ tako mli, dani efee akɛ ekpe sɛɛ fe nine!
14. Namɛi baawo yara yɛ Babilon kpeteŋkpele lɛ hiɛkpatamɔ lɛ he, ni mɛni hewɔ?
14 Te je lɛ baabu Babilon Kpeteŋkpele lɛ hiɛkpatamɔ lɛ amɛha tɛŋŋ? Maŋkwralɔi ni efite—“shikpɔŋ lɛ nɔ maŋtsɛmɛi lɛ”—baadamɔ sɛɛ fɛlɛŋŋ, ni amɛbaawo yara yɛ ehewɔ ejaakɛ amɛkɛ lɛ fɛɛ eye ŋɔɔmɔ yɛ afii ohai abɔ ni eho lɛ mli yɛ mumɔŋ ajwamaŋ ni amɛkɛ lɛ bɔ lɛ mli. Mɛi krokomɛi ni baafo ni amɛaaye ŋkɔmɔ yɛ ehewɔ hu ji jarayeli mli gbɔmɛi hiɛjoolɔi lɛ, ‘guɔyelɔi ni etsɔmɔ niiatsɛmɛi yɛ emli lɛ.’ Mɛnɛɛmɛi hu baatsi amɛhe kɛya sɛɛ fɛlɛŋŋ, ni amɛaakɛɛ: “Kpoo, kpoo, maŋ kpeteŋkpele lɛ ni woɔ klala fɛfɛo kɛ mama ni tamɔ afaseo diŋ kɛ mama ni tsuɔ tamɔ muneele, ni ewulaa kɛ shika kɛ tɛi ni jara wa kɛ adiagbai lɛ! Ejaakɛ ŋmɛlɛtswaa kome pɛ mli lɛ nɛkɛ nii afalɛ babaoo nɛɛ fɛɛ etsɔ amaŋfɔ!” Osɔfoi atadei wuji ni amɛkɛwulaa amɛhe kɛ bɔ ni je lɛŋ sɔlemɔtsui wuji lɛ yɔɔ fɛo ha lɛ fɛɛ baaho aya kɛya naanɔ! (Kpojiemɔ 18:9-17) Shi ani mɛi fɛɛ baafo yɛ Babilon kpeteŋkpele lɛ hiɛkpatamɔ lɛ hewɔ?
15, 16. Mɛɛ nɔdaamɔ nɔ Nyɔŋmɔ webii baana kɛha mlifilimɔ?
15 Kpojiemɔ 18:20, 21 haa hetoo akɛ: “Bo ŋwɛi, kɛ nyɛ krɔŋkrɔŋbii kɛ bɔfoi kɛ gbalɔi, nyɛnyaa yɛ ehewɔ, ejaakɛ Nyɔnmɔ ekojo lɛ eha nyɛ!” Taakɛ ashɛɔ wiɛ wulu afɔɔ ŋshɔŋ lɛ, nakai “aaashɛ Babilon maŋ kpeteŋkpele lɛ afɔ trukaa, ni anaŋ lɛ kwraa dɔŋŋ.”
16 Mɛɛ nifeemɔ ni kɛ miishɛɛ baa nɛ! Kpojiemɔ 19:1-8 yeɔ enɛ he odase jogbaŋŋ. Afɔɔ wɔ nine shii ejwɛ sɔŋŋ kɛjɛɔ ŋwɛi akɛ, “Haleluya,” aloo “Nyɛjiea Yah yi!” Nɛkɛ Haleluyai nɛɛ mli klɛŋklɛŋ etɛ lɛ jieɔ Yehowa yi ejaakɛ etsu jalɛ kojomɔ he nii yɛ ajwamaŋ ní hiɛ eshwie shi, ni ji Babilon kpeteŋkpele lɛ nɔ. Jeŋ apasa jamɔ maŋtsɛyeli lɛ bɛ dɔŋŋ! Ni gbee ko jɛ Nyɔŋmɔ maŋtsɛsɛi lɛ mli kɛɛ akɛ: “Nyɛjiea wɔ-Nyɔŋmɔ lɛ yi, nyɛ mɛi ni ji etsuji lɛ fɛɛ kɛ nyɛ mɛi ni nyɛsheɔ lɛ gbeyei, mɛi bibii kɛ mɛi wuji lɛ fɛɛ.” Kwɛ hegbɛ kpele ni wɔɔna akɛ wɔɔfata he yɛ nakai lala lɛ lamɔ mli!
Toobi lɛ Yookpeemɔ Lɛ
17. Kɛ akɛ Kpojiemɔ 11:17 kɛ 19:6 he lɛ, mɛɛ shishinumɔi enyɔ naa Yehowa bɔiɔ nɔyeli akɛ Maŋtsɛ yɛ?
17 Haleluya ni ji ejwɛ lɛ kɛ saneyitso kroko ko baa: “Haleluya, ejaakɛ Nuŋtsɔ, wɔ-Nyɔŋmɔ Ofe lɛ miiye maŋtsɛ.” Shi ani awooo yijiemɔ lala ni tamɔ nɛkɛ nɔ yɛ Kpojiemɔ 11:17 hu? Wɔkaneɔ yɛ jɛmɛ akɛ: “Wɔmiida bo shi, Nuŋtsɔ Nyɔŋmɔ Ofe lɛ, . . . akɛ oŋɔ ohewalɛ kpeteŋkpele lɛ ni ooye maŋtsɛ.” Hɛɛ. Shi, sane diɛŋtsɛ ni yɔɔ Kpojiemɔ 11:17 lɛ miitsɔɔ bɔ ni Yehowa ha Mesia Maŋtsɛyeli lɛ ba shihilɛ mli yɛ 1914 koni ekɛ ‘dadetso akpala jeŋmaji lɛ fɛɛ.’ (Kpojiemɔ 12:5) Shi Kpojiemɔ 19:6 miiwie Babilon kpeteŋkpele lɛ hiɛkpatamɔ he. Akɛni ajie jamɔ ni efee ehe tamɔ yoo ajwamaŋ lɛ kɛtee kwraa hewɔ lɛ, agbɛnɛ abu Nyɔŋmɔ ni Yehowa ji lɛ bem. Já ni aaajá lɛ akɛ Jeŋ Muu Fɛɛ Nɔyelɔ kɛ Maŋtsɛ lɛ baahi shi agbɛnɛ kɛya naanɔi anaanɔ!
18. Babilon Kpeteŋkpele lɛ hiɛkpatamɔ gbeleɔ gbɛ kɛhaa mɛɛ mlifilimɔ wiemɔ ko jajemɔ?
18 Enɛ hewɔ lɛ, abaanyɛ ajaje mlifilmɔ wiemɔi nɛɛ akɛ: “Nyɛhaa wɔmii ashɛa ni wɔmli afilia wɔ ni wɔwoa [Yah] hiɛ nyam! Ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto. Ni aha lɛ klala ni he tse ni kpɛɔ nyeramnyeram koni ewo, ejaakɛ klala lɛ ji krɔŋkrɔŋbii lɛ ajalɛ nii lɛ.” (Kpojiemɔ 19:7, 8) Be pɔtɛɛ mli ni mɛi ni afɔ amɛ mu ni eshwɛ yɛ shikpɔŋ nɛɛ nɔ lɛ anine baashɛ amɛ ŋwɛi shitee lɛ nɔ lɛ, no lɛ atsɔko. Shi amaa nɔ mi ahaa wɔ yɛ sane nɛɛ mli yɛ biɛ akɛ gbɛfaŋnɔ ni amɛbaana yɛ Toobi, Yesu Kristo yookpeemɔ lɛ mli lɛ baafee miishɛɛ be, ni ebaaba lɛ nakai hu akɛni amɛ diɛŋtsɛ amɛna ajwamaŋ ni hiɛ eshwie shi, Babilon Kpeteŋkpele lɛ hiɛkpatamɔ lɛ kɛ amɛhiŋmɛii lɛ hewɔ.
Akpata Satan Je lɛ Hiɛ
19. Mɛɛ nibii krokomɛi ni baaba awie he yɛ Kpojiemɔ 19:11-21?
19 Agbɛnɛ okpɔŋɔ yɛŋ ni atsi ta klɛŋklɛŋ kwraa yɛ Kpojiemɔ 6:2 lɛ ebaje kpo ni aana lɛ faŋŋ ekoŋŋ. Wɔkaneɔ yɛ Kpojiemɔ 19:11 akɛ: “Ni mɔ ni ta [okpɔŋɔ yɛŋ lɛ] nɔ lɛ, atsɛɔ lɛ akɛ: Heyelilɔ kɛ Anɔkwafo; ni jalɛ naa ekojoɔ ni ewuɔ ta yɛ.” Enɛ hewɔ lɛ, “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ” lɛ jeɔ kpo ni etaa okpɔŋɔ nɔ koni etswia jeŋmaji lɛ anii, ni enaanaa “Nyɔŋmɔ Ofe lɛ mlifu ni naa wa lɛ weinŋaanɔ lɛ nɔ.” No hewɔ lɛ, yakatswaa “shikpɔŋ lɛ nɔ maŋtsɛmɛi lɛ kɛ amɛtai” lɛ ebua amɛhe naa akɛ amɛyaawuu Har-Magedon ta lɛ. Okpɔŋɔ yɛŋ lɛ nɔ Talɔ lɛ baagbe ekunimyeli lɛ naa. Agbɛnɛ Satan shikpɔŋ nɔ gbɛjianɔtoo lɛ he nɔ ko kwraa eshwɛŋ dɔŋŋ.—Kpojiemɔ 19:12-21.
20. Mɛni baaba Abonsam diɛŋtsɛ nɔ?
20 Shi Abonsam diɛŋtsɛ hu? Awieɔ Kristo Yesu he yɛ Kpojiemɔ 20:1-6 akɛ “bɔfo ko [ni] miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfele lɛ kɛ kɔsɔŋkɔsɔ kpeteŋkpele ko yɛ edɛŋ.” Ni emɔ drako lɛ, blema Onufu lɛ, mɔ ni ji Abonsam kɛ Satan lɛ, ni efimɔ lɛ, ni eshɛ lɛ efɔ bu kwɔŋkwɔŋ lɛ mli, ni eŋa naa ni esoɔ naa hu ewo eyi. Akɛni ajie Satan kɛjɛ shihilɛ mli kwraa ni enyɛɛɛ elaka jeŋmaji lɛ dɔŋŋ hewɔ lɛ, Toobi lɛ kɛ eyemforo lɛ Afii Akpe Nɔyeli be ni yɔɔ nyam lɛ baaje shishi agbɛnɛ. Awerɛhoyeli yaafonui bɛ dɔŋŋ! Adam gbele lɛ hu dɔŋŋ! Ŋkɔmɔyeli, kɛ bolɔmɔ, kɛ piŋmɔ ko hu bɛ dɔŋŋ! “Ejaakɛ tsutsu nii lɛ eho etee!”—Kpojiemɔ 21:4.
21. Beni wɔkɛ miishɛɛ kpaa Yesu Kristo kpojiemɔ lɛ gbɛ lɛ, mɛni esa akɛ efee wɔfaishitswaa?
21 Beni wɔyaa nɔ wɔkɛ miishɛɛ mɛɔ wɔ-Nuŋtsɔ Yesu Kristo kpojiemɔ lɛ, nyɛhaa wɔjiea ekaa kpo ni wɔkɛgbaa mɛi krokomɛi Nyɔŋmɔ Maŋtsɛyeli lɛ he shiwooi ni tsɔɔ suɔmɔ lɛ he sane. Wɔkpɔmɔ ebɛŋkɛ kpaakpa! Eba akɛ wɔɔnyiɛ kɛya wɔhiɛ, hɛɛ, wɔya wɔhiɛ daa nɛɛ, akɛ Jeŋ Muu Fɛɛ Nuŋtsɔ Yehowa bii ni etsɔɔ amɛ nii!
Emlitii
◻ Mɛni tsɔɔ akɛ Yesu Kristo kpojiemɔ lɛ ebɛŋkɛ kpaakpa?
◻ Mɛɛ gbɛ nɔ Yehowa oweletɔɔ gbi lɛ aaatsɔ aba?
◻ Te esa akɛ “mɛi ni sumɔɔ Yehowa” lɛ abu jeŋ shihilɛ ni yɔɔ bianɛ nɛɛ amɛha tɛŋŋ?
◻ Kɛ amanehulu kpeteŋkpele lɛ je shishi lɛ, te nibii baanyiɛ sɛɛ aba aha tɛŋŋ?
[Mfoniri ni yɔɔ baafa 23]
Yesu ‘miiba kɛ atatui Iɛ,’ koni ebatsu kojomɔ he nii akɛ mɔ ni anaaa lɛ
[Mfoniri ni yɔɔ baafa 25]
Etsɛŋ ni apasa jamɔ, Satan yiwalɛ nibii agbɛjianɔtoo Iɛ, kɛ Satan diɛŋtsɛ hu fɛɛ baaya hiɛkpatamɔ mli