Tsakemɔ ye Nɔyeli Mli Etsɛŋ Kwraa!

Mɛi pii eku amɛhiɛ amɛshwie sane ni he hiaa fe fɛɛ lɛ nɔ. No ji enɛ: Jeŋmaji ni kɛ amɛhe shiɔ akaŋ yɛ jeŋ hewalɛ hepelemɔ mli lɛ nyɛɛɛ ayoo akɛ nɔyeli hewalɛ kpeteŋkpele ko ni da fe amɛ nɔ̃ lɛ yɛ. Amɛkuɔ amɛhiɛ amɛshwieɔ anɔkwale ni eji akɛ “Mɔ Ni Yɔɔ Ŋwɛi Shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔ haa mɔ fɛɛ mɔ ni esumɔɔ” lɛ nɔ. (Daniel 4:25) Namɔ ji mɔ nɛɛ ni Nyɔŋmɔ Ofe lɛ halaa lɛ akɛ maŋtsɛ yɛ shikpɔŋ muu lɛ fɛɛ nɔ lɛ? Mɛɛ be mli akɛ jeŋ nɔyeli hewalɛ woɔ edɛ?

Maŋtsɛ Kroko Yɛ Lolo

Dani Daniel aaagba yɛ “kooyigbɛ maŋtsɛ lɛ kɛ wuoyigbɛ maŋtsɛ” lɛ ahe lɛ, no mli lɛ ena gbalɛ ninaa ni kɔɔ maŋtsɛ ni Nyɔŋmɔ ehala lɛ lɛ he: “Mɔ ko tamɔ gbɔmɔbi kɛ ŋwɛi atatui miiba, ni eba mɔ ni eye gbii pii [Yehowa Nyɔŋmɔ] lɛ ŋɔɔ, ni akɛ lɛ ba ehiɛ; ni aha lɛ nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni ni emaŋtsɛyeli lɛ, nɔ ni fiteŋ ni.”​—Daniel 7:​13, 14.

Nakai ninaa lɛ tee nɔ ekɛ kooloi fee jeŋ hewalɛi ni baatsara nɔ aba lɛ he mfoniri. Ni yɛ anɔkwale mli lɛ, “gbɔmɔ eye enyɛmi gbɔmɔ nɔ ni ekɛye lɛ awui” tamɔ kooloi kɛ yiwaa feɔ nii. (Jajelɔ 8:​9, NW.) Gbɔmɛi hu eye nɔ yɛ mumɔi fɔji asafoi atuatselɔi ni feɔ amɛ nii tamɔ kooloi ni Satan diɛŋtsɛ ji amɛ lumɔ lɛ shishi. (Daniel 7:​17; 10:​13; Okɛto Kpojiemɔ 12:9; 13:​2-4 he.) Nɔ ni tamɔɔɔ enɛ lɛ, “mɔ ko tamɔ gbɔmɔbi” lɛ nine shɛɔ nɔyeli hewalɛ nɔ kɛjɛɔ Yehowa dɛ. Nɛkɛ nɔyelɔ ni Yehowa Nyɔŋmɔ ehala nɛɛ yɛ sui ni sa kɛha nɔyelɔ ni baaye adesai ni abɔ amɛ kɛjɛ shishijee “yɛ Nyɔŋmɔ subaŋ nɔ” lɛ anɔ. (1 Mose 1: 27) Shi namɔ nɛ?

Yesu kɛ wiemɔ “Gbɔmɔ bi” lɛ to lɛ diɛŋtsɛ ehe yɛ be mli ni eyɔɔ shikpɔŋ nɔ fii 1,900 ni eho nɛ lɛ. Akɛni eji adesa hewɔ lɛ, eji “Gbɔmɔ bi” diɛŋtsɛ, ni ejie sui kpakpai tamɔ suɔmɔ, hedɔɔ, kɛ jalɛsaneyeli kpo yɛ emuuyeli mli. Ekɛ ewala hu ha akɛ kpɔmɔ nɔ̃ kɛha adesai, ni ekɛ nakai feemɔ tsu nii akɛ adesai awekunyo ni bɛŋkɛ kpaakpa​—yɛ anɔkwale mli lɛ, “Gbɔmɔ bi.”​—Mateo 20:​28; Hebribii 2:​11-17.

Yɛ be mli ni ekɛ Daniel gbalɛ lɛ tsuɔ nii lolo lɛ, Yesu kɛɛ: “Ni amɛaana Gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo.” Yɛ sɛɛ mli lɛ, ejie ehe kpo yɛ mfonirifeemɔ ko ni tamɔ nakai nɔŋŋ mli akɛ: “Shi beni Gbɔmɔ bi lɛ aaaba yɛ enunyam lɛ mli . . . lɛ, eeeta enunyam sɛi Iɛ nɔ.” (Mateo 24:​30; 25:31) Ŋmɛnɛ, Yesu jeee gbɔmɔ ko kɛkɛ yɛ shikpɔŋ nɔ. Kɛjɛ be mli ni egbo ni atee lɛ shi yɛ afi 33 Ŋ.B. lɛ sɛɛ nɛɛ, etsɔ ŋwɛi mumɔŋ bɔɔnɔ yɛ Nyɔŋmɔ subaŋ nɔ. Akɛ mɔ ni tamɔɔɔ adesai nɔyelɔi lɛ, lɛ pɛ ji Maŋtsɛ “ni lɛ ekome eyɔɔ naanɔ shihilɛ ni gbele bɛ mli, ni ehiɔ la ni anyɛŋ abɛŋkɛ mli lɛ, mɔ ni gbɔmɔ ko gbɔmɔ ko enako lɛ da, ni enyɛŋ lɛ ena hu lɛ.” (1 Timoteo 6:16) Anaŋ kooloi asui ni mumɔi fɔji yiwalɔi ni amɛna adesa nɔyelii anɔ hewalɛ lɛ yɔɔ lɛ eko yɛ e-Maŋtsɛyeli nɔyeli lɛ mli.

No hewɔ lɛ Yesu pɛ ji Maŋtsɛ ni Nyɔŋmɔ ehala lɛ akɛ e-Mesia loo Kristo kɛ mɔ ni akɛ hewalɛ eha lɛ akɛ eye shikpɔŋ muu lɛ fɛɛ nɔ. (Daniel 7:14) Enɛ tsɔɔ akɛ adesa nɔyelii fɛɛ, ni “kooyigbɛ maŋtsɛ” lɛ kɛ “wuoyigbɛ maŋtsɛ” lɛ fata he lɛ baaba amɛnaagbee ni akɛ Nyɔŋmɔ Maŋtsɛyeli lɛ ni yɔɔ Kristo nɔyeli shishilɛ baato amɛnajiaŋ​—Daniel 2:​44; okɛto Lala 2:​7, 8, 12 he.

“Lumɔ Kpeteŋkpele Lɛ” Ŋɔ Hewalɛ

Shi, Yesu ejeee enɔyeli yɛ adesai anɔ lɛ shishi yɛ afi 33 Ŋ.B. Eyɛ be ko ni ekɛbaamɛ. Enɛ sɛɛ dani Yehowa kɛ hewalɛ ha lɛ akɛ “ye lumɔ yɛ ohenyɛlɔi ateŋ.” (Lala 110:​1, 2: Bɔfoi lɛ Asaji 2:​32-36) Yɛ be mli ni egbaa enɛ lɛ Daniel kɛɛ: “Ni nakai be lɛ mli lɛ, Mikael ni ji lumɔ kpeteŋkpele . . . lɛ aaate shi adamɔ shi; shi fimɔ be ko aaaba ni anako nɔ da kɛjɛ beyinɔ ni jeŋ maŋ yɔɔ lɛ kɛyashi nakai be lɛ mli.”​—Daniel 12:⁠1.

Nɛkɛ gbalɛ nɛɛ nyiɛ nɔ ni Daniel tsɔɔ akɛ mpleshii ni ka “kooyigbɛ maŋtsɛ” lɛ kɛ “wuoyigbɛ maŋtsɛ” lɛ teŋ yɛ ŋmɛnɛŋmɛnɛ “naagbee be” nɛɛ mli ni miishɛ enaagbee lɛ sɛɛ. Biɛ ji he ni ‘maŋtsɛmɛi’ nɛɛ ateŋ mɔ kome “kɛ mlila babaoo aaaje kpo” koni eyakpata mɛi pii ahiɛ lɛ. (Daniel 11:​14, 40, 44, 45) No mli Mikael “ni damɔ shi ha [Nyɔŋmɔ diɛŋtsɛ] maŋbii” lɛ baate shi ni etsu nii eha emɛ koni amɛnyɛ amɛje mli.​—Okɛto Daniel 11:​2, 3, 7, 20, 21; 12:1 he.

Shi te enɛ kɔɔ Yesu he ehaa tɛŋŋ? Kaimɔ akɛ ekɛ Daniel gbalɛ lɛ fata lɛ diɛŋtsɛ enɔ lɛ he ni ewie akɛ lɛ ji wɔsɛɛ be mli Maŋtsɛ lɛ. Ni enɛ mli hu ewie “amanehulu babaoo” ni anako nɔ nakai da lɛ he yɛ lɛ. (Mateo 24:​21, 29-31) Eka shi faŋŋ akɛ eewie “fimɔ be” ni Daniel tsi ta ekɛto Mikael he lɛ. (Okɛto Mateo 24:​15; Daniel 11:31 he.) Yesu jie ehe kpo lɛlɛŋ akɛ lɛ ji Mikael ni baadamɔ shi ni eye nɔ lɛ.

Yesu kɛ Daniel fɛɛ kɛ nɛkɛ gbalɛi nɛɛ ha yɛ be mli ni amɛtsɔɔ “naagbee be” lɛ mli lɛ. Nɛkɛ nibii nɛɛ eba mli titri lɛ, kɛjɛ 1914. No mli Yesu ŋɔ hewalɛ akɛ Maŋtsɛ yɛ ŋwɛi, ni eeye nɔ yɛ ehenyɛlɔi ateŋ​—Mateo 24:​3, 7-12.

Jeŋ Muu Fɛɛ Paradeiso​—Etsɛŋ Kwraa

Ekolɛ oyoo akɛ jeŋmaji lɛ nyɛɛɛ ayɔse Kristo Maŋtsɛyeli lɛ. Amɛkpoɔ sane ni kɔɔ no ni ato ama shi lɛ he lɛ, ni amɛyaa nɔ amɛmaa amɛ diɛŋtsɛ amɛ maŋtsɛyelii anɔ mi. Nakai sane lɛ ji kwashiai asane kɛha amɛ. No hewɔ lɛ, “nibii agbɛjianɔtoo nɛɛ mli nɔyelɔi lɛ eko” baleee Nyɔŋmɔ nilee ni ekɛhala Kristo akɛ Maŋtsɛ lɛ. Akɛni gbɛjianɔtoo koni Satan kɛ emumɔŋ lumɛi atuatselɔi lɛ yeɔ nɔ lɛ eshwila amɛhiŋmɛi hewɔ lɛ, amɛnaa amɛhe akɛ mɛi ni teɔ shi woɔ Mesia Maŋtsɛyɛli lɛ.​—1 Korintobii 2:8; ekɛto Luka 4:​5, 6; 2 Korintobii 4:4 he.

No hewɔ lɛ, taakɛ Yesu gba fɔ shi lɛ, awaa mɛi ni kɛ anɔkwayeli shiɛɔ Maŋtsɛyeli lɛ ayi lɛlɛŋ. Amɛbaaba tutuamɔi ni dara ashishi lolo. (Mateo 24:​9, 14; Daniel 11:​44, 45; ekɛto Ezekiel 38:​14-16 he.) Shi Yesu baaje kpo aba akɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ” koni ebawu eha ewebii lɛ. Nɛkɛ tawuu nɛɛ baaba naagbee yɛ kunimyeli kwraa mli kɛha Nyɔŋmɔ Maŋtsɛ ni ehala lɛ lɛ. Mɛi ni tutuaa ewebii lɛ ‘baaba amɛnaagbee ni mɔ ko bɛ ni baaye abua amɛ.’ No mli lɛ, akɛ ‘maŋtsɛmɛi’ krokomɛi lɛ fɛɛ eba hiɛkpatamɔ mli momo.​—Kpojiemɔ 11:​15, 18; 19:​11, 16, 19-21; Lala 2:​1-3, 6-9.

Akɛni “naagbee be” lɛ je shishi yɛ 1914 hewɔ lɛ, amrɔ nɛɛ eshɛ shɔŋŋ Yesu kɛɛ akɛ yinɔ ni na nakai shishijee lɛ hu baana enaagbee (Mateo 24:​32-34) No hewɔ lɛ, wɔmiibɛŋkɛ nakai anunyam be ni Kristo Yesu baaye shikpɔŋ lɛ nɔ nibii anɔ kwraa ni efee adesai toibolɔi fɛɛ ekome yɛ enɔyeli kome lɛ shishi lɛ he kɛ foi.

Hɛɛ, etsɛŋ ni nɔyeli tsakemɔ ko baaba. Ni kɛlɛ mɛni ji nɔ ni enɛ baatsɔɔ aha wɔ? Etsɔɔ akɛ ekolɛ owɔsɛɛ be baaba naagbee kɛ ŋmɛnɛŋmɛnɛ beaŋ adesa nɔyeli kɛ amɛsɛɛfilɔi lɛ aloo, ebaanyɛ etsɔɔ naanɔ wala kɛ shweshweeshwe shihilɛ yɛ shikpɔŋ nɔ paradeiso ni Nyɔŋmɔ Maŋtsɛyeli lɛ kwɛɔ nɔ ni ekudɔɔ lɛ mli aha bɔ, ni enɛ hu damɔ onifeemɔ nɔ. Enɛ baaba mli anɔkwale aha bo kɛji okɛ Yehowa Odasefoi akpekpei abɔ ni yɔɔ jeŋ fɛɛ lɛ fi Kristo nɔyeli lɛ sɛɛ yɛ anɔkwayeli mli.