Miishɛjemɔ Ni Jɛ Toiŋjɔlɛ Nyɔ Lɛ Ŋɔɔ
“Nyɛkɛ nɛkɛ wiemɔi nɛɛ ashɛjeshɛjee nyɛmii.”—1 TESALONIKABII 4:18.
1. Mɛɛ faikpamɔi loo sɔlemɔ ni Paulo fee tsɔɔ miishɛɛ ni eyɔɔ yɛ toiŋjɔlɛ he?
PAULO, ni ji bɔfo lɛ, miisumɔ waa ni Kristofoi asafo lɛ ana toiŋjɔlɛ. No hewɔ lɛ, ejeɔ ewoji 13 ni eŋmala ni abaa yi aha wɔ yɛ ŋmalɛ ni jɛ mumɔŋ lɛ mli lɛ ashishi kɛ faikpamɔ akɛ mɛi ni aŋmaa ahaa amɛ lɛ ana toiŋjɔlɛ ni jɛ Nyɔŋmɔ ŋɔɔ. Akɛ nɔkwɛmɔ nɔ lɛ, Paulo ŋma Tesalonika asafo ni shwereɔ lɛ akɛ: “Duromɔ kɛ toiŋjɔlɛ ni jɛ wɔtsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ ahanyɛ!” Kɛmiiba nakai wolo lɛ nɔŋŋ naagbee lɛ, ekpa fai akɛ: “Shi toiŋjɔlɛ Nyɔŋmɔ lɛ diɛŋtsɛ atsuu nyɛhe kwraa kɛmɔ shi, ni eto nyɛsusuma kɛ nyɛgbɔmɔtso muu lɛ fɛɛ ni shwamɔ ko akahi he yɛ wɔ-Nuŋtsɔ Yesu Kristo baa be lɛŋ.”—1 Tesalonikabii 1:1; 5:23.
2. (a) Te Paulo susuɔ asafo lɛ he ehaa tɛŋŋ? (b) Kristofoi onukpai baanyɛ anyiɛ Paulo nɔkwɛmɔ nɔ lɛ sɛɛ ŋmɛnɛ yɛ mɛɛ gbɛ nɔ?
2 Paulo kɛ enanemɛi lɛ tsu nii waa yɛ ‘tɔlɛ kɛ deŋmegbomɔ mli’ yɛ heyelilɔi heei lɛ ateŋ. Paulo kɛɛ: “Wɔmli jɔ yɛ nyɛteŋ, taakɛ bɔ ni biianyɛ hiɛɔ lɛ diɛŋtsɛ ebii dɔdɔɔdɔ lɛ. Ní akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛ aaahanyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” Ani wɔnuuu bɔ ni Paulo yɔɔ suɔmɔ diɛŋtsɛ kɛha nakai asafo lɛ he, ní ejwɛŋɔ amɛhe waa yɛ nakai wiemɔi lɛ amli Yɛ anɔkwale mli lɛ, nakai suɔmɔ lɛ nɔŋŋ onukpai ni ji Kristofoi jieɔ lɛ kpo yɛ Yehowa Odasefoi asafoi aaafee 50,000 ni ebɔle shikpɔŋ muu lɛ fɛɛ nɔ lɛ amli.—1 Tesalonikabii 2:7-9; Yohane 13:34, 35; 15:12-14.
3. (a) Timoteo he ba sɛɛnamɔ kɛha Tesalonika asafo lɛ yɛ mɛɛ gbɛ nɔ? (b) Enɛ kɛ mɛni kpaa gbee ŋmɛnɛ?
3 Kaalɔ, Satan kɛ haomɔi ba nakai Tesalonika Kristofoi lɛ anɔ. No hewɔ lɛ, Paulo tsu Timoteo kɛtee amɛŋɔɔ, bɔni afee ni ‘eha amɛfi shi ni eshɛje amɛmii yɛ hemɔkɛyeli lɛ mli.’ Timoteo ku esɛɛ kɛtee Paulo ŋɔɔ yɛ Ateene kɛ amaniɛbɔɔ kpakpa ni kɔɔ amɛhemɔkɛyeli kɛ suɔmɔ he. Amɛ fɛɛ amɛna miishɛɛ beni amɛnu amɛhemɔkɛyeli kɛ emuuyeli mli ni amɛhiɛ lɛ he lɛ, ni amɛtee nɔ amɛsɔle kɛha Nyɔŋmɔ ni eha amɛyimɔ obɔbɔɔbɔ yɛ nɔ ni amɛtɔɔ fa yɛ mli lɛ mli. (1 Tesalonikabii 3:1, 2, 5-7, 10) Enɛ hu tsɔɔ Teokrase gbɛjianɔtoo ni yɔɔ ŋmɛnɛ lɛ mli, bɔ ni nɔkwɛlɔi gbɛfalɔi tswaa asafoi lɛ amɛnaa shi, yɛ he ni agu nitsumɔ lɛ ni Yehowa Odasefoi sɔmɔɔ yɛ yiwaa ni mli wa po shishi lɛ.—Yes. 32:1, 2.
‘Yɛ Beni Eba Lɛ Mli’
4, 5. (a) Mɛɛ sɔlemɔ loo fai Paulo kpa yɛ biɛ, ni mɛni hewɔ esa akɛ wɔnya he waa ŋmɛnɛ lɛ? (b) Mɛni hewɔ wɔgbi nɛɛ ji gbi ni tsɔɔ nɔ ko krɛdɛɛ lɛ?
4 Bɔfo Paulo kɛ ewolo lɛ fa nɛɛ ba naagbee kɛ faikpamɔ akɛ: “Shi nyɛ lɛ, Nuŋtsɔ lɛ awonyɛ obɔbɔ, ni eha nyɛteke nɔ kɛ suɔmɔ ni nyɛkɛ sumɔɔ nyɛhe kɛ mɛi fɛɛ taakɛ bɔ ni wɔhu wɔsumɔɔ nyɛ lɛ; bɔni afee ni eha nyɛtsuii afi shi yɛ krɔŋkrɔŋfeemɔ mli ni shwamɔ ko akahi nyɛhe, yɛ Nyɔŋmɔ kɛ wɔ-Tsɛ lɛ hiɛ, yɛ wɔ-Nuŋtsɔ Yesu Kristo kɛ emɛi krɔŋkrɔŋi lɛ fɛɛ abaa be lɛ mli.”—1 Tesalonikabii 3: 12, 13.
5 Paulo miikwɛ wɔsɛɛ be shɔŋŋ yɛ biɛ, eekwɛ beni Yesu “eba kɛ nibii agbɛjianɔtoo nɛɛ naagbee” lɛ, beni “gbɔmɔ bi lɛ aaaba yɛ enunyam lɛŋ, ni ebɔfoi krɔŋkrɔŋi lɛ fɛɛ aaafata ehe” lɛ. Wɔ ŋwɛi Maŋtsɛ lɛ shɛ shi yɛ 1914. Yesu miikojo jeŋmaji komɛi ni yɔɔ shikpɔŋ nɔ bianɛ kɛmiijɛ enunyam maŋtsɛsɛi ni anaaa lɛ nɔ, ni eegbala heshibalɔi lɛ, adesai ni tamɔ gwantɛŋi lɛ kɛmiiha yibaamɔ kɛmiitsɔ “amanehulu kpeteŋkpele” lɛ mli kɛ agbɛnɛ kɛha naanɔ wala yɛ shikpɔŋ nɔ paradeiso lɛ mli—Mateo 24:3-21; 25:31-34, 41, 46.
Kitai kɛha Wɔhilɛ
6. Mɛɛ ŋaawoo loo kɔkɔbɔɔ ni Paulo kɛha esa akɛ wɔbo toi agbɛnɛ?
6 Ani oji mɔ ko ni nine miishɛ naanɔ wala oti lɛ nɔ? Kɛji nakai ni lɛ, esa akɛ obɔ nɔ ni Paulo ŋma yɛ hiɛ eha Tesalonikabii lɛ toi: “Agbɛnɛ nɔ ni eshwɛ lɛ, anyɛmimɛi, wɔmiikpanyɛ fai ni wɔmiiwonyɛ ŋaa yɛ Nuŋtsɔ Yesu mli, akɛ bɔ ni nyɛna kɛjɛ wɔdɛŋ bɔ ni sa akɛ nyɛba nyɛjeŋ nyɛha ni nyɛsa Nyɔŋmɔ hiɛ, kɛ bɔ ni nyɛbaa hu lɛ, ni nyɛteke nɔ fe tsutsu lɛ. Ejaakɛ nyɛle nɔ kitai ni wɔwonyɛ yɛ Nuŋtsɔ Yesu mli lɛ.” (1 Tesalonikabii 4: 1, 2) Mɛni ji “kitai” ni Paulo maa nɔ mi yɛ biɛ lɛ ekomɛi?
7. (a) Mɛɛ ‘kita’ ni he hiaa akɛhaa yɛ biɛ? (b) Yɛ be mli ni wɔnine eshɛ Nyɔŋmɔ mumɔ lɛ nɔ lɛ, mɛni hewɔ esaaa akɛ wɔŋmɛɛɔ bu ni wɔbuɔ lɛ he lɛ?
7 Klɛŋklɛŋ ‘kita’ lɛ kɔɔ jeŋba kpakpa he. Paulo jaje yɛ faŋŋ mli akɛ: “Ejaakɛ enɛ ji Nyɔŋmɔ suɔmɔnaa nɔ, nyɛhetsemɔ lɛ, ni nyɛtsi nyɛhe naa kɛjɛ ajwamaŋbɔɔ mli, ni nyɛteŋ mɔ fɛɛ mɔ ale lɛ diɛŋtsɛ enɔ lɛ hiɛmɔ yɛ hetsemɔ kɛ woo mli, jeee yɛ akɔnɔ hiɛdɔɔ mli, taakɛ bɔ ni jeŋmajiaŋbii ni leee Nyɔŋmɔ lɛ feɔ lɛ.” Yɛ miishɛɛ mli lɛ, ‘nyɛbale’ Nyɔŋmɔ kɛ e-Bi, Yesu Kristo ni wɔmiipele ni wɔnine ashɛ naanɔ wala nɔ. Kwɛ hiɛgbejiasane ni eeeji akɛ wɔɔŋmɛ gbɛ ni agbala wɔ kɛya je lɛŋ jeŋba shara ŋmɔtɔ lɛ mli ekoŋŋ! Nɔ ni yɔɔ mɔbɔ ji akɛ mɛi komɛi eje afii babaoɔ ni amɛhi gboklɛfoi aŋsaraŋ kɛ tsuŋwoi amli baloo amɛkɛ amɛwala be fɛɛ etsu nii yɛ ekaa naa yɛ maŋsɛɛ sanekpakpa shiɛmɔ sɔɔmɔ lɛ mli, kɛkɛ ni amɛŋmɛ gbɛ ni Kaalɔ lɛ du amɛ trukaa yɛ jeŋba he. Akɛni wɔnine eshɛ mumɔ krɔŋkrɔŋ lɛ nɔ hewɔ lɛ, eha akɛ ‘wɔfeŋ lɛ nidɔɔ nii’ kɛtsɔ bɔlɛnamɔ he jeŋba gbonyo ko nɔ!—1 Tesalonikabii 4:3-8; Yohane 17:3; 1 Korintobii 10:12, 13; Efesobii 4:30.
8, 9. (a) Mɛni ji “nyɛmimɛi asuɔmɔ” lɛ? (b) Mɛɛ gbɛ nɔ wɔɔtsɔ wɔna suɔmɔ ni tamɔ nɛkɛ, ni mɛɛ sɛɛnamɔ yɔɔ mli?
8 Paulo ‘kita’ ni nyiɛ sɛɛ lɛ kɔɔ phil·a·del·phiʹa, ni ji “nyɛmimɛi asuɔmɔ” he. (1 Tesalonikabii 4:9, 10) Enɛ ji a·gaʹpe, suɔmɔ ni damɔ mla nɔ lɛ kpojiemɔ yɛ gbɛ krɛdɛɛ nɔ, ni Paulo hu kɛ miishɛɛ jieɔ yi yɛ biɛ yɛ kuku 9 lɛ, kɛ agbɛnɛ yɛ yitso 8 kukuji 6 kɛ 12. Phil·a·del·phiʹa, ji hedɔɔ ko ni mli wa waa, taakɛ eka shi faŋŋ akɛ, eyɔɔ Yesu kɛ Petro teŋ, kɛ agbɛnɛ suɔmɔ ni ka David kɛ Yonatan teŋ lɛ. (Yohane 21:15-17; 1 Samuel 20: 17; 2 Samuel 1:26) Ahaanyɛ akɛfata a·gaʹpe he, ni akɛtswa naanyobɔɔ ni bɛŋkɛ kpaakpa ama shi, taakɛ, akɛ nɔkwɛmɔ nɔ lɛ, anaa yɛ naanyobɔɔ kɛ ekomefeemɔ ni miishɛɛ yɔɔ mli ni Yehowa Odasefoi pii naa mli ŋɔɔmɔ yɛ gbɛgbamɔ sɔɔmɔ lɛ kɛ teokrase nitsumɔi komɛi amli lɛ mli lɛ.
9 Paulo kɛɛ: “Nyɛyaa nɔ nyɛtekea nɔ fe tsutsu lɛ.” Wɔbaanyɛ wɔha wɔnyɛmimɛi asuɔmɔ lɛ mli alɛɛ yɛ be fɛɛ mli. Ni nɛkɛ su nɛɛ jeɔ kpo babaoo yɛ be mli ni onukpai kɛ asafoŋ sɔɔlɔi nyiɛɔ hiɛ yɛ ekaa naa yɛ Maŋtsɛyeli sɔɔmɔ mli lɛ mli. Kɛ́ mɛi ni yɔɔ asafo lɛ mli lɛ fɛɛ kɛ amɛhe wo ‘Maŋtsɛyeli lɛ taomɔ mli klɛŋklɛŋ’ lɛ, mligbalamɔi ni jɛ emuu ni adesa yeee hewɔ, mɛi ni kɛ amɛhe kpaaa gbee, kɛ naagbai ni tamɔ nakai bayeɔ gbɛhe ni ji enyɔ. Nyɛhaa wɔkɛ wɔhiŋmɛi amaa oti lɛ nɔ yɛ be fɛɛ mli!—Mateo 6:20, 21, 33; 2 Korintobii 4:18.
10. Akɛ Kristofoi lɛ, te wɔɔfee tɛŋŋ ‘wɔnyiɛ bɔ ni yɔɔ fɛo’?
10 Paulo kɛ ‘kita’ kroko fata he yɛ biɛ akɛ wɔkɛfee oti ni ma wɔhiɛ akɛ wɔɔfee kpoo ni wɔkɛ wɔjwɛŋmɔ ama wɔ diɛŋtsɛ wɔ nitsumɔi anɔ, ni wɔkɛ wɔniji atsu nii. Yɛ be mli ni ‘wɔnyiɛɔ bɔ ni sa’ yɛ wɔ daa gbi shihilɛi amli, wɔjieɔ suɔmɔ ni damɔ mla nɔ kɛ nyɛmimɛi ahedɔɔ kpo lɛ, abaaha wɔ nibii ni he hiaa wɔ lɛ fɛɛ.—1 Tesalonikabii 4:11, 12; Yohane 13 :35 Romabii 12:10-12.
Gbohiiashitee Hiɛnɔkamɔ lɛ Shɛjeɔ Mii
11. (a) Mɛni hewɔ Paulo kɛ gbohiiashitee lɛ ba mli agbɛnɛ? (b) Esa akɛ ŋaawoo ni jɛ Paulo ŋɔɔ nɛɛ asa wɔhe yɛ mɛɛ gbɛ nɔ?
11 Agbɛnɛ, bɔfo lɛ wie gbohiiashitee hiɛnɔkamɔ kpakpa lɛ he. Shi mɛni hewɔ esa akɛ Paulo kɛ nɛkɛ sane nɛɛ aba biɛ? Eesumɔ ni ewo enyɛmimɛi lɛ ahewalɛ ni amɛŋmɛ amɛtsui shi yɛ yiwai ni baa amɛnɔ lɛ mli. Oshara yɛ akɛ amɛbaalaaje amɛwala. Etamɔ nɔ ni mɛi komɛi ewɔ yɛ gbele mli yɛ nakai be lɛ mli. Miishɛjemɔ he miihia nanemɛi heyelilɔi lɛ. (1 Tesalonikabii 2:14-20) Akɛni amɛsusuɔ akɛ Kristo ‘baa be’ lɛ ebɛŋkɛ hewɔ lɛ, amɛmiijwɛŋ nɔ ni baaba mɛi ni amɛgboi momo lɛ anɔ lɛ he. Jeee akɛ nɔ ni Paulo ŋmaa agbɛnɛ lɛ kɛ miishɛjemɔ haa mɛi ni laajeɔ amɛsuɔlɔi Kristofoi lɛ pɛ kɛkɛ, shi moŋ, eji hewalɛwoo kɛha amɛ koni amɛŋmɛ amɛtsui shi kɛyashi Yehowa “gbi” lɛ aaafɛ. Esa akɛ Paulo ŋaawoo lɛ aye abua wɔ fɛɛ koni wɔfi shi shiŋŋ yɛ mumɔŋ, yɛ be mli ni wɔyaa nɔ wɔjajeɔ sanekpakpa lɛ wɔtsɔɔ, ni wɔkpaa nibii agbɛjianɔtoo nɛɛ naagbee kwraa gbɛ lɛ.
12. Mɛɛ miishɛjemɔ diɛŋtsɛ wɔbaanyɛ wɔna beni suɔlɔ ko egbo lɛ, ni kɛjɛ nɛgbɛ?
12 Paulo kɛɛ: “Anyɛmimɛi, wɔmiisumɔ akɛ nyɛle mɛi ni ewɔ lɛ ahe sane, koni nyɛkaye ŋkɔmɔ tamɔ mɛi ni eshwɛ lɛ, mɛi ni bɛ nɔhiɛkamɔ ko lɛ.” (1 Tesalonikabii 4:13) Mɛɛ miishɛjemɔ kɛ jwɛŋmɔŋ toiŋjɔlɛ anaa yɛ ehiɛnɔkamɔ lɛ mli nɛkɛ! Afii enumɔ ko sɛɛ lɛ, Paulo baaŋma ewolo ni ji enyɔ lɛ eyaha Kristofoi ni yɔɔ Korinto lɛ, ni ebaakɛɛ yɛ mli akɛ: “duromɔ kɛ toiŋjɔlɛ ni jɛ wɔ-Tsɛ Nyɔŋmɔ lɛ kɛ Nuŋtsɔ Yesu Kristo dɛŋ ahanyɛ. Ajɔɔ Nyɔŋmɔ kɛ wɔ-Nuŋtsɔ Yesu Kristo tsɛ lɛ, mɔ ni ji musuŋtsɔlɔi atsɛ kɛ miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ wɔmanehului lɛ fɛɛ mli, koni wɔ hu wɔnyɛ wɔkɛ miishɛjemɔ ni Nyɔŋmɔ ŋɔshɛjeɔ wɔ diɛŋtsɛ wɔmii lɛ ashɛje mɛi ni naa amanehulu lɛ amli.”—2 Korintobii 1:2-4.
13, 14. (a) Mɛni hewɔ Paulo sumɔɔ ni Kristofoi ale nɔ ni gbele ji diɛŋtsɛ lɛ? (b) Mɛni ji nɔ ni Ŋmalɛi lɛ tsɔɔ yɛ shihilɛ mli ni gbohii lɛ yɔɔ lɛ he?
13 Bɔfo lɛ sumɔɔɔ ni wɔfee mɛi ni leee shihilɛ mli ni gbohii lɛ yɔɔ lɛ ahe nɔ ko. Yɛ be ni sa mli lɛ, hemɔkɛyeli-kwamɔ kpeteŋkpele ko baabote mɛi ni kɛɔ akɛ amɛji Kristofoi lɛ ateŋ, ni yɛ enɛ hewɔ lɛ amɛbaaku amɛsɛɛ amɛya Babilonia kɛ Hela jeŋ nilee ahe. Nɛkɛ hemɔkɛyeli kwalɔi nɛɛ baakpɛlɛ Plato tsɔɔmɔ ni kɔɔ susuma ni gbooo ni yɔɔ mɔ mli lɛ nɔ—nɔ ko ni amrɔ nɛɛ eji tsɔɔmɔ titri yɛ apasa jamɔ jeŋ maŋtsɛyeli Iɛ mli fɛɛ lɛ. Teemɔŋ nibii sɔrɔtoi ni ebɔle “wala sɛɛ” he lɛ, kɛji akɛ yɛ ŋwɛi, hetsuumɔ he, aloo naanɔ piŋmɔ hu lɛ, enɛ kɛ anɔkwale miishɛjemɔ ko baaa. Agbɛnɛ hu wala ni gbele bɛ mli ni mɔ yɔɔ ‘yɛ emli lɛ teɔ shi ewoɔ gbohiiashitee tsɔɔmɔ la. ejaakɛ te aaafee tɛŋŋ atee mɔ ko shi kɛba wala mli ekoŋŋ kɛji akɛ esusuma lɛ gbooo?
14 Paulo miiŋma yɛ “mɛi ni ewɔ yɛ gbele mli” lɛ ahe yɛ biɛ. Hɛɛ, “mɛi ni ewɔ.” Gbɔmɔ ni ewɔ lɛ leee nɔ ko nɔ ko, ni enyɛɛɛ etsu nitsumɔ ko kwraa. (Okɛto Jajelɔ 9:5, 10 he.) Be ko shɛ yɛ Yesu sɔɔmɔ nitsumɔ lɛ mli ni ewie Lazaro he akɛ’“ewɔ,” ni ákɛ Yesu ‘baatsiɛ lɛ kɛjɛ ewɔɔ lɛŋ.’ Beni Kristo kaselɔi lɛ nuuu nakai wiemɔi lɛ ashishi lɛ, “Yesu kɛɛ amɛ faŋŋ akɛ: Lazaro egbo.” Gbohiiashitee he hiɛnɔkamɔ lɛ shɛje Lazaro nyɛmimɛi yei ni ji Marta kɛ Maria mii, ni Yesu kɛ miishɛjemɔ kroko hu baha amɛ. Shi kwɛ bɔ ni enɛ tswa amɛhemɔkɛyeli lɛ ema shi shiŋŋ yɛ be mli ni Yesu tee enaanyo lɛ ni egbo gbii ejwɛ sɔŋŋ lɛ shi kɛjɛ gbohii ateŋ lɛ!—Yohane 11:11-14, 21-25, 43-45.
15. (a) Awajeɔ hiɛnɔkamɔ ni wɔyɔɔ yɛ gbohiiashitee lɛ mli lɛ yɛ mɛɛ gbɛ nɔ? (b) Mɛɛ gbɛ nɔ aaatsɔ aye abua wɔ ni wɔkɛ hiɛshikamɔ ahi shi yɛ suɔlɔ ko gbele mli?
15 Nakai naakpɛɛ nii lɛ, kɛ Yesu diɛŋtsɛ nitsumɔi krokomɛi ni ekɛtee gbohii ashi lɛ, kɛ nɔ ni fe fɛɛ lɛ shi ni Yehowa tee Yesu diɛŋtsɛ lɛ—enɛɛmɛi fɛɛ ni ba ni aŋmala ashwie shi lɛ woɔ wɔhekɛnɔfɔɔ yɛ gbohiiashitee he hiɛnɔkamɔ ni yɔɔ naakpɛɛ lɛ mli hewalɛ. (Luka 7:11-17; 8:49-56; 1 Korintobii 15:3-8) Lɛlɛŋ, gbele kɛ awerɛho kɛ yaafonui baa, ni ewa akɛ aaahi shi yɛ be mli ni mɔ ni asumɔɔ lɛ lɛ bɛ dɔŋŋ. Shi mɛɛ miishɛjemɔ kɛ hewalɛ wɔnaa kɛjɛɔ nɔmimaa ni ji akɛ Nuŋtsɔ Maŋtsɛ Yehowa “aaami gbele kɛaatee naanɔ, ni . . . eeetsumɔ hiɛaŋ fɛɛ yaafonui” lɛ nɛkɛ! (Yesaia 25:8; Kpojiemɔ 21:4) Tsabaa ni hi fe fɛɛ kɛha awerɛho lɛ ateŋ ekome ji ni mɔ kɛ ehe aaawo Toiŋjɔlɛ Nyɔŋmɔ lɛ sɔɔmɔ mli kwraa, ni ekɛ Maŋtsɛyeli hiɛnɔkamɔ ni wɔ diɛŋtsɛ lɛ wɔkɛ shidaa kpɛlɛ nɔ lɛ aha mɛi krokomɛi —Okɛto Bɔfɔi lɛ Asaji 20:35 he.
Bɔ Ni Ato Gbohiiashitee Lɛ Naa Aha
16, 17. (a) Mɛɛ gbɛ nɔ aaatsɔ akpata “naagbee henyɛlɔ” lɛ hiɛ yɛ? (b) Paulo tsɔɔ bɔ ni áto gbohiiashitee lɛ naa áha lɛ mli yɛ mɛɛ gbɛ nɔ?
16 Wɔhemɔkɛyeli mli wa akɛ Kristo, “klɛŋklɛŋmɔ” yɛ gbohiiashitee lɛ mli kɛ agbɛnɛ mɔ ni awo lɛ maŋtsɛ yɛ Nyɔŋmɔ ninejurɔ nɔ yɛ ŋwɛi lɛ baatsu Yehowa anunyam Maŋtsɛyeli lɛ yiŋtoi ahe nii kɛmɔ shi. (Hebribii 6:17, 18; 10:12, 13) Taakɛ Paulo tsɔɔ mli yɛ wolo kroko mli lɛ: “Shi ja [Yesu Kristo] eye maŋtsɛ kɛyashi beyinɔ ni eeeŋɔ ehenyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji gbele.” Yɛ mɛɛ gbɛ nɔ? Efa ko ji kɛtsɔ gbohiiashitee lɛ kɛ nɔ ni ejɛ Adam gbele lɛ mli eba lɛ ni aaajie kɛya lɛ nɔ. Bɔfo lɛ etsɔɔ mli bianɛ akɛ: “Ejaakɛ bɔ ni gbele tsɔ gbɔmɔ nɔ kɛba lɛ, nakai nɔŋŋ shitee hu tsɔ gbɔmɔ nɔ kɛba. Ejaakɛ taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaana wala yɛ. Shi mɔ fɛɛ mɔ yɛ lɛ diɛŋtsɛ egbɛjianɔ: klɛŋklɛŋmɔ ji Kristo, no sɛɛ lɛ mɛi ni ji Kristo nii lɛ, yɛ ebaa lɛ mli.” (1 Korintobii 15:20-26) Bɔ ni ato gbohiiashitee lɛ naa aha nɛɛ he Paulo wieɔ yɛ eklɛŋklɛŋ wolo ni eŋma eyaha Tesalonikabii lɛ mli akɛ:
17 “Ejaakɛ kɛ wɔheɔ wɔyeɔ akɛ Yesu gbo ni ete shi lɛ, belɛ nakai nɔŋŋ Nyɔŋmɔ baatsɔ Yesu nɔ aŋɔ mɛi ni ewɔ lɛ hu afata ehe kɛba. Ejaakɛ wɔmiikɛɛnyɛ enɛ yɛ Nuŋtsɔ lɛ wiemɔ ko naa, akɛ wɔ mɛi ni wɔhiɛ kamɔ ni baashwɛ yɛ Nuŋtsɔ lɛ baa be lɛ mli lɛ, wɔtsɔŋ mɛi ni ewɔ lɛ ahiɛ; ejaakɛ lɛ Nuŋtsɔ lɛ diɛŋtsɛ kɛ oshebɔɔ kɛ ŋwɛibɔfo nukpa gbee kɛ Nyɔŋmɔ tɛtrɛmantrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi.”—1 Tesalonikabii 4:14-16.
18. Mɛɛ be mli atee mɛi ni afɔ amɛ mu lɛ ni “ewɔ ye gbele mli” lɛ ashi?
18 Yɛ 1914 sɛɛ, beni Yesu “eba” yɛ Maŋtsɛyeli hewalɛ mli lɛ, lɛ, akɛ bɔfo nukpa lɛ kɛ ŋwɛi famɔ ha koni “mɛi ni yɔɔ Kristo mli lɛ” abua amɛhe naa. Yɛ mɛi ni tamɔ nɛkɛ ni afɔ amɛ mu ni “amɛwɔ yɛ gbele mli” lɛ agbɛfaŋ lɛ, nɛkɛ tɛtrɛmantrɛ tsɛmɔ nɛɛ biɔ ni atee amɛ shi yɛ mumɔŋ kɛya ŋwɛi. Buu-Mɔɔ lɛ ewie kɛjɛ jeeŋmɔ akɛ nɛkɛ Kristofoi ni afɔ amɛ mu nɛɛ ashitee kɛmiijɛ gbele mli lɛ je shishi kɛjɛ afi 1918.
19. Mɛɛ be ni yɛ mɛɛ gbɛ nɔ “aaasha” mɛi ni eshwɛ lɛ “yɛ atatui amli,” ni kɛha mɛɛ yiŋtoo?
19 Shi, Kristofoi ni afɔ amɛ mu ni amɛshwɛ yɛ shikpɔŋ nɛɛ nɔ, ni amrɔ nɛɛ amɛyifalɛ nɔ gbɔɔ ni amɛshɛɛɛ 10,000 lɛ hu? Esa akɛ mɛnɛɛmɛi hu agbe amɛshikpɔŋ nɔ shihilɛ lɛ naa yɛ anɔkwayeli mli. Paulo ŋma yɛ amɛhe tamɔ nɔ ni ekɛ amɛ yɛ, yɛ beni Kristo eba lɛ mli akɛ: “No sɛɛ lɛ, wɔ mɛi ni wɔhiɛ kamɔ ni eshwɛ lɛ, aaasha wɔkɛ amɛ fɛɛ yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli, ni nakai wɔkɛ Nuŋtsɔ lɛ aaayahi shi daa.” (1 Tesalonikabii 4:17; okɛto Kpojiemɔ 1:10 he.) No hewɔ lɛ, yɛ be ni sa mli lɛ, abaatee 144,000 lɛ fɛɛ shi ni amɛyasɔmɔ akɛ osɔfoi kɛ maŋtsɛmɛi yɛ ŋwɛi Zion Gɔŋ lɛ nɔ kɛ Toobi Yesu Kristo. “Enɛ ji klɛŋklɛŋ shitee lɛ.” (Kpojiemɔ 14:1, 4; 20:4, 5) Shi mɛni mɛɔ adesai akpekpei toi akpekpei abɔ ni yɔɔ amɛgbohii abui amli bianɛ lɛ?
20, 21. (a) Mɛni kã adesai akpekpei toi akpekpei abɔ ni egboi yɛ amɛgbohii abui amli lɛ ahiɛ? (b) Mɛɛ kuu amɛgboiŋ kɛjɛŋ shikpɔŋ lɛ nɔ kɔkɔɔkɔ lɛ, ni mɛni hewɔ? (d) Kɛ kuu nɛɛ mli aŋkroaŋkroi komɛi aaagboi lɛ, mɛɛ miishɛɛ gbɛkpamɔ yɔɔ kɛha amɛ?
20 Eyɛ mli akɛ Paulo ejeee gbɛ etsiii mɛnɛɛmɛi ata yɛ klɛŋklɛŋ wolo ni eŋma eyaha Tesalonikabii lɛ mli moŋ, shi Kpojiemɔ 20:12 maa nɔ mi kɛhaa wɔ akɛ “gbohii lɛ, mɛi bibii kɛ mɛi wuji” baana shitee ni amɛyadamɔ Nyɔŋmɔ kojomɔ sɛi lɛ hiɛ. (Kwɛmɔ Yohane 5:28, 29 hu.) Shi, ŋmɛnɛ, ábua “asafo babaoo” lɛ ni amɛyibɔ shɛɔ akpekpei abɔ lɛ anaa mɔmɔ yɛ nakai maŋtsɛsɛi lɛ hiɛ. Ákɛ kuu lɛ, abaahere mɛnɛɛmɛi ayiwala hiɛkalɔi kɛtsɔ “amanehulu kpeteŋkpele” ni baa lɛ mli. Toobi lɛ kwɛɔ amɛ ni etsɔɔ amɛ gbɛ kɛyaa “wala nu bui ahe” no hewɔ lɛ amɛgboiŋ kɛjɛŋ shikpɔŋ lɛ nɔ dɔŋŋ. Shi yɛ gbɔlɛ aloo shihilɛ mli nibii ni aleee ni baa hewɔ lɛ amɛteŋ mɛi komɛi baanyɛ agboi yɛ be ni Nuŋtsɔ lɛ “eba” nɛɛ mli. (Kpojiemɔ 7:9, 14, 17; Jajelɔ 9:11) Ni mɛnɛɛmɛi hu?
21 Mra shitee he hiɛnɔkamɔ ni yɔɔ miishɛɛ ka shi ha nɛkɛ “toi krokomɛi” nɛɛ. (Yohane 10:16) Amɛhemɔkɛyeli kɛ amɛnitsumɔi ni tamɔ blema Abraham nɔ lɛ kɛ amɛ ebote amɛkɛ Nyɔŋmɔ teŋ naanyobɔɔ mli momo. Taakɛ nakai hii kɛ yei ni yɔɔ hemɔkɛyeli ni atsɔɔ bɔ ni amɛji yɛ Hebribii yitso 11 lɛ ji lɛ, nɛkɛ ŋmɛnɛŋmɛnɛ beaŋ “toi krokomɛi” nɛɛ eŋmɛ amɛtsui shi yɛ kaai sɔrɔtoi amli. No hewɔ lɛ, yɛ sane naatsɔɔmɔ ni ja naa lɛ, amɛ hu amɛbaana “shitee ni hi” ni ŋwanejee ko bɛ he akɛ eji mra nɔ yɛ Harmagedon Sɛɛ. (Hebribii 11:35; Yakobo 2:23) Yɛ anɔkwale mli lɛ, mɔ fɛɛ mɔ ni etsɔ hemɔkɛyeli nɔ ‘eye Yesu heloo ni enu ela’ lɛ baana eshiwoo nɛɛ mlibaa hu mli gbɛfaŋnɔ: “Eyɛ naanɔ wala, ni mi lɛ, matee lɛ shi, yɛ naagbee gbi lɛ nɔ.”—Yohane 6:54; Romabii 5:18, 21; 6:23.
22. Te wɔɔfee tɛŋŋ wɔkɛ nɛkɛ saji nɛɛ aaashɛjeshɛje wɔhe mii?
22 Yɛ be mli ni etee nɔ etsɔɔ anunyam gbohiiashitee he hiɛnɔkamɔ lɛ mli lɛ sɛɛ lɛ, Paulo tee nɔ ewo ŋaa akɛ: “No hewɔ lɛ nyɛkɛ nɛkɛ wiemɔi nɛɛ atsea nyɛtsui aŋmɛa nyɛmli.” (1 Tesalonikabii 4:18) Kɛkɛ ni etee nɔ etsɔɔ saji krokomɛi ni he hiaa ni kɔɔ “Nuŋtsɔ Yesu Kristo baa be” loo ba ni eba lɛ he lɛ mli. (1 Tesalonikabii 5:23) Mɛni ji nɛkɛ saji nɛɛ? Kwɛmɔ wiemɔ “Toiŋjɔlɛ ni Jɛ Nyɔŋmɔ Ŋɔɔ—mɛɛ Be?” lɛ mli.a
[Shishigbɛ niŋmai]
a Ajie kɛjɛ October 1, 1986 Watchtower lɛ mli.
Yɛ Enaamuamɔ Mli Lɛ
◻ Mɛɛ fai Paulo kpaa ehaa Kristofoi?
◻ Mɛɛ “kitai” bɔfo lɛ kɛhaa koni ahi aha wɔ?
◻ Nyɔŋma Wiemɔ lɛ shɛjeɔ wɔmii yɛ gbohii lɛ ahe yɛ mɛɛ gbɛ nɔ?
◻ Te Paulo tsɔɔ bɔ ni ato gbohiiashitee Iɛ he gbɛjianɔ aloo ato naaa aha tɛŋŋ?