Nyɛhia Shi “Shiŋŋ yɛ Hemɔkɛyeli Iɛ Mli”
“Shí mumɔ lɛ kɛɔ faŋŋ akɛ, naagbee gbii lɛ anɔ lɛ, mɛi komɛi aaakwa hemɔkɛyeli lɛ.”—1 Tim. 4:1.a
1. Kɛji akɛ mɔ ko gbee shi kɛjɛ hemɔkɛyeli lɛ he lɛ ani esa akɛ enɛ agba wɔnaa tsɔ?
1 ANI ohe jɔ̃ɔ bo waa ni ŋmiŋmi mɔɔ bo yakatswaa yɛ be mli ni oona aloo onu akɛ Kristofonyo ko ni ole miiŋmɛɛ ehe kɛmiiha ŋwanejee loo yiŋkɔshikɔshifeemɔ, ehe miijɔ ni ekolɛ eetse atua po ni eyashɛ heni agbɛnɛ eeshi Kristofoi asafo lɛ ni eebɔ mɔdɛŋ ni egbala mɛi krokomɛi kɛnyiɛ esɛɛ hu lɛ? Kɛji nakai ni lɛ, obaanyɛ ona miishɛɛ akɛ ooole akɛ, eyɛ mli akɛ nibii ni tamɔ nɛkɛ yɛ awerɛhoo moŋ, shi Ŋmalɛi lɛ tsɔ hiɛ ebɔ wɔ kɔkɔ akɛ enɛɛmɛi baaba.
2, 3. (a) Mɛni ji wiemɔ “hemɔkɛyeli kwamɔ” lɛ shishi, ni nɔmɔ ji klɛŋklɛŋ hemɔkɛyeli kwalɔ? (b) Mɛni ji nɔ ni hemɔkɛyeli kwamɔ gbɛ kɛba Israel kɛ Yuda nɔ?
2 Wiemɔ “hemɔkɛyeli kwamɔ” lɛ jɛ Hela wiemɔ ko ni eshishi ji “adamɔ sɛɛ flɛŋŋ,” “shigbeemɔ kɛmiijɛ nɔ ko he, foijee kɛmiijɛ nitsumɔ he,” “atuatsemɔ, nɔ ko he ŋmɛɛmɔ.” Klɛŋklɛŋmɔ ni gbee shi kɛjɛ Yehowa anɔkwa jamɔ he ji Satan Abonsam. No hewɔ lɛ lɛ ji klɛŋklɛŋ hemɔkɛyeli kwalɔ. (Yoh. 8:44) Eha klɛŋklɛŋ adesai enyɔ lɛ batsɔmɔ hemɔkɛyeli kwalɔi. (1 Mose, yitso 3) Yɛ Israel yinɔsane mra be mli tɔɔ nɛkɛ “shigbeemɔ kɛmiijɛ nɔ ko he” aloo ‘he ni atsɔɔ kɛjɛɔ’ anɔkwa jamɔ he lɛ ‘ba. Wɔkaneɔ akɛ:
“Shi amɛkojolɔi lɛ hu amɛbooo amɛ toi, shi moŋ amɛyabɔɔ ajwamaŋ kɛnyiɛɔ nyɔŋmɔi krokomɛi asɛɛ, ni amɛjaa amɛ; etsɛɛɛ kɛkɛ lɛ amɛje gbɛ ni amɛtsɛmɛi lɛ nyiɛ nɔ ni amɛbo Yehowa kitai lɛ atoi lɛ nɔ.”—Koj. 2:17.
3 Yɛ sɛɛ mli lɛ, Israel kɛ Yuda maŋtsɛmɛi lɛ ateŋ mɛi pii batsɔmɔ hemɔkɛyeli kwalɔi, ni amɛnyiɛ maji ni amɛyeɔ amɛnɔ lɛ ahiɛ kɛtee hemɔkɛyeli kwamɔ mli. Klɛŋklɛŋ lɛ Nyɔŋmɔ gbala kooyigbɛ Israel maŋtsɛyeli lɛ toi, akɛ: “Matsu lɛ [Asiria] kɛaatee jeŋ maŋ fɔŋ [Israel] ko nɔ.” (Yes. 10:6) Ni dani Babilonbii lɛ aaakpata Yerusalem ni ji Yuda maŋtiase lɛ hiɛ lɛ, Yehowa kɛɛ akɛ: “Ejaakɛ Yerusalem gbalɔi lɛ aŋɔɔ efɔŋfeemɔ [hemɔkɛyeli kwamɔ] jɛ kɛtee shikpɔŋ lɛ nɔ fɛɛ.” (Yer. 23:15) Hemɔkɛyeli kwamɔ aloo anɔkwa hemɔkɛyeli lɛ he ni atsɛɔ he kɛjɛɔ lɛ kɛ jɔɔmɔi ko baaa Israel kɛ Yuda.
Hemɛkɛyeli Kwamɔ Yɛ Mra Be Mli Kristofoi Lɛ Ateŋ
4. Mɛɛ kɔkɔ Yesu bɔ eshi hemɔkɛyeli kwalɔi?
4 Mra be mli yɛ eshikpɔŋ nɔ sɔɔmɔ lɛ mli lɛ, Yesu bɔ esɛɛnyiɛlɔi lɛ kɔkɔ eshi hemɔkɛyeli kwalɔi. Ekɛɛ yɛ e-Gɔŋ nɔ Shiɛmɔ lɛ mli akɛ:
“Nyɛbotea agbo fintɔŋŋ lɛ mli! Ejaakɛ agbo ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ mli lɛ:, ni mɛi ni boteɔ mli lɛ fa pii. Shi agbo fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no. Shi nyɛhiɛ ahia nyɛhe nɔ yɛ osato gbalɔi lɛ ahe, ejaakɛ amɛŋɔɔ toowolo amɛhaa amɛhe kɛbaa nyɛŋɔɔ, shi amɛmli gbɛ lɛ klaji fulɔi ji amɛ. Amɛyibii lɛ nyɛkɛ aaale amɛ.”—Mat. 7:13-16.
5. Mɛni ji nɔ ni Paulo wie yɛ hemɔkɛyeli kwalɔi ahe?
5 Yɛ no sɛɛ afii nyɔŋmai enyɔ kɛ enumɔ lɛ, Paulo bɔ Efeso onukpai ni ji Kristofoi lɛ kɔkɔ akɛ: “Ejaakɛ mile akɛ, kɛ́ mikpa mihe lɛ, klaji fulɔi baabote nyɛteŋ, ni amɛbaaŋ toikuu lɛ yi; ni nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ.” (Bɔf. 20:29, 30) Paulo tsi nɛkɛ klɛŋklɛŋ afii oha lɛ mli hemɔkɛyeli kwalɔi lɛ ateŋ mɛi komɛi agbɛi ata yɛ enaagbee niŋmaai ni jɛ mumɔŋ lɛ mli. Ebɔ Timoteo kɔkɔ akɛ: “Shi yakayaka sanegbaa ni buleɔ mɔ lɛ, tsi ohe kɛjɛ he; ejaakɛ amɛaatee hiɛ pii yɛ nɔshafeemɔ mli, ni amɛwiemɔ lɛ aaatsɛŋe tamɔ hela fɔŋ ko kɛaakpe: amɛteŋ mɛi komɛi ji Himeneo kɛ Fileto, mɛi ni edu gbɛ kɛjɛ anɔkwale lɛ he, ni amɛbutuɔ mɛi komɛi ahemɔkɛyeli.” “Aleksandro, sɔɔlɔ lɛ, fee mi efɔŋ naakpa: bo hu kwɛ ohe ni ahi yɛ ehewɔ, ejaakɛ eku wɔwiemɔi lɛ anaa naakpa.”—2 Tim. 2:16-18; 4:14, 15.
6. Mɛni ji sui ni anaa ni haa ayooɔ hemɔkɛyeli kwalɔi diɛŋtsɛ lɛ?
6 Kɛji akɛ wɔtao nɛkɛ kɔkɔbɔɔi ni Yesu kɛ Paulo kɛha nɛɛ mli lɛ, nibii sɔrɔtoi ni jejee amɛhe nɛɛ jeɔ kpo ni ayooɔ yɛ hemɔkɛyeli kwalɔi lɛ ahe:
(1) Anɔkwale lɛ he ni aduɔ gbɛ kɛjɛɔ
(2) Yaka wiemɔi ni ekɔdɔ ni ejaaa ni awieɔ
(3) Mɔdɛŋ ni abɔɔ koni akɛfite mɛi krokomɛi ahemɔkɛyeli ni amɛgbala kaselɔi lɛ kɛnyiɛ amɛdiɛŋtsɛ amɛsɛɛ
(4) Osatofeemɔ (‘klaji ni amɛŋɔ toowolo amɛha amɛhe’)
(5) Atsɔɔ amɛyibii anɔ akɛlɛɔ amɛ; ‘amɛaaya amɛhiɛ pii yɛ nɔshafeemɔ mli’
Nɛkɛ okadii ni tsɔɔ nɔ ko diɛŋtsɛ nɛɛ baaye abuɔ mra be mli Kristofoi lɛ ni amɛyoo hemɔkɛyeli kwalɔi lɛ oya ni ‘amɛkwɛ amɛhe nɔ jogbaŋŋ yɛ amɛhe.’
Hemɔkɛyeli Kwamɔ Yɛ “Naagbee Gbii Lɛ Anɔ”
7. Mɛɛ be mli hemɔkɛyeli kwamɔ babaoo ba, ni mɛɛ ŋmalɛ gba enɛ he sane efɔ shi?
7 Hemɔkɛyeli kwamɔ lɛ ni “miitsu nii momo” yɛ be mli ni Kristo bɔfoi lɛ ekomɛi yɔɔ wala mli lolo lɛ bashwere yɛ “naagbee gbii lɛ anɔ,” ni ji akɛ, yɛ amɛgbele sɛɛ. Okadii enumɔ ni je kpo ni tsɔɔ nɔ ko pɔtɛɛ nɛɛ mli baka shi faŋŋ kɛjɛ afii ohai enyɔ lɛ nɔ kɛyaa ni eyashɛ heni da fe fɛɛ yɛ afii ohai ejwɛ lɛ mli. Nɛkɛ hemɔkɛyeli kwamɔ ni mɛi pii kɛ amɛhe baawo mli nɛɛ baaba dani “wɔ-Nuntsɔ Yesu Kristo ba ni eba” lɛ kɛ “Yehowa gbi” lɛ aaashɛ.—2 Tes. 2:1-12, NW.
8, 9. (a) Mɛɛ kɔkɔbɔɔ Petro kɛha ni kɔɔ naagbee gbii lɛ ahe? (b) Ani esa akɛ nɛkɛ “hefɛoyelɔi” kɛ ‘gbɔmɛi ni kwaa mla’ nɛɛ afee mɛi ni yɔɔ Kristofoi asafo lɛ sɛɛ pɛ?
8 Shi ŋmalɛi krokomɛi feɔ lɛ faŋŋ akɛ yɛ nibii agbɛjianɔtoo nɛɛ “naagbee gbii” lɛ mli po lɛ saji ni kɔɔ hemɔkɛyeli kwamɔ he baaba yɛ anɔkwa Kristofoi asafo lɛ mli. Bɔfo Petro ŋma akɛ:
“Naagbee gbii lɛ anɔ lɛ hefɛoyelɔi aaaba kɛ hefɛoyeli, mɛi ni aaanyiɛ yɛ amɛdiɛŋtsɛ amɛkɔnɔi lɛ anaa, ni amɛaakɛɛ:
‘Nɛgbɛ ba ni eba lɛ he shiwoo lɛ yɔɔ?’ Agbɛnɛ nyɛ lɛ, suɔmɔmɛi, akɛni nyɛle momo sa hewɔ lɛ, nyɛsraa, koni akɛ gbɔmɛi foji alakamɔ sane lɛ akashata nyɛhu, ni nyɛjɛ nyɛdiɛŋtsɛ nyɛ shifimɔ lɛ mli nyɛgbee shi.”—2 Pet. 3:3, 4, 17, NW.
9 Jeee akɛ Petro miibɔ enyɛmimɛi lɛ kɔkɔ yɛ “hefɛoyelɔi” kɛ “gbɔmɛi foji” ni yeee mla nɔ ni yɔɔ je lɛ mli lɛ ahe. Kristofoi le nɛkɛ eshara ni jɛ je lɛ mli lɛ jogbaŋŋ. Petro miiwie oshara ni yɔɔ ‘lakamɔ’ ni mɛi komɛi ni yɔɔ Kristofoi asafo lɛ mli ni baatsɔmɔ hefɛoyelɔi ni amɛye gbalɛi ni kɔɔ ‘ba ni Kristo eba’ lɛ he lɛ he fɛo ni amɛŋɔ mlakwamɔ su amɛkɛte shi amɛshi “tsulɔ enɔkwafo kɛ nilelɔ” lɛ kɛ Kristofoi asafo lɛ Nɔyeli Kuu lɛ kɛ onukpai ni ahala amɛ lɛ ni ‘amɛaalaka amɛ’ lɛ he.
Nɔ Ni Kɛ Hemɔkɛyeli Kwamɔ Baa Kɛ Nɔ Ni Jɛɔ Mli Baa
10, 11. (a) Mɛni ji nɔ titri ni kɛ hemɔkɛyeli kwamɔ baa? (b) Mɛni ji Hela Wiemɔ ni atsɔɔ shishi akɛ “aje ŋwane” lɛ Shishinumɔi krokomɛi, ni mɛɛ gbɛ nɔ hemɔkɛyeli kwalɔ Iɛ diɛŋtsɛ toɔ ehe akɛ kojolɔ?
10 Yɛ nibii sɔrɔtoi ni kɛ hemɔkɛyeli kwamɔ baa lɛ ateŋ lɛ, ekome ni jeɔ kpo waa ni ŋwanejee ko kwraa bɛ he ji hemɔkɛyeli ni abɛ kɛtsɔ ŋwanejee loo yiŋkɔshikɔshifeemɔ nɔ. (Heb. 3:12) Nɔ ni yɔɔ miishɛɛ ji akɛ, The New International Dictionary of New Testament Theology kɛ amaniɛbɔɔ ni nyiɛ sɛɛ nɛɛ haa yɛ Hela feemɔ-wiemɔ ni afɔɔ shishitsɔɔmɔ akɛ “aje ŋwane” [yiŋ afee kɔshikɔshi]”: “Diakrino, akɛ sɔrɔtofeemɔ aba, akojo, . . . ; aje ŋwane, ahoso. Yɛ [Kpaŋmɔ Hee] lɛ mli wiemɔi komɛi amli lɛ ŋwanejee jeɔ kpo akɛ hemɔkɛyeli ni abɛ ni no hewɔ lɛ eji esha (Rom. 14:23) . . . . Yɛ Rom. 4:20 lɛ akɛ ŋwanejee loo yiŋkɔshikɔshifeemɔ toɔ he ni aheee ayeee he. No hewɔ lɛ ŋwanejee ji he ni aheee Nyɔŋmɔ nifeemɔ ni yɔɔ lolo ni ebaatsu ni esa akɛ gbɔmɛi amɛ enɛ lɛ ayeee. Yɛ KH (Kpaŋmɔ Hee) lɛ mli lɛ ŋwanejelɔ lɛ feɔ esha eshiɔ Nyɔŋmɔ kɛ eshiwooi lɛ, ejaakɛ ekojoɔ Nyɔŋmɔ yɛ amale mli.”
11 No hewɔ lɛ mɔ ni jeɔ ŋwane kɛyashɛɔ heni ebatsɔɔ hemɔkɛyeli kwɛlɔ lɛ feɔ lɛ diɛŋtsɛ ehe kojolɔ. Esusuɔ akɛ ele jogbaŋŋ fe enanemɛi Kristofoi, ni ele jogbaŋŋ hu fe “tsulɔ anɔkwafo kɛ nilelɔ” lɛ, mɔ ni etsɔ enɔ ekase nɔ ni hi fe fɛɛ, kɛ́ jeee nɔ fɛɛ nɔ po ni ele ni kɔɔ Yehowa Nyɔŋmɔ kɛ eyiŋtooi ahe lɛ. Enaa heyeli mumɔ ko yɛ emli, ni “ewooɔ ehe yɛ etsui mli . . . ” nɔ ko ni “Yehowa miihi.” (Abɛi 16:5) Hemɔkɛyeli kwalɔi nɛɛ ateŋ mɛi komɛi po susuɔ akɛ amɛle fe Nyɔŋmɔ, yɛ bɔni etoɔ nibii ahe gbɛjianɔ ehaa yɛ eyiŋtooi ahe nitsumɔ mli lɛ. No hewɔ lɛ nibii krokomɛi enyɔ ni kɛ hemɔkɛyeli kwamɔ baa ji trumufeemɔ kɛ hewoo.—2 Pet. 2:10b,13a.
12. Mɛni ji nibii ni jɛɔ atuatsemɔ kɛ hemɔkɛyeli kwamɔ mli baa lɛ ekomɛi?
12 Nɔ ni jɛɔ hemɔkɛyeli kwamɔ gbɛ ni mɔ ko tsɔɔ nɔ lɛ mli baa ji miishɛɛ ni alaajeɔ amrɔ nɔŋŋ. Hemɔkɛyeli kwɔlɔ lɛ bafeɔ keketee yɛ etuatsemɔ gbɛi lɛ anɔ. Nɔ kroko hu ji akɛ eyeee mumɔŋ niyenii ni “tsulɔ anɔkwafo kɛ nilelɔ” lɛ kɛhaa lɛ—enɛ haa egbɔjɔɔ yɛ mumɔŋ ni ebatsɔɔ mɔ ni ekumɔ yɛ mumɔŋ. Yɛ be mli ni ekɛ miishɛɛ ni etsuji lɛ yɔɔ lɛ toɔ awerɛho shihilɛ ni hemɔkɛyeli kwalɔi lɛ yɔɔ mli lɛ he lɛ, Yehowa jaje yɛ gbalɛ naa akɛ:
“Naa, mitsuji lɛ aaaye nii, shi nyɛ lɛ hɔmɔ aaaye nyɛ; naa, mitsuji lɛ aaanu nii, shi nyɛ lɛ, kumai aaaye nyɛ; naa, mitsuji lɛ aaanya, shi nyɛ lɛ, nyɛhiɛ aaagboi; naa, mitsuji lɛ aaala kɛ tsuijurɔ, shi nyɛ lɛ nyɛaabolɔ kɛ tsuiŋdɔlɛ, ni nyɛkɛ mumɔ ni ekumɔ aaafo yɔɔ!”—Yes. 65:13, 14.
13. Mɛni ji “amɛgbeɔ nɔyeli he guɔ” Iɛ shishi ni mɛni jɛɔ enɛ mli baa? (Yuda 8, 10)
13 Yɛ be mli ni amɛŋmɛɛ amɛhe amɛha heloo lɛ nitsumɔi tamɔ “nyɛɛ, bei, awuŋayelii, mlilawooi, bɔlɔmɔi, atuatsemɔi, mligbalamɔi” lɛ, hemɔkɛyeli kwalɔi lɛ kɛ amɛhe yawoɔ heloo lɛ nitsumɔi krokomɛi amli tamɔ “daatɔɔi,” “nyenyeŋtswibɔɔi” kɛ “ajwamaŋbɔɔ” mli. (Gal. 5:19-21) Petro bɔɔ wɔ kɔkɔ yɛ mɛi ni “gbeɔ nɔyeli he guɔ” kɛtsɔ bu ni amɛbuu teokrase gbɛjianɔtoo lɛ, mɛi ni ‘wieɔ mɛi ni akɛgbɛnaanii ewo amɛdɛŋ yɛ Kristofoi asafo lɛ mli lɛ ahe efɔŋ,’ ni ‘amɛjeɔ gbɛ ni ja lɛ nɔ’ lɛ ahe. Ekɛɔ akɛ “amɛnaagbee shihilɛ etsɔ efɔŋ kɛha amɛ fe tsutsu nɔ lɛ.” Kanemɔ 2 Petro, yitso 2 lɛ jogbaŋŋ.
Gbɛ Ni Aaatsɔ Nɔ Akwa ‘Hemɔkɛyeli Lɛ He Ni Aaakpale Kɛaajɛ’
14, 15. Mɛɛ gbɛ nɔ wɔɔtsɔ wɔkwa hewoo?
14 Wɔna akɛ nibii titrii ni haa akwaa hemɔkɛyeli Iɛ ateŋ ekome ji hemɔkɛyeli ni anaaa ni baa kɛtsɔɔ ŋwanejee loo yiŋkɔshikɔshifeemɔ ni fiteɔ nii nɔ, ni agbɛnɛ wiemɔ ni atsɔɔ shishi akɛ “ŋwanejee” Iɛ hu tsɔɔ “ni apɛi nii amli.” Hemɔkɛyeli kwalɔ lɛ feɔ ehe mɔ ni toɔ eyiŋ yɛ nɔ ni ji anɔkwale kɛ nɔ ni ji amale he, yɛ nɔ ni ji “ekpakpa kɛ efɔŋ” yɛ Mumɔŋ niyenii he lɛ he. Ebafeɔ mɔ ni wooɔ ehe.—Okɛto 1 Mose 2:17; 3:1-7 he.
15 Beni afee ni akwa hemɔkɛyeli lɛ he ni aaakpale kɛaajɛ Iɛ, esa akɛ Kristofonyo lɛ akwɛ jogbaŋŋ yɛ hemɔkɛyeli ni anaaa he, nakai “esha ni ebɔle wɔhe kpula lɛ,” koni “wɔkɛ tsuishitoo ada foi ni ka wɔhiɛ lɛ.” (Heb. 12: 1; 3:12, 19) Paulo kɛ nɛkɛ ŋaawoo nɛɛ ha wɔ: “Nyɛkaa nyɛdiɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo; nyɛkwɛa nyɛdiɛŋtsɛ nyɛhe ni ahia.” (2 Kor. 13:5) Paulo tsɛɛɛ wɔ ni wɔje “hemɔkɛyeli lɛ” he ŋwane, shi moŋ ni wɔbi wɔdiɛŋtsɛ wɔhe sane, akɛ wɔmiihi shi yɛ hemɔkɛyeli lɛ mli aloo dabi. Esa akɛ wɔdiɛŋtsɛ wɔmli ni wɔɔpɛi nɛkɛ yɛ anɔkwayeli mli lɛ kɛ hiɛshikamɔ kɛ heshibaa awo wɔmli koni ebu wɔhe kɛjɛ hemɔkɛyeli kwalɔ lɛ heyeli mumɔ kɛ hewoo lɛ he.
16. (a) Mɛɛ osharai krokomɛi esa akɛ wɔkwa? (b) Mɛɛ nikasemɔi enyɔ wɔbaanyɛ wɔkase kɛjɛ Yudafoi Beroiabii lɛ adɛŋ?
16 Beni afee ni wɔkwa hemɔkɛyeli lɛ ni wɔɔgbee shi kɛaajɛ he lɛ, ehe miihia ni wɔkwɛ wɔhe nɔ jogbaŋŋ yɛ trumufeemɔ he. Esa akɛ wɔda shi yɛ mumɔŋ niyenii babaoo ni wɔnine shɛɔ nɔ kɛtsɔɔ “tsulɔ anɔkwafo kɛ nilelɔ” Iɛ nɔ lɛ hewɔ. (Mat. 24:45) Enɛ etsɔɔɔ akɛ esaaa akɛ wɔnaa nibii loo saji anɔmimaa wɔhaa wɔhe yɛ be mli ni wɔyaa nɔ lɛ. Wɔbaanyɛ wɔkase nibii sɔrɔtoi enyɔ yɛ enɛ mli kɛjɛ Yudafoi ni ji Beroiabii Iɛ ahe. Beni afee ni amɛna nɔmimaa yɛ nɔ ni amɛkaseɔ Iɛ mli lɛ, ‘amɛpɛiɔ Ŋmalɛi lɛ amli jogbaŋŋ daa nɛɛ amɛkwɛɔ akɛ nibii nɛɛ yɛ mli nakai lo,’ shi kɛlɛ amɛji mɛi ni amɛ “su hi” ejaakɛ “amɛjie amɛyitsoŋ amɛmɔ wiemɔ [ni Paulo kɛ Sila shiɛɔ tsɔɔ amɛ] lɛ mli.”—Bɔf. 17:11.
17, 18. Mɛni esa akɛ wɔnyɛ wɔyoo ni wɔkɛ mligbalamɔ aba mli, ni mɛɛ ŋaawoo Paulo kɛhaa yɛ enɛ he?
17 Nɛkɛ shidaa kɛ yitsoŋ ni ajieɔ akɛkaseɔ nii lɛ baaye abua wɔ beni afee ni wɔna suɔmɔ kɛ anɔkwale nilee, kɛ sɛɛyoomɔ fɛɛ. Nɛkɛ Kristofoi asu nɛɛ hu baanyɛ aye abua wɔ ni wɔyoo nibii ni he hiaa titri kɛ nɔ ni he ehiaaa tsɔ lɛ, Ani sane ko ni eshishinumɔ wa kɛha wɔ lɛ he hiaa nakai? Ani enaa hewalɛ yɛ nibii ni he hiaa titri ni wɔkase kɛtsɔ “tsulɔ” kuu lɛ yelikɛbuamɔ nɔ lɛ nɔ? Ani esa akɛ enɛ atɔ̃tɔ̃ wɔdiɛŋtsɛ kɛ mɛi krokomɛi anane? Ani enɛ tsiɔ wɔnaa koni wɔkawo Kristofoi ayibii?
18 Paulo woɔ wɔ ŋaa akɛ: “Ni enɛ he fai mikpaa,akɛ nyɛsuɔmɔ lɛ afa kɛya nɔ, ni eteke nɔ fe tsutsu lɛ yɛ nilee kɛ sɛɛyoomɔ fɛɛ gbɛfaŋ, ni nyɛyoɔ nii ni hi titri lɛ, koni nyɛfee krɔŋŋ ni nanetɔtɔmɔ ko akahi nyɛhe kɛyashi Kristo gbi lɛ nɔ; ni jalɛ yibii ni awoɔ yɛ Yesu Kristo mli lɛ, ayimɔ nyɛ obɔbɔ aha Nyɔŋmɔ anunyam kɛ yijiemɔ.”—Fil. 1:9-11
Ŋwanejelɔi Lɛ Ni Aaasha Amɛ Kɛjɛ La Lɛ Mli
19. (a) Mɛɛ mligbalamɔ kroko esa akɛ wɔfee? (b) Mɛɛ ŋaawoo kroko ni tswaa mɔ maa shi Yuda kɛha?
19 Akɛni abɔ wɔ kɔkɔ akɛ “mɛi komɛi aaakwa hemɔkɛyeli lɛ” hewɔ lɛ, esa akɛ wɔfee klalo ni “nyɛpele hemɔkɛyeli ni atu awo krɔŋkrɔŋbii lɛ adɛŋ shikome lɛ he.” (1 Tim. 4:1; Yuda 3) Shi ehe miihia ni wɔgbala hemɔkɛyeli kwalɔi ni kɛ naagbai baa ni atsi amɛta yɛ 2 Petro, yitso 2 lɛ, kɛ Kristofoi ni amɛhemɔkɛyeli he jɔɔ ni jeɔ ŋwane aloo amɛyiŋ feɔ amɛ kɔshikɔshi yɛ anɔkwale nilee ni amɛbɛ hewɔ lɛ mli. Yuda kɛ nɛkɛ mligbalamɔ nɛɛ baa. Yɛ be mli ni ebɔ kɔkɔ eshi “huhuuhu wielɔi kɛ krɔlɔi ni nɔ̃ esaaa amɛhiɛ” ni agbɛnɛ ewie eshi mɛi ni “amɛkwɛɔ gbɔmɛi ahiɛŋtsei anɔ” kɛ “hefɛoyelɔi” ni “kɛ mligbalamɔi baa lɛ” ahe lɛ sɛɛ lɛ, kɛkɛ ni etee nɔ ekɛɛ akɛ: “Ni nyɛtoa nyɛhe yɛ Nyɔŋmɔ suɔmɔ lɛ mli, yɛ be mli ni nyɛmɛɔ wɔ-Nuntsɔ Yesu Kristo mɔbɔnalɛ lɛ yɛ naanɔ wala hewɔ lɛ. Agbɛnɛ hu, nyɛyaa nɔ nyɛnaa mɛi komɛi ni jɛɔ ŋwane lɛ mɔbɔ; nyɛshaa amɛ kɛjɛa la lɛ mli ni nyɛkɛherea amɛyiwala.”—Yuda 16-23, NW.
20. Mɛɛ gbɛ nɔ esa akɛ atsɔ aye abua ŋwanejelɔi shi kɛji akɛ amɛkpoo yelikɛbuamɔ ni amɛgbee shi kɛjɛ hemɔkɛyeli lɛ hu?
20 Hɛɛ, ehe mihia ni atsɔɔ nɛkɛ ŋwanejelɔi nɛɛ akɛ amɛŋwanejee loo yiŋkɔshikɔshifeemɔ ni fiteɔ nii lɛ baanyɛ ekɛ amɛ abote hiɛkpatamɔ mli. Esa akɛ amɛnyɛmimɛi Kristofoi lɛ kɛ onukpai lɛ titri abɔ mɔdɛŋ aye abuɔ amɛ, ni kɛ aaahi lɛ, ni amɛsha amɛ kɛjɛ “la” ni baanyɛ akpata amɛhiɛ yɛ mumɔŋ lɛ mli. Yɛ mɛi ni kpooɔ nɛkɛ tsuishitoo kɛ suɔmɔ yelikɛbuamɔ nɛɛ ni ‘gbeeɔ shi kɛjɛɔ hemɔkɛyeli lɛ he’ lɛ gbɛfaŋ lɛ, esaaa akɛ enɛ gbaa wɔnaa tsɔ. Wɔkɛ bɔfo Yohane baakɛɛ akɛ: “Wɔteŋ amɛjɛ amɛtee, shi kɛlɛ amɛjeee wɔteŋ mɛi komɛi, ejaakɛ wɔteŋ mɛi komɛi ji amɛ kulɛ amɛkɛwɔ hi shi.”—1 Yoh. 2:19.
“Shiŋŋ Yɛ Hemɔkɛyeli Lɛ Mli” Kɛyashi Naagbee Diɛŋtsɛ
21, 22. (a) Mɛɛ hewalɛwoo Petro kɛha yɛ wɔhe ni aaawa yɛ hemɔkɛyeli lɛ mli lɛ he? (b) Mɛni ji nɔ ni esa akɛ mumɔŋ Israelbii lɛ kɛ “asafo babaoo” lɛ aya nɔ afee beni afee ni amɛnine ashɛ amɛhiɛnɔkamɔi sɔrɔtoi lɛ anɔ?
21 Ŋwanejee ko kwraa bɛ he akɛ Satan baasumɔ ni ena ni wɔfɛɛ ‘wɔgbee shi kɛjɛ hemɔkɛyeli lɛ he.’ No hewɔ lɛ Petro wo wɔ ŋaa akɛ:
“Nyɛdamɔa shi shimɔ yɛ hemɔkɛyeli mli nyɛtsia lɛ gbɛ, ejaakɛ nyɛle akɛ nakai amanehului lɛ nɔŋŋ nyɛnyɛmimɛi ni yɔɔ je lɛŋ lɛ hu naa. Shi duromɔ fɛɛ Nyɔŋmɔ ni tsɛnyɛ kɛba enaanɔ anunyam lɛ mli yɛ Kristo Yesu mli lɛ, kɛ nyɛna amanehulu fioo nyɛ ta lɛ, lɛ diɛntsɛ eeesaanyɛ pɛ ni eeewajenyɛ ni eeewonyɛ hewalɛ ni eeeha nyɛfi shi shiŋŋ.”—1 Pet. 5:8-10.
Hɛɛ, esa akɛ mɛi ni ji mumɔŋ Israelbii, ni atsɛ amɛ koni amɛkɛ Kristo abaye maŋtsɛ yɛ “enaanɔ anunyam lɛ mli” lɛ ahi shi akɛ anɔkwafoi yɛ “kaa ŋmlɛtswaa” lɛ mli, kɛji akɛ ‘amɛsumɔɔɔ ni mɔ ko shɔɔ amɛ akekre lɛ.’—2 Tim. 2:10; Kpoj. 3:10, 11.
22 Amɛ hefatalɔi, “asafo babaoo” lɛ mlibii lɛ hu yooɔ akɛ esa akɛ amɛhu amɛhi shi “shiŋŋ yɛ hemɔkɛyeli lɛ mli” kɛji akɛ amɛmiisumɔ ni ‘amɛje amanehulu kpeteŋkpele lɛ mli’ lɛ. (Kpoj. 7:9, 10, 14) Nakai Kristofoi lɛ ni yɔɔ ŋwɛi hiɛnɔkamɔ, kɛ amɛhefatalɔi lɛ ni amɛhiɛnɔkamɔ ji akɛ amɛbaahi shi daa yɛ shikpɔŋ nɔ paradeiso ni asaa lɛ mli lɛ etswa amɛfai shi akɛ amɛbaaya nɔ ni amɛkɛ anɔkwayeli ashiɛ “maŋtsɛyeli lɛ he sanekpakpa” lɛ. (Mat. 24:14) Shweremɔ fɛfɛo ni oba je lɛŋ hei sɔrɔtoi babaoo kɛbashi afi 1981 nɛɛ mli lɛ ji odaseyeli kɛha amɛ akɛ Yehowa jɔɔmɔi yɛ egbɛjianɔtoo lɛ nɔ, ni ákɛ nitsumɔ yɛ lolo ni abaatsu. No hewɔ lɛ amɛboɔ Paulo ŋaawoo lɛ toi: “Shi nyɛkahaa ekpakpafeemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.”—Gal. 6:8, 9.
23 Yɛ be mli ni wɔnaa nibii ni agba afɔ shi yɛ “naagbee gbii” lɛ amli lɛ akɛ eeba kpetekpelee yɛ wɔhiɛ lɛ, wɔnaa hekɛnɔfɔɔ ni mliwa akɛ “amanehulu kpeteŋkpele” lɛ kɛ Nyɔŋmɔ jalɛ gbɛjianɔtoo hee lɛ jetsɛremɔ lɛ ebɛŋkɛ wɔshinaa naa kpaakpa. Jɔɔmɔi ni yɔɔ naakpɛɛ ni jwere wɔhiɛ nɔŋŋ nɛɛ, kɛ́ yɛ ŋwɛi jio, aloo yɛ shikpɔŋ nɔ paradeiso lɛ mli jio lɛ, ehaa wɔ ‘ekaawoo ni mliwa’ koni wɔdamɔ shi “shiŋŋ yɛ hemɔkɛyeli Iɛ mli” kɛyashi naagbee, beni afee ni wɔnyɛ “wɔkɛmɔ nɔhiɛkamɔ ni ka wɔhiɛ lɛ mli.”—Heb. 6:17-19.
[Shishigbɛ niŋmaa]
a Ajie kɛjɛ August 1, 1980 Blɔfo Buu-Mɔɔ lɛ mli.
23. Mɛni kɛ hewalɛwoo ni mliwa haa wɔfɛɛ beni afee ni wɔnyɛ wɔdamɔ shi “shiŋŋ yɛ hemɔkɛyeli lɛ mli”?
[Akrabatsa ni yɔɔ baafa 12]
NƆ Nl KƐBAA
Hemɔkɛyeli ni bɛ
Heyeli mumɔ
Trumufeemɔ
Hewoo
[Akrabatsa ni yɔɔ baafa 12]
NƆ NI JƐƆ MLI BAA
Miishɛɛ ni laajeɔ
Atuatsemɔ
Mumɔŋ niyenii ni onaaa
Heloo lɛ nitsumɔi
[Mfoniri ni yɔɔ baafa 13]
“Nyɛshaa amɛ kɛjɛa la lɛ mli ni nyɛkaherea amɛyiwala”