Yitso 17
“Tsulɔ” Lɛ Ni Hi Shi Kɛyashi Ena “Okadi” Lɛ
1. Taakɛ ŋwɛi kanei lɛ abɔɔ he sane tsɔɔ lɛ, Nyɔŋmɔ miisumɔ ni gbɔmɔ atamɔ lɛ yɛ mɛɛ gbɛ nɔ?
1 GBƆMƆ Bɔlɔ lɛ ji be bulɔ. Ni eesumɔ ni gbɔmɔ hu abu be. Wɔkaneɔ yɛ enibɔɔ he sane ni anaa yɛ e-Wiemɔ ni jɛ mumɔŋ lɛ klɛŋklɛŋ yitso lɛ mli akɛ: “Ni Nyɔŋmɔ kɛɛ: Kanei aba ŋwɛi atatu lɛ mli, koni amɛgbala shwane kɛ nyɔɔŋ mli, ni amɛtsɔ okadii kɛ be kɛ gbii kɛ afii; ni amɛtsɔmɔ kanei yɛ ŋwɛi atatu lɛ mli, amɛtsɔ yɛ shikpɔŋ lɛ nɔ. Ni efee nakai. Ni Nyɔŋmɔ fee kanei wuji enyɔ lɛ: kane wulu lɛ, ni eye shwane nɔ, kɛ kane bibioo lɛ, ni eye nyɔɔŋ nɔ, kɛ ŋulamii lɛ hu.” (1 Mose 1:14-16) No hewɔ lɛ Biblia buɔ be ni kɔɔ gbɔmɔ shihilɛ he lɛ he akɔntaa, ni efeɔ enɛ yɛ bei kɛ gbii kɛ afii amli.
2, 3. (a) Yɛ mɛɛ gbɛ nɔ Biblia lɛ tsɔɔ bɔ ni abuɔ be ahaa po kɛbashi afi 1914 Ŋ.B.? (b) Mɛni Yesu kɛɛ ni kɔɔ ebaa be lɛ he yɛ “amanehulu kpeteŋkpele” ni baa yɛ eparousia be lɛ mli lɛ he?
2 Biblia be he akɔntaabuu lɛ tee nɔ kɛjɛ gbɔmɔ bɔɔ mli yɛ Eden Abɔɔ lɛ mli aahu kɛyashi he ni ebe he akɔntaabuu lɛ kɛ jeŋ yinɔsane be he akɔntaabuu ni ji anɔkwale bakpe. Biblia mli gbalɛi ni be he akɔntaabuu yɔɔ mli lɛ tsuɔ be he nii kɛyaa hiɛ lolo kɛyaa wɔsɛɛ be mli, aahu po kɛyaa Jeŋmaji “abei kpawo” ni amɛkɛye adesai anɔ ni ŋwɛi kɛ ehe wooo mli lɛ naagbee, kɛbashiɔ afi 1914 Ŋ.B. (Daniel 4:16, 23, 25, 32; Luka 21:24) Nakai afi lɛ ji be mli ni Yesu Kristo ni yɔɔ ŋwɛi ni awo ehiɛ nyam lɛ parousia loo “ba ni eba” lɛ je shishi. Yesu gba “amanehulu babaoo” ni eko bako ni tamɔ nakai da lɛ he sane efɔ shi akɛ ebaaba yɛ eparousia lɛ mli, shi etsɔɔɔ nɔ gbi kɛ ŋmlɛtswaa pɔtɛɛ ni nakai haomɔ be ni eko bako ni tamɔ nakai da lɛ baafɛ ashwie adesai aje lɛ fɛɛ nɔ. Ekɛɛ akɛ:
3 “Shi no gbi lɛ kɛ no ŋmlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, [ni Bi lɛ tete leee,] ja mitsɛ kome kɛkɛ. Shi bɔ ni Noa gbii lɛ fee lɛ, nakai gbɔmɔ bi lɛ baa lɛ hu baatamɔ. Ejaakɛ bɔ ni yɔɔ yɛ gbii ni nyiɛ nu afua lɛ hiɛ lɛ amli, ni mɛi ni lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli, ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ, nakai nɔŋŋ gbɔmɔ bi lɛ baa lɛ aaatamɔ. No mli lɛ mɛi enyɔ aaahi ŋmɔshi, aaaŋɔ mɔ kome, ni aaashi mɔ kroko lɛ. Mɛi enyɔ aaawiɛ yɛ wiɛ sɛɛ; aaaŋɔ mɔ kome ni aaashi mɔ kroko lɛ. No hewɔ lɛ nyɛsaraa, ejaakɛ nyɛleee nɔ ŋmlɛtswaa nɔ ni nyɛ Nuŋtsɔ lɛ baa [Hela: erʹkhe·tai].”—Mateo 24:36-42; Marko 13:32, 33.
4. No hewɔ lɛ shihilɛ ni yɔɔ adesai ateŋ yɛ Yesu parousia lɛ mli lɛ baatamɔ namɔ gbii amli nɔ̃ ni mɛɛ gbii titri?
4 Taakɛ gbalɛ nɛɛ tsɔɔ lɛ, esa akɛ shihilɛi ni baahi shi yɛ hii kɛ yei ateŋ yɛ Nuŋtsɔ Yesu Kristo parousia ni anaaa lɛ lɛ mli lɛ atamɔ Noa gbii lɛ dani jeŋ mulu fɛɛ nu afua lɛ ba lɛ. Eka shi faŋŋ akɛ be nii atsɛ́ yɛ biɛ akɛ “Noa gbii,” lɛ tsɔɔ akɛ Yesu miitsɔɔ “gbii ni nyiɛ nu afua lɛ hiɛ lɛ,” beni Noa kpɛɔ adeka lɛ ni Nyɔŋmɔ efa lɛ akɛ ekpɛ lɛ. Kɛ jeee nakai lɛ, nɔ ko krɛdɛɛ ko ehiŋ shi ni gbɔmɛi ni hi shi dani nu afua lɛ ba lɛ baakadi ni baatsɔɔ akɛ nu afua ko miiba amɛyinɔ be lɛ nɔ. Nɛkɛ adeka nɛɛ kpɛɛ baaha ale “Noa gbii” pɔtɛɛ lɛ yɛ enaagbee shihilɛ be afii oha lɛ mli dani nu afua lɛ ba, ejaakɛ nu afua lɛ je shishi beni Noa eye afii ohai ekpaa, no hewɔ lɛ wɔkaneɔ akɛ: “Ni Noa ye afii ohai enumɔ, ni efɔ Shem kɛ Ham kɛ Yafet.”—1 Mose 5:32; 7:11.
5. (a) Ana akɛ “Noa gbii” ni ekɛfee adeka lɛ ji be ni afo he husu loo be kuku ko yɛ mɛɛ anɔkwasane hewɔ? (b) Bɔ ni akɛ “Noa gbi” lɛ to he lɛ tsɔɔ mɛni yɛ parousia lɛ shishinumɔ he?
5 Nɔ kroko ni tsɔɔ be ni afo he husu lɛ ji akɛ, akɛɛ Noa akɛ ekɛ lɛ diɛŋtsɛ eŋa kɛ ebi, hii etɛ lɛ kɛ ‘ebihii lɛ aŋamɛi’ afata ehe kɛya adeka lɛ mli. (1 Mose 6:18) Enɛ baatsɔɔ akɛ Noa bihii etɛ lɛ ebote gbalashihilɛ mli dani adeka lɛ he nitsumɔ je shishi. No hewɔ lɛ be ni tsɔ nu afua lɛ hiɛ ni no mli lɛ gbɔmɛi lɛ baanyɛ akadi akɛ nɔ ko ni yɔɔ sɔrɔto miiya nɔ lɛ baafee be ni nɔ egbɔ kɛyashɛ aaafee afii nyɔŋmai enumɔ dani jeŋ fɛɛ hiɛkpatamɔ lɛ ba. Shi yɛ fɛɛ sɛɛ lɛ, “gbii” ni akɛha gbɔmɛi lɛ ni amɛkɛ hiɛdɔɔ asusu nɔ ni yaa nɔ lɛ he lɛ he be kpalaŋŋ ko. Akɛni “nakai nɔŋŋ gbɔmɔ bi lɛ ba ni eba [parousia] lɛ baatamɔ,” hewɔ lɛ, enɛ yeɔ odase akɛ Kristo parousia ni anaaa lɛ lɛ heɔ be kpalaŋŋ ko ni ekadiii “amanehulu kpeteŋkpele” lɛ shishijee kɛkɛ yɛ gbi pɔtɛɛ ko ŋmlɛtswaa pɔtɛɛ ko nɔ. Yɛ nɔ ni kɛ nakai parousia lɛ he jwɛŋmɔ ni ahiɛ lɛ kpaa gbee lɛ, Yesu wiemɔ ni tamɔ nakai nɔŋŋ ni yɔɔ Luka 17:26 lɛ kɛɔ akɛ: “Ni bɔ ni eba mli yɛ Noa gbii lɛ amli lɛ, nakai nɔŋŋ ebaaba yɛ gbɔmɔ bi lɛ gbii lɛ amli hu.” Shi taakɛ gbii ni Noa kɛkpɛ adeka lɛ ha lɛ hu ekɛ eweku ni bɛŋkɛ lɛ kpaakpa lɛ bote adeka kpeteŋkpele lɛ mli hewɔ lɛ, nakai nɔŋŋ eparousia ni anaaa lɛ lɛ heɔ be dani ebaa naagbee yɛ jeŋ muu fɛɛ “amanehulu kpeteŋkpele” lɛ mli.
6. (a) Mɛɛ gbɛ nɔ, taakɛ Yesu tsɔɔ lɛ, Noa gbii lɛ baatamɔ eparousia be lɛ? (b) Belɛ mɛni ejaaa yɛ gbɔmɛi lɛ agbɛfaŋ lɛ?
6 Yɛ Noa gbii lɛ amli lɛ, yiwalɛ yi shikpɔŋ lɛ nɔ obɔ, ni amɛbɔi lɛ fitemɔ. (1 Mose 6:11, 12) Enɛ ehiii ni ejaaa kwraa! Shi Yesu ewieee no he yɛ be mli ni etsɔɔ bɔ ni Noa gbii lɛ kɛ eparousia loo “ba ni eba” lɛ gbii lɛ je amɛhe lɛ. Yesu kɛɛ: “Amɛmiiyeyee nii, amɛmiinunuu dai, amɛmiiwɛwɛɛ yei ni akɛ amɛ miiha gbala kɛyashi gbi nɔ ni Noa bote adeka lɛ mli ni nu afua lɛ ba ni ebakpata amɛfɛɛ kwa amɛhiɛ lɛ.” (Luka 17:27) Nibii ni atsitsii ta nɛɛ ja ni amɛfeemɔ sa hu. Ojogbaŋŋ, belɛ mɛni ejaaa yɛ gbɔmɛi lɛ ahe lɛ? No ji akɛ amɛkɛ amɛhe wo nakai nibii ni afeɔ daa gbi lɛ amli, ni amɛjieee hemɔkɛyeli ko kpo yɛ Noa sane ni jɛ Nyɔŋmɔ ŋɔɔ lɛ mli, ni amɛbuuu nɔ ni Noa kɛfi eshiɛmɔ lɛ sɛɛ ni ji adeka kpeteŋkpele ni ekpɛ ekɛtsɔɔ ehemɔkɛyeli lɛ akɛ nɔ ko ni hiɛdɔɔ yɔɔ mli. (Hebribii 11:7) Ákɛ enɛ ejaaa yɛ gbɔmɛi lɛ agbɛfaŋ lɛ, Yesu kɛɛ akɛ: “Ni amɛhiɛ bɛ amɛhe nɔ kɛyashi nu afua lɛ baloo amɛfɛɛ kɛtee.”—Mateo 24:39.
7. (a) Abu mɛi ni akpata amɛhiɛ yɛ Nu Afua lɛ mli lɛ fɔ yɛ mɛni hewɔ, ni mɛni kɛ enɛ ba? (b) Yɛ mɛɛ gbɛ nɔ ana nɔ ko ni tamɔ nakai nɔŋŋ yɛ gbɔmɛi lɛ ahe kɛjɛ 1914?
7 Abu gbɔmɛi ni akpata amɛhiɛ yɛ jeŋ fɛɛ nu afua lɛ mli lɛ fɔ akɛni lɛ, Nyɔŋmɔ “eŋɔɔɔ blema je lɛ he ekeee lɛ, shi moŋ Noa ni ji jalɛ shiɛlɔ lɛ, mɔ ni gbe yi fee mɛi kpaanyɔ lɛ kɛkɛ yi ebaa, ni ekɛ nu afua lɛ ba mɛi ni kwa Nyɔŋmɔ lɛ aje lɛ nɔ.” (2 Petro 2:5) Yesu gbalɛ, “Nakai nɔŋŋ gbɔmɔ bi lɛ baa lɛ baatamɔ” lɛ hɛleɔ wɔ shi koni wɔtao gbɔmɛi ni yɔɔ ŋmɛnɛ lɛ anifeemɔi kɛ amɛsubaŋ mli yɛ eparousia, “ba ni eba” ni anaaa lɛ nɛɛ mli. Ani Yehowa Nyɔŋmɔ naa hemɔkɛyeli ni bɛ lɛ nɔŋŋ yɛ amɛteŋ? Ní amɛkɛ amɛhe ewo daa gbi shihilɛ mli nibii tamɔ niyeli, ninumɔ, gbalashihilɛ mlibotemɔ kɛ gbalahamɔ mli ni amɛbuuu nɔ ni kuu fioo ni akɛ amɛ to Noa kɛ eweku lɛ mlibii kpawo lɛ ahe lɛ kɛɔ ni amɛfeɔ lɛ akɛ etsɔɔ nɔ ko? Ojogbaŋŋ, nɔ ni fe afii nyɔŋmai ekpaa, kɛjɛ Kristo parousia lɛ shishijee yɛ 1914 Ŋ.B. nɛ, ní Yehowa “mɛi ni ehala” lɛ kɛ agbɛnɛ yɛ sɛɛ mli lɛ, “asafo babaoo” ni tamɔ gwantɛŋi lɛ ejaje Nyɔŋmɔ maŋtsɛyeli ni áto ama shi lɛ kɛ “amanehulu kpeteŋkpele” ni baa lɛ yɛ jeŋ fɛɛ, shi gbɔmɛi lɛ titri kɛ hiɛdɔɔ susuko nɛkɛ sane nɛɛ he.
8. (a) Mɛɛ gbi nɔ yɛ naagbee otsi lɛ mli Noa kɛ eweku lɛ bote adeka lɛ mli kwraa, ni mɛni gbe sane lɛ naa kwraa? (b) Enɛ ji kɔkɔbɔɔ kɛha wɔ ŋmɛnɛ koni wɔkafee mɛni?
8 Yɛ Noa gbii lɛ amli, yɛ naagbee otsi lɛ ni no sɛɛ nu afua lɛ ba lɛ mli lɛ, akɛ kooloi kɛ loofɔji ahenɔi sɔrɔtoi ni esa akɛ abaa amɛyi lɛ wo adeka lɛ mli. Yɛ nakai otsi ni he hiaa fe fɛɛ lɛ naagbee gbi lɛ nɔ lɛ, yɛ (Noa kalanda lɛ) nyɔŋ ni ji enyɔ lɛ gbi ni ji nyɔŋma kɛ kpawo lɛ nɔ yɛ afi 2370 D.Ŋ.B. lɛ, Noa kɛ mɛi kpawo ni yɔɔ weku lɛ mli lɛ bote adeka lɛ mli. “Ni Yehowa ŋa eyi.” (1 Mose 7:1-16) Nifeemɔ nɛɛ ŋa Noa kɛ eweku lɛ yi kɛha yiwalaheremɔ, koni ashi mɛi ni yɔɔ sɛɛ ni bɛ adeka lɛ mli lɛ aha hiɛkpatamɔ. Yesu kɛ enɛ feɔ kɔkɔbɔɔ he nɔkwɛmɔ nɔ kɛhaa ekaselɔi fɛɛ ni yɔɔ wala mli yɛ nɛkɛ gbii nɛɛ amli yɛ eparousia loo “ba ni eba” nɛɛ mli lɛ. Belɛ ekaba lɛ yɛ wɔgbɛfaŋ akɛ wɔɔkase nɛkɛ gbɔmɛi ni leee Nyɔŋmɔ lɛ aje lɛ yɛ amɛ pɛsɛmkunya gbɛ ni amɛkɛbooo amɛ toi kɛ shikpilikpii-feemɔ ni tsɔɔ hemɔkɛyeli ni bɛ nɛɛ mli. Kɛji akɛ wɔbooo toi ni wɔɔtsu he nii taakɛ Yesu gbalɛ lɛ mlibaa tsɔɔ lɛ, nɔ ni ebaatsɔɔ pɛ ji hiɛkpatamɔ kɛha wɔ kɛ jeŋ ni heee yeee lɛ. “Amanehulu kpeteŋkpele” ni kpataa nii ahiɛ lɛ baaba mɛi ni hiɛ bɛ amɛhe nɔ lɛ anɔ trukaa yɛ gbi kɛ ŋmlɛtswaa ni aleee ni atsiŋ ta lɛ nɔ.
AHALA AMƐ KƐHA WALA LOO KƐHA HIƐKPATAMƆ
9. (a) Yɛ mɛɛ gbɛ nɔ Yesu tsɔɔ akɛ abaahala mɛi amli kɛha yiwalaheremɔ ni abaahala mli kɛha hiɛkpatamɔ? (b) Ehe miihia ni wɔfee mɛi ni naa shɔŋŋ nii tamɔ okropɔŋi yɛ mɛɛ gbɛ nɔ?
9 Yiwalaheremɔ lɛ baahala mli ni hiɛkpatamɔ lɛ hu baahala mli yɛ nakai be lɛ mli, yɛ nanemɛi ni bɛŋkɛ kpaakpa yɛ jeŋ saji amli po he, tamɔ ŋmɔhumɔ loo ŋmaawiɛmɔ yɛ shia. Yesu kɛɛ: “No mli lɛ mɛi enyɔ aaahi ŋmɔshi, aaaŋɔ mɔ kome, ni aaashi mɔ kroko lɛ.” (Mateo 24:40, 41) Otsii pii dani ekɛ gbalɛ nɛɛ aaaba, yɛ be mli ni Yesu wie wiemɔ ko ni tamɔ nakai nɔŋŋ lɛ, etoibolɔi lɛ bi lɛ akɛ: “Nuŋtsɔ, nɛgbɛ?” Eha hetoo akɛ: “He ni gbonyo ka lɛ jɛi okropɔŋi buaa amɛhe naa yɛ.” (Luka 17:34-37) No hewɔ lɛ mɛi ni ‘aŋɔɔ emɛ kɛyaa’ kɛhaa yiwalaheremɔ lɛ baafee mɛi ni amɛ mumɔŋ ninaa yaa shɔŋŋ, tamɔ okropɔŋi, ni buaa amɛhe naa yɛ mumɔŋ okpɔlɔŋmɛɛ ni Yehowa kɛhaa yɛ he ni ehala ni yɔɔ shweshweeshwe lɛ. Mɛi ni ashiɔ amɛ ahaa hiɛkpatamɔ lɛ baafee mɛi ni haaa amɛhiɛ ahi amɛhe nɔ yɛ mumɔŋ yɛ Yesu gbalɛ lɛ mlibaa he, ni kɛ sane ni kɔɔɔ amɛhe nɔ ko su diɔ amɛ pɛsɛmkunya shihilɛ gbɛ lɛ sɛɛ lɛ. Mɛnɛɛmɛi ni taoɔ ni amɛtsɔ je lɛŋ nibii anɔ amɛbaa amɛ adesa susumai ayi lɛ baalaje amɛ susumai lɛ yɛ “amanehulu kpeteŋkpele” ni baa trukaa lɛ mli.
10. Mɛɛ gbɛ nɔ Yesu ma nɔ mi yɛ biɛ akɛ esaaa akɛ wɔfeɔ tamɔ je lɛŋ bii ni wɔkɛ wɔhe wo wɔ diɛŋtsɛ wɔ nibii amli sɔŋŋ?
10 Wɔnyɛŋ wɔtamɔ je lɛŋ bii lɛ, mɛi ni yɔɔ Kristendom lɛ po, ni tamɔ mɛi ni kɛ amɛhe wo amɛ diɛŋtsɛ amɛshihilɛ mli nibii amli yɛ Noa gbii lɛ amli lɛ. Yesu ma nikasemɔ ni yɔɔ nɛkɛ abɛbua nɛɛ mli lɛ nɔ mi beni afee ni efee sɛɛnamɔ kɛha wɔ, ákɛ: “No hewɔ lɛ nyɛsaraa, ejaakɛ nyɛleee nɔ ŋmlɛtswaa nɔ ni nyɛ Nuŋtsɔ lɛ baa ([Hela: erʹkhe·tai].” (Mateo 24:42) Kɛji akɛ wɔheɔ Nuŋtsɔ lɛ parousia kɛjɛ 1914 Ŋ.B. lɛ wɔyeɔ lɛ belɛ esa akɛ wɔsara ni wɔbu agbɛnɛ koni “amanehulu kpeteŋkpele” lɛ akabanina wɔ ni wɔmiitsu nitsumɔi ni esaaa.
11, 12. (a) Mɛni hewɔ Yesu ekɛɛɛ ekaselɔi lɛ he pɔtɛɛ ni ebaaba akɛ Yehowa blafo kɛha “amanehulu kpeteŋkpele” lɛ? (b) “Amanehulu kpeteŋkpele” lɛ ni aaabanina wɔ trukaa tamɔ julɔ yɛ gbɛkɛ lɛ baatsɔɔ mɛni aha wɔ taakɛ Yesu abɛbua lɛ fee he mfoniri lɛ?
11 Nuŋtsɔ Yesu ekɛɛɛ ekaselɔi lɛ nɔ̃ gbi kɛ nɔ̃ ŋmlɛtswaa yɛ afi kɛ nyɔŋ pɔtɛɛ mli ni ebaaba, (Hela: erʹkhe·tai) akɛ Yehowa blafo nukpa yɛ “amanehulu kpeteŋkpele . . . ni anako nɔ da kɛjɛ je lɛŋ shishijee mli” lɛ mli. Ehaŋ ekaselɔi lɛ ateŋ mɔ ko ale be pɔtɛɛ lɛ, beni afee ni amɛnyiɛ kɛkɛ ni amɛtiu je lɛŋ nitsumɔi esɛɛ kɛyashi naagbee hiŋmɛitswaa lɛ nɔ, koni amrɔ nɔŋŋ lɛ akɛni amɛle be lɛ pɔtɛɛ hewɔ lɛ amɛŋɔ Nyɔŋmɔ gbeyeishemɔ su amɛfɔ amɛnɔ ni amɛkɛ amɛhe awo sɔɔmɔ ni Nyɔŋmɔ efa lɛ mli! Jeee nakai! Shi moŋ akɛni ekɛɛɛ wɔ be pɔtɛɛ lɛ hewɔ lɛ enɛ nyɛɔ wɔnɔ koni wɔhiɛ atsɛ̃ ni wɔsara yɛ be mli. “Amanehulu kpeteŋkpele” lɛ ni aaabanina wɔ trukaa tamɔ julɔ lɛ baatsɔɔ naanɔ hiɛkpatamɔ kɛji akɛ wɔbɛ ekaa yɛ Nyɔŋmɔjamɔ krɔŋŋ lɛ mli. No hewɔ lɛ Yesu kɛɛ:
12 “Shi nyɛnaa nyɛlea akɛ, kɛ shiatsɛ ko le nɔ [nyɔɔŋ] ŋmlɛtswaa nɔ ni julɔ baa lɛ, kulɛ eeesara ni eŋmɛŋ gbɛ ni agbu ewe lɛ awoŋ. No ahewɔ lɛ nyɛ hu nyɛsaa nyɛhe nyɛtoa, ejaakɛ nɔ ŋmlɛtswaa ni nyɛsusuuu lɛ nɔ gbɔmɔ bi lɛ baa [Hela: erʹkhe·tai].”—Mateo 24:43, 44.
13. (a) Mɛni ji yiŋtoo ni yɔɔ shi ni eshi ekaselɔi lɛ ni amɛleee be pɔtɛɛ ni Nuŋtsɔ lɛ baaba ni ebatsu Yehowa oweletɔɔ lɛ he nii lɛ sɛɛ? (b) No hewɔ lɛ ehe miihia ni wɔfee mɛni yɛ enɛ he?
13 Mɛni ji yiŋtoo hewɔ ni eshi ekaselɔi lɛ nɛkɛ ni amɛleee be pɔtɛɛ mli ni Nuŋtsɔ lɛ baaba koni ebatsu Yehowa oweletɔɔ he nii aloo ebatsu jalɛsaneyeli he nii yɛ nɛkɛ nibii agbɛjianɔtoo nɛɛ Nyɔŋmɔjamɔ kɛ maŋkwramɔ kɛ kwasafoŋ fã lɛ anɔ? No ji akɛ beni afee ni mɛi fɛɛ ni kɛɔ akɛ amɛji Kristo kaselɔi lɛ atsɔɔ kɛji akɛ amɛji anɔkwale Kristofoi daa gbi yɛ be fɛɛ mli ni amɛkɛ amɛhe ewo Nyɔŋmɔ Mesia maŋtsɛyeli lɛ he sanekpakpa lɛ shiɛmɔ mli ni amɛmiibɔ mɔdɛŋ ni amɛmia amɛhiɛ yɛ be fɛɛ mli ni amɛfee “jeŋmaji fɛɛ kaselɔi,” aloo amɛji mɛi ni hegbɛ kɛkɛ amɛtaoɔ. Ní ji akɛ, amɛmɛɔ kɛyashi be mli ni amɛaana akɛ be bɛ dɔŋŋ ni akɛaashashao shi, shi kpaako agbɛnɛ esa akɛ amɛkɛ amɛhe awo nitsumɔ mli tamɔ mɛi ni kɛ amɛhe ewo nitsumɔ ni Nyɔŋmɔ ekpɛlɛ nɔ lɛ mli yɛ be fɛɛ mli momo? Akɛni “ŋmlɛtswaa ni nyɛsusuuu lɛ nɔ gbɔmɔ bi lɛ baa” hewɔ lɛ, ehe miihia ni wɔfɛɛ wɔhiɛ atsɛ̃ ni wɔsara ni wɔhiɛ adɔ yɛ ŋmlɛtswaai fɛɛ mli yɛ jamɔ kɛ sɔɔmɔ ni wɔ Nuŋtsɔ lɛ kpɛlɛɔ nɔ lɛ mli.
“TSULƆ ANƆKWAFO KƐ NILELƆ LƐ”
14. Mɛɛ sane Yesu bi yɛ biɛ, ní eshi etoibolɔi lɛ ni amɛtao nɔ ni amɛ diɛŋtsɛ amɛsumɔɔ akɛ amɛaaji amɛha amɛhe?
14 Biɛ ji he ni Nuŋtsɔ Yesu wie saramɔ kɛ hesaamɔ ni ataoɔ yɛ ekaselɔi lɛ adɛŋ lɛ he. No hewɔ lɛ agbɛnɛ eteeɔ sanebimɔ ko ni tswaa ekaselɔi lɛ ateŋ mɔ fɛɛ mɔ mpoa shĩ yɛ bɔ ni mɔ lɛ diɛŋtsɛ etu ehe eha Yehowa Mesia lɛ kɛ nilee ni mɔ lɛ diɛŋtsɛ kɛtsuɔ nii, nilee kɛ saneshishinumɔ yɛ Mesia lɛ sɔɔmɔ mli lɛ he. Kaselɔ fɛɛ kaselɔ baanyɛ atsɔɔ nɔ tsulɔ ni eji taakɛ enu bɔ ni Nuŋtsɔ lɛ bi sane lɛ ha lɛ: “Namɔ ji tsulɔ anɔkwafo kɛ nilelɔ, mɔ ni enuŋtsɔ ŋɔlɛ eto ewebii lɛ anɔ, koni eha amɛ amɛŋmaa yɛ be ni sa nɔ lɛ?”—Mateo 24:45.
15. (a) Mɛni hewɔ Yesu tee sanebimɔ ni kɔɔ tsulɔ ni baaye anɔkwale lɛ he lɛ shi? (b) Mɛɛ sanebimɔ teɔ shi yɛ mɔ ni nakai tsulɔ lɛ ji he, ni mɛni Meyer’s Hand-Book ni kɔɔ Mateo he lɛ yɔɔ kɛɛmɔ yɛ enɛ he?
15 Akɛni ele kɛjɛ gbalɛi ni jɛ mumɔŋ ni yɔɔ e-Tsɛ lɛ Wiemɔ mli akɛ mɛi baatse atua ni amɛkwa anɔkwale Kristofoi ahemɔkɛyeli lɛ kɛ sɔɔmɔ lɛ hewɔ lɛ, Yesu tee sanebimɔ ni akɛpɛiɔ nibii amli ni saa ekaselɔ fɛɛ kaselɔ he lɛ shi yɛ gbɛ ni sa nɔ. Shi bɔ ni ebi sane nɛɛ hewɔ lɛ, ani eewie nuu pɔtɛɛ ko he, ekaselɔ kome ko he? Aloo eewie kɛmiikɔ kaselɔi akuu ko he? The Critical and Exegetical Hand-Book to the Gospel of Matthew ni H. A. W. Meyer Th. D., (1884) fee lɛ kɛ ŋaawoo ko haa. Ekɛɔ yɛ baafa 429 yɛ wiemɔ “belɛ namɔ ji” (AV) he akɛ: “Etsɔɔ bɔ ni hesaamɔ he hiaa ha. Nɔ ni atsɔɔ lɛ diɛŋtsɛ baa yɛ okadi gbɛ nɔ, doulos [tsulɔ] lɛ damɔ shi kɛha kaselɔi lɛ ni Nuŋtsɔ lɛ ehala ni amɛtsɔɔ E-sɔlemɔ lɛ gbɛ, ni aatao ni ana amɛ akɛ anɔkwafoi (1 Korintobii 4:1) kɛ nilelɔi hu, . . . ” “Tsulɔ” kuu nɛɛ ni ekɛɛ akɛ amɛji bɔfoi nyɔŋma kɛ enyɔ lɛ pɛ lɛ baaŋmɛ gbɛ ni bɔfoi asɛɛyelɔi aloo osɔfonukpai (nɔkwɛlɔi) asɛɛyelɔi kɛtsɔ jamɔ nifeemɔ ni akɛhalaa mɔ nɔ aba.
16. Yɛ kɛji akɛ kaselɔi akuu muu lɛ fɛɛ fata “tsulɔ” kuu lɛ he shi jeee nɔkwɛlɔi pɛ lɛ, mɛni ji nɔ ni Marko 13:34-36 kɛɔ?
16 Shi, kɛji akɛ wɔsusu “tsulɔ anɔkwafo kɛ nilelɔ” lɛ fɛɛ he akɛ kaselɔi akuu muu lɛ fɛɛ (ni mumɔŋ nɔkwɛlɔi lɛ fata he) lɛ, belɛ ejieɔ nɔ ko ni atsɛɔ lɛ akɛ “osɔfonukpai asɛɛyelɔi” ni sɔlemɔ lɛ yinɔsane tsɔɔ akɛ eye awui ni enyɛ mɛi anɔ yɛ Kristendom lɛ kɛyaa. Gbɛ ni kaselɔ Marko tsɔ nɔ ewie Yesu wiemɔi ni kɔɔ sane nɛɛ he lɛ tsɔɔ akɛ kaselɔi akuu muu lɛ fɛɛ fata he. Marko 13:34-36 kɛɔ akɛ: “Tamɔ nuu ko ni edom eshi ewe, ni eha tsuji lɛ hegbɛ kɛ mɔ fɛɛ mɔ nitsumɔ, ni efa agbonaakwɛlɔ lɛ akɛ ebu. No hewɔ lɛ nyɛsaraa; ejaakɛ nyɛleee beyinɔ ni shiatsɛ lɛ baa [Hela: erʹkhe·tai], ekolɛ gbɛkɛ lɛ, loo nyɔɔŋ teŋ loo wuɔgbɛɛmɔ, loo lebi; koni ekaba trukaa ebanina nyɛ akɛ nyɛmiiwɔ.”
17. Mɛni hewɔ ejeee jɛmɔ akɛ Yesu kɛ ekaselɔi lɛ aaato “tsuji” ahe lɛ, shi tsuji ni amɛji nɛɛ kɛ mɛɛ gbɛnaa nii fɔɔ amɛnɔ?
17 Ebaafee tamɔ nɔ ni enaa wa fioo akɛ Yesu kɛ ekaselɔi lɛ aaato “tsuji” ahe. Shi nɔ ko ni sa yɛ ni no nɔ edamɔ ekɛ amɛ to he nakai lɛ. Ejaakɛ wɔkaneɔ yɛ 1 Korintobii 6:20 kɛ 7:23 akɛ: “Ejaakɛ ahe nyɛ kɛ jara ni wa. No hewɔ lɛ nyɛwoa Nyɔŋmɔ hiɛ nyam yɛ nyɛ gbɔmɔtso kɛ nyɛ mumɔ lɛ ni ji Nyɔŋmɔ nɔ lɛ mli.” “Jara ni wa akɛhe nyɛ; nyɛkatsɔmɔa gbɔmɛi atsuji.” Yɛ nakai bɔfo Paulo wiemɔi lɛ asɛɛ lɛ, bɔfo Petro ŋma Kristofoi lɛ akɛ: “Ejaakɛ nyɛle akɛ jeee nibii ni fiteɔ taakɛ jwiɛtɛi loo shika, aŋɔkpɔnyɛ kɛjɛ nyɛyaka jeŋba ni nyɛná kɛjɛ nyɛtsɛmɛi lɛ aŋɔɔ lɛ mli, shi moŋ, kɛ Kristo, mɔ ni tamɔ Toobi ni he bɛ kpa ko loo ŋmaamɔnɔ ko lɛ lá, ni jara wa lɛ.” (1 Petro 1:18, 19) Yɛ enɛ kɛ gbeekpamɔ naa lɛ, nɛkɛ Kristo kaselɔ nɛɛ kɛ hiɛkpamɔ wiemɔ nɛɛ gbele ewolo ni ji enyɔ ni eŋma lɛ naa: “Simon Petro, ni ji Yesu Kristo tsulɔ.” Agbɛnɛ hu Paulo hiɛ gbooo akɛ eeejie lɛ diɛŋtsɛ ehe kpo akɛ “Paulo kɛ Timoteo, ni ji Yesu Kristo tsuji lɛ.” (Filipibii 1:1) Ni Nuŋtsɔ lɛ nyɛ̃ bi kɛ wiemɔi nɛɛ kpa ewolo lɛ hiɛ: “Yuda, ni ji Yesu Kristo tsulɔ kɛ Yakobo nyɛmi lɛ.” (Yuda 1) Nyɔŋyeli yɛ nɛkɛ gbɛ nɔ lɛ haa Kristofoi anɔkwayeli lɛ feɔ gbɛnaa nii ni ka amɛnɔ babaoo.
18. Mɛni hewɔ blema Israel ji tsuji amaŋ kɛha Yehowa lɛ, ni ekɛ nakai tsuji lɛ fɛɛ to gbɔmɔ kome pɛ he yɛ mɛɛ gbɛ nɔ?
18 Kristo kaselɔi lɛ eteee shi wooo Kristofoi anyɔŋyeli yɛ efɔŋ ni afeɔ tsulɔ taakɛ bɔ ni eba yɛ efɔŋ ni afee Israel maŋ lɛ gbɛfaŋ lɛ: “Ani Israel lɛ, nyɔŋ ni, aloo nyɔŋ bi ni afɔ lɛ yɛ shia ni? Mɛɛ hewɔ mɔ ni etsɔ haa nɔ̃ nɛɛ?” (Yeremia 2:14) Blema Israel maŋ lɛ batsɔ “haa nɔ̃” kɛha Jeŋmaji lɛ, ejaakɛ Israelbii lɛ tsuuu nii akɛ Ŋwɛi Flooflo Nyɔŋmɔ Yehowa lɛ tsuji anɔkwafoi. Akɛni Yehowa jie amɛ kɛjɛ Mizraim hewɔ lɛ Israelbii lɛ fɛɛ bafee maŋ ni sɔmɔɔ Yehowa. Yɛ be mli ni ekɛɔ Farao ni jɛ Mizraim lɛ hegbɛ krɛdɛɛ ni Yehowa yɔɔ yɛ Israel maŋ lɛ nɔ lɛ, E-kɛ emaŋ ni ehala amɛ nɛɛ to mɔ kome he, akɛ: “Mibi, mikromɔ bi ni ji Israel, ni miikɛɛo akɛ: Ha mibi lɛ aya, ni eyasɔmɔ mi.”—2 Mose 4:22, 23.
19. Mɛɛ gbɛ Yehowa tsɔ Yesaia nɔ ewie etsɔɔ Israel maŋ muu lɛ akɛ E-tsulɔ ni ji gbɔmɔ aŋkro ko?
19 Yɛ nɔ ni fe afii ohai kpawo sɛɛ lɛ, Yehowa wie Israel maŋ muu lɛ fɛɛ he tamɔ amɛji E-tsulɔ kome ko, akɛ: “Shi bo, mitsulɔ Israel, bo Yakob ni mihalao, mishieŋtsɛ Abraham seshi; bo ni mimɔ omli kɛjɛ shikpɔŋ lɛ naagbee hei lɛ, ni mitsɛo kɛjɛ ekoji lɛ anɔ, ni mikɛɛo akɛ: Mitsulɔ jio, mihalao ni mishɛŋo mifɔŋ lɛ!” (Yesaia 41:8, 9) Beni afee ni enɛ afee faŋŋ akɛ gbɔmɛi aŋkroaŋkroi pii yɔɔ nɛkɛ tsulɔ kuu nɛɛ mli lɛ, Bɔlɔ lɛ kɛɔ Israel maŋ lɛ akɛ: “Yehowa kɛɛ, nyɛji midasefoi, kɛ mitsulɔ ni mihala. . . . Shi agbɛnɛ, bo toi, mitsulɔ Yakob, bo Israel ni mihala! Bɔ ni Yehowa . . . kɛɛ nɛ: . . . Ani jeee blema beebe mijɛ mijaje mitsɔɔ nyɛ ni miha nyɛnu? Ni nyɛji midasefoi.”—Yesaia 43:10; 44:1-8; agbɛnɛ hu 42:19; 44:21; 48:20; 49:3; Yeremia 30:10.
20. Mɛɛ be mli akpoo heloo gbɛfaŋ Israel, ni namɛi batsɔmɔ mumɔŋ Israel, ni mɛni hewɔ wiemɔ ni yɔɔ Yesaia 43:10 lɛ kɔɔ amɛhe?
20 Yɛ afi 33 Ŋ.B. Pentekoste Gbijurɔyeli lɛ nɔ, beni Yesu Kristo te shi kɛjɛ gbohii ateŋ lɛ sɛɛ gbii nyɔŋmai enumɔ lɛ, Yehowa Nyɔŋmɔ shɛ́ heloo naa Israel ketiafolɔi lɛ efɔ. Shi Kristofonyo bɔfo Paulo ŋma wolo eyaha enyɛmimɛi Kristofoi ni yɔɔ Roma niiaŋ yɛ Galata aaafee afi 50-52 mli ni ekɛɛ akɛ “Ketiafoo jeee nɔ ko, ni asaŋ foo hu jeee nɔ ko, shi moŋ bɔɔ hee kɛkɛ ji nɔ ko. Ni mɛi abɔ ni aaanyiɛ yɛ nɛkɛ susumɔ kpaa nɛɛ naa lɛ, hejɔlɛ kɛ mɔbɔnalɛ aha amɛ kɛ Nyɔŋmɔ Israel lɛ!” (Galatabii 6:15, 16) Anɔkwale Kristofoi asafo lɛ ji gbɛjianɔtoo ni nyiɛ nakai susumɔ kpaa ni kɔɔ “bɔɔ hee” lɛ sɛɛ pɛpɛɛpɛ, ni agbɛnɛ, akɛni aakpoo heloo naa Israel hewɔ lɛ, Kristo sɛɛnyiɛlɔi asafo lɛ ebatsɔ “Nyɔŋmɔ Israel lɛ.” Ákɛ asafo ni amɛfee ekome lɛ, amɛbaafee Yehowa Nyɔŋmɔ kɛ e-Kristo lɛ “tsulɔ.” Yesaia 43:10 baanyɛ awie he yɛ mumɔŋ gbɛ nɔ akɛ: “Yehowa kɛɛ, nyɛji midasefoi, kɛ mitsulɔ.”
21. (a) Eyɛ mli akɛ Yesu tee sanebimɔ ni kɔɔ tsulɔ lɛ he lɛ shi moŋ, shi ani Yesu le mɔ ni nɛkɛ “tsulɔ” kuu nɛɛ ji? (b) Mɛɛ sane wɔbiɔ yɛ be mli ni nakai “tsulɔ” kuu lɛ je shishi lɛ he?
21 Eyɛ mli akɛ etee sanebimɔ ni kɔɔ “tsulɔ anɔkwafo kɛ nilelɔ” lɛ he shi moŋ, shi ŋwanejee ko bɛ Yesu jwɛŋmɔ mli yɛ mɔ ni nɛkɛ “tsulɔ” nɛɛ ji lɛ he. Ŋwanejee ko bɛ he akɛ nakai Yehowa Nyɔŋmɔ “tsulɔ” lɛ ni ji nakai “Nyɔŋmɔ Israel lɛ” yɛ Yesu jwɛŋmɔ mli. Tɔmɔ ko bɛ nakai “tsulɔ” ni feɔ gbɔmɛi akuu ko lɛ ni aaagbala jwɛŋmɔ kɛba nɔ lɛ he. Ekɛ lɛ diɛŋtsɛ elá lɛ jara hé nakai Nyɔŋmɔ Israel lɛ akɛ etsulɔ, ni yɛ ebɛbua ni ekɛha yɛ egbalɛ lɛ mli lɛ hewɔ lɛ ebaanyɛ etsɛ lɛ akɛ “tsulɔ” ni gbɔmɛi pii yɔɔ mli, nɔ ni baajie ehe kpo akɛ “anɔkwafo kɛ nilelɔ.” Akɛni Yesu wie nɛkɛ “tsulɔ” nɛɛ he yɛ gbalɛ ni kɔɔ ‘beni eba lɛ kɛ nibii agbɛjianɔtoo lɛ naagbee he okadi’ lɛ mli hewɔ lɛ, ani nakai “tsulɔ anɔkwafo kɛ nilelɔ” lɛ ni gbɔmɛi akuu ko feɔ lɛ ba shihilɛ mli klɛŋklɛŋ yɛ ‘beni eba’ lɛ loo parousia lɛ mli kɛjɛ 1914 kɛbaa nɛɛ?
22. (a) Mɛni hewɔ ni “tsulɔ anɔkwafo kɛ nilelɔ” kuu lɛ nyɛŋ aba shihilɛ mli klɛŋklɛŋ yɛ Kristo parousia be lɛ mli lɛ? (b) Namɛi ji “ewebii” ni “tsulɔ” lɛ baalɛ amɛ lɛ?
22 Dabi; ejaakɛ Yesu abɛbua lɛ tsɔɔ akɛ “tsulɔ” lɛ Nuŋtsɔ lɛ tee he ko, “tamɔ nuu ko ni edom eshi ewe, ni eha etsuji lɛ hegbɛ kɛ mɔ fɛɛ mɔ nitsumɔ.” (Marko 13:34) No hewɔ lɛ, “tsulɔ anɔkwafo kɛ nilelɔ” lɛ ji mɔ ni “enuŋtsɔ ŋɔ lɛ eto ewebii lɛ anɔ, koni eha amɛ amɛŋmaa yɛ be ni sa nɔ” lɛ. (Mateo 24:45) Nɔ ni fe afii ohai nyɔŋma kɛ nɛɛhu nɛ, yɛ be mli ni ekwɔ kɛtee ŋwɛi lɛ mli, nakai “tsulɔ” ni feɔ gbɔmɛi akuu ko lɛ “Nuŋtsɔ” lɛ tee, ni eshi “tsulɔ” lɛ kɛ famɔi ni amɛlɛ “ewebii” lɛ. (Mateo 28:16-20) “Ewebii” nɛɛ jeee Nuŋtsɔ lɛ weku, shi moŋ “tsuji ni sɔɔmɔ lɛ yɛ shia” (H. A. W. Meyer) aloo “eshiabii.” (New English Bible) Amɛji tsuji, tamɔ bɔ ni “tsulɔ anɔkwafo kɛ nilelɔ” ni akɛ amɛlɛɛ he nitsumɔ efɔ amɛnɔ lɛ ji lɛ. No hewɔ lɛ amɛfɛɛ amɛji tsuji akuu ko, ni amɛfɛɛ amɛyɛ “Nuŋtsɔ” kome lɛ shishi. Gbɛnaa nii ka amɛfɛɛ nɔ akɛ amɛfee ‘anɔkwafoi kɛ nilelɔi.’
23. (a) No hewɔ lɛ mɛɛ be mli nakai “tsulɔ” kuu lɛ ba shihilɛ mli? (b) Mɛni tsɔɔ akɛ nɛkɛ “tsulɔ” nɛɛ hi shi ni ena enuŋtsɔ lɛ parousia lɛ he “okadi” lɛ?
23 Yesu abɛbua lɛ mlibaa je shishi beni eshi amɛ yɛ afi 33 Ŋ.B., ni “tsulɔ” kuu lɛ ni ji “Nyɔŋmɔ Israel lɛ,” Kristo asafo ni akɛ mumɔ efɔ́ amɛ ni afɔ amɛ mu lɛ ni naagbee lɛ emlibii baafee 144,000 lɛ ehi shi kɛjɛ nakai be lɛ mli. (Kpojiemɔ 7:4-8; 14:1-3) Yinɔsane niŋmaa tsɔɔ akɛ yɛ beni “Nuŋtsɔ” lɛ parousia ni anaaa lɛ Iɛ je shishi yɛ Jeŋmaji Abe lɛ naagbee yɛ 1914 lɛ, no mli lɛ nɛkɛ “tsulɔ” kuu nɛɛ mli shwɛɛnii yɛ shikpɔŋ nɔ lolo. No hewɔ lɛ “tsulɔ” kuu lɛ ni gbɔmɛi akuu ko yɔɔ mli lɛ ehi shi ni amɛna Nuŋtsɔ lɛ parousia loo “ba ni eba” lɛ he “okadi” lɛ.
September Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)