Daniel

4 “Maŋtsɛ Nebukadnezar miiŋma wolo nɛɛ kɛmiihã majimaji, kɛ jeŋmaji, kɛ wiemɔ kui fɛɛ ni yɔɔ shikpɔŋ lɛ fɛɛ nɔ: Toiŋjɔlɛ babaoo ahã nyɛ! 2 Eŋɔɔ minaa akɛ mahã ale okadii kɛ naakpɛɛ nii ni Nyɔŋmɔ Ni Nɔ Kwɔ Fe Fɛɛ lɛ efee ehã mi lɛ. 3 Ekadii lɛ dara ni enaakpɛɛ nii lɛ naa wa waa! Emaŋtsɛyeli lɛ, naanɔ maŋtsɛyeli ni, ni enɔyeli lɛ yɛ kɛjɛ yinɔ kome nɔ kɛmiiya yinɔ kroko nɔ.+

4 “Mi, Nebukadnezar, no mli lɛ, mihe ejɔ mi yɛ mishĩa lɛ, ni nɔ fɛɛ nɔ miiya nɔ jogbaŋŋ yɛ mimaŋtsɛ shĩa lɛ mli. 5 Mila lamɔ ko ni hã mishe gbeyei. Be ni mikã misaa lɛ nɔ lɛ, miyitsoŋ mfonirii kɛ ninai lɛ hã mitsui fã.+ 6 No hewɔ lɛ, mifã koni akɛ Babilon hiɛshikalɔi lɛ fɛɛ aba mihiɛ koni amɛbatsɔɔ mi lamɔ lɛ shishi.+

7 “Nakai be lɛ mli lɛ, majikfeelɔi lɛ, kɛ okɔmfoi lɛ, kɛ Kaldeabii* lɛ, kɛ ŋulamiiaŋkwɛlɔi+ lɛ ba mihiɛ. Be ni migba amɛ lamɔ lɛ, amɛnyɛɛɛ amɛtsɔɔ mi shishi.+ 8 Sɛɛ mli lɛ, Daniel, mɔ ni akɛ minyɔŋmɔ lɛ gbɛ́i ewo lɛ+ ni atsɛɔ lɛ Belteshazar+ ni nyɔŋmɔi krɔŋkrɔŋi lɛ amumɔ yɔɔ emli+ lɛ badamɔ mihiɛ, ni migba lɛ lamɔ lɛ akɛ:

9 “‘Belteshazar, bo ni oji majikfeelɔi lɛ anukpa,+ mile jogbaŋŋ akɛ nyɔŋmɔi krɔŋkrɔŋi lɛ amumɔ yɛ omli,+ ni teemɔŋ sane ko teemɔŋ sane ko bɛ ni wa hã bo.+ No hewɔ lɛ, gbalamɔ ninai ni mina yɛ milamɔ lɛ mli lɛ mli ohã mi ni otsɔɔ mi shishi.

10 “‘Ninai ni mina yɛ miyitsoŋ be ni mikã misaa lɛ nɔ lɛ mli lɛ, mina tso+ ko ma shikpɔŋ lɛ teŋ, ni ekwɔ waa diɛŋtsɛ.+ 11 Tso lɛ bada ni ená hewalɛ, ni eyiteŋ yashɛ ŋwɛi tɔ̃ɔ, ni anaa lɛ yɛ shikpɔŋ muu lɛ fɛɛ naagbeehei lɛ. 12 Enɔ bai yɛ fɛo, ni enɔ yibii fa babaoo diɛŋtsɛ, ni niyenii yɛ nɔ kɛhã mɔ fɛɛ mɔ. Ehɔɔŋ lɛ shishi ŋa mli kooloi lɛ hiɔ, ni etsei aniji lɛ anɔ ŋwɛi loofɔji hiɔ, ni bɔɔ nii* fɛɛ náa niyenii yɛ nɔ.

13 “‘Be ni mihiɛ miyitsoŋ ninai lɛ kwɛmɔ yɛ misaa lɛ nɔ lɛ, mina bulɔ ko, mɔ krɔŋkrɔŋ ko ni miikpeleke shi kɛmiijɛ ŋwɛi.+ 14 Ebo waa ekɛɛ: “Nyɛfoa tso lɛ nyɛfɔ̃a shi,+ ni nyɛfolɔa eniji lɛ, nyɛkpalaa ebai lɛ yɛ ehe nyɛshwiea shi, ni nyɛgbɛa enɔ yibii lɛ nyɛshwãa. Nyɛhãa ŋa mli kooloi lɛ ashia eshishi, ni loofɔji lɛ hu ashi eniji lɛ anɔ. 15 Shi nyɛshia etsoku lɛ kɛ eshishifãi* lɛ yɛ shikpɔŋ lɛ nɔ yɛ ŋa mli jwɛi fɔ lɛ ateŋ, ni nyɛkɛ dade kɛ akɔɔble kɔsɔŋkɔsɔ afia tsoku lɛ. Ŋwɛi bɔ́ afɔ lɛ, ni ená egbɛfaŋnɔ yɛ ŋa mli kooloi lɛ ateŋ yɛ shikpɔŋ lɛ nɔ kwɛ̃ɛ nii lɛ ateŋ.+ 16 Atsake etsui ni ji gbɔmɔ nɔ lɛ, ni ahã lɛ kooloo tsui, ni bei kpawo+ aho yɛ enɔ.+ 17 Bulɔi lɛ afamɔ nɛ,+ ni nibimɔ lɛ jɛ mɛi krɔŋkrɔŋi awiemɔ lɛ mli, koni mɛi ni yɔɔ wala mli lɛ aná ale akɛ Mɔ Ni Nɔ Kwɔ Fe Fɛɛ lɛ ji Nɔyelɔ yɛ adesai amaŋtsɛyeli mli,+ ni lɛ ekɛhãa mɔ fɛɛ mɔ ni esumɔɔ, ni ekɛ mɔ ni bɛ nɔ ko mli kwraa yɛ hii ateŋ lɛ po taa nɔ.”

18 “‘Enɛ ji lamɔ ni mi, Maŋtsɛ Nebukadnezar mina lɛ; ni agbɛnɛ, Belteshazar, tsɔɔmɔ mi eshishi, ejaakɛ hiɛshikalɔi krokomɛi lɛ fɛɛ ni yɔɔ mimaŋtsɛyeli lɛ mli lɛ nyɛɛɛ atsɔɔ mi eshishi.+ Shi bo lɛ, obaanyɛ, ejaakɛ nyɔŋmɔi krɔŋkrɔŋi lɛ amumɔ yɛ omli.’

19 “Nakai be lɛ mli lɛ, Daniel, mɔ ni atsɛɔ lɛ Belteshazar+ lɛ, he jɔ̃ ehe be fioo, ni esusumɔi lɛ hã etsui fã.

“Maŋtsɛ lɛ kɛɛ akɛ, ‘Belteshazar, kaahã lamɔ lɛ kɛ eshishitsɔɔmɔ lɛ hã otsui fã.’

“Belteshazar kɛɛ akɛ, ‘Ao minuŋtsɔ, kulɛ lamɔ nɛɛ akɔ mɛi ni nyɛɔ bo lɛ ahe, ni eshishitsɔɔmɔ lɛ akɔ ohenyɛlɔi lɛ ahe.

20 “‘Tso ni ona ni bada agbo ni ená hewalɛ, ni eyiteŋ shɛɔ ŋwɛi tɔ̃ɔ ni anaa yɛ shikpɔŋ lɛ nɔ fɛɛ,+ 21 ni enɔ bai yɔɔ fɛo, ni enɔ yibii fa babaoo diɛŋtsɛ, ni niyenii yɛ nɔ kɛhã mɔ fɛɛ mɔ, ni ŋa mli kooloi lɛ hiɔ eshishi, ni ŋwɛi loofɔji hiɔ eniji lɛ anɔ lɛ,+ 22 ji bo, maŋtsɛ, ejaakɛ obada agbo, ni oná hewalɛ, ni onunyam lɛ eda ni eshɛ ŋwɛi tɔ̃ɔ,+ ni onɔyeli lɛ eshɛ shikpɔŋ lɛ naagbeehei lɛ.+

23 “‘Ni maŋtsɛ lɛ na bulɔ ko, mɔ krɔŋkrɔŋ ko+ ni miikpeleke shi kɛmiijɛ ŋwɛi, ni kɛɛ akɛ: “Nyɛfoa tso lɛ nyɛfɔ̃a shi, ni nyɛkpãtãa ehiɛ, shi nyɛshia etsoku lɛ kɛ eshishifãi* lɛ yɛ shikpɔŋ lɛ nɔ yɛ ŋa mli jwɛi fɔ lɛ ateŋ, ni nyɛkɛ dade kɛ akɔɔble kɔsɔŋkɔsɔ afia tsoku lɛ. Ni ŋwɛi bɔ́ afɔ lɛ, ni ená egbɛfaŋnɔ yɛ ŋa mli kooloi lɛ ateŋ kɛyashi bei kpawo baaho enɔ.”+ 24 Ao maŋtsɛ, eshishi nɛ; Eji Mɔ Ni Nɔ Kwɔ Fe Fɛɛ lɛ famɔ akɛ enɛ aba minuŋtsɔ maŋtsɛ nɔ. 25 Abaashwie bo yɛ gbɔmɛi ateŋ, ni obaayahi ŋa mli kooloi lɛ ateŋ, ni abaahã okpe jwɛi tamɔ tsinahii kpeɔ jwɛi lɛ; ni ŋwɛi bɔ́ baafɔ bo,+ ni bei kpawo+ baaho onɔ,+ kɛyashi obaaná ole akɛ Mɔ Ni Nɔ Kwɔ Fe Fɛɛ lɛ ji Nɔyelɔ yɛ adesai amaŋtsɛyeli mli, ni lɛ ekɛhãa mɔ fɛɛ mɔ ni esumɔɔ.+

26 “‘Shi akɛni amɛkɛɛ akɛ ashi tso lɛ tsoku lɛ kɛ eshishifãi* lɛ hewɔ lɛ,+ omaŋtsɛyeli lɛ baatsɔ onɔ ekoŋŋ be ni oná ole akɛ ŋwɛi ni yeɔ nɔ lɛ. 27 No hewɔ lɛ, maŋtsɛ, hã miŋaawoo lɛ asa ohiɛ. Feemɔ nɔ ni ja ni okɛtsi ohe kɛje ohe eshai lɛ ahe, ni ona ohiafo mɔbɔ ni okɛtsi ohe kɛje onifɔjianii lɛ ahe. Ekolɛ abaahã oshweremɔ lɛ sɛɛ atsɛ ahã bo.’”+

28 Enɛ fɛɛ ba Maŋtsɛ Nebukadnezar nɔ.

29 Nyɔji 12 sɛɛ lɛ, gbi ko lɛ enyiɛ Babilon maŋtsɛ shĩa lɛ yiteŋ. 30 Maŋtsɛ lɛ kɛɛ akɛ: “Ani jeee Babilon Kpeteŋkpele lɛ ni mi diɛŋtsɛ mitsɔ mihewalɛ kɛ minyɛmɔ nɔ mitswa koni etsɔ maŋtsɛ shĩa, ni mikɛwo migbojee lɛ hiɛ nyam lɛ nɛ?”

31 Be ni wiemɔ lɛ yɔɔ maŋtsɛ lɛ naa lolo lɛ, gbee ko jɛ ŋwɛi kɛɛ akɛ: “Bo, Maŋtsɛ Nebukadnezar, aakɛɛ bo akɛ, ‘Maŋtsɛyeli lɛ eje odɛŋ,+ 32 ni aashwie bo yɛ gbɔmɛi ateŋ. Ni okɛ ŋa mli kooloi baayahi shi, ni abaahã okpe jwɛi tamɔ tsinahii kpeɔ jwɛi lɛ, ni bei kpawo baaho onɔ, kɛyashi be ni obaaná ole akɛ Mɔ Ni Nɔ Kwɔ Fe Fɛɛ lɛ ji Nɔyelɔ yɛ adesai amaŋtsɛyeli mli, ni lɛ ekɛhãa mɔ fɛɛ mɔ ni esumɔɔ.’”+

33 Ni wiemɔ lɛ ba mli yɛ Nebukadnezar nɔ amrɔ nɔŋŋ. Ashwie lɛ yɛ gbɔmɛi ateŋ, ni ebɔi jwɛi kpemɔ tamɔ tsinahii kpeɔ jwɛi lɛ, ni ŋwɛi bɔ́ fɔ egbɔmɔtso lɛ kɛyashi eyitsɔi tsa kakadaŋŋ tamɔ okropɔŋ tsɛji, ni ewaobii anaa tsa tamɔ loofɔji awaobii anaa.+

34 “Be ni nakai be lɛ ba naagbee lɛ,+ mi, Nebukadnezar, mikwɛ ŋwɛi, ni mijwɛŋmɔ ba mimli ekoŋŋ; ni mijie Mɔ Ni Nɔ Kwɔ Fe Fɛɛ lɛ yi, ni mikɛ yijiemɔ kɛ anunyam hã mɔ ni hiɔ shi kɛyaa naanɔ lɛ, ejaakɛ enɔyeli lɛ, naanɔ nɔyeli ni, ni emaŋtsɛyeli lɛ yɛ kɛjɛ yinɔ kome nɔ kɛmiiya yinɔ kroko nɔ.+ 35 Mɛi ni yɔɔ shikpɔŋ lɛ nɔ lɛ fɛɛ kɛ lɛ yeee egbɔ yɛ gbɛ ko gbɛ ko kwraa nɔ, ni efeɔ nɔ ni esumɔɔ yɛ ŋwɛi asraafoi lɛ kɛ mɛi ni yɔɔ shikpɔŋ lɛ nɔ lɛ ateŋ. Ni mɔ ko mɔ ko bɛ ni baanyɛ atsĩ enaa,*+ loo ekɛɛ lɛ akɛ, ‘Mɛni ofee nɛɛ?’+

36 “Nakai be lɛ mli lɛ, mijwɛŋmɔ ba mimli ekoŋŋ, ni mimaŋtsɛyeli lɛ anunyam lɛ, kɛ migbojee lɛ kɛ miwoo lɛ ku sɛɛ eba miŋɔɔ.+ Minukpai lɛ kɛ mibladei lɛ kɛ hiɛdɔɔ tao misɛɛ gbɛ, ni akɛ mimaŋtsɛyeli lɛ hã mi ekoŋŋ, ni akɛ anunyam babaoo po fata he ahã mi fe tsutsu lɛ.

37 “Agbɛnɛ, mi, Nebukadnezar, miijie ŋwɛi Maŋtsɛ lɛ yi,+ ni miiwó enɔ gojoo ni miiwo ehiɛ nyam, ejaakɛ enitsumɔi lɛ fɛɛ lɛ, anɔkwale ni, ni egbɛi ja,+ ni agbɛnɛ hu, yɛ bɔ ni enyɛɔ ebaa mɛi ni nyiɛɔ kɛ henɔwomɔ lɛ ashi lɛ hewɔ.”+