Yitso 12
Maŋtsɛ Lɛ Nibii Ni Wɔɔha Eya Hiɛ
1. (a) Mɛɛ sanebimɔ teɔ shi yɛ Maŋtsɛyeli lɛ niyelɔi ni yɔɔ wɔteŋ lolo lɛ ahe? (b) Kɛji akɛ wɔna nibii ni tamɔ nɛkɛ ni miiya nɔ yɛ amɛhe lɛ, enɛ kɛ mɛɛ anɔkwasane he odaseyeli haa?
1 AKƐNI odasei lɛ fɛɛ tsɔɔ akɛ Nyɔŋmɔ afii akpe maŋtsɛyeli lɛ ebɛŋkɛ hewɔ lɛ, sanebimɔ lɛ teɔ shi akɛ: Mɛni esa akɛ wɔkpa gbɛ yɛ mɛi ni baaya amɛyafata Nyɔŋmɔ afii akpe Maŋtsɛ lɛ he yɛ ŋwɛi nɔyeli lɛ mli lɛ ahe? Yɛ be mli ni amɛkahe amɛyɔɔ wɔteŋ lolo lɛ, esani wɔkwɛ amɛ beni akaa amɛ akwɛɔ yɛ bɔ ni amɛkɛ ŋwɛi Maŋtsɛ lɛ, mɔ ni atsɛ amɛ koni amɛkɛ lɛ abaye maŋtsɛ lɛ nibii lɛ tsuɔ nii amɛhaa. Te amɛkwɛɔ ŋwɛi Maŋtsɛ lɛ nibii ni yɔɔ shikpɔŋ nɔ lɛ anɔ amɛhaa tɛŋŋ? Kɛji akɛ wɔyɔseɔ nɛkɛ kaa ni yaa nɔ yɛ Maŋtsɛyeli lɛ gboshiniyelɔi lɛ ateŋ yɛ wɔteŋ lɛ, belɛ eji odaseyeli kpele ni tsɔɔ akɛ Nyɔŋmɔ Mesia Maŋtsɛ lɛ miiye maŋtsɛ. Eba emaŋtsɛyeli lɛ mli!
2, 3. (a) Nɔ ni wɔnaa ni yaa nɔ lɛ ji mɛɛ Yesu abɛbua miibaa, ni eji ehetoo lɛ fa kɛha mɛɛ sane ni ebɔfoi lɛ bi? (b) Te nakai abɛbua lɛ je shishi eha tɛŋŋ?
2 Afee nibii ni yaa nɔ ni gbɔmɛi kɛ amɛhiŋmɛi naa yɛ afii ohai nyɔŋmai enyɔ nɛɛ mli lɛ he mfoniri yɛ abɛbua ni Yesu Kristo kɛfata egbalɛ ni sa kadimɔ jogbaŋŋ lɛ he beni eta shi yɛ Mugɔŋ ni hiɛ kwɛɔ Yerusalem lɛ nɔ yɛ afii 33 Ŋ.B. lɛ agbiɛnaa nyɔŋ ni ji Nisan lɛ gbi nyɔŋma kɛ ekome lɛ nɔ lɛ mli. No mli lɛ eegbala sane ni ebɔfoi lɛ bi lɛ akɛ: “Tsɔɔmɔ wɔ beyinɔ ni aaatee nii nɛɛ, ni mɛni ji beni oba [pa·rou·siʹa, Hela] lɛ kɛ je nɛŋ naagbee lɛ he okadi?” (Mat. 24:3, NW) lɛ hetoo hamɔ mli fitsofitso eetsɔɔ amɛ. Ekɛ “obalayei nyɔŋma” abɛbua lɛ eha ebɔfoi lɛ egbe naa ni beni amɛkase nii kɛjɛ mli sɛɛ lɛ, ebu amɛ abɛ kroko, nɔ ni mlibaa tsɔɔ akɛ ba ni eba ni hiŋmɛi nyɛŋ ana lɛ lɛ eje shishi. Afɔɔ abɛbua nɛɛ tsɛmɔ akɛ “talentai ahe abɛbua.” Eje shishi akɛ:
3 “Shi tamɔ nuu ko ni beni ebaadom lɛ, etsɛ etsuji, ni etuu enibii ewo amɛdɛŋ; ni eha mɔ kome talentai enumɔ, mɔ kome hu enyɔ, ni mɔ kome hu ekome, bɔni mɔ fɛɛ mɔ aaanyɛ akwɛ; ni amrɔ lɛ edom.”—Mat. 25:14, 15.
4. Taakɛ abɛbua nɛɛ mli sane lɛ yɔɔ lɛ, mɛni ji nɔ ni “tamɔ” nuu niiatsɛ ko ni beni ebaadom lɛ ekɛ nibii ni jara wawai wo etsuji adɛŋ lɛ? (b) “Nuu” nɛɛ feɔ namɔ he mfoniri, ni mɛni hewɔ?
4 Mɛni ji nɔ ni atsɔɔ akɛ ‘etamɔ’ nuu ko ni beni ebaadom lɛ etsɛ etsuji ni etuu enibii ewo amɛdɛŋ lɛ? No ji nibii ni kɔɔ Maŋtsɛyeli ni Yesu Kristo fɔɔ he wiemɔ lɛ he. Enɛ jeɔ kpo faŋŋ yɛ abɛbua ni tsɔ hiɛ lɛ mli, enɛ ji “obalayei nyɔŋma” abɛbua ni eje shishi kɛ wiemɔi nɛɛ akɛ: “No mli lɛ ŋwɛi maŋtsɛyeli lɛ aaatamɔ obalayei nyɔŋma ni kɔlɔ amɛkanei akɛ amɛyakpee ayemforowu.” (Mat. 25:1) Enɛ hu jeɔ kpo faŋŋ yɛ abɛbua ni Yesu kɛha beni egbe “talentai” abɛbua lɛ naa lɛ mli. (Mat. 25:31-34) Yɛ abɛbua ni wɔsusuɔ he nɛɛ mli lɛ, nuu niiatsɛ lɛ ni baadom lɛ ji Nuŋtsɔ Yesu Kristo diɛŋtsɛ. Ebaa lɛ he “okadi” ji nɔ ni abi lɛ.
5. Mɛɛ mra be mli abɛbuai komɛi amli nibii je abɛbua ni kɔɔ “talentai” lɛ ahe lɛ, ni yɛ mɛɛ gbɛ nɔ esoro abɛbuai enyɔ lɛ yɛ nɔ ni ataoɔ ni amɛtsɔɔ mli lɛ?
5 Nibii ni “talentai” ahe abɛbua nɛɛ wieɔ he lɛ tamɔ abɛbua ni Yesu tsɔ hiɛ ekɛha ni afɔɔ lɛ tsɛmɔ akɛ “benai” abɛbua lɛ. Eka shi faŋŋ akɛ, ekɛ “talentai” ahe abɛbua lɛ ha koni kɛtsɔ bɔ ni eba mli yɛ wɔgbii nɛɛ amli hewɔ Iɛ ekɛtsɔɔ akɛ Nuŋtsɔ Yesu Kristo ba ni eba lɛ eje shishi, yɛ be mli ni Nuŋtsɔ Yesu kɛ benai abɛbua lɛ ha bɔni afee ni etoibolɔi lɛ ale yɛ nakai be lɛ mli akɛ Mesia maŋtsɛyeli lɛ baaba yɛ wɔsɛɛ be ko ni yɔɔ shɔŋŋ. No hewɔ lɛ, nɔ ni aŋma afɔ shi lɛ kpa benai ahe abɛbua lɛ hiɛ akɛ: “Shi beni amɛboɔ nii nɛɛ atoi lɛ, ebu abɛ ko eshi nɔ.” Mɛni hewɔ? “Ejaakɛ ebɛŋkɛ Yerusalem ni amɛsusuɔ akɛ amrɔ lɛ nɔŋŋ Nyɔŋmɔ maŋtsɛyeli lɛ baapue. No hewɔ lɛ ekɛɛ: Ablade ko dom etee maŋsɛɛ shɔŋŋ, ni eyaŋɔ emaŋtsɛyeli, ni eku esɛɛ eba. Ni etsɛ etsuji nyɔŋma., ni ejie benai nyɔŋma ehaa amɛ, ni ekɛɛ amɛ akɛ: Nyɛtsɔmɔa he kɛyashi maba.” (Luka 19:11-13) Enɛ tsɔɔ gbɛfaa kɛmiiya maŋsɛɛ shɔŋŋ kɛ agbɛnɛ esɛɛ kuu kɛbaa, enɛ tsɔɔ akɛ be kakadaŋŋ sɛɛ dani ablade lɛ kɛ emaŋtsɛyeli hewalɛ lɛ ku sɛɛ ba.
6. (a) Mɛni ba gbii enyɔ dani Yesu kɛ abɛbua ni kɔɔ “talentai” lɛ he lɛ ha, ni mɛni ejieee ehe kpo yɛ nakai, be lɛ mli? (b) No hewɔ lɛ mɛɛ sanebimɔ teɔ shi agbɛnɛ?
6 Nakai nɔŋŋ eji anɔkwale akɛ beni Nuŋtsɔ Yesu kɛ “talentai” ahe abɛbua lɛ ha lɛ, no mli lɛ, Nyɔŋmɔ Mesia maŋtsɛyeli lɛ yɛ wɔsɛɛ shɔŋŋ diɛŋtsɛ; ejeee nɔ ko ni baaba mli oya. Gbii enyɔ pɛ dani enɛ aaaba yɛ Hɔgbaa, Nisan 9, 33 Ŋ.B. lɛ, Yesu ta tejibi ko nɔ tamɔ maŋtsɛ kɛtee Yerusalem ni mɛi pii nyiɛ esɛɛ amɛbɔlɔ amɛkɛɛ akɛ: “Ajɔɔ mɔni baa yɛ Nuŋtsɔ [Yehowa] gbɛi anɔ lɛ! Ajɔɔ wɔtsɛ David maŋtsɛyeli ni baa yɛ Nuŋtsɔ lɛ gbɛi anɔ lɛ! Hosiana yɛ ŋwɛi flooflo!” Shi kɛlɛ, Maŋtsɛyeli lɛ ejieko ehe kpo yɛ nakai be lɛ mli. (Mar. 11:9, 10) Ani Maŋtsɛyeli nɛɛ miijie ehe kpo yɛ wɔgbii nɛɛ amli? Enɛ ji sanebimɔ ni he hiaa wɔ jogbaŋŋ bianɛ! Afii pii eho kɛjɛ beni Yesu ba yɛ heloo mli lɛ.
7, 8. (a) Te wɔfeɔ tɛŋŋ wɔleɔ be mli ni “talentai” lɛ ahe abɛbua lɛ mlibaa je shishi? (b) Yɛ mɛɛ gbɛ nɔ Bɔfoi lɛ Asaji 1:2-5 maa enɛ nɔ mi?
7 “Talentai” ahe abɛbua lɛ mlibaa ni kɔɔ Yesu parousia aloo ba ni eba lɛ he lɛ je shishi diɛŋtsɛ yɛ bɔfoi lɛ agbii lɛ amli afii ohai nyɔŋma kɛ nɛɛhu nɛ. “Nuu” lɛ ni yɔɔ abɛbua lɛ mli ni ji Yesu Kristo diɛŋtsɛ lɛ kɛ amɛ hi shi yɛ heloo mli kɛyashi beni ekwɔ kɛtee ŋwɛi, gbii nyɔŋma sɛɛ dani aye Pentekoste Gbijurɔ lɛ yɛ Yerusalem. Abɛbua lɛ je shishi akɛ nuu ko ni beni “ebaadom lɛ” etsɛ etsuji ni etuu enibii ewo amɛdɛŋ. Yesu ni atee lɛ shi kɛjɛ gbohii ateŋ lɛ ‘eyako heko’ yɛ “maŋsɛɛ shɔŋŋ” kɛyashi beni ekwɔ kɛtee atatu lɛ mli yɛ ŋwɛi ni anaaa lɛ dɔŋŋ lɛ. No hewɔ lɛ, dani nakai be lɛ aaashɛ lɛ, efɔ nine etsɛ “etsuji” ni ji ekaselɔi anɔkwafoi lɛ ni etuu nibii ni eyɔɔ lɛ ewo amɛdɛŋ. Enɛ hewɔ hu ni abɛbua nɛɛ je shishi beni atee lɛ shi kɛjɛ gbohii ateŋ lɛ sɛɛ beni eshwɛ fioo ni ebaakwɔ kɛya eŋwɛi Tsɛ lɛ ŋɔɔ lɛ. Wɔkaneɔ enɛ yɛ Bɔfoi 1:2-5 akɛ:
8 “Kɛyashi gbi nɔ ni aŋɔ lɛ kɛtee ŋwɛi lɛ, [Yesu tuu nitsumɔ ko kɛwo ekaselɔi lɛ adɛŋ. Aŋɔ lɛ kɛtee ŋwɛi] beni etsɔ mumɔ krɔŋkrɔŋ lɛ nɔ ewo ebɔfoi ni ehala lɛ akitai sɛɛ lɛ; mɛi hu ni emanehulu lɛ sɛɛ lɛ etsɔ saji pii anɔ ejie ehe kpo etsɔɔ amɛ akɛ hiɛkalɔ, ni eha amɛna lɛ gbii nyɔŋmai ejwɛ sɔŋŋ, ni ekɛamɛ wie Nyɔŋmɔ maŋtsɛyeli lɛ he. Ni beni ekɛ amɛnaa kpe shi lɛ, ewo amɛ akpɔ akɛ amɛkaje Yerusalem, shi moŋ amɛmɛ tsɛ lɛ shiwoo lɛ, ni nyɛnu yɛ minaa lɛ; ejaakɛ Yohane lɛ, nu ekɛ baptisi, shi nyɛ lɛ eyeŋ gbii pii ko ni akɛ mumɔ krɔŋkrɔŋ aaabaptisi nyɛ.”
9. (a) Te atsɔɔ nuu ni faa gbɛ lɛ yiŋtoo lɛ mli aha tɛŋŋ yɛ “talentai” lɛ he abɛbua lɛ mii? (b) Benai lɛ ahe abɛbua ni tamɔ enɛ lɛ mli lɛ, mɛni ji yiŋtoo hewɔ ni nuu lɛ fa gbɛ ketee shɔŋŋ shikpɔŋ nɔ lɛ, ni yɛ mɛɛ gbɛ nɔ Yesu ma enɛ nɔ mi yɛ Nuŋtsɔ lɛ Gbɛkɛnaashi Niyenii lɛ shishi?
9 Shikpɔŋ ni “nuu” lɛ ‘baadom’ kɛya jɛmɛ ni yɔɔ abɛbua lɛ mli lɛ ji ŋwɛi diɛŋtsɛ, heni Nuŋtsɔ Yesu Kristo ŋwɛi Tsɛ lɛ diɛŋtsɛ yɔɔ lɛ. Luka 19:12 wieɔ enɛ he yɛ gbɛ ni ja nɔ akɛ “maŋsɛɛɛ shɔŋŋ.” Yesu etsɔɔɔ wɔ yiŋtoo hewɔ ni “nuu” lɛ faa gbɛ lɛ yɛ “talentai” lɛ he abɛbua lɛ mli. Shi kɛlɛ etsɔɔ akɛ eeya koni eyatao “miishɛɛ” krɛdɛɛ ko koni eha “enibii” lɛ afa ni etsɔ “nibii pii atsɛ.” No hewɔ lɛ be mli ni nuu lɛ nine shɛ yiŋtoo hewɔ ni efa gbɛ kɛtee maŋsɛɛ shɔŋŋ lɛ nɔ lɛ, ebote “emiishɛɛ” mli akɛ “tsuji” ni eshi amɛ yɛ esɛɛ lɛ anuŋtsɔ. Abɛbua kroko ni kɛ enɛ yeɔ egbɔ ni ji benai lɛ anɔ̃ lɛ tsɔɔ akɛ yiŋtoo ni yɔɔ gbɛfaa lɛ sɛɛ ji ni “eyaŋɔ maŋtsɛyeli, ni eku esɛɛ eba.” No hewɔ lɛ maŋtsɛyeli lɛ ni eeena lɛ ji “emiishɛɛ.” Beni etsɔɔ akɛ enɛ ji yiŋtoo hewɔ ni eyaa ŋwɛi lɛ, Yesu kɛɛ ebɔfoi lɛ yɛ sɛɛ mli beni etsɔɔ amɛ gbɛ ni esa akɛ amɛtsɔ nɔ amɛye daa afi Nuŋtsɔ lɛ Gbɛkɛnaashi Niyenii lɛ akɛ: “Ni mihu miito maŋtsɛyeli mahanyɛ taakɛ bɔ ni mitsɛ oto ebami lɛ, koni nyɛye nii ni nyɛnu yɛ mikpɔlɔ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma kɛ enyɔ lɛ.”—Luka 22:29, 30.
10. ”Etsuji” lɛ feɔ namɛi ahe mfoniri yɛ abɛbua lɛ mli, ni te atsɔɔ akɛ amɛkpɛlɛ nɛkɛ gbɛi nɛɛ nɔ amɛha tɛŋŋ?
10 Yɛ abɛbua lɛ mli lɛ, “etsuji” lɛ ji Yesu Kristo kaselɔi ni abaptisi amɛ ni baana maŋtsɛsɛii yɛ “ŋwɛi maŋtsɛyeli” lɛ mli lɛ. Efeee bɔfoi lɛ ahiɛgbele akɛ amɛaajaje akɛ amɛji Nuŋtsɔ Yesu “tsuji.” Akɛ nɔkwɛmɔ nɔ lɛ, akɛ wiemɔi nɛɛ jeɔ Petro wolo ni ji enyɔ lɛ shishi: “Simon Petro, ni ji Yesu Kristo tsulɔ kɛ bɔfo lɛ.” (2 Pet. 1:1) Yɛ be mli ni ejeɔ Biblia mli naagbee wolo ni ji Kpojiemɔ lɛ shishi lɛ, bɔfo Yohane kɛɛ akɛ Yesu Kristo “tsu ebɔfo lɛ ni ekɛbatsɔɔ etsulɔ Yohane” (Kpoj. 1:1) Kaselɔ Yuda je ewolo lɛ shishi nɛkɛ “Yuda, ni ji Yesu Kristo tsulɔ kɛ Yakobo nyɛmi lɛ.” (Yuda 1) Kaselɔ Yakobo kɛ wiemɔi nɛɛ je ewolo lɛ shishi: “Yakobo ji Nyɔŋmɔ kɛ Nuŋtsɔ Yesu Kristo tsulɔ lɛ, ŋma yaha akutsei nyɔŋma kɛ enyɔ ni egbɛ eshwa lɛ.” (Yak. 1:1) Bɔfo Paulo je ewolo ni eŋma eyaha Filipibii lɛ shishi akɛ: “Paulo kɛ Timoteo, Yesu Kristo tsuji lɛ, ŋma yaha mɛi krɔŋkrɔŋi lɛ ni yɔɔ Yesu Kristo mli yɛ Filipi.”—Filip. 1:1.
“ENIBIII” Ni ETU EWO MƐI ADƐŊ
11. “Nibii” ni Yesu ni ji “nuu” ni yɔɔ abɛbua lɛ mli lɛ shi eha “etsuji” lɛ jeee mɛni nibii?
11 Kaselɔi ni baana ŋwɛi maŋtsɛyeli lɛ ji “tsuji” ni Yesu Kristo ni yaa lɛ bua amɛnaa dani eshi shikpɔŋ nɔ ni ekɛ “enibii” wo amɛdɛŋ lɛ. (Mat. 25:14) Mɛni ji nɛkɛ nibii nɛɛ? Eshiii heloo gbɛfaŋ nibii komɛi yɛ esɛɛ ehaaa kaselɔi lɛ, tamɔ shiai, shikpɔji, atadei, shika yɛ shikatoohe. Eshi enyɛ Maria ni egbɔ lɛ kɛ enyɛ bihii kɛ biyei lɛ yɛ esɛɛ beni egbɔ yɛ sɛŋmɔtso nɔ yɛ Kalvary lɛ, ni mɛnɛɛmɛi ji mɛi ni taakɛ Mose Mla lɛ tsɔɔ lɛ, heloo gbɛfaŋ nibii komɛi ni eyɔɔ lɛ baaji amɛnɔ̃. Yɛ be mli ni eshiɛɔ ni etsɔɔ Nyɔŋmɔ maŋtsɛyeli lɛ he nii afii etɛ kɛ fa lɛ, no mli lɛ ebɔɔɔ ‘jwetri ko ehaaa ehe yɛ shikpɔŋ nɔ,’ shi moŋ klɛŋklɛŋ lɛ eetao ŋwɛi Tsɛ lɛ maŋtsɛyeli. (Mat. 6:19, 20, 33; 12:46, 47; 24:3-47; Bɔf. 1:14) Belɛ mɛni eshi yɛ esɛɛ ni ebaanyɛ ekɛwo “etsuji” lɛ adɛŋ?
12, 13. (a) Belɛ mɛni Yesu Kristo shi yɛ esɛɛ akɛ “enibii”? (b) Yɛ mɛɛ gbɛ nɔ enɛ jeɔ kpo yɛ nɔ ni Yesu kɛɛ ebɔfoi lɛ yɛ Yakob nubu ni yɔɔ Samaria lɛ he lɛ mli?
12 Eji shishitoo kɛha Kristofoi anitsumɔi lolo, ŋmɔ ni ahu mli ni abaashiɛ Nyɔŋmɔ Mesia maŋtsɛyeli lɛ he sanekpakpa lɛ yɛ mli ni kaselɔi Kristofoi ni amɛbaafee hu ajɛ mli aba. Eji gbɛ ni asaa aha ekaselɔi ni ji “tsuji” lɛ. Beni shɛɔ afi 30 Ŋ. B. ni enyiɛ gbɛ kɛmiitsɔ Samaria shikpɔŋ lɛ nɔ beni eshiɛ etsɔɔ Samariayoo ko yɛ “Yakob nubu” ni bɛŋkɛ Sikar lɛ he lɛ sɛɛ lɛ, Yesu kɛɛ ebɔfoi lɛ akɛ:
13 “Naa, miikɛɛnyɛ akɛ: Nyɛholea nyɛhiŋmɛii anɔ ni nyɛkwɛa ŋmɔji lɛ bɔ ni amɛgba futaa momo ni sa kpamɔ. Ni mɔ ni kpaa lɛ naa enyɔmɔwoo; ni ebuaa yibii anaa etoɔ naanɔ wala, koni mɔ ni duɔ lɛ kɛ mɔ ni kpaa lɛ fɛɛ anya shikome. Ejaakɛ enɛ mli ni wiemɔ ni awie akɛ: Mɔ ko duɔ ni mɔ ko kpaa lɛ baa mli yɛ. Mi lɛ, mitsunyɛ koni nyɛyakpa nɔ ni jeee nyɛ nyɛtsu he nɔ ko; mɛi krokomɛi etsu nii lɛ, ni nyɛha amɛnitsumɔ lɛ mli.”—Yoh. 4:35-38.
14. (a) Kɛ akɛ Yohane Baptisilɔ lɛ kɛ Yesu Kristo maŋ sɔɔmɔ nitsumɔ lɛ to he lɛ te anaa tɛŋŋ? (b) Yesu shi ŋmɔ ni ahu mli ni asaa nɔ ni baanyɛ awo yibii babaoo eha namɛi ni yɛ mɛɛ gbɛ nɔ?
14 Yohane Baptisilɔ lɛ kɛ nyɔji ekpaa tsɔ hiɛ etsu nii akɛ Yesu hiɛnyiɛlɔ ni ejaje akɛ: “Nyɛtsakea nyɛtsuii, ejaakɛ ŋwɛi maŋtsɛyeli lɛ ebɛŋkɛ.” Yɛ sɛɛ mli beni awo Yohane tsuŋ yɛ afi 30 Ŋ.B. sɛɛ lɛ, Yesu je nakai shiɛmɔ lɛ nɔŋŋ shishi. Etee nɔ yɛ afii etɛ kɛ fa ni nyiɛ sɛɛ lɛ mli eshiɛ nakai sane lɛ ni etsɔɔ gbɔmɛi lɛ anii yɛ he fɛɛ he ni hegbɛ lɛ aaaba yɛ. No hewɔ lɛ maŋ shiɛmɔ ni Yohane Baptisilɔ lɛ kɛ ehe wo mli lɛ sɛɛ etsɛɛɛ kwraa, aaafee afi pɛ, shi Yesu maŋ shiɛmɔ kɛ eteemɔŋ nitsumɔi lɛ sɛɛ kɛlɛ fe enɔ lɛ nɔ toi etɛ. Abaanyɛ akɛɛ akɛ nakai hii enyɔ lɛ fɛɛ du nii, Yesu tsa nɔ kɛjɛ heni Yohane shi yɛ lɛ. Yesu je shishi ena kaselɔi tamɔ nikpamɔ shi enine shɛɛɛ mɛi fɛɛ nɔ yɛ nɛkɛ nitsumɔ nɛɛ mli. (Mat. 4:12-23; 3.1-7) Agbɛnɛ hu, Yesu etsɔ emaŋ sɔɔmɔ nitsumɔ ni awuyeli gbele kɛ gbohiiashitee fata he lɛ nɔ eha Biblia mli gbalɛi ni kɔɔ shiwoo Mesia lɛ he lɛ eba mli, ni maŋ muu lɛ fɛɛ le enɛ. Enɛ na hewalɛ waa yɛ Yudafoi lɛ ni yɔɔ shikpɔŋkuku ni Yesu Kristo tsu nii yɛ mli ni awie ehe babaoo yɛ nakai be lɛ mli lɛ anɔ. Nɔ ni jɛ mli ba ji shikpɔŋ ni ahu nɔ ni abaanyɛ ana kaselɔi Kristofoi kɛjɛ mli.
15. (a) No hewɔ lɛ mɛni nii ni sɛɛnamɔ yɔɔ he ni abaanyɛ atsu he nii ni ewo yibii Yesu Kristo shi eha ekaselɔi lɛ? (b) Yɛ shishijee lɛ mɛi enyiɛ eshi nakai “nibii” lɛ eha?
15 Yɛ nɛkɛ gbɛ nɔ Yesu kɛ nɔ ko ni asaa momo ni abaatsu he nii, nyɛmɔ hewalɛ ko wo ŋmɔ ni ji gbɔmɛi ni etsu nii yɛ amɛteŋ lɛ mli, ŋmɔ ni asaa momo ni baahere nitsumɔ ni wɔsɛɛ be mli lɛ Yesu kaselɔi baatsu lɛ nɔ amrɔ nɔŋŋ. Nɛkɛ ŋmɔ ni asaa ni hiɛ nyɛmɔi (Kristofoi ni abaanyɛ ana) kɛtsɔ kaselɔi Kristofoi anidumɔ kɛ nikpamɔ nɔ lɛ ji nɔ ni feɔ Nuŋtsɔ Yesu Kristo ni atee lɛ shi lɛ “nibii” lɛ. Enɛ ji nɔ ni ekɛwo etsuji ni ji kaselɔi lɛ adɛŋ lɛ. Yɛ eshitee kɛmiijɛ gbohii ateŋ lɛ sɛɛ lɛ “ejie ehe kpo etsɔɔ aaafee nyɛmimɛi ohai enumɔ loo nɔ shikome,” shi yɛ no sɛɛ yɛ Pentekoste Gbijurɔyeli lɛ nɔ lɛ, kaselɔi aaatee oha kɛ nyɔŋmai enyɔ bua amɛhe naa yɛ ŋwɛitsu ko nɔ yɛ Yerusalem ni amɛbafee klɛŋklɛŋ mɛi ni nine shɛ mumɔ krɔŋkrɔŋ lɛ nɔ beni afɔse ashwie shi kɛjɛ ŋwɛi lɛ. (1 Kor. 15:6; Mat. 28:16-18; Bɔf. 1:13-15) No hewɔ lɛ, kɛ hoo kwraa lɛ, ekɛ “enibii” nɛɛ wo “etsuji” ni ji Kristofoi fe oha dɛŋ dani efa gbɛ loo edom kɛtsɔ kwɔ ni ekwɔ kɛtee ŋwɛi Tsɛ lɛ ŋɔɔ lɛ nɔ.
16. Shika enyiɛ nuu ni yɔɔ abɛbua lɛ mli lɛ “nibii” lɛ feɔ, ni mɛɛ gbɛ nɔ etsɔ eja nɛkɛ “nibii” nɛɛ eha “etsuji” lɛ?
16 Mɛɛ gbɛ nɔ atsɔ aja nɛkɛ “nibii” nɛɛ, ni mɛni nɔ adamɔ afee enɛ? Wɔkaneɔ akɛ: “Ni eha mɔ kome talɛntai enumɔ, mɔ kome hu enyɔ, ni mɔ kome hu ekome. Bɔ ni mɔ fɛɛ mɔ aaanyɛ akwɛ; ni amrɔ lɛ edom.” (Mat. 26:15) No hewɔ lɛ “enibii” ni eja eha etsuji lɛ feɔ jwiɛtɛi talɛntai kpaanyɔ (8) . Enɛ damɔ shi kɛha heloo gbɛfaŋ nibii ni fa yɛ nakai blema bei lɛ amli yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli, ejaakɛ jwiɛtɛi talenta kome feɔ benai nyɔŋmai ekpaa (60) aloo aaafee ¢2337.50. Tsulɔ ni nine shɛ talenta kome nɔ lɛ na shika ni fa tamɔ nɛkɛ ni ekɛaatsu nii; tsulɔ ni nine shɛ talɛntai enyɔ nɔ lɛ na nɛkɛ shika nɛɛ toi enyɔ; ni mɔ ni na talɛntai enumɔ lɛ na shika nɛɛ toi enumɔ. Tsuji lɛ ateŋ mɔ fɛɛ mɔ nine shɛ shika ni amɛteŋ “mɔ fɛɛ mɔ aaanyɛ akwɛ” yɛ nitsumɔ mli lɛ nɔ. Nuu niiatsɛ lɛ le etsuji lɛ kɛ amɛnyɛmɔi.
17. (a) Mɛɛ nyɛmɔi”tsuji” ni yɔɔ ebɛbua lɛ mli lɛ yɔɔ, ni abɛbua lɛ mlibaa hu? (b) Namɔ nine shɛ gbɛnaa nii ni da fe fee nɔ yɛ abɛbua lɛ mli, kɛ agbɛnɛ yɛ emlibaa lɛ mli?
17 Yɛ abɛbua lɛ mli lɛ, amɛnyɛmɔi lɛ ji fɔmɔ mli nyɛmɔi loo mɔdɛŋbɔɔi ni tsuji lɛ ena yɛ amɛ su kɛ baŋ mli. Yɛ “talentai” lɛ he abɛbua lɛ mlibaa mli lɛ, “nyɛmɔi” loo mɔdɛŋbɔɔi lɛ jeee gbɔmɔtsoŋ loo jwɛŋmɔŋ nɔ̃, eyɛ mli akɛ nyɛmɔ ni tamɔ nɛkɛ lɛ he baanyɛ aba sɛɛnamɔ ni eye ebua. Shi moŋ “nyɛmɔi” lɛ damɔ shi kɛha mumɔŋ nibii ni Kristofonyo tsulɔ ni baana ŋwɛi maŋtsɛyeli lɛ mli gbɛ lɛ baanyɛ afee loo aaanyɛ ana yɛ emli. Ekaa, suɔmɔ ni eyɔɔ, kɛ miishɛɛ ni Kristofonyo tsulɔ lɛ yɔɔ lɛ eye ebua ni ena nɛkɛ nibii nɛɛ koni ekɛ mumɔŋ jwetri ni akɛwo edɛŋ lɛ atsu nii. Mɔ ni nine shɛɔ nɔ ni damɔ shi kɛha talɛntai enumɔ nɔ taakɛ enyɛmɔ yɔɔ lɛ naa gbɛnaa nii ni tsii aloo nɔ ni da fe fɛɛ. No hewɔ lɛ Nuŋtsɔ Yesu Kristo kɛ gbɛnaa nii ni da lɛ efɔ ebɔfoi ni ji etsuji lɛ anɔ, ni amɛyɛ gbɛgbamɔ nitsumɔ ni da ni amɛbaatsu, kɛ agbɛnɛ Kristofoi asafo lɛ shishitoo tɛi ni amɛbaatsɔmɔ.—Kpoj. 21:14; Efe. 2:20-22.
18. (a) “Tsuji” lɛ ni amɛyibɔ ji etɛ pɛ lɛ damɔ shi kɛha mɛni? (b) Yɛ abɛbua lɛ mli lɛ, “tsuji” lɛ bafee hii sɔŋŋ shi emlibaa lɛ hu?
18 Nuŋtsɔ Yesu Kristo yɛ mumɔŋ “tsuji” fe etɛ ni ekɛ amɛ ekpaŋ kɛha ŋwɛi maŋtsɛyeli lɛ. No hewɔ lɛ “tsuji” etɛ lɛ ni yɔɔ abɛbua lɛ mli lɛ damɔ shi kɛha kui sɔrɔtoi etɛ ni kpaa gbɛ akɛ amɛbaafee ŋwɛi maŋtsɛyeli lɛ niyelɔi. Esa akɛ wɔkai akɛ yei pii yɛ Kristofoi asafo lɛ ni akɛ mumɔ efɔ amɛ lɛ mli. Yɛ Pentekoste Gbijurɔyeli lɛ nɔ, yɛ afi 33 Ŋ.B. lɛ, Yesu nyɛ Maria ji nɛkɛ yei nɛɛ ateŋ mɔ kome, ni Maria kɛ Marta ni jɛ Betania, maŋ ni bɛŋkɛ Yerusalem lɛ mli lɛ hu fata “yei” komɛi ni atsi amɛta yɛ Bɔfoi 1:14 ni nine shɛ mumɔ krɔŋkrɔŋ lɛ nɔ yɛ Pentekoste gbi ni sa kadimɔ lɛ nɔ lɛ ahe. (Yoh. 11:1-45) Agbɛnɛ hu beni awaa Filipo sanekpakpa shiɛlɔ lɛ yi yɛ Yerusalem lɛ, etee Samaria yɛ kooyigbɛ, ni eyana Samaria yei komɛi ni heɔ yeɔ, ejaakɛ wɔkaneɔ akɛ: “Shi beni amɛhe Filipo ni jaje Nyɔŋmɔ maŋtsɛyeli lɛ kɛ Yesu Kristo gbɛi lɛ he sanekpakpa lɛ etsɔɔ amɛ lɛ amɛye lɛ, abaptisi hii kɛ yei.”—Bɔf. 8:12.
19. (a) Mɛni “nuu” lɛ kpaa gbɛ akɛ tsuji lɛ kɛ “enibii” lɛ aaafee yɛ abɛbua lɛ mli? (b) Mɛni Yesu Kristo kpaa gbɛ yɛ “nibii” ni eshi eha ekaselɔi ni ji “tsuji” lɛ ahe?
19 Nuu ni dom yɛ abɛbua lɛ mli lɛ miikpa gbɛ akɛ etsuji lɛ kɛ nakai talentai lɛ baatsu nii yɛ be mli ni efa gbɛ lɛ ni amɛha efa. Esumɔɔɔ ni amɛha shika lɛ aka shi efolo ni ewooo yibii ko. Nakai nɔŋŋ hu Nuŋtsɔ Yesu Kristo, beni ekɛ enibii fɛɛ ni yɔɔ shikpɔŋ nɔ lɛ woɔ ekaselɔi ni ji “tsuji” lɛ adɛŋ lɛ, lɛ hu ekpa amɛ gbɛ akɛ amɛbaafee. Yɛ anɔkwale mli lɛ efa amɛ akɛ amɛkaha shikpɔŋ ni esaa nɔ ni ekɛwo amɛdɛŋ lɛ miika shi efolo ni amɛtsuuu nii yɛ nɔ ni ewooo yibii. Ni nakai nɔŋŋ esaaa akɛ ashiɔ ŋmɔ lɛ dalɛ lɛ nakai ni akɛ eko fataaa he, alɛɛɛ mli ni eeeda. Dabi, shi moŋ, Nuŋtsɔ Yesu Kristo ni bɛ lɛ miikpa nɔyaa gbɛ, no hewɔ lɛ nɔ ni baajɛ shweremɔ ni baŋ lɛ mli aba ji toigbalamɔ kɛha mɔ ni tsuŋ egbɛnaa nii lɛ.
NII NI AKƐ “TALENTAI” LƐ AAATSU
20. “Nuu” lɛ ni ekɛ talɛntai lɛ wo etsuji lɛ adɛŋ lɛ miikpa mɛni gbɛ kɛmiijɛ amɛdɛŋ, ni yɛ mɛɛ gbɛ nɔ nakai gbɛkpamɔi lɛ ni amɛnine shɛ nɔ lɛ he ba sɛɛnamɔ kɛha tsuji lɛ?
20 Kɛji akɛ akɛɛɛ nakai abɛbua lɛ mli tsuji lɛ nakai diɛŋtsɛ po lɛ, amɛle akɛ aakpa nɔyaa gbɛ kɛmiijɛ amɛdɛŋ. Abɛbua lɛ haa enɛ mli feɔ faŋŋ, ejaakɛ wɔkaneɔ akɛ: “Shi mɔ ni na talentai enumɔ lɛ tee ni eyatsɔmɔ he, ni ena talentai enumɔ ebɔ he. Nakai nɔŋŋ mɔ ni na enyɔ lɛ hu na enyɔ ebɔ he.” (Mat. 25:16, 17) Eka shi faŋŋ akɛ nɛkɛ tsuji enyɔ nɛɛ kɛ amɛ shika lɛ eyatooo shikatoohe ko ni atsɔ shikatoohe lɛ nitsumɔi anɔ ana hekpa. Shi moŋ amɛdiɛŋtsɛ amɛkɛ wo nitsumɔ mli amɛkɛ amɛŋaa kɛ nilee kɛ sɛɛyoomɔ tsɔmɔ he. Mɔdɛŋ ni amɛ diɛŋtsɛ amɛbɔ lɛ he ba sɛɛnamɔ. Ejaakɛ shika ni akɛwo amɛdɛŋ lɛ bɔ he. Mɔ fɛɛ mɔ kɛ “lɛ diɛŋtsɛ enyɛmɔ” tsu nii, kɛ anɔkwale kɛ hetuu-kɛ-hamɔ kɛha nɔtsɛ lɛ, kɛ agbɛnɛ suɔmɔ ni amɛsumɔɔ akɛ amɛhiɛ aaaba nyam yɛ ehiɛ.
21, 22. Yɛ mɛɛ gbɛ nɔ abaaha Yesu Kristo “nibii” lɛ afa babaoo, kɛyashi nɛgbɛ? Yɛ mɛɛ shikpɔji anɔ?
21 Belɛ mɛɛ gbɛ nɔ nakai Nuŋtsɔ Yesu Kristo “nibii” ni akɛwo mɛi ni amɛkpaa gbɛ akɛ amɛbaafee Maŋtsɛyeli lɛ niyelɔi lɛ adɛŋ lɛ bɔɔ he kɛhaa abɛbua lɛ mlibaa? Nuŋtsɔ Yesu tsɔɔ gbɛ ni amɛaatsɔ nɔ amɛfee enɛ, ni Biblia mli sane lɛ hu kɛ nɔkwɛmɔ nii ni tsɔɔ bɔ ni afee lɛ afii ohai nyɔŋma kɛ nɛɛhu ni eho nɛ lɛ ha. Gbii komɛi dani Nuŋtsɔ Yesu aaakwɔ kɛya ŋwɛi lɛ etsake ehe ni ejie ehe kpo etsɔɔ ekaselɔi lɛ yɛ heko ni amɛtsɔ hiɛ amɛto he gbɛjianɔ amɛfɔ shi, yɛ gɔŋ ko nɔ yɛ Galilea niiaŋ. Jɛmɛ ekɛɛ amɛ yɛ akɛ: “Aŋɔ hegbɛ fɛɛ ahami yɛ ŋwɛi kɛ shikpɔŋ nɔ. No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa tsɛ lɛ kɛ bi lɛ kɛ mumɔ krɔŋkrɔŋ Iɛ gbɛi amli, ni nyɛtsɔɔ amɛ ni amɛye nii fiaa ni mikɛɛnyɛ lɛ anɔ. Ni naa, mi lɛ, mikɛnyɛ yɛ daa kɛyashi jeŋ naagbee lɛ.” (Mat. 28:16-20) Shi eje gbɛ ema gbɛ ni esa akɛ atsɔ nɔ atsu “enibii” ni esa akɛ aha efa lɛ he nii lɛ nɔ mi waa yɛ gbi nɔ ni ekwɔ kɛtee ŋwɛi lɛ. Wɔkaneɔ yɛ enɛ he akɛ:
22 “Agbɛnɛ mɛi ni naa ebakpe shi lɛ bi lɛ akɛ: Nuŋtsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ? Shi ekɛɛ amɛ akɛ: Jeee nyɛhe sane ko ji akɛ nyɛaale bei loo yinɔi Iɛ ni tsɛ lɛ eto yɛ lɛ diɛŋtsɛ ehewalɛ mli lɛ, shi moŋ kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.”—Bɔf. 1:6-8.
23. (a) Nɛgbɛ ji heni Yesu shiɛ ni etsɔɔ nii yɛ pɛ, ni mɛni jɛ mli ba? (b) Agbɛnɛ nɛgbɛ kaselɔi lɛ naa Kristo “nibii” lɛ yɛ ni amɛkɛtsu nii kɛyashi namɔ be ni sa mli?
23 Akɛ Maŋtsɛyeli lɛ shiɛlɔ kɛ tsɔɔlɔ yɛ shikpɔŋ nɔ lɛ, Yesu je gbɛ etsu nii yɛ Yerusalem kɛ Galilea niiaŋ kɛ Yudea (ni Samaria fata he) kɛ Perea yɛ Yordan Faa lɛ naa yɛ bokagbɛ. Yesu saa shikpɔŋ yɛ Yudafoi lɛ kɛ Samariabii lɛ ateŋ koni ajɛ mli afee kaselɔi babaoo. Kaselɔi lɛ baaŋɔ shihilɛ ni tamɔ nɛkɛ ni eba yɛ shikpɔji nɛɛ anɔ lɛ ni amɛha kaselɔi ni ji Kristofoi lɛ ayi afa; no ji “nibii” ni Nuŋtsɔ Yesu Kristo kɛwo amɛdɛŋ akɛ “tsuji” lɛ. No hewɔ lɛ, klɛŋklɛŋ lɛ, esa akɛ amɛtsu nii yɛ nakai shikpɔji ni asaa nɔ lɛ amli kɛyashi be loo yinɔ ni ŋwɛi Tsɛ lɛ eto kɛha lɛ diɛŋtsɛ ehe lɛ. Esa akɛ amɛfee enɛ, ni amɛkai akɛ “Kristo tsɔ sɔɔlɔ eha ketiafoo lɛ yɛ Nyɔŋmɔ anɔkwale lɛ hewɔ, koni ekɛma shiwooi ni awo tsɛmɛi lɛ anɔ mi.”—Rom. 15:8.
24. (a) Yɛ mɛɛ gbɛ nɔ kaselɔi lɛ kɛ amɛ Nuŋtsɔ lɛ “nibii” lɛ bɔi nitsumɔ yɛ beni amɛnine shɛ mumɔ krɔŋkrɔŋ lɛ nɔ lɛ sɛɛ nɔŋŋ, ni te yifalɛ lɛ tee nɔ eha tɛŋŋ? (b) Mɛɛ ŋmɔ ni baa nii pii heyelilɔi ni ji Yudafoi lɛ na yɛ be mli ni amɛku amɛsɛɛ amɛtee shia yɛ Pentekoste sɛɛ lɛ?
24 Yɛ enɛ kɛ gbeekpamɔ naa lɛ, kaselɔi ni ji “tsuji” ni yɔɔ nakai be lɛ mli lɛ ŋɔ nakai hegbɛ lɛ koni amɛtsu nii yɛ shikpɔŋ ni Nuŋtsɔ Yesu esaa ni ekɛwo amɛdɛŋ akɛ “enibii” ni etsu he nii lɛ, ni amɛbɔi mumɔŋ ŋmɔ lɛ mii nitsumɔ bɔni afee ni amɛwo kaselɔi ayibii babaoo. Amɛfee nakai amrɔ nɔŋŋ, yɛ Pentekoste Gbijurɔyeli lɛ nɔ afi 33 Ŋ.B. yɛ Yerusalem, ni amrɔ nɔŋŋ lɛ amɛwo yibii babaoo aaafee akpei etɛ ni abaptisi amɛ ni baana Maŋtsɛyeli lɛ mli hegbɛ yɛ mumɔ krɔŋkrɔŋ ni akɛbaptisi amɛ lɛ hewɔ. Mɛnɛɛmɛi fɛɛ ji gbɔmɛi ni afo amɛ ketia, kɛji akɛ amɛji heloo naa Yudafoi loo mɛi ni amɛtsake amɛhe kɛba Yudafoi ahemɔkɛyeli lɛ mli jio. Kaselɔi lɛ tee nɔ amɛkɛ nibii ni Nuŋtsɔ Yesu kɛwo amɛdɛŋ lɛ tsu nii lolo, amɛtsɔmɔ Kristofoi “anibii” lɛ he yɛ nitsumɔ mli, no hewɔ lɛ yɛ sɛɛ mli be ko lɛ kaselɔi ni yɔɔ Yerusalem lɛ ayi bafa kɛyashɛ “aaafee akpei enumɔ.” (Bɔf. 4:4) Ŋwanejee ko kwraa bɛ he akɛ Yudafoi kɛ mɛi ni amɛtsɔmɔ amɛhe Yudafoi ohai abɔ ni shi Yerusalem yɛ Pentekoste sɛɛ ni amɛku amɛsɛɛ kɛtee amɛshiai yɛ shikpɔŋ lɛ nɔ hei sɔrɔtoi lɛ na shikpɔji ni amɛbaatsu Kristojamɔ he nii yɛ mli yɛ amɛkuuŋbii ni ji Yudafoi lɛ ashiai amli.
25. (a) Yɛ mɛɛ gbɛ nɔ Yesu etsu “nibii” komɛi ahe nii momo yɛ Yudafoi kɛ mɛi ni amɛtsɔmɔ amɛhe Yudafoi ni baa Yerusalem gbijurɔyeli lɛ ateŋ? (b) Yɛ mɛɛ gbɛ nɔ yiwaa ha Kristofoi ahemɔkɛyeli lɛ gbɛ eshwã kɛtee shɔŋŋ shikpɔji ni Yudafoi lɛ yɔɔ nɔ lɛ anɔ?
25 Ekolɛ nakai Yudafoi lɛ kɛ mɛi ni amɛtsɔmɔ amɛhe Yudafoi lɛ ateŋ mɛi pii ni kuɔ amɛsɛɛ lɛ kɛ Yesu Kristo ekpe ni amɛnu ewiemɔi yɛ tsutsu be ni amɛbasra Yerusalem ni amɛbaye gbijurɔ lɛ. Akɛni nakai eji hewɔ lɛ, belɛ Yesu esaa shikpɔŋ ko efɔ shi yɛ nakai Yudafoi lɛ kɛ mɛi ni amɛtsɔmɔ amɛhe Yudafoi lɛ ateŋ, kɛkɛ ni bɔfoi lɛ kɛ nanemɛi kaselɔi ni yɔɔ Yerusalem lɛ ŋɔ Yesu nibii nɛɛ ni amɛkɛ nɛkɛ “nibii” nɛɛ tsu nii. (Yoh. 12:20-29; Bɔf. 2:5-11) No hewɔ lɛ ebalɛ akɛ, dani eeeba akɛ bɔfo Paulo aaaya Roma, Italia lɛ, no mli lɛ asafo ko ni Kristofoi babaoo yɔɔ mli yɛ jɛmɛ momo. (Rom. 1:1-7;15:22-24) Agbɛnɛ hu yiwaa ni te shi yɛ Yerusalem ni ba Kristo kaselɔi ni yɔɔ jɛmɛ lɛ anɔ lɛ jɛ Kristofoi ahemɔkɛyeli lɛ ni gbɛ shwa Yudafoi pii ni yɔɔ amɛnɔyelihe lɛ sɛɛ lɛ ateŋ lɛ hewɔ. Aŋma yɛ Bɔfoi 11:19 akɛ: “Agbɛnɛ mɛi ni gbɛ shwa yɛ Stefano amanehulu lɛ mli lɛ fo mli kɛtee Foinike kɛ Kipro kɛ Antiokia tɔ̃ɔ, shi amɛjajeee wiemɔ lɛ amɛtsɔɔɔ mɔ ko mɔ ko akɛ ja Yudafoi lɛ kɛkɛ.”
26. (a) Kaselɔ-feemɔ nitsumɔ lɛ ni atsu yɛ Yudafoi lɛ ateŋ pɛ lɛ tee nɔ aahu kɛyashi be mli ni mɛni ba? (b) Yɛ mɛɛ gbɛ nɔ nii ni atsu yɛ shikpɔji heei ni agbele nɛɛ kpaako lɛ anɔ Iɛ ha mumɔŋ “talentai” lɛ fa babaoo?
26 Nuŋtsɔ Yesu Kristo ni bɛ lɛ “nibii” ni faa lɛ ni akɛ hegbɛ lɛ haa Yudafoi kɛ mɛi ni amɛtsɔmɔ amɛhe Yudafoi lɛ pɛ lɛ tee mɔ aahu kɛyashi afi 36 Ŋ.B. gbo be mli. Kɛkɛ ni be ni akɛaaha Kristofoi kaselɔi lɛ ayi afa yɛ hei krokomɛi lɛ hu bashɛ, taakɛ bɔ ni Yesu diɛŋtsɛ afa lɛ, akɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ, ni, nyɛaafea midasefoi . . . kɛyashi shikpɔŋ lɛ naagbeehei lɛ.” (Mat. 28:19, 20; Bɔf. 1:8) Kɛkɛ ni Nyɔŋmɔ be bashɛ kɛha Yudafoi ni ji kaselɔi lɛ, mɛi ni Yesu kɛ mumɔŋ “talentai” lɛ ewo amɛdɛŋ lɛ akɛ amɛkɛ nakai “nibii” lɛ atsu nii koni amɛkɛna mumɔŋ “talentai” babaoo. Mɛi ni je enɛ shishi ji kuu ni na talentai enumɔ lɛ, beni atsu bɔfo Petro kɛtee Roma maŋtiase ni yɔɔ Yudea ni ji Kaisarea lɛ mli koni eyatsake Kornelio ni ebatsɔ Yesu Kristo kaselɔ lɛ. (Bɔf. 10:1 kɛyashi 11:18) Atsɔ enɛ nɔ agbele jeŋmajiaŋbii aloo adesai ni jeee Yudafoi lɛ aje lɛ naa aha kaselɔfeemɔ. Enɛ jeee shikpɔŋ ni ji Yesu Kristo ‘nii’ ni Yehowa Nyɔŋmɔ kɛwo edɛŋ yɛ shikpɔŋ nɔ akɛ ehu nɔ ni etɛo nɔ ko yɛ nɔ ni ekpa kaselɔi akɛ yibii yɛ nɔ.—Mat. 15:24.
27. Nɛkɛ jeŋ fɛɛ nitsumɔ ni agbele naa ni baawo yibii babaoo nɛɛ biɔ mɛni yɛ kaselɔi ni ji Yudafoi lɛ agbɛfaŋ?
27 Agbɛnɛ naa shikpɔŋ agbo ni Yesu Kristo diɛŋtsɛ tsɔko hiɛ esako emli gbɔmɛi lɛ, akɛ gbɛgbalɔ lɛ Yesu Kristo huko enɛ mli ni eduko nɔ ko yɛ mli ehako ekaselɔi lɛ koni amɛŋɔ nakai hegbɛ lɛ ni amɛha Kristofoi asafo lɛ mlibii lɛ ayi afa. Yɛ sɛɛnamɔ kɛ hegbɛ kɛ hewalɛ ni Yesu kɛtsu nii ni ekɛto shishijee ŋmɔ lɛ he gbɛjianɔ eha amɛ lɛ hewɔ lɛ, akɛni amrɔ nɛɛ amɛji nitsulɔi ni he esa hewɔ lɛ amɛbaanyɛ amɛtɛo ni amɛhu nɛkɛ ŋmɔ nɛɛ koni amɛkɛ maji krokomɛi ni baanyɛ awo Yesu Mesia lɛ kaselɔi babaoo afata he. Enɛ biɔ gbɛgbamɔ he mɔdɛŋbɔɔ yɛ amɛ diɛŋtsɛ amɛgbɛfaŋ, ni enɛ biɔ ekaa, mɔdɛŋbɔɔ yɛ anɔkwayeli mli diɛŋtsɛ, henɔkwɛmɔ jogbaŋŋ kɛ hiɛmiamɔ koni amɛkalaaje nɔ ko. Agbɛnɛ jeee nɔ ni mɔ kroko eto shishi amɛtswaa amɛmaa nɔ lɛ dɔŋŋ, amɛ diɛŋtsɛ amɛmiije shishi ehee kwraa koni amɛfee kaselɔi yɛ heni yɔɔ ehee kwraa. Enɛ tsɔɔ toiboo ni amɛaafee amɛha Nuŋtsɔ lɛ.—Rom. 15:17-21.
28, 29. (a) Yɛ mɛɛ gbɛ nɔ sɛɛ mli Kristo kaselɔi ni ji “tsuji” lɛ efee bɔ amɛnyɛmɔ aaŋmɛ amɛ gbɛ ni amɛfee yɛ nɔkwɛmɔ nɔ ni klɛŋklɛŋ afii oha lɛ mli kaselɔi lɛ fee lɛ sɛɛnyiɛmɔ mli? (b) Mɛni titri eye ebua fe fɛɛ ni eha yifalɛ eba babaoo lɛ?
28 Yesu Kristo bɔfoi lɛ kɛ klɛŋklɛŋ afii oha lɛ mli kaselɔi lɛ to gbɛjianɔ ni amɛfee nɔkwɛmɔ nɔ yɛ gbɛ ni atsɔɔ nɔ akɛ “talentai” lɛ ni akɛwo amɛdɛŋ lɛ ‘tsuɔ nii.’ Amɛha Nuŋtsɔ lɛ talɛntai lɛ ku bɔ he. Kristofoi akuu ni ji “tsuji” ni akɛ Nuŋtsɔ lɛ “nibii” lɛ amli “talentai enumɔ” ewo amɛdɛŋ lɛ na talɛntai enumɔ kroko amɛfata he. Kristo “tsuji” akuu ni akɛ Nuŋtsɔ lɛ nibii amli talentai enyɔ wo amɛdɛŋ lɛ hu na talɛntai enyɔ amɛfata he. Eji nɔyaa ni eku ebɔ he, kɛ akɛaato he lɛ, kɛha kuu fɛɛ kuu. No hewɔ lɛ mɔ fɛɛ mɔ nyɛ etsu gbɛnaa nii ni ka enɔ lɛ he nii, ni mɔ ko ehiii fe enyɛmi. Mɔ fɛɛ mɔ fee bɔ ni ataoɔ yɛ edɛŋ lɛ. Mɔ fɛɛ mɔ fee nɔ ni fe fɛɛ ni ebaanyɛ “yɛ lɛ diɛŋtsɛ enyɛmɔ mli.” Shi kɛlɛ shweremɔ ni ba yɛ Nuŋtsɔ lɛ nibii lɛ amli lɛ jeee nɔ ni jɛ “tsulɔ” lɛ diɛŋtsɛ “nyɛmɔ” mli. Nɔ kroko yɛ sane lɛ mli ni fata he, ni enɛ ji nɔ ni yɔɔ mli ni he hiaa fe fɛɛ. Bɔfo Paulo wieɔ enɛ he be mli ni ekɛtoɔ lɛ diɛŋtsɛ esɔɔmɔ lɛ kɛ Apolo, kaselɔ ni naa tse lɛ he lɛ, akɛ:
29 “Agbɛnɛ, Apolo ji namɔ, Paulo ji namɔ? Amɛji sɔɔlɔi ni nyɛtsɔ amɛnɔ nyɛhe nyɛye, ni mɔ fɛɛ mɔ le bɔ ni Nuŋtsɔ lɛ eha lɛ. Mi lɛ, mitɛo; Apolo shwie nɔ nu; shi Nyɔŋmɔ ha shwere. Belɛ agbɛnɛ jeee mɔ ni tɛo lɛ ji nɔ ko, ni jeee mɔ ni shwie nɔ nu lɛ hu, shi moŋ mɔ ni ha eshwere, ni ji Nyɔŋmɔ lɛ. Shi mɔ ni tɛoɔ lɛ kɛ mɔ ni shwieɔ nɔ nu lɛ fɛɛ lɛ ekomeŋ; shi mɔ fɛɛ mɔ aaana lɛ diɛŋtsɛ enyɔmɔwoo, yɛ lɛ diɛŋtsɛ enitsumɔ naa. Ejaakɛ Nyɔŋmɔ hefatalɔi nitsulɔi ji wɔ; Nyɔŋmɔ ŋmɔ, Nyɔŋmɔ tsu ji nyɛ.”—1 Kor. 3:5-9.
30. (a) Belɛ namɔ esa ákɛ akɛ yifalɛ lɛ he yijiemɔ aha klɛŋklɛŋ? (b) Mɛɛ odaseyeli yɔɔ ni kɔɔ yifalɛ ni ba yɛ heni kaselɔi lɛ tsu nii yɛ lɛ he klɛŋklɛŋ afii oha lɛ mli?
30 No hewɔ lɛ Nyɔŋmɔ ji Mɔ ni esa ákɛ akɛ shweremɔ lɛ he yijiemɔ aha, ni Kristo “tsuji” lɛ ji dɛŋdadei kɛkɛ ni eŋɔɔ enaa akɛ ekɛ amɛ aaatsu nii ni nɛkɛ yifalɛ loo shweremɔ nɛɛ aba. Eyeɔ ebuaa “etsuji” lɛ koni amɛnyɛ amɛtsa amɛgbɛnaa nii ahe nii. Ekɛ nɔ ni he hiaa “tsuji” lɛ wulaa amɛ koni amɛnyɛ amɛtsu kaselɔi afeemɔ nitsumɔ lɛ yɛ jeŋmaji fɛɛ mli yɛ omanyeyeli mli. No hewɔ lɛ akɛ eko fataa shikpɔŋ ni ahu nɔ ni asaa nɔ ni woɔ kaselɔi yibii ni Nyɔŋmɔ Bi lɛ shi eha ekaselɔi anɔkwafoi lɛ he, ejaakɛ atsɔɔ toiboo ni Kristo “tsuji” lɛ feɔ kɛhaa efamɔi lɛ kɛ enɔkwɛmɔ nɔ lɛ kasemɔ nɔ amɛkɛ hei krokomɛi ni tamɔ nɛkɛ nɔŋŋ baa shihilɛ mli yɛ jeŋ muu lɛ fɛɛ mli. Mɛɛ enɛ he odaseyeli yɔɔ yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli? Enɛ: kaselɔi ni baana ŋwɛi maŋtsɛyeli lɛ mli gbɛfaŋnɔ lɛ asafo lɛ ayi bafa babaoo yɛ Yerusalem maŋ lɛ sɛɛ kɛ Yudea kɛ Galilea kɛ Samaria fɛɛ. Ato asafoi yɛ Asia, Afrika, Europa kɛ Mediteranea Ŋshɔkpɔi lɛ anɔ.
31. Akɛ nɔ ni yaa nɔ nɛɛ he nɔkwɛmɔ nɔ lɛ, mɛni ji nɔ ni heni Petro jɛ eŋma eklɛŋklɛŋ wolo lɛ tsɔɔ yɛ ehe?
31 Akɛ nɔkwɛmɔ nɔ lɛ, ŋɔɔ bɔfo Petro nɛkɛ. Eji bɔfoi ejwɛ ni yɛ be mli ni amɛnu bɔ ni Yesu egba Yerusalem sɔlemɔtsu fɛfɛo lɛ hiɛkpatamɔ lɛ he sane efɔ shi lɛ, amɛbi lɛ nɛkɛ sane nɛɛ ateŋ mɔ kome: “Tsɔɔmɔ wɔ be mli ni aaafee nii nɛɛ, kɛ be mli ni nii nɛɛ fɛɛ kwa baaba mli lɛ he okadi.” (Mat.13:1-4) Aaafee afii nyɔŋmai etɛ sɛɛ, aloo yɛ afi 62-64 Ŋ.B. lɛ, aloo afii pii dani “nii nɛɛ” aaaba kɛ Yerusalem hekawoo kɛ ehiɛkpatamɔ ni esɔlemɔtsu lɛ fata he lɛ aaaba lɛ, no mli lɛ bɔfo Petro miitsu maŋsɛɛ sanekpakpa jajemɔ nitsumɔ lɛ yɛ Roma Maŋtsɛyeli lɛ sɛɛ. Hɛɛ, klɛŋklɛŋ wolo ni eŋma eyaha enanemɛi Kristofoi ni yɔɔ Roma Maŋtsɛyeli lɛ mli lɛ, aŋma kɛjɛ Babilon maŋtiase lɛ mli, yɛ Eufrate Paa lɛ naa yɛ Mesopotamia ni ewie Kristofoi asafo ni yɔɔ jɛmɛ lɛ he yɛ ewolo lɛ naagbee mli akɛ: “(Asafo) ni ahala yɛ Babilon afata wɔhe lɛ . .. miibi nyɛ.”—1 Pet. 5:13.
32-34. (a) Aaafee mɛɛ be ni nɛgbɛ ji heni Paulo ŋma wolo ni ekɛha Kolosebii lɛ kɛjɛ? (b) Yɛ mɛɛ gbɛ nɔ Paulo tsɔɔ bɔ ni “talentai” ni akɛwo kaselɔi lɛ adɛŋ lɛ baafa babaoo yɛ jeŋ fɛɛ aha?
32 Agbɛnɛ bɔfo Paulo hu yɛ. Naagbee lɛ eyashɛ Roma maŋtiase lɛ diɛŋtsɛ mli, shi moŋ akɛ gboklɛfonyo ni ekɛ esane eyafɔ Roma Kaisare lɛ hiɛ koni aye esane lɛ jogbaŋŋ aha lɛ. Ejɛ heni awolɛ tsuŋ yɛ, yɛ Roma lɛ eŋma eyaha Kristofoi asafo ni yɔɔ Kolose, Asia Bibioo lɛ, aaafee afi 60-61 Ŋ.B. Enɛ ba aaafee afii nyɔŋma dani “nii nɛɛ” ni Nuŋtsɔ Yesu Kristo egba yɛ he lɛ ba, shi mra be mli dani enɛ aaaba, dani Yudafoi anibii agbɛjianɔtoo ni ejɛɛhe ji Yerusalem lɛ aaaba naagbee lɛ, no mli lɛ bɔfo Paulo ewie okadi “talentai” lɛ ni Yesu kɛwo etsuji lɛ adɛŋ ni baafá yɛ jeŋ fɛɛ lɛ he. Beni Paulo wieɔ ‘sanekpakpa lɛ ni aaajaje’ lɛ he lɛ, eŋma amɛ akɛ:
33 “Akɛni wɔnu nyɛ Kristo Yesu nɔ hemɔkɛyeli kɛ nyɛ suɔmɔ ni nyɛkɛsumɔɔ hetselɔi lɛ fɛɛ lɛ he lɛ, yɛ hiɛnɔkamɔ ni aŋɔto ahanyɛ yɛ ŋwɛi lɛ hewɔ, nɔ ni nyɛnu momo yɛ sanekpakpa lɛ anɔkwale wiemɔ lɛ mli lɛ, nɔ ni eshɛ nyɛŋɔɔ taakɛ bɔ nɔŋŋ ni eyɔɔ yɛ jeŋ muu lɛ fɛɛ mli ni ewoɔ yibii ni eshwereɔ taakɛ bɔ ni efeɔ yɛ nyɛhu nyɛteŋ kɛjɛ gbi nɔ ni nyɛnu ni nyɛna nyɛle Nyɔŋmɔ duromɔ lɛ yɛ anɔkwale mli lɛ; taakɛ bɔ ni nyɛkase hu yɛ Epafra, mɔ ni ji wɔnaanyo tsulɔ ni wɔsumɔɔ ni ji Kristo anɔkwa sɔɔlɔ hanyɛ lɛ naa lɛ, lɛ nɔŋŋ ebagba wɔ nyɛ suɔmɔ ni yɔɔ mumɔ mli lɛ he sane.
34 “Ni nyɛ ni sa ni nyɛji mɛi kpɔji kɛ henyɛlɔi yɛ nyɛjwɛŋmɔ kɛ nitsumɔi fɔji lɛ amli lɛ, agbɛnɛ ekɛ eheloo gbɔmɔtso lɛ etsɔ mli eŋɔkpatanyɛ, ni ekɛ nyɛ adamɔ shi akɛ mɛi krɔŋkrɔŋi ni he bɛ kpa ko loo naafolɔmɔ ko yɛ ehiɛ; kɛji nyɛhiɛ hemɔkɛyeli lɛ mli ni nyɛdamɔ shi shiŋŋ, ni nyɛtsiŋ nyɛhe kɛjɛŋ sanekpakpa lɛ ni ashiɛɔ atsɔɔ bɔɔnii fɛɛ ni yɔɔ ŋwɛi shishi lɛ he lɛ.”—Kol. 1:4-8, 21-23.
35. Mɛni jɛ ekaa ni klɛŋklɛŋ afii oha lɛ mli kaselɔi kɛtsu nii yɛ be kukuoo lɛ mli lɛ mli ba, eji mɛɛ Yesu gbalɛ mlibaa?
35 Mɛɛ ekãawoo he odaseyeli nakai bɔfo Paulo wiemɔi ni jɛ mumɔŋ lɛ ji yɛ nakai klɛŋklɛŋ afii oha lɛ mli Nuŋtsɔ Yesu Kristo “tsuji” lɛ ni amɛkɛ “talentai” ni ekɛwo amɛdɛŋ lɛ ‘tsuɔ nii’ lɛ ahe po ji enɛ! Mɛɛ nii amɛnyɛ amɛtsu nɛkɛ yɛ be kukuoo nɛɛ mli—sanekpakpa lɛ “ni eyɔɔ jeŋ muu lɛ fɛɛ mli, ni ewoɔ yibii ni eshwereɔ” lɛ, sanekpakpa lɛ ni yɛ nakai be mli lɛ “ashiɛɔ atsɔɔ bɔɔnii fɛɛ ni yɔɔ ŋwɛi shishi lɛ”! Bo lɛ susumɔ enɛ he: “Shikome kɛkɛ ajie lɛ [Yesu Kristo] kpo yɛ jeŋ bei lɛ anaagbee,” yɛ afi 29-33 Ŋ.B., shi dani Yudafoi anibii agbɛjianɔtoo lɛ aaaba naagbee yɛ afi 70 Ŋ.B. kɛtsɔ amɛjamɔ maŋtiase lɛ hiɛkpatamɔ nɔ lɛ, no mli lɛ Yudafoi ni yɔɔ nakai jeŋ ni ale lɛ mli lɛ anine eshɛ odaseyeli ni kɔɔ Nyɔŋmɔ Mesia maŋtsɛyeli lɛ he lɛ nɔ. Yɛ anɔkwale mli lɛ, jeŋmaji lɛ fɛɛ hu nine eshɛ nɛkɛ odaseyeli nɛɛ nɔ, yɛ Yesu gbalɛ ni kɔɔ “nibii agbɛjianɔtoo lɛ naagbee” lɛ he “okadi” lɛ mlibaa he, ni ji: “Ni aaashiɛ maŋtsɛyeli nɛɛ he sanekpakpa lɛ yɛ shikpɔŋ ni ayɔɔ nɔ lɛ fɛɛ nɔ, ni akɛye jeŋmaji lɛ fɛɛ odase; ni no dani naagbee lɛ aaaba.”—Mat. 24:14; Heb. 9:26, NW.
February Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)