“Shikpɔŋ Iɛ nɔ Ŋoo Ji Nyɛ”
“Shikpɔŋ Iɛ nɔ ŋoo ji nyɛ. Shi kɛji ŋoo naanu gbo lɛ, mɛni okɛaawo lɛ ŋoo dɔŋŋ?”—MATEO 5:13.
1. Mɛni ji ŋoo diɛŋtsɛ ni wɔyeɔ nɛɛ?
1 Ŋoo ji nɔ ko ni yɔɔ naakpɛɛ. Eji tsofai ni áfutu, sodium ni ji tsofa ko ni yɔɔ naakpɛɛ ni esu tamɔ dade, kɛ Chlorine, kɔɔyɔɔ ni ebɔɔ yɔɔ mli ni tsoɔ. Yɛ anɔkwale ni eji akɛ akɛ nɛkɛ nibii enyɔ ni oshara yɔɔ mli nɛɛ baanyɛ afutu ni aná nɔ ko ni sɛɛnamɔ yɔɔ he kɛjɛ mli lɛ ji naakpɛɛ gbɛjianɔ ni Bɔlɔ lɛ eto kɛha adesai ahilɛ-kɛhamɔ.—Lala 104:24.
2. Mɛɛ nɔkwɛmɔ nɔ aaanyɛ afee ni tsɔɔ akɛ ŋoo tsĩɔ kpɔtɔmɔ loo fitemɔ naa ni ebaanyɛ efee yibaamɔ nɔ̃ hu?
2 Nɔ kome ji akɛ, ŋoo nyɛɔ etsiɔ kpɔtɔmɔ loo fitemɔ naa waa. Akɛ nɔkwɛmɔ nɔ lɛ: Nuu ko kɛ gwantɛŋi enyɔ ni ágbe amɛ lɛ ahewolɔ wo e-kar sɛɛ ni eŋmɛ mli ni eefa gbɛ kɛmiiya he ko shɔŋŋ yɛ Afrika hulu ni tsoɔ waa lɛ mli. Beni yɛ naagbee lɛ egbele e-kar lɛ sɛɛ lɛ fũ ko kpee lɛ ni ena ni gɔgɔmii eha too wolo lɛ fɛɛ he! Shi efɔ too gwantɛŋ he tsɔi lɛ mli fɛfɛo ni awo lɛ ŋoo aloo akɛ ŋoo kpa mli fɛɛ. Mɛni jɛ mli ba? Amɛbatsɔmɔ saa bɔdɔɔ ni kamɔ saatso hiɛ afii babaoo.
3. Mɛni abaanyɛ awie yɛ jara ni ŋoo yɔɔ lɛ kɛ enámɔ he?
3 Belɛ eka shi faŋŋ akɛ ŋoo ji yibaamɔ nii ni nɔ bɛ. Ehe yɛ sɛɛnamɔ yɛ gbɛ kroko hu nɔ. Yɛ anɔkwale mlilɛ, abuɔ ŋoo akɛ nɔ ni nyiɛ shika-tsuru sɛɛ yɛ jara naa yɛ blema China. Latin wiemɔ kɛha ŋoo, “salt” ji sal, ni yɛ blema Roma nɔyeli beaŋ lɛ, asraafoi lɛ anine shɛɔ ŋoo nɔ akɛ amɛnyɔmɔwoo (salarium) lɛ fa. Enɛ mli ana wiemɔ “salary” (nyɔmɔwoo) lɛ kɛjɛ. Shi hei pii yɛ ni ŋmɛnɛ ŋoo efee nɔ ni asɛ̃ɛɛ he ni ejara waaa hu. Ŋoo ni yɔɔ ŋshɔi lɛ amli lɛ shɛɔ shitooi akpei ejwɛ kɛ fa koji ejwɛ yɛ kwɔlɛ kɛ lɛɛmɔ kɛ tilɛ naa—efa bɔ ni eeenyɛ eha United States, Amerika fɛɛ nɔ kɛyashi shitoo kome yɛ emlikwɔlɛ naa! Beni Yesu Kristo yɔɔ shikpɔŋ nɔ lɛ no mli lɛ ŋoo fa saŋŋ diɛŋtsɛ. Akɛ nɔkwɛmɔ nɔ lɛ, Ŋshɔ ni Egbo lɛ mli nui lɛ haa anaa ŋoo babaoo diɛŋtsɛ, ni ŋmeŋmei yɛ ni anaa ŋoo kɛjɛɔ nɔ ni bɛŋkɛ he ni Lot ŋa lɛ tsɔ “ŋoo kpɔ” yɛ lɛ.—1 Mose 19:26.
4. Mɛni hewɔ wɔbaanyɛ wɔkɛɛ akɛ ŋoo he hiaa kɛha wala lɛ?
4 Ŋoo hu nyɛɔ etsaa mɔ tamɔ tsofa. Ŋoo ni yɔɔ wɔgbɔmɔtsei amli lɛ shɛɔ niŋmɛɛ tɛi ni ji ounce kpaanyɔ, ni kɛ enɛ bɛ wɔgbɔmɔtsei amli lɛ wɔbaagboi. No hewɔ lɛ ŋoo he miihia kɛha wala. Shi taakɛ akɛtsu nii yɛ Biblia lɛ mli lɛ, akɛ ŋoo tsuɔ nii yɛ okadi loo mfonirifeemɔ gbɛ nɔ hu bɔ ni ekɔɔ Kristofonyo shihilɛ kɛ enitsumɔi ahe.
“Ŋoo Ahi Mli”
5. Mɛni ji nɔ ni ŋoo tsuɔ yɛ niyenii mli?
5 Kɛ nihoolɔ ko hiɛ kpa nɔ akɛ ekɛ ŋoo aaawo eniyenii ni ehoɔ lɛ mli lɛ, anuŋ eŋɔɔmɔ he ni mɛi yeŋ. Taakɛ Hiob kɛɛ lɛ: “Ani ayeɔ nii mutɛ ni ŋɔɔ ko bɛ mli?” (Hiob 6:1, 6) Ŋoo haa bɔ ni niyenii ŋɔɔ ha lɛ jeɔ kpo faŋŋ. Akɛ bɔ ni ŋoo yɔɔ nɛɛ kɛ sɛɛnamɔ ni yɔɔ he lɛ kɛ bɔ ni ebaa nii ayi lɛ tsuɔ nii yɛ okadi loo mfoniri-feemɔ mli yɛ Ŋmalɛi Iɛ amli. Akɛ ŋoo tsuɔ nii titri akɛtsɔɔ wiemɔ ni ja mli.
6. Kolosebii 4:6 kɔɔ Yehowa Odasefoi asɔɔmɔ lɛ he yɛ mɛɛ gbɛ nɔ?
6 Bɔfo Paulo ŋma akɛ: “Nyɛhaa nyɛwiemɔ afea nɔ ni mlijɔlɛ yɔɔ mli yɛ be fɛɛ mli, nɔ ni ŋoo yɔɔ mli, ni nyɛle bɔ ni sa akɛ nyɛhaa mɔ fɛɛ mɔ hetoo.” Shishitsɔɔmɔ kroko kaneɔ akɛ: “Nyɛhaa nyɛsanegbaa afea nɔ ni ŋɔɔ yɛ be fɛɛ mli, ni ekɛfee nɔ ni ŋɔɔmɔ bɛ mli.” (Kolosebii 4:6 NW; The New English Bible) Anɔkwale Kristofoi kɛ ŋmlɛtswaai babaoo tsuɔ nii yɛ Nyɔŋmɔ Maŋtsɛyeli lɛ he sane ni amɛgbaa gbɔmɛi lɛ mli. Shi kɛlɛ, jeee Yehowa Odasefoi fɛɛ ji mɛi ni amɛnaa tse kɛ wiemɔ. Ni kɛlɛ, kɛji akɛ amɛhiɛ sɔɔ sane lɛ waa ni amɛkɛ hekɛnɔfɔɔ kɛ miishɛɛ wieɔ he lɛ, amɛbaanyɛ amɛtsɔ gbɔmɛi pii atsuii kɛba Nyɔŋmɔ Wiemɔ lɛ mli anɔkwale lɛ he. Belɛ kwɛ bɔ ni ehe hiaa akɛ Yehowa tsuji awiemɔ aaafee nɔ ni ŋɔɔ ni saa mɛi ahiɛ!
7. Kristofonyo wiemɔi ‘ni akɛ nɔ ko ewo mli’ lɛ baanyɛ ana mɛɛ hewalɛ kpakpa yɛ mɛi anɔ?
7 Jeee akɛ Kristofonyo lɛ wiemɔ ni ‘nɔ ko yɔɔ mli’ lɛ haa toibolɔ lɛ nuɔ Biblia mli sane lɛ he ŋma kɛkɛ, shi moŋ ebaa mɛi ni boɔ toi lɛ awala yi hu. No hewɔ lɛ taakɛ bɔ ni ŋoo he hiaa kɛha wala lɛ, nakai nɔŋŋ hu Yehowa tsuji awiemɔ baanyɛ atsɔɔ wala aha mɛi ni kɛ hiɛsɔɔ boɔ nɔ ni amɛkɛɔ yɛ Nyɔŋmɔ yiŋtoo kɛ e-Maŋtsɛyeli lɛ he lɛ toi lɛ.—Okɛto Yohane 6:63, 68 he.
8. Mɛni hewɔ esa akɛ mlijɔlɛ ahi sɔɔlɔi ni ji Kristofoi lɛ awiemɔ mli lɛ?
8 No hewɔ lɛ esa akɛ mlijɔlɛ ahi Kristofoi awiemɔ mli yɛ be mli ni amɛwieɔ amɛtsɔɔ mɛi ni heee yeee lɛ. Yɛ bei komɛi amli lɛ mɛi ni nuɔ Maŋtsɛyeli lɛ he sane lɛ haa hetoo kɛ mlifu aloo wiemɔ sha. Shi esaaa akɛ Yehowa tsuji haa amɛ hetoo yɛ nakai gbɛ nɔ nɔŋŋ. Shi moŋ esa akɛ amɛfee mɛi ni mli hi. Kɛ akɛɛ mɔ ko afee mɔ ni mli jɔ lɛ te atsɔɔ tɛŋŋ? Etsɔɔ akɛ mɔ ko afee mɔ ni mli hi, mɔ ni saa mɛi ahiɛ, mɔ ni buɔ nii ni enaa mɔbɔ. Kristofonyo lɛ mlihilɛ kɛ tsuishitoo gbɛ ni etsɔɔ nɔ etsuɔ sanebimɔi, shitee-kɛ-wooi, wiemɔ-kɛ-shimɔ aloo sui gbohii ahe nii lɛ kɛ sɔrɔtofeemɔ ko ni he hiaa waa baa. Taakɛ abɛbua ko tsɔɔ lɛ: “Naa jɔlɛ hetoo kuɔ mlila naa.” (Abɛi 15:1) Mlijɔlɛ, bulɛ kɛ ŋaa hetooi yɛ Kristofoi asɔɔmɔ lɛ mli lɛ baanyɛ ajɔɔ gbɔmɛi ni ekolɛ amɛwieɔ amɛshiɔ wɔ waa shi amɛyɔɔ tsuijurɔ lɛ ahe.—Abɛi 25:15.
9. Mɛɛ gbɛ esa akɛ Kristofoi atsɔ nɔ ni amɛkɛ amɛnanemɛi heyelilɔi awie, ni mɛni hewɔ?
9 Belɛ mɛɛ gbɛ esa akɛ Kristofonyo lɛ atsɔ nɔ ni ekɛ enanemɛi heyelilɔi lɛ awie? Yɛ gbɛ ni mlijɔlɛ bɛ mli nɔ? Dabi! Mɛni hewɔ? Ejaakɛ nɛkɛ Yehowa tsuji ni amɛjɔɔ amɛhe nɔ nɛɛ hu ji “Nyɔŋmɔ asafoku” ni esa akɛ ahiɛ amɛ blɛoo lɛ fa.—Okɛto 1 Petro 5:2-4; Bɔfoi lɛ Asaji 20:29 he.
10. Esa akɛ Efesobii 4:29-32 akɔ wiemɔi ni Kristofoi kɛtsuɔ nii lɛ he yɛ mɛɛ gbɛ nɔ?
10 Ani esa akɛ Yehowa tsulɔ ko kɛ wiemɔ sha ko awie atsɔɔ enanemɛi nitsulɔi ni ekolɛ amɛwo emli la lɛ? Ani ebaafee nɔ ni hi akɛ Kristofonyo ni eji onukpa yɛ nitsumɔ mli kɛ yakayaka wiemɔ aaawie atsɔɔ nitsulɔi ni yɔɔ eshishi lɛ akɛni amɛtsuuu nɔ ko jogbaŋŋ lɛ hewɔ? Kɛ wumɛi kɛ ŋamɛi ni ji Kristofoi amli fu lɛ, ani esa akɛ amɛbolɔ amɛwo amɛhe kɛ amɛbii ni amɛjɛ amɛhe? Dabi! Paulo ŋma akɛ: “Wiemɔ sha ko wiemɔ sha ko akaje nyɛnaa kwraa . . . Nyɛhaa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afɔa yɛ nyɛteŋ, kɛ efɔŋ fɛɛ efɔŋ. Shi nyɛmli ahia ahaa nyɛhe, nyɛmusuŋ atsɔanyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔfanyɛ yɛ Kristo mli lɛ.”—Efesobii 4:29-32.
“Nyɛhaa Ŋoo Ahiaa Nyɛmli”
11, 12. Mɛɛ “ŋoo” nɛkɛ Yesu wieɔ he yɛ Marko 9:50 lɛ, ni nakai wiemɔi lɛ baabi mɛɛ wiemɔ kɛ nifeemɔ nɛkɛ?
11 Akɛni wɔyeee emuu hewɔ lɛ, be shɛɔ ni wɔwieɔ wiemɔi ni esaaa Kristofonyo. Taakɛ kaselɔ Yakobo kpɛlɛ nɔ yɛ faŋŋ mli lɛ: “Wɔ fɛɛ wɔtɔ̃ɔ babaoo; kɛ mɔ ko tɔɔɔ yɛ wiemɔ mli lɛ, lɛ lɛ nuu ni hi kɛwula shi ji lɛ, ni eyɛ hewalɛ akɛ ekɛaawo gbɔmɔtso muu lɛ fɛɛ manyoflɛ.” (Yakobo 3:2, 8-10) Yesu mra be mli kaselɔi lɛ jeee mɛi ni esoro amɛ yɛ enɛ mli, ni akã amɛhiɛ akɛni amɛkɛ mlijɔlɛ ewieee amɛtsɔɔɔ amɛhe lɛ hewɔ. Akɛ nɔkwɛmɔ nɔ lɛ, kaselɔi lɛ kɛ hiɛdɔɔ je ŋwane waa be ko yɛ mɔ ni da fe fɛɛ yɛ amɛteŋ lɛ he. Yesu kɛ ŋaawoo ko ni hi jogbaŋŋ ha kuu muu lɛ fɛɛ yɛ mɛi anane ni amɛaatɔtɔ ni no aaaha “akɛ la aaawo [amɛ] ŋoo,” aloo ni aaakpata amɛhiɛ yɛ Gehena lɛ he. Kɛkɛ ni ekɛ wiemɔi nɛɛ gbe naa: “Nyɛhaa ŋoo ahia nyɛmli ni nyɛhia shi yɛ hejɔlɛ (toiŋjɔlɛ) mli yɛ nyɛteŋ.”—Marko 9:33-50.
12 Eka shi faŋŋ akɛ jeee ŋoo diɛŋtsɛ ni anaa bibioo ko yɛ ekaselɔi lɛ ahelooŋ gbɔmɔtsei amli lɛ he ewieɔ lɛ. Shi moŋ eewie bɔ ni esa akɛ amɛsusu amɛhe, amɛkɛ ŋaa atsu nii, amɛfee mɛi ni yeɔ emuu kɛ mɛi ni sumɔɔ toiŋjɔlɛ yɛ wiemɔ kɛ jeŋba mli lɛ he—gbɛ kpakpa nɔ ni amɛaatsɔ amɛkɛ mɛi krokomɛi aye lɛ he. Enɛ he miihia koni anɔkwale Kristofoi anyɛ ni amɛkɛ amɛhe ahi shi yɛ toiŋjɔlɛ mli.
“Shikpɔŋ Lɛ Nɔ Ŋoo”
13. Mɛni Yesu tsɔɔ beni ekɛɛ esɛɛnyiɛlɔi lɛ akɛ “Shikpɔŋ lɛ nɔ ŋoo ji nyɛ” lɛ?
13 Yesu wie hu yɛ esɛɛnyiɛlɔi lɛ ahe akɛ: “Shikpɔŋ lɛ nɔ ŋoo ji nyɛ.” (Mateo 5:13) Yesu kɛ nɔ ni ewie nɛɛ etsɔɔɔ akɛ ekaselɔi lɛ ji ŋoo diɛŋtsɛ. Shi moŋ ŋoo baa nii ayi, ni sane ni Yesu sɛɛnyiɛlɔi lɛ kɛyaa gbɔmɛi lɛ aŋɔɔ lɛ baabaa amɛteŋ mɛi pii awala yi. Yɛ anɔkwale mli lɛ, ekaselɔi lɛ na yibaamɔ hewalɛ ko yɛ mɛi ni bo amɛsane lɛ toi lɛ anɔ, etsi mumɔŋ kɛ jeŋba mli fitemɔ loo kpɔtɔmɔ yɛ nɛkɛ gbɔmɛi nɛɛ amli lɛ naa. Sanebimɔ ko bɛ anɔkwale ni eji akɛ sanekpakpa lɛ ni Yesu sɛɛnyiɛlɔi lɛ jaje lɛ baabaa wala yi lɛ he.—Bɔfoi lɛ Asaji 5:20; 13:46-48.
Ŋoo Baa Nii Ayi Kɛjɛɔ Kpɔtɔmɔ Loo Fitemɔ Mli
14. Bɔni afee ni wɔtsĩ je lɛŋ kpɔtɔmɔ loo fitemɔ naa lɛ, mɛni he hiaa?
14 Kɛ ajɛ he ni Yehowa Nyɔŋmɔ kwɛɔ nii kɛjɛɔ ni kwɔ grɔŋŋ ni yɔɔ krɔŋŋ hu lɛ akwɛ nii lɛ, esa akɛ yiwalɛ nibii agbɛjianɔtoo nɛɛ fɛɛ atamɔ too hewoji ni wɔtsɔ hiɛ wɔtsi ta lɛ. Dani aaafɔ he ni aaawo amɛ ŋoo lɛ no mli lɛ amɛmiije fu waa ni eyi tɔ kɛ gɔgɔmii. Shihilɛ ni yɔɔ je nɛɛ mli lɛ saa mɔ fɛɛ mɔ he yɛ gbɛ ko nɔ, ni bɔni afee ni wɔtsĩ kpɔtɔmɔ ni boteɔ shihilɛ mli nibii fɛɛ mli lɛ naa lɛ, ehe miihia ni mɔ lɛ ana ekãa ni ehiɛ emuuyeli mli eha Nyɔŋmɔ. Nɛkɛ gbɛ nɔ pɛ mɔ ko baatsɔ abaa lɛ diɛŋtsɛ eyi kɛjɛ jeŋba mli kpɔtɔmɔ Iɛ mli. Jeee mlijɔlɛ yɛ wiemɔ mli pɛ ji nɔ ni he hiaa lɛ, shi moŋ nii ayibaamɔ su ni haa enyɛɔ ekɛɔ kpɔtɔmɔ yɛ esui sɔrɔtoi lɛ fɛɛ mli akɛ dabi lɛ. Ehe miihia waa ni ena “ŋoo” yɛ esane nɛɛ mli.—1 Petro 4:1-3.
15. Mɛɛ nɔkwɛmɔ nɔ Yesu kɛ Daniel fee kɛha wɔ?
15 Esa akɛ Nyɔŋmɔ tsulɔ anɔkwafo lɛ ale bɔ ni eeefee ekɛɛ dabi yɛ nifeemɔi kɛ kaai gbohii ahiɛ. Kaimɔ akɛ Yesu kɛɛ dabi shii etɛ yɛ be mli ni Satan ka lɛ yɛ ŋa lɛ nɔ lɛ. (Mateo 4:1-10) Ni susumɔ nɔkwɛmɔ nɔ ni gbalɔ Daniel kɛha lɛ he. Ekase bɔ ni eeekɛɛ akɛ dabi, yɛ be mli ni edako kwraa. Yɛ be mli ni Daniel ji obalanyo yɛ Babilon maŋtsɛmɛi awe lɛ afã ni aha amɛ “amɛ daa ŋmaa kɛjɛ maŋtsɛ lɛ diɛŋtsɛ niyenii kɛ ewein ni enuɔ lɛ mli.” Shi Daniel kɛ enanemɛi lɛ kpoo enɛ. Enɛ jeee gbɔfeemɔ niyenii ko ni akpooɔ. Shi moŋ nɛkɛ obalahii Hebribii nɛɛ ma nɔ nii akɛ amɛmiisumɔ shwie baa kɛ nu pɛ kɛkɛ ejaakɛ amɛmiishwɛ ni amɛtse amɛhe kɛjɛ niyenii ni Yehowa Mla egu loo akɛ wɔji anifeemɔi ebule lɛ lɛ ayeli he. Ebi ekãa diɛŋtsɛ ni atsɔ gbɛ ni tamɔ nɛkɛ nɔ. Nyɔmɔwoo kpele ni ji nɔ ni jɛ mli ba, ejaakɛ yɛ kaa be lɛ naagbee lɛ amɛshwishwii ni amɛhe fee fɛo fe mɛi ni ye maŋtsɛmɛi aniyenii lɛ. Ni nakai Hebribii lɛ anine shɛ Yehowa dɛŋ jɔɔmɔ kɛ duromɔ nɔ.—Daniel 1:6-17.
16. Mɛni hewɔ abaanyɛ akɛɛ akɛ Daniel ji Yehowa tsulɔ ni “awo lɛ ŋoo jogbaŋŋ” lɛ?
16 Yehowa Nyɔŋmɔ kwɛ koni abaa Daniel kɛ ehefatalɔi lɛ ayi yɛ ‘ŋoo ni yɔɔ amɛmli’ lɛ hewɔ. Shi wɔbaanyɛ wɔkase babaoo kɛjɛ Daniel ŋɔɔ. Ahala lɛ awo gbɛhe ko ni kwɔ gojoo mli yɛ Babilonbii anɔyeli lɛ mli. Ehe bahia ni ekɛɛ dabi shii abɔ yɛ nakai shihilɛ lɛ mli, ejaakɛ wɔŋjalɔi ebɔle lɛ, ni ŋwanejee ko kwraa bɛ he akɛ nɔ ni eyi obɔ yɛ maŋtsɛmɛi awe lɛ ji nyenyeŋtswibɔɔ, amale, nyɔɔŋnihamɔ, maŋkwramɔŋ juu-kɛ-fɔ̃ kɛ jeŋbai gbohii. Daniel ba nɔnyɛɛ shishi shii abɔ yɛ enɛɛmɛi ahewɔ. Shi eyɛ mli akɛ eyɛ nakai gbii lɛ amli “je lɛ” mli moŋ, shi “ejɛɛɛ je lɛ mli.” (Yohane 17:16) Daniel ji Yehowa tsulɔ anɔkwafo ni “awo lɛ ŋoo jogbaŋŋ.” Ejaakɛ akɛhi emuuyeli kɛ anɔkwayeli ni Daniel hiɛ mli lɛ ha ayoo su fɔŋ ni ehenyɛlɔi lɛ yɔɔ lɛ hewɔ lɛ, amɛbɔ mɔdɛŋ ni amɛkpata ehiɛ! Shi kɛlɛ ehe bahia ni amɛkpɛlɛ nɔ akɛ “eyeɔ anɔkwa, ni anaaa efɔŋ loo tɔmɔ ko yɛ ehe.” (Daniel 6:5, 6) Mɛɛ nɔkwɛmɔ nɔ kpakpa nɛ!
17. Mɛɛ kaai ni mli wawai jwere obalaŋtai Kristofoi ahiɛ ŋmɛnɛ?
17 Obalaŋtai Kristofoi ni yɔɔ ŋmɛnɛ lɛ hu kɛ kaai ni mli wawai miikpe tamɔ bɔ ni Daniel kɛ enanemɛi lɛ kɛkpe lɛ. Amɛkɛ enɛɛmɛi kpeɔ titri yɛ skul, he ni esa akɛ amɛdamɔ tsofai, zigarɛt shɛremɔ, daa ni wa numɔ, yakayaka wiemɔ, ajwamaŋbɔɔ, shishiumɔ, atuatsemɔ mumɔ, apasa jamɔ, maŋhedɔɔ, naanyobɔɔ fɔŋ, apasa tsɔɔmɔi tamɔ sutsakemɔ kɛ nibii krokomɛi ni naa mɛi anɔ hewalɛ waa lɛ anaa yɛ lɛ. Ebiɔ obalanyo loo obalayoo Kristofonyo ni “awo Iɛ ŋoo jogbaŋŋ” dani enyɛ edamɔ shi akɛ emuuyeli mli hiɛlɔ ni he tse yɛ kaai nɛɛ fɛɛ naa.
18. (a) Mɛɛ sanebimɔi fɔlɔi ni ji Kristofoi aaafee jogbaŋŋ kɛ amɛsusu he? (b) Mɛni ajieɔ yi ahaa fɔfɔi ni naa akɛ ewa kɛha amɛ akɛ amɛaaye amɛbua amɛbii lɛ?
18 No hewɔ lɛ, fɔlɔi ni ji Kristofoi, nyɛsusua shihilɛ ni nyɛwekui lɛ yɔɔ mli lɛ he jogbaŋŋ. Ani emlibii lɛ fɛɛ miiya amɛhiɛ yɛ mumɔŋ? Ani nyɛtsĩ je lɛ sui gbohii lɛ anaa koni ekana hewalɛ yɛ nyɛbii lɛ anɔ? Ani nyɛle nɔ ni amɛfeɔ kɛ nɔ ni amɛsusuɔ kɛ bɔ ni amɛnuɔ anɔkwale jamɔ he amɛhaa lɛ jogbaŋŋ? Ani amɛhiɔ nibii ni yɔɔ je lɛŋ ni he tseee lɛ kwraa aloo oshara yɛ akɛ amɛbaanyɛ amɛŋmɛɛ amɛhe amɛha nɛkɛ nibii nɛɛ? (Amos 5:14, 15) Ákɛ fɔlɔi lɛ, kɛji akɛ nyɛbɛŋkɛɛɛ nyɛbii lɛ bɔ ni sa ni nyɛaanyɛ nyɛye nyɛbua amɛ, aloo nyɛnaa akɛ efeemɔ wa lɛ, mɛni hewɔ nyɛkɛfɔɔɔ Yehowa hiɛ yɛ sɔlemɔ ni mli wa mli? Yɛ anɔkwale mli lɛ eeeye ebua nyɛ ni nyɛye gbɛtsii nii nɛɛ hɔ kunim.—1 Yohane 5:14.
19. Mɛni nibii nɛkɛ esa akɛ fɔlɔi ni ji Kristofoi akɛɛ dabi yɛ he lɛ?
19 Akɛ fɔlɔi Kristofoi lɛ, mɛɛ nɔkwɛmɔ nɔ ji nɔ ni nyɛfeɔ? Ani nyɛkɛ shiŋŋfeemɔ kɛɔ fufeemɔ, daanumɔ babaoo kɛ jeŋba shara kɛ muji nitsumɔi ni afeɔ kɛbɔleɔ shi lɛ akɛ dabi? Ani nyɛkɛɔ nyɔɔŋnihamɔ kɛ juu bibii kɛ je lɛŋ bii ayakayaka wiemɔ kɛ fɛoyelii lɛ akɛ dabi lo? Ani ale nyɛ yɛ nitsumɔ he kɛ akutsoŋ he ni nyɛyɔɔ lɛ akɛ mɛi ni he tse, mɛi ni yeɔ anɔkwale, mɛi ni ja? Ni nyɛaakɛɛ dabi yɛ be ni sa mli lɛ he miihia kɛba “shikpɔŋ lɛ nɔ ŋoo” ni nyɛaatsɔmɔ.
Nɔ Ni Hiɔ Shi Daa Kɛ Anɔkwayeli
20. Akɛ ŋoo tsu nii yɛ Yehowa jamɔ mli yɛ blema Israel lɛ mɛɛ gbɛ nɔ?
20 Ŋwanejee ko bɛ he akɛ akɛni ŋoo damɔ shi kɛha fitemɔ loo kpɔtɔmɔ ni bɛ hewɔ lɛ, akɛtsu nii yɛ jamɔ ni Israel kɛha Yehowa lɛ mli. Akɛ nɔkwɛmɔ nɔ lɛ, esa ákɛ akɛ ŋoo awo afɔlei fɛɛ ni ashaa yɛ afɔleshaa latɛ lɛ nɔ lɛ mli. Awie yɛ Mla ni atsɔ Mose nɔ akɛha lɛ mli akɛ: “Ni oniyenii afɔlei fɛɛ ni okɛbaake lɛ, wo mli ŋoo, ni o-Nyɔŋmɔ lɛ kpaŋmɔ ŋoo lɛ akakpa yɛ oniyenii afɔle lɛ mli; ofɔlei fɛɛ ni okɛbaake lɛ, ŋoo afata he.” Ni abu “ŋoo kpaŋmɔ” lɛ akɛ eka amɛnɔ aloo efimɔɔ amɛ.—3 Mose 2:13; 4 Mose 18:19; 2 Kronika 13:4, 5.
21. Akɛ “shikpɔŋ lɛ nɔ ŋoo” lɛ, mɛni ataoɔ yɛ Yehowa tsuji adɛŋ ŋmɛnɛ?
21 Akɛ odasefoi kɛha Yehowa lɛ, etsuji ni yɔɔ shikpɔŋ nɔ ŋmɛnɛ lɛ ji “shikpɔŋ lɛ nɔ ŋoo.” Enɛ biɔ ni amɛfee mɛi ni anyɛŋ afite am, anɔkwafoi kɛ anɔkwayelɔi. Esa akɛ amɛkɛ ekãa awo Nyɔŋmɔ mumɔ krɔŋkrɔŋ lɛ yibii lɛ—suɔmɔ, miishɛɛ, toiŋjɔlɛ, tsuishiŋmɛɛ mlihilɛ, ejurɔfeemɔ, hemɔkɛyeli, mlijɔlɛ kɛ henɔyeli (Galatabi 5:22, 23) Mumɔ lɛ yibii lɛ ji mumɔŋ sui ni tamɔ ŋoo lɛ ajɛɛhe. Shi yɛ anɔkwale ni eji akɛ mɛi komɛi esɔmɔ Yehowa afii pii lɛ jeee nɔ ni maa nɔ mi akɛ amɛnyɛŋ amɛgbee shi. (1 Korintobii 10:12) Yesu diɛŋtsɛ bɔ wɔ kɔkɔ yɛ enɛ he.
22. Mɛni ji nɔ ni Mateo 5:13 naagbee fa lɛ tsɔɔ?
22 Kaimɔ akɛ beni Yesu kɛɛ akɛ, “shikpɔŋ lɛ nɔ ŋoo ji nyɛ” lɛ pɛ kɛkɛ ni ekɛfata he akɛ: “Shi kɛji ŋoo naanu gbo lɛ, mɛni akɛaawo lɛ ŋoo dɔŋŋ? Ehiii haaa nɔ ko akɛ ja atsi ashwie, ni gbɔmɛi naanaa nɔ.” (Mateo 5:13) Akɛ nibii krokomɛi futu ŋoo ni ayeɔ yɛ be mli ni Yesu yɔɔ shikpɔŋ nɔ lɛ. No hewɔ lɛ kɛji akɛ nugbɔnɛmɔ fɔ ŋoo diɛŋtsɛ lɛ eshwie aloo yɛ gbɛ kroko ko nɔ lɛ, atsiɔ nɔ ni eshwɛ lɛ ashwieɔ, aloo akɛshwieɔ gbɛjegbɛi anɔ koni mɛi ni hoɔ lɛ anaanaa nɔ. Kɛ ahaaa ŋoo lɛ ahi shihilɛi komɛi ni hi ashishi lɛ, ebaanyɛ efee nɔ ni sɛɛnamɔ bɛ he yɛ gbɛ ni waaa nɔ.
23. Akɛ Yehowa Odasefoi lɛ, mɛni ji nɔ ni esa akɛ efee wɔjwɛŋmɔ yɛ Yesu wiemɔi, “Shikpɔŋ lɛ nɔ ŋoo ji nyɛ” lɛ he?
23 Akɛ Yehowa kɛ e-Bi Yesu Kristo tsuji anɔkwafoi lɛ, nyɛhaa wɔkwɛɔ jogbaŋŋ ni ‘wɔnaanu akagbo,’ aloo wɔlaaje wɔ ŋoo sui lɛ. Shi moŋ nyɛhaa wɔboa mɔdɛŋ fɛɛ ni wɔɔnyɛ ni wɔwo Nyɔŋmɔ mumɔ lɛ yibii lɛ. Eba akɛ mlijɔlɛ aaahi wɔwiemɔ mli daa, ni wɔkɛ ekãa ajaje Maŋtsɛyeli lɛ he sane lɛ ni wɔkɛye wɔbua ni abaa mɛi awala yi. Wɔkaha je ni ekpɔtɔ nɛɛ nine miishɛ wɔnɔ kɔkɔɔkɔ, shi moŋ eba akɛ wɔɔha Yesu wiemɔi; “shikpɔŋ lɛ nɔ ŋoo ji nyɛ” lɛ he shishinumɔ ni mli kwɔ kɛ gbɛnaa nii ni fata he lɛ ahi wɔjwɛŋmɔ mli.a
[Shishigbɛ niŋmaa]
a Ajie kɛjɛ May 15, 1985 Blɔfo Watchtower lɛ mli.
Kaa Ojwɛŋmɔ Okwɛ
◻ Te wɔɔfee tɛŋŋ wɔha ‘wɔwiemɔi afee nɔ’ ni ŋoo yɔɔ mli’ lɛ?
◻ Mɛni hewɔ ehe hiaa akɛ ‘ŋoo aaahi Kristofoi ami’ lɛ?
◻ Yesu sɛɛnyiɛlɔi Iɛ ji “shikpɔŋ Iɛ nɔ ŋoo” yɛ mɛɛ gbɛ nɔ?
◻ Mɛni ji nibii komɛi ni Kristofoi ni “awo amɛ ŋoo jogbaŋŋ” Iɛ kpooɔ?
◻ Yɛ Mateo 5:13 hewɔ lɛ, mɛni esa akɛ efee Yehowa tsuji ni yɔɔ wolo mli ŋmɛnɛ lɛ ajwɛŋmɔ?
[Mfoniri ni yɔɔ baafa 25]
Daniel kase bɔ ni eeefee ekɛɛ dabi, yɛ be mli ni eji obalanyo fioo
DECEMBER Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)