Teemɔŋ Sane ni Esaaa akɛ Kristofoi Kɛtoɔ!
“Faŋŋ miwieɔ yɛ mitsɔɔ je lɛ. . . . Miwieee nɔ ko nɔ ko yɛ dujiaŋ.”—YOHANE 18:20.
1, 2. Te bɔ ni akɛ Hela wiemɔ my·steʹri·on tsu nii ahã yɛ Ŋmalɛi lɛ amli lɛ he hiaa hã tɛŋŋ?
ATSƆƆ Hela wiemɔ my·steʹri·on shishi yɛ New World Translation of the Holy Scriptures lɛ mli shii 25 akɛ “teemɔŋ sane krɔŋkrɔŋ,” kɛ shii 3 akɛ “teemɔŋ sane.” Teemɔŋ sane ni atsɛɔ lɛ krɔŋkrɔŋ lɛ baafee nɔ ni he hiaa waa diɛŋtsɛ! Esa akɛ mɔ fɛɛ mɔ ni aaaná hegbɛ akɛ eeená teemɔŋ sane ni tamɔ nɛkɛ he nilee lɛ anu he akɛ akɛ woo kpele diɛŋtsɛ eha lɛ, ejaakɛ abu lɛ akɛ mɔ ni sa akɛ ekɛ jeŋ muu fɛɛ Nyɔŋmɔ ni Nɔ Kwɔ Fe Fɛɛ lɛ leɔ teemɔŋ sane.
2 Expository Dictionary of Old and New Testament Words ni Vine fee lɛ mãa nɔ mi akɛ yɛ shihilɛi pii amli lɛ, “teemɔŋ sane krɔŋkrɔŋ” ji shishitsɔɔmɔ ni sa jogbaŋŋ fe “teemɔŋ sane.” Ewieɔ my·steʹri·on he akɛ: “Yɛ [Kristofoi a-Hela Ŋmalɛi] lɛ amli lɛ, etsɔɔɔ naakpɛɛ nɔ ko ni anuuu shishi (taakɛ eji yɛ Blɔ[fo] wiemɔ lɛ gbɛfaŋ lɛ), shi moŋ nɔ ko ni, akɛni ŋɛlɛ nɔ ni eyɔɔ lɛ nɔ kwɔ fe bɔ ni akɛ adesai adebɔɔ naa nyɛmɔ baanyɛ anu shishi hewɔ lɛ, abaanyɛ ahã ale kɛtsɔ Ŋwɛi kpojiemɔ pɛ nɔ, ni ahãa aleɔ yɛ Nyɔŋmɔ gbɛ nɔ, kɛ be ni ehala pɛ mli, ni ehãa mɛi ni E-Mumɔ lɛ ehã amɛ sɛɛyoomɔ lɛ pɛ leɔ enɛ. Yɛ daa gbi shishinumɔ naa lɛ, teemɔŋ sane tsɔɔ nilee ni atsĩmɔ nɔ; kɛ́ akɛtsu nii yɛ Ŋmalɛ mli lɛ, etsɔɔ anɔkwale ni ajie lɛ kpo atsɔɔ. No hewɔ lɛ, wiemɔi ni akɛtsuɔ nii yɛ sane nɛɛ he titri ji ‘ahã ale,’ ‘ahã eje kpo faŋŋ,’ ‘ajie lɛ kpo atsɔɔ,’ ‘ashiɛ,’ ‘anu shishi,’ ‘heŋmɛɛmɔ kɛhamɔ.’ ”
3. Esoro Kristofoi asafo ni hi shi yɛ klɛŋklɛŋ afii oha lɛ mli lɛ yɛ teemɔŋ jamɔ kui komɛi ahe yɛ mɛɛ gbɛ nɔ?
3 Nɛkɛ saji amlitsɔɔmɔ nɛɛ mãa sɔrɔtofeemɔ kpele ni kã teemɔŋ jamɔ kui ni amɛ nifeemɔi yɔɔ naakpɛɛ, ni shwere yɛ klɛŋklɛŋ afii oha lɛ mli lɛ kɛ Kristofoi asafo ni ato shishi ehee lɛ teŋ. Yɛ be mli ni ahãa mɛi ni akpɛlɛɔ amɛnɔ awoɔ teemɔŋ jamɔ kui amli lɛ fimɔɔ amɛhe kɛtsɔɔ kita ni amɛkãa akɛ amɛbaafee dioo ni amɛkɛbu jamɔ mli tsɔɔmɔi ahe lɛ nɔ lɛ, akɛ Kristofoi wooo naatsii ni tamɔ nakai shishi kɔkɔɔkɔ. Eji anɔkwale akɛ bɔfo Paulo wie “Nyɔŋmɔ nilee ni aŋɔtee yɛ teemɔŋ sane mli” lɛ he, ni etsɛ lɛ akɛ “nilee ni aŋɔtee,” ni tsɔɔ akɛ, aŋɔtee “je nɛɛŋ onukpai lɛ.” Akɛteeko Kristofoi ni ajie lɛ kpo atsɔɔ amɛ kɛtsɔ Nyɔŋmɔ mumɔ lɛ nɔ bɔni afee ni amɛha eje kpo faŋŋ lɛ.—1 Korintobii 2:7-12; okɛto Abɛi 1:20 he.
Atsɔɔ Nɔ ni Ji ‘Teemɔŋ Sane Krɔŋkrɔŋ’ Lɛ
4. Namɔ nɔ “teemɔŋ sane krɔŋkrɔŋ” lɛ damɔ, ni yɛ mɛɛ gbɛ nɔ?
4 Yehowa ‘teemɔŋ sane krɔŋkrɔŋ’ lɛ kɔɔ Yesu Kristo he titri. Paulo ŋma akɛ: “[Yehowa] eha wɔle nɔ ni esumɔɔ lɛ mli teemɔŋ sane lɛ bɔ ni sa ehiɛ, ni eto eyiŋ yɛ emli eha bei lɛ ayinɔ lɛ gbɛjianɔtoo, koni eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ, yɛ emli.” (Efesobii 1:9, 10) Paulo wie bɔ ni ‘teemɔŋ sane krɔŋkrɔŋ’ lɛ su ji hã lɛ he jogbaŋŋ po beni etsɔɔ bɔ ni ehe hiaa ni aná “Nyɔŋmɔ teemɔŋ sane krɔŋkrɔŋ, ni ji, Kristo lɛ he anɔkwa nilee lɛ.”—Kolosebii 2:2, NW.
5. Mɛɛ nibii “teemɔŋ sane krɔŋkrɔŋ” lɛ kɔɔ he?
5 Shi kɛlɛ, ekɔɔ nibii babaoo he, ejaakɛ ‘teemɔŋ sane krɔŋkrɔŋ’ lɛ ji teemɔŋ sane ko ni hiɛ sui babaoo. Ejeee yɔsemɔ ni ayɔseɔ Yesu akɛ lɛ ji shiwoo Seshi loo Mesia lɛ kɛkɛ; nɔ ni fata he hu ji gbɛhe ni ahã lɛ ni etsuɔ he nii yɛ Nyɔŋmɔ yiŋtoo mli lɛ. Ekɔɔ ŋwɛi nɔyeli, ni ji Nyɔŋmɔ Mesia Maŋtsɛyeli lɛ he, taakɛ Yesu tsɔɔ mli faŋŋ beni ekɛɛ ekaselɔi lɛ akɛ: “Ejaakɛ nyɛ lɛ aŋɔhã nyɛ akɛ nyɛnu ŋwɛi maŋtsɛyeli lɛ he teemɔŋ saji krɔŋkrɔŋi lɛ ashishi, shi nakai gbɔmɛi lɛ, aŋɔhãko amɛ” lɛ.—Mateo 13:11, NW.
6. (a) Mɛni hewɔ eja gbɛ akɛ aaakɛɛ akɛ ‘teemɔŋ sane krɔŋkrɔŋ’ lɛ, “aŋɔtee kɛjɛ naanɔ beebe lɛ”? (b) Ajie lɛ kpo fiofio yɛ mɛɛ gbɛ nɔ?
6 Be kakadaŋŋ baaho yɛ be ni atsĩ Nyɔŋmɔ yiŋtoo tã klɛŋklɛŋ akɛ ekɛ nɔdaamɔ nɔ baahã kɛha Mesia Maŋtsɛyeli lɛ, kɛ be mli ni ‘aaagbe teemɔŋ sane krɔŋkrɔŋ lɛ naa’ lɛ teŋ. (Kpojiemɔ 10:7; 1 Mose 3:15) Enaagbee ni akɛbaa lɛ baaba mli yɛ be mli ni atoɔ Maŋtsɛyeli lɛ amãa shi lɛ, taakɛ anaa kɛ́ akɛ Kpojiemɔ 10:7 to 11:15 he lɛ. Yɛ anɔkwale mli lɛ, aaafee afii 4,000 ho kɛjɛ be mli ni akɛ Maŋtsɛyeli lɛ he klɛŋklɛŋ shiwoo hã yɛ Eden, kɛyashi be mli ni Mɔ ni Awo Lɛ Maŋtsɛ lɛ pue yɛ afi 29 Ŋ.B. lɛ. Afii 1,885 kroko hu ho dani ato Maŋtsɛyeli lɛ amã shi yɛ ŋwɛi yɛ 1914. Enɛ hewɔ lɛ, ajie ‘teemɔŋ sane krɔŋkrɔŋ’ lɛ kpo fiofio yɛ be sɛɛjɛkɛmɔ ni miihe ashɛ afii 6,000 mli. (Kwɛmɔ baafa 16.) Lɛlɛŋ, Paulo sane ja beni ewie “teemɔŋ sane ni aŋɔtee kɛjɛ naanɔ beebe lɛ kpojiemɔ . . . , nɔ ni agbɛnɛ ajie atsɔɔ faŋŋ” lɛ he lɛ.—Romabii 16:25-27; Efesobii 3:4-11.
7. Mɛni hewɔ wɔbaanyɛ wɔná tsulɔ anɔkwafo kɛ nilelɔ lɛ mli hekɛnɔfɔɔ kwraa lɛ?
7 Ákɛ mɔ ni tamɔɔɔ adesai, ni amɛwala sɛɛkɛlɛ ji be kukuoo pɛ lɛ, Yehowa nuuu he akɛ be sɛɛkɛlɛ miinyɛ enɔ koni ejie eteemɔŋ saji akpo etsɔɔ dani ebe ashɛ. Esa akɛ nɛkɛ anɔkwa sane nɛɛ atsĩ wɔ gbɛ ni wɔkafee mɛi ni bɛ tsuishitoo, kɛji anyɛŋ atsɔɔ Biblia mli sanebimɔi komɛi amli ahã wɔ amrɔ nɔŋŋ bɔ ni wɔtsui aaanyɔ wɔmli lɛ. Heshibaa ni tsulɔ anɔkwafo kɛ nilelɔ kuu, ní akɛ nitsumɔ ewo edɛŋ akɛ ehã Kristofoi awe lɛ niyenii yɛ be ni sa mli lɛ yɔɔ lɛ hewɔ lɛ, ehãaa ekɛ henɔwomɔ aka akɛ eeetsɔɔ nɔ ni baaba wɔsɛɛ, ni eeeka eyiŋ ewie nibii ni shishinumɔ bɛ faŋŋ lolo lɛ ahe. Tsulɔ kuu lɛ bɔɔ mɔdɛŋ akɛ eeekwa keketeefeemɔ. Eyɛ heshibaa babaoo bɔ ni aaaha ekpɛlɛ nɔ akɛ kɛbashi amrɔ nɛɛ, enyɛŋ eha sanebimɔ fɛɛ sanebimɔ hetoo, yɛ Abɛi 4:18 ni yɔɔ ejwɛŋmɔ mli jogbaŋŋ lɛ hewɔ. Shi kwɛ bɔ ni eyɔɔ miishɛɛ akɛ aaale akɛ Yehowa baaya nɔ ejie eteemɔŋ saji ni kɔɔ eyiŋtoi ahe lɛ kpo etsɔɔ, yɛ lɛ diɛŋtsɛ ebe ni eto mli, kɛ lɛ diɛŋtsɛ egbɛ nɔ hu! Ekaba akɛ wɔɔtsɔmɔ mɛi ni bɛ tsuishitoo yɛ Yehowa gbɛjianɔtoo gbɛfaŋ, ni wɔbɔ mɔdɛŋ ni wɔshá foi kɛnyiɛ teemɔŋ saji a-Kpojielɔ lɛ hiɛ yɛ gbɛ ni nilee bɛ mli nɔ. Kwɛ bɔ ni ewoɔ mɔ hewalɛ waa akɛ wɔɔle akɛ gbɛjianɔtoo ni Yehowa kɛtsuɔ nii ŋmɛnɛ lɛ efeee nakai! Eji anɔkwafo kɛ nilelɔ fɛɛ.—Mateo 24:45; 1 Korintobii 4:6.
Esa akɛ Agba Teemɔŋ Sane ni Ajie lɛ Kpo lɛ Atsɔɔ!
8. Te wɔfeɔ tɛŋŋ wɔleɔ akɛ abaahã ale ‘teemɔŋ sane krɔŋkrɔŋ’ lɛ?
8 Yehowa ejieee ‘eteemɔŋ sane krɔŋkrɔŋ’ lɛ kpo etsɔɔɔ Kristofoi akɛ amɛya nɔ amɛkɛto. Esa akɛ ahã ale, yɛ shishitoo mla ni Yesu kɛfɔ̃ shi eha esɛɛnyiɛlɔi fɛɛ—shi jeee kɛha osɔfoi fioo komɛi pɛ lɛ kɛ gbeekpamɔ naa, akɛ: “Nyɛ ji je lɛŋ la lɛ. Maŋ ni mã gɔŋ nɔ lɛ, anyɛŋ aŋɔtee. Asaŋ asuuu kane amãaa tsese shishi: shi moŋ akɛmãa kanetso nɔ, ni etsoɔ ehãa mɛi ni yɔɔ shia lɛ fɛɛ. Nakai nyɛhãa nyɛla atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.”—Mateo 5:14-16; 28:19, 20.
9. Mɛni mãa nɔ mi akɛ Yesu jeee maŋ hiɛ atuatselɔ, taakɛ mɛi pii wieɔ lɛ?
9 Yesu ehiɛɛɛ maŋ hiɛ atuatsemɔ jwɛŋmɔ akɛ ebaato teemɔŋ kuu ni ji esɛɛnyiɛlɔi ashishi koni ekɛtsu teemɔŋ yiŋtoi komɛi ahe nii. Robert M. Grant ŋma yɛ wiemɔi ni afii ohai enyɔ lɛ mli hemɔkɛyeli hefãlɔ Justin Martyr kɛfã mra be Kristofoi ahe lɛ he yɛ wolo ni gbɛi ji Early Christianity and Society lɛ mli akɛ: “Eji Kristofoi ji maŋ hiɛ atuatselɔi kulɛ, amɛbaatee amɛhe koni amɛkɛtsu oti ni mã amɛhiɛ lɛ he nii.” Shi te Kristofoi aaafee tɛŋŋ ‘amɛtee amɛhe,’ ní yɛ nakai beaŋ nɔŋŋ lɛ, amɛfee tamɔ “maŋ ni mã gɔŋ nɔ” hu? Esaaa ni amɛkaa akɛ amɛkɛ amɛ kane lɛ aaawo tsese shishi! No hewɔ lɛ, nɔyeli lɛ bɛ nɔ ko ni eeedamɔ nɔ eshe gbeyei yɛ amɛnitsumɔ hewɔ. Niŋmalɔ nɛɛ tee nɔ ewie amɛhe akɛ amɛji “maŋtsɛ wulu lɛ nanemɛi kpakpai fe fɛɛ yɛ toiŋjɔlɛ kɛ gbɛjianɔtoo kpakpa namɔ mli.”
10. Mɛni hewɔ esaaa ni Kristofoi kɛ mɛi ni amɛji lɛ teɔ lɛ?
10 Yesu taooo ni ekaselɔi lɛ kɛ mɛi ni amɛji lɛ atee akɛ mɛi ni atsɛɔ amɛ jamɔ kuu fã lɛ eko mli bii. (Bɔfoi lɛ Asaji 24:14; 28:22) Kɛji wɔhaaa wɔla atso ŋmɛnɛ lɛ, no lɛ nakai feemɔ esaŋ Kristo kɛ e-Tsɛ, mɔ ni ji teemɔŋ saji a-Kpojielɔ lɛ fɛɛ hiɛ, ni no haŋ wɔ hu wɔna miishɛɛ.
11, 12. (a) Mɛni hewɔ Yehowa sumɔɔ ni mɛi ale Kristojamɔ lɛ? (b) Yesu fee nɔkwɛmɔ nɔ kpakpa yɛ mɛɛ gbɛ nɔ?
11 Yehowa “[sumɔɔɔ] akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9; Ezekiel 18:23; 33:11; Bɔfoi lɛ Asaji 17:30) Nɔdaamɔ nɔ kɛha adesai ni eshwa amɛhe lɛ ahe eshai ni akɛaake amɛ ji Yesu Kristo, mɔ ni kɛ ehe hã akɛ kpɔmɔ nɔ kɛha mɛi fɛɛ—jeee kɛha mɛi fioo pɛ lɛ—kpɔmɔ afɔleshaa lɛ mli hemɔkɛyeli namɔ, koni “mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Ehe miihia ni aye abua gbɔmɛi ni amɛto gbɛjianɔ ni he hiaa ni baahã amɛfee mɛi ni sa akɛ akojoɔ amɛ akɛ gwantɛŋi, shi jeee abotiai, yɛ kojomɔ ni baa lɛ mli.—Mateo 25:31-46.
12 Esaaa ákɛ akɛ anɔkwa Kristojamɔ teeɔ; esa akɛ ahã ale yɛ gbɛ fɛɛ gbɛ ni sa ni aaanyɛ nɔ. Yesu diɛŋtsɛ fee nɔkwɛmɔ nɔ ni sa efɔ̃ shi. Beni osɔfonukpa lɛ bi lɛ ekaselɔi lɛ kɛ etsɔɔmɔ lɛ he saji lɛ, ekɛɛ: “Faŋŋ miwieɔ yɛ mitsɔɔ je lɛ. Daa nɛɛ mitsɔɔ nii yɛ kpeehei lɛ kɛ sɔlemɔwe lɛ, he ni Yudafoi lɛ fɛɛ kpeɔ yɛ lɛ, ni miwieee nɔ ko nɔ ko yɛ dujiaŋ.” (Yohane 18:19, 20) Yɛ okadi ni ato afɔ̃ shi nɛɛ hewɔ lɛ, mɛɛ Nyɔŋmɔ gbeyeishelɔ baaka akɛ eeehã nɔ ni Nyɔŋmɔ ejaje akɛ esa akɛ ajie lɛ kpo faŋŋ lɛ ahi teemɔŋ? Namɔ baaka akɛ ekɛ “nilee” ni kɛ mɔ yaa naanɔ wala mli “lɛ naa samfele” lɛ aaato? Nakai feemɔ baahã efee tamɔ jamɔ mli osatofoi ni hi shi yɛ klɛŋklɛŋ afii oha lɛ mli lɛ.—Luka 11:52; Yohane 17:3.
13. Mɛni hewɔ esa akɛ wɔkɛ hegbɛ fɛɛ hegbɛ ni wɔnáa lɛ ashiɛ lɛ?
13 Ekaba akɛ mɔ ko kwraa baanyɛ akɛɛ akɛ, ákɛ Yehowa Odasefoi lɛ, wɔkɛ Nyɔŋmɔ Maŋtsɛyeli lɛ he shɛɛ sane lɛ eto akɛ teemɔŋ sane! Kɛ́ akpɛlɛɔ sane lɛ nɔ jio akpɛlɛɛɛ nɔ jio, esa akɛ gbɔmɛi ale akɛ ashiɛ sane lɛ atsɔɔ. (Okɛto Ezekiel 2:5; 33:33 he.) No hewɔ lɛ, nyɛhaa wɔkɛ hegbɛ fɛɛ hegbɛ ni wɔɔná lɛ atsu nii ni wɔkɛwie anɔkwale lɛ he shɛɛ sane lɛ wɔtsɔɔ mɛi fɛɛ, yɛ he fɛɛ he ni wɔkɛ amɛ aaakpe yɛ.
Kpoji ni Akɛaatsɛrɛ Satan Kadaai Amli
14. Mɛni hewɔ esaaa ni wɔshashaoɔ shi akɛ wɔɔhã wɔ jamɔ mli nifeemɔi afee faŋŋ lɛ?
14 Yehowa Odasefoi miitsɔmɔ gbɔmɛi ni adafitswaa mli saji gbalaa jwɛŋmɔ kɛyaa amɛnɔ waa yɛ hei babaoo. Akɛni enɛ tamɔ nɔ ni ba mra be mli Kristofoi lɛ anɔ lɛ hewɔ lɛ, bei pii lɛ, awieɔ amɛhe wiemɔ fɔŋ ni akɛ amɛ fataa jamɔ kui ni yiŋkɔshikɔshi-feemɔ yɔɔ amɛnifeemɔi ahe lɛ kɛ teemɔŋ jamɔ kui ahe, akɛ kuu kome. (Bɔfoi lɛ Asaji 28:22) Ani bɔ ni wɔshiɛɔ yɛ faŋŋ mli lɛ hãa wɔfeɔ mɛi ni abaanyɛ atutua wɔ be fɛɛ be? Eka shi faŋŋ akɛ efeŋ nɔ ni nilee yɔɔ mli, ni ekɛ ŋaawoo ni Yesu kɛha lɛ hu kpaŋ gbee, akɛ wɔkɛ wɔhe aaawo naataomɔi ni he ehiaaa mli. (Abɛi 26:17; Mateo 10:16) Shi kɛlɛ, esaaa akɛ akɛ Maŋtsɛyeli shiɛmɔ nitsumɔ ni sɛɛnamɔ yɔɔ he, kɛ gbɔmɛi ni ayeɔ abuaa amɛ koni amɛshihilɛ aya hiɛ lɛ toɔ. Ewoɔ Yehowa hiɛ nyam, ewoɔ enɔ gojoo, ni egbalaa gbɔmɛi ajwɛŋmɔ kɛbaa lɛ kɛ e-Maŋtsɛyeli ni eto ema shi lɛ nɔ. Bɔ ni akɛ miishɛɛ hereɔ Biblia mli anɔkwale lɛ nɔ ahãa yɛ bei nɛɛ amli, yɛ Europa Bokagbɛ kɛ Afrika hei komɛi lɛ fã jɛ bɔ ni agbɛnɛ abaanyɛ ashiɛ anɔkwale lɛ yɛ faŋŋ mli yɛ nɛkɛ hei nɛɛ lɛ hewɔ.
15, 16. (a) Bɔ ni wɔfeɔ wɔnii yɛ faŋŋ mli, kɛ wɔmumɔŋ shweremɔ lɛ tsuɔ mɛɛ yiŋtoi ahe nii, shi ani esa akɛ enɛ ahã wɔhao wɔhe? (b) Mɛni hewɔ Yehowa kɛ kpoji woɔ Satan kadaai amli lɛ?
15 Eji anɔkwale akɛ bɔ ni Yehowa Odasefoi shiɛɔ yɛ faŋŋ mli, kɛ mumɔŋ paradeiso ni amɛnaa mli ŋɔɔmɔ kɛ amɛ shweremɔ—yɛ amɛyifalɛ kɛ heloonaa nibii fɛɛ gbɛfaŋ lɛ—ji nɔ ko ni sa kadimɔ waa diɛŋtsɛ. Eyɛ mli akɛ egbalaa mɛi ni yɔɔ jalɛ tsuii lɛ kɛbaa moŋ, shi ekolɛ otii nɛɛ teeɔ shitee-kɛ-wolɔi amlifu shi. (2 Korintobii 2:14-17) Yɛ anɔkwale mli lɛ, yɛ naagbee lɛ, ekolɛ enɛ baalaka Satan tai lɛ koni amɛte shi ni amɛbatutua Nyɔŋmɔ webii lɛ.
16 Ani esa akɛ enɛ afee sane ni wɔkɛaahao wɔhe? Jeee yɛ Yehowa gbalɛ ni wɔnaa yɛ Ezekiel yitso 38 lɛ naa. Agba afɔ̃ shi akɛ Gog ni jɛ Magog, ni ji gbɛi ni akɛtsɛɔ Satan Abonsam kɛjɛ be mli ni aba lɛ shi kɛba shikpɔŋ nɛɛ niiaŋ, beni ato Maŋtsɛyeli lɛ ama shi yɛ 1914 lɛ sɛɛ lɛ, baanyiɛ tutuamɔ ni akɛaaba Nyɔŋmɔ webii anɔ lɛ hiɛ. (Kpojiemɔ 12:7-9) Yehowa kɛɔ Gog akɛ: “Ni oookɛɛ: ‘Mafã kɛaatee shikpɔŋ ni naa kã lɛ nɔ, mayatua mɛi ni yɔɔ kpoo, ni amɛhiɔ shi shweshweeshwe, ni amɛ fɛɛ amɛhiɔ shi ni amɛbɛ gbogbo, ni amɛbɛ agbó sɛɛ adabaŋi loo agbói hu lɛ!’ Ni oyaha nii, ni otswa ojo, ni owó onine nɔ oshi amaŋfɔ̃i ni agbɛnɛ ahiɔ mli, kɛ maŋ ni abua naa kɛjɛ jeŋmaji lɛ amli, ní amɛná kooloi kɛ nibii pii, ni amɛhiɔ shikpɔŋ laŋmɔ lɛ nɔ lɛ.” (Ezekiel 38:11, 12) Shi, kuku 4 lɛ tsɔɔ akɛ, ehe ehiaaa ni Nyɔŋmɔ webii ashe tutuamɔ nɛɛ gbeyei, ejaakɛ Yehowa ji mɔ ni hãa ebaa. Shi mɛni hewɔ Nyɔŋmɔ ŋmɛɔ gbɛ—hɛɛ, eteeɔ—tutuamɔ ni akɛbaa ewebii anɔ lɛ shi po lɛ? Wɔkaneɔ hetoo ni Yehowa kɛhãa, yɛ kuku 23 akɛ: “Mafee mihe agbo, ni mafee mihe krɔŋkrɔŋ, ni mahã ale mi yɛ jeŋmaji pii ahiɛ, ni amɛaaná amɛle akɛ mi ji Yehowa lɛ.”
17. Te esa akɛ wɔbu Gog tutuamɔ ni ekɛbaaba lɛ wɔha tɛŋŋ?
17 Enɛ hewɔ lɛ, yɛ nɔ najiaŋ ni amɛaashe Gog tutuamɔ lɛ gbeyei lɛ, Yehowa webii kɛ gbɛkpamɔ ni mli wa kwɛɔ nɛkɛ Biblia gbalɛ mlibaa kroko nɛɛ gbɛ. Kwɛ miishɛɛ ni eji akɛ wɔɔle akɛ Yehowa kɛ kpoji miiwo Satan kadaai amli, kɛtsɔ egbɛjianɔtoo ni anaa, ni ehã eshwere, ni ejɔɔ amɛ lɛ nɔ, ni eegbala lɛ kɛ etai lɛ fɛɛ kɛmiiya amɛ nɔ kunimyeli mli!—Ezekiel 38:4.
Eyɛ Faŋŋ Amrɔ Nɛɛ Fe Bei Fɛɛ ni Eho!
18. (a) Mɛni gbɔmɛi babaoo yɔseɔ bianɛ, ni mɛni hewɔ? (b) Bɔ ni ahereɔ Maŋtsɛyeli shiɛmɔ lɛ nɔ ahãa lɛ ji kanyamɔ nɔ̃ kpele yɛ mɛɛ gbɛ nɔ?
18 Yehowa Odasefoi ejie amɛsusumɔi ni damɔ Biblia lɛ nɔ lɛ kpo faŋŋ yɛ ŋmɛnɛŋmɛnɛ beaŋ, eyɛ mli akɛ mɛi komɛi náaa enɛ he miishɛɛ. Amɛkɛ afii nyɔŋmai abɔ ebɔ kɔkɔ yɛ osharai ni yɔɔ tawa shɛremɔ kɛ tsofai fɔji kɛ nitsumɔ mli, kɛ bɔ ni nilee bɛ mli akɛ aaaŋmɛ nɔ fɛɛ nɔ feemɔ gbɛ yɛ gbekɛbii atsɔsemɔ mli, nibii fɔji ni jɛɔ hiɛtserɛjiemɔ ni eyi obɔ kɛ bɔlɛnamɔ mli jeŋba shara kɛ yiwalɛ lɛ mli baa, kɛ osharai ni yɔɔ lá ni agbalaa awoɔ mɔ mli lɛ ahe. Amɛjie nibii ni kɛ amɛhe kpaaa gbee yɛ sutsakemɔ tsɔɔmɔ lɛ mli lɛ hu kpo faŋŋ. Amrɔ nɛɛ, gbɔmɛi babaoo miikɛɛ akɛ, “Yehowa Odasefoi asane ja lɛlɛŋ.” Eji wɔhaaa mɛi ale wɔsusumɔi yɛ faŋŋ mli diɛŋtsɛ kulɛ, amɛnyɛŋ amɛwie wiemɔ ni tamɔ nɛkɛ. Ni kaaku ohiɛ ofɔ̃ anɔkwale nɛɛ nɔ akɛ, yɛ wiemɔ ni amɛwie nɛɛ hewɔ lɛ, amɛmiikɔ shidaamɔ ni tsɔɔ akɛ amɛmiitao amɛkɛɛ akɛ, “Satan, amalelɔ ji bo; Yehowa sane ja lɛlɛŋ.” Mɛɛ kanyamɔ kpele kɛha wɔ nɛ, koni wɔya nɔ wɔnyiɛ Yesu nɔkwɛmɔ nɔ lɛ sɛɛ, ní wɔwie anɔkwale wiemɔ lɛ yɛ faŋŋ mli!—Abɛi 27:11.
19, 20. (a) Mɛɛ faishitswaa Yehowa webii jie lɛ kpo yɛ 1922 mli, ni ani wiemɔ nɛɛ kɔɔ wɔhe lolo? (b) Te esa akɛ wɔbu Yehowa ‘teemɔŋ sane krɔŋkrɔŋ’ lɛ wɔha tɛŋŋ?
19 Yehowa webii kɛ be kakadaŋŋ enu gbɛnaa nii ni kã amɛnɔ yɛ enɛ gbɛfaŋ lɛ shishi. Yɛ kpee ko ni sa kadimɔ waa ni afee yɛ 1922 mli lɛ shishi lɛ, J. F. Rutherford, ní no mli lɛ, lɛ ji Buu Mɔɔ Asafo lɛ sɛinɔtalɔ lɛ, wie ni eta etoibolɔi lɛ atsui mli akɛ: “Nyɛhiɛ akãa shi, nyɛhiɛ ahia nyɛhe nɔ, nyɛfea ekãa, nyɛtsuii asaa. Nyɛfea Nuntsɔ lɛ odasefoi anɔkwafoi. Nyɛyaa nyɛhiɛ kɛyashi be mli ni Babilon he nibii fɛɛ aaatsɔ amaŋfɔ. Nyɛgbɛa sane lɛ nyɛshwãa kɛyaa shɔŋŋ kɛ he fɛɛ he. Esa akɛ je lɛ ale akɛ Yehowa ji Nyɔŋmɔ, ni ákɛ Yesu Kristo ji maŋtsɛmɛi a-Maŋtsɛ kɛ nuntsɔmɛi a-Nuntsɔ. Enɛ ji gbii fɛɛ amli gbi lɛ. Naa, Maŋtsɛ lɛ miiye nɔ! Nyɛ ji enajiaŋdamɔlɔi sanejajelɔi. No hewɔ lɛ, nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.”
20 Kɛ́ wiemɔi nɛɛ ahe miihia waa yɛ 1922 mli lɛ, no lɛ kwɛ bɔ ni amɛhe hiaa waa yɛ afii 75 sɛɛ, beni Kristo kpojiemɔ akɛ Kojolɔ kɛ Oweletɔlɔ lɛ ebɛŋkɛ kpaakpa lɛ! Yehowa Maŋtsɛyeli ni ato amã shi lɛ he shɛɛ sane lɛ kɛ mumɔŋ paradeiso ni Nyɔŋmɔ webii náa mli ŋɔɔmɔ lɛ ji ‘teemɔŋ sane krɔŋkrɔŋ’ ni yɔɔ nyam diɛŋtsɛ fe nɔ ni esa akɛ atsimɔ nɔ. Taakɛ Yesu diɛŋtsɛ jaje yɛ faŋŋ mli diɛŋtsɛ lɛ, esa akɛ kɛtsɔ mumɔ krɔŋkrɔŋ lɛ yelikɛbuamɔ nɔ lɛ, ekaselɔi lɛ atsɔmɔ gbɛhe ni he hiaa waa ni eyɔɔ mli yɛ Yehowa naanɔ yiŋtoo mli lɛ he odasefoi “kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8; Efesobii 3:8-12) Yɛ anɔkwale mli lɛ, akɛ Yehowa, Nyɔŋmɔ ni jieɔ teemɔŋ saji akpo lɛ tsuji lɛ, esaaa ni wɔkɛ teemɔŋ sane nɛɛ toɔ kɛhaa wɔhe!
Te Obaaha Hetoo Tɛŋŋ?
◻ Mɛni ji ‘teemɔŋ sane krɔŋkrɔŋ’ lɛ?
◻ Te wɔfeɔ tɛŋŋ wɔleɔ akɛ esa akɛ ashiɛ atsɔɔ?
◻ Mɛni kɛ tutuamɔ ni Gog kɛaaba Yehowa webii anɔ lɛ baaba, ni te esa akɛ wɔna enɛ wɔha tɛŋŋ?
◻ Mɛni esa akɛ wɔteŋ mɔ fɛɛ mɔ atswa efai shi akɛ ebaafee?
[Akrabatsa ni yɔɔ baafa 16]
‘Teemɔŋ Sane Krɔŋkrɔŋ’ ko ni Ajie lɛ Kpo Fiofio
◻ Afi 4026 D.Ŋ.B. sɛɛ: Nyɔŋmɔ wo shi akɛ ebaatee Seshi ko shi koni ebakpata Satan hiɛ.—1 Mose 3:15
◻ 1943 D.Ŋ.B.: Awo Abraham kpaŋmɔ lɛ mli hewalɛ, ni awo shi akɛ Seshi lɛ baaba kɛtsɔ Abraham nɔ.—1 Mose 12:1-7
◻ 1918 D.Ŋ.B.: Isak fɔmɔ akɛ kpaŋmɔ lɛ gboshiniyelɔ.—1 Mose 17:19; 21:1-5
◻ af. 1761 D.Ŋ.B.: Yehowa mã nɔ mi akɛ Seshi lɛ baaba kɛtsɔ Isak binuu, Yakob nɔ.—1 Mose 28:10-15
◻ 1711 D.Ŋ.B.: Yakob tsɔɔ akɛ Seshi lɛ baaba kɛtsɔ ebinuu Yuda nɔ.—1 Mose 49:10
◻ 1070-1038 D.Ŋ.B.: Maŋtsɛ David baná ele akɛ Seshi lɛ baafee eseshinyo, ni ebaaye nɔ akɛ Maŋtsɛ kɛya naanɔ.—2 Samuel 7:13-16; Lala 89:36, 37
◻ 29-33 Ŋ.B.: Abayoo Yesu akɛ Seshi lɛ, Mesia lɛ, wɔsɛɛ be mli kojolɔ, kɛ Mɔ ni Abaawo lɛ Maŋtsɛ lɛ.—Yohane 1:17; 4:25, 26; Bɔfoi lɛ Asaji 10:42, 43; 2 Korintobii 1:20; 1 Timoteo 3:16
◻ Yesu jie lɛ kpo akɛ ebaaná nanemɛi nɔyelɔi kɛ kojolɔi, ni ákɛ ŋwɛi Maŋtsɛyeli lɛ baaná shishibii yɛ shikpɔŋ nɔ, ni ákɛ, esa akɛ esɛɛnyiɛlɔi fɛɛ afee Maŋtsɛyeli shiɛlɔi.—Mateo 5:3-5; 6:10; 28:19, 20; Luka 10:1-9; 12:32; 22:29, 30; Yohane 10:16; 14:2, 3
◻ Yesu jie lɛ kpo akɛ abaato Maŋtsɛyeli lɛ amã shi yɛ be pɔtɛɛ ko mli, taakɛ nibii ni ba je lɛŋ lɛ mã nɔ mi lɛ.—Mateo 24:3-22; Luka 21:24
◻ 36 Ŋ.B.: Petro baná ele akɛ mɛi ni jeee Yudafoi hu baafee hefatalɔi Maŋtsɛyeli gboshiniyelɔi.—Bɔfoi lɛ Asaji 10:30-48
◻ 55 Ŋ.B.: Paulo tsɔɔ mli akɛ abaatee hefatalɔi Maŋtsɛyeli gboshiniyelɔi lɛ ashi kɛya shihilɛ ni gbele kɛ fitemɔ bɛ mli lɛ mli yɛ be ni Kristo eba lɛ mli.—1 Korintobii 15:51-54
◻ 96 Ŋ.B.: Yesu, ni miiye maŋtsɛ yɛ esɛɛnyiɛlɔi ni afɔ amɛ mu lɛ anɔ momo lɛ, jie lɛ kpo akɛ amɛ naagbee yibɔ baafee 144,000.—Efesobii 5:32; Kolosebii 1:13-20; Kpojiemɔ 1:1; 14:1-3
◻ 1879 Ŋ.B.: Zion’s Watch Tower gbala jwɛŋmɔ kɛtee 1914 nɔ akɛ afi ni sa kadimɔ waa diɛŋtsɛ, yɛ Nyɔŋmɔ ‘teemɔŋ sane krɔŋkrɔŋ’ lɛ he nitsumɔ mli
◻ 1925 Ŋ.B.: Buu-Mɔɔ lɛ tsɔɔ mli akɛ afɔ Maŋtsɛyeli lɛ yɛ afi 1914; esa akɛ ashiɛ Maŋtsɛyeli lɛ he ‘teemɔŋ sane krɔŋkrɔŋ’ lɛ atsɔɔ.—Kpojiemɔ 12:1-5, 10, 17
[Mfonirii ni yɔɔ baafa 15]
Taakɛ amɛ Hiɛnyiɛlɔ, Yesu ji lɛ, Yehowa Odasefoi jajeɔ Yehowa Maŋtsɛyeli lɛ yɛ faŋŋ mli